Tri ditë para zgjedhjeve të 28 dhjetorit, ai deklaron për KosovaPress se ndërkombëtarëve iu duhet një partner në Kosovë, për të punuar për Planin e Rritjes së BE-së, normalizimin e marrëdhënieve me Serbinë dhe për zhvillimin e Kosovës. Diplomati francez mirëpret largimin e 50 për qind të masave ndëshkuese ndaj Kosovës, derisa është më i rezervuar në pyetjet se a do të hiqen të njëjtat në tërësi në fillim të vitit të ardhshëm.

“Mesazhi është se na duhet një partner. Ne së bashku jemi mbështetësit tuaj të huaj, miqtë tuaj të huaj. Na duhet një qeveri, një qeveri e plotë, me të cilën do të mund të punonim për Planin e Rritjes, natyrisht, por edhe për shumë çështje të tjera, qoftë për normalizimin e marrëdhënieve me Serbinë, por edhe për zhvillimin e Kosovës, legjislacionin e Kosovës”, thekson ai.
Kosova nuk arriti të formojë institucionet e reja pas zgjedhjeve të kaluara të 9 shkurtit.

Duke folur për krizën politike dhe mosformimin e institucioneve, diplomati francez thotë se një vit pa një qeveri me mandat të plotë ka qenë i vështirë për Kosovën.

“Ky vit pa një qeveri të plotë ka qenë pak i vështirë, duhet ta them. Jo se nuk kemi qenë në gjendje të punonim, siç thashë, në projektin e impiantit të trajtimit të ujërave të zeza. Ne kemi mundur të punojmë në nivel teknik. Kishte edhe iniciativa të tjera që mund t’i bënim në nivel teknik, por Kosova është një demokraci. Si demokraci, është nevoja për një qeveri të përgjegjshme para parlamentit”, thekson ai.
Bashkimi Evropian ditë më parë vendosi të heqë 50 për qind të masave, derisa u zotua për heqjen e të gjitha masave ndëshkuese ndaj Kosovës deri në fund të muajit janar 2026.

Ky zhvillim, sipas ambasadorit Guérot, është lajm i mirë për Kosovën, pasi do të ecin përpara shumë projekte të rëndësishme për vendin, të cilat ishin bllokuar vitet e fundit.

“Kemi një projekt shumë të rëndësishëm, që është ngadalësuar nga masat, për ndërtimin e një impianti të trajtimit të ujërave të zeza, i cili do të mbulonte Prishtinën, Obiliqin, Fushë Kosovën dhe Graçanicën. Ky është një projekt i përbashkët me Gjermaninë, në fakt. Pra, po pres me padurim që të përshpejtojmë këtë projekt, për të cilin nuk jemi ndalur së punuari kurrë në nivelin teknik. Është vetëm një nga projektet që kemi. Kemi projekte të zhvillimit me Agjencinë Franceze të Zhvillimit, sidomos për të ndihmuar Kosovën me Lojërat Mesdhetare 2030 dhe gjithashtu për ta ndihmuar atë në tranzicionin drejt një energjie më të pastër. Në Prishtinë këtu po shohim mjegullën, që është bërë si shkak i një energjie të papastër dhe agjencia po punon”, shton ai.

Sa i përket zotimit se deri në janar të vitit 2026 do të hiqen masat, ambasadori francez thotë për KosovaPress se vendimi politik tashmë është marrë nga Këshilli Evropian dhe se tani i takon Komisionit Evropian ta zbatojë.

“Detajet nuk i di. Nuk mund t’jua tregoj. Vendimi politik është marrë nga Këshilli i Ministrave dhe nga Këshilli Evropian dhe tani Komisioni do ta zbatojë atë. Prandaj nuk mund të hyj në detaje”, thotë ai.

Masat ndaj Kosovës ishin vendosur në vitin 2023, si përgjigje ndaj përshkallëzimit të situatës së sigurisë në veri të Kosovës, kur kryetarët shqiptarë, të dalë nga zgjedhjet që u bojkotuan nga serbët lokalë, nisën detyrën e tyre në komunat në veri./kosovapress 

Katër persona kanë mbetur të plagosur në një aksident rrugor në zonën e Kamzës, në Tiranë.

Ngjarja u regjistrua mesditën e kësaj të enjteje në lagjen e Valiasit kur një automjet tip Audi është përplasur me një tjetër mjet, ‘Toyota’.

Policia ndodhet në vendin e ngjarjes për të hedhur dritë mbi shkaqet e këtij aksidenti./abcnews.al

Vodhi gjatë natës një shumë parash dhe disa sende në një lokal në Shijak, brenda pak orësh identifikohet, kapet dhe vihet në pranga 27-vjeçari, i dyshuar si autor i vjedhjes. 27 vjeçari, dyshohet dhe si autor i disa vjedhjeve të tjera të ndodhura më parë.

Specialistët për Hetimin e Krimeve të Komisariatit të Policisë Shijak, menjëherë pas marrjes së kallëzimit për një rast vjedhjeje në një lokal në fshatin Shahinaj, organizuan punën për identifikimin, kapjen dhe vënien në pranga të autorit të këtij rasti.

Si rezultat i reagimit të menjëhershëm dhe profesional të shërbimeve të Policisë, u  identifikia kap dhe u arrestua në flagrancë shtetasi S. D., 27 vjeç, banues në Shijak, I dyshuar si autor i vjedhjes së një shume parash, pije alkoolike dhe cigare në lokalin e një shtetasi në fshatin Shahinaj.

Vijon puna për dokumentimin ligjor të vjedhjeve të tjera që mund të jenë kryer nga shtetasi S. D. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme./abcnews.al

Read More...

Kosova voton për herë të dytë këtë vit. Ekspertja gjermane për Ballkanin, Frauke Seebass kërkon dialog mes partive dhe kujton, se Kosova ka humbur shumë nga reputacioni i saj ndërkombëtar këtë vit.

DW: Për herë të dytë brenda një viti kemi zgjedhje të reja në Kosovë. Mendoni, se këto votime do të sjellin zhbllokimin e situatës në vend? Gjatë fushatës partitë e tjera sërish shprehen, se nuk do të hyjnë në koalicion me partinë “Vetëvendosje” të Albin Kurtit…

Gjithçka do të varet nga rezultati i zgjedhjeve. Vetëvendosje shpreson për një shumicë kaq të madhe sa të mund të qeverisë e vetme ose “vetëm” me mbështetjen e pakicave, të cilave Kushtetuta u garanton një numër të caktuar vendesh. Kjo taktikë dështoi pas zgjedhjeve në shkurt.

VV mund të përpiqet në rast të një rezultati zgjedhor të ngushtë, të bindë politikanë individualë nga partitë e tjera që të mbështesin koalicionin. Aleanca me PSHDK-në e vogël para zgjedhjeve (përveç Guxo dhe Alternativës), partnerë tradicionalë të LDK-së, është një tregues i kësaj. Por është gjithashtu e mundur që partitë opozitare të mund të mobilizojnë mbështetje të mjaftueshme për të formuar një qeveri pa VV-në, megjithëse shanset për këtë janë të pakta. Nëse kemi një rezultat të ngjashëm si në shkurt, një bllokim i ri nuk është i pamundur.

DW: Pse ky qëndrim kaq refuzues ndaj Albin Kurtit?

Para së gjithash ky lidhet kryesisht me qëndrimin e tij pa kompromis, me të cilin ai i shpalli luftë “elitave të korruptuara” dhe, në fakt, të gjitha partive të tjera. Para zgjedhjeve të shkurtit, VV synonte të rifitonte një shumicë konstituuese, ndërsa partitë e tjera të mëdha e pozicionuan veten para së gjithash në opozitë me Albin Kurtin, kjo çoi në një atmosferë të helmuar mes tyre. Pas farsës që shoqëroi zgjedhjen e Kryetares së Kuvendit, të cilën Kurti e interpretoi si një pengesë të qëllimshme, nuk mbeti më ndonjë hapësirë ​​për kompromis. Nëse Kurti nuk ia del të angazhohet në dialog me partitë e tjera, pritet një bllokim i mëtejshëm.

DW: Po, mungesa e vullnetit politik të partive në Kosovë solli këtë situatë të zgjedhjeve të jashtëzakonshme, por Kosova nuk e kishte një traditë të një mungese të tillë kaq të madhe të kompromisit. Si e shpjegoni këtë polarizim politik të një shkalle të tillë në vend?

Zgjedhjet e Vetëvendosjes në vitin 2021 ishte një votë proteste, pas rënies së koalicionit me LDK-në me ndihmën e SHBA-së. Ndërsa VV ishte detyruar të bënte kompromis në atë koalicion, tani ishte në gjendje të qeveriste praktikisht e pakontestueshme për katër vjet. Fushata zgjedhore që çoi në zgjedhjet e shkurtit dhe muajt e bllokimit helmuan atmosferën në parlament dhe në të gjithë vendin. Mbetet të shpresohet që partitë t’i rikthehen e të kujtojnë përgjegjësinë që kanë ndaj qytetar:ëve, pavarësisht rezultatit të zgjedhjeve.

DW: Albin Kurti është përballur gjithashtu me mjaft kritika edhe nga partnerët ndërkombëtarë të Kosovës – nën një qeveri të mundshme Kurti si mund të sigurohet progres në dialogun me Serbinë, një kusht për integrimin e mëtejshëm të Kosovës në BE?

Për BE-në, zbatimi i Marrëveshjes së Ohrit të vitit 2023 mbetet thelbësor, dhe Kosova duhet të tregojë përparim në krijimin e një Asociacionit të Komunave Serbe. Kjo është në thelb e lidhur me të gjithë progresin e Kosovës në integrimin transatlantik, që nga anëtarësimi në Këshillin e Evropës deri tek trajtimi i kërkesës për anëtarësim. Për shkak të situatës politike në Serbi, afrimi me BE aktualisht është shumë vështirë, veçanërisht nën Kurtin, por Kosova mund të bëjë përparim të konsiderueshëm si në nivel vendas ashtu edhe në politikën e jashtme me zbatimin e Asociacionit.

DW: Deri tani, Asociacioni duket i largët. A mund të quhet ai arsye kryesore pse Kosova aktualisht ka ngecur në integrimin drejt BE? Deri tani BE kishte edhe sanksione në fuqi. SHBA pezulloi dialogun strategjik.

Masat dhe bllokadat drejtohen kundër Kurtit dhe politikave të tij të njëanshme, veçanërisht mungesës së konsultimeve dhe përshkallëzimeve në komunat veriore. Në vend që të denoncojë trajtimin e pabarabartë krahasuar me Serbinë, qeveria duhet të kuptojë se është në pozicion defensiv dhe se nuk ka konsensus brenda BE-së. Masat janë ligjërisht në një zonë gri, kërkohet unanimitet për shfuqizimin e tyre, por shumë vende duan të shohin që Kosova të bëjë lëshime e para. Mund të supozohet se partnerët ndërkombëtarë do të ishin më të hapur ndaj një qeverie nën dikë tjetër përveç Kurtit.

DW: Por Kosova ka frikë se Asociacioni do të rrezikojë funksionalitetin e shtetit më të ri të Evropës. Sa real është ky rrezik, duke pasur parasysh se komunat serbe duan të arrijnë një lloj vetëqeverisjeje brenda Kosovës përmes Asociacionit?

Nuk e shoh më këtë rrezik pas vendimit të Gjykatës Kushtetuese dhe propozimeve aktuale sipas Marrëveshjes së Ohrit. Përkundrazi, besoj se Asociacioni i Komunave është një parakusht për integrimin e serbëve të Kosovës dhe demokratizimin e mëtejshëm, veçanërisht nëse edhe komunat jugore janë pjesë e tij, dhe ky integrim më i thellë mund të parandalojë gjithashtu propozime të reja për ndryshime territoriale (shkëmbim territoresh). Asociacioni i Komunave – i mbrojtur nga kushtetuta dhe e drejta e vetëmenaxhimit e sanksionuar në të – do të administronte vetë fusha të tilla si arsimi dhe planifikimi urban, por nuk mund të bllokojë vendimet kombëtare, siç është rasti, për shembull, në Republikën Srpska. Ideja e Vetëvendosjes për të detyruar integrimin përmes reciprocitetit, nga ana tjetër, ka dështuar.

DW: Ndërkohë Serbia dhe Kosova akuzojnë njëra-tjetrën për shkelje të marrëveshjeve të Brukselit të arritura për normalizimin e marrëdhënieve. Çfarë mund të bëjë BE-ja për të siguruar që një marrëveshje, pasi të nënshkruhet edhe të zbatohet vërtet?

BE-ja në fakt ka shumë leva për të sjellë progres në zbatimin e marrëveshjeve, por mungojnë vullneti politik dhe, mbi të gjitha, uniteti. Prandaj, shoh më shumë potencial veprimi në një koalicion shtetesh që marrin drejtimin këtu dhe ofrojnë stimuj pozitivë dhe negativë. Megjithatë, duke pasur parasysh situatën aktuale në Serbi, kjo strategji do të vinte vite me vonesë, nuk shoh që Serbia do të zbatojë marrëveshjet në vitet e ardhshme.

DW: Kosova mbetet vendi më i varfër në Evropë, i vetmi shtet ballkanik pa statusin kandidat për anëtarësim në BE. A ka qenë BE shumë e ashpër me Kosovën, apo arsyet duhen kërkuar brenda politikave të qeverisë aktuale?

Kjo është komplekse, por thënë përmbledhtazi, ka një të vërtetë tek të dyja. Për mua, pika e kthesës ishte viti 2018, kur shtetet anëtare të BE-së refuzuan liberalizimin e vizave për arsye politike të brendshme. Perceptimi në Kosovë ishte se ishin bërë kaq shumë kompromise pa rezultate konkrete, dhe VV e shfrytëzoi këtë atmosferë të krijuar. Nga ana tjetër, veprimet e njëanshme të Kurtit dhe bllokimi i muajve të fundit kanë luajtur një rol të madh në atë që edhe partnerë tradicionalë të Kosovës ndihen të ofenduar, reputacioni ndërkombëtar i Kosovës ka pësuar dëme të konsiderueshme.

Ekspertja për Ballkanin, Frauke Seebass aktualisht është studiuese e ftuar në Zyrën e Brukselit në Fondacionin e njohur gjerman “Shkenca dhe Politika”, fokusi i punës së saj është Ballkani dhe zgjerimi i BE-së, studimet për paqen dhe konfliktet./DW

Macaulay Culkin ka folur së fundmi për jetën e tij larg vëmendjes publike, pasi u tërhoq nga aktrimi në moshën 14-vjeçare.

Culkin, i cili nisi karrierën që fëmijë dhe u shndërrua në një yll global me filmat “Home Alone” (1990) dhe “Home Alone 2: Lost in New York” (1992), vazhdoi më pas me role në “The Good Son”, “The Girl” dhe “Richie Rich” (1994), përpara se të merrte një pushim të gjatë nga industria e filmit.

Në emisionin ‘Mythical Kitchen,’ Culkin tregoi se vendimi për t’u larguar nga aktrimi erdhi nga dëshira për të pasur një jetë normale.

“Çfarë doja ishte të isha me njerëz të moshës sime. Duhet ta mbani mend: shumica e gjërave që kam bërë si fëmijë nuk ishin punë në grup. Isha vetëm unë,” u shpreh ai.

Ai shtoi se shpesh njerëzit e pyesin për bashkëpunimin me aktorë të njohur, si Joe Pesci. “Më thonë: ‘Si ishte të punoje me Joe Pesci?’ Dhe unë u përgjigjem: ‘E keni parë filmin?’ Kemi ndoshta dy skena bashkë. Pastaj jam unë, vetëm, në një shtëpi – pothuajse vërtet ‘Home Alone’.”

Duke folur më gjerë për pauzën nga aktrimi, Culkin tha: “Doja të dilja, të takoja vajza, të rrija me njerëz të moshës sime. Doja të shkoja në festa dhe të bëja gjëra normale. Nuk mund t’ju them sa shumë Bar Mitzvah kam humbur.”

Megjithatë, për famën ai theksoi se ajo nuk mund të zhbëhet: “Nuk mund ta ç’bësh atë që ka ndodhur. Nuk mund ta kthesh dhëmbëzën pas.”

Pas një mungese të gjatë, Culkin u rikthye në aktrim në vitin 2003 me filmin biografik “Party Monster”.

Në jetën personale, Culkin u fejua me aktoren Brenda Song në janar të vitit 2022. Çifti ka dy djem, Dakota dhe Carson./abcnews.al

SHQIPËRI– Aeroporti Ndërkombëtar i Tiranës ka pritur fluks udhëtarësh gjatë nëntorit. Sipas të dhënave rezulton se janë përpunuar mbi 765 mijë pasagjerë të ardhur nga 67 destinacione.

Rritja e fluksit lidhet drejtpërdrejt si me vijimin e kërkesës turistike pas sezonit veror, por edhe me zgjerimin e destinacioneve te fluturimeve.

Siç ka shumë shqiptarë që zgjedhin të kalojnë pushimet jashtë vendit, ka edhe të huaj që vijnë në Shqipëri për të shijuar ditët e fundvitit.

Eksperti për turizmin, Isa Krasniqi, i ftuar në “Money Report” u shpreh se për festat e fundvitit, qytetet j metë frekuentuara nga Shqiptarët janë Vjena, Praga dhe Roma. Megjithatë ka prej atyre që zgjedhin që pushimet t’i kalojnë në vende të ngrohta, siç është Dubai.

“Shqiptarë kanë zgjedhur këtë vit më shumë, tre qytete si Vjena, Praga, dhe Roma. Të tre këto qytete kanë linja ajrore direkte, por janë dhe qytetet që të ofrojnë atmosferë të madhe sa i përket festave të fundvitit. Ka edhe fluturime për në vende të nxehta, siç është dhe Dubai, por ka dhe prej atyre që duan të kalojnë festat e fundvitit në Shqipëri”, tha ai.

I pyetur se cilat janë qytetet më të kërkuara brenda vendit për të kaluar festat, eksperti u shpreh se Korça është dominuesja absolute, por megjithatë vitet e fundit ka një interes të shtuar për Beratin dhe Shkodrën.

“Korça është vend i parë për shumë arsye, në këtë vit sidomos ka hyrë shumë vizita e Beratit, por edhe e Shkodrës. Jo vetëm vizita, por po preferohet dhe akomodimi në këto dy vende. Gjithashtu edhe Vlora mbetet një destinacioni”, tha ai.

Ai theksoni se Shqipëria duhet të ketë ofertë gjithëvjetore në turizëm, pasi ky sektor shprehet Krasniqi ka shumë potencial dhe të gjithë duhet të punojmë për këtë objektiv.

“Ka shumë gjermanë, të cilët po e frekuentojnë në pjesën e fundit të vitit, për të festuar vitin e ri. Ka edhe nga Spanja, që vijnë dhe janë entuziastë për vizitën e tyre në Shqipëri. Janë mahnitur kur kanë parë bukuritë e vendit tonë.

Ne duhet të shkojmë në një turizëm gjithëvjetor. Duhet ta ngremë turizmin dhe të jetë gjithëvjetor. Të investojmë në promovimin e Shqipërisë, por edhe përmirësimin e infrastrukturës. Të kemi çfarë të themi tek të huajt”, tha ai./abcnews.al

Kryetari i Fenerbahçes, Sadettin Saran, u la i lirë nën kontroll gjyqësor më 25 tetor, pas ndalimit të tij, pasi një test droge rezultoi pozitiv. Rasti vjen në kuadër të një hetimi të gjerë që prej javësh ka tronditur vendin, ku janë ndaluar prezantues televizivë, gazetarë, këngëtarë, aktorë dhe influencerë të rrjeteve sociale, nën akuza që përfshijnë prodhimin dhe trafikimin e narkotikëve.

Saran u mor fillimisht në pyetje më 20 dhjetor si pjesë e hetimit dhe më pas iu nënshtrua testeve toksikologjike. Ai u ndalua më 24 dhjetor, vetëm disa orë pasi ekspertët mjeko-ligjorë zbuluan gjurmë narkotikësh në mostrat e flokëve të tij.

Sipas raportit zyrtar, në flokët e tij u gjet kokainë, ndërsa testet e gjakut, urinës dhe thonjve rezultuan negative. Deklarata e tij para autoriteteve më 25 dhjetor thuhet se zgjati rreth dy orë.

Saran u lirua nën kontroll gjyqësor dhe do të jetë i detyruar të paraqitet pranë autoriteteve dy herë në javë. Anëtari i bordit të Fenerbahçes, Ertan Torunoğulları, së bashku me disa tifozë, u mblodhën në Gjykatën Çağlayan në Stamboll për të shprehur solidaritet me Saranin, nën masa të shtuara sigurie.

Ndërkohë, bordi ekzekutiv i klubit zhvilloi edhe një mbledhje të jashtëzakonshme. Në këtë takim nuk pritej të merrej ndonjë vendim lidhur me drejtimin e klubit; ai u përshkrua si një rishikim i procesit në vazhdim dhe i hapave të mundshëm, në varësi të zhvillimeve të ardhshme.

Fenerbahçe publikoi gjithashtu një deklaratë duke shprehur mbështetje të plotë për Saranin dhe duke siguruar tifozët se aktivitetet e klubit do të vazhdojnë pa ndërprerje.

Shqipëria do të ketë avionin e vet shtetëror. Turqia i ka dhuruar vendit tonë një avion qeveritar Airbus A319 VIP, me vlerë rreth 11.9 milionë dollar, në kuadër të forcimit të marrëdhënieve diplomatike dhe bashkëpunimit strategjik mes dy vendeve.

Avioni, i konfiguruar për përdorim qeveritar dhe i operuar më herët nga Turkish Airlines, do t’i kalojë shtetit shqiptar pa asnjë kosto financiare ndërsa shpenzimet e tranferimit të pronësisë do të mbulohen nga pala turke.

Mediat turke raportojnë se vendimi është publikuar në fletoren zyrtare, në kuadër të marrëveshjes dypalëshe, që parashikon se dhurimi ka për qëllim të përforcojë “marrëdhëniet miqësore dhe bashkëpunimin e ngushtë” mes Turqisë dhe Shqipërisë, të vendosura fillimisht me Traktatin e Miqësisë, Fqinjësisë së Mirë dhe Bashkëpunimit të vitit 1992, ndërsa të dyja palët shprehin dëshirën për t’i forcuar më tej këto lidhje përmes bashkëpunimit teknik dhe atij në fushën e mbrojtjes.

Marrëveshja pasqyron angazhimin e përbashkët të dy vendeve për thellimin e partneriteteve institucionale në fushën e aviacionit civil, logjistikës së mbrojtjes dhe sektorëve të tjerë strategjikë, duke shërbyer njëkohësisht si një gjest simbolik i mbështetjes së Turqisë për zhvillimin rajonal dhe përpjekjet integruese të Shqipërisë./abcnews.al

Vetëm në një muaj aeroporti Ndërkombëtar i tiranës ka pritur rreth 765 mijë e 890 pasagjerë.Kjo konfirmon interesin e lartë për Shqipërinë edhe përtej sezonit veror por edhe udhetimet për festa.

Destinacionet më të  frekuentuara gjatë kësaj periudhe rezultojnë Milano, Londra, Roma, Bolonja dhe Pisa, duke reflektuar lidhjet e forta me tregjet kryesore europiane.

Ndërsa në total udhëtimet janë realizuar në drejtim të 67 dstinacioneve duke konfirmuar edhe shtimin e linjave të fluturimit. Të dhënat për muajin nëntor konfirmojnë se Aeroporti Ndërkombëtar është një ndër portat kryesore të hyrjeve për turistët e huaj.

Ndërkohë që Shqipëria priti 11.7 milione turistë në 11 muaj. Të dhënat e INSTAT tregojnë se nëse bëjmë një krahasim me të njëjtën periudhë të një viti më parë rezulton se rritja wshtw 6.6% ose rreth 700 mijë turistë më tepër.

Këto të dhëna konfirmojnë vijimin e një fluksi të lartë hyrjesh të turistëve të huaj në vend, të mbështetur kryesisht nga tregjet evropiane duke konsoliduar rolin e Shqipërisë si destinacion turistik dhe rajonal gjatë gjithë vitit.

Sipas INSTATpërgjatë nëntorit 96% e hyrjeve të shtetasve të huaj në Shqipëri kanë qenë nga rajoni i Europës duke kryesuar europa jugore  dhe vendet si Italia, Spanja, Portugalia ndjekur nga Europa Perëndimore.

Po ashtu Ekonomia shqiptare ka përfituar të ardhura rekord nga turistët gjatë këtij viti. Sipas të dhënave të Bankës së Shqipërisë në periudhën janar-shtator tregojnë se shpenzimet e turistëve të huaj rezultojnë 4.42 miliardë euro rreth 560 milionë euro më tepër./abcnews.al

Besimtarët e krishterë kremtojnë sot festen e krishtlindjes, ditën më të shënuar të kalendarit fetar.  Në të gjitha kishat dhe katedralet mbahen mesha dhe thuhen lutje për paqe, mbarësi e dashuri.

Sot në mëngjes u mbajt mesha në Katedralen Ortodokse Ngjallja e Krishtit në Tiranë, ndërsa mbrëmë besimtaret katolike ndoqën meshën e rastit ne Katedralen e Shën Palit.

Festa e krishtlindjes vazhdon ne tryezat familjare.

Në një komunikim me News Line në ABC News, at Nikolla Kodheli tha se katedralja ortodokse ishte e mbushur me besimtarë, të cilët u lutën për më shumë shëndet, paqe dhe dashuri në gjirin e tyre familjar.

“Katedralja ishte plot e përplot. Njerëzit vijnë për t’u lutur dhe për të kërkuar  bekimin e perëndisë. Lutjet janë të shumta, janë private, por shpresa mbetet që të janë më shumë dashuri dhe bekimin e perëndisë dhe dashuri me njëri tjetrin. Besoj se dashuria është kërkesa më e madhe. Nënat vijnë për fëmijët, nënat vijnë për fëmijët, prindërit dhe të dashurit e tyre. Njeriu i rikthehet përsëri perëndisë. Shpresa tek perëndia mbetet e gjallë. Është lindja e shpëtimtarit,  perëndia bëhet njeri. Krishti bëhet njeri dhe i dhuron botës natyrë njerëzore dhe ne për ta imituar atë për t’u bërë vëllezër me të. Të largohen nga lajmet e tepërta, të kenë shpresë tek Zoti, të përqendrohen te vetja e tyre dhe t’i japin mundësi shoqërisë dhe politikës që të reflektojë, sepse një shoqëri nuk përbëhet vetëm nga njerëz fetarë, por edhe pushtetarë. Shumë të rinj vijnë e pagëzohen dhe bëhen pjesë e kishës, Këtë nuk e shikoj vetëm tek komuniteti ortodoks, por edhe tek komunitetet e tjera”, apeloi ai.

Ai u bëri apel besimtarëve të besojnë më shumë tek Perëndia dhe kërkoi prej tyre të përçojnë më shumë dashuri për familjen dhe për shoqërinë në tërësi.

“Urimi im është që të besojmë më shumë tek perëndia. Apeli është të duam njëri tjetrin, të duam vendin dhe të lutemi për të gjithë. Më shumë shpresë dhe dashuri. Të kemi më shumë dashuri në familjet tona dhe ta shprehim këtë dashuri edhe tek të tjerët “,tha ai.

Monedha europiane ka vijuar të dobësohet përballë lekut në javët e fundit të këtij viti. Sipas kursit zyrtar të Bankës së Shqipërisë këtë javë monedha europiane  po këmbehet me 96.46 lekë një prej niveleve më të ulëta të regjistruara ndonjëherë. Nëse bëjmë një krahasim me të njëjtën periudhë të një viti më parë monedha europiane ka pësuar një dobësim me gati 2 pikë pasi këmbehej me rreth 98,46 lekë.

Por pavarësisht kësaj rënia vjetore e kursit mbetet  në nivele më të stabilizuara krahasuar me vitet e mëparshme. Kundrejt të njëjtës datë të vitit të kaluar, kursi Euro-Lek rezulton në rënie me 2.1%.

Kjo situatë sipas agjentëve të këmbimit valutor ka ardhur pasi  në ditët e fundit në treg po qarkullon sasi e shtuar  e valutës së huaj, çka përfaqëson një tendencë pak a shumë të zakonshme sezonale. Kjo ndikohet më së shumti nga kthimi i emigrantëve për festat e fundvitit duke sjellë më të ardhura pranë familjeve të tyre.

Banka e Shqipërisë planfikon të tërheqë deri në 450 milionë euro nga tregu vitin e ardhshëm. Ajo do të shtojë ndërhyrjet,   ku sipas kalendarit te publikuar pritet te terhiqen rreth 100 milione euro me shume se planifikimi per kete vit. Nderhyrjet kryhen per efekt te reserves valutore por edhe me qëllim stabilizimin e kursit te kembimit.

Banka Qendrore ka kryer blerje të konsiderueshme të valutës edhe gjatë vitit 2025 dhe deri në fund të 9-mujorit, këto blerje kishin vlerën e rreth 800 milionë eurove.

Read More...

Read More...

Është mishërimi i përsosmërisë. Luka Doncic gjithnjë e më shumë spikat si fenomeni i NBA-së, dhe statistikat e fundit e vërtetojnë këtë ndjesi. Siç njofton vetë liga më e fortë e basketbollit në botë, ylli nga Sllovenia është lojtari i saj më i ndjekur në rrjetet sociale.

Po flasim për këtë sezon, deri në këtë moment, dhe Luka është i ndjekur nga 845 milionë njerëz në platformat e ndryshme të mediave sociale. Në vend të dytë, me diferencë jo të vogël, është francezi ende tepër i ri, Viktor Uembanijama.

Ky është fenomeni I dytë I NBA-së, e ndoshta me kalimin e viteve mund të bëhet figura kryesore. Talenti i madh i San Antonios ka 708 milionë ndjekës në platformat e mediave sociale.

Pas tij vjen amerikani I parë, dhe njëri nga basketbollistët më të dashur jo vetëm në Shtetet e Bashkuara, por në të gjithë botën. Stef Kërri, njëri nga realizuesit më të mirë nga distanca për të gjitha kohët, është I treti me 703 milionë ndjekës, ndërsa po luan një tjetër sezon të madh me Golden Stejtin.

Edhe më I habitshëm është fenomeni i vjetër i NBA-së, Lebron Xhejms. “Mbreti i basketbollit” mban vendin e katërt në këtë gjysmë sezoni me 641 milionë ndjekës, duke lënë pas më të mirin e kampionatit sezonin e kaluar, Shej Gilgës Aleksandër dhe kapitenin e Denverit, Nikola Jokiç, që kanë më pak se 500 milionë ndjekës./abcnews.al

Është padyshim një tjetër pretendent i fortë. Algjeria hyn në këtë Kupë të Kombeve të Afrikës si ekip për t’u mundur, dhe për të përfunduar të paktën në podium, bashkë me Marokun dhe Senegalin, e madje më lart se Egjipti i yllit Mohamed Salah.

Kredencialet e saj i vërtetoi plotësisht me fitoren 3-0 ndaj Sudanit në nisje të këtij turneu. Në një përballje thuajse pa histori në stadiumin e Mulla Hasanit në kryeqytetin e Marokut, Rabat, më I miri ishte ai që pritej.

Rijad Mahrez, ish-futbollist i Mançester Sitit, dhe sot në Arabinë Saudite tek Al Ahli, realizoi dy herë. Golat e tij u shënuan që në minutën e dytë, e pastaj pasi kaloi një orë lojë.

Ibrahim Maza fiksoi shifrat 3-0 në 85’.

Algjeria pati epërsi me katërfishin e gjuajtjeve në kuadrat dhe gati 60 për qind mbajtje topi. Me sukses e nisën Kupën e Kombeve të Afrikës edhe dy kandidatë të tjerë për titullin.

Bregu I Fildishtë kaloi vetëm 1-0 Mozambikun, duke iu falur golit të shënuar nga Amad Diallo në 49’, pra me të nisur pjesa e dytë.

I njëjti rezultat edhe për Kamerunin, i cili ka emër të madh në Afrikë, por që nuk është në nivelet e dikurshme. Suksesi ndaj Gabonit ishte 1-0, pasi Eta Jong shënoi që në minutën e gjashtë, ndërsa përballja ishte shumë e vështirë./abcnews.al

Nuk ka qetësi në futbollin turk. Pas skandalit të basteve, tronditja tjetër e madhe vjen nga droga. Presidenti i Fenerbahçes, një nga klubet më të mëdhenj të Turqisë, Sadettin Saran, është arrestuar në Stamboll si pjesë e një hetimi që përfshin figura të argëtimit dhe medias. Transmetuesi shtetëror “TRT” raporton se Saran, një shtetas turk dhe amerikan, u arrestua pasi testet mjeko-ligjore zbuluan praninë e narkotikëve në mostrat e flokëve të tij.

Javën e kaluar, ai u thirr për të dëshmuar para prokurorëve dhe u dërgua në një strukturë mjekësore mjeko-ligjore për të dhënë mostra flokësh dhe gjaku. Hetimi po mbikëqyret nga Zyra e Prokurorit të Përgjithshëm të Stambollit. Që nga fillimi i dhjetorit, ai ka çuar në arrestimin e më shumë se një duzine personash me akuzën e prodhimit dhe trafikimit të drogës. Midis të ndaluarve janë prezantues televizivë, gazetarë, këngëtarë, aktorë dhe personalitete të mediave sociale. Ata akuzohen për krime që variojnë nga prodhimi dhe trafikimi i drogës deri te ndihma dhe nxitja e prostitucionit. Shumë prej tyre i janë nënshtruar analizave të gjakut dhe flokëve për të verifikuar përdorimin e drogës

Sadettin Saran, i lindur në Denver, i zgjedhur president i Fenerbahçes në shtator, u mor në pyetje javën e kaluar me akuzat për furnizim dhe lehtësim të përdorimit të narkotikëve. Fenerbahçe lëshoi ​​një deklaratë duke shprehur mbështetjen e saj për Saran dhe duke siguruar tifozët se aktivitetet e klubit do të vazhdojnë pa ndërprerje.

“Kemi besim të plotë se presidenti ynë do ta kapërcejë këtë proces me të njëjtën mendje të shëndoshë dhe guxim që ka treguar gjithmonë”, deklaroi klubi në X. Kjo nuk është hera e parë që Fenerbahçe merr goditje të tilla. Ish-presidenti i klubit, Aziz Yildirim, kaloi më shumë se një vit në burg në vitin 2012 për akuzat e trukimit të ndeshjeve, përpara se të lirohej nga akuzat kur një rigjykim zbuloi se çështja e mëparshme ishte ndikuar nga gjyqtarë, prokurorë dhe oficerë policie të korruptuar. Ekipi ishte gjithashtu i përfshirë në një hetim tjetër për bastet e paligjshme dhe trukimin e ndeshjeve në futbollin turk./abcnews.al

Kur je në dorë të dikujt, jo gjithmonë është mirë. Në futboll dhe në sport në përgjithësi ndodh shpesh që një Mesi e Maradona, Majkëll Xhordan apo Lebron Xhejms të jenë vendimtarë, dhe në këtë situatë ka qenë Reali në 2025.

Skuadra më e madhe në botë ka varësi të plotë nga golat e shënuar nga Kilian Mbape. Kapiteni i Francës ka realizuar 59 rrjeta në këtë vit kalendarik, u mbyll nga ana sportive me ndeshjen ndaj Seviljes.

Diferenca me yjet e tjerë të Madridit është me të vërtetë e jashtëzakonshme. Ndjekësit më të afërt të Mbapesë tek Reali në 2025 janë Xhud Belingham dhe Vinisius. Anglezi dhe braziliani kanë realizuar vetëm nga 13 gola secili, pra me një distancë prej 46 rrjetash.

Jo vetëm kaq, por Mbape ka po aq gola sa 8 shënuesit madrilenë që vijnë pas tij këtë vit, përfshi Rodrigon, Arda Gylerin, Endrikun, Gonzalon, Valverden e Brahim Diazin. Kjo shpjegon ndoshta faktin që Reali nuk fitoi dot asnjë trofe këtë sezon, dhe duket se do ta ketë të vështirë edhe në 2026.

Mbape u shpall edhe shënuesi më i mirë në Europë me 66 rrjeta në 67 ndeshje, duke përfshirë edhe kombëtaren, e duke lënë në vend të dytë yllin e Anglisë dhe të Bajernit, Harri Kejn, me 60 gola në 65 ndeshje./abcnews.al

Të dalluar kanë qenë shumë, por ndoshta jo aq sa ata. Mirlind Daku dhe Medon Berisha, të dy shqiptarë me origjinë nga Kosova, kanë shkëlqyer mbi të tjerët gjatë kësaj gjysme sezoni në Europë.

Për shërbimet e tyre për ekipet kanë fituar edhe çmimin e rëndësishëm të lojtarit të ndeshjes, dhe Daku e Berisha ia kanë dalë më shumë sesa të gjithë futbollistët e tjerë të kombëtares.

Sulmuesi që luan me Rubinin e Kazanit është shpallur 4 herë Lojtari i Ndeshjes këtë sezon në Premier Ligën e Rusisë. Kjo ka ndodhur në sfidat ndaj Ahmatit të Groznit, Dinamos së Mahaçkallës, Orenburgut dhe Soçit.

Ylli kuqezi është kandidat për Këpucën e Artë këtë edicion në kampionatin rus, duke shënuar 9 gola në 17 javë, plus një asist, vetëm dy gola larg vendit të parë.

Medon Berisha ka qenë gjithashtu tepër I dalluar, madje në një kampionat shumë më të vështirë, në Serinë A të Italisë.

Për nivelin e paraqitur, vlera e kartonit iu rrit nga 1.5 në 6 milionë euro pikërisht në 23 dhjetor nga agjencia e njohur “transfermarkt”.

Mesfushori kuqezi e ka fituar tri herë çmimin e futbollistit të ndeshjes në kampionatin italian.

Kjo ka ndodhur fillimisht në duelin ndaj Fiorentinës, kur shënoi edhe golin e fitores, pastaj kundër Veronës, dhe për të tretën herë u veçua në sfidën përballë Torinos, duke shërbyer dy asistë.

Berisha ka dy gola e tre asistë në 13 ndeshje në Serinë A. /abcnews.al

Nuk është në nivelin maksimal, por do të jetë aty vitin e ardhshëm. Jasir Asani po bën maksimumin që skuadra e tij, Esteglal, të realizojë objektivat e sezonit, dhe një dorë e dha në Championsin e dytë të Azisë.

Futbollisti kuqezi, që vjet ishte ndër më të mirët në Championsin e parë, me 9 gola në 10 ndeshje, realizoi në fitoren 3-0 që iranianët arritën në fushën e rivalit direkt, Al Muharrak.

Dueli në Bahrein nuk pati histori, dhe ky sukses siguroi kualifikimin e Esteglalit për në raundin e dytë, ndërsa ishte një hakmarrje për humbjen 0-1 të pësuar në Teheran në sfidën e grupit më herët.

Shqiptari shënoi sipas mënyrës së tij, dhe tani ka dy gola e një asist në këtë Ligë të Kampionëve në gjashtë ndeshje, ndërsa ka qenë gjithmonë titullar si dhe ka luajtur 90 për qind të minutave të mundshme.

Përtej rrjetave dhe asisteve për shokët, Asani ka dhënë edhe më shumë kontribut sidomos në lojën sulmuese, në ndërtimin e aksioneve, që në fund kanë përfunduar me top në rrjetë.

Edhe sezoni në total ka qenë shumë i mirë për yllin kuqezi. Shqiptari nga Shkupi ka 10 gola gjithsej, nga të cilët gjashtë në kampionatin e Iranit, dy në Champions dhe dy në Kupën e Iranit, ndërsa ka shërbyer dy asiste.

E gjitha kjo në 19 ndeshje, duke qenë shënuesi më i mirë i Ligës Profesioniste bashkë me dy të tjerë, ndonëse Esteglal duhet të rikthehet tek fitoret për të pretenduar titullin, duke qenë 5 pikë prapa kryesuesit Sepahan./abcnews.al