TIRANË, 18 janar/ATSH/ Prokuroria e Posaçme Kundër Korrupsionit dhe Krimit të Organizuar informoi sot mbi operacionin e zhvilluar dy ditë më parë në kryeqytet për goditjen e Call Center-ave, nga ku telefonoheshin dhe mashtroheshin shtetas italianë, për investime në kriptomonedha të ndryshme.

SPAK bëri të ditur se gjatë operacionit janë arrestuar në flagrancë gjashtë persona, si dhe janë ekzekutuar urdhërndalimet për dy të tjerë dhe janë shpallur në kërkim tre persona, ndërkohë që të paktën 28 objekte ku ushtronin veprimtarinë e tyre Call Center-at janë kontrolluar nga Byroja Kombëtare e Hetimit dhe Policia e Shtetit.

“Në 9 janar regjistruam procedimin penal për kryerjen e veprës penale të “Mashtrimit Kompjuterik”, në bashkëpunim, në formën e grupit të strukturuar kriminal. Procedimi u regjistrua në Byronë Kombëtare të Hetimit pas paraqitjes së gazetarëve italianë të emisionit investigativ ‘Le Iene’, që transmetohet në Mediaset. Ata kanë dorëzuar materiale të punës së tyre”, thuhet në njoftimin e SPAK.

Gjatë këtij hulumtumi, SPAK bëri të ditur se është identifikuar një Qendër Thirrjesh (Call Center) që ndodhet në Tiranë, në ndërtesën “Atti Tower”, në rrugën “Ibrahim Rugova”, përballë Katedrales Ortodokse, nga ku, autorët e mirorganizuar dyshohet se kanë mashtruar shtetas italianë dhe europianë për investime në kriptomonedha të ndryshme.

“Investigimi mori shkas nga ankesat e disa shtetasve italianë të mashtruar nga Qendra e Thirrjeve. Gazetarët italianë mundën të infiltrojnë një shtetas italianë, i cili nisi të punojë aty dhe realizoi regjistrimin e të dhënave në ambientet e Qendrës së Thirrjeve. Nga të dhënat rezulton se në këtë veprimtari dyshohet të jenë përfshirë shtetas italianë, rezidentë në Itali dhe të tjerë që jetojnë në Shqipëri, ndërsa transaksionet kryheshin në kriptovaluta, në portofolet e monedhave virtuale të menaxhuara nga drejtuesit e këtij aktiviteti të kundraligjshëm, duke përdorur platforma mashtruese”, vijon njoftimi i SPAK.

Duke iu referuar materialeve video bëhet fjalë për një Qendër Thirrjesh, që ndodhej në katin e 9-të dhe të 13-të të “Atti Tower”. SPAK thekson se nga pamja e përgjithshme, dinamika e komunikimit dhe veprimet e personit që kryen regjistrimin apo edhe personave të tjerë, shihet se është një qendër e mirorganizuar e thirrjeve telefonike, me poste pune të ndara, role të përcaktuara dhe staf që operonte në gjuhën italiane, franceze, spanjolle dhe gjermane.

Pas regjistrimit të këtij procedimi penal, hetuesit e Byrosë Kombëtare të Hetimit kanë nisur menjëherë puna për identifikimin e organizatorëve dhe dokumentimin e aktiviteti kriminal të mashtrimit.

Nga veprimet e para hetimore të BKH-së, rezultoi se organizatorët e kësaj veprimtarie kriminale kishin ngritur një strukturë të sofistikuar sigurie, me disa perimetra mbrojtës, duke përdorur jo vetëm kamerat filmike statike, por edhe personel civil vëzhgimi, jashtë kësaj qendre.

“Ekzistojnë indicie të qarta se mbrëmjen e datës 15 janar 2026, pas përfundimit të punës, pjesëtarë të këtij personeli vëzhgues, kanë njoftuar pronarët e Qendrës për një ndërhyrje të mundshme. Pas kësaj, në orët e para të mëngjesit të datës 16 janar 2026, janë larguar pajisjet dhe është boshatisur edhe ambienti i Qendrës së Thirrjeve”, thekson SPAK.

Pas ekzekutimit të vendimit të Gjykatës së Posaçme, hetuesit e BKH-së konstatuan në datën 16 janar 2026, boshatisjen e ambientit dhe largimin e pajisjeve dhe personelit. “Falë veprimeve të shpejta dhe të pandërprera hetimore u bë i mundur identifikimi i personave dhe automjeteve të përdorura për largimin e pajisjeve kompjuterike dhe sistemeve nga Call Center-i. Pas gjurmimit të tyre, në një kohë të shkurtër, u realizua kapja në flagrancë e disa shtetasve, të cilët kishin transportuar gjatë natës materiale drejt një ambient tjetër të marrë me qira në “Downtown One”, në bulevardin “Bajram Curri””, vijon më tej njoftimi për shtyp.

Pas kapjes në flagrancë të këtyre shtetasve, hetuesit kanë bërë kontrollin me iniciativë të ambientit në katin e 5-të të godinës, ku është konstatuar një Qendër tjetër Thirrjesh, në ndërtim e sipër. Aty u gjetën pajisje kompjuterike, telefona, harddisqe, laptopë, karta të ndryshme SIM, dokumente, blloqe me shënime. Personat e kapur në flagrancë, po transportonin një kosh mbeturinash, i cili përmbante sende të dyshuara të marra nga Qendra e Thirrjeve në rrugën “Ibrahim Rugova”, të cilat ishin duke i asgjësuar.

Në kushtet e kapjes në flagrancë është kërkuar mbështetja e punonjëve të Policisë të Drejtorisë Vendore Tiranë.

“Shtetasin e arrestuar në flagrancë janë 6 persona me inicialet: R.Gj., D.Q., E.Gj., E.M., R.P., O.K.. Gjithashtu, paralelisht me identifikimin e Qendrës së dytë të thirrjeve, në sajë të veprimeve verifikuese, janë nxjerrë dhe ekzekutuar urdhrat e ndalimit për shtetasit me inicialet; K.K. dhe H.XH., si të dyshuar për kryerjen e veprës penale të “Mashtrimit kompjuterik”, në bashkëpunimin, në formën e grupit të strukturuar kriminal”, thuhet në njoftimin e SPAK.

Në ecuri të veprimeve hetimore, SPAK njofton se në datën 17 janar janë lëshuar dhe urdhrat e ndalimit për tre shtetas të tjerë, të dyshuar për kryerjen e veprës penale të “Mashtrimit kompjuterik”, në bashkëpunimin, në formën e grupit të strukturuar kriminal, të cilët nuk janë gjetur deri në këto momente.

“Gjatë kontrolleve të ushtruara në 28 ambiente; banesa, automjete, zyra, garazhde, etj, janë gjetur dhe sekuestruar në cilësinë e provës materiale, qindra pajisje kompjuterike të cilat janë në proces verifikimi, sisteme monitorimi të kamerave, sisteme të rrjetit kompjuterik, pajisje memorizuese, server, dokumente të Qendrës së Thirrjeve, subjektit “Infinite” shpk dhe subjekteve të tjerë në proces verifikimi. Gjithashtu janë sekuestruar edhe automjete të përdorur nga autorët e dyshuar, motomjete si dhe një automjet luksoz i markës “Ferrari”, që dyshohet se i përket organizatorëve të këtij aktiviteti”, thuhet në njoftim.

Prokuroria e Posaçme vijon kryerjen e veprimeve hetimore për inventarizimin e të gjitha pajisjeve kompjuterike, sekuestrimin, analizimin e tyre si dhe identifikimin e të gjithë viktimave të veprës penale, në bashkëpunim me autoritetet e huaja.

Prokuroria e Posaçme falënderon në mënyrë të veçantë edhe stafin e emisionit investigativ italian “Le Iene” të “Mediaset”, falë punës të së cilëve, u bë e mundur inicimi dhe hetimi i këtij rasti të mashtrimit masiv në Qendrën e Thirrjeve në Shqipëri.

Gjithashtu, SPAK u tërheq vëmendjen qytetarëve dhe medias për fenomenin e mashtrimit online përmes Qendrave të Thirrjeve (Call Center) dhe kjo është një veprimtari që do vazhdojë të ndiqet me prioritet edhe në bashkëpunim me partnerët tanë ndërkombëtarë.

Nga ana tjetër, një apel u shkon edhe shtetasve që punojnë në këto qendra, për t’u ndërgjegjësuar dhe për t’u mos bërë pjesë e veprimtarive të paligjshme.

/m.m/r.e/

The post SPAK arreston tetë persona për mashtrim kompjuterik, tre në kërkim appeared first on Agjencia Telegrafike Shqiptare.

TIRANË, 18 janar/ATSH/ Deputetja e Partisë Demokratike Jorida Tabaku reagoi sot lidhur me deklaratën e kryeministrit Edi Rama në lidhje me Korporatën Shqiptare të Investimeve (AIC).

Duke e krahasuar me modelin italian, Tabaku tha se nuk është e qartë se cilit institucion i referohet kryeministri.

“Cilindo model italian të marrë si referencë Kryeministri, rezultati është i njëjtë: në Itali funksionet janë të ndara qartë me ligj. Banka financon, agjencia administron pronën; ndërsa në Shqipëri ato janë përqendruar në një ent të vetëm, pa garë dhe pa llogaridhënie.
Dallimet janë thelbësore”, tha ajo.

Tabaku theksoi se në Itali, institucionet funksionojnë si banka publike që menaxhojnë para dhe rrezik financiar, ndërsa Korporata Shqiptare e Investimeve nuk menaxhon fonde, por merr prona publike me vendime qeverie dhe i fut ato në marrëveshje ndërtimi me privatë.

“Ndërsa institucionet publike europiane veprojnë përmes prokurimit publik dhe konkurrencës së hapur, AIC shmang garën dhe krijon privilegje të drejtpërdrejta për partnerë të përzgjedhur”, u shpreh Tabaku.

Ndërkohë, Tabaku theksoi se në Europë, ndërhyrja publike bëhet aty ku tregu dështon, për banesa sociale, zona të varfra apo infrastrukturë strategjike.

“AIC bën të kundërtën, duke ndërhyrë aty ku tregu funksionon më së miri dhe duke krijuar konkurrencë të pandershme të sponsorizuar nga shteti. Ndërkohë, qeveria shqiptare është njëkohësisht edhe lojtari që ndërton, edhe arbitri që firmos për veten, ndërsa rreziku financiar i kësaj skeme nuk shfaqet sot në buxhet, por u lihet shqiptarëve si faturë për nesër”, vijoi ajo.

Tabaku iu referua vendimit të Këshillit të Ministrave, ku qeveria ia kaloi godinën e ish-shkollës jetimore “Zyber Hallulli” Korporatës Shqiptare të Investimeve.

“Një pronë publike me funksion social iu hoq fëmijëve jetimë përmes një firme qeveritare, pa debat publik dhe pa transparencë. Korporata e Investimeve veproi jo si institucion shtetëror, por si një pronar i keq: hoqi fëmijët nga godina, i zhvendosi në periferi dhe e nxori pronën nga funksioni i saj social”, u shpreh ajo.

/m.m/r.e/

The post Tabaku për Korporatën e Investimeve: Dallime thelbësore me Italinë, ku funksionet ndahen me ligj appeared first on Agjencia Telegrafike Shqiptare.

The post Vijon prishja e objekteve të paligjshme në Shkodër appeared first on Agjencia Telegrafike Shqiptare.

TIRANË, 18 janar/ATSH/ Zëvendësministrja e Shëndetësisë dhe Mirëqenies Sociale, Eugena Tomini vizitoi sot Qendrën Shëndetësore Nr. 5 në Tiranë, ku bisedoi me mjekët mbi situatën e krijuar nga virozat e stinës.

Tomini bëri thirrje për kujdes të shtuar ndaj personave me sëmundje kronike dhe konsultim të rregullt me mjekun e familjes.

Sipas mjekëve të kësaj qendre, kryesisht pacientët vijnë me viroza respiratore të stinës, por nuk mungojnë edhe rastet me kovid.

Pacientët testohen pranë kësaj qendre për testet e kovidit, ndërsa për analiza të mëtejshme mostrat dërgohen për analizim edhe pranë Institutit të Shëndetit Publik.

Tomini theksoi rëndësinë e vaksinimit, ndërsa theksoi se certifikatat e vaksinimit gjenerohen edhe përmes platformës qeveritare “e-Albania”.

/m.m/r.e/

The post Virozat e stinës, Tomini: Kujdes i shtuar ndaj personave me sëmundje kronike appeared first on Agjencia Telegrafike Shqiptare.

TIRANË, 18 janar/ATSH/ Ministri i Turizmit, Kulturës dhe Sportit Blendi Gonxhja ndau sot statistikat e zhvillimit të turizmit dhe kulturës për vitin 2025, që dëshmojnë rritjen e interesit për Shqipërinë.

Gonxhja u shpreh se këto statistika reflektojnë ndikimin e politikave të ndjekura, investimeve të realizuara dhe bashkëpunimit mes institucioneve qendrore e vendore.

Konkretisht në vitin 2025 Shqipërinë e vizituan mbi 12,4 milionë vizitorë të huaj, ose rreth 770 mijë më shumë krahasuar me vitin 2024.

Vetëm nga Kosova, numri i vizitorëve shënoi rritje me 5,3% krahasuar me vitin 2024.

Të ardhurat nga turizmi për 9-mujorin 2025 arritën në 4,4 miliardë euro, ose një rritje prej 14,5%.

Po ashtu, sitet e trashëgimisë kulturore u vizituan nga mbi 1,5 milionë vizitorë, duke shënuar rritje të të ardhurave me 30,63% krahasuar me vitin 2024.

“Këto të dhëna dëshmojnë jo vetëm rritjen e interesit për Shqipërinë si destinacion, por edhe përmirësimin gradual të standardeve, shërbimeve dhe ofertës kulturore në të gjithë territorin”, u shpreh Gonxhja.

Njëkohësisht, Ministri theksoi se “ato na vendosin përpara nevojës për planifikim më të kujdesshëm, menaxhim të qëndrueshëm dhe orientim strategjik, në mënyrë që ky zhvillim të përkthehet në përfitime afatgjata për komunitetet, ekonominë dhe imazhin ndërkombëtar të vendit”.

/m.m/r.e/

The post Gonxhja: Mbi 12,4 milionë vizitorë të huaj në 2025-ën appeared first on Agjencia Telegrafike Shqiptare.

TIRANË, 18 janar/ATSH/ Kryeministri Edi Rama reagoi sot lidhur me lajmet që janë shpërndarë në disa medie mbi ftesën që i është bërë Shqipërisë për të qenë pjesëmarrëse si vend anëtar themelues i Bordit të Paqes në Rripin e Gazës.

Kryeministri Edi Rama hodhi poshtë, duke i cilësuar gënjeshtra, pretendimet e disa medieve, sipas të cilave “në Bordin e Paqes janë ftuar të gjitha shtetet e OKB-së, apo se Shqipëria do të paguajë 1 miliard euro dhe këtu do të vijnë palestinezët”.

“Tenxheret politike e medietike të mexhelisit tonë janë teneqera të zhurshmshme të Shqipërisë së vjetër, ndërsa kjo që po vazhdojmë të ndërtojmë me shumë mund e këmbëngulje të madhe është një Shqipëri Tjetër, e dinjitetshme ndërkombëtarisht dhe e respektuar botërisht”, u shpreh Rama.

Më poshtë reagimi i plotë i kryeministrit Rama:

Tenxheret politike mediatike po bubullojnë e gërrgërrojnë aq fort sa thua se në Bordin e Paqes së Presidentit Trump nuk është ftuar Shqipëria, po një vend armik i Shqipërisë!

Në Bordin e Paqes janë ftuar të gjitha shtetet e OKB
GËNJESHTËR

Shqipëria do të paguajë 1 miliardë EURO
GËNJESHTËR

Palestinezët do të vijnë në Shqipëri
GËNJESHTËR

E vërteta është shumë e thjeshtë se sa ç’pjell, sidomos në çdo rast kur nderohet Shqipëria, mllefi i injorancës dhe inati i ligësisë:

Tenxheret politike e mediatike të mexhelisit tonë janë teneqera të zhurmshme të Shqipërisë së vjetër, ndërsa kjo që po vazhdojmë të ndërtojmë me shumë mund e këmbëngulje të madhe është një Shqipëri Tjetër, e dinjitetshme ndërkombëtarisht dhe e respektuar botërisht.

Sa për mua personalisht, rëndësi ka vetëm besimi i shumicës së shqiptarëve, që më kanë ngjitur e mbajtur katër herë në majën e shtetit shqiptar dhe respekti i atyre që janë në majat e botës a të Europës, i cili më duhet mbi të gjitha për të nderuar e lartësuar Shqipërinë.

Ky është një moment i jashtëzakonshëm i Shqipërisë, ku tërbimi i tenxhereve thjesht na siguron se sa më shumë lehin qentë, aq më përpara është duke shkuar karvani”.

/m.m/r.e/

The post Rama: Shqipëria nuk do të paguajë 1 miliard euro për Bordin e Paqes appeared first on Agjencia Telegrafike Shqiptare.

TIRANË, 18 janar/ATSH-Maela Marini/ Dorian Potka, i cili prej 13 vitesh ka hapur Akademinë e Arteve Marciale në Korçë, ishte sot i ftuari i radhës i kryeministrit Edi Rama në podkastin “Flasim”.

Në Qqendrën e tij sportive, të cilën e menaxhon bashkë me bashkëshorten, Anxhelën, ushtrohen mbi 100 persona të grupmoshave të ndryshme.

Doriani tregoi se si u kthye nga emigrimi në Greqi dhe vendosi që aftësitë që kishte fituar atje me artet marciale t’i vinte në dispozicion për krijimin e kësaj qendre sportive.

E krijuar në fund të vitit 2013, Akademia e Arteve Marciale në Korçë është bërë si pikë referimi për ushtrimin e këtij sporti nga grupmosha të ndryshme.

/r.e/

The post Dorian Potka, i riu që la emigrimin dhe ngriti akademi të arteve marciale në Korçë appeared first on Agjencia Telegrafike Shqiptare.

TIRANË, 18 janar/ATSH-Maela Marini/ Finalisti i “Albania’s Got Talent”, Dashnor Bushi ishte i ftuari i radhës në podcastin “Flasim” me kryeministrin Edi Rama.

Dashnor Bushi i lindur dhe rritur në Kavajë, ka emigruar më pas në Itali, vend ku lindi dhe djali i tij Nikolas, i cili u trajnua si ventrilok dhe ishte fitues i “Albania’s Got Talent”.

Në Kavajë ata jetuan disa vite e më pas të gjithë bashkë si familje emigruan në SHBA, ku Dashnori ushtroi artin e iluzionizmit, ndërsa djali i tij Nikolas u trajnua si ventrilok.

I njohur për truket e magjisë, ai ushtroi po ashtu disa nga numrat e tij edhe në studion e podkastit “Flasim”, duke befasuar kryeministrin Rama dhe të ftuarin tjetër në studio.

Dashnor Bushi tha se loja me letra ka qenë pasioni i tij që në rini.

“Truket me letra janë pasioni im, pasi kërkon aftësi dhe shumë punë”, tha Bushi.

Ai tregoi se është larguar drejt SHBA-së në vitin 2013, ndërsa u shpreh se “ka disa gjëra që po ndryshojnë në Shqipëri edhe për artin e magjisë. “Kemi një popull të vështirë për këtë lloj arti, por unë e adhuroj punën time dhe e bëj për të kënaqur publikun”, tha ai.

/r.e/

The post Dashnor Bushi truke magjie në podkastin “Flasim” appeared first on Agjencia Telegrafike Shqiptare.

TIRANË, 18 janar/ATSH/ Kryeministri Edi Rama nënvizoi sot rëndësinë e rishikimit të ligjit të arsimit të lartë në funksion të ndërkombëtarizimit të universiteteve.

Gjatë podkastit “Flasim”, Kryeministri vlerësoi rëndësinë e mbledhjes së Konferencës së Rektorëve gjatë javës që lamë pas, të cilën e cilësoi si një takim të rëndësishëm për vazhdimin e përpjekjes së përbashkët mes qeverisë dhe universitetit, botës akademike, në funksion të rritjes së cilësisë së arsimit të lartë.

“Ky diskutim i hapur është zhvilluar në funksion të ndërkombëtarizimit të arsimit tonë të lartë dhe në funksion të racionalizimit të burimeve dhe potencialeve në arsimin tonë të lartë”, tha Rama.

Kryeministri bëri të ditur se në këtë takim ka paraqitur sfidat mbi të cilat duhet të vendosen piketat e reja, duke filluar nga një rishikim i ligjit “Për arsimin e lartë”.

“Ka ardhur koha, pasi tanimë është krijuar një eksperiencë. Ligji na mundësoi një përmbysje të madhe, por sot është e qartë që, mbi bazën e eksperiencës dhe, natyrisht, të sfidave të reja, ligji duhet të rishikohet dhe këtë gjë do ta bëjmë së bashku, pa diskutim, me universitetet. Nga ligji, pra, deri te rritja e përpjekjeve për të shtuar zinxhirin që tanimë ka filluar të shtrihet në territor, të ndërkombëtarizimit përmes partneriteteve të ngushta me universitete të njohura në Evropë dhe botë dhe përmes programeve të përbashkëta”, u shpreh Rama.

Po ashtu, Kryeministri theksoi se “një aspekt tjetër është edhe qasja ndaj financimit. Për këto do të flasim më hollësisht në takimin që ne mbajmë rregullisht si një këshill i përbashkët, po themi joformal, por shumë efikas, mes qeverisë dhe përfaqësuesve të universiteteve, ku këtë radhë do të jenë ftuar të gjithë përfaqësuesit, pa dallim të universiteteve publike dhe atyre private, ose më saktë, universiteteve publike me financim shtetëror dhe universiteteve publike me financim privat”.

/m.m/r.e/

The post Rama: Rishikim i ligjit të arsimit të lartë në funksion të ndërkombëtarizimit të universiteteve appeared first on Agjencia Telegrafike Shqiptare.

TIRANË, 18 janar/ATSH/ Kryeministri Edi Rama e konsideroi sot të paharrueshëm vlerësimin me medaljen “Zayed”, nga presidenti i Emirateve të Bashkuara, Mohammed bin Zayed Al Nahyan.

Gjatë podkastiti “Flasim”, Kryeministri theksoi se ky vlerësim e ka prekur dhe njëkohësisht e ka bërë shumë krenar për Shqipërinë.

“Ky moment më ka prekur personalisht dhe më ka lënë pa fjalë, për hir të së vërtetës, gjë që nuk më ndodh shpesh, siç edhe mund ta merrni me mend, se te fjalët nuk mbetem ndonjëherë mangut përgjithësisht, por këtë herë kam mbetur mangut. Ishte momenti kur një mik i madh i Shqipërisë, një mik i vjetër i shqiptarëve dhe një personalitet i madh i politikës botërore, që jam i nderuar ta quaj mik, më ka bërë një surprizë në Pallatin Presidencial, duke më akorduar medaljen më të lartë të Emirateve të Bashkuara, e cila mban emrin e themeluesit të Emirateve, Sheikh Zayed.”

Rama theksoi se presidenti Mohammed bin Zayed Al Nahyan, i ka bërë një vlerësim që realisht, për nga mënyra, vendi dhe, mbi të gjitha, për nga pesha që ka, është absolutisht i paharrueshëm.

“Nuk e di sa unë e meritoj, por di që të qenit në radhë me ata që e kanë marrë më parë këtë vlerësim më bën shumë krenar për Shqipërinë si kryeministër shqiptar dhe, njëkohësisht, më ngarkon edhe me më shumë, si të thuash, përgjegjësi, nëse mund të ketë akoma, në raport me çuarjen përpara të këtij misioni që më kanë besuar shqiptarët, që është Shqipëria në Bashkimin Evropian dhe një Shqipëri krenare, dinjitoze, kryelartë kudo në botë”, u shpreh Kryeministri.

/m.m/r.e/

The post Rama: Nderimi me medaljen “Zayed” vlerësim i paharrueshëm, krenar për Shqipërinë appeared first on Agjencia Telegrafike Shqiptare.

TIRANË, 18 janar/ATSH/ Kryeministri Edi Rama shprehu sot bindjen se Shqipëria do të ketë sovranitet energjetik brenda këtij mandati qeverisës.

Në nisje të podkastit “Flasim”, kryeministri Edi Rama informoi mbi pjesëmarrjen në Javën e Qëndrueshmërisë 2026 në Emiratet e Bashkuara Arabe.

“Në një prej paneleve, së bashku me Kryeministrin e Malit të Zi, ne iu përgjigjëm një sërë pyetjesh që shprehnin interesimin, pikërisht, për përpjekjet që po bëjmë në sensin e zhvillimit të qëndrueshëm, të rritjes së kapaciteteve energjetike dhe, patjetër, edhe në sensin e shfrytëzimit maksimal të teknologjisë, si një instrument shumë i rëndësishëm në funksion edhe të procesit të anëtarësimit”, informoi Rama.

Kryeministri vlerësoi bashkëpunimin trilateral mes Emirateve të Bashkuara, Shqipërisë dhe Italisë, ku Shqipëria ka një rol kyç, si vendi ku do të krijohet një kapacitet gjenerimi i energjisë së gjelbër.

Rama tha se përmes kabllit nënujor që do të lidhë Shqipërinë me Italinë, kjo energji do të transmetohet në Itali dhe në vende të tjera, duke i dhënë Shqipërisë një avantazh të rëndësishëm strategjik.

“Por më e rëndësishmja, kam përcjellë edhe një mesazh për të cilin unë personalisht, po edhe e gjithë shumica jonë qeverisëse, ka krenarinë të jetë bartëse – Shqipëria sovrane në energji. Pasi, sipas programit dhe sipas të gjitha hapave që po i hedhim mbi planin e detajuar për këtë program, Shqipëria do të ketë sovranitet energjetik brenda këtij mandati të qeverisë sonë, mandatit të 83 mandateve”, tha Rama.

/m.m/r.e/

The post Rama: Energjia e gjelbër do t’i japë Shqipërisë avantazh të rëndësishëm strategjik appeared first on Agjencia Telegrafike Shqiptare.

TIRANË, 18 janar/ATSH/ Kryeministri Edi Rama vlerësoi sot se projekti për ndërtimin e parkut të energjisë së rinovueshme me erë në Tropojë do të thellojë diversifikimin e portofolit energjetik të vendit.

Në nisje të podkastit “Flasim”, kryeministri Rama u ndal te zhvillimet kryesore të javës, ku veçoi projektin madhor të parkut me energji të rinovueshme me erë në Tropojë.

“Kjo javë ka qenë e rëndësishme edhe në aspektin e zhvillimit ekonomik, pasi kemi hedhur edhe një hap tjetër të rëndësishëm në drejtim të sovranitetit energjetik, duke fuqizuar kështu themelet e ekonomisë dhe duke iu afruar atij momenti kur Shqipëria nuk do të ketë më nevojë të paguajë nga taksat e shqiptarëve për të importuar energji nga jashtë”, u shpreh kryeministri Rama.

Rama vlerësoi hapin e hedhur për fazën e dytë të projektit madhor të parkut me energji të rinovueshme me erë në Tropojë, me një kapacitet prodhimi prej 600 megavat.

Sipas Kryeministrit ky është një hap dhe një fazë e re që shënon finalizimin e një përpjekjeje të përbashkët rreth dyvjeçare me kompaninë amerikane, lidere në energjinë e rinovueshme në Europë, CWP.

“Në këtë mënyrë, falë një procesi parapërgatitor që është faktikisht më i shkurtër se vetë procesi i ndërtimit, kam bindjen se në një kohë 12 muaj punë, pa llogaritur periudhat kur dimri është realisht në fazën që e bën të pamundur punën normale në terren, ne do të kemi parkun me energji të erës, që do të hyjë në rrjetin e prodhimit tonë kombëtar dhe do të bëjë që, në këtë mënyrë, Shqipëria të thellojë diversifikimin e portofolit të vet energjetik”, u shpreh Rama.

/m.m/r.e/

The post Rama: Parku eolik në Tropojë, hap i rëndësishëm për sovranitetin energjetik appeared first on Agjencia Telegrafike Shqiptare.

TIRANË, 18 janar/ATSH/ Kryeministri Edi Rama sqaroi sot se Shtetet e Bashkuara të Amerikës nuk i kanë ndaluar vizat për Shqipërinë, por për 75 vende është bërë një pezullim i përkohshëm për sa i përket lejeve të punës në Shtetet e Bashkuara.

Gjatë podkastit “Flasim”, Kryeministri reagoi ndaj dezinformimit të opinionit publik lidhur me këtë lajm, të cilin e cilësoi të pavërtetë.

“Dua të them dy fjalë për ata që u hodhën përpjetë, ose më saktë, për ata që jetojnë të hedhur përpjetë dhe që, në përpjetësinë e tyre, i shtuan hedhjeve edhe një hedhje të radhës dhe të së njëjtës natyrë: dezinformim, çoroditje e opinionit publik, helmim i të gjithë atyre që kanë akoma fuqinë t’i dëgjojnë, duke thënë që Amerika i ndaloi vizat për Shqipërinë”, tha Rama.

Kjo, sipas Kryeministrit, është e pavërtetë dhe Shtetet e Bashkuara të Amerikës nuk i kanë ndaluar vizat për Shqipërinë.

“Shtetet e Bashkuara të Amerikës, administrata aktuale, nën orientimin e qartë prej kohësh të presidentit Trump për politikën e re lidhur me emigracionin, ka vendosur që për 75 vende të botës, ndër të cilat edhe disa vende të Ballkanit, ku përfshihet edhe Kosova, të bëhet një pezullim i përkohshëm për sa i përket lejeve të punës në Shtetet e Bashkuara. Jo vizave për në Amerikë, por lejeve të qëndrimit në Amerikë për punë, pasi për këtë kategori vendesh kanë vënë re fenomenin e marrjes së vizës për turizëm, marrjes së vizës për biznes dhe më pas të mosrespektimit të afateve, por të qëndrimit atje për të filluar një punë”, sqaroi Rama.

Kjo, sipas tij, “është diçka që shkon në linjën krejt normale të politikës së re të presidentit Trump dhe që nuk ka pikën e lidhjes me të gjitha ato që u thanë nga ata që hidhen përpjetë dhe që, përsëri, kur të bien në tokë, do të shohin se terreni mbi të cilin qëndrojnë është gjithmonë më i rrëshqitshëm”.

“Pra, do të humbin thellë e më thellë dhe do të hidhen përpjetë lart e më lart”, shtoi Kryeministri.

/m.m/r.e/

The post Rama: SHBA nuk i kanë ndaluar vizat për Shqipërinë appeared first on Agjencia Telegrafike Shqiptare.

TIRANË, 18 janar/ATSH/ Kryeministri Edi Rama publikoi sot tekstin e letrës që mori dje nga presidenti i Shteteve të Bashkuara, Donald J. Trump, i cili e ka ftuar personalisht për të përfaqësuar Shqipërinë në Bordin e Paqes për Rripin e Gazës.

Ndërsa falënderon shqiptarët për privilegjin e besimit që i kanë dhënë, Kryeministri siguron se “do të bëj deri në fund gjithçka duhet për ta lartësuar emrin e Shqipërisë e dinjitetin e shqiptarëve”.

Bordi i Paqes është një organizatë e re ndërkombëtare e ideuar prej presidentit Trump, ku Shqipëria ftohet si anëtare themeluese.

“Arritja jonë sjell së bashku një grup kombesh të dalluara që janë gati të marrin mbi supe përgjegjësinë fisnike të ndërtimit të paqes së përhershme, një nder i rezervuar për ata që janë të përgatitur të udhëheqin me shembullin e tyre, dhe të përkushtohen me mjeshtëri për një të ardhme të sigurt e të begatë për brezat që do të vijnë. Në një të ardhme të afërt, ne do t’i mbledhim partnerët tanë të mrekullueshëm e të përkushtuar, shumica e të cilëve janë Udhëheqës Botërorë shumë të respektuar”, thuhet ndër të tjera në letrën e presidentit Trump.

Presidenti i SHBA-së, Donald Trump njoftoi të enjten formimin e “Bordit të Paqes” për Rripin e Gazës.

Pjesë e Bordit do të jenë edhe ish-kryeministri britanik, Tony Blair, sekretari i Shtetit të SHBA-së, Marco Rubio, i dërguari special për Lindjen e Mesme, Steve Witkoff dhe dhëndri i Trump, Jared Kushner, ish-i dërguari special i OKB-së, Nickolay Mladenov, miliarderi Marc Rowan, presidenti i Bankës Botërore, Ajay Banga, dhe zëvendëskëshilltari i sigurisë kombëtare të SHBA-së, Robert Gabriel.

Më poshtë përkthimi i letrës së presidentit Trump:

“16 Janar, 2026

Shkëlqesia e Tij

Edi Rama

Kryeministër i Shqipërisë

Tiranë

I nderuar Kryeministër,

Është një nder i madh për mua t’ju ftoj ju, si Kryeministër i Republikës së Shqipërisë, të më bashkoheni në një përpjekje Historike dhe Madhështore për forcimin e Paqes në Lindjen e Mesme dhe, njëkohësisht, të ndërmarrim një qasje të re plot guxim për zgjidhjen e Konfliktit Global!

Më 29 shtator 2025, shpalla Planin Gjithëpërfshirës për fundin e konfliktit në Gaza, një plan veprimi me 20 pika, i mbështetur menjëherë nga të gjithë Udhëheqësit Botërorë, përfshirë edhe Krerët kryesorë në Botën Arabe, Izrael, dhe Europë. Në vijim të këtij Plani, më 17 Nëntor, Këshilli i Sigurimit i Kombeve të Bashkuara miratoi me shumicë mbizotëruese Rezolutën 2803, duke mirëpritur dhe mbështetur këtë plan.

Tani është koha që t’i kthejmë gjithë ëndrrat në realitet. Bordi i Paqes është në zemër të këtij Plani dhe ky është Bordi më mbresëlënës dhe më me ndikim i krijuar ndonjëherë, i cili do të themelohet si një Organizatë e Re Ndërkombëtare dhe Administratë Qeverisëse Tranzitore.

Arritja jonë sjell së bashku një grup kombesh të dalluara që janë gati të marrin mbi supe përgjegjësinë fisnike të ndërtimit të PAQES së PËRHERSHME, një Nder i rezervuar për ata që janë të përgatitur të udhëheqin me shembullin e tyre, dhe të përkushtohen me mjeshtëri për një të ardhme të sigurt e të begatë për brezat që do të vijnë. Në një te ardhme të afërt, ne do t’i mbledhim partnerët tanë të mrekullueshëm e të përkushtuar, shumica e të cilëve janë Udhëheqës Botërorë shumë të respektuar.

Si Kryetar i Bordit, ftoj zyrtarisht Republikën e Shqipërisë të përfaqësuar prej jush, të na bashkohet si Shtet Anëtar Themelues, dhe të bëhet palë në Statutin e Bordit të Paqes. Ky bord do të jetë aq i veçantë sa kurrë më parë nuk ka ekzistuar diçka e ngjashme me të!

Çdo Shtet Anëtar mund të caktojë një përfaqësues të autorizuar në emër të tij për të marrë pjesë dhe kontribuar në takime. Bashkëngjitur gjeni Planin Gjithëpërfshirës, dhe Statutin e Bordit, i cili tani është i disponueshëm për nënshkrimin tuaj dhe ratifikimin.

Me kënaqësi pres të punojmë së bashku, edhe për shumë gjatë në të ardhmen, drejt qëllimit të vendosjes së përhershme të PAQES BOTËRORE, MIRËQËNIES, DHE MADHËSHTISË PËR TË GJITHË!Me urimet më të mira, Unë jam,

Sinqerisht,

DONALD J. TRUMP

PRESIDENT I REPUBLIKËS SË SHTETEVE TË BASHKUARA TË AMERIKËS”.

/m.m/r.e/

The post Rama publikon ftesën e Trump për Bordin e Paqes: Do të bëj gjithçka për të lartësuar emrin e vendit tonë appeared first on Agjencia Telegrafike Shqiptare.

TIRANË, 18 janar/ATSH/ Për herë të parë parashikohet që Shqipëria të ketë një regjistër elektronik kombëtar për donacionet dhe sponsorizimet. Ky regjistër do të jetë i aksesueshëm nga publiku në çdo kohë në faqen zyrtare në internet të Drejtorisë së Përgjithshme të Tatimeve për të dhënat që lidhen me donacionet dhe sponsorizimet e organeve publike.

Kjo është risia kryesore e projektligjit “Për donacionet dhe sponsorizimet”, hedhur për konsultim nga qeveria si pjesë e paketës së ligjeve në fushën e antikorrupsionit.

Ky projektligj përcakton rregullat dhe procedurat për mbështetjen me donacione dhe sponsorizime në realizimin e veprimtarive me interes publik.

Në lidhje me lehtësitë tatimore, projektligji parashikon se subjekteve, persona fizikë a juridikë, që paguajnë tatim mbi fitimin sipas ligjit “Për tatimin mbi të ardhurat”, shuma e sponsorizuar u njihet si shpenzim i zbritshëm jo më pak se 3 për qind të tatimfitimit.

Gjithashtu, projektligji synon rregullimin e lehtësisë tatimore të dedikuar për sponsorizuesit që kontribuojnë në fushën e artit, sportit ose kulturës, përmes zbritjes direkte deri në masën 30 % nga tatimi mbi fitimin.

Projektligji vendos kufizime për të pranuar sponsorizime për disa organe publike për shkak të natyrës së tyre të veprimtarisë. Organet e sistemit të drejtësisë, Policia e Shtetit, organet që kanë kompetenca kontrolli dhe mbikëqyrëse në fushën e prokurimit publik, pastrimit të parave ose luftës ndaj korrupsionit nuk mund të pranojnë sponsorizime, nëse nuk i lejohet shprehimisht me ligj të posaçëm.

Në lidhje me donacionet e organeve publike, projektligji parashikon rregulla të posaçme për pranimin dhe administrimin e tyre kur vlera financiare është mbi 500 mijë lekë.

Për organizatat jofitimprurëse, organizatat sportive, shoqëritë sportive, subjektet tregtare dhe individët fshehja e të dhënave në regjistër ose deklarimi i pasaktë i sponsorizuesve përbën kundërvajtje administrative për organizatën dhe dënohet me gjobë nga organet tatimore nga përbën kundërvajtje administrative dhe dënohet me gjobë nga organet tatimore nga 100 mijë lekë deri 200 mijë lekë.

Pranimi i sponsorizimeve të paligjshme nga organizatat jofitimprurëse ndëshkohet me gjobë nga organet tatimore nga 200 mijë lekë deri në 300 mijë lekë.

Në rastin e pranimit të sponsorizimeve të paligjshme nga organizatat jofitimprurëse, organizatat sportive, shoqëritë sportive, subjektet tregtare dhe individët, është parashikuar se përbën kundërvajtje administrative dhe ndëshkohet me gjobë nga organet tatimore nga 200 mijë lekë deri në 300 mijë lekë.

Projektligji është hartuar në kuadër të detyrimeve që sjell procesi i integrimit evropian, ku Shqipëria ka marrë përsipër angazhimin për ndryshimin e kuadrit ligjor për donacionet dhe sponsorizimet brenda vitit 2027.

Shqipëria miratoi ligjin e parë për sponsorizimet në vitin 1994, por ligji ka nocione bazë të kufizuara për sa i përket llojeve të sponsorizimeve si dhe nuk ka parashikime për donacionet, transparencën, integritetin dhe masat antikorrupsion.

Në këto kushte, u konsiderua i vlefshëm hartimi i një projektligji të ri dhe jo amendimi i pjesshëm i ligjit të 1994-ës, në mënyrë që të adresohen këto boshllëqe.

Sindikatat dhe partitë politike nuk janë subjekt i këtij projektligji.

Nga ana tjetër, projektligji nuk krijon mbivendosje me kuadrin ligjor në fuqi për pastrimin e parave, luftën kundër terrorizimit apo parandalimin e konfliktit të interesave, por përforcon masat e integritetit dhe përmban një sërë rregullash që synojnë të rrisin transparencën dhe besimin e qytetarëve tek organet publike.

Në vazhdën e këtyre ndryshimeve ligjore, konsiderohen të domosdoshme ndryshimet për sponsorizimet e kryera në fushën e artit, kulturës dhe sportit.

/m.m/j.p/r.e/

The post Regjistër kombëtar për donacionet dhe sponsorizimet, rregulla të posaçme për vlera mbi 500 mijë lekë appeared first on Agjencia Telegrafike Shqiptare.

TIRANË, 16 janar/ATSH-Maela Marini/ Kryetari i Komisionit për Çështjet e Brendshme dhe të Mbrojtjes, Bledar Çuçi bëri të ditur sot se janë rritur grantet që i dedikohen bashkive për emergjencat civile, si dhe është siguruar një shpërndarje më e drejtë e këtyre fondeve mbi bazë risku.

Në mbledhjen e grupit parlamentar të Partisë Socialiste, Çuçi bëri një analizë të punës së këtij komisioni gjatë tre muajve të shkuar, ku veçoi miratimin e amendamentit për rritjen e fondit të emergjencave civile.

Sipas Çuçit, gjatë shqyrtimit të buxhetit 2026 në këtë komision u propozua një amendament që parashikonte rritjen me gati 50% të granteve që i dedikohen bashkive për emergjencat civile, krahasuar kjo me propozimin e ardhur nga qeveria.

“Kjo u bë në rakordim të plotë me Ministrinë e Mbrojtjes dhe Ministrinë e Financave. Amendamenti i dytë i propozuar nga ky komision dhe i miratuar në Kuvend, ka të bëjë me ndryshimin e formulës së shpërndarjes së këtij fondi, duke i dhënë peshë bashkive bazuar mbi riskun që kanë ndaj emergjencave civile “, tha Çuçi.

Sipas tij, “ky është viti i parë që do të bëhet ky ushtrim dhe do të jetë kontribut shumë i vlefshëm për të shpërndarë para publike aty ku është nevoja, sidomos për parandalimin e   emergjencave civile”.

Çuçi vlerësoi po ashtu edhe zhvillimin e seancës dëgjimore me ministren për Punët e Brendshme, Albana Koçiu, që sipas tij, “ndikoi sadopak në pastrimin e baltës që opozita hedh vazhdimisht në çështjet e sigurisë”.

Ndërkohë, Çuçi informoi se në axhendën e afërt të punës së komisionit janë edhe ndryshimet në Kodin Penal si dhe projektligji për Agjencinë e Mbikëqyrjes së Sistemit të Ekzekutimit të Vendimeve Penale, që do të kthehet në një agjenci inteligjente. /j.p/

The post Çuçi: Garantuam shpërndarje më të drejtë të fondeve të emergjencave për bashkitë  appeared first on Agjencia Telegrafike Shqiptare.

TIRANË, 16 janar/ATSH/ Kryeministri Edi Rama reagoi sot pas jehonës që krijoi në disa medie në Athinë, bashkëbisedimi i tij me gazetarin John Defterios, në panelin e organizuar gjatë Samitit të Zhvillimit të Qëndrueshëm në Abu Dhabi.

Rama u shpreh se “është e pabesueshme që një fjali e thënë me humor, të shkëputet totalisht nga konteksti e të kthehet në polemikë publike me pathos nacionalist”, gjë që sipas tij, “fatkeqësisht në Athinën mediatike ndodh shpesh”.

Kryeministri siguroi se nuk ka as më të voglin dyshim që Platoni dhe Aristoteli janë filozofë grekë dhe që Greqia e Lashtë është shtrati i qytetërimit europian.

“Greqia është një vend për të cilin unë ushqej ndjenjat më pozitive; populli grek është për mua një fqinj i pazëvendësueshëm e vëlla i patjetërsueshëm i popullit shqiptar dhe për kryeministrin e Greqisë ushqej një respekt të veçantë”, u shpreh Rama.

Më poshtë reagimi i plotë i kryeministrit Rama:

Jam i mahnitur nga reagimi i disa mediave në Athinë e i ndonjë politikani të lodhur grek lidhur me tonet e mia aspak tendencioze, po me humor miqësor gjatë bashkëbisedimit me gazetarin e nderuar John Defterios në panelin e organizuar gjatë Samitit të Zhvillimit të Qëndrueshëm në Abu Dhabi.

Është e pabesueshme që një fjali e thënë me humor, të shkëputet totalisht nga konteksti e të kthehet në polemikë publike me pathos nacionalist, gjë që fatkeqësisht në Athinën mediatike ndodh shpesh.

Por i siguroj të gjithë të shqetësuarit e të lënduarit, se nuk kam as më të voglin dyshim që Platoni dhe Aristoteli janë filozofë grekë dhe që Greqia e Lashtë është shtrati i qytetërimit europian; që kultura greke meriton vetëm admirim, jo vetëm për filozofët e lashtësisë po edhe për poetët, shkrimtarët, kineastët e muzikën që i ka dhënë njerëzimit; që Greqia është një vend për të cilin unë ushqej ndjenjat më pozitive, që populli grek është për mua një fqinj i pazëvendësueshëm e vëlla i patjetërsueshëm i popullit shqiptar dhe që për kryeministrin e Greqisë ushqej një respekt të veçantë!

U kuptuam? Shpresoj po.

Por ama mos më kërkojë askush ndër të shqetësuarit dhe të lënduarit me humorin tim, që kush shkruan e flet greqisht me pathosin nacionalist të të larpërmendurve, të më duket si pasardhës i Platonit dhe Aristotelit! Kaq”.

/m.m/j.p/

The post Rama pas reagimeve në disa medie në Greqi: E pabesueshme si humori kthehet në polemikë me pathos nacionalist appeared first on Agjencia Telegrafike Shqiptare.

TIRANË, 16 janar/ATSH-Maela Marini/ Kryeministri Edi Rama e konsideroi sot garantimin e  sigurisë ushqimore si një ndër sfidat kryesore në procesin e integrimit europian.

Kryeministri Rama, njëherësh kryetar i Partisë Soccialiste zhvilloi sot një mbledhje me grupin parlamentar të PS-së ku bëri një përmbledhje të punës dhe të sfidave që janë ndeshur në sesionin e mëparshëm parlamentar, por edhe u vendosën disa objektiva për në vijim.

Rama theksoi se tashmë Shqipëria ka hyrë në fazën më intensive të negociatave me Bashkimin Europian. “Në një hark kohor relativisht shumë të shkurtër, prej vetëm 2 vitesh, Shqipëria duhet të përmbushë të gjitha kushtet për të mbyllur negociatat e anëtarësimit”, shtoi ai.

Rama solli në vëmendje barrën e detyrimeve dhe kushteve që duhet të përmbushë vendi për të dalë me sukses nga procesi i negociatave dhe për të përballuar përfshirjen në një realitet tërësisht të ri, siç është realiteti i një tregu prej 450 milionë njerëzish.

“Shqipëria e integruar do të jetë një pikë uji në oqean dhe sfida për të gjithë sektorin prodhues dhe po ashtu për institucionet do të jetë e shumëfishtë. Ne përmes skuadrës së negociatave jemi duke negociuar periudhat e ndërmjetme pas momentit të anëtarësimit që t’i japim mundësi vendit që të jetë i gatshëm të përmbushë të gjitha kriteret”, shtoi Rama.

Kryeministri theksoi se beteja kryesore është për sektorin e prodhimit ushqimor, për të gjithë prodhuesit në fshat dhe për të gjithë sipërmarrjet që përpunojnë prodhimet ushqimore.

Në kushtet e sotme, Rama tha se jemi të paintegrueshëm në BE për shkak të nivelit të pamjaftueshëm të sigurisë ushqimore sipas kritereve të BE-së.

“Për këtë arsye, po përpiqemi të fitojmë një fazë të ndërmjetme prej 5 vitesh pas anëtarësimit, por përgatitjet duhet të fillojnë tani”, tha Rama.

Kryeministri solli në vëmendje situatën në të cilën ndodhej vendi për sa i përket sigurisë ushqimore në vitin 2013 dhe arritjet që janë bërë në këtë fushë.

“Kur kemi marrë detyrën rrugët e Shqipërisë ishin njëkohësisht tregje ushqimore dhe thertore. Të gjitha autostradat e vendit ishin të kufizuara nga tezgat dhe tregjet informale ushqimore. Shumë përparim është bërë por ama në raport me kriteret e sigurisë ushqimore të BE-së jemi ende larg”, shtoi Rama.

Rama paralajmëroi se në rast se nuk garantohet siguria ushqimore, në momentin e anëtarësimit dhe kur përfundon periudha e ndërmjetme asnjë ushqim i prodhuar në Shqipëri nuk mund të shitet jashtë vendit.

Madje sipas tij edhe në Shqipëri do të funksionojnë kriteret e njëjta dhe ushqimet mund të bllokohen nëse nuk përmbushin kriteret e sigurisë.

“Pastaj në skenarin më pesimist do të thotë se gjithçka që hahet të importohet. Për këtë arsye duhet një super punë por edhe super vendosmëri nga ana jonë si vendimmarrës për të mos falur asgjë dhe askënd në emër të nevojës që ‘vazhdoj të punoj’. Gjithësekush duhet të vendoset në pozita shumë të forta përgjegjshmërie dhe pune sepse në rastin më të mirë janë vetëm 10 vite përpara dhe është një punë shumë e madhe për t’u bërë”, u shpreh Rama.

1 nga 11

The post Rama: Siguria ushqimore, sfida kryesore në mbylljen e negociatave të anëtarësimit në BE appeared first on Agjencia Telegrafike Shqiptare.

TIRANË, 16 janar/ATSh/ Kontigjenti VII i Forcës Tokësore u nis sot drejt Bullgarisë në kuadër të misionit të NATO-s në Novo Selo.

Ministri i Mbrojtjes, Pirro Vengu vlerësoi Forcat Tokësore të cilat ndodhen në vijën e parë të sigurisë kolektive.

Sipas tij, “ky është  një tjetër mision për efektivët e Forca Tokësore dhe një tjetër mundësi për ta mbajtur flamurin shqiptar lart, krah për krah me flamujt aleatë”.

Vengu vlerësoi po ashtu kontigjenti VI, që përmbylli me sukses misionin, duke përfaqësuar Shqipërinë me profesionalizëm, disiplinë dhe përgjegjësi të lartë.

“Kontigjenti VII merr stafetën, gati për të treguar se përkushtimi, gatishmëria dhe standardet e NATO-s janë vlera që Forca Tokësore i mban në çdo mision”, u shpreh Vengu.

Duke filluar nga 29 nëntori 2022, Forcat e Armatosura janë angazhuar në Aktivitetin e Vigjilencës së Përforcuar (eVA) në Novo Selo, Bullgari.

Kontingjenti i FARSH i përbërë nga 30 ushtarakë, dislokohet në përbërje të grup-batalionit të NATO-s në kufijtë lindorë të Aleancës. Vend drejtues i këtij misioni është Italia dhe rotacioni i kontingjenteve është çdo 6 muaj.

/m.m/j.p/

The post Vengu: Forca Tokësore, në vijën e parë të sigurisë kolektive në Bullgari appeared first on Agjencia Telegrafike Shqiptare.

TIRANË, 15 janar/ATSh/ Gjykata Kushtetuese vlerësoi sot se vendimet e gjykatave të posaçme për vijimin e masës së sigurimit “Arrest në shtëpi” për kryetarin e Partisë Demokratike Sali Berisha vijnë në kundërshtim me Kushtetutën.

Në 17 dhjetor, Gjykata Kushtetuese mori në shqyrtim në seancë plenare çështjen me kërkues Sali Berishën, i cili kërkonte shfuqizimin e vendimeve të Gjykatës së Posaçme të Shkallës së Parë për Korrupsionin dhe Krimin e Organizuar; të Gjykatës së Posaçme të Apelit për Korrupsionin dhe Krimin e Organizuar; dhe të Kolegjit Penal të Gjykatës së Lartë, si të papajtueshme me Kushtetutën.

Pasi mori në shqyrtim pretendimet e palëve, Gjykata Kushtetuese nënvizoi se në vitin 2023 ndaj kërkuesit rezulton se, për kërkesën e prokurorit, nga gjykatat e zakonshme janë vendosur masat e sigurimit personal “Detyrimi për t’u paraqitur në Policinë Gjyqësore” dhe “Ndalimi i daljes jashtë shtetit”.

“Vendimet gjyqësore që kanë disponuar për këto masa sigurimi janë bërë objekt i shqyrtimit nga Gjykata, e cila, me vendimin e datë 21 nëntor 2024 ka vendosur pranimin pjesërisht të kërkesës dhe shfuqizimin e vendimeve gjyqësore që kishin vendosur ato masa, si të papajtueshme me Kushtetutën, vetëm për pjesën që kanë caktuar masën e sigurimit personal “Ndalimi i daljes jashtë shtetit”. “Kjo me arsyetimin se në caktimin ndaj kërkuesit të këtyre dy masave vendimeve të gjykatave u mungon arsyetimi, për rrjedhojë nuk rezulton që të kenë vlerësuar nevojën për caktimin tyre për të njëjtin procedim ndaj tij”, thuhet në njoftimin e Gjykatës Kushtetuese.

Për shkak se Berisha nuk respektoi një prej masave të sigurimit të caktuar nga gjykata, “Detyrimi për t’u paraqitur në Policinë Gjyqësore”, për kërkesën e prokurorit gjykatat e zakonshme, në datën 30 dhjetor 2023, ka zëvendësuar masat e sigurimit të vendosura ndaj kërkuesit me masën “Arresti në shtëpi”.

“Edhe procesi gjyqësor që disponoi për zëvendësimin e masave të sigurimit ndaj kërkuesit, duke caktuar masën “Arresti në shtëpi”, është bërë objekt i kontrollit kushtetues nga Gjykata, e cila, me vendimin e datës 17 janar 2025, ka vendosur rrëzimin e kërkesës”, bëri të ditur Gjykata Kushtetuese.

Ndërkohë rasti që u shqyrtua sot lidhet me një vendim të Gjykatës së Posaçme të Shkallës së Parë për Korrupsionin dhe Krimin e Organizuar të datës 30 korrik 2024, përmes të cilit është disponuar për vijimin e zbatimit të masës së sigurimit “Arresti në shtëpi”.

Gjykata, bazuar në jurisprudencën e GjEDNj-së vlerësoi t’i analizojë vendimet gjyqësore në drejtim të kufizimit të lirisë personale për periudhën që ato kanë prodhuar pasoja juridike.

Në vlerësimin e kësaj çështjeje, Gjykata konstatoi se gjykatat në shqyrtimin e kushteve dhe të kritereve për vijimin e masës së sigurimit “Arresti në shtëpi” kanë arsyetuar se nevojat e sigurimit paraqiten të pandryshuara me ato për të cilat në gjenezë është konkluduar se kërkuesi duhej të vendosej nën një masë sigurimi.

Në këtë kuptim, Gjykata Kushtetuese evidentoi se gjykatat që kanë lejuar vijimin e masës së sigurimit personal “Arresti në shtëpi”, u janë referuar të njëjtave nevoja sigurimi si në momentin fillestar, kur janë caktuar masat e sigurimit ndaj kërkuesit “Detyrimi për t’u paraqitur në Policinë Gjyqësore” dhe “Ndalimi i daljes jashtë shtetit”.

Gjykata konstaton se për këtë të fundit, në vendimin e saj ka konsideruar që për sa kohë u konstatua mungesë në vlerësimin e elementit të nevojës për kufizimin e të drejtave dhe të lirive të kërkuesit, në raport me mbarëvajtjen e procedimit penal, kjo përbën shkak të mjaftueshëm për të konstatuar cenimin e parimit të proporcionalitetit në caktimin e masës “Ndalimi i daljes jashtë shtetit”.

Po kështu, Gjykata, mbi bazën e të njëjtave argumente, konstatoi se edhe vetëm masa e sigurimit personal “Detyrimi për t’u paraqitur në Policinë Gjyqësore” duket se i plotësonte nevojat e sigurimit.

“Ndërkohë, në vendimet e gjykatave të zakonshme objekt kontrolli, ndonëse kishin kaluar 7 muaj nga caktimi i masës së sigurimit ‘Arrest në shtëpi”’ në lidhje me rrezikun e ikjes, nuk ka ndonjë arsyetim, ndërsa për rrezikun e marrjes dhe të vërtetësisë së provave organi i prokurorisë, në vijim, por edhe gjykatat e zakonshme, në momentin fillestar të caktimit të masave të sigurimit, kanë vlerësuar se ajo përmbushej nga masa e sigurimit ‘Detyrimi për t’u paraqitur në Policinë Gjyqësore’”, vlerëson Gjykata Kushtetuese.

Megjithatë, Gjykata Kushtetuese konstaton se për të njëjtën nevojë sigurimi dhe pa evidentuar ndonjë rrethanë të re për ndonjë sjellje konkrete të kërkuesit në aspekt të kësaj nevoje sigurimi, në rastin në shqyrtim gjykatat e zakonshme kanë konsideruar se ajo përmbushej nga një masë sigurimi më e rëndë, ajo e “Arrestit në shtëpi”.

Nisur nga kjo, Gjykata konstatoi se arsyetimi i vendimeve gjyqësore nuk është i mjaftueshëm në aspektin kushtetues në vlerësimin e kësaj nevoje sigurimi, duke mbajtur parasysh edhe faktin se justifikimi për caktimin fillimisht të masës së sigurimit “Arresti në shtëpi” konsistonte në mosrespektimin, moszbatimin nga kërkuesi të masës “Detyrimi për t’u paraqitur në Policinë Gjyqësore”.

Në vlerësimin e Gjykatës, vetëm një rrethanë e tillë nuk mund të justifikojë vijimin e zbatimit ndaj kërkuesit të masës “Arresti në shtëpi”, pra nuk mund të përbëjë arsye të mjaftueshme për zgjatjen në kohë të gjatë të kufizimit të lirisë, pa arsyetuar për ndonjë arsye të re që justifikon vijimin e masës konkrete.

Për këtë arsye, Gjykata vlerësoi se vendimet objekt i këtij gjykimi kushtetues, që kanë disponuar për vijimin e masës së sigurimit “Arresti në shtëpi”, vijnë në kundërshtim me Kushtetutën.

Për shkak se masa e sigurimit “Arresti në shtëpi” nuk është më në fuqi, pasi Gjykata e Posaçme e Apelit për Korrupsionin dhe Krimin e Organizuar në datën 3 janar 2025 ka vendosur zëvendësimin e saj me masën e sigurimit “Detyrimi për t’u paraqitur në Policinë Gjyqësore”, Gjykata vendosi të mos i shfuqizojë vendimet objekt të këtij shqyrtimi kushtetues.

Në përfundim të këtij gjykimi, Gjykata vendosi pranimin e pjesshëm të kërkesës dhe deklarimin si antikushtetuese të vendimeve të Gjykatës së Posaçme të Shkallës së Parë për Korrupsionin dhe Krimin e Organizuar; të Gjykatës së Posaçme të Apelit për Korrupsionin dhe Krimin e Organizuar; dhe të Kolegjit Penal të Gjykatës së Lartë. “Shpenzimet e përfaqësimit të kërkuesit në vlerën 75.000 lekë i ngarkohen Ministrisë së Financave”, thuhet në vendim.

/m.m/a.f/r.e/

The post Gjykata Kushtetuese: Vijimi i “Arrestit në shtëpi” për Berishën, në kundërshtim me Kushtetutën appeared first on Agjencia Telegrafike Shqiptare.