Donald Trump e ka paralajmëruar Iranin se “koha po mbaron” për të negociuar një marrëveshje mbi programin e tij bërthamor pas shtimit të vazhdueshëm të forcave ushtarake amerikane në Gjirin Persik. Presidenti amerikan tha se një “Armadë masive” po “lëvizte shpejt, me fuqi, entuziazëm dhe qëllim të madh” drejt Iranit, duke iu referuar një force të madhe detare amerikane.

Në përgjigje, misioni i Iranit në OKB tha se Teherani “është gati për dialog bazuar në respekt dhe interesa të ndërsjella”, por nëse shtyhet, shkroi me të gjitha kapitalet, do të mbrohet dhe “do të përgjigjet si kurrë më parë”.

Trump kishte thënë më parë se do të “shpëtonte” protestuesit e përfshirë në shtypjen brutale dhe të pashembullt të demonstratave në Iran në fillim të këtij muaji.
Agjencia e Lajmeve të Aktivistëve të të Drejtave të Njeriut (HRANA) me seli në SHBA thotë se ka konfirmuar vrasjen e më shumë se 6,000 njerëzve, përfshirë 5,858 protestues, që nga fillimi i trazirave në fund të dhjetorit.

Ajo thotë se aktualisht po heton edhe 17,000 vdekje të tjera të raportuara pavarësisht një mbylljeje të internetit pas gati tre javësh. Një grup tjetër, Organizata për të Drejtat e Njeriut në Iran (IHR) me seli në Norvegji, ka paralajmëruar se numri përfundimtar mund të kalojë 25,000.

Trump bëri paralajmërimin e tij të fundit ndaj Iranit në një postim në platformën e tij Truth Social të mërkurën. “Shpresojmë që Irani të ‘Vijë shpejt në Tavolinë’ dhe të negociojë një marrëveshje të drejtë dhe të barabartë – JO ARMË BËRTHAMORE”, shkroi ai.

Irani këmbëngul se programi i tij bërthamor është tërësisht paqësor dhe ka mohuar vazhdimisht se kërkon të zhvillojë armë bërthamore.

Presidenti amerikan tha se forca detare në Gjirin Persik ishte më e madhe se ajo e dërguar në Venezuelë para se forcat amerikane të kapnin ish-udhëheqësin e vendit, Nicolás Maduro.

Trump shtoi se kjo forcë ishte “e gatshme dhe e aftë të përmbushte shpejt misionin e saj, me shpejtësi dhe dhunë, nëse është e nevojshme”.

Duke iu referuar sulmeve të SHBA-së në vendet kryesore bërthamore iraniane qershorin e kaluar – të nisura gjatë luftës 12-ditore të Izraelit me Izraelin – Trump paralajmëroi: “Sulmi i ardhshëm do të jetë shumë më i keq! Mos e bëni këtë të ndodhë përsëri.”/abcnews.al

Gripi është përhapur në të gjithë vendin dhe është në kulm të qarkullimit të tij.  Prej mesit të  janarit të prekurit janë rritur ndjeshëm duke shtuar fluksin e pacientëve në spitale e qendra shëndetësore. Sipas Institutit të Shëndetit Publik vetëm javën e fundit rreth 18 500 persona me infeksione në rrugët  e frymëmarrjes  kanë kërkuar ndihmë mjekësore.

“Më i shprehur është në qytetet e mëdha, që kanë dhe numër më të madh të popullatës, Tirana, Shkodra, Kukësi, Durrësi, Fieri. Aktualisht jemi ne kulmin e qarkullimit që parashikohet dhe javën e parë të shkurtit dhe me pas pritet një rënie graduale e numrit të rasteve.” 

Virusi  që po dominon është ai i tipit A. Instituti i Shëndetit publik konfirmon praninë e nëntipit K që po qarkullon dhe në Europë dhe shfaqet më agresiv.

“Qarkullon virusi i tipit A të gripit me dy nëntipet e tij AH1 dhe  AH3,  por me mbizotërim të  ah3 që gjithashtu  mbizotëron dhe në të gjithë kontinentin Europian.   Nëntipi ah3   paraqet një klinikë më të ashpër  sesa nëntipi AH1. Dallimi i gripit nga këto virozat e tjera është temperaturë e lartë që  reziston për tre deri në 1 javë, 38 gradë dhe më tepër. Janë shenja të përgjithshme si skuqje, lotim, syshë rrjedhje hundësh, kollë dhe dhimbje e theksuar muskulare.  Gripi është një sëmundje që  kërkon regjim shtrati.”

Të prekur janë të gjitha moshat  ndërkohë nuk kanë munguar rastet e rënda dhe shtrimet në spitale.

“Janë rritur format  e rënda dhe hospitalizimet kryesisht tek mosha e re dhe e mesme. S’ka mbingarkesë spitalore, as në terapi intensive.     Tek te rriturit janë 130 shtrime në javë flasim për QSUT,  tek fëmijët një numër i ulët rreth 10 raste.”

Specialistët e shëndetit publik I referohen viteve të shkuara dhe  thonë se rënie e numrit të të prekurve pritet në  mes të shkurtit. Ndërkohë apelojnë për të  shmangur  vendet me shumë njerëz dhe për të  kontaktuar mjekun e familjes me shfaqjen e shenjave klinike./abcnews.al

Autoritetet amerikane besojnë se kanë qenë dy agjentë federal që kanë qëlluar për vdekje Alex Preti, 37 vjecarin që u vra këtë fundjavë në Mineapolis nga Agjentët e Emigracionit dhe Doganave. Detajet janë zbuluar nga një raport paraprak që Departamenti I Sigurisë Kombëtare që I eshte dorëzuar Kongresit Amerikan.

Raporti i cili u sigurua nga Mediat amerikane  përbën përshkrimin më të detajuar deri më tani të qeverisë amerikane mbi vrasjen e 37 vjecarit që ishte një infermier në repartin e Kujdesit Intensiv në shtetin e Minesotës.

Sipas Zyrës së Përgjegjësisë Profesionale të Doganës dhe Patrullës Kufitare  dy oficerë qëlluan me armë pasi një tjetër oficer në vendngjarje bërtiti: “Ai ka armë”, ndërkohë që Pretti po mbahej nga agjentët në një rrugë të mbuluar me borë.

Pamjet video të realizuara nga kalimtarë tregojnë se arma e 37 vjecatit ishte marrë tashmë nga oficerët në momentin kur ai u qëllua. Arma që mbante Alex Pretti ishte me leje. 37 vjecari u perplas me forcat e rendit ne protestat qe qytaret ne Mienapolis po mbajne kunder operacioneve te urdheruara nga Donald Trump per arrestimin dhe debimin e emigranteve te paligjshem. Zbulimet per vrasjen e Alex Pretti vijne ne nje kohe kur administra e Trump po perballet jo vetem me reagimin e forte publik per vrasjen e 37 vjecarit, por edhe per vrasjen e Renee Good, një grua nga Minneapolis që u vra më herët këtë muaj nga një oficer federal i emigracionit. Disa ligjvënës republikanë kanë refuzuar të mbështesin mënyrën se si Sekretarja e Sigurisë Kombëtare, Kristi Noem, ka trajtuar këto raste.

Udhëheqësi i demokratëve në Dhomën e Përfaqësuesve Hakeem Jeffries paralajmëroi Presidentin Amerikan Donald Trump duke I kërkuar shkarkimin e Kristi Noem duke thënë se nëse ai nuk do ta bëjë dicka të tillë atëhere palet politike do të nisin procedurat për shkakrimin dhe fajësimin e saj ne Kongres.

Presidenti Amerikan Donadl Trump deklaroi në një Interviste për Fox News se administrata e tij do të ul tensionet në Minesota duke e përshkruar atë se çfarë ka ndodhur me vrasjne e dy protestuesve si e tmershme. Më pas në një tjetër deklaratë nga një tubim ne Iwoa, Kreu i Shtëpisë së Bardhë tha se 37 vjecari Alexx Pretti ishte i pafat që mbeti i vrarë në një incident ndërsa shtoi se ai nuk duhej të ishte i armatosur përballë forcave të rendit.

Ilir Meta, nga qelia pretendon se protesta e 21 Janarit 2011, ku humbën jetën katër persona, duke u shfajesuar se nuk ishte një reagim spontan ndaj videos së publikuar më 11 janar, ku ai shfaqej duke bërë pazare me Dritan Priftin, por një ngjarje e parapërgatitur.

“Nëse populli do të ishte revoltuar realisht për atë montazh të stërprovuar më 11 Janar, do të kishte dalë që atë natë në rrugë. Ja maksimumi ditën tjetër. Por 21 Janari ndodhi vetëm 10 ditë pas publikimit,” -shkruan Meta.

Videon me Dritan Priftin, Ilir Meta e quan të montuar.

“Montazhi i 11 Janarit nuk ishte aspak i papritur për mua dhe disa të tjerë. Problemi nuk ishte kush ishte në video, por vërtetësia e bisedës dhe montimet e bëra” vijon ai.

Megjithatë, Meta i quan vrasjet e 4 personave “viktima të pafajshëm”, ai nuk përmend momentet e ekzekutimit të tyre, që në fakt u urdhëruan dhe nuk ishin vrasje aksidentale.

Meta thotë se sulmuesit në protestën e 21 Janarit nuk ishin anëtarë të Partisë Socialiste, por persona të rekrutuar për të shkaktuar dhunë.

“Nuk ishin socialistët që sulmuan me dhunë Kryeministrinë. Socialsitët ishin te ura e Lanës dhe përtej. Por ishin të rekrutuarit dhe të importuarit që për 3-4 orë sulmuan pa rreshtur policinë” thekson Meta.

Ngjarja e 21 Janarit 2011 la pas katër viktima dhe mbetet një nga episodet më të rënda të përplasjes politike pas viteve ’90, ndërsa hetimi për përgjegjësit mbetet në duar e SPAK, që deri më tani, ka marrë në pyetje  zyrtarë të lartë të kohës kur u dhanë urdhër për të qëlluar Portestuesit. Në pyetje është marrë, Sali Berisha, Lulzim Basha dhe me vet ofrimin e tij edhe Ilir Meta./abcnews.al

Si në shqip, si në anglisht, Berisha ngaterrohet edhe nw Strasburg. Doktori njofton sërish se ka folur me tone konservatore kundër terapisë konvertuese para përfqësuesve të partive simotra të djathta.

“Zoti President, unë kam disa mendime për këtë çështje. Unë e konsideroj këtë tendencë, konsideroj terapinë konvertuese, si një nga agresionet më të shëmtuara ndaj qënieve njerëzore, identitetit njerëzor dhe familjes. Terapia konvertuese është ç’njerëzore, është kundër natyrës dhe identitetit njerëzor Shqipëria sot është një model i shëmtuar në këtë drejtim, sepse Shqipëria , kërkoj ndjesë, por është një lloj kopshti apo republike e George Soros. Jam i trishtuar që ata po arrijnë ta diktojnë axhendën e tyre, sepse janë shumë të fuqishëm në institucionet ndërkombëtare dhe në shoqërinë civile.”

Por Raporti në Strasburg të cilit i referohet Berisha nuk flet kunder ndryshimit te gjinise. Dokumenti i hartuar nga deputetja britanike Kate Osborn për terapinë konvertuese dënon praktikat e dhunshme dhe shtrënguese që përdoren për t’i detyruar persona, femije te rinj dhe LGBT, të mohojnë ose korrigjojnë orientimin seksual apo identitetin gjinor që ata tashmë kanë.

Por doktori e pranon para të djathtëve europianë zbuloi se ai nuk është dhe aq konservator për LGBTI.

“Dhe dua të theksoj se qëndrimi im nuk ka absolutisht asgjë me kundërshtitë për orientimin seksual. Jo, asgjë. Unë jam respektues dhe do të respektoj gjithmonë zgjedhjet e gjithësecilit.”

Nuk dihet shumë për reagimet e të djathtëve europianë kur dëgjuan Berishën tu kundershtonte rezoluten, Për shkak se mbledhja ishte me dyer te mbyllura. Por punimet në Asamblenë Parlamentare të KiE u bën me dyer të hapura.

Në një sallë thuajse bosh, Berisha i zuri vendin Vokshit në fund te shkalleve. E nisi me leksione zgjedhjesh, e vijoi me narkoshtetin dhe e mbylli duke pagëzuar sërish Edi Ramën.

“Edi Rama, the prime minister witch is called “large Ramaduro”

Por si në Tiranë, si në Strasburg, Berishës nuk i ecën, sidomos me Ramaduron./abcnews.al

Socialistët nuk kanë kohë për të humbur. Mazhoranca do të vazhdojë punën për reformën territoriale edhe pa opozitën,  ndërsa kjo e fundit nuk mund të kushtëzojë punën e komisionit, i cili parashikon që brenda muajit korrik të dalë me një draft paraprak për harten e re territoriale.

Por dera mbetet e hapur ndaj opozitës i sugjeroi të mos bëjnë të njëjtin gabim si reformën paraardhëse.

“Kur ne flasim për dëshirën gjithëpërfshirëse të gjithë aktoreve, duke filluar nga opozita, nuk do të thotë se dikush ka veton për të bllokuar procesin. Ne nuk mund të themi që sdo ballafaqohemi me sfidat sepse një prej aktorëve nuk do të vijë në tavoline dhe duhet të kuptojme se ajo për ca ne po flasim për reformën territoriale ka ca limite kohore, të cilat nëse humben ne flasim për një reform që do ndodhi në 2031, sepse nëse do ndryshojme harten, ajo duhet të ndryshojë para zgjedhjeve të 2027.  Unë shpresoj që opozita të ketë nxjerrë disa mesime nga reforma e fundit territoriale se edhe atëhere e ka bojkotuar.  Shpresoj që opozita të jetë proaktive në këtë proces dhe të krijojë shtratin e duhur për këtë proces.” tha Demo.

Demo nuk dha detaje sesa duhet të jetë numri I bashkive por orientoi se ku do të përqëndrohet analiza.

“Patjetër që do të ketë një dokument të parë që do të jetë për diskutim publik. Nuk do të flasë në fillim dhe besoj ky do të jetë procesi, për numrin e bashkive, por për konceptin. Si e duam një bashki? Si mund të ketë sukses? Cilat janë sfidat? Ne si ministri, do të mbështesim komisionin me informacion, publikun, bashkitë për këtë reformë. Ne kemi marrëdhënie të shëndetshme me aktorët që kanë qenë partnerë të jashtëzakonshëm dhe kanë një databazë njohurish” -u shpreh ai.

 Ndërsa rishikimi i qarqeve është i ndërlidhur me ndryshimet në kushtetutë dhe produktin që do të prodhojë reforma zgjedhore.

“Qarqet janë të parashikuara në Kushtetutë. Vetvetiu, ndryshimi i tyre si rrjedhojë sjell ndryshime të tjera në sisteme me sensitivitet si Kodi Zgjedhor. 12 qarqet që kemi sot janë krijuar në një kontekst tjetër dhe ka vend për të diskutuar, por nuk dua të kaloj më përpara se ç’duhet. Në javët që vijnë besoj do të jetë një debat i hapur.”-tha ministri.

 Një javë më parë, Bashkëkryetari i Komisionit të reformës territoriale, Arbjan Mazniku i kërkoi anëtarëve socialistë ti propozojnë Kuvendit, heqjen e bashkëkryetarit, të drejtës së barazisë dhe vetos për deputetët demokratë, në mënyrë që këta të fundit të mos kenë mundësi për shkak të bojkotit të bllokojnë edhe reformën. Ndërsa nga opozita ende nuk reflektim./abcnews.al

Arrest në burg ka vendosur gjyjata e Durrësit për Mikel Ndojin. 56 vjecari plagosi të bijën dhe kolegun e saj të punës të hënën në Durrës.

56-vjeçari dontë të ribashkohej pranë familjes, ndaj së cilës kishte ushtruar dhunë, por ai refuzohej nga ish bashkëshortja dhe vajza e tij. Qëndrimi i vajzës në lidhje me konfliktet që autori kishte me ish bashkëshorten është bërë shkak për ngjarjen e rëndë.

56-vjeçari Mikel Ndoj ishte i divorcuar për shkak të dhunës së vazhdueshme që ky i fundit kishte ushtruar në familje. Mikel Ndoj rezulton një person me precedent penal në shtetin Italian për dhunë, vepër për të cilën kishte kryer edhe disa vite burg.

E ëma e vajzës së plagosur punonte në një fasoneri pranë vendit të ngjarjes, ndërsa krimi ndodhi në ambientet e jashtme të një agjencie imobiliare ku punonte vajza. Fatmirësisht 24-vjeçarja Xhesika Ndoj dhe kolegu i saj i punës i cili ndërhyri në parandalimin e krimit, vijojnë në spital nën kujdesin mjekësor jashtë rrezikut për jetën.

Nëse ka një fushë ku Sali Berisha dominon bindshëm politikisht, ajo ështe media.

Raporti më i fundit nga Autoriteti i Mediave Audiovizive, tregon se Partia Demokratike zë 84.20% të hapësirës televizive në 3 ekranet kombëtare gjatë muajit dhjetor.

7-fish më shumë se sa Partia Socialiste, kurse nga partitë e reja, hapësirë ka fituar Shqipëria Bëhet me 2.24% për shkak të qëndrimit të Adriatik Lapajt përpara kryeministrisë.

Politikanit të cilit i është dhënë më shumë hapësirë nga tre televizionet kombëtare është po Sali berisha, 34.87% kurse kryeministrit Edi Rama 27.83%.

Ndryshimi është se gjatë dhjetorit Edi Rama në daljet e tij është shfaqur si kryeministër për aktivitete publike, kurse Berisha është shfaqur tërësisht për aktivitetin e tij partiak, nga konferencat e përditshme nga selia, foltoret dhe protestat.

Por ndërkohë, i vetmi që ankohet për censurë nga mediat është Sali Berisha. Në përditshmëri sa herë Berisha del në konferencat e mesditës, të paktën 9 ekrane televizive e japin live.

Kurse realiteti i censurës është po ashtu tjetër. Berisha ka urdhëruar gjithë zyrtarët e PD të rangut të parë dhe të dytë, të refuzojnë çdo ftesë nga studiot televizive nga mediat, duke sulmuar dhe etiketuar gazetarët dhe analistët, që përballen me deputetët e PD. Përjashtim bën vetem Syri TV./abcnews.al

Ndotja që po i bëhet lumit Drino, sidomos gjatë stinës së reshjeve ku shtohen prurjet, konsiderohet një problem serioz nga ambientalistët.

Lavdi Hasani, pedagog dhe specialist thotë se hedhja pa kriter e mbetjeve rrezikon shkatërrimin e florës dhe faunës, edhe në lumin Vjosë, aty ku derdhet Drino, që përshkon të gjithë luginën me të njëjtin emër në Gjirokastër

Sipas tij është e domosdoshme monitorimi I vazhdueshëm I faktorëve që kthehen në ndotës pasi rrezikohet edhe shëndeti I qytetarëve që konsumojnë produktet e ofruara nga peshkatarët.

Lumi Vjosa është edhe lumi I fundit I egër në Europë ndaj edhe vëmendja për mbrojtjen e vlerave të tij duhet të jenë maksimale nga agjensitë përgjegjëse që operojnë në jug të vendit.

Kelmendi po shndërrohet gjithnjë e më shumë në një nga destinacionet turistike më të preferuara në veri të vendit. Bukuritë natyrore, ajri i pastër dhe traditat e ruajtura ndër breza po tërheqin çdo vit gjithnjë e më shumë vizitorë vendas dhe të huaj.

I shtrirë në zemër të Alpeve Shqiptare, Kelmendi ofron peizazhe mbresëlënëse, shtigje malore, burime natyrore dhe mikpritjen karakteristike të banorëve vendas. Turistët tërhiqen kryesisht nga aktivitetet në natyrë, kulinaria tradicionale dhe bujtinat familjare, të cilat po kthehen në një burim të rëndësishëm të ardhurash për ekonominë lokale.

Megjithatë, pavarësisht zhvillimit të turizmit, Vermoshi, një nga pikat më të frekuentuara turistike të Kelmendit, përballet ende me sfidën e largimit të banorëve.

Banoret besojnë se zhvillimi i mëtejshëm i turistëve mund të nxisë rikthimin e të rinjve, për të investuar në shtëpitë e trashëguara dhe për t’i kthyer ato në bujtina që mirëpresin vizitorë gjatë gjithë vitit.

Një ndikim pozitiv ka pasur edhe mbajtja e hapur e rrugës gjatë sezonit dimëror. Kjo ka mundësuar që disa bujtina të qëndrojnë funksionale edhe në muajt e ftohtë, duke e kthyer turizmin në një aktivitet gjithnjë e më të qëndrueshëm gjatë gjithë vitit./abcnews.al

Pamela Veizaj është një nga ato zëra që nuk dëgjohen thjesht, por ndihen. “Bilbili” nga Mallakastra ka kënduar që në moshë shumë të vogël, gjithmonë me emocione të forta brenda zemrës, duke e kthyer këngën popullore në identitet dhe mision jetësor. Ishte babai i saj ai që këmbënguli se ajo ishte bërë për këtë muzikë, dhe sot publiku e vërteton çdo herë kur e dëgjon të këndojë.

Për Pamelën, skena dhe njerëzit janë një marrëdhënie e ndërsjellë dashurie: ajo i shijon po aq sa ata e shijojnë zërin e saj. Çdo këngë që publikon lind nga një frymëzim i momentit dhe, siç tregon vetë, secila e bën të lotojë jo nga lodhja, por nga ndjenja se çdo varg e ka çuar një hap më lart, mes vështirësive dhe sakrificave.

E lindur në Fier dhe e rritur mes Shqipërisë dhe Greqisë, Pamela e quan këngën një sakrificë që i jep kënaqësi. Festa familjare të humbura, mungesa të ndërsjella dhe koha e çmuar larg njerëzve të dashur janë çmimi i një rruge që ajo e ka zgjedhur me bindje të plotë. Në industrinë muzikore, ajo ka refuzuar shumë këngë dhe bashkëpunime, sepse kërkon shumë nga vetja dhe beson se çdo projekt duhet të mbetet në kohë.

Jashtë skenës, Pamela Veizaj është një vajzë e qetë, kërkuese ndaj vetes dhe serioze për figurën që përfaqëson, por njëkohësisht e njëjta Pamela e buzëqeshur dhe e dashur që publiku sheh në ekran. Dhe viti 2026 premton shumë surpriza: projekte të reja, dy bashkëpunime, këngë solo dhe një prani edhe më të afërt me publikun, si në ekran ashtu edhe në festat familjare të shqiptarëve.

Anton Shkoza nuk është thjesht ish-kampion xhudoje. Ai është një aktor i drejtpërdrejtë i historisë moderne shqiptare, një rebel me shpirt luftëtari dhe themeluesi i xhudos shqiptare. Prej më shumë se tre dekadash, ky sport është jeta e tij, një mision që e ka ndarë sot edhe me tre fëmijët e tij, kampionë absolutë në xhudo.

Në një kohë kur sistemi komunist i “ngushtonte” rrugët e sportit dhe të jetës, Anton Shkoza u shpall hapur kundërshtar i regjimit. Familja e tij u godit rëndë: më 19 janar 1988, akti i guximshëm i kushëririt Donat Shkoza, që theu traun e doganës së Hanit të Hotit me makinën e Degës së Punëve të Brendshme, çoi në burgosjen politike të vëllait të tij. Viti 1990 e gjeti Anton Shkozën në aktivitetet antikomuniste, deri te rënia e bustit të Enver Hoxhës.

Ai ishte i pranishëm në hapjen e Kishës Katolike dhe të Xhamisë së Plumbit në Shkodër më 15 nëntor 1990, në hapjen e kishës në Vau Dejës më 6 dhjetor dhe më 13 dhjetor, ditën e rrëzimit të bustit të diktatorit, ishte para ish-Komitetit Ekzekutiv të rrethit. I shpallur kundërshtar i regjimit, për t’i shpëtuar arrestimit u detyrua të largohej në Greqi.

Pas kthimit në atdhe, nisi një kapitull historik për sportin shqiptar. Në vitin 1992 u kthye në Shkodër dhe krijoi klasat e para të xhudos, ndërsa në vitin 1993 hapi palestrën e parë të xhudos në Shqipëri, në Vau Dejës, me ekipet e Vllaznisë dhe Vau Dejësit. Në vitin 1995, Shqipëria përfaqësohet për herë të parë në Kampionatin Ballkanik të Xhudos, ndërsa Anton Shkoza përfaqëson vendin në Lojërat Olimpike Mesdhetare në Bari.

Në vitin 1998, përfaqësoi Policinë Shqiptare në Kampionatin e Parë Botëror të Xhudos për Policinë në Kuvajt. Një vit më pas, kur ishte i përzgjedhur nga Komiteti Olimpik për Lojërat Olimpike “Sidney 2000”, një aksident fatal gjatë stërvitjes i dëmtoi kolonën vertebrore dhe i ndryshoi jetën përgjithmonë, por jo shpirtin. Anton Shkoza nuk hoqi dorë kurrë nga xhudoja. Sot, në Shkodër, ai drejton Akademinë e Parë të Xhudos në Shqipëri, duke ndërtuar breza kampionësh.

Pekini nuk është gjithmonë vendi më mikpritës në dimër. Ajër i ftohtë fryn nga veriu, duke ngrirë liqenet dhe lumenjtë e qytetit dhe vetëm shpirtrat më të guximshëm do të guxonin të zhyteshin në ujin e akullt.

E megjithatë, në dy muajt e fundit, udhëheqës nga e gjithë bota kanë pranuar ftesa për në kryeqytetin kinez.

Ka pasur një mori vizitash nga Franca, Koreja e Jugut, Irlanda, Kanadaja dhe Finlanda. Kancelari gjerman pritet të vizitojë muajin tjetër.

Dhe tani midis udhëheqësve perëndimorë që po shkojnë drejt Pekinit është Sir Keir Starmer, kryeministri i parë britanik që viziton Kinën në tetë vjet.

Ai duket se ka një pritje të ngrohtë të garantuar, veçanërisht pasi Mbretëria e Bashkuar miratoi së fundmi planet për një mega-ambasadë kineze në Londër.

Zyrtarët në Kinë i kishin paralajmëruar tashmë homologët e tyre se nuk do ta njoftonin vizitën e kryeministrit derisa të zgjidhej kjo çështje.

Por të dyja palët tani janë gati të ulen në tryezë dhe për Mbretërinë e Bashkuar, dhjetëra marrëveshje të reja janë në rrezik për të nxitur ekonominë e vendit.

“Nëse të dyja palët mund të ecin përpara me një marrëdhënie tregtare të arsyeshme, kjo është tashmë një arritje”, thotë Dr. Yu Jie, një Studiues i Lartë në Programin e Kinës, Azi-Paqësorit në grupin e ekspertëve Chatham House.

Një pyetje e rëndësishme është se deri në çfarë mase Kina i sheh vizitat e personave si Starmer si pjesë të një tronditjeje më të madhe gjeopolitike? Dhe sa afër mendon vërtet se mund të bëhet me Mbretërinë e Bashkuar?

Carney, pionieri
Për Kinën, kjo është pjesë e një ofensive sharmuese me shpresën se disa tani do ta shohin Pekinin si një partner të qëndrueshëm dhe të parashikueshëm – në kontrast me SHBA-në.

Duket se funksionoi me Mark Carney, kryeministrin kanadez, i cili e vizitoi më parë këtë muaj. Ai ka hapur një rrugë për udhëheqës të tjerë botërorë duke udhëtuar në Pekin dhe duke njoftuar një “partneritet të ri strategjik me Kinën”.

Edhe para fjalimit të tij në Davos, Carney u tha gazetarëve në kryeqytetin kinez se rendi global ishte në një “pikë këputjeje”.

Ky ishte një kthesë dramatike për një marrëdhënie midis dy kombeve që kishin qenë në ngrirje të thellë për një dekadë, dhe do të jetë muzikë për veshët e Presidentit Xi Jinping.

Presidenti i SHBA-së Donald Trump, megjithatë, ka kërcënuar të vendosë një tarifë 100% për Kanadanë nëse Carney bën një marrëveshje tregtare me Kinën.

Mesazhi nga Uashingtoni duket të jetë se nëse bën një marrëveshje me një superfuqi, rrezikon zemërimin e një tjetre.

Starmer është përpjekur tashmë ta shmangë këtë minë gjeopolitike dhe, përpara se të hipte në aeroplan, e bëri të qartë se nuk do të zgjedhë midis SHBA-së dhe Kinës.

Disa analistë besojnë se kinezët do të jenë të qartë në lidhje me aftësinë e tyre për të shkaktuar një përçarje në të ashtuquajturën “marrëdhënie të veçantë”.

“Pekini do të jetë realist,” thotë Dr. Yu Jie, “në vend që të mendojë se mund ta largojë Mbretërinë e Bashkuar nga SHBA-ja.”

Ajo që dikur quhej “epoka e artë” për marrëdhëniet Britani-Kinë ka evoluar në atë që Starmer e ka quajtur “epoka e akullnajave”. Por me kaq shumë vështirësi për t’u përballuar, një ringjallje e plotë e marrëdhënies së vjetër është e pamundur – është më realisht fillimi i një shkrirjeje të ngadaltë diplomatike.

Kohët e mira të shkuara
Në ngrohtësinë e një pubi në Hutongs, një zonë tradicionale në Pekin pranë Sheshit Tiananmen, tingulli i ndritshëm depërtues i pipave kelte shpërthen nga dy altoparlantë, ndërsa Bowei Wang derdh një pintë birrë kafe.

Z. Wang është një nga një milion kinezë që kanë studiuar në Mbretërinë e Bashkuar në dy dekadat e fundit, që datojnë që nga ajo e ashtuquajtura “epoka e artë” midis dy vendeve.

“Birra është gjithçka për mua”, më thotë ai ndërsa pi një gllënjkë. Kjo ishte një nga birrat e para që ai bëri në fabrikën e tij të birrës Overtone në Glasgow.

“Pesëmbëdhjetë vjet më parë, kur studioja në Skoci, thashë: ‘Uau, birra britanike është aq e mirë, sa dua ta sjell përsëri në Kinë në të ardhmen’.”

Dhe kështu, ai e bëri. Birra tani është një birrë ndërkulturore. Ajo prodhohet në Yoker në Glasgow, transportohet në Kinë dhe shërbehet nga një bar në Pekin ku skena nga filmi Braveheart luhen në një televizor të madh, ndërsa Elizabeth I është në një tjetër.

Fotografia përcaktuese nga “epoka e artë”, kur Mbretëria e Bashkuar mbështeti lidhje më të ngushta ekonomike, është një foto e kryeministrit të atëhershëm David Cameron dhe Presidentit Xi duke ndarë një birrë dhe një shportë me peshk dhe patate të skuqura në Plough Pub në vitin 2015.

Për Mbretërinë e Bashkuar, kjo do të ishte e paimagjinueshme tani, ndërsa përpiqet të lundrojë midis nevojës së saj për të bërë biznes dhe shqetësimeve të saj për sigurinë. Kina mbetet një kërcënim i madh për sigurinë kombëtare, ndërsa agjencitë e inteligjencës vazhdojnë të ngrenë shqetësime në lidhje me spiunazhin dhe vjedhjen e pronës intelektuale. Ekzistojnë gjithashtu kërcënime të vazhdueshme për shtetasit kinezë që janë larguar nga vendi dhe janë përpjekur ta bëjnë Mbretërinë e Bashkuar një strehë dhe shtëpinë e tyre.

Dhe nga perspektiva e Kinës, 11 vitet që nga ai takim e kanë parë atë të fitojë një fuqi të madhe ekonomike.

Një kthim në një “epokë të artë” të re është “një mendim i dëshiruar”, thotë Dr. Yu Jie.

“Barazia ekonomike midis Pekinit dhe Londrës ka ndryshuar në mënyrë dramatike që kur u shpall e ashtuquajtura ‘epoka e artë’. Nëse të dy palët mund të ecnin përpara me një marrëdhënie tregtare të arsyeshme, kjo është tashmë një arritje”, tha ajo.

Xi është një udhëheqës shumë më i sigurt tani sesa kur u takua me paraardhësit e Starmer, Theresa May dhe Cameron.

Kina po ngjitet lart pas betejës së saj kundër SHBA-së vitin e kaluar në një luftë tregtare të ashpër.

Ajo përfundoi me një armëpushim tetorin e kaluar kur të dy udhëheqësit u takuan në Korenë e Jugut, por Xi do të besojë se i ka treguar Amerikës dhe botës se sa të varur janë nga mallrat kineze.

Ky vend tani prodhon rreth një të tretën e të gjitha mallrave të botës, përpunon më shumë se 90% të mineraleve të rralla të tokës në botë, prodhon rreth 60 deri në 80% të të gjitha paneleve diellore, turbinave me erë dhe automjeteve elektrike.

Dardan Spahia nga gjimnazi “Petro Nini Luarasi”, një kampion i arteve marciale, u kthye nga Lisbona me medaljen e artë në Kampionatin Europian të “Jiu-Jitsu Brasilian” duke garuar mes sportistëve të Europës në kategorinë U18.

Në një postim në facebook kryeministri Edi Rama shkruan se një tjetër medalje ari vjen në Shqipëri, ndërsa shton se nxënës si Dardani, janë forca e shembullit që kur talenti, pasioni dhe disiplina ecin së bashku, ka vetëm fitues.

“Një tjetër medalje ari vjen në Shqipëri nga nxënësit tanë. Dardan Spahia nga gjimnazi “Petro Nini Luarasi”, një kampion i arteve marciale, u kthye nga Lisbona me medaljen e artë në Kampionatin Europian të “Jiu-Jitsu Brasilian” duke garuar mes sportistëve të Europës në kategorinë U18. Krenarë për nxënës si Dardani, forca e shembullit që kur talenti, pasioni dhe disiplina ecin së bashku, ka vetëm fitues”, shkruan Rama.

Thuhet se fati ndihmon më të fortin. Gjithsesi, mbrëmja e fundit në Australian Open shkoi kundër kësaj aksiome, dhe vetë Novak Gjokoviç e pranoi se Lorenco Muzeti ishte më I miri në fushë, dhe se ishte ai që e meritonte fitoren.

Nga ana tjetër, në sport ekzistojnë edhe dëmtimet, një goditje e pamëshirshme dhe tenisti italian u dorëzua kur po shkruante historinë. Numri 5 në botë fitoi dy sete radhazi ndaj atij që cilësohet si tenisti më I mirë I të gjitha kohëve, dhe ishte në rrugë të mbarë.

Shifrat 6-4 e 6-3 nuk lini vend për dyshime, veçse Muzeti ndjeu dhimbje në muskujt e këmbës. Gjatë setit të tretë, Gjokoviç ishte në avantazh 3-1, e më në fund italiani thirri mjekun për konsultim, duke vendosur që të tërhiqej.

Një përfundim mizor, ndërsa tenisti serb ka ende shansin të fitojë një Grand Slem. Ylli nga Beogradi mban rekordin botëror të 24 Grand Slemeve të fituara në karrierë, të 37 finaleve Grand Slem dhe të 51 gjysmëfinaleve.

Po ashtu, ai vendosi rekordin e fitoreve në Australian Open me 103, një më shumë sesa legjenda tjetër, Rozher Federer. Në gjysmëfinale edhe Jelena Ribakina për femra.

Tenistja ruse, por që përfaqëson Kazakistanin, triumfoi në një çerekfinale luksi ndaj ish-numrit 1 të botës, polakes Iga Shviontek, madje si një “tren ekspres”.

Ribakina, një herë fituese e Grand Slemit, ia doli 2-0 me shifrat 7-5 e 6-1 dhe në gjysmëfinale në Melburn do të luajë ndaj amerikanes Xhesika Pegula.

Si gjithmonë spektakël, por edhe shumë tension. Mbrëmja e fundit në NBA ka dhuruar gjithçka në parketet ku u luajtën gjithsej shtatë ndeshje.

Por dy prej sfidave ishin me të vërtetë të luftuara, duke kaluar edhe kufijtë sportivë.

Duket se ecuria rekord e kampionëve në fuqi të Oklahoma City ka irrituar rivalët. Vetëm kjo mund të shpjegojë përplasjen fizike në sekondat e fundit në ndeshjen kundër Neë Orleans.

Jeremia Fears dhe Lu Dort nisën atë që më pas do të kthehej në një përplasje masive mes lojtarëve dhe stafeve të dyja skuadrat.

Ndeshja u ndërpre për disa minuta, ndërsa katër basketbollistë mbyllën përpara kohe sfidën pasi u dënuan me gabime teknike.

Sa I përket rezultatit, Oklahoma City Thunder fitoi me shifrat 104-95 duke forcuar pozitat e saj në krye të Konferencës së Perëndimit dhe si favorite për të fituar sërish titullin kampion.

Tension i lartë edhe në sfidën mes Phoenix Suns dhe Brooklyn Nets. Dillon Brooks dhe Zaire Ëilliams patën si fillim një përplasje sportive, por që më pas u kthye në një sherr masiv mes shokëve të tyre të skuadrës.

Për këtë arsye arbitrat nxorrën jashtë me teknikë pesë lojtarë, përpara se Suns të fitonin sfidën me katër pikë diferencë 106-102./abcnews.al

Suksesi në javën e parafundit i la me shpresë.

Blutë e Londrës ia dolën 1-0 ndaj Pafosit qipriot dhe zunë vend mes 8 ekipeve të para në Champions, por nuk do të jetë e lehtë ta mbrojnë kualifikimin në një atmosferë të vështirë.

Futbollistët e Çelsit arritën në Napoli për sfidën e sotme në orën 21:00, duke e ditur se ndoshta vetëm fitorja mund të jetë e vlefshme.

Jo më kot, plot 8 ekipe kanë nga 13 pikë, përfshi edhe londinezët, dy të tjerë kanë nga 12, Dortmundi ka 11 dhe dy të tjerë kanë nga 10 pikë.

Natyrisht, anglezët e dinë se në stadiumin “Maradona” nuk do të jetë e lehtë të merren tri pikë në javën e fundit të ndeshjeve në grup.

Trajnerit Rosenior do t’i mungojnë disa lojtarë si Koluell, Adarabiojo apo Lavia, por Koul Palmer është kthyer, ashtu si edhe portieri Jorgensen, ndërsa alternativat për zgjedhje do të jenë të shumta.

Napoli I trajnerit Antonio Konte është në pozita më të vështira.

Barazimi në Danimarkë herën e kalur ndaj Kopenhagenit prishi shumë punë, dhe forma në Serinë A po ashtu nuk është shumë e mirë.

Nga ana tjetër, kampionët e Italisë kanë mungesa si De Brujne, Anguisa, Gilmor, Politano, Neresh si dhe kapiteni I Kosovës, Amir Rrahmani, plus portierin Milinkoviç-Saviç.

Napolitanët janë në vendin e 25-të, pra do t’u duhet fitorja për plej ofin, ose ndryshe eliminohen.

Dy ekipet kanë luajtur vetëm dy herë në Champions, në vitin e largët 2012, me Çelsin që u kualifikua për në çerekfinale, veçse me napolitanët që fituan në fushën e tyre me shifrat 3-1.

Do të jetë një finale, e sërish mund të mos mjaftojë. Dortmund-Inter është një nga ndeshjet me më shumë tension dhe emocion sonte në Champions, ndërsa dy skuadrave u duhet vetëm fitorja.

Gjithsesi, asnjëra prej tyre nuk e ka fatin në dorën e saj. Dortmund është në vendin e 16-të dhe një sukses mundet edhe t’i sigurojë një vend në 8 të parat, pra ta kualifikojë direkt, ndërsa humbja mund ta eliminojë.

Verdhezinjtë kanë mungesa si mesfushorin Zabicer si dhe mbrojtësin Zyle, të cilët janë të dëmtuar, ndërsa mbrojtësi i krahut Svenson është i pezulluar. Trajneri Niko Kovaç ka besim, edhe pse forma e ekipit nuk ka qenë e qendrueshme, as në Ligën e Kampionëve dhe as në Bundesligë.

Edhe Interi ka problemet e veta. Trajneri Kristian Kivu do të duhet të bëjë pa mesfushorët e rëndësishëm Barela e Çalhanoglu, ashtu si edhe pa mbrojtësin holandez Damfris, që është jashtë prej shumë kohësh.

Titullarë në mesfushë priten Sucic, Zielinski dhe Mkitarian, në portë Zomer edhe pse I kritikuar, ndërsa në sulm janë yjet në formë si kapiteni Lautaro Martinez dhe Markus Turam.

Për zikaltërit gjithashtu duhet fitorja për të shmangur plej ofin, por gjithsesi ata nuk kanë rrezik eliminimi. Bilanci total është lehtësisht në favor të italianëve, me dy fitore, një barazim e një humbje, por këtë rast vlen më shumë ajo që ka ndodhur në Gjermani.

Borusia fitoi sfidën e fundit mes tyre në fushën e vet, 3-2 në 2019, ndërsa shumë herët, në 1964, në ish-stadiumin “Vestfalenshtadion” dueli përfundoi 2-2./abcnews.al

Fokusi kryesor i Shteteve të Bashkuara të Amerikës nuk është më Europa dhe ky ndryshim është një ndryshim strukturor dhe jo i përkohshëm. Kjo ishte deklarata që beri shefja e Politikës së Jashtme të Bashkimit Europian Kaja Kallas ndërsa Brukseli po meson të përshtatet me mënyrën sesi Presidenti Amerikan Donald Trump ka riformësuar marrdhëniet transatlantike.

Duke folur në konferencën vjetore të Agjencisë Europiane të Mbrojtjes, Kallas theksoi se, ndonëse Bashkimi Europian vazhdon të synojë lidhje të forta transatlantike dhe Shtetet e Bashkuara do të mbeten aleat, Europa duhet të përshtatet me realitete të reja. Ajo nënvizoi se “NATO duhet të bëhet më europiane për të ruajtur forcën e saj”.

“NATO  duhet të bëhet më europiane për të ruajtur Forcën e saj dhe për këtë duhet të ketë një veprim të menjëhershëm nga ana e Bashimit Europian. Ne duhet të sigurohemi që të gjitha iniciativat tona të sigurisë dhe mbrojtjes të mbeten pjesë plotësuese për NATO.  E thënë shkurt Bashkimi Europian duhet të sinkronizojë përpjekjet sëbashku me NATO-n për të garantuar një mbrojtje më të mirë. Më lejoni të jem e qartë, ne i duam marrëdhëniet e forta transatlantike, Shtetet e Bashkuara mbeten partneri ynë, por Europa nuk është më qendra kryesore e Gravitetit për Washingtonin.”

Kaja Kallas deklaroi  se Bashkimi Europian duhet të veprojë me urgjencë për të forcuar mbrojtjen e Unionit duke theksuar se Administrata e Presidentit Amerikan Donald Trump nuk ka nguruar të vendosë në pikëpyetje marrdhëniet transatlantike pavarësisht një aleance historike. Kaja Kallas e konsideroi Rusinë kërcënimin më të madhe për sigurinë Europiane, Kinën një sfidë afatgjatë ndërsa shtoi se Lindja e Mesme mbetej një rajon krejtësisht I paparashikueshme. Të gjitha këto zhvillime gjeopolitike sipas Kallas e kanë venë Unionin 27 anëtarësh përall një tensioni të rëndë mbi normat, rregullat dhe ligjet ndërkombëtare që janë ndërtuar dhe zbatohen prej më shumë se 80 vitesh.

Presidenti i Republikës, Sh.T.Z. Bajram Begaj, vizitoi sot Shtëpinë Muze të shkrimtarit Ismail Kadare në Tiranë në përkujtim të tij me rastin e 90-vjetorit të lindjes. Kreu i Shtetit vlerësoi veprën e Kadaresë dhe kontributin e tij përmes letërsisë në njohjen ndërkombëtare të identitetit dhe historisë sonë.

“Muza e Kadaresë ishte Shqipëria.

Por ai pati fuqinë e magjisë që me penën e tij të nxjerrë nga thellësitë e historisë mitet, kujtesën dhe dinjitetin e kombit tonë e t’i shndërronte në letërsi të papërsëritshme botërore”, – vlerësoi Presidenti Begaj.

Kreu i Shtetit theksoi edhe rëndësinë e përcjelljes së kësaj vepre te gjeneratat e ardhshme. Mesazhi i plotë i Presidentit të Republikës me rastin e ditës së lindjes së shkrimtarit Ismail Kadare:

“Muza e Kadaresë ishte Shqipëria. Por ai pati fuqinë e magjisë që me penën e tij të nxjerrë nga thellësitë e historisë mitet, kujtesën dhe dinjitetin e kombit tonë e t’i shndërronte në letërsi të papërsëritshme botërore.

Sot, në 90-vjetorin e datëlindjes, vizitova muzeun e tij në Tiranë, shtëpinë ku ai shkroi pjesën më të madhe të veprave.
Besoj se ne duhet të edukojmë fëmijët e të rinjtë që të vijojnë letërsinë e mrekullueshme të tij”.