Reshjet e dendura të shiut gjatë ditëve të fundit kanë shkaktuar vërshime në disa zona të vendit, duke sjellë dëme materiale në disa komuna.
Megjithatë, ndryshe nga vitet e kaluara kur Komuna e Vushtrrisë ishte ndër më të goditurat, këtë herë ka pasur më pak raportime për vërshime në këtë komunë.
Kryetari i Komunës së Vushtrrisë, Ferit Idrizi, në një prononcim për Telegrafin ka thënë se situata aktuale është rezultat i ndërhyrjeve të vazhdueshme që janë bërë gjatë mandatit të tij në shtretërit e lumenjve, përroskave dhe kanaleve kulluese.
Sipas Idrizit, në fillim të mandatit gjendja e këtyre shtretërve nuk ka qenë e mirë, pasi për një periudhë të gjatë nuk ishte bërë pothuajse asnjë mirëmbajtje.
“Në fillim të mandatit, gjendja e shtretërve të lumenjve, por edhe e përroskave dhe kanaleve kulluese në të gjithë territorin e Komunës së Vushtrrisë nuk ka qenë e mirë. Për një periudhë të gjatë nuk është bërë pothuajse asgjë për mirëmbajtjen e tyre, gjë që ka sjellë bllokimin e shtretërve me dhe, mbeturina dhe shkurre. Si pasojë e kësaj gjendjeje, Komuna e Vushtrrisë ndër vite është përballur vazhdimisht me vërshime, duke rrezikuar pronën, infrastrukturën publike dhe sigurinë e qytetarëve, veçanërisht vërshimet e vitit 2021 që shkaktuan dëme milionëshe”, ka thënë Idrizi.
Ai theksoi se menjëherë pas marrjes së mandatit, ndër prioritetet kryesore të komunës ka qenë identifikimi i zonave më problematike dhe ndërhyrja konkrete në to.
“Fillimisht është bërë identifikimi i zonave më problematike, e më pas kemi filluar me ndërhyrje konkrete, ku është bërë pastrimi, zgjerimi dhe në disa raste edhe betonimi i shtretërve të lumenjve. Po ashtu, është bërë hapja dhe zgjerimi i përroskave në të gjithë territorin e Komunës së Vushtrrisë, si dhe janë trajtuar kanalet kulluese që më herët kanë qenë të bllokuara”, tha Idrizi.
Ai bëri të ditur se “janë trajtuar shtretërit e lumenjve Silnica, Tërstena, Podranqa, lumin që kalon nëpër fshatin Smrekonicë, lumin që vjen nga Sllakoci e kalon nëpër fshatrat Ceceli, Ropicë, Samadrexhë, Maxhunaj deri në lumin Silnica, por edhe lumenj të tjerë që kalojnë nëpër territorin e komunës".
Sipas tij, janë pastruar përroskat në fshatrat Stanoc i Epërm, Novolan, Pantinë, Akrashticë, Vërnicë, Bukosh, Druar, Dumnicë, etj, ndërkaq gjithashtu është bërë edhe hapja e kanaleve kulluese në tërë territorin e Komunës së Vushtrrisë”.
Idrizi tha se kjo punë e vazhdueshme ka ndikuar drejtpërdrejt në zvogëlimin e rrezikut nga vërshimet në komunë.
“Gjendja aktuale është dukshëm më e qëndrueshme dhe më e menaxhueshme krahasuar me periudhat e mëparshme. Në shumicën e zonave janë reduktuar rreziqet nga vërshimet, falë ndërhyrjeve të realizuara dhe monitorimit të vazhdueshëm të situatës në terren. Megjithatë, mbetemi të vetëdijshëm se kjo është një çështje që kërkon angazhim të përhershëm, prandaj do të vazhdojmë me investime, mirëmbajtje të rregullt dhe masa parandaluese për të garantuar siguri afatgjate për qytetarët tanë”, tha ndër të tjera Idrizi. /Telegrafi/
Tre persona kanë marrë lëndime trupore një aksident i cili ka ndodhur sot rreth orës 13:50 mes trenit dhe një veture në fshatin Grabovc të Poshtëm.
Lajmin për Telegrafin e ka konfirmuar zëdhënësja e Policisë së Kosovës për rajonin e Prishtinës, Flora Ahmeti.
Ahmeti tha se me rastin po merret Njësiti i Trafikut Rajonal.
“Rreth orës 13:50 kemi pranuar informatën për një aksident trafiku në fshatin Grabovc i poshtëm. Në këtë aksident ka qenë i përfshirë një tren dhe një automjet . Si pasojë e aksidentit, tre persona kanë marrë lëndime trupore . Me rastin po merret Njësiti i Trafikut Rajonal”, ka thënë Ahmeti. /Telegrafi/
Spanjolli Xavi Hernandez është gati të kthehet në karrierën e tij si trajner dhe synon Ligën Premier.
Mediat angleze kanë deklaruar se ish-mesfushori dhe trajneri i Barcelonës është një nga favoritët për të marrë drejtimin e Manchester Unitedit.
Megjithatë, pavarësisht raportimeve që sugjerojnë se negociatat tashmë janë duke u zhvilluar, burimi më i famshëm i futbollit u përpoq të sqaronte të gjithë situatën.
Gazetari Fabrizio Romano konfirmoi se ndërsa Xavi është në radar, nuk ka dialog të drejtpërdrejtë midis dy palëve në këtë fazë.
Si kujtesë, Xavi ka qenë i papunë për gati dy vjet, pasi u largua nga Barcelona.
Romano deklaron se Xavi ka pushuar dhe është duke kërkuar në mënyrë aktive projektin e tij të radhës dhe deklaron se ish-mesfushori i Barcelonës do të "do të donte" të stërviste në Ligën Premier.
Siç dihet, Unitedi shkarkoi Ruben Amorimin nga detyra e trajnerit të ekipit nga Old Trafford disa ditë më parë. /Telegrafi/
Drejtori i Shërbimit Korrektues të Kosovës, Ismail Dibrani thotë se në vjeshtën e vitit 2027 do të pranohen të burgosurit e parë nga shteti danez.
Ai njofton se ka filluar trajnimi i grupit të parë të stafit me rregulla të sistemit të burgjeve në Danimarkë. Në intervistën për KosovaPress, ai thekson se nuk kanë interes për marrëveshje me shtete të tjera për transferimin e të burgosurve në Kosovë.
Ai gjithashtu flet për rastet e parandalimit të kontrabandës brenda burgjeve, por edhe përfshirjen e zyrtarëve korrektues në këto raste.
Në këtë intervistë, drejtori Ismail Dibrani thekson se drejtor i burgut në Gjilan do të jetë Rasim Selmani, po ashtu njofton se është zgjedhur edhe guvernatori nga shteti danez.
“Është vjeshta e vitit 2027 kur do të pranohen të burgosurit e parë nga shteti danez. Kështu që atje janë duke bashkëpunuar ngushtë grupet teknike të dy shteteve, sepse janë të themeluara dy komitete drejtuese nga shteti i Kosovës dhe shteti i Danimarkës, të cilët janë duke hartuar planet se si do të funksionojë ky burg. Ka filluar trajnimi i stafit, sepse ju e dini që atje do të respektohet rendi shtëpiak danez, ka filluar trajnimi i grupit të parë... Shumica e stafit që do të punojnë në këtë burg do të trajnohet në Danimarkë sipas rregullave dhe sistemit danez të burgjeve. Përveç aspektit të përfitimit të praktikave më të mira të sistemit danez, ne do të kemi mundësi që këto praktika t’i implementojmë edhe në burgje të tjera, ato praktika që janë edhe në përputhje me legjislacionin tonë”, deklaron ai.
Dibrani thotë se në këtë burg nuk do të vendosen të burgosur me rrezikshmëri shumë të lartë, persona të dënuar për terrorizëm apo të burgosur me probleme të rënda të shëndetit mendor.
KosovaPress mëson edhe Belgjika, Franca dhe Britania e Madhe kanë bërë kërkesë për marrëveshje për transferimin e të burgosurve në Kosovë.
Megjithatë, Dibrani shpreh kundërshtinë e tij, duke thënë se “nuk do të ishte e rrugës që në këtë situatë ta ngarkojmë vetën”.
“Si Shërbim Korrektues nuk kemi interes që të lidhim marrëveshje të tjera për shumë arsye. Po, ka pasur shumë kërkesa prej shumë shteteve të Bashkimit Evropian, por që rekomandimi i Shërbimit Korrektues të Kosovës do të jetë jo marrëveshje të reja sepse kemi mjaft punë për të bërë me këto institucione, me këta të burgosur që kemi të shtetasve tanë. Dhe nuk do të ishte e rrugës që në këtë situatë ta ngarkojmë vetën edhe me të burgosur të shteteve të tjera”, shton ai.
Buxheti i vitit të ardhshëm parasheh rreth tetë milionë euro për investime kapitale për Shërbim Korrektues të Kosovës.
Drejtori i ShKK-së, Ismail Dibrani thotë se kanë planifikuar ndërtimin e burgut të Lipjanit dhe Qendrës Korrektuese në Prizren.
“Planifikohet ndërtimi i burgut të Lipjanit, Qendrës Korrektuese për gram por që është projekt tre vjeçar. Ndërtimi i Qendrës së Paraburgimit dhe Qendrës Korrektuese në Prizren, për momentin është vetëm Qendër e Paraburgimit, por atje është planifikuar që të ndërtohet edhe një qendër por që do të jetë me disa nivele ku atje do të kenë mundësi vendosen edhe të burgosurit që kanë dënim të plotfuqishëm, kjo për të lehtësuar edhe lëvizjet e familjarëve nga Dragashi, Prizreni, Gjakova, Rahoveci dhe komuna të tjera”, tregon Dibrani në intervistën për KosovaPress.
Në anën tjetër, Dibrani bën të ditur se gjatë tri viteve të fundit janë regjistruar mbi 600 raste të parandalimit të kontrabandës brenda institucioneve korrektuese.
“Kemi pasur numër më të vogël të kontrabandës që kemi hasur brenda institucioneve korrektuese dhe kemi pasur rritje të numrit të parandalimeve. Vetëm në tri vitet e fundit kemi mbi 600 raste të parandalimit të kontrabandës krahasuar me vitet tjera, në periudhën e njëjtë ku kemi pasur 100 raste të parandalimit të kontrabandës. Natyrisht rezultat dhe sukses i jashtëzakonshëm ka qenë edhe mbështetja e madhe që kemi pasur edhe qeveria.
Siç e dini është themeluar edhe institucioni pëe trajtimin e personave me nevoja të veçanta, me mbështetjen e qeverisë, Ambasadës Amerikane, partner kryesor strategjik gjatë kësaj periudhe kemi pasur EULEX-in, Këshillin e Evropës, OSBE-n që na kanë ndihmuar në shumë trajnime, hartimin e legjislacionit sekondar dhe në ngritjen profesionale të stafit, sepse organizohen me dhjetëra punëtori apo pjesëmarrës janë me qindra zyrtarë të cilët ju kanë nënshtruar këtyre trajnimeve”, thotë ai.
Të burgosurit përdorin metoda të ndryshme për futjen e kontrabandës, përfshirë përmes familjarëve, trupit, ushqimit, por edhe mjeteve më të sofistikuara si dronët.
Në disa raste ndihmohen edhe nga zyrtarë korrektues, por sipas Dibranit këto raste janë në ulje.
“Fatmirësisht viteve të fundit ky numër ka ardhur duke u zvogëluar edhe si rezultat i masave, kemi pasur raste kur edhe mbikëqyrësit e lartë, por edhe oficerë, jo në numër të madh janë arrestuar, janë edhe sot në vuajtje të dënimit por ka raste që edhe janë në procedura. Por, fati i mirë që ky numër ka ardhur në vazhdimësi duke u zvogëluar dhe numri më i madh tash ju e dini që ka shumë metoda. Kemi problemin e dronëve, metoda më të sofistikuara përmes të cilave të burgosurit tentojnë të fusin kontrabandën brenda. Po ashtu, edhe kur nga jashtë tentojnë të hedhin kontrabandë brenda mureve, ku ata pastaj gjatë aktiviteteve arrijnë t’i fusin edhe brenda.
Por, natyrisht janë shumë mënyra dhe metoda ku të burgosurit arrijnë dhe gjejnë rrugë edhe në burgjet me sigurinë më të lartë në botë ka kontrabandë. Por neve jemi duke bërë përpjekje maksimale që kjo dukuri të zvogëlohet. Jemi në konsultim edhe me institucionet tjera të sigurisë që të sigurojmë edhe anti-dron por edhe pajisje të tjera të penguesve të valëve, të cilët na i mundësojnë shumë më lehtë që siguria në institucionet tona të ngritet edhe më tepër”, shprehet Dibrani.
Shërbimi Korrektues i Kosovës gjatë vitit të kaluar është vlerësuar me Çmimin Ndërkombëtar të Ekselencës nga Organizata Ndërkombëtare e Burgjeve dhe Shërbimeve Korrektuese (ICPA), për projektin “Rehabilitimi Gjithëpërfshirës dhe Kujdesi Shëndetësor”.
Dibrani thotë se të burgosurit po përfshihen në programe rehabilituese, të cilat ndikojnë risocializimin e tyre.
“Kemi fituar çmimin e ekselencës ndërkombëtare që radhitemi në vendin e parë, krahas Singaporit, krahas Kanadasë, krahas Finlandës, në trajtimin shëndetësor dhe në reformën e programeve rehabilituese. Kemi arritur rekorde sa i përket programeve rehabilituese sepse vetëm vitin që po e përfundojmë tani [viti 2025], kemi arritur të nënshkruajmë me dhjetëra marrëveshje të bashkëpunimit me shumë organizata vendore dhe ndërkombëtare dhe si rezultat i kësaj është rritur edhe numri i pjesëmarrjes së të burgosurve në këto programe rehabilituese.
Vetëm gjatë këtij viti [viti 2025] kemi afër 600 persona që janë të përfshirë në programe rehabilituese, për herë të parë kemi listë të pritjeve, ku të burgosurit janë në pritje për të marrë pjesë në programe rehabilituese”, përfundon ai.
Në gjitha qendrat korrektuese në Kosovë janë mbi 1750 të burgosur, prej tyre janë 1100 të dënuar dhe 600 të paraburgosur. Ndërkaq, kapaciteti në të gjitha burgjet e Kosovës është 2200 shtretër. /KP/
Kryeministri i RMV-së, Hristijan Mickoski nuk do t'i kërkojë falje prokurores Lençe Ristovska me arsyetimin se nuk ja ka përmendur emrin e saj në intervistë.
Në përgjigjen ndaj pyetjes së “Sloboden Peçat” drejtuar Qeverisë, nëse Mickoski do t’i kërkojë falje Ristoskas pasi e quajti “mediokre” dhe pasi e mbështeti konstatimin e gazetares, e cila tha se Ristoska është pjesë e një “matrice klienteliste-politike”, si dhe nëse kjo paraqet presion ndaj saj që të zhbllokojë pasurinë e partisë dhe të heqë dorë nga ndjekja penale, nga Qeveria thanë se është e çuditshme se si Ristoska e ka njohur veten në atë intervistë.
“Në lidhje me pyetjen tuaj gazetareske, ju informojmë se kryeministri Hristijan Mickoski në intervistë nuk e ka përmendur Lençe Ristoskan me emër dhe mbiemër. Ai ka folur për mediokritete dhe është e çuditshme se si Lençe Ristoska u vetë-njoh në atë intervistë” thuhet në përgjigjen e shkurtër të Qeverisë.
Prokurorja kërkoi nga Mickoski falje publike pas intervistës së tij për “vecer.mk”, ku Mickoski foli se pas ndryshimeve në Kodin Penal të propozuara nga deputetë të OBRM-PDUKM-së, më zëshëm kishin reaguar disa individë nga ish-Prokuroria Speciale Publike (PSP).
SHBA-të janë në proces të sekuestrimit të një tjetër cisterne nafte.
Duke cituar një zyrtar amerikan, thuhet se anija kishte lundruar më parë nga Venezuela.
Anija, e quajtur cisterna Olina, po sekuestrohet pranë Trinidadit dhe është ndalimi i pestë i anijeve në javët e fundit.
Anija Olina, e cila sipas bazës së të dhënave publike të transportit detar Equasis mbante flamurin e rremë të Timorit Lindor, kishte lundruar më parë nga Venezuela dhe ishte kthyer në rajon kur u sekuestrua të premten, raporton Reuters, duke cituar një burim transporti detar të njohur me çështjen.
"Sistemi i gjurmimit të vendndodhjes AIS të anijes ishte aktiv për herë të fundit 52 ditë më parë në Zonën Ekonomike Ekonomike të Venezuelës, në verilindje të Curacaos", thotë kompania britanike e menaxhimit të riskut detar Vanguard.
"Konfiskimi vjen pas një ndjekjeje të zgjatur të cisternave të lidhura me dërgesat e sanksionuara të naftës venezueliane në rajon."
Anija Olina u nis nga Venezuela javën e kaluar e ngarkuar plotësisht me naftë.
Ajo ishte pjesë e një flotiljeje që u largua menjëherë pasi SHBA-të kapën Nicolas Maduron, presidentin e rrëzuar të Venezuelës, më 3 janar.
Reuters raporton gjithashtu se SHBA-të vendosën sanksione ndaj cisternës në janar të vitit të kaluar, kur ajo u emërua Minerva M.
Uashingtoni tha se kjo ishte për shkak se dyshohet se ishte pjesë e flotës në hije të cisternave të naftës. /Telegrafi/
Ka ndërruar jetë ish-ministri i Financave, Ali Sadriu në moshën 75 vjeçare.
Lajmin për ndarjen nga jeta të ish-ministrit Sadriu e kanë bërë të ditur familjarët e tij.
Ali Sadriu ishte nga fshati Davidovc, komuna e Shtimes. Shkollën fillore e kreu në vendlindje, ndërsa shkollën e mesme në Ferizaj. Studimet universitare i përfundoi në Fakultetin Ekonomik në Prishtinë.
Ali Sadriu ishte gjithashtu iniciator, bashkëthemelues dhe aktivist i Lidhjes Demokratike të Kosovës (LDK) në Shtime, që nga themelimi gjatë viteve 1989–2000.
Ai ishte deputet i Kuvendit të Kosovës në disa legjislatura si dhe ministër në Qeverinë e parë të pasluftës, në Ministrinë e Ekonomisë dhe Financave (2002–2004). /Telegrafi/
John Obi Mikel i ka lëshuar një paralajmërim të ashpër trajnerit të ri të Chelseat, Liam Rosenior, duke pretenduar se 41-vjeçari mund ta humbasë punën shpejt nëse nuk fiton tre lojtarë kyç në menaxhimin e dhomës së zhveshjes së ekipit.
Ish-mesfushori i “Bluve”, i cili kaloi më shumë se një dekadë në Stamford Bridge, theksoi rëndësinë e menaxhimit të talenteve të profilit të lartë mes dinamikës së vazhdueshme të fuqisë së lojtarëve.
Në podkastin “The Obi One”, Mikel përmendi Cole Palmer, Enzo Fernandez dhe Moises Caicedo si shtyllën kurrizore që Rosenior duhet ta mbajë të lumtur.
Obi Mikel
“Si ia del Liam Rosenior ta menaxhojë këtë skuadër që të mos e humbasë dhomën e zhveshjes, të mos humbasë lojtarë si Cole Palmer, si Enzo Fernandez, si Caicedo?”, ka thënë fillimisht Mikel.
“Këta janë shtylla kurrizore. Ke nevojë për atë shtyllë kurrizore për të qenë i lumtur me veten. Duhet t’i tërheqësh ata me vete. Dhe nëse ai nuk arrin ta bëjë këtë, do ta humbasë atë dhomë zhveshjeje dhe gjithçka do të mbarojë para se ta kuptosh”, përfundoi ish-ylli i Chelseat.
Chelsea renditet në vendin e tetë me një fitore në nëntë ndeshje në ligë, duke e bërë kualifikimin në Ligën e Kampionëve kritik për të ardhmen afatgjatë të Rosenior.
Ndërsa Mikel theksoi ndikimin e treshes, shumë e shohin kapitenin e klubit Reece James si liderin e vërtetë të dhomës së zhveshjes, mbështetja e të cilit mbetet thelbësore. /Telegrafi/
Një pikë loti i shkon ndër mjekër për t’i rënë në ujin e ndotur që përplaset valë-valë në katin e parë të shtëpisë së saj. “E zeza unë. Më iku mundi, djersa familjes. Në atë shtëpi kam edhe jetën e burrit që më vdiq në Greqi duke punuar. Erdhi e më mori uji gjithçka. E zeza unë, e mjera unë”, përsërit nën traumën e dukshme, Lumie Muçaj, gruaja 57-vjeçare që jeton prej 26 vitesh në zonën e ish-kënetës në Durrës.
“Përmbytja nuk na erdhi nga Zoti, por nga shteti, unë jam Socialiste”, ndërhyn nga ballkoni i katit të dytë një e moshuar, që pas çdo fjalie ankese ripërsërit se socialiste është dhe se tani “shteti të vendosi dorën në zemër”, shkruan Faktoje.al
Mbi 840 familje në zonën e ish-kënetës janë nën ujë, me dëme të mëdha kryesisht në elektroshtëpiake, pasi vërshimi i ujërave të ndotur (ujërat e shiut të bashkuara me ujërat e zeza dhe mbetje nafte) ndodhi në harkun kohor 15-20 minuta, duke mos u lënë mundësi që të lëviznin orendi dhe pajisjet e tjera. Nga Porto-Romano, deri në thellësi të qytetit të Durrësit përmbytjet janë katastrofike.
Pyetja që kërkon përgjigje më shumë se nga ekspertë duhet të vijë nga Prokuroria e Durrësit, e cila po diskuton hapjen e hetimeve kryesisht për akuzën: “shkatërrim i pronës me pasoja të rënda; dhe shpërdorim detyre”. Kjo nisur edhe nga fakti se në duar ka një rast të rëndë për t’i dhënë përgjigje. Një 54-vjeçar punonjës i ndërmarrjes komunale Plazh Durrës, u gjet i mbytur nga polumbarët në një kanal kullues pranë zonës së Plepave.
Hidrovor mbi kuota
Ankesa kudo, bashkë me pikëpyetjen nga erdhi kjo fatkeqësi, nga Zoti, natyra të cilët Durrësin e përmbytën nga padija apo interesat e vogla të treshes; pushtet qendror-pushtet lokal-biznes?!. “Mbyllja e hidrovorit të vjetër dhe spostimi i hidrovorit të ri në një kuotë më të lartë kanë sjellë këtë pasojë katastrofike”-thotë për Faktoje.al, inxhnieri hidro dhe i porteve, Tomor Spahiu.
Dalja jashtë funksionit e hidovorit të vjetër u bë për t’i hapur rrugë ndërtimit të portit të ri tregtar, që sot shërben kryesisht për çisternat e naftës. Për ekspertin Spahiu, por edhe shumë studiues të tjerë, kjo solli pasojën katastrofike që po kalon Durrësi sot, por me gjasë do e përjetojë në çdo kohë. “Spostimi i hidrivorit u bë për t’i krijuar fasilitet Kastratit”, thekson Spahiu.
Historiku i hidrovorit të vjetër
Durrësi është një zonë që preket nga përmbytjet dhe jo pa qëllim që nga viti 1928 funksiononin dy kanale të mëdha kulluese. I pari shtrihej nga Vila e Zogut deri në Porto Romano, ndërsa i dyti nga Shën Avlashi deri në Plepa. “Të dyja këto kanale janë bllokuar. Nuk di me çfarë logjike, me çfarë ekspertize e me çfarë qëllimi ka ndodhur kjo situatë”, thotë inxhinier Spahiu. Sipas tij, studimet e mëparshme inxhinierike ishin të sakta dhe efikase, fillimisht nga austriakët ndërmjet luftës së Parë Botërore, më pas nga italianët, sistemi komunist dhe vijuar deri katër vite më parë. “Durrësi nuk duhej të përmbytej. Përveç dy kanaleve kryesore që u bllokuan një tjetër arsye madhore e përmbytjeve është spostimi i hidrovorit”, sugjeron Spahiu. Hidrovori i vjetër ishte në kuotën më të ulët të Durrësit dhe tërhiqte të gjithë sasinë ujore, por tre vite më parë hapësira e hidrovorit i kaloi kompanisë Kastrati që do të niste aty ndërtimin e portit të ri tregtar, i cili sot shërben kryesisht për ankorimin dhe më pas shkarkimin e cisternave të naftës dhe nënprodukteve të saj.
Hidrovori i ri është gati jo funksional
Pasi dhanë për zhvillim portual hapësirën e hidrovorit të vjetër, në nëntor 2021, Bashkia Durrës hapi garën për ndërtimin e hidrovorit të ri. Me fondin 20.5 milionë euro tre kompani, bashkim operatorësh, morën përsipër ndërtimin e kësaj vepre, por vendi ku do ngrihej edhe sot sjell çudi, sidomos në aspektin inxhinierik. “Hidrovori i ri është bërë në kuotë të lartë, është pothuajse jo funksional”, thekson eksperti Spahiu. Gazetari Geri Emiri, drejtues i medias Afora dhe banor i Durrësit, tha për Faktoje.al se investimet për hidrovorin e ri, apo devijimi i kanaleve kulluese solli përkeqësim të situatës së përmbytjeve.
“Investimet kanë sjellë devijime të kanaleve ekzistuese që megjithëse ishin ndërtuar për ujërat e shiut nga kodrat dhe tokat bujqësore, shërbejnë edhe si “kanalizime të hapura” për ujërat e përdorura të zonave periferike të qytetit”, thotë Emiri.
Investimet kanë sjellë devijime të kanaleve ekzistuese që megjithëse ishin ndërtuar për ujërat e shiut nga kodrat dhe tokat bujqësore, shërbejnë edhe si "kanalizime të hapura" për ujërat e përdorura të zonave periferike të qytetit”
Më tej shton se: “Ndërtimi nga qeveria shqiptare dhe vendosja në funksion e një hidrovori të ri po në zonën e Porto-Romanos, nuk ka sjellë përmirësime të dukshme në përballimin e përmbytjeve në qytet, përkundrazi që prej vitit 2025 ato po vijnë dhe po zgjerohen në hartën e zonave që prekin”. “Në disa hulumtime në Median Amfora ne kemi dokumentuar sesi Ujësjellësi i Durrësit që prej vitit 2013 ka marrë mbi 150 milion euro kredi për të investuar në rrjetin e ujësjellësit dhe të kanalizimeve, por dukshëm nuk ka arritur që ta përmirësojë situatën në terren”, thotë Emiri.
Pasoja
Si për ironi, rruga “Shën Asti” (kleriku i parë martir, i kryqëzuar nga Romakët në vitin 78 pas krishtit, në Durrës), është aq e përmbytur sa pasojat notojnë kudo. Uji i shiut, përzier frikshëm me ujëra të zeza dhe naftë, ka nxjerrë në sipërfaqe shapka fëmijësh dhe lodrat e tyre, si shenjë domethënëse se përveç pasojave ekonomike, përhapja e infeksioneve të ndryshme nuk do jetë në kohë të largët.
“Ka pasur përmbytje edhe më parë por kurrë si tani. Kam 30 vite këtu dhe nuk ka pasur përmbytje të tillë. Nuk ka mbetur më asgjë. Kanë dalë jashtë përdorimit gjithë mobiliet, lavatriçe, frigorifer, sobë, kuzhina e gjitha është dëmtuar. Bleva dhe divane të reja para vitit të ri, tani nuk përdoren më. Katastrofë”, shprehet me dhimbje Albin Muçaj me origjinë nga Kukësi, i ardhur që në vitin 1996 në Durrës, teksa përsërit “shi ka rënë gjithnjë, edhe më shumë se këto dy ditë dhe nuk jemi përmbytur kështu”.
Ndodhemi në rastet kur nuk ka nevojë të trokasësh në dyert e lagura, pasi banorët të kërkojnë secili për hesap të tij për të treguar me ngulm dëmet. Halli është i përbashkët. Arsyeja që dëmet janë vërtetë shumë të mëdha lidhet me shpejtësinë e përmbytjes ku brenda 20 minutash uji kapërceu mbi 60 centimetra në të gjithë katet e para.
“Kam dëme shtëpie komplet. Dhjetë mijë euro mobilie më janë shkatërruar. Makina iku, shtëpia iku, kush do mi shpërblejë mua këta? U përmbytëm se bashkia hapi rezervuarin që të mos përmbytej një lokal dhe ujin e hodhi nga banesat. Po ashtu mbyllën edhe hidrovorin e vjetër”, flet plot acarim Altin Priftit, ndërsa këmbëzbathur vërtitet sa në oborrin e shtëpisë aq edhe buzë rrugës duke kërkuar me ngul: “të vijnë atë të bashkisë, ku janë”?. Në një nga daljet e fundit, kryetarja e Bashkisë Durrës, Emiriana Sako dhe Ministri i Mbrojtjes Pirro Vëngu ia faturuan problemin reshjeve të dendura të shiut.
Qyteti nën ujë
Në çdo rrugicë që futesh përballesh me të njëjtat probleme. Vetëm ata banesa që kanë qenë të ngritura të paktën 2 metra nga toka kanë pësuar më pak përmbytje, nga ish-këneta, deri në afërsi të Burgut të Durrësit, përmbytja vijon për të tretën ditë radhazi, ndërsa qyteti i Durrësit njohu një përmirësim të vogël të mërkurën, por prania e ujit edhe në zonën më të ngjeshur urbane vijon të jetë problem. “Kam shumë dëme në shtëpi, se e kam në kat të parë. Makinat janë dëmtuar dhe nuk e merr me mend se çfarë dëmesh na ka shkaktuar kjo përmbytje”, thotë një qytetar pranë zonës së Stadiumit të Durrësit.
“Kam të shkatërruar gjithë dhomën e gjumit të djalit me lavatriçe, frigorifer, televizor dhe çdo gjë. Jemi në katastrofë të madhe. Nuk kemi as ujë të pijshëm”, thotë për Faktoje, Bektash Shahini, një tjetër banor i Durrësit. Dëmtime të shumta janë kryesisht në automjete dhe bizneset e kateve të para, ndërsa ish-këneta ndodhet në situatë katastrofike. Hidrovori nuk ka punuar deri në orën 12 dhe këtë e dinë të gjithë. Kjo përmbytje është bërë me nxjerrë jashtë komunitetin nga këtu dhe me e bërë si 5 Majin në Tiranë, apo komunitete të tjera. As bashkia, as qeveria, as emergjanca nuk kanë ardhur. Zoti vuftë dorë mbi ne, se për shtet kemi mbaruar”, thotë për Faktoje, Mark Ndrea.
Zgjidhja pa zgjidhje
Për inxhinierin e njohur Tomor Spahiu zona e ish-kënetës, por edhe e gjithë pjesa urbane e Durrësit do kalojë katastrofë pas katastrofe edhe në vijim. “Duhet të rikthejnë në funksion hidrovorin e parë. Ai e mbante gjithë Durrësin. Po ashtu emergjente është hapja e dy kanaleve kryesore kulluese. Mënyra sesi është ndërtuar hidrovori i ri nuk vlen. Situata është shumë e rëndë, flas edhe si ekspert por edhe si banor i këtij qyteti”, thotë Spahiu, ndërsa e mbyll: “Ai që po e paguan është populli”.
“Ai që po e paguan është populli”
Prokuroria Durrësit pritet syrtarisht të dalë me njoftim për hapje të hetimeve, ndërsa situata vijon të jetë mjaft e rëndë, pavarësisht angazhimit të strukturave lokale dhe disa mjeteve të ushtrisë.
Reshje të kohëpaskohshme të shiut dhe borës në viset më të ulëta dhe borë në viset më të larta dhe në male do të ketë nesër paradite, kur do të fryjë erë e matur deri e përforcuar jugore, mbi 60 kilometra në orë. Pasdite reshjet do të jenë vetëm me borë.
“Për shkak të zbritjes së masës më të ftohtë ajrore nga veriu, pasdite dhe gjatë natës reshjet çdokund do të jenë vetëm me borë. Reshje më të rrëmbyeshme do të ketë në pjesët perëndimore, me ç’rast shtresa e borës në male do të rritet për 20 cm, ndërsa në vendet e tjera prej 5 deri 10 centimetra”, kumtoi Drejtoria për punë hidrometeorologjike.
Sipas parashikimit të DPHM-së, reshje lokale të borës do të ketë edhe të dielën, kur do të fryjë erë e përforcuar veriore, që do të vazhdojë të fryjë edhe të hënën. Nga fillimi i javës së ardhshme vende-vende temperaturat e mëngjesit do të zbresin edhe nën -10 gradë, ndërsa të ditës do të përqendrohen nën zero.
Në Shkup nesër paradite do të ketë reshje të kohëpaskohshme të shiut dhe borës, të cialt pasdite dhe gjatë natës do të jenë vetëm me borë. Reshje lokale të borës do të ketë edhe të dielën, kur do të fryjë erë e përforcuar veriore.
Pas përfundimit të numërimit të votave nga zgjedhjet e parakohshme të 28 dhjetorit, Paneli Zgjedhor për Ankesa dhe Parashtresa (PZAP) pritet të shqyrtojë edhe një ankesë.
Kështu tha në një prononcim për Telegrafin, ud.drejtori i sekretariatit të PZAP-së, Tefik Mahmuti.
Mahmuti tha se ankesa e cila është në pritje për shqyrtim në PZAP është nga PDK-ja.
“Të gjitha ankesat janë shqyrtuar dhe vetëm një ankesë e PDK-së ende nuk është shqyrtuar. Pritet që paneli shumë shpejt ta shqyrtojë dhe këtë ankesë. Ende ka afat të pranimit të ankesave në PZAP”, ka thënë Mahmuti.
Ndryshe, pas përfundimit të numërimit të votave pritet shpallja e rezultateve përfundimtare të këtyre zgjedhjeve të parakohshme nga KQZ-ja.
Sipas Ligjit për Zgjedhjet e Përgjithshme, palët kanë të drejtë të paraqesin ankesa në PZAP brenda 48 orëve. /Telegrafi/
Brett Ambler, i njohur më së miri si fëmija nga nga meme virale “Wait a minute, who are you”, është sërish në qendër të vëmendjes së internetit, këtë herë si i rritur.
Një video e kohëve të fundit ku shfaqet Ambler është bërë virale, duke grumbulluar gati 5 milionë shikime, me shumë përdorues që shprehin habi kur shohin atë tashmë të rritur.
Ambler fillimisht luajti në videoklipin për fëmijë të vitit 1989, Special Friends: Starring You on Kazoo , ku energjia e tij e gjallë dhe replika e paharrueshme e shndërruan atë në një ikonë interneti dekada më vonë.
Klipi u rishfaq vite më parë dhe u bë një meme e dashur për të gjithë.
Në klipin e publikuar së fundmi shumë shikues u habitën dhe nuk e njohën menjëherë Amblerin.
Megjithatë, nostalgjia u shfaq shpejt.
"Ajo buzëqeshje nuk ndryshoi kurrë tek ai”, komentoi një përdorues.
"Zëri i tij duket i njëjtë", shtoi një tjetër.
Një i tretë shkroi: "Gjithmonë pyesja veten se çfarë i ndodhi atij fëmije, kështu që jam i lumtur që patëm rastin ta shihnim."
Ambler, tani 45 vjeç, e ka përqafuar famën e tij si meme me përulësi dhe humor.
Gjatë viteve, ai ka folur në intervista rreth videos, është lidhur me fansat përmes platformave sociale dhe ka vazhduar të punojë në teatër dhe muzikë.
Ndërsa ai kurrë nuk priste njohje globale nga një performancë e fëmijërisë, prania e tij ka mbetur konstante.
Reagimi viral ndaj paraqitjes së tij të fundit është një shembull se sa thellë i lidh kultura e internetit brezat. /Telegrafi/
Redaktimi i imazheve në mjetin Grok AI të X është kufizuar vetëm për abonentët me pagesë, sipas një mesazhi të shfaqur nga chatbot.
Përdoruesit ishin në gjendje të ngarkonin një fotografi dhe t'i kërkonin Grokut ta ndryshonte imazhin, por sistemi i Al tani u përgjigjet kërkesave me këtë mesazh: "Gjenerimi dhe redaktimi i imazheve aktualisht janë të kufizuara vetëm për abonentët që paguajnë".
Kjo vjen pasi Fondacioni i Mbikëqyrjes së Internetit (IWF) paralajmëroi se kriminelët përdorën Grok për të krijuar imazhe të abuzimit seksual me fëmijë.
X dhe xAI, të dyja në pronësi të miliarderit Elon Musk, janë kritikuar ashpër ditët e fundit pasi shumë përdorues, kryesisht gra, thanë se kishin parë imazhe seksuale të gjeneruara nga Al të vetes në X.
Kryeministri britanik Keir Starmer e quajti këtë "të turpshme" dhe "të neveritshme".
Ai i tha X "ta merrte kontrollin mbi këtë çështje".
Ndryshe, Musk tha se një version i ri i Grok ishte publikuar dhe i nxiti përdoruesit të përditësonin aplikacionin e tyre, megjithëse nuk ishte menjëherë e qartë se çfarë përditësimesh përmbante versioni i ri.
Manjati i teknologjisë ka këmbëngulur më parë se "kushdo që përdor Grok për të krijuar përmbajtje të paligjshme do të vuajë të njëjtat pasoja sikur të kishte ngarkuar përmbajtje të paligjshme".
X ka thënë se ndërmerr veprime kundër përmbajtjes së paligjshme, përfshirë materialin e abuzimit seksual me fëmijë, "duke e hequr atë, duke pezulluar përgjithmonë llogaritë dhe duke bashkëpunuar me qeveritë lokale dhe zbatimin e ligjit sipas nevojës". /Telegrafi/
Testarossa është një nga emrat më legjendarë të Ferrarit dhe tani është rikthyer - këtë herë me një superveturë që ka mbi 1,000 kuaj fuqi.
Ferrari 849 Testarossa është një nga modelet ‘më të egra’ që ka dalë ndonjëherë nga Maranello, duke përzier elementët klasikë të dizajnit me teknologjinë më të fundit të përparuar.
Brenda Testarossas së re, luksi dhe funksionaliteti shkojnë krah për krah, me një kabinë të fokusuar te shoferi që synon të ofrojë një përvojë vërtet të veçantë pas timonit.
Paneli i instrumenteve i 849 Testarossa arrin një ekuilibër të këndshëm midis stilit klasik GT dhe sinjaleve të frymëzuara nga garat.
Ai shtrihet horizontalisht, me një pjesë të hollë të sipërme që përmban një ekran digjital të projektuar për të qenë i këndshëm për sytë.
Vlen të përmendet se nuk ka ekran qendror tradicional të infotainment.
Timoni sjell përsëri diçka që fansat kanë pritur me padurim: butona të vërtetë fizikë, duke përfshirë një buton mekanik të duhur për ndezje.
Nga ana teknologjike, gjithçka që dëshironi është e përfshirë. Testarossa ka Apple CarPlay, Android Auto, MyFerrari Connect dhe një panel karikimi pa tel të integruar.
Lëkura me cilësi të lartë dhe zbukurimet e punuara me dorë i japin kabinës një ndjesi premium.
Çdo detaj është projektuar për t'u dukur shkëlqyeshëm dhe për të funksionuar pa probleme, deri te kontrollet fizike për dyert dhe dritaret.
Sinqerisht, ulëset meritojnë një analizë të plotë më vete - janë shumë të mira.
Blerësit mund të zgjedhin midis dy opsioneve të ulëseve: ulëset komode ose ulëset më të forta të garave.
Ulëset komode kanë një pamje më të pastër dhe më të thjeshtë, ndërsa mbeten sportive.
Ndërkohë, ulëset e garave e çojnë veturën në një nivel tjetër me një dizajn më agresiv. /Telegrafi/
Trump ka deklaruar se NATO është e pafuqishme pa SHBA-në, duke pretenduar se morali i tij udhëhoqi vendimet mbi veprimet ushtarake të SHBA-së.
Presidenti i SHBA-së, Donald Trump, tha se “mund të jetë një zgjedhje” për Uashingtonin nëse do të duhej të zgjidhte midis kontrollit të Grenlandës dhe ruajtjes së aleancës së NATO-s, mes një përpjekjeje të ripërtërirë për të përvetësuar ishullin në Rrethin Arktik.
Trump la të kuptohej gjithashtu se aleanca do të ishte pa forcë pa SHBA-në, shkruan euronews.
“Mendoj se gjithmonë do të shkojmë mirë me Evropën, por dua që ata të ndryshojnë”, tha Trump.
“Nëse shikoni NATO-n, Rusia mund t'ju them se nuk është aspak e shqetësuar për asnjë vend tjetër përveç nesh”, shtoi ai.
Duke folur disa ditë pasi urdhëroi operacionin që rrëzoi Nicolas Maduron e Venezuelës dhe lëshoi kërcënime kundër shumë kombeve të tjera, Trump tha në një intervistë me New York Times se ndjenja e tij personale për të drejtën dhe të gabuarën përbën kufizimin e vetëm të autoritetit të tij për të vendosur forcën ushtarake amerikane në nivel global.
"Morali im, mendja ime është e vetmja gjë që mund të më ndalojë", tha Trump kur u pyet për kufizimet në fuqitë e tij ushtarake globale.
"Nuk kam nevojë për ligjin ndërkombëtar", vazhdoi ai.
“Por nuk dua të lëndoj njerëz”, tha presidenti amerikan.
Trump ka autorizuar sulme ushtarake në Iran, Irak, Nigeri, Somali, Siri, Jemen dhe Venezuelë që nga fillimi i mandatit të tij të dytë.
Pas kapjes së Maduros, ai ka lëshuar paralajmërime për Kolumbinë dhe ka ripërtërirë kërkesat për Grenlandën, një territor autonom brenda Mbretërisë së Danimarkës, e cila është pjesë e aleancës së NATO-s. /Telegrafi/
Sipas Sky Sport Italia, klubi i Ligës Premier, Nottingham Forest, ka ndërmarrë hapat e parë për të testuar gatishmërinë e Interit për të shitur mesfushorin italian Davide Frattesi gjatë këtij afati kalimtar.
Burime pranë negociatave bëjnë të ditur se drejtuesit e Forest kanë kontaktuar së fundmi Interin për bisedime fillestare, ndërsa klubi zikaltër ka qenë i qartë në qëndrimin e tij: çmimi i Frattesit është 35 milionë euro.
Mbetet për t’u parë nëse anglezët do të jenë të gatshëm të plotësojnë kërkesat financiare të Interit në ditët në vijim.
Përveç Nottingham Forest, interes për 24-vjeçarin kanë shfaqur edhe Galatasaray dhe Juventusi, të cilat po monitorojnë situatën e mesfushorit të Kombëtares italiane.
Nga ana tjetër, Sky Sport Italia raporton se Nottingham Forest nuk ka ndërmend të përfshijë Dan Ndoye në asnjë marrëveshje për Frattesin.
Madje, klubi anglez ka refuzuar edhe një qasje të fundit nga Napoli për shërbimet e sulmuesit anësor zviceran.
Forest planifikon ta mbajë Ndoye deri në fund të sezonit.
25-vjeçari ka regjistruar dy gola dhe një asistim në 21 paraqitje në të gjitha kompeticionet këtë sezon.
Napoli kishte tentuar transferimin e tij edhe verën e kaluar, përpara se Ndoye të kalonte përfundimisht te Nottingham Forest për një shumë prej 45 milionë eurosh.
Ndërkohë, edhe Frattesi nuk ka arritur të bindë plotësisht këtë sezon me fanellën e Interit, duke kontribuar me dy asistime në 15 paraqitje, ndërsa ka grumbulluar vetëm 506 minuta lojë në të gjitha garat. /Telegrafi/
Policia e Kosovës ka bërë të ditur se janë gjetur mbetje eshtërore që dyshohet se u përkasin personave të zhdukur gjatë luftës.
Në raportin policor thuhet se mbetjet eshtërore janë tërhequr nga IML për ekzaminime të mëtutjeshme mjeko-ligjore.
“Gjakovë / 1998-1999. Ekipet policore në koordinim me IML-në dhe njësitet tjera kompetente kanë hasur në mbetje eshtërore, të cilat dyshohet se i përkasin së paku një individi-personi, që figuron në listën e personave të zhdukur gjatë luftës së fundit në Kosovë 1998-1999”, thuhet në raport. /Telegrafi/
Një ngjarje e tmerrshme ndodhi në kryeqytetin e Hondurasit, Tegucigalpa, ku Gladys Aurora Lopez, deputete e Partisë Kombëtare, u lëndua rëndë nga një pajisje shpërthyese që shpërtheu vetëm disa centimetra larg kokës së saj.
Ngjarja ndodhi gjatë një interviste për mediat, kur Lopez po fliste qetësisht dhe papritmas një objekt u hodh drejt saj, duke shpërthyer në flakë pas goditjes në pjesën e pasme të qafës së saj.
Lopez mbijetoi, por pësoi dëmtime serioze, duke përfshirë djegie dhe dëmtime dëgjimi.
Disa persona të tjerë që ndodheshin pranë saj morën plagë të lehta.
Ky sulm ndodhi në një kohë të tensionuar politikisht, pas një rinumërimi të kontestuar të votave pas zgjedhjeve presidenciale të nëntorit, kur Nasry Asfura fitoi me një rezultat të ngushtë.
Presidenti i Kongresit, Luis Redondo, urdhëroi menjëherë një hetim dhe kërkoi shqyrtimin e kamerave të sigurisë dhe regjistrimeve të urgjencës për të identifikuar autorin.
Ndërkohë, presidenti i zgjedhur Asfura bëri thirrje për qetësi, duke theksuar se “kjo nuk duhet të ndodhë, pavarësisht motivit.”
Tomas Zambrano, kreu i grupit parlamentar të Partisë Kombëtare, e quajti këtë sulm një akt dhune të papranueshëm dhe akuzoi partinë në pushtet për krijimin e një klime armiqësore ndaj opozitës.
Ai kërkoi që Forcat e Armatosura dhe Policia Kombëtare të garantojnë sigurinë e ligjvënësve dhe të Kongresit, duke paralajmëruar se Honduras po hyn në një periudhë të pasigurt dhe të tensionuar politikisht. /Telegrafi/
Kryetari i Lidhjes Demokratike të Kosovës (LDK), Lumir Abdixhiku pas rezultateve nga zgjedhjet e 28 dhjetorit ka thënë se çdo votë e dhënë është përgjegjësi, respekt dhe obligim për të ardhmen.
Abdixhiku përmes një postimi në rrjetin social në Facebook ka shkruar se “Nuk është e tepër të përsëritet se rezultati zgjedhor nuk ishte ai që pritëm; larg madje”.
“Ju faleminderit nga zemra, të gjithë 126.102 qytetarëve të Kosovës që i besuan LDK-së në këto zgjedhje. Çdo votë e dhënë për ne është përgjegjësi, respekt dhe obligim për të ardhmen. Ju faleminderit për besimin, për durimin dhe për angazhimin në një garë të vaështirë. Nuk është e tepër të përsëritet se rezultati zgjedhor nuk ishte ai që pritëm; larg madje. Por është verdikt i qytetarëve të vendit tonë dhe para tij përulemi me respekt të plotë. LDK e asnjë individ nuk i shmanget asnjë përgjegjësie dhe asnjë reflektimi; kjo na dallon. Dalim faqebardhë në secilin veprim tonin”, ka thënë ai.
Tutje Abdixhiku ka shkruar se pas certifikimit të rezultateve do të organizohet dhe Kuvendi i LDK-së për siç tha “nga anëtarësia e partisë, vendoset fati i LDK-së”.
“Por njëkohësisht, dua të jem i qartë: LDK është parti institucionale. Çështjet tona nuk zgjidhen në statuse emocionale, as në klithma sociale, e as në debate të çastit. Pas certifikimit të rezultateve, sipas Statutit dhe traditës sonë demokratike, do të mblidhet Kryesia e LDK-së; dhe pas saj, siç kam paralajmëruar natën e zgjedhjeve, do të organizohet dhe Kuvendi i LDK-së, aty ku vendosë anëtarësia, e jo klithmat e interesave të ngushta. Në Kuvend, në organet legjitime të partisë, nga anëtarësia e partisë, vendoset fati i LDK-së. Aty do të trajtohen të gjitha çështjet politike, organizative dhe vendimmarrëse - mbi të gjitha të përgjegjësisë dhe të vizioneve tutje përpara. Kjo është mënyra jonë. Kjo ka qenë gjithmonë LDK-ja: përgjegjësi, maturi, rend institucional dhe respekt për demokracinë e brendshme”.
Por Abdixhiku i është drejtuar edhe atyre që e kanë “goditur” këtë parti.
“Një fjalë të drejtpërdrejtë kam dhe për ata që sot po e godasin LDK-në nga jashtë: qëllimet e tyre nuk kanë qenë kurrë të mira, as për LDK-në e as për arritjen e një rezultati më të mirë zgjedhor. LDK-ja nuk ndërtohet me sulme nga jashtë, e as me gëzim për humbjen e saj. LDK është më e madhe se çdo individ, por edhe më e fortë se çdo zë që synon ta dobësojë. Ne do ta bëjmë fatin tonë, me qetësi, me ndershmëri dhe me përgjegjësi; siç i ka hije kësaj shtëpie politike e cila nuk braktiset e as nuk goditet në ditët e saja më të vështira. Faleminderit secilit që na votoi, na mbështeti dhe na qëndroi pranë. Besimi juaj mbetet detyrimi ynë më i madh”, ka shkruar ndër të tjera kryetari i LDK-së. /Telegrafi/
Login
