Pavarësisht lidhjeve të shumta ndër vite mes Erling Haaland dhe Real Madridit, sulmuesi norvegjez aktualisht nuk është në planet e klubit madrilen.

Sipas informacioneve të gazetarit Ekrem Konur, drejtuesit e “Los Blancos” besojnë se nevojat sulmuese të skuadrës janë të mbuluara plotësisht nga Kylian Mbappe.

Prej disa sezonesh, media pranë Real Madridit e kanë përmendur vazhdimisht emrin e Haalandit si një objektiv të mundshëm për “Santiago Bernabeu”.

Megjithatë, situata aktuale tregon se klubi nuk ka interes konkret për të ndërmarrë hapa drejt sulmuesit të Manchester Cityt.

Nga ana sportive, Mbappe po kalon një sezon mbresëlënës.

Sulmuesi francez ka realizuar 29 gola dhe ka dhënë 5 asistime në 24 ndeshje zyrtare.

Ndërkohë, Haaland ka shënuar 25 gola dhe ka regjistruar 4 asistime në 23 paraqitje me Manchester Cityn, statistika që konfirmojnë formën e lartë të të dy lojtarëve.

Përtej aspektit sportiv, transferimi i Haalandit do të ishte jashtëzakonisht i vështirë.

Norvegjezi ka kontratë me Man Cityn deri në qershor të vitit 2034 dhe klubi anglez nuk ka ndërmend të lehtësojë largimin e tij.

Edhe pse është përfolur për ekzistencën e një klauzole lirimi, as lojtari dhe as klubi nuk e kanë konfirmuar zyrtarisht një mekanizëm të tillë.

Në këto rrethana, një kalim i Haalandit te Real Madridi duket shumë larg realitetit, të paktën në të ardhmen e afërt. /Telegrafi/

Cristiano Ronaldo nuk nguroi ta lavdërojë Kylian Mbappe pas paraqitjes së jashtëzakonshme të francezit, i cili barazoi rekordin e tij historik për numrin më të madh të golave të shënuar në një vit kalendarik me fanellën e Real Madridit.

Mbappe hyri në përballjen e së shtunës ndaj Sevillas duke pasur nevojë vetëm për një gol për të arritur kuotën e 59 golave për Madridin gjatë vitit 2025, shifër kjo që përkon me rekordin absolut të Ronaldos dhe njëkohësisht numrin më të lartë të golave të shënuar nga një lojtar i vetëm në një vit në historinë e klubit.

Sulmuesi francez u detyrua të priste deri në minutën e 86-të për të realizuar golin vendimtar nga pika e bardhë e penalltisë. Menjëherë pas golit, Mbappe e shfaqi hapur emocionin e tij, duke festuar me celebrimin e famshëm “siu” të Cristiano Ronaldos, gjest që u prit me entuziazëm nga tifozët në “Santiago Bernabeu”.

Pas ndeshjes, Mbappe ia dedikoi golin idhullit të tij, duke e theksuar edhe në rrjetet sociale, ku publikoi fotografi nga festa e golit së bashku me një imazh nga fëmijëria, kur kishte takuar Ronaldon për herë të parë.

“Besoni në ëndrrat tuaja. Respekt i madh për Cristianon”.

Nën këtë postim, vetë Cristiano Ronaldo reagoi duke e përgëzuar Mbappen, duke përdorur simbole që shprehnin duartrokitje dhe zjarr, si shenjë vlerësimi për arritjen e sulmuesit francez, i cili tashmë ka hyrë në histori të klubit madrilen./Telegrafi/

Nuk ishte fitorja që pritej. Tifozët ende nuk janë të kënaqur me Realin, përkundrazi, por gjithsesi ata përjetuan barazimin e një rekordi në “Santiago Bernabeu”.

Kilian MBape shënoi në fitoren 2-0 ndaj Seviljes dhe arriti në 59 gola të një viti kalendarik, aq sa është niveli më I lartë që ka mbërritur ndonjë yll merenges.

Në 2013, 59 rrjeta kishte shënuar Kristiano Ronaldo.

Kapiteni I Francës mund ta kishte thyer rekordin nëse do të kishte realizuar dy herë, por Sevilja ishte rival I fortë dhe ishte pozitiv fakti që ai arriti ta tundte rrjetën.

Fitore mes vërhsëllimash, – ishte titulli I pamëshirshëm I “Markës”, që ka në kopertinë Mbapenë që feston si Ronaldo, e vazhdon: Mbape barazon rekordin e portugezit në një triumph gri të Madridit”.

“Shumë gola dhe shumë vërshëllima, – titullon e përditshmja tjetër madrilène, “AS”, – Mbape barazon 59 golat e Kristianos dhe ia dedikon atij rekordin”.

Goli tjetër për ekipin e trajnerit Shabi Alonso u shënua nga Xhud Belingham, madje ishte I pari, në fitoren 2-0 në La Liga.

Reali ende shpreson për titullin, duke mos qenë shumë larg Barcelonës, ndonëse forma e deritanishme nuk ka qenë aspak bindëse.

Real Madridi fitoi me rezultat 2-0 ndaj Sevillës në kuadër të javës së 17-të në La Liga, në atë që ishte ndeshja e fundit për ta për vitin 2025.

Një ndër autorët e golave në këtë sfidë ishte Kylian Mbappe, me francezin që realizoi në minutën e 86-të nga penalltia për 2-0.

Me këtë gol, ai barazoi rekordin e Cristiano Ronaldos për më së shumti gola brenda një viti kalendarik me 59 të tillë.

E golin e realizuar, Mbappe ia dedikoi pikërisht Ronaldos duke bërë festimin e tij dhe për këtë ai u përgjigj për gazetarët pas ndeshjes.

“Sot barazova rekordin e idhullit tim, Cristiano Ronaldos, lojtarit më të madh në historinë e këtij klubi”.

“Pse ia dedikova golin tim Ronaldos? Sepse ai ka qenë gjithmonë shumë i mirë me mua, më ka ndihmuar të përshtatem në Madrid, tani është miku im dhe kam një marrëdhënie shumë të mirë me të”.

“Dua t’i dërgoj urimet e mia më të mira, Gëzuar Krishtlindjet dhe një Vit të Ri të lumtur”.

“Në vitin 2026, do ta japim jetën për këtë klub. Kemi shumë gjëra për të dëshmuar”.

“Kur isha një djalë i vogël, thosha se dhurata ime e ëndrrave për ditëlindje do të ishte të luaja një ndeshje për Real Madridin. Sonte, ajo ëndërr u bë realitet”, ka deklaruar Mbappe./Telegrafi/

Krahasimi i statistikave mes dy yjeve të Real Madridit ka rikthyer në vëmendje një debat të madh: a po i afrohet Kylian Mbappr sezonit historik të Cristiano Ronaldos nga viti 2013?

Cristiano Ronaldo mban ende rekordin për më së shumti gola të shënuar nga një lojtar i Real Madridit brenda një viti kalendarik – plot 59 gola në vitin 2013.

Kylian Mbappe, nga ana tjetër, është shumë pranë këtij rekordi në vitin 2025, me 58 gola të realizuar dhe një ndeshje ende për t’u luajtur.

Statistikat krahasuese

Cristiano Ronaldo (2013):
– 50 ndeshje
– 59 gola
– 14 asistime
– 7 het-trik

Kylian Mbappé (2025):
– 58 ndeshje
– 58 gola
– 5 asistime
– 5 het-trik

Nga këto shifra, Ronaldo ka një mesatare më të mirë golash për ndeshje, pasi arriti 59 gola në vetëm 50 paraqitje. Po ashtu, ai kontribuoi ndjeshëm më shumë në lojën kolektive me 14 asistime, krahasuar me 5 të Mbappe.

Liga e Kampionëve – faza eliminatore

Edhe në ndeshjet vendimtare të Ligës së Kampionëve, Ronaldo del në avantazh. Në vitin 2013, ai shënoi 6 gola nga raundi i 16-tave deri në gjysmëfinale, duke realizuar në çdo ndeshje, përveç njërës.

Mbappe, në edicionin 2025, ka shënuar 4 gola në fazat eliminatore, të gjithë kundër Manchester Cityt, ndërsa nuk ka realizuar asnjë gol në raundin e 16-tave dhe çerekfinale.

El Clasico – pika e fortë e Mbappe

E vetmja fushë ku Mbappé ka epërsi të qartë është El Clasico. Sulmuesi francez ka shënuar 6 gola në 4 përballje ndaj Barcelonës, ndërsa Ronaldo në katër El Clasico të vitit 2013 kishte regjistruar 2 gola dhe 1 asistim.

Përfundim

Statistikat tregojnë se Cristiano Ronaldo i vitit 2013 mbetet më i kompletuar dhe më vendimtar, sidomos në ndeshjet e mëdha evropiane dhe në kontributin kolektiv. Megjithatë, Kylian Mbappé është shumë pranë historisë dhe me një ndeshje ende për t’u luajtur, ai ka mundësinë ta barazojë ose ta thyejë rekordin legjendar.

Debati mbetet i hapur – kush ishte më i mirë? Ronaldo i 2013-s apo Mbappé i 2025-s?

/Telegrafi/

Real Madridi ka shënuar fitore ndaj Talaveras si mysafir, me rezultat 3-2, duke siguruar kalimin tutje në Kupën e Mbretit.

“Mbretërit” kishin disa raste në fillimin e ndeshjes dhe në mesin e pjesës së parë, por portieri Jaime Gonzalez bëri disa pritje të bukura.

Ndeshja u zhbllokua me një penallti që ishte e diskutueshme, por në mungesë të VAR-it, vendimi nuk u ndryshua dhe Kylian Mbappé shënoi nga pika e bardhë për 1-0 në minutën e 41-të.

Vetëm pesë minuta më pas, Mbappé depërtoi bukur, gjuajti dhe pas një devijimi të mbrojtësit Fernando, topi përfundoi në rrjetë për 2-0.

Pjesa e dytë doli të jetë interesante, me Nahuel Arroyo që shënoi për 2-1 në minutën e 80-të.

Por, kur Real Madridi ishte në vështirësi, në skenë doli sërish Mbappé, i cili shënoi për 3-1, duke lënë të kuptohet se ndeshja ishte mbyllur në favor të madrilenëve.

Në kohën shtesë, Gonzalo Ignacio Di Renzo shënoi për 3-2, duke i dhënë drithërima Real Madridit.

Talavera pati edhe një rast tjetër, por një pritje e bukur e Lunin bëri që Real Madridi ta ruante rezultatin dhe të kalonte tutje. /Telegrafi/

Ousmane Dembele ka fituar trofeun ‘FIFA The Best 2025’, duke lënë pas Lamine Yamal dhe Kylian Mbappe.

Ky sukses vjen si vazhdim i fitores së tij me ‘Topin e Artë’ në shtator, duke shpërblyer një sezon të jashtëzakonshëm për sulmuesin e PSG-së, si në nivel individual, ashtu edhe kolektiv.

Ndryshe nga trofeu i organizuar nga France Football, sistemi i votimit i FIFA-s synon të jetë më gjithëpërfshirës, duke u lejuar tifozëve nga e gjithë bota të votojnë në të njëjtin nivel me përzgjedhësit e kombëtareve, kapitenët dhe gazetarët specialistë.

Sipas analizës së Maxime Barbaud nga FootMercato, votimi është ndarë në katër kategori me peshë të barabartë (25% secila), ku pikët janë: 5 për vendin e parë, 3 për të dytin dhe 1 për të tretin.

FIFA ka publikuar votat e dhëna nga 11 finalistët për secilën kategori, duke përfshirë zgjedhjet e përzgjedhësve, kapitenëve dhe mediave.

Zgjedhjet e kapitenëve dhe përzgjedhësve të kombëtareve të njohura:

Didier Deschamps, përzgjedhësi i Francës, ka votuar për dy të preferuarit e tij: Dembele në vendin e parë, Mbappe në vendin e dytë dhe Hakimi në të tretin.

Achraf Hakimi, kapiteni i Marokut, ka zgjedhur Mbappen si numrin një, Dembele në vendin e dytë dhe Raphinha në të tretin.

Marquinhos, kapiteni i Brazilit, ka vendosur Dembele në krye, Raphinha të dytin dhe Hakimi të tretin.

Carlo Ancelotti ka përsëritur të njëjtin podium, por me Mbappen në vendin e tretë.

Në Spanjë, ka pasur mendime të ndryshme rreth Lamine Yamal: kapiteni Unai Simon e ka zgjedhur si të parë, përpara Pedri dhe Nuno Mendes, ndërsa përzgjedhësi Luis de la Fuente ka votuar Pedrin, më pas Lamine Yamal dhe Mbappen.

Në Portugali, kapiteni Bernardo Silva ka votuar për Vitinha, Nuno Mendes dhe Dembele, ndërsa përzgjedhësi Roberto Martinez ka zgjedhur të njëjtët lojtarë, por me Lamine Yamal në vend të tretë.

Votat e yjeve ndërkombëtarë

Lionel Messi ka votuar për Dembelen, Mbappen dhe Lamine Yamal.

Përzgjedhësi i Argjentinës, Scaloni, ka zgjedhur Mbappe, Pedri dhe Lamine Yamal.

Luka Modric ka vlerësuar lojtarë të fushës së tij: Vitinha në vendin e parë, Dembele të dytin dhe Lamine Yamal të tretin, duke lënë jashtë Mbappen.

Kapiteni italian Donnarumma ka votuar për Dembele, Hakimi dhe Lamine Yamal.

Riyad Mahrez ka zgjedhur Dembele, Hakimi dhe Mbappe.

Mohamed Salah, finalist, ka vendosur Hakimi, Dembele dhe Mbappe.

Këto rezultate jo vetëm që reflektojnë performancat individuale, por gjithashtu tregojnë edhe lidhjet dhe preferencat personale midis lojtarëve dhe përzgjedhësve, duke ofruar një panoramë interesante mbi votimin për çmimin 'FIFA The Best 2025'. /Telegrafi/

Sulmuesi francez i Paris Saint-Germain, Ousmane Dembele, u shpall fitues i çmimit prestigjioz “FIFA The Best” si lojtari më i mirë i vitit.

Dembele ka grumbulluar 50 pikë, 11 më shumë se talenti spanjoll i Barcelonës, Lamine Yamal dhe 15 pikë përpara bashkëkombësit të tij Kylian Mbappe, tashmë pjesë e Real Madridit.

Ky çmim, i ndarë nga FIFA, vlerëson lojtarin më të mirë të sezonit duke marrë në konsideratë performancat individuale, sukseset ekipore dhe ndikimin në lojë, si në nivel klubesh ashtu edhe kombëtaresh.

Pas treshes kryesore, renditja u plotësua nga:

Achraf Hakimi (Marok) – 31 pikë

Raphinha (Brazil) – 29 pikë

Mohamed Salah (Egjipt) – 24 pikë

Vitinha (Portugali) – 22 pikë

Harry Kane (Angli) – 14 pikë

Nuno Mendes (Portugali) – 13 pikë

Pedri (Spanjë) – 12 pikë

Cole Palmer (Angli) – 7 pikë

Në kategorinë e femrave, dominimi spanjoll ishte i plotë. Aitana BonmatO u shpall fituese e çmimit ‘Futbollistja e Vitit’ me 52 pikë, duke lënë pas Mariona Caldentey (40 pikë) dhe Alexia Putellas (33 pikë), të dyja bashkëkombëse të saj dhe lojtare kyçe të Barcelonës dhe përfaqësueses spanjolle.

Si funksionoi votimi i “The Best”

Fituesit e çmimeve “The Best” u përcaktuan përmes një sistemi votimi të kombinuar, ku morën pjesë:

Trajnerët e kombëtareve

Kapitenët e kombëtareve

Gazetarë sportivë të përzgjedhur nga FIFA

Tifozët, përmes votimit online

Secili grup pati peshë të barabartë në rezultatin përfundimtar.

/Telegrafi/

Një gjykatë pune në Paris urdhëroi të martën Paris Saint-Germain t'i paguajë Kylian Mbappes 61 milionë euro në pagë dhe bonuse të papaguara, duke i dhënë fund pjesshëm një prej mosmarrëveshjeve më të ashpra në futbollin francez.

Vendimi erdhi pas muajsh debatesh ligjore pasi sulmuesi francez e paditi PSG-në në gjykatë për të ardhurat që ai tha se ishin mbajtur për prillin, majin dhe qershorin e vitit 2024, pak para se të largohej nga klubi për t'u bashkuar me Real Madridin si transferim i lirë.

"Jemi të kënaqur me vendimin. Kjo është ajo që mund të pritet kur pagat nuk paguhen", ka thënë avokati i Mbappes, Frederique Cassereau.

Gjykata vendosi që PSG nuk i kishte paguar Mbappes tre muaj rrogë, një bonus etik dhe një bonus nënshkrimi që i takonte sipas kontratës së tij të punës.

Këto shuma u njohën si të detyrueshme nga dy vendime të Ligës Franceze të Futbollit Profesional (LFP) në shtator dhe tetor 2024, dhe gjyqtarët thanë se PSG nuk kishte paraqitur ndonjë marrëveshje me shkrim që tregonte se Mbappe kishte hequr dorë nga e drejta e tij.

Gjyqtarët hodhën poshtë argumentet e PSG-së që Mbappe duhet të humbasë tërësisht pagat e tij të papaguara, por gjithashtu hodhën poshtë disa nga pretendimet shtesë të lojtarit, duke përfshirë akuzat për punë të fshehur, ngacmim moral dhe shkelje të detyrës së sigurisë nga punëdhënësi.

Gjykata nuk e konsideroi kontratën me afat të caktuar të Mbappes si të përhershme, një vendim që kufizoi shkallën e kompensimit të mundshëm në lidhje me shkarkimin dhe pagën e njoftimit.

PSG kishte argumentuar se Mbappe veproi në mënyrë të pabesë duke fshehur për gati një vit qëllimin e tij për të mos rinovuar kontratën, duke e penguar klubin të siguronte një tarifë transferimi të ngjashme me 180 milionë eurot që paguan për ta nënshkruar atë nga AS Monaco në vitin 2017.

Përfaqësuesit e Mbappe thanë se mosmarrëveshja kishte të bënte me zbatimin e rreptë të ligjit francez të punës dhe shpërblimin e papaguar, në vend të politikës së transferimeve. /Telegrafi/

Sezoni 2025/2026 ka nisur me ritëm të lartë në kampionatet kryesore evropiane dhe sulmuesit më të mirë po tregojnë menjëherë formën e tyre përpara portës.

Disa nga emrat më të njohur të futbollit botëror po kryesojnë listën e golashënuesve.

Harry Kane po shkëlqen me fanellën e Bayern Munich.

Sulmuesi anglez ka shënuar 18 gola në 14 ndeshje, duke qenë aktualisht më i miri në Evropë për nga numri i golave.

Pas tij renditet Erling Haaland, i cili vazhdon të jetë vendimtar për Manchester City, me 17 gola në 16 ndeshje.

Ndërkohë, Kylian Mbappe ka nisur shumë mirë aventurën e tij me Real Madridin, duke u bërë një nga pikat kryesore të sulmit.

Në listën e golashënuesve më të spikatur janë edhe Ayase Ueda, Vangelis Pavlidis, Luis Suarez dhe Ferran Torres, të cilët po japin kontribut të rëndësishëm për skuadrat e tyre.

Sezoni sapo ka filluar, por gara për golashënuesin më të mirë të Evropës pritet të jetë shumë interesante.

Golashënuesit më të mirë në Evropë

1. Harry Kane (32 vjeç / Bayern Munich / Angli) - 18 gola në 14 ndeshje (1,087 minuta)

2. Ayase Ueda (27 vjeç / Feyenoord / Japoni) - 18 gola në 16 ndeshje (1,315 minuta)

3. Erling Haaland (25 vjeç / Manchester City / Norvegji) - 17 gola në 16 ndeshje (1,377 minuta)

4. Kylian Mbappe (26 vjeç / Real Madrid / Francë) - 17 gola në 17 ndeshje (1,488 minuta)

5. Vangelis Pavlidis (27 vjeç / Benfica / Greqi) - 13 gola në 14 ndeshje (1,164 minuta)

6. Ayoub El Kaabi (32 vjeç / Olympiakos / Marok) - 12 gola në 14 ndeshje (1,148 minuta)

7. Luis Suarez (28 vjeç / Sporting Lisbon / Kolumbi) - 11 gola në 14 ndeshje (1,156 minuta)

8. Mason Greenwood (24 vjeç / Olympique de Marseille / Angli) - 11 gola në 15 ndeshje (1,224 minuta)

9. Paul Onuachu (31 vjeç / Trabzonspor / Nigeri) - 11 gola në 15 ndeshje (1,304 minuta)

10. Ferran Torres (25 vjeç / FC Barcelona / Spanjë) - 11 gola në 16 ndeshje (1,023 minuta) /Telegrafi/

Real Madridi arriti të mposhtë Alavesin me rezultatin 2-1, por kjo fitore nuk ishte aspak e bindshme, dhe Xabi Alonso ende nuk mund të ketë qetësi.

Ende ka diskutime për një shkarkim të mundshëm të Xabi Alonsos, trajnerit që u emërua në stolin e Real Madridit këtë verë.

Sipas El Nacional, Kylian Mbappe e mbështet fuqishëm Alonson dhe dëshiron që ai të vazhdojë drejtimin e ekipit, duke vlerësuar stilin dhe udhëheqjen e tij.

Nëse do të ndodhë një ndarje me Xabi Alonson, Mbappe ka bërë të qartë për klubin preferencën e tij për një zëvendësues – bashkëkombësin e tij, Zinedine Zidane.

Megjithatë, rikthimi i “Zizu” në stolin e Real Madridit duket i vështirë, pasi ai ka një marrëveshje verbale për të marrë drejtimin e kombëtares franceze pas Kupës së Botës 2026.

Florentino Perez ka një trajner të preferuar, Jurgen Klopp, por Mbappe ka bërë të qartë në diskutime private se nuk dëshiron të punojë me gjermanin.

Ky qëndrim i lojtarit spanjoll i citon burimet nga El Nacional, duke treguar tensionin mes dëshirës së klubit dhe preferencave të yllit francez.

Në këtë situatë, Real Madrid duhet të balancojë midis vendimeve të klubit dhe dëshirës së Mbappé, lojtarit kryesor që po mban ekipin këtë sezon. /Telegrafi/

Mosmarrëveshja e gjatë ligjore mes sulmuesit të Real Madridit, Kylian Mbappe, dhe ish-klubit të tij, Paris Saint-Germain, po i afrohet një momenti vendimtar.

Të martën, Gjykata e Punës në Paris pritet të shpallë vendimin për këtë çështje, megjithëse ekziston ende mundësia që seanca të shtyhet për një datë të mëvonshme.

Të dyja palët po kërkojnë shuma marramendëse pas ndarjes së tyre në verën e vitit 2024.

PSG pretendon kompensim prej 440 milionë eurosh nga sulmuesi francez, ndërsa Mbappe kërkon 263 milionë euro nga klubi parisien.

Në qendër të konfliktit janë pagat dhe bonuset e papaguara, me vlerë rreth 55 milionë euro, që sipas lojtarit i takojnë në fund të kontratës së tij.

PSG argumenton se Mbappe ka shkelur një marrëveshje verbale të arritur në vitin 2023, ndërsa përfaqësuesit ligjorë të futbollistit këmbëngulin se klienti i tyre po kërkon thjesht zbatimin e ligjit francez të punës.

Pavarësisht vendimit që pritet të merret, çështja mund të vazhdojë edhe në shkallë të tjera gjyqësore, pasi të dyja palët kanë të drejtën e apelimit. /Telegrafi/

Sipas të dhënave të publikuara nga Opta, Lautaro Martinez, Kylian Mbappe, Erling Haaland dhe Harry Kane janë të vetmit katër futbollistë që kanë qenë të përfshirë drejtpërdrejt në më shumë se 10 gola në secilin prej shtatë sezoneve të fundit në pesë ligat kryesore të Evropës.

Kapiteni i Interit ishte protagonist absolut në fitoren 2-1 ndaj Genoas të dielën në “Marassi”, duke kontribuar me një gol dhe një asistim.

Falë kësaj paraqitjeje, sulmuesi argjentinas kryeson aktualisht listën e golashënuesve në Serie A me tetë gola, një më shumë se ylli i Milanit, Christian Pulisic.

Statistikat e Optas të publikuara në rrjetin social X konfirmojnë vazhdimësinë dhe ndikimin e jashtëzakonshëm të Lautaros në vitet e fundit.

“Lautaro Martinez është një nga katër lojtarët e vetëm që kanë qenë të përfshirë drejtpërdrejt në më shumë se 10 gola (8 gola dhe 3 asistime këtë sezon) në secilin prej shtatë sezoneve të fundit në ligat e mëdha evropiane, së bashku me Kylian Mbappe, Erling Haaland dhe Harry Kane. I pandalshëm”, shkruan Opta.

Që nga transferimi te Interi në verën e vitit 2018, “El Toro” ka realizuar 165 gola në 355 ndeshje me fanellën zikaltër, duke u shndërruar në një prej ikonave moderne të klubit.

Fitues i Kupës së Botës 2022 me Argjentinën, Lautaro u shpall golashënuesi më i mirë i Serie A në sezonin 2023/24 me 24 gola, duke ndihmuar Interin të fitonte Scudetton e 20-të në histori.

Po ashtu, ai u shpall golashënuesi më i mirë i Copa America 2024 me kombëtaren argjentinase, duke vulosur statusin e tij si një nga sulmuesit më vendimtarë në futbollin botëror. /Telegrafi/

Mediat sportive në Madrid kanë nisur të shfaqin një qëndrim më mbështetës ndaj Xabi Alonsos, pas fitores 2-1 të Real Madridit në udhërim ndaj Deportivo Alaves.

Kylian Mbappe dhe Rodrygo realizuan nga një gol, respektivisht në pjesën e parë dhe të dytë, duke i siguruar “Los Blancos” tre pikë të rëndësishme, një rezultat që i ka dhënë disi frymëmarrje projektit të drejtuar nga Alonso.

Gazetari Emilio Contreras, në një analizë për La Tribuna, shprehu habinë e tij për mënyrën se si po vihet në dyshim trajneri spanjoll.

“Jam i surprizuar që një bast trevjeçar si ai i Xabi Alonsos po vihet në diskutim kaq shpejt. Është e qartë që disa gjëra nuk po funksionojnë, por rezultatet nuk janë të këqija. Ekipi ishte kryesues i kampionatit deri pak kohë më parë dhe është mes tetë më të mirëve në Ligën e Kampionëve”.

Contreras theksoi gjithashtu standardet e dyfishta brenda klubit.

“Sezonin e kaluar situata ishte më kritike dhe Ancelotti u mbajt në detyrë. Kjo tregon qartë se durimi te Real Madridi është shumë i kufizuar”.

Edhe Nacho Labarga dha mendimin e tij mbi polemikat që rrethojnë të ardhmen e Alonsos.

“Nuk e kuptoj pse ka kaq shumë dyshime rreth një shkarkimi të mundshëm. Ky është Real Madridi dhe kjo stemë të detyron të fitosh. Forma e skuadrës ka qenë e dobët dhe, edhe pse nuk ka një zëvendësues të qartë, kërkesat në këtë klub janë ndryshe”.

Megjithatë, Labarga u shpreh qartë kundër një largimi të menjëhershëm.

“Unë e di se çfarë do të bëja dhe, për mua, shkarkimi i Alonsos do të ishte një gabim”.

Në të njëjtën linjë ishte edhe Jose Manuel Olivan, i cili bëri thirrje për më shumë qetësi dhe durim.

“Jemi më 12 dhjetor dhe ende nuk është vendosur as titulli i parë i sezonit. Nëse diçka ka humbur, atëherë po, është problem. Por Alonso tashmë e ka dëshmuar veten si trajner i madh përmes rezultateve dhe projekte të tilla afatgjata kërkojnë durim”.

Debati rreth të ardhmes së Xabi Alonsos vazhdon, por fitorja ndaj Alaves duket se ka zbutur tonet kritike dhe ka rikthyer pjesërisht besimin e mediave madrilene. /Telegrafi/

Kylian Mbappe shënoi një tjetër gol të bukur për Real Madridin ndaj Alaves, duke arritur golin e 70-të për klubin në vetëm një sezon e gjysmë.

Sulmuesi francez ka arritur këtë shifër në vetëm 81 ndeshje që nga koha kur iu bashkua ekipit si lojtar i lirë gjatë verës së vitit 2024.

Mbappe tani i mungojnë vetëm tre gola për të barazuar rekordin e Cristiano Ronaldos me 69 gola në një vit kalendarik, duke përfshirë edhe golat me kombëtaren. Mbretërit kanë edhe dy ndeshje në kalendar.

Francezi ka shënuar deri tani 66 gola në vitin 2025, duke përfshirë klubin dhe përfaqësuesen.

Në këtë sezon, Mbappe ka 26 gola në 21 ndeshje për Real Madridin, përfshirë 17 gola në 17 ndeshjet e La Ligës.

Ai u shpall "Lojtari i Ndeshjes" në fitoren e vështirë 2-1 të Real Madridit ndaj Deportivo Alaves. Goli i tij i bukur në pjesën e parë ndezi lojën për ekipin, megjithëse ai vuante nga një problem në gjurin e majtë.

Rodrygo, Bellingham dhe Valdepenas gjithashtu luajtën ndeshje të mira, por ndikimi i Mbappe ishte vendimtar. /Telegrafi/

Ousmane Dembele dhe Kylian Mbappe janë dy emrat që kryesojnë garën për çmimin "Lojtari më i Mirë i FIFA-s", sipas prestigjiozes Le Parisien.

Dy yjet francezë kanë pasur sezone të jashtëzakonshme dhe konsiderohen si favoritët absolutë për këtë trofe individual.

Dembele vjen në këtë garë pasi u shpall fitues i "Topit të Artë" në shtator, si shpërblim për paraqitjet e tij mbresëlënëse me Paris Saint-Germain sezonin e kaluar, ku ishte një nga figurat kyçe të suksesit të klubit parisien.

telegrafi.com

Nga ana tjetër, Kylian Mbappé e mbylli sezonin si fitues i Këpucës së Artë Evropiane, duke shënuar më shumë gola se çdo lojtar tjetër në pesë ligat kryesore të Evropës.

Sulmuesi francez vazhdoi të konfirmojë statusin e tij si një nga lojtarët më vendimtarë në futbollin botëror.

Dembele dhe Mbappe kanë ndarë së bashku dhomën e zhveshjes te PSG, përpara largimit të Mbappes drejt Madridit, ndërsa vazhdojnë të jenë shokë skuadre edhe në Kombëtaren e Francës, ku përbëjnë një dyshe sulmuese shumë të frikshme.

Me dy karriera që po zhvillohen në nivelet më të larta dhe me trofe individualë e kolektivë në sfond, mbetet për t’u parë se cili prej tyre do të kurorëzohet si më i miri i FIFA-s, në një duel që pritet të jetë shumë i ngushtë. /Telegrafi/

Real Madridi ka shënuar edhe një herë territorin e tij në tregun ndërkombëtar duke refuzuar një nga ofertat më ekstravagante të parë ndonjëherë në historinë e futbollit modern.

Oferta e Al-Hilal synonte të shkaktonte një tërmet të madh mediatik dhe ekonomik duke vendosur Kylian Mbappen në qendër të një projekti të paprecedentë të drejtuar nga Arabia Saudite.

Megjithatë, në zyrat e “Santiago Bernabeu” nuk pati asnjë dyshim. Mesazhi ishte i menjëhershëm: largimi i lojtarit është i panegociueshëm, pavarësisht shumës së propozuar.

Propozimi saudit arriti në 350 milionë euro, një shifër e paprecedentë për një marrëveshje të këtij dimensioni. Plani përfshinte një kontratë katërvjeçare me një pagë vjetore prej 300 milionë eurosh për Mbappen.

Me këto shifra, sulmuesi francez do të kishte tejkaluar edhe fitimet e Cristiano Ronaldos, duke u bërë futbollisti më i paguar në botë, me një diferencë të konsiderueshme krahasuar me yjet e tjerë.

Pavarësisht kësaj, Real Madridi as që e mori në konsideratë hapjen e negociatave. Bordi drejtues beson se ekzistojnë vlera sportive që nuk mund të maten vetëm në terma ekonomikë.

Klubi e sheh pranimin e një oferte prej 350 milionë eurosh si dobësim të një projekti të ndërtuar rreth lojtarit dhe ndikimit të tij global.

Për Al-Hilal, nënshkrimi i Mbappes ishte shumë më tepër sesa një përforcim sportiv. Ishte një lëvizje strategjike për ta shndërruar ligën saudite në një vitrinë globale.

Klubi arab synonte një ikonë gjeneracionale të aftë për të tërhequr audiencë, sponsorë dhe prestigj ndërkombëtar, duke ndjekur rrugën e hapur nga emra të tjerë të mëdhenj që janë transferuar në rajon.

Sidoqoftë, Real Madridi e ka mbyllur këtë derë në mënyrë kategorike, duke dërguar një mesazh të qartë dhe të pakontestueshëm për tregun global./Telegrafi/

Paris Saint-Germain ka shënuar një tjetër fitore në betejën ligjore me Kylian Mbappe, pasi gjykata ka refuzuar apelimin e paraqitur nga avokatët e futbollistit lidhur me sekuestrimin e llogarive bankare të klubit, raporton Mundo Deportivo.

Gjykata franceze e punës pritet ende të japë vendimin përfundimtar lidhur me padinë në vlerë prej 55 milionë eurosh, të ngritur nga përfaqësuesit ligjorë të Mbappe kundër PSG-së. Sulmuesi francez këmbëngul se nuk ka pranuar kurrë të heqë dorë nga një pjesë e kontratës së tij për t’u larguar nga klubi si lojtar i lirë.

Nga ana tjetër, PSG argumenton se shuma në fjalë është mbajtur mbi bazën e fjalës së vetë Mbappe, pavarësisht se nuk ka ekzistuar asnjë marrëveshje formale me shkrim mes palëve. Klubi thekson se marrëveshja ka qenë verbale dhe se veprimet janë ndërmarrë në mirëbesim.

Në muajin maj, Paris Saint-Germain arriti të rrëzojë vendimin për ngrirjen e 55 milionë eurove në llogaritë e tij, një masë e vendosur fillimisht nga gjykata, por që më pas u anulua. Ky vendim u apelua nga pala e Mbappe, megjithatë pa sukses.

Këtë javë, Gjykata e Apelit e hodhi sërish poshtë apelimin, duke urdhëruar avokatët e Kylian Mbappe të paguajnë shpenzimet gjyqësore, si dhe një shumë prej 3 mijë eurosh në favor të PSG-së.

Avokati i klubit parisien, Renaud Semerdjian reagoi pas vendimit, duke theksuar se gjykatat kanë qenë të qarta në vlerësimin e çështjes.

“Gjykatat kanë konfirmuar për herë të dytë mungesën e bazës ligjore në pretendimet e Kylian Mbappe”, deklaroi Semerdjian.

Çështja mbetet ende e hapur sa i përket vendimit final për padinë prej 55 milionë eurosh, por për momentin PSG duket se po del fituese në çdo raund të kësaj sage juridike./Telegrafi

Mbrojtësi i Fluminense, Thiago Silva, ka folur për marrëdhënien e tensionuar midis Neymar të Santos dhe Kylian Mbappe të Real Madridit gjatë kohës së tyre te Paris Saint-Germain.

Silva ka deklaruar se ishte plotësisht i befasuar kur pa që një miqësi e shëndetshme po përkeqësohej dhe tani ka treguar situatën.

“Tek Paris Saint-Germain, Mbappe dhe Neymar shkuan mirë në fillim, por marrëdhënia e tyre u përkeqësua. Pse? Ishte një histori e bukur. Më kujtohet ndeshja e Trofeut të Kampionëve kundër Monacos së Kylian Mbappe në Marok. Në fund të ndeshjes, Mbappe donte të fliste me mua. Ai tha: “Edhe nëse Neymar nënshkruan, unë dua të vij dhe të jem pjesë e kësaj skuadre. Nëse mund të flasësh me presidentin...”, zbuloi fillimisht Silva.

“Të dy mbërritën atë verë dhe marrëdhënia e tyre ishte e pabesueshme. Ata ishin shumë të afërt, ndër ata që argëtoheshin më shumë çdo ditë”.

“Nuk e kuptova pse u ndanë. Unë nuk isha më te PSG. Nuk e di se cili prej të dyve shkaktoi ndarjen, por kjo më trishtoi. Ata janë dy djem të mrekullueshëm dhe është zhgënjyese që përfundoi kështu”, përfundoi ish-kapiteni i PSG-së. /Telegrafi/

Sulmuesi francez, Karim Benzema ndodhet në Dubai duke u përgatitur për gjysmën e dytë të sezonit me klubin e tij, Al-Ittihad, pas një pushimi prej gati një muaji.

Në qytetin e Emirateve të Bashkuara Arabe, Benzema dha një intervistë të gjatë për gazetën L'Equipe, në të cilën trajtoi tema të ndryshme, nga një rikthim i mundshëm në ekipin kombëtar francez deri te situata aktuale te Real Madridi.

Megjithatë, vëmendja ishte te situata e Real Madridit, me klubin mbretëror që po përjeton një krizë të rezultateve dhe Benzema ka identifikuar problemin.

Thierry Henry i del në mbrojtje Alonsos, sulmon lojtarët e Real Madridit

“Ajo që u mungon është thjesht një lidhje, midis Mbappe, Vinicius, Bellingham dhe Rodrygo. Secili duhet të dijë çfarë të bëjë në fushë”, ka thënë fillimisht Benzema për L’Equipe.

“Bellingham duhet të kuptojë se ai është mesfushori sulmues, jo golashënuesi. Mbappe është golashënuesi, jo mesfushori sulmues. Vinicius nuk është mesfushor mbrojtës, ai është një sulmues i krahut të majtë".

"Për sa kohë që të gjithë e dinë çfarë të bëjnë në fushë, kaq është. Sepse po flasim për lojtarë që janë ndër dhjetë më të mirët në botë, dhe të gjithë janë në të njëjtën skuadër".

“Zgjidhja e problemit? Është e vështirë sepse secili ka personalitetin dhe karakteristikat e veta. Secili dëshiron të jetë më i miri, kështu që është pak e komplikuar. Secili duhet ta kuptojë se, në rolin e tij, mund të kontribuojë, por se kjo është për të mirën e ekipit", përfundoi ylli francez. /Telegrafi/