TIRANË, 10 janar/ATSH/ Kryeministri Edi Rama reagoi sërish sot ndaj deklaratave të gazetarit Blendi Fevziu, i cili u shpreh në emisionin “Opinion” se “të paktën 7 ministra janë në udhëtime private jashtë shtetit të shtunave e të dielave, dhe lënë kasetat me inspektime nëpër televizione sikur janë në punë”.

Rama tha se “Blendi Fevziu ka gënjyer fort, kur duke e parë në sy publikun nga ekrani i “Opinion”, ndërsa u shpreh se pikërisht publikut të “Opinion” duhet t’i kërkonte ndjesë për gënjeshtrën me 7 bishta.

Ditën e djeshme, kryeministri deklaroi se ministrat e kabinetit qeveritar edhe kur dalin për arsye personale jashtë vendit e bëjnë këtë me një kërkesë për leje dhe vetëm me miratim.

Më poshtë reagimi i plotë i kryeministrit:

Pra, Blendi Fevziu ka gënjyer fort, kur duke e parë në sy publikun nga ekrani i Opinionit ai tha, ‘kam fakte që të paktën 7 ministra janë në udhëtime private jashtë shtetit të shtunave e të dielave, dhe lënë kasetat me inspektime nëpër tv sikur janë në punë… Ju’a garantoj’!

Duke reaguar ndaj postimit tim pa sjellë asnjë fakt mbi këtë akuzë të rreme ose shqip, shpifje, Fevziu braktisi jo thjesht deklarimin e dhënë me garancinë se zotëronte fakte, për plot 7 ministra që bënin marifetin e lartpërmendur.

Në të vërtetë ai braktisi publikun e tij dhe u mor në tym me videot e inspektimeve, përballjet e Trumpit me gazetarët, lirinë e tij për të udhëtuar në Amerikën Latine, gjëra që s’kishin asnjë lidhje me arsyen e me përmbajtjen e reagimit tim.

Pa asnjë pendesë për fajin e tij live ndaj publikut, Fevziu u shfaq i çuditur që unë reagova ndaj shpifjes së tij, për të cilën ai në fakt mirë mua, që s’më detyrohet asnjë shpjegim, po publikut të Opinionit duhet t’ia kërkonte një ndjesë për gënjeshtrën me 7 bishta.

Dhe për të shpjeguar çudinë e vet, ai tha se gjëra më të mëdha duhet të merrnin vëmendjen time, duke filluar nga ‘1/3 e Shqipërisë nën ujë’ – vendi ynë ka 2,874,800 hektarë nga të cilat uji kishte mbuluar 13,160 hektarë, pra jo 1/3 po 1/217 – apo duke vazhduar me ‘krizën parlamentare të shkaktuar nga kërkesa e SPAKUT’, kur në fakt kriza parlamentare e Blendit është thjesht krizë e partisë së liderit të Fevziut dhe çunit të Bahri Falliut, sepse parlamenti është me pushimet e dimrit.

Por unë nuk çuditem që Fevziu nuk i kërkon ndjesë publikut të tij për gjithë atë derr gënjeshtre absurde dhe denigruese, ndaj njerëzish që Fevziu nuk ka detyrë t’i respektojë si kundërshtarë, po ka detyrimin të mos i baltosë kolektivisht duke nxitur urrejtje.

Nuk çuditem as që i zoti i Opinionit propagandon kundër qeverisë, me të njëjtat marzhe të llahtarshme gabimi në komunikimin e fakteve, si ai i Shqipërisë së mbuluar nga uji në 1/3 – e këtu Fevzo s’është as vetëm, as më i gabuari, po të kesh parasysh ca të tjerë që gënjejnë si derra të knaqun migjenianë ditë e natë.

Nuk çuditem nga asnjë çudi e mexhelisit politik e mediatik unë, sepse më shumë se sa të vërtetës që Blendi e synon kur shkruan libra si gazetar, Fevziu i Opinionit i shërben tenxheres së tij të potershme që duhet të bubullojë përnatë, e të gërrgërrojë sa më fort mes 700 tenxhereve simotra, që ziejnë në një garë të marrë se kush shkumëzon më shumë.

Poterja gjithçka, e vërteta asgjë. Asnjë çudi.

/m.m/a.f/

The post Rama: Fevziu nuk paraqiti asnjë fakt për akuzën ndaj ministrave appeared first on Agjencia Telegrafike Shqiptare.

TIRANË, 10 janar/ATSH/ Moti i keq me reshje intensive shiu dhe bore që ka përfshirë vendin prej disa ditësh ka shkaktuar probleme në disa qarqe të vendit.

Kryeministri Edi Rama ndau sot momente nga ndërhyrjet që po kryhen përgjatë 24 orëve nga strukturat shtetërore për t’i ardhur në ndihmë banorëve të prekur nga kjo situatë.

Ndërkohë, sipas kryeministrit, “puna po vijon për përballimin e situatës së krijuar nga moti shumë i keq i ditëve të fundit”.

Për përballimin e situatës së përmbytjeve, efektivë të Forcave të Armatosura janë dislokuar në zonat e prekura me fokus mbrojtjen e jetës së qytetarëve dhe minimizimin e pasojave nga situatat emergjente.

Aktualisht, mbi 155 efektivë, 37 mjete dhe 7 motopompa janë angazhuar në qarqet Vlorë, Fier, Durrës dhe Gjirokastër, si dhe në zona të tjera ku ka qenë e nevojshme ndërhyrja.

Ndërkohë autoritetet po punojnë edhe për pastrimin e akseve rrugore në zonat malore ku reshjet e borës dhe ngricat kanë shkaktuar problematika.

Në koordinim me Agjencinë Kombëtare të Mbrojtjes Civile, autoritetet qendrore dhe vendore po vijojnë punën në terren për garantimin e sigurisë së banorëve dhe mbajtjen e situatës nën kontroll.

Deri tani në rang vendi regjistrohen 1587 banesa në praninë e uji, ndërsa janë evakuuar 339 persona dhe 51 familje.

/m.m/a.f/

The post Rama: Vijon puna për përballimin e situatës së krijuar nga moti i keq appeared first on Agjencia Telegrafike Shqiptare.

The post Tabaku: Natyra s’është alibi për përmbytjet, vetëm 1% e buxhetit për kanalizime appeared first on Agjencia Telegrafike Shqiptare.

TIRANË, 9 janar/ATSH-Maela Marini/ Kryetarja e bashkisë Vlorë, Brunilda Mersini bëri të ditur sot se pas orëve të gjata dhe të vështira, fatmirësisht niveli i ujit në lumin Vjosë ka nisur të ulet ndjeshëm.

Në një prononcim për mediet, Mersini u shpreh se aktualisht niveli i Vjosës është nën 8 metra.

“Kjo ka bërë që ne të kalojmë në një fazë të dytë, duke filluar të hapim rrugët. Pavarësisht se të gjitha rrugët e fshatrave janë të aksesueshme ngel një segment rrugor në Bishan”, tha ajo.

Sipas Mersinit, ka qenë një punë e  jashtëzakonshme e të gjitha strukturave. “Janë angazhuar 255 forca me 40 mjete që kanë ndihmuar edhe për evakuimin e banorëve dhe  bagëtive. Fokusi ka qene te jetët njerëzore”, tha ajo.

Ndërkohë kryebashkiakja e Vlorës njoftoi qytetarët se pritet një tjetër stuhi e fortë ere gjatë ditës së sotme.

Ajo u bëri thirrje banorëve të tregojnë kujdes të shtuar dhe të shmangin lëvizjet e panevojshme.

“Për çdo shqetësim apo situatë emergjente, të kontaktojnë shërbimet përkatëse, të cilat do të vijojnë të jenë në gatishmëri të plotë. Prioriteti ynë mbetet shëndeti dhe siguria e çdo qytetari”, u shpreh ajo.

/a.f/

The post Mersini: Pritet stuhi ere në Vlorë, të shmangen lëvizjet e panevojshme appeared first on Agjencia Telegrafike Shqiptare.

TIRANË, 9 janar/ATSH/ Rruga Bogë–Theth vijon të jetë e kalueshme, pavarësisht reshjeve të dëborës në këtë zonë malore.

Kryeministri Edi Rama ndau sot pamje nga ky aks rrugor, ku po punohet në vijimësi për të garantuar qarkullim pa probleme.

“Gatishmëri maksimale në aksin Bogë–Theth. Situata po monitorohet në mënyrë të vazhdueshme dhe ndërhyrjet do të vijojnë sipas nevojës, për të garantuar lëvizje të sigurt për banorët dhe vizitorët”, u shpreh Rama.

Moti i keq me reshje intensive shiu dhe bore ka përfshirë vendin prej disa ditësh. Situata ka shkaktuar rritje të prurjeve në lumenj duke përmbytur mbi 13 mijë ha tokë bujqësore.

Ndërkohë në zonat malore po punohet në vijimësi për pastrimin e akseve rrugore nga bora dhe sigurimin e qarkullimit normal.

/m.m/a.f/

The post Rama: Rruga Bogë -Theth e kalueshme, gatishmëri për të garantuar lëvizje të sigurt appeared first on Agjencia Telegrafike Shqiptare.

TIRANË, 9 janar/ATSH-Maela Marini/ Kryeministri Edi Rama deklaroi se reagimi i shtetit ndaj situatave të përmbytjeve si dhe mbrojtja dhe garancitë për familjet e dëmtuara sot është krejt tjetër krahasuar me të shkuarën.

Në mbledhjen e Komitetit Ndërministror të Emergjencave Civile, Rama siguroi se do të çohet deri në fund gjithë procesi i transformimit të infrastrukturës që sipas tij, deri dje ishte inekzistent.

“Këtë e tregon sasia e hektarëve të mbuluar nga uji sot mbas gjithë kësaj lemerie atmosferike dhe sasitë që mbuloheshin nga uji në të kaluarën për të kuptuar ndryshimin e pakrahasueshëm”, shtoi Rama.

Kryeministri theksoi se kemi një hartë të qartë veprimi në programin e Shqipërisë 2030 për të rritur rezistencën e infrastrukturës në tërësi, karshi këtyre fenomeneve.

“Ministria e Mbrojtjes, duke u inkuadruar në kornizën e re të vendosur nga NATO, ka pjesë të funksionimit të saj dhe elementin e qëndrueshmërisë, që lidhet drejtpërdrejtë me infrastrukturën kritike. Këtu jemi në kushtet kur flasim për infrastrukturën kritike. Kështu që në bashkëpunimin e ngushtë të Ministrisë së Mbrojtjes me Ministrinë e Infrastrukturës apo me Ministrinë e Bujqësisë, lidhur me pikat ku duhet ndërhyrë, do të bëjmë që çfarë është programuar për vitin 2026, të riprogramohet edhe për të riadresuar këto pika ku kanë ndodhur dëmtime”, tha Rama.

Njëkohësisht, kryeministri kërkoi nga deputetët që të bëjnë konstatimet e tyre lidhur me dëmet në terren.

“Ju kërkoj deputetëve edhe njëherë, që të jenë të pranishëm në të gjitha zonat e tyre të përkujdesjes ndaj njerëzve, jo zgjedhësve, po njerëzve pa dallim dhe të bashkëpunojnë ngushtësisht me kryetaret e bashkive dhe me strukturat në territor për të bërë të mundur që gjithë procesi i zhdëmtimit të jetë një proces sa më i plotë, sa më i drejtë dhe sa më efikas”, theksoi Rama.

/a.f/

The post Rama: Deputetët të angazhohen në terren për konstatimin e dëmeve appeared first on Agjencia Telegrafike Shqiptare.

TIRANË, 9 janar/ATSH-Maela Marini/ Kryeministri Edi Rama bëri të ditur sot se deri tani në rang vendi regjistrohen 1587 banesa në praninë e uji, ndërsa janë evakuuar 339 persona dhe 51 familje.

Në mbledhjen e Komiteti Ndërministror i Emergjencave Civile, kryeministri Rama bëri një përditësim të situatës së krijuar nga moti shumë i keq i ditëve të fundit, si pasojë e nivelit tejet të lartë të reshjeve të shiut.

“Aktualisht në gjithë vendin janë ulur sasitë e reshjeve të matura, përjashtuar Durrësin ku janë regjistruar 41 mm shi. Një punonjës i bashkisë së Durrësit është gjendur i mbytur. Deri tani janë numëruar në rang vendi 1587 banesa në praninë e ujit. Janë evakuuar 339 persona dhe 51 familje”, tha Rama.

Po ashtu, kryeministri theksoi se prani uji është konstatuar në 13 211 ha tokë bujqësore, një pjesë janë përmbytur.

“Kemi prani uji edhe në disa qendra shëndetësore apo objekte arsimore. Sasia e reshjeve ka qenë e jashtëzakonshme deri në 300 mm ose përndryshe më shumë se sa sasia mesatare e reshjeve që bien gjatë gjithë muajit. Pra, reshjet 30-ditore mesatare të muajit kanë rënë për një periudhë 3 apo 4 ditore”, tha Rama.

Ky fenomen, sipas tij, vjen si rezultat i ndryshimit të klimës dhe po bëhet gjithnjë e më pak i papritur në mbarë botën.

“Për shembull në disa zona të ultësirës perëndimore sasia e reshjeve në këto 4-5 ditë ka qenë rreth 25% ose sa çereku i sasisë vjetore të tyre në mesatare. Si pasojë e rritjes së këtyre prurjeve në rrjetet ujore, në kanalet e ujërave të larta, kolektorë kryesorë kullues, përrenjtë malorë dhe vetë lumenjtë e vendit ka ardhur si pasojë përmbytja”, tha Kryeministri.

Rama theksoi se kjo ka ndodhur pavarësisht infrastrukturës gjerësisht të ripërtërirë të mbrojtjes ujore si rezultat i investimeve të vazhdueshme të dekadës së fundit.

The post Rama: 1587 banesa e mbi 13 mijë hektarë tokë bujqësore të përmbytura, u evakuuan 339 persona appeared first on Agjencia Telegrafike Shqiptare.

TIRANË, 8 janar/ATSH/ Në fshatin Ferras të Fierit dhe në bashkinë e Dimalit po vijon evakuimi i banorëve që rrezikohen nga përmbytjet.

Ministri i Mbrojtjes, Pirro Vengu ndau sot momente nga ndërhyrjet që po kryejnë efektivët e Regjimentit të Këmbësorisë së Jugut.

“Efektivët e Regjimentit të Këmbësorisë së Jugut janë në vijën e parë të angazhuar në evakuime dhe përballimin e emergjencave civile në Ferras të Fierit dhe Bashkinë e Dimalit”, u shpreh Vengu.

Reshjet intensive të shiut në ditët e fundit kanë krijuar problematikë të shtuar në disa qarqe të vendit, kryesisht në Durrës, Vlorë dhe Fier.

Ministria e Mbrojtjes ka urdhëruar evakuimin në disa zona të këtyre qarqeve, konkretisht në Novoselë të Vlorës, në Ferras të Fierit, si dhe në Sukth dhe Katundin e Ri në Durrës.

/m.m/a.f/r.e/

The post Vengu: Vijon evakuimi i banorëve në Ferras dhe bashkinë Dimal appeared first on Agjencia Telegrafike Shqiptare.

The post Urdhërohet evakuimi i menjëhershëm i banorëve të fshatit Ferras në Fier appeared first on Agjencia Telegrafike Shqiptare.

TIRANË, 8 janar/ATSH/ Reshjet e shiut të ditëve të fundit kanë shkaktuar problematika në qarqe të ndryshme të vendit.

Si pasojë e reshjeve intensive, gjatë orëve të fundit ka pasur rritje të niveleve të lumenjve në disa qarqe të vendit, gjë që ka krijuar problematika serioze, kryesisht përmbytje të tokave bujqësore dhe banesave, rrëshqitje dherash, dëmtime infrastrukturore dhe bllokime rrugësh.

Sipas Ministrisë së Mbrojtjes, situata më problematike paraqitet në qarqet Shkodër, Lezhë, Durrës, Fier, Berat dhe Gjirokastër, ndërsa në qarqe të tjera situata është nën monitorim ose pa rrezik.

Strukturat e Mbrojtjes Civile dhe Forcat e Armatosura, nën koordinimin e Agjencisë Kombëtare të Mbrojtjes Civile janë angazhuar në terren për përballimin e emergjencës, evakuimin e banorëve, ku është e nevojshme dhe minimizimin e dëmeve.

Situata sipas qarqeve paraqitet si më poshtë:

Qarku Shkodër
Ka rritje të nivelit të ujit në fshatin Obot, me rreth 60 cm ujë mbi rrugën kryesore. Qarkullimi bëhet vetëm për mjete të tonazhit të lartë. Po ashtu ka rritje të sipërfaqeve të tokave bujqësore nën ujë. 15 banesa janë të rrethuara nga uji në Vaun e Dejës. Në disa fshatra të Malësisë së Madhe ka rrugë të bllokuara dhe prezencë uji. Ndërsa në bashkinë Fushë-Arrëz janë evidentuar shkarje dherash dhe rënie gurësh, prezencë e shtuar e ujit në rrugët auto-rurale, që kanë shkaktuar dëmtime.

Qarku Lezhë
Rreth 3000 ha tokë bujqësore janë nën ujë. Është bërë evakuimi i dy familjeve, një në fshatin ishullin Shëngjin dhe një në fshatin Kakariq. Rreth 100 banesa janë të rrethuara nga uji, kryesisht në njësitë administrative Dajç, Babullojë, Balldren dhe Shënkoll. Po ashtu ka rrëshqitje dherash në fshatrat Torovicë dhe Tresh. Po punohet për mbylljen e çarjes së argjinaturës në lumin Droje, në fshatin Dukagjin.

Qarku Vlorë
Niveli i lumit Vjosë në Novoselë ka kaluar mbi 8 metra. Janë evakuuar 13 familje pranë Urës së Mifolit dhe në Novoselë. Nuk ka prezencë uji në banesa.

Qarku Durrës
Aktualisht situata është drejt përmirësimit, por po punohet për heqjen e ujit nga rreth 800 banesa dhe objekte, veçanërisht në zonën e burgut, ish-Kënetës, Shkozet dhe Nish Tullë. Në terren ndodhen ekipe të vlerësimit të dëmeve që po vazhdojnë evidentimin dhe dokumentimin e rasteve. 250 persona janë të strehuar në Shtëpinë e Pushimit te Ushtrisë, Durrës dhe 55 persona janë strehuar në Konvaleshencën e Ministrisë së Brendshme. ⁠Lumenjtë Erzen dhe Ishëm, si dhe kanali i Tonës janë në kuotat maksimale. Disa rrugë të qytetit mbeten të bllokuara, për shkak të pranisë së lartë të ujit.

Bashkia Krujë: Si pasojë e çarjes së argjinaturës së lumit Drojë ka vërshime uji në dy fshatrat Dukagjin i Ri dhe Miliska. Në fshatin Miliska uji ka hyrë në banesa, ku janë prekur 50 familje. Në terren ndodhen ekipe të Bordit të Kullimit Durrës, për përballimin e situatës.

Bashkia Shijak: Ka prani uji në 15 banesa. Situata problematike paraqitet veçanërisht në njësitë administrative Xhafzotaj, Maminas dhe Gjepalaj.

Qarku Gjirokastër
Si pasojë e reshjeve të dendura ka rrëshqitje dherash në aksin Tepelenë–Gjirokastër, ku qarkullimi është i kufizuar. Po punohet për rikthimin e energjisë në disa zona malore. Nivele të larta të lumit Vjosë në Memaliaj dhe Përmet.

Qarku Kukës
Lumenjtë janë në kuota të larta, por pa problematika aktuale.

Qarku Tiranë
Ka rritje e niveleve të lumenjve në Rrogozhinë dhe Kavajë, por pa rrezik të menjëhershëm për zonat e banuara.

Qarku Korçë
Janë disa rrugë të pakalueshme në Devoll. Po ashtu janë evidentuar rrëshqitje dherash dhe bllokime rrugore në Pogradec dhe Përrenjas. Në Maliq ka sipërfaqe të tokave bujqësore nën ujë.

Qarku Berat
Rreth 95 hektarë toka bujqësore janë nën ujë. Është evidentuar rritje e nivelit të lumit Osum. Në lagjen 22 Tetori dhe Gorricë, janë marrë masa për sigurimin e bizneseve dhe punohet për largimin e ujit nga pedonalja me pompa thithëse.

Qarku Fier
Rreth 200 ha tokë bujqësore janë të përmbytura. Ka prezencë uji në 27 banesa në disa fshatra.

Ministri e Mbrojtjes njofton se në qarqet e tjera nuk paraqiten problematika serioze.

Në total Forcat e Armatosura kanë angazhuar rreth 150 efektivë; mbi 20 mjete të kalueshmërisë së lartë dhe të tonazhit të rëndë; 10 gomone/motobarka shpëtimi;  15 pompa thithëse me kapacitet të lartë dhe të vogël.

Forcat janë shpërndarë kryesisht në qarqet Shkodër, Lezhë, Vlorë, Durrës, Gjirokastër dhe Fier, në funksion të evakuimeve, përforcimit të argjinaturave dhe largimit të ujërave.

Ministria e Mbrojtjes u bën thirrje të gjithë banorëve në zonat e prekura të ndjekin udhëzimet e autoriteteve vendore dhe të Mbrojtjes Civile, si dhe të shmangin lëvizjet e panevojshme, veçanërisht në zona të përmbytura ose me rrëshqitje dherash.

Po ashtu qytetarët duhet të raportojnë menjëherë çdo situatë rreziku pranë strukturave përgjegjëse, si dhe të bashkëpunojnë në rastet e evakuimit për garantimin e sigurisë së jetës dhe pronës.

Situata vijon të monitorohet në mënyrë të pandërprerë dhe strukturat përgjegjëse mbeten në gatishmëri të plotë.

/m.m/a.f/

The post Reshjet intensive, situata më problematike në gjashtë qarqe appeared first on Agjencia Telegrafike Shqiptare.

TIRANË, 7 janar/ATSH/ Moti i keq me reshje intensive shiu që ka përfshirë vendin gjatë dy ditëve të fundit ka shkaktuar përmbytje në disa qarqe të vendit.

Kryeministri Edi Rama ndau sot pamje nga Shkozeti, ku duket problematika e krijuar nga grumbullimi i mbetjeve plastike, që ka shkaktuar përmbytje në zonat përreth.

“Sigurisht që kur i hedhim plehrat e shishet plastike nëpër fusha e në anët e rrugëve të atdheut që e duam vetëm në stadium, vjen një ditë shiu me gjyma që i mbledh nga janë e nga s’janë dhe i dynd në det. Po kur pastaj shiu është aq i furishëm sa ky i fundit, atëherë nuk e arrin dot detin si zakonisht, sepse gryka e kanalit taposet krejt, duke përmbytur dynjanë”, tha Rama, duke ndarë pamjet nga Shkozeti.

1 nga 2

/m.m/a.f/r.e/

The post Rama: Hedhja e plehrave në anë të rrugës, shkak për përmbytjet appeared first on Agjencia Telegrafike Shqiptare.

TIRANË, 7 janar/ATSH/ Kryetari i bashkisë së Lezhës, Pjerin Ndreu bëri të ditur sot se situata e shkaktuar nga reshjet në Lezhë është në përmirësim të ndjeshëm.

Sipas Ndreut, autoritetet vendore mbeten në mbikëqyrje të problematikave të ndryshme.

“Lezha ka përjetuar një situatë të rënduar në disa zona dhe jo në gjithë territorin, por jo jashtë kontrollit”, theksoi Ndreu.

Sipas tij, problematika që krijohet në vazhdimësi në lagjen “Besëlidhja” në Lezhë, është drejt zgjidhjes pasi një projekt i KfW-së është në zbatim e sipër.

“Kjo do të thotë që së shpejti nuk do përballemi më me të tilla situata! S’ka vend për panik, as për shprehje mediatike ‘Lezha nën ujë’, sepse 20% e qytetit e ka këtë problem, as për fërkim duarsh nga ‘madhështorë’ e kushdo tjetër, pasi i kemi dalë për zot kësaj pune ashtu siç duhet”, u shpreh Ndreu.

Në zonat rurale, sipas tij, “ka pasur problematikë në 10% të territorit në toka bujqësore në Pllanë, Spiten, Grash, Zojs, Torovicë, Blinisht, Gocaj”.

“Fluksi i pashembullt i reshjeve është përballuar me kompetencë nga punonjësit e bashkisë Lezhë, që kanë qenë kudo ku iu është kërkuar, në ndihmë të banorëve dhe në përmirësim të situatës”, tha Ndreu.

Sistemi i kanaleve kulluese prej 730 km të hapura në këto 6 vite, sipas kryebashkiakut Ndreu ka bërë që të amortizohen në maksimum pasojat.

“Sot as që bëhet fjalë për javë të tëra me prezencë uji. Puna jonë ka dhënë efektet e duhura. Gjithsesi nuk ka vend për t’u vetëkënaqur, por përgjegjësi për të vazhduar me vendosmëri në përmirësimin më tej të problematikave të evidentuara”, tha Ndreu.

Çdo banor i Lezhës, sipas tij, “duhet të jetë i sigurt se përtej helmit që e kanë gati disa detashmentë që s’kanë punë tjetër, ne gjithmonë e në çdo rast do jemi në shërbim të komunitetit. Asnjëherë më parë s’ka ndodhur një komunikim dhe bashkërendim i tillë, ku qytetari ka një derë ku qan hallet dhe gjen një përgjigje të shpejtë”.

/m.m/a.f/r.e/

The post Ndreu: Situata e shkaktuar nga reshjet në Lezhë është në përmirësim të ndjeshëm appeared first on Agjencia Telegrafike Shqiptare.

TIRANË, 7 janar/ATSH/ Kryeministri Edi Rama reagoi sot pas akuzave të opozitës lidhur me situatën e shkaktuar nga moti i keq në disa qarqe të vendit.

Kryeministri kujtoi se reshjet kanë shkaktuar përmbytje edhe në vende të tjera të rajonit si Itali, Greqi, Mal të Zi dhe Kroaci, por andej opozita nuk fajëson qeverinë.

“Nuk e kuptoj pse nuk po më fajësojnë akoma mua, qeverinë dhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë… Çudi e madhe opozitat andej, po të paktën të fajësonin qeveritë e tyre, po hiç, asnjë llaf. S’e kuptojnë që aleanca me shiun të çon në fitore?!”, u shpreh Rama, në një reagim në rrjete sociale.

Kryetari i Partisë Demokratike, Sali Berisha u shpreh dje se “përmbytjet janë rezultat i politikave të dështuara urbanistike dhe mungesës së investimeve në infrastrukturë dhe sistemin e kanalizimeve, përgjegjësi që i atribuohen qeverisë dhe pushtetit lokal”.

Prej dy ditësh vendi është përfshirë nga moti i keq me reshje intensive shiu, që ka shkaktuar probleme në disa qarqe. Aktualisht qarqet më të prekura janë ai i Gjirokastrës, Lezhës dhe Durrësit.

Nuk e kuptoj pse nuk po më fajësojnë akoma mua, qeverinë apo qoftë edhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë… Çudi e madhe opozitat andej, po të paktën të fajësonin qeveritë e tyre, por hiç, asnjë llaf, s’e… pic.twitter.com/sCleOghzIh

— Edi Rama (@ediramaal) January 7, 2026

/m.m/a.f/r.e/

The post Rama i përgjigjet opozitës: Pse nuk më fajësojnë edhe për reshjet mbytëse në rajon appeared first on Agjencia Telegrafike Shqiptare.

TIRANË, 6 janar/ATSH-Maela Marini/ Moti i keq me reshje intensive shiu ka shkaktuar problematikat e para në bashkinë e Lezhës, ku për shkak të pranisë së ujit është pezulluar mësimi në dy shkolla.

Në një prononcim për ATSH-në, kryetari i bashkisë Lezhë, Pjerin Ndreu bëri të ditur se aktualisht ka prezencë uji në 20% të territorit të qytetit.

“Një pasqyrë të saktë se sa hektarë tokë bujqësore janë nën ujë ende nuk kemi, por ne ndodhemi në terren për të monitoruar nga afër situatën. Aktualisht është pezulluar mësimi në dy shkolla për shkak të prezencës së ujit në qendër të qytetit. 20% e territorit të qytetit është i zënë me ujë”, u shpreh Ndreu.

Sipas tij, ka fryrje të lumenjve për shkak të prurjeve dhe prezencë uji në disa toka bujqësore, por jo në banesa.

“Për momentin po ikim shtëpi më shtëpi, po komunikojmë me të gjithë kryetarët e fshatrave për të evidentuar nëse do të ketë ndonjë rast që duhet të evakuohet, por deri tani nuk kemi ndonjë problematikë të tillë”, u shpreh Ndreu për ATSH.

Më herët bashkia Lezhë informoi se për shkak të reshjeve të shumta dhe shkarkimeve nga hidrocentrali i Vaut të Dejës, situata në territor pritet të rëndohet.

Autoritete vendore u kërkojnë të gjithë banorëve që, në rast emergjence apo nëse konstatojnë prezencë uji në banesat e tyre, të kontaktojnë menjëherë në numrat e emergjencës të vendosur në dispozicion: +355 68 367 8727

Bashkia Lezhë është në gatishmëri të plotë dhe po ndjek nga afër situatën për të garantuar ndërhyrje të menjëhershme dhe mbështetje për qytetarët.

/m.m/r.e/a.f/

The post Ndreu: Prani uji në 20% të territorit, pezullohet mësimi në dy shkolla appeared first on Agjencia Telegrafike Shqiptare.

TIRANË, 6 janar/ATSH/ Në kaskadën e Drinit si pasojë e rritjes së prurjeve, po vijojnë shkarkimet e kontrolluara nga HEC-i Koman dhe HEC-i Vau i Dejës.

Kryeministri Edi Rama bëri të ditur sot se “bashkia e Shkodrës është në koordinim të vazhdueshëm me KESH për menaxhimin e situatës dhe minimizimin e çdo rreziku të mundshëm për zonat e territorit të bashkisë”.

Kryeministri theksoi se deri në këto momente nuk është evidentuar asnjë problematikë.

“Aktualisht po shkarkohet një sasi prej 700 m³/sekondë, përveç prodhimit, shkarkime këto të monitoruara dhe të menaxhuara nga specialistët e hidrocentraleve”, u shpreh Rama.

Moti i keq me reshje intensive shiu që ka përfshirë vendin gjatë orëve të fundit ka shkaktuar problematika në disa qarqe të vendit. Në Durrës dhe Lezhë si pasojë e pranisë së ujit është pezulluar mësimi në disa shkolla.

Po ashtu reshjet e dendura të shiut kanë shkaktuar ndërprerje të energjisë elektrike në disa zona.

/m.m/a.f/r.e/

The post Rama: Vijojnë shkarkimet e kontrolluara nga kaskada e Drinit appeared first on Agjencia Telegrafike Shqiptare.

TIRANË, 5 janar/ATSH/ Kreu i Lëvizjes “Shqipëria Bëhet”, Adriatik Lapaj u rikthye sërish në protestë para selisë së Kryeministrisë, pasi la ambientet e Spitalit të Traumës, ku mori ndihmën dhe trajtimin e nevojshëm mjekësor pas një incidenti me ngrohësen e gazit.

Lapaj i bëri thirrje qytetarëve që të bashkohen dhe të protestojnë kundër kryeministrit Edi Rama deri në rrëzimin e qeverisë.

“Rama e ka vendosur precedentin e çadrës nuk e kam vendosur unë. Këtij i duket Republika si pronë private. Ramës po i themi që ka vjedhur Republikën bashkë me kolegët. Nuk e them unë e thotë gjykata. Unë mendoj që në këtë vend ka shumë për të protestuar”, tha ai.

Lapaj paralajmëroi se do të vazhdojë protestën para kryeministrisë edhe nëse procedohet nga policia.

Efektivë të policisë së Shtetit kanë ndërhyrë në orët e vona të mbrëmjes së djeshme për largimin e çadrave të ngritura para kryeministrisë nga kryetari i “Shqipëria Bëhet”, Adriatik Lapaj dhe mbështetës të tij.

Ata janë përplasur me punonjësit e policisë duke kundërshtuar këtë vendim.

Gjatë këtij aksioni, dyshohet se Lapaj është lënduar në kokë nga një prej bombolave të gazit dhe është dërguar në spital për të marrë ndihmën mjekësore.

“Shqipëria Bëhet” po proteston pa ndërprerje që prej datës 8 dhjetor para godinës së Kryeministrisë./m.m/j.p/

The post Lapaj rikthehet në protestë para Kryeministrisë appeared first on Agjencia Telegrafike Shqiptare.

TIRANË, 5 janar/ATSH/ Kryetari i Partisë Demokratike Sali Berisha shprehu sot bindjen se populli opozitar do të triumfojë, ndërsa garantoi se beteja do të ndalet vetëm me fitoren e opozitës.

Në foltoren e vendosur para kryeministrisë, Berisha u shpreh se “ky është një vit i madh për opozitën”.

“Ky është viti në të cilin do të triumfojmë. Shqiptarët me dinjitet do përmbysin diktaturën e shëmtuar, të urryer që u instalua mbi ta dhe përsëri do jenë një popull i lirë. Ne nuk presim që forcat Delta të zbarkojnë në Surrel, sepse do zbarkojnë Deltat tona”, u shpreh Berisha.

Berisha akuzoi sërish Ramën se shndërroi zgjedhjet në farsë elektorale, ndërsa u shpreh se “mandatet e tij qëndrojnë mbi krimin”.

“Ka marrë mandatet e opozitës. Ky është si Maduro për shqiptarët, se në qoftë se Maduro ka përzënë nga vendi i tij 20 për qind të popullatës me varfëri dhe mjerim, ky ka përzënë nga Shqipëria 40 për qind të popullatës”, tha Berisha.

Sipas tij, “viti 2026 ngjason shumë në histori me vitin e rrëzimit të diktaturave komuniste njëra pas tjetrës”.

“Sot diktaturat më të përhapura janë narko-diktaturat dhe autokracitë elektorale. Ushtria amerikane, qeveria e SHBA, në një operacion më të përsosurin në histori, arrestuan dhe nxorën sot para gjyqit Maduron e Venezuelës. Mediat e majta, të kontrolluara nga qeveria në Shqipëri, nga mëngjesi gjer në darkë u bien borive se u shkel sovraniteti, se kjo shkeli ligjin ndërkombëtar. Dhunuesit më të mëdhenj të sovranitetit të kombeve, dhunuesit më të mëdhenj të ligjit kombëtar dhe ndërkombëtar janë diktatorët dhe diktaturat. Rrëzimi i tyre është respekti më i madh për ligjin ndërkombëtar, ligjin kombëtar, për qytetarët e vendeve të shtypura”, u shpreh më tej Berisha.

Sipas tij, “nuk ka sovranitet vendi në të cilin zgjedhjet zëvendësohen me farsë elektorale”.

Në fjalën e tij Berisha uroi edhe 35-vjetorin e gazetës “Rilindja Demokratike”, ndërsa garantoi gazetarët se programi i PD ka në themel lirinë e fjalës dhe dinjitetin e tyre.

/m.m/j.p/

The post Berisha: Populli opozitar do të triumfojë appeared first on Agjencia Telegrafike Shqiptare.

TIRANË, 5 janar/ATSH/ Kryetari i grupit parlamentar të Partisë Socialiste, Taulant Balla reagoi sot ndaj protestës së Partisë Demokratike para selisë së Kryeministrisë.

Balla kujtoi se “po afron përvjetori i 15-të i masakrës së 21 janarit në bulevard dhe kambanat bien më shumë se kurrë”.

Sipas Ballës, “kush ka dhënë urdhër të qëllohet mbi popullin, duhet të përballet me drejtësinë”.

“Njëri nga hyzmeqarët sulmoi pa dashje kryebufin ndërsa fliste për krimet e Maduros, iu referua krimit të vrasjes së protestuesve nga diktatori i Venezuelës në 2019. Ke plotësisht të drejtë. Kush ka dhënë urdhër të qëllohet mbi popullin, duhet të përballet me drejtësinë. 15 vjetori i 21 Janarit 2011 po afron dhe kambanat bien më shumë se kurrë”, u shpreh Balla.

Balla solli në vëmendje edhe mungesën e pjesëmarrjes të mbështetësve të PD-së në protestën e sotme para kryeministrisë.

/m.m/j.p/

The post Balla për protestën e opozitës: Kambanat e 21 Janarit bien më fort se kurrë appeared first on Agjencia Telegrafike Shqiptare.

TIRANË, 4 janar/ATSH/ Shkolla “Martin Camaj” në Shkodër po i nënshtrohet rikonstruksionit të fasadës, në kuadër të ndërhyrjeve të bashkisë për të garantuar kushte më të mira për nxënësit dhe mësuesit.

Kryeministri Edi Rama ndau sot pamje nga ndërhyrjet që po realizohen në këtë shkollë, ku më herët është investuar edhe për pajisjen me laboratorët e rinj smart, pjesë e një nisme kombëtare për integrimin e teknologjisë në arsimin parauniversitar.

“Viti i ri nis mbarë për shkollën ‘Martin Camaj’ në Shkodër, e cila po rilind duke i dhënë më shumë funksionalitet hapësirës ku çdo ditë formohet e ardhmja”, u shpreh Rama.

Punimet po realizohen nga Drejtoria e Përgjithshme e Mirëmbajtjes së Objekteve Publike në bashkinë Shkodër, në vijim të angazhimit për të përmirësuar infrastrukturën arsimore dhe mjediset e nxënësve.

/m.m/a.f/

The post Rikonstruktohet fasada e shkollës “Martin Camaj” në Shkodër appeared first on Agjencia Telegrafike Shqiptare.

TIRANË, 4 janar/ATSH-Maela Marini/ Pas përfundimit të festave të fundvitit, pika kufitare e Kakavijës po përballet me fluks të shtuar lëvizjesh, kryesisht në dalje, ndërsa emigrantët po rikthehen në Greqi.

Në një prononcim për ATSH-në, prefektja e qarkut Gjirokastër Albana Hasanaj bëri të ditur se gjatë 24 orëve të fundit në pikën kufitare të Kakavijës kanë hyrë 3555 shtetas.

Fluksi më i madh i lëvizjes, sipas Prefektes së Gjirokastrës regjistrohet në dalje të territorit ku në këtë pikë kufitare janë regjistruar 7350 shtetas.

Hasanaj theksoi se nga pala shqiptare po punohet me 2 sportele në hyrje dhe 4 sportele në dalje.

“Nga pala shqiptare po operohet me kapacitet të plotë dhe me masa të shtuara. Edhe aktualisht fluksi i lëvizjes në dalje te territorit është i lartë”, u shpreh prefektja Hasanaj.

Sipas saj, autoritetet shqiptare janë në kontakt dhe koordinim të vazhdueshëm me autoritetet homologe greke per shtimin e sporteleve.

“Aktualisht nga pala greke po punohet me 3 sportele në hyrje dhe 2 sportele në dalje. Në këto momente fluksi vjen me të njëjtin intensitet. Jemi në gatishmëri per marrjen e masave shtesë”, u shpreh prefektja Hasanaj për ATSH-në.

/a.f/

The post Hasanaj për ATSH: Mbi 7 mijë shtetas drejt Greqisë nga Kakavija në 24 orët e fundit appeared first on Agjencia Telegrafike Shqiptare.