Edin Dzeko u bë lojtar i ri i Schalke 04 në mes të javës së kaluar, ndërsa gazeta gjermane Bild ka zbuluar detajet e kontratës dhe të ardhurave të tij.

Ish-sulmuesi i Fiorentinës mbërriti në Gelsenkirchen si lojtar i lirë dhe nënshkroi kontratë deri në fund të sezonit aktual, pra për rreth pesë muaj.

Sipas Bild, Dzeko do të përfitojë pak më pak se 300 mijë euro si pagë bazë për këtë periudhë. Në kontratë është përfshirë edhe një bonus prej 400 mijë eurosh, të cilin sulmuesi boshnjak do ta përfitojë nëse Schalke siguron ngjitjen në Bundesliga.

Pavarësisht afrimit të një emri me përvojë të madhe, lojtari më i paguar i ekipit pritet të mbetet kapiteni Kenan Karaman, paga vjetore e të cilit vlerësohet në rreth 800 mijë euro.

Klubet kroate paguajnë më shumë

Këto shifra kanë befasuar tifozët e Dzekos, sidomos në Bosnje dhe Hercegovinë. Nëse paga e tij do të ishte për një sezon të plotë, ajo do të arrinte në rreth 600 mijë euro, një shumë që aktualisht e fitojnë disa lojtarë te Dinamo Zagreb dhe Hajduk Split, madje edhe më shumë.

Te Dinamo, lojtarët kryesorë përfitojnë deri në një milion euro në vit, ndërsa te Hajduk, Marko Livaja ka kontratën më të lartë, rreth 850 mijë euro në vit. Për krahasim, te Fenerbahçe, Dzeko përfitonte rreth 5 milionë euro në sezon.

Ardhja e Dzekos te Schalke 04 po konsiderohet si një përforcim kyç në luftën për rikthim në elitën e futbollit gjerman.

Pritet që ai të ketë ndikim jo vetëm në fushë, por edhe në dhomat e zhveshjes në fazën vendimtare të sezonit. Dzeko ka debutuar tashmë për Schalken në derbin ndaj Kaiserslautern, që përfundoi 2-2, ku ai shënoi edhe golin e tij të parë për “Minatorët”. /Telegrafi/

Legjenda e futbollit brazilian, Adriano, ka reaguar ashpër publikisht ndaj një mashtruesi që arriti ta mashtrojë nënën e tij përmes një mesazhi të rremë në WhatsApp, duke i marrë më shumë se 15 mijë realë brazilianë (rreth 2400 euro).

Në një video që u bë virale në rrjetet sociale, ish-sulmuesi i Interit zbuloi se mashtruesi ishte paraqitur si vetë Adriano, duke pretenduar se kishte ndërruar numrin e telefonit.

Përmes këtij mashtrimi, ai arriti ta bindte nënën e tij, Rosilda Ribeiro, që t’i transferonte shumën e parave.

Adriano u shfaq i revoltuar dhe i prekur, duke i dërguar një paralajmërim të drejtpërdrejtë mashtruesit: paratë duhet të kthehen brenda 24 orëve, përndryshe do të përballet me pasoja.

“Nuk luhet me familjen time”, ishte mesazhi i qartë i ish-futbollistit, i cili përdori gjuhë të ashpër në reagimin e tij publik, duke treguar se është i vendosur ta çojë çështjen deri në fund.

Rasti i Adrianos është një tjetër shembull i mashtrimeve gjithnjë e më të shpeshta përmes aplikacioneve të komunikimit, ku autorët shfrytëzojnë emra të njohur dhe besimin familjar për të përfituar financiarisht. /Telegrafi/

Trajneri i Napolit, Antonio Conte, ka reaguar ndaj kritikave të ish-sulmuesit të Chelseat, Diego Costa, duke theksuar se në futboll ka njerëz inteligjentë dhe budallenj, dhe se ai nuk do të humbasë kohën duke u fokusuar tek ato që thonë të tjerët.

Conte po kalon një periudhë të vështirë me Napolin, përballë shumë lëndimeve dhe një humbjeje të rëndë 3-0 kundër ish-klubit të tij, Juventusit, në Serie A, raporton Football Italia.

Çfarë tha Diego Costa për Conten?

Diego Costa, i cili fitoi Ligën Premier me Chelsean në sezonin 2016/17 nën drejtimin e Contes, foli së fundmi në podcastin e John Obi Mikel, duke komentuar jo vetëm si trajner, por edhe si person.

“Conte është i mirë si trajner, por si person ai është gjëja më e keqe që mund të të ndodhë në punën tënde të përditshme. Ai është shumë i keq. Ai është një njeri që nuk i beson askujt dhe mendon se di gjithçka. Nuk është kënaqësi të stërvitesh me të. Ai është gjithmonë i zemëruar, gjithmonë i vrenjtur. Ndoshta nuk bën seks në shtëpi sepse është shumë i hidhëruar”.

“Më vjen keq sepse isha shumë i lumtur te Chelsea, por nuk doja t’i shkaktoja probleme klubit. Lojtarët donin që unë të kthehesha, por askush nuk e pëlqente. Kjo është arsyeja pse ai nuk qëndroi gjatë”, deklaroi Costa

Përgjigja e Antonio Contes

Në një konferencë për shtyp përpara ndeshjes vendimtare të Ligës së Kampionëve kundër Chelseat, Conte komentoi shkurt dhe prerë rreth fjalëve të tij.

“Sinqerisht, nuk e humbas energjinë time duke lexuar gazetat dhe duke ndjekur atë që thuhet. Ka njerëz inteligjentë dhe budallenj në futboll, kështu që nuk do ta humbas kohën time duke lexuar atë që thonë ata”.

“Costa ishte me mua për një sezon. Mund të flas për futbollin: ne fituam ligën dhe ai u përpoq të largohej tre herë në të njëjtin sezon. Çfarë ndodhi më pas, nuk e di”, deklaroi Conte.

Një marrëdhënie e tensionuar te Chelsea

Diego Costa dhe Antonio Conte kanë pasur tensione të pazgjidhura që nga koha kur punuan së bashku te Chelsea në vitin 2017.

Gjatë verës, Conte i kishte dërguar një mesazh Costas se nuk ishte më i nevojshëm në klub, pavarësisht se sulmuesi spanjoll kishte shënuar 20 gola në sezonin e Ligën Premier dhe ishte në formë të shkëlqyer.

Marrëdhënia e tyre mbeti e tendosur gjatë gjithë sezonit, duke lënë shije të hidhur për të dyja palët. /Telegrafi/

Mbrojtësi i Kombëtares së Kosovës, Amir Rrahmani, pritet të rikthehet në dispozicion të trajnerit të Napolit, Antonio Conte, për ndeshjen e radhës në Serie A ndaj Fiorentinës.

Sipas raportimeve nga mediat italiane, kapiteni dardan ka shënuar përparim të dukshëm në rikuperim dhe mund të jetë i gatshëm për sfidën që Napoli e zhvillon të shtunën nga ora 18:00, në kuadër të xhiros së 23-të të kampionatit italian.

Megjithatë, Rrahmani nuk do të jetë i gatshëm për përballjen e së mërkurës ndaj Chelseat në Ligën e Kampionëve, duel në të cilin Conte nuk do të mund të llogarisë ende në shërbimet e tij.

Qendërmbrojtësi u lëndua më 17 janar në ndeshjen kundër Sassuolos, një dëmtim muskulor që e la jashtë skuadrës për dy ndeshjet e fundit – përballë Copenhagenit në Ligën e Kampionëve dhe ndaj Juventusit në Serie A.

Edhe në pjesën e parë të sezonit, Rrahmani kishte munguar në disa takime për shkak të lëndimeve, ndërsa deri tani ka regjistruar 19 paraqitje dhe ka shënuar një gol në të gjitha garat.

Amir Rrahmani nominohet për “EA Sports FC 26 Team of the Year”

Rikthimi i tij pritet të jetë një përforcim i rëndësishëm për Napolin, që në javët e fundit është përballur me mungesa të shumta për shkak të lëndimeve në repartet kyçe të skuadrës. /Telegrafi/

Kobbie Mainoo, mesfushori i talentuar i Manchester United, po rikthen shkëlqimin nën drejtimin e Michael Carrick, pas një periudhe të vështirë me trajnerin e mëparshëm, Amorim.

Rio Ferdinand e ka krahasuar Mainoo me legjendën Clarence Seedorf, por nën drejtimin e Amorim, talenti i lindur në vitin 2005 u shfrytëzua shumë pak: vetëm 225 minuta në Ligën Premier. Megjithatë, si shpesh ndodh në futboll, një ndryshim në stolin e klubit mund të ndryshojë gjithçka. Ky ishte rasti i Mainoo: nga një rezervë e përhershme, ai u bë titullar i padiskutueshëm.

Fjalët nga Ferdinand dhe Gerrard

Nga akademia e Manchester United deri te debutimi nën Ten Hag, i cili në kohën e tij te Ajax tregoi se di të zhvillojë talentet e reja, dhe rruga e Mainoo ka qenë e shpejtë. Ai ka fituar vendin e tij në ekip ndeshje pas ndeshjeje, duke treguar klas dhe personalitet, pavarësisht moshës së re.

Rio Ferdinand e vlerësoi: “Më duket se luan si Clarence Seedorf. Nuk po them që është po aq i mirë sa ai, apo se do të bëhet njësoj, por shoh shumë ngjashmëri”.

Jo vetëm Ferdinand ka folur për Mainoo. Edhe Steven Gerrard, ish-kapiteni i Liverpool, ka mbetur i impresionuar nga stili i tij.

“Do të doja të isha i aftë të luaja edhe gjysmën e mirë të asaj që bën Mainoo. Ai është e ardhmja. Dhe ju lutem, ndaloni krahasimet me Curtis Jones apo Harvey Elliot: nuk janë në të njëjtin univers me Kobbie”.

Pengesat me Amorim

Pavarësisht talentit të madh, Amorim nuk e konsideroi Mainoo pjesë të rëndësishme të rotacionit. Me sistemin 3-4-2-1, mesfusha u mbush kryesisht nga Casemiro dhe Bruno Fernandes, duke e lënë Mainoo jashtë. Në 14 paraqitje me të gjitha garat, ai nuk ka filluar asnjëherë nga minuta e parë, një vendim që nuk është ndarë nga tifozët dhe familjarët e mesfushorit.

Në ndeshjen kundër Bournemouth, vëllai i Mainoo shkoi në Old Trafford me një fanellë ku shkruhej “Free Kobbie Mainoo”, një mesazh i qartë që Carrick nuk e la pa u dëgjuar.

Ringjallja nën drejtimin e Carrick

Kur Michael Carrick mori drejtimin e Manchester United, ai vendosi të ndryshojë hierarkinë e mesfushës. Mainoo u zgjodh të luajë krahas Casemiro në sistemin 4-2-3-1, duke kombinuar eksperiencën me freskinë dhe teknikun e lartë të mesfushorit anglez.

Rikthimi i tij ishte i menjëhershëm dhe mbresëlënës. Kundër Manchester City të Guardiolas, Mainoo tregoi aftësi të jashtëzakonshme: 34 pasime me 91% saktësi, 2/2 pasime të gjata të sakta, dy duele fitues, tre ndërhyrje dhe tre largime nga zona mbrojtëse. Një performancë e plotë që e bëri të duket si një veteran në fushë.

“Kobbie është një lojtar fantastik, ka talent të jashtëzakonshëm dhe aftësi të mëdha. Ai ka menaxhuar ndeshje të mëdha me përvojë dhe ka luajtur mirë edhe për Kombëtaren. Pres me padurim sukseset e tij”, deklaroi Carrick pas ndeshjes.

Paraqitja që përcakton liderin

Mainoo vazhdoi të tregojë klasën edhe kundër Arsenalit, ku shërbeu me asistim për golin e Cunha në fitoren 3-2, duke thyer një rekord pa humbje prej 267 ditësh në "Emirates Stadium".

Kjo periudhë shënon kthimin më të mirë të mundshëm për Kobbie Mainoo, i cili tani po konsolidon rolin e tij si lider i mesfushës së Manchester United.

Në këtë mënyrë, Kobbie Mainoo ka treguar se një ndryshim në stolin e klubit mund të jetë vendimtar për karrierën e një të riu, duke shndërruar pengesat e mëparshme në një ringjallje të plotë në Ligën Premier. /Telegrafi/

Edicioni i pestë i Ligës së Kombeve të UEFA-s do të nisë më 24 shtator 2026, duke shënuar vazhdimin e një gare që ka zëvendësuar ndeshjet miqësore dhe që njëkohësisht sjell përfitime financiare për federatat nacionale dhe vetë UEFA-n.

Liga e Kombeve përbëhet nga katër nivele, ndërsa Kosova për herë të parë në histori do të garojë në Ligën B, nivelin e dytë të kësaj gare.

Kjo u arrit vitin e shkuar, kur Kosova mposhti Islandën në play-off, duke siguruar vendin në Ligën B.

Nga Liga D në Ligën B – rrugëtimi i Kosovës

Në edicionin e parë (2018/19), Kosova ishte pjesë e Ligës D, niveli i katërt dhe i fundit. Më pas, për tri edicione radhazi, “Dardanët” garuan në Ligën C.

Promovimi në Ligën B për edicionin 2026/27 erdhi falë dy fitoreve në play-off ndaj Islandës, në mars të vitit të kaluar, një sukses historik për përfaqësuesen kosovare.

Shorti dhe vazot: Kosova në vazon e katërt

Shorti për edicionin e ri të Ligës së Kombeve do të hidhet më 12 shkurt në Bruksel. Kosova do të jetë në vazon e katërt, së bashku me Suedinë, Maqedoninë e Veriut dhe Irlandën e Veriut.

Vazoja 1: Skocia, Hungaria, Polonia, Izraeli

Vazoja 2: Zvicra, Bosnjë-Hercegovina, Austria, Ukraina

Vazoja 3: Sllovenia, Gjeorgjia, Irlanda, Rumania

Vazoja 4: Suedia, Maqedonia e Veriut, Irlandën e Veriut, Kosova.

Përballja e vetme e ndaluar, ndaj Bosnje-Hercegovinës

Kosova do të ketë në grup nga një përfaqësuese nga secila prej tri vazove të para. Përballja e vetme e ndaluar: Kosova – Bosnjë-Hercegovinë.

Sipas vendimeve të Komitetit Ekzekutiv të UEFA-s, Kosova nuk mund të përballet me Bosnjë-Hercegovinën, ndonëse kjo e fundit ndodhet në vazon e dytë.

“Bazuar në vendimet e Komitetit Ekzekutiv të UEFA-s, ekipet që nuk mund të jenë në një grup janë: Bosnjë-Hercegovina (Liga B, vazo 2) – Kosova (Liga B, vazo 4)”, thuhet në njoftimin zyrtar të UEFA-s.

Që nga viti 2016, UEFA ka ndaluar përballjet e Kosovës me Serbinë dhe Bosnjë-Hercegovinën për arsye sigurie, ndërsa në vitin 2019 u ndaluan edhe ndeshjet Kosovë – Rusi.

Rumania dhe Ukraina, sfida potenciale me histori tensioni

Ndër përballjet potencialisht më të ndërlikuara për Kosovën janë ato me Rumaninë. Të gjitha ndeshjet e mëparshme mes dy përfaqësueseve janë shoqëruar me tensione politike dhe sjellje fyese nga tifozët rumunë, përfshirë thirrje provokuese edhe në Prishtinë.

Edhe ndeshjet e kaluara me Ukrainën kanë pasur elemente ndjeshmërie politike, çka e bën grupin e Kosovës potencialisht shumë interesant dhe delikat.

Datat e ndeshjeve dhe fokusi aktual i Kosovës

Ndeshjet e fazës së ligës do të zhvillohen nga 24 shtatori deri më 17 nëntor, me nga dy ndeshje në shtator, tetor dhe nëntor.

Megjithatë, aktualisht i gjithë fokusi i Kosovës është te play-offi për kualifikim në Kupën e Botës 2026. Më 26 mars, “Dardanët” luajnë ndaj Sllovakisë në Bratislavë në gjysmëfinale, ndërsa në rast fitoreje, më 31 mars do të përballen me Turqinë ose Rumaninë në finale.

Fituesi i finales siguron biletën për Botërorin 2026, që do të mbahet në SHBA, Kanada dhe Meksikë.

Ligë më lart se Sllovakia, konkurrencë më e fortë

Derisa Kosova do të garojë në Ligën B, Sllovakia mbetet në Ligën C, çka do të thotë se nuk mund të ketë përballje mes dy përfaqësueseve në Ligën e Kombeve.

Në Ligën B, ku do të garojë Kosova, ndodhen përfaqësuese shumë më të forta, duke e bërë këtë edicion një sfidë të madhe, por edhe një test real për nivelin e “Dardanëve”. /Telegrafi/

Visar Bekaj është lojtar i Tiranës. Portieri i Kombëtares së Kosovës ka arritur marrëveshje me klubin bardheblu dhe pritet që zyrtarizimi të bëhet shumë shpejt.

Bekaj ka nënshkruar kontratë për 1 vjet e gjysmë me një klauzolë shkëputjeje gjatë verës, e cila i hap rrugë një transferimi të mundshëm jashtë vendit.

Telegrafi mëson se ai do të jetë lojtari më i paguar në ligë, me një pagë mujore që kalon 15 mijë euro.

Ky është një rikthim për portierin kosovar te Tirana, klub me të cilin ka pasur paraqitje shumë të mira në të kaluarën, duke mbajtur madje edhe shiritin e kapitenit. Performancat e tij e bënë një nga figurat kryesore të skuadrës në atë periudhë.

Nga Tirana, Bekaj u transferua në Turqi te Hatayspor, ku qëndroi për dy sezone, duke fituar përvojë në një kampionat më të fortë. Më herët në karrierë, ai ka mbrojtur edhe ngjyrat e FC Prishtinës.

"Ishte nder të luaja për këtë klub" - Visar Bekaj largohet nga Hatayspor pas dy vitesh e gjysmë

Portieri 28-vjeçar është gjithashtu pjesë e Kombëtares së Kosovës, ku ka qenë rregullisht i grumbulluar, ndërsa rikthimi i tij te Tirana shihet si një lëvizje e duhur dhe një sinjal i qartë për ambiciet e klubit kryeqytetas për t'i shpëtuar rënies. /Telegrafi/

Brezi i futbollistëve me të cilin u rritën miliona tifozë në mbarë botën sot nuk feston më gola në fushë, por jep udhëzime nga zona teknike.

Ish-yje të Ligës Premier, La Liga, Serie A dhe Bundesligës kanë ndërruar fanellën me kostumin e trajnerit, duke ndërtuar kapituj të rinj në karrierën e tyre.

Disa tashmë udhëheqin klube gjigante, të tjerë po rriten gradualisht – por të gjithë dëshmojnë se koha në futboll ecën shpejt.

Wayne Rooney

Legjenda e Manchester United dhe Anglisë hyri herët në zejen e trajnerit, duke drejtuar Derby County në kushte ekstreme. Ka kaluar edhe nga DC United e Birmingham City dhe mbetet një emër i respektuar për projekte rindërtimi.

Michael Carrick

I qetë dhe inteligjent si dikur në fushë, Carrick u dallua te Middlesbrough për futboll posedues. Në janar 2026 u rikthye te Manchester United si trajner i përkohshëm, duke fituar dy ndeshje të mëdha. E ardhmja pritet të sjellë më shumë suksese.

Jack Wilshere

I detyruar të tërhiqej herët si lojtar, Wilshere u formua si trajner në akademinë e Arsenalit. Në vitin 2025 mori drejtimin e Luton Town, në sfidën e tij të parë serioze si trajner kryesor.

Tom Cleverley

Ish-mesfushori i Manchester United nisi karrierën e trajnerit te Watford dhe më pas u emërua trajner i Plymouth Argyle. Vlerësohet për punën metodike dhe komunikimin e fortë me lojtarët.

Vincent Kompany

Nga Anderlechti te Burnley dhe më pas te Bayern Munich – ngjitje e shpejtë për ish-kapitenin e Man Cityt. Stili i tij intensiv dhe dominues e ka bërë një nga trajnerët më interesantë të Evropës.

Frank Lampard

Filloi te Derby, promovoi talente te Chelsea dhe kaloi beteja të vështira te Everton. Aktualisht po ringjall Coventry City, me synimin e kthimit në Ligën Premier.

Steven Gerrard

Hero i Liverpoolit, fitoi titullin historik me Rangers pa humbje. Pas Aston Villas dhe një aventure në Arabinë Saudite, vazhdon të kërkojë stabilitet në karrierën e trajnerit.

Xabi Alonso

Një nga mendjet më brilante taktike të brezit të tij. Pas suksesit historik me Bayer Leverkusen, u emërua trajner i Real Madridit, por periudha përfundoi në janar 2026. Tani në kërkim të një projekti më afatgjatë.

Xavi Hernandez

Ikonë e Barcelonës, e riktheu klubin te titulli i La Ligës në 2023. Pavarësisht kritikave evropiane, ai simbolizoi rikthimin te ADN-ja klasike e klubit.

Cesc Fabregas

Nga dirigjent në fushë, në arkitekt nga banka. Trajner i Comos në Serie A, Fabregas po ndërton një projekt ambicioz me futboll posedues.

Alvaro Arbeloa

Rrugë akademike dhe disiplinë madrilene. Pas suksesit me të rinjtë, në janar 2026 mori drejtimin e Real Madridit, duke u bërë pjesë e tranzicionit të klubit.

Javier Mascherano

Nga organizator i mbrojtjes, në udhëheqës ekipesh. Pas Argjentinës U-20, drejtoi Inter Miami drejt suksesit dhe fitoi respekt si trajner.

Ruud van Nistelrooy

Metodik dhe i përmbajtur, nisi te PSV dhe fitoi trofe. Pas një eksperience të vështirë te Leicester, sot është pjesë e stafit të Holandës.

Fernando Torres

Ikonë e Atleticos, po rritet si trajner brenda klubit të zemrës. Aktualisht drejton Atletico Madrid B dhe shihet si pasardhës i mundshëm i Simeones.

Rafael Marquez

I qetë dhe taktik, punon me Barcelonën B. Një figurë kyçe në zhvillimin e talenteve dhe në strukturën e brendshme të klubit katalanas.

Andrea Pirlo

Filloi papritur te Juventusi dhe fitoi trofe, por u largua shpejt. Sot vazhdon të kërkojë stabilitet, duke mbetur një emër që tërheq interes.

Thiago Motta

Një nga trajnerët më modernë në Serie A. Me Bolognan ka ndërtuar një ekip agresiv dhe taktikisht inteligjent, pavarësisht dështimit te Juventusi.

Gael Clichy

Ish-mbrojtësi i Arsenalit dhe Man Cityt u emërua trajner i Caen në fund të vitit 2025. Fokus i madh në intensitet dhe zhvillimin e të rinjve.

Stephan Lichtsteiner

Legjenda e Juventusit dhe Arsenalit u rikthye në Zvicër. Në janar 2026 mori drejtimin e Baselit, me misionin për ta rikthyer klubin në majë.

Liam Rosenior

Nga mbrojtës i qëndrueshëm në Ligën Premier, në trajner progresiv. Në janar 2026 u emërua trajner i Chelseat me kontratë afatgjatë.

/Telegrafi/

Sulmuesi Mërgim Berisha mund të rikthehet në futbollin austriak, këtë herë te kampioni në fuqi, Sturm Graz.

Sipas mediave austriake, klubi nga Graci ka hyrë në negociata intensive me Berishën, i cili aktualisht është pjesë e Hoffenheimit, por 27-vjeçari nuk ka zhvilluar asnjë paraqitje në këtë edicion dhe nuk ka qenë as pjesë e listës së të grumbulluarve, duke e bërë të qartë se nuk bën më pjesë në planet e klubit gjerman.

Kontrata e Berishës me Hoffenheimin skadon në verën e vitit 2027, çka e bën të mundur një transferim gjatë këtij afati kalimtar, nëse palët arrijnë marrëveshje.

Sipas të dhënave të “Transfermarkt”, vlera e sulmuesit në tregun e transferimeve vlerësohet rreth 2.5 milionë euro.

Berisha e njeh mirë futbollin austriak, pasi më parë ka luajtur për klube si Salzburg, LASK, Altach dhe Liefering, ku ka lënë gjurmë pozitive. Përveç Austrisë dhe Gjermanisë, ai ka qenë pjesë edhe e Fenerbahces në Turqi.

Ku është Mërgim Berisha?

Për shërbimet e tij raportohet se ka interesim edhe nga disa klube të tjera, por Sturm Graz momentalisht duket më i avancuari në garë për firmën e sulmuesit. /Telegrafi/

Mos e quani “klub plastik”. Ajo që po bën Hoffenheim në futbollin gjerman është rezultat i një vizioni afatgjatë, i ndërtuar me durim, strukturë dhe ide të qarta – jo thjesht me para.

Mjafton një vështrim në renditjen aktuale të Bundesligës për të habitur shumëkënd: TSG 1899 Hoffenheim ndodhet në vendin e tretë, menjëherë pas gjigantëve Bayern Munich dhe Borussia Dortmund. Rastësi? Aspak.

Pas kësaj historie fshihet rrugëtimi i jashtëzakonshëm i një klubi të vogël dhe i një njeriu që u kthye te rrënjët e tij për të ndërtuar diçka të madhe.

Nga fshati në elitë

Hoffenheim është një vend i vogël në Baden-Württemberg, me vetëm disa mijëra banorë. Megjithatë, çdo fundjavë stadiumi modern i klubit mbushet dhe popullsia e zonës trefishohet, duke e kthyer qytetin në një qendër të vërtetë futbolli.

Gjithçka nisi në fund të viteve ’90, kur Dietmar Hopp – bashkëthemelues i gjigantit teknologjik SAP dhe ish-lojtar i Hoffenheimit në rini – vendosi të marrë në dorë klubin e zemrës. Në atë kohë, Hoffenheim luante në divizionin e shtatë të futbollit gjerman, larg çdo vëmendjeje.

Hopp nuk ndërtoi suksesin përmes “afisheve” apo emrave të mëdhenj, por përmes infrastrukturës, qendrave stërvitore moderne dhe një modeli menaxhimi profesional. Ideja ishte e qartë: suksesi sportiv vjen si pasojë e organizimit të fortë.

Ngritja marramendëse dhe dimri magjik

Rruga drejt elitës u shënua nga dy figura kyçe të futbollit modern. Fillimisht Hans-Dieter Flick, i cili përpara lavdisë me Bayern Munich dhe Barcelonën, ndihmoi Hoffenheimin të hidhte hapa të mëdhenj nga ligat e ulëta. Më pas erdhi Ralf Rangnick, arkitekti i projektit që tronditi Gjermaninë.

Me investime të mëdha për nivelin e atëhershëm – mbi 18 milionë euro në Zweite Liga – Rangnick ndërtoi një skuadër konkurruese me emra ende të panjohur për publikun e gjerë: Demba Ba, Chinedu Obasi dhe Vedad Ibisevic. Rezultati ishte spektakolar: brenda vetëm 24 muajsh, Hoffenheim u ngjit nga liga e tretë në Bundesligë.

Sezoni 2008-2009 mbetet historik. Në debutimin e tyre në elitë, Hoffenheim e mbylli gjysmën e parë të kampionatit si “kampion dimëror”. Vetëm dëmtimi i rëndë i Ibisevicit, i cili kishte shënuar 18 gola në 17 ndeshje, i ndali ëndrrat për titull. Por projekti nuk u ndal kurrë.

Hoffenheim sot - stabilitet dhe ambicie

Sot, Hoffenheim po jeton një tjetër kapitull të artë. I udhëhequr nga përvoja dhe klasi i Andrej Kramarić (6 gola dhe 2 asistime) dhe energjia e talentit të ri Tim Lenperle (6 gola dhe 2 asistime), klubi ka siguruar vendin e tretë në Bundesligë, duke u konfirmuar si forcë serioze në futbollin gjerman.

Gur në këtë mur, këtë vit kanë vënë edhe treshja shqiptare që luan te Kosova, Albian Hajdari, Leon Abdullahu dhe Fisnik Asllani, të moshës nga 21 deri në 23 vjeç, që kanë qenë motorët e skuadrës që nga rikthimi i tyre në formën e lartë.

Edhe pse shpesh është etiketuar si klub “pa histori”, realiteti flet ndryshe. Ndërsa emra të mëdhenj si Schalke 04 dhe Hambur SV kanë rënë në krizë, Hoffenheim ka ndërtuar vazhdimësi. Ky është sezoni i 18-të radhazi i klubit në Bundesligë – një arritje që flet për stabilitet dhe vizion.

Një histori që vazhdon

Hoffenheim është dëshmia se në futbollin modern, pasioni i një ish-lojtari të kthyer në miliarder, i kombinuar me ide të qarta dhe punë afatgjatë, mund ta shndërrojë një fshat të vogël në një emër të respektuar të futbollit evropian.

Nga divizioni i shtatë deri në zonën e Ligës së Kampionëve – rrugëtimi i Hoffenheimit dëshmon se asgjë nuk është e pamundur kur projekti është i fortë dhe ambicia nuk njeh kufij. /Telegrafi/

Basel ka emëruar zyrtarisht legjendën zvicerane Stephan Lichtsteiner si trajner të ri të ekipit të parë.

42-vjeçari, i cili njeh mirë klubin për shkak të përvojës së tij të gjatë në punën me të rinjtë e Basel, ka nënshkruar një kontratë deri në verën e vitit 2029. Me të, në stafin teknik vjen edhe Pascal Bader, 43 vjeç, si asistent trajner.

"Ne e njohim Stephanin që nga puna e tij me të rinjtë dhe kemi punuar direkt me të për më shumë se dy vjet. Ai sjell një kuptim të thellë taktikor dhe di si të motivojë skuadrat e tij për të performuar si një kolektiv. Edhe pse nuk ka përvojë si trajner kryesor në nivel profesional, ne i besojmë 100% për këtë detyrë. Ai është detajist dhe perfeksionist, me një mentalitet fitues që do të na ndihmojë menjëherë në këtë situatë", thuhet në njoftimin e klubit.

Lichtsteiner, i cili gjatë karrierës së tij aktive fitoi me Juventusin shtatë tituj kampionati italian, pesë kupa dhe katër Superkupa, dhe përfaqësoi Zvicrën në më shumë se 100 ndeshje, komentoi pas emërimit.

"Jam i bindur për projektin afatgjatë te FC Basel dhe jam i lumtur që tani bëj pjesë të tij. Edhe pse ky hap vjen pak më herët se sa e kisha planifikuar, është një sfidë që e pranoj me dëshirë. Jam i sigurt se së bashku mund të arrijmë shumë", deklaroi legjenda zvicerane.

Trajneri zviceran do të udhëheqë edhe yjet e ekipit, përfshirë Xherdan Shaqirin, duke sjellë përvojën e tij të jashtëzakonshme dhe mentalitetin fitues te skuadra. /Telegrafi/

Pas muajsh në hijen e Kylian Mbappes dhe yjeve të tjerë të Real Madridit, Endrick po merr vëmendjen kryesore në Lyon: 4 gola dhe 1 asist në tre paraqitjet e tij të para për klubin francez.

Pas një fillimi sezoni të vështirë në Madrid, me më shumë hije se dritë, braziliani 18-vjeçar po e gjen veten përtej Pirenejve, 1235 km larg: në Lyon.

Në tre paraqitjet e tij të para nën drejtimin e Paulo Fonsecas, Endrick ka shënuar katër gola dhe ka dhënë një asist. Debutimi i tij u bë në Kupën e Francës, ku realizoi golin e parë, përpara se të shënonte një tregolësh në Ligue 1 kundër Metz.

Tre fitore dhe një konstante: pseudonimi i tij “Bobby” – një nofkë që ai e krijoi gjatë kohës së tij te Real Madrid në nder të idhullit të tij, Bobby Charlton. Dhe të mendosh që Evropa e zbuloi këtë talent brazilian fillimisht përmes mediave sociale.

Endrick, nga YouTube ... te Lyon

Shpejtësia, përfundimi dhe vizioni i lindur… nga YouTube. Nëse sot mund ta admirojmë talentin e pastër të Endrickut në Evropë, kjo është falë videove të postuara në kanalin e babait të tij, Douglas Sosa.

Babai i tij, i papunë në atë kohë dhe plot besim në aftësitë e të birit, nisi të publikonte lojërat e Endrickut, duke shpresuar për një telefonatë nga një klub i madh brazilian.

Pas shumë komentesh dhe pëlqimesh, Palmeiras e vuri re talentin e tij. Përveç që mbuloi shpenzimet e vogla të Endrickut, klubi i ofroi familjes akomodim dhe një punë për babanë e tij si punëtor në klub.

“Palmeiras na hapi dyert dhe ne nuk mund të bënim gjë tjetër veçse t’i falënderonim. Ata na dhanë gjithçka, dhe përpjekjet e tyre ishin thelbësore për jetën time,” rrëfente futbollisti për Globo Esporte.

Në ekipin e të rinjve të Verdao, Endrick shënoi 165 gola në 169 paraqitje, shifra që i siguruan promovimin në ekipin e parë në vitin 2022. Një vit e gjysmë më vonë, në moshën 18-vjeç, ai debutoi në Evropë me Real Madridin.

- YouTube www.youtube.com

Endrick, lojtari i ri i Lyonit

Në moshën 16 vjeç, 2 muaj dhe 25 ditë, ai u bë debutuesi më i ri në historinë e Palmeiras. Dhjetë ditë më vonë, shënoi edhe golin që e bëri golashënuesin më të ri të klubit, duke thyer një rekord 108-vjeçar. Ai u bë gjithashtu lojtari i parë që fitoi të paktën një titull në çdo kategori, nga U-11 deri te skuadra e parë.

Me transferimin te Real Madrid, ai i kaloi Vinicius dhe Rodrygo në listën e lojtarëve më të shtrenjtë nën 18-vjeç të të gjitha kohërave. Në Spanjë, trendi vazhdoi: ai u bë golashënuesi më i ri i huaj në historinë e La Ligas në moshën 18 vjeç e 35 ditë dhe më pas, në 18 vjeç, 1 muaj e 27 ditë, golashënuesi më i ri i Real Madridit në Ligën e Kampionëve.

Aktualisht, ai ndodhet në huazim te Lyon, duke synuar të zhvillohet larg presionit të Bernabeu-s dhe të gjejë qëndrueshmëri. Vetëm atëherë, nga sezoni i ardhshëm, do të ketë mundësinë të zërë hapësirën që Real Madrid ka planifikuar për të. /Telegrafi/

Mesfushori i Kosovës, Valon Berisha, 32 vjeç, pritet të largohet nga LASK, por së fundmi ai ka refuzuar ofertat nga Bosnja, dhe është në pritje të destinacioni të ti të ardshëm.

Dino Buric, drejtori sportiv i LASK-ut, deklaroi se gjetja e një zgjidhjeje është në interes si të klubit ashtu edhe të lojtarit dhe se një marrëveshje për largimin e tij pritet të arrihet brenda ditësh.

“Unë besoj fuqimisht se po. Valoni është një lojtar me objektiva. Njëri prej tyre është të rikthehet në aksion për Kosovën në mars”.

Dino Buric, drejtori sportiv i LASK-ut

“Për këtë, ai ka nevojë për ndeshje, të cilat për fat të keq nuk mund t’i luajë me ne. Jemi të sinqertë për këtë. Kjo është arsyeja pse është në interes të të dyja palëve të gjejnë një zgjidhje”, deklaroi Buric.

Berisha u bashkua me LASK-un në janar 2024 dhe ka bërë 10 paraqitje në ligën vendase këtë sezon pa asnjë gol ose asist.

Mesfushori ka bërë 52 ndeshje dhe ka shënuar 4 gola për Kosovën.

Valon Berisha, mesfushori i Kosovës

Kontrata e tij me klubin austriak është e vlefshme deri në qershor 2026, dhe vlera e tij aktuale e tregut, sipas Transfermarkt, është 500 mijë euro. /Telegrafi/

Kanë mbetur edhe 15 xhiro deri në fund të Ligës Premier, dhe tre klube janë në garë për titullin e kampionit të Anglisë.

Është e qartë se Liverpooli nuk do ta mbrojë titullin e fituar sezonin e kaluar, dhe favoritët kryesorë për titull janë Arsenal, Manchester City dhe Aston Villa.

“Topçinjtë” janë liderë në tabelë pavarësisht humbjes 3-2 ndaj Manchester United, dhe ende kanë përballje vendimtare me Manchester Cityn. Po ashtu, Manchester City do të presë Aston Villan në raundin e fundit.

Arsenal ka 50 pikë pas 23 xhirove, ndërsa Manchester City dhe Aston Villa ndajnë vendet e dyta dhe të treta me nga 46 pikë secila.

Kush do të jetë kampioni i ri i Anglisë? Arsenal, Manchester City apo Aston Villa? Më poshtë gjeni oraret e të tre ekipeve kryesuese deri në fund të kampionatit.

Orari i ndeshjeve të Arsenal, Manchester City dhe Aston Villa deri në fund të Ligës Premier 2025/26

Xhiro 24:

• Leeds United – Arsenal
• Tottenham Hotspur – Manchester City
• Aston Villa – Brentford

Xhiro 25:

• Arsenal – Sunderland
• Liverpool – Manchester City
• Bournemouth – Aston Villa

Xhiro 26:

• Brentford – Arsenal
• Manchester City – Fulham
• Aston Villa – Brighton & Hove Albion

Xhiro 27:

• Tottenham Hotspur – Arsenal
• Manchester City – Newcastle United
• Aston Villa – Leeds United

Xhiro 28:

• Arsenal – Chelsea
• Leeds United – Manchester City
• Wolves – Aston Villa

Xhiro 29:

• Brighton & Hove Albion – Arsenal
• Manchester City – Nottingham Forest
• Aston Villa – Chelsea

Xhiro 30:

• Arsenal – Everton
• West Ham United – Manchester City
• Manchester United – Aston Villa

Xhiro 31:

• Wolves – Arsenal
• Manchester City – Crystal Palace
• Aston Villa – West Ham United

Xhiro 32:

• Arsenal – Bournemouth
• Chelsea – Manchester City
• Nottingham Forest – Aston Villa

Xhiro 33:

• Manchester City – Arsenal
• Aston Villa – Sunderland

Xhiro 34:

• Arsenal – Newcastle United
• Burnley – Manchester City
• Fulham – Aston Villa

Xhiro 35:

• Arsenal – Fulham
• Everton – Manchester City
• Aston Villa – Tottenham Hotspur

Xhiro 36:

• West Ham United – Arsenal
• Manchester City – Brentford
• Burnley – Aston Villa

Xhiro 37:

• Arsenal – Burnley
• Bournemouth – Manchester City
• Aston Villa – Liverpool

Xhiro 38:

• Crystal Palace – Arsenal
• Manchester City – Aston Villa

/Telegrafi/

Atalanta është përballur së fundmi me një incident të turpshëm sigurie në stadiumin e saj. Në rrjetet sociale ka qarkulluar me shpejtësi një video, në të cilën shihet një person duke depërtuar në ambientet e stadiumit të klubit bergamask në një mënyrë të pabesueshme.

Bëhet fjalë për “New Balance Arena”, e njohur deri vitin e kaluar si "Gewiss Stadium", ku një nga portat hyrëse rezulton të ketë si fjalëkalim… vitin e themelimit të klubit.

Po, tingëllon e pabesueshme, por sipas videos virale, personi provoi thjesht kodin 1907 – viti kur u themelua Atalanta – dhe arriti ta hapë portën, duke hyrë në stadium gjatë natës pa asnjë pengesë.

Ky rast ka ngritur shqetësime serioze për masat e sigurisë në impiantin e klubit të Serie A dhe ka shkaktuar reagime të shumta në rrjetet sociale, ku tifozët dhe ndjekësit janë shprehur të habitur nga lehtësia me të cilën u realizua ndërhyrja.

Ngjarja është pjesë e një fenomeni gjithnjë e më të përhapur, i njohur si “stadium hopping”, apo "shëtitje ilegale në stadium", ku tifozë apo individë kureshtarë nga vende të ndryshme përpiqen të hyjnë ilegalisht në stadiume të famshme sportive kur ato janë të mbyllura.

Pas këtij incidenti, Atalanta pritet të rishikojë dhe forcojë masat e sigurisë rreth stadiumit për të shmangur raste të ngjashme në të ardhmen. /Telegrafi/

Jonathan David ka nisur më në fund të justifikojë pritshmëritë te Juventusi, por kjo nuk do të thotë se Luciano Spalletti ka hequr dorë nga ideja për të afruar një sulmues të ri qendre në afatin kalimtar të janarit.

Sulmuesi kanadez ka shënuar tri gola në katër paraqitjet e fundit në Serie A, duke shtuar edhe një asist, dhe duket se po përshtatet gjithnjë e më mirë me fanellën bardhezi.

Megjithatë, trajneri i Juventusit ka shpjeguar pse do të ishte i kënaqur të sillte një tjetër qendërsulmues në skuadër.

Pse Spalletti kërkon një sulmues tjetër?

Pas fitores ndaj Napolit, Spalletti foli për tipologjinë e sulmuesit që i mungon aktualisht Juventusit, duke marrë si shembull sulmuesin e Napolit, Rasmus Højlund.

“Ka sulmues si Hojlund që zbresin në mesfushë, mbajnë topin nën presion dhe e bëjnë lojën të luajtshme për ekipin”.

“Kjo është diçka që ne nuk e kemi. David është shumë i mirë për të shënuar gola, por futbolli nuk është vetëm kaq. Ne kemi nevojë për një sulmues që lufton fizikisht me mbrojtësit qendrorë. Nuk na duhet domosdoshmërisht një golashënues, por një lojtar për atë lloj pune. David është i fortë, por nuk është i ndërtuar për atë rol”, u shpreh Spalletti

Këto deklarata erdhën pas një periudhe ku David ishte kritikuar ashpër nga një pjesë e tifozëve dhe mediave italiane, sidomos pas penalltisë së humbur në barazimin 1-1 ndaj Lecces në fillim të muajit.

Reagimi i Davidit dhe mbështetja e trajnerit

Sulmuesi 26-vjeçar reagoi në mënyrën më të mirë të mundshme, duke shënuar rregullisht dhe duke treguar se po fiton vetëbesim. Mbështetja e skuadrës dhe e trajnerit ka qenë vendimtare në këtë proces, ndërsa tre golat e shënuar në vitin 2026 janë dëshmi e qartë se David po vendoset gradualisht në ambientin bardhezi.

Kjo ka ngritur pyetjen: a do ta pengojë ardhja e një sulmuesi të ri zhvillimin e tij te Juventusi? Përgjigjja, sipas burimeve pranë klubit, është jo domosdoshmërisht.

Edhe pse Spalletti ka qenë i qartë për profilin e sulmuesit që kërkon, kjo nuk do të thotë se David do ta humbasë vendin në formacionin startues nëse vjen një “numër 9” i ri.

Një përforcim që mund ta ndihmojë Davidin

Përkundrazi, ardhja e një sulmuesi fizik mund të rrisë edhe më shumë efikasitetin e Davidit. Një lojtar që mban topin, hap hapësira dhe tërheq mbrojtësit kundërshtarë do t’i krijonte më shumë mundësi kanadezit për të shfrytëzuar lëvizjet e tij në zonë.

David është mësuar të luajë me një partner në sulm edhe te Kombëtarja e Kanadasë, ndaj një skemë e tillë mund t’i përshtatet mjaft mirë.

Nuk është rastësi që Juventusi, përjashtuar Federico Chiesan, është lidhur kryesisht me sulmues fizikë në këtë afat të janarit, si Jean-Philippe Mateta, Youssef En-Nesyri dhe Beto.

Çështja Vlahović dhe planet e Juventusit

Juventusi aktualisht ka edhe një qendërsulmues klasik në skuadër, Dusan Vlahovic, por serbi është i dëmtuar dhe nuk pritet të rikthehet para mesit të shkurtit ose madje marsit. Për më tepër, kontrata e tij skadon në qershor dhe gjithçka tregon se ai do të largohet nga Torino si lojtar i lirë në fund të sezonit.

David tashmë ka fituar konkurrencën ndaj Lois Opendas për të qenë sulmuesi kryesor pas dëmtimit të Vlahovicit, ndërsa Spalletti ka kaluar edhe në një formacion të ri 4-2-3-1, duke u larguar nga skema 3-4-2-1.

Trajneri italian duket se ka një ide të qartë për riformësimin e repartit ofensiv në muajt e ardhshëm. /Telegrafi/

- YouTube www.youtube.com

Sergio Ramos ka arritur një marrëveshje në parim me një grup aksionarësh kryesorë për blerjen e Sevilla FC, klub ku ka fituar emër si futbollist profesionist.

Partneri i tij në këtë sipërmarrje është Martin Ink nga kompania Five Eleven Capital, sipas informacioneve të gazetarit Manolo Aguilar.

Kjo marrëveshje hap një periudhë ekskluziviteti, gjatë së cilës Ramos dhe ekipi i tij do të analizojnë gjendjen financiare të klubit, përpara se të tentojnë arritjen e një marrëveshjeje përfundimtare, raporton Cadena SER.

Faza e analizës së thelluar

Marrëveshja e arritur përfaqëson një hap vendimtar, pasi tani nis procesi i analizës së thelluar financiare dhe ligjore, i njohur si “due diligence”.

Ky proces pritet të zgjasë disa muaj dhe vetëm pas përfundimit të tij do të merret një vendim përfundimtar.

Ky zhvillim konfirmon se thashethemet e fundit nuk kanë qenë të pabazuara dhe se oferta e Sergio Ramosit dhe partnerëve të tij është serioze, konkrete dhe e mbështetur nga një marrëveshje në parim.

Detajet e ofertës

Sipas informacioneve shtesë të publikuara nga Miguel Angel Chazarri, oferta fillestare për blerjen e klubit kap vlerën e 450 milionë eurove.

Sergio Ramos ka qenë i lidhur ngushtë me Sevillan gjatë karrierës së tij si futbollist. Ai ka luajtur për klubin dy herë: herën e parë nga viti 2003 deri në vitin 2005, përpara se të transferohej te Real Madridi, ndërsa u rikthye sërish te Sevilla në sezonin 2023/24, pas dy sezoneve të kaluara te Paris Saint-Germain.

Takimi paraprak

Kësaj marrëveshjeje në parim i ka paraprirë një takim i mbajtur më 15 janar, gjatë të cilit Sergio Ramos dhe Pérez Solano prezantuan ofertën dhe projektin e tyre përpara aksionarëve të klubit.

Takimi zgjati më shumë se dy orë dhe u vlerësua shumë për shkak të rëndësisë dhe seriozitetit të ofertës, çka në fund çoi në arritjen e marrëveshjes në parim për blerjen e Sevilla FC. /Telegrafi/

Klubi i Sporteve Ujore Otrila vazhdon të dëshmojë se është një nga qendrat më të rëndësishme të zhvillimit të notit në Kosovë, me sportisten e këtij klubi, Hana Beiqi, që është shpallur sportistja më e mirë e vitit në not në vend.,

Ajo e merr këtë vlerësim të merituar për paraqitjet dhe rezultatet e jashtëzakonshme gjatë vitit. Beiqi është rekordere e Kosovës në disa disiplina të notit dhe konsiderohet një nga talentet më premtuese të sporteve ujore në vend.

Sukseset e saj janë rezultat i një pune të strukturuar, përkushtimi maksimal dhe një sistemi profesional trajnimi, që karakterizon filozofinë e punës së klubit Otrila.

Ky vlerësim nuk përfaqëson vetëm një arritje individuale për Hanën, por edhe një tjetër dëshmi të qartë të misionit të klubit Otrila për ndërtimin e sportistëve elitarë, zhvillimin e talenteve të reja dhe krijimin e standardeve të reja në not dhe sportet ujore në Kosovë.

Otrila vazhdon të investojë në vizion afatgjatë dhe zhvillim të qëndrueshëm, duke u shndërruar në një adresë të sigurt për talentet që synojnë nivelet më të larta të sportit. /Telegrafi/

Talenti brazilian Endrick, i huazuar te Lyoni nga Real Madridi, tregoi edhe një herë pse konsiderohet si një nga sulmuesit e rinj më premtues në botë, duke shkëlqyer me një paraqitje fantastike ndaj Metz, ku ekipi i tij Lyon fitoi 5-2.

Ky ishte het-triku i tij i parë me Lyon, ku është i huazuar dhe ka lënë përshtypje shumë të mira deri më tani.

Në minutën e 10-të, Corentin Tolisso depërtoi nga krahu i djathtë dhe dërgoi një pasim të saktë në zonë, ku Endrick u gjend në pozicion perfekt dhe me shumë qetësi e parakaloi portierin, duke i dhënë Lyonit epërsinë 1-0.

Pak para përfundimit të pjesës së parë, në minutën e 45-të, Endrick u gjend sërish përballë portierit dhe me gjakftohtësi e dërgoi topin në rrjetë për ta thelluar rezultatin në 4-1.

Sulmuesi i ri e kompletoi het-trikun nga pika e bardhë, duke realizuar penalltinë për rezultatin 5-2.

Golat e shënuar nxorën në pah lëvizjen e shkëlqyer, mendimin e shpejtë dhe talentin natyral të Endrickut, duke konfirmuar ndikimin e menjëhershëm që ai po e ka në Ligue 1 me fanellën e Lyonit. /Telegrafi/

Pas fitores 3-2 ndaj Arsenalit, Michael Carrick u pyet nëse e sheh veten duke marrë rolin e trajnerit të përhershëm te Manchester United në të ardhmen.

Ai foli për Sky Sports pas fitores fantastike, që e ngritë Man Utd në vendin e katërt në renditje. Ai nuk deshi të komentojë të ardhmen e tij.

"Po e shijoj këtë moment. Është një pozicion fantastik për t’u pasur. Çfarë do të ndodhë më tej nuk do ta përgjigjem çdo javë. Po e shijoj dhe do të vazhdoj të bëj më të mirën që mundem", deklaroi ai.

Carrick ka fituar të dy ndeshjet si trajner i përkohshëm i “Djajve të Kuq” që nga emërimi i tij, duke i ndihmuar ata të ndërpresin serinë e papërmbajtshme të Arsenalit në Emirates Stadium.

Fillimisht e fitoi derbin e qytetit ndaj Man Cityt, ndërsa tani fitoi ndaj liderit Arsenalit. /Telegrafi/