HONG KONG, 16 janar /ATSH-/ – Departamenti Amerikan i Tregtisë njoftoi nënshkrimin e një marrëveshjeje tregtare me qeverinë e Tajvanit, e cila do të ulë tarifat e vendosura nga Administrata Trump mbi produktet tajvaneze nga 20% në 15%, duke i përafruar ato me ato të vendosura tashmë mbi produktet japoneze dhe evropiane, shkruan adnkronos.it.

Në këmbim, kompanitë tajvaneze të çipave u zotuan të “investojnë të paktën 250 miliardë dollarë” në Shtetet e Bashkuara për të zhvilluar prodhimin vendas dhe 250 miliardë dollarë shtesë “për të forcuar ekosistemin dhe zinxhirin e furnizimit të çipave në vend.

Kjo marrëveshje ka provokuar një reagim të ashpër nga Kina.

Reagimi i Kinës

‘’Pekini kundërshton me vendosmëri dhe vazhdimisht marrëveshjen e nënshkruar nga Shtetet e Bashkuara dhe Tajvani, prodhuesi kryesor i çipave në botë, për të ulur tarifat mbi produktet dhe për të zhvendosur një pjesë të prodhimit të tij të gjysmëpërçuesve në Shtetet e Bashkuara, si dhe “çdo marrëveshje midis vendeve me të cilat ka marrëdhënie diplomatike dhe rajonit të Tajvanit të Kinës”, theksoi Guo Jiakun, zëdhënës i Ministrisë së Jashtme në Pekin.

Tajvani ‘i ndarë’ për marrëveshjen

Marrëveshja midis Uashingtonit dhe Tajvanit, e cila duhet të miratohet nga parlamenti i kontrolluar nga opozita e Tajvanit, dhe e cila ofron 250 miliardë dollarë investime në SHBA dhe 250 miliardë dollarë të tjerë në garanci krediti për të lehtësuar investimet e mëtejshme të korporatave, do të çojë në një zhvendosje masive të sektorit të çipave”, komentoi Departamenti i Tregtisë i SHBA-së.

“Rezultatet e arritura tregojnë se progresi i bërë deri më tani është domethënës”, deklaroi kryeministri tajvanez Cho Jung-tai.

“Bazuar në planifikimin e vazhdueshëm, Tajvani do të mbetet prodhuesi kryesor i çipave dhe të inteligjencës artificiale në botë, jo vetëm për kompanitë tajvaneze, por edhe në nivel global”, komentoi ministri i Ekonomisë Kung Ming-hsin.

Marrëveshja përcakton që deri në vitin 2030, prodhimi do të jetë 85 përqind në Tajvan dhe 15 përqind në SHBA, dhe 80 përqind dhe 20 përqind deri në vitin 2036.   /os/

The post FOKUS – Marrëveshja Tajvan-SHBA mbi prodhimin e çipave shkakton zemërimin e Kinës appeared first on Agjencia Telegrafike Shqiptare.

TIRANË, 16 janar/ATSh/ Federata e Futbollit, në bashkëpunim me Bashkinë Gramsh, ka nisur punimet për rikonstruksionin e stadiumit “Myslim Koçi”, një tjetër investim i rëndësishëm në funksion të përmirësimit të infrastrukturës sportive dhe zhvillimit të futbollit në të gjithë vendin.

Ky projekt synon krijimin e kushteve më të mira për zhvillimin e aktiviteteve sportive, veçanërisht për ekipet vendase dhe moshat e reja.

Me nisjen zyrtare të punimeve, Presidenti i FSHF-së, Armand Duka, inspektoi nga afër procesin e rikonstruksionit gjatë një vizite në Gramsh, ku u prit nga Kryetari i Bashkisë, Besion Ajazi. Gjatë inspektimit, Presidenti Duka u njoh në detaje me projektin, i cili parashikon rikonstruksionin e dhomave të zhveshjes, ndërtimin e tribunës së re, modernizimin e ambienteve ndihmëse, si edhe instalimin e tapetit me bar artificial në fushën e stadiumit “Myslim Koçi”, duke e përshtatur atë me standardet bashkëkohore për zhvillimin e ndeshjeve dhe stërvitjeve.

Presidenti Duka vlerësoi projektin për stadiumin e Gramshit, duke e cilësuar si një impiant modest, por modern, që plotëson standardet për zhvillimin e ndeshjeve kombëtare dhe ndërkombëtare të nivelit të dytë.

Kreu i qeverisë së futbollit shqiptar falënderoi Bashkinë Gramsh për bashkëpunimin dhe mbështetjen e vazhdueshme në zhvillimin e futbollit, duke theksuar rëndësinë e zhvillimit të futbollit në çdo qytet të Shqipërisë.

“Kënaqësi për mua të jem sot në Gramsh bashkë me Kryetarin e Bashkisë për të inspektuar punimet e ndërtimit të këtij stadiumi, modest por modern, i bukur, i cili plotëson të gjitha kushtet për organizimin e ndeshjeve jo vetëm të kampionatit kombëtar shqiptar, por edhe internacionale deri në një lloj niveli, pra një stadium i kategorisë së dytë”, tha ai.

“Dua ta falënderoj kryetarin e bashkisë për bashkëpunimin në ndërtimin e stadiumit, por jo vetëm kaq, por për të gjithë bashkëpunimin në zhvillimin e futbollit edhe në këto anë, sepse futbolli nuk luhet vetëm në Tiranë, Durrës apo në qendrat e mëdha urbane, por duhet të luhet në çdo cep të Shqipërisë, në çdo cep të globit”, cilësoi Duka.

Kënaqësi që ju keni 250 fëmijë që luajnë futboll në zonën e Gramshit, keni një ekip vajzash që është nga më kualitativët në kampionatin kombëtar shqiptar dhe uroj që të kemi edhe me djemtë të njëjtin sukses që keni edhe me vajzat. Jam shumë i sigurt që stadiumi i ri dhe fusha tjetër që do të bëhet për stërvitje pas stadiumit, do t’i shërbejë jo vetëm ekipit të vajzave, por edhe ekipit të djemve për të shkuar akoma më përpara.

Kryetari i Bashkisë Gramsh, Besion Ajazi falënderoi Presidentin Duka dhe FSHF-në për mbështetjen e dhënë për zhvillimin e futbollit në Gramsh, duke e cilësuar stadiumin e ri si një investim shumë të rëndësishëm për qytetin, ekipet dhe moshat e reja.

Ai theksoi se impianti do të jetë modern dhe i kompletuar me të gjitha ambientet e nevojshme, duke u shndërruar në një vlerë të shtuar për komunitetin dhe brezat e rinj.

Presidenti i FSHF-së, Armand Duka gjatë inspektimit të punimeve të stadiumit në Gramsh

1 nga 4

/e.i/j.p/

The post Rikonstruksioni i stadiumit “Myslim Koçi” në Gramsh, Duka: Futbolli duhet të zhvillohet në çdo qytet appeared first on Agjencia Telegrafike Shqiptare.

TIRANË, 16 janar /ATSh/ Grupi parlamentar i Partisë Socialiste hapi sot vitin e ri kuvendor, me mbledhjen ku Kryeministri dhe kryetari i PS-së Edi Rama vendosi piketat e punës së sezonit të ri.

Në fjalën e tij, kryeministri Edi Rama, njëkohësisht kryetar i Partisë Socialiste u ndal edhe tek administrata e Kuvendit, e cila duhet të modernizohet. Rama gjithashtu nënvizoi se do të nisë puna për godinën e re të Kuvendit.

“Administrata e Kuvendit, duhet të modernizohet dhe të mbështetet nga një transformim i rëndësishëm teknologjik, punë për të cilën do të flasë Kryetari dhe nga ana tjetër duhet të vendosim edhe piketat në një kalendar të qartë, për godinën e re të parlamentit të Shqipërisë. Të gjitha këto shkojnë bashkë në të njëjtin drejtim dhe natyrisht që asnjëra nga këto nuk pengon një pjesë të madhe të punës qe bëjmë po të gjitha këto bashkë ndihmojnë për t’i dhënë më shumë hapësirë dhe energji pozitive punës së deputetëve të cilët duhet”, tha Rama.

Kreu i qeverisë kërkoi nga deputetët socialistë që të jenë sa më shumë të pranishëm në terren.

Rama tha se braktisja e territorit si zakonisht në të shkuarën nuk duhet dhe nuk mund të jetë një opsion për këtë grup parlamentar, ndërsa theksoi se përmbyllja e negociatave duhet bërë në vitin 2027.

“83 mandatet e kërkojnë këtë me një ngulm të panjohur më parë, 83 mandate imponojnë shumë gjëra për këtë forcë politike duke filluar nga detyrimi që fundin e 2027 të dalim para atyre që na i dhanë 83 mandate, dhe të tjerëve që nuk na votuan dhe t’u themi se ne e bëjmë atë për të cilën u kërkuam votën i mbyllëm negociatat me BE. I mbaruam detyrat tona”, tha Rama.

“Detyra tjetër është sigurisht pjesa e këmbënguljes politike me gjithë kryeqytet e Evropës me gjithë parlamentet qeveritë të bëjnë ratifikimet për të anëtarësuar Shqipërinë në BE”, përfundoi Kryeministri Edi Rama.

/m.q/j.p/

The post Rama: Nisim punën për ndërtimin e godinës së re të Kuvendit appeared first on Agjencia Telegrafike Shqiptare.

TIRANË, 16 janar/ATSh/ Kryeministri Edi Rama, njëherësh kryetari i Partisë Socialiste, në mbledhjen e sotme të grupit parlamentar u ndal te rëndësia e fazës përpara përmbylljes së negociatave duke kërkuar kontributin e sa më shumë përfaqësuesve.

Rama tha se edhe më herët e ka theksuar gjatë fjalës së tij në Asamblenë Kombëtare në nisje të mandatit, që faza informuese duhet të jetë shumë më tepër në vëmendjen e grupit parlamentar dhe të Qeverisë, dhe këtu Rama përfshiu edhe drejtuesit e grupit të PS dhe dy ministret që drejtojnë negociatat.

“Kjo është pjesa që lidhet me fazën përpara përmbylljes së negociatave mbi cilindo tekst. Duhet shumë më tepër punë për t’u shpjeguar me grupin dhe për t’u dëgjuar nga grupi. Duhet shumë më tepër informacion i ndërsjellë në mënyrë që të gjithë deputetët, të cilët për shkak të përkatësisë në komisione apo për shkak të ekspertizës së tyre mund të kontribuojnë në një proces draftimi, të jenë të informuar dhe të mikpritur të kontribuojnë”, tha Rama.

“Kështu që këtë format të sotëm, që është një format i domosdoshëm për më tutje, natyrisht jo me të gjithë ngarkesën e sotme, por me pika specifike dhe me një pikë gjithmonë të përbashkët për procesin e negociatave për draftet që janë në proces, për draftet që vijnë më pas, do ta zhvillojmë çdo muaj”, pohoi Rama duke iu referuar mbledhjes së zgjeruar të grupit parlamentar të PS-së.

/e.i/j.p/

The post Rama: Deputetët, të mikpritur të kontribuojnë në fazën përmbyllëse të negociatave appeared first on Agjencia Telegrafike Shqiptare.

TIRANË, 16 janar/ATSh/ Kryeministri, njëherësh kryetari i Partisë Socialiste Edi Rama në hapjen e vitit të ri kuvendor të grupit parlamentar u ndal tek miratimi i ligjeve që kanë të bëjnë me anëtarësimin në BE.

Në fjalën e tij, Rama tha se “kemi pasur disa raste që në mënyrë të natyrshme procesi i diskutimeve dhe miratimit të ligjeve që kanë të bëjnë me anëtarësimin në BE është vonuar apo është marrë lehtë si një proces ku ne kemi lirinë të fusim duart sipas opinioneve tona”.

Ne, tha Rama, nuk e kemi këtë liri që të jemi shumë të qartë.

“Ne kemi lirinë që të negociojmë me Bashkimin Europian, por nuk kemi lirinë që pasi negociojmë të diskutojmë, që do të thotë negociatat mbi një draft që hyn në të gjithë mekanizmin e gjerë dhe kompleks të arkitekturës së ligjit europian negociohet me komisionin i imponohet qeverisë dhe vjen në parlament”, nënvizoi Rama.

Kreu i qeverisë u shpreh se “në momentin që vjen në parlament duhet miratuar jo diskutuar sepse që t’i hyjmë diskutimit të një ligji të tillë duhet  të ridiskutojmë më parë a duam të hyjmë në BE apo jo”.

Këtu, vijoi Rama, kam një tjetër shembull për të dhënë.

“Me të drejtë disa shokë dhe kolegë bëjnë gabimin që bëja unë deri kur e mësova që nuk duhej bërë. Marrin një draft që vjen nga qeveria pasi është dakordësuar me Komisionin përmes skuadrës negociatore dhe fillojnë i referohen vendeve të tjera të BE-së. Shiko se Franca nuk e ka kështu, Gjermania nuk e ka kështu madje edhe Krocia nuk e ka kështu dhe pse ta bëjmë edhe ne kështu. Këtë gjë po e ndaj me ju si eksperiencë dhe duke shpresuar që ju e dini që nuk jam lehtësisht i përthyeshëm ju ftoj të jeni të gjithë të pathyeshëm në këtë pikë sepse kur ngrihet kjo pyetje ose ky pretendim se nuk duam ta bëjmë kështu sepse ne duam ta bëjmë si Franca përgjigjja është shumë e thjeshtë: Që ta bëni si Franca duhet të jeni Franca, ju jeni Shqipëria, nuk kemi kërkuar ne që ju të vini të bëheni pjesë e familjes sonë, jeni ju që keni kërkuar dhe ne jemi shumë të lumtur t’ju kemi pjesë të familjes, por për ju kemi kushte dhe kushtet janë këto nëse doni, nëse s’doni mund ta bëni si të doni”, tha Rama.

Tani, sqaroi Rama, kjo nuk ndodh vetëm me Shqipërinë i gjithë procesi i anëtarësimit është një proces që ka sjellë rëndim të  kushteve për atë që ka ardhur më pas.

“Ata që kanë hyrë në fillim në BE nga ish-perandoria komuniste e lindjes e kanë pasur shumë më të lehtë procesin dhe janë bërë anëtarë me shumë më pak kushte. Kanë qenë po ta themi ndryshe shumë më të papërgatitur seç jemi ne sot”, tha Rama.

Kryeministri Rama vuri në dukje se “pastaj kanë ardhur ata që kanë pasur më shumë kushte se sa ata më përpara. Pastaj kanë ardhur ata të tjerët më pas që kanë pasur ku e ku më shumë kushte sesa përpara. Në fund ka ardhur Kroacia që ka pasur më shumë kushte se gjithë të tjerët. Tani jemi ne vendet e Ballkanit Perëndimor që kemi kushte që as Koracia nuk nuk do t’i merrte dot me mend”.

/k.s/j.p/

The post Rama: Kemi lirinë të negociojmë me BE-në, por jo të diskutojmë ligjet appeared first on Agjencia Telegrafike Shqiptare.

AMSTERDAM, 16 janar /ATSH-DPA/- Çmimi i gazit natyror është ende në rritje për shkak të motit jashtëzakonisht të ftohtë në disa vende të Evropës, duke arritur nivelin më të lartë në pothuajse gjashtë muaj.

Gjatë javës së tregtimit, çmimi i gazit natyror u rrit me rreth 20%. Në bursën e Amsterdamit, kontrata e ardhshme TTF për gazin natyror evropian për dorëzim brenda një muaji tregtohej me 34,30 euro për megavat orë (MWh) në mëngjes, çmimi më i lartë që nga gushti.

Rritja e çmimit gjatë javës së tregtimit, është rritja më e mprehtë që nga tetori 2023.

Rezervat evropiane të gazit janë aktualisht në 52%, shumë nën mesataren sezonale prej 67%.

Temperaturat e akullta që priten në fund të muajit, mund të çojnë në tërheqje të mëtejshme të gazit nga vendet e magazinimit.

Situata e tensionuar në Iran, i cili është një furnizues i rëndësishëm i gazit për Turqinë, ka pasur gjithashtu një ndikim në çmime.

Kërcënimet e fundit nga qeveria amerikane kundër vendeve që bëjnë biznes me Iranin kanë rritur shqetësimet për furnizimin.

SHBA-ja i ka kërcënuar partnerët tregtarë të Iranit me tarifa të reja ndëshkuese prej 25%.

Tregu po merr parasysh gjithashtu kërkesën më të fortë në Kinë, blerësen më të madhe në botë të gazit natyror të lëngshëm.

The post FOKUS – Çmimi i gazit natyror rritet me 20%, për shkak të motit të ftohtë në Evropë appeared first on Agjencia Telegrafike Shqiptare.

TIRANË, 16 janar/ATSH-Maela Marini/ Kryeministri Edi Rama e konsideroi sot garantimin e  sigurisë ushqimore si një ndër sfidat kryesore në procesin e integrimit europian.

Kryeministri Rama, njëherësh kryetar i Partisë Soccialiste zhvilloi sot një mbledhje me grupin parlamentar të PS-së ku bëri një përmbledhje të punës dhe të sfidave që janë ndeshur në sesionin e mëparshëm parlamentar, por edhe u vendosën disa objektiva për në vijim.

Rama theksoi se tashmë Shqipëria ka hyrë në fazën më intensive të negociatave me Bashkimin Europian. “Në një hark kohor relativisht shumë të shkurtër, prej vetëm 2 vitesh, Shqipëria duhet të përmbushë të gjitha kushtet për të mbyllur negociatat e anëtarësimit”, shtoi ai.

Rama solli në vëmendje barrën e detyrimeve dhe kushteve që duhet të përmbushë vendi për të dalë me sukses nga procesi i negociatave dhe për të përballuar përfshirjen në një realitet tërësisht të ri, siç është realiteti i një tregu prej 450 milionë njerëzish.

“Shqipëria e integruar do të jetë një pikë uji në oqean dhe sfida për të gjithë sektorin prodhues dhe po ashtu për institucionet do të jetë e shumëfishtë. Ne përmes skuadrës së negociatave jemi duke negociuar periudhat e ndërmjetme pas momentit të anëtarësimit që t’i japim mundësi vendit që të jetë i gatshëm të përmbushë të gjitha kriteret”, shtoi Rama.

Kryeministri theksoi se beteja kryesore është për sektorin e prodhimit ushqimor, për të gjithë prodhuesit në fshat dhe për të gjithë sipërmarrjet që përpunojnë prodhimet ushqimore.

Në kushtet e sotme, Rama tha se jemi të paintegrueshëm në BE për shkak të nivelit të pamjaftueshëm të sigurisë ushqimore sipas kritereve të BE-së.

“Për këtë arsye, po përpiqemi të fitojmë një fazë të ndërmjetme prej 5 vitesh pas anëtarësimit, por përgatitjet duhet të fillojnë tani”, tha Rama.

Kryeministri solli në vëmendje situatën në të cilën ndodhej vendi për sa i përket sigurisë ushqimore në vitin 2013 dhe arritjet që janë bërë në këtë fushë.

“Kur kemi marrë detyrën rrugët e Shqipërisë ishin njëkohësisht tregje ushqimore dhe thertore. Të gjitha autostradat e vendit ishin të kufizuara nga tezgat dhe tregjet informale ushqimore. Shumë përparim është bërë por ama në raport me kriteret e sigurisë ushqimore të BE-së jemi ende larg”, shtoi Rama.

Rama paralajmëroi se në rast se nuk garantohet siguria ushqimore, në momentin e anëtarësimit dhe kur përfundon periudha e ndërmjetme asnjë ushqim i prodhuar në Shqipëri nuk mund të shitet jashtë vendit.

Madje sipas tij edhe në Shqipëri do të funksionojnë kriteret e njëjta dhe ushqimet mund të bllokohen nëse nuk përmbushin kriteret e sigurisë.

“Pastaj në skenarin më pesimist do të thotë se gjithçka që hahet të importohet. Për këtë arsye duhet një super punë por edhe super vendosmëri nga ana jonë si vendimmarrës për të mos falur asgjë dhe askënd në emër të nevojës që ‘vazhdoj të punoj’. Gjithësekush duhet të vendoset në pozita shumë të forta përgjegjshmërie dhe pune sepse në rastin më të mirë janë vetëm 10 vite përpara dhe është një punë shumë e madhe për t’u bërë”, u shpreh Rama.

1 nga 11

The post Rama: Siguria ushqimore, sfida kryesore në mbylljen e negociatave të anëtarësimit në BE appeared first on Agjencia Telegrafike Shqiptare.

SOFJE, 16 janar /ATSH-AA/ – Kanë dështuar përpjekjet për të zgjidhur krizën qeveritare në Bullgari, e cila lindi pas dorëheqjes së qeverisë së koalicionit trepartiak të kryeministrit Rosen Jelyazkov.

Përpjekjet e grupeve politike në parlamentin bullgar për të formuar një kabinet të tretë kanë qenë gjithashtu të pasuksesshme.

Partia Alternativa për të Drejtat dhe Liritë (APS), e ngarkuar me formimin e qeverisë nga presidenti Rumen Radev, e refuzoi detyrën.

Kryetari i Grupit Parlamentar APS, Hayri Sadikov, deklaroi se ata po braktisnin përpjekjet e tyre për të formuar një qeveri, duke marrë parasysh realitetet politike në vend.

“Së bashku, duam të shkojmë në zgjedhje të përgjithshme të parakohshme të ndershme, të lira, transparente dhe demokratike”, tha Sadikov.

Më parë, Presidenti Radev u kishte ngarkuar aleancës Qytetarët për Zhvillimin Evropian të Bullgarisë (GERB) dhe aleancën Vazhdo Ndryshimin – Bullgaria Demokratike (PP-DB), grupet më të mëdha në parlament, formimin e një kabineti, dhe të dy e kishin refuzuar detyrën dy herë radhazi.

Sipas rregullave të reja kushtetuese, presidenti mund të zgjedhë vetëm kryeministrin, dhe atë nga një listë e kufizuar prej 10 personash që mbajnë poste publike.

Kryeministri i përkohshëm, i emëruar nga presidenti, duhet të paraqesë një draft kabineti, dhe pas konsultimit me grupet parlamentare, Radev duhet ta nënshkruajë dekretin.

Me emërimin e qeverisë së përkohshme, Radev do të caktojë një datë për zgjedhjet e parakohshme parlamentare brenda dy muajsh.

Parlamenti do të vazhdojë punën e tij derisa qeveria e re të betohet.   /os/

The post SOFJE – Bullgari, dështojnë përpjekjet për të formuar qeverinë appeared first on Agjencia Telegrafike Shqiptare.

TIRANË, 16 JANAR /ATSH/ Deputetja e Partisë Demokratike, njëherësh kryetare e komisionit për Kulturën, Turizmin dhe Diasporën, Ina Zhupa, deklaroi sot se fjalori i ri i gjuhës shqipe përgatitur nga Akademia e Shkencave paraqet shqetësime serioze për mungesë profesionalizmi.

Sipas saj “atje gjenden lehtësisht gafa, diskriminim, mospërputhje me përkufizimet e termave sipas ligjeve etj”.

“Gjuha është themeli i kulturës kombëtare. Fjalori i një gjuhe nuk është thjesht një listë fjalësh, por akt kulturor, shkencor dhe kombëtar. Pikërisht për këtë arsye, fjalori i gjuhës shqipe duhet të jetë i saktë, i përgjegjshëm dhe në përputhje me zhvillimin bashkëkohor të shoqërisë”, nënvizoi Zhupa.

Zhupa theksoi se fjalori i ri i hedhur në konsultim publik ka gafa dhe qëndrime të cilat nuk mund të anashkalohen dhe janë tejet problematike.

Zhupa bëri të ditur se do të kërkojë një seancë dëgjimore me Akademinë e Shkencave që të japë shpjegime profesionale në lidhje me mënyrën e hartimit.

“Është interesi publik, për aq kohë sa bëhet fjalë për fjalor zyrtar, të bërë me fonde publike dhe element thelbësor i identitetit kombëtar. Kjo seancë dëgjimore nuk do trajtohet aspak si politike, por si çështje kulturore dhe kombëtare. Gjuha shqipe meriton seriozitet, profesionalizëm dhe përgjegjësi të lartë institucionale dhe një diskutim serioz”, nënvizon ajo.

Gjithashtu Zhupa solli edhe disa shembuj që sipas saj, janë qartësisht shfaqje e një pune jo cilësore dhe problematike në shumë nivele duke përmendur futjen e fjalës “abandonim” në fjalorin shqip-shqip apo fjalës “onlajn”

“Përkufizimi thellësisht diskriminues i fjalëve “djalë” dhe “vajzë”. Në fjalorin e ri, “djalë” përshkruhet me nota pozitive: trim, i urtë, shtyllë e shtëpisë, shpresë. Ndërsa “vajzë” shoqërohet me një sërë përkufizimesh negative, fyese dhe moralisht paragjykuese”, theksoi ndër të tjera Zhupa.

Sipas saj “fjalori nuk mund të jetë as ideologjik, as paragjykues, as i pakujdesshëm ndaj historisë gjuhësore dhe identitare. Ai formëson mendimin, edukon brezat dhe përcakton se çfarë konsiderohet “shqip e saktë””.

/m.q/j.p/

The post Zhupa: Akademia e Shkencave do thirret në dëgjesë mbi fjalorin e ri të gjuhës shqipe appeared first on Agjencia Telegrafike Shqiptare.

TIRANË, 16 janar /ATSH/- Propozimet e reja do të ofrojnë mundësinë për t’u bërë anëtar i BE-së, duke kufizuar disa të drejta vendimmarrjeje –  ndërsa anëtarët e ardhshëm janë të ndarë rreth këtyre planeve, thuhet në një shkrim të publikuar nga “Politico”.

Vendet që kanë pritur me vite për t’u bashkuar me BE-në, janë të ndara rreth planeve që po hartohen në Bruksel, për t’i lejuar ata të bëhen anëtarë pa të drejtat e zakonshme të votimit të plotë.

Mes disa kombeve në Evropën Lindore dhe Ballkanin Perëndimor, që janë në radhë për t’u bashkuar me bllokun, po shfaqet një përçarje rreth kushteve të bashkangjitura me aplikimet e tyre.

Disa këmbëngulin se ata duhet të marrin përfitimet e plota të bllokut – ndërsa të tjerë janë të kënaqur, vetëm që janë rreth tryezës.

Për të ulur shqetësimet e anëtarëve ekzistues, se një BE më e madhe do ta bënte më të vështirë marrjen e vendimeve unanime, Komisioni Evropian po shqyrton mundësinë e dhënies së të drejtave të plota të votës për anëtarët e rinj, vetëm pasi BE-ja të ketë rishikuar mënyrën e funksionimit të saj.

Kjo lëvizje do ta bënte më të vështirë për vendet individuale të ushtronin veton e tyre dhe do të ndalonte devijimin e politikave.

Aktualisht, anëtarët e rinj marrin menjëherë, të drejta të plota vote, siç ndodhi kur vendi më i fundit, Kroacia iu bashkua BE-së, në vitin 2013.

Ndër fuqitë që, fillimisht mund të kufizohen, përfshin të drejtën e anëtarëve të rinj për të bllokuar sanksionet, ndër çështje të tjera, që aktualisht kërkojnë që çdo vend i BE-së të jetë dakord.

Lundrimi rreth kërcënimeve të vetos nga qeveritë populiste në Hungari dhe Sllovaki ka rezultuar kohëhumbëse për udhëheqësit.

Perspektiva e bllokut pa të drejta të plota vote po shkakton reagime të ndryshme nga vendet kandidate.

Edi Rama, kryeministri i Shqipërisë – që tani ka hapur të gjitha të ashtuquajturat “grupe negociuese” përmes të cilave do të duhet të punojë – tha se masat ishin një “ide e mirë” dhe se vendi i tij do të pranonte madje, për një periudhë kohore, të mos kishte një komisioner të vetin në Bruksel.

Ai tha se Shqipëria nuk donte të sfidonte vullnetin e anëtarëve të mëdhenj themelues si Franca dhe Gjermania.

“Në fund të fundit, janë të rriturit në familje që marrin vendimet e rëndësishme”, tha Rama.

“Avantazhi i anëtarëve më të vegjël të BE-së është se, nëse vendet më të mëdha “gabojnë”, nuk është faji i anëtarëve të rinj”, shtoi ai.

Salome Zourabichvili, ish-presidentja e zgjedhur drejtpërdrejt e Gjeorgjisë, tha se ajo e kishte mbështetur prej kohësh një veprim të tillë në diskutimet me zyrtarët e BE-së.

Roli i saj u shfuqizua nga partia në pushtet “Ëndrra Gjeorgjiane” në një veprim të kritikuar nga Brukseli, dhe bisedimet e pranimit tani kanë ngecur mes paralajmërimeve për prapambetje demokratike.

“Si një vend i vogël, është e qartë se interesi ynë është të jemi pjesë e një komuniteti, e një familjeje dhe të jemi pjesë e programeve që përbëjnë BE-në, dhe aspak të jemi vendimmarrës të barabartë si vendet që kanë qenë në origjinën e kësaj organizate dhe janë shumë më të fuqishme”, tha Zourabichvili.

“Mendoj se është shumë logjike nëse doni të keni një organizatë që mund të marrë vendime në mënyrë efikase”, shtoi ajo.

Moldavia, kërkesa e së cilës për anëtarësim është binjake me atë të Ukrainës, tha se kërkonte të shihte detajet e propozimeve.

“Ne jemi të gatshëm të marrim përgjegjësi në një fazë të hershme dhe do të mirëpresim mundësinë për të marrë pjesë dhe për të ndihmuar në formësimin e këtyre diskutimeve”, tha një zyrtar i lartë moldav.

“Në të njëjtën kohë, anëtarësimi i plotë – me të drejta të barabarta dhe pjesëmarrje të plotë në vendimmarrjen e BE-së – duhet të mbetet objektivi i qartë dhe përfundimtar”, shtoi ai.

Ukraina, e cila ka kryer reforma të gjera, si pjesë e procesit të pranimit edhe pse përballet me agresionin e Rusisë, ka hezituar ta mbështesë idenë.

“Nëse flasim për anëtarësim në BE, ai duhet të jetë i plotë”, tha presidenti Volodymyr Zelensky në nëntor.

Mali i Zi, vendi kandidat më i përparuar në rrugën e tij të pranimit në BE, gjithashtu këmbëngul se nuk ka nevojë të rishikohen kushtet – sipas të cilave i është dhënë anëtarësimi dhe pret të përfundojë procesin e verifikimit këtë vit.

“Fakti është se BE-ja tashmë përbëhej nga 28 shtete anëtare”, tha presidenti malazez, Jakov Milatović .

“Dhe aktualisht, kemi 27 për shkak të Brexit-it. Në këtë drejtim, nëse Mali i Zi bëhet shteti i 28-të anëtar i BE-së deri në vitin 2028, padyshim, përgjigjja nëse ka nevojë për reforma apo jo, varet nga udhëheqësit e BE-së”, shtoi ai.

Plani në lidhje me të drejtat e reduktuara të votës u propozua në fund të vitit të kaluar nga zyrtarët dhe qeveritë pro-BE-së – për t’i dhënë jetë një procesi zgjerimi që po bllokohet gjithashtu nga Hungaria dhe disa vende të tjera – nga frika se mund të sillte konkurrencë të padëshiruar për tregjet lokale ose të kompromentonte interesat e sigurisë.

Hungaria ka kërcënuar vazhdimisht të vërë veton ndaj anëtarësimit të Ukrainës në BE.

Komisionerja e BE-së për zgjerimin, Marta Kos tha se propozimet konkrete do të paraqiteshin në shkurt ose mars.

Ajo shtoi se një element krejtësisht i ri po nxiste një ndjenjë të re urgjence.

“Kemi forca të jashtme shkatërruese që do të donin të na shihnin duke dështuar – ato po punojnë kundër vendeve tona kandidate, ne jemi objektivi kryesor”, tha ajo.

Plani do të duhet të zhvillohet në detaje nga Komisioni Evropian, përpara se t’u paraqitet udhëheqësve kombëtarë dhe ka të ngjarë të diskutohet në samitet e ardhshme të Këshillit, si dhe të vlerësohet nga juristët për – të parë se si përshtatet me traktatet themelore të BE-së.

Ndërsa kandidatët po zbatojnë reformat e nevojshme për t’u bërë anëtarë të bllokut, Kos tha se kishte ende nevojë për punë –  për të bindur anëtarët ekzistues për mbështetje të mjaftueshme.

“Negociatat janë një pjesë teknike, ne duhet të marrim në konsideratë pjesën politike, që janë vendet anëtare”, tha ajo. //a.i/

The post Planet për një BE me dy nivele, Rama për “Politico”: Ide e mirë appeared first on Agjencia Telegrafike Shqiptare.

TIRANË, 16 janar /ATSH/ Gjykata e Shkallës së Parë në Tiranë me kërkesë të prokurorisë së Tiranës sekuestroi pasuritë e një shtetasi spanjoll A.C në Shqipëri.

Gjykata sekuestroi shoqëri tregtare, mbi 23 hektarë tokë në Dhërmi, automjete e llogari bankare të të dyshuara se janë produkt i veprës penale “Pastrimi i produkteve të veprës penale ose veprimtarisë kriminale”.

Sipas prokurorisë, nga hetimet rezultoi se shtetasit A.C., i ati shtetasi D.I. dhe partnerja e tij, shtetasja M.M., rezultuan të përfshirë në një skemë mashtrimi duke krijuar kompani një shtete të ndryshme si Spanjë, Portugali, Shqipëri, Shtetet e Bashkuara të Amerikës, Republika Dominikane dhe Estonia. Vlera e përfituar përmes kësaj skeme arrin shumën 30 milionë euro.

“Në territorin e shtetit shqiptar, shtetasit e mësipërm, vepruan nëpërmjet shoqërisë “Wingwort” sh.p.k dhe 2 (dy) shoqërive të tjera të regjistruara në Regjistrin Tregtar, me të njëjtin objekt veprimtarie “Aktivitet në fushën e turizmit, hapja e menaxhimi i hoteleve, godinave etj”, “Menaxhim i pasurive të paluajtshme, shërbime agjenci turistike”, nëpërmjet shoqërive të krijuara të përfshirë në kontrata, transferta dhe shkëmbime tregtare me shoqëri të huaja me vendndodhje në Bullgari, Sllovaki, Malajzi, (Labuan vend offshore). Këto shoqëri ka nënshkruar kontratë shitblerje pasuri e paluajtshme dhe ka blerë pasuri të paluajtshme në Dhërmi me vlera dukshëm më të ulëta se sa vlera e tregut”, njoftoi prokuroria.

Nga verifikimet e kryera sipas prokurorisë “ka rezultuar se këto subjekte ushtrojnë të njëjtin aktivitet dhe kanë të njëjtën adresë, me administratorë këta shtetas. Subjektet rezultojnë me status “pezulluar”, çka rrit dyshimet për ekzistencën e një aktiviteti të përbashkët ekonomik të mundshëm dhe përdorim formal të subjekteve për qëllime të fshehjes apo transferimit të të ardhurave me origjinë të dyshimtë, veprime që mund të përbëjnë elementë të veprës penale të “Pastrimit të produkteve të veprës penale””.

“Shtetasi D.I., është subjekt i një hetimi nga Audiencia Nacional në Spanjë për mashtrim piramidal dhe pastrim parash, lidhur me veprimtarinë e tij financiare ndërkombëtare. Hetimi lidhet kryesisht me aktivitetet e tij në kompaninë Madeira Invest Club dhe shoqëri të tjera të tij financiare. Në qëndër të skemës qëndron A.C., i njohur në rrjetet e koduara si “Luis” apo “Cryptospain”. Ai komunikonte me klientët në platformën Telegram, duke i bindur të investonin shuma që nisnin nga 1.5 milionë euro, pa pasur detyrimin të identifikoheshin. Kjo e bënte të pamundur gjurmimin e transaksioneve financiare. Sipas hetimeve, rrjeti kriminal kishte ngritur kompani fiktive në Portugali, SHBA, Estoni, Republikën Dominikane dhe Shqipëri, për të fshehur qarkullimin e parave. Dy prej këtyre kompanive, “Wortned” dhe “Wortonova”, u regjistruan në Qëndrën Kombëtare të Biznesit në Tiranë në qershor 2024, me adresë në rrugën “Teodor Keko”. Të dyja kompanitë kishin si objekt aktivitetin turistik dhe menaxhimin e hoteleve, por sipas dokumenteve, ato nuk zhvilluan ndonjë veprimtari të vërtetë. Pronari i “Wortned” ishte vetë A C., ndërsa “Wortonova” figuron në pronësi të shtetases rumune M.M. me administrator të përbashkët D. I. babai i tij”, njoftoi prokuroria.

Bazuar në veprimet hetimore të kryera dhe provat e mbledhura, rezulton se është kryer vepra penale “Pastrimi i produkteve të veprës penale ose veprimtarisë kriminale”.

“Në përputhje me ligjin, duke pasur parasysh seriozitetin e veprës, dëmin e shkaktuar dhe mundësinë e fshehjes ose shfrytëzimit të pasurive të fituara në mënyrë të paligjshme, sugjerojmë dërgimin e çështjes në gjykatë për gjykim për veprën penale të sipërpërmëndur si dhe vendosjen e masës së sekuestros mbi pasuritë e identifikuara gjatë hetimit, si më poshtë: Pasuria e ndodhur në Zonën Kadastrale nr. 1481, me sipërfaqe 13.66 Hektarë, në adresën Dhërmi, Vlorë, në vendin e quajtur Kolia, “Tokë Kullotë”;  Pasuria në Zonën Kadastrale nr. 1481, me sipërfaqe 9.5 Hektarë, në adresën Dhërmi, Vlorë, në vendin e quajtur Megali-Langadhea, “Tokë Kullotë”;  Shoqëria ‘Wortend’; Shoqëria ‘Wingwort’;  Shoqëria ‘Wortnova’;  Automjeti, Toyota, Land Cruiser; Automjeti Mercedez Benz, AMG G 63; dhe Llogaritë bankare në të gjitha bankat e nivelit të dytë ku mund të ketë llogari aktive bankare”, njoftoi prokuroria e Tiranës.

/m.q/j.p/

The post Përfitoi 30 milionë euro duke krijuar kompani fiktive, sekuestrohen pasuritë e shtetasit spanjoll appeared first on Agjencia Telegrafike Shqiptare.

TIRANË, 16 janar /ATSH/ Gjykata e Posaçme e Apelit për Korrupsionin dhe Krimin e Organizuar la në fuqi vendimin për sekuestrimin e pasurive të Jamarbër Malltezit dhe bashkëshortes së tij, Argita Malltezit.

Vendimi u mor sot me trup gjykues monokratik të përbërë nga gjyqtari Engert Pëllumbi, i cili rrëzoi ankimimin Jamarbër dhe Argita Malltezit, për heqjen e sekuestros preventive dhe vendosi që të miratojë vendimin e datës 27 tetor 2025 të Gjykatës së Posaçme të Shkallës së Parë për Korrupsionin e Krimin e Organizuar.

Gjykata ka sekuestruar 25 pasuri të vajzës dhe dhëndrit të ish-kryeministrit Sali Berisha, në kuadër të dosjes për aferën Partizani.

Gjykata e Posaçme Kundër Korrupsionit dhe Krimit të Organizuar (GJKKO) ka kaluar për gjykim dosjen e ish-kompleksit sportiv “Partizani”, në të cilën ish-kryeministri Sali Berisha, akuzohet për “Korrupsion pasiv i funksionarëve të lartë shtetërorë ose i të zgjedhurve vendorë”.

Ndërkohë, Jamarbër Malltezi akuzohet nga SPAK për kryerjen e veprave “Korrupsioni pasiv i funksionarëve të lartë shtetërorë ose i të zgjedhurve vendorë”, si dhe “Pastrimi i produkteve të veprës penale ose veprimtarisë kriminale”.

SPAK e akuzon Berishën se, gjatë kohës që ishte kryeministër, ka përdorur funksionin e tij për të favorizuar dhëndrin Jamarbër Malltezi, në procesin e privatizimit të ish-kompleksit “Partizani”. Sipas SPAK, ky privatizim është bërë në mënyrë të parregullt dhe me ndikim të paligjshëm nga Berisha, duke sjellë përfitime të padrejta për Malltezin dhe dëm ekonomik për shtetin. Berisha i ka cilësuar akuzat si politike.

/m.q/j.p/

The post Apeli i GJKKO lë në fuqi sekuestrimin e pasurive të Jamarbër dhe Argita Malltezit appeared first on Agjencia Telegrafike Shqiptare.

PRISHTINË, 16 janar/ATSH/ Nën masa të larta të sigurisë u sollën sot në gjykatë të pandehurit, Blagoje Spasojeviq, Vladimir Toliq dhe Dushan Maksimoviq, të cilët akuzohen për sulmin terrorist në Banjskë në shtatorin e vitit 2023.

Në sallë ndodhen edhe zyrtarët policorë që u lënduan në këtë sulm e që janë Alban Rashiti, Çlirim Shaqiri, Mirsad Kryeziu dhe Sedat Dushi.

Në këtë sulm mbeti i vrarë rreshteri policor, Afrim Bunjaku.

Seancën në rastin Banjska po e udhëheq kryetari i trupit gjykues, Ngadhënjim Arrni. Ndërsa, deri tani këtë gjykim e ka udhëhequr gjyqtari, Arben Hoti por me avancimin e tij në Gjykatën e Apelit Hoti u zëvendësua me Arrnin.

Gjykimi në rastin e sulmin terrorist Bansjka ka nisur rishtazi për shkak të ndryshimit të trupit gjykues, ndërsa edhe sot dy të akuzuarit Blagoje Spasojeviq dhe Vladimir Toliq nuk u deklaruan rreth fajësisë ndërsa, Dushan Maksimoviq tha se nuk është fajtor për veprat të cilat i vihen në barrë me aktakuzën e Prokurorisë.  /Kosovapress/

The post Të akuzuarit për sulmin terrorist në Banjskë dalin para gjykatës appeared first on Agjencia Telegrafike Shqiptare.

PRAGË, 16 janar /ATSH-DPA/- Kryeministri çek, Andrej Babiš dhe qeveria e tij e re fituan dje një votëbesim të detyrueshëm në parlament, një muaj pasi morën detyrën.

Ligjvënësit miratuan kabinetin e ri të djathtë me 108 vota pro dhe 91 kundër.

Koalicioni qeverisës përfshin partinë populiste të krahut të djathtë ANO të Babis, Partinë e Motoristëve dhe Partinë e Lirisë dhe Demokracisë së Drejtpërdrejtë (SPD) të ekstremit të djathtë.

Sipas kushtetutës çeke, çdo qeveri e sapoemëruar duhet të kërkojë një votëbesim brenda 30 ditëve.

Vota pasoi një diskutim më shumë se 25-orësh në Dhomën e Ulët, gjatë të cilit opozita akuzoi koalicionin për mbrojtjen e anëtarëve të saj nga ndjekja penale.

Babis përballet me hetime për mashtrim të dyshuar me subvencione, ndërsa themeluesi i SPD-së dhe kryetari i parlamentit Tomio Okamura është nën hetim për nxitje të gjuhës së urrejtjes. Të dy gëzojnë imunitet parlamentar.

Një pikë tjetër polemike ishte largimi i qeverisë nga mbështetja e fortë për Ukrainën që karakterizonte administratën e mëparshme.

Babis theksoi se Republika Çeke dhe qytetarët e saj ishin përparësia e tij kryesore.

Ai premtoi deportim më të shpejtë të shtetasve të huaj kriminelë dhe hodhi poshtë miratimin e euros. Ai gjithashtu kritikoi politikat e BE-së për klimën si të dëmshme për industrinë.

Lidhur me politikën e jashtme, Babis përjashtoi pjesëmarrjen çeke në çdo mision të mundshëm paqeruajtës në Ukrainë, duke thënë se iniciativa e municioneve me bazë në Pragë për të mbështetur Ukrainën do të vazhdonte vetëm në një rol koordinues, pa përdorur paratë e taksapaguesve çekë.

Programi ka furnizuar Kievin me më shumë se 4 milionë fishekë deri më sot. //a.i/

The post REPUBLIKA ÇEKE – Qeveria e kryeministrit Babis fiton votëbesimin appeared first on Agjencia Telegrafike Shqiptare.

MADRID, 16 janar /ATSH-ANSA/ – Këngëtari spanjoll Julio Iglesias ka thyer heshtjen me një deklaratë të postuar në profilin e tij në Instagram, pas akuzave për sulm seksual, abuzim me pushtetin dhe shfrytëzim në punë të ngritura nga dy ish-punonjës, për të cilat Zyra e Prokurorit Publik Spanjoll ka hapur një hetim paraprak.

“Mohoj kategorikisht se kam abuzuar, detyruar ose nuk kam respektuar ndonjë grua”, shkroi këngëtari 82-vjeçar duke mohuar të gjitha akuzat dhe duke i quajtur dëshmitë “të rreme”.

“Këto akuza më shkaktojnë trishtim të madh. Nuk kam dëgjuar kurrë një mizori të tillë, por ende kam forcën t’u tregoj njerëzve të gjithë të vërtetën dhe të mbroj dinjitetin tim përballë një fyerjeje kaq të rëndë”, shton kantautori, një nga artistët më të famshëm të popit latin me 300 milionë shitje albumesh.

Në mesazh, Iglesias falënderoi gjithashtu njerëzit që e mbështesin, duke folur për “dashurinë dhe besnikërinë” e tyre dhe duke i siguruar ata se ka gjetur “shumë ngushëllim” tek ata. /os/

The post MUZIKË – Julio Iglesias mohon akuzat për abuzim seksual: Më shkaktuan një trishtim të madh! appeared first on Agjencia Telegrafike Shqiptare.

TIRANË, 16 janar /ATSH/ Agjencia e Administrimit të Pasurive të Sekuestruara dhe të Konfiskuara (AAPSK) publikoi në faqen e saj zyrtare versionet e përditësuara për vitin 2025 të Katalogut të Pasurive të Sekuestruara dhe Katalogut të Pasurive të Konfiskuara.

Këta katalogë janë publikuar fillimisht për herë të parë gjatë muajve shkurt dhe mars 2025 dhe tashmë janë përditësuar për të reflektuar të gjitha ndryshimet, zhvillimet dhe lëvizjet që kanë ndodhur gjatë vitit 2025 deri në fund të tij, në kuadër të administrimit të pasurive nga AAPSK. Përditësimi i tyre përfaqëson vijimësinë e një procesi të rregullt dhe gjithëpërfshirës inventarizimi të pasurive të vendosura nën administrimin e Agjencisë.

Publikimi dhe rifreskimi i katalogëve synon rritjen e transparencës, forcimin e llogaridhënies institucionale dhe garantimin e aksesit të hapur në informacion për qytetarët, institucionet dhe të gjitha palët e interesuara. Katalogët ofrojnë një pasqyrë të detajuar mbi pasuritë e sekuestruara dhe të konfiskuara, statusin ligjor të tyre dhe mënyrën e administrimit nga AAPSK.

Në lidhje me këtë proces, Kryeadministratorja e AAPSK, Risena Xhaja, u shpreh se “publikimi dhe përditësimi i vazhdueshëm i katalogëve të pasurive të sekuestruara dhe të konfiskuara është një angazhim konkret i AAPSK për transparencë dhe administrim të përgjegjshëm. Për herë të parë, këto pasuri po dokumentohen dhe bëhen publike në mënyrë të strukturuar, duke krijuar një standard të ri në administrimin e tyre dhe duke forcuar besimin e publikut dhe institucioneve në këtë proces.”

AAPSK sqaron se vlerat e pasurive të pasqyruara në katalogë, të shoqëruara me pasaportat përkatëse, nuk përfaqësojnë vlerën e tyre të tregut. Këto vlera janë referuese dhe janë marrë në bazë të dokumentacionit zyrtar dhe dosjeve hetimore përkatëse. Publikimi i pasurive realizohet për qëllime transparence dhe informimi, dhe nuk ka si objektiv shitjen apo tjetërsimin e tyre.

Agjencia e Administrimit të Pasurive të Sekuestruara dhe të Konfiskuara mbetet e angazhuar në zbatimin e parimeve të ligjshmërisë, eficiencës, transparencës dhe interesit publik, duke garantuar një administrim sa më të rregullt dhe profesional të pasurive që i janë besuar.

Katalogët e përditësuar për vitin 2025 janë tashmë të disponueshëm për konsultim në faqen zyrtare të AAPSK.

/m.q/j.p/

The post AAPSK publikon katalogët e përditësuar të pasurive të sekuestruara dhe të konfiskuara për vitin 2025 appeared first on Agjencia Telegrafike Shqiptare.

UASHINGTON, 16 janar /ATSH-DPA/- Pas kërcënimeve kundër Iranit, Shtetet e Bashkuara të Amerikës po përforcojnë praninë e tyre ushtarake në Lindjen e Mesme.

“New York Times”, duke cituar dy zyrtarë amerikanë, raportoi se aeroplanmbajtësja “USS Abraham Lincoln” dhe disa anije shoqëruese po lëvizin nga Deti i Kinës Jugore në rajon dhe pritet të mbërrijnë brenda rreth një jave.

Gjithashtu, po vendosen armë dhe pajisje shtesë mbrojtëse, që do të pasohen nga avionë luftarakë.

Media amerikane “Axios” raportoi në mënyrë të ngjashme se “USS Abraham Lincoln” po shkon drejt rajonit. Pentagoni ende nuk e ka konfirmuar dislokimin.

“Fox News”, duke cituar burime ushtarake, raportoi se të paktën një aeroplanmbajtëse amerikane po dërgohej në Lindjen e Mesme, megjithëse nuk specifikoi se cila ishte.

Që nga fillimi i protestave masive kundër qeverisë autoritare të Iranit, më shumë se dy javë më parë, presidenti i SHBA-së Donald Trump e ka kërcënuar vazhdimisht vendin me ndërhyrjen e SHBA-së.

Protestat u shkaktuan, ndër të tjera, nga një krizë e rëndë ekonomike, inflacion i lartë dhe pakënaqësi e përhapur me udhëheqjen në Teheran.

Forcat e sigurisë së Iranit i kanë shtypur brutalisht protestat, me raportime për mijëra të vdekur.

The post FOKUS – SHBA-ja përforcon ushtrinë në Lindjen e Mesme mes tensioneve në Iran appeared first on Agjencia Telegrafike Shqiptare.

UASHINGTON, 16 janar /ATSH-AA/ – Presidenti i SHBA-së, Donald Trump, njoftoi të enjten formimin e një “Bordi të Paqes” për Rripin e Gazës.

“Është nder i madh për mua të njoftoj se Bordi i Paqes është formuar. Anëtarët e Bordit do të shpallen së shpejti, por mund të them me siguri se është bordi më i madh dhe më prestigjioz i mbledhur ndonjëherë në çdo kohë, në çdo vend”, shkroi Trump në Truth Social.

I dërguari i SHBA-së, Steve Witkoff, njoftoi të mërkurën se faza e dytë e një marrëveshjeje armëpushimi kishte filluar si pjesë e planit 20-pikësh të Trump për t’i dhënë fund luftës në Gaza.

Në një postim të veçantë, Trump tha se faza tjetër e planit të tij “zyrtarisht” filloi.

“Si Kryetar i Bordit të Paqes, unë po mbështes një Qeveri Teknokratike Palestineze të sapoemëruar, Komitetin Kombëtar për Administrimin e Gazës, të mbështetur nga Përfaqësuesi i Lartë i Bordit, për të qeverisur Gazën gjatë tranzicionit të saj. Këta udhëheqës palestinezë janë të përkushtuar pa u lëkundur për një të ardhme paqësore!” tha ai.

Trump tha se një “marrëveshje gjithëpërfshirëse për demilitarizimin” me Hamasin do të sigurohet me mbështetjen e Egjiptit, Turqisë dhe Katarit.

Ai tha se marrëveshja e propozuar do të kërkonte që grupi palestinez të dorëzonte armët e tij dhe të çmontonte rrjetin e tuneleve të tij.

“Hamasi duhet të përmbushë menjëherë angazhimet e tij, duke përfshirë kthimin e trupit të fundit në Izrael, dhe të vazhdojë pa vonesë drejt demilitarizimit të plotë. Siç e kam thënë më parë, ata mund ta bëjnë këtë në mënyrën e lehtë ose në mënyrën e vështirë.

“Populli i Gazës ka vuajtur mjaftueshëm gjatë. Koha ka ardhur tani”, shtoi ai.

Trump njoftoi një plan 20-pikësh në shtator që përshkruante një kornizë armëpushimi që përfshin lirimin e robërve izraelitë, tërheqjen e Izraelit nga Gaza, formimin e një administrate teknokratike dhe vendosjen e një force ndërkombëtare stabilizimi, së bashku me një kërkesë që Hamasi të çarmatoset.

Izraeli ka vrarë më shumë se 71.400 persona, shumica prej tyre gra dhe fëmijë, dhe ka plagosur mbi 171.300 në një ofensivë brutale që nga tetori 2023 që e la Gazën në rrënoja.

Pavarësisht një armëpushimi që filloi më 10 tetor, Izraeli ka vazhduar të sulmojë, duke vrarë 451 palestinezë dhe duke plagosur më shumë se 1.200, sipas Ministrisë së Shëndetësisë së Gazës.

The post SHBA – Trump njofton formimin e “Bordit të Paqes” për Gazën appeared first on Agjencia Telegrafike Shqiptare.

TIRANË, 16 janar/ATSh/ Kontigjenti VII i Forcës Tokësore u nis sot drejt Bullgarisë në kuadër të misionit të NATO-s në Novo Selo.

Ministri i Mbrojtjes, Pirro Vengu vlerësoi Forcat Tokësore të cilat ndodhen në vijën e parë të sigurisë kolektive.

Sipas tij, “ky është  një tjetër mision për efektivët e Forca Tokësore dhe një tjetër mundësi për ta mbajtur flamurin shqiptar lart, krah për krah me flamujt aleatë”.

Vengu vlerësoi po ashtu kontigjenti VI, që përmbylli me sukses misionin, duke përfaqësuar Shqipërinë me profesionalizëm, disiplinë dhe përgjegjësi të lartë.

“Kontigjenti VII merr stafetën, gati për të treguar se përkushtimi, gatishmëria dhe standardet e NATO-s janë vlera që Forca Tokësore i mban në çdo mision”, u shpreh Vengu.

Duke filluar nga 29 nëntori 2022, Forcat e Armatosura janë angazhuar në Aktivitetin e Vigjilencës së Përforcuar (eVA) në Novo Selo, Bullgari.

Kontingjenti i FARSH i përbërë nga 30 ushtarakë, dislokohet në përbërje të grup-batalionit të NATO-s në kufijtë lindorë të Aleancës. Vend drejtues i këtij misioni është Italia dhe rotacioni i kontingjenteve është çdo 6 muaj.

/m.m/j.p/

The post Vengu: Forca Tokësore, në vijën e parë të sigurisë kolektive në Bullgari appeared first on Agjencia Telegrafike Shqiptare.

TIRANË, 16 janar/ATSh/ Situata në territorin e qarkut Shkodër, paraqitet e qëndrueshme dhe në përmirësim gradual.

Në përditësimin e situatës, Prefektura Shkodër njofton se në zonën e Dajçit vërehet rënie e nivelit të ujit, ndërsa te “Urrelat e Shirqit” nuk ka më prani uji. Aksi rrugor i Obotit vijon të ketë prezencë uji rreth 20–30 cm, por me tendencë rënieje të vazhdueshme.

Prefektura e qarkut Shkodër informoi se transporti i banorëve në zonat e prekura vijon të realizohet nga Regjimenti i Këmbësorisë së Veriut, me një automjet me kalueshmëri të lartë dhe 5 efektivë të Forcave të Armatosura.

Në territorin e bashkisë Vau Dejës, Malësi e Madhe, Pukë dhe Fushë Arrëz situata paraqitet e qëndrueshme dhe nën kontroll. Nuk raportohen problematika apo situata emergjente.

Sipas të dhënave të Drejtorisë së Ujitjes dhe Kullimit Lezhë, nivelet e ujit në pikat monitoruese vijojnë të jenë nën kuotat kritike. Niveli i lumit Drin në Bahçallëk është në kuotën 7.2 m, ndërsa lumi Buna regjistrohet në kuotën 8.30 m në Pazar dhe 6.40 m në Dajç. Hidrovoret e Velipojës vijojnë të funksionojnë normalisht në kuotën -1.90 m dhe punojnë në kapacitet të plotë, duke garantuar menaxhimin e prurjeve.

Nga DRV Shkodër raportohet se nuk ka probleme me qarkullimin rrugor. Në akset malore rekomandohet qarkullimi me goma dimërore dhe/ose zinxhirë.

Sipas Prefekturës Shkodër, kontraktorët e mirëmbajtjes rrugore shprehen se qarkullimi në akset Qafë Mali – Fierzë dhe K/Hadroj – Q/Bënë kryhet me goma dimërore/zinxhirë.

Akset rrugore Dedaj–Razëm, Bogë–Qafë Thore-Theth dhe Hani Hotit-Vermosh janë të kalueshme, por kërkohet respektim rigoroz i rregullave të qarkullimit, sinjalistikës dhe përdorimi i gomave dimërore ose zinxhirëve.

Institucioni i Prefektit të Qarkut Shkodër, në bashkëpunim me strukturat përgjegjëse, vijon të jetë në terren, duke monitoruar në mënyrë të vazhdueshme situatën.

/e.i/j.p/

The post Bie niveli i ujërave në tokat e përmbytura në qarkun e Shkodrës appeared first on Agjencia Telegrafike Shqiptare.