Në vitin 2024, në Bashkimin Evropian kishte 737,142 autobusë dhe autobusë motorik (duke përfshirë trolejbusë dhe minibusë), 1,6 autobusë dhe autobusë motorik në 1000 banorë. Maqedonia e Veriut me 3,690 autobusë ose me nga 2 autobusë në 1000 banorë është pak mbi mesataren evropiane.

Numri më i madh i autobusëve dhe autobusëve motorik në 1000 njerëz është vërejtur në Maltë (4,6), pastaj vijojnë Luksemburgu (4,0) dhe Estonia (3,7). Normat më të ulëta janë vërejtur në Holandë (0,5), Gjermani (1,0) dhe Austri (1,2), tregojnë të dhënat për pajisjen transportuese të publikuar nga Eurostat.

Në rajon më së shumti autobusë në 1.000 banorë ka Shqipëria (3,8), Rumania (3) dhe Bullgaria (2,8). Pastaj vijon Mali i Zi (2,4), Greqia (2,6), Serbia (1,8), Kroacia (1,5) dhe Bosnja e Hercegovina (1,3).

Kjo normë e motorizmit ka mbetur e qëndrueshme në 10 vitet e fundit, ndërsa numri i automobilave udhëtues në 1000 banorë dukshëm është rritur në periudhën e njëjtë (nga 506 në vitin 2014 në 578 në vitin 2024). Maqedonia me 319 automobila në 1000 banorë mbetet nën mesataren evropiane, edhe pse ka rritje të dukshme në dhjetë vitet e fundit, nga 180 në vitin 2014.

Sipas Eurostat, në mesatare 5,1% e parkut vozitës të autobusëve dhe autobusëve motorik është rinovuar në mbarë BE-në në vitin 2024, ndërsa Maqedonia me 379 autobusë të rinj në vitin 2024 ka rinovuar parkun vozitës prej 10,2 për qind.

Shkalla e rinovimit përfaqëson raportin e automjeteve të regjistruara rishtazi në të gjitha automjetet, duke përjashtuar automjetet e dorës së dytë. Në BE, shkalla më e lartë e rinovimit është në Luksemburg, ku 11.6% e flotës u rinovua, 9.6% në Holandë dhe 9.5% në Austri. Në të kundërt, vetëm 0.7% e flotës në vitin 2024 u rinovua në Bullgari, 2.4% në Poloni dhe 2.5% në Hungari.

Përpjekjet për përmirësimin e cilësisë së ajrit, veçanërisht në mjediset urbane, patën ndikim pozitiv në pjesën e autobusëve dhe autobusëve motorik me zero emisione mes të gjitha regjistrimeve të reja të automjeteve. Në nivel të BE-së, në vitin 2024, kjo pjesë ishte më e madhe se sa tek automobilat e rinj udhëtues (17,8% kundrejt 13,5%), që përgjigjet me 6.746 autobusë të saporegjistruar dhe autobusë me zero emisione.

Në Maqedoni sipas të dhënave të Entit Shtetëror të Statistikës në vitin 2024 nga 3.690 autobusë, 3.609 ishin me motorë dizel (97,8%) 63 benzin-gaz (1,7%) dhe vetëm 15 elektrik (0,4%).

FC Shkupi po përjeton një nga sezonet më të vështira në futbollin elitar të Maqrdinisë së Veriut. Ekipi nga Çairi është i bllokuar në vendin e fundit në tabelë me vetëm një pikë të fituar pas 16 javë të luajtura, njofton Telegrafi.

Pas përfundimit të gjysmësezonit ka folur trajneri Minas Osmani, i cili ka shprehur hapur dëshpërimin nga situata në klubin që ka katër tituj kampion.

"Për ne si klub, ky gjysmësezon ka qenë zhgënjyes dhe i vështirë. FC Shkupi dhe tifozët tanë nuk e meritojnë këtë situatë. Megjithatë, shpresojmë të fillojmë me energji të re dhe forcë më të madhe për të rikthyer rezultatet dhe krenarinë që ky klub meriton", tha në fillim Minas Osmani, trajneri aktual i Shkupit.

Trajneri Osmani beson se FC Shkupi do të reagojë në merkaton e janarit dhe do të sjellë lojtarë cilësorë për të dalë nga zona e rrezikut.

"Jemi të përqendruar maksimalisht në hapjen e merkatos. Shpresojmë se do të arrijmë të sjellim disa lojtarë cilësorë që do ta forcojnë ekipin në ato fusha ku kemi më shumë nevojë. Sa i përket lojtarëve që kemi tashmë në ekip, do të zhvillojmë biseda individuale me secilin prej tyre dhe së bashku do të vlerësojmë hapat e mëtejshëm."

Minas Osmani thekson se qëllimi kryesor i Shkupit është mbijetesa në futbollin elitar vendas.

“Qëllimi ynë është që FC Shkupi të hyjë në gjysmën e dytë të sezonit sa më i kompletuar dhe më konkurrues”, përfundoi trajneri Minas Osmani.

FC Shkupi do ta luajë ndeshjen e parë të sezonit pranveror në transfertë, më 15 shkurt 2026, në stadiumin e Makedonija Gj.P. /Telegrafi/

Ali Ahmeti sot nga Shkupi bëri thirrje që të shpallen të pafajshëm ish-krerët e UÇK-së, Hashim Thaçi, Kadri Veseli, Jakup Krasniqi, Rexhep Selimi, si dhe ushtarë tjerë që akuzohen nga Gjykata e Hagës. Ahmeti në fjalimin e tij nga sheshi "Skënderbeu", tha se ish-krerët e UÇK-së akuzohet për vepra që asnjëherë nuk i kanë bërë, duke thënë se kanë luftuar për lirinë e popullit.

Ahmeti gjithashtu tha se Gjykata e Hagës duhet t'u jep mirënjohje e lëvdatë ish-krerëve të UÇK-së, e jo t'i dënojë.

"UÇK dënonte çdo veprim fashist dhe veprim kundër popullatës civile. UÇK e shpalli veten ushtri e popullit që lufton për lirinë e popullit të vet. Është e vërtetë e madhe që objektivin e madh nuk e arritëm për të ndërtuar hierarki, prandaj nuk do të donim që akuzat që bëhen për shtëpinë e verdhë, akuzat që bëhen për ndërmarrje të përbashkët kriminale të njollosin historinë e luftës çlirimtare".

"Ky proces duhet të marrë epilog të pafajësisë, pasi Hashim Thaçi, Kadri Veseli, Jakup Krasniqi, Rexhep Selimi dhe ushtarë që ndodhen pas grilave, akuzohen për vepra të pabëra. Gjithë procesin e kemi përcjellë dhe na dridhej lëkura kur dëgjonim akuza që neve na i kishte bërë Beogradi dhe Moska, si kriminel e banditë. Ne e kemi dashur lirinë, por jo duke ua mohuar lirinë popuj tjerëve", tha Ahmeti.

Ai gjithashtu theksoi se protesta e sotme nuk është kundër shtetit të Maqedonisë, duke shtuar se ish-krerët e UÇK-së që ndodhen në Hagë kanë kontribuar për stabilitetin dhe të ardhmen e Maqedonisë së Veriut.

Ai poashtu përmendi dëshmitë e gjeneralit Wesley Clark, James Rubin dhe Christofer Hill, për të cilët shprehi mirënjohje

"Jemi mirënjohës ndaj dëshmisë së gjeneralit Clark, mirënjohës ndaj James Rubin, si dhe ambasadorit që punoi shumë në rajon për paqe dhe stabilitet Christofer Hill", tha Ahmeti./Telegrafi/

Mijëra protestues në sheshin “Skënderbeu” në Shkup, kanë protestuar në mbrojtje të ish-krerëve të Ushtrisë Çlirimtare të Kosovës.

Protesta e thirrur nga OVL-UÇK ka nisur në ora 13:00 në sheshin “Skënderbe” në Shkup.

Ajo është përkrahur nga shumë figura politike, nisur nga kryetari i Bashkimit Demokratik për Integrim, Ali Ahmeti, i cili ka bërë thirrje për pjesëmarrje masive në tubimin e sotëm.

Protesta ka karakter paqësor, ndërsa kryeministri i Maqedonisë së Veriut, Hristijan Mickoski, tha se edhe pse nuk e përkrah protestën do të mundësojë siguri dhe mbarëvajtje të qetë të tubimit.

Nis protesta në Shkup në mbrojtje të krerëve të UÇK-së, pamje nga sheshi "Skënderbeu" telegrafi.com

Shkupi pritet të vishet sot kuqezi, ndërsa mijëra qytetarë do të mblidhen në një protestë madhështore në mbështetje të ish-drejtuesve të Ushtrisë Çlirimtare të Kosovës që po gjykohen në Hagë. Tubimi, me moton “Liria ka emër”, organizohet nga Organizata e Veteranëve të Luftës së UÇK-së dhe do të nisë në orën 13:00 në sheshin “Skënderbeu” […]

The post “‘Liria ka emër’, shqiptarët në Shkup protestojnë në mbështetje të ish-krerëve të UÇK-së appeared first on BoldNews.al.

Tifo-grupi i KF Shkupit "Shvercerat" kanë njoftuar se do ta mbështesin protestën e 13 dhjetorit (e shtunë) në përkrahje të ish-krerëve të Ushtrisë Çlirimtare të Kosovës.

Në një njoftim nga ky tifo-grup thonë se "kjo nuk është betejë individuale e as politike, por betejë kombëtare".

"Shvercerat Shkup do ta mbështesin protestën e së shtunës ndaj Gjykatës Speciale me 13 dhjetor në sheshin Skenderbeu në Shkup. Jo vetëm se shumë anëtarë të shvercerave kanë qenë pjesë e lavdishme e UÇK-së, por se lufta e kësaj të fundit ka qenë sublime dhe një nga më të mëdhatë në qindvjeçarin e fundit. Kjo nuk është një betejë individuale e as politike, por një betejë kombëtare që na tangon të gjithë neve dhe jo vetëm ata që padrejtësisht sot mbahen në burg".

"Lufta e UÇK-së ka qenë luftë e drejtë për liri, luftë që ka pasur në fokus mbrojtjen e pragut të shtëpisë dhe qytetarëve të pafajshëm të cilët masakroheshin nga ushtria serbe. Ftojmë secilin anëtar të Shvercerave që të jetë pjesë e kësaj proteste, në atë mënyrë që të përçojmë mesazh të qartë se qëndrojmë përkrah njerëzve që zgjodhën lirinë e vendit si të vetmen alternativë", thonë nga tifo-grupi "Shvercerat".

Më 13 dhjetor me fillim nga ora 13:00 në sheshin “Skënderbeu” në Shkup, do të mbahet protesta në mbështetje të ish-krerëve të Ushtrisë Çlirimtare të Kosovës që po mbahen në Hagë. E nga kryeqendra e shtetit maqedonas, sot u kërkua pjesëmarrje masive në këtë protestë me kërkesën e vetëm lirim të ish-krerëve të UÇK-së dhe drejtësi për ata.

Nga Këshilli Organizativ i kësaj proteste u tha se po presin që zyrtarisht të marrin leje për mbajtjen e kësaj proteste, për çka deklaruan se kanë adresuar dy kërkesa te organet në Shkup.

Kryetari i Shoqatës së Familjeve të Dëshmorëve të UÇK-së, Xhavit Jashari theksoi se protesta në Shkup, ashtu sikurse edhe në vendet tjera ka qenë thirrje për drejtësi.

“Qëllimi jonë i vetëm është që të kërkojmë drejtësi dhe të solidarizohemi me Hashim Thaçin, Kadri Veselin, Jakup Krasniqin, Rexhep Selimit dhe gjithë të tjerët të cilët padrejtësisht po mbahen në Gjykatën Speciale në Hagë. Ne nuk i thërrasim protestat dhe nuk i kemi thirrur asnjëherë që të kundërshtojmë ose kundër drejtësisë, por protestat tona pikërisht në këtë rast ku po atakohet lufta e shenjt e jona, UÇK protestat i kemi thirr dhe çdo individ që i përgjigjet kësaj proteste flet në vete dhe kërkon drejtësi. Atje është duke ndodhur padrejtësi. Në rastin e parë kërkohet drejtësi, ndërsa protesta është e orientuar ku atje po ndodh padrejtësi...Kjo Gjykatë është politike, dhe qëllim të vetëm ka dhe nuk do të arrij luftën tonë të drejtë dhe të pastër me gjitha ato që ka bërë ushtria, policia dhe shteti serb në Kosovë“, tha ai.

Jashari beson se protesta në Shkup do të jetë masive, prandaj bëri thirrje për pjesëmarrjen e të gjithëve.

“Iu bëjmë thirrje dhe ftojmë të gjithë qytetarët pa dallim feje, pa dallim politike, partitë politike, qytetarët e OJQ.. që të vijnë në protestë t’i shprehim pakënaqësitë tona dhe të kërkojmë drejtësi dhe protesta të jetë e qetë dhe e dinjitetshme... Besojmë që protesta do të jetë masive dhe ftesa jonë është pa dallim i ftojë të gjithë.. kërkojmë krerët të lirohen, kjo gjykatë nuk e ka problem vetëm Hashim Thaçin e Kadri Veselin, Jakup Krasniqin e Rexhep Selimin, por përmes tyre tentojnë ”, deklaroi ai.

Bujar Dardhishta nga Këshilli Organizativ i protestës në Shkup, deklaroi se tashmë për këtë protestë kanë bërë dy kërkesa në qytetin e Shkupit dhe se janë në pritje të lejes për këtë protestë.

Dardhishta potencoi se kjo protestë nuk është kundrejt ndonjë entiteti në këtë shtet, por është mbi partiake e puro shqiptare.

“Konform ligjit për organizim të protestës kemi adresuar dy kërkesa për protestë në qytet të Shkupit, konform ligjet për vetëqeverisjes lokale për sheshet dhe lokalet kompotent është qyteti i Shkupit kemi bërë kërkesa para dy javë dhe të njëjtën kërkesë e kemi bërë para një jave, kemi marrë një konkluzion për ta paguar taksën komunale gjë që e kemi bërë, dhe presim proces e sipër për të na dhënë lejen. Nuk mendoj se duhet të ketë ndonjë pengesë për arsye se kjo është e drejtë kushtetuese në vendin tonë, jemi shtetas në vendin tonë. Kjo protestë nuk është e adresuar kundrejt ndonjë entiteti kjo është protestë mbi partiake puro shqiptare dhe këtë protestë shqiptarët nuk duhet ta përkrahin parimisht por realisht”, theksoi ai.

Protesta në Shkup në mbështetje të ish-krerëve të UÇK-së në të cilët janë të paraburgosur në Hagë është e pesta me radhë. Më 7 gusht të këtij viti është mbajtur protestë e parë në Prishtinë, pastaj në Hagë, në Tiranë dhe së fundmi edhe në Strasburg.

Ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi ndodhen në paraburgim në Hagë nga nëntori i vitit 2020. Që të katër janë deklaruar të pafajshëm mbi akuzat që i ngarkon Zyra e Prokurorit të Specializuar.

Sipas aktakuzës, Thaçi, Veseli, Krasniq dhe Selimi akuzohen për krime kundër njerëzimit dhe krime lufte./kp/

Organizatorët e protestës së 13 dhjetorit në Shkup, thonë se të shtunën përmes një tubimi paqësor do të kërkojnë lirimin e ish-krerëve të Ushtrisë Çlirimtare të Kosovës, të cilët sipas tyre, padrejtësisht po mbahen në Gjykatën Speciale në Hagë.

Xhavit Jashari nga OVL-UÇK tha se kjo gjykatë përmes bashkëpunimit me Prokurorinë serbe, me këtë gjykimi po tenton të njollosë luftën e drejtë të UÇK-së.

“Qëllimi i jonë i vetëm është që të kërkojmë drejtësi dhe të solidarizohemi me Hashim Thaçin, Kadri Veselin, Jakup Krasniqin, Rexhep Selimin dhe të gjithë të tjerët që padrejtësisht po mbahen në Gjykatën Speciale në Hagë. Ne do t’i adresojmë kërkesat tona të drejta dhe të ligjshme dhe ajo e përgjithshmja është që të kërkojmë krerët të lirohen”, tha mes tjerash Xhavit Jashari, kryetar i Shoqatës së Familjeve të Dëshmorëve të Luftës së UÇK-së.

Ndërsa Bujar Dardhishta nga Këshilli Organizativ i protestës në Shkup, tha se nuk presin të kenë probleme për të marrë leje për mbajtjen e protestës.

Kompania “Link Media Plus” është zgjedhur për të realizuar dekorimin e Shkupit për Vitin e Ri. Oferta e saj ishte e vetmja në tenderin e shpallur nga autoritetet e qytetit, të cilat për zbukurimin e zonës qendrore dhe bulevardëve kryesorë do të paguajnë 3.260.000 denarë, ose rreth 53.000 euro.

Pas dorëzimit të garancisë bankare nga kompania, do të nënshkruhet kontrata.

Kompania “Link Media Plus” këtë vit ka fituar gjithashtu tenderët për dekorimin në Komunën Qendër të Shkupit dhe në Komunën e Shtipit. Sipas sistemit të prokurimeve publike, kompania ka punuar edhe në mirëmbajtjen e automjeteve zyrtare të Administratës së Policisë Financiare, shërbime për pastrimin e rrugëve, si dhe furnizime me kontejnerë mbeturinash. Në vitin 2023, ajo realizoi dekorimin festiv në Kavadar, Çair dhe në Qendrën Tregtare të Shkupit.

Sipas specifikimeve të tenderit, kompania duhet të vendosë elemente dekorative dhe ndriçues të Vitit të Ri në disa lokacione në Shkup. Pjesa më e madhe e dekorit do të vendoset në Sheshin “Maqedonia”.

Projekti do të realizohet në tërësi nga kompania, e cila duhet të sigurojë edhe heqjen e dekoracioneve pas përfundimit të periudhës festive.

Autoritetet e qytetit ende nuk kanë njoftuar datën e saktë se kur do të fillojë vendosja e dekorimeve, as programi për Vitin e Ri, e as kush do të argëtojë qytetarët e Shkupit për Natën e Vitit të Ri.

FC Shkupi po përjeton sezonin më të dobët në historinë e vet, një edicion i errët për klubin emblemë shqiptar që numëron katër tituj kampion, por sot ndodhet në krizën më të thellë që ka përjetuar ndonjëherë, njofton Telegrafi.

Me vetëm një pikë të grumbulluar dhe një formë të rrënuar, skuadra nga Çairi u mposht sërish, kësaj radhe nga Brera Strumica me rezultat 1-3, duke e lënë ekipin praktikisht me një këmbë në Ligën e Dytë.

Ndeshja u luajt në terren neutral në Strugë, aty ku Brera i dha fund serisë negative dhe mori tre pikë të arta. Në pesë ndeshjet e fundit, skuadra nga Strumica kishte katër humbje dhe një barazim, ndaj ky sukses vjen si frymëmarrje për ta para pauzës dimërore.

Brera e siguroi fitoren me dy gola në pjesën e parë dhe një tjetër në të dytën. Emrah Makiq shënoi në minutën e 7-të, Zoran Ivanovski në të 17-tën, ndërsa Mile Todorov vulosi rezultatin 0-3 në minutën e 51-të pas një kundërsulmi. Shkupi shënoi golin e vetëm në fund të takimit me kapitenin Erion Shuku, por pa ndikim në fatin e ndeshjes.

Ndërkohë, sot u zhvillua edhe një ndeshje tjetër në Shkup. Sileksi e mbylli vitin me fitore bindëse, duke triumfuar 0-3 në udhëtim te Rabotniçki dhe duke e justifikuar plotësisht rolin e favoritit. Me këto tre pikë, ekipi nga Kratova e mbyllin gjysmësezonin në vendin e katërt me 31 pikë, ndërsa Rabotniçki futet në pauzën dimërore në gjendje alarmante, menjëherë pas Shkupit, me vetëm 7 pikë në tabelë. Kampionati i Maqedonisë do të vazhdojë në muajin shkurt. /Telegrafi/

Java e 16-të e Ligës së Parë të Maqedonisë së Veriut pritet të mbyllë gjysmësezonin vjeshtor me duele vendimtare, ku do të mësohet edhe kampioni vjeshtor i këtij edicioni. Ndeshjet zhvillohen nga e premtja deri të hënën, ndërsa gara në krye është hapur, megjithëse me epërsi të lehtë ështe Vardari para Strugës, njofton Telegrafi.

Sipas renditjes aktuale, Vardari hyn në këtë javë si lider dhe është më afër ta mbyllë pjesën e parë të sezonit në vend të parë. Megjithatë, ekipi kuqezi nuk e ka të garantuar epitetin e kampionit vjeshtor. Struga, që ndodhet vetëm një hap prapa, ka shanse reale të kapë kreun, sidomos nëse Vardari ndalet me barazim në duelin ndaj Makedonija Gj.P, ndërsa ata arrijnë fitore në transfertë kundër Tikveshit. Në këtë skenar, Struga do të shkonte në pushimin dimëror si kampione e vjeshtës.

Ndërkohë, kampioni aktual, Shkëndija, ka pësuar ngecje gjatë javëve të fundit dhe praktikisht është jashtë garës për titullin vjeshtor. Megjithatë, tetovarët mbeten ende brenda objektivit madhor, mbrojtjes së titullit në fund të sezonit, pasi distanca me kreun është e rikuperueshme në pjesën pranverore.

Në mesin e tabelës qëndrojnë dy ekipet tjera shqiptare, Bashkimi dhe Arsimi. Të dy skuadrat po zhvillojnë një sezon të qetë, larg zonës së rrezikut, por edhe pa presion për garë në kreun e klasifikimit. Të dyja ekipet synojnë ta mbyllin vjeshtën me rezultate pozitive për të hyrë më të forta në fazën pranverore.

Në anën tjetër, situata më e rëndë i takon Shkupit, i cili po zhvillon sezonin më të dobët në historinë e klubit. Me vetëm një pikë nga 15 ndeshje, Shkupi është ekipi i vetëm që nuk ka provuar ende shijen e fitores. Për të kaltrit e Çairit, java e 16-të është më shumë një përpjekje për të shpëtuar krenarinë sesa luftë për pikë. /Telegrafi/

Dyshet e javës së 16-të:

05.12. – 13:00
• Makedonija Gj.P – Vardari
• Tikveshi – Struga

06.12. – 13:00
• Bashkimi – Shkëndija

07.12. – 13:00
• Shkupi – AP Brera
• Rabotniçki – Sileksi

08.12. – 13:00
• Arsimi – Pelisteri

Vardari e shkatërron Shkupin 6–1 – një “derbi” vetëm me emër, sepse Shkupi nuk është më ai rival që dikur e ndizte qytetin, njofton Telegrafi.

Në terrenin e qendrës stërvitore “Petar Miloshevski”, Vardari demonstroi force ndaj një Shkupit të rënë thellë në krizë, ndoshta më të madhen që kur mban këtë emër. Pa sponsor stabil, pa futbollistë konkurrues dhe pa asnjë strukturë që mund ta mbajë në garë, Shkupi sot është larg asaj skuadre që dikur e bënte derbin të dukej i barabartë.

Që në minutat e para, të dyja ekipet patën nga një gjysmë-rast, por rrezik real nuk pati. Vardari mori iniciativën, ndërsa Shkupi u mbyll prapa duke tentuar të mbijetonte. Situata u përkeqësua kur u lëndua kapiteni Suhel Muharemi, një goditje tjetër për një ekip tashmë të varfër në alternativë në bankinë.

Vardari me Zakariqin shënoi dy gola brenda 70 sekondash, i pari nga rreth 20 metra me devijim, ndërsa i dyti pas një topi të kaluar mbi mbrojtjen, 2:0 .

Pjesa e dytë nisi me gol. Në minutën e 47-t, nga pika e bardhë, Mihail Talevski e çoi rezultatin në 3:0. Dhjetë minuta më vonë, pas një topi të kthyer në shtyllën e dytë, Omëragiqi u la i vetëm para portës dhe shënoi për 4:0.

Shkupi arriti vetëm një gol nderi me anë të Mario Stankovskit, i cili shfrytëzoi daljen e gabuar të portierit Talevski 4:1. Por kjo ishte e gjitha nga një ekip i lodhur, i dëmtuar dhe pa identitet. Omëragiqi shënoi sërish për 5:1, ndërsa në minutën e 84-t kompletoi hat-trikun për rezultatin përfundimtar 6:1.

Vardari ruan kreun e tabelës me 39 pikë, një më shumë se Struga, ndërsa Shkupi është i “ngrirë” në fund me vetëm një pikë, shembulli më i qartë se ky nuk është më derbi, por një përballje mes një ekipi në ngritje dhe një tjetri në shpërbërje. /Telegrafi/

Edhe shqiptarët në Maqedoninë e Veriut shënuan festën e 28 nëntorit, ditën e Flamurit Shqiptar.

Me rastin e kësaj feste, disa qytetarë me kuaj, të veshur me tesha kombëtare dhe në duar mbanin flamuj kombëtar, defiluan rrugëve të Tetovës.

Për nder të kësaj date të rëndësishme për kombin shqiptar, aktivitete festive u zhvilluan në shkollat fillore dhe të mesme të Tetovës.

"Në vigjilje të festës së Flamurit, ditës së Pavarësisë së Shqipërisë ne si komunë e Tetovës ,si çdo vit po përkrahim të gjitha aktivitetet që po mbahen thuajse në çdo shkollë fillore dhe të mesme të Komunës së Tetovës", ka thënë Albi Qamili, zëvendëskryetar i Komunës së Tetovës.

28 nëntori në atmosferë festive u shënua edhe në shkollën "Ismail Qemali" në Shkup.

Kësaj ceremonie iu bashkua edhe kryetari i Komunës së Çairit, Izet Mexhiti.

“Kjo ceremoni merr një rëndësi të veçantë sepse zhvillohet në një shkollë që mban emrin e udhëheqësit të pavarësisë Ismail Qemali emri i tij është i lidhur në ditën e sotme po aq sa flamuri që valëvitet me krenari sepse ishte ai që i dha kombit drejtim, vizion, dhe qartësi në momentet më vendimtare të historisë sonë", tha ai.

Për Festën e Flamurit, urimet e tyre për të gjithë shqiptarët, kanë përcjellë të gjithë liderët politikë shqiptarë në Maqedoninë e Veriut.

Ndotja e ajrit në Shkup vazhdon të jetë një nga shqetësimet kryesore të qytetarëve. Ditët e fundit, niveli i lartë i ndotjes ka ndikuar negativisht ndaj shëndetin e banorëve.

Në një nga rrugët e Shkupit takuam një qytetar me maskë në fytyrë, që mezi merrte frymë teksa ishte ulur të pushonte pak. Tha se sot ishte i detyruar të dalë për disa punë të domosdoshme, megjithëse çdo frymëmarrje e thellë i shkakton djegie në fyt.
“Ndotja, veçanërisht në Shkup, është e jashtëzakonshme, jo vetëm unë…unë jam tashmë një burrë i moshuar dhe vuaj nga HOBB e cila shkaktohet nga ajri i keq ambiental në këtë qytet, presim që të fryjë era ose të bjerë shi ose që bora ta pastrojë dhe kaq”, tha një qytetar.

“Ndihem sikur kam shtypje në fyt, sikur po më mbyt fyti këto dy ose tre ditë në veçanti. Çdo vit ndotet gjithnjë e më shumë. Nuk janë drutë për ngrohje që ndotin, nuk do të pajtohesha që drutë ndotin qytetin, por më shumë nga papastërtia, nga shumë makina, nga ato gazra që nxirren çdo ditë, ka shumë makina në qytet, mendoj se kjo është ajo që shkakton ndotjen”, u shpreh një qytetar.
Disa qytetarë të tjerë vlerësojnë se situata nuk do të përmirësohet vetvetiu. Sipas tyre, nevojitet qasje e qëndrueshme dhe zbatim masash të bazuara në të dhëna shkencore, jo vetëm aktivitete të shpërndara online.

“Ky projekt duhet të ngrihet sistematikisht bazuar në metoda shkencore deterministe që do ta trajtojnë këtë problem, të gjitha aktivitetet e tjera janë aktivitete online”, theksoi një qytetar.

Ndërkohë, shpresa për pastrim të ajrit mbetet te ndryshimi i motit. Reshjet dhe erërat që priten ditëve në vijim mund të sjellin një pastrim të përkohshëm të ajrit, por jo një zgjidhje afatgjatë.

“Presim të shohim mbi 25 litra për metër katror reshje brenda 24 orëve. Gjithashtu të enjten do të kemi reshje më të bollshme, por ato do të jenë më të përhapura në pjesët lindore të vendit. Nga e enjtja do të kemi një masë ajri më të ftohtë që zbret nga veriu ku temperaturat ditore do të ulen me 4 deri në 5 gradë dhe në male reshjet do të jenë nga bora, në malet më të larta mendohet. Ky lloj moti do të zgjasë deri të shtunën dhe të shtunën do të ketë reshje lokale mjaft të lehta, megjithatë, do të jetë ende mot i ndryshueshëm dhe presim stabilizim”, theksoi Lençe Rizova, sinoptike.

Sipas matjeve të fundit nga stacionet monitoruese, sot ndotja e ajrit në Shkup ka rezultuar mesatarisht e lartë, posaçërisht në Qendër të Shkupit, Lisiçe dhe Karposh. Ndotje më e lartë është regjistruar në Kërçovë dhe Gjevgjeli./ Alsat/

Është përmbyllur java e 14-të e Ligës së Parë të Maqedonisë së Veriut me ndeshjenefundit e cila ishte shtyrë shkaku i reshjeve të shiut, e që sot u lujat në Strugë. Ky duel vuri përballë ekipet e Shkupit dhe Pelisterit, të cilën e fituan mysafirët me rezultat 3:0, njofton Telegrafi.

Shkupi pëson edhe një humbje të rëndë, këtë herë me rezultat 3-0 ndaj Pelisterit, në ndeshjen që mbylli javën e 14-të të kampionatit. Humbja vjen vetëm pak ditë pas barazimit të vetëm që ekipi ka marrë këtë sezon, duke e lënë skuadrën sërish e fundit në renditje me vetëm një pikë.

Ndeshja u zhvillua në Strugë, aty ku Pelisteri rrezikoi që nga minutat e para ku edhe pse goli i parë u anulua nga VAR, presioni i vazhdueshëm dha rezultat në pjesën e dytë. Fillimisht Petkovski shënoi pas një kombinimi të bukur, vetëm pak çaste pasi Shkupi pati gol të anuluar të Muaremit. Pa u rikuperuar mirë, Shkupi pësoi edhe një gol të dytë nga mbrojtësi Ristevski, ndërsa fitoren e vulosi sulmuesi Bulatoviqi me një supergol, duke bërë 3-0.

Me këtë triumf, Pelisteri ngjitet në kuotën e 14 pikëve dhe barazohet me Makedonija Gj.P, në pozitat 9 dhe 10 të tabelës, ndërsa Shkupi mbetet e fundit me vetëm një pikë të vetme pas 14 javësh.

Java e 15-të do të fillojë me duelin e parë më 28 nëntor, kur Sileksi do të jetë nikoqir i Arsimit, për të vazhduar më pas me 29 nëntor me dy duelet Brera – Tikveshi dhe Pelisteri – Makedonija Gj.P. dikur vlente për derbin e madh jo vetrëm të qytetit, por edhe kampionatit, Vardari – Shkupi, ndërsa më 30 nëntor do të jetë një duel mes të parit dhe të fundit.Në të njejtën ditë luahete dhe derbi shqiptar, Struga – Bashkimi, ndërsa java e 15-të do të mbyllet me duelin e një dhjetorit, Shkëndija – Rabotniçki. /Telegrafi/

Java e 14-të e Ligës së Parë të Maqedonisë së Veriut sjell një program të pasur futbollistik, me ndeshje të forta, ku në qendër të vëmendjes është derbi shqiptar ndërmjet Arsimit dhe Shkëndijës, ndërsa sfida Shkupi – Pelisteri është shtyrë për të martën për shkak të gjendjes së keqe të fushës në Strugë, njofton Telegrafi.

Ndeshja ndërmjet Shkupit dhe Pelisterit, e vlefshme për javën e 14-të të Ligës së Parë të Maqedonisë, ka marrë një termin të ri. Fillimisht ishte planifikuar të luhej sot, por kjo nuk do të ndodhë.

Problemi qëndron tek gjendja e fushës në “Stadionin e Qytetit” në Strugë, ku Shkupi i zhvillon ndeshjet si vendas. Pas reshjeve të dendura të ditëve të fundit, terreni është i përmbytur dhe nuk ofron kushte minimale për zhvillimin e lojës.

Për këtë arsye, me marrëveshje mes dy klubeve dhe FFM-së, ndeshja është shtyrë për të martën, në të njëjtin orar – 13:00.

Ndërkohë, këtë fundjavë do të kemi disa përballje interesante në kampionat. Të dielën në Gostivar luhet derbi shqiptar mes Arsimit dhe Shkëndijës, gjithashtu me fillim nga ora 13:00. Po në të njëjtin termin, Bashkimi nga Kumanova do të jetë mysafir i Tikveshit në Kavadar.

Të hënën Struga udhëton drejt Shkupit në sfidën kundër Rabotniçkit, ndërsa një ditë më parë u luajt ndeshja mes Maqedonija GJ.P dhe Sileksit, ku ekipi mysafir nga Kratova fitoi me rezultat 1-2. Sot, duke filluar nga ora 13:00, zhvillohet edhe takimi AP Brera – Vardari. Java pra mbyllet me duelin Shkupi Pelisteri që luhet të martën. /Telegrafi/

Nga Ministria e Punëve të Brendshme njoftojnë se gjatë ditës së djeshme, ka ndodhur një ngjarje e rëndë, në të cilën është përfshirë autoambulanca. Siç njoftojnë nga MPB, shoferi i autoambulancës, duke dashur të shmang aksidentin me një veturë tjetër, ka frenuar papritmas dhe si pasojë pacienti 89-vjeçar që transportohej me autoambulancën ka ndërruar jetë, ndërsa një mjeke u lëndua rëndë, si dhe një punonjëse tjetër u lëndua lehtë.

“Më 19.11.2025 rreth orës 12:01, në SPB-Shkup është raportuar se në kryqëzimin e rrugës “11 Tetori” me bulevardin “Koço Racin” në Shkup, një autoambulancë “Renault Trafic” me targa të Shkupit, pronë e një institucioni privat shëndetësor, i drejtuar nga Z.A. (55) nga Shkupi, ka frenuar papritur gjatë përpjekjes për të shmangur një përplasje me një tjetër automjet".

"Si pasojë, A.M. (26) nga Shkupi, mjeke në institucion, ka pësuar lëndime të rënda trupore, ndërsa A.R. (41) nga Shkupi, gjithashtu punonjëse në institucion, ka pësuar lëndime trupore, të konfirmuara në Spitalin e Përgjithshëm “Shën Naumi i Ohrit”".

"Në autoambulancë po transportohej J.T. (89) nga Shkupi, i cili ka pasur probleme shëndetësore, dhe pasi është dërguar në Spitalin e Përgjithshëm “Shën Naumi i Ohrti”, mjeku ka konstatuar vdekjen e tij. Me urdhër të prokurorit publik, trupi i të ndjerit i është dorëzuar për obduksion. Është kryer inspektim nga ekipi i SPB-Shkup dhe po ndërmerren masa për sqarimin e plotë të rastit”, thonë nga MPB.

Një stuhi e fortë me erëra të fuqishme jugore ka goditur rajonin e Shkupit, duke shkaktuar probleme serioze në trafikun ajror.

Sipas njoftimit të Qendrës për Menaxhim me Kriza, për shkak të erës së fuqishme, dy avionë janë detyruar të devijojnë dhe të ulen në aeroportin e Prishtinës, ndërsa dy të tjerë po vazhdojnë të qarkullojnë në ajër në pritje të udhëzimeve për ulje.

“Për shkak të erës së fortë jugore, e cila e ka përfshirë rajonin e Shkupit, dy avionë janë devijuar për ulje drejt aeroportit të Prishtinës, ndërsa dy të tjerë ende po qarkullojnë dhe po presin udhëzime për ulje”, thonë nga QMK-ja.

Një video emocionale është bërë virale në rrjetet sociale, ku shihet një nënë me fëmijën e saj duke u ngrohur pranë auspuhit të një autobusi të Ndërmarrjes transportuese në Shkup.

Pamjet prekëse kanë shkaktuar reagime të shumta nga qytetarët, të cilët shprehin shqetësim për kushtet e vështira në të cilat ndodhen familjet në nevojë, sidomos në ditët e ftohta.

Autoritetet ende nuk kanë dalë me reagim lidhur me rastin, ndërsa qytetarët në komente bëjnë thirrje për mbështetje sociale më të madhe dhe zgjidhje afatgjatë për personat që jetojnë në kushte të rënda.

Mbrëmë, stacionet matëse në Shkup regjistruan disa herë rritje të ndotjes së ajrit. Sot në mesditë, Shkupi u rendit i 15-ti në botë për cilësinë e keqe të ajrit.

Sa më shumë të bien temperaturat, aq më shumë rritet ndotja. Disa qytetarë tashmë kanë reaguar në rrjetet sociale, duke thënë se në orët e mbrëmjes ndihej erë e rëndë.

Studimi “Përballja me ndotjen e ajrit në qytetin e Shkupit”, i financuar nga Agjencia Suedeze për Bashkëpunim dhe Zhvillim Ndërkombëtar, identifikon si ndotës kryesor djegien e druve dhe qymyrit, të cilat janë burimi më i madh i grimcave PM.

Burime të tjera ndotjeje janë mazuti, derivatet e naftës, pluhuri mineral, djegia e mbeturinave, ndërtimet përmes prishjeve, gërmimeve dhe mjeteve të rënda pa kontroll, transporti dhe trafiku rrugor.