TIRANË, 25 dhjetor /ATSH/ Agjencitë e udhëtimit dhe operatorët turistikë shqiptarë do të mund të ofrojnë shërbimet e tyre më lehtë në vendet e rajonit, pa u përballur me procedura të përsëritura licencimi.

Këshilli i Ministrave i propozon Kuvendit ratifikimin e vendimit të Komitetit të Përbashkët të CEFTA-s, “Për lehtësimin e tregtisë së shërbimeve të ofruara nga agjencitë e udhëtimit dhe operatorët turistikë”.

Sipas relacionit shoqërues, vendimi synon që rregullat për ushtrimin e aktivitetit turistik të mos kthehen në barriera për tregtinë e shërbimeve, duke garantuar trajtim të barabartë dhe mosdiskriminim për operatorët nga vendet e CEFTA-s.

Një element i rëndësishëm i vendimit është mundësia që shërbimet turistike të ofrohen edhe përkohësisht në vendet e tjera të rajonit, pa qenë e nevojshme hapja e një zyre apo marrja e një licence të re, çka pritet të rrisë konkurrencën dhe bashkëpunimin rajonal në turizëm.

Projektligji është pjesë e angazhimeve të Shqipërisë në kuadër të Marrëveshjes së CEFTA-s dhe zhvillimit të Tregut të Përbashkët Rajonal, të modeluar sipas parimeve të Bashkimit Evropian. /j.p/

The post Hiqen barrierat për shërbimet turistike shqiptare në tregun rajonal appeared first on Agjencia Telegrafike Shqiptare.

TIRANË, 11 dhjetor/ATSH-Maela Marini/ Kryetari i grupit parlamentar të Partisë Socialiste, Taulant Balla deklaroi sot në Kuvend se projektligji “Për koncesionet dhe Partneritetin Publik-Privat” merr në konsideratë të gjitha sugjerimet, gjetjet dhe kritikat që janë bërë ndër vite.

Duke iu drejtuar deputetëve të opozitës, Balla tha se “nuk jemi në sistemin komunist ku të gjitha shërbimet publike duhen ofruar vetëm nga paratë publike”.

“Opozitë si ju ne na bëni nder. Unë të isha deputet i opozitës dhe të mbaja mend se çfarë kam thënë në gjithë këto vite do vija ta votoja ligjin që keni para. Ligji merr në konsideratë të gjitha sugjerimet, gjetjet, kritikat që janë bërë ndër vite përfshirë këtu rekomandimet nga Komisioni Europian”, tha Balla.

Sipas tij, po i jepet një autoritet i “rojes” fiskale Ministrisë së Financave dhe kjo është normale.

Balla u shpreh se vetë opozita duhet të jetë dakord që mos të kalojë asnjë koncesion pa marrë miratimin e Ministrisë së Financave.

“Në këtë sistem që kemi zgjedhur një pjesë e shërbimeve publike kryhen nga privati, por ne duam t’i kontrollojmë”, theksoi Balla.

Në përfundim, Balla uroi në emër të grupit parlamentar të PS-së drejtuesin e ri të SPAK, Klodian Braho.

“Sot u krye një proces siç i ka hije një vendi që konsolidon ditë pas dite institucionet e drejtësisë. Mes 4 kandidatëve njëri prej tyre u zgjodh kryetar i SPAK. Uroj që të çojë më tej punët e mira të nisura nga drejtuesi që sapo përfundoi mandatin, Altin Dumani”, tha Balla. /j.p/

The post Balla: Ministria e Financave, “roje” fiskale e të gjitha koncesioneve appeared first on Agjencia Telegrafike Shqiptare.

TIRANË, 5 dhjetor/ATSH/ Mbrojtja e fëmijëve në Shqipëri është një prej prioriteteve të Ministrisë së Shëndetësisë dhe Mirëqenies.

Në një njoftim zyrtar, MSHMS bën me dije se për herë të parë po hartohet një projektligj për familjet kujdestare, një hap që garanton se asnjë fëmijë nuk mbetet pa kujdes.

Sipas MSHMS, ky projektligj, i propozuar nga kjo ministri mbron të drejtat e fëmijëve pa kujdes prindëror ose në rrezik për ta humbur atë, duke i vendosur ata në një mjedis familjar të sigurt, mbështetës dhe gjithëpërfshirës, gjithmonë në përputhje me parimin e interesit më të lartë të fëmijës.

Ligji i ri për Kujdesin Alternativ, i cili po finalizohet, është një prej shtyllave kryesore të reformës së deinstitucionalizimit dhe një angazhim kyç në kuadër të Kapitullit 23 të negociatave për anëtarësim në Bashkimin Evropian.

Ligji pritet të modernizojë të gjithë sistemin e kujdesit për fëmijët që nuk mund të rriten me prindërit e tyre, duke vendosur standarde të reja në garantimin e interesit më të lartë të fëmijës dhe ndërtimin e një modeli funksional të kujdestarisë profesionale.

/e.i/j.p/

The post Hartohet për herë të parë projektligj për familjet kujdestare appeared first on Agjencia Telegrafike Shqiptare.

TIRANË, 4 dhjetor/ATSH/ Ministrja e Shëndetësisë dhe Mirëqenies Sociale, Evis Sala prezantoi sot në Kuvend, projektligjin “”Për shërbimet dhe produktet biocide në shëndetin publik”, të ndryshuar”.

Sala tha se sot prezantohet një projektligj me rëndësi të veçantë për shëndetin publik.

“Edhe pse në pamje të parë duket një paketë e specializuar teknike, realiteti është se ky ligj prek jetën e përditshme të të gjithëve. Ky është një ligj që vendos në qendër të tij sigurinë e qytetarit. Produktet biocide përdoren në spitale, në shtëpitë tona, në industrinë ushqimore ose në ambiente kolektive. Për këtë arsye, standardet për to duhet të jenë të qarta, të unifikuara dhe të garantuara, në mënyrë që mbrojtja e shëndetit publik të mos vijë në kurriz të sigurisë së qytetarëve”, tha Sala.

”Për më shumë se dhjetë vjet, Shqipëria ka funksionuar me një kuadër ligjor të pjesshëm, jo plotësisht të harmonizuar me legjislacionin europian. Boshllëqet ligjore, kanë sjellë një proces jo të strukturuar e transparent për të vlerësuar sigurinë dhe cilësinë e këtyre produkteve.

Sot ne e mbyllim këtë boshllëk. Ky projektligj e vendos Shqipërinë në të njëjtin standard me Bashkimin Europian, duke adoptuar parimet e rregulloret e BE-së dhe duke sjellë një model modern dhe të qëndrueshëm. Projektligji që po shqyrtohet sot, është një shembull i mirë që integrimi i standardeve europiane shtrihet në çdo qelizë. Ai sjell mbrojtjen e shëndetit publik dhe lehtësimin e tregtisë sipas standardeve europiane”, vijoi ajo.

Ministrja Sala nënvizoi se ky projektligj është i rëndësishëm para së gjithash, për të mbrojtur shëndetin e qytetarëve. Sipas Salës, “produktet biocide nuk janë produkte të zakonshme pasi përmbajnë substanca aktive që mund të jenë të dëmshme kur nuk përdoren apo nuk kontrollohen siç duhet”.

“Mungesa e kritereve të detyrueshme krijonte mundësinë që në treg të depërtonin produkte të pasigurta. Me këtë ligj, çdo produkt i tillë do të kalojë një proces të qartë vlerësimi, duke u testuar efikasiteti, përbërja dhe rreziqet e mundshme”, tha Sala.

“Ky projektligj i jep fund edhe fragmentimit të deritanishëm. Për herë të parë krijohet një regjistër kombëtar i produkteve biocide, një databazë transparente ku çdo qytetar, çdo biznes, çdo institucion publik mund të verifikojë se cilat produkte janë të autorizuara dhe cilat jo.

Për herë të parë, sigurojmë që produktet biocide, që do të tregtohen në Republikën e Shqipërisë, janë të njëjta e me të njëjtat standarde me ato që tregtohen në secilin nga vendet e Bashkimit Europian, qofshin këto produkte vendase apo të importuara”, pohoi Sala.

Ministrja tha se me miratimin e projektligjit, autorizimi për vendosjen në treg të produkteve biocide do të lëshohet vetëm për produkte biocide të prodhuara në vend, por të autorizuara paraprakisht në një nga vendet e Bashkimit Europian dhe produkte biocide të importuara dhe të autorizuara paraprakisht në njërin nga vendet e Bashkimit Europian, pavarësisht vendit të origjinës.

“Projektligji siguron vendosjen e një ekuilibri të drejtë ku nga njëra anë, rritet kontrolli dhe siguria; nga ana tjetër, bizneset nuk rëndohen. Kemi propozuar adresimin e mangësive të ndeshura ndër vite ku procedurat ligjore nuk ishin të qarta dhe proceset ishin të paparashikueshme. Për çdo subjekt që importon apo prodhon biocide vendoset detyrimi për të pasur një person teknik të kualifikuar, çka rrit profesionalizmin dhe shmang abuzimet që vijnë nga mungesa e ekspertizës”, tha Sala.

“Kemi dëgjuar me vëmendje të gjitha shqetësimet e ngritura gjatë komisioneve parlamentare. Disa prej tyre lidhen me ngarkesën që mund të krijojnë vlerësimet laboratorike. Dua të theksoj se ligji e parashikon qartë që analizat kryhen vetëm kur ka dyshim të arsyeshëm për rrezik ose për cilësi të pamjaftueshme. Pra, nuk kemi të bëjmë me shpenzime të panevojshme për biznesin, por me një mekanizëm mbrojtës që aktivizohet vetëm kur kërkohet. E kjo është një garanci për sigurinë e qytetarëve”, shtoi ajo.

Sipas Salës, afatet e zbatimit janë menduar në mënyrë realiste, duke krijuar një periudhë tranzitore që i jep kohë tregut të përshtatet natyrshëm me kërkesat e reja.

Sala tha se “sa i përket administratës publike, ministria jonë ka nisur tashmë një proces trajnimi për inspektorët dhe për specialistët që do të jenë të përfshirë në zbatimin e ligjit”.

“Ne sigurojmë se struktura jonë është gati për ta zbatuar këtë ligj me profesionalizëm dhe për të garantuar që çdo produkt i hedhur në treg të jetë i sigurt dhe i kontrolluar. Ky projektligj sjell mbrojtje të drejtpërdrejtë të shëndetit publik dhe njëkohësisht rrit cilësinë e produkteve që qarkullojnë në treg, duke krijuar konkurrencë të ndershme dhe duke shmangur hyrjen e produkteve të dyshimta që dëmtojnë konsumatorin dhe çekulibrojnë tregun”, tha Sala.

Ministrja Sala shtoi, në përfundim të fjalës në Kuvend, se me këtë projektligj sillet një model europian i kontrollit të sigurt.

“Ajo është garanci për qytetarët, është një investim në sigurinë e familjeve tona, është një mburojë për shëndetin publik dhe një hap i qartë drejt modernizimit të tregut shqiptar. Sot vendosim të garantojmë standarde europiane në një fushë që është thelbësore për cilësinë e jetës së qytetarëve”, tha Sala.

/e.i/r.e/

The post Sala: Për herë të parë regjistër kombëtar për produktet biocide appeared first on Agjencia Telegrafike Shqiptare.

A ka një organizatë apo grup në Shqipëri që po “rrëmben fëmijët” për ti ndryshuar gjininë me anë të hormoneve?

Këto kanë qenë disa tituj dhe akuza që kanë qarkulluar në media ditët e fundit. Por le ta çmontojmë dezinformimin dhe të informojmë me fakte, sipas kuadrit ligjor shqiptar!

Në Shqipëri nuk ekziston asnjë ligj, protokoll, program shtetëror ose privat që lejon ndryshimin e gjinisë përmes terapisë hormonale apo ndërhyrjeve mjekësore.

Terapia hormonale për ndryshimin e gjinisë nuk është e rregulluar në sistemin shëndetësor. Kjo do të thotë se zyrtarisht nuk ofrohet si shërbim, as për të rritur, e aq më pak për fëmijë.

Citizens ka trajtuar me anë të artikujve mungesën  e terapisë hormonale, si sfidë emocionale dhe financiare për shumë anëtarë të komunitetit LGBT. Këta të fundit për shkak të mungesës së protokollit mjekësor, janë detyruar të largohen jashtë vendit për të kryer terapinë pa rrezikuar shëndetin mendor dhe fizik.

Ky debat nuk është i ri. Çështjet e orientimit seksual, identitetit gjinor dhe mosdiskriminimit janë trajtuar në ligjin shqiptar që prej vitit 2010, me Ligjin Nr. 10221 “Për Mbrojtjen nga Diskriminimi”.

Ky ligj ndalon diskriminimin për shkak të orientimit seksual dhe identitetit gjinor dhe u kërkon institucioneve që të mbrojnë barazinë.

Pra këto koncepte nuk janë “risi të frikshme”,  por kanë qenë pjesë e ligjit për më shumë se 14 vite.

Shumë njerëz janë shqetësuar, sepse me anë të projektligjit të ri për “Barazinë Gjinore” çështjet LGBT do të mësohen në shkolla.

Por ky nuk është ligj për arsimin dhe nuk ndryshon kurrikulat mësimore. Në tekst nuk ka asnjë nen që kërkon futjen e temave LGBT në shkolla. I vetmi detyrim për institucionet publike është përdorimi i gjuhës gjithëpërfshirëse dhe respektimi i parimit të mosdiskriminimit, një standard që ekziston tashmë edhe në Ligjin për Mbrojtjen nga Diskriminimi.

Çdo ndryshim në kurrikulat e shkollave rregullohet vetëm nga Ligji nr. 69/2012 “Për Arsimin Parauniversitar”, i cili ia delegon këtë kompetencë Ministrisë së Arsimit dhe Agjencisë së Sigurimit të Cilësisë në Arsimin Parauniversitar.
Ndaj, edhe nëse një ditë do të kishte nevojë për të trajtuar konceptet e barazisë gjinore në programe mësimore, kjo nuk mund të ndodhë me një ligj që udhëzon për barazinë gjinore, por vetëm me:

1. Udhezime të posaçme të Ministrisë së Arsimit,
2. Tekste dhe module të miratuara nga ASCAP,

Edukimi gjinor, në kuptimin që përdoret në projektligj, ka të bëjë me parandalimin e stereotipeve dhe garantimin e trajtimit të barabartë mes vajzave dhe djemve, jo me ndryshime gjinie, jo me trajtime hormonale dhe jo me ndërhyrje mjekësore.

Këto pretendime janë pjesë e një narrative të sajuar, që shpesh shfaqet sa herë diskutohet një ligj që prek të drejtat e njeriut.

The post Dezinformimi mbi “ndryshimin e gjinisë” në Shqipëri appeared first on Citizens.al.

TIRANË, 12 nëntor/ATSH/ Këshilli i Ministrave vendosi sot propozimin e projektligjit “Për nënproduktet me origjinë shtazore” që vjen si propozim i ministrit të Bujqësisë dhe Zhvillimit Rural.

Qëllimi i këtij ligji është parandalimi dhe minimizimi i risqeve për shëndetin publik e të shëndetit të kafshëve, që rrjedhin nga këto produkte, dhe në veçanti për të mbrojtur sigurinë e zinxhirit ushqimor dhe të ushqimeve për kafshë.

Projektligji do i kalojë Kuvendit pvr shqyrtim në komisionet e përhershme para se të kalojë për votijm.

The post Siguria ushqimore, propozohet pr.ligji “Për nënproduktet me origjinë shtazore” appeared first on Agjencia Telegrafike Shqiptare.

Projektligji i Ramës për Barazinë Gjinore, i cili tjetërson konceptin tradicional të familjes, ka revoltuar aktivistët dhe qytetarët të cilët janë mbledhur në protestë këtë pasdite te Parlamenti, aty ku pritet që ligjvënësit të votojnë këtë ligj. Aktivistët kanë shprehur revoltën e tyre në thirrjet “turp, turp”, “ligj antikombëtar”, teksa mes pankartave është pikasur njëra […]

The post Rama kërkon të shuajë konceptin e familjes, shqiptarët thirrje Trumpit: Ndihmoje popullin tonë appeared first on BoldNews.al.

TIRANË, 31 tetor /ATSH/ Ministria e Shëndetësisë dhe Mirëqenies Sociale ka hedhur për konsultim publik një projektligj për vendosjen e standardeve të cilësisë dhe sigurisë për substancat me origjinë njerëzore, si gjak, qeliza dhe inde, të përdorura në riprodhimin mjekësor të asistuar dhe inseminim artificial.

Në draftin e MSHMS, thuhet se ky ligj ka për qëllim të përcaktojë masa që vendosin standarde të larta të cilësisë dhe sigurisë për të gjitha substancat me origjinë njerëzore të synuara për aplikim te njeriu dhe për aktivitete të lidhura me ato substanca.

Gjithashtu, synohet që me këtë ligj të sigurohet një nivel i lartë i mbrojtjes së shëndetit të njeriut, veçanërisht për dhuruesit e gjakut, marrësit e gjakut dhe pasardhësit nga riprodhimi mjekësor i asistuar, duke përfshirë forcimin e vazhdimësisë së furnizimit me gjak.

Në draftin e hedhur për Konsultim Publik nga MSHMS thuhet që ky ligj nuk zbatohet për transplantin e organeve, qumështin e gjirit, kur përdoret ekskluzivisht për ushqyerjen e fëmijës, pa ndonjë përpunim të kryer nga një strukturë gjaku dhe për përdorim brenda çiftit, të cilat as nuk janë përpunuar dhe as nuk janë ruajtur para aplikimit ne njerëzit.

Sipas draftit, substancat e përfshira janë të gjitha substancat me origjinë njerëzore që aplikohen tek njerëzit kur këto substanca ndërveprojnë biologjikisht me trupin e marrësit të substancave njerëzore (SoHo). Këto janë gjaku dhe përbërësit e gjakut, indet dhe qelizat e tyre, qumështi i gjirit, të tjerë përbërës gjaku që nuk përdoren për transfuzion.

Në draft thuhet se “ky ligj promovon solidaritetin, dhurimin vullnetar dhe vetëmjaftueshmërinë, duke rritur besimin publik në sistem”.

/e.i/r.e/

The post Projektligj për sigurinë e gjakut dhe qelizave njerëzore në riprodhimin e asistuar appeared first on Agjencia Telegrafike Shqiptare.

TIRANË, 25 tetor/ATSH/ Qeveria shqiptare harton për herë të parë një kuadër ligjor për rregullimin e veprimtarisë së lobimit, ku synon të vendosë rregulla të qarta për ndërveprimin ndërmjet zyrtarëve publikë dhe subjekteve private.

Iniciativa për miratimin e këtij projektligji është pjesë e detyrimeve që Shqipëria ka ndërmarrë në kuadër të avancimit të negociatave me Bashkimin Evropian dhe përkatësisht në Pozicionin e Përbashkët Negociues të BE-së për Shqipërinë për Grupkapitullin “Themeloret”.

Projektligji “Për lobimin” ka në fokus ndërveprimin midis palëve të interesuara si bizneset, organizatat e shoqërisë civile apo grupet e ekspertëve nga njëra anë dhe vendimmarrësve publikë nga ana tjetër, duke garantuar që proceset e politikëbërjes të jenë transparente dhe të gjurmueshme.

Përcaktohet qartë një kuadër i qartë rregullash për ushtrimin e veprimtarisë së ndikimit në proceset publike të vendimmarrjes, duke parashikuar detyrimin për regjistrim të çdo individi apo subjekti juridik që angazhohet në lobim, si dhe deklarimin periodik të burimeve financiare dhe shpenzimeve çdo gjashtë muaj.

Nëpërmjet këtij projektligji do të vendoset detyrimi për raportim të saktë dhe të rregullt mbi aktivitetet e lobimit, respektimi i Kodit të Sjelljes dhe të parimeve etike profesionale, si dhe deklarimi i konfliktit të interesit duke e kthyer lobimin në një proces të ligjshëm, të hapur dhe në shërbim të interesit publik.

Lobimi si instrument ligjor kundër korrupsionit

Në thelb të kësaj nisme qëndron parimi i transparencës dhe parandalimit të korrupsionit.

Përmes regjistrit publik të lobimit, çdo kontakt, kontratë apo shpenzim lobimi do të jetë i deklaruar dhe i verifikueshëm, duke e bërë të mundur gjurmimin e burimeve të ndikimit dhe të interesave të përfaqësuara.

Projektligji vendos mekanizma të detyrueshëm për deklarimin e kontakteve të lobimit, përfshirë raportimin nga vetë zyrtarët publikë që zhvillojnë takime apo komunikime me lobistë, si dhe kufizime për ish-zyrtarët e lartë publikë në lidhje me ushtrimin e veprimtarisë së lobimit pas përfundimit të funksionit të tyre.

Ky proces reformues do të ndihmojë jo vetëm në krijimin e një mjedisi më transparent për funksionet publike, por edhe në forcimin e standardeve të besueshmërisë institucionale, që përbëjnë një shtyllë thelbësore të procesit të integrimit evropian, duke mundësuar kështu një moment të rëndësishëm në rrugëtimin e Shqipërisë drejt forcimit të integritetit publik dhe konsolidimit të mirëqeverisjes.

Miratimi i këtij projektligji do ta pozicionojë vendin tonë në një linjë të qartë përafrimi me standardet e GRECO-s dhe OECD-së për qeverisjen e hapur, transparencën dhe integritetin publik.

/m.m/a.f/

The post Qeveria propozon pr/ligjin “Për Lobimin”: Instrument i ri për transparencë dhe besim në vendimmarrjen publike appeared first on Agjencia Telegrafike Shqiptare.

Qeveria shqiptare harton për herë të parë një kuadër ligjor për rregullimin e veprimtarisë së lobimit, ku synon të vendosë rregulla të qarta për ndërveprimin ndërmjet zyrtarëve publikë dhe subjekteve private. Iniciativa për miratimin e këtij projektligji është pjesë e detyrimeve që Shqipëria ka ndërmarrë në kuadër të avancimit të negociatave me Bashkimin Evropian dhe përkatësisht në Pozicionin e…

Source

Si kundërpërgjigje ndaj hapit pas të grupit parlamentar socialist mbi ndryshimet e propozuara në projektligjin mbi barazinë gjinore, mbi 20 organizata të shoqërisë civile mbajtën një deklaratë të përbashkët për shtyp. Në mbështetje të këtij qendrimi ishte edhe institucioni i Avokatit të Popullit.

Mirela Arqimandriti, drejtuese ekzekutive e Qendrës Aleanca Gjinore për Zhvillim theksoi se ky projektligj forcon mekanizmat e llogaridhënies, bën të detyrueshëm buxhetimin gjinor dhe krijon instrumente konkrete për barazi reale në vendin e punës, vendimmarrje dhe në jetën publike.

“Projektiligji vlerëson punën e papaguar të kujdesit, promovon paga të barabarta për punë të barabartë, pjesëmarrje të barabartë në drejtim dhe politikë” – thekson Arqimandriti.

Në kuadër të fushatave të dizinformimit ajo sqaron se ky projektligj nuk prezanton gjini të reja dhe nuk zëvendëson biologjinë; nuk ndërhyn në jetën familjare dhe nuk ndryshon konceptet nënë, baba apo prind.

Ndër 22 ndryshimet e propozuara nga kryetari i Grupit Parlamentar Socialist Taulant Balla, renditen një sërë termash që ishin pjesë e projektligjit, si: “për shkak të përkatësisë së shumëfishtë”, “në të gjithë diversitetin e tyre”; “lidhur me identitetin dhe shprehjen gjinore”, apo përkufizimi “orientim seksual”.

“Të dezinformuar kanë mbetur dhe vetë deputetët në lidhje me projektligjin, prandaj do të ishte e nevojshme që të kishte informim sa më shumë mbi gjërat reale që ky projektligj sjell dhe me jo ç’trafikohet në media”, komentoi Komisioneri për Mbrojtjen nga Diskriminimi Robert Gajda për Citizens.al.

Ai shpjegon se koncepte si identiteti gjinor, janë shumë të vjetër në legjislacionin shqiptar, duke theksuar se identiteti gjinor njihet në ligjin Për Mbrojtjen nga Diskriminimi, (i miratuar në vitin 2010).

“Ligji synon të rregullojë situata faktike për të cilat vetë legjislacioni do të duhet të tregojë një ndjeshmëri, por dhe vetë shteti duhet të jetë i interesuar për t’i rregulluar këto situata në mënyrë që t’i garantohen të drejtat e njeriut kujtdo”, përmbledh Gajda.

Mirela Arqimandriti shton se nëse eliminohet fjala stereotip nga projektligji për barazinë gjinore do të thotë se po zgjedhim mos të shohim më rrënjën e pabarazisë.

“Pabarazia nuk fillon në ligj, ajo fillon në mendje, në mënyrën si rrisim vajzat dhe djemtë, si flasim për gratë në media, politikë e biznes dhe si gjykojmë burrat që kujdesen për fëmijët e tyre” – thekson ajo.

Deklarat u përmbyll duke theksuar se ky ligj nuk është për ndarje por për bashkim, për familjen, për barazinë dhe për dinjitetin njerëzor, nuk është ideologji, por thirrje për respektin e të drejtave të njeriut.

Ky projektligj është i parashikuar për votim të kalojë për votim në 30 tetor, sipas kalendarit të seancave plenare.

Konsultimi për projektligjin u hap më 10 mars dhe u mbyll më 7 prill të këtij viti. Në regjistrin elektronik janë numëruar rreth 1,400 vizitorë dhe një koment nga Komiteti Shqiptar i Helsinikit. Ndërkohë, nga sugjerimet e bëra gjatë procesit nga shoqëria civile u morën parasysh dhe u pasqyruan në draftin e projektligjit rreth 12 komente.

Ndër organizatat që reflektuan sugjerimet e tyre për përmirësimin e draft-propozimit ishin: Qendra AËEN, SCiDEV, Aleanca LGBTI, etj.

Lexo edhe:

• A po legalizohen “70 gjini” në Shqipëri? Ja si qëndron e vërteta
• Elementët pozitivë që sjell projektligji për barazinë gjinore
• PS bën një hap pas, propozon ndryshime të projektligjit për barazinë gjinore

The post Ligji për barazinë gjinore: Shoqëria civile kundërshton “hapin pas” të mazhorancës appeared first on Citizens.al.

Gjashtë muaj pas përfundimit të konsultimeve me 18 organizata joqeveritare, 9 institucione të nivelit qendror, 7 përfaqësi ambasadash dhe agjencish ndërkombëtare, Partia Socialiste ka bërë një hap pas në lidhje me projektligjin “Për Barazinë Gjinore”, të cilin ajo e shtyu vetë përmes ish-ministres së Shëndetësisë dhe Mbrojtjes Sociale, Albana Koçiu.

Deputeti Taulant Balla, njëherësh kryetar i grupit parlamentar të socialistëve, i është drejtuar të mërkurën Komisionit për Shëndetësinë dhe Mirëqenien Sociale, duke propozuar 22 ndryshime të draftit, i cili në prill 2025 mbylli konsultimet për publikun.

Ndryshimi kryesor lidhet me pikën 2 të Nenit 1, ku Balla kërkon që të zëvendësohen fjalët “si dhe trajtim të barabartë pavarësisht përkatësisë gjinore” me fjalët “si dhe trajtim të barabartë mes grave dhe burrave”.

Pika 2 e Nenit 1 në draftin e fundit kishte këtë formulim:

Ky ligj rregullon çështjet themelore të barazisë gjinore në të gjitha fushat e jetës publike dhe private për arritjen e barazisë gjinore plotësisht dhe në mënyrë efektive, ligjërisht dhe në praktikë, si dhe trajtimit të barabartë, pavarësisht përkatësisë gjinore, përmes mbrojtjes, mundësive të barabarta për ushtrimin e të drejtave dhe gëzimin e të mirave dhe shërbimeve, pjesëmarrjes, përfaqësimit dhe ndihmesës në zhvillimin e të gjitha fushave të jetës shoqërore.

Në ndryshimet e tjera, Balla, ka propozuar heqje të fjalëve si: “për shkak të përkatësisë së shumëfishtë”, “në të gjithë diversitetin e tyre”; “lidhur me identitetin dhe shprehjen gjinore”, apo përkufizimi “orientim seksual”.

Ky zhvillim vjen ndërkohë që më 29 shtator projektligji u depozitua në parlament nga qeveria duke u futur në kalendarin e seancave plenare për miratim më 30 tetor.

Kështu, edhe pse vetë, para tre vitesh, Balla shprehej me krenari në parlament se “PS-ja e ka në ADN promovimin e barazisë gjinore”, me ndryshimet e propozuara së fundmi prej tij nuk duket se ajo është aq gjithëpërfshirëse.

Konsultimi për projektligjin u hap më 10 mars dhe u mbyll më 7 prill të këtij viti. Në regjistrin elektronik janë numëruar rreth 1,400 vizitorë dhe një koment nga Komiteti Shqiptar i Helsinikit. Ndërkohë, nga sugjerimet e bëra gjatë procesit nga shoqëria civile u morën parasysh dhe u pasqyruan në draftin e projketligjit rreth 12 komente.

Ndër organizatat që reflektuan sugjerimet e tyre për përmirësimin e draft-propozimit ishin: Qendra AWEN, SCiDEV, Aleanca LGBTI, etj.

Keqinterpretimi publik dhe perceptimi i gabuar në mediat sociale, kinse ky projektligj synonte të ndryshonte gjininë, kur qartësisht kjo gjë rregullohet me ligje dhe kode të tjera, duket se ka prekur dhe deputetin Balla, i cili në relacionin shoqërues për ndryshimet e kërkuara është shprehur se Gjykata e Drejtësisë e BE-së që mbron personat transgjender nga diskriminimi, “mbështetet në interpretimin e diskriminimit bazuar në gjini, jo në njohjen e një gjinie të tretë”.

“Legjislacioni aktual i BE-së për barazinë gjinore, siç është Direktiva 2006/54/KE dhe direktiva të tjera, të cilat pretendohet të përafrohen përmes këtij projektligji) nuk parashikojnë një “gjini të tretë” apo kategori të tjera përtej binaritetit burrë-grua,” citohet në relacion.

Ekspertët e kontaktuar nga Citizens u shprehën se pavarësisht ndryshimeve të propozuara nga deputeti Balla, projektligjit nuk mund t’i zhbëhet dot thelbi i tij: pra barazia gjinore, si për shembull arritja e kuotave gjinore të barabarta në përfaqësitë politike, njohja e punës së papaguar, rënia e barrës së provës tek abuzuesi dhe jo viktima etj; elementë që Citizens.al i ka shpjeguar gjerësisht në një artikull të mëparshëm.

Në ditët në vijim pritet një reagim zyrtar nga disa prej palëve të përfshira si grupe interesi, të cilat patën sugjeruar dhe mbështetur draftin e parë të projektligjit, të kundërshtuara së fundmi nga kreu i grupit parlamentar të PS-së.

Citizens,al ka shpjeguar prej kohësh se ky projektligj nuk shton gjinitë, nuk përmban asnjë nen që lidhet me martesat e të njëjtës gjini, si edhe nuk prek ligjin për gjendjen civile apo Kodin e Familjes, i cili njeh  qartësisht dy gjini zyrtare në Shqipëri, burrë dhe grua.

The post PS bën një hap pas, propozon ndryshime të projektligjit për barazinë gjinore appeared first on Citizens.al.

TIRANË, 8 tetor/ATSH/ Ministria e Shëndetësisë dhe Mirëqenies Sociale ka hedhur për konsultim publik një projektligj që ka në bazë të tij trajtimin e çdo lloj forme dhune ndaj grave dhe vajzave.

Ky projektligj synon që të vendos afate për administruesit e faqeve dhe platformave online, që nuk zbatojnë urdhrat e gjykatave.

Sipas projektligjit, për mosveprim brenda afatit 12 deri në 24 orë pas njoftimit, Autoriteti i Komunikimeve Elektronike dhe Postare (AKEP) do të vendosë gjobë administrative për çdo 24 orë vonesë në heqjen ose bllokimin e përmbajtjes.

Autoriteti i Komunikimeve Elektronike dhe Postare (AKEP), në rast keqpërdorimi të imazheve intime pa pëlqim, dhunës e përndjekjes digjitale të lehtësuar nga teknologjia, dhe gjuhën e urrejtjes digjitale të lehtësuar nga teknologjia, vendos gjobë administrative nga 50 000 deri në 500 000 lekë për çdo 24 orësh vonesë, nëse kjo masë është vendosur nga gjykata.

Ky ligj ka për qëllim parandalimin, reduktimin dhe mbrojtjen nga të gjitha format e dhunës ndaj grave dhe dhunës në familje në veprimtarinë publike,  private, përfshirë dhunën në mjedisin digjital.

Në projektligj, theksohet se fokusi është në sigurimin e mbrojtjes së menjëhershme ndaj dhunës ndaj grave dhe dhunës në familje, përmes mjeteve ligjore, civile dhe administrative, masave të tjera të nevojshme dhe politikave të integruara dhe gjithëpërfshirëse, me në qendër viktimën, duke i kushtuar vëmendje të veçantë grupeve të cenueshme.

Projektligji synon parandalimin, mbrojtjen, mbështetjen dhe rehabilitimin e viktimave, nëpërmjet krijimit të një rrjeti të koordinuar institucionesh përgjegjëse në nivel qendror dhe vendor si dhe organizatave të shoqërisë civile, me qasje të integruar duke pasur në qendër viktimën.

Gjithashtu, forcimi i sistemit gjyqësor për marrjen e masave të menjëhershme të mbrojtjes ndaj dhunës ndaj grave dhe dhunës në familje është një tjetër pikë e projektligjit.

Një tjetër element është garantimi për viktimat e dhunës ndaj grave dhe dhunës në familje të aksesit të shpejtë, falas dhe të thjeshtuar në mjetet juridike pranë gjykatave ose organeve të tjera përgjegjëse sipas këtij ligji.

Ky projektligj do të zbatohet në të gjitha mjediset e veprimtarisë publike dhe private përfshirë ato të ndërmjetësuara nga teknologjia, me kujdesin e duhur në mjedisin e familjes dhe pa kufizim në të gjitha mjediset e cenueshme nga dhuna.

Dispozitat e këtij ligji zbatohen për të gjitha viktimat e dhunës ndaj grave dhe dhunës në familje, në proceset administrative dhe civile, duke përfshirë edhe viktimat e dhunës të veprave penale të parashikuara në Kodin Penal, si edhe viktimat e dhunës në kohë paqeje, në situata konflikti të armatosur dhe në situata emergjente.

Sipas projektligjit, dhunë është çdo veprim ose mosveprim i një personi ndaj një personi tjetër, përfshirë dhunën digjitale, që sjell si pasojë cenim të integritetit fizik, moral, psikologjik, seksual, social, ekonomik.

Projektligji cilësosn se dhunë ndaj grave është çdo akt dhune i drejtuar kundër një gruaje ose vajze për shkak se është grua ose vajzë, që ndikon në mënyrë disproporcionale te gratë ose vajzat, dhe është një formë diskriminimi kundër grave, që sjell ose ka gjasa të sjellë dëme ose vuajtje fizike, seksuale, psikologjike ose ekonomike, përfshirë kërcënimet për veprime të tilla, shtrëngimin ose privimin arbitrar të lirisë, pavarësisht nëse ndodhin në jetën publike, private përfshirë dhunën e lehtësuara nga teknologjia.

Projektligji përfshin edhe dhunën në familje, si akt që ndodh brenda ose jashtë njësisë së banimit, mes pjesëtarëve që janë ose kanë qenë në marrëdhënie familjare për shkaqe natyrore ose juridike sipas përcaktimeve të këtij ligji, dhe pavarësisht nga fakti nëse dhunuesi ndan ose ka ndarë të njëjtën banesë me viktimën.

/e.i/j.p/

The post Projektligji në konsultim publik, gjobë deri në 500 000 lekë për bullizmin online ndaj grave dhe vajzave appeared first on Agjencia Telegrafike Shqiptare.

TIRANË, 6 tetor/ATSH/ Ministria e Infrastrukturës dhe Energjisë nxori për konsultim publik projektligjin “Për përcaktimin e kërkesave për projektimin ekologjik të produkteve me ndikim në energji”, i cili ka për qëllim vendosjen e standardeve mjedisore për produktet që konsumojnë energji, duke siguruar qëndrueshmëri, reduktim të gjurmës së karbonit dhe lëvizje të lirë në tregun e brendshëm.

Ky projektligj përafron në mënyrë të plotë Direktivën 2009/125/EC të BE-së dhe përfshin edhe dispozitat më të fundit të Rregullores (BE) 2024/1781, duke krijuar bazën për pasaportën digjitale të produktit, etiketim të qartë dhe procedura standarde për vlerësimin e konformitetit dhe kontrollin e tregut.

Ndër avantazhet kryesore të ligjit përfshihen nxitja e inovacionit dhe prodhimit të gjelbër, përmirësimi i informacionit për konsumatorët dhe harmonizimi me legjislacionin evropian për lëvizjen e lirë të mallrave. Projektligji adreson gjithashtu mungesën e standardeve të detyrueshme për projektimin ekologjik, rrit ndërgjegjësimin e publikut dhe forcon kapacitetet institucionale për mbikëqyrjen e tregut.

Ligji synon gjithashtu asistencë teknike për ndërmarrjet e vogla dhe të mesme, ndërsa zbatimi i tij nuk kërkon shpenzime shtesë nga buxheti i shtetit, ndërkohë që të ardhurat nga masat administrative derdhen në buxhetin e shtetit. /j.p/

The post Produktet me ndikim në energji, standarde ekologjike dhe pasaportë digjitale për konsumatorët appeared first on Agjencia Telegrafike Shqiptare.

Bëhet fjalë për projektligjin që thotë se, ndër të tjera, nuk meriton të diskriminohesh prej identitetit tënd gjinor. Po të më pyesësh mua, askush nuk meriton të diskriminohet mbi asnjë bazë. Por këtu po flasim për një historik të mungesës së vullnetit për të ndryshuar shoqërinë shqiptare që të jetë e jetueshme nga të gjithë. […]

The post 10 arsye pse Shqipëria duhet ta mbrojë identitetin gjinor appeared first on Reporter.al.

TIRANË, 18 shtator/ATSH/ Ministria e Infrastrukturës dhe Energjisë ka nxjerrë për konsultim publik projektligjin “Për lirimin e frekuencave të Digjital Divident dy (DD2)”, që synon lirimin e brezit të frekuencave 700 MHz, aktualisht i përdorur për transmetime televizive tokësore. Ky brez do të vihet në dispozicion të rrjeteve moderne të komunikimeve elektronike, përfshirë ato 4G dhe 5G.

Për të garantuar që publiku të mos humbasë aksesin në programet televizive gjatë këtij tranzicioni, shteti do të kompensojë pjesërisht kostot shtesë të operatorëve televizivë për përshtatjen me frekuencat e reja.

Sipas dokumentit zyrtar, kompensimi financiar, në vlerën prej 5,1 milionë euro, do të mbulohet nga buxheti i shtetit dhe do të përfshijë si kostot teknike të migrimit të frekuencave, ashtu edhe një fushatë informuese për publikun mbi ndryshimet në shpërndarjen e kanaleve televizive.

Fondet e kompensimit do t’i transferohen Autoritetit të Mediave Audiovizive (AMA), i cili do të jetë përgjegjës për administrimin e procesit dhe raportimin për zbatimin e tij pranë Ministrisë së Infrastrukturës dhe Energjisë, si dhe Ministrisë së Financave.

Pas përfundimit të lirimit, frekuencat e brezit 700 MHz do të kalojnë në administrim të Autoritetit të Komunikimeve Elektronike dhe Postare (AKEP), që do të mundësojë përdorimin e tyre nga rrjetet e komunikimeve elektronike të brezit të pestë (5G).

Ky proces përfaqëson gjithashtu një angazhim të Shqipërisë në kuadër të integrimit evropian, duke zbatuar vendimin e Parlamentit dhe Këshillit Evropian, për përdorimin e brezit 470-790 MHz, i përfshirë si detyrim në kapitullin 10 të negociatave me Bashkimin Evropian: “Transformimi Digjital dhe Media”.

Lirimi i këtij brezi do të shërbejë edhe për zgjidhjen e problemeve të interferencës së sinjalit televiziv në zonat kufitare me vendet fqinje, duke përmirësuar cilësinë e transmetimit.

Të ardhurat që pritet të gjenerohen nga dhënia në përdorim e këtyre frekuencave për rrjetet 5G pritet të kompensojnë plotësisht, madje të tejkalojnë shpenzimet buxhetore.

Vetëm nga licencimi i frekuencave në brezin 3,4 GHz për rrjetet 5G, në vitin 2024 janë arkëtuar mbi 10,8 milionë euro.

Në hartimin e projektligjit kanë kontribuar Ministria e Financave dhe Ekonomisë, AMA, AKEP, si dhe përfaqësues të asistencës teknike të Bashkimit Evropian, në kuadër të projektit “Technical Assistance for The Telecommunications Sector”.

Pas përfundimit të fazës së konsultimit publik, projektligji pritet të kalojë për miratim në Këshillin e Ministrave dhe më pas të dërgohet për shqyrtim në Kuvendin e Shqipërisë.

/r.e/a.f/

The post Lirimi i brezit 700 MHz, hap drejt rrjeteve 5G dhe përafrimit me BE-në appeared first on Agjencia Telegrafike Shqiptare.

Organizatat e shoqërisë civile kanë mbështetur fuqishëm implementimin e projektligjit “Për barazi gjinore në Shqipëri”, dhe në veçanti përdorimin e termit “gjini” në vend të termave klasikë “burrë-grua”. Aktivistët në mbrojtje të të drejtave të njeriut e konsiderojnë këtë projektligj një hap të domosdoshëm drejt standardeve evropiane, duke e quajtur atë një instrument kundër diskriminimit […]

The post Projektligji për barazinë gjinore përballet me fushatë dezinformimi appeared first on Reporter.al.

Në një nismë të re ligjore, qeveria pranon dështimin e skemës së incenerimit, ku u hodhën dhjetëra milionë euro investime në dekadën e fundit, dhe i rikthehet riciklimit si hallkë e parë në hierarkinë e menaxhimit të mbetjeve, në një skemë menaxhimi që pritet të rëndojë në xhepat e qytetarëve me rritje kostosh dhe tarifash. […]

The post “Ndotësi paguan”: ligji i ri për mbetjet sjell kosto shtesë për qytetarët appeared first on Reporter.al.

TIRANË, 27 gusht/ATSH/ Ministria e Bujqësisë dhe Zhvillimit Rural ka hedhur për konsultim publik projektligjin “Për kontrollet zyrtare”.

MBZHR fton qytetarë, ekspertë të fushës, shoqata dhe përfaqësues të tjerë të publikut të interesuar për të kontribuar përgjatë procesit të konsultimit publik.

Në këtë drejtim, MBZHR siguron se qëllimi i këtij ligji është të garantojë një nivel të lartë të mbrojtjes së shëndetit të njerëzve, kafshëve dhe bimëve në Republikën e Shqipërisë, përmes përcaktimit të rregullave të përgjithshme dhe të veçanta.

Po ashtu synohet vendosja e parimeve dhe kërkesave për kontrollet dhe aktivitetet zyrtare, si dhe rregullimi i përgjegjësive, financimit dhe procedurave për kryerjen e kontrolleve zyrtare.

Projektligji përcakton në mënyrë të detajuar mënyrën e re të kontrollit të sigurisë ushqimore, nga produktet bimore e deri te nënproduktet shtazore, me qëllim “ushqime më të sigurta” për konsumatorët por edhe për kafshët.

“Institucioni i Kontrollit Zyrtar” do të mbikëqyrë subjektet që operojnë në vend, me një shtrirje të gjerë, nga bujqësia në blegtori. “Institucioni i Kontrollit Kufitar” do të funksionojë vetëm në pikat kufitare. Ndërsa institucioni i “Aktiviteteve të tjera” do të mbulojë aspektet e mbetura, në fushën e sigurisë ushqimore.

Projektligji i ri parashikon që kontrollet të kryhen vetëm me bazë risku. “IPKZ kryen rregullisht kontrolle zyrtare në të gjithë operatorët, mbi bazë të riskut dhe me frekuencën të përshtatshme, duke marrë parasysh risqet e identifikuara që lidhen me kafshët dhe mallrat; aktivitetet nën kontrollin e operatorëve; vendndodhjen e aktiviteteve ose veprimtarisë të operatorëve; përdorimin e produkteve, proceseve, materialeve ose substancave që mund të ndikojnë në sigurinë e ushqimit, integritetin dhe cilësinë e ushqimit, ose sigurinë e ushqimit për kafshë, shëndetin ose mirëqenien e kafshëve, shëndetin e bimëve ose, në rastin e OMGJ-ve dhe produkteve për mbrojtjen e bimëve, që mund të kenë gjithashtu një ndikim negativ në mjedis”, thuhet në projektligj.

Për të bërë kontrolle në subjekte, projektligji parashikon se duhet të ketë rreziqe të identifikuara më parë sa i takon cenimit të sigurisë ushqimore, të ketë informacione për mundësinë e mashtrimit të konsumatorëve, si dhe duke u bazuar në historikun e të dhënave të operatorëve në lidhje me rezultatet e kontrolleve zyrtare të kryera ndaj tyre.

“Kontrollet zyrtare kryhen pa njoftim paraprak, përveç rasteve kur njoftimi paraprak është i nevojshëm dhe i justifikuar. Në kontrollet zyrtare me kërkesë të operatorit, autoriteti kompetent mund të vendosë nëse kontrolli zyrtar kryhet me ose pa njoftim paraprak”, thuhet në projektligj.

Kontrollet duhet të bëhen para se produktet të hidhen në treg, apo në rastin e bagëtive parashikohen analiza përpara se të shkojë në thertore. Po kështu saktësohet se pjesë e kontrolleve do të jenë edhe produktet që vijnë nga importi apo ato që eksportohen në pikat e kontrollit kufitar, këto të fundit do të miratohen me urdhër nga ministri i Bujqësisë.

Por, kontrollet për sigurinë ushqimore nuk do të jenë vetëm në dorë të shtetit. Projektligji i ri ka krijuar hapësirë për të kontraktuar edhe operatorë privatë, në mbikëqyrjen e sigurisë së ushqimeve, nga bimët deri tek kafshët.

“Trupë e deleguar” nënkupton një person juridik të veçantë të cilit autoritetet kompetente i kanë caktuar detyra të caktuara të kontrollit zyrtar ose detyra të caktuara që lidhen me aktivitete të tjera zyrtare”, thuhet më tej në projektligj.

Këto subjekte private, që do të jenë të ngarkuara me kontrollin e bizneseve bujqësore apo blegtorale duhet që të raportojnë sa herë t’u kërkohet tek autoritetet kompetente për rezultatet e kontrolleve zyrtare.

Projektligji parashikon gjoba për bizneset që abuzojnë me sigurinë ushqimore të bimëve dhe kafshëve, që shkojnë nga 100 mijë lekë deri në 2 milionë lekë (ose rreth 20 mijë euro), në rastin kur subjekti operon i paregjistruar.

Në përfundim të procesit të konsultimit publik, Ministria e Bujqësisë dhe Zhvillimit Rural do të përmbledhë të gjitha sugjerimet dhe komentet dhe do të japë arsyet për mënyrën se si ato janë reflektuar ose jo në projekt-akt.

Konsultimi publik ka nisur në datën 19 gusht dhe do të zgjasë deri më 16 shtator 2025.

/m.m/j.p/

The post Konsultim publik për projektligjin, rregulla të reja për kontrollet për sigurinë ushqimore appeared first on Agjencia Telegrafike Shqiptare.

TIRANË, 21 gusht /ATSH/ Ministri i Shtetit për Administratën Publike dhe Antikorrupsionin ka publikuar për konsultim publik projektligjin “Për disa shtesa dhe ndryshime në ligjin nr. 90/2012 ‘Për organizimin dhe funksionimin e administratës shtetërore’”.

Ky projektligj ka për qëllim të përmirësojë organizimin, efikasitetin, funksionimin dhe llogaridhënien në institucionet e administratës shtetërore nën përgjegjësinë e Këshillit të Ministrave, me qëllim adresimin e problematikave ekzistuese dhe përshtatjen e funksionimit të administratës shtetërore me praktikat më të mira evropiane të organizimit institucional. Përmirësimet e këtij ligji vijnë si përgjigje ndaj një nevoje të artikuluar qartë për linjëzim të mëtejshëm me standardet e BE, sidomos në këtë fazë kur Shqipëria po avancon me ritme të shpejta në procesin e anëtarësimit në Bashkimin Evropian.

Në shkurt 2024 OECD/SIGMA hartoi një raport voluminoz të titulluar “Administrata Publike në Shqipëri”, ku teksa evidenton që Shqipëria është lider rajonal në funksionimin e administratës publike në fushat e menaxhimit të financave publike, menaxhimit të shërbimit civil dhe burimeve njerëzore, si dhe të zhvillimit dhe koordinimit të politikave për reformën në administratën publike, parashtron dhe një sërë rekomandimesh për t’i adresuar.

Konkretisht, OECD/SIGMA shprehet se “Qeveria duhet të përcaktojë një tipologji të qartë të organeve të qeverisjes qendrore dhe të sigurojë zbatimin e saj të njëtrajtshëm; nëse është e nevojshme, duke riorganizuar organet ekzistuese për t’i përputhur me rregullat e reja dhe duke shmangur dublikimin e funksioneve të organeve të qeverisjes qendrore. Ministritë e linjës, duhet të vendosin mekanizma transparentë për planifikimin e punës dhe raportimin, si për ministritë, ashtu edhe për institucionet vartëse”.

Në përgjigje të nevojave të evidentuara për ndryshime, si dhe rekomandimeve të OECD/SIGMA, projektligji vjen me disa risi dhe ka në fokus një administratë në efiçente, më pak burokratike, me role dhe përgjegjësi të qarta institucionale. Projektligji është propozuar për të uniformizuar më tej punën në institucionet e administratës shtetërore, duke shmangur zgjidhjet e përkohshme që shpesh shkaktojnë probleme e sjellin fragmentim të përgjegjësisë, dhe vakume në sistemin e llogaridhënies.

Krijimi i sistemit të ri të mbikëqyrjes dhe llogaridhënies

Projektligji shënon një hap të rëndësishëm duke vendosur një sistem modern dhe të unifikuar mbikëqyrjeje dhe llogaridhënieje të zbatueshëm për të gjithë institucionet dhe agjencitë në varësi të kryeministrit dhe ministrave. Puna e institucioneve do të vlerësohet duke u bazuar te objektivat e matshëm dhe performanca reale vjetore. Ky sistem i ri ka si qëllim të garantojë një menaxhim më efikas dhe të orientuar drejt rezultateve përmes planeve vjetore të performancës, vetëvlerësim të performancës, dhe mbikëqyrjen e zbatimit të planit nga ministria përgjegjëse ose kryeministri.

Vendosen kritere për krijimin e institucioneve

Me qëllim rritjen e efiçencës institutionale, sipas këtij projektligji një institucion varësie mund të krijohet vetëm nëse ka një numër minimal punonjësish që e justifikon ekzistencën e tij. Gjithashtu, projektligji vendos kritere për krijimin e institucioneve në varësi të drejtpërdrejtë të Kryeministrit, duke parashikuar se mbeten në varësi të kryeministrit institucionet që shërbejnë dhe kontribuojnë në realizimin e funksionit kushtetues të Kryeministrit, si dhe institucionet e ngarkuara me funksione horizontale që nuk mund të kryhen nga ministritë e linjës. Sipas draftit, institucione të tjera në varësi të kryeministrit mund të krijohen vetëm nëse i përkasin një fushe të konsideruar si prioritare në programin politik qeveritar, dhe për sa kohë ajo fushë konsiderohet si e tillë.

Riorganizimi i institucioneve joministrore

Drafti i ri synon të thjeshtojë sistemin e institucioneve joministrore, duke propozuar dy lloje të trupave joministrore/ekzekutive: institucionet e varësisë dhe agjencitë autonome, të rikonceptuara, sipas rekomandimit të OECD/SIGMA. Në raport Shqipëria është vlerësuar me 0 nga 8 pikë në indikatorin që mat numrin e institucioneve me natyrë administrative që raportojnë në Kuvend, për shkak të numrit shumë të lartë të këtyre institucioneve që raportojë tek legjislativi. Sipas SIGMA (fq.71) “Autonomia e enteve rregullatore për funksionimin e përditshëm është e garantuar. Megjithatë, ato raportojnë në Kuvend, çka nuk është thelbësore, për ruajtjen e pavarësisë së tyre funksionale. Përkundrazi, distanca e tyre nga ekzekutivi mund të cënojë llogaridhënien institucionale për performancën e tyre të përgjithshme”.

Ripërcaktimi i roleve dhe përgjegjësive

Ndryshimet në ligj synojnë ndarjen dhe mirëpërcaktimin e roleve dhe përgjegjësive ndërmjet niveleve hierarkike, duke evituar përqëndrimin e tepërt të vendimmarrjes vetëm në nivelet e larta menaxheriale, si ministrat apo sekretarët e përgjithshëm. Projektligji parashikon që, pavarësisht se ruhet roli mbikqyrës i ministrit dhe sekretarit të përgjithshëm, vendimmarrja për çështje të përgjegjësisë nga pikëpamja përmbajtësore, sidomos për vendimmarrje të natyrës rutinore, mbetet tek drejtuesit të nivelit të mesëm, përveç rasteve kur ligji e lidh vendimmarrjen me një autoritet të një niveli më të lartë.

Ky projektligj është publikuar në portalin e konsultimit publik, në përputhje me rregullat e parashikuara nga legjislacioni në fuqi, për komente dhe sugjerime nga të gjithë aktorët e interesuar.

/gj.m//r.e//a.f/

The post Projektligji “Për organizimin e administratës shtetërore”: Standarde evropiane në administratën publike shqiptare appeared first on Agjencia Telegrafike Shqiptare.