Në Qendrën Kryesore të Mjekësisë Familjare “Dr. Fatmir Krasniqi” në Fushë Kosovë është vendosur dhe funksionalizuar ekrani informues, përmes të cilit qytetarët mund të informohen në kohë reale për listën e barnave esenciale që gjenden në stok në barnatore.
Ky sistem informues u mundëson qytetarëve qasje të drejtpërdrejtë në të dhëna të sakta dhe të verifikueshme mbi disponueshmërinë e barnave esenciale, duke rritur transparencën, llogaridhënien institucionale dhe besimin në shërbimet shëndetësore publike.
Nga Komuna e Fushë Kosovës është bërë e ditur se vendosja e këtij ekrani është pjesë e angazhimeve për përmirësimin e shërbimeve shëndetësore dhe informimin e drejtë të qytetarëve.
Komuna e Fushë Kosovës ka theksuar se mbetet e përkushtuar të jetë pranë qytetarëve dhe në shërbim të nevojave të tyre në sektorin e shëndetësisë. /Telegrafi/
Ministria e Bujqësisë, Pylltarisë dhe Zhvillimit Rural, përmes Agjencisë për Zhvillimin e Bujqësisë, ka njoftuar se po vazhdon realizimi i pagesave për fermerët në kuadër të Programit të Pagesave Direkte.
Sipas njoftimit të ministrisë, gjatë këtij viti është shënuar një rritje e ndjeshme e numrit të aplikuesve, me mbi 3,000 fermerë më shumë krahasuar me vitin paraprak, çka ka ndikuar që një numër i vogël i pagesave të realizohen me vonesë.
Po ashtu, gjatë vitit 2025 janë rritur pagesat për njësi përkrahjeje për disa kultura dhe sektorë bujqësorë. Në sektorin e blegtorisë, është shënuar rritje e numrit të lopëve qumështore për rreth 10,000 krerë krahasuar me vitin paraprak. Në pemëtari, subvencionet janë rritur nga 450 euro në 600 euro për hektar, ndërsa pagesat direkte për dele janë rritur nga 25 euro në 30 euro për krerë. Rritje është shënuar edhe në bletari, nga 20 euro në 25 euro për koshere, si dhe në akuakulturë, nga 0.20 euro për kilogram në 0.25 euro për kilogram.
Nga MBPZHR bëhet e ditur se këto rritje kanë ndikuar që buxheti i planifikuar për subvencione të mos jetë i mjaftueshëm për realizimin e të gjitha pagesave brenda vitit 2025.
Ministria thekson se procesi i realizimit të pagesave është në zhvillim dhe do të vazhdojë edhe në ditët në vijim, deri në përfundimin e plotë të të gjitha pagesave të parapara sipas Programit të Pagesave Direkte.
MBPZHR ka ritheksuar përkushtimin e saj për mbështetjen e vazhdueshme të sektorit të bujqësisë dhe fermerëve në vend, duke falënderuar fermerët për mirëkuptimin dhe bashkëpunimin. /Telegrafi/
Emergjenca e Spitalit të Përgjithshëm në Gjakovë ka përballuar një ngarkesë të konsiderueshme pune gjatë vitit 2025, duke ofruar shërbime mjekësore për mijëra pacientë, përfshirë raste urgjente dhe me rrezik të lartë për jetën.
Sipas raportit vjetor të punës për vitin 2025, në Emergjencë janë realizuar gjithsej 22,371 vizita mjekësore, ndërsa janë ofruar 4,544 konsulta mjekësore për pacientë me gjendje të ndryshme shëndetësore.
Gjatë kësaj periudhe, 2,741 pacientë janë pranuar për trajtim spitalor, ndërsa 160 raste kanë qenë të domosdoshme për transferim në Qendrën Klinike Universitare të Kosovës për trajtim të mëtejshëm.
Raporti evidenton edhe një numër të madh të rasteve specifike. Gjatë vitit 2025 janë trajtuar 1,183 raste aksidentesh, 253 raste rrahjeje, 20 raste therjeje, 39 raste të dhunës në familje, 23 tentativa për vetëvrasje, si dhe 4 raste plagosjeje.
Po ashtu, gjatë vitit të kaluar në Emergjencën e Spitalit të Gjakovës janë regjistruar gjithsej 64 raste exitusi.
Nga Spitali i Gjakovës bëhet e ditur se këto të dhëna pasqyrojnë ngarkesën e lartë të punës në Emergjencë gjatë vitit 2025, si dhe përkushtimin profesional të stafit shëndetësor në ofrimin e shërbimeve të pandërprera, cilësore dhe në kohë për qytetarët. /Telegrafi/
Gjykata Themelore në Prizren, Dega në Dragash, ka bërë të ditur se ndaj Ferzidin Bozës nga fshati Restelicë i Komunës së Dragashit janë trajtuar gjithsej tri raste penale në vitet e fundit, për të cilat janë marrë aktgjykime dënuese, përfshirë edhe shqiptimin e masave të detyrueshme të trajtimit psikiatrik në liri.
Sipas njoftimit zyrtar të gjykatës, rasti i parë mban numrin P.nr. 2/22 dhe është gjykuar më 15 korrik 2022. Në këtë rast, Boza është shpallur fajtor për veprën penale “Lëndim i lehtë trupor”, për çka i është shqiptuar dënim me burgim në kohëzgjatje prej gjashtë muajsh.
Megjithatë, dënimi është pezulluar për një periudhë verifikuese prej dy vitesh, me kusht që i dënuari të mos kryejë ndonjë vepër tjetër penale. Përveç kësaj, gjykata ka shqiptuar edhe masën e trajtimit të detyrueshëm psikiatrik ambullantor në liri, në kohëzgjatje prej dy vitesh. Zbatimi i kësaj mase i është besuar Qendrës për Shëndet Mendor në Prizren, e cila është obliguar ta pranojë të dënuarin për trajtim dhe të njoftojë gjykatën për gjendjen e tij shëndetësore së paku një herë në gjashtë muaj. Për këtë masë janë njoftuar edhe Shërbimi Sprovues në Prizren dhe Qendra për Punë Sociale në Dragash.
Rasti i dytë, me numër P.nr. 56/21, është përfunduar me aktgjykim dënuese më 22 gusht 2022. Në këtë lëndë, Ferzidin Boza është shpallur fajtor për veprën penale “Dhuna në familje” dhe është dënuar me gjashtë muaj burgim, dënim i cili nuk do të ekzekutohet nëse brenda një periudhe verifikuese prej një viti nuk kryen ndonjë vepër tjetër penale. Edhe në këtë rast, gjykata ka shqiptuar masën e trajtimit të detyrueshëm psikiatrik në liri, e cila do të zbatohet nga personeli mjekësor i Qendrës së Shëndetit Mendor në Prizren deri në përmirësimin e gjendjes mendore të tij, por jo më gjatë se tre vjet. Qendra është obliguar që çdo gjashtë muaj ta informojë gjykatën për ecurinë e trajtimit.
Rasti i tretë, me numër P.nr. 65/24, është gjykuar më 17 tetor 2024. Në këtë rast, Boza është shpallur fajtor sërish për veprën penale “Lëndim i lehtë trupor” dhe është dënuar me gjashtë muaj burgim. Në dënim është llogaritur edhe koha e kaluar në paraburgim nga data 30 qershor 2024 deri më 25 shtator 2024. Me propozimin dhe pëlqimin e të akuzuarit dhe mbrojtësit të tij, gjykata ka vendosur që dënimi me burgim të zëvendësohet me dënim me gjobë në shumën prej 2 mijë euro. Pas llogaritjes së kohës së kaluar në paraburgim, nga kjo shumë janë zbritur 260 euro, ndërsa pjesa e mbetur duhet të paguhet në afatin ligjor pas plotfuqishmërisë së aktgjykimit.
Gjykata Themelore në Prizren ka njoftuar se gjatë ditës do të informojë opinionin publik për rrjedhën e mëtejmë të rastit, nëse pranohet ndonjë kërkesë për caktim të masës së sigurisë, si dhe për kohën e mbajtjes së seancës dëgjimore. /Telegrafi/
Në zyrat e Komunës së Graçanicës është mbajtur ceremonia e nënshkrimit të Grant Kontratës për “Projektin për sigurimin e pajisjeve mjekësore për Qendrën Diagnostikuese Graçanicë”, në kuadër të Ndihmës Japoneze për Grante për Projektet e Sigurisë Bazike Njerëzore (GGP).
Grant kontrata është nënshkruar nga i Ngarkuari me Punë i Ambasadës së Japonisë në Kosovë, Hiroyasu Tanigaki, dhe kryetari i Komunës së Graçanicës, Novak Ziviq, si partner zbatues i projektit.
Me këtë rast, Tanigaki e ka uruar Ziviqpër zgjedhjen e tij në postin e kryetarit të komunës, duke i dëshiruar suksese në ushtrimin e mandatit. Ai ka theksuar se Japonia mbetet e përkushtuar për të mbështetur projektet që ndikojnë drejtpërdrejt në mirëqenien e qytetarëve.
“Na bën veçanërisht të kënaqur që përmes këtij projekti të mbështesim Qendrën Diagnostikuese dhe Komunën e Graçanicës në përpjekjet e tyre për të përmirësuar kushtet e jetesës së qytetarëve në këtë komunë dhe në rajonin përreth”, ka deklaruar Tanigaki.
Projekti synon përmirësimin e cilësisë së shërbimeve shëndetësore për qytetarët e Graçanicës dhe zonave përreth, përmes sigurimit të pajisjeve moderne mjekësore.
Në kuadër të tij, në laboratorin klinik të Qendrës Diagnostikuese do të instalohet një analizues shtesë imunoanalitik, i cili do t’u mundësojë rreth 4 mijë e 100 pacientëve në vit marrjen e diagnozave më të sakta dhe zbulimin e hershëm të sëmundjeve.
Po ashtu, në repartin e fizioterapisë do të dhurohet një pajisje për terapi me valë goditjeje radiale ekstrakorporale, e cila do t’u mundësojë rreth 430 pacientëve në vit trajtim adekuat sipas nevojave të tyre shëndetësore.
Vlera totale e projektit kap shumën prej 59 mijë e 700 euro.
Ndihma Japoneze për Grante për Projektet e Sigurisë Bazike Njerëzore (GGP) është një nga skemat e Ndihmës Zyrtare të Japonisë për Zhvillim, e cila mbështet organizatat joqeveritare dhe institucionet publike lokale në adresimin e nevojave bazike të komuniteteve, veçanërisht në fushat e shëndetit, arsimit, mjedisit dhe mirëqenies sociale.
Në Kosovë, Japonia ka zbatuar skemën GGP edhe para shpalljes së pavarësisë, ndërsa pas pavarësisë, shuma totale e granteve të ndara përmes kësaj skeme arrin në 4 milionë e 410 mijë e 415 euro për 66 projekte në mbarë vendin. /Telegrafi/
Banorët e lagjes “Qendra” të Prishtinës, protestuan të mërkurën kundër ndërmarrjes “Prishtina Parking”, për shkak të, siç thanë, parkimit të pakontrolluar që po shkakton tollovi të vazhdueshme, bllokimeve disaorëshe të rrugëve, konflikteve mes banorëve, si edhe mungesës së gjobave dhe transparencës për lejet e parkimit rezidencial. Ata kërkuan zgjidhje urgjente, si parkim vetëm për rezidentët dhe vendosjen e një laure për ta shmangur kaosin në lagje.
Banor i kësaj lagjeje, Luan Dizdari, tha se banorët po përballen vazhdimisht me tollovi dhe bllokime disaorëshe, veçanërisht në zonën e tunelit, për shkak të parkimit të pakontrolluar.
“Nuk jemi aspak të kënaqur, bëhet tollovi gjithmonë, kemi problem,zakonisht te tuneli këtu, aty bllokohet, ka dy a tre orë duhet me i prit… Zoti na ruajt naj njeri smut me kon, bllokohesh…zgjedhja e vetme me hek Prishtina Parking prej këtu hiq, sepse këtu po parkohen edhe makina tjera që vin prej gjithkahit dhe shumica i kanë renë në fije, po i fusin ku nuk ka gjoba edhe bllokon… bejnë kishe policia e komunës, ata po japin diçka letra, herë vin herë nuk vin, veç bëhet tollovi mosvet…duhet me bë një rampë vetëm na këtu të lagjes tonë me u parku edhe s’ke me pas problem, me të vërtetë shumë herë më ka ndodh me thënë ec largoma kerrin se s’po mundem me dal”, theksoi Dizdari.
“Me kërkesën e qytetarëve është thirrë protesta lidhur me pakënaqësitë e Prishtina Parking, edhe këtu duke e falënderu Policinë e Kosovës se moti ka mujt me ndodh edhe naj vrasje, sepse ka konflikte të mëdha mbrenda lagjes, kemi pa kanqësi. Unë si përfaqësuese e kom kërku listën të cilën ata i kanë pajis qytetarët me leje si banor rezidencial, të njëjtit janë përgjigj që s’kanë drejtë me dhanë detaje sepse janë të dhëna konfidenciale, mirëpo kanë harru që unë jam përfaqësuese në komunitet edhe ndodh që kam të dhëna shumë më shumë se ata që janë në ndërmarrje, unë i kam të gjitha të dhënat e banorëve rezidencial dhe kam takimet e rregullta me qytetarët”, theksoi Hasani.
Ndërmarrja “Prishntina Parking” i menaxhon disa nga zonat e parkimit të komplekset banesore në kryeqytet.
Shpend Ahmeti, ish-kryetar i Prishtinë, ka dalë sot më 21.01.2026 para Gjykatës në seancën e shqyrtimit fillestar për t`u ballafaquar me aktakuzën e prokurorisë lidhur me mosraportim të pasurisë.
Sipas aktakuzës i pandehuri Shpend Ahmeti nuk ka deklaruar mjetet financiare në shumë prej 54,400.00 euro të pranuara nga llogaritë personale të nënës së tij dhe 118 mijë euro të tij. Sipas Prokurorisë shuma e përgjithshme e mjeteve të padeklaruara arrin vlerën prej 172,600.00 euro.
Pas leximit të aktakuzës nga prokurori Dren Paca, i akuzuari Shpend Ahmeti u deklarua rreth fajësisë.
Ahmeti tha se nuk ndihet fajtor për veprën e cila i vihet në barrë.
Tutje, pas deklarimit të tij, gjyqtari Leon Përlaska njoftoi të akuzuarin dhe mbrojtjen e tij se në afat prej 30 ditësh kanë të drejtë të paraqesin kundërshtimin e provave dhe të paraqesin kërkesë për hedhje të aktakuzës.
Prokuroria Speciale e Republikës së Kosovës më 23.12.2025 ka ngritur aktakuzë ndaj Shpend Ahmetit.
Në aktakuzën e Prokurorisë Speciale të siguruar nga KALLXO.com thuhet se i pandehuri Shpend Ahmeti në periudhën kohore nga viti 2018 e në vazhdimësi deri në vitin 2022, në Prishtinë, në cilësinë e Kryetarit të Komunes së Prishtines edhe pse i obliguar të bëjë deklarimin e pasurisë vjetore në Agjencinë për Parandalimin e Korrupsionit, me dashje ka paraqitur deklarata të pasakta të pasurisë duke mos deklaruar te ardhurat reale.
“Si person zyrtar, ka qenë i obliguar të bëjë deklarimin e saktë, të plotë dhe në kohë të pasurisë, të ardhurave, dhuratave, dobive pasurore dhe detyrimeve financiare, me rastin e paraqitjes se deklaratave vjetore pranë Agjencisë për Parandalimin e Korrupsionit, me dashje ka paraqitur deklarata të pasakta të pasurisë, duke mos deklaruar të ardhurat reale, respektivisht duke mos deklaruar deponimet në para të gatshme (cash) të realizuara personalisht gjatë viteve përkatëse, si drejtëpërdrejt ashtu edhe përmes bankomatëve (ATM), në llogaritë e tij personale pranë Bankës Ekonomike dhe Bankës Kombëtare Tregtare (BKT), në vlerë të përgjithshme prej 118,200.00 euro.”- thuhet në aktakuzë.
Sipas PSRK-së i pandehuri Ahmeti në vazhdimësi ka kryer veprën penale “Mosraportimi ose raspotimi i rremë i pasurisë, të ardhurave, i dhuratave, i dobisë tjetër materiale ose i detyrimeve financiare.
Ahmeti ishte për dy mandate kryetar i Prishtinës, i njëjti kishte fituar si pjesë e Lëvizjes Vetëvendosje mandatin e parë në vitin 2013-të dhe përfundoi mandatin e dytë në vitin 2021.
Prokuroria Themelore në Prizren – Departamenti për Krime të Rënda, ka njoftuar se në fshatin Restelicë të Komunës së Dragashit ka ndodhur një rast i vrasjes së rëndë, i cili dyshohet se ka ndodhur brenda rrethit familjar.
Sipas të dhënave fillestare të hetimit, i dyshuari F.B. dyshohet se ka privuar nga jeta nënën e tij, T.B., duke ushtruar dhunë fizike në shtëpinë e tyre.
Rasti është raportuar në orët e hershme të mëngjesit, pas së cilës në vendin e ngjarjes kanë dalë prokurorja kujdestare nga Departamenti për Krime të Rënda, njësitet relevante të Policisë së Kosovës, krim-teknika si dhe zyrtarë nga Instituti i Mjekësisë Ligjore.
Me urdhër të prokurorit, trupi i pajetë i viktimës është dërguar në Institutin e Mjekësisë Ligjore për obduksion, me qëllim të përcaktimit të saktë të shkakut të vdekjes dhe përfundimit të procedurave hetimore.
Nga të dhënat zyrtare të Prokurorisë Themelore në Prizren, rezulton se i dyshuari ka pasur çrregullime mendore dhe ka qenë i përfshirë më herët në tri raste penale të dhunës në familje.
Një rast është trajtuar gjatë vitit 2024, ndërsa dy raste gjatë vitit 2021. Për këto raste, prokuroria kishte ndërmarrë veprimet ligjore përkatëse, kishte ngritur aktakuza dhe ishin nxjerrë aktgjykime dënuese.
Prokuroria Themelore në Prizren ka bërë të ditur se është duke ndërmarrë të gjitha veprimet e nevojshme hetimore për zbardhjen e plotë të rrethanave të ngjarjes dhe shkakut të vdekjes. /Telegrafi/
Spitali i Përgjithshëm “Dr. Sami Haxhibeqiri” në Mitrovicë ka shënuar rritje të konsiderueshme të ndërhyrjeve kirurgjike gjatë vitit 2025, duke realizuar 500 operacione më shumë krahasuar me vitin 2024.
Sipas të dhënave zyrtare të spitalit, gjatë vitit 2025 janë kryer gjithsej 3 mijë e 369 operacione kirurgjike, një shifër kjo më e lartë edhe në raport me vitet paraprake.
Ndërhyrjet janë realizuar me sukses të plotë nga ekipet mjekësore të degëve kirurgjike.
Operacionet janë kryer në Kirurgji të Përgjithshme, Ortopedi, Otorinolaringologji, Oftalmologji, Urologji si dhe në Obstetrikë dhe Gjinekologji, duke reflektuar një angazhim të shtuar dhe kapacitete më të avancuara shërbimi për pacientët.
Drejtuesit e institucionit kanë përgëzuar stafin e degëve kirurgjike dhe të anestezionit, përfshirë mjekët, infermierët dhe stafin tjetër mbështetës, për profesionalizmin, përkushtimin dhe punën e palodhshme gjatë gjithë vitit 2025. /Telegrafi/
Drejtoria e Inspekcionit në Komunën e Gjilanit ka publikuar bilancin vjetor të punës për periudhën janar–dhjetor 2025, duke prezantuar të dhëna të detajuara mbi aktivitetet inspektuese në fushën e ndërtimit, veprimtarive afariste, komunikacionit, mjedisit dhe hapësirave publike.
Në sektorin e ndërtimit, gjatë vitit 2025 janë hartuar gjithsej 308 procesverbale, janë shqiptuar 15 gjoba dhe janë shqyrtuar 36 ankesa nga qytetarët.
Nga Drejtoria theksohet se është rritur ndjeshëm vetëdijesimi i qytetarëve për pajisje me leje ndërtimi, ndërsa ndërtimet e larta janë mbajtur nën kontroll të vazhdueshëm përmes matjeve gjeodezike për çdo etazhitet.
Inspektorët kanë realizuar përcjellje të vazhdueshme të punimeve, gjë që, sipas tyre, ka ndikuar drejtpërdrejt në rritjen e cilësisë së ndërtimit.
Në fushën e veprimtarive afariste, gjatë vitit janë inspektuar 261 biznese, shumica prej tyre biznese të reja. Për këtë periudhë janë hartuar 261 procesverbale, janë realizuar 163 pranime të kushteve minimale teknike për subjekte afariste, si dhe është bërë kontrolli i dokumentacionit të konformitetit të mallrave sipas standardeve evropiane.
Po ashtu, është mbyllur një subjekt afarist dhe janë shqiptuar 10 gjoba mandatore, ndërsa të hyrat nga pranimet teknike kanë arritur vlerën prej 14,600 euro.
Drejtoria ka raportuar edhe për bashkëpunim me Policinë e Kosovës lidhur me organizimin e ahengjeve të maturantëve, ku gjatë inspektimeve janë ndaluar pijet alkoolike për persona nën moshën 18-vjeçare.
Në sektorin e komunikacionit janë hartuar 176 procesverbale, janë iniciuar 35 kundërvajtje dhe janë shqiptuar 10 gjoba. Inspektimet kanë përfshirë linjat komunale të autobusëve, taksitë legale dhe ilegale, si dhe aktivitete vetëdijesuese në shkolla fillore të mesme të ulëta, ku gjatë muajit shtator janë mbajtur ligjërata me temën “Fëmijët miq në trafikun rrugor” në tetë shkolla të zonës urbane të Gjilanit.
Në aspektin e mjedisit, Drejtoria ka monitoruar hapësirat urbane dhe rurale, duke trajtuar kërkesa dhe ankesa të qytetarëve për ndotje, hedhje të mbeturinave dhe pajisje me leje mjedisore komunale. Pas inspektimeve në terren janë lëshuar vendime, gjoba, afate ligjore dhe akte të tjera normative.
Po ashtu, është bërë monitorimi i zbatimit të lejeve mjedisore për subjektet afariste dhe është realizuar bashkëpunim me operatorë publikë për pastrimin e disa lokacioneve në qytet.
Gjatë vitit 2025, Drejtoria e Inspekcionit ka bashkëpunuar ngushtë me Policinë e Kosovës, MMPHI-në, KPMM-në, prokurorinë, ndërmarrjet publike lokale dhe kompani të shërbimeve publike, duke përfshirë “Hidromorava”, NPL “Tregu”, “Eco Higjiena” dhe KEDS-in.
Në kuadër të shqyrtimit të ankesave zyrtare, janë shqiptuar 13 gjoba mandatore, janë hartuar 109 procesverbale dhe janë pranuar 39 kërkesa zyrtare. Sipas Drejtorisë, masat e ndërmarra kanë përfshirë vërejtje verbale, ndërprerje punimesh, dhënie afatesh ligjore dhe shqiptim gjobash.
Drejtoria e Inspekcionit në Gjilan vlerëson se puna gjatë vitit 2025 ka kontribuar në forcimin e zbatimit të ligjit, rritjen e rendit dhe përmirësimin e standardeve në fusha të ndryshme të jetës publike në komunë. /Telegrafi/
Ekipet e KRM “Pastrimi” po vazhdojnë angazhimin në terren edhe gjatë orëve të natës, me qëllim të largimit të mbeturinave të grumbulluara dhe vendosjes së kontejnerëve në zonat ku është paraqitur nevojë urgjente.
Nga kjo ndërmarrje bëhet e ditur se puna po zhvillohet me intensitet të shtuar, lagje pas lagjeje dhe derë më derë, në mënyrë që situata të rikthehet në normalitet sa më shpejt të jetë e mundur.
KRM “Pastrimi” ka falënderuar qytetarët për durimin dhe bashkëpunimin, duke theksuar se angazhimi i ekipeve nuk do të ndalet derisa gjendja të stabilizohet plotësisht dhe shërbimi të jetë në nivelin e duhur. /Telegrafi/
Policia e Kosovës ka bërë të ditur se vazhdon të mbetet adresa e parë e besimit për qytetarët, përmes bashkëpunimit dhe veprimeve të përgjegjshme në shërbim të komunitetit.
Sipas njoftimit, mbrëmë rreth orës 22:00, në Stacionin Policor në Podujevë, dy qytetarë me inicialet S.B dhe L.B kanë dorëzuar një portofol të gjetur, i cili përmbante para dhe dokumente personale.
Pas procedurave të nevojshme, portofoli i është kthyer pronarit të tij, duke përmbyllur me sukses rastin.
Policia e Kosovës ka falënderuar qytetarët për bashkëpunimin dhe gjestin human, duke vlerësuar veprimet që forcojnë besimin dhe solidaritetin në shoqëri. /Telegrafi/
Sot është realizuar rrënimi i një objekti të ndërtuar pa leje në pronë komunale pranë Stacionit të Autobusëve, bazuar në vendimin e Kryetarit të Komunës së Mitrovicës, Faton Peci.
Veprimi u ndërmor nga Drejtoria e Inspekcionit me qëllim të lirimit të hapësirës së uzurpuar dhe rikthimit të saj në shërbim të interesit publik.
Kryetari Peci theksoi se “nuk do të lejohet ndërtimi i objekteve kundërligjshëm, dhe aksionet do të vazhdojnë deri në lirimin e plotë të hapësirave publike, për të garantuar rendin dhe respektimin e ligjit”.
Ky veprim përfaqëson një hap konkret të Komunës së Mitrovicës drejt ruajtjes së rendit urban dhe mbrojtjes së pronës publike. /Telegrafi/
Ekipet e KRU “Hidrodrini”, të sektorit të Kanalizimit nga Istogu dhe Peja, kanë realizuar intervenime pastrimi dhe zhbllokime të rrjetit të kanalizimit në tre lokalitete të fshatrave të Istogut.
Zhbllokime janë kryer në fshatrat Gurrakoc, Saradran dhe Zabllaq, si pasojë e bllokimeve të shkaktuara nga mbeturina të ngurta, gjëra ushqimore të jashtë përdorimit dhe objekte të tjera që rrjeti i kanalizimit nuk është i destinuar t’i përballojë.
KRU “Hidrodrini” apelon tek qytetarët që të shmangin hedhjen e materialeve të papërshtatshme në kanalizim, për të garantuar funksionimin e rregullt të sistemit dhe shmangien e dëmeve. /Telegrafi/
Hidromorava njofton konsumatorët se, për shkak të një defekti në gypin e ujësjellësit, furnizimi me ujë në rrugën “Mbretëresha Teutë” në lagjen “Dheu i Bardhë” është ndërprerë.
Kompania bën të ditur se çdo ndryshim në situatë apo informacion shtesë do t’i bëhet i ditur qytetarëve përmes kanaleve zyrtare të komunikimit.
Konsumatorët ftohen të tregojnë mirëkuptim dhe durim deri në normalizimin e furnizimit. /Telegrafi/
Pas një shtyrjeje të përkohshme të procesit mësimor për shkak të problemeve të ngrohjes qendrore, nga data 19 janar, mësimi në shkollat e Komunës së Fushë Kosovës ka rifilluar në ambiente të ngrohta dhe të përshtatshme për nxënësit dhe mësimdhënësit.
Gjatë kësaj periudhe, janë instaluar dhe riparuar sisteme të reja ngrohjeje në shkollat “Mihal Grameno”, “Hoxhë Kadri Prishtina”, “Lismiri”, “Daut Bogujevci” dhe “Vëllezërit Frashëri”, duke siguruar kushte më të mira për zhvillimin normal të procesit mësimor.
Komuna ka publikuar një video ku tregohet ambienti i përmirësuar mësimor, ndërsa nxënësit tashmë vijojnë mësimin në kushte më të sigurta dhe komode.
Autoritetet komunale bëjnë me dije se arsimi mbetet prioritet kryesor dhe do të vazhdojnë angazhimet për përmirësimin e kushteve në të gjitha institucionet arsimore. /Telegrafi/
Në një aksion të ndërmarrë sot nga Drejtoria e Inspekcionit dhe trupa inspektuese e Komunës së Obiliqit, është liruar prona e uzurpuar në fshatin Plemetin, konkretisht objekti i Shtëpisë së Kulturës, i cili ishte në shfrytëzim pa bazë ligjore për më shumë se 25 vjet.
Sipas njoftimit të komunës, ky veprim shënon një hap të rëndësishëm drejt rikthimit të rendit ligjor dhe respektimit të së drejtës së pronës.
Aksioni është realizuar në përputhje të plotë me ligjet në fuqi, duke dëshmuar angazhimin e institucioneve komunale për zbatimin e ligjit dhe mbrojtjen e interesit publik.
Drejtoria e Inspekcionit thekson se do të vazhdojë trajtimin e të gjitha rasteve të uzurpimit të pronës, pa dallim, duke respektuar parimet e barazisë dhe sundimit të ligjit.
Ky aksion tregon përkushtimin institucional të Komunës së Obiliqit për forcimin e rendit juridik dhe garantimin e të drejtave pronësore për qytetarët. /Telegrafi/
Kryetari i Komunës së Podujevës, Shpejtim Bulliqi, ka emëruar Behram Latifin drejtor të Drejtorisë për Bujqësi, Pylltari dhe Zhvillim Rural.
Sipas njoftimit të komunës, Latifi ka përfunduar studimet në Fakultetin Juridik, drejtimi i përgjithshëm. Ai ka përvojë profesionale në sektorin publik, ku ka shërbyer si zyrtar ligjor dhe zyrtar ekzekutiv në Shërbimin Korrektues të Kosovës, si dhe në Inspektoratin e Punës, ku ka mbajtur disa pozita, përfshirë zyrtar të lartë për bashkëpunim profesional, ushtrues detyre i menaxherit të personelit dhe udhëheqës i Divizionit për Cilësi të Inspektimeve dhe Standardizim të Gjobave.
Po ashtu, Latifi ka përvojë edhe në sektorin privat, ku ka ushtruar detyra menaxheriale.
Kryetari Bulliqi i ka uruar Latifit suksese dhe punë të mbarë në detyrën e re, duke shprehur besimin se ai do të kontribuojë në zhvillimin e sektorit të bujqësisë, pylltarisë dhe zhvillimit rural në Komunën e Podujevës. /Telegrafi/
Drejtoria e Policisë së Kryeqytetit njofton se po vazhdon zbatimi i masave për rritjen e sigurisë në trafik.
Në kuadër të këtyre aktiviteteve, Njësiti i Trafikut të Kryeqytetit është duke realizuar shqiptimin e gjobave ndaj kundërvajtësve në bazë të monitorimit të kamerave të sigurisë.
Nga data 13.01.2026 deri më 19.01.2026 nga kjo njësi janë shqiptuar 1369 gjoba për kundërvajtje të ndryshme, përfshirë edhe përdorimin e telefonit mobil gjatë vozitjes, të cilat janë evidentuar nga kamerat e sigurisë apo gjatë zbatimit të detyrave të rregullta.
Me këtë rast, Policia e Kosovës u bën apel të gjithë shoferëve që të shmangin përdorimin e telefonit gjatë vozitjes dhe të respektojnë rregullat e trafikut rrugor, me qëllim të parandalimit të aksidenteve dhe ruajtjes së jetës së qytetarëve. /Telegrafi/
Në fshatin Nagavc të komunës së Rahovecit ndodhet një lis shumëvjeçar, i njohur nga banorët si “Lisi i Mujës”, i cili mbart një histori të veçantë dhe është futur në listën e objekteve nën mbrojtje nga Ministria e Mjedisit dhe Planifikimit Hapësinor që nga viti 2016.
Në pamje të parë, ky lis mund të duket i zakonshëm, por sipas banorëve të fshatit, ai është shumë i vjetër dhe nuk mbahet mend as nga paraardhësit e tyre.
Ata kanë treguar për Telegrafin se ndër vite lisi është shfrytëzuar edhe si pikë ndalese nga kalimtarë të shumtë, për shkak të kuriozitetit dhe veçantisë që ka.
Megjithatë, “Lisi i Mujës” ka nisur të dëmtohet si pasojë e proceseve natyrore, ndërsa një degë e tij tashmë është thyer. Banorët shprehin shqetësim se mungesa e mirëmbajtjes po e kthen këtë monument natyror në rrezik për fshatin.
Sipas banorit të Nagavcit, Sadat Gashi, lisi nuk është mirëmbajtur prej vitesh, ndonëse ndodhet nën mbrojtjen e Ministrisë së Kulturës.
Ai thekson se një nga degët e lisit gjendet mbi telat e rrymës elektrike dhe ekziston rreziku që të shembet në çdo moment, duke shkaktuar dëme materiale dhe duke rrezikuar dhjetëra shtëpi të fshatit.
Po ashtu, një pjesë e degëve shtrihen mbi rrugën kryesore të fshatit Nagavc, çka paraqet rrezik serioz për lëvizjen e qytetarëve dhe automjeteve.
Banorët kërkojnë ndërhyrje urgjente nga institucionet përgjegjëse, në mënyrë që të ruhet kjo vlerë natyrore, por njëkohësisht të garantohet siguria e qytetarëve. /Telegrafi/
Login
