TIRANË, 28 dhjetor/ATSH/ Në podkastin “Flasim – Yje të vitit”, Episodi 12, Sezoni 5, kryeministri Edi Rama kishte të ftuar boksierin Jurgen Uldedaj.

Megjithëse që prej vitit 2017 stërvitet midis Gjermanisë dhe Anglisë, Jurgen Uldedaj ndeshet me siglën e flamurit kuqezi, duke përfaqësuar Shqipërinë në çdo ndeshje ndërkombëtare. Ai ka bërë që flamuri shqiptar të ngrihet me krenari në shumë arena evropiane dhe botërore, duke e kthyer çdo fitore në një moment emocionues për sportin kombëtar.

Uldedaj u shpall në tetor të këtij viti kampion bote në versionin IBO Cruiserweight (International Boxing Organization) për peshën e rëndë.

Në nisje të podkastit Uldedaj i dorëzoi kryeministrit Rama një dhuratë simbolike nga federata e boksit IBO, një nga pesë federatat e boksit profesionist botëror.

Uldedaj tregoi për nisjen e karrierës së tij dhe nisjen drejt Gjermanisë.

“Jetoj në Gjermani prej 11 vitesh, atje e zhvilloj përgatitjen fizike, në pjesën malore të Mynihut. Atje kam trajnerin kryesor të përgatitjes fizike, ndërsa në Angli kam trajnerin e boksit, që bëj stërvitje teknike”, tha ai.

Kryeministri Rama e pyeti Uldedajn se si filloi kjo ngjitje, nga momenti kur la Lezhën dhe si e zgjodhi rrugën për të vazhduar.

“Çuditërisht sportistët vijnë nga paraardhës sportistë, unë asnjë pjesëtar të familjes nuk e kam pasur sportist. Para pak kohësh u shpalla edhe “Qytetar Nderi” i Lezhës. E kam filluar në Lezhë, kam qenë pak i shëndoshë dhe u futa për t’u dobësuar pak, ishte mosha që fillon merr peshë. Aty fillova, ishin trajnerët që spikatën talentin. Hyra direkt në boks, pasi isha luftarak, tek sporti i boksit gjeta edhe veten”, theksoi Uldedaj.

Ky sport, shtoi ai, është komplet e kundërta, të disiplinon të jep një kulturë që nuk ta jep çdo lloj sporti.

“Në Lezhë ishte vetëm hapi i parë shkak u bëra edhe unë të iknim në Tiranë edhe për shkollë edhe për stërvitje më profesionale. Në Shqipëri ndenja 6-7 vite, kam ikur 17 vjeç në Gjermani, derisa ndenja në Shqipëri u bëra pjesë e ekipit kombëtar mora medalje bronzi në kampionat evropian dhe botëror dhe e mbylla me medalje ari”, tha Uldedaj.

Më tej, Uldedaj tregon se “në Gjermani nënshkrova kontratë me një nga klubet më prestigjioze, zhvillova një karrierë prej 15 ndeshjesh. Në 2018 kam bërë ndeshje në Shqipëri me gjermanët dhe ka qenë aktiviteti i parë i boksit profesionist në Shqipëri dhe nga atëherë nuk kam marrë më pjesë në Shqipëri. Më mungon dhe shumë shpejt do të bëjmë diçka të madhe këtu”.

I pyetur nga Kryeministri nëse është dëmtuar gjatë ndeshjeve, Uldedaj tha se “ka qenë një periudhë dëmtim pas dëmtimi. Një sportist duhet të jetë shumë i fortë psikologjikisht, aq sa edhe fizikisht, në sportet individuale, sepse unë kam thyer dorën, bërrylin, jam bërë 4 herë operacion. Këto janë disa pjesë që vetëm sportisti dhe rrethi i shokëve i përjetojnë, kur dalim në ring ose në fushë shohin ndeshjen, por nuk e dinë se çfarë është hequr për të ardhur deri aty”.

Pyetjes së Kryeministrit nëse ka parë ndonjë talent shqiptar që mund të jetë i niveleve të larta, Uldedaj iu përgjigj se “nuk i kam ndjekur aq nga afër, por Shqipëria gjithmonë ka nxjerrë talente, dëshira ime është që kur të përfundoj t’iu vij në ndihmë talenteve të vegjël”.

/k.s/r.e/

The post Rama në podkast me boksierin Jurgen Uldedaj, që ka ngritur flamurin shqiptar në arenën ndërkombëtare appeared first on Agjencia Telegrafike Shqiptare.

TIRANË, 27 dhjetor/ATSH/ Atmosfera e festave të fundvitit ka gjallëruar rrugët dhe sheshet e qytetit të Elbasanit.

Në zemër të qytetit, mes mureve shekullore të kalasë dhe portës së saj simbolike, sheshi “Hans Ditrih Gensher” është kthyer në epiqendrën e festimeve.

Në këtë shesh janë të shumta fotografitë e shkrepura mes dekoreve festive, ku banorë të moshave të ndryshme fiksojnë në fotografi momente nga vizita e tyre, veçanërisht gjatë orëve të mbrëmjes.

Kryetari i bashkisë Elbasan, Gledian Llatja, tha për ATSH-në se atmosfera festive ka nisur që në fillim të dhjetorit, me një kalendar të pasur aktivitetesh për të gjitha moshat, duke e bërë qytetin gjithnjë e më të gjallë, veçanërisht në orët e mbrëmjes.

Artistë vendas dhe të huaj, grupe vallëzimi, DJ dhe këngëtarë të njohur ngjiten në skenën e improvizuar në shesh, duke krijuar një atmosferë që e kthen qytetin në një festë të hapur për të gjithë.

Këto festa janë kthyer në një mundësi mjaft të mirë për gjallërimin e Elbasanit dhe nxitjen e turizmit. Qytetarë të shumtë elbasanas kanë vendosur ta festojnë ndërrimin e viteve në pika turistike, por edhe në lokalet e njohura të qytetit.

Drejtori i Turizmit dhe Trashëgimisë Kulturore në bashkinë Elbasan, Artur Guni, pohon se Gjinarin këtë fundvit e karakterizon një fluks i shtuar prenotimesh, falë kushteve komode që ofron për pushuesit.

Sipas tij, bujtinat e hapura së fundmi, lokalet e shumta dhe investimet në shërbime kanë ndikuar ndjeshëm në rritjen e interesit për të kaluar ndërrimin e viteve në këtë zonë turistike piktoreske.

Kërkesa të larta janë regjistruar gjithashtu edhe për zonat e tjera turistike të bashkisë, si Funari, por edhe brenda qytetit të Elbasanit, ku turistë vendas dhe të huaj kanë kryer prenotime për të shijuar natyrën, qetësinë dhe ofertën festive të fundvitit.

Sipas të dhënave të mbledhura nga strukturat hoteliere, agjencitë turistike dhe operatorët e turizmit në bashkinë Elbasan, numri i turistëve nga gushti deri tani arrin rreth 11 mijë vizitorë.

Në këto ditë festash, Elbasani ndryshon ritëm. Çdo ditë që kalon, qyteti gjallërohet më shumë, duke treguar se Elbasani di të festojë, të ruajë traditat dhe të krijojë një atmosferë të ngrohtë mikpritëse.

Atmosfera festive në Elbasan, Foto: Andrin Hoxha

1 nga 115

/k.s/j.p/r.e/

The post Festat e fundvitit në Elbasan, fluks prenotimesh në Gjinar dhe Funar appeared first on Agjencia Telegrafike Shqiptare.

TIRANË, 26 dhjetor/ATSH/ Festat e fundvitit kanë shënuar një rritje të fluksit të hyrje-daljeve të udhëtarëve në Pikën e Kalimit Kufitar të Morinës, në Kukës.

Prefekti i qarkut të Kukësit, Dritan Baji tha sot për ATSH-në se ditët e fundit në Morinë ka pasur një rritje të numrit të udhëtarëve që kalojnë përmes kësaj pike kufitare“.

“referuar të dhënave të Drejtorisë së Pikës së Kalimit Kufitar të Morinës nga data 24 deri mëngjesin e sotëm kanë hyrë 18.189 udhëtarë dhe 6466 automjete, si dhe kanë dalë 19.925 shtetas dhe 7173 automjete”, tha Baji.

Sipas tij, numër të shtuar të lëvizjeve ka patur edhe në Stacionin e Pikës Kufitare Qafë-Prush dhe Shishtavec.

Qytetarët e Shqipërisë dhe Kosovës kanë nisur të lëvizin pa kontrolle kufitare nga 1 nëntori i këtij viti, e që do të zgjasë deri më 28 shkurt të vitit 2026. Marrëveshja e nënshkruar pranverën e kaluar mes dy qeverive mundëson qarkullim të lirë pa pasaportë apo kartë identiteti.

Gjatë kësaj periudhe, kontrollet kufitare aplikohen vetëm për mjetet me targa të huaja, por me një procedurë të përshpejtuar, për të shmangur radhët dhe pritjet e gjata në pikat e përbashkëta, veçanërisht në Morinë dhe Vermicë.

/k.s/r.e/a.f/

The post Mbi 18 mijë udhëtarë kanë hyrë në Morinë në dy ditë appeared first on Agjencia Telegrafike Shqiptare.

TIRANË, 26 dhjetor/ATSH/ Pikat e Kalimit Kufitar të Kapshticës dhe Kakavijës kanë shënuar fluks të lartë udhëtarësh që vijnë për festat e fundvitit nga shteti fqinj, Greqia.

Prefekti i qarkut të Korçës, Nertil Jole tha sot për ATSH-në se “lëvizjet në kufi gjatë ditëve të fundit janë më të shumta në drejtim të hyrjes në Shqipëri, pasi emigrantë të shumtë shqiptarë kthehen për të kaluar festat pranë familjeve të tyre. Sipas të dhënave nga Drejtoria e Policisë së Kalimit Kufitar të Kapshticës vetëm gjatë 24 orëve të fundit nëpërmjet PKK Kapshticë kanë hyrë dhe dalë 8424 shtetas me 3046 mjete. Konkretisht kanë hyrë në vendin tonë 6907 shtetas me 2485 mjete si dhe kanë dalë 1517 shtetas me 561 mjete”.

Sipas tij, për të përballuar fluksin e shtuar të udhëtarëve dhe mjeteve Policia Kufitare është angazhuar për të shmangur krijimin e radhëve dhe për të minimizuar kohën e pritjes.

Ndërsa Drejtoria e Kalimit Kufitar të Kakavijës bën të ditur se në 24 orët e fundit janë përpunuar 10.087 shtetas në hyrje-dalje, nga të cilët 8537 në hyrje dhe 1550 në dalje, si dhe 2902 mjete në hyrje-dalje, nga të cilat 2413 në hyrje dhe 489 në dalje.

Autoritetet kufitare u bëjnë thirrje udhëtarëve të planifikojnë lëvizjet dhe të respektojnë rregullat, pasi fluksi pritet të vijojë edhe në ditët në vazhdim.

/k.s/r.e/a.f/

The post Fluks udhëtarësh në Kapshticë dhe Kakavijë appeared first on Agjencia Telegrafike Shqiptare.

TIRANË, 26 dhjetor/ATSH/ Ministria e Turizmit, Kulturës dhe Sportit ka përcaktuar rregullat e reja dhe kriteret për dhënien e shtetësisë shqiptare për personat që ndihmojnë në evidentimin e kontributit me interes kombëtar në fushën e artit, kulturës dhe sportit.

Në Fletoren Zyrtare është publikuar udhëzimi i firmosur nga ministri i Turizmit, Kulturës dhe Sportit, Blendi Gonxhja, i cili detajon se si do të vlerësohen kërkesat e të huajve që duan të pajisen me pasaportën shqiptare përmes meritave të veçanta.

Sipas udhëzimit, përveç kritereve të përgjithshme, aplikuesit në programet e veçanta të shtetësisë me interes në fushën e artit, kulturës dhe sportit, duhet të plotësojnë edhe kriteret specifike shtesë.

“Kandidati duhet të ketë përfaqësuar ose promovuar Shqipërinë në skenën ndërkombëtare përmes artit, filmit, muzikës, letërsisë apo formave të tjera kulturore dhe disiplinave sportive, si dhe të ketë kontribut në krijimin e personave juridikë në fushën e artit, kulturës, sportit dhe mbështetjes së aktiviteteve, programeve, nismave në këto fusha”, thuhet në udhëzim.

Udhëzimi saktëson edhe rrugën që ndjek dosja e një aplikanti.

Drejtoria përgjegjëse pranë MTKS regjistron menjëherë kërkesat e ardhura nga Agjencia e Posaçme për Programet e Shtetësisë (AHVPSH).

Ministri ngre një komision ad-hoc, për vlerësimin e aplikimit në aspekt të kontributit me interes kombëtar në fushën e artit, kulturës dhe sportit.

Pas përfundimit të shqyrtimit, grupi i punës i paraqet ministrit për miratim raportin përfundimtar, i cili përmban përshkrimin e kontributit të aplikuesit në një nga fushat; dokumentacionin mbi të cilin bazohet vlerësimi; qëndrimin lidhur me evidentimin ose jo të kontributit në fushën e artit, kulturës dhe sportit si dhe rekomandimin për miratimin ose mosmiratimin e propozimit për dhënie shtetësie.

Për zbatimin e këtij udhëzimi ngarkohet struktura përgjegjëse për politikat e trashëgimisë kulturore, zhvillimit të arteve dhe politikave të sportit dhe anëtarët e grupit ad-hoc.

Ky udhëzim hyn në fuqi pas botimit në Fletoren Zyrtare.

/k.s/r.e/a.f/

The post Pasaporta shqiptare për “interes kombëtar”, procedurat për artistët e sportistët appeared first on Agjencia Telegrafike Shqiptare.

TIRANË, 26 dhjetor/ATSH/ Festat e fundvitit kanë sjellë një atmosferë festive edhe në shkollat e vendit, duke i “veshur” me ngjyra dhe gjallëri përmes programeve artistike me këngë dhe kërcime.

Kryeministri Edi Rama ndau sot në rrjetet sociale performancën e realizuar nga nxënësit e shkollës “Gustav Mayer” në Tiranë me rastin e festave.

“Atmosferë festive nga oborri i shkollës “Gustav Mayer”, me meloditë e fundvitit përmes programit Art dhe Zeje, si një kartolinë urimi”, shkruan Rama.

Nxënësit të veshur me veshje festive dhe kapuçët e babagjyshit sollën nën ritmet e muzikës një performancë shumë të bukur, që u interpretua në oborrin e shkollës.

Aktivitetet e organizuara në shkollat e vendit kanë sjellë buzëqeshje dhe emocione, duke e kthyer shkollën në një hapësirë feste në prag të ndërrimit të viteve.

/k.s/r.e/a.f/

The post Atmosferë festive nga nxënësit e shkollës “Gustav Mayer” në kryeqytet appeared first on Agjencia Telegrafike Shqiptare.

TIRANË, 26 dhjetor/ATSH/ Reshjet e dëborës kanë përfshirë gjatë natës dhe mëngjesin e sotëm segmentin rrugor Boboshticë-Dardhë, në Korçë.

Prefekti i qarkut të Korçës, Nertil Jole tha sot për ATSH-në se “për shkak të temperaturave të ulëta në të gdhirë të ditës së sotme ky aks rrugor u mbulua nga dëbora. Prej mëngjesit kontraktori po punon për largimin e dëborës dhe hedhjen e kripës”.

Sipas tij, të gjitha akset rrugore kombëtare janë të hapura dhe qarkullimi rrugor zhvillohet normalisht.

“Stafi i Drejtorisë Qendër-Lindje i Autoritetit Rrugor Shqiptar po i monitoron ato për të siguruar çdo ndërhyrje aty ku është e nevojshme”, tha Jole.

Jole theksoi se “nga komunikimet me strukturat vendore të Emergjencave Civile, nuk raportohen situata emergjente në territorin e qarkut Korçë. Prurjet e lumenjve dhe përrenjve paraqiten brenda kuotave normale”.

“Nga OSHEE bëhet me dije se fideri Vithkuq, NST Rehovë, është pa energji elektrike, duke prekur 205 abonentë ruralë në zonën e Lekasit (13 kabina). Po ndiqet situata nga strukturat përkatëse”, tha Jole.

Autoritetet Rrugore u bëjnë apel drejtuesve të mjeteve të kenë kujdes, të pajisen me goma dimërore dhe zinxhirë, të ulin shpejtësinë e të respektojnë sinjalistikën dhe udhëzimet e Policisë Rrugore, kur udhëtojnë në zonat me prani dëbore.

/k.s/a.f/r.e/

The post Dëborë në Boboshticë-Dardhë, Jole: Borëpastrueset në terren, akset rrugore të kalueshme appeared first on Agjencia Telegrafike Shqiptare.

TIRANË, 25 dhjetor/ATSH/ Në qytetin e Gjirokastrës në këtë fundvit janë rikthyer pas 34 viteve mungesë shfaqjet e Teatrit të Kukullave për fëmijë.

Rikthimi i traditës së shfaqjeve synon argëtimin dhe edukimin e fëmijëve gjirokastritë.

Aktori Bujar Sulejmani, i cili ka pasur një karrierë të gjatë prej 55 vitesh në Teatrin e Kukullave të Gjirokastrës tha për mediet se prej disa ditësh po japim shfaqje dhe fëmijët gjirokastritë po argëtohen në këto festa të fundvitit.

“Fëmijët duhet të heqin dorë nga telefoni të vijnë në teatër se ka shumë gjëra të bukura, shfaqjet janë argëtuese dhe edukative dhe ju bën shumë mirë”, tha aktori Niko Ura.

Ndërsa aktori Fredi Beqo shprehet se “shfaqjet na kishin munguar shumë edhe ne aktorëve, por edhe fëmijëve të vegjël, pasi këtu vijnë dhe argëtohen. Po t’i shikosh sa të kënaqur dalin kur përfundon shfaqja është një emocion i madh për ne”.

Kryetari i bashkisë së Gjirokastrës, Flamur Golemi thekson se “përgjatë fundjavave me bashkëpunimin e aktorëve të vjetër të qytetit, në skenën e ngritur rishtazi do të shfaqen pjesë për fëmijë”.

Shfaqjet po jepen me rastin e festave të fundvitit, ndërsa në vijim fëmijët e çerdheve, kopshteve dhe shkollave do të kenë mundësi të ndjekin shfaqje çdo fundjavë.

/k.s/a.f/

The post Teatri i Kukullave rikthehet në Gjirokastër pas 34 vitesh mungesë appeared first on Agjencia Telegrafike Shqiptare.

TIRANË, 25 dhjetor/ATSH/ Në Himarë, babagjyshi ndryshe nga viti i kaluar ka ardhur nga ajri, duke kthyer Krishtlindjen në një festë magjike që fëmijët do ta mbajnë mend gjatë.

Kryetari i bashkisë së Himarës Vangjel Tavo publikoi pamje nga atmosfera e gëzueshme e fëmijëve.

“Shëtitorja e Himarës u mbush me buzëqeshje, emocione dhe gëzim të pafund për fëmijët tanë. Me rastin e festës së Krishtlindjes, u shpërndanë dhurata për më të vegjlit, duke sjellë ngrohtësi, dashuri dhe frymën e vërtetë të festës në çdo cep të qytetit.
Momenti më i veçantë i ditës ishte pa dyshim ardhja surprizë e Babagjyshit, këtë vit jo nga deti, por nga ajri, duke zbritur mbi Himarë dhe duke kthyer këtë ditë në një përvojë magjike që fëmijët do ta mbajnë mend gjatë”, theksoi Tavo.

Ardhja e Babagjyshit nga ajri ishte një surprize e bukur për të gjithë në një dite feste, ku Himara këtë vit ka zgjedhur një mënyrë të veçantë për të festuar së bashku me banorët dhe fëmijët.

“Himara feston me zemër të madhe, me vëmendje për fëmijët dhe me aktivitete që forcojnë ndjenjën e komunitetit dhe gëzimin e përbashkët. Gëzuar Krishtlindjen për të gjithë”, shkruan Tavo.

Mes gëzimit të festës dhe këtij momenti të veçantë nuk kanë munguar urimet edhe nga fëmijët e banorë të Himarës në festën e Krishtlindjeve.

/k.s/a.f/

The post Babagjyshi vjen nga ajri, surprizon fëmijët në shëtitoren e Himarës appeared first on Agjencia Telegrafike Shqiptare.

TIRANË, 25 dhjetor/ATSH/ Mijëra besimtarë të krishterë në të gjithë vendin festuan sot Krishtlindjen, ku morën pjesë në meshat e organizuara ku u lutën për më shumë paqe dhe begati.

Në qytetin e Shkodrës mesha e shenjtë e Krishtlindjes u kremtua në katedralen “Shën Shtjefni”, ku Arqipeshkëvi Giovani Peragine udhëhoqi meshën e parë të Krishtlindjes që pas emërimit të tij në këtë detyrë.

Besimtarët uruan njëri-tjetrin, ndërsa një urim përcolli edhe Imzot Angelo Masafra.

Në qytetin e Korçës qindra besimtarë ortodoksë që në mëngjes herët iu drejtuan Katedrales “Ngjallja e Krishtit” në Korçë ku ndoqën meshën e drejtuar nga Mitropoliti i Korçës Hirësia e tij Imzot Anastasi.

Qindra besimtarë të krishterë në Lezhë iu bashkuan ritualit fetar të lindjes së Krishtit në Katedralen e Shën Nikollit në Lezhë, ndërsa mesha e shenjtë u drejtua nga ipeshkvi i Dioqezës së Lezhës, Otavio Vitale, i cili vuri theksin tek mungesa e paqes në botë.

Në Durrës besimtarët e krishterë morën pjesë në meshën e zhvilluar në Kishën Dioqezane Tiranë–Durrës, si edhe në Katedralen e Shën Astit dhe Apostullit Pal. Momente lutjeje, reflektimi dhe paqeje u bashkuan në këtë festë të shenjtë.

Krishtlindja u kremtua edhe në qytetin e Gjirokastrës, ku besimtarët uruan njëri-tjetrin për më shumë shëndet dhe mbarësi.

Besimtarët u bënë pjesë e meshës edhe në qytetin e Fierit dhe Lushnjës, ndërsa Krishtlindja u kremtua edhe në qytete të tjera të vendit.

/k.s//a.f/

The post Besimtarët e krishterë në rrethe festojnë Krishtlindjen appeared first on Agjencia Telegrafike Shqiptare.

TIRANË, 25 dhjetor/ATSH/ Besimtarët katolikë morën pjesë në meshën e Krishtlindjes në mesnatë, në katedralen e “Shën Palit”.

Mesha u drejtua nga kreu i Kryedioqezës Mitropolitane Tiranë-Durrës, Arjan Dodaj.

“Netët e mbara të historisë së njerëzimit nuk janë një dritë e fortë që imponon, por një dritë e butë që ndriçon rrugën e çdo njeriu. Ajo përshkon shekujt dhe arrin tek ne, këtu, sonte. Ecim me gëzim dhe shpresë përballë çdo zhgënjimi njerëzor, sikurse kemi shtegtuar në këtë vit jubilear të shpresës, sepse për ne ka lindur Shpëtimtari. Jezusi mbetet për ne gjithmonë Zoti ynë, por edhe vëllai ynë. Leximet e kësaj nate, që sapo kemi dëgjuar, na ndihmojnë të kuptojmë se Krishtlindja nuk është thjesht premtimi i një përkujtimi të një ngjarjeje të kaluar. Sot shumë njerëz përjetojnë errësirën, siç dëgjojmë dhe shohim në luftë”, tha Imzot Arjan Dodaj.

Në meshë ishin të shumtë besimtarët katolikë të pranishëm, të cilët pritën mes lutjesh mbërritjen e mesnatës së 25 dhjetorit, lindjen e Jezusit.

Krishtlindja është nga festat më të rëndësishme në kalendarin e besimtarëve katolikë, por edhe atyre ortodoksë, të cilët meshën e festës e mbajnë në mëngjesin e 25 dhjetorit.

Festa e Krishtlindjes quhet dhe Lindja në Mish e Zotit dhe Perëndisë dhe Shpëtimtarit tonë Jezu Krisht. Në Krishtlindje kremtohet lindja si njeri e Birit të Perëndisë, të atij që së bashku me Atin dhe Shpirtin e Shenjtë është me të vërtetë Perëndi në jetë të jetëve.

Prandaj në Kishë këndohet: Virgjëresha lindi sot të përmbiqenshmen Fjalë, edhe dheu i blaton të paafruarit shpellën; Engjëjt, me barinjtë po lavdërojnë, Magët pra, bashkë me yllin po udhëtojnë; se për ne ka lindur Krishti, si djalë foshnjë, i parëjetshmi Zot.

Festa e Krishtlindjes është kremtimi i shpëtimit të botës nëpërmjet Birit të Perëndisë, i cili u bë njeri për ne, që me anën e tij, ne të mund të bëhemi hyjnorë, bij të Perëndisë Atë, me anë të banimin ndër ne të Shpirtit të Shenjtë.

Mesha në mesnatë janë mbajtur edhe në kisha e tjera katolike, të shpërndara në 6 dioqezat e vendit.

Mesha e Krishtlindjes në katedralen e “Shën Palit”, foto: Andrin Hoxha

1 nga 32

/k.s/j.p/

The post Besimtarët katolikë në meshën e Krishtlindjes, Imzot Dodaj: Ecim me gëzim dhe shpresë përballë çdo zhgënjimi njerëzor appeared first on Agjencia Telegrafike Shqiptare.

TIRANË, 24 dhjetor/ATSH/ Në mbyllje të këtij viti dhe në vigjilje të festës së Krishtlindjes, siç është kthyer në traditë tashmë, Kryeministri Edi Rama, i shoqëruar nga ministrja e Shëndetësisë dhe Mirëqenies Sociale Evis Sala vizitoi Qendrën Spitalore Universitare “Nënë Tereza” në kryeqytet, për t’u përshëndetur me mjekë, dhe infermierë, por jo vetëm.

Pacientët e vegjël që trajtohen në shërbimin e Pediatrisë ishin të parët që u vizituan nga Kryeministri Rama, i cili shpërndau për ta dhurata me rastin e festave të fundvitit, duke iu uruar shërim të shpejtë dhe kthim sa më parë në shtëpi.

“Ne e bëjmë këtë çdo vit, kështu që kemi ardhur të sjellim dhuratat për ju që ta kaloni gëzuar Vitin e Ri bashkë me mamat dhe me babat, edhe që të shëroheni sa më shpejt që të ktheheni në shtëpi dhe në shkollë”, uroi Kryeministri vogëlushët që shoqëroheshin nga prindërit në mjediset spitalore.

Më tej, Kryeministri Rama, vijoi vizitën në Spitalin Onkologjik, i cili në muajt e fundit ka përmirësuar ndjeshëm infrastrukturën dhe ka rritur kapacitetet pritëse.

Drejtuesja e QSUNT Anxhela Paparizo, e cila shoqëronte Kryeministrin në këtë vizitë, informoi se është realizuar rikonstruksioni i një sërë ambienteve, mes të cilave sallat e kemioterapisë ditore, që janë pajisur edhe me aparatura të teknologjisë moderne.

Ndërsa Ministrja e Shëndetësisë dhe Mirëqenies Sociale Evis Sala shtoi se është realizuar edhe rregullimi i fashave orare, duke i dhënë përparësi pacientëve të ardhur nga rrethet për kemioterapinë ditore, për të cilën është hapur dhe një sallë e dytë me kapacitet më të madh, me poltrone dhe sistem monitorimi bashkëkohor.

Nga ana e tij, kryeministri Rama u shpreh se synimi është që shërbimi i kemioterapisë të ofrohet edhe nëpër rrethe, në mënyrë që të shmanget fluksi i shtuar në QSUNT.

Në vijim, Kryeministri Rama zhvilloi një takim të zgjeruar me personelin mjekësor, mjekë, infermierë, ekipe të urgjencës mjekësore dhe specializantë.

1 nga 6

/k.s/j.p/

The post Rama në QSUNT: Shërbimi i kemioterapisë të ofrohet edhe në rrethe appeared first on Agjencia Telegrafike Shqiptare.

TIRANË, 24 dhjetor/ATSH/ Drejtuesi i ri i SPAK, Klodjan Braho do të ketë prioritet të punës së tij në krye të institucionit të drejtësisë të garantojë që askush të mos jetë mbi ligjin dhe që të gjithë të jenë të barabartë para tij.

I pyetur nga BIRN, Braho i cili mori detyrën e kryeprokurorit të SPAK më 19 dhjetor, u shpreh se “do të përqendrohemi në çështjet aktuale dhe do të vijojmë hetimet e thelluara, përfshirë analizën e pasurive të përfituara në mënyrë të paligjshme dhe konfiskimin e tyre”.

Klodjan Braho u përzgjodh këtë muaj si drejtuesi i ri i Prokurorisë së Posaçme Kundër Korrupsionit dhe Krimit të Organizuar për një mandate trevjeçar duke zëvendësuar Altin Dumanin.

Prokuroria e Posaçme kundër Korrupsionit dhe Krimit të Organizuar është institucion i dalë nga reforma në drejtësi.

Braho renditi si kusht të rëndësishëm për funksionimin e duhur të SPAK-ut forcimin e pavarësisë dhe profesionalizmit të prokurorëve dhe hetuesve.

“Do të punojmë gjithashtu për forcimin institucional të SPAK-ut dhe rritjen e kapaciteteve për mbledhjen dhe analizën e informacionit”, vuri në dukje ai.

“Qëllimi ynë është të rrisim besimin e publikut te drejtësia dhe këtë mund ta arrijmë vetëm duke vendosur standarde të larta në luftën kundër korrupsionit dhe krimit të organizuar”, përfundoi Braho.

The post Braho: Prioritet i SPAK, askush të mos jetë mbi ligjin appeared first on Agjencia Telegrafike Shqiptare.

TIRANË, 24 dhjetor/ATSH/ Drejtuesi i Operatorit të Shpërndarjes së Energjisë Elektrike (OSHEE), Enea Karakaçi, sqaroi sot në një intervistë televizive se nuk ka sanksione nga Komuniteti i Energjisë i BE-së ndaj Shqipërisë.

Ai vuri në dukje se Komuniteti i Energjisë i Bashkimit Europian ka qëllim jo të sanksionojë shtetet, ai është ndërtuar mbi baza vullnetare nga shtetet, të cilat kanë dëshirë të futen në BE.

Karakaçi informoi po ashtu edhe në lidhje me funksionimin e komunitetit. “Për t’u futur në BE ke nevojë të marrësh disa masa ligjore, nënligjore vepruese dhe kjo është krejtësisht normale. Çdo vit Sekretariati i Energjisë jep masa komanduese për shtetet sepse edhe direktivat e BE-së miratohen në mënyrë të vazhdueshme”, u shpreh ai.

“Ne kemi qenë në përputhje me kuadrin rregullator të BE-së deri para një viti sepse ligji jonë ishte në përputhje me direktivën e shkuar, tani ka dalë një direktivë e re dhe na kërkohet që të aprovohet një direktivë e re”, tha Karakaçi.

I pyetur se kur pritet të miratohet pr/ligji i ri “Për sektorin e energjisë elektrike”, zv/ministri tha se brenda 31 korrikut 2026 ligji është i miratuar.

Karakaçi theksoi se projektligji është publikuar në faqen e konsultimit publik, që është detyrim ligjor. “Pr/ligji është në formën përfundimtare dhe shumë shpejt do të fillojë procedura e miratimit në qeveri dhe shumë shpejt në parlament”, saktësoi drejtuesi i OSHEE.

Sipas relacionit të projektligjit, qëllimi kryesor i këtyre ndryshimeve është harmonizimi i legjislacionit shqiptar me Paketën e Energjisë së Pastër të Bashkimit Evropian, duke përfshirë dispozitat e rëndësishme që lidhen me tregun e energjisë elektrike.

Kjo nismë vjen si pjesë e angazhimeve të Shqipërisë si palë kontraktuese e Komunitetit të Energjisë dhe në përputhje me detyrimet nga Marrëveshja e Stabilizim-Asociimit me BE-në, e cila kërkon përafrimin dhe zbatimin efektiv të legjislacionit europian.

Karakaçi foli edhe për çmimin e energjisë elektrike duke theksuar se nuk do të ketë rritje të saj në vitin 2026.

“Çmimi vazhdon të jetë i ulur, patjetër që nuk do të ketë rritje çmimi në vitin 2026, pra do jetë i njëjti çmim i miratuar me ulje në vitin 2025. E theksoj faktin se ne bëmë një ulje çmimi me 10.5 % në vitin 2025, që do vazhdojë të jetë i aplikueshëm edhe në vitin 2026″, tha Karakaçi.

/k.s/j.p/

The post Karakaçi: Nuk ka asnjë sanksion nga Komuniteti i Energjisë i BE për Shqipërinë appeared first on Agjencia Telegrafike Shqiptare.

TIRANË, 24 dhjetor/ATSH/ Për herë të parë në sektorin e shëndetësisë gjatë 2026 do të fillojë edhe indeksimi vjetor i pagës mbi bazën e vjetërsisë në punë.

Kryeministri Edi Rama në bashkëbisedimin e sotëm me personelin shëndetësor në QSUNT u ndal edhe tek rritja e pagave për mjekët dhe infermierët.të cilët do të përfitojnë rritje të re përveç indeksimit vjetor.

“Do të vazhdojmë të rrisim pagat për mjekët, edhe patjetër do vazhdojmë të rrisim pagat edhe për infermierët. Faktikisht do të rritet 135 euro në muaj dhe në ndërkohë është vendosur edhe diçka tjetër për herë të parë, që nuk e kemi pasur mundësinë ta vendosim përpara, që do të bëjmë dhe një vlerësim në punë”, tha Rama.

Kryeministri Rama informoi se “do të bëhet faktikisht indeksimi vjetor i pagës mbi bazën e vjetërsisë në punë dhe kjo do të jetë një shtesë tjetër që do të vlejë, qoftë për mjekët, qoftë për infermierët apo për teknikët e shkencave mjekësore, gjë që shkon plus asaj rritjes për të cilën unë fola”.

Gjithashtu, shtoi Rama, do të rritet digjitalizimi, për të futur sa më shumë dhe sa më shpejt edhe inteligjencën artificiale në proceset e trajtimit të pacientëve nga ana e shërbimit shëndetësor.

/k.s/j.p/

The post Rama: Indeksim vjetor i pagës së mjekëve dhe infermierëve mbi bazën e vjetërsisë në punë appeared first on Agjencia Telegrafike Shqiptare.

TIRANË, 24 dhjetor/ATSH/ Kryeministri Edi Rama në bashkëbisedimin e sotëm me personelin shëndetësor në QSUNT vuri në dukje se 15 milionë euro ekstra vetëm për barnat onkologjike janë parashikuar në buxhetin e vitit të ardhshëm.

Po ashtu, ndërsa informoi se shëndetësia në buxhetin 2026 ka marrë 50 milionë euro më shumë sesa këtë vit, Rama tha se kjo shumë nuk është pak për buxhetin.

Kreu i Qeverisë u ndal posaçërisht tek buxhetin për barnat onkologjike, duke theksuar se  15 milionë euro të tjera do të shtohen në mesin e vitit të ardhshëm për të pasur një rimbursim domethënës të barnave onkologjike, në shërbimin parësor dhe për ta siguruar mbulimin me barna në të gjithë sistemin onkologjik.

Rama u zotua për transformim të sistemit onkologjik në mënyrë që gjithë presioni i madh që vjen mbi onkologjikun në Tiranë, të shpërndahet me rijetësimin e sistemit në spitalet rajonale, duke garantuar që protokollet dhe i gjithë mbulimi me barna, të jenë garanci për pacientët në të gjithë territorin.

Faktikisht, vijoi Rama, kemi vendosur në buxhet kapacitet domethënës për të rimbursuar 400 mijë pacientë. “Flasin shumë njerëzit, “jo po kur është shëndetësia falas”, “jo ku është shëndetësia falas”, po faktikisht gjithë këto gjëra që ndodhin këtu janë pjesë e këtij vizioni edhe faktikisht janë krejt ndryshe nga si ndodh në vende të tjera”, u shpreh Kryeministri.

Kreu i qeverisë po ashtu garantoi se do të vijojë transformimi i QSUNT-së për të mbyllur edhe çfarë ka mbetur pa u mbyllur, ndërkohë që ambicia është për të ngritur Institutin Kombëtar të Tumoreve dhe për të pasur një rrjet kombëtar për të adresuar këtë problem që bëhet gjithmonë e më i madh, jo në Shqipëri, por kudo ku kanceri po prek gjithmonë e më shumë njerëz.

/k.s/j.p/

The post Rama: 15 milionë euro ekstra vetëm për barnat onkologjike appeared first on Agjencia Telegrafike Shqiptare.

TIRANË, 24 dhjetor/ATSH/ Kryeministri Edi Rama zhvilloi sot një takim me personelin mjekësor, mjekë, infermierë, ekipe të urgjencës mjekësore dhe specializantë, të cilët i vlerësoi për sakrificën dhe përkushtimin në shërbim të qytetarëve.

Në fjalën e tij, Rama tha se nuk duhet harruar sakrifica dhe përkushtimi i të gjithë mjekëve, infermierëve, punonjësve të Urgjencës Kombëtare, të gjithë stafit që mbështet për çdo orë e çdo ditë të vitit pa pushim, duke shpëtuar jetë, duke shëruar njerëz të sëmurë dhe duke kryer një shërbim jetik për shoqërinë dhe për vendin.

Kreu i qeverisë u shpreh se janë rreth 60 mijë operacione të suksesshme që bën shërbimi ynë shëndetësor në vit edhe plus 35 mijë ndërhyrjet mikro-kirurgjikale, që së bashku bëjnë 95 mijë ndërhyrje në trupin e njerëzve mesatarisht në vit dhe që janë të suksesshme.

“Përderisa nuk bëjnë lajm të keq – nuk bëjnë lajm të mirë dhe mjafton një operacion i dështuar, mjafton një tragjedi për t’u kthyer në të kundërt, për të gjithë, për të gjithë trupën e mjekëve, për të gjithë shërbimin tonë kombëtar shëndetësor”, vuri në dukje Kryeministri.

“Kur ndodh pastaj që brenda këtij shërbimi identifikohen individë apo veprimtari që e njollosin bluzën e bardhë, atëherë sigurisht që kostoja e reputacionit është shumë e lartë dhe pavarësisht se totalisht e pamerituar për të tjerët, janë të gjithë që paguhen. Por, në fund të ditës për të gjithë ata që e dinë se çfarë do të thotë të shërbesh në sistemin shëndetësor, për të gjithë ata që marrin shërbim, pjesa pozitive është pozitive, është ajo që dominon”, nënvizoi Rama.

Kryeministri Rama u ndal edhe tek Spitali Onkologjik dhe investimet që janë kryer aty.

“Përpara se të vinim këtu, vizituam Onkologjikun, që siç e dimë shumë mirë, u bë shkas në një moment të caktuar për të ulur kokën të gjithë së bashku përballë faktesh që nuk nderojnë askënd. Takuam disa pacientë, të cilët ishin shumë të kënaqur me shërbimin dhe që dukej që ishin tërësisht të sinqertë në fjalët e tyre dhe unë po i thosha drejtores dhe ministrit, që opinioni ushqehet me negativitet të madh për shërbimin shëndetësor nga ata dhe prej atyre, që fatmirësisht nuk kanë marrë ndonjëherë shërbim në spital. Sepse po të pyesësh ata që kanë marrë shërbim në spital, pjesa dërrmuese, jo të gjithë patjetër, pjesa dërrmuese kanë marrë një shërbim që e kujtojnë për mirë,  edhe i kujtojnë mjekët për mirë, nuk i kujtojnë për keq. Dhe ju këtë e dini shumë mirë, sepse keni pacientë që kanë kaluar në kujdesin tuaj dhe ju jam mirënjohës, edhe ju kujtoj për mirë”, theksoi Rama.

Kryeministri Rama tha se gjithsesi, duhet vazhduar të adresohen problemet dhe të ngrihet niveli i shërbimeve.

Rama tha se ndërtesa e re e parkimit do të zgjidhë përfundimisht gjithë problematikën e lëvizjes së makinave dhe parkimit të makinave mbi lulishte, sepse do të akomodojë të gjitha makinat që hyjnë në territorin e QSUNT-së.

“Janë rreth 700 e ca makina që parkojnë gjatë ditës nëpër territor, ndërkohë që parkingu ka 1400 vende, kështu që do të akomodojë të gjitha makinat. Plus do të shërbejë edhe për komunitetin rreth e rrotull, duke krijuar të ardhura që do të ndahen midis QSUNT-së dhe Fondit Shqiptar të Zhvillimit. Dhe kjo do të bëjë që ndërkohë gjithë territori i QSUNT-së sot, që është faktikisht rreth 80 mijë metra katrorë territor i lirë, të bëhet parku më i madh urban i Tiranës, duke krijuar një atmosferë tërësisht tjetër, ku rrugët e makinave të ndahen midis rrugë këmbësorësh edhe rrugë për makinat e shërbimit”, tha Rama.

/k.s/j.p/

The post Rama: 95 mijë operacione të suksesshme në vit në shërbimin shëndetësor appeared first on Agjencia Telegrafike Shqiptare.

TIRANË, 23 dhjetor/ATSH/ Guvernatori i Bankës së Shqipërisë, Gent Sejko, zhvilloi një takim me publicistë, analistë, gazetarë dhe përfaqësues të shtypit të shkruar e medias elektronike në Shqipëri.

Në fjalën e tij, Guvernatori Sejko theksoi rëndësinë e komunikimit të qartë, të saktë dhe profesional në një mjedis ekonomik dhe financiar gjithnjë e më kompleks, duke vënë në dukje se bashkëpunimi me median është thelbësor për transparencën dhe mirëkuptimin publik të politikave të bankës qendrore.

Guvernatori Sejko nënvizoi se media ka një rol të pazëvendësueshëm në shpjegimin e vendimmarrjes monetare dhe financiare.

Ai u ndal gjithashtu në ecurinë e ekonomisë shqiptare gjatë vitit 2025, duke theksuar se ajo ka vijuar të shfaqë rritje të qëndrueshme, një treg pune të fortë dhe inflacion të ulët, në kushtet e një mjedisi të jashtëm të pasigurt.

Në këtë kontekst, politika monetare e Bankës së Shqipërisë ka qenë e kujdesshme dhe e orientuar drejt ruajtjes së stabilitetit, duke synuar një ekuilibër të qëndrueshëm mes kontrollit të inflacionit dhe mbështetjes së rritjes ekonomike.

“Vendimet tona kanë ndikim të drejtpërdrejtë në jetën e qytetarëve dhe të bizneseve, ndaj transparenca dhe shpjegimi i tyre mbeten një prioritet i vazhdueshëm për Bankën e Shqipërisë.”, theksoi ai.

Një vëmendje e veçantë iu kushtua edhe rolit të medias në luftën kundër dezinformimit financiar, ku Guvernatori e cilësoi median profesionale si një partnere të rëndësishme në rritjen e kulturës ekonomike dhe financiare në vend.

Ai nënvizoi se dialogu i hapur dhe kritik me gazetarët dhe analistët kontribuon në forcimin e llogaridhënies dhe të besueshmërisë institucionale, elemente thelbësore këto për stabilitetin ekonomik afatgjatë.

Një pjesë e veçantë e aktivitetit iu kushtua ndarjes së Çmimit të Guvernatorit për Diplomën më të Mirë për vitin 2025, si dëshmi e angazhimit të Bankës së Shqipërisë për nxitjen e kërkimit shkencor dhe ekselencës akademike.

Këtë vit, në këtë konkurs aplikuan 38 studentë me punime universitare dhe master, që trajtonin tema me rëndësi për politikëbërjen ekonomike dhe financiare në vend.

Studimi vlerëson ndikimin e politikës monetare mbi të ardhurat nga puna gjatë periudhës 2014–2024 dhe ndihmon në kuptimin e mekanizmit të transmetimit të politikës monetare në tregun e punës.

Çmimi i Tretë iu akordua studentes Eris Hoti, nga King’s College London, MSc Financial Policy and Regulation, për temën “Bank Size and Competition in Albania: Evidence from the Panzar and Rosse Model”.

Teza analizon konkurrencën në sektorin bankar shqiptar dhe evidenton dallimet në sjelljen konkurruese sipas madhësisë së bankave.

Në përmbyllje, Guvernatori Sejko përgëzoi fituesit dhe të gjithë pjesëmarrësit për nivelin e lartë të punimeve, duke i inkurajuar ata të ruajnë një lidhje të vazhdueshme me Bankën e Shqipërisë dhe të kontribuojnë në të ardhmen me dije dhe profesionalizëm në zhvillimin ekonomik dhe financiar të vendit.

/k.s/a.f/

Fituesit e Çmimit të Guvernatorit për vitin 2025 janë:

• Çmimi i Parë iu akordua studentes Guina Shkëmbi, nga Frankfurt School of Finance and Management, për temën e masterit “The Current Road to SEPA: Assessing Compliance Challenges and Economic Impact in Albania”. Studimi analizon përfitimet ekonomike të integrimit në SEPA, sfidat rregullatore dhe operative, si dhe nivelin e përputhshmërisë së sistemeve të pagesave në Shqipëri me standardet evropiane, duke ofruar rekomandime konkrete për përshpejtimin e këtij procesi.

Çmimi i Dytë iu akordua studentes Eva Billa, nga Fakulteti Ekonomik, Universiteti i Tiranës, për temën “Efektet e Politikës Monetare në të Ardhurat nga Puna në Shqipëri”.

The post Sejko takim me gazetarët, ndahet ”Çmimi i Guvernatorit për diplomën më të mirë për vitin 2025” appeared first on Agjencia Telegrafike Shqiptare.

TIRANË, 23 dhjetor/ATSH/ Në Tiranë u zhvillua sot ceremonia e nderimit me Medalje Ari të 190 nxënësve të shkollave të të gjithë vendit, që kanë përfunduar me rezultate të shkëlqyera ciklin e arsimit të mesëm të lartë.

Në ceremoninë e organizuar në Kryeministri, gjatë së cilës u dhanë medaljet nga Kryeministri Edi Rama dhe ministrja e Arsimit, Mirela Kumbaro.

Në fjalën e saj ministrja Kumbaro tha se “jeni 190 nxënës ekselentë nga i gjithë vendi, që keni shkëlqyer me rezultatet tuaja të gjimnazit e të Maturës Shtetërore. Jeni këtu sepse nuk jeni dorëzuar! Dhe për këtë arsye, sot nuk kam ndërmend t’ju mësoj asgjë. As nuk do të guxoja, sepse më të mirëve nuk mund t’u japim leksione, por vetëm besim”.

“Medalja e Artë që merrni sot është një simbol i karakterit, sepse është dëshmia më e mirë dhe prova e qartë se suksesi nuk të vjen nga rastësia, por nga zgjedhjet e përditshme dhe ju më mirë se kushdo e dini, por nëse ma lejoni, unë do t’ju kërkoja që këtë t’ua tregonit sa më shumë prej bashkëmoshatarëve tuaj apo vëllezërve e motrave më të vegjël”, tha Kumbaro.

Ministrja Kumbaro tha se “suksesi juaj i vërtetë do të matet me ndikimin që do të keni tek të tjerët, se si do ta përdorni gjeniun brenda jush për të ndërtuar, për të përmirësuar jetën e të tjerëve, për t’i bërë gjërat edhe më mirë. Kjo medalje që ju do të merrni sot është një kujtesë e fortë se sukseset nuk kanë ardhur tek ju, por keni shkuar ju pas çdo suksesi të arritur deri më sot”.

Kumbaro ndau gjithashtu me nxënësit një lexim nga autorja Maya Angelou.

“Je shumatorja e gjithçkaje që ke parë, dëgjuar, ngrënë, nuhatur, të është thënë apo ke harruar – të gjitha janë aty. Çdo gjë ndikon te secili prej nesh, dhe për këtë arsye përpiqem të sigurohem që përvojat e mia të jenë sa më të mira”, citoi Kumbaro autoren Maya Angelou.

/k.s/a.f/

The post Medalje Ari për 190 nxënës ekselentë appeared first on Agjencia Telegrafike Shqiptare.

TIRANË, 23 dhjetor/ATSH/ Shqipëria edhe gjatë muajit nëntor ka tërhequr vizitorët e huaj, duke konfirmuar pozicionin e saj si një nga destinacionet më të preferuara turistike në rajonin e Ballkanit edhe gjatë stinës së dimrit.

Gjatë muajit nëntor të këtij viti në territorin e Shqipërisë kanë hyrë 1.282.118 shtetas shqiptarë dhe të huaj, duke shënuar një rritje me 1,4 %, krahasuar me nëntorin e një viti më parë.

Sipas shifrave të publikuara nga INSTAT 1.322.499 shtetas shqiptarë dhe të huaj rezultojnë të kenë dalë nga territori i Shqipërisë, duke shënuar një rritje me 3,7 %, krahasuar me të njëjtën periudhë të një viti më parë.

“Në nëntor 2025, numri i shtetasve shqiptarë që kanë hyrë në territorin shqiptar është 652.150, duke pësuar një rënie me 1,3 %, krahasuar me Nëntor 2024. Numri i shtetasve të huaj që kanë hyrë në territorin shqiptar është 629.968. Ky numër është rritur me 4,2 %, krahasuar me të njëjtën periudhë të vitit 2024”, thuhet në njoftimin e INSTAT.

INSTAT bën të ditur se “në nëntor 2025, 96% e hyrjeve të shtetasve të huaj në Shqipëri janë nga rajoni i Evropës. Evropa Jugore zë 86 % të hyrjeve të shtetasve të huaj nga kontinenti Evropian, ndjekur nga Evropa Perëndimore me 5 %, Evropa Qendrore/ Lindore dhe Evropa Veriore secili me 4 %”.

Sipas INSTAT, qëllimi i hyrjes në territorin shqiptar i shtetasve të huaj, në 97 % të rasteve është për qëllime personale.

“Në nëntor 2025, ky tregues ka shënuar një rritje me 4,5 % krahasuar me Nëntor 2024. Hyrjet e shtetasve të huaj për qëllime biznesi dhe profesionale kanë rënë me 3,6 %”, theksohet në njoftimin e INSTAT.

Ndërkohë sa i takon daljeve në muajin nëntor 2025, 677.065 shtetas shqiptarë numërohen të kenë dalë nga territori i Shqipërisë, duke shënuar rritje me 7,5%, krahasuar me Nëntor 2024.

“Daljet e shtetasve të huaj nga territori i Shqipërisë gjatë muajit Nëntor 2025 janë 645.434. Krahasuar me të njëjtën periudhë të një viti më parë, ky tregues paraqitet pothuajse i pandryshuar, me një rënie shumë të lehtë prej 0,01%”, vlerëson INSTAT.

/k.s/a.f/

The post Mbi 1.2 milionë persona erdhën në Shqipëri gjatë nëntorit appeared first on Agjencia Telegrafike Shqiptare.