TIRANË, 10 korrik /ATSH/ Në një nga ngjarjet më prestigjioze globale të teknologjisë dhe inovacionit, në ceremoninë e ndarjes së çmimeve “WSIS Prizes 2025” që u mbajt në Gjenevë të Zvicrës, drejtoresha e Përgjithshme e AKSHI-t, Mirlinda Karçanaj, tërhoqi çmimin në emër të Shqipërisë.

Projekti fitues i mundësuar nga inteligjenca artificiale ishte ai me titull “Harmonizimi i Legjislacionit Shqiptar me Acquis të BE-së”.

Drejtoresha e Agjencisë Kombëtare të Shoqërisë së Informacionit u shpreh se ajo që nisi nga vullneti i Kryeministrit për të përshpejtuar procesin e integrimit të Shqipërisë në BE, sot është konkretizuar në këtë modul inovativ që bën të mundur: përkthimin me saktësi mbi 95% dhe përafrimin me AI të legjislacionit kombëtar me atë evropian, krahasimin me AI për mbivendosje apo kontradikta të akteve në proces përafrimi dhe krijimin automatik të tabelave të përputhshmërisë.

“Çka më parë kërkonte muaj të tërë pune manuale, sot realizohet për pak minuta”, thotë Karçanaj në një postim në rrjetet sociale.

Drejtuesja e AKSHI-t tha se si bashkënegociatore e Kapitullit 10 “Transformimi Digjital dhe Media”, ky çmim është një moment krenarie të dyfishtë për të.

“Modeli i inteligjencës artificiale që mori këtë vlerësim është ideuar që në krye të herës nga Kryeministri Edi Rama, me një qëllim të qartë: përshpejtimin e procesit të integrimit të Shqipërisë në Bashkimin Evropian. Përkthimi i legjislacionit që realizohet me saktësi mbi 95% dhe krijimi automatik i tabelave të përputhshmërisë kanë reduktuar ndjeshëm kohën dhe punën e strukturave tona të integrimit. Ajo që më parë kërkonte muaj pune, tani realizohet shumë shpejt, në vetëm pak minuta, me shumë saktësi, me shumë integritet. Ky është një shembull konkret se si inovacioni dhe vizioni na ndihmojnë të jemi më pranë Bashkimit Evropian”, u shpreh Karçanaj.

/e.i/j.p/

The post Karçanaj: Shqipëria, nënkampione bote në kategorinë e-Government appeared first on Agjencia Telegrafike Shqiptare.

TIRANË, 19 qershor /ATSH/ Vijon bashkëpunimi i ngushtë mes Policisë së Shtetit dhe autoriteteve ligjzbatuese të Emirateve të Bashkuara Arabe, në kuadër të operacioneve për lokalizimin, kapjen dhe ekstradimin e shtetasve shqiptarë të shpallur në kërkim ndërkombëtar.

Tre shtetas shqiptarë, të cilët ishin shpallur në kërkim ndërkombëtar nga Gjykata e Posaçme kundër Korrupsionit dhe Krimit të Organizuar (GjKKO), janë ekstraduar nga Dubai drejt Shqipërisë. Ata akuzohen për përfshirje në ngjarje të rënda kriminale kundër personit dhe përkrahje të një shtetasi të shumëkërkuar.

Ekstradimi u bë i mundur pas shkëmbimit të informacioneve mes strukturave të specializuara të Policisë së Shtetit dhe Policisë së Dubait, në kuadër të operacionit ndërkombëtar të koduar “The Wanted”, si dhe në bashkëpunim me Interpol Tiranën dhe Interpol Abu Dhabin.

Shtetasit e ekstraduar janë:

E. D., 38 vjeç, ndaj të cilit GjKKO ka caktuar masën e sigurisë “arrest në burg” për veprat penale “Vrasja me paramendim” (mbetur në tentativë), “Sigurimi i kushteve dhe i mjeteve materiale për të kryer vrasje”, “Mbajtja pa leje e armëve” dhe “Përkrahja e autorit të krimit”, kryer në kuadër të një grupi të strukturuar kriminal;

M. K., 39 vjeç, i akuzuar për “Vrasje me paramendim” për interes dhe hakmarrje, “Sigurimi i kushteve dhe i mjeteve materiale për të kryer vrasje”, “Përkrahja e autorit të krimit” dhe “Mbajtja pa leje e armëve”, gjithashtu pjesë e një grupi të strukturuar kriminal;

A. Xh., 40 vjeç, i cili akuzohet për veprën penale “Përkrahja e autorit të krimit”, e kryer në kuadër të një grupi të strukturuar kriminal.

Pas mbërritjes në Shqipëri, tre shtetasit iu dorëzuan Drejtorisë së Përgjithshme të Burgjeve për ekzekutimin e vendimeve përkatëse të GjKKO-së. /a.f/

The post Ekstradohen nga Dubai tre shtetas shqiptarë të kërkuar për ngjarje të rënda kriminale appeared first on Agjencia Telegrafike Shqiptare.

TIRANË, 31 maj /ATSH/ Ministri i Ekonomisë, Kulturës dhe Inovacionit, Blendi Gonxhja priti sot në një takim miqësor, ministrin për Administratën Publike të Malit të Zi, Marash Dukaj, së bashku me Sekretarin e Shtetit, Naim Gjokaj.

Në një postim në rrjetet sociale, ministrit Gonxhja, duke ndarë foto nga takimi bëb të dotur se u diskutua mbi mundësinë e shkëmbimit të përvojës ndërmjet dy ministrive në fushat prioritare të inovacionit dhe inteligjencës artificiale, si pjesë thelbësore e agjendave qeveritare.

“Në fokus ishte koordinimi i një takimi të ardhshëm në Tiranë, për të ndarë ide mbi përshtatjen e programeve të inovacionit mes dy vendeve, në funksion të planit të ri të veprimit, me të cilin Shqipëria synon të bëhet qendër evropiane për AI të gjelbër dhe inovacion të qëndrueshëm”, tha Gonxhja në një postim në rrjetet sociale.

Nga takimi i ministrit të MEKI-t, Blendi Gonxhja me ministrin për Administratën Publike të M...

1 nga 10

The post Gonxhja: Bashkëpunim në inovacion dhe IA me Malin e Zi appeared first on Agjencia Telegrafike Shqiptare.

TIRANË, 8 maj /ATSH/ Tre shtetas shqiptarë, të përfshirë në ngjarje të rënda kriminale dhe bashkëpunëtorë të të shumëkërkuarit Talo Çela, janë arrestuar në Dubai si rezultat i një operacioni të përbashkët mes Policisë së Shtetit dhe autoriteteve të Emirateve të Bashkuara Arabe, të koordinuar nga Interpol Tirana. Arrestimet u kryen në kuadër të 3 fazave të tjera të operacionit ndërkombëtar “The Wanted”.

Konkretisht, sipas policisë “u kapën shtetasit: E. D., 38 vjeç, të cilit GjKKO, në vitin 2024, i ka caktuar masën e sigurisë “Arrest në burg”, për veprat penale “Vrasja me paramendim”, mbetur në tentativë, “Sigurimi i kushteve dhe i mjeteve materiale për të kryer vrasje”, “Mbajtja pa leje dhe prodhimi i armëve, armëve shpërthyese dhe i municionit” dhe “Përkrahja e autorit të krimit”, kryer në kuadrin e grupit të strukturuar kriminal.

“Ai akuzohet se: ka informuar shtetasit që kanë tentuar të vrasin shtetasin K. P., në lidhje me lëvizjet e tij; ka siguruar kushtet/mjetet për vrasjen e shtetasit A. S.; ka strehuar, ka transportuar dhe i ka siguruar kushtet e nevojshme për jetesë, shtetasit të shumëkërkuar T. Ç”, njoftoi policia.

Në pranga ka rënë edhe “M. K., 39 vjeç, të cilit GjKKO, në vitin 2024, i ka caktuar masën e sigurisë “Arrest në burg”, për veprat penale “Vrasja me paramendim”, kryer për interes dhe hakmarrje, “Sigurimi i kushteve dhe i mjeteve materiale për të kryer vrasje”, “Përkrahja e autorit të krimit” dhe “Mbajtja pa leje dhe prodhimi i armëve, armëve shpërthyese dhe i municionit”, kryer në kuadrin e grupit të strukturuar kriminal”.

“Ai akuzohet se: ka marrë pjesë në vrasjet e shtetasve K. K. dhe I. A.; ka siguruar kushtet/mjetet për vrasjen e shtetasve A. S. dhe A. C. alias A. S.; ka ndihmuar shtetasin e shumëkërkuar T. Ç., për t’u fshehur”, njoftoi policia.

Po ashtu është arrestuar edhe “A. Xh., 40 vjeç, të cilit GjKKO, në vitin 2024, i ka caktuar masën e sigurisë “Arrest në burg”, për veprën penale “Përkrahja e autorit të krimit”, kryer në kuadrin e grupit të strukturuar kriminal. Ai akuzohet se: për rreth 2 vjet, ka ndihmuar shtetasin T. Ç., duke i krijuar kushtet e nevojshme për jetesë; ka shoqëruar 1 gazetar, me qëllim intervistimin e shtetasit T. Ç”.

Interpol Tirana vijon bashkëpunimin me homologët, me qëllim ekstradimin e këtyre shtetasve, në Shqipëri. /j.p/

The post Akuzohen si bashkëpunëtorë të Talo Çelës, 3 të arrestuar në Dubai appeared first on Agjencia Telegrafike Shqiptare.

TIRANË, 2 maj /ATSH/ Policia e Shtetit njoftoi sot, se në kuadër të operacionit policor ndërkombëtar të koduar “The Wanted” u ekstradua në Shqipëri i shumëkërkuari Florenc Çapja.

Sipas njoftimit të Policisë së Shtetit, ky operacion u finalizua si rezultat i shkëmbimit të informacionit dhe koordinimit të veprimeve, me partnerët e Policisë së Shtetit, nëpërmjet strukturave të INTERPOL-it, në kuadër të fazës së radhës të operacionit policor ndërkombëtar të koduar.

““The Wanted”, u finalizua me sukses, arrestimi për herë të dytë në Dubai dhe ekstradimi në Shqipëri, i të shumëkërkuarit ndërkombëtarisht, me rrezikshmëri të lartë shoqërore, shtetasit Florenc Çapja 44 vjeç, lindur në Elbasan”, thuhet në njoftimin e Policisë.

Sipas Policisë, 44-vjeçari është me masë sigurie “arrest në burg”, nga GjKKO-ja, në vitin 2022, për veprën penale “Sigurimi i kushteve dhe mjeteve për të kryer vrasje”, kryer në kuadër të grupit të strukturuar kriminal, si dhe nga Gjykata e Elbasanit, në vitin 2021, për veprat penale ”Vrasja në rrethana cilësuese”, kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit”.

Në njoftim cilësohet se 44-vjeçari, i akuzuar nga SPAK dhe Gjykata e Elbasanit, si porositës i 3 vrasjeve.

Ekstradimi i shtetasit të shumëkërkuar Florenc Çapja është dëshmi e bashkëpunimit shumë të mirë të Policisë së Shtetit me partnerët ndërkombëtarë.

Policia e Shtetit mbetet maksimalisht e angazhuar, për vijimin e operacioneve policore me objektiv lokalizimin, kapjen dhe arrestimin, me qëllim ekstradimin, të shtetasve të shpallur në kërkim ndërkombëtar. /j.p/

The post Ekstradohet nga Dubai i dënuari me burgim të përjetshëm Florenc Çapja appeared first on Agjencia Telegrafike Shqiptare.

TIRANË, 2 maj /ATSH/ Policia e Shtetit njoftoi sot se në kuadër të operacionit ndërkombëtar të koduar “The Wanted” pritet të ekstradojë pasditen e sotme të shumëkërkuarin Florenc Çapja, 44 vjeç, banues në Elbasan.

“Policia e Shtetit, në vijim të bashkëpunimit mjaft të mirë me partnerët, si në aspekte hetimore, ashtu dhe në ato operacionale, dhe si rezultat i shkëmbimit të menjëhershëm të informacionit mes strukturave të specializuara për lokalizimin dhe kapjen e shtetasve në kërkim ndërkombëtar, me qëllim ekstradimin, pasditen e sotme, do të finalizojë me sukses një tjetër fazë të operacionit ndërkombëtar të koduar “The Wanted””, njoftoi Policia.

Policia bëri të ditur se “në kuadër të këtij operacioni, pritet që pasditen e sotme, të finalizohet me sukses ekstradimi nga Dubai, i të shumëkërkuarit F. Ç., 44 vjeç, banues në Elbasan”.

Për informacion më të detajuar, Policia bëri të ditur se do të njoftojë në momentin e finalizimit të operacionit të ekstradimit në Rinas.

/a.f/r.e/

The post Ekstradohet sot nga Dubai Florenc Çapja appeared first on Agjencia Telegrafike Shqiptare.

PRISHTINË, 21 mars/ATSH/ Ish-presidenti i Kosovës, Hashim Thaçi po viziton varrin e babait të tij, në fshatin Burojë  të Skenderajt.

Nën masa të rrepta të sigurisë, Thaçi u soll nga Haga në Kosovë pesë ditë pas vdekjes së babait të vet, Haxhi Thaçit, dhe tri ditë pas varrimit.

Gjykata Speciale nuk i dha leje Thaçit të marrë pjesë në varrimin e babait të vet të martën më 18 mars.

/Kosovapress/

The post Thaçi viziton varrin e babait appeared first on Agjencia Telegrafike Shqiptare.

TIRANË, 25 shkurt/ATSH/ Ambasada shqiptare në Vjenë bën të ditur se kompania ajrore “Air Albania” ka nisur fluturimet e reja direkte midis Tiranës dhe Vjenës, duke e bërë udhëtimin më të shpejtë, më të rehatshëm dhe më të përshtatshëm për të gjithë qytetarët.

Fluturimet për dhe nga Vjena do të kryhen dy herë në javë, të enjte dhe të diel.

Nisja nga Tirana do të jetë në orën 20:15 dhe mbërritja në Vjenë parashikohet në 21:25.

Nisja nga Vjena në Tiranë do të kryhet në orën 22:25, ndërsa mbërritja në Tiranë parashikohet në 00:10 (të ditës së nesërme).

Fluturimet operohen me Airbus A320, një avion modern që garanton siguri, rehati dhe një shërbim cilësor për të gjithë pasagjerët.

Kjo linjë e re forcon më tej marrëdhëniet mes Shqipërisë dhe Austrisë, duke lehtësuar shkëmbimet turistike, ekonomike dhe kulturore mes dy vendeve tona.

Për shqiptarët që jetojnë, studiojnë apo punojnë në Austri, për bizneset dhe për të gjithë ata që udhëtojnë shpesh midis dy kryeqyteteve, kjo është një mundësi më shumë për të lëvizur më shpejt dhe me më shumë lehtësi.

Ambasada e Shqipërisë në Vjenë përshëndet këtë zhvillim dhe fton të gjithë qytetarët të përfitojnë nga kjo linjë e re ajrore.

1 nga 2

/r.e/

The post Air Albania dy fluturime në javë drejt Vjenës appeared first on Agjencia Telegrafike Shqiptare.

TIRANË, 13 shkurt /ATSH/ Drejtoresha e Agjencisë Kombëtare të Shoqërisë së Informacionit (AKSHI), Linda Karçanaj u shpreh sot gjatë prezantimit të modulit AI të zhvilluar brenda platformës së integrimit evropian dhe anëtarësimit në ambientet e Kryeministrisë ku ishte i pranishëm edhe kryeministri Edi Rama, se tashmë po ndodh një revolucion inteligjent brenda atij dixhital.

Sot, sipas Karçanajt, moduli i inteligjencës artificiale, i zhvilluar në bashkëpunim me OpenAI dhe Microsoft, përkthen çdo akt të BE-së brenda disa minutash. “Me saktësi maksimale, mbi 97%! Dhe jo vetëm kaq: ai e krahason automatikisht me legjislacionin shqiptar, nxjerr mospërputhjet, krijon tabela krahasuese dhe-në fund-gjeneron tabelën e përputhshmërisë me një klikim të vetëm”, tha ajo.

Drejtuesja e AKSHI-t tha se ky realitet quhet Platforma e Integrimit Evropian dhe Anëtarësimi që vjen si një sistem elektronik nuk është thjesht një risi teknologjike, por një revolucion i vërtetë në mënyrën se si e menaxhojmë procesin e integrimit në Bashkimin Evropian.

“Sepse le ta themi hapur: dikur, çdo raport, çdo shkresë, çdo dokument i kërkuar nga Komisioni Evropian ishte një udhëtim në një labirint pa fund. Email-e të panumërta, dokumente Word që qarkullonin sa andej këndej, excel-e që duheshin bashkuar, njerëz që harronin të hidhnin të dhënat…Rrëmujë totale! Dhe në fund, gjithçka përmblidhej me mund e djersë, me punë manuale, me vonesa, me gabime njerëzore”, shtoi ajo.

“E di që shumë prej jush e kanë provuar në vetë të parë: keni kaluar javë, muaj, ndoshta edhe vite duke përkthyer ligje e rregullore të BE-së, duke analizuar se ku përputhen dhe ku nuk përputhen me legjislacionin shqiptar. Një punë që ka marrë kohë të pafundme dhe ka kërkuar burime të panumërta njerëzore, financiare, energji… Epo kjo epokë mori fund”, theksoi Karçanaj.

Sipas saj, sot mjafton të ngarkosh raportin në platformë dhe sistemi bën të gjithë punën vetë, gjeneron dokumentin final, kujton afatet, sinjalizon nëse diçka mungon, dhe na ndihmon të monitorojmë çdo detyrim që kemi marrë përsipër.

“E gjitha në kohë reale, me transparencë të plotë, pa vonesa, pa stres. Ky është ndryshimi. Ky është përparimi. Ky është moment, kur ne nuk ecim më me hapin e vjetër të burokracisë, por me ritmin e teknologjisë më të avancuar që ekziston”, vijoi ajo.

“Më lejoni ta them troç: ky sistem nuk është thjesht një vegël teknike. Nuk është thjesht një aplikacion. Është një provë e qartë se Shqipëria jo vetëm që është gati për Evropën, por është e aftë të jetë lider i inovacionit administrativ në rajon”, u shpreh Karçanaj.

“Sepse në fund të ditës, çfarë duam ne? Ne duam një administratë që nuk humbet kohë me letra dhe procedura të kota, por që fokusohet aty ku ka vërtet rëndësi: në analizë, në vendimmarrje, në zgjidhje konkrete”, theksoi Karçanaj në fjalën e saj.

Drejtuesja e AKSHI-t tha se kjo mundësi do të shfrytëzohet si një hapësirë për të përshpejtuar rrugën drejt BE-së.

“Shqipëria nuk ka kohë për të humbur. Ky vend nuk ka më luksin të ecë me hapa të vegjël. Koha për të pritur ka mbaruar. Koha për të vepruar është tani”, përfundoi ajo. /j.p/

The post Karçanaj: Moduli i inteligjencës artificiale përkthen çdo akt të BE-së brenda disa minutash, dikur merrte kohë të pafundme appeared first on Agjencia Telegrafike Shqiptare.

TIRANË, 29 janar /ATSH/ Forcat speciale RENEA do të jenë pjesëmarrëse në kompeticionin “Swat Challenge Dubai 2025”, që do të zhvillohet nga data 1 deri më 5 shkurt 2025, në Dubai.

Ekipi i forcave speciale RENEA ka mbërritur mbrëmjen e sotme në Dubai dhe është pritur nga përfaqësues të Policisë së Dubait.

Policia e Shtetit njofton se për këtë vit janë regjistruar për të marrë pjesë 121 ekipe të forcave speciale nga 50 shtete të ndryshme nga e gjithë bota.

Në këtë kompeticion zhvillohen gara taktike, qitje dhe ushtrime fizike midis forcave speciale elitë të përfaqësuara në këtë kompeticion.

Kjo është hera e katërt që forcat speciale RENEA përfaqësojnë Policinë e Shtetit në këtë kompeticion.

/a.f/r.e/

The post RENEA në “Swat Challenge Dubai 2025”, garojnë 121 ekipe nga 50 vende appeared first on Agjencia Telegrafike Shqiptare.

TIRANË, 14 janar /ATSH/ Kryetari i bashkisë së Kolonjës, Erion Isai u paraqit ditën e sotme në Prokurorinë e Posaçme kundër Korrupsionit dhe Krimit të Organizuar (SPAK).

Pasi doli nga SPAK ku qëndroi për rreth një orë, Isai tha se ishte thirrur si person që ka dijeni për një çështje dhe se nuk kishte lidhje me tenderat e bashkisë që ai drejton.

“Është një ngjarje e vjetër, nuk ka lidhje me tenderat e bashkisë. Kam qenë i thirrur si person në dijeni për një ngjarje. Nuk ka lidhje me krimet zgjedhore, a lidhje me një ngjarje konkrete të para shumë kohëve, ku Bashkia nuk ka qenë e përfshirë me tender publik të drejtpërdrejtë, por si institucion që bashkëpunon dhe ka dijeni”, tha Isai.

Isai nuk specifikoi se për çfarë kallëzimi bëhet fjalë apo për cilën çështje.

“I takon prokurorisë se kë po heton, unë jam pyetur si person që ka dijeni. Hetuesit ishin në humor, pse të mos jenë në humor. Ishte hera e parë në Prokurori, ishte këndshëm”, tha Isai. /j.p/

The post Kryebashkiaku i Kolonjës, Erion Isai në SPAK: U thirra si person që ka dijeni appeared first on Agjencia Telegrafike Shqiptare.

BERLIN, 13 janar /ATSH-DPA/ – Edhe pse një lloj ëmbëlsire e njohur si “çokollata e Dubait” është bërë një trend popullor në Gjermani, një gjykatë vendosi se vetëm produktet e prodhuara në Dubai mund të tregtohen me këtë emër.

Rasti përfshinte çokollata “Alyan Dubai Handmade Chocolate” nga zinxhiri gjerman i supermarketeve me kosto të ulët ‘’Aldi Süd’’, të cilat u goditën menjëherë pasi u shfaqën në dyqane në dhjetor.

Ëmbëlsirat e quajtura “Dubai Chocolate” janë të mbushura me krem ​​fëstëk dhe fije crunchy pastiçerie. Në Gjermani, kjo kënaqësi e ëmbël është kthyer në trend dhe është promovuar gjerësisht nga ndikuesit në platformat e mediave sociale si Instagram dhe TikTok.

Por të hënën, gjykata rajonale e Këlnit lëshoi ​​një urdhër të përkohshëm kundër Aldi Süd, duke vënë në dukje se “çokollata e tij artizanale Alyan Dubai” prodhohet në të vërtetë në Turqi.

Gjykata urdhëroi shitësin e shumicës të ndalonte shitjen e produktit.

Gjykata vendosi që në Gjermani një produkt mund të etiketohet vetëm si “çokollatë e Dubait” ose e ngjashme nëse është prodhuar në Dubai ose ka ndonjë lidhje tjetër gjeografike me Dubain.   /os/

The post SOFT NEWS – Gjermania ndalon çokollatat e pëlqyera që nuk vijnë nga … Dubai! appeared first on Agjencia Telegrafike Shqiptare.

TIRANË, 10 dhjetor/ATSH/ Në konferencën ndërkombëtare “Formësimi i së Ardhmes së GovTech”, ishte i pranishëm edhe zëvendëskryeministri i Maqedonisë së Veriut, Arben Fetai.

Në këtë konferencë ku Shqipëria mikpret rajonin për të diskutuar revolucionin digjital, Arben Fetai u shpreh se qeveria e Maqedonisë së Veriut e ka vendosur transformimin digjital si një ndër 5 fushat prioritare të axhendës së reformave në kuadër të integrimit në Bashkimin Evropian.

“Duke u përqendruar në transformimin digjital, ne synojmë të krijojmë infrastruktura të sigurta digjitale, të digjitalizojmë administratën publike dhe të rrisim së paku me 50% numrin e shërbimeve publike elektronike që u ofrohen qytetarëve”, tha Fetai.

Për të arritur këto ambicie, zëvendëskryeministri i Maqedonisë së Veriut tha se do të investohet në korniza ligjore dhe strategjike që garantojnë mbrojtjen e të dhënave digjitale, ndërkohë që promovojnë modernizimin e të gjitha shërbimeve publike.

“Në Ministrinë e Transformimit Digjital, po përgatitemi për ndërtimin e një qendre të dhënash kombëtare. Kjo iniciativë do të përmirësojë sigurinë e të dhënave, do të sigurojë konsistencë dhe do të optimizojë kostot operative. Këto masa do të kontribuojnë në modernizimin e administratës publike e gjithashtu në parandalimin dhe reduktimin e korrupsionit” deklaroi Arben Fetai.

Në përfundim të fjalës së tij, zëvendëskryeministri përmendi tri porosi:

E para, kishte të bënte me transformimin digjital, i cili, sipas tij, nuk është një përpjekje e izoluar e shteteve tona veç e veç. “Si partnerë rajonalë, ndajmë përgjegjësi për të bashkëpunuar, për të përshpejtuar progresin tonë të ndërsjellë dhe për t’u siguruar që përfitimet e digjitalizimit të ndihen nga të gjithë qytetarët e vendeve tona”, u shpreh Fetai.

Më tutje ai renditi sigurinë kibernetike që është padyshim një nga sfidat më të mëdha me të cilat përballemi, prandaj duhet t’i jepet prioritet mbrojtjes së të dhënave personale, parandalimit të manipulimeve dhe mbrojtjes nga sulmet kibernetike.

Porosia e tij e tretë ishte modernizimi i shërbimeve publike përmes platformave të e-Qeverisjes, që jo vetëm përmirësojnë efikasitetin, por gjithashtu luftojnë korrupsionin duke reduktuar transaksionet direkte midis zyrtarëve të shtetit dhe qytetarëve.

/r.e/a.f

The post Fetai: Siguria kibernetike, një nga sfidat më të mëdha me të cilat përballemi appeared first on Agjencia Telegrafike Shqiptare.

Ishte e qartë që kjo do të ndodhte herët a vonë. Michel Barnier u bë kryeministri më jetëshkurtër në historinë e Francës, duke mos qëndruar as 100 ditë në detyrë, pasi Parlamenti e rrëzoi më 4 dhjetor – një shfaqje që nuk ishte parë që nga viti 1962.

E gjithë kjo ndodhi si pasojë e zgjedhjeve të parakohshme tronditëse këtë verë, në të cilat e djathta ekstreme dhe një koalicion partish të majta fituan vende, duke e detyruar presidentin e dobësuar politikisht, Emmanuel Macron, dhe forcat e tij centriste të formojnë një qeveri minoritare të paqëndrueshme, që mund të qeveriste vetëm me pëlqimin e populistes Marine Le Pen.

Tani, do të ketë një qeveri të re që ndoshta nuk do të mbijetojë për shumë gjatë, pasi parametrat janë saktësisht të njëjtë – një marrëveshje me të majtën ekstreme ose të djathtën ekstreme deri sa një zgjedhje e re të mund të thirret në mënyrë kushtetuese në verën e vitit 2025.

Ka të ngjarë që Macron të nominojë ministrin e njohur të Forcave të Armatosura, Sebastien Lecornu, nga partia e tij Renaissance, për të tentuar formimin e një qeverie të re që mund të navigojë përmes asamblesë kombëtare të paqëndrueshme dhe të marrë mjaftueshëm vota për të bërë ndonjë punë. Por, parashikimet më të mençura janë se ai do të dështojë plotësisht ose do të tejkalojë rekordin e padëshirueshëm të Barnierit për mandatin më të shkurtër si kryeministër.

Do të ketë thirrje që Macron të japë dorëheqje si president para përfundimit të mandatit të tij në 2027, por ai ka të ngjarë të vazhdojë. Kjo do të thotë që ai do të vazhdojë të drejtojë politikën e jashtme, siç bëjnë zakonisht presidentët francezë të shtetit, por do të kufizohet nga kaosi në Paris që do të thithë energjinë dhe vëmendjen e tij.

Gjithashtu, ai do të jetë i kufizuar financiarisht, pasi qeveria u rrëzua për shkak të pamundësisë për të rënë dakord mbi një buxhet me masa të shumta shtrënguese.

Deficiti aktualisht është 6.1 % e Bruto Produktit Vendor – duke tërhequr kritika dhe potencialisht gjoba financiare nga Brukseli dhe duke shkaktuar frikë në tregjet financiare nga një krizë e re në eurozonë.

Dhe, kjo ndodh në momentin absolutisht më të keq për BE-në, pasi fuqia tjetër e madhe e bllokut, Gjermania, është një “patë e çalë” që pret zgjedhjet federale të reja në fund të shkurtit, me bisedime të mundshme të zgjatura për formimin e një koalicioni.

A do të ketë ende gatishmëri të mjaftueshme për të mbështetur Ukrainën politikisht, ushtarakisht dhe më e rëndësishmja – financiarisht? Ka të ngjarë të ketë fonde të mjaftueshme për Kievin vitin e ardhshëm, por më pas?

Të themi thjesht: Dy motorët e Evropës që ndalen në mes të kërkesave në rritje nga administrata e ardhshme e SHBA-së për rritjen e shpenzimeve evropiane për mbrojtje, si dhe sinjaleve për tarifa të reja tregtare transatlantike, është një skenar që dikush në Kremlin mund të dëshirojë ta shfrytëzojë për t’i ushqyer luftërat e tij për pushtet në 2025, shkruan REL.    /os/

The post FOKUS – Ndalen dy motorë të Evropës: Franca i bashkohet Gjermanisë në kaosin politik appeared first on Agjencia Telegrafike Shqiptare.

TIRANË, 20 nëntor/ATSH/ Drejtoresha e Agjencisë Kombëtare të Shoqërisë së Informacionit (AKSHI), Linda Karcanaj priti sot në një takim zëvendëskryeministrin shqiptar të Republikës së Maqedonisë së Veriut, Arben Fetai dhe këshilltarin e tij, Bashkim Bakiu për të ndarë së bashku eksperiencën e vendeve tona.

Gjatë takimit, Fetai foli mbi arritjet e Shqipërisë si vend lider në rajon dhe jo vetëm, në qeverisjen elektronike dhe shërbimet online duke lehtësuar jetën e qytetarëve dhe bizneseve në marrjen e shërbimeve publike.

Gjithashtu Fetai vlerësoi Shqipërinë si një shembull për t’u ndjekur në rajon dhe më gjerë.

Karçanaj tha në një postim në rrjetet sociale se “i njoha dy miqtë tanë me procesin dhe hapat që kemi ndjekur në këto 11 vite në e-Qeverisje, digjitalizimi në sektorë të ndryshëm si arsim, shëndetësi, bujqësi, etj, fokusi aktual në përdorimin e inteligjencës artificiale si dhe ringritja pas sulmit kibernetik të dy viteve më parë dhe hapat e ndërmarra për forcimin e mureve tona mbrojtëse”.

“Jam e bindur se bashkëpunimi mes dy vendeve tona do të na çojë më para në planet respektive, por edhe në një plan më të madh, si një rajon i tërë, me synimin e qartë, integrimin në Bashkimin Europian”, tha Karçanaj.

1 nga 5

/k.s/

The post Karcanaj pret zv/kryeministrinë e Maqedonisë së Veriut, në fokus digjitalizimi dhe mbrojtja kibernetike appeared first on Agjencia Telegrafike Shqiptare.

TIRANË, 31 tetor/ATSH/ Drejtoresha e Agjencisë Kombëtare të Shoqërisë së Informacionit (AKSHI), Linda Karçanaj mori pjesë sot në takimin e Bordit të Rishikimit të të Dhënave dhe Inteligjencës Artificiale (DARB) në Washington.

Gjatë eventit treditor të dialogut të nivelit të lartë për Inteligjencën Artificiale në mbrojtjen kibernetike dhe sigurinë kibernetike, Karçanaj përfaqësoi Shqipërinë si koordinatore kombëtare.

Karçanaj theksoi se viti 2024 ka qenë një vit i veçantë për Shqipërinë, duke shënuar avancimin teknologjik dhe progresin më të lartë në fushën e Inteligjencës Artificiale.

“Ne kemi hedhur baza të forta për përdorimin e përgjegjshëm dhe efektiv të Inteligjencës Artificiale në Shqipëri, duke u bërë një model për vendet e tjera. Jemi vendi i vetëm në Europë që po përdorim AI në procesin e transpozimit të legjislacionit të BE-së, një zgjidhje që mund të shërbejë si model për vendet që aspirojnë integrimin europian”, theksoi Karçanaj.

Po ashtu, drejtoresha e AKSHI-t nënvizoi se Shqipëria është në një fazë të avancuar të hartimit të Strategjisë Kombëtare të Inteligjencës Artificiale, e cila do të vendosë një kuadër gjithëpërfshirës për zhvillimin e kësaj teknologjie në vend.

Karçanaj ndau qëndrimet mbi aspiratën e vendit për të qenë lider në Ballkanin Perëndimor për dixhitalizimin, mbrojtjen kibernetike dhe Inteligjencën Artificiale, si dhe vendosmërinë për të ofruar mbështetje të vazhdueshme si anëtar i rëndësishëm i NATO-s.

Po ashtu, ajo shprehu përkushtimin e Shqipërisë për të përmirësuar strategjitë e Inteligjencës Artificiale dhe për të siguruar që teknologjitë moderne të shërbejnë për përmirësimin dhe forcimin e vazhdueshëm të partneritetit mes Aleancës.

“U diskutuan zgjidhjet e avantazheve në përdorimin e ‘GenerativeAI’ dhe metodave të tjera AI dhe ML, në definimin e kërkesave teknike. Theksova, gjithashtu, rëndësinë e përcaktimit të specifikimeve dhe projeksionit për mënyrat efikase të përdorimit të AI, për kohezion, sinergji dhe sinkronizim mes aleatësh”, tha Karçanaj.

1 nga 4

/m.m/j.p/

The post Karçanaj: Të vetmit në Europë që po transpozojmë legjislacionin e BE-së përmes Inteligjencës Artificiale appeared first on Agjencia Telegrafike Shqiptare.

TIRANË, 8 tetor /ATSH/ Lista e Kombëtares A pëson sërish ndryshime. Departamenti i Komunikimit në FSHF bën me dije se trajneri Silvinjo ka vendosur të afrojë në skuadër mesfushorin e Shpresave, Feta Fetai. Lojtari do të bashkohet me ekipin në stërvitjen e pasdites dhe do të jetë pjesë e skuadrës për dy ndeshjet e Kombëtares ndaj Çekisë dhe Gjeorgjisë.

Ndryshime ka edhe në listën e ekipit Kombëtar U-21. Trajneri Alban Bushi ka vendosur të thërrasë në grumbullim mesfushorin e Tiranës, Hajrulla Tola si edhe portierin e Vorës, Arbër Jata. Portierët Simon Simoni dhe Endri Dema kanë ngarkesë në muskuj dhe për pasojë i duhen dy ditë të plota rikuperimi.

Shqipëria U-21 do të luajë më 15 nëntor kundër Armenisë në stadiumin “Air Albania” në ora 18:00.

The post Ndryshime në listat e ekipeve Kombëtare A dhe U-21, Silvinjo fton Feta Fetain appeared first on Agjencia Telegrafike Shqiptare.