TIRANË, 10 janar/ATSH/- Ministrja për Europën dhe Punët e Jashtme, Elisa Spiropali, zhvilloi një takim online me anëtarët e Këshillit Koordinues të Diasporës, me fokus bashkëpunimin dhe fuqizimin e rolit të diasporës në sfidat e zhvillimit të vendit.

Spiropali bën të ditur se në takim u fol për tri çështje konkrete: Strategjia Kombëtare e Diasporës 2026-2030, risitë e Ligjit të Ri për Diasporën, si dhe përgatitjet për samitin e 4-t të Diasporës.

Ajo thekson se Strategjia Kombëtare e Diasporës 2026-2030, e ngre në një tjetër nivel ndërveprimin me shqiptarët përtej kufijve.

Kryediplomatja shton se gjatë takimit onlime u diskutua për risitë e Ligjit të Ri për Diasporën, përfshirë krijimin e Qendrave të Kulturës shqiptare në botë, fuqizimin e Agjencisë Kombëtare për Diasporën dhe shtimin e numrit të anëtarëve të Këshillit Koordinues të Diasporës.

Gjithashtu, shton ministrja Spiropali, u diakutua edhe për përgatitjet për samitin IV të Diasporës që do të mbahet në Tiranë në datat 14 dhe 15 prill, si një platformë konkrete e bashkëpunimit.

The post Spiropali: Në prill mbahet Samiti IV i Diasporës appeared first on Agjencia Telegrafike Shqiptare.

TIRANË, 10 janar/ATSH/-Në zonën e Matogjinit të Bashkisë së Selenicës është shkëputur një pjesë mali duke shfaqur problematika në aksesin rrugor drejt lagjes Bashaj.

Ministria e Mbrojtjes bëri me dije se aksesi është i bllokuar për lëvizje me automjete dhe se banorët janë jashtë rrezikut.

Në njoftim sqarohet se autoritetet vendore, në bashkëpunim me Policinë e Shtetit janë në komunikim të vazhdueshëm me banorët.

Agjencia Kombëtare e Mbrojtjes Civile (AKMC), në bashkëpunim me Repartin e Xhenios, po merr masat e nevojshme për mbështetje dhe ndërhyrje në terren, me qëllim normalizimin e situatës dhe rikthimin e lëvizshmërisë.

The post Rrëshqet rruga në Matogjinë të Selenicës, autoritetet masa për rikthimin e lëvizjes appeared first on Agjencia Telegrafike Shqiptare.

TIRANË, 8 janar/ATSH/- Prefekti i Tiranës, Afrim Qendro ka deklaruar se në Tiranë dhe në të gjitha fshatrat e këtij qarku ku ka problematika, ekipet e emergjencave janë në terren prej orëve të para të ditës dhe deri tani në mbrëmje.

Qendro nënvizon se “me gjithçka mundemi dhe kemi në dorë po punohet për normalizimin e situatës”.

Prefekti bën me dije se janë kryer disa evakuime dhe se strukturat janë në gatishmëri për të ndërhyrë në çdo rast që do të kërkohet ndihmë.

Ai apelon qytetarët që të evitojnë lëvizjet e panevojshme teksa parashikimet thonë se reshjet do të jenë intensive edhe gjatë ditës së nesërme.

The post Qendro: Strukturat në gatishmëri për të ndërhyrë në çdo rast appeared first on Agjencia Telegrafike Shqiptare.

TIRANË, 8 janar/ATSH/- Situata në njësinë administrative Novoselë po rëndohet, si pasojë e rritjes së nivelit të ujit, duke krijuar rrezik për banorët dhe pronat e zonës.

Bashkia e Vlorës njoftoi sot se në bashkëpunim me strukturat përgjegjëse të emergjencave civile, Agjencinë Kombëtare të Mbrojtjes Civile dhe Forcat e Armatosura, ka angazhuar të gjitha kapacitetet e nevojshme në terren dhe ndodhet në gatishmëri të plotë për të asistuar banorët, si në rast nevoje për evakuim, ashtu edhe për marrjen e masave të duhura për shpëtimin dhe sigurinë e bagëtive.

Bashkia u bën thirrje banorëve të ndjekin me përpikëri udhëzimet e strukturave në terren dhe të shmangin lëvizjet e panevojshme në zonat e rrezikuara, deri në normalizimin e situatës.

Gjithashtu, Bashkia ka vënë në dispozicion të banorëve numrat e kontaktit:

Emergjencat Civile

+355 69 213 9738

Ndërmarrja e Shërbimeve Publike

+355 69 541 9296

Ujësjellës-Kanalizime

+355 69 930 8090

The post Rëndohet situata në Novoselë, strukturat në gatishmëri për evakuimin e banorëve appeared first on Agjencia Telegrafike Shqiptare.

TIRANË, 7 janar/ATSH/- Ministria e Shëndetësisë dhe Mirëqenies Sociale informon se, në bashkëpunim me Operatorin e Shërbimeve të Kujdesit Shëndetësor (OSHKSH), po ndjek në mënyrë të vazhdueshme situatën në terren dhe funksionimin e strukturave shëndetësore në të gjithë vendin, për shkak të kushteve të motit.

MSHMS bën të ditur në njoftimin zyrtar se nëpërmjet komunikimit të drejtpërdrejtë me 36 Njësitë Vendore të Kujdesit Shëndetësor dhe 4 Drejtoritë Rajonale, po sigurohet raportim i detajuar dhe i përditësuar mbi gjendjen e qendrave shëndetësore, pikave ambulatore dhe strukturave spitalore.

Ndërkohë, strukturat shëndetësore kanë marrë masat e nevojshme për ofrimin e kujdesit shëndetësor të pandërprerë dhe të sigurt për qytetarët gjatë këtyre ditëve me mot të keq.

Në këtë kuadër, vijon monitorim i pandërprerë 24/7 i situatës në terren, verifikim i infrastrukturës, pajisjeve dhe rezervave bazë medikamentoze të emergjencës, sigurim i aksesueshmërisë së transportit të urgjencës dhe koordinim me autoritetet vendore dhe emergjencat civile si dhe caktim i personave përgjegjës për monitorimin e situatës në çdo institucion shëndetësor

Ndërsa në nivel spitalor, MSHMS nënvizon se janë marrë një sërë masash si aktivizim i plotë i shërbimit të urgjencës me gatishmëri 24/7, forcim i koordinimit operacional me OSHKSH-në, pushtetin vendor dhe strukturat e emergjencave, monitorim i situatës çdo 3 orë dhe kontroll i vazhdueshëm i infrastrukturës si dhe verifikim i rezervave kritike: medikamente, materiale mjekësore, ujë të pijshëm, karburant për gjeneratorë dhe pajisje emergjente.

The post MSHMS: Strukturat shëndetësore në gatishmëri, aktivizim i plotë i shërbimit të urgjencës 24/7 appeared first on Agjencia Telegrafike Shqiptare.

TIRANË, 7 janar/ATSH/- Përkeqësimi i motit dhe reshjet intensive të shiut përkeqësuan situatën mbrëmjen e djeshme në disa lagje të qytetit të Gjirokastrës.

Ministri i Mbrojtjes, Pirro Vengu shprehu mirënjohje të veçantë për efektivët e Repartit të Gërhotit, të cilët deri në orët e vona të mbrëmjes së djeshme kanë qenë në terren duke luftuar me prurjet e vrullshme të ujit në Gjirokastër.

Ai vlerësoi edhe angazhimin e Forcave të Armatosura në përballimin e situatës së krijuar në disa zona të vendit.

Ministri nënvizon se mbi 100 efektivë, dhjetëra mjete si dhe pompa me kapacitet të lartë janë angazhuar në qarqet Lezhë, Durrës dhe Gjirokastër, si edhe në çdo zonë ku ka qenë e nevojshme ndërhyrja.

The post Vengu: Mbi 100 efektivë të FA-ve u angazhuan për përballimin e pasojave nga moti i keq appeared first on Agjencia Telegrafike Shqiptare.

TIRANË, 7 janar/ATSH/- Ministri i Turizmit, Kulturës dhe Sportit, Blendi Gonxhja deklaroi sot se në vijim të situatës së reshjeve intensive, strukturat përgjegjëse të trashëgimisë kulturore vijojnë monitorimin e pandërprerë në territor me prioritet, mbrojtjen e pasurive kulturore.

Gonxhja thekson se në qarkun Shkodër dhe zonat përreth, reshjet kanë vazhduar ndërkohë që kanë nisur edhe shkarkimet nga kaskada e HEC-eve Koman dhe Vau i Dejës.

“Situata paraqitet e përkeqësuar në qytetin e Lezhës, ku dalja e lumit Drin nga shtrati ka shkaktuar përmbytje në qendër të qytetit, duke ndikuar edhe në zonën breg-lumore pranë mureve antike të Lisit dhe Memorialit të Skënderbeut, për shkak të pamundësisë së kolektorit të qytetit për të tërhequr ujin nga niveli i lartë i lumit”, bën të ditur ministri.

Gonxhja pohon se në pasuritë e tjera kulturore në territor situata po monitorohet në mënyrë të vazhdueshme dhe, pavarësisht prurjeve të shtuara të lumenjve dhe përrenjve, deri në këto momente nuk janë konstatuar përkeqësime.

“Nga monitorimi i kryer në një pjesë të urave në juridiksionin e DRTK Vlorë, nuk janë evidentuar problematika, ndërsa po vijon vëzhgimi edhe në sektorin Sarandë, ku deri tani, sipas kontakteve në terren, nuk raportohet për situata shqetësuese. Informacion më i detajuar do të përcillet në vijim”, deklaron ai.

Ministri i Turizmit, Kulturës dhe Sportit, Blendi Gonxhja shton se monitorimi në terren vijon me prioritet mbrojtjen e pasurive kulturore dhe reagimin në kohë ndaj çdo risku të mundshëm.

The post Gonxhja: Monitorim i vazhdueshëm për mbrojtjen e pasurive kulturore appeared first on Agjencia Telegrafike Shqiptare.

TIRANË, 6 janar/ATSH/- Reshjet e dendura të shiut kanë krijuar sot vështirësi serioze në qarkullim në disa zona në Durrës.

Prefektura e Qarkut Durrës në këtë situatë u bën thirrje të gjithë qytetarëve të qarkut të shmangin lëvizjet e panevojshme, të tregojnë kujdes maksimal gjatë çdo lëvizjeje dhe të ndjekin me përpikëri udhëzimet e strukturave të Emergjencave Civile dhe të autoriteteve vendore, duke kontribuar në ruajtjen e sigurisë së tyre dhe të komunitetit.

Strukturat e Prefekturës së Qarkut Durrës, në bashkëpunim me ato të Mbrojtjes Civile, ndodhen në monitorim të vazhdueshëm të situatës dhe janë në gatishmëri të plotë për ndërhyrje të menjëhershme, duke garantuar reagim të koordinuar ndaj çdo emergjence.

Për të siguruar një komunikim të menjëhershëm me qytetarët, në rast të çdo shqetësimi apo situate të papritur, Prefektura Durrës ka publikuar kontaktet zyrtare të Prefekturës, Bashkive dhe Njësive Administrative të Qarkut Durrës:

PREFEKTURA E QARKUT DURRËS

Prefekti i Qarkut: 068 213 3479

Sekretari i Përgjithshëm: 069 298 6677

Sektori i Emergjencave Civile: 069 333 4448

BASHKIA DURRËS

Kryetare e Bashkisë: +355 69 404 2397

Nj.A. nr.1: +355 67 396 6496

Nj.A. nr.2: +355 68 602 6066

Nj.A. nr.3: +355 69 346 4644

Nj.A. nr.4: +355 67 204 03946

Nj.A. nr.5: +355 68 602 2222

Nj.A. nr.6: +355 68 522 7118

Sukth: +355 68 202 7057

Katund i Ri: +355 69 487 4868

Rrashbull: +355 69 912 8286

Ishëm: +355 68 202 2933

Manëz: +355 67 619 9666

Shërbimet e Bashkisë Durrës:

Policia Bashkiake: +355 52 232 250 / +355 68 874 8477

Ndërmarrja Rruga: +355 69 395 8568

UKD: +355 69 241 6094

Ndërmarrja e Shërbimeve Komunale: +355 69 440 3455

Ndërmarrja Komunale Plazh: +355 69 203 6667

Agjencia e Parqeve Urbane: +355 68 208 7570

BASHKIA SHIJAK

Kryetari i Bashkisë: 069 209 7914

Policia Bashkiake: 067 506 6600

Zjarrfikësja: 069 332 1400

Emergjencat Civile: 069 335 3554

BASHKIA KRUJË

Emergjencat Civile:+355 68 406 9203

Policia e Shtetit: 129

Zjarrfikësja: 128

Numri unik i emergjencave në Shqipëri: 112

The post Reshjet e dendura të shiut krijojnë vështirësi në qarkullim në disa zona të Qarkut Durrës appeared first on Agjencia Telegrafike Shqiptare.

TIRANË, 2 janar/ATSH/- Instituti i Gjeoshkencave bën me dije se ditën e nesërme do të ketë reshje me intensitet të lartë kryesisht në veri dhe qendër të vendit.

Sipas njoftimit zyrtar, në qarqet Shkodër dhe Kukës mund të ketë vërshime të shpejta të lumenjve të vegjël malorë dhe rrëshqitje të dherave.

Në zonat urbane, në këto qarqe mund të shfaqen probleme me përmbytje të lokalizuara, në varësi të gjendjes së kanalizimeve.

Gjithashtu, sipas llogaritjeve të IGJEO përgjatë datave 3 deri më 7 janar priten reshje intensive, kryesisht në veri dhe jug të vendit.

Këto reshje do të sjellin rritje të rrezikshme të prurjeve dhe niveleve në lumenjtë Drin-Buna, liqenin e Shkodrës, lumenjtë Mat, Shkumbin dhe Vjosë.

Ndërsa në qarqet Lezhë, Dibër, Durrës, Tiranë dhe Elbasan priten reshje mesatare deri lokalisht intensive, shoqëruar me shtrëngata.

Në qarqet e tjera priten reshje të dobëta deri lokalisht mesatare.

The post IGJEO: Rritje e niveleve të lumenjve, dëborë në zonat malore appeared first on Agjencia Telegrafike Shqiptare.

PRISHTINË, 1 janar/ATSH/- Ish-kryetari i Kuvendit të Kosovës, Nexhat Daci është ndarë nga jeta në moshën 81-vjeçare.

Lajmin e ka bërë të ditur kryetari në detyrë i Kuvendit, Dimal Basha.

Daci ka shërbyer si kryetar i Kuvendit e më pas edhe si president në detyrë pas vdekjes së Ibrahim Rugovës, më 2006.

Nexhat Daci është themelues i Lidhjes Demokratike të Dardanisë dhe ka qenë aktiv në politikë edhe pas mandatit të tij si kryeparlamentar.

Nexhat Daci ishte kimist, profesor universiteti, akademik. Lindi më 1944 në Tërnoc, ku mbaroi shkollimin fillor. Shko­llimin e mesëm e kreu në Leskoc (1956-1960). Studimet universitare i mba­roi në Fakultetin e Shkencave Matematike-Natyrore (Dega e ki­misë) në Beograd (1962-1966), ku u diplomua në qershor të vitit 1966. Studimet pasuniversitare i mbaroi në fakultetin dhe drejtimin e njëjtë në Beograd (1966-1968). Një kurs pasuniversitar e ka mbaruar Lièges (Belgjikë), në vitin 1970. U dok­torua në vitin 1973 në Universitetin e Zagrebit. Studimet e pasdoktoraturës i vazhdoi në Angli (Universiteti i Bradfordit) në vitin 1974.

Pas përfundimit të studimeve të rregullta dhe të magjistraturës, në vitin 1968 zuri punë – asistent në Fakultetin Filozofik të atëhershëm, në Katedrën e Kimisë. Karrierën universitare (më 1971 ligjërues; më 1974 profesor inordinar; më 1984 profesor ordinar) pa ndërprerje e ka ushtruar në Prishtinë, ndërsa dhjetëra herë ka pasur udhëtime studimi në Çeki (Brno), Shqipëri, Angli (Bradford, Oksford, Londër), Skotlandë (Aberdin).
Ka marrë pjesë në tubime shkencore (sim­poziume, konferenca dhe kongrese) në nivele kombëtare dhe ndërkombëtare në: SHBA, Angli, Gjermani, Itali, Turqi, Hungari, Slloveni, Kroaci, Serbi, Shqipëri, Kosovë. Është anëtar i Shoqatës Kimike Amerikane në vitin 1985, i Akademisë Evropiane për Çështje Mjedisi me seli në Tübingen të Gjermanisë dhe Londër në vitin 1987 dhe kombëtare, në Akademinë e Shkencave dhe të Arteve të Ko­sovës në vitin 1993, korrespondent, dhe i rregullt në vitin 1996. Është anëtar i Akademisë Europiane të Shkencave dhe të Arteve nga viti 2014.

Gjatë periudhës akademike-universitare ka ushtruar edhe këto detyra: shef i Degës së Kimisë 1971-1973; sekretar i përgjithshëm i ASHAKut, 1994-1999; kryetar i ASHAK-ut, 1999-2002 dhe 2018-2019.

Ka qenë deputet (2001-2011) kryetar i Parlamentit të Kosovës në periudhën 2000-2004 dhe 2004-2006.

/Kosovapress/

The post Ndahet nga jeta ish-kryetari i Kuvendit të Kosovës, Nexhat Daci appeared first on Agjencia Telegrafike Shqiptare.

TIRANË, 30 dhjetor/ATSH/- Policia e Tiranës ka ndërmarrë një sërë masash për garantimin e mbarëvajtjes së festimeve me rastin e ndërrimit të viteve.

Në njoftimin për mediet, Drejtoria e Policisë së Tiranës bën me dije se do të ketë shtim të prezencës së shërbimeve policore me uniformë dhe atyre të Policisë Kriminale, në të gjitha zonat urbane, me fokus të veçantë në zonat me fluks qytetarësh, me qëllim garantimin e rendit dhe sigurisë publike.

Policia do të ketë pika fikse të kontrollit në hyrje dhe dalje të qytetit, si dhe shtimin e patrullimeve të lëvizshme, me qëllim parandalimin e veprimtarive të paligjshme dhe rritjen e sigurisë.

Gjithashtu do të intensifikohen masat për monitorimin e qarkullimit rrugor, nëpërmjet kontrolleve të shtuara, përdorimit të mjeteve inteligjente dhe patrullimeve në akset kryesore urbane dhe interurbane, me synim parandalimin e aksidenteve rrugore.

Punonjësit e policisë do të kryejnë kontrolle të vazhdueshme ndaj subjekteve dhe individëve që posedojnë/shesin lëndë piroteknike (fishekzjarre dhe/ose kapsolla), për parandalimin e rreziqeve dhe ngjarjeve aksidentale.

Në kuadër të masave të marra, policia do të rrisë prezencën e shërbimeve në sheshe publike, shëtitore, pedonale, objekte kulti, në ambiente argëtimi (bare, restorante, lokale nate) dhe në qendra tregtare, me objektiv garantimin e mbarëvajtjes së festimeve.

Punonjësit e Policisë do të jenë në gatishmëri për të ndërhyrë menjëherë, në çdo rast nevoje, ndaj apelojnë qytetarëve për ndihmë dhe denoncim të paligjshmërive që hasin, pranë çdo patrulle fizike, njësie policie ose në numrat pa pagesë 129 dhe 112.

The post Policia masa për ndërrimin e viteve, rritje e efektivëve dhe kontrolle në hyrje e dalje të kryeqytetit appeared first on Agjencia Telegrafike Shqiptare.

TIRANË, 30 dhjetor/ATSH/-  Pas pesë ditësh pa ujë të pijshëm, defekti në tubacionin kryesor të furnizimit në Vlorë është riparuar pas mesnate.

Bashkia Vlorë njofton se pas mbi 72 orëve pune intensive dhe pa ndërprerje u bë e mundur për riparimi i defektit në linjën kryesore 1000 mm të furnizimit me ujë të qytetit.

Prova e tretë e furnizimit ka rezultuar pozitive dhe aktualisht po furnizohen me ujë të pijshëm Zona e Çentrales, një pjesë e Lungomares dhe një pjesë e lagjes “Pavarësia”.

Kryetarja e Bashkisë Vlorë, Brunilda Mersni ka falenderuar ekipet teknike për sakrificën dhe qytetarët për durimin dhe mirëkuptimin.

The post Nis furnizimi me ujë në disa zona të Vlorës appeared first on Agjencia Telegrafike Shqiptare.

TIRANË, 30 dhjetor/ATSH/- Drejtoria për Hetimin e Krimit Kibernetik në Policinë e Shtetit paralajmëron qytetarët për qarkullimin e një fushate mashtruese (phishing) në platformën “WhatsApp”.

Në njoftimin zyrtar, policia bën me dije se këto mesazhe paraqiten si kërkesë për votim për çmimin e parë të një burse falas, në favor të një personi të afërt me dërguesin, i cili dyshohet se mund të ketë rënë më parë pre e këtij mashtrimi, duke sjellë më pas përhapjen e mesazhit te kontaktet e tij.

Mesazhet synojnë marrjen e kontrollit të llogarisë në aplikacionin “WhatsApp”, duke i drejtuar përdoruesit drejt faqeve të rreme dhe duke i nxitur të vendosin kode verifikimi, të cilat përdoren nga autorët për të përvetësuar llogarinë.

Policia e Shtetit iu bën thirrje qytetarëve që ë mos klikojnë në lidhje të dyshimta, edhe kur mesazhi iu shkon nga kontakte të njohura si dhe të mos japin kode verifikimi, fjalëkalime apo të dhëna personale.

Gjithashtu, policia apelon që qytetarët të aktivizojnë verifikimin me dy hapa (Two step verification) në aplikacionin “WhatsApp” si dhe të raportojnë çdo rast të dyshimtë pranë strukturave të Policisë së Shtetit.

Policia e Shtetit po monitoron situatën dhe fton qytetarët të tregojnë kujdes maksimal ndaj mesazheve që ofrojnë votime, çmime apo përfitime të menjëhershme.

The post Policia apel qytetarëve: Mos klikoni në mesazhe të dyshimta “WhatsApp” appeared first on Agjencia Telegrafike Shqiptare.

TIRANË, 30 dhjetor/ATSH/- Ministri i Turizmit, Kulturës dhe Sportit, Blendi Gonxhja deklaroi sot se Muzeu Kombëtar Arkeologjik në Durrës është në prag të përfundimit të ndërhyrjeve restauruese dhe ekspozuese.

Gonxhka thekson se mbi 2,400 objekte shumë shpejt do të ekspozohen në pavijone tërësisht të reja, me ndriçim dhe kushte bashkëkohore.

Në kuadër të këtij imvestimi është rikoncrptuar edhe oborri i Muzeut për t’u shndërruar në një mjedis tërheqës për vizitorët, aktivitete kulturore dhe edukim.

Ministri nënvozon se muzeu do të kthehet në një pikë referimi për studiuesit dhe dashamirësit e historisë, si edhe një nga atraksionet kryesore kulturore të Durrësit.

The post Muzeu Arkeologjik në Durrës në prag të përfundimit të restaurimit appeared first on Agjencia Telegrafike Shqiptare.

PRISHTINË, 29 dhjetor/ATSH/- Kreu i BDI-së, Ali Ahmeti ka përgëzuar sot qytetarët e Kosovës për procesin zgjedhor në të cilin dëshmuan maturi dhe pjekuri të lartë demokratike.

Ahmeti shprehet se në Kosovë u zhvillua një proces i lirë, i ndershëm dhe plotësisht demokratik, në përputhje me standardet evropiane, duke konfirmuar forcën e institucioneve dhe vullnetin e lirë të qytetarëve të saj.

Ai ka uruar Lëvizjen Vetëvendosje dhe Kryeministrit Albin Kurti për fitoren e shënuar.

Ahmeti nënvizon se Kosova ka nevojë për stabilitet, zhvillim dhe vizion të qartë shtetëror, në shërbim të qytetarëve të saj.

“Si dikush që ka dhënë kontribut për lirinë e Kosovës dhe që beson thellë në të ardhmen e saj, dëshiroj që Kosova të ecë përpara me hapa të sigurt, duke forcuar aleancën e saj strategjike me Shtetet e Bashkuara të Amerikës dhe me Bashkimin Evropian. Kjo është rruga që garanton paqe, zhvillim dhe një të ardhme të sigurt për brezat që vijnë”, shprehet ai.

Kreu i BDI-së, vë në dukje se Kosova e lirë, e fortë dhe e zhvilluar, ka qenë dhe mbetet ëndrra jonë e përbashkët.

The post Ahmeti uron Kurtin: Kosova e lirë dhe e zhvilluar, ëndrra jonë e përbashkët appeared first on Agjencia Telegrafike Shqiptare.

PRISHTINË, 29 dhjetor/ATSH/- Kosova sot ka përmbyllur me sukses procesin për zgjedhjet e parakohshme parlamentare.

Sipas rezultateve preliminare publikuar në platformën e KQZ-së, LVV ka fituar 49.30% të votave, e pasuar nga PDK me 21.01% dhe LDK me 13.59%, ndërkaq Aleanca për Ardhmërinë e Kosovës sipas këtyre rezultateve ka marr 5.68% të elektoratit.

Në bazë të këtyre rezultateve, LVV siguron 56 mandate, PDK me 23 mandate, LDK merr 15 mandate, AAK 6 mandate, Lista Serbe 10 mandate, komunitetet e tjera 10 mandate.

/Kosovapress/

The post Vetëvendosje siguron 56 mandate në Kuvend, PDK forcë e dytë me 23 mandate appeared first on Agjencia Telegrafike Shqiptare.

TIRANË, 28 dhjetor/ATSH/, Qytetarët e Vlorës kanë protestuar mbrëmjen e sotme pasi prej tre ditësh mungon furnizimi me ujë të pijshëm për shkak të një defekti në tubacionin kryesor.

Me pankarta në duar, qytetarët kanë bllokuar Bulevardin “Ismail Qemali” dhe më pas kanë hyrë brenda ambienteve të teatrit ” Petro Marko” ku do të mbahej mbrëmja Gala e festave të fundvitit.

Për shkak të situatës së krijuar, mbrëmja Gala është anuluar.

Deputetja e PD, Ina Zhupa ka reaguar ndaj situatës së krijuar në Vlorë duke u shprehur se: “E kanë shkatërruar Vlorën dhe Shqipërinë dhe jetojnë në botën paralele me koncerte, ballo, verë e tendera”.

Edhe deputetja Jorida Tabaku reagoi duke theksuar se “në Vlorën e ujit sa nga malet edhe nga deti nuk ka ujë. Në qytetin që ka pasur kryeministrin për 8 vite deputet, prej 4 ditësh mungon uji. Ndërsa njerëzit arrestohen përse protestojnë për një standart minimal njerëzor”.

The post Qytetarët protestojnë për mungesën e furnizimit me ujë në Vlorë appeared first on Agjencia Telegrafike Shqiptare.

PRISHTINË, 28 dhjetor/ATSH/- Mbi 363 mijë qytetarë kanë shfrytëzuar të drejtën e votës deri në orën 13:30 sipas të dhënave elektronike të Komisionit Qendror Zgjedhor.

Ndër qytetet ku pjesëmarrja është më e madhe e votueseve është Prishtina.

Procesi i votimit në zgjedhjet e sotme të parakohshme ka vijuar normalisht, tha sot kryetari i KQZ-së, Kresnik Radoniqi.

Megjithatë, ai tha se në gjashtë komuna, Istog, Ferizaj, Viti, Rahovec, Graçanicë dhe Gjilan, janë evidentuar probleme me energji elektrike, por që më pas janë zgjidhur. Për këtë problem, Radoniqi tha se janë në komunikim me KEDS-in, mirëpo nuk e përjashtoi mundësinë që sërish të ketë probleme me energji elektrike.

/KosovaPress/

The post Mbi 363 mijë qytetarë kanë votuar deri në 13:30, probleme me energjinë në gjashtë komuna appeared first on Agjencia Telegrafike Shqiptare.

PRISHTINË, 28 dhjetor/ATSH/ Kosova mban sot zgjedhjet e parakohshme ku mbi 2 milionë qytetarë janë ftuar të votojnë për herë të katërt brenda vitit.

Nê garën e sotme zgjedhore janë 24 subjekte politike me 1,180 kandidatë nga të cilët 8 janë subjekte shqiptare me 624 kandidatë, ndërsa pjesa tjetër janë subjekte nga radhët e komuniteteve pakicë që garojnë për 20 ulëse të garantuara.

Procesi i votimit nis në orën 07:00 të mëngjesit dhe mbyllet në orën 19:00.

Numri i qendrave të votimit është 948, ku 910 nga të cilat janë për votimin e rregullt me 2,557 vendvotime. Po ashtu janë edhe 38 qendra votimi me gjithsej 57 vendvotime për të mundësuar votimin me kusht.

Sipas Ligjit për Zgjedhjet e Përgjithshme, numërimi i fletëvotimeve të subjekteve politike në zgjedhjet për Kuvendin e Kosovës bëhet në vendvotim, pasi të përfundojë procesi i votimit, ndërkaq, numërimi i votave të kandidatëve për deputetë të Kuvendnit të Kosovës bëhet në Qendra Komunale të Numërimit, duke filluar nga dita e hënë.

KQZ ka marrë masa që sot të publikohen rezultatet preliminare të subjekteve politike nga zgjedhjet për Kuvendin e Kosovës.

Rezultatet nga vendvotimet e para, do të fillojnë të publikohen duke filluar para orës 20:00 dhe ato do të përditësohen vendvotim pas vendvotimi. Pra, brenda një kohe të shkurtër pasi numërohen fletëvotimet e një vendvotimi, do të publikohen të dhënat në platformën e rezultateve.

Sipas të dhënave të KQZ-së, numri i qytetarëve me të drejtë vote për të votuar brenda Kosovës është 1,999,204 votues, ndërkaq, në këtë listë nuk janë të përfshirë 77,086 shtetasit e Kosovës që janë regjistruar për të votuar nga jashtë vendit përmes postës apo në përfaqësitë diplomatike.

Viti 2025 në Kosovë nisi me votime më 9 shkurt për Kuvendin e Kosovës, vazhdoi në vjeshtë me votimin për zgjedhjet lokale të 12 tetorit dhe 9 nëntorit dhe mbyllet me votimin e ditës së sotme.

Policia e Kosovës  ka hartuar dhe po zbaton një plan të detajuar operativ për mbarëvajtjen e sigurisë.

Gjithashtu, në këto zgjedhje janë të angazhuar rreth 100 prokurorë. Institucioni i Avokatit të Popullit do të jetë në terren për vëzhgim, me fokus të veçantë te grupet e margjinalizuara: personat e privuar nga liria, shtëpitë e të moshuarve dhe qendrat integruese.

/KosovaPress/

The post Kosova në zgjedhje të parakohshme, qytetarët votojnë sot për Kuvendin e ri appeared first on Agjencia Telegrafike Shqiptare.

PRISHTINË, 27 dhjetor/ATSH/- Lëvizja Vetëvendosje ka mbyllur sonte fushatën e saj elektorale, prej nga u bë thirrje qytetarëve që në zgjedhjet e 28 dhjetorit të votojnë për numrin 116.

Kandidati për kryeministër, Albin Kurti u ndal te arritjet e qeverisjes së tij të deritanishme duke thënë se ekonomia shënoi rritje nga 7 në 11 miliardë euro, ndërsa për vitin e ardhshëm parashihet të arrijë në 12 miliardë euro.

Ai theksoi se qeveria aktuale ka rritur ekonominë me rreth 1 miliard euro çdo vit, tri herë më shpejt se qeveritë e kaluara, ndërsa punësimi është rritur pesë herë më shpejt.

“Ne e kemi gjetur ekonominë e Kosovës me 7 miliardë, sivjet është 11 miliardë e vitin e ardhshëm 12 miliardë. Kur vjen puna te punësimi jemi pesëfish më shumë më të shpejtë se ata. Kjo rritje e punësimit ka qenë 85 mijë gjithsej apo 24% më i lartë se në vitin 2021”, tha Kurti.

Ai po ashtu deklaroi se do të ndahet një miliard euro për ushtrinë e Kosovës dhe do të ketë fabrikë municioni.

“Në mandatin e ardhshëm do t’i ndajmë një miliard euro për prodhimtarinë, shteti do të jetë garanci hipotekë për investimet, të cilat do t’i bëjnë qytetarët e Republikës. Qasja jonë është shumë e thjeshtë, kush punon fiton, kush fiton investon, kush investon punëson dhe kush punëson fiton edhe më shumë. Prandaj një miliard euro për prodhimtarinë. Një miliard euro garanci për kredi në banka.  Ndërmarrësit e Kosovës nuk do të kenë nevojë që në bankat e Kosovës ta lënë hipotekë tokën stërgjyshore apo pasurit e pa luajtshme”, tha ai.

Kurti përmbylli tubimin duke u bërë thirrje qytetarëve që nesër të dalin dhe të mbështesin Vetëvendosjen për një të ardhme më të mirë dhe të qëndrueshme për Kosovën. /Kosovapress/

The post Kurti: Një miliard euro për ushtrinë mandatin e ardhshëm appeared first on Agjencia Telegrafike Shqiptare.