Java e 16-të e Ligës së Parë të Maqedonisë së Veriut pritet të mbyllë gjysmësezonin vjeshtor me duele vendimtare, ku do të mësohet edhe kampioni vjeshtor i këtij edicioni. Ndeshjet zhvillohen nga e premtja deri të hënën, ndërsa gara në krye është hapur, megjithëse me epërsi të lehtë ështe Vardari para Strugës, njofton Telegrafi.
Sipas renditjes aktuale, Vardari hyn në këtë javë si lider dhe është më afër ta mbyllë pjesën e parë të sezonit në vend të parë. Megjithatë, ekipi kuqezi nuk e ka të garantuar epitetin e kampionit vjeshtor. Struga, që ndodhet vetëm një hap prapa, ka shanse reale të kapë kreun, sidomos nëse Vardari ndalet me barazim në duelin ndaj Makedonija Gj.P, ndërsa ata arrijnë fitore në transfertë kundër Tikveshit. Në këtë skenar, Struga do të shkonte në pushimin dimëror si kampione e vjeshtës.
Ndërkohë, kampioni aktual, Shkëndija, ka pësuar ngecje gjatë javëve të fundit dhe praktikisht është jashtë garës për titullin vjeshtor. Megjithatë, tetovarët mbeten ende brenda objektivit madhor, mbrojtjes së titullit në fund të sezonit, pasi distanca me kreun është e rikuperueshme në pjesën pranverore.
Në mesin e tabelës qëndrojnë dy ekipet tjera shqiptare, Bashkimi dhe Arsimi. Të dy skuadrat po zhvillojnë një sezon të qetë, larg zonës së rrezikut, por edhe pa presion për garë në kreun e klasifikimit. Të dyja ekipet synojnë ta mbyllin vjeshtën me rezultate pozitive për të hyrë më të forta në fazën pranverore.
Në anën tjetër, situata më e rëndë i takon Shkupit, i cili po zhvillon sezonin më të dobët në historinë e klubit. Me vetëm një pikë nga 15 ndeshje, Shkupi është ekipi i vetëm që nuk ka provuar ende shijen e fitores. Për të kaltrit e Çairit, java e 16-të është më shumë një përpjekje për të shpëtuar krenarinë sesa luftë për pikë. /Telegrafi/
Skuadra e Arsimit mori fitore të jashtëzakonshme si mysafire ndaj Sileksit me rezultat 1-3 (0-1), në ndeshjen e javës së 15-të të Ligës së Parë të Futbollit. Ky sukses vjen menjëherë pas tre pikëve të mëdha të fituara ndaj Shkëndijës (3:0), duke e bërë këtë periudhë një nga më të mirat për ekipin nga Çegrani, njofton Telegrafi.
Takimi nisi me 20 minuta vonesë për shkak të terrenit tepër të lagësht, i cili e vështirësonte lojën dhe e ndalte shpesh topin në bar. Të dy skuadrat patën vështirësi në pasime, megjithatë u zhvillua një lojë interesante dhe me raste të shumta.
Sileksi krijoi më shumë nga loja dhe rrezikoi me Dodevin, Aliqin dhe Govedaricën, i cili humbi rastin më të mirë për skuadrën vendase në pjesën e parë. Arsimi zakonisht u tërhoq në gjysmën e vet dhe u orientua në kundërsulme, por pa krijuar raste të pastra deri në minutat e fundit.
Megjithëse pjesa e parë ishte më shumë në kontroll të Sileksit, në minutën e 44-të ishte Arsimi ai që goditi. Mirnel Huriq përfitoi nga një top i krosuar dhe nga vetëm dy metra e dërgoi në rrjetë, duke i dhënë mysafirëve një epërsi të papritur dhe shumë të vlefshme para pushimit.
Arsimi e nisi më mirë edhe pjesën e dytë dhe kishte një mundësi të artë me Taipin, i cili nuk arriti të shënojë. Sileksi u mundua vazhdimisht të depërtojë në zonë, por terreni i rëndë ua vështirësonte çdo tentim.
Në momentin kur vendasit shtuan presionin dhe Govedarica humbi një tjetër rast para portës, erdhi ndëshkimi. Në minutën e 61-të, Ajdini që sapo ishte futur në lojë, shënoi për 0-2 dhe i dha Arsimit një epërsi të madhe. Ky gol ndikoi dukshëm te vendasit, të cilët megjithë dominimin, mbetën pas në rezultat.
Sileksi u rikthye në lojë në minutën e 76-të me golin e Martin Mirçevskit, që përfitoi nga një top i kthyer nga traversa.
Megjithatë, reagimi i Arsimit ishte i menjëhershëm. Vetëm pak minuta më vonë, Alban Taipi shënoi me një goditje të fuqishme për 1-3, duke e vulosur fitoren dhe rikthyer epërsinë e dy golave. Tani Arsimi ka 21 pikë, vetëm një më pak se Bashkimi në pozitën e pestë.
Sileksi mbetet me 28 pikë dhe në javën e ardhshme përballet me Rabotniçkin. Ndërsa Arsimi do të luajë para tifozëve të vet kundër Pelisterit të Manastirit. /Telegrafi/
Java e 14-të e Ligës së Parë të Maqedonisë së Veriut sjell një program të pasur futbollistik, me ndeshje të forta, ku në qendër të vëmendjes është derbi shqiptar ndërmjet Arsimit dhe Shkëndijës, ndërsa sfida Shkupi – Pelisteri është shtyrë për të martën për shkak të gjendjes së keqe të fushës në Strugë, njofton Telegrafi.
Ndeshja ndërmjet Shkupit dhe Pelisterit, e vlefshme për javën e 14-të të Ligës së Parë të Maqedonisë, ka marrë një termin të ri. Fillimisht ishte planifikuar të luhej sot, por kjo nuk do të ndodhë.
Problemi qëndron tek gjendja e fushës në “Stadionin e Qytetit” në Strugë, ku Shkupi i zhvillon ndeshjet si vendas. Pas reshjeve të dendura të ditëve të fundit, terreni është i përmbytur dhe nuk ofron kushte minimale për zhvillimin e lojës.
Për këtë arsye, me marrëveshje mes dy klubeve dhe FFM-së, ndeshja është shtyrë për të martën, në të njëjtin orar – 13:00.
Ndërkohë, këtë fundjavë do të kemi disa përballje interesante në kampionat. Të dielën në Gostivar luhet derbi shqiptar mes Arsimit dhe Shkëndijës, gjithashtu me fillim nga ora 13:00. Po në të njëjtin termin, Bashkimi nga Kumanova do të jetë mysafir i Tikveshit në Kavadar.
Të hënën Struga udhëton drejt Shkupit në sfidën kundër Rabotniçkit, ndërsa një ditë më parë u luajt ndeshja mes Maqedonija GJ.P dhe Sileksit, ku ekipi mysafir nga Kratova fitoi me rezultat 1-2. Sot, duke filluar nga ora 13:00, zhvillohet edhe takimi AP Brera – Vardari. Java pra mbyllet me duelin Shkupi Pelisteri që luhet të martën. /Telegrafi/
Javën e 13-të të Ligës së Parë të Maqedonisë së Veriut, e kanë hapur duelet Struga – Arsimi dhe Bashkimi – Rabotniçki, ku në të dyja përballjet kanë triumfuar ekipet nikoqire. Struganët fituan bindshëm ndaj Arsimit dhe u rikthyen në krye të tabelës, ndërsa Bashkimi siguroi tri pikë të vlefshme kundër Rabotniçkit për t’u ngjitur në mesin e renditjes, njofton Telegrafi.
Struga Trim Lum shënoi fitore të sigurt ndaj Arsimit (4-0) në ndeshjen e javës së 13-të të Ligës së Parë të Maqedonisë. Skuadra e Bledi Shkëmbit nuk hasi vështirësi përballë mysafirëve, duke e kontrolluar plotësisht lojën në “Stadiumin e Qytetit” në Strugë. Pas disa rasteve të humbura në fillim, rezultatin e zhbllokoi Marjan Radeski në minutën e 20-të, pas një topi të gjatë nga Bojku dhe përfundimi të saktë në këndin e portierit Islami.
Në pjesën e dytë, kapiteni Bunjamin Shabani mori skenën, duke realizuar dy gola brenda dy minutash – fillimisht pas kombinimit me Compaorén dhe më pas pas një topi të vjedhur nga Jevtovski. Në fund, rezultatin përfundimtar 4-0 e vulosi Hristijan Maleski, duke konfirmuar epërsinë e plotë të struganëve. Me këtë fitore, Struga Trim Lum ngjitet sërish në krye të tabelës me 32 pikë, dy më shumë se Vardari, ndërsa Arsimi mbetet me 15 pikë dhe rrezikon rënien në zonën e ftohtë.
Në ndeshjen tjetër, Bashkimi fitoi 2-1 ndaj Rabotniçkit në një duel të fortë në Kumanovë. Pas disa rasteve në pjesën e parë, vendasit kaluan në epërsi në minutën e 41-të me golin e Abdulhadi Jahjas. Në pjesën e dytë, Emanuell Avornio shënoi me kokë për 2-0, duke sjellë entuziazëm në tribuna.
Mysafirët ngushtuan diferencën në fund me golin e Hoxhës, por Bashkimi ruajti avantazhin dhe mori një fitore të rëndësishme. Kjo ishte fitorja e gjashtë për kumanovarët, që në javën e ardhshme do të përballen me Strugën, ndërsa Rabotniçki do të ketë sfidë të vështirë ndaj Shkëndijës. /Telegrafi/
Java e 13-të e Ligës së Parë të Maqedonisë së Veriut pritet të sjellë duele interesante dhe me shumë rëndësi për ecurinë e sezonit. Ndeshjet do të zhvillohen në tri ditë, nga e shtuna deri të hënën, njofton Telegrafi.
Të shtunën, më 8 nëntor, në orën 13:00, në program janë dy përballje: Bashkimi pret Rabotniçkin në Kumanovë, ndërsa në Strugë zhvillohet derbi shqiptar mes Strugës dhe Arsimit, një ndeshje që gjithmonë zgjon interesim të madh.
Të dielën, më 9 nëntor, gjithashtu në orën 13:00, Pelisteri do të përballet me AP Brerën, ndërsa në Shkup do të luhet dueli mes Vardarit dhe Tikveshit.
Java do të përmbyllet të hënën, më 10 nëntor, me dy ndeshje po aq tërheqëse: Shkëndija do të jetë nikoqire e Makedonija Gj.P., ndërsa Sileksi do të përballet me Shkupin.
Pas kësaj jave, kampionati do të ndërpritet për shkak të angazhimeve ndërkombëtare të Përfaqësueses së Maqedonisë, e cila do të luajë ndeshjet kualifikuese për Botërorin 2026.
Vlen të kujtohet se më 15 nëntor do të zhvillohet edhe ndeshja e prapambetur e javës së 12-të mes Shkupit dhe Shkëndijës, e shtyrë për shkak të angazhimit të kuqezinjve në Ligën e Konferencës kundër Jagiellonias. /Telegrafi/
Ndeshja e parë e javës së 12-të solli përballjen mes dy skuadrave shqiptare, Arsimit nga Çegrani dhe Bashkimit nga Kumanova, njofton Telegrafi.
Skuadra vendase e Arsimit arriti një fitore të merituar me rezultat 4-2, duke vazhduar formën e mirë në elitën e futbollit të Maqedonisë së Veriut.
Arsimi dominoi që nga fillimi me lojë ofensive dhe shumë raste të krijuara. Alban Taipi hapi serinë e golave në minutën e 36-të, por Bashkimi barazoi shpejt me Resul Memetin. Megjithatë, para përfundimit të pjesës së parë, Muhjedin Dardhishta riktheu epërsinë 2-1.
Në pjesën e dytë vendasit vazhduan me ritëm të lartë. Shefit Shefiti realizoi dy herë, duke çuar rezultatin në 4-1 dhe duke e vulosur fitoren, ndërsa Avornio shënoi golin e dytë për Bashkimin në fundin e ndeshjes.
Pas kësaj fitoreje, Arsimi ka tani 15 pikë dhe në javën e ardhshme do të përballet me Struga Trim Lum, ndërsa Bashkimi është në pozitën e pestë me 19 çikë, dhe javën e tjetër do të luajë kundër Rabotniçkit në Shkup. /Telegrafi/
Ka nisur java e 11-të e Ligës së Parë të Maqedonisë së Veriut me dy ndeshje të luajtura sot, në Shkup dhe Gostivar, njofton Telegrafi.
Në kryeqytet, Makedonija Gj.P dhe Bashkimi ndanë pikët pas një dueli të luftuar që përfundoi 1:1. Të dy skuadrat patën raste të mira shënimi, ndërsa portierët ishin në qendër të vëmendjes gjatë pjesës së parë. Avantazhin e takimit e mori Bashkimi në fillim të pjesës së dytë me golin e Avornijos, pas një pasigurie të portierit vendas. Megjithatë, vendasit arritën të barazonin në minutat e fundit përmes Peçovit, duke shmangur humbjen në shtëpi. Kumanovarët, megjithëse pa fitore, treguan karakter dhe qartazi po rriten nga ndeshja në ndeshje.
KF Bashkimi - Kumanovë
Në Gostivar, Arsimi zhvilloi një ndeshje spektakolare përballë Rabotniçkit, duke arritur një barazim 2:2 pas një përmbysjeje të bukur në pjesën e dytë. Miqtë nga Shkupi përfituan në fundin e pjesës së parë, kur fillimisht Demir Imeri shënoi një gol të bukur nga distanca, ndërsa menjëherë pas tij një autogol i fatkeq e dyfishoi epërsinë e Rabotniçkit.
Në pjesën e dytë, skuadra nga Çegrani reagoi me vendosmëri, veterani Bashkim Velija realizoi një “perlë” nga 30 metra, ndërsa në minutat e fundit Albian Taipi, pasi goli iu konfirmua nga VAR-i, barazoi rezultatin për 2:2, duke shpërthyer entuziazmin në tribuna. Arsimi arriti të ruajë barazimin deri në fund dhe të marrë një pikë me shumë vlerë në shtëpi.
Pas këtyre dueleve, Arsimi ngjitet në kuotën e 12 pikëve, ndërsa Bashkimi mbetet me një bilanc të qëndrueshëm në mesin e tabelës. Java e 11-të do të vazhdojë me tri përballje të tjera interesante: nesër Shkupi luan ndaj Strugës, Pelisteri pret Tikveshin në orën 17:00, ndërsa të enjten zhvillohen dy duele të forta – AP Brera përballet me Shkëndijën në orën 13:30 dhe në mbrëmje Vardari pret Sileksin në orën 17:00. /Telegrafi/
Sot u luajtën dy duele të javës së 10-t, të Ligës së Parë të Maqedonisë së Veriut, njofton Telegrafi. Shefit Shefiti me hat-trick spektakolar përmbysi Tikveshin, ndërsa Bashkimi e theu Shkupin për 4–1 në javën e 10-të të Ligës së Parë.
Në njërën prej ndeshjeve më dramatike të këtij sezoni, Tikveshi e humbi një fitore të sigurt ndaj Arsimit, ndonëse udhëhiqte me 2–0 dhe 3–1. Dueli në Kavadar përfundoi me fitoren e çegranasve 3–4, me Shefit Shefitin protagonist absolut falë një hat-tricku të jashtëzakonshëm, ndërsa Taipi në shtesë vulosi përmbysjen historike.
Skuadra eeTikveshit dominoi ndeshjen dhe me dy gola të Sadikut shkoi në pushim me avantazh 2–0. Në pjesën e dytë, Shefiti ngushtoi rezultatin, Ivanovski riktheu diferencën në 3–1, por në minutat e fundit Shefiti shënoi dy herë për 3–3, përpara se Taipi të realizonte golin e fitores në sekondat e fundit (3–4).
Pas kësaj fitoreje, Arsimi ngjitet në vendin e tetë me 11 pikë, ndërsa Tikveshi mbetet një pozitë më poshtë me 8 pikë.
Në ndeshjen tjetër të javës së 10-të, Bashkimi nga Kumanova vazhdoi formën e mirë duke mposhtur Shkupin me rezultat bindës 4–1. Skuadra e Muarem Muaremit dominoi nga fillimi deri në fund, me Aleksovskin dhe Simonovskin që shënuan herët për epërsi 2–0. Shkupi ngushtoi nga penalltia me Shukun, por Avronio riktheu qetësinë me golin e tretë para pushimit. Në fillim të pjesës së dytë, Bashkimi shënoi edhe golin e katërt, duke vulosur një fitore të merituar.
Me këtë triumf, Bashkimi ngjitet në kuotën e 18 pikëve dhe afrohet me vendet e kreut, ndërsa Shkupi mbetet në fund të tabelës me vetëm një pikë pas dhjetë javësh kampionat.
Pas një pauze të gjatë, shkaku i angazhimeve të përfaqësueses së Maqedonisë në ndeshjet kualifikuese për Kampionatin Botëror dhe më pas nga raundi i parë i zgjedhjeve lokale, futbolli vendor rikthehet, nga sot me duelet e javës së dhjetë në Ligën e Parë, njofton Telegrafi.
Java do të nisë me dy ndeshje të premten, ku më interesant pritet të jetë derbi shqiptar në Kumanovë. Ekipi i Bashkimit, që këtë sezon po tregon formë solide, do të jetë nikoqir i Shkupit. Dy skuadra me objektiva të ndryshme – Bashkimi ndodhet në pozitën e pestë me 15 pikë, ndërsa Shkupi, ndonëse një emër i madh në futbollin vendor, këtë edicion po kalon periudhë të vështirë dhe gjendet në fund të tabelës me vetëm një pikë të fituar.
Dueli tjetër i ditës do të luhet në Kavadar, ku Tikveshi pret Arsimin. Të dy ekipet kanë pikë të barabarta në renditje dhe synojnë të marrin maksimumin për të larguar presionin e zonës së ftohtë. Të dy ndeshjet do të fillojnë në orën 14:30.
Të shtunën do të zhvillohen dy takime të tjera: Rabotniçki do të përballet me Makedonija Gj.P, ndërsa Struga Trim Lum, që aktualisht kryeson tabelën, do të jetë nikoqire e Brerës nga Strumica.
Të dielën pritet një duel interesant mes Sileksit dhe Pelisterit, ndërsa java e dhjetë do të mbyllet të hënën me superderbin e madh mes Shkëndijës dhe Vardarit, përballje që gjithmonë sjell emocione dhe rivalitet të lartë.
Shkaku i ndryshimit të orës nga ajo verore në dimërore, ndeshjet Sileksi – Pelisteri dhe Shkëndija – Vardari do të fillojnë në orën 13:30. /Telegrafi/
Këtë fundjavë nuk do të zhvillohen ndeshje futbolli në Maqedoni, pasi Federata e Futbollit e Maqedonisë (FFM) ka pranuar rekomandimin e Ministrisë së Punëve të Brendshme (MPB) për të shtyrë të gjitha takimet për shkak të mbajtjes së raundit të parë të zgjedhjeve lokale, njofton Telegrafi.
Janë publikuar terminet e reja për ndeshjet e shtyra të javës së dhjetë, ndërsa vëmendjen më të madhe, sigurisht, e tërheq derbi i madh mes Shkëndijës dhe Vardarit, i cili do të luhet në “Stadiumin e Qytetit” në Tetovë.
Përballja mes Shkëndijës dhe Vardarit është caktuar për të hënën, më 27 tetor, me fillim nga ora 13:30.
Xhiroja e dhjetë në Ligën e Parë të Futbollit të Maqedonisë do të nisë të premten (më 24 tetor) me ndeshjet Bashkimi – Shkupi dhe Tikveshi – Arsimi (në orën 14:30).
Të nesërmen, pra të shtunën, do të luhen takimet Rabotniçki – Makedonija GP dhe Struga – Brera (në orën 14:30), ndërsa të dielën (më 26 tetor) është parashikuar vetëm një ndeshje – Sileksi kundër Pelisterit (në orën 13:30). /Telegrafi/
Pas nëntë javëve të para në Ligën e Parë të Maqedonisë së Veriut, Struga Trim & Lum e pandalshme në krye, Shkëndija në ndjekje për mbrojtjen e titullit, ndërsa Shkupi përjeton sezonin më të errët në historinë e saj, njofton Telegrafi.
Liga e Parë ka hyrë në një pauzë për shkak të ndeshjeve të përfaqësueses, por pas nëntë javëve, tabela e kampionatit është e qartë: Struga Trim & Lum kryeson pa humbje dhe me një golaverazh mbresëlënës, Shkëndija po qëndron fort në garë për fronin, ndërsa Bashkimi dhe Arsimi po kërkojnë stabilitet në mesin e tabelës. Në anën tjetër, FC Shkupi, një klub me traditë, është zhytur në krizë të thellë me vetëm një pikë të fituar.
Struga Trim & Lum – lidere e padiskutueshme
Struga Trim & Lum po zhvillon një sezon fantastik. Pas nëntë javëve, skuadra strugane kryeson renditjen me 23 pikë, me një bilanc mbresëlënës prej 7 fitoreve dhe 2 barazimeve, pa asnjë humbje.
Me 22 gola të shënuar dhe vetëm 5 të pësuar, Struga ka golaverazhin më të mirë në kampionat (+17), duke dëshmuar forcën e saj në të dyja fazat e lojës. Ekipi i trajnerit Blendi Shkëmbi ka ndërtuar një stil dominues dhe të disiplinuar, ku përveç efikasitetit në sulm, mbrojtja ka qenë një nga më të qëndrueshmet në ligë.
Shkëndija – kampionia që nuk heq dorë nga froni
Në vendin e tretë, me 21 pikë, qëndron Shkëndija e Tetovës, kampione në fuqi dhe rivale e përjetshme për kreun. Kuqezinjtë kanë regjistruar 6 fitore dhe 3 barazime, duke qenë një nga tre skuadrat që ende nuk kanë pësuar humbje. Me 15 gola të shënuar dhe vetëm 4 të pësuar, Shkëndija është ekipi me mbrojtjen më të fortë në kampionat. Forma e qëndrueshme, përvoja dhe grupi i konsoliduar e mbajnë skuadrën tetovare në garë të plotë për titull, në një duel që duket se do të vazhdojë gjatë gjithë sezonit me Strugën dhe Vardarin. Sigurisht se garën e bënë pak më të vështirë, pasi kuqezinjtë nga Tetova këtë seszonë janë pjesëmarrës për herë të parë në historinë e klubit edhe në garat e Ligës së Konferencës.
Bashkimi befasia pozitive e sezonit
Ekipi i Bashkimit të Kumanovës është një nga historitë e bukura të këtij fillim sezoni. Pas nëntë javëve, Bashkimi renditet në vendin e pestë me 15 pikë, falë 4 fitoreve, 3 barazimeve dhe vetëm 2 humbjeve.
Skuadra ka shënuar 12 gola dhe ka pësuar po aq (12:12), çka tregon një ekuilibër të mirë mes fazave të lojës. Në javët e fundit, Bashkimi ka treguar karakter, duke marrë rezultate të rëndësishme si mysafir, dhe po hyn me ambicie në mesin e skuadrave që luftojnë për pozicionet e para. Nëse jo më shumë, kumanovarët do të sulmojnë një pozitë që u mundëson dalje në garat evropiane.
Arsimi luan “ftohtë-nxehtë”, me potencial për rikthim
Në vendin e tetë me 8 pikë gjendet Arsimi i Tetovës, që ka realizuar 2 fitore, 2 barazime dhe 5 humbje, me golaverazh 13:16. Skuadra ka treguar momente të mira loje, sidomos në duelet në shtëpi, por mungesa e vazhdimësisë dhe disa gabime në fundin e ndeshjeve kanë kushtuar pikë të vlefshme. Nëse arrin të stabilizojë mbrojtjen dhe të ruajë ritmin e sulmit, Arsimi ka potencial për të ngjitur disa shkallë në tabelë pas rikthimit nga pauza.
Shkupi në krizë, nëntë javë një pikë
Në fund të tabelës, me vetëm 1 pikë nga 9 ndeshje, qëndron FC Shkupi, një klub me traditë të madhe dhe katër tituj kampion në historinë e saj. Bilanci është alarmant: 0 fitore, 1 barazim dhe 8 humbje, me golaverazh -17 (6:23).
Kjo është periudha më e vështirë që ka përjetuar Shkupi në vitet e fundit, ku problemet financiare, ndryshimet e brendshme dhe mungesa e stabilitetit kanë ndikuar drejtpërdrejt në fushë. Në Çair mbretëron pasiguria, ndërsa tifozët presin reagim dhe masa konkrete për ta shpëtuar sezonin, që aktualisht po shkon drejt katastrofës.
Pauza – moment reflektimi
Pas nëntë javëve, kampionati po tregon se do të jetë një nga më interesantët e viteve të fundit. Ekipet shqiptare janë protagoniste në çdo nivel të tabelës: Struga Trim & Lum si lidere e qartë, Shkëndija në ndjekje për mbrojtjen e titullit, Bashkimi me rritje të qëndrueshme, Arsimi që kërkon stabilitet dhe Shkupi që përballet me krizën më të thellë në historinë e tij të afërt.
Pauza për ndeshjet e përfaqësueses do t’u japë trajnerëve kohë për analizë dhe përgatitje, ndërsa rikthimi në fushë pritet të sjellë edhe më shumë emocione dhe duele të zjarrta mes skuadrave shqiptare që po e udhëheqin elitën e futbollit në Maqedoninë e Veriut. /Telegrafi/
Java e tetë e Ligës së Parë të Maqedonisë u hap sot me përballjen mes Makedonija Gj.P dhe Arsimit, dy skuadrave që po luftojnë për t’u larguar nga fundi i tabelës, njofton Telegrafi.
Nikoqirët arritën të triumfojnë me rezultat 4-1, edhe pse Arsimi pati momente kur u duk se mund të merrte më shumë nga ky duel.
Ndeshja nisi me presion të vendasve, që kaluan në epërsi në minutën e 13-të me golin e Stoillovit. Arsimi e pranoi golin herët, por nuk u dorëzua dhe me kalimin e minutave filloi të krijojë raste, siç ishte përpjekja e Ignjatovit në minutën e 33-të.
Në pjesën e dytë, Arsimi u gjend në disavantazh prej dy golave, por në minutën e 63-të Shefit Shefiti ktheu shpresat me një realizim të bukur, duke ngushtuar rezultatin në 2-1. Megjithatë, vetëm pak çaste më pas, ekipi nga Çegrani mbeti me një lojtar më pak pasi Xhemil Jahiji u ndëshkua me kartonin e dytë të verdhë, gjë që e vështirësoi misionin e tyre për të rikthyer ndeshjen.
Edhe futbollistët e Arsimit me një lojtar më pak u përpoqën të mbeten aktivë në lojë, një gabim i portierit Siljanovski i dha mundësinë vendasve të realizojnë golin e tretë, ndërsa në fund u shënua edhe i katërti për rezultatin përfundimtar 4-1.
Arsimi mbeti duarbosh në duelin ndaj Makedonija Gj.P telegrafi.com
Me këtë humbje, Arsimi mbetet me katër pikë më pak se rivali i sotëm dhe do të kërkojë të rikthehet në binarë javën e ardhshme në udhëtimin e vështirë ndaj Tikveshit në Kavadar. Kujtojmë se ndeshjet tjera të javës së tetë do të zhvillohen në tri ditët e ardhshme. /Telegrafi/
Fillimi i tetorit sjell javën e tetë të kampionatit në Ligën e Parë të Maqedonisë së Veriut, e cila më pas do të ketë një pauzë për shkak të angazhimeve të përfaqësueses në kualifikimet për Botërorin 2026. Kjo xhiro premton duele të nxehta, me disa ndeshje që mund të ndikojnë drejtpërdrejt në renditjen e tabelës, njofton Telegrafi.
Xhiron e hap të premten përballja mes Makedonija Gj.P dhe Arsimit (15:00). Të dy skuadrat ndahen vetëm nga një pikë në renditje, ndërsa Arsimi vjen i motivuar pas fitores ndaj Shkupit, kurse Makedonija e Gj.P. do të kërkojë të kthehet te rezultatet pozitive pas humbjes nga Tikveshi.
Të shtunën zhvillohen dy ndeshje të tjera. Bashkimi, që ndodhet në formë shumë të mirë dhe është afër kreut të tabelës, udhëton në Strumicë për t’u përballur me AP Brerën. Në të njëjtën kohë, Shkupi do të masë forcat me Rabotniçkin, ndeshje që do të luhet në Strugë për shkak të pezullimit të stadiumit të Çairit. Bëhet fjalë për dy skuadrat që ndodhen në fund të tabelës, por kjo mund të jetë mundësia e artë për Shkupin që ende nuk ka fituar asnjë pikë këtë sezon.
Të dielën spikat derbi i madh në Shkup mes Vardarit dhe Strugës (15:00). Struga Trimi Lum, që po dominon kampionatin, do të kërkojë të vazhdojë ecurinë perfekte përballë ndjekësit të parë, Vardarit, në një duel që pritet të tërheqë vëmendjen e madhe të opinionit sportiv. Në të njëjtën ditë, Sileksi pret Tikveshin në Kratovë.
Java e tetë do të mbyllet të hënën me përballjen në Manastir mes Pelisterit dhe Shkëndijës. Për kuqezinjtë e Tetovës kjo do të jetë një ndeshje e vështirë, pasi sot ata përballen me Rayo Vallecanon në Ligën e Konferencës. /Telegrafi/
Java e tetë e kampionatit elitar të Maqedonisë së Veriut u hap me dy ndeshje mjaft interesante. Në Gostivar, Arsimi dhe Shkupi dhuruan spektakël me plot gjashtë gola, ndërsa në Kavadar, Tikveshi ia doli të marrë tri pikë shumë të vlefshme ndaj Makedonija Gj.P, njofton Telegrafi.
Në një atmosferë të zjarrtë në stadiumin e Gostivarit, Arsimi arriti fitore, duke e mundur Shkupin me rezultat 4-2 dhe duke siguruar kështu triumfin e dytë në elitë.
Skuadra vendase e nisi ndeshjen fuqishëm dhe qysh në minutën e 16-të kaloi në epërsi. Megjithatë, mysafirët nga Çairi reaguan shpejt dhe në minutën e 35-të portugezi Ribeiro shënoi një gol të bukur për 1-1. Pak para pushimit, Arsimi riktheu epërsinë që u finalizua nga Shefit Shefiti në minutën e 45-të (2-1).
Në pjesën e dytë, Shkupi tentoi të kthehet në lojë. Pas disa rasteve, barazimi erdhi në minutën e 76-të, kur Ardit Destani mposhti portierin e Arsimt dhe vendosi shifrat 2-2. Por reagimi i vendasve ishte i menjëhershëm, vetëm pas nëntë minutash, Leonid Ignjatovi me një goditje me kokë riktheu epërsinë për Arsimin (3-2). Vetëm një minutë më pas, Shefiti fitoi dhe ekzekutoi saktë një penallti, duke realizuar golin e tij të dytë personal dhe duke vulosur rezultatin përfundimtar 4-2.
Kjo fitore e çon Arsimin në kuotën e 8 pikëve dhe e ngjit në vendin e shtatë, ndërsa Shkupi vazhdon të mbetet “i ngujuar” në fund të tabelës pa asnjë pikë pas tetë xhirove.
Në ndeshjen tjetër, Tikveshi triumfoi ndaj Makedonija Gj.P. me rezultat 2-1. Për vendasit shënuan Sadik (9’) dhe Ivanovski (67’), ndërsa golin e vetëm për mysafirët e realizoi Stoilov nga penalltia (56’). /Telegrafi/
Java e tetë e kampionatit në Maqedoninë e Veriut pritet të sjellë emocione të veçanta, sidomos për ekipet shqiptare që janë thellësisht të përfshira në luftën për kreun e renditjes, por edhe në mbijetesë, njofton Telegrafi.
Struga Trim Lum, lideri aktual me 19 pikë, këtë javë pret Pelisterin në shtëpi. Kampionët e Bledi Shkëmbit janë në një formë të jashtëzakonshme dhe synojnë të vazhdojnë serinë e fitoreve për të ruajtur, e ndoshta edhe thelluar epërsinë në krye të tabelës. Me vetëm një gol të pranuar deri më tani, Struga mbetet skuadra më solide e kampionatit dhe në letër ka përballje të favorshme për të marrë tri pikë të tjera.
Në Tetovë, Shkëndija (17 pikë) përballet me një rival direkt, Sileksin (15 pikë). Ky është një duel për vendet e para, ku kuqezinjtë e Tetovës kërkojnë të shfrytëzojnë epërsinë e terrenit vendas për të kaluar në pozitën e dytë ose për t’iu afruar Strugës. Përballja shihet si test i madh për ambiciet e Shkëndijës që sërish e synon titullin kampion.
Një tjetër ndeshje e madhe do të zhvillohet në Kumanovë, ku Bashkimi (13 pikë) e pret Vardarin, njëri prej liderëve të tabelës me 19 pikë. Për ziegjelbrit e Kumanovës, kjo sfidë është më shumë se një ndeshje futbolli, është derbi që mat forcat e Bashkimit me një kundërshtar historik. Me një fitore, Bashkimi do të bëhej pjesë e ngushtë e garës për kreun, duke dëshmuar se ky sezon është i tyre për të shënuar rikthim të madh.
Ndërkohë, Arsimi (5 pikë) do të luajë në Gostivar ndaj Shkupit, skuadrës që ndodhet në fund të tabelës pa asnjë pikë pas 7 javësh. Ky duel mes dy ekipeve shqiptare pritet të jetë shumë i zjarrtë, pasi të dy ekipet kanë nevojë jetike për pikë. Arsimi kërkon të largohet nga zona e rrezikut, ndërsa Shkupi është i dëshpëruar për t’i dhënë fund serisë së humbjeve dhe për të nisur ringjalljen. Një disfatë tjetër do ta komplikonte edhe më shumë situatën e ekipit nga Çairi, që ndodhet në krizë të thellë sportive dhe morale.
Java e tetë e kampionatit të Maqedonisë së Veriut do të zhvillohet prej së shtunës deri të hënën. /Telegrafi/
Në një nga ndeshjet më të bukura të këtij sezoni në elitën e futbollit vendor, Struga Trim&Lum arriti fitore të madhe në transfertë ndaj Sileksit me rezultat 1-3, në kuadër të javës së shtatë të kampionatit të Maqedeonisë, njofton Telegrafi. Ekipi i Strugës, me këtë fitore, u ngjitën në krye të renditjes, me pikë të barabarta me Vardarin, duke dëshmuar edhe një herë se janë ndër favoritët kryesorë për titullin.
Ndeshja në stadiumin e Kratovës solli lojë të fortë dhe të hapur që nga fillimi. Struga kaloi herët në epërsi me golin e Kompaore, i cili realizoi të tetin gol sezonal pas vetëm shtatë ndeshjesh. Bukuria e takimit u vulos në minutën e 34-të, kur Hamza Memedriza realizoi një perlë nga goditja e lirë, duke dyfishuar epërsinë për struganët. Sileksi reagoi shpejt dhe ngushtoi diferencën me një gol të bukur të Hrvanoviqit, por pjesa e parë përfundoi 1-2.
Edhe në pjesën e dytë vendasit kërcënuan disa herë portën e Anxheletit, por Struga rezistoi dhe shfrytëzoi hapësirat në kundërsulme. Në minutat shtesë doli në skenë i riu Shaban Zenku, i cili me një goditje të fuqishme vulosi fitoren 1-3, duke shënuar edhe golin e tij të parë në elitë.
Falë këtij triumfi, Struga jo vetëm që ruajti ecurinë pozitive, por mori edhe kreun e tabelës, duke treguar forcën e saj si një skuadër e kompletuar dhe e gatshme për synime të mëdha.
Ndërkohë, në Strumicë, Arsimi pësoi sërish. Pavarësisht se kaloi në epërsi ndaj Brera Strumicës, skuadra nga Çegrani u mund me rezultat 2-1, duke mbetur në zonën e fundit të tabelës dhe duke konfirmuar formën e dobët në këtë fillimsezon. Java e shtatë kopmpletohet nesër me ndeshjen Pelisteri - Bashkimi. /Telegrafi/
Java e 7-të e Ligës së Parë të Maqedonisë së Veriut: Duelet shqiptare në qendër të vëmendjes, me Shkupin që rikthehet në Çair për herë të parë këtë sezon, ndërsa Struga luan derbin e javës ndaj Sileksit në Kratovë. Njofton Telegrafi
Pas shumë pritjesh, FC Shkupi më në fund do ta zhvillojë ndeshjen e parë si vendas në stadiumin e vet në Çair. Klubi konfirmoi se çështjet rreth terrenit janë zgjidhur dhe të shtunën (20 shtator, ora 15:30) do të mirëpresë Makedonija Gj.P. Për skuadrën nga Çairi kjo është mundësi e artë për të marrë pikët e para të sezonit, duke qenë se deri tani ende nuk ka arritur të gëzojë një sukses.
Një tjetër sfidë e fortë është ajo e Strugës, që të dielën (22 shtator, ora 15:30) do të udhëtojë në Kratovë për t’u përballur me Sileksin në një derbi interesant për kreun e tabelës. Struga e Bledi Shkëmbit po kërkon të vazhdojë formën pozitive dhe të ruajë pozitën e pare në renditje.
Ndërkohë, kampioni aktual Shkëndija të shtunën (21 shtator, ora 15:30) në Tetovë do të përballet me Tikveshin. Kuqezinjtë synojnë fitore për të forcuar pozitat në krye dhe për të mbajtur ritmin e lartë të rezultateve.
Bashkimi nga Kumanova, pas triumfit ndaj Sileksit javën e kaluar, këtë herë do të provojë të marrë vazhdimësi edhe në udhëtim, ku të hënën (23 shtator, ora 15:30) viziton Pelisterin në Manastir.
Nga ana tjetër, skuadra e Arsimit, që ka pasur një “nxehtë-ftohtë” këtë sezon, do të kërkojë këndelljen në Strumicë, aty ku të dielën (22 shtator, ora 15:30) luan kundër AP Brera-s. /Telegrafi/
Pas javës së kaluar kur Arsimi shkëlqeu me triumfin bindës në Manastir ndaj Pelisterit (0-4), sot skuadra nga Gostivari nuk arriti ta përsërisë të njëjtën paraqitje, duke u mposhtur në shtëpi nga Vardari me rezultat 1-4, njofton Telegrafi.
Ndeshja nisi keq për vendasit, pasi në minutën e 10-të mbrojtja e Arsimit gaboi në pastrim, ndërsa topi përfundoi në këmbët e sulmuesit nga Uganda, Rogers Mato, i cili shënoi për 0-1. Vardari vazhdoi presionin dhe deri në minutën e 35-të e kishte siguruar epërsinë 0-3 falë golave të Misllav Matiq dhe sërish Matos. Pas pushimit, Mato kompletoi het-trikun personal, duke vulosur një tjetër paraqitje të shkëlqyer.
Arsimi arriti të shënojë golin e nderit në minutën e 72-të, pas një goditjeje dënimi të Ramadanit, që u devijua nga muri dhe e befasoi portierin mysafir, Davor Taleski. Vendasit patën një mundësi të artë nga pika e bardhë, por Shefit Shefiti e shpërdoroi penalltinë në minutën e 59-të, kur rezultati ishte 0-4.
Kjo humbje i tregon Arsimit se debutimi në elitë do të ketë ulje-ngritjet e veta, pavarësisht startit premtues dhe fitores së madhe në Manastir një javë më parë. Në javën e ardhshme, skuadra nga Gostivari do të udhëtojë te Brera në Strumica, ndërsa Vardarin e pret derbi i qytetit kundër Rabotniçkit. /Telegrafi/
Futbollistët e Arsimit shënuan fitoren e tyre të parë historike në elitën e futbollit vendor, pasi triumfuan bindshëm me 0-4 (0-0) në transfertën ndaj Pelisterit, në kuadër të xhiros së pestë, njofton Telegrafi.
Edhe pse vendasit nga Manastiri zhvilluan një pjesë të parë të shkëlqyer, duke goditur dy herë shtyllën, në fund u ndëshkuan për gabimet e tyre.
Pjesa e parë kaloi me dominim të Pelisterit, të cilët kishin më shumë posedim dhe raste, por nuk arritën të shënojnë. Në minutën e 66’, Armin Besagiq zhbllokoi rezultatin pas një aksioni të bukur që nisi nga krahu i majtë.
Në minutën e 81’, Taipi dyfishoi, pasi fillimisht iu anulua goli për pozitë jashtë loje, por pas verifikimit në VAR u pranua. Vetëm pak çaste më vonë, Shefit Shefiti shënoi golin e tretë për mysafirët. Në minutat shtesë, Leonid Ignatov vulosi fitoren me rezultatin final 0-4.
Kjo fitore historike i ngjit Arsimin në kuotën e 5 pikëve, duke u renditur në vendin e 7-të, ndërsa Pelister mbetet një pozitë më lart me 6 pikë.
Në xhiron e ardhshme të mesjavës, Arsimi pret Vardarin, ndërsa Pelisteri udhëton në Shkup për t’u përballur me Rabotniçkin. /Telegrafi/
Në kuadër të javës së pestë të Ligës së Parë të Maqedonisë, në Strumicë u zhvillua “derbi i fundit të tabelës” mes Brera Strumicës dhe Shkupit, ku vendasit arritën të fitojnë minimalisht 1-0, edhe pse mysafirët nga Çairi treguan lojë më të organizuar dhe patën raste të pastra për gol, njofton Telegrafi.
Takimi nisi me ritëm më të mirë nga Shkupi, i cili krijoi dy mundësi në minutat e para, ndërsa në vazhdim arriti të tundë edhe rrjetën me anë të kapitenit Muarem. Mirëpo, goli u anulua pas rishikimit nga VAR për pozitë jashtë loje, duke ua humbur mysafirëve një epërsi të merituar.
Shkupi nuk u ndal me kaq, duke zhvilluar disa aksione të rrezikshme edhe në fundin e pjesës së parë, ndërsa edhe në pjesën e dytë pati shanset e veta – sidomos në minutën e 69-të, kur topi nuk arriti deri te kapiteni dhe përfundoi jashtë kuadratit. Çairasit në asnjë moment nuk e lanë përshtypjen e një rivali të dorëzuar, përkundrazi, kontrolluan mirë lojën dhe e mbajtën Brerën larg portës në shumë raste.
Megjithatë, fati nuk ishte në anën e Shkupit. Në minutën e 85-të, pas një aksioni të shpejtë të vendasve, i riu Kiril Stojanov arriti të realizojë golin e vetëm të takimit, i cili pas verifikimit të VAR-it u pranua si i rregullt.
Kështu, Shkupi mbetet ende pa fitore këtë edicion, edhe pse në Strumicë e dëshmoi se ka cilësi dhe meritonte të paktën një pikë. Mundësinë për të marrë pikët e para do ta ketë në javën e ardhshme kur do të udhëtojë në Kavadar përballë Tikveshit.
Në duelet tjera të javës së pestë, Sileksi vazhdoi serinë e fitoreve duke mposhtur Rabotniçkin 3:1, ky ishte edhe goli i parë i pranuar nga Sileksi pas pesë javësh. Dje Shkëndija triumfoi 2:1 ndaj Bashkimit, ndërsa Vardari fitoi minimalisht 1:0 ndaj Makedonija Gj.P. Java e pestë do të mbyllet nesër me ndeshjet Struga – Tikveshi dhe Pelisteri – Arsimi. /Telegrafi/
Login
