TIRANË, 11 shkurt /ATSH/ Kryetarja e Gjykatës Kushtetuese, Fiona Papajorgji, priti sot në një takim Ambasadorin e Mbretërisë së Bashkuar në Shqipëri, Nicholas Abbott, i shoqëruar nga John Walker, Sekretar i Dytë për Çështjet Politike, të Brendshme dhe të Drejtësisë.

Gjatë takimit, Ambasadori Abbott theksoi rëndësinë e angazhimit të Gjykatës Kushtetuese në forcimin e shtetit të së drejtës dhe shprehu mbështetjen e plotë për nisma që garantojnë pavarësinë institucionale. Kryetarja Papajorgji vlerësoi dialogun e hapur me partnerët ndërkombëtarë si një instrument kyç për konsolidimin e drejtësisë kushtetuese dhe theksoi rolin e Gjykatës në mbrojtjen e të drejtave themelore dhe në garantimin e shtetit të së drejtës.

Po ashtu, u diskutuan mundësitë për forcimin e bashkëpunimit profesional, shkëmbimin e përvojave dhe mbështetjen ndaj iniciativave që synojnë rritjen e standardeve institucionale dhe transparencës.

/e.xh/a.f/

The post Papajorgji pret ambasadorin Abbott, diskutohet për forcimin e shtetit të së drejtës appeared first on Agjencia Telegrafike Shqiptare.

LOS ANGELES, 11 shkurt, ATSH/ James Van Der Beek, aktori i dashur i serialit kult Dawson’s Creek, është ndarë nga jeta në moshën 48-vjeçare.

Lajmi i trishtë u konfirmua nga familja e tij, e cila bëri të ditur se aktori dhe babai i gjashtë fëmijëve kishte qenë duke luftuar në heshtje me kancerin kolorektal në fazën e tretë që prej gushtit 2023.

Van Der Beek, i njohur për rolin e Dawson Leery-t — një prej figurave më të dashura të televizionit amerikan të viteve ’90 — kishte zgjedhur ta mbante diagnozën larg syrit të publikut, duke vazhduar jetën familjare dhe angazhimet profesionale pa bërë zhurmë.

Në nëntor të vitit 2024, ai u detyrua ta bëjë publike betejën e tij, pasi mësoi se një tabloidi po përgatitej të publikonte lajmin pa pëlqimin e tij. Në një intervistë për revistën People, aktori tha se e ndjeu të domosdoshme të tregonte vetë historinë e tij, “për të mbajtur kontrollin e narrativës” dhe për t’i shërbyer transparencës ndaj fansave që e shoqëruan gjatë gjithë karrierës.

Karriera e Van Der Beek shtrihej edhe përtej  fenomenit Dawson’s Creek. Ai ishte aktiv në film, televizion dhe në projekte sociale, duke u shndërruar me kalimin e viteve në një figurë të dashur, me një humor të butë, prani të qetë dhe përkushtim të jashtëzakonshëm ndaj familjes.

Aktori la pas bashkëshorten Kimberly dhe gjashtë fëmijët e tyre, të cilët shpesh shfaqeshin në rrjetet sociale si qendra e jetës së tij.

The post Ndahet nga jeta James Van Der Bee, ylli i “Dawson’s Creek” appeared first on Agjencia Telegrafike Shqiptare.

TIRANË, 11 shkurt /ATSH/ Kryetari i grupit parlamentar të Partisë Socialiste dhe drejtuesi politik i PS për Diasporën, Taulant Balla ka mirëpritur në Kuvendin e Shqipërisë Leonard Caushin, një anëtar aktiv të diasporës shqiptare në Miçigan të Shteteve të Bashkuara të Amerikës.

“Bashkë me nënkryetarin e Grupit, Erion Malaj, mirëprita në Kuvendin e Shqipërisë Leonard Caushin, anëtar shumë aktiv i diasporës shqiptare në Miçigan, ShBA. Shumë krenar për suksesin dhe arritjet e tij si sipërmarrës në fushën e logjistikës”, u shpreh Balla.

Këto takime tregojnë se vlerësimi i mazhorancës ndaj diasporës vazhdon dhe përtej fushatave zgjedhore si një falënderim për rolin që sipërmarrësit shqiptarë në ShBA kanë në promovimin e imazhit dhe potencialit ekonomik të Shqipërisë në arenën ndërkombëtare.

/r.e/a.f/

The post Balla pret në Kuvend sipërmarrësin shqiptar nga Miçigani Leonard Caushi appeared first on Agjencia Telegrafike Shqiptare.

PRISHTINË, 11 shkurt /ATSh/ Presidentja e Kosovës, Vjosa Osmani ka mandatuar sot Albin Kurtin për formimin e qeverisë së re.

Dekreti për mandatim i është dorëzuar Kurtit nga e para e shtetit.

“Sot, në përputhje me Kushtetutën e Kosovës, kam caktuar Kryeministrin Albin Kurti, mandatar për formimin e Qeverisë së Republikës së Kosovës. I uroj suksese në udhëheqjen e Qeverisë së re dhe punë në shërbim të qytetarëve të Republikës së Kosovës”, shkruan ajo.

Sot, Kuvendi i Kosovës zgjodhi Albulena Haxhiun për kryetare të Kuvendit të Kosovës.

/KosovaPress/

The post Osmani mandaton Kurtin për kryeministër appeared first on Agjencia Telegrafike Shqiptare.

UASHINGTON, 11 shkurt /ATSH/ – Negociatat me Iranin të vazhdojnë për të parë nëse mund të arrihet apo jo një marrëveshje, deklaroi sot presidenti amerikan, Donald Trump në llogarinë e tij në Truth Social.

”Sapo kam mbaruar takimin me kryeministrin Netanyahu të Izraelit dhe disa përfaqësues të tij. Ishte një takim shumë i mirë, marrëdhënia e shkëlqyer midis dy vendeve tona vazhdon”, fillon postimi i presidentit Trump.

”Nuk u arrit asgjë përfundimtare përveçse këmbëngula që negociatat me Iranin të vazhdojnë për të parë nëse mund të arrihet apo jo një marrëveshje”, shtoi ai.

”Herën e fundit, Irani vendosi se ishte më mirë të mos arrinte një marrëveshje dhe u godit me ‘Midnight Hammer’, por kjo nuk funksionoi mirë për ta”, theksoi ai.

”Shpresojmë që këtë herë të jenë më të arsyeshëm dhe të përgjegjshëm. Përveç kësaj, diskutuam për progresin e jashtëzakonshëm që po bëhet në Gaza dhe në rajon në përgjithësi. Vërtet ka PAQE në Lindjen e Mesme. Faleminderit për vëmendjen tuaj ndaj kësaj çështjeje!”, përfundon postimi i Trump në Truth Social.

Presidenti i SHBA-së Donald Trump priti sot për bisedime në Shtëpinë e Bardhë, kryeministrin izraelit Benjamin Netanyahu, sipas dpa.

Netanyahu tha se do t’i paraqesë presidentit Trump perspektivën izraelite mbi bisedimet me Republikën Islamike.

Gazeta izraelite “Yedioth Ahronoth” raportoi se Netanyahu synon të ndajë informacionin aktual të shërbimeve sekrete me Trump në lidhje me programin e raketave iraniane si dhe në lidhje me masakrën që regjimi ka kryer ndaj qytetarëve të vet./ a.jor.

The post SHBA – Trump: Netanyahu të vazhdojë diskutimet me Iranin appeared first on Agjencia Telegrafike Shqiptare.

PRISHTINË, 11 shkurt /ATSh/ Kryetarja e sapozgjedhur e Kuvendit të Kosovës, Albulena Haxhiu, ka përçuar mesazhe të unitetit dhe kompromisit në adresimin e parë pas marrjes së kësaj detyre.

Ajo në foltoren e Kuvendit tha se detyrën e kryeparlamentares do ta ushtrojë me paanshmëri dhe integritet.

“E marr këtë detyrë me vetëdijen e plotë për peshën kushtetuese që ajo bart dhe respekt të thellë për vullnetin e qytetarëve që na kanë sjellë këtu. Këtë besim do ta nderoj me punë të përditshme, transparencë por edhe me përkushtim të plotë. Të qenit në krye të Kuvendit do të thotë t’i shërbesh Republikës, rendit demokratik dhe besimit publik. Kuvendi është shtëpia politike e qytetarëve… Detyra ime do të jetë që Kuvendi të funksionojë me dinjitet, transparencë dhe respekt të ndërsjellë, në përputhje të plotë me Kushtetutën. Do të sigurohem që secili prej jush të gjejë hapësirën e vet këtu me të njëjtin dinjitet dhe respekt. E di që kemi ardhur këtu me histori dhe qëndrime të ndryshme politike, por sot në këtë sallë ne kemi një detyrë të përbashkët që t’u shërbejmë qytetarëve me ndershmëri dhe vizion. Pavarësisht se dallimet tona janë reale, përgjegjësitë i kemi të përbashkëta… Ju ftoj që debatet t’i zhvillojmë me argumente dhe dallimet t’i mbajmë brenda respektit të ndërsjellë”, tha ajo.

Haxhiu përmendi edhe procesin në Hagë ndaj ish-krerëve të UÇK-së, ku tha se pret që ata të kthehen sa më parë në vend.

“Sakrificën e popullit për liri, përfshirë luftën çlirimtare të UÇK-së dhe kontributin e madh të grave dhe burrave që dhanë gjithçka për vendin. Sot pasdite, gjatë tërë ditës kishim seancën gjyqësore ndaj ish-krerëve të UÇK-së. Historia e popullit shqiptar është e qartë dhe e drejtë. Lufta e UÇK-së ka qenë e drejtë për çlirim. Dihet kush ka qenë agresori dhe dihet kush ka bërë krime në vendin tonë. Ato janë të regjistruara dhe dëshmuara nga bota mbarë. Ato krime janë kryer nga Serbia, e cila kurrë nuk u përball me drejtësinë. Ne presim që ish-krerët e UÇK-së të kthehen sa më parë në vend dhe tek familjet e tyre. Këto orvatje të Prokurorisë të marrin fund sa më parë”, përfundoi Haxhiu.

/KosovaPress//r.e/

The post Haxhiu premton paanshmëri: Kuvendi të funksionojë me dinjitet appeared first on Agjencia Telegrafike Shqiptare.

TIRANË, 11 shkurt /ATSH/ Ministri i Drejtësisë, Besfort Lamallari theksoi sot se qeveria nuk do ta lejojë zvarritjen e çështjeve gjyqësore dhe se mazhoranca socialiste do të ndërhyjë në ligjet e Reformës në Drejtësi për të adresuar problemet e identifikuara në sistem.

Në një intervistë për A2 CNN, Lamallari shpjegoi se ndërhyrjet do të përqendrohen te procedimet penale, vakancat në gjyqësor, mekanizmat disiplinorë për gjyqtarët dhe prokurorët, si dhe garantimi i të drejtave ligjore për qytetarët. Ai nënvizoi se përmirësimi i sistemit gjyqësor lidhet drejtpërdrejt me synimin e Shqipërisë për mbylljen e negociatave me Bashkimin Evropian.

“Të mos lëmë pa adresuar me objektivitet çështje si zvarritja e çështjeve gjyqësore, procedimet penale, garancitë ligjore që duhet të ekzistojnë për qytetarët shqiptarë, mekanizmi disiplinor i gjyqtarëve dhe prokurorëve, të cilët zvarrisin pafundësisht publikimin e vendimeve të dhëna. Çështje të tjera të ndjeshme si vakancat. Nuk ka kuptim që ne të mos adresojmë çështje që vijnë nga ankesat e qytetarëve, në lidhje me drejtësinë që ata marrin”, tha ministri.

Lamallari shtoi se grupi parlamentar socialist do të gjejë zgjidhjet ligjore të duhura për ndryshimet e planifikuara dhe Ministria e Drejtësisë do të vijojë të mbajë rolin e saj kushtetues.

Lamallari gjithashtu bëri apel për ish-pronarët që kanë dokumente të paplota për kompensimin financiar, duke njoftuar se ATP do të organizojë ditë të dedikuara për asistencë dhe plotësimin e dosjeve.

/a.f/r.e/

The post Lamallari: Nuk do ta lejojmë zvarritjen e çështjeve gjyqësore, përmirësojmë Reformën në Drejtësi appeared first on Agjencia Telegrafike Shqiptare.

TIRANË, 11 shkurt /ATSh/ Këshilli i Ministrave ka miratuar sot një shtesë në vendimin nr. 586, datë 30 gusht 2019, për punësimin e përkohshëm të studentëve të ekselencës në institucionet e administratës shtetërore.

Sipas vendimit të ri, “përjashtimisht për vitin 2026, për studentët e ekselencës të punësuar me kontratë të përkohshme 1-vjeçare në institucionet e administratës shtetërore, sipas procedurave të thirrjes së publikuar në dhjetor 2024, afati i kontratës së tyre të shtyhet deri në përfundim të procedurave të punësimit, sipas legjislacionit specifik, që rregullon marrëdhënien e punës në këto institucione”.

Departamenti i Administratës Publike dhe institucionet e administratës shtetërore janë ngarkuar për zbatimin e këtij vendimi, i cili hyn në fuqi pas botimit në “Fletoren Zyrtare”.

/a.f/r.e/

The post Qeveria shtyn kontratat e punës për studentët e ekselencës në administratë appeared first on Agjencia Telegrafike Shqiptare.

ROMË, 11 shkurt /ATSH-ANSA/ – Kabineti i kryeministres, Giorgia Meloni miratoi sot një paketë të re masash që synojnë luftën kundër imigracionit të paligjshëm.

Paketa përfshin kompetenca të reja që do t’u mundësojnë autoriteteve të vendosin një bllokadë detare në situata të caktuara.

Paketa do t’u mundësojë autoriteteve të ndalojnë kalimin në ujërat territoriale italiane për deri në 30 ditë, dhe të zgjatet deri në një maksimum prej gjashtë muajsh, në rastet e kërcënimeve serioze për rendin publik ose sigurinë kombëtare, si në rrezikun konkret të akteve terroriste ose infiltrimit terrorist.

Gjithashtu do të jetë e mundur të vendoset bllokada në rastin e “presionit të jashtëzakonshëm migrator që mund të rrezikojë menaxhimin e sigurt të kufijve”.

Në raste të tilla, migrantët e kapur mund të “transportohen në vende të treta përveç vendit të tyre të origjinës, me të cilin Italia ka lidhur marrëveshje specifike”.

Kabineti miratoi gjithashtu një projektligj për të zbatuar Paktin e ri të BE-së për Migracionin dhe Azilin, i cili hyn në fuqi në qershor.

Paketa vjen pasi Parlamenti Evropian miratoi të martën një listë të re të vendeve të sigurta për t’u kthyer migrantët, edhe kur ata nuk vijnë prej tyre, si dhe qendra përpunimi në det të hapur si ajo e Romës në Shqipëri, një model i mundshëm për vendet e tjera, i cili megjithatë deri më tani është penguar kryesisht nga vendimet gjyqësore për të drejtat e njeriut.

“Qendrat në Shqipëri do të funksionojnë”, ka deklaruar vazhdimisht kryeministrja italiane, duke e përshëndetur atë si një faktor pengues pionier për migracionin nga Afrika./ a.jor.

The post ITALI – Qeveria miraton paketën e re ligjore kundër imigracionit të paligjshëm appeared first on Agjencia Telegrafike Shqiptare.

PRISHTINË, 11 shkurt /ATSh/ Organizata OVL-UÇK, sot para se të fillonte seanca e konstitutimit të Kuvendit të Kosovës, para kuvendit shpërndau emblema për deputetët të cilët u betuan sot me shkrimin “mos qoftë atdheu i ngrohtë si diell, s’ka pse i duhet sakrifica jonë”, ku në to ka emblema për krerët e UÇK-së.

Ata të cilët u ndalën ishin Enver Hoxhaj i PDK e Ramush Haradinaj kryetari i AAK-së.

Ndërsa, ministri në detyrë i punëve të brendshme, Xhelal Sveçla edhe pse iu kërkua të ndalej nuk u ndal.

/KosovaPress/

The post OLV UÇK me aksion para Kuvendit, shpërndan emblema me fytyrat e krerëve të UÇK-së appeared first on Agjencia Telegrafike Shqiptare.

TIRANË, 11 shkurt /ATSh/ Këshilli i Ministrave miratoi sot kriteret dhe procedurat për dhënien e statusit “Qendër Ekselence” për institutet dhe njësitë e veçanta të kërkimit shkencor.

Vendimi është marrë në mbështetje të nenit 100 të Kushtetutës dhe të ligjit nr. 109/2024 “Për shkencën dhe kërkimin shkencor në Republikën e Shqipërisë”, me propozim të ministrit të Arsimit.

Sipas vendimit, statusi “Qendër Ekselence” do t’u jepet institucioneve që kanë rezultate të spikatura në nivel kombëtar ose ndërkombëtar, si dhe atyre që zhvillojnë kërkim shkencor në fusha prioritare.

Statusi jepet me afat të përkohshëm ose të përhershëm. Për rezultate të spikatura në nivel kombëtar, ai akordohet për një periudhë 5-vjeçare, me të drejtë rinovimi. Ndërsa për rezultate të spikatura në nivel ndërkombëtar, në kuadër të projekteve me kohëzgjatje jo më pak se tre vjet, statusi jepet me afat të përhershëm.

Institucionet që aplikojnë duhet të jenë të regjistruara në Regjistrin Kombëtar përkatës dhe të plotësojnë një sërë kriteresh shkencore, bibliometrike, infrastrukturore, administrative dhe të ndikimit në shoqëri. Mes tyre përfshihen publikimi i të paktën tre artikujve shkencorë në vit në revista të indeksuara, angazhimi në projekte kërkimore kombëtare dhe ndërkombëtare, marrëveshje bashkëpunimi me partnerë vendas ose të huaj, si dhe posedimi i të paktën një patente ose marrëveshjeje me industrinë për produkte apo procese inovative.

Vendimi parashikon gjithashtu kritere në burime njerëzore dhe infrastrukturë kërkimore, përfshirë ekzistencën e një drejtuesi kërkimor-shkencor, mekanizma për barazi gjinore dhe mbështetje të kërkuesve të rinj, si dhe infrastrukturë moderne dhe akses të hapur në laboratorë dhe biblioteka.

Aplikimi për statusin “Qendër Ekselence” do të bëhet përmes portalit “e-Albania”, i shoqëruar me dokumentacionin përkatës, raportin e auditit financiar dhe planin strategjik të zhvillimit. Për vlerësimin e kërkesave do të ngrihet një komision i posaçëm me pesë anëtarë, përfshirë përfaqësues të ministrisë përgjegjëse dhe ekspertë të pavarur.

Subjektet që marrin refuzim kanë të drejtë ankimi brenda 30 ditëve, në përputhje me Kodin e Procedurave Administrative.

Vendimi hyn në fuqi pas botimit në “Fletoren Zyrtare”.

/a.f/r.e/

The post Miratohen kriteret për dhënien e statusit “Qendër Ekselence” appeared first on Agjencia Telegrafike Shqiptare.

BRUKSEL, 11 shkurt /ATSH-DPA/ – Shtetet e Bashkuara të Amerikës nuk do të jenë të përfaqësuara në nivelin më të lartë për herë të dytë radhazi në një takim ministror të NATO-s këtë javë.

Sekretari i përgjithshëm i NATO-s, Mark Rutte, konfirmoi sot në një konferencë për shtyp në Bruksel se në vend të sekretarit të Mbrojtjes, Pete Hegseth, në takimin e ministrave të mbrojtjes të NATO-s nesër do të marrë pjesë zëvendëssekretari Elbridge Colby.

Në dhjetor, sekretari amerikan i Shtetit, Marco Rubio gjithashtu kishte anuluar pjesëmarrjen në një takim planifikuar të NATO-s në Bruksel.

Mungesa e sekretarëve amerikanë në takime zyrtare të NATO-s konsiderohet jashtëzakonisht e rrallë.

Ish-zëdhënësja e e NATO-s, Oana Lungescu (2010–2023), shkroi se kjo mund të jetë hera e parë në historinë e aleancës që dy takime ministrash radhazi zhvillohen pa një sekretar amerikan, duke dërguar një sinjal negativ në një kohë të tensionuar për marrëdhëniet transatlantike.

Rutte tha se vendimi i Hegseth duhet të pranohet, duke theksuar se kontaktet e tij me zyrtarët e lartë të Shtëpisë së Bardhë, Pentagonit dhe Departamentit të Shtetit vazhdojnë të jenë intensive.

Ai shtoi se Colby është një figurë shumë e rëndësishme me përgjegjësi për udhëzimet politike, dhe se NATO-ja mbetet e rëndësishme, por SHBA-ja gjithashtu duhet të përqendrohet në rajonin e Paqësorit./  /Ad.Ab./ a.jor.

The post SHBA – Sekretari i Mbrojtjes, Hegseth anulon pjesëmarrjen në një takim të NATO-s appeared first on Agjencia Telegrafike Shqiptare.

TIRANË, 11 shkurt /ATSH/ Shqipëria është më shumë se male dhe peizazhe, ajo është një vend me pasuri të jashtëzakonshme pyjore.

Ministri i Mjedisit, Sofjan Jaupaj ndau sot statistikat mbi shpërndarjen e pyjeve në rajonet e vendit, duke theksuar rëndësinë e menaxhimit të qëndrueshëm të këtyre burimeve natyrore.

Sipas të dhënave zyrtare, pjesa veriore e Shqipërisë rezulton më e pasur me fond pyjor, me 41% të sipërfaqes së pyjeve të vendit. Rajoni juglindor ka 30%, rajoni qendror 17%, ndërsa rajoni jugperëndimor përbën pjesën e mbetur, 12%.

Këto shifra tregojnë diversitetin dhe rëndësinë e pasurisë natyrore të Shqipërisë në hartën e gjelbër të vendit.

Ministri Jaupaj theksoi se statistikat e pyjeve nuk reflektojnë vetëm pasurinë natyrore, por edhe përgjegjësinë për menaxhim me kujdes dhe vizion afatgjatë.

“Punë e përditshme e Ministrisë së Mjedisit është monitorimi i pyjeve dhe kullotave, për të garantuar që këto burime të menaxhohen në mënyrë të qëndrueshme dhe të kontribuojnë në zhvillimin e mjedisit dhe ekonomisë vendase”, u shpreh Jaupaj.

/e.xh/r.e/a.f/

The post 41% e pyjeve të Shqipërisë ndodhen në veri, Jaupaj: Pasuri natyrore me menaxhim të qëndrueshëm appeared first on Agjencia Telegrafike Shqiptare.

PRISHTINË, 11 shkurt /ATSh/ Albulena Haxhiu është kryetarja e Kuvendit të Kosovës.

Haxhiu mori 66 vota të deputetëve nga LVV-ja dhe komunitetet jo serbe në seancën e sotme konstituive.

Kundër Haxhiut votuan deputetët e PDK-së, LDK-së, Listës Serbe, ndërkaq abstenuan deputetët e AAK-së.

Pas zgjedhjes së kryetares radha i vjen zgjedhjes së pesë nënkryetarëve të Kuvendit për t’u konsideruar i konstituuar Kuvendi.

/KosovaPress//r.e/

The post Albulena Haxhiu zgjidhet kryetare e Kuvendit appeared first on Agjencia Telegrafike Shqiptare.

PARIS, 11 shkurt /ATSH-AFP/ – Marie-Rose Tessier, e konsideruar si gruaja më e moshuar e Frances, që ndryshe njihet edhe me epitetin ”dekania”, vdiq dje në qytetin Vendée, në moshën 115-vjeçare.

Lajmi u konfirmua sot nga mbesa e saj duke pohuar njoftimet e medias lokale.

Ajo vdiq në Les Sables-d’Olonne, ku jetonte prej rreth 15 vitesh, në një institucion për të moshuar.

E lindur më 21 maj 1910 në Beaurepaire, Vendee, Tessier u konsiderua si më e moshuara e njohur në Francë pas vdekjes në vitin 2023, në moshën 118-vjeçare, të motrës Andre, e cila mbante titullin e dekanes së njerëzimit.

Në një intervistë për “France 3 Pays de la Loire” në vitin 2023, ajo shprehej me humor se “nuk ka asgjë të veçantë të jesh e moshuar. Ajo që më dhemb më shumë është se nuk shoh. Nuk mund të lexosh, të thurësh. Nuk mund të bësh asgjë kur nuk sheh”!.

E ardhur nga një familje fermerësh, ajo ishte thellësisht e lidhur me vendlindjen e saj, siç theksoi bashkia e Beaurepaire në një deklaratë.

Jeta e saj përfshiu më shumë se një shekull histori, duke përjetuar Luftën e Parë dhe të Dytë Botërore.

Tragjedia më e madhe ndodhi më 18 prill 1944, kur në moshën 33-vjeçare humbi bashkëshortin e saj, Auguste Charles Tessier, i vrarë gjatë bombardimeve në Tergnier, në departamentin Aisne.

Çifti kishte dy vajza.

Sipas specialistit të superqindvjeçarëve Laurent Toussaint, e moshuara më e njohur e Francës pritet të jetë tani Madeleine Della Monica, e lindur në vitin 1912.

Aktualisht, sipas Grupit Amerikan të Kërkimeve në Gerontologji (GRG) dhe bazës së të dhënave ”LongeviQuest”, personi më i moshuar në botë është britanikja Ethel Caterham, 116 vjeçe./   /Ad.Ab./ a.jor.

The post FOKUS – Vdes në moshën 115-vjeçare dekania franceze, Marie-Rose Tessier appeared first on Agjencia Telegrafike Shqiptare.

TIRANË, 11 shkurt /ATSH/  Mbrëmë u zhvillua në Shkodër dita e parë e karnavaleve, duke kthyer sheshin qendror të qytetit në një atmosferë plot ngjyra, drita dhe energji festive. Qytetarë të të gjitha moshave u mblodhën për të ndjekur shfaqjet e para, ku muzika, maskat dhe performancat e ndryshme krijuan një mbrëmje magjike për publikun.

Kryeministri Edi Rama ndau në rrjetet sociale momente nga parada festive e karnavaleve,  duke ftuar qytetarët t’i bashkohen këtij aktiviteti dhe të shijojnë performancat artistike.

“”Eja në Shkodër – deri më 15 shkurt”. Muzikë, maska, ngjyra dhe atmosferë festive, plot energji”, shkroi Rama.

Karnavalet e Shkodrës rikthejnë traditën e festave me ngjyra dhe muzikë, duke krijuar një ambient tërheqës për familjet, të rinjtë dhe vizitorët, dhe shërbejnë si një mundësi për promovimin e qytetit si destinacion turistik dhe kulturor.

Gjatë mbrëmjes, sheshi u mbush me dritëra, dekorime të veçanta dhe performanca artistike që përfshinin valle, muzikë live dhe maska të ndryshme, duke e kthyer qytetin në një skenë magjike për të gjithë pjesëmarrësit.

Festa vazhdon deri më 15 shkurt, duke ofruar aktivitete të ndryshme kulturore dhe artistike, duke u bërë një pikë referimi për karnavalet në Shqipëri.

Në Shkodër, tradita e karnavaleve vjen e dokumentuar prej 1860-ës, duke u kthyer në një nga elementët më të qëndrueshme të jetës kulturore dhe urbane të qytetit. Shkodranët kanë ruajtur ndër breza mjeshtërinë e punimit artizanal dhe shpirtin krijues të komunitetit.

/e.xh/a.f/r.e/

The post Drita, ngjyra dhe muzikë – Shkodra hap festën e karnavaleve appeared first on Agjencia Telegrafike Shqiptare.

TIRANË, 11 shkurt /ATSH/ Sistemi bankar shqiptar vijon të paraqitet i qëndrueshëm dhe me standarde të konsoliduara në administrimin e riskut, në një periudhë ku ekonomia po shfaq sinjale zhvillimi dhe rritje të kërkesës në treg.

Ekspertja e ekonomisë, Romina Radonshiqi vlerëson se si bizneset, ashtu edhe familjet shqiptare kanë hyrë në një fazë më të kujdesshme dhe më të strukturuar të menaxhimit financiar.

Sipas saj, institucionet bankare kanë forcuar mekanizmat e kontrollit dhe analizës së riskut, duke ruajtur stabilitetin e sistemit, ndërsa bizneset po tregojnë maturi më të madhe në administrimin e të ardhurave dhe orientimin e investimeve.

Radonshiqi thekson se edhe individët kanë reflektuar nga përvojat e viteve të kaluara, duke treguar sot më shumë kujdes në marrjen e angazhimeve financiare. “Ka një ndërgjegjësim më të madh për mënyrën se si menaxhohen të ardhurat dhe detyrimet. Stabiliteti financiar sot është më i dukshëm si te bizneset, ashtu edhe te familjet”, u shpreh ajo.

Ekspertja evidenton se bizneset reagojnë të parat ndaj zhvillimeve ekonomike dhe ndryshimeve në treg. Megjithatë, ajo nënvizon se rritja e sektorit të turizmit ka dhënë ndikim të drejtpërdrejtë në ekonominë vendase, veçanërisht në tregun e pasurive të paluajtshme.

Sipas saj, zgjerimi i aktivitetit turistik dhe rritja e kërkesës kanë sjellë shtim të kredive hipotekore, të cilat po përdoren jo vetëm për strehim, por edhe si instrument financiar për investime dhe zhvillim biznesi.

“Nuk bëhet fjalë vetëm për blerje banesash për qëllime familjare, por edhe për investime që lidhen me aktivitetin ekonomik, sidomos në zona me potencial turistik”, theksoi Radonshiqi, duke shtuar se kjo prirje pasqyron një treg më dinamik dhe një qasje më të strukturuar ndaj financimit.

Referuar statistikave, në fund të vitit 2025 totali i kredisë së dhënë nga bankat u rrit në 9,4 miliardë euro, nga 8,3 miliardë euro që ishte në fund të vitit 2024. Ndërsa raporti i kredive me probleme shënoi rënie në nivelin më të ulët historik 3,8% në fund të vitit të kaluar, duke zbritur me 0,37% me bazë vjetore, sipas të dhënave të BSh-së.

/e.xh/a.f/r.e/

The post Radonshiqi: Rritja e kreditimit pasqyron një ekonomi më dinamike, turizmi ka ndikimin kryesor appeared first on Agjencia Telegrafike Shqiptare.

BRUKSEL, 11 shkurt /ATSH-DPA/ – Superliga Evropiane është tashmë pjesë e historisë, pasi UEFA dhe “Real Madridi” arritën një marrëveshje për t’i dhënë fund një mosmarrëveshjeje gati pesëvjeçare.

“Reali” dhe presidenti i tyre Florentino Perez ishin ndër arkitektët kryesorë të projektit të shkëputjes, i cili përfshinte edhe “Gjashtëshen e Madhe” të Premier Ligës, kur u prezantua në prill 2021.

Kontingjenti anglez u tërhoq brenda disa ditësh mes presionit të tifozëve dhe qeverisë, por “Reali” dukej se ishte ende i lidhur me projektin dhe ishte i përfshirë në veprime ligjore kundër organit drejtues të futbollit evropian, UEFA-s, për shkak të përpjekjeve të tij për të bllokuar formimin e garës, duke kërkuar miliarda euro kompensim.

“Barcelona” njoftoi tërheqjen në fundjavë dhe tani “Reali” ka njoftuar se ka rënë dakord për një marrëveshje paqeje.

Një deklaratë nga “Real Madridi” thoshte se “pas muajsh diskutimesh të mbajtura në dobi të futbollit evropian, UEFA, Klubet Evropiane të Futbollit dhe ‘Real Madridi’ njoftojnë se kanë arritur një marrëveshje në parim për të mirën e futbollit evropian të klubeve, duke respektuar parimin e meritës sportive dhe duke theksuar qëndrueshmërinë afatgjatë të klubeve dhe duke përmirësuar përvojën e tifozëve përmes përdorimit të teknologjisë”.

“Kjo marrëveshje në parim do të shërbejë gjithashtu për të zgjidhur mosmarrëveshjet e tyre ligjore në lidhje me Superligën Evropiane, sapo të zbatohet një marrëveshje përfundimtare”, shtonte deklarata./ /Ad.Ab./ a.jor.

The post FOKUS – Superliga e Evropës hyn në arkivat e historisë appeared first on Agjencia Telegrafike Shqiptare.

BERLIN, 11 shkurt  /ATSH-DPA/ – Ministri i Jashtëm i Gjermanisë, Johann Wadephul, ka riafirmuar angazhimin e Berlinit për një zgjidhje të negociuar mes Shteteve të Bashkuara dhe Iranit lidhur me programin bërthamor të Teheranit.

Wadephul  deklaroi sot se, përveç programit bërthamor, në tryezën e bisedimeve duhet të trajtohet edhe programi iranian i zhvillimit të raketave balistike.

Wadephul i bëri këto komente në Berlin, në kuadër të një takimi me homologë nga vendet e Azisë Qendrore, Turkmenistani, Taxhikistani, Kirgistani, Uzbekistani dhe Kazakistani.

Sipas tij, programi raketor i Iranit përbën kërcënim jo vetëm për Izraelin, por edhe për Evropën.

“Është gjithashtu në interesin tonë që këto çështje të adresohen dhe të zgjidhen përmes negociatave”, theksoi Wadephul.

Presidenti amerikan Donald Trump pritet të takohet sot më  vonë në Uashington me kryeministrin izraelit Benjamin Netanyahu, në një takim që zhvillohet në sfondin e negociatave mes SHBA-së dhe Iranit.

Izraeli e konsideron programi bërthamor d të Iranit si kërcënimin më të madh ekzistencial, ndërsa Netanyahu ka kërkuar nga Uashingtoni të mbajë një qëndrim të ashpër në bisedimet në vijim me Teheranin./  /Ad.Ab./ a.jor.

The post BERLIN – Gjermania mbështet dialogun SHBA-Iran për programin bërthamor appeared first on Agjencia Telegrafike Shqiptare.

TIRANË, 11 shkurt /ATSH/ Shqipëria prezantoi në UNESCO përvojën e saj në menaxhimin e akuiferëve ndërkufitarë, gjatë Simpoziumit Ndërkombëtar “Akuiferët ndërkombëtarë – e ardhme e qëndrueshme”, të zhvilluar më 10-11 shkurt 2026 në Paris.

Ekspertë të Ministrisë së Mjedisit paraqitën në këtë simpozium modelin e bashkëpunimit me Malin e Zi për akuiferin Buna-Bojana si një shembull të koordinimit institucional dhe mbrojtjes së qëndrueshme të burimeve ujore.

Aktiviteti mblodhi përfaqësues ekspertë të fushës së menaxhimit të burimeve ujore, të cilët diskutuan mbi praktikat më të mira për administrimin e qëndrueshëm të ujërave nëntokësore dhe nevojën për bashkëpunim ndërkufitar.

Në këtë forum ndërkombëtar, Shqipëria prezantoi përvojën e saj në menaxhimin e akuiferit ndërkufitar Buna-Bojana me Malin e Zi, duke e cilësuar atë si një shembull konkret të bashkëpunimit të suksesshëm ndërmjet dy vendeve. Ndërsa u theksua rëndësia e integrimit të të dhënave mjedisore, monitorimit të përbashkët dhe koordinimit institucional për garantimin e përdorimit të qëndrueshëm të rezervave ujore.

Pjesëmarrja në këtë aktivitet konsiderohet një hap i rëndësishëm në drejtim të rritjes së rolit të Shqipërisë në nismat rajonale për menaxhimin e ujërave ndërkufitare dhe në përputhje me angazhimet ndërkombëtare për mbrojtjen e mjedisit.

/e.xh/a.f/r.e/

The post Shqipëria prezanton në UNESCO bashkëpunimin ndërkufitar për menaxhimin e akuiferëve appeared first on Agjencia Telegrafike Shqiptare.