Manchester United ka refuzuar disa oferta për mbrojtësin Harry Maguire gjatë këtij muaji, duke bërë të qartë se qendërmbrojtësi anglez nuk është në shitje, pavarësisht interesimit në rritje nga klube të njohura të Evropës.

Sipas raportimeve, AC Milan dhe disa skuadra nga Liga Premier kanë shfaqur interes konkret për shërbimet e Maguire, por drejtuesit e “Djajve të Kuq” janë të vendosur ta mbajnë atë në “Old Trafford” të paktën deri në fund të sezonit.

“The Sun” raporton se United do të refuzojë çdo ofertë që vjen gjatë afatit kalimtar të janarit, duke nënvizuar vendosmërinë për të mos u ndarë nga një prej transferimeve më të shtrenjta në historinë e klubit.

Harry Maguire u bashkua me Manchester United si nënshkrimi rekord prej 80 milionë funte dhe pavarësisht kritikave dhe periudhave të vështira, klubi vazhdon ta shohë atë si një pjesë të rëndësishme të skuadrës.

Kontrata aktuale e mbrojtësit skadon në verë dhe ende nuk është e qartë nëse United do t’i ofrojë një zgjatje deri në vitin 2027 apo do të vendosë të ndahet me të në fund të marrëveshjes.

Për momentin, e ardhmja e Maguire në “Old Trafford” konsiderohet e sigurt, teksa Manchester United po përgatitet për pjesën e mbetur të sezonit nën drejtimin e përkohshëm të Michael Carrick./Telegrafi

Trajneri Zinedine Zidane ka treguar me detaje kujdesin e madh dhe vëmendjen që i kushtonte lojtarëve të Real Madridit gjatë periudhës së tij shumë të suksesshme në kryeqytetin spanjoll, duke shpjeguar mënyrën se si arriti të fitojë besimin e një dhome zhveshjeje plot yje dhe ego të mëdha, diçka që Xabi Alonso nuk arriti ta bënte kurrë.

Real Madridi ka bërë 19 emërime trajnerësh gjatë shekullit 21, por vetëm tre prej tyre kanë arritur të qëndrojnë më shumë se 75 ndeshje në krye të skuadrës.

Zidane është një nga figurat e rralla, krahas Jose Mourinhos dhe Carlo Ancelottit, që gjeti formulën për të nxjerrë vazhdimisht maksimumin nga një grup futbollistësh të mbushur me emra të mëdhenj në “Santiago Bernabeu”.

Ndërsa Mourinho zgjodhi një qasje më të ashpër, si Ancelotti ashtu edhe Zidane u fokusuan te ana njerëzore e lojtarëve milionerë. Vetë francezi e kishte shpjeguar më herët këtë filozofi.

“Ne menaxhojmë njerëz, jo thjesht lojtarë”.

Zidane e theksoi fuqishëm këtë ide në një bisedë të fundit me ndihmësin e tij, Hamidou Msaidie, në kanalin e këtij të fundit në YouTube.

“Te Real Madridi, ne ishim në dispozicion të lojtarëve”.

“Për mua, kjo është ajo që e bën një ekip të fortë: ti je aty për lojtarin. Nëse nuk e ke kuptuar këtë, nuk mund të zgjasësh në këtë profesion. Ne jemi aty për t’i mbështetur ata; duhet t’ua tregosh se je pranë tyre”.

Në kontrast të plotë, periudha shtatëmuajshe e Xabi Alonsos në krye të Real Madridit u shoqërua me shumë spekulime rreth dështimit të tij për ta bindur dhomën e zhveshjes me idetë e veta. Disa lojtarë të rëndësishëm thuhej se mbetën të “pakënaqur” dhe “të pabindur” ndaj ish-trajnerit të Bayer Leverkusenit, i cili u përshkrua si “i ftohtë dhe i paarritshëm”.

Një shpërthim gjatë një seance stërvitore, ku Alonso bërtiti “Nuk e dija që po vija të stërvisja një çerdhe!”, nuk ndihmoi aspak për të ndërtuar respektin universal që Zidane e konsideronte thelbësor.

“Që dhoma e zhveshjes ta pranojë atë që ti dëshiron të implementosh, ata duhet të të pëlqejnë”, shpjegoi ish-fituesi i Kupës së Botës.

“Nëse lojtarët nuk bien dakord me gjithçka që u jepet – stërvitjen, gjithë procesin – gjithmonë do të mungojë diçka. Me ne, mendoj se ata e shijuan gjithçka, në çdo aspekt”.

Zidane mori drejtimin e Real Madridit në mesin e sezonit 2015/16, pasi Rafael Benitez kishte hasur të njëjtat vështirësi që më vonë do ta penalizonin edhe Alonson.

Francezi fitoi menjëherë Ligën e Kampionëve atë sezon, trofeu i parë nga tri fitore radhazi historike në Evropë, përpara se të rikthehej në vitin 2019 dhe të siguronte edhe një titull kampion në La Liga. Më shumë se taktikat, fokusi i tij fillestar ishte te mentaliteti i lojtarëve.

“Ne u dhamë shumë besim lojtarëve”, kujtoi ai.

“Ata kishin kaluar një periudhë të vështirë dhe duhej të rikthenin besimin, formën fizike, gjithçka. Ne krijuam një kornizë që ata të rikuperonin gjithçka. Kur një lojtar është konkurrues, i lumtur të stërvitet dhe të dalë të luajë, ai është i aftë të fitojë tri Liga Kampionësh”.

“Kaluam shumë mirë. U përpoqa t’u tregoja se të gjithë ishin të rëndësishëm. Nëse nuk stërvitesh mirë, nuk luan. Nëse të hënën e di kush do të luajë të shtunën, kjo është keq. Lojtarët që nuk luajnë nuk do të stërviten mirë”.

Përveç menaxhimit të egove, Zidane vuri theks të madh edhe te përgatitja fizike. Ai e emëroi specialistin e njohur Antonio Pintus gjatë mandatit të tij të parë, një figurë me të cilën kishte punuar edhe si lojtar te Juventusi, duke përjetuar nga afër seancat e tij të rënda stërvitore.

Pintus pati një rol më të kufizuar gjatë verës nën drejtimin e Alonsos, duke u zhvendosur në një pozicion më menaxherial të performancës. Vetëm një ditë pas largimit të trajnerit, italiani u rikthye menjëherë në rolin e tij të mëparshëm si trajner i përgatitjes fizike.

Zidane theksoi se ndryshimet fizike te Real Madridi nisën që në mesin e sezonit të tij të parë.

“Arritëm në një pikë kritike. Ekipi nuk ishte në gjendje të mirë fizike dhe thjesht duhej t’u ngulitnim idenë se duhej të punonin si ekip”.

“Ne patëm mundësi të punonim gjatë javës sepse kishim vetëm ndeshje të La Ligës. U takova me katër kapitenët dhe u shpjegova çfarë prisja prej tyre. Kur ata pranuan të punonin, gjithçka ndryshoi. Erdhi gëzimi. Rikthyem motivimin. Punë dhe gëzim. I bëmë të vraponin. Përgatitja fizike ishte themelore”.

Pavarësisht përpjekjeve të tij, Xabi Alonso nuk arriti kurrë t’i bëjë yjet e Real Madridit të vraponin në të njëjtën mënyrë./Telegrafi

Fortuna Dusseldorf ka shënuar fitore minimale në shtëpi ndaj Bielefeld në kuadër të Bundesliga 2, ku protagonist ishte Florent Muslija.

Ylli i Kosovës po vazhdon shkëlqimin në elitën e dytë të futbollit gjerman, ku asistoi te goli i vetëm në sfidë.

Muslija dhuroi një asistim të mrekullueshëm te zvicerani Itten, i cili e finalizoi për mrekulli.

Me këtë asistim, Muslija mori notën 7.5 nga “SofaScore”, për të qenë ndër lojtarët më të vlerësuar në këtë sfidë.

Përpos asistit, Muslija kompletoi edhe dy driblime, dhuroi katër pasime kyçe si dhe fitoi plot tetë duele.

Ky është asistimi i dytë në Bundesliga 2, ndërsa ka të regjistruar edhe tre gola këtë edicion me Fortunan që po garon për mbijetesë./Telegrafi/

Barcelona është duke konsideruar si opsion qendërmbrojtësin Ron Raçi për të ardhmen e afërt.

Katalunasit janë në situatë të rëndë financiare, ndërsa vazhdimisht po shikojnë disa opsione më të lira, por që i përshtaten stilit të lojës së trajnerit Hansi Flick.

Siç raporton “Football Transfer News”, Raçi është emri më i ri në listën e Barcelonës, me gjigantin spanjoll që e preferon sepse luan me këmbën e majtë pavarësisht pozitës së qendërmbrojtësit.

“Barcelona po e skauton Ron Raçin, qendërmbrojtësin e Hajduk Splitit”.

“Barcelona aktivisht po përcjellë një qendërmbrojtës që luan me këmbë të majtë për sezonin tjetër. Një ndër emrat është Rron Raçi, mbrojtësi i ri i vlerësuar nga Hajduk Spliti, i cili ka impresionuar me top paraqitje në futbollin kroat”, thuhet ndër të tjera në njoftimin e tyre.

Ndërkohë, në listën e Barcelonës mbesin edhe qendërmbrojtësit e njohur si Alessandro Bastoni, Nico Schlotterbeck dhe Micky van de Veen.

Raçi mbetet tepër i rëndësishëm edhe për Kosovën, me përzgjedhësin Franco Foda që e sheh si opsion për play-offin e Kupës së Botës 2026./Telegrafi/

Federata Franceze e Futbollit ka nisur zyrtarisht procedurat për ta emëruar Zinedine Zidane si përzgjedhësin e ardhshëm të Kombëtares së Francës, raporton “L’Equipe”.

Sipas këtyre burimeve, gjithçka po shkon drejt një skenari që konsiderohet pothuajse i sigurt brenda futbollit francez.

Zidane shihet si pasuesi i natyrshëm i Didier Deschamps, i cili pritet të largohet nga posti pas Kupës së Botës 2026. Turneu botëror i vitit 2026 do të jetë edhe paraqitja e fundit e Deschamps në krye të “Gjelave”, përpara se Federata të hapë një kapitull të ri me një nga figurat më ikonike të historisë së futbollit francez.

Sipas raportimit, Zidane ka nisur tashmë punën në prapaskenë, duke përzgjedhur stafin e tij ndihmës, çka e përforcon edhe më shumë bindjen se emërimi i tij është vetëm çështje kohe. Brenda Federatës ekziston bindja se ai është profili ideal për të udhëhequr një brez të ri lojtarësh francezë drejt objektivave madhorë.

Zinedine Zidane nuk ka drejtuar asnjë klub që nga viti 2021, kur u largua nga posti i trajnerit të Real Madridit. Në periudhën e tij në krye të klubit madrilen, ai arriti suksese historike, duke fituar tri herë Ligën e Kampionëve, si dhe disa trofe të tjerë madhorë, duke u konsoliduar si një nga trajnerët më të suksesshëm të epokës moderne.

Emërimi i tij në krye të Francës do të shënonte një kthim të madh në futboll për Zidane, këtë herë në nivel kombëtar, me synimin kryesor për ta përgatitur ekipin pas Kupën e Botës 2026 dhe për të ruajtur statusin e Francës si një nga kombëtaret më të forta në botë./Telegrafi

Inter raportohet se ka refuzuar një ofertë nga Galatasaray për Hakan Calhanoglu, por e ardhmja e mesfushorit turk përtej këtij sezoni mbetet ende në pikëpyetje.

Klubi nga Stambolli po shikon seriozisht tregun e Serie A, duke pasur në radar disa mesfushorë, përfshirë Youssouf Fofana të Milanit dhe pikërisht yllin e Interit.

Sipas një raportimit të fundit nga “Calciomercato.com”, situata e Calhanoglu vazhdon të monitorohet me vëmendje, ndërsa një transferim i mundshëm te Galatasaray ishte diskutuar edhe gjatë verës së kaluar. Interesi i klubit turk nuk është zbehur, por pengesa kryesore mbetet qëndrimi i fortë i Interit.

“SportsDigitale” ka raportuar se Inter ka refuzuar një ofertë nën 25 milionë euro për Calhanoglu. Nerazzurrët nuk kanë asnjë dëshirë ta shesin yllin e mesfushës gjatë afatit kalimtar të janarit, duke e konsideruar atë një element kyç në projektin sportiv aktual.

Megjithatë, e ardhmja e Calhanoglu në “Stadio Meazza” pas verës nuk është aspak e sigurt. Agjentët e lojtarit pritet të ulen në bisedime me drejtuesit e Interit për një rinovim të kontratës, pasi marrëveshja aktuale skadon në vitin 2027.

Në këtë fazë, Inter nuk është i gatshëm të heqë dorë nga Calhanoglu gjatë dimrit, por mbetet për t’u parë nëse palët do të arrijnë një marrëveshje për zgjatjen e kontratës./Telegrafi

Manchester City është shumë pranë finalizimit të transferimit të kapitenit të Crystal Palace, Marc Guehi, por ajo që po tërheq vëmendjen më të madhe është paga që pritet të përfitojë qendërmbrojtësi anglez në “Etihad”.

Sipas raportimeve të fundit, Guehi ka arritur tashmë një marrëveshje verbale për kushtet personale dhe pritet të nënshkruajë një kontratë 5-vjeçare e gjysmë me kampionët e Anglisë.

Me këtë kontratë, 25-vjeçari do të futet menjëherë në mesin e dhjetë lojtarëve më të paguar në skuadrën e Pep Guardiolës.

Raportohet se paga e Marc Guehi do të jetë rreth 300 mijë funte në javë, një shifër që e vendos atë në elitën e hierarkisë financiare të Manchester Cityt dhe që reflekton besimin e madh të klubit në cilësitë dhe rëndësinë e tij për të ardhmen.

Sa i përket marrëveshjes mes klubeve, City dhe Crystal Palace kanë një akordim në parim për një shumë fillestare prej rreth 20 milionë funte, me bonuse që mund ta çojnë vlerën totale të transferimit afër 30 milionë funteve. Palace ka pranuar ofertën duke pasur parasysh edhe rrezikun e humbjes së lojtarit pa pagesë në fund të kontratës.

Me këtë lëvizje, Manchester City jo vetëm që forcon mbrojtjen me një nga qendërmbrojtësit më të vlerësuar në Angli, por gjithashtu dërgon një sinjal të qartë se Marc Guehi shihet si një figurë kyçe e projektit afatgjatë të klubit./Telegrafi

Ministria e Kulturës, Rinisë dhe Sportit (MKRS) i ka dërguar email zyrtar Federatës së Futbollit të Kosovës (FFK) para Kuvendit Zgjedhor, që do të zhvillohet më 5 shkurt.

MKRS-ja e ka paralajmëruar FFK-në të bëjë disa ndryshime statutare para se ta zhvillojë Kuvendin Zgjedhor.

“Para se të procedohet me mbajtjen e Kuvendit Zgjedhor të paralajmëruar për datën 05 shkurt 2026 është e domosdoshme që FFK të ndërmarrë harmonizimin e disa çështjeve thelbësore të Statutit dhe akteve të tejra normative konkretisht:”.

“Harmonzimi sipas dakordimit të arritur gjatë procesit të licencimit në vitin 2023 në mes të përfaqësuesve të UEFA-s, FIFA-s dhe MKRS dhe harmonizimin e Statutit të FFK-së me Ligjin për Sport dhe Udhëzimin Administrativ përkatës që rregullon procedurat e lejimit të ushtrimit të veprimtarisë sportive të federatave”.

Ndër të tjera, MKRS-ja i ka kujtuar FFK-së që të përfundojë edhe procesin e lincencimit për shtatë lidhje rajonale si dhe licendimin për shoqatat profesionale, me këtë të fundit që thuhet se ka qenë kusht nga MKRS edhe gjatë vitit 2025.

Më poshtë lexoni emailin e plotë./Telegrafi/.

Sulmuesi Kylian Mbappe vazhdon të ankohet për dhimbje në gju dhe mbetet në dyshim për ndeshjen e Real Madridit ndaj Levantes këtë të shtunë, sipas raportimeve të fundit.

Sulmuesi francez e pësoi problemin në fillim të dhjetorit, por pavarësisht shqetësimit vendosi të luajë për të ndjekur rekordin e golave në një vit kalendarik të Cristiano Ronaldos, duke e barazuar përfundimisht portugezin me 59 gola.

Megjithatë, drejt fundit të muajit, klubi madrilen konfirmoi se Mbappe do të kishte nevojë për kohë pushimi për t’u rikuperuar.

Fillimisht u vendos një afat rreth trejavësh për rikthimin e tij, çka e bënte pothuajse të sigurt mungesën në Superkupën e Spanjës. Megjithatë, ai u rikthye më herët se sa pritej, duke hyrë nga stoli në finalen e humbur ndaj Barcelonës, më pak se dy javë pas diagnozës fillestare.

Sipas “Marca”, Mbappe ka vazhduar të stërvitet me grupin, por pasi u pushua për humbjen në Kupën e Mbretit ndaj Albacetes, ai ende po ndjen parehati në gju.

Sulmuesi është grumbulluar për ndeshjen kundër Levantes dhe trajneri Alvaro Arbeloa ka këmbëngulur se gjendja e tij është përmirësuar.

“Gjendja e tij është më e mirë”, ka deklaruar Arbeloa, duke lënë të hapur mundësinë e aktivizimit të kujdesshëm.

Megjithatë, raportimet sugjerojnë se roli i Mbappe mund të jetë i kufizuar në javët në vijim. Shkalla e saktë e shqetësimit aktual nuk dihet, por brenda klubit ekziston bindja se ai nuk e ka përkeqësuar lëndimin në gju dhe thjesht ka nevojë për pak më shumë kohë për t’u rikuperuar plotësisht, ashtu siç ishte parashikuar fillimisht.

Sipas “L’Equipe”, vetë Mbappe ka pranuar se nxitimi për t’u rikthyer mund të mos ketë qenë vendimi më i mençur.

“E dija se po rrezikoja disi, por nuk pendohem, sepse doja të ndihmoja Real Madridin të fitonte një trofe kundër Barcelonës”, raportohet të ketë thënë ai.

Në këtë kontekst, thuhet se Mbappe mund të pushojë ndaj Levantes dhe madje të mungojë edhe në ndeshjen pasuese kundër Monacos, për t’u rikthyer më vonë gjatë muajit, në udhëtim ndaj Villarrealit.

Mbrojtja e gjendjes fizike të yllit francez do të jetë kyçe për Real Madridin, edhe nëse kjo do të thotë një goditje afatshkurtër për Arbeloan./Telegrafi

Ylli i Celje Milot Avdyli thotë se ka punë të pakryer ndaj Dritës pasi e kanë mposhtur dy herë kur ishte pjesë e Trepçës, ndërsa beson se skuadra sllovene do t’i eliminojë.

Drita të premten mësoi se në 1/16 e finales të Ligës së Konferencës do të përballet me Celje, skuadër ku edhe luan që prej verës ish kapiteni i Kosovës U21.

Në një intervistë për faqen zyrtare të Celjes, Avdyli deklaroi se kishte dëshirë për t’u përballur me klubin kosovar, ndërsa tani synon t’i “hakmerret” sepse kishte pësuar dy humbje prej tyre kur ka qenë pjesë e Trepçës.

“Doja që të luaja ndaj Dritës në fazën e ligës dhe dëshira ime tash është bërë realitet. Ndeshja do të jetë e veçantë sepse do të përballem me një klub nga vendlindja. Kam disa punë të pakryera me Dritën, sepse luajta dy herë ndaj tyre kur isha lojtar i Trepçës dhe humba në dy rastet”.

“Jam i sigurt se këtë herë do të jetë ndryshe. I njoh shumicën e lojtarëve të Dritës, i kam ndjekur edhe ndeshjet e tyre në Evropë, kanë kualitet por janë padyshim skuadër që mund të mposhtet”.

Në fund, Avdyli shtoi se Celje do të kualifikohet në fazën tjetër sidomos me ndihmën e tifozëve.

“Një atmosferë e mirë na pret në Prishtinë, por do të adaptohemi. Është mirë që luajmë ndeshjen kthyese në stadiumin tonë, ku gjithnjë kemi pasur mbështetje të zhurshme dhe me ndihmëne tifozëve arritëm t’i mposhtim AEK Athens dhe Legian në fazën e ligës, si dhe mbetet të pamposhtur në përgjithësi. Besoj se kualifikohemi”.

Përballja mes Dritës dhe Celjes do të zhvillohet më 19 shkurt./Telegrafi/

Presidenti i Real Madridit Florentino Perez e ka bërë prioritet afrimin e yllit të Manchester Cityt Erling Haaland në verën e vitit 2026.

Real Madridi aktualisht po kalon një krizë në aspektin sportiv, ndërsa bordi ka nisur punën që të gjejë problemin, si dhe të përforcohet për vitin e ardhshëm.

Sipas asaj që raporton gazetari i besueshëm Florian Plettenberg, dëshira e madhe njëkohësisht objektivi, është askush tjetër përpos Haaland, që po vazhdon të shkëlqejë te City.

Në bazë të këtij raportimi, Perez e sheh norvegjezin si “shpëtimtari” i Real Madridit, megjithatë është në dijeni se klubi madrilen nuk do ta ketë të lehtë një afrim të tillë.

Haaland ka kontratë afatgjatë me Cityn dhe një nënshkrim i mundshëm padyshim do ta tejkalonte shifrën prej 150 milionë eurove.

Mirëpo, lajmi pozitiv për gjigantin spanjoll është se Haaland nuk do ta refuzonte kalimin në “Santiago Bernabeu”, pasi e sheh Realin si klubi i ëndrrave është fans tepër i madh i futbollit spanjoll.

Mbetet të shihet nëse do të realizohet një transferim i tillë që padyshim do të niste një epokë të re galaktikësh te klubi më i madh në botë./Telegrafi/

Barcelona është kualifikuar në fazën tjetër të Kupës së Mbretit për ta eliminuar Racing Santander.

Katalunasit triumfuan me rezultat 0-2, sfidë që e dominuan në përgjithësi por dështuan të shënojnë më shumë se një herë.

Barcelona rrezikoi fillimisht përmes Dani Olmos dhe Marcus Rashford, por të dy dështuan t’i konkretizojnë.

Vendasit gjithashtu krijuan një rast fantastik përmes Guliashvilit, megjithatë goditja e tij përfundoi mbi portë.

Heroi i Barcelonës rezultoi të jetë Ferran Torres, i cili shënoi përballë portierit pas asistimit të Fermin (66’).

Racing bëri atë që s’pritej, shënoi dy herë përmes Manex Lozanos, megjithatë në të dy rastet ishte në pozitë jashtë loje.

Krejt në fund, Barcelona e vulosi fitoren përmes Lamine Yamal (90+5').

Kësisoj, Barcelona nuk vepron si Real Madridi dhe kualifikohet tutje në Kupën e Mbretit./Telegrafi/

Albacete ishte të mërkurën mbrëma në vëmendjen e të gjithëve, kur arriti ta eliminojë Real Madridin në 1/8 e finales në kuadër të Kupës së Mbretit.

Skuadra që garon në divizionin e dytë fitoi me rezultat 3-2, duke e shënuar golin e fitores në minutën e fundit përmes Betancor (90+5’).

Sidoqoftë, ajo që e ka bërë edhe me të çmendur këtë fitore është fakti që vendasit kishin pushuar shtatë nga lojtarët e formacionit të parë sepse nuk besonin se mund ta eliminonin 15 herë kampionin e Evropës.

Albacete i kishte larguar nga formacioni lojtarët si Marino, Vallejo e Gomez, të cilët janë të padiskutueshëm në 11-she pasi iu janë dashur për divizionin e dytë, ku po luftojnë për mbijetesë.

Fitorja e Albacete vlerësohet si më e madhja në historinë e klubit, e më e bukura tani që llogaritet se ka qenë ekipi “B”. Përndryshe, skuadra e divizionit të dytë një xhiro më parë kishte eliminuar Celta Vigon.

Ndërkohë, Real Madridi vazhdon krizën e madhe pavarësisht ardhjes së Arbeloas në krye. “Los Blancos” tashmë kanë nisur punën për një trajner të ri, i cili do ta marrë drejtimin e klubit madrilen në verë./Telegrafi/

AC Milan ka shënuar fitore të rëndësishme në udhëtim ndaj Comos, duke përmbysur rezultatin dhe triumfuar me shifrat 1-3, në një ndeshje ku Adrien Rabiot ishte figura kryesore.

Vendasit kaluan të parët në epërsi në minutën e 10-të, kur Marc Oliver Kempf u shkëput më lart se mbrojtja pas një goditjeje nga këndi dhe me kokë realizoi për 1-0.

Como vazhdoi të rrezikojë, por në minutën e 41-të Mike Maignan shpëtoi Milanin me një pritje vendimtare ndaj një goditjeje nga afërsia të Lucas Da Cunha.

Momenti kyç i pjesës së parë erdhi në minutën e 44-të, kur Kempf shkaktoi penallti. Christopher Nkunku u tregua i saktë nga pika e bardhë në minutën 45+1, duke barazuar rezultatin në 1-1.

Në pjesën e dytë, Milani mori kontrollin e lojës dhe në minutën e 55-të përmbysi rezultatin. Adrien Rabiot përfitoi nga një top i mbetur në zonë dhe me një goditje të saktë realizoi për 1-2.

Francezi e vulosi fitoren në minutën e 88-të me një supergol nga distanca, duke e dërguar topin në këndin e poshtëm të portës për rezultatin përfundimtar 1-3.

Milani me këtë fitore zë pozitën e dytë me 43 pikë, derisa Como zë vendin e gjashtë me 34 sosh./Telegrafi

Luis Enrique shpreson që eliminimi i hershëm dhe befasues i Paris Saint-Germain nga Kupa e Francës të shërbejë si motivim për skuadrën e tij në vazhdim të sezonit.

Jonathan Ikone shënoi golin e vetëm të ndeshjes, teksa Paris FC triumfoi 1-0 në “Parkun e Princave”, duke bërë që PSG të eliminohej para fazës së 1/8 së finales vetëm për herë të dytë në 20 vitet e fundit.

Para përballjes me skuadrën që mban vendin e katërt, Luis Enrique u bëri thirrje lojtarëve të tij që të japin një reagim të fortë, për të rikonfirmuar ambicien për të konkurruar në të gjitha frontet këtë sezon.

“Pas një humbjeje, të gjithë duan të rikthehen menjëherë. Ne e analizuam ndeshjen”.

“E dimë se bëmë gjithçka për të fituar kundër Paris FC, por ndonjëherë përballesh me një portier që ndalon gjithçka. Kështu është futbolli, por duhet të vazhdosh përpara”.

“Të premten luajmë kundër një prej skuadrave më të mira të kampionatit dhe është detyra jonë t’i japim ndeshjes të gjithë përbërësit e nevojshëm”.

“Është e rëndësishme të dimë se e merituam fitoren. Qartë. E humbëm ndeshjen, e pranojmë rezultatin dhe i uruam Paris FC fat për vazhdimin e kompeticionit”.

“Por shpresoj që kjo të na shërbejë si motivim për të dhënë edhe më shumë në kampionat dhe në Ligën e Kampionëve”.

Lille, megjithatë, do të jetë një provë shumë e fortë për PSG-në. Skuadra e drejtuar nga Bruno Genesio ka fituar shtatë nga dhjetë ndeshjet e fundit në Ligue 1 dhe synon rikthimin në Ligën e Kampionëve.

Takimi i fundit mes dy ekipeve në kampionat u zhvillua në tetor, kur Ethan Mbappe, vëllai i ish-yllit të PSG-së, Kylian Mbappe, shënoi golin e barazimit në minutën e 85-të për rezultatin 1-1.

“Kur e analizuam Lille, pamë se ata bëjnë shumë gjëra mirë, si me topin ashtu edhe pa të. Ka shumë cilësi në ekipin e tyre”.

“Do të luajmë në shtëpi dhe do të jetë një test i mirë për të parë se si do të reagojmë pas humbjes. Shpresojmë të bëjmë një paraqitje të mirë”.

“Po luajmë kundër një skuadre të madhe pas një humbjeje dhe e dimë që do të jetë një ndeshje e vështirë, gjithmonë ka qenë e tillë sa herë jemi përballur me ta”.

“Duam të fitojmë për të vazhduar përpara në kampionat”./Telegrafi

Ka qenë java më e vështirë për RCD Mallorca dhe tifozët e saj, pas paraqitjeve zhgënjyese në dy ndeshjet ndaj Gironës dhe Rayos. Të dielën pati edhe përplasje verbale me tifozët, ndërsa skuadra ndodhet shumë pranë zonës së rënies nga kategoria.

Në këtë situatë të tensionuar, sulmuesi Vedat Muriqi ka folur për radion “COPE”, duke iu drejtuar drejtpërdrejt tifozëve të Mallorcas dhe duke bërë thirrje për bashkim.

“Nëse i prishim lidhjet me tifozët me edhe 19 ndeshje për t’u luajtur, atëherë kemi mbaruar”.

Muriqi theksoi se e kupton plotësisht frustrimin e tifozëve për paraqitjet e dobëta dhe kritikat se skuadra nuk po lufton mjaftueshëm. Ai është i bindur se gjërat do të ndryshojnë, edhe pse paradoksalisht 11 golat e tij rekord në gjysmën e parë të sezonit nuk kanë mjaftuar për ta përmirësuar pozitën e ekipit, diçka që e ka pranuar publikisht edhe trajneri Jagoba Arrasate.

Sulmuesi kosovar është i bindur se Mallorca do të ketë një gjysmë të dytë sezoni shumë më të mirë dhe kujton mbështetjen e tifozëve në momentet më të vështira, veçanërisht mbijetesën dramatike nën drejtimin e Javier Aguirres.

“Më kujtohet gjithmonë ai vit kur Granada na mposhti rëndë. Dola për darkë dhe disa tifozë më inkurajuan, duke më thënë se kishim edhe tri ndeshje dhe mund të shpëtonim. U habita shumë. Dua që tifozët të vazhdojnë të jenë kështu, sepse kjo na ndihmon të qëndrojmë në kategori. Nuk kam asnjë dyshim se kjo skuadër do të mbetet në elitë”.

Muriqi foli edhe për përvojën e tij me presionin e madh në Turqi.

“Kam luajtur edhe në Turqi, ku presioni është shumë më i madh dhe nuk ta falin asnjë gabim. Për shembull, te Fenerbahce duhet të jesh si robot. Është e pamundur”.

Debatet me tifozët të dielën, sipas tij, kanë qenë më konstruktive nga sa është raportuar. Edhe pse u përfol për një përplasje të ashpër mes disa tifozëve dhe Mojicas, Muriqi dhe disa bashkëlojtarë të tij patën biseda të qeta me pjesën tjetër të tifozëve.

“Disa prej nesh lojtarëve ishim aty, ashtu si Alfonso Diaz, duke biseduar me tifozët. Thirrëm edhe një drejtues për të qetësuar situatën. U thashë se askush në skuadër nuk dëshiron të humbasë pas vetëm pesë minutash lojë. Askush nuk dëshiron të jetë në këtë situatë. Na thanë se nuk po dukej pasioni. I kuptoj dhe jam dakord, sepse rezultatet nuk po na shkojnë mbarë. Është detyra jonë ta ndryshojmë këtë”.

“Nëse fillojmë të përçahemi me 19 ndeshje të mbetura, kemi mbaruar. Duhet të fillojmë të fitojmë dhe ta kthejmë situatën. Me shtatë pikë mund të jesh i dhjeti. Tifozët duhet të na mbështesin siç kanë bërë gjithmonë. E përsëris, nëse i shkatërrojmë të gjitha, nuk ka kuptim”.

Muriqi pranon se skuadra vuan nga mungesa e besimit dhe se duhet të krijohen më shumë raste.

“Ka pak mungesë besimi. Nëse shikon renditjen, të gjithë jemi shumë afër. Nuk po them se marrëdhënia me tifozët është prishur, por më parë nuk na fishkëllenin. Duhet të ndërtojmë më shumë lojë, ndonjëherë na mungon pasimi final. Këto janë gjëra që duhet t’i përmirësojmë. U flas gjithmonë shokëve të skuadrës, e dinë që unë jam aty për çdo top në zonë dhe përpiqem t’i bind të fusin më shumë topa”.

Muriqi shprehu pakënaqësi edhe për gjykimin, veçanërisht për penalltinë e dhënë ndaj Valjentit në Vallecas dhe për faullet që i akordohen vazhdimisht kundër tij në duelet ajrore.

“Është diçka që as nuk dua ta mendoj, sepse më zemëron shumë. Më thonë që jam më i fortë dhe, për shkak se jam më i fortë, faulli qenka i imi? Shpeshherë më bëjnë faull dhe nuk fishkëllitet asgjë”.

Sa i përket lidershipit, sulmuesi i Mallorcas thekson se nuk ka nevojë për shiritin e kapitenit për të udhëhequr ekipin.

“Gjithë jetën time, pas vdekjes së babait, kam qenë lider i familjes sime. Isha shtatë vjeç kur ai vdiq dhe fillova të punoja në moshën tetëvjeçare. Gjithmonë kam qenë lider. Në fushë kemi kapitenë si Rai dhe Martin, unë nuk kam nevojë për shiritin. Përpiqem të ndihmoj, të flas, të bërtas në fushë. Qëllimi i vetëm është fitorja dhe shokët e skuadrës më respektojnë”./Telegrafi

Golden Eagle Ylli ka shënuar fitore në shtëpi ndaj KB Prishtinës, sfidë që u vendos në çerekun e fundit.

Skuadra suharekase triumfoi me rezultat 94-82 (26:14, 17:30, 23:22, 28:16).

Pas vetëm shtatë minutave lojë kishte ndërprerje, pasi “Plisat” hodhën gjësende në parket, duke fyer bordin e Prishtinës që vendosën ta bënin Bekë Berishën kryetar të klubit.

Policia pastaj ndërhyri duke i larguar nga palestra, ku pastaj vazhdoi ndeshja. Ylli e fitoi çerekun e parë me plot 12 pikë dallim, pra 26:14.

Prishtina u këndell në çerekun e dytë, ku e mbylli me 13 pikë epërsi (17:30), si dhe kompletuar përmbysjen në pjesën e parë 33:34.

Ylli e barazoi rezultatin në çerekun e tretë, duke e fituar çerekun me një pikë epërsi 23:33. Krejt në fund, suharekasit dominuan plotësisht me 12 pikë dallim (28:16).

Lis Soshi e Bamforth ishin më të dalluarit te Ylli me 20 pikë, ndërsa te Prishtina u dallua Burns me 29 sosh./Telegrafi/

Mbrojtësi Lirim Kastrati pas një viti e gjysmë pa klub, i është bashkuar zyrtarisht skuadrës hungareze DVTK.

Pas largimit nga skuadra polake, Kastrati ka qenë agjent i lirë ndërsa ka vendosur të rikthehet në elitën e futbollit hungarez.

DVTK përmes një komunikate zyrtare e njoftoi afrimin e mbrojtësit të Kosovës, me këtë të fundit që deklaroi se është i lumtur dhe mezi pret të jep më të mirën në fanellën e kuqe.

“Jam i lumtur që jam këtu. Arrita me pritje të mëdha sepse e di që Diogyor është një ndër klubet me më traditë në futbollin hungarez”.

“Kam luajtur shpesh kundër DVTK dhe secila ndeshje ishte e vështirë, më kujtohet edhe atmosfera e shkëlqyer që ishte krijuar nga tifozët”.

“Pasi u largova nga Hungaria luajta në Poloni për një vit e gjysmë, ku mësova një kulturë të re. Në dhjetor nisa stërvitjet në Ujpest dhe u përgatita me skuadrën, luajta edhe në fazën parapërgatitore, prandaj arrita në kampin e dimrit me kushte plot 100 për qind, thuajse perfekte. Mezi pres të vesh fanellën e kuqe më të bardhë”, deklaroi ai.

Kastrati ka pasur shumë sukses në Hungari, ku edhe e fitoi Kupën në edicionin 2020/21./Telegrafi/

Afati kalimtar i janarit ka hyrë në fazën më intensive dhe raportimet nga Italia bëjnë të ditur se Juventusi shpreson të arkëtojë rreth 20 milionë euro përmes shitjes së dy brazilianëve që prej kohësh kanë dalë nga planet kryesore të klubit.

Njëri prej tyre është Arthur Melo, i cili vazhdon të jetë nën kontratë me Juventusin, pavarësisht se pjesën më të madhe të tre viteve e gjysmë të fundit e ka kaluar larg Torinos, në formë huazimi te Liverpool, Fiorentina, Girona dhe së fundmi te Gremio në Brazil.

29-vjeçari iu bashkua Juventusit në një marrëveshje shkëmbimi me Miralem Pjanic, transferim që në atë kohë u raportua se kishte një vlerë prej 72 milionë eurosh, plus deri në 10 milionë euro bonuse dhe shtesa.

Me kontratë të vlefshme deri në vitin 2027, La Gazzetta dello Sport raporton se Arthur ende vlerësohet rreth 10 milionë euro në bilancin financiar të Juventusit, shifër që pritet të bjerë në rreth 6.5 milionë euro gjatë verës.

Sipas të njëjtës gazetë, Arthur tashmë ka zhvilluar bisedime me drejtuesit e Gremios për një transferim të përhershëm, pas një periudhe pozitive gjatë vitit 2025.

Përveç Arthurit, Juventusi mund të përfitojë së shpejti edhe nga aktivizimi i një klauzole përqindjeje nga shitja e Kaio Jorge.

Sulmuesi 23-vjeçar u transferua te Juventusi nga Santos në vitin 2021, ndërsa eksperienca e tij në Serie A u nda mes ekipit të parë, skuadrës U23 dhe një huazimi te Frosinone në sezonin 2023/24. Në verën e vitit 2024, ai u lejua të largohej nga Juventusi, duke iu bashkuar Cruzeiros për një shumë të raportuar prej 7.2 milionë eurosh.

Kaio Jorge e mbylli sezonin 2025 të kampionatit brazilian (që zhvillohet nga marsi deri në dhjetor) si golashënuesi më i mirë i ligës, me 21 gola në 33 paraqitje. Ai regjistroi gjithashtu tetë asistime në kampionat, si dhe pesë gola dhe një asist në tetë ndeshje të Kupës së Brazilit.

Paraqitjet e tij të shkëlqyera kanë tërhequr vëmendjen e disa prej klubeve më të mëdha në Brazil, përfshirë Flamengon, e cila raportohet se ka paraqitur një ofertë prej 32 milionë eurosh për ta transferuar sulmuesin nga Cruzeiro.

Në reagim ndaj interesimit, Cruzeiro ka rinovuar kontratën e Kaio Jorge deri në vitin 2030, gjë që nënkupton se një largim i mundshëm në të ardhmen e afërt do të ndodhte për një shumë edhe më të lartë se oferta aktuale e Flamengos.

Kjo situatë është në favor të Juventusit, pasi bardhezinjtë raportohet se kanë të drejtë në 30 për qind të shumës që do të përfitohet nga transferimi i ardhshëm i Kaio Jorge, duke e bërë këtë operacion një burim të rëndësishëm të ardhurash për klubin italian./Telegrafi

Ndeshja mes Golden Eagle Yllit dhe KB Prishtinës është ndërprerë pas vetëm shtatë minutave lojë.

Ishin tifozët e Prishtinës “Plisat” që hedhen gjësende në parket, prandaj edhe gjyqtari përkohësisht e suspendoi lojën.

E tërë kjo situatë erdhi si pakënaqësi e tifozëve kundër vendimit të Prishtinës për ta emëruar Bekë Berishën si kryetar të klubit.

MKRS-ja e kundërshtoi këtë vendim, megjithatë mbetet për t’u parë se si do të zhvillohet situata në ditët e ardhshme.

Kujtojmë, aktualisht Ylli ishte në epërsi të madhe prej nëntë pikëve 17-8, ndërsa kishin mbetur edhe 3 minuta e 12 sekonda për t’u mbyllur çereku i parë./Telegrafi