Manchester United po vazhdon kërkimet për përforcime në repartin ofensiv dhe një nga emrat që ka dalë në plan të parë është anësori i RB Leipzig, Yan Diomande (19).

Talenti i ri shihet si një alternativë interesante dhe një projekt afatgjatë për skuadrën e drejtuar nga Rúben Amorim.

Sipas burimeve të Give Me Sport, Diomande është futur në krye të listës së dëshirave të “Djajve të Kuq”, të cilët po analizojnë mundësitë për ta forcuar sulmin në afatin e ardhshëm të transferimeve.

Megjithatë, një marrëveshje e mundshme nuk pritet të jetë e lehtë, pasi RB Leipzig ka vendosur një çmim të lartë për lojtarin, rreth 87 milionë funte (100 milionë euro).

Një investim për të ardhmen

Diomande përfaqëson profilin e një lojtari të ri me potencial të madh zhvillimi. Në moshë shumë të re, ai ofron fleksibilitet dhe perspektivë afatgjatë, duke i dhënë stafit teknik mundësinë që ta integrojë gradualisht në ekip, pa presionin për ta bërë menjëherë titullar të padiskutueshëm.

Megjithatë, paraqitjet e tij tregojnë se Diomande nuk është vetëm një projekt për të ardhmen. Ai ka qenë në formë të shkëlqyer këtë sezon në Bundesligë me RB Leipzig, ku ka realizuar 7 gola dhe ka dhënë dy asistime në 11 paraqitje.

Shpejtësia, driblimi dhe aftësia për të krijuar raste e bëjnë atë një profil shumë tërheqës për futbollin anglez.

Një transferim i mundshëm te Manchester United do t’i jepte Diomandes hapësirë për t’u zhvilluar në ligën Premier, duke mësuar gradualisht dhe duke u përshtatur me intensitetin e kampionatit, pa barrën e pritshmërive të menjëhershme. /Telegrafi/

‘Teatri i Ëndrrave’ po përgatitet për një nga transferimet më ambicioze të dekadës së fundit nën drejtimin e Ruben Amorim. Manchester United i ka vënë syrin sulmuesit anësor të Juventusit, Kenan Yildiz, i cili dëshiron një transferim në Ligën Premier.

Drejtuesit e klubit britanik e kuptojnë se rindërtimi i linjës sulmuese kërkon talent të jashtëzakonshëm për të sjellë freski dhe aftësinë për të krijuar menjëherë mundësi shënimi. Prandaj, United është i përgatitur të shpenzojë shumën astronomike prej 100 milionë eurosh për të siguruar shërbimet e sulmuesit turk.

Klubi anglez synon të përshpejtojë negociatat për të parandaluar gjigantë të tjerë evropianë që të konkurrojnë për nënshkrimin e sulmuesit të talentuar anësor. Ruben Amorim është në kërkim të një lojtari që mund të plotësojë figura si Matheus Cunha dhe Bryan Mbeumo, duke optimizuar rezultatin e golave të ekipit.

20-vjeçari ka mahnitur vëzhguesit e klubit nga Old Trafford falë pjekurisë së tij taktike dhe performancave të shkëlqyera në Serie A. Aktualisht, Kenan Yildiz është bartësi i flamurit të rinovimit të Juventusit, ku ka shifra të lakmueshme me gjashtë gola dhe gjashtë asistime këtë sezon.

Sulmuesi turk ka një kontratë afatgjatë me Juventusin deri në vitin 2029, duke i dhënë klubit italian një avantazh të konsiderueshëm. Megjithatë, oferta treshifrore nga United mund të jetë e mjaftueshme për të bindur bordin e Torinos të ndahet nga lojtarin e tyre.

United e sheh këtë futbollist të ri si zgjidhjen përfundimtare për krahun e majtë të sulmit të tyre, një zonë që ka qenë e paqëndrueshme në muajt e fundit. Shkathtësia e yllit turk i përshtatet në mënyrë të përkryer sistemit dinamik që stafi i trajnerëve portugezë po përpiqet të zbatojë në këtë fazë të re. /Telegrafi/

I vendosur për të ndërtuar një skuadër të përshtatur plotësisht me filozofinë dhe idetë e tij taktike, trajneri portugez Ruben Amorim ka vendosur të nxjerrë në treg pesë lojtarë të Manchester United që nuk bëjnë pjesë në planet e tij afatgjata.

Pas 16 javësh kampionat, Man Utd renditet vetëm në vendin e gjashtë në Ligën Premier, një pozicion larg pritshmërive dhe ambicieve të klubit.

“Djajtë e Kuq” ndodhen plot 10 pikë pas Arsenalit kryesues, çka ka shtyrë stafin teknik të ndërmarrë masa konkrete për ristrukturimin e skuadrës.

Sipas raportimeve të Caught Offside, Amorim i ka kërkuar drejtuesve të klubit që të dëgjojnë oferta për këta pesë futbollistë:

Altay Bayindir (27 vjeç), portier – Turqi

Tyrell Malacia (26), mbrojtës i majtë – Holandë

Manuel Ugarte (24), mesfushor mbrojtës – Uruguai

Mason Mount (26), mesfushor ofensiv – Angli

Joshua Zirkzee (24), sulmues – Holandë

Bëhet fjalë për lojtarë që nuk janë kërkuar drejtpërdrejt nga Amorim dhe që, sipas vlerësimeve të stafit teknik, po hasin vështirësi për t’u përshtatur me skemat taktike dhe intensitetin e kërkuar nga trajneri portugez. /Telegrafi/

Trajneri i Manchester United, Ruben Amorim, ka komentuar mbi kritikën e ardhur nga ish-lojtarë të klubit, duke e konsideruar atë të natyrshme.

“E konsideroj këtë krejtësisht normale. Fakti është se, si trajner kryesor i Manchester United, e pranoj që nuk kemi qenë mjaftueshëm të suksesshëm. Duhet të kishim grumbulluar më shumë pikë, veçanërisht këtë sezon. I konsideroj kritika të tilla si të natyrshme”, ka thënë Amorim.

Ai shtoi se ish-lojtarët ndonjëherë nuk kanë informacionin e plotë dhe duket se presin që United të arrijë gjithmonë standardet e larta që ata vetë kanë vendosur, duke fituar vazhdimisht.

“Është e kuptueshme që për ta është e vështirë të shohin klubin në këtë situatë”.

Amorim theksoi se problemi kryesor nuk qëndron te rezultatet e tjera, por tek performanca e tij si trajner.

“Problemi real qëndron tek performanca ime si trajner; nuk po përballoj situatën sa duhet dhe jam i gatshëm ta pranoj këtë. Në thelb, pakënaqësia e tyre ka të bëjë vetëm me mungesën e fitoreve dhe pozicionin aktual në ligë. Kur ekipi fiton, nuk ka probleme”, përfundoi Amorim.

Pas 15 ndeshjesh, Manchester United renditet në vendin e tetë në Ligën Premier me 25 pikë. /Telegrafi/

Mandati i Ruben Amorim si trajner i Manchester United është karakterizuar nga këmbëngulja e tij për të përdorur një sistem me tre mbrojtës, gjë që ka zemëruar legjendën e klubit, Paul Scholes.

Amorim respektohet për suksesin e tij me formacionin 3-4-3 te Sporting, por Scholes e ka kritikuar ashpër portugezin për refuzimin e tij për të luajtur në një stil më të përshtatur me “mënyrën e Man United”.

Sistemi i Amorim përdor tre qendërmbrojtës dhe mbrojtës anësorë që avancojnë lart, i cili përbën një largim nga mbrojtja tradicionale me katër që është e rrënjosur në historinë e klubit.

Dhe Scholes ka qenë veçanërisht i zëshëm në pakënaqësinë e tij, duke argumentuar se qasja taktike nuk përshtatet me filozofinë e “rrezikut dhe argëtimit” për të cilën klubi është i famshëm.

“Nuk mendoj se trajneri e kupton klubin, pikë. Thjesht nuk mendoj se ai është njeriu i duhur. Man United ka të bëjë me rrezik dhe argëtim, më shumë se çdo gjë tjetër."

"T’i kesh tifozët në këmbë, të gatshëm të shpërthejnë. Anësorë që driblojnë kundërshtarët. Goditje në portë. Momente cilësie. Nuk ka asgjë aty”.

“Kjo vjen nga klubi. Flasim për faktin se ky është një klub ndryshe – ata kanë Omar Berrada, Jason Wilcox, të cilët ndoshta janë të shkëlqyer në punën e tyre, të shkëlqyer në atë që bëjnë. Por ata nuk janë Man United”.

“Ata s’kanë asnjë ide se çfarë do të thotë të blesh një lojtar të Manchester United, të sjellësh një trajner të Manchester United. Nëse shkon te Sporting Lisbon dhe i shikon, ata luajnë me tre nga prapa”.

“Qysh aty, kjo është një ‘jo’. Man United nuk e bën kurrë këtë. Nuk mund ta bëjnë. Thjesht nuk munden, është vërtetuar ndër vite e vite e vite”, ka deklaruar Scholes./Telegrafi/

Legjendat e Manchester United, Paul Scholes dhe Nicky Butt, kanë shprehur zemërimin e tyre ndaj trajtimit që trajneri Ruben Amorim i ka bërë mesfushorit të ri Kobbie Mainoo, duke e quajtur “një tallje absolute”. Të dy kanë parashikuar gjithashtu se 20-vjeçari mund të transferohet te rivali i Ligës Premier, Chelsea.

Mainoo nuk ka asnjë start në Ligën Premier këtë sezon dhe ka mbetur i papërdorur në disa ndeshje të fundit, pavarësisht deklaratës së Amorim se ai është “titullar”.

Scholes u shpreh në podcastin The Good, The Bad & The Football:

“Kobbie është një djalë 20-vjeçar dhe nuk po luan, ai do të duhet të largohet… Bast që i merr për dore Casemiro çdo ditë në stërvitje”.

Ndërsa Butt shtoi:

“Ai do të jetë një tjetër lojtar i talentuar i akademisë që largohet dhe bëhet yll diku tjetër… Nëse do të isha në vendin e tij, do t’i thoja: ‘Ne po të nxjerrim jashtë’”.

Të dy legjendat shohin projektin rinor të Chelseat, që tani përfshin edhe ish-lojtarin e United, Alejandro Garnacho, si një destinacion ideal për Mainoo.

Scholes këshilloi mesfushorin: “Shko pa menduar dy herë”.

Paralelisht, Napoli po shqyrton një mundësi huazimi për Mainoo në janar, për shkak të mungesave në mesfushë për shkak të dëmtimeve.

Derisa Kobbie Mainoo ka regjistruar gjithsej 83 paraqitje për United dhe ka kontribuar me 10 gola, legjendat e Old Trafford shprehin shqetësimin se skuadra mund të humbasë një tjetër talent të madh, pas rasteve të Scott McTominay dhe Anthony Elanga. /Telegrafi/

Trajneri i Manchester United, Ruben Amorim, ka vlerësuar lart mënyrën se si Luke Shaw është adaptuar në rolin mes mbrojtësit të majtë dhe qendrorit në skemën e tij 3-4-2-1, duke theksuar se menaxhimi i kujdesshëm i ngarkesës fizike ka qenë kyç për të shmangur problemet me dëmtimet.

“Duhej të tregonim kujdes me minutat e tij. Ai është përshtatur shumë mirë me këtë pozicion”, ka thënë fillimisht Amorim.

Amorim theksoi se Shaw është lojtar shumë inteligjent dhe i klasit botëror, megjithëse i duhet më shumë vazhdimësi, dhe ekipi e menaxhon mirë rikuperimin e tij.

“Me topin, nganjëherë luan si mbrojtës i majtë. Është shumë inteligjent. Për mua, ai është lojtar i klasit botëror. Natyrisht, i duhet më shumë vazhdimësi. Po luajmë vetëm një ndeshje në javë dhe kjo ndihmon shumë. Nëse do t’i duhej tre ditë për t’u rikuperuar, gjë që nuk është rasti, ne do ta menaxhonim”.

Shaw, 30 vjeç, ka regjistruar 13 paraqitje në Ligën Premier këtë sezon, duke u rikthyer në formë pas një viti 2024-25 të vështirë ku luajti vetëm shtatë ndeshje për shkak të dëmtimeve.

Mbrojtësi i kombëtares angleze, me 34 paraqitje dhe tre gola, ka kontratë me United deri në vitin 2027. /Telegrafi/

Fanella e famshme me numrin shtatë te Manchester United duket se më në fund po i vjen fundi “mallkimit”.

Që kur Cristiano Ronaldo u largua për te Real Madrid në vitin 2009, i vetmi lojtar që ia doli me numrin 7 gjatë periudhës së tij të dytë te "Old Trafford" ishte vetë ai.

Tani, Mason Mount po tregon shenja se mund t’i japë fund asaj serie negative, shkruan The Sun.

Mallkimi i numrit të famshëm

Midis periudhave të Ronaldos, fanella e bërë ikonike nga George Best, Bryan Robson, Eric Cantona dhe David Beckham u mbajt nga Michael Owen, Antonio Valencia, Angel Di María, Memphis Depay, Alexis Sanchez dhe Edinson Cavani.

Asnjëri prej tyre nuk arriti të lërë gjurmë të thella: Owen pati probleme me lëndimet, Valencia kërkonte të kthehej te numri 25, Di María qëndroi vetëm një vit, Depay 18 muaj, Sánchez dështoi, ndërsa Cavani, pavarësisht 17 golave në një sezon, shpesh nuk ishte i disponueshëm.

Rrugëtimi i vështirë i Mount

Mason Mount, i nënshkruar në vitin 2023 për 68 milionë euro, pati dy sezone të vështira për shkak të lëndimeve dhe formës jo të qëndrueshme.

Nën drejtimin e Erik ten Hag, ai humbi shumë ndeshje, përkatësisht 31 në sezonin e parë dhe 30 në sezonin e dytë. Fitorja kundër Crystal Palace ishte ndeshja e parë që ai luajti nga fillimi deri në fund që nga nëntori i vitit 2023. Ai shënoi golin e fitores.

Rilindja nën Ruben Amorim

Me ardhjen e Ruben Amorim te Man United, situata ndryshoi ndjeshëm. Mount ka humbur vetëm një ndeshje këtë sezon dhe po tregon ndikim të madh në lojë, duke shënuar gola vendimtarë dhe duke qenë një krijues kyç i rasteve.

Amorim e ka pranuar publikisht se e “dashuron” lojtarin, dhe arsyet janë të qarta: në vetëm gjashtë ndeshje si titullar në Ligën Premier këtë sezon, ai ka dhënë tetë pasime kyçe, ndërsa kontributi i tij pa top është po aq i rëndësishëm.

E ardhmja e fanellës së numrit 7

Me rindërtimin e mundshëm të mesfushës vitin e ardhshëm, Mount është vendosur si një nga tre sulmuesit kryesorë të Man United.

Ai do të përballet me provat e fuqisë së tij në ndeshjet kundër West Ham dhe Wolves. Nëse vazhdon formën e tij, është vetëm çështje kohe para se tribunat e Old Trafford të këndojnë emrin e tij dhe të thyejnë “mallkimin” e numrit 7. /Telegrafi/

Manchester United janë gati të lejojnë largimin e tre lojtarëve në janar, kur të rihapet afati kalimtar i transferimeve.

Seria prej pesë ndeshjesh pa humbje e “Djajve të Kuq” mori fund të hënën, pasi skuadra e Ruben Amorim u mposht 1-0 nga Everton në Old Trafford.

Kjo humbje i lë ata në vendin e dhjetë në renditje, me 18 pikë pas 12 ndeshjeve.

United vazhdon kampionatin të dielën, me një transfertë në Selhurst Park kundër Crystal Palace.

Skuadra do të përballet me një dhjetor të ngjeshur, me gjashtë ndeshje në kampionat, përfshirë sfida të mëdha kundër Aston Villas dhe Neëcastle United, para se të hapet afati i janarit.

Amorim pritet të kërkojë përforcime në treg, duke pasur parasysh disa dëmtime brenda skuadrës – përfshirë Benjamin Sesko, si dhe largimet për Kupën e Kombeve të Afrikës, me Bryan Mbeumo (Kamerun), Amad Diallo (Bregu i Fildishtë) dhe Noussair Mazraoui (Marok) që do të mungojnë.

Ayden Heaven

Edhe largimet janë pjesë e planit.

Sipas The Daily Mail, Diego Leon, Sekou Kone dhe Ayden Heaven mund të dërgohen në huazim për të marrë më shumë minuta loje.

Leon, i cili nënshkroi verën e kaluar, dhe Kone ende nuk kanë luajtur asnjë ndeshje me ekipin e parë.

Mbrojtësi i majtë paraguajan, është anashkaluar këtë sezon, me Luke Shaw dhe Patrick Dorgu që kanë prioritet para tij, ndërsa mesfushori mbrojtës malian ka luajtur me ekipin U-21.

Sa i përket Heaven, ai ka regjistruar tre paraqitje këtë sezon, pasi debutoi për Manchester United sezonin e kaluar./Telegrafi/

Ruben Amorim ka konfirmuar se sulmuesi i Manchester United, Benjamin Sesko, do të mungojë për disa javë pasi u lëndua në ndeshjen ndaj Tottenhamit para pauzës së kombëtareve.

Trajneri portugez tha në konferencë se lojtari do të mungojë për disa javë, ndërsa klubi anglez duhet të jetë më i kujdesshëm.

“Do të qëndrojë disa javë jashtë. Nuk e di saktë sa, por nuk është shumë serioze. Duhet të jemi të kujdesshëm me të”.

“Po ndihet më mirë, kështu që presim që pas disa javësh të kthehet”.

Ai theksoi gjithashtu se rikthimi i sulmuesit pritet të përkojë me momentin kur Amad dhe Bryan Mbeumo do t’i bashkohen kampit të Kupës së Kombeve të Afrikës.

Benjamin Sesko

“Nuk dua të flas me siguri të plotë, por kur ata të nisen për grumbullim, pres që Ben të jetë kthyer.”

Nga afatet e përmendura, kuptohet se Sesko mund të mungojë rreth një muaj, duke e lënë Unitedin të varfër me opsione të pastra në qendër të sulmit përkohësisht.

Ndërkohë, gjiganti anglez po konsideron të hyjë në garë në afatin e verës për t’u përforcuar në repartin ofansiv./Telegrafi/

Ruben Amorim ka reflektuar mbi evolucionin e tij si trajner, duke thënë se ndjehet më i fortë pas një viti sfidues në krye të Manchester United.

Në një prononcim për Stan Sport, trajneri portugez u shpreh se përvoja e ka forcuar dhe e ka përgatitur si për të tashmen, ashtu edhe për sfidat e së ardhmes.

“Kam mësuar shumë gjatë vitit të kaluar. Jam një trajner më i mirë tani dhe jam gati për të ardhmen, por edhe për të tashmen. Ishte një rrugëtim i vështirë, por i domosdoshëm”, ka thënë Amorim.

Pas një sezoni 2024/25 tejet të vështirë, ku United e mbylli në vendin e 15-të me 18 humbje në Ligën Premier, skuadra duket se ka rikthyer formën në javët e fundit.

Me tre fitore dhe dy barazime në pesë ndeshjet e fundit të kampionatit, Man Utd aktualisht renditet në vendin e 7-të, një pozicion mbi Liverpoolin, duke sinjalizuar një rikthim të mundshëm në garë.

Amorim thekson se ky progres është rezultat i mësimeve dhe përvojave që e kanë transformuar si trajner, ndërsa thekson se ekipi i tij është i gatshëm për sfidat që i presin. /Telegrafi/

Dimitar Berbatov ka kritikuar ashpër mënyrën se si trajneri Ruben Amorim e trajtoi mesfushorin e Manchester United, Kobbie Mainoo , duke e përshkruar situatën aktuale të 20-vjeçarit si "vërtet mizore".

Mainoo, i cili dikur konsiderohej i paprekshëm në Old Trafford dhe që pritej të dominonte mesfushën për vite me radhë, ka rënë në hierarki të skuadrës nën drejtimin e Amorim, duke mos arritur të startojë asnjë ndeshje të vetme në Ligën Premier këtë sezon.

Preferenca e Amorimit për një dyshe në mesfushë mes Casemiro dhe Bruno Fernandes, e ka lënë Mainoon jashtë fushe, një kontrast i fortë me trajektoren e tij të mëparshme, e cila e pa atë të fitonte një vend në ekipin kombëtar të Anglisë.

Mundësitë e kufizuara të mesfushorit të ri e kanë bërë atë të bjerë jashtë garës për ndeshjet ndërkombëtare, duke rritur shqetësimet në lidhje me zhvillimin e tij.

Komentet e Berbatov vijnë në një kohë kur perspektivat e Mainoo te United duken gjithnjë e më të pasigurta.

Pavarësisht interesit nga Napoli për një transferim në formë huazimi gjatë verës, Amorim e bllokoi transferimin, megjithatë rrallë e ka shfrytëzuar lojtarin dhe për këtë Berbatov shprehu keqardhje.

"Është një situatë shumë e vështirë, veçanërisht për një lojtar të ri. Dhe kjo të tregon se si futbolli mund të jetë një lojë vërtet mizore në disa raste, sepse Kobbie Mainoo luante, ai arriti në ekipin kombëtar të Anglisë, ai po ngjitej lart, lart e lart. Papritmas ai nuk po përfshihet më”, ka thënë fillimisht Berbatov për Daily Mail.

Berbatov vuri në dyshim nëse Mainoo duhet të mbetet i duruar te United apo të kërkojë futboll të rregullt diku tjetër për të rifituar besimin e tij.

"Tani pyetja është, a do të qëndrojë ai pozitiv, i duruar dhe të presë përsëri momentin e tij?. Apo duhet të transferohet në një vend tjetër për të luajtur rregullisht, për të rifituar vetëbesimin dhe për t'u rikthyer te United dhe për të filluar të luajë më rregullisht?".

"Do të doja ta shihja të luante sepse talenti është aty për t'u parë, ajo vendimmarrje, ajo qetësi dhe arrogancë që të nevojitet me topin në këmbë është aty, edhe në moshën e tij".

"Më pëlqen kjo. Por për momentin, trajneri nuk sheh diçka që mund ta përdorë që nga minuta e parë e ndeshjes”, përfundoi ish-ylli i Unitedit. /Telegrafi/

Manchester United ka konfirmuar se trajneri Ruben Amorim është në mënyrë befasuese i afërm me një nga lojtarët e tij, pasi faqja portugeze e gjenealogjisë Geneall ka zbuluar se të dy ndajnë të njëjtin stër-stërgjysh.

Sipas The Sun, i afërmi i largët i trajnerit të “Djajve të Kuq” është mbrojtësi Diogo Dalot, i cili është titullar i rregullt te United që prej se Amorim mori drejtimin e skuadrës.

Të dy janë stër-stërnipër të Carlos Dallot, i lindur në Francë, i cili udhëtoi nëpër Europë si artist cirku bashkë me vëllezërit e tij, Jose dhe Julia, përpara se të vendosej përgjithmonë në Portugali.

Dalot kishte konfirmuar më herët se familja e tij ka origjinë franceze dhe se paraardhësit e tij, ish-artistët e cirkut, janë vendosur në qytetin e tij të lindjes, Braga.

Ruben Amorim/ Diogo Dalot

Tashmë, 26-vjeçari mund ta quajë trajnerin e tij pjesë të familjes edhe jashtë marrëdhënies profesionale.

Dalot ka qenë titullar në 39 nga 54 ndeshjet që Amorim ka drejtuar Manchester United-in, përfshirë barazimin 2-2 ndaj Nottingham Forest të shtunën.

Megjithatë, mbrojtësi portugez ishte lojtari i parë që u zëvendësua pasi Forest kaloi në epërsi 2-1 në fillim të pjesës së dytë.

Manchester United ka shënuar përmirësim të dukshëm nën drejtimin e Amorim pas një fillimi të vështirë sezoni, ndërsa Dalot ka qenë një element i qëndrueshëm dhe i besueshëm në sistemin që trajneri portugez po ndërton në “Old Trafford”./Telegrafi/

Manchester United vazhdon ta shohë mesfushorin e Atletico Madridit Conor Gallagher si një përforcim të mundshëm për mesfushën në prag të merkatos së janarit, sipas gazetarit Ekrem Konur.

Anglezi i cili iu bashkua Atletico Madridit nga Chelsea verën e kaluar për rreth 35 milionë funte, nuk ka arritur të sigurojë një vend të qëndrueshëm në formacionin e Diego Simeones dhe thuhet se mund të jetë i hapur për një rikthim në Ligën Premier.

Raporti shton se Manchester United po ndjek nga afër zhvillimet dhe preferon një huazim në vend të një transferimi të përhershëm.

Conor Gallagher

Nga ana tjetër, Atletico Madrid ende nuk ka marrë një vendim përfundimtar, por pritet që diskutimet për një largim të mundshëm me huazim të intensifikohen në javët e ardhshme.

Gallagher vazhdon të ketë një rol të rëndësishëm te “Los Rijoblancos”, por nuk do ta refuzonte rikthimin në kampionatin anglez, që do t’i jepte mundësi më të madhe edhe për të zënë vend në formacionin titullar të Thomas Tuchel te Anglia./Telegrafi/

Trajneri i Manchester United, Ruben Amorim, nuk është i shqetësuar nëse do të përfundojë mbi Liverpoolin, pavarësisht rivalitetit të vazhdueshëm midis klubeve.

Pas nëntë ndeshjesh në kampionat, United ka grumbulluar 16 pikë, ndërsa Liverpooli ka 15 pikë, duke i lënë të dyja ekipet të vendosura për të përmirësuar renditjen e tyre.

Megjithatë, trajneri portugez i Djajve të Kuq nuk është i interesuar për luftën ndaj Reds, por për të fituar titullin kampion në Ligën Premier.

“Nuk më intereson nëse Manchester United përfundon përpara Liverpoolit”, ka thënë fillimisht Amorim.

“Dua vetëm të fitoj çdo ndeshje dhe të përfundoj në krye të Ligës Premier. Dua të jem në një pozicion për t'u bërë kampion i Ligës Preimier!", përfundoi portugezi.

Ndryshe, në kuadër të xhiros së 10-të, United luan sot (e shtunë) në udhëtim te Nottingham Forest, teksa Reds po ashtu sot e presin Aston Villan. /Telegrafi/

Pavarësisht se kërkoi tre lojtarë kur u emërua te Manchester United, Ruben Amorim nuk ka nënshkruar asnjë prej tyre 12 muaj më vonë.

Pas një sezoni të dobët, duke përfunduar i 15-ti në Ligën Premier dhe duke humbur finalen e Ligës së Evropës ndaj Tottenhamit, ai mori mbështetje në afatin kalimtar veror.

Sulmi i Amorimit u përforcua me ardhjet e Bryan Mbeumo dhe Matheus Cunha, të dëshmuar në Ligën Premier, ndërsa Benjamin Sesko erdhi nga Leipzig.

Portieri Senne Lammens gjithashtu rezultoi një nënshkrim i rëndësishëm në ditën e fundit, duke u bashkuar nga Royal Antwerp për 18.2 milionë euro.

United tani ka fituar tre ndeshje radhazi për herë të parë që nga shkurti 2024, dhe për herë të parë nën drejtimin e Amorimit.

Edhe pse nënshkrimet verore të United kanë bërë një fillim premtues në Old Trafford, asnjë prej tyre nuk ishte në listën fillestare të dëshirave të Amorimit.

Ruben Amorim/ Inacio, Goncalves, Edwards

Para se të emërohej, TEAMtalk raportoi se ai donte të sillte tre lojtarë nga Sporting Lisbona me vete te Unitedi.

Njëri prej tyre ishte mbrojtësi qendror Goncalo Inacio. Pavarësisht një klauzole lirimi prej 51 milionë eurosh dhe interesit të raporteve nga Liverpool dhe Barcelona, asnjë klub nuk arriti ta transferojë atë.

Marcus Edwards ishte një tjetër lojtar që Amorim thuhet se dëshironte të sillte te United. 26-vjeçari u transferua në Angli si huazim në janar, duke ndihmuar Burnley të siguronte promovimin nga Championship.

Promovimi i Burnley aktivizoi një klauzolë blerjeje prej 8.5 milionë eurosh, por ai ka bërë vetëm një paraqitje në Ligën Premier.

Pedro Goncalves, një tjetër lojtar i krahut, gjithashtu ishte lidhur me Manchester United.

27-vjeçari, i cili më parë luajti për Wolves, ka qenë prezent në të gjitha ndeshjet e kampionatit këtë sezon, duke kontribuar me gjashtë gola dhe katër asistime në nëntë ndeshje./Telegrafi/

Një lojtar i Manchester United, raportohet se po shtyn për një largim në afatin e janarit, por Ruben Amorim do të preferonte ta mbante atë për të shmangur një dilemë të mundshme.

Megjithëse ka përjetuar një fillim të vështirë të sezonit 2025/2026, gjërat kanë filluar të përmirësohen për skuadrën e Amorimit, me “Djajtë e Kuq” që aktualisht ndodhen në një ecuri prej tre fitoresh radhazi, pasi kanë mposhtur Sunderlandin, Liverpoolin dhe Brightonin javët e fundit.

Një numër lojtarësh u larguan nga United gjatë verës, qoftë në formë huazimi apo transferimi të përhershëm, me Rasmus Hojlund, Marcus Rashford, Jadon Sancho dhe Antony që të gjithë u larguan nga “Old Trafford”.

Si zakonisht, pritet të ketë lëvizje në skuadrën e United gjatë afatit kalimtar të janarit, me Mirror që raporton se sulmuesi Joshua Zirkzee dëshiron të largohet nga klubi në formë huazimi gjatë afatit dimëror, pasi ka luajtur vetëm katër herë këtë sezon.

Thuhet se ai do të preferonte të qëndronte në Ligën Premier, por nuk do ta përjashtonte mundësinë për t’u larguar jashtë vendit, pasi dëshiron të luajë rregullisht me shpresën për të siguruar një vend në skuadrën e Holandës për Kupën e Botës së verës së ardhshme.

Ruben Amorim/ Joshua Zirkzee

Megjithatë, sipas një raporti të The Sun, Zirkzee mund të pengohet të largohet.

Arsyeja për këtë lidhet me Kupën e Kombeve të Afrikës (AFCON), e cila është planifikuar të zhvillohet midis 21 dhjetorit dhe 18 janarit.

Amad, Noussair Mazraoui dhe Mbeumo ka shumë gjasa të thirren për përfaqësueset e Bregut të Fildishtë, Marokut dhe Kamerunit, që do të thotë se Amorim mund të mbetet me mungesa në repartin ofensiv për rreth katër javë, në varësi të ecurisë së këtyre kombëtareve në kompeticion.

Më herët këtë javë, gazeta italiane La Gazzetta dello Sport raportoi se gjigantët e Serie A, Roma, ishin të interesuar ta sillnin Zirkze-n në Itali, por çdo marrëveshje e mundshme varet nga Amorim./Telegrafi/

Trajneri i Liverpoolit, Arne Slot, kritikoi trajnerin e tij të Manchester United, Ruben Amorim, për qasjen dhe stilin e tij të lojës gjatë derbit të luajtur në 'Anfield' javën e kaluar.

Trajneri holandez kritikoi qasjen e Amorimit, duke theksuar se skuadra e tij u mbrojt thellë, kërcënoi në kundërsulm dhe dërgoi vazhdimisht topa të gjatë përpara.

"Është gjithmonë e vështirë të luash kundër një skuadre që mbrohet në një bllok të ulët dhe luan kryesisht me topa të gjatë”.

“Është edhe më e vështirë kur humbet një gol pas një minute, ndërsa një nga lojtarët tanë është në fushë".

"Nëse do të më kishit thënë para ndeshjes se kundër një blloku të tillë, kundër kaq shumë topave të gjatë, do të krijonim aq shumë raste sa kishim krijuar, nuk do të prisja që të humbisni, por humbëm”.

Ruben Amorim

“Patëm mjaftueshëm raste për të shënuar më shumë se një gol, por nga ana tjetër pësuam dy përsëri, dhe njëri prej tyre ishte nga një goditje dënimi”.

Menjëherë pas kësaj deklarate Amorim u përgjigj shpejt. Portugezi deklaroi se kishte hapur një faqe të re.

"Liverpooli është në të kaluarën, nuk dua të komentoj. Nuk është e rëndësishme”, ka thënë ai shkurtimisht kur u pyet për komentin e kolegut të tij./Telegrafi/

Trajneri i Manchester United, Ruben Amorim, ka theksuar se për të, kualifikimi në Evropë apo një vend në top gjashtë të Ligës Premier nuk mund të quhet sezon i suksesshëm për klubin.

“Ne duam të kthehemi në Evropë, është e rëndësishme, por nuk e dimë çfarë do të ndodhë”.

“Por unë nuk e quaj sukses vetëm daljen në Evropë me këtë klub. Suksesi i Manchester United është të fitojë Ligën Premier. Duhet të jemi të ndershëm me tifozët tanë: aktualisht nuk jemi në atë nivel dhe duhet ta pranojmë këtë”.

Ruben Amorim

“Unë nuk do ta quaj sukses nëse përfundojmë në vendin e gjashtë apo të tetë. Kjo nuk është sukses. Duhet të ecim me hapa. Por suksesi i vërtetë i këtij klubi është të fitojë Ligën Premier, asgjë më pak”, shtoi ai për “Sky Sports”.

Aktualisht, Manchester United nuk ndodhet as në pjesën e sipërme të tabelës së kampionatit anglez, por kjo mund të ndryshojë nëse arrijnë një fitore ndaj Liverpoolit në “Anfield” të dielën pasdite.

Kujtojmë, përballja mes dy rivalëve të urryer do të fillojë pas orës 17:30./Telegrafi/

Trajneri i Manchester United, Ruben Amorim, ka konfirmuar se Bruno Fernandes do të vazhdojë të jetë gjuajtësi kryesor i penalltive të skuadrës, pavarësisht dy gabimeve të fundit të portugezit nga pika e bardhë.

Në sezonin aktual të Ligës Premier, kapiteni i “Djajve të Kuq” ka humbur dy penallti, në barazimin 1–1 kundër Fulham dhe në humbjen 1–3 ndaj Brentford.

“Ai është gjuajtësi kryesor i penalltive. Ai shënon shumë gola. Nëse është e nevojshme, do ta ndryshojmë, por jam absolutisht i sigurt se Bruno do ta zgjidhë këtë”, deklaroi Amorim.

Trajneri portugez shtoi se Fernandes ka një histori të gjatë suksesi në ekzekutimin e penalltive dhe se dy gabimet e fundit nuk do të ndikojnë në besimin e tij.

“E di që nuk është e lehtë për të, por ai ka ekzekutuar rreth 70 penallti në karrierë dhe ka humbur vetëm rreth 8. Dy prej tyre ndodhën nën drejtimin tim. Sigurisht që nuk më pëlqen, por ai është shumë i sigurt në vetvete", tha Amorim.

Në fund, tekniku theksoi se Fernandes po vazhdon të punojë me përkushtim në stërvitje.

“Ai i praktikon penalltitë çdo ditë, duke e ditur që të gjithë e vëzhgojnë mënyrën se si i gjuan. Ai do të jetë gati për ta shënuar tjetrën", përfundoi trajneri portugez. /Telegrafi/