BRUKSEL, 9 maj /ATSH-AA/ – Mijëra studentë dhe aktivistë të arsimit dolën në rrugët e Brukselit për të protestuar kundër reformave dhe shkurtimeve buxhetore që prekin arsimin në gjuhën frënge, ndërsa demonstrata u zgjerua teksa marshuesit lëviznin nëpër qendrën e qytetit.

Protesta nisi në Sheshin Poelaert pranë Pallatit të Drejtësisë, ku fillimisht u mblodhën mes 500 dhe 1.000 pjesëmarrës. Turma u rrit më pas ndërsa protestuesit marshuan drejt Stacionit Qendror të Brukselit përmes rrugës Regentschapsstraat dhe sheshit Koningsplein.

Policia tha se rreth 2.500 persona morën pjesë në demonstratë në kulmin e saj në Sheshin Poelaert.

Pjesëmarrësit shprehën kundërshtimin e tyre ndaj reformave arsimore të prezantuara nga qeveria e Komunitetit Francez dhe dënuan atë që e përshkruan si përdorim joproporcional të dhunës nga policia gjatë protestave të mëparshme.

Demonstrata mbeti kryesisht paqësore gjatë gjithë ditës në Sheshin Poelaert, me përjashtim të përdorimit të fishekzjarreve dhe mjeteve të tjera piroteknike.

Policia, e cila mbajti një distancë të konsiderueshme dhe nuk ndërhyri në asnjë moment gjatë protestës, njoftoi se nuk pati incidente të mëdha.

Më herët gjatë ditës, u raportuan tensione pranë Stacionit Qendror të Brukselit dhe zonës Mont des Arts përpara fillimit të demonstratës, ku disa biçikleta të përbashkëta dhe skuterë elektrikë u dogjën.

Pakënaqësia në sektorin e arsimit frëngjishtfolës mbetet e lartë pavarësisht miratimit të fundit të masave të kontestuara nga Parlamenti i Komunitetit Francez.

Kolektivi arsimor “Sulmet e Marsit” njoftoi planet për të vazhduar mobilizimin, me protesta dhe veprime të planifikuara çdo ditë gjatë dy javëve të ardhshme në qytete të ndryshme të Valonisë.   /os/

The post BRUKSEL – Mijëra persona protestojnë kundër politikave të reja arsimore appeared first on Agjencia Telegrafike Shqiptare.

TIRANË, 7 qershor/ATSH/ Qytetarë, përfaqësues të shoqërisë civile, ambientalistë po zhvillojnë pasditen e së dielës protestën e tetë kundër investimit të propozuar për Zvërnecin në Vlorë.

Marshimi nisi si çdo ditë në sheshin “Skënderbej” për të vijuar më pas marshimin përgjatë bulevardit “Dëshmorët e Kombit” drejt Kryeministrisë.

Edhe sot protestuesit mbajnë në duar parulla ku kërkohet anulimi i projektit, mbrojtja e natyrës si dhe dorëheqjen e kryeministrit Rama.

Me thirrjen “Shqipëria e re” protestuesit dëgjuan përfaqësues të tyre në foltoren e ngritur enkas për protestën.

Një përfaqësues i grupit koordinues të protestws vuri në dukje disa pika që kërkohen për zbatim, të cilat sipas tij janë minimaliste por thelbësore.

Protestuesi renditi kërkesat që kryeministri të mos ketë më shumë se dy mandate, kryeministri dhe ministrat të mos jenë më deputetë dhe kryetarë partish, pasi sipas tij, kreu i kuvendit është kukull dhe kryeministri ushtron të gjitha pushtetet.

Po ashtu, sipas tij, edhe Berisha është opozitë false që i shërben Ramës.

Protestuesit artikuluan edhe pretendime për mungesë vendimesh të drejta nga Drejtësia.

Me thirrjen “Shqipëria e shqiptarëve jo e tradhtarëve” fjalën e mori një përfaqësues nga komuniteti shqiptar në SHBA, i cili tha se pushteti në vitet ’90 u transferua në duart e atyre që e kishin pasur.

Ai i bëri thirrje që Rama dhe Berisha të kërkojnë falje dhe të japin llogari para drejtësisë.

Qytetarët kanë marrë fjalën njëri pas tjetrit pa protokoll po sipas dëshirës për jo më shumë se 3 minuta secili.

“Mos e lëshoni vendin, nuk është emigrimi zgjidhja, askush nuk është i lumtur në emigrim por në vendin e vet”, ishte mesazhi i një emigranteje nga Shkodra drejtuar të rinjve.

Analisti Fatos Lubonja iu drejtua protestuesve duke theksuar se në shesh janë nga shtresa e pozicione të ndryshme po i bashkon parulla “Shqipëria nuk është në shitje”.

“Kjo do të thotë se duam Shqipëri të re, jo të ndërtua nga krimi dhe oligarkët”, tha ai. “Kjo parullë mund të ishte edhe Shqipëria nuk është për t’u grabitur, se na kanë grabitur qytetet, parqet, plazhet. Na thonë se jemi kundër zhvillimit. Ne jemi kundër zhvillimit nga oligarkët për oligarkët”, tha ai.

Të rinj protestues me flamuj kuqezi e maska kanë vendosur në bulevard para Kryeministrisë edhe një gomone me mesazhe.

Një emigrant nga Zvicra bëri thirrje që protestuesit të ligjin besën në 10 qershor si Besëlidhja e Lezhës, pasi këta që janë sot në politikë, sipas tij, e kanë lidhur besën me të keqen.

“Ju nuk doni fjalën politikë në protestë, por gjithë këto rryma që mblidhen këtu duhet të bashkohen e të pastrojnë Shqipërinë”, tha ai.

Dy turistë italianë morën fjalën në protestë të thirrur nga aktivistët për të përcjellë mesazhin që turistët nuk janë trembur nga protestat. “E quajmë të rëndësishme të ngremë zërin për ambientin”, tha një prej tyre.

“Kam parë popull jashtëzakonisht krenar për vendin e tyre. Shqipëria e shqiptarëve”, tha turisti tjetër.

Në një moment ka ndodhur edhe që një fëmijë ka humbur mes turmës ku janë angazhuar të gjithë pjesëmarrësit për ta gjetur.

Fjalimet kanë  vijuar më pas me të rinj që thanë se janë në protestë pasi besojnë se vendin mund ta ndërtojnë vetëm ata dhe se tani është radha e tyre për të luftuar komunizmin.

Ashtu sikundër edhe në ditët e tjera të protestës, fëmijët kanë pasur këndin e tyre të vizatimit, ku kanë shprehur ndjesitë për ruajtjen e natyrës, zogjve dhe kafshëve.

Dita e tetë e protestës për Zvërnecin u mbyll rreth orës 20:00 ku qytetarët u ftuan të marshojnë në bulevard. Grupi koordinues përsëriti thirrjen për protestën e nesërme në orën 18:00 ndërsa u ra dakord për protestë kombëtare më 10 qershor.

1 nga 110

The post Dita e tetë e protestës për Zvërnecin në kryeqytet: Shqipëri e re appeared first on Agjencia Telegrafike Shqiptare.

TOLEDO, 7 qershor /ATSH – ANSA/ – Të shtëna me armë zjarri u regjistruan në qytetin e Toledos, në shtetin amerikan të Ohajos, pranë zonës ku po zhvillohej festivali Old West End Festival.

Sipas autoriteteve, disa persona u goditën nga plumbat.

Departamenti i Policisë së Toledos bëri të ditur se është në kërkim të autorit ose autorëve të dyshuar të përfshirë në ngjarje.

Të paktën 12 persona të plagosur janë transportuar në spitalet e zonës për të marrë trajtimin e nevojshëm mjekësor, njoftoi Policia e Toledos në një postim.

. Deri më tani nuk janë bërë publike informacione mbi gjendjen e tyre shëndetësore.

Policia u ka kërkuar qytetarëve të shmangin zonën ndërsa vijojnë hetimet.

I plagosuri më i ri është 14 vjeç, ndërsa më i moshuari 61 vjeç. Shumica e të lënduarve janë pak më shumë se 20 vjeç.

Autoritetet po punojnë mbi pistën se në ngjarje kanë qenë të përfshirë të paktën dy persona të armatosur, të cilët ka shumë të ngjarë të kenë qëlluar ndaj njëri-tjetrit, deklaroi zëvendësshefi i policisë, Joe Heffernan.

Guvernatori republikan i Ohajos, Mike DeWine, reagoi ndaj ngjarjes duke e cilësuar atë një krim të pakuptimtë.

“Festivalet verore duhet të jenë vende të sigurta ku familjet mund të kalojnë kohë së bashku pa frikën e dhunës”, shkroi ai në një postim në rrjetin social X. /os/

The post SHBA – Të shtëna me armë në Ohio, 12 të plagosur pranë një festivali appeared first on Agjencia Telegrafike Shqiptare.

ROMË, 6 qershor /ATSH/ – Programi Botëror i Ushqimit dhe Organizata e Kombeve të Bashkuara për Ushqimin dhe Bujqësinë paralajmërojnë se uria po përkeqësohet në disa nga rajonet më të prekura të botës, ndërsa konfliktet, krizat ekonomike dhe kushtet ekstreme klimatike vazhdojnë të rëndojnë situatën, sipas AP.

Sipas raportit të tyre më të fundit, zonat me rrezikun më të lartë përfshijnë pjesë të Sudan, Palestinës, Sudanin e Jugut, Haitin dhe Mali, ku miliona njerëz përballen me mungesa të rënda ushqimore.

Në Sudan, luftimet e vazhdueshme kanë shkaktuar zhvendosje masive të popullsisë dhe vështirësi të mëdha në shpërndarjen e ndihmave humanitare.

Agjencitë e OKB-së paralajmërojnë se situata mund të përkeqësohet edhe më tej në muajt e ardhshëm.

Raporti thekson gjithashtu se konfliktet në Lindjen e Mesme, përfshirë pasojat e luftës në Gaza, kanë rritur ndjeshëm pasigurinë ushqimore dhe varësinë nga ndihmat ndërkombëtare.

Ndërkohë, vende si Afganistani dhe Somalia vazhdojnë të përballen me kombinimin e varfërisë së thellë, thatësirave dhe mungesës së financimeve humanitare, duke vënë në rrezik miliona banorë.

OKB-ja u bën thirrje donatorëve ndërkombëtarë të rrisin urgjentisht mbështetjen financiare për programet e ndihmës, duke paralajmëruar se pa veprim të shpejtë, numri i njerëzve të përballur me uri akute mund të rritet ndjeshëm gjatë këtij viti. /Ad.Ab./

The post ROMË – OKB: Uria po përkeqësohet në pikat më të nxehta të botës appeared first on Agjencia Telegrafike Shqiptare.

NORMANDI, 6 qershor /ATSH- DPA/ -Sekretari amerikan i Shtetit, Pete Hegseth i bëri thirrje vendeve evropiane të marrin masa më të forta kundër emigracionit të paligjshëm, gjatë ceremonive për 82-vjetorin e zbarkimit aleat në Normandi, duke e krahasuar situatën aktuale me një “pushtim” të brigjeve evropiane.

Duke folur në varrezat ushtarake amerikane në Colleville-sur-Mer, sekretari i Mbrojtjes deklaroi se sot “plazhe të ndryshme europiane po sulmohen nga ideologji të rrezikshme”, duke iu referuar mbërritjes së emigrantëve me anije në vende si Spanja, Italia, Greqia dhe Bullgaria.

Hegseth pyeti se kur kryeqytetet europiane do të veprojnë ndaj asaj që ai e quajti “pushtim”, duke përsëritur argumentet e administratës së presidentit Donald Trump se emigracioni masiv përbën kërcënim për qytetërimin evropian.

Ai u kërkoi gjithashtu aleatëve evropianë të shtojnë kontributin e tyre në mbrojtje, duke theksuar se siguria dhe paqja mund të garantohen vetëm përmes forcës ushtarake dhe bashkëpunimit të ngushtë transatlantik.

“Amerika do të udhëheqë, por aleatët tanë duhet të jenë krah për krah me ne kur ka rëndësi”, tha Hegseth, duke nënvizuar se aleancat duhet të bazohen në veprime konkrete dhe sakrifica të përbashkëta, jo vetëm në deklarata politike.

Zbarkimi në  Normandi më 6 qershor 1944 ishte operacioni më i madh amfib në histori.

Mbi 132 mijë ushtarë aleatë nga SHBA-ja, Britania, Kanadaja dhe vende të tjera zbarkuan në brigjet franceze, duke i hapur rrugën çlirimit të Evropës Perëndimore nga Gjermania naziste. /Ad Ab./

The post NORMANDI – Hegseth u kërkon vendeve evropiane më shumë vendosmëri ndaj emigracionit appeared first on Agjencia Telegrafike Shqiptare.

LONDËR, 6 qershor /ATSH/ – Një valë e re influencuesish të shëndetit, përfshirë Dave Asprey, po e promovojnë nikotinën si një substancë me përfitime të mëdha për trurin dhe jetëgjatësinë, sipas Reuters.

Ata pretendojnë se nikotina mund të përmirësojë funksionin njohës, madje edhe të ndihmojë në kthimin mbrapsht të sëmundjeve si Alzheimeri.

Në rrjetet sociale, nikotina po paraqitet si një produkt “natyral”, duke u krahasuar me produkte të tjera alternative që shpesh kundërshtojnë mjekësinë tradicionale.

Figura publike si Jillian Michaels dhe Tucker Carlson kanë ndikuar në përhapjen e këtyre ideve.

Michaels ka deklaruar se përdor doza të ulëta nikotine për përqendrim dhe për mbrojtje të mundshme ndaj sëmundjeve neurodegjenerative, ndërsa Carlson i ka quajtur produktet me nikotinë si mjete që rrisin produktivitetin dhe energjinë. Këto deklarata kanë ndihmuar që nikotina të shihet nga disa si një suplement i dobishëm.

Megjithatë, ekspertët e shëndetit paralajmërojnë se këto pretendime janë të ekzagjeruara.

Studiues si Jeremiah Mock theksojnë se nikotina është një substancë aktive biologjikisht dhe mund të jetë e dëmshme. Ajo rrit tensionin e gjakut, ndikon në sistemin kardiovaskular dhe krijon varësi të fortë.

Paraqitja e saj si e padëmshme ose “shëruese” nuk përputhet me provat shkencore.

Disa influencues mbështeten në studime shkencore, si ato të Paul Newhouse, të cilat tregojnë se nikotina mund të përmirësojë përqendrimin në disa raste të veçanta, si tek personat me dëmtime të lehta njohëse.

Por edhe vetë studiuesit theksojnë se këto efekte janë të kufizuara dhe nuk justifikojnë pretendimet për parandalim apo trajtim të Alzheimerit ose Parkinsonit.

Ekspertë të tjerë si Jonathan Foulds dhe Adam Leventhal shpjegojnë se efekti i nikotinës është i përkohshëm. Ajo mund të rrisë vigjilencën në situata monotone, por nuk të bën më inteligjent apo më krijues. Me kalimin e kohës, trupi krijon tolerancë dhe rreziku i varësisë rritet. /Ad.Ab./

The post MJEKËSI – Nikotina promovohet si ndihmë për trurin, ekspertët paralajmërojnë për rreziqet appeared first on Agjencia Telegrafike Shqiptare.

PARIS, 6 qershor /ATSH-AFP/  – Ish-Zonja e Parë e Francës, Bernadette Chirak, ndërroi sot jete në moshën 93 vjeç

Presidenti francez Emmanuel Macron i bëri homazh sot  vejushës së ish-presidentit Jacques Chirac përmes një mesazhi në rrjetin social X.

“Një zonjë bujare na la. Kombi ndan dhimbjen me familjen e saj, të afërmit dhe të gjithë ata që e deshën”, shkroi Macron.

Bernadette Chirac gëzonte popullaritet të madh në Francë dhe ishte një këshilltare e rëndësishme e bashkëshortit të saj gjatë gjithë karrierës së tij të gjatë politike.

“Ajo është gruaja e jetës sime; së bashku kemi arritur kaq shumë”, kishte shkruar Jacques Chirac në kujtimet e tij.

Ai u nda nga jeta në vitin 2019, në moshën 86-vjeçare.

Bernadette Chirac mbetet deri më sot e vetmja Zonjë e Parë franceze që ka mbajtur edhe vetë një post politik.

Nga viti 1979 deri në vitin 2015 ajo ishte anëtare e këshillit të përgjithshëm të departamentit të Corrèze.

Çifti u njoh gjatë studimeve në “Sciences Po’,  një nga institucionet më prestigjioze të arsimit të lartë në Francë, dhe u martuan në vitin 1956. /Ad.Ab./

The post FRANCÊ – Bernadette Chirac, figura e njohur e politikës shuhet në moshën 93-vjeçare appeared first on Agjencia Telegrafike Shqiptare.

BEOGRAD, 4 qershor /ATSH-AA/ – Presidenti i Këshillit Evropian, Antonio Costa tha sot në Beograd se rruga e Serbisë drejt anëtarësimit në Bashkimin Evropian është e vështirë, por se drejtimi i udhëtimit është i qartë, duke thënë se autoritetet në Beograd duhet të përqendrohen në reforma, marrëdhënie të mira fqinjësore dhe harmonizim me politikat e BE-së, veçanërisht në politikat e jashtme dhe të sigurisë.

Pas takimit me presidentin serb, Aleksandar Vuçiq, Costa tha se vizita e tij përfaqëson një konfirmim të angazhimit të vazhdueshëm të BE-së ndaj perspektivës evropiane të Serbisë, duke theksuar se zgjerimi mbetet një nevojë gjeostrategjike për Evropën.

“Rruga përpara për Serbinë është e vështirë, por trajektorja është e qartë. Ne duhet të përqendrohemi në nxitjen e marrëdhënieve të fqinjësisë së mirë, harmonizimin me politikat e BE-së dhe zbatimin e reformave aktuale”, tha Costa. Ai përmendi dialogun midis Beogradit dhe Prishtinës si dhe zbatimin e Marrëveshjes së Ohrit, si momente kyçe kur bëhet fjalë për nxitjen e marrëdhënieve të fqinjësisë së mirë në rajon dhe procesin e pranimit në BE.

Ai i bëri thirrje Serbisë që të përshpejtojë aktivitetet në fushën e sundimit të ligjit, përfshirë zbatimin e rekomandimeve të Komisionit të Venecias në lidhje me gjyqësorin, si dhe masat që synojnë forcimin e lirive të medias dhe përzgjedhjen transparente të përbërjes së re të Autoritetit Rregullator për Median Elektronike (REM).

Costa theksoi nevojën për të reformuar legjislacionin zgjedhor në përputhje me rekomandimet e ODIHR-it para zgjedhjeve të ardhshme.

Ai tha se Bashkimi Evropian mbetet partneri më i rëndësishëm i Serbisë në fushat e tregtisë, investimeve dhe zhvillimit të institucioneve demokratike, por se shpejtësia e përparimit në rrugën evropiane varet nga vetë autoritetet serbe.

“Ne dëshirojmë dhe jemi të gatshëm të bëjmë më shumë, por duhet të jem i qartë – ritmi i progresit varet nga vendosmëria e Serbisë”, tha Costa.

“Dera e Bashkimit Evropian mbetet e hapur, por koha për veprim vendimtar është tani”, tha zyrtari evropian.   /os/

The post BEOGRAD – Costa pas takimit me Vuçiç: Rruga e Serbisë drejt BE-së është e vështirë por e qartë appeared first on Agjencia Telegrafike Shqiptare.

Arabia Saudite ka njoftuar përfundimin me sukses të sezonit të këtij viti të Haxhit, duke deklaruar se një sistem i integruar sigurie, organizimi dhe shërbimesh u mundësoi pelegrinëve të kryenin ritualet me lehtësi dhe qetësi, transmeton Anadolu.

Njoftimi u bë nga princi Saud bin Mishal bin Abdulaziz, zv/guvernator i rajonit të Mekës dhe zv/kryetar i Komitetit të Përhershëm për Haxhin dhe Umren, në një deklaratë televizive në prag të përfundimit të pelegrinazhit vjetor.

Princi Saud tha se sezoni i Haxhit 2026/1447 dëshmoi “një sistem të integruar sigurie, organizimi dhe shërbimesh” që u lejoi pelegrinëve të kryenin ritualet në mënyrë të qetë dhe të sigurt.

Ai theksoi se suksesi i Haxhit nuk shënon fundin e punës, por fillimin e përgjegjësive të reja, duke riafirmuar angazhimin e Arabisë Saudite për të ruajtur rolin e saj në shërbim të Islamit dhe muslimanëve.

Të martën, Autoriteti i Përgjithshëm i Statistikave i Arabisë Saudite tha se numri total i pelegrinëve këtë sezon arriti në 1.707.301, përfshirë 1.546.655 pelegrinë nga jashtë vendit që përfaqësonin 165 kombësi. 160.646 pelegrinë të tjerë kryen Haxhin brenda Arabisë Saudite.

Totali e tejkaloi shifrën e vitit të kaluar prej 1.673.230 pelegrinësh, por mbeti nën më shumë se 1.83 milion pelegrinë të regjistruar në vitin 2024. Sezoni vjetor i Haxhit përfundon të shtunën.

Ritualet e Haxhit nisën zyrtarisht të hënën me mbërritjen e pelegrinëve në Mina, në perëndim të Arabisë Saudite, mes shërbimeve dhe masave të gjera të sigurisë për lehtësimin e pelegrinazhit.   /os/

The post FOKUS – Arabia Saudite njofton përfundimin e Haxhit, 1.7 milion pelegrinë në 2026-ën appeared first on Agjencia Telegrafike Shqiptare.

VJENË, 20 maj /ATSH-ANSA/ – Kreu i agjencisë mbikëqyrëse bërthamore të OKB-së, Rafael Grossi, ka paralajmëruar se një sulm i drejtpërdrejtë ndaj centralit bërthamor Barakah në Emiratet e Bashkuara Arabe mund të çojë në pasoja të rënda radioaktive.

Duke folur në një seancë emergjente të Këshillit të Sigurimit të OKB-së pas një sulmi të fundit me dron ndaj objektit, Grossi tha se situata është shumë shqetësuese.

“Ky është një objekt bërthamor në Lindjen e Mesme, ku pasojat e një sulmi mund të jenë shumë serioze”, tha ai.

Grossi theksoi se centrali Barakah në Emiratin e Abu Dhabit, rreth 300 kilometra larg kryeqytetit me të njëjtin emër, është një objekt bërthamor funksional që përmban mijëra kilogramë material bërthamor, përfshirë karburant të ri dhe të përdorur.

“Në rast të një sulmi ndaj centralit bërthamor Barakah, një goditje direkte mund të rezultojë në një çlirim shumë të lartë të radioaktivitetit në mjedis”, tha ai.

Ai shtoi se dëmtimi i linjave të jashtme të furnizimit me energji elektrike mund të paraqesë gjithashtu rreziqe serioze, duke çuar potencialisht në dëmtimin e bërthamës së reaktorit.

Ai paralajmëroi më tej se të dy skenarët do të kërkonin masa emergjente mbrojtëse, përfshirë evakuime, strehim dhe përdorimin e jodit të qëndrueshëm në distanca që shtrihen deri në disa qindra kilometra.

Të dielën, zyrtarët e Emirateve të Bashkuara Arabe thanë se pranë centralit Barakah kishte shpërthyer një zjarr si pasojë e një sulmi me dron.

Zhvillimet vijnë teksa tensionet rajonale janë përshkallëzuar që kur SHBA-ja dhe Izraeli nisën sulme ndaj Iranit në shkurt. Teherani u kundërpërgjigj me sulme që synuan Izraelin, si dhe aleatët amerikanë në Gjirin Persik, përfshirë Emiratet e Bashkuara Arabe, së bashku me mbylljen e Ngushticës së Hormuzit.   /os/

The post VJENË – OKB paralajmëron për rrezik shumë të lartë të radioaktivitetit” në uzinën e EBA-s appeared first on Agjencia Telegrafike Shqiptare.

ABU DABI, 17 maj /ATSH/ – Një sulm me dron goditi sot centralin bërthamor “Barakah” në Emiratet e Bashkuara Arabe, duke shkaktuar zjarr në perimetrin e objektit dhe duke rritur frikën për rikthimin e luftës në rajon, sipas AP.

Autoritetet thanë se nuk pati viktima apo rrjedhje radioaktive, ndërsa armëpushimi mes Iranit dhe kundërshtarëve të tij mbetet i brishtë.

Askush nuk mori menjëherë përgjegjësinë për sulmin dhe Emiratet e Bashkuara Arabe nuk akuzuan drejtpërdrejt ndonjë palë.

Megjithatë, Abu Dabi ka deklaruar se Irani ka ndërmarrë ditët e fundit sulme me dronë dhe raketa, ndërsa tensionet janë përshkallëzuar për shkak të ngushticës së Hormuzit, një rrugë strategjike për tregtinë globale të energjisë.

Shtetet e Bashkuara të Amerikës vazhdojnë bllokadën ndaj porteve iraniane, ndërsa përpjekjet diplomatike për arritjen e një paqeje më të qëndrueshme kanë dështuar vazhdimisht.

Presidenti amerikan Donald Trump paralajmëroi se luftimet mund të rifillojnë, ndërsa televizioni shtetëror iranian ka transmetuar vazhdimisht pamje me prezantues të armatosur për të përgatitur opinionin publik për një konflikt të mundshëm.

Centrali “Barakah”, i ndërtuar me ndihmën e Koresë së Jugut dhe që hyri në funksion në vitin 2020, është i vetmi central bërthamor në botën arabe dhe furnizon rreth një të katërtën e nevojave energjetike të Emirateve.

Autoriteti bërthamor i Emirateve deklaroi se zjarri nuk ndikoi në sigurinë e centralit dhe se njësitë vazhdojnë të funksionojnë normalisht.

Agjencia Ndërkombëtare për Energjinë Atomike (IAEA) tha se sulmi shkaktoi zjarr në një gjenerator elektrik dhe se një nga reaktorët po furnizohej përkohësisht nga gjeneratorë rezervë me naftë.

Drejtori i përgjithshëm i IAEA-së, Rafael Mariano Grossi, shprehu “shqetësim të madh”, duke theksuar se çdo aktivitet ushtarak që rrezikon sigurinë bërthamore është i papranueshëm. /Ad.Ab./

The post EBA – Sulm me dron ndaj centralit bërthamor “Barakah”, rriten tensionet në rajon appeared first on Agjencia Telegrafike Shqiptare.

BERLIN, 15 maj /ATSH-AA/ – Gjenerali më i lartë i Gjermanisë paralajmëroi se Rusia po riarmatoset me shpejtësi dhe po krijon struktura të reja ushtarake për të sfiduar Perëndimin ushtarakisht deri në vitin 2029..

“Ne mund të shohim se Rusia po përgatitet të jetë e aftë të zhvillojë një luftë në shkallë të gjerë kundër Perëndimit”, tha gjenerali Carsten Breuer në një tubim katolik në Würzburg, duke shtuar se aleatët e NATO-s duhet të rrisin kapacitetet e tyre ushtarake.

Ai vuri në dukje se raportet më të fundit të inteligjencës tregojnë se Rusia po krijon garnizone të reja dhe se arsenali i saj i ri i armëve sugjeron se Moska dëshiron të jetë e aftë të zhvillojë një luftë të madhe kundër Perëndimit deri në vitin 2029.

“Kërcënimi është real dhe shumë i afërt”, tha Breuer, duke shtuar: “Si ushtar, unë po shikoj skenarin më të keq dhe po them se deri në vitin 2029 duhet të jemi gati. Duhet të jemi gati ta pengojmë Rusinë, në mënyrë që ajo as të mos e mendojë një gjë të tillë”.   /os/

The post BERLIN – Breuer: Rusia po përgatitet për luftë të madhe kundër Perëndimit deri në vitin 2029 appeared first on Agjencia Telegrafike Shqiptare.

TIRANË, 14 maj/ATSH/ Vijojnë punimet për rilindjen e Shkollës së Mesme të Bashkuar “Sotir Çapo” dhe ndërtimin e palestrës së re në Zharrëz, Patos.

Kryeministri Edi Rama solli pamje nga ky investim i Ministrisë së Arsimit dhe Bashkisë Patos duke vënë në dukje se ai do të garantojë kushte dinjitoze për nxënësit dhe mësuesit, me klasa të reja, laboratorë modernë, bibliotekë dhe terrene sportive.

Rama theksoi se janë 42 shkolla në të gjithë vendin që do të rikonstruktohen me standarde bashkëkohore brenda këtij viti.

Infrastruktura arsimore si kompenent i rëndësishëm i mësimdhënies është në focus të politikave të Ministrisë së Arsimit.

The post Drejt përfundimit rikonstruksioni i Shkollës së Mesme të Bashkuar “Sotir Çapo” në Zharrëz appeared first on Agjencia Telegrafike Shqiptare.

PRISHTINË, 14 maj/ATSH/ Kandidati i Lëvizjes Vetëvendosje për deputet nga komuna e Skenderajt, Hysni Mehani, po pretendon se është sulmuar fizikisht nga kryetari i kësaj komune, Sami Lushtaku.

Mehani përmes një shkrimi në Facebook të bërë në llogarinë e ish-kandidatit të VV-së për asamble në Skenderaj, Bahri Zabeli, pretendon se Lushtaku ia ka marrë edhe telefonin personal.

“Te dashur miq jam sulmuar nga Sami Lushtaku dhe banda e tij. Telefonin personal ma kanë marrë. Lus policinë të mbroj familjen time dhe ftoj familjaret për përmbajtje”, thuhet në postimin e profilit të Zabelit, që në fund mban njoftimin se është bërë nga Mehani, transmeton KosovaPress.

Ish-deputetja e Lëvizjes Vetëvendosje, Arjeta Fejza, tha se ka qenë dëshmitare okulare e ngjarjes. Sipas saj, Mehani është sulmuar fizikisht nga kryetari i Skenderajt, Sami Lushtaku.

Fejza, nga ambientet e spitalit ku po trajtohet Mehani, tha se ngjarja ka ndodhur, derisa ata po qëndronin në një kafeteri në qendër të Skenderajt.

“Ishim në kafe pa asnjë lloj komunikimi paraprak me zotëri Lushtakun. Ai u afrua dhe e sulmoi zëvendësministrin Mehani. Fillimisht me telefon, pastaj me dorë, pastaj edhe me gotë, siç keni pasur mundësinë me pa edhe dëmin, të cilin e ka në fytyrën e tij. Kur sekretari i qendrës sonë, Bardh Zabeli tentoi të ndërhyjë për ta qetësuar situatën, me i nda pak, mos të vazhdojë ajo përplasja fizike, ai u sulmua edhe nga disa persona të tjerë përreth, të cilët unë nuk i di se kush janë, as nuk i njoh, por ishin bashkë me zotëri Lushtakun në atë moment”, tha Fejza.

Ajo e cilësoi rastin si sulm ndaj demokracisë dhe kërkoi reagim nga organet kompetente.

Pas pretendimeve të LVV, kryetari i Skenderajt, Sami Lushtaku, reagoi duke thënë se pushteti i Albin Kurtit përmes mekanizmave të tij ka tentuar që ta sulmojë atë sot në Skenderaj.

“Pushteti i Albin Kurtit përmes mekanizmave të tij tentoi që sot të më sulmoj në Skenderaj. E kam një jetë në shërbim të vendit kurse etiketat si ‘Sami Serbia’ qytetarët nuk i tolerojnë më prandaj edhe reaguan”, shkroi Lushtaku,

Kryeministri në detyrë, Albin Kurti dënoi ashpër sulmin ndaj zëvendësministrit të Financave, Hysni Mehani.

Kurti në mbledhjen e qeverisë tha se veprimet e tilla nuk i trembin dhe nuk i shtyjnë të tërhiqen nga gara politike në asnjë qytet.

Pas sulmit ndaj zëvendësministrit të Financave, Hysni Mehani ka reaguar edhe Lidhja Demokratike e Kosovës, e cila ka dënuar dhunën e sotme politike, duke shprehur shqetësime për klimën e rrezikshme të gjuhës së urrejtjes, kërcënimeve dhe terrorit digjital.

Sipas Lidhjes Demokratike të Kosovës mospajtimet politike duhet të mbeten gjithmonë brenda normave demokratike, institucionale dhe qytetare.

The post Kandidati i VV-së për deputet, Hysni Mehani pretendon se u sulmua nga kryetari i komunës së Skenderajt, Sami Lushtaku appeared first on Agjencia Telegrafike Shqiptare.

TIRANË, 14 maj/ATSH/ Komuniteti i banorëve që jetojnë në rrugën e Balshajve do të kenë shumë shpejt një zonë të rikualifikuar, që do të plotësojë kërkesat e tyre për urbanizimin dhe zhvillimin e saj.

Gjatë inspektimit të investimeve në Kodër–Kamzë, kryetarja e komanduar e bashkisë së Tiranës, Anuela Ristani, tha se përmes realizimit të këtij projekti janë krijuar hapësira më të sigurta për banorët, duke i dhënë fund përmbytjeve në këtë zonë.

“Jemi këtu tek zona e qymyrmbajtëses në Kodër-Kamzë, një zonë e cila ka qenë komplet informale, që nga kanalizimet deri tek çdo lloj elementi tjetër i sigurisë në rrugë. Tani, jo vetëm që janë bërë të gjithë sistemimet e përmbytjeve që ndodhnin shpesh, pasi kolektori duhej bërë nga fillimi, por ka të gjithë elementët e sigurisë rrugore. Elementë që për fat të keq, nuk ndodhen në të gjithë lagjet tona, por për çdo investim të ri, jemi kujdesur që të ekzistojnë”, deklaroi Ristani.

Për kryetaren e komanduar të bashkisë së Tiranës kjo ndërhyrje është një investim shumë i madh, pasi janë rreth 2000 metra rrugë, 1500 të tilla janë vetëm sipërfaqe e trotuareve dhe pjesa tjetër është pjesa e makinave.

“Jemi duke sistemuar edhe qarkullimin e të gjithë segmenteve, sepse bëhet fjalë për disa blloqe ndërtesash, ku kalimi do të bëhet një herë nga njëri krah për njërin dhe nga njëri krah për tjetrin, në mënyrë që të mos pengohen më pas edhe kalimet në trotuar dhe të mos pengojmë edhe rrugën për qarkullim”, tha Ristani.

Më tej, ajo theksoi se ky investim ndikon direkt në përmirësimin e cilësisë së jetesës në periferi të Tiranës.

“Ky është një nga disa investime që ka njësia administrative nr. 11, për të rehabilituar jo vetëm atë që është një infrastrukturë shumë e rënduar, – për shkak të gjithë zhvillimit që është bërë pa “shtyllën kurrizore” të rrjetit rrugor dhe sistemimit të ujërave të bardha e të zeza -, por edhe për të rritur cilësinë dhe ndërgjegjësimin e komunitetit, në mënyrën si komunikojmë, në mënyrën si i japim hapësirë njeri-tjetrit dhe në mënyrën si ndajmë hapësirën e përbashkët”, përfundoi Ristani.

Projekti synon transformimin e plotë të infrastrukturës në një nga zonat veri-perëndimore të Tiranës, e kufizuar nga rrugët “Kastriotët”, “Ali Ibra” dhe “Hasan Vathi”.

Ndërhyrja përfshin rikonstruksionin e plotë të rrjetit rrugor, ndërtimin e trotuareve të reja, kanalizimet e ujërave të ndotura dhe të shiut, vendosjen e ndriçuesve LED, sinjalistikën rrugore vertikale dhe horizontale, si dhe gjelbërimin dhe arredimin urban me pemë dekorative, stola, kosha mbeturinash dhe parkime biçikletash.

Ky investim synon përmirësimin e cilësisë së jetës së banorëve, rritjen e sigurisë dhe aksesit, si dhe ofrimin e standardeve bashkëkohore të shërbimeve publike në zonë.

/k.s/a.f/

The post Investimet në Kodër-Kamzë, Ristani: I japim fund përmbytjeve dhe mungesës së infrastrukturës appeared first on Agjencia Telegrafike Shqiptare.

MOSKË, 13 maj /ATSH-ANSA/ – Për të ruajtur sigurinë publike dhe për të parandaluar përhapjen e informacionit të rremë, administrata ruse ka ndaluar shpërndarjen e teksteve, fotove dhe videove që përshkruajnë pasojat e sulmeve me dronë ukrainasë dhe sulmeve terroriste.

Kjo është sipas një deklarate të publikuar në faqen e internetit të kryetarit të bashkisë së kryeqytetit rus.

“Për të siguruar sigurinë publike, Moska vendos kufizime në publikimin e teksteve, fotove dhe videove që përshkruajnë pasojat e sulmeve terroriste, përfshirë sulmet me dronë”, thuhet në deklaratë.   /os/

The post RUSI – Moska ndalon publikimin e informacionit, fotove dhe videove të sulmeve me dronë appeared first on Agjencia Telegrafike Shqiptare.

TIRANË, 10 maj /ATSH/- Për 12 ditët e ardhshme, vëmendja e botës së kinemasë do të jetë e përqendruar në Festivalin e Filmit në Kanë, raportoi AP.

Ngjarja e madhe e njohur, në rivierën franceze të Côte d’Azur, nis të martën dhe do të sjellë një sërë premierash të shumëpritura, me shfaqjen e yjeve ne tapetin e kuq dhe prezantimit të filmave më të përfolur të vitit.

Këtë vit, studiot e Hollivudit janë më të tërhequra, por festivali mbetet prej më shumë se 78 vitesh një nga skenat më prestigjioze të kinemasë botërore.

Edicioni i kaluar përfshiu filma të nominuar për çmim “Oscar” si “Sentimental Value”, “The Secret Agent” dhe “It Was Just an Accident”.

Edhe këtë vit, pritet që disa prej premierave të shndërrohen në pretendentë për çmimet më të mëdha të industrisë.

Në vitet e fundit, filma si “Parasite” dhe “Anora” janë prezantuar fillimisht në Festivalin e Filmit në Kanë, përpara se të triumfonin në çmimet “Oscar”.

Juria, që do të vendosë për çmimin kryesor “Palma e Artë”, këtë vit drejtohet nga regjisori koreano-jugor Park Chan-wook.

Në ceremoninë e hapjes, festivali do t’i akordojë gjithashtu “Palmën e Artë të Nderit” regjisorit Peter Jackson, ndërsa më vonë një çmim të ngjashëm do të marrë edhe Barbra Streisand.

Mes projekteve më të pritura është edhe sezoni i katërt i serialit “The White Lotus” të HBO-së, i cili është zhvendosur në Croisette për xhirime.

Filmat që pritet të spikasin në festival:

“Hope”

Regjisori Na Hong-jin, më pak i njohur ndër emrat e mëdhenj të kinemasë koreane, pritet të ketë një moment të rëndësishëm, në Kanë me projektin e tij më të ri.

Filmi është një thriller fantastiko-shkencor, i zhvilluar prej kohësh, të cilin drejtori artistik i festivalit Thierry Frémaux e ka përshkruar si një vepër që “ndryshon vazhdimisht zhanër”.

Kasti përfshin një përzierje aktorësh koreano-jugorë dhe yje të Hollivudit, mes tyre Hwang Jung-min, Zo In-sung, Jung Ho-yeon, Michael Fassbender, Alicia Vikander dhe Taylor Russell.

“Paper Tiger”

Edhe pse fillimisht nuk ishte pjesë e listës zyrtare të konkurrimit, drama e re e James Gray, e vendosur në Queens, është shtuar më vonë në program dhe është kthyer menjëherë në një nga filmat amerikanë më të përfolur të festivalit.

Gray, i njohur për filmat “Armageddon Time” dhe “The Immigrant”, trajton historinë e dy vëllezërve (Adam Driver dhe Miles Teller) që përfshihen në rrjetin e mafies ruse. Në kast është edhe Scarlett Johansson.

“Fjord”

Regjisori rumun Cristian Mungiu, fitues i Palmës së Artë për “4 Months, 3 Weeks and 2 Days” dhe autori i “R.M.N.”, rikthehet me një dramë të re evropiane.

Filmi ndjek historinë e një çifti rumuno-norvegjez (Sebastian Stan dhe Renate Reinsve) që zhvendosen në qytetin e izoluar të origjinës së bashkëshortes në Norvegji.

“Teenage Sex and Death at Camp Miasma”

Jane Schoenbrun, një nga zërat më të veçantë të kinemasë së re amerikane pas “I Saw the TV Glow” dhe “We’re All Going to the World’s Fair”, vjen në një nga garat kryesore të Festivalit të Filmit në Kanë.

Filmi i ri, me Hannah Einbinder dhe Gillian Anderson, trajton procesin e realizimit të një filmi slasher.

“Fatherland”

Regjisori polak Paweł Pawlikowski, i njohur për “Ida” dhe “Cold War”, sjell një tjetër dramë në stilin e tij karakteristik bardhezi.

Filmi paraqet shkrimtarin gjerman Thomas Mann (Hanns Zischler) në një udhëtim pas Luftës së Dytë Botërore, i shoqëruar nga vajza e tij (Sandra Hüller).

“All of a Sudden”

Regjisori japonez Ryusuke Hamaguchi bën debutimin e tij në gjuhën frënge, pas suksesit të “Drive My Car” dhe “Evil Does Not Exist”.

Filmi, me Virginie Efira dhe Tao Okamoto, paraqet historinë e një drejtoreshe të shtëpisë së pleqve dhe një dramaturg japonez në fazë terminale të sëmundjes.

“Sheep in the Box”

Regjisori Hirokazu Kore-eda, fitues i Palmës së Artë për “Shoplifters”, prezanton një histori (shkencë dhe fiction) të ngrohtë dhe emocionale.

Filmi tregon një çift që, pas humbjes së djalit të tyre, adopton një robot humanoid foshnje.

“The Man I Love”

Ira Sachs sjell një dramë të re amerikane me Rami Malek në rolin e një aktori në Nju Jorkun e viteve 1980, i cili përballet me një sëmundje kërcënuese për jetën ndërsa përgatitet për rolin e tij të fundit.

“The Unknown”

Regjisori francez Arthur Harari, bashkautor i “Anatomy of a Fall”, rikthehet me një histori misterioze të një fotografeje (Léa Seydoux) që, pas një fotografie në një festë, zgjohet në trupin e një gruaje tjetër.

“Minotaur “

Regjisori rus Andrey Zvyagintsev, i njohur për “Leviathan” dhe “Loveless”, kthehet në Kanë – me një dramë rreth një ekzekutiv biznesi në krizë në Rusinë rurale, pas një përvoje pranë vdekjes gjatë pandemisë.

“John Lennon: The Last Interview”

Dokumentari i Steven Soderbergh për intervistën e fundit të John Lennon, zhvilluar në Dakota në Nju Jork pak para vrasjes së tij, ka tërhequr vëmendje për përdorimin e inteligjencës artificiale për të ilustruar reflektimet filozofike të artistit.

Filmi do të shfaqet si projekt special në festival.

“Bitter Christmas”

Pedro Almodóvar rikthehet në Kanë me një dramë për kinemanë, dhimbjen dhe plakjen.

Pas debutimit në gjuhën angleze me “The Room Next Door”, regjisori spanjoll kthehet në gjuhën e tij amtare me një nga projektet e tij më personale. //a.i/

The post Festivali i Filmit në Kanë: Filmat kryesorë që pritet të dominojnë spektaklin appeared first on Agjencia Telegrafike Shqiptare.

TIRANË, 9 maj/ATSH/ Ekspozita e hapur sot me titullin “ATSH – Një rrugëtim në historinë e lajmit shqiptar” nuk është thjesht një rikthim në të kaluarën, por një përpjekje për të kuptuar se si është ndërtuar informacioni publik në Shqipëri, dhe se si ai ka diktuar mënyrën që shoqëria ka parë dhe kuptuar realitetin.

Kështu u shpreh drejtoresha e përgjithshme e ATSH-së Valbona Zhupa në fjalën përshëndetëse në hapjen e ekspozitës, që mblodhi në mjediset e Kalasë së Tiranës dashamirës të shumtë, profesionistë të medias dhe gazetarë.

“Nëpërmjet kësaj ekspozite kemi dashur të rikthejmë jo vetëm ngjarjet, por edhe atmosferën e epokave të ndryshme: gjurmët e makinave të para të transmetimit, fotografitë bardhezi të dala nga laboratorët, radiostacionet e hershme, buletinet e shtypura me urgjencë, kamerat, negativët, telegrafët, newsroom-et dhe njerëzit që kanë qenë pas lajmit”, theksoi Zhupa.

Ajo informoi se përmes materialeve arkivore të Agjencisë Telegrafike Shqiptare, në bashkëpunim me Drejtorinë e Përgjithshme të Arkivave, janë sjellë fotografi dhe materiale të papublikuara më parë.

“Nga dokumentet e para të shtypit shqiptar, te krijimi i ATSH-së si institucioni qendror i lajmit, kjo ekspozitë sjell fragmente të historisë së informacionit në Shqipëri përmes fotografive, dokumenteve dhe dëshmive arkivore që kanë shoqëruar momentet më të rëndësishme të vendit”, vuri në dukje drejtoresha e përgjithshme e ATSH-së.

Sipas saj, mes materialeve të ekspozuara gjenden marrëveshje historike të ATSH-së me agjenci ndërkombëtare, ligji i shtypit i vitit 1931, dokumente mbi transmetimin e lajmit në periudha lufte, fotografi të gazetarëve në terren, si edhe materiale që pasqyrojnë zhvillimin e organizimit institucional të lajmit ndër vite.

Po ashtu, Zhupa vlerësoi se ekspozita është gjithashtu një homazh për njerëzit që e kanë ndërtuar ATSH-në ndër dekada.

“Nga Mihal Sherko dhe drejtuesit e parë të agjencisë, te gazetarët, fotoreporterët, redaktorët, përkthyesit, teknikët dhe arkivistët – secili prej tyre ka lënë një gjurmë në historinë e informacionit shqiptar”, theksoi ajo.

Në këtë rrugëtim, një vend të veçantë zë puna e fotoreporterëve të ATSH-së.

“Si kronikanë të kohës, ata kanë qenë dëshmitarë në ngjarje politike, në transformime sociale, në përditshmëri, në festa, në jetën politike, sociale ekonomike të vendit, në kohë krize e në ndryshime epokash. Shumë prej imazheve që sot i konsiderojmë pjesë të memories kolektive të shqiptarëve, kanë kaluar fillimisht përmes objektivit të tyre”, vlerësoi Zhupa.

Një dimension tjetër i rëndësishëm i ekspozitës është edhe teknologjia, sepse historia e lajmit është edhe historia e mënyrës se si ai ka udhëtuar.

“Nga transmetimet e para me telegraf, tek radioja, televizioni dhe platformat digjitale të sotme, informacioni ka ndryshuar vazhdimisht formë, shpejtësi dhe ndikim. Bashkë me të, ka ndryshuar edhe mënyra si njerëzit e kanë kuptuar botën përreth”, theksoi ajo.

Duke u kthyer serisht tek arkivi i ATSH-së, Zhupa përmendi se më në fund ka nisur procesi e digjitalizimit.

“Ky fond përfshin mbi 300 mijë fotografi dhe negativë filmikë, mes tyre dhe materiale të hershme në xham, që sot po digjitalizohen për t’u ruajtur dhe bërë më të aksesueshme për publikun dhe brezat që vijnë”, theksoi ajo.

“Në një kohë kur gjithçka qarkullon me shpejtësi dhe rrezikon të humbasë po aq shpejt, ruajtja e arkivës mbetet një mënyrë për të mos lejuar harresën. Siç shkruante Milan Kundera: “Lufta e njeriut kundër pushtetit është lufta e kujtesës kundër harresës””, vuri në dukje Zhupa.

“Nuk është rastësi që kjo ekspozitë hapet më 9 maj, në Ditën e Evropës, një ditë që na kujton se informimi i lirë dhe i besueshëm është themeli i çdo shoqërie demokratike”, përfundoi drejtoresha e përgjithshme e ATSH-së, Valbona Zhupa.

/r.e/

The post Zhupa: Arkivi i ATSH-së pjesë e memories kolektive të shqiptarëve, kemi nisur digjitalizimin appeared first on Agjencia Telegrafike Shqiptare.

MOSKË, 8 maj /ATSH-AA/ – Operacionet në 13 aeroporte në jug të Rusisë u pezulluan sot përkohësisht pasi sulmet me dronë goditën ndërtesën administrative të degës së Navigimit Ajror të Rusisë Jugore në Rostov-on-Don, tha Ministria ruse e Transportit.

Në një deklaratë të postuar në Telegram, ministria tha se procedurat e kontrollit të trafikut ajror në jug të Rusisë jugore po përshtateshin pas sulmit. “Personeli është i sigurt dhe autoritetet po vlerësojnë funksionalitetin e pajisjeve”, tha ministria.

Operacionet e aeroportit u pezulluan në Astrakhan, Vladikavkaz, Volgograd, Gelendzhik, Grozny, Krasnodar, Makhachkala, Magas, Mineralnye Vody, Nalchik, Sochi, Stavropol dhe Elista.

Rusia dhe Ukraina shkëmbyen akuza sot për shkelje të dyshuara të një armëpushimi dy-ditor të shpallur nga Moska që përkon me përkujtimet e Ditës së Fitores në Rusi më 9 maj.

Presidenti ukrainas, Volodymyr Zelenskyy tha se Rusia kishte nisur më shumë se 850 sulme me dronë ndërsa Ministria e Mbrojtjes e Rusisë tha se kishte regjistruar 1.365 shkelje të armëpushimit.

Ministria e Mbrojtjes e Rusisë njoftoi të hënën se do të zbatonte një armëpushim më 8-9 maj gjatë festimeve të Ditës së Fitores dhe shprehu shpresën se Ukraina do të ndiqte të njëjtën gjë.

Më vonë atë ditë, Zelenskyy tha se Kievi d

The post MOSKË – Sulmet ukrainase me dronë ndërpresin operacionet në 13 aeroporte në jug të Rusisë appeared first on Agjencia Telegrafike Shqiptare.

KIEV/BAKU, 25 prill /ATSH– DPA/ – Ukraina dhe Azerbajxhani ranë dakord për thellimin e bashkëpunimit ushtarak gjatë vizitës së presidentit ukrainas Volodymyr Zelensky në Baku.

“Gjashtë dokumente u nënshkruan”, njoftoi presidenti Zelensky në rrjetin X pas takimit me presidentin Ilham Aliyev në kryeqytetin azerbajxhanas.

“Çelësi qëndron në kompleksin e armatimeve. Ne do të zgjerojmë dhe thellojmë bashkëpunimin tonë”  tha Zelensky, pa dhënë detaje të mëtejshme.

Në fillim të vizitës, Zekensky u takua me specialistë ukrainas të luftës me dronë, të cilët prezantuan përvojën e tyre para palës azerbajxhanase.

Ukraina ka nënshkruar më herët marrëveshje të ngjashme me vende të Lindjes së Mesme, duke u bazuar në përvojën e saj në përballjen me dronë të dizajnit rus dhe iranian.

Disa vende të Gjirit janë goditur nga dronë iranianë gjatë konfliktit aktual me Iranin.

Nën udhëheqjen e Aliyevit, Azerbajxhani ka ofruar mbështetje për Ukrainën në përballjen me pushtimin rus dhe është një furnizues i rëndësishëm nafte, me shkëmbime tregtare vjetore që arrijnë rreth 500 milionë dollarë.

Presidenti Aliyev tha se synimi është rritja e mëtejshme e tregtisë mes dy vendeve. Azerbajxhani, një ish-republikë sovjetike e pasur me naftë, ka ndjekur një linjë gjithnjë e më të pavarur në marrëdhëniet me Moskën. /Ad.Ab./

The post FOKUS – Ukraina dhe Azerbajxhani bien dakord për bashkëpunim ushtarak dhe rritje të tregtisë appeared first on Agjencia Telegrafike Shqiptare.