TIRANË, 11 shkurt /ATSh/ Agjencia për Zhvillim Bujqësor dhe Rural (AZhBR) njoftoi sot se 65.435 fermerë në të gjithë vendin kanë përfituar nga pagesat e drejtpërdrejta të Skemës Kombëtare të Mbështetjes në Bujqësi për vitin 2025, me një fond total prej 5,152 miliardë lekësh.

Sipas AZhBR-së, përmes tetë masave mbështetëse, skema ka synuar të mbështesë sektorët kryesorë të prodhimit bujqësor dhe blegtoral, duke kontribuar në uljen e kostove të prodhimit, rritjen e konkurrueshmërisë dhe zhvillimin e qëndrueshëm të bujqësisë në vend.

Drejtoresha e AZhBR-së, Ardita Kuçi, ka thënë se kjo mbështetje financiare përbën një instrument të rëndësishëm për fuqizimin e fermerëve dhe përmirësimin e standardeve të prodhimit.

“Kjo mbështetje kontribuon drejtpërdrejt në uljen e kostove, rritjen e konkurrueshmërisë dhe zhvillimin e qëndrueshëm të sektorit bujqësor në të gjithë vendin”, ka theksuar Kuçi.

Sipas të dhënave të bëra publike nga AZhBR, numri i përfituesve sipas masave mbështetëse është:

a) 3791 fermerë përfituan nga masa për tufën bazë të matrikullimit (gjedhë);

b) 5275 fermerë nga masa për tufën bazë të matrikullimit (të imta);

c) 4135 përfitues nga masa për mbarështimin e bletarisë;

d) 1307 përfitues për fara, fidane dhe inpute të tjera bujqësore;

e) 751 përfitues për kultivimin e bimëve mjekësore dhe aromatike;

f) 110 përfitues për fermat organike; 4 përfitues për certifikimin Global GAP;

g) 50.061 fermerë përfitues për naftën e përdorur në punimet e mekanizuara në bujqësi.

AZhBR bën të ditur se masa për naftën në bujqësi përbën numrin më të lartë të përfituesve, duke reflektuar rëndësinë e mbështetjes për uljen e kostove të mekanizimit dhe përmirësimin e eficiencës në prodhim.

Skema Kombëtare e Mbështetjes 2025 konsiderohet një ndër instrumentet kryesore të politikave publike në mbështetje të fermerëve, me synim rritjen e prodhimit vendas, formalizimin e sektorit dhe përmirësimin e standardeve në përputhje me kërkesat e tregut.

/e.xh/a.f/r.e/

The post Mbi 65 mijë fermerë përfituan nga Skema Kombëtare e Mbështetjes në Bujqësi 2025 appeared first on Agjencia Telegrafike Shqiptare.

TIRANË, 11 shkurt /ATSH/ Kreu i Shtetit, Bajram Begaj, priti sot në Presidencë Drejtorin e Zyrës për Evropën dhe Azinë në Byronë e Çështjeve Ndërkombëtare të Narkotikëve dhe Zbatimit të Ligjit (INL) të Departamentit Amerikan të Shtetit, Mark Tervakoski, i cili zhvilloi sot një vizitë në Tiranë.

Në takim ishte e pranishme edhe e Ngarkuara me Punë e Shteteve të Bashkuara të Amerikës në Tiranë, Nancy VanHorn.

Në një postim në rrjetin social “X”, Begaj ndau detaje nga takimi.

“Ne riafirmuam partneritetin dhe bashkëpunimin tonë strategjik si aleatë të NATO-s për forcimin e shtetit të së drejtës, luftën kundër krimit të organizuar dhe korrupsionit, promovimin e zhvillimit të qëndrueshëm ekonomik, si dhe ndërtimin e institucioneve më të forta në dobi të të gjithë shoqërisë shqiptare”, shkruan Begaj.

Gjatë qëndrimit në Tiranë, zyrtari i lartë amerikan u takua edhe me ministren e Brendshme, Albana Koçiu, ministrin e Drejtësisë, Besfort Lamallari, si dhe me kreun e Prokurorisë së Posaçme kundër Korrupsionit dhe Krimit të Organizuar (SPAK), Klodian Braho.

Sipas njoftimit të Ambasadës së Shteteve të Bashkuara në Tiranë, takimet theksuan forcën e partneritetit mes SHBA-së dhe Shqipërisë në fushën e zbatimit të ligjit, si dhe angazhimin e përbashkët në luftën kundër krimit të organizuar ndërkombëtar dhe trafikimit të narkotikëve.

Gjatë vizitës u riafirmua mbështetja e Shteteve të Bashkuara për forcimin e kapaciteteve të institucioneve shqiptare përmes ofrimit të ekspertizës, mjeteve dhe bashkëpunimit të vazhdueshëm.

1 nga 2

/a.f/

The post Begaj pret zyrtarin e lartë amerikan, theksohet bashkëpunimi në sundimin e ligjit appeared first on Agjencia Telegrafike Shqiptare.

PRISHTINË, 11 shkurt /ATSh/ Avokati i Thaçit, Pierre Richard Prosper ka kritikuar ashpër Zyrën e Prokurorit të Specializuar për deklaratat sa i përket dëshmitarëve ndërkombëtarë.

Përreth 15 minuta, ai para trupit gjykues ka thënë se është e pamundur qe të ishin thjesht kalimtarë në Kosovë.

“Këta persona kanë pasur komunikime personale. Prokuroria dëshiron qe ju besoni se këta persona kanë qenë kalimtarë në Kosovë. Kjo tregon injorancë, është mungesë respekti”, ka thënë ai.

Më tej ai tha se dëshmitarët ndërkombëtare nuk kanë dëshmuar në cilësinë e personave privat, por si persona me role të rëndësishme në shtetet e tyre.

“Ky person [Hashim Thaçi] u hodhi hy syve atyre, sigurisht që jo. Prokuroria vjen këtu dhe përpiqet të shtrembërojë faktet. Ju lutem reflektoni”, ka thënë ai.

Ekipi mbrojtës po vazhdon deklaratën përmbyllëse, ku paraprakisht avokatja Nina Tavakolli tha se “ZPS nuk ka argumentuar se Thaçi kishte përdorur pushtetin e qeverisë së përkohshme për qëllimin e per adhket kriminal, tha Tavakolli.

/KosovaPress/

The post Avokati i Thaçit i ashpër me Prokurorinë: Dëshmitarët ndërkombëtarë nuk kanë qenë kalimtarë në Kosovë appeared first on Agjencia Telegrafike Shqiptare.

PRISHTINË, 11 shkurt /ATSh/ Lojërat Mesdhetare “Prishtina 2030” (edicionet e 21-ta të eventit) do të kenë një program të zgjeruar me 24 sporte konkurruese, duke përfshirë sporte klasike të Olimpikut si atletikë, not, xhudo, boks, volejboll, dhe sporte të tjera si basketboll 3×3, futsal (i zëvendëson futbollin tradicional U21) dhe mundësinë për të shtuar edhe sporte si Baseball 5, Canoe Sprint apo Kickboxing në varësi të aprovimit të fundit të organizatorëve. Kjo e bën programin mjaft më dinamik dhe gjithëpërfshirës se në edicionet e mëparshme.

Për të përgatitur mbajtjen e lojërave, janë planifikuar investime të mëdha në infrastrukturë sportive në Kosovë. Kjo përfshin ndërtimin e një stadiumi kombëtar moderne që do të jetë vendi i ceremonive hapëse dhe mbyllëse, si dhe objekte të reja të sportit në disa qytete (p.sh. Pejë, Ferizaj, Prizren e Vushtrri). Janë gjithashtu plane për pallate të sporteve, pishina gjysmë-olimpike dhe përmirësime të objekteve ekzistuese.

Një nga elementet e rëndësishme të përgatitjeve është transformimi i Qendrës së Studentëve në Prishtinë në një qendër të akomodimit për mijëra atletë, me rreth 4,500 shtretër dhe ambiente të reja, si dhe rinovime të kuzhinës dhe objekteve të tjera të shërbimit. Kjo është një investim afatgjatë që do të shfrytëzohet edhe pasi përfundojnë Lojërat.

Ngaqë Kosova s’ka dalje në det, për sportet si vela dhe gara me varkë apo sporte ujore të lidhura me detin, vendi ka bërë marrëveshje bashkëpunimi me Shqipërinë, ku eventet në det do të zhvillohen në bregdet—një nismë unike që është risia historike e këtij edicioni të Lojërave Mesdhetare.

Në edicionin e vitit 2030 pritet të marrin pjesë rreth 3,500 deri në 5,000 atletë nga 26 vende të rajonit mesdhetar, duke e bërë këtë ngjarjen sportive më të madhe që Kosova ka organizuar ndonjëherë.

/KosovaPress/

The post Risitë që sjellin Lojërat Mesdhetare në Kosovë appeared first on Agjencia Telegrafike Shqiptare.

STRASBURG, 11 shkurt /ATSH-AFP/ – Këshilli i Evropës njoftoi sot heqjen e imunitetit të ish-sekretarit të përgjithshëm, norvegjezit Thorbjorn Jagland, i cili është subjekt i një hetimi në vendin e tij për lidhjet e tij të kaluara me shkelësin seksual amerikan, Jeffrey Epstein.

Sekretari i përgjithshëm i institucionit me seli në Strasburg nga viti 2009 deri në vitin 2019, Thorbjorn Jagland përfitoi nga imuniteti diplomatik, edhe pas përfundimit të mandatit të tij, për akte të kryera gjatë ushtrimit të detyrave të tij.

Thorbjrn Jagland, i cili shërbeu gjithashtu si kryeministër i Norvegjisë nga viti 1996 deri në vitin 1997, është nën hetim nga policia norvegjeze me dyshimin për “korrupsion të rëndë”.

Ai ishte kryetar i Komitetit të Nobelit, i cili jep çmimin Nobel për Paqen, dhe sekretar i përgjithshëm i Këshillit të Evropës kur krijoi lidhje me Epstein në vitet 2010.

”Heqja e imunitetit të tij do t’i lejojë sistemit norvegjez të drejtësisë të bëjë punën e vet, dhe Jagland, nëse ndiqet penalisht, të mbrohet”, deklaroi sekretari aktual i përgjithshëm i Këshillit të Evropës, zvicerani Alain Berset.

Sipas gazetës norvegjeze ”Verdens Gang”, e cila citon dokumente të publikuara nga Departamenti i Drejtësisë i SHBA-së, Jagland kishte kërkuar një garanci nga Jeffrey Epstein për blerjen e një apartamenti, megjithëse rezultati i kësaj kërkese nuk dihet.

Jagland i tha gazetës se kreditë për pasuritë e tij të paluajtshme ishin marrë të gjitha nga banka norvegjeze DNB.

Ai gjithashtu qëndroi me Epstein në Nju Jork në vitin 2018, si dhe në Paris në vitet 2015 dhe 2018, sipas të njëjtave dokumente./ a.jor.

The post STRASBURG – Këshilli i Evropës i heq imunitetin ish-sekretarit Jagland për shkak të çështjes Epstein appeared first on Agjencia Telegrafike Shqiptare.

PRISHTINË, 11 shkurt /ATSh/ Ekipi mbrojtës i Hashim Thaçit përfundoi deklaratën përmbyllëse në Dhomat Specializuara.

Në përfundim të deklaratës, avokati Lluka Mishetiq tha para trupit gjykues se është koha që Hashim Thaçi të lirohet dhe të kthehet pranë familjes së tij.

“Hashim Thaçi të shpallet i pafajshëm dhe të kthehet në familjen e tij. Kërkesa e ZPS-së për dënim efektiv prej 45 vjetësh është një parashtrim i pabesueshëm. Nuk është parashtrim serioz”, tha ai.

Mishetiq tha se Thaçi ishte jashtë Kosovës në pjesën me të madhe të aktakuzës.

“Ky gjykim për ZPS-së ishte test”, përfundoi ai.

Pas pauzës prej 15 minutash, në pjesën tjetër të ditës do të fillojë deklarata përmbyllëse e ekipit mbrojtës të Kadri Veselit.

Në galerinë publike po e dëgjojnë seancën familjarë të ish-krerëve të UÇK-së, në mesin e tyre edhe djali i Veselit.

/KosovaPress/

The post Avokati: Koha që Thaçi të lirohet, kërkesa e prokurorisë joserioze appeared first on Agjencia Telegrafike Shqiptare.

TIRANË, 11 shkurt /ATSh/  Tirana është mundur 2-0 nga Dinamo City, në çerekfinalen e parë të Kupës së Shqipërisë.

Ndeshja e zhvilluar në “Selman Stermasi” u vendos nga një gol i Vilës në minutën e 76’, teksa rezultati u dyfishua në minutën e tretë shtesë nga Dejvi Bregu.

Raundi i parë i fazës çerekfinale mbyllet sot në orën 16:30 me ndeshjen AF Elbasani – Partizani.

Kupa e Shqipërisë, faza çerekfinale – takimet e para:

E martë, 10 shkurt 2026:
13:30 Bylis 0-1 Vllaznia
16:30 Teuta 1-2 Egnatia
E mërkurë, 11 shkurt 2026:
13:30 Tirana 0-2 Dinamo
16:30 AF Elbasani – Partizani
*Ndeshjet e kthimit luhen më 4 mars 2026

/a.f/

The post Kupa e Shqipërisë, Dinamo City mund 2-0 Tiranën në “Selman Stermasi” appeared first on Agjencia Telegrafike Shqiptare.

TIRANË, 11 shkurt/ATSH/ Drejtoria e Përgjithshme e Arkivave në bashkëpunim me Agjencinë e Parqeve dhe Rekreacionit prezantuan sot në sheshin “Mimoza” një ekspozitë dokumentare dhe fotografike mbi rrugëtimin shekullor të Tiranës, duke nisur nga shpallja kryeqytet.

Në këtë aktivitet u paraqitën materiale arkivore që ofrojnë një pikëpamje tërësore të historikut të kryeqytetit. Aktiviteti u zhvillua mes atmosferës festive të ansamblit “Tirana” dhe sofrës tradicionale tiranase, me pjesëmarrjen e nxënësve dhe qytetarëve të shumtë.

Ekspozita shpalosi fragmente të historisë së kryeqytetit (1604-1937) nën autorësinë e Osman Myderrizit, telegramin dërguar qyteteve të vendit për ngritjen e flamurit në Tiranë (28 nëntor 1912), foto të godinës ku u vendos qeveria pas Kongresit të Lushnjës, me një imazh të Bashkisë së vjetër etj.

Midis materialeve të ekspozuara për publikun, gjendeshin me dhjetëra foto dhe kartolina që ilustrojnë zhvillimin urbanistik të Tiranës. /j.p/

1 nga 7

The post Ekspozitë fotografike dhe dokumentare në 106-vjetorin e Tiranës si kryeqytet appeared first on Agjencia Telegrafike Shqiptare.

TIRANË, 11 shkurt/ATSH/ Drejtori i Zyrës për Europën dhe Azinë në Byronë e Çështjeve Ndërkombëtare të Narkotikëve dhe Zbatimit të Ligjit (INL) të Departamentit Amerikan të Shtetit, Mark Tervakoski, zhvilloi një vizitë në Tiranë, ku u takua me përfaqësues të institucioneve të zbatimit të ligjit, sistemit të drejtësisë, shoqërisë civile dhe misioneve ndërkombëtare në Shqipëri.

Gjatë qëndrimit në Tiranë, zyrtari i lartë amerikan u takua me Presidentin Bajram Begaj, ministren e Brendshme, Albana Koçiu, ministrin e Drejtësisë, Besfort Lamallari, si dhe me kreun e Prokurorisë së Posaçme kundër Korrupsionit dhe Krimit të Organizuar (SPAK), Klodian Braho.

Sipas njoftimit të Ambasadës së Shteteve të Bashkuara në Tiranë, takimet theksuan forcën e partneritetit mes SHBA-së dhe Shqipërisë në fushën e zbatimit të ligjit, si dhe angazhimin e përbashkët në luftën kundër krimit të organizuar ndërkombëtar dhe trafikimit të narkotikëve.

Gjatë vizitës, u riafirmua mbështetja e Shteteve të Bashkuara për forcimin e kapaciteteve të institucioneve shqiptare përmes ofrimit të ekspertizës, mjeteve dhe bashkëpunimit të vazhdueshëm.

Sipas ambasadës, SHBA mbetet e përqendruar në bashkëpunimin me partnerët që ndajnë të njëjtin angazhim për të luftuar krimin e organizuar, i cili dëmton qytetarët, kërcënon kufijtë dhe cenon sigurinë kombëtare.

“Shtetet e Bashkuara janë të përqendruara në ofrimin e aftësive, mjeteve dhe bashkëpunimit në Shqipëri dhe në rang global për partnerët që ndajnë angazhimin tonë për të luftuar kriminelët që dëmtojnë qytetarët e vendeve tona, kërcënojnë kufijtë tanë dhe cenojnë sigurinë tonë kombëtare”, citohet njoftimi i ambasadës.

Vizita e Tervakoskit rikonfirmon mbështetjen e vazhdueshme të SHBA-së për përpjekjet e Shqipërisë në forcimin e sundimit të ligjit dhe sigurisë. /j.p/

1 nga 14

The post Ambasada amerikane: SHBA të angazhuara për forcimin e partneritetit me Shqipërinë, bashkëpunim për luftën kundër krimit appeared first on Agjencia Telegrafike Shqiptare.

BRUKSEL, 11 shkurt /ATSH-AA/ – Bashkimi Evropian kritikoi hapat e njëanshëm të Izraelit, me të cilët i jep vetes kontroll më të madh mbi Bregun Perëndimor të pushtuar, duke i cilësuar këto veprime si “kundërproduktive dhe të papajtueshme me të drejtën ndërkombëtare.

Në një deklaratë të përbashkët, përfaqësuesja e lartë e BE-së për politikë të jashtme, Kaja Kallas, si dhe komisaret Dubravka Suica dhe Hadja Lahbib, thanë se hapat e rinj rrezikojnë “të minojnë përpjekjet e vazhdueshme ndërkombëtare” që synojnë stabilizimin dhe paqen në rajon.

“Hapat e rinj të miratuar nga kabineti i sigurisë i Izraelit për Bregun Perëndimor janë kundërproduktive dhe të papajtueshme me të drejtën ndërkombëtare”, thuhet në deklaratë.

BE-ja përsëriti gjithashtu qëndrimin e saj të kahershëm për mosnjohjen e sovranitetit të Izraelit mbi territoret e pushtuara që nga qershori i vitit 1967, në përputhje me rezolutat përkatëse të Këshillit të Sigurimit të OKB-së.

Ajo paralajmëroi se vendimet që ndikojnë në zbatimin e Protokollit të Hebronit ndërmjet Izraelit dhe Autoritetit Palestinez mund të rrezikojnë status quo-në e ndjeshme në vendet fetare.

Duke riafirmuar përkushtimin ndaj zgjidhjes me dy shtete, blloku tha se mbështet krijimin e një shteti palestinez të pavarur, demokratik, të bashkuar territorialisht dhe funksional, që të jetojë krah për krah me Izraelin në paqe dhe siguri.

BE-ja theksoi se do të vazhdojë të punojë me partnerët ndërkombëtarë për zbatimin e zgjidhjes me dy shtete dhe u bëri thirrje të gjitha palëve të përmbahen nga masa të njëanshme që rrisin tensionet dhe dëmtojnë perspektivën për një marrëveshje të negociuar.   /os/

The post FOKUS – BE: Kontrolli i Bregut Perëndimor nga Izraeli i papajtueshëm me të drejtën ndërkombëtare appeared first on Agjencia Telegrafike Shqiptare.

TIRANË, 11 shkurt /ATSh/ Shqipëria shënoi sot debutimin e saj në Lojërat Olimpike Dimërore “Milano Cortina 2026”. Skiatori Denni Xhepa u rendit në vendin e 34-t nga 42 garues në disiplinën e Super G. Skiatori shqiptar përfundoi garën me kohën 1:31.72.

Podiumi u dominua nga Zvicra, ku Franjo von Allmen siguroi medaljen e artë, e treta për të në këtë Olimpiadë, ndërsa vendin e dytë e zuri Ryan Cochran-Siegle i SHBA-së. Medalja e bronztë shkoi për Marco Odermatt, po nga Zvicra.

23-vjeçari Denni Xhepa bëhet shqiptari i parë që përfaqëson ngjyrat kuqezi në një garë shpejtësie në Olimpiadën Dimërore. Katër vite më parë, në Lojërat e Pekinit, ai u rendit i 28-ti, por jo në disiplinën e Super-G.

Xhepa do ketë edhe dy gara të tjera në Lojërat Olimpike Dimërore, pasi më 14 shkurt do garojë në disiplinën e Slalomit Gjigant në orën 11:30 në Bormio. Gjithashtu ai do e mbyllë garimin në Olimpiadë më 16 shkurt në disiplinën e Slalomit, garë e cila do të fillojë në orën 10:00 në pistën e Bormios.

Kujtojmë se kjo është hera e parë që vendi ynë përfaqësohet nga katër sportistë në një Olimpiadë Dimërore. Skiatorët Lara Colturi, Denni Xhepa, Lisa Brunga dhe Semire Dauti janë sportistët e Shqipërisë në “Milano Cortina 2026”.

/m.q/j.p/

The post Shqipëria debuton në Lojërat Olimpike “Milano Cortina 2026” me Denni Xhepën appeared first on Agjencia Telegrafike Shqiptare.

MANCHESTER, 11 shkurt/ATSH/— Ajo që nisi si një lojë e pafajshme në internet është shndërruar, pas 493 ditësh, në një fenomen të vërtetë rreth formës së dobët të Manchester United dhe durimit të një tifozi të vetëm.

Frank Ilett, i njohur online si The United Strand, publikoi më 5 tetor 2024 një video ku premtonte se nuk do të qethte flokët deri kur United të fitonte pesë ndeshje radhazi. Në një sondazh të postuar atë ditë, ku morën pjesë 27 mijë ndjekës, 90% parashikuan se qethja e radhës do të vinte vetëm në vitin 2026.

Pas barazimit 1-1 të së martës ndaj West Ham, pritja vazhdon — dhe bashkë me të rritet edhe popullariteti i sfidës. Ilett sot ka mbi 2.3 milionë ndjekës dhe transmetimet e tij live në YouTube për ndeshjet e United arrijnë deri në 100 mijë shikues njëkohësisht.

“E kam nisur për argëtim, vetëm për të sjellë pak pozitivitet mes tifozëve në këtë moment të çuditshëm për klubin,” tha ai për BBC Sport, duke pranuar se nuk e kishte imagjinuar asnjëherë që sfida “no win, no trim” do zgjaste kaq shumë. “Mendoja se do të mbaronte për tre a katër muaj.”

Fakti që Manchester United nuk arrin pesë fitore radhazi që prej janar–shkurtit 2024 e ka kthyer modelin e flokëve të Ilett në një simbol të rënies së klubit. “Flokët e mi janë një pasqyrim vizual se United nuk është aty ku duhet të jetë,” thotë ai, mes humorit dhe durimit të imponuar.

Sfida ka marrë përmasa të papritura: bashkëpunime me marka të mëdha, agjent personal dhe një ndjekësi të gjerë që e ka kthyer në figurë virale. “Nuk është më vetëm për mua,” thotë ai. “Nuk mund ta ndal tani.”

Por ëndrra e madhe mbetet një: “Nëse do më lejonin, prerja e flokëve në fushën e Old Trafford, ndoshta edhe nga një lojtar, do ishte e pabesueshme,” thotë Ilett, duke pritur që Manchester United t’i japë më në fund arsye për t’u ulur në karrigen e berberit.

The post “493 ditë pritje: Flokët që bashkuan miliona tifozë të Manchester United” appeared first on Agjencia Telegrafike Shqiptare.

TIRANË, 11 shkurt/ATSH/ – Vdekja e këngëtarit legjendar të Nirvana, Kurt Cobain, po rikthehet në qendër të debatit publik pothuajse tri dekada pas ngjarjes, pas publikimit të një raporti të ri forensik që ngre dyshime se rasti mund të ketë qenë vrasje e inskenuar si vetëvrasje.

Sipas Euronews, një ekip i pavarur ekspertësh ka analizuar sërish dokumentet, fotografitë e skenës së ngjarjes dhe raportet toksikologjike, duke arritur në përfundimin se Cobain mund të ketë qenë i konfrontuar nga një ose më shumë persona, ti jetë injektuar një dozë e lartë heroine “për ta bërë të paaftë”, dhe më pas të jetë qëlluar me armë zjarri. Raporti pretendon gjithashtu se arma e gjetur në duart e tij “mund të jetë vendosur” pas vdekjes.

Kurt Cobain u gjet i vdekur më 5 prill 1994 në banesën e tij në Seattle dhe autoritetet vendosën se ai kishte kryer vetëvrasje me armë zjarri. Vitet e fundit të jetës së tij ai ishte përballur me varësi nga droga dhe probleme të shëndetit mendor.

Megjithatë, dyshimet rreth vdekjes së tij nuk janë shuar asnjëherë. Që nga fundi i viteve ’90, teori të ndryshme konspirative kanë pretenduar për një letër të dyshimtë, për çrregullime në skenën e ngjarjes, si dhe për tensionet në martesën e tij me këngëtaren Courtney Love. Dokumentari i vitit 1998 Kurt & Courtney i regjisorit Nick Broomfield i artikuloi këto dyshime dhe ngriti pikëpyetje mbi versionin zyrtar.

Pavarësisht raportit të ri, autoritetet amerikane nuk kanë njoftuar për rihapje të hetimit, dhe konkluzioni zyrtar i vitit 1994 – vetëvrasje – mbetet i pandryshuar.

The post Raport i ri ringjall dyshimet mbi vdekjen e Kurt Cobain appeared first on Agjencia Telegrafike Shqiptare.

ROMË, 11 shkurt /ATSH/- Kryeministrja italiane, Giorgia Meloni dhe kancelari gjerman, Friedrich Merz kanë theksuar nevojën për veprime të menjëhershme për të adresuar sfidat strategjike të Bashkimit Evropian, sipas “Corriere Della Sera”.

Boshti i ri që po shfaqet midis Italisë dhe Gjermanisë duket se paralajmëron ndryshime të mëdha.

Në një letër të përbashkët me kancelarin gjerman, Friedrich Merz drejtuar të gjitha vendeve anëtare, Meloni bën thirrje për një “afat kohor” të qartë dhe të përcaktuar dhe një sërë reformash që duhej të zbatoheshin ose planifikoheshin brenda këtij viti.

“Pika e parë është se nuk kemi më kohë, duhet të nxitojmë, nuk kemi nevojë për një program, por për një orar, me afate të përcaktuara dhe një sërë reformash të zbatuara ose të planifikuara deri në fund të vitit”, tha Meloni.

Sipas burimeve qeveritare italiane, bashkëpunimi midis Romës dhe Berlinit duket i fortë, veçanërisht në çështje të tilla si tregu i vetëm, ulja e burokracisë dhe lehtësimi i barrës ligjore për bizneset.

Ndërkohë, presidenti francez, Emmanuel Macron ka shfaqur një qasje më të orientuar drejt investimeve, por të gjitha palët po përshpejtojnë ritmin në mënyrë që të mos humbasin mundësitë strategjike.

“Nuk ka më kohë për pozicione ideologjike dhe nevojiten veprime të menjëhershme për t’u përballur me konkurrencën nga Kina dhe SHBA-ja, veçanërisht në sektorë të tillë si inteligjenca artificiale dhe mbrojtja”, theksoi Meloni.

Në letrën e përbashkët me Merz, përfshihet edhe krijimi i një kuadri të përbashkët ligjor evropian për investitorët dhe startup-et, duke e shndërruar tregun e përbashkët në një hapësirë ​​ligjore të integruar dhe jo thjesht të rregulluar nga ligjet kombëtare.

Burime italiane theksojnë se, në pritje të samitit të ardhshëm, shumica e vendimeve do të merren me bashkëpunim të zgjeruar, duke tejkaluar kufijtë e votimit unanim kur është e nevojshme, në mënyrë që ato të mos mbeten të bllokuara.

Italia dhe Berlini synojnë të nxjerrin vendime konkrete që mund të forcojnë konkurrueshmërinë e BE-së në arenën globale. //a.i/

The post “Corriere Della Sera”: Meloni-Merz: Nevojiten veprime të menjëhershme për të adresuar sfidat strategjike të BE-së appeared first on Agjencia Telegrafike Shqiptare.

TIRANË, 11 shkurt/ATSH/ – Bashkimi Europian po përgatitet për një hap të rëndësishëm në sistemin e pagesave: hyrjen e euros digjitale, një formë e re monedhe publike, kontante por në format digjital, e cila është aktualisht në fazë studimi nga Banka Qendrore Evropiane.

Sipas parashikimeve, euroja digjitale do të mund të hidhet në treg në vitin 2029, ndërsa një fazë pilot pritet të nisë në vitin 2027, pasi të miratohet kuadri përkatës ligjor nga institucionet europiane.

Ja 5 pikat kryesore që shpjegojnë funksionimin e saj:

1. Çfarë është euroja digjitale

Euroja digjitale është një formë e monedhës publike – si paratë fizike, por në version elektronik. Ajo do të emetohet nga Banka Qendrore Evropiane dhe do të përdoret paralelisht me kartëmonedhat dhe monedhat tradicionale, pa i zëvendësuar ato.

2. Si do të funksionojë

Çdo qytetar do të ketë një “wallet” digjital, përmes një aplikacioni ose karte të posaçme. Me të, përdoruesit do të mund të kryejnë pagesa në dyqane, transferta midis pajisjeve, si dhe blerje online dhe jashtë vendit. Çdo pagesë do të funksionojë si transferim kredie te BQE.

3. Çfarë ndryshon për qytetarët dhe bankat

Pagesat digjitale nuk do të varen më vetëm nga operatorë privatë ndërkombëtarë si Visa, Mastercard, apo PayPal.

Për të shmangur largimin e depozitave nga bankat, parashikohet një kufi i mbajtjes së euros digjitale në portofol – rreth 3 000 euro. Për pagesa më të larta, portofoli mund të lidhet me llogarinë bankare.

4. Avantazhet kryesore

Euroja digjitale sjell kosto më të ulëta për qytetarët dhe bizneset, një sistem unik dhe të unifikuar pagesash në gjithë BE-në, si dhe më shumë autonomi europiane në infrastrukturën e pagesave.

5. Si do të kryhen transaksionet

Pagesat do të mund të bëhen online dhe offline.

– Online: të dhënat do të mbeten te bankat, siç funksionon aktualisht.

– Offline: paratë do të kalojnë drejtpërdrejt nga një pajisje te tjetra, në mënyrë anonime, duke ofruar të njëjtin nivel privatësie si pagesat me para në dorë.

Euroja digjitale do të jetë falas dhe e aksesueshme për të gjithë, edhe për ata që nuk kanë llogari bankare ose lidhje interneti.

The post BE, 5 pika për të kuptuar si funksionon euroja digjitale appeared first on Agjencia Telegrafike Shqiptare.

TIRANË, 11 shkurt/ATSH/ Përmes një ceremonie të veçantë të zhvilluar në Ambasadën e Republikës së Shqipërisë në Athinë, iu dha diploma e mirënjohjes “Nderi i Akademisë”, prof. dr. Priamo Bollanos. Ky vlerësim iu dha në 90-vjetorin e lindjes.

Ceremoninë e çeli ambasadorja Luela Hajdaraga, e cila i uroi mirëseardhjen delegacionit të Akademisë së Shkencave të Shqipërisë, prof. dr. Bollanos dhe familjes së tij, si dhe miqve të shumtë të profesorit.

Pasi foli për vlerat e prof. dr. Bollanos, ambasadorja Hajdaraga ftoi akademik Skënder Gjinushin, kryetar i ASHSH-së për të dhënë titullin e lartë të mirënjohjes akademike.

Ky titull iu jepet personaliteteve të shquara shkencore nga fusha të ndryshme, për kontributet e tyre në vijimësi.

Motivacioni i dedikuar për prof. dr Bollanon ishte: për rolin thelbësor në modernizimin e arsimit në fushën e shkencave ekonomike, forcimin e metodologjisë shkencore dhe etikës profesionale në institucionet e arsimit të lartë, administratën publike, institucionet kërkimore-shkencore, duke ndikuar drejtpërdrejt në formimin e brezave të ekonomistëve dhe studiuesve…”.

Në fjalën përshëndetëse profesor Bollano falënderoi ASHSH për vlerësimin e lartë si dhe  Ambasadën e Republikës së Shqipërisë si organizuese e veprimtarisë. Ai bëri një përshkrim mbresëlënës të jetës së tij akademike dhe shoqërore, për sfidat me të cilat është përballur dhe arritjet e veprimtarisë kërkimore shkencore, administrative e shtetërore. /j.p/

1 nga 4

The post Priamo Bollano vlerësohet me titullin “Nderi i Akademisë” appeared first on Agjencia Telegrafike Shqiptare.

ANKARA, 11 shkurt /ATSH-AA/ – Një teknik mjekësor i urgjencës në Osmaniye të Turqisë nxori ushqimin që i ngeli në fyt duke kryer manovrën Heimlich mbi vete.

Ilyas Yildir, i cili punon si teknik mjekësor në Qendrën e Shëndetit të Shpejtë 112, po hante në zyrën ku jepte trajnime për ndihmën e parë, kur një copë ushqimi i ngeli në fyt.

Pa mundur të marrë frymë, Yildir shtyu shpejt gjoksin mbi skajin e karriges dhe bëri manovrën Heimlich mbi vete.

Me këtë manovër ai arriti të nxjerrë ushqimin që i ngeli në fyt. Ngjarja u regjistrua nga kamera e sigurisë e zyrës.

Ilyas Yildir, që kreu manovrën Heimlich mbi vete, i tha Agjencisë Anadolu se gjatë ngrënies në zyrë papritmas i kishte ngecur një copë ushqimi në fyt dhe nuk mund të merrte frymë.

Ai tregoi se në atë moment nuk kishte askënd pranë. “Si instruktor ndihme e parë dhe teknik mjekësor i urgjencës e dija çfarë duhej të bëja. Bëra manovrën Heimlich mbi vete. Kjo ngjarje të shërbejë si shembull për njerëzit se si mund të veprojnë vetëm, në shtëpi, për t’u shpëtuar vetë”, tha ai.

Manovra e Heimlich-ut (ose shtytja abdominale) është një teknikë e ndihmës së shpejtë që shpëton jetën dhe përdoret në rastet e bllokimit të rrugëve të frymëmarrjes të shkaktuara nga një trup i huaj. Kryhet për të parandaluar mbytjen nëse rrugët e frymëmarrjes (fyti, trakea) e një personi bllokohen nga një copë ushqimi ose një objekt tjetër.

E tëra çfarë ju nevojitet është një karrige dhe mund ta kryeni vetë manovrën Heimlich për të pastruar një rrugë ajrore të bllokuar (nga ushqimi ose një objekt i vogël).

Teknika e saktë: mbështetuni në një karrige dhe ushtroni presion me krahët. Sipas studiuesve në Spitalin Mbretëror Brompton në Londër, teknika,  është efektive dhe e sigurt.

E emëruar sipas shpikësit të saj, kirurgut torakal Henry Heimlich, kjo manovër përfshin kompresimin e diafragmës së një personi të vetëdijshëm, duke e shtyrë atë lart, duke shkaktuar kështu një kollë (e shkaktuar artificialisht nga rritja e dhunshme e presionit intratorakal) dhe nxjerrjen pasuese të trupit të huaj.

Kjo arrihet duke alternuar pesë goditje në shpinë midis shpatullave me pëllëmbën e dorës, konkretisht pjesën në bazën e gishtit të madh, të quajtur eminenca tenar, me pesë shtytje në diafragmë.

Kjo teknikë mund të kryhet si tek të rriturit ashtu edhe tek fëmijët mbi një vjeç.

Ju gjithashtu mund ta kryeni këtë manovër edhe tek vetja duke vendosur njërën dorë në grusht kundër barkut tuaj ndërsa e kapni atë me tjetrën dhe e shtyni lart me një seri shtytjesh derisa rrugët e frymëmarrjes të lirohen.

Si alternativë, mund ta mbështesni pjesën e sipërme të barkut në një objekt të fiksuar (siç është shpina e një divani ose karrigeje) dhe ta shtyni poshtë disa herë me trupin tuaj derisa kompresimet të lehtësojnë nxjerrjen e pengesës.   /os/

The post FOKUS – Çfarë është manovra Heimlich e cila u shpëton nëse mbyteni gjatë ngrënies appeared first on Agjencia Telegrafike Shqiptare.

LOS ANGELES, 11 shkurt /ATSH/ – Superylli i muzikës pop Britney Spears ka shitur të drejtat e gjithë katalogut të saj muzikor te botuesi i pavarur Primary Wave, më 30 dhjetor, për një shumë që raportohet të jetë rreth 200 milionë dollarë (rreth 146 milionë paund), sipas BBC. Detajet zyrtare të marrëveshjes dhe çmimi përfundimtar nuk janë bërë publikë.

Spears, 44 vjeçe, është e njohur për hitet që dominuan muzikën pop në dy dekadat e fundit, përfshirë “…Baby One More Time”, “Oops!.. I Did It Again”, “Toxic” dhe “Gimme More”. Primary Wave nuk i është përgjigjur kërkesave për koment, ndërsa përfaqësuesit e këngëtares kanë refuzuar të komentojnë.

Në janar 2024, Spears deklaroi se “nuk do t’i kthehej kurrë industrisë së muzikës”, ndërsa publikimi i fundit i saj ishte dueti me Elton John në vitin 2022. Primary Wave ka blerë më herët edhe të drejtat mbi katalogët e artistëve të mëdhenj si Notorious B.I.G., Prince dhe Whitney Houston.

Spears mbetet një nga artistet femra më të shitura në botë, me mbi 150 milionë disqe të shitur dhe një katalog që përfshin nëntë albume në studio që prej debutimit të saj në vitin 1999.

Shitja vjen pas një periudhe të trazuar për këngëtaren, e cila në vitin 2021 përfundoi kujdestarinë 13-vjeçare – një regjim ligjor nën të cilin kontrolloheshin financat dhe jeta e saj personale nga i ati. Në vitin 2023 ajo publikoi autobiografinë “The Woman in Me”, ku rrëfen jetën nën këtë regjim.

Në fund të vitit 2025, ish-bashkëshorti i saj Kevin Federline publikoi librin “You Thought You Knew”, duke shtuar edhe perspektivën e tij mbi vitet e marrëdhënies dhe jetën përkrah Spears.

Shitja e katalogut të Spears vjen në një moment kur edhe artistë të tjerë të mëdhenj kanë zgjedhur të shesin të drejtat e tyre muzikore. Bruce Springsteen i shiti të drejtat e tij në vitin 2021 për 500 milionë dollarë, ndërsa Justin Bieber nënshkroi një marrëveshje prej 200 milionë dollarësh në vitin 2023. Justin Timberlake, Shakira dhe shumë të tjerë kanë ndjekur këtë trend, që po shndërrohet në praktikë të zakonshme në industrinë globale të muzikës.

The post Britney Spears shet katalogun muzikor për rreth 200 milionë dollarë appeared first on Agjencia Telegrafike Shqiptare.

TIRANË, 11 shkurt /ATSh/ Në Shkodër u mbajt takimi trepalësh për bashkëpunim në fushën e mbrojtjes midis Shqipërisë, Kosovës dhe Kroacisë, ndërmjet shefave të shtabeve të tre vendeve.

Përmes një reagimi në rrjetet sociale ministri i Mbrojtjes, Pirro Vengu, theksoi rëndësinë e këtij takimi.

“Më shumë bashkëpunim ushtarak, më shumë ndërveprueshmëri, më shumë gatishmëri operacionale”, shkruan Vengu.

Ai shtoi se fokusi do të jetë në zhvillimin e stërvitjeve dhe trajnimeve të përbashkëta për përballimin e sfidave të sigurisë dhe kërcënimeve hibride.

“Viti 2026 do të presë stërvitjen e parë trilaterale, në përputhje me Konceptin Strategjik të NATO-s dhe objektivat euroatlantike”, shkruan Vengu.

Kosova, Shqipëria dhe Kroacia në këtë mënyrë po konkretizojnë në praktikë bashkëpunimin në fushën e mbrojtjes për të cilin u dakordësuan kur ministrat e Mbrojtjes nënshkruan një deklaratë të përbashkët më 18 mars në Tiranë.

/m.q/j.p/

The post Bashkëpunimi Shqipëri-Kosovë-Kroaci në mbrojtje, Vengu: Këtë vit stërvitja e parë trepalëshe appeared first on Agjencia Telegrafike Shqiptare.

MADRID, 11 shkurt /ATSH-DPA/- Kryeministri spanjoll Pedro Sánchez ka njoftuar masa për përmirësimin e sigurisë hekurudhore pak më shumë se tre javë pas një aksidenti vdekjeprurës hekurudhor që shkaktoi vdekjen e 46 personave.

Sánchez, duke folur sot në parlament, tha se ndërsa sistemi hekurudhor spanjoll nuk është perfekt, ai është “më i besueshmi” në BE dhe një nga më të mirët në botë.

Ai paralajmëroi për rrezikun e dezinformimit dhe përhapjes së panikut që pretendon se sistemi hekurudhor spanjoll është “i vjetëruar ose i pasigurt “.

Më 18 janar, dy trena me shpejtësi të lartë që udhëtonin në drejtime të kundërta u përplasën pranë Adamuz në rajonin jugor të Andaluzisë.

Dyzet e gjashtë persona vdiqën dhe më shumë se 120 të tjerë u plagosën. Një dëmtim strukturor në shinat hekurudhore dyshohet si shkaku i mundshëm.

Vetëm dy ditë më vonë, një mur mbajtës u shemb mbi shinat në Barcelonë dhe një tren udhëtarësh u përplas me mbeturinat.

Makinisti i trenit humbi jetën dhe dhjetëra pasagjerë u plagosën.

“Pas aksidenteve, frika nga udhëtimi me tren në Spanjë është rritur”, sipas sondazheve.

Lideri konservator i opozitës Alberto Núñez Feijóo tha sot në parlament se aksidentet mund të ishin shmangur. Në këtë kontekst, ai kërkoi dorëheqjen e Sánchez.

“Që kur mora detyrën në vitin 2018, numri i aksidenteve hekurudhore në Spanjë është ulur me 11%”, tha kryeministri socialist.

Në të njëjtën kohë, ai tha se investimet në infrastrukturën hekurudhore midis viteve 2018 dhe 2025 ishin pothuajse trefishuar krahasuar me periudhën midis viteve 2012 dhe 2018, nga 1,7 miliardë euro në 5 miliardë euro (2,02 miliardë dollarë deri në 5,95 miliardë dollarë).

Megjithatë, ai tha se ishte legjitime të vihej në dyshim niveli i investimeve. //a.i/

The post MADRID – Spanja njofton masa pas aksidenteve vdekjeprurëse hekurudhore appeared first on Agjencia Telegrafike Shqiptare.