Manchester United po i afrohet emërimit të trajnerit të përkohshëm, me Michael Carrick që ka dalë në avantazh si kandidati kryesor pas përparimit të madh të arritur në bisedime gjatë 24 orëve të fundit.
Sipas Fabrizio Romano, takimi i fundit mes Carrick dhe drejtuesve të klubit ka qenë “shumë, shumë pozitiv”, sidomos në aspektin e taktikës, ideve, komunikimit dhe vizionit të përgjithshëm.
“Manchester United është gati ta emërojë trajnerin e ri të përkohshëm dhe gjatë 12 orëve të fundit mund të konfirmojmë se Michael Carrick ka bërë përparim të rëndësishëm në bisedimet me klubin”, ka deklaruar Romano.
“Në 24 orët e fundit, Michael Carrick është shndërruar në opsionin kryesor për postin e trajnerit të përkohshëm te Manchester United. Nga sa kuptoj, takimi mes United dhe Carrick ka qenë shumë pozitiv për sa i përket taktikës, ideve, komunikimit dhe qëllimit. Ndjesia ka qenë shumë e mirë”.
Carrick, i cili kishte një periudhë të suksesshme si trajner i përkohshëm në vitin 2021 me dy fitore në tri ndeshje pas largimit të Ole Gunnar Solskjaer, shihet si një figurë e njohur dhe e besuar, e aftë për t’i dhënë stabilitet të menjëhershëm skuadrës.
Hierarkia e Manchester Unitedit po kërkon një zgjidhje të shpejtë, në mes të spekulimeve të vazhdueshme që e lidhin Ole Gunnar Solskjaer sërish me këtë rol.
“Djajtë e Kuq” të cilët po kalojnë një periudhë të vështirë në Liga Premier, kanë nevojë për një dorë të sigurt për ta stabilizuar situatën dhe për të synuar një rikthim të fortë në garën për kualifikim në garat Evrope në pjesën e mbetur të sezonit./Telegrafi
Arsenal synon një transferim prej rreth 74 milionë eurosh për Tino Livramento, por përballet me konkurrencë nga Manchester City.
Sipas një raporti të ri, Arsenal po planifikon një marrëveshje të mundshme prej rreth 74 milionë eurosh për të nënshkruar me Tino Livramento nga Newcastle, por përballet me konkurrencë të fortë nga Manchester City.
Mbrojtësi 23-vjeçar do të ketë vetëm dy vite të mbetura në kontratën e tij gjatë verës, dhe të dy gjigantët e Ligës Premier janë të interesuar për të siguruar shërbimet e tij.
Sipas The Sun, Arsenal po planifikon një transferim të mundshëm veror për Livramento. Mbrojtësi i djathtë i Newcastle ka marrë një rol kyç në skuadrën e Eddie Howe në St James' Park, duke luajtur 18 ndeshje në të gjitha kompeticionet.
Kontrata e tij skadon në vitin 2028 dhe 'Laraskat' do të kenë shumë pak fuqi negociuese këtë verë, duke pasur parasysh se më herët kishin kërkuar rreth 70 milionë euro për Livramenton në verë.
Performancat e 23-vjeçarit në veriun e Anglisë e kanë bërë atë një pjesë të përfaqësueses së Anglisë, ku ka fituar tre paraqitje, dhe ai shpreson të përfshihet në skuadrën e Thomas Tuchel për Botërorin 2026.
Arsenal përballet me konkurrencë serioze nga Manchester City, të cilët kanë pasur një interes afatgjatë për ish-lojtarin e Southampton.
Livramento iu bashkua Newcastle në vitin 2023 nga Southampton në një marrëveshje prej 34.8 milionë eurosh dhe ‘Laraskat’ pritet të përfitojnë një fitim të madh nga ky transferim.
Ai ka treguar në nëntor, pas rikthimit nga një mungesë e gjatë, se ende nuk ka pasur negociata për një kontratë të re.
“Kjo nuk është diçka që unë e kontrolloj. E lë te babai im dhe agjenti im. Për mua, kam qenë jashtë për shtatë javë. Kam punuar shumë për t’u rikthyer dhe natyrisht për të ndihmuar skuadrën”.
Jam shumë i lumtur me mënyrën se si kam luajtur (kundër Man City). Kjo është fokusi im tani. Të qëndroj ku jam dhe të ndihmoj sa më shumë skuadrën”, kishte deklaruar ai./Telegrafi/
Trajneri portugez Nuno Espírito Santo ka regjistruar një rast vërtet të rrallë këtë sezon në Ligën Premier angleze, duke humbur të njëjtën ndeshje dy herë brenda një sezoni – por si trajner i dy skuadrave të ndryshme.
Situata është sa e ndërlikuar, aq edhe pothuajse e pabesueshme. Në fillim të sezonit, Nuno Espírito Santo ishte në krye të Nottingham Forest.
Në atë periudhë, skuadra e tij u mposht bindshëm 3-0 nga West Ham, ndeshje që rezultoi edhe e fundit për portugezin në stolin e Forest, pasi u shkarkua menjëherë pas saj.
Gjashtë muaj më vonë, fati i solli sërish përballë të njëjtat skuadra, por me role të përmbysura. Këtë herë, Nuno Espírito Santo ishte trajner i West Ham, ndërsa Nottingham Forest arriti fitore 2-1, duke i shkaktuar portugezit një tjetër humbje ndaj ish-skuadrës së tij.
Për ta bërë historinë edhe më interesante, mediat angleze raportojnë se Nuno rrezikon shkarkimin edhe nga West Ham, çka do të thotë se për herë të dytë brenda të njëjtit sezon, një përballje mes West Ham dhe Nottingham Forest mund të rezultojë fatale për vendin e tij të punës.
Ky rast unik është parë vetëm një herë më parë në futbollin elitar anglez. I ndodhi Harry Redknapp në sezonin 2004/2005, në derbin e famshëm të Bregut Jugor mes Portsmouth dhe Southampton.
Redknapp fillimisht drejtoi Portsmouthin, duke u mposhtur 2-1 nga Southampton, ndërsa më pas, gjatë të njëjtit sezon, kaloi te Southampton, ku pësoi një humbje të rëndë 4-1 nga Portsmouth. Në atë rast, rikthimi i tij në Portsmouth u shoqërua me një pritje tejet armiqësore nga tifozët vendas. /Telegrafi/
Në tregun italian të transferimeve, emri më i përfolur në këto ditë është Federico Chiesa, i cili duket se nuk hyn në planet e trajnerit Arne Slot te Liverpooli.
Sipas mediave, ai është vlerësuar ndërmjet 12 dhe 15 milionë eurosh për të mundur të largohet gjatë këtij afati kalimtar dimëror nëse situata e kërkon.
Liverpooli kishte dukur se po rifitonte ritmin në javët e fundit, por dy barazime të reja ndaj Leeds United dhe Fulham kanë rikthyer dyshimet mbi performancën e skuadrës në Anfield.
Në konferencë për shtyp, Arne Slot shprehu indinjatën e tij ndaj kritikave që e cilësojnë ekipin e tij si “të mërzitshëm”, duke theksuar se gjatë karrierës së tij ka preferuar gjithmonë një futboll sulmues.
Megjithatë, për të menaxhuar valën e humbjeve të fundit, trajneri holandez ka zgjedhur të fusë një mesfushor të katërt, Florian Wirtz, për të marrë më shumë kontroll në mesfushë, në vend që të përdorte një sulmues krahu natyral si Chiesa, i cili duket se nuk hyn plotësisht në planet e tij këtë dimër.
Garë për rikthimin e Chiesas
Sipas ‘La Gazzetta dello Sport’, Milan dhe Napoli janë dy skuadrat me shanse.
Për Napolin, transferimi i Chiesas do të varej nga largimi i Noa Lang drejt Turqisë, ndërsa për Milanin, dëmtimi i fundit i Nkunku ka rritur nevojën për një zëvendësues.
Megjithatë, favoriti kryesor për të siguruar shërbimet e tij duket se është Juventusi.
Nga Torino kanë marrë sinjalin se për ta sjellë Chiesan ne Liverpool ne janar, duhet të paguajnë 12-15 milionë euro, dhe duke pasur parasysh situatën e vështirë ekonomike të klubit, duket se do të përpiqen të negociojnë deri në çastin e fundit për një ulje çmimi që të përputhet me buxhetin aktual.
Federico Chiesa, 28 vjeç, luajti 14 ndeshje për Liverpoolin sezonin e kaluar në të gjitha kompeticionet, ku shënoi 2 gola dhe regjistroi 1 asistim. /Telegrafi/
Meriton Korenica është shumë pranë një transferimi në Shtetet e Bashkuara të Amerikës. Mesfushori i CFR Cluj pritet t’i bashkohet DC United, skuadrës së MLS, ndërsa negociatat konsiderohen të përfunduara në rreth 90 për qind.
Sipas burimeve të FANATIK, pronari i CFR Cluj, Neluțu Varga, do të përfitojë një shumë të konsiderueshme nga kjo marrëveshje, duke shitur 75 për qind të të drejtave federative të lojtarit kosovar.
Korenica prej kalimit te Cluj, ka shkëlqyer, duke qenë lojtar kryesor i klubit rumun.
4 milionë dollarë për Korenicën, Cluj mban 25% të kartonit
Pas transferimit të Louis Munteanu për 7 milionë dollarë në MLS, DC United ka kthyer vëmendjen edhe nga një tjetër lojtar kyç i kampionëve të Rumanisë. Klubi amerikan është i gatshëm të paguajë rreth 4 milionë dollarë për Meriton Korenicën, ndërsa CFR Cluj do të mbajë 25 për qind të të drejtave federative të lojtarit për një shitje të ardhshme.
“Ka shanse shumë të mira që Korenica të transferohet te DC United. Është çështje ditësh,” deklaroi ekskluzivisht për FANATIK pronari i CFR Cluj, Neluțu Varga.
Trajneri i DC United, Rene Weiler, është një admirues i madh i mesfushorit kosovar dhe po e shtyn fort realizimin e këtij transferimi, i cili pritet të zyrtarizohet në ditët në vijim.
Paga e Korenicës në MLS
Nëse marrëveshja finalizohet, Meriton Korenica do të përfitojë një kontratë shumë të mirë financiare. Ai pritet të ketë një pagë vjetore prej rreth 800 mijë dollarësh, duke u bërë një nga lojtarët e rëndësishëm të DC United në repartin e mesfushës.
Sipas Transfermarkt, vlera aktuale e tregut e Korenicës është 2.4 milionë euro. Në karrierën e tij, ai ka luajtur për klube si Liria, Rshoveci, Ballkani dhe Prishtina në Kosovë. /Telegrafi/
Legjenda e futbollit anglez, Kevin Keegan, 74 vjeç, është diagnostikuar me kancer, njoftoi familja e tij në një deklaratë zyrtare.
Ish-sulmuesi dhe trajneri i kombëtares së Anglisë u shtrua së fundmi në spital për shkak të problemeve të gjatë me barkun, dhe testet zbuluan kancerin për të cilin ai së shpejti do të fillojë trajtimin.
Familja e Keegan shprehu mirënjohje për ekipin mjekësor për veprimin e tyre të shpejtë dhe kujdesin e vazhdueshëm, duke kërkuar gjithashtu privatësi gjatë kësaj kohe të vështirë.
“Këto teste zbuluan një diagnozë të kancerit, për të cilën Kevin do të marrë trajtim. Ai është mirënjohës ekipit mjekësor për ndërhyrjen dhe kujdesin e tyre të vazhdueshëm. Gjatë kësaj kohe të vështirë, familja kërkon privatësi dhe nuk do të bëjë asnjë koment të mëtejshëm,” thuhet në deklaratë.
Reagimi i Newcastle United
Newcastle United, klubi me të cilin Keegan lidhet ngushtë si lojtar dhe trajner, reagoi menjëherë duke publikuar një mesazh mbështetjeje në rrjetet sociale.
"Ish-lojtari dhe trajneri ynë Kevin Keegan do të fillojë trajtimin pas një diagnoze me kancer, pas shtrimit në spital për vlerësim të mëtejshëm të simptomave të barkut që kanë ekzistuar prej kohësh. Mbreti Kev, ne jemi me ty në çdo hap të rrugës. Të urojmë shërim të shpejtë dhe të plotë".
Keegan ka një lidhje të veçantë me Newcastlen, ku ka luajtur dhe ka drejtuar ekipin mes viteve 1992–1997 dhe më pas në vitin 2008. Lajmi i diagnostikimit të tij ka nxitur reagime mbështetëse nga tifozët dhe komuniteti i futbollit anglez, të cilët kujtojnë karrierën e tij të jashtëzakonshme.
Our former player & manager, Kevin Keegan will undergo treatment after being diagnosed with cancer having been admitted to hospital for further evaluation of ongoing abdominal symptoms.
Kevin Keegan lindi më 14 shkurt 1951 në Armthorpe dhe konsiderohet një nga ikonat më të mëdha të futbollit anglez. Ai e filloi karrierën e tij profesionale në Scunthorpe, duke u bërë yll në Liverpool (1971–1977), ku fitoi tre tituj të Ligës Premier, një Ligë Kampionësh dhe dy Kupa UEFA.
Në vitin 1977, ai u transferua te Hamburger SV në Gjermani, ku fitoi dy herë Topin e Artë (1978 dhe 1979), Bundesligën dhe luajti në finalen e Ligës së Kampionëve.
Më pas, ai luajti për Southampton, Newcastle United dhe Blacktown City, ku përfundoi karrierën e tij të pasur.
Keegan luajti gjithsej 63 herë për Anglinë, duke shënuar 21 gola, dhe mori pjesë në Kupën e Botës 1982 në Spanjë.
Si trajner, ai udhëhoqi Newcastle United drejt dy vendeve të dyta radhazi në Ligën (1995/96 dhe 1996/97), dhe gjithashtu ka qenë trajner i kombëtares së Anglisë nga viti 1999 deri në 2000. /Telegrafi/
Zinedine Zidane ka dy “kërkesa” nëse do të pranonte të zëvendësonte Ruben Amorim në postin e trajnerit të Manchester United.
Amorim u shkarkua nga posti i trajnerit të United të hënën, pas 14 muajsh në krye të skuadrës. Ai u largua nga “Old Trafford” me ish-ekipin e tij të renditur në vendin e gjashtë në tabelën e Ligës Premier.
Pas barazimit 1-1 të së dielës në transfertë ndaj rivalëve të Leeds, Amorim u tha gazetarëve se kishte rënë dakord të ishte “menaxher, jo trajner” kur iu bashkua fillimisht United.
Megjithatë, në deklaratën zyrtare të klubit që konfirmonte largimin e tij, United iu referua atij si trajner i pare, titull që ai e ka mbajtur që nga marrja e detyrës.
Oliver Glasner, Enzo Maresca dhe Gareth Southgate janë ndër favoritët për ta zëvendësuar Amorim në mënyrë të përhershme.
Një alternativë tjetër mund të jetë Zidane, i cili është pa punë që prej largimit nga Real Madrid për herë të dytë në vitin 2021.
Zidane ka deklaruar më parë se mungesa e zotërimit të mirë të gjuhës angleze do ta pengonte të drejtonte në Ligën Premier, megjithëse miku i tij i ngushtë dhe ish-shoku i skuadrës te Franca, Emmanuel Petit, kishte pohuar në vitin 2021 se ai po e mësonte gjuhën.
Në tetor të vitit 2024, Petit deklaroi se Zidane do t’i parashtronte dy kërkesa Manchester United nëse do t’i afrohej për postin e trajnerit.
“Për momentin, ambienti te Manchester United prej vitesh nuk ka qenë i mirë. Stabiliteti në stol, niveli i lojtarëve gjithashtu, pritshmëritë e klubit nuk janë të njëjta si më pare”.
“United është ende një klub i madh, por jo më në fushë. Dhe Zizou është shumë i ndërgjegjshëm dhe shumë i kujdesshëm për këtë, për cilësinë e lojtarëve”.
“Nëse ai e merr detyrën te Manchester United, kjo do të thotë se ka zgjidhje”, ka deklaruar Petit./Telegrafi/
Pas shkarkimit të Ruben Amorim, drejtuesit e Manchester United po marrin kohë për të zgjedhur trajnerin që do t’i besojnë stolin në vazhdim të sezonit. E vetmja gjë e qartë për momentin është se përkohësisht skuadra do të drejtohet nga Darren Fletcher.
“Djajtë e kuq” po analizojnë me qetësi situatën për të kuptuar më mirë, nëse do t’i besojnë një trajneri deri në fund të këtij sezoni, apo do të firmosin me një emër të madh që në këtë moment.
Zërat e fundit flasin për disa kandidatura, të cilave u është shtuar ajo e italianit Enzo Maresca, i cili sapo është larguar nga Chelsea. Drejtori sportiv i Manchester United, Omar Berrada, ka një lidhje me trajnerin italian, pasi ishte pikërisht ai që e çoi te Manchester City.
Kërkimi për trajnerin e ri të Manchester United ka nisur zyrtarisht. Pas vetëm 14 muajsh në krye të skuadrës, Ruben Amorim u shkarkua të hënën, pas kritikave të tij të fundit ndaj hierarkisë së klubit në "Old Trafford".
United aktualisht ndodhet në vendin e gjashtë në Liga Premier dhe mbetet në garë për një vend në Ligën e Kampionëve për sezonin e ardhshëm.
Sipas “BBC Sport”, Darren Fletcher do ta drejtojë ekipin për disa ndeshje, përpara se klubi të emërojë një trajner të përkohshëm deri në fund të sezonit.
Por pyetja kryesore mbetet: kush do ta marrë drejtimin e “Djajve të Kuq” në mënyrë të përhershme gjatë verës?
Trajnerë me përvojë në Liga Premier
Pas dështimeve të njëpasnjëshme me Erik ten Hag, Ralf Rangnick dhe së fundmi Amorim, në “Old Trafford” po shtrohet dilema nëse duhet zgjedhur një trajner i provuar në Liga Premier.
Unai Emery është një nga emrat më të përfolur. Spanjolli ka bërë një punë të jashtëzakonshme me Aston Villën, duke e nxjerrë klubin nga lufta për mbijetesë dhe duke e kthyer në pretendente për zonën e Evropës dhe madje për titull. Villa ndodhet aktualisht e treta në tabelë, vetëm gjashtë pikë pas Arsenalit kryesues. Megjithatë, periudha e tij e përzier te Arsenali mund të shihet si një pengesë.
Një tjetër emër interesant është Andoni Iraola. Ai ka tërhequr vëmendjen pas sezonit të kaluar me Bournemouth, të cilët përfunduan në vendin e nëntë. Edhe pse “Cherries” janë aktualisht në një seri prej 11 ndeshjesh pa fitore, do të ishte e vështirë për Iraolën ta refuzonte një ofertë nga Manchester United.
Oliver Glasner, i cili i skadon kontrata me Crystal Palace gjatë verës, fitoi FA Cup sezonin e kaluar, ndërsa Eddie Howe i dha fund pritjes së gjatë të Newcastle për një trofe madhor duke fituar Carabao Cup. Të dy mund të tundohen nga një sfidë e re në “Old Trafford”.
Zgjidhje nga brenda klubit?
Një tjetër mundësi është një emërim i brendshëm. Darren Fletcher, ish-mesfushori i United dhe aktualisht trajner i ekipit U-18, është 41 vjeç dhe ka kaluar 11 vite si lojtar nën drejtimin e Sir Alex Ferguson.
Një tjetër kandidat i natyrshëm është Michael Carrick. Ish-mesfushori i United është i papunë që nga shkarkimi nga Middlesbrough në qershor. Carrick, tani 44 vjeç, zhvilloi 463 ndeshje me fanellën e United gjatë 12 viteve, duke fituar 17 trofe para se të tërhiqej në vitin 2018. Mbetet për t’u parë nëse ai do të jetë ende pa punë deri në verë.
Kieran McKenna, trajneri i Ipswich Town, është një tjetër emër me lidhje me United. 39-vjeçari, ish-asistent në ekipin e parë të United, ka impresionuar në rolin e tij të parë si trajner kryesor. Ai i ngjiti Ipswich në Liga Premier përmes dy promovimeve radhazi dhe, pas rënies nga elita sezonin e kaluar, tani i ka çuar në vendin e tretë në Championship. Një tjetër promovim do ta forconte ndjeshëm kandidaturën e tij.
Po një rikthim i Ole Gunnar Solskjaer? Edhe pse duket pak i mundshëm, norvegjezi mbetet i lirë dhe ende shumë i dashur për tifozët. Periudha e tij mes viteve 2018 dhe 2021 përfundoi me zhgënjim, por a meriton ai më shumë vlerësim? Vetëm pak më shumë se katër vite më parë, United përfundoi i dyti në Liga Premier nën drejtimin e tij, duke shënuar 73 gola, më shumë se në çdo sezon që nga largimi i Fergusonit në vitin 2013.
Emra të mëdhenj nga Evropa
Nga kontinenti, opsionet nuk mungojnë. Mauricio Pochettino, aktualisht trajner i SHBA-së, ka qenë vazhdimisht i lidhur me United. Me Botërorin që zhvillohet këtë verë në SHBA, pritja e United për një emërim të përhershëm mund t’i përshtatet atij.
Xavi, ish-trajneri i Barcelonës, është i papunë që nga viti 2024 dhe një aventurë në Liga Premier do të ishte padyshim joshëse për të. Luis Enrique, i cili fitoi Ligën e Kampionëve me Paris Saint-Germain si pjesë e tripletës sezonin e kaluar, vazhdon të jetë në krye të klubit francez, por ka fituar gjithçka në Paris.
Zinedine Zidane është ende pa punë katër vite pas largimit nga Real Madridi, por mbetet dilemë nëse ai po pret ende një ditë drejtimin e Francës. Roberto De Zerbi, që ka përvojë në Angli nga periudha te Brighton, po bën një punë mbresëlënëse te Marseille. Megjithatë, sinqeriteti i tij i drejtpërdrejtë mund të shihet si problem për hierarkinë e United.
Gareth Southgate ka qenë prej kohësh i lidhur me United, por e kishte përjashtuar veten para emërimit të Amorim, duke deklaruar se nuk do të rikthehej në trajnim për të paktën një vit pas largimit nga Anglia. Tani, pas një periudhe pa punë që nga korriku 2024, a mund të jetë gati për rikthim?
Ai drejtoi Anglinë për 102 ndeshje në tetë vite, duke i çuar në dy finale të Kampionatit Evropian dhe një gjysmëfinale Botërori. Bashkëpronari i United, Sir Jim Ratcliffe, dihet se është admirues i tij, por Southgate nuk ka drejtuar një klub që nga largimi nga Middlesbrough para 16 vitesh.
Një tjetër emër në dispozicion është Enzo Maresca, i shkarkuar nga Chelsea javën e kaluar. Ai është i lirë dhe, ashtu si Southgate, mund të jetë një opsion si për afat të shkurtër, ashtu edhe për projekt afatgjatë.
Vendimi përfundimtar do të jetë jetik për të ardhmen e Manchester United, i cili kërkon stabilitet dhe rikthim në majat e futbollit anglez dhe evropian./Telegrafi
Ruben Amorim është larguar nga posti i trajnerit të Manchester United. Ruben u emërua në nëntor të vitit 2024 dhe e udhëhoqi ekipin drejt finales së UEFA Europa League në Bilbao në maj. Me Manchester Unitedin që renditet në vendin e gjashtë në Premier League, udhëheqja e klubit ka marrë me ngurrim vendimin se është […]
Ruben Amorim, është larguar nga posti i trajnerit të Manchester United pas 14 muajsh në krye të klubit të gjashtë në tabelën e Premier League.
Në një deklaratë, Manchester United thotë se vendimi është marrë ‘me ngurrim’ dhe ‘është koha e duhur për të bërë një ndryshim’.
Ruben u emërua në nëntor të vitit 2024 dhe e udhëhoqi ekipin drejt finales së UEFA Europa League në Bilbao në maj.
Me Manchester Unitedin që renditet në vendin e gjashtë në Premier League, udhëheqja e klubit ka marrë me ngurrim vendimin se është koha e duhur për të bërë një ndryshim.
Kjo do t’i japë ekipit mundësinë më të mirë për një përfundim sa më të lartë në Premier League.
Klubi dëshiron ta falënderojë Rubenin për kontributin e tij në klub dhe i uron gjithë të mirat në të ardhmen.
Darren Fletcher do të marrë drejtimin e ekipit kundër Burnley të mërkurën.
Si arriti skuadra deri këtu?
Sipas BBC, Ruben Amorim kishte mbetur i lidhur me formacionin e tij të preferuar mbrojtës me tre lojtarë dhe mbrojtës krahu që nga mbërritja e tij te Manchester United.
Por trajneri portugez ndryshoi sistemin në mbrojtje me katër lojtarë për fitoren ndaj Newcastle në ditën e Krishtlindjeve, përpara se të kthehej në sistemin me tre mbrojtës për ndeshjet pasuese.
Raportet kishin pohuar se Christopher Vivell, kreu i rekrutimeve të United, i bëri thirrje Amorimit të përshtaste sistemin e tij pas një shpjegimi të detajuar nga trajneri i Fulhamit, Marco Silva, të planit të tij për ta kundërshtuar atë pas barazimit midis palëve në Craven Cottage në gusht.
Amorim, i cili u emërua si ‘trajner kryesor’ kur klubi njoftoi mbërritjen e tij, tha se kishte pasur mosmarrëveshje me klubin mbi objektivat e transferimeve.
Dhe aludimet e tij për tensionet në rritje me drejtorin e futbollit Jason Wilcox po bëheshin vetëm më të forta me fillimin e afatit kalimtar të janarit.
Manchester United nuk ka arritur më shumë se një barazim në udhëtim te Leeds United 1-1.
Ka qenë një ndeshje shumë e luftuar, por që në 45 minutat e para nuk pati gola dhe pjesa e parë përfundoi baras 0-0.
Gjithçka në ndeshje ndodhi brenda tre minutave, kur vendasit të parët kaluan në epërsi me golin e amerikanit Aaronson që shënoi në minutën e 62-të për 1-0.
Vetëm tre minuta më vonë, Joshua Zirkzee asistoi te Cunha i cili barazoi shifrat në 1-1.
Deri në fund më gola nuk pati dhe ndeshja u mbyll baras 1-1.
Me këtë barazim, Man Utd ngritet në pozitën e pestë në tabelë me 31 pikë, derisa Leeds mbetet e 16-ta me 22 sosh. /Telegrafi/
Sipas Diario AS, gjiganti i Ligës Premier, Newcastle United, paraqesin një kërcënim serioz për Real Madridin në garën për mesfushorin e talentuar të AZ Alkmaarit, Kees Smit.
Mesfushori 19-vjeçar është në krye të listës së dëshirave të Los Blancos për verën e ardhshme, teksa madrilenët synojnë të përforcojnë mesfushën me një profil kreativ dhe kontrollues të lojës.
Performancat e tij kanë tërhequr vëmendjen e klubeve më të mëdha evropiane, ndërsa stili i lojës e ka çuar shpesh në krahasime me yllin e Barcelonës, Pedri.
AZ Alkmaar e vlerëson talentin holandez mbi 60 milionë euro, çmim që nuk ka trembur Newcastle, të cilët janë të gatshëm të investojnë fuqishëm për të siguruar shërbimet e tij dhe për të fituar garën ndaj Real Madridit.
Ndërkohë, madrilenët po mbajnë nën vëzhgim edhe alternativa të tjera për mesfushën, si Adam Wharton i Crystal Palace dhe Rodri i Manchester City, por emri i Kees Smit mbetet një nga prioritetet kryesore për të ardhmen.
Përndryshe, Smit preferon kalimin te Real Madridi por gjithashtu nuk do ta refuzonte ndonjë skuadër angleze meqenëse i pëlqen edhe Liga Premier./Telegrafi
CFR Cluj është gati të fitojë para këtë dimër dhe pasi shiti Louis Munteanu te DC United, ata po përgatiten të shesin një tjetër yll në MLS.
Nelutu Varga, pronari i klubit me seli në Gruia, është në bisedime të avancuara me zyrtarët e DC United për transferimin e mesfushorit kosovar Meriton Korenica.
Sipas informacioneve të marra nga Fanatik, asgjë nuk është finalizuar ende, por ka shumë mundësi që marrëveshja të përfundojë.
Korenica vlerësohet shumë nga trajneri i DC United, Rene Weiler, i cili e pa atë në një ndeshje të Cluj.
Madje duket se trajneri zviceran i ekipit të Amerikës së Veriut e pëlqen Korenicën edhe më shumë sesa Louis Munteanu.
Fanatik ka mësuar se bisedimet në lidhje me transferimin e Meriton Korenicës te DC United janë rreth shumës 4 milionë euro.
Kjo do të ishte një tjetër lëvizje e shkëlqyer për Clujin, një klub që po përballet me disa vështirësi financiare.
I transferuar një vit e gjysmë më parë nga Manisa, Korenica ka performuar vazhdimisht mirë për Clujin.
Këtë sezon, ai ka shënuar 6 gola dhe ka dhënë 7 asistime në 29 ndeshje të luajtura në të gjitha garat./Telegrafi/
Trent Alexander-Arnold mund t’i ofrohet një rrugëdalje nga Real Madridi, pasi raportohet se dy klube të Ligës Premier po rivalizojnë për shërbimet e tij.
Mbrojtësi 27-vjeçar u largua verën e kaluar nga klubi i fëmijërisë së tij, Liverpool, ku kishte kaluar gjithë karrierën deri në atë moment, një vendim që ndau opinionin e tifozëve të “Të Kuqve”.
Sezoni i parë i Alexander-Arnold te Real Madridi ka qenë me ulje-ngritje. Ai ka zhvilluar vetëm 11 paraqitje në të gjitha kompeticionet dhe në fillim të dhjetorit pësoi një dëmtim në muskujt e kofshës, i cili e ka lënë jashtë fushave për disa muaj.
Me hapjen e merkatos së janarit, kanë nisur spekulimet mbi të ardhmen e tij. Sipas mediumit spanjoll Fichajes, Reali po shqyrton mundësinë e shitjes së ish-mbrojtësit të Liverpoolit, ndërsa disa klube angleze janë të interesuara për ta rikthyer Alexander-Arnold në Angli gjatë verës.
Një nga klubet e përmendura në artikull është Newcastle United, që aktualisht renditet në vendin e dhjetë në Ligën Premier.
Opsioni tjetër, më kontrovers, është Manchester United, rival i përbetuar i Liverpoolit, i cili ndodhet në vendin e gjashtë në renditje, dy pikë pas skuadrës së Arne Slot, me të cilën Alexander-Arnold fitoi titullin e Ligës Premier sezonin e kaluar.
Raportohet se si Newcastle ashtu edhe Manchester United po shqyrtojnë oferta rreth 40 milionë euro për Alexander-Arnold, por këto shifra konsiderohen “të pamjaftueshme” për ta bindur Real Madridin të heqë dorë nga lojtari, me klubin spanjoll që thuhet se “nuk ka asnjë qëllim ta lërë të largohet”.
Kontrata e Trent Alexander-Arnold me Real Madridin është e vlefshme deri në verën e vitit 2031./Telegrafi/
Një nga përshtypjet më të forta që la futbolli në vitin 2025 ishte numri i jashtëzakonshëm i konflikteve.
Dhe jo konflikte mes rivalësh, ato janë pjesë e zakonshme e çdo sezoni, por përplasje të hapura brenda vetë skuadrave, mes futbollistëve dhe shokëve të ekipit, trajnerëve apo drejtuesve të klubeve.
Shpresa është që këto histori të mbeten në 2025 dhe që viti 2026 të sjellë tema më të këndshme për debat.
Por, përpara se t’i lëmë pas, ja një përmbledhje e konflikteve më të bujshme të vitit.
Mohamed Salah vs Liverpool
Pa dyshim, skandali i brendshëm më i zhurmshëm i vitit. Pas një barazimi me Leeds, Mohamed Salah shpërtheu publikisht, duke shprehur pakënaqësinë e tij ndaj klubit dhe trajnerit Arne Slot. Egjiptiani u ankua për mungesë besimi, premtime të pambajtura dhe përjashtim nga formacioni.
Reagimi i Slotit ishte i ftohtë, por i prerë, Salah u la jashtë për ndeshjen e Ligës së Kampionëve kundër Interit. Megjithatë, rikthimi i tij në fushë u shoqërua me një asistim kundër Brightonit.
Duartrokitjet e Salahut për tifozët në “Anfield” pas ndeshjes lanë shumë pikëpyetje. Lamtumirë apo thjesht një pauzë para Kupës së Afrikës? Vijimi i historisë pritet në janar.
Alexander Isak vs Newcastle
Një tjetër sagë ku Liverpooli ishte protagonist indirekt. Alexander Isak e bëri të qartë dëshirën për t’u transferuar në “Anfield”, duke refuzuar të luante për Newcastle dhe duke akuzuar klubin për thyerje marrëveshjesh.
Pas një vere të gjatë dhe tensionuese, marrëveshja u mbyll: Liverpooli pagoi 145 milionë euro, ndërsa Newcastle investoi paratë për dy sulmues të rinj. Të gjitha palët fituan, të paktën në letër.
Marc-Andre ter Stegen vs Barcelona
Kush do ta mendonte që kapiteni i Barcelonës do të përplasej me drejtuesit? Pas një operacioni në shpinë, ter Stegen deklaroi se do të mungonte tre muaj, një periudhë që nuk i lejonte klubit të lironte hapësirë për regjistrime të reja.
Situata përshkallëzoi: kapiteni u ndëshkua brenda klubit, refuzoi vizita mjekësore dhe u përfol për largim. Edhe pse u rikthye gradualisht, Flick e bëri të qartë se Joan Garcia ishte portieri numër një. E ardhmja e gjermanit në “Camp Nou” mbetet e pasigurt.
Robert Lewandowski vs përzgjedhësi i Polonisë
Një konflikt që tronditi futbollin polak. Robert Lewandowski pezulloi karrierën në kombëtare pasi iu hoq shiriti i kapitenit nga trajneri Michal Probierz.
Vendimi u mirëprit nga një pjesë e dhomës së zhveshjes, por Polonia pa pasoja të menjëhershme: humbje ndaj Finlandës dhe dorëheqje e tij. Lewandowski u rikthye më vonë dhe tregoi edhe një herë rëndësinë e tij.
Alejandro Garnacho vs Ruben Amorim (Manchester United)
Pas finales së humbur të Ligës së Evropës, Garnacho reagoi hapur ndaj vendimit të trajnerit për ta lënë në stol. Postime provokuese dhe deklarata publike vulosën fatin e tij. Amorim ishte i prerë: argjentinasi nuk ishte më pjesë e planeve.
Pas një vere të vështirë, Garnacho u transferua te Chelsea. Ai atje po luan rregullisht.
Viktor Gyokeres vs Sporting Lisbona
Një tjetër rast presioni për transferim. Sulmuesi suedez pretendoi një “marrëveshje xhentëlmenësh” për largim, por Sporting kërkonte më shumë se sa Arsenali ishte gati të paguante.
Pas tensioneve dhe bojkotit, marrëveshja u arrit. Gyokeres u transferua në Londër, edhe pse forma e tij mbetet larg asaj që tregoi në Portugali.
Yoane Wissa vs Brentford
Një tjetër bojkot veror. Wissa refuzoi të luante për Brentford për të detyruar transferimin te Newcastle.
Pas ofertave të refuzuara dhe presionit publik, marrëveshja u mbyll për 55 milionë euro vetëm pak para mbylljes së afatit kalimtar.
Adrien Rabiot vs Jonathan Rowe (Marseille)
Pas humbjes ndaj Rennes, një debat në dhomën e zhveshjes u shndërrua në përplasje fizike. Rabiot dhe Rowe u përfshinë në një sherr serioz, aq sa stafi i sigurisë ndërhyri.
Të dy lojtarët u larguan nga klubi deri në fund të afatit kalimtar, duke mbyllur një episod të turpshëm për Marseille. Rabiot shkoi te Milani, Eowe te Bologna.
Dominik Livakovic vs Girona
Një nga transferimet më të çuditshme të vitit. Portieri kroat u huazua te Girona, por refuzoi të luante në Kupë e Mbretit, sepse dëshironte të largohej në janar për të siguruar minuta para Kampionatit Botërorit 2026.
Trajneri Michel e konfirmoi publikisht refuzimin e lojtarit për të aktivizuar veten.
Dani Rodriguez vs Mallorca
Një legjendë e klubit u përjashtua pas një postimi kritik ndaj trajnerit Jagoba Arrasate. Rodriguez u ndëshkua, iu hoq shiriti i kapitenit dhe nuk u përfshi më në skuadër.
Mallorca dhe lojtari u ndanë në janar, në një mënyrë të hidhur për një figurë historike të klubit.
Davide Calabria vs Sergio Conceiçao (AC Milan)
Një përplasje e hapur pas ndeshjes me Parmën. Conceiçao i bërtiti Calabrias në fushë, pas pakënaqësive për disiplinën e lojtarëve.
Calabria u largua nga Milani, fitoi Kupën e Italisë me Bolognan dhe më pas u transferua te Panathinaikos.
Idrissa Gueye vs Michael Keane (Everton)
Një moment shokues: Gueye goditi shokun e skuadrës gjatë ndeshjes dhe u përjashtua me karton të kuq, një rast i rrallë në Ligën Premier.
Mesfushori kërkoi falje publike dhe konflikti u mbyll shpejt. Pas dy ditësh publikuan foto së bashku.
Hakan Çalhanoglu vs Lautaro Martinez (Inter)
Deklaratat e Lautaros pas eliminimit nga Botërori i Klubeve ndezën tensione. Çalhanoglu reagoi publikisht, duke kritikuar stilin e udhëheqjes.
Një mbledhje emergjente e skuadrës i shoi tensionet dhe të dy mbetën pjesë kyçe e Interit.
Luis Perez vs Juanmi Latasa (Valladolid)
Gjatë një sezoni katastrofik, një incident në stol tronditi publikun: Perez tentoi të godiste Latasan pas një zënke.
Klubi i ndëshkoi të dy dhe më pas rrugët e tyre u ndanë.
Lorenzo Lucca vs shokët e ekipit (Udinese)
Një episod sa komik aq edhe simbolik. Lucca refuzoi t’ua dorëzonte penalltinë shokëve, shënoi, por u zëvendësua menjëherë.
Asnjë nga protagonistët nuk është më te Udinese.
Përmbledhja
Në përmbledhje, viti 2025 u shënua nga një numër i jashtëzakonshëm konfliktesh të brendshme në futboll, duke nxjerrë në pah brishtësinë e ekuilibrave brenda klubeve moderne.
Përplasjet mes lojtarëve, trajnerëve dhe drejtuesve shpesh morën përmasa publike dhe dolën mbi interesin sportiv të skuadrave.
Mungesa e komunikimit, menaxhimi i dobët i situatave delikate dhe presioni i vazhdueshëm i rezultateve përshkallëzuan tensionet.
Në shumë raste, këto kriza u mbyllën me transferime të detyruara ose ndarje të hidhura, duke lënë pasoja të dukshme.
Efektet u reflektuan drejtpërdrejt në stabilitetin, imazhin dhe performancën sportive të klubeve.
Këto episode shërbejnë si një paralajmërim i qartë se harmonia, udhëheqja dhe dialogu janë elementë thelbësorë për suksesin afatgjatë në futbollin modern. /Telegrafi/
Liverpool dhe Leeds United nuk arritën të gjenin rrugën e golit në një përballje që përfundoi 0-0, në një ndeshje ku skuadra e Arne Slot dukej e zbehtë dhe pa ide.
Ky rezultat shënon fundin e një serie pozitive për Liverpool, i cili vinte pas tri fitoreve radhazi në kampionat, por nuk arriti të krijonte raste të pastra gjatë 90 minutave.
Ndeshja nisi me ritëm të moderuar, me pak aksione në portat respektive. Leeds tregoi organizim dhe përkushtim në mbrojtje, ndërsa Liverpool duket se nuk kishte ide të qarta taktike për të kaluar mbrojtjen kundërshtare.
Nga ana tjetër, Leeds provonte të shfrytëzonte çdo hapësirë, por e vetmja mundësi e shënimit që u anulua ishte goli i Dominic Calvert-Lewin, i cili u konsiderua pozitë jashtë loje.
Ky barazim i lë Liverpoolin në pozitën e katërtë me 33 pikë, plot 12 pikë pas Arsenalit lider, ndërsa Leeds ka 21 pikë në vendin e 17-të. /Telegrafi/
Mbrojtësi i djathtë i Real Madridit, Trent Alexander-Arnold mund të rikthehet në Ligën Premier më shpejt sesa që ishte menduar, por jo te Liverpooli.
Sipas mediumit të afërt me klubin mbretëror, DefensaCentral, Alexander-Arnold, mund të largohet nga Los Blancos në afatin kalimtar të verës 2026.
Anglezi 27-vjeçar nuk është ambientuar ende plotësisht në klubin e tij të ri, kështu që e ardhmja e tij mbetet e pasigurt.
Manchester City, Manchester United dhe Newcastle United thuhet se mund të ofrojnë deri në 40 milionë euro për të blerë Trentin në verën e vitit 2026.
Nga ana e tij, Alexander-Arnold nuk dëshiron të largohet nga Real Madridi dhe klubi nuk është ende gati të shqyrtojë ofertat në tavolinë.
Të gjithë në ekip besojnë te Alexander-Arnold dhe mendojnë se ai duhet të luajë më shumë ndeshje për t'u përshtatur me klubin e tij të ri.
Mbrojtësi iu bashkua Real Madridit në verën e vitit 2025 si lojtar i lirë. Këtë sezon, ai ka dhënë një asistim në 11 ndeshje në nivel klubesh. /Telegrafi/
Disa, si Karl-Heinz Rummenigge, menduan se ishte çmenduri. "E përgëzoj Stuttgartin që gjeti një idiot që do të paguante kaq shumë para për Woltemade", deklaroi legjenda e Bayern Munich me një sinqeritet të jashtëzakonshëm. Bayern, rastësisht, kishte bërë gjithashtu një ofertë për sulmuesin në afatin e verës. Fjalët e Rummenigges ishin të ashpra në përshkrimin e kalimit të sulmuesit gjerman në Newcastle verën e kaluar. Nënshkrimi i tij sigurisht që nuk la askënd indiferent.
Historia e Nick Woltemade, tani 23 vjeç, duket e pabesueshme. Të thuash se vlera e tij është rritur me 833% në vetëm një vit, sipas të dhënave të Transfermarkt, tingëllon si një përrallë. Megjithatë, është shumë reale.
Më 20 dhjetor 2024, ai luante për VfB Stuttgart, një ekip të cilit i ishte bashkuar si transferim i lirë nga Werder Bremen verën e kaluar, dhe vlerësimi i tij në fund të vitit të kaluar ishte 7.5 milionë euro. Tani, 12 muaj më vonë, ai është bërë transferimi më i shtrenjtë i të gjitha kohërave i Newcastle, me klubin që pagoi 85 milionë euro për shërbimet e tij - një marrëveshje që provokoi një reagim të zemëruar nga Rummenigge.
Vlerësimi i tij në Transfermarkt është rritur në 70 milionë euro, një rritje prej 62.5 milionë eurosh krahasuar me vitin e kaluar, që përkthehet në një shifër marramendëse prej 833%.
Ngritja e gjigantit Woltemade, i cili është gati dy metra i gjatë (198 centimetra për të qenë i saktë), ka qenë spektakolar në muajt e fundit. Ai e përfundoi sezonin e kaluar në Stuttgart me 17 gola në 33 paraqitje në të gjitha garat dhe më pas fitoi Këpucën e Artë në Kampionatin Evropian U-21, ku shënoi gjashtë gola.
Ai ishte tashmë në rrugën e tij për t'u bërë një yll. Por para kësaj, në sezonin 2023/24, gjërat nuk ishin shumë të mira: ai kishte shënuar vetëm dy gola në Bundesligë në 30 ndeshje për Werder Bremen, gjë që, megjithatë, nuk e pengoi Stuttgartin ta nënshkruante zyrtarisht atë në maj 2024. Është e vërtetë që ai mbërriti si transferim i lirë. Ai nënshkroi deri në vitin 2028, por koha e tij në Stuttgart ishte e destinuar të ishte e shkurtër.
"Nick demonstroi cilësitë e tij sezonin e kaluar dhe e vendosi veten në Bundesligë. Ai është një sulmues i fuqishëm, por edhe i aftë, zhvillimin e të cilit e kemi ndjekur nga afër. Jemi të bindur se Woltemade do të vazhdojë zhvillimin e tij pozitiv me ne dhe do të bëhet një lojtar kyç në sulmin tonë", ka thënë drejtori sportiv i VfB, Fabian Wohlgemuth dhe ai e bëri me të vërtetë mirë, pasi kjo është pikërisht ajo që ndodhi.
Sepse pastaj, ju e dini pjesën tjetër: një vit te Stuttgart, 17 gola dhe një transferim rekord te Newcastle. Një lëvizje që shkaktoi një ndryshim sizmik në treg. "Dua të vdes i lumtur për nënshkrimin e Woltemade", u ankua Klaus Filbry, drejtori i Werder Bremen. Fjalët e tij erdhën pasi u zbulua shuma e madhe e paguar për mbërritjen e sulmuesit në Ligën Premier dhe pasi klubi i tij, Werder Bremen, e kishte lënë të lirë sezonin e kaluar.
Pavarësisht humbjes së marrëveshjes, Filbry ishte i lumtur për Woltemade. "Urime Stuttgartit që nënshkroi një lojtar falas dhe e shiti atë një vit më vonë, pas 7 ose 8 muajsh, për 85 ose 90 milionë. Jam i lumtur për Nick. Ai është një djalë i shkëlqyer. Ne, në të njëjtën kohë, marrim një përqindje të tarifës së transferimit si një pagesë solidariteti", vazhdoi ai.
Aventura e sulmuesit gjerman në Ligën Premier po fillonte. Në fund të gushtit, më 30, transferimi i tij te Newcastle u bë zyrtar, duke shënuar fillimin e një kapitulli të ri për Wolterman. "Largimi nga Gjermania është një hap i madh në jetën time, por të gjithë më kanë pritur aq ngrohtësisht saqë tashmë ndihem si pjesë e familjes. Pasi fola me trajnerin, kam ndjesinë se ky është vendi ideal për të arritur potencialin tim të plotë", deklaroi gjermani pas mbërritjes në Angli.
Deri më tani, ai ka shënuar nëntë gola, shtatë në Ligën Premier, një në Ligën e Kampionëve dhe një në Kupën EFL, dhe ka dhënë dy asistime në 23 ndeshje në të gjitha garat me Newcastle.
Woltemade është një sulmues shumë i kompletuar. "Ai është i fortë në shumë aspekte, ka aftësi të shkëlqyera teknike dhe ka provuar të jetë një kërcënim i vërtetë në një nga ligat më të mira të Evropës, por ai është gjithashtu ende në një moshë ku ka shumë hapësirë për t'u zhvilluar dhe për t'u rritur këtu", tha Eddie Howe, trajneri i tij te Newcastle United, kur mbërriti sulmuesi gjerman.
Përveç një gjuajtjeje të fuqishme, ai ka aftësinë për të bërë vrapime pa top dhe vizionin për t'u kombinuar me shokët e ekipit . Është pikërisht kjo lehtësi e lidhjes me të tjerët që Howe, tani që e njeh më mirë, thekson: "Shumë herë ai është personi që bën pasimin për anësorët që ta marrin topin, kështu që përfshirja e tij pothuajse gjithmonë varet nga aftësia e tij për të arritur atë krosim”.
Rudi Voller, drejtor sportiv i Federatës Gjermane të Futbollit, ndan të njëjtin mendim. Edhe ai është një admirues i Nick dhe kënaqet duke e parë të luajë për ekipin kombëtar. "Është kënaqësi ta shohësh të luajë. Ai jo vetëm që shënon gola, por di edhe si të lidhet me shokët e ekipit, gjë që e bën edhe më të vlefshëm", tha ai verën e kaluar, kur Nick ishte golashënuesi më i mirë në Kampionatin Evropian U-21.
Duke parë performancën e tij në Ligën Premier, Voller shkon edhe më tej. "Tani askush nuk flet për 85 milionë eurot që paguan për transferimin e tij te Newcastle. Në fund, ishte praktikisht një marrëveshje e mirë [qesh]. Cilësia e tij është vërtet e jashtëzakonshme", tha Voller për Kicker disa ditë më parë.
Jeta e tij në Angli... me mikun e tij më të mirë
Përveç performancës së tij në fushë, Woltemade njihet si një lojtar i qetë në jetën e tij personale. Të paktën, kjo është ajo që thonë ata që e njohin. "Jashtë fushës, ai është shumë i mirë. Nuk duket i shqetësuar. Ka mbërritur në një vend tjetër dhe nuk ka shkaktuar ndonjë trazirë", komentoi Howe.
Bëri bujë të madhe në Angli fakti që Woltemade solli shokun e tij më të mirë për të jetuar me të. "Nuk e di pse të gjithë flasin për këtë. Mendoj se është normale kur mbërrin në një vend të ri", tha sulmuesi në një konferencë për shtyp kur u pyet për këtë. "Jam këtu vetëm, kështu që e pyeta shokun tim më të mirë: 'A do të vish me mua në Newcastle?'", shpjegoi lojtari me qetësi.
Meqenëse Nick rrallë jep diçka për të folur në jetën e tij personale, shtypi dëshiron ta dijë dhe madje e ka pyetur nëse ka takuar ndonjë vajzë në Angli deri më tani. "Jo, kam shumë ndeshje, kështu që nuk kam takuar askënd", u përgjigj sulmuesi me një buzëqeshje. Ajo që Woltemade ka gjetur me siguri te Newcastle është suksesi në fushë. Kjo është arsyeja pse vlera e tij është 833% më e lartë se vitin e kaluar. E pabesueshme. /Telegrafi/
Login
