Mbrojtësi francez Dayot Upamecano ende nuk ka dhënë dritën jeshile për ofertën e rinovimit të kontratës me Bayern Munich.

Situata ka filluar të shkaktojë pakënaqësi në radhët e drejtuesve të klubit bavarez.

Në fillim të muajit janar, disa media raportuan se Upamecano ishte shumë pranë rinovimit të kontratës së tij me Bayernin.

Megjithatë, më shumë se dy javë më vonë, njoftimi zyrtar ende mungon.

Sipas asaj që raporton sot Abendzeitung, ndryshe nga sa ishte menduar fillimisht, palët nuk kanë arritur ende një marrëveshje të plotë.

Dy pikat kryesore të mosmarrëveshjes janë: së pari, kohëzgjatja e kontratës së re (deri në vitin 2030 ose 2031) dhe së dyti, data nga e cila do të hynte në fuqi klauzola e lirimit prej 60 milionë eurosh.

Upamecano dhe përfaqësuesit e tij dëshirojnë të kenë mundësinë për t’u larguar nga klubi duke filluar nga viti 2027, ndërsa Bayern Munich nuk është i gatshëm të humbasë kontrollin mbi lojtarin përpara verës së vitit 2028.

Në çdo rast, gazeta gjermane thekson se një prishje e negociatave për shkak të këtyre dy çështjeve do të ishte një “surprizë e madhe”.

Aktualisht, drejtuesit e Bayernit po ruajnë qetësinë, por fakti që bisedimet nuk po konkretizohen ka nisur të krijojë frustrim në nivelet drejtuese të klubit.

Drejtori sportiv Max Eberl ka deklaruar së fundmi:

“Është spekuluar se Upa ka pranuar ofertën, por këtë nuk e kemi thënë kurrë. Ne kemi thënë se po presim përgjigjen e Upamecanos, ajo është e vetmja që ka rëndësi. Dhe kjo është ajo që po presim, ende nuk ka risi”. /Telegrafi/

Trajneri i Real Madridit, Alvaro Arbeloa, ka deklaruar se shpreson që klubi dhe Vinicius Junior të arrijnë një marrëveshje për vazhdimin e bashkëpunimit, mes spekulimeve të vazhdueshme rreth së ardhmes së sulmuesit brazilian.

Rinovimi i kontratës së Vinicius, i pezulluar që nga vera e kaluar, ka qenë një nga temat kryesore të diskutimit gjatë këtij sezoni.

Pas largimit të Xabi Alonsos, raportimet nga Spanja bëjnë të ditur se Vinicius është sërish i hapur për të nënshkruar një kontratë të re me “Los Blancos”.

Agjenti i lojtarit ndodhet aktualisht në Madrid, megjithatë deri më tani nuk ka sinjale konkrete për përparim në negociata.

I pyetur nga mediat nëse do të dëshironte që Vinicius të rinovonte kontratën, Arbeloa u shpreh i rezervuar, por optimist:

“Nuk varet nga unë, është çështje mes klubit dhe lojtarit. Sigurisht, shpresoj që ai të vazhdojë të bëjë histori këtu”.

Arbeloa shmang diskutimet për përforcime

Në vazhdim, Arbeloa u pyet disa herë nëse mendon se skuadra ka nevojë për përforcime apo nëse Real Madridi planifikon lëvizje në tregun e transferimeve.

Trajneri spanjoll zgjodhi të mos hyjë në detaje, duke theksuar besimin e plotë te grupi aktual i lojtarëve.

“Kam një skuadër të jashtëzakonshme. Nëse na mungon diçka, kemi një akademi të shkëlqyer të të rinjve, ashtu siç ka qenë gjithmonë në historinë e Real Madridit”, ka thënë Arbeloa.

I shtyrë për një përgjigje më konkrete, Arbeloa shtoi:

“Nuk mendoj se është një pyetje që më takon mua, por e përsëris: besoj se kam një skuadër të jashtëzakonshme”.

Real Madridi do të udhëtojë këtë të shtunë drejt “La Ceramica” për t’u përballur me Villarrealin, në ndeshjen që do të luhet në orën 21:00.

Kjo do të jetë ndeshja e katërt e Arbeloas në krye të skuadrës.

Trajneri konfirmoi gjithashtu rikthimin e Rodrygo Goes në listën e lojtarëve, pas mungesës në tre takimet e para për shkak dëmtimi. /Telegrafi/

I vetëdijshëm për interesin e madh që ka ngjallur mes gjigantëve të futbollit evropian, Tottenham ka vendosur një çmim jashtëzakonisht të lartë për mbrojtësin Micky van de Ven.

Sipas klubit londinez, lojtari nuk do të largohet për më pak se 115 milionë euro.

Nxjerrja e Van de Ven nga Tottenham pritet të jetë një mision tepër i vështirë.

Sipas asaj që raporton Talksport, drejtuesit e Spurs janë të gatshëm të shqyrtojnë largimin e mbrojtësit holandez vetëm nëse ndonjë klub paraqet një ofertë që i afrohet kësaj shifre astronomike.

Gjatë muajve të fundit, 23-vjeçari është përfolur disa herë si objektiv i Real Madridit dhe Barcelonës, por as madrilenët nuk janë të gatshëm të investojnë kaq shumë për një mbrojtës, ndërsa katalanasit nuk e kanë aktualisht kapacitetin financiar për të realizuar një transferim të tillë.

Në këtë kontekst, Liverpooli mbetet i vetmi klub që potencialisht mund të përmbushë kërkesat e Tottenhamit, teksa edhe “Reds” po e vlerësojnë seriozisht afrimin e qendërmbrojtësit.

Transferim historik?

Nëse Liverpooli vendos të bëjë hapin vendimtar, Van de Ven do të shndërrohej në mbrojtësin më të shtrenjtë në historinë e futbollit.

Rekordi aktual mbahet nga kroati Josko Gvardiol, i cili në vitin 2023 u transferua te Manchester City për rreth 90 milionë euro nga RB Leipzig.

I formuar te Volendam në Holandë, Van de Ven ka luajtur më pas për Wolfsburgun në Gjermani, përpara se të transferohej te Tottenham.

Deri tani, ai numëron 80 paraqitje zyrtare me klubin londinez, ku ka realizuar 9 gola dhe 3 asistime.

Mbrojtësi ka kontratë të vlefshme me Tottenham deri në qershor të vitit 2029. /Telegrafi/

Barcelona ka vendosur të refuzojë një ofertë të jashtëzakonshme prej 120 milionë eurosh për sulmuesin brazilian Raphinha, duke konfirmuar se lojtari nuk është në shitje.

Oferta erdhi nga klubi arab Neom SC, që përfshinte 100 milionë euro fiks dhe 20 milionë në variabla, por drejtuesit katalanas vendosën që projekti sportiv të ketë prioritet mbi çdo përfitim financiar.

Presidenti Joan Laporta ka qenë i qartë në komunikimin e vendimit, duke theksuar se Raphinha është një pjesë kyçe e ekipit dhe prishja e stabilitetit do të ishte e dëmshme për projektin e trajnerit Hansi Flick.

Klubi e sheh lojtarin si një element thelbësor jo vetëm për golat, por edhe për lidershipin, përkushtimin dhe ndikimin në dhomën e zhveshjes.

Edhe vetë Raphinha ndjehet i kënaqur dhe i vlerësuar në Barcelonë.

Mbrojtja e vendimit të klubit mbështetet gjithashtu në dëshirën e lojtarit për të qëndruar dhe për të vazhduar të japë kontributin e tij maksimal nën drejtimin e Flick.

Në moshën 29-vjeçare, braziliani po kalon një nga periudhat më të mira të karrierës së tij.

Neom synonte të bënte Raphinha figurën kryesore të projektit të tyre ambicioz sportiv, por përpjekja e tyre nuk pati sukses.

Barcelona ka vendosur të mos hyjë në negociata, duke dhënë një mesazh të qartë për tregun: lojtarët kyç nuk janë në shitje, pavarësisht nga ofertat e jashtëzakonshme.

Ky vendim forcon projektin e Barcelonës dhe sinjalizon një qasje të re: klubi nuk është i gatshëm të shesë referentët për të përmirësuar bilancin financiar, por do të mbajë stabilitetin sportiv.

Raphinha mbetet një pjesë thelbësore e projektit të klubit dhe e trajnerit Hansi Flick. /Telegrafi/

Kylian Mbappe po kalon një sezon të jashtëzakonshëm me Real Madridin, duke shënuar më shumë gola sesa numri i ndeshjeve të luajtura me fanellën e “Los Blancos”.

Pavarësisht një sezoni me ulje-ngritje për skuadrën madrilene dhe disa pikëpyetjeve ende të hapura, sulmuesi francez ka vazhduar të jetë faktori vendimtar në fushë.

Mbappe nuk ka treguar mëshirë as ndaj ish-klubeve të tij.

Monaco e përjetoi këtë drejtpërdrejt të martën mbrëma, kur ai realizoi dy gola që i dhanë Real Madridit kontrollin e ndeshjes dhe rikthyen entuziazmin e tifozëve në “Santiago Bernabeu”.

Forma e ekipit mund të ketë luhatje, por ndikimi i Mbappes mbetet konstant.

Në total, 27-vjeçari ka shënuar 32 gola në 27 paraqitje me Real Madridin.

Prej tyre, 19 gola janë realizuar në La Liga dhe 11 në Ligën e Kampionëve, duke e bërë atë golashënuesin kryesor në të dyja kompeticionet deri në këtë fazë të sezonit.

Me 11 gola në Evropë, ai ka barazuar tashmë rekordin e Cristiano Ronaldos në fazën e grupeve të Ligës së Kampionëve, një rekord që francezi mund ta thyejë në ndeshjen e radhës në Lisbonë.

Duhet theksuar se, ndryshe nga sezoni kur Ronaldo e vendosi këtë rekord, faza e grupeve aktuale përfshin tetë ndeshje, krahasuar me gjashtë më parë.

Rekorde të reja në horizont

Një tjetër objektiv madhor është rekordi prej 17 golash i shënuar nga Cristiano Ronaldo në sezonin 2013/14 në Ligën e Kampionëve.

Mbappe ka tashmë 44 gola në 59 ndeshje në këtë kompeticion përgjatë karrierës së tij, dhe shanset për t’iu afruar ose tejkaluar këtë rekord do të varen nga ecuria e Real Madridit në fazat eliminatore.

Aktualisht, skuadra madrilene është shumë pranë sigurimit të një kualifikimi direkt në raundin e 16 më të mirave.

Në moshën 27-vjeçare, Mbappe vazhdon të thyejë rekorde dhe të konfirmojë statusin e tij si një nga futbollistët më dominues të brezit të tij.

Edhe pse shifrat legjendare të idhullit të tij të fëmijërisë mbeten ende larg, francezi ka hapësirë për përmirësim dhe motivim të mjaftueshëm për të vazhduar garën në majat e futbollit evropian.

Ndërsa Cristiano Ronaldo i afrohet shifrës simbolike të 1000 golave zyrtarë në karrierë, një sfidues i ri po ngrihet fuqishëm në Evropë dhe pikërisht në ish-klubin e tij duke vënë në provë disa nga rekordet më mbresëlënëse të futbollit modern. /Telegrafi/

Kjo javë mund të konsiderohet pa dyshim më e vështira në karrierën e Brahim Diaz.

Të dielën, mesfushori kishte në këmbët e tij mundësinë për t’i dhënë fund një thatësire 60-vjeçare për Marokun në Kupën e Kombeve të Afrikës dhe për të shkruar emrin e tij në historinë e futbollit maroken.

Megjithatë, penalltia e tij ‘panenka’ u ndal nga portieri Edouard Mendy, duke e kthyer Diaz në një nga figurat më të diskutuara të finales.

Luis Enrique del në mbrojtje të Brahim Diaz

Trajneri i Paris Saint-Germain, Luis Enrique, i cili nuk gëzon simpati në “Santiago Bernabeu” për shkak të së kaluarës së tij me Barcelonën, doli hapur në mbrojtje të Brahim Diaz.

Sipas Diario AS, trajneri austrian ka thënë:

“Sot folëm për atë penallti. Të gjithë po flasin për Brahimin. Por unë kujtoj Zidanen, një perëndi të futbollit, që shënoi një panenka në finalen e Kupës së Botës. Kujtoj gjithashtu Sergio Ramosin, që ka shënuar Panenka në ndeshje shumë të rëndësishme. Shumë lojtarë e bëjnë këtë. Kur shënon, të gjithë të duartrokasin dhe askush nuk thotë asgjë. Kur e humbet, lindin shumë opinione negative”.

Luis Enrique vijoi duke theksuar vlerat njerëzore dhe sportive të lojtarit:

“Ai është një lojtar i shkëlqyer. E njoh personalisht, e kam drejtuar edhe me kombëtaren për një ndeshje. Është një futbollist i jashtëzakonshëm dhe një njeri i madh. Është e padrejtë. E kuptoj që është e vështirë për t’u pranuar, por ky është sporti: duhet të dish të fitosh dhe të humbësh. Nuk është fundi i botës. Më e rëndësishmja janë vlerat që u transmeton të rinjve. Ai nuk është një kriminel apo njeri i keq. Ai meriton respekt. Aktualisht po kalon një moment presioni”.

Brahim kërkon falje, Real Madridi i qëndron pranë

Pas penalltisë së humbur, Brahim Diaz publikoi një mesazh emocional ku kërkoi falje ndaj tifozëve dhe popullit të Marokut.

Trajneri Alvaro Arbeloa dhe disa bashkëlojtarë te Real Madridi kanë bërë të ditur se do ta mbështesin lojtarin pas rikthimit të tij, i cili ndodhi të enjten.

Brahim pritet të jetë i gatshëm për ndeshjen e radhës së Real Madridit ndaj Villarrealit, ndërsa klubi madrilen ka treguar unitet të plotë në mbështetje të mesfushorit. /Telegrafi/

Cole Palmer, një nga lojtarët kyç të Chelseat sezonin e kaluar, po kalon një sezon shumë më të ndërlikuar.

Situata e tij fizike dhe e ardhmja në Stamford Bridge janë kthyer në temë të nxehtë debati në Angli.

Me Cole Palmer, Chelsea bëri një zgjedhje të goditur, të mësuar të shpenzojnë shuma të mëdha dhe shpesh të gabojnë në afate kalimtare vitet e fundit, “Blutë” nuk janë penduar aspak për 47 milionë eurot e investuara në vitin 2023 për ta transferuar nga Manchester City.

Në sezonin e tij të parë në Londër, reprezentuesi anglez shkëlqeu: 45 ndeshje të zhvilluara, 25 gola dhe 15 asistime, shifra që pothuajse bënë që “Qytetarët” të pendoheshin për largimin e tij.

Sezoni pasues konfirmoi pritshmëritë, pa presion të tepruar.

Palmer e mbylli edicionin 2024/2025 me 15 gola dhe 11 asistime në 42 ndeshje në të gjitha kompeticionet.

I renditur i teti në ceremoninë e fundit të Topit të Artë, 23-vjeçari nisi të përballej gjithnjë e më shumë me problemet fizike.

Ndryshe nga sezoni i tij i parë te Chelsea, ku humbi vetëm një ndeshje për shkak të një ftohjeje, sezoni i kaluar e pa atë më shpesh në dhomën e rikuperimit.

Fillimisht një lodhje muskulore e mbajti jashtë për gjashtë ditë (një ndeshje), ndërsa më pas një dëmtim në tendinën e kofshës e la jashtë fushave për 20 ditë, duke humbur katër takime.

Një prirje shqetësuese

Sezoni aktual ka qenë edhe më i vështirë.

Gjithçka nisi në gusht me një tërheqje në ijë, që e detyroi të mungonte 22 ditë dhe dy ndeshje. Në shtator pësoi një rikthim të dëmtimit, duke qëndruar jashtë për 60 ditë dhe duke humbur 12 ndeshje, deri në mesin e nëntorit.

Kur dukej se problemet po merrnin fund, Palmer pësoi një tjetër shqetësim në kofshë në fillim të janarit, duke humbur edhe dy ndeshje të tjera. Ai nuk ishte i disponueshëm as për ndeshjen e Ligës së Kampionëve kundër Pafos.

Trajneri i Chelseat, Liam Rosenior, sqaroi situatën:

“Si masë paraprake, ai ndjeu diçka të lehtë gjatë ndeshjes kundër Brentford. Madje ndodhi herët në takim, ndaj e përgëzoj që rezistoi. Por nuk dua të rrezikoj lojtarët e mi në këtë fazë, sidomos ata të nivelit të Cole Palmer. Ka shumë gjasa të jetë gati dhe titullar të dielën kundër Crystal Palace”.

Pas pesë dëmtimeve këtë sezon, Palmer ka humbur gjithsej 19 ndeshje dhe 101 ditë aktivitet.

Ai ka luajtur vetëm 13 ndeshje, 10 prej tyre si titullar, duke shënuar 5 gola dhe asnjë asistim.

Chelsea shpreson në rikthimin e plotë fizik të yllit anglez, por problemet nuk ndalen këtu.

Sipas disa mediave britanike, lojtari nuk është plotësisht i lumtur në Londër dhe do të preferonte një rikthim në Manchester.

Kjo situatë po ndiqet nga afër nga Manchester United.

Sipas Daily Express, “Djajtë e Kuq” janë të interesuar dhe paga e Palmer nuk përbën pengesë.

E ardhmja e Cole Palmer mbetet e hapur, ndërsa fjala e fundit pritet të vijë nga vetë lojtari. /Telegrafi/

Real Madridi po analizon dy propozime të ardhura së fundmi nga MLS, të cilat mund të sjellin lëvizje të rëndësishme në përbërjen e skuadrës në afat të shkurtër.

Klubet amerikane kanë shfaqur interes konkret për David Alaba dhe Dani Ceballos, dy lojtarë me role dhe situata të ndryshme brenda ekipit madrilen.

Drejtuesit e klubit po vlerësojnë skenarë që do të ndihmonin në uljen e masës salariale dhe riorganizimin e ekipit për sezonin e ardhshëm.

Oferta e parë lidhet me David Alaba, për të cilin Charlotte ka paraqitur një propozim prej 1 milion eurosh.

Edhe pse shuma është modeste, Real Madrid e sheh me interes këtë opsion për shkak të pagës së lartë të mbrojtësit austriak, rreth 22.5 milionë euro në sezon.

Në moshën 33-vjeçare dhe pas disa dëmtimeve, Alaba nuk konsiderohet më prioritet në projektin sportiv të klubit.

MLS mund t’i ofrojë Alabës një rol udhëheqës dhe vazhdimësi, ndërsa për Real Madrid largimi i tij do të sillte përfitime të rëndësishme ekonomike.

Kontrata e tij është e vlefshme deri në verën e vitit 2026, por klubi madrilen është i hapur të lehtësojë një largim që do të balanconte buxhetin dhe strukturën e skuadrës.

Oferta e dytë, më e fortë financiarisht, vjen nga Austin për Dani Ceballos, me një vlerë prej 9 milionë eurosh.

Mesfushori spanjoll, 29 vjeç, nuk ka arritur të konsolidohet si titullar te Real Madrid dhe mungesa e vazhdimësisë ka ndikuar në të ardhmen e tij.

Me kontratë deri në vitin 2027, klubi është në pozitë të mirë negociuese, por gjithsesi e konsideron shitjen si një operacion të zgjuar.

Interesi i MLS për këta dy lojtarë konfirmon rritjen e peshës së tregut amerikan.

Për Real Madrid, këto lëvizje nuk lidhen vetëm me shifrat, por me një strategji më të gjerë rinovimi dhe stabiliteti financiar.

Vendimi përfundimtar ende nuk është marrë, por dera drejt Amerikës mbetet e hapur. /Telegrafi/

Joshua Kimmich ka zgjedhur të qëndrojë jashtë debatit të rindezur së fundmi mbi një bojkot të mundshëm të Kupës së Botës 2026.

Pas fitores 2-0 të Bayern Munich ndaj Union Saint-Gilloise në Ligën e Kampionëve, kapiteni i përfaqësueses gjermane mbajti një qëndrim të qartë, duke iu referuar drejtpërdrejt përvojës së tij gjatë Kupës së Botës 2022 në Katar.

I pyetur për idetë politike që janë shfaqur sërish në lidhje me Botërorin që do të zhvillohet në SHBA, Meksikë dhe Kanada, Kimmich reagoi me një buzëqeshje dhe një deklaratë të prerë:

“Nuk marr më pjesë në diskutime politike”.

Për futbollistin 30-vjeçar, ky qëndrim është rezultat i një procesi reflektimi.

Përvoja në Katar, sipas tij, tregoi se deklaratat politike të lojtarëve nuk japin gjithmonë efektin e dëshiruar.

“Ne e kuptuam se nuk është produktive që ne, si lojtarë, të shprehemi tepër politikisht”, shpjegoi hapur ylli i Bayern Munich.

“Sigurisht që kemi edhe një përgjegjësi për të folur në një masë të caktuar”, shtoi ai, por theksoi se pikërisht aty vendos tani një vijë të qartë.

“Mendoj se në Gjermani dhe në DFB ka persona të tjerë që janë më të përgatitur për këto çështje dhe që duhet të shprehen për to”, përfundoi Kimmich. /Telegrafi/

Brahim Diaz ndodhet sërish në qendër të vëmendjes te Real Madridi, teksa vera pritet të jetë vendimtare për të ardhmen e tij.

Sulmuesi që përfaqëson Marokun përballet me konkurrencë të fortë në repartin ofensiv, çka ka kufizuar rolin e tij në skuadër.

Megjithatë, klubi vlerëson cilësitë, polivalencën dhe kontributin e tij sa herë që ka pasur minuta në dispozicion.

Edhe pse nuk konsiderohet titullar i padiskutueshëm, Brahim ka lënë gjurmë me paraqitje pozitive në La Liga dhe në kompeticionet evropiane.

Real Madridi nuk e ka vendosur atë në listën e largimeve, por as nuk e konsideron të paprekshëm.

Një ofertë e rëndësishme financiare mund ta ndryshojë situatën, sidomos në kushtet e një skuadre të mbingarkuar.

Interesim konkret për lojtarin ka nga Liga Premier, ku profili i tij përshtatet mirë me intensitetin dhe ritmin e kampionatit anglez.

Flitet se oferta që mund të arrijnë rreth 60 milionë euro do ta vinin klubin madrilen përballë një vendimi të vështirë.

Një shumë e tillë do të përfaqësonte një mundësi ekonomike serioze për një lojtar me rol dytësor.

Ndërkohë, Milani po shtyn fort për rikthimin e Brahim Diaz në “San Siro”.

Kujtimet pozitive nga aventura e tij e mëparshme dhe dëshira e klubit italian për ta bërë pjesë kyçe të projektit e bëjnë këtë opsion shumë real.

Një ofertë rreth 50 milionë euro është në tryezë dhe nëse lojtari shpreh gatishmëri për t’u kthyer në Itali, marrëveshja mund të konkretizohet gjatë afatit kalimtar të verës. /Telegrafi/

I përfshirë prej kohësh në listën e objektivave të klubeve të mëdha si Real Madrid dhe Paris Saint-Germain, Enzo Fernandez po kalon një moment shumë pozitiv te Chelsea.

Mesfushori argjentinas është kthyer në një pjesë kyçe të skuadrës londineze, por pavarësisht rolit të tij të rëndësishëm, klubi anglez nuk e përjashton mundësinë e një largimi nëse vjen oferta e duhur.

Në moshën 25-vjeçare, Fernandez është një nga emrat që ndiqet me vëmendje nga Real Madridi, i cili po planifikon me kujdes përforcimet për sezonin 2026–2027.

Me 32 ndeshje të luajtura deri tani, ku ka realizuar 8 gola dhe ka dhënë 4 asistime, argjentinasi shihet si një profil ideal për të forcuar mesfushën e “Los Blancos”, repart që kërkon ndërhyrje të reja cilësore.

Sipas raportimeve të “Defensa Central”, Chelsea do të ishte i gatshëm të negociojë largimin e Enzo Fernandez nëse një klub vendos në tavolinë shumën prej 120 milionë eurosh, edhe pse lojtari ka kontratë deri në vitin 2031 dhe nuk konsiderohet zyrtarisht i transferueshëm.

Po ashtu, burimi në fjalë thekson se klubi londinez ka identifikuar tashmë një zëvendësues të mundshëm: Joao Neves.

Megjithatë, largimi i mesfushorit portugez nga Paris Saint-Germain nuk pritet të jetë aspak i lehtë, çka e bën situatën edhe më komplekse në afatet kalimtare. /Telegrafi/

Luis Enrique ka marrë një vendim kyç disa muaj më parë që sot po rëndon ndjeshëm mbi Paris Saint-Germain, si në kampionatin francez ashtu edhe në Ligën e Kampionëve.

Humbja 2-1 ndaj Sporting Lisbonës në xhiron e parafundit të fazës së ligës ka rikthyer dyshime serioze mbi projektin parisien dhe ka vështirësuar ndjeshëm kualifikimin direkt në fazën e 1/8-ve.

Ky rezultat e detyron PSG-në të luajë gjithçka në ndeshjen e fundit ndaj Newcastle, në një atmosferë presioni maksimal.

Paraqitja ndaj Sportingut tregoi mungesë stabiliteti, humbje kontrolli në momente vendimtare dhe gabime që u ndëshkuan shtrenjtë.

Për më tepër, skuadra nuk varet më vetëm nga vetja për të qenë mes tetë më të mirave, çka ka hapur sërish debate të forta brenda dhe jashtë klubit.

Në qendër të kritikave është vendosur portieri Lucas Chevalier, i transferuar verën e kaluar për 40 milionë euro.

Performanca e tij ka ngritur pikëpyetje për mungesë autoriteti dhe pasiguri në ndeshje të nivelit të lartë.

Edhe pse konsiderohet një investim për të ardhmen, Liga e Kampionëve po rezulton një skenë tepër e rëndë për një portier ende në fazë konsolidimi, ku çdo gabim amplifikohet.

Debati bëhet edhe më i ashpër duke kujtuar largimin e Gianluigi Donnarummas, i cili u përjashtua nga projekti dhe më pas iu bashkua Manchester Cityt.

Vendimi i Luis Enrique për t’ia besuar portën Chevalierit, në vend të një portieri të provuar në nivelet më të larta, po shihet gjerësisht si një gabim strategjik.

Përballja vendimtare me Newcastle nuk do të përcaktojë vetëm fatin evropian të PSG-së, por edhe drejtimin e diskutimit mbi menaxhimin e skuadrës dhe zgjedhjet e trajnerit spanjoll. /Telegrafi/

Robert Lewandowski po përballet me një moment vendimtar në aventurën e tij te Barcelona, pasi klubi i ka komunikuar qartë kushtet për vazhdimësinë e kontratës.

Në zyrat e klubit nuk ka dëshirë për ta detyruar largimin e tij, por rinovimi nuk do të jetë as automatik dhe as pa kushte.

Drejtuesit kanë përcaktuar një kornizë të re sportive dhe financiare, në përputhje me realitetin aktual të projektit blaugrana.

Nga ana sportive, Barcelona i ka kërkuar sulmuesit polak të pranojë një rol të ri brenda skuadrës.

Në moshën 36-vjeçare, ai nuk konsiderohet më titullar i padiskutueshëm në çdo ndeshje.

Ideja e stafit teknik është që Lewandowski të shfrytëzohet si një armë strategjike, duke i menaxhuar minutat dhe duke e aktivizuar në ndeshje kyçe, ku përvoja dhe instinkti i tij mbeten vendimtare.

Çështja më delikate lidhet me aspektin financiar

Aktualisht, paga e tij arrin rreth 26 milionë euro në vit, një barrë e madhe për kufijtë e rreptë të pagave të klubit.

Për këtë arsye, drejtuesit i kanë kërkuar një ulje shumë të ndjeshme të pagës, pothuajse përgjysmim, në përputhje me rolin e ri që i propozohet në skuadër.

Presidenti Joan Laporta dhe drejtuesit theksojnë se kjo qasje nuk është personale, por strukturore.

Lewandowski vlerësohet për profesionalizmin, lidershipin dhe ndikimin pozitiv në një dhomë zhveshjeje me shumë lojtarë të rinj.

Edhe me më pak minuta, klubi beson se ai mund të vazhdojë të jetë një garanci golash dhe një shembull për të ardhmen.

Tani vendimi i takon vetë lojtarit, ai duhet të zgjedhë mes pranimit të rolit dhe pagës së re ose kërkimit të një aventure tjetër për të ruajtur statusin aktual.

Barcelona nuk do ta pengojë nëse vendos të largohet, por as nuk do të devijojë nga kufijtë e vendosur.

Javët në vijim pritet të jenë vendimtare për të sqaruar të ardhmen e sulmuesit polak. /Telegrafi/

Dy klube të mëdha të Ligës Premier vazhdojnë të mbajnë nën vëzhgim situatën e Arda Guler.

Arsenali dhe Chelsea po shqyrtojnë mundësinë që të ndërmarrin hapa konkretë në fund të këtij sezoni për sulmuesin turk të Real Madridit.

Edhe pse fillimi i tij në “Santiago Bernabeu” nuk ishte i lehtë, Guler ka arritur gradualisht të fitojë një rol të rëndësishëm në skemat e skuadrës madrilene, duke iu afruar ëndrrës së tij të deklaruar hapur për të ndërtuar një karrierë afatgjatë te gjigantët spanjollë.

Në këtë kontekst, as lojtari dhe as drejtuesit e Real Madridit nuk duken të gatshëm të konsiderojnë një largim në këtë fazë.

Sipas raportimeve të “Caught Offside”, interesi i Arsenalit dhe Chelseat mbetet aktiv, por çdo ndryshim i mundshëm i situatës do të kërkonte kushte shumë specifike.

Së pari, vetë futbollisti do të duhej të shprehte dëshirë të qartë për t’u larguar nga Madridi, ndërsa më pas klubet e interesuara do të duhej të paraqisnin oferta financiare shumë të larta, në vlerat 90 ose 100 milionë euro.

Kujtojmë se Real Madridi pagoi rreth 26 milionë euro te Fenerbahçe për transferimin e tij.

Burime pranë Arsenalit kanë konfirmuar se klubi londinez po e ndjek nga afër zhvillimin e Guler, por e pranon se sfida kryesore do të ishte bindja e lojtarit, i cili aktualisht nuk po mendon të largohet nga Real Madridi.

Një lëvizje në afatin e janarit përjashtohet, ndërsa vera mbetet periudha e vetme ku një skenar i tillë mund të rishqyrtohet, nëse shumat e ofruara do ta detyronin Real Madridin ta mendonte seriozisht një shitje. /Telegrafi/

Legjenda e Liverpoolit, Jamie Carragher, ka kritikuar ashpër Vinicius Junior, duke e akuzuar për sjellje egoiste dhe duke e konsideruar si një nga faktorët kryesorë që çuan në shkarkimin e trajnerit Xabi Alonso.

“Arsyeja pse flas për Viniciusin është sepse ai është problemi më i madh. Ai është një nga turpet më të mëdha që çuan në humbjen e vendit të punës së trajnerit”, ka thënë ish-mbrojtësi anglez.

Carragher nuk i kurseu as kritikat ndaj presidentit të Real Madridit, Florentino Perez, të cilin e akuzoi se u ka dhënë lojtarëve fuqi të tepruar në dhomat e zhveshjes, duke i kthyer trajnerët në figura të zëvendësueshme.

Duke dhënë më shumë detaje, ish-ylli i “The Reds” shtoi:

“Në ndeshjen kundër Barcelonës, të cilën Real Madridi e fitoi, ai u zëvendësua në minutat e fundit. Trajneri po përpiqej të siguronte rezultatin dhe fitoren”.

“Viniciusi u zemërua, filloi të reagonte dhe të shprehte pakënaqësinë, duke thënë se nuk do të rinovonte kontratën për sa kohë Alonso ishte trajner. Më pas publikoi një deklaratë pas ndeshjes, ku kërkonte falje tifozëve dhe lojtarëve, por jo trajnerit”.

Carragher theksoi se ky episod ishte vendimtar për largimin e Alonsos.

“Kjo është arsyeja pse Alonso humbi vendin e punës, sepse Perez, presidenti i klubit, ka frikë se një nga lojtarët më të mirë në botë mund të mos rinovojë kontratën”.

Në përfundim, ai nënvizoi realitetin e njohur në klubin madrilen.

“Dhe ne e dimë shumë mirë se te Real Madridi, trajneri është i zëvendësueshëm, jo lojtarët. Kështu funksionon ky klub”, përfundoi Carragher. /Telegrafi/

Trent Alexander-Arnold po kalon një nga momentet më të ndërlikuara të karrierës së tij.

Alexander-Arnold i ardhur te Real Madridi me pritshmëri shumë të larta dhe si një transferim strategjik, nuk ka arritur të gjejë rolin dhe rëndësinë e premtuar në projektin sportiv të klubit.

Situata aktuale ka krijuar pakënaqësi të dukshme te lojtari, i cili ndjen se pritshmëritë e tij nuk janë përmbushur.

Pavarësisht cilësive dhe reputacionit të ndërtuar ndër vite, Alexander-Arnold nuk ka arritur të konsolidohet si titullar i padiskutueshëm.

Problemet fizike dhe konkurrenca e brendshme kanë ndikuar në minutazhin e tij, ndërsa ndikimi në lojë ka qenë më i kufizuar nga sa pritej.

Në rrethin e lojtarit flitet për zhgënjim dhe mungesë harmonie me projektin aktual të Real Madridit.

Në këtë kontekst, afati kalimtar i verës po merr formë dhe Bundesliga po shfaqet si një opsion serioz.

Bayern Munich po ndjek nga afër situatën dhe e vlerëson shumë profilin e anglezit, duke e parë atë si një përforcim ideal për krahun e djathtë të mbrojtjes.

Klubi bavarez beson se stili i lojës në Gjermani mund të nxjerrë në pah aftësitë e tij teknike dhe ndikimin ofensiv.

Edhe Real Madridi është i vetëdijshëm për situatën dhe nuk përjashton mundësinë e një largimi, nëse pakënaqësia vazhdon dhe mbërrin një ofertë bindëse.

Mbajtja e një lojtari të pakënaqur nuk shihet si zgjidhje afatgjatë, ndërsa një transferim mund të ndihmojë në rregullimin e balancave në skuadër dhe shmangien e tensioneve të panevojshme.

Alexander-Arnold merr një ofertë të paimagjinueshme për t’u larguar nga Real Madridi

Muajt e ardhshëm do të jenë vendimtarë për të ardhmen e Alexander-Arnold.

Lojtari po shqyrton me kujdes hapin e radhës, duke kërkuar një ambient ku të ndihet i vlerësuar dhe protagonist.

Nëse transferimi te Bayern Munich realizohet, do të ishte një nga lëvizjet më befasuese të afatit kalimtar veror dhe një pikë kthese në karrierën e tij. /Telegrafi/

Drejtuesit e Bayern Munich kanë nisur negociatat për të zgjatur dhe siguruar kontratën e sulmuesit francez Michael Olise, duke qenë të vetëdijshëm për interesin që ai ngjall tek klube të tilla si Real Madrid dhe Liverpool.

Futbollisti 24-vjeçar është bërë tashmë një nga transferimet më të spikatura të klubit bavarez në vitet e fundit, duke regjistruar shifra mbresëlënëse këtë sezon: 13 gola dhe 20 asistime në 28 ndeshje zyrtare.

Progresi i tij nuk ka kaluar pa u vënë re nga klubet e mëdha evropiane, gjë që ka shtyrë Bayernin të veprojë shpejt për të siguruar qëndrueshmërinë e tij afatgjatë.

Sipas Sport Bild, drejtuesit e klubit synojnë të mbyllin marrëveshjen e rinovimit para Botërorit, turne që mund të rrisë edhe më shumë popullaritetin e lojtarit.

Olise erdhi te Bayern verën e vitit 2024 nga Crystal Palace për 53 milionë euro, një shans që në atë kohë konsiderohej i rrezikshëm.

Më pak se dy vite më vonë, insistimi i drejtorit sportiv Max Eberl, mbështetësi i tij kryesor, ka dhënë rezultate, duke e konsoliduar sulmuesin e ri si një pjesë kyçe të ekipit. /Telegrafi/

Paris Saint-Germain ka reaguar qartë ndaj interesimit të Real Madridit për Vitinhan, duke e mbyllur çdo derë për një transferim të mundshëm.

Mesfushori portugez është shndërruar në një nga figurat më të rëndësishme të futbollit evropian falë paraqitjeve të tij të nivelit të lartë dhe aftësisë për të drejtuar lojën me inteligjencë dhe qetësi.

Performancat e tij e kishin futur prej kohësh në radarët e klubeve më të mëdha, përfshirë edhe klubin madrilen.

Në Paris, Vitinha konsiderohet një shtyllë e projektit sportiv të drejtuar nga Luis Enrique.

Trajneri spanjoll e sheh atë si element kyç në organizimin e lojës, si në fazën ofensive ashtu edhe në balancën taktike të ekipit.

Roli i tij ka evoluar ndjeshëm dhe sot ai është referencë absolute në mesfushën e PSG-së, duke diktuar ritmin dhe strukturën e çdo ndeshjeje.

Sipas raportimeve të The Athletic, drejtuesit e PSG-së i kanë përcjellë një mesazh të drejtpërdrejtë Real Madridit: Vitinha nuk është në shitje.

Qëndrimi i klubit francez është i prerë dhe nuk lidhet me aspektin financiar, por me rëndësinë strategjike që lojtari ka për të tashmen dhe të ardhmen e ekipit.

Edhe nga rrethi i lojtarit është bërë e qartë se largimi nga Parisi është i pamundur në këtë fazë.

Kjo situatë e detyron Real Madridin të rishikojë planet e tij për përforcimin e mesfushës.

Interesimi për Vitinhan ishte pjesë e strategjisë për të gjetur një dirigjent loje, por refuzimi i PSG-së e bën këtë të parealizueshme.

Klubi madrilen tashmë po orienton vëmendjen drejt objektivave të tjerë, ndërsa Vitinha vazhdon të jetë lideri dhe simboli i projektit ambicioz parisien. /Telegrafi/

Real Madrid dhuroi një mbrëmje spektakolare në ‘Santiago Bernabeu’ me fitoren bindëse 6–1 ndaj Monacos, por vëmendja kryesore e ndeshjes shkoi te Vinicius Junior.

Ylli brazilian ishte protagonist absolut, duke realizuar një gol dhe duke dhënë dy asistime, në një paraqitje që konfirmoi edhe një herë statusin e tij si një nga lojtarët më vendimtarë të futbollit evropian.

I vërshëllyer fillimisht nga një pjesë e tifozëve, Vinicius arriti t’i kthejë fishkëllimat në duartrokitje përmes lojës së tij elektrizuese dhe ndikimit direkt në rezultat.

Përveç kontributit vendimtar në fitoren e thellë, 23-vjeçari shënoi edhe një arritje historike personale.

Me dy asistimet kundër Monacos, Vinicius Junior arriti kuotën e 30 asistimeve në Ligën e Kampionëve, duke u ngjitur në vendin e tetë në renditjen e asistuesve më të mirë të të gjitha kohërave në këtë kompeticion prestigjioz.

Top 10 asistuesit më të mirë në historinë e Ligës së Kampionëve:

Cristiano Ronaldo – 42 asistime

Angel Di Maria – 41 asistime

Lionel Messi – 40 asistime

Neymar – 33 asistime

Kevin De Bruyne – 31 asistime

Ryan Giggs – 31 asistime

Xavi Hernandez – 30 asistime

Vinicius Junior – 30 asistime

Thomas Muller – 30 asistime

Karim Benzema – 29 asistime

Ngjitja e Vinicius Junior në këtë listë elitare dëshmon jo vetëm talentin e tij individual, por edhe pjekurinë që ka fituar vitet e fundit në fanellën e Real Madridit.

Me ritmin aktual dhe moshën e re që ka, braziliani ka të gjitha mundësitë që në vitet në vijim të ngjitet edhe më lart në këtë renditje historike. /Telegrafi/

Liverpooli e ka vendosur mesfushorin anglez Adam Wharton si objektivin kryesor për të përforcuar repartin e mesfushës në sezonin e ardhshëm.

Talenti 21-vjeçar i Crystal Palace ka tërhequr vëmendjen e skautëve evropianë me paraqitjet e tij të pjekura dhe ndikimin në lojë, duke u kthyer në një nga emrat më të kërkuar të Ligës Premier.

Klubi nga Merseyside po kërkon një organizator loje që të marrë përgjegjësi në qendër të fushës dhe të sjellë qartësi në ndërtimin e aksioneve.

Crystal Palace është i vetëdijshëm për interesimin e madh dhe e ka vlerësuar kartonin e Wharton rreth 65 milionë euro, shifër që mund të rritet përmes bonuseve të lidhura me performancën dhe arritjet sportive.

Nga ana taktike, Wharton shihet si një përshtatje ideale për stilin e lojës së Liverpoolit, duke plotësuar mesfushorë si Alexis Mac Allister dhe Ryan Gravenberch.

Aftësia e tij për të thyer linjat me pasime të sakta dhe për të ruajtur ekuilibrin defensiv e bën atë një element kyç për tranzicionin e shpejtë dhe presionin e lartë që karakterizon skuadrën.

Pavarësisht interesimit nga klube të tjera të mëdha angleze, Liverpooli duket se ka avantazhin falë projektit afatgjatë dhe ambicies sportive.

Investimi në një talent të ri vendas shihet si një hap strategjik për stabilitet dhe konkurrencën në vitet në vijim, ndërsa vera pritet të jetë vendimtare për finalizimin ose jo të kësaj lëvizjeje të madhe në afatin kalimtar. /Telegrafi/