Ikona e filmit francez, Brigitte Bardot, e cila vdiq të dielën në moshën 91 vjeçare, do të varroset në Saint-Tropez në Rivierën Franceze.

Funerali do të zhvillohet më 7 janar në kishën Notre-Dame-de-l'Assomption në Saint-Tropez, raportoi BFM TV.

Bardot, e cila u bë simbol i Francës në vitet 1950 dhe 1960, jetonte në një vendpushim ku, thotë ajo, gjente ngushëllim midis kafshëve dhe ia kushtoi jetën mirëqenies së tyre.

Brigitte Bardot

"Ajo ishte e bukur, nuk ka fjalë tjetër. Do të na mungojë shumë", tha të hënën për Reuters banori i Saint-Tropez, Philippe Volmier.Volmier tha se e njihte atë për 30 vjet dhe e kishte parë duke shëtitur qentë e saj në plazh.

Presidenti Emmanuel Macron tha të dielën se Bardot mishëron "një jetë lirie".

Ajo jetoi vetëm për pjesën më të madhe të jetës së saj, e rrethuar nga kafshë të shumta, përfshirë mace, qen dhe kuaj.

E njëjta i tha të përjavshmes franceze 'Paris Match' në vitin 2024 se donte të varrosej në kopshtin e saj.

Megjithatë, autoriteti lokal deklaroi se nuk kishte marrë asnjë kërkesë për një varrim privat. /Telegrafi/

Ndonëse u paralajmërua se punimet për autostradën Shkup-Bllacë do të nisin në fund të dhjetorit, megjithatë kjo nuk do të ndodh. Para tre javësh, zëvendësministrja e Transportit, Kaltrina Zekolli Shaqiri në Click Plus tha se vetëm kushtet klimatike mund t’i prolongojnë punimet.

“Kanë aplikuar diku 11 kompani të vendit dhe ndërkombëtare, rrethi është zvogëluar në tre kompani që i plotësojnë kushtet më shumë. Ajo që më gëzon është se ofertat janë brenda buxhetit të paraparë.

Madje disa shifra janë shumë më të kapshme sesa i kemi paramenduar ne se do t’i shohim kur t’i hapim. Mund të them se për shumë pak, apo brenda muajit do të fillojnë punimet në këtë rrugë. Këtë e them dhe uroj që kushtet klimatike mos të na vështirësojnë për të ngecur ndoshta për në janar-shkurt apo në pranverën e hershme për të filluar me energji të re dhe ritëm të plotë”, tha Kaltrina Zekolli.

Sot jemi 29 dhjetor, punimet nuk kanë nisur, jo për shkak kushteve klimatike, por siç sqarojnë nga kabineti i zëvendësministres arsyet e vonesës, janë procedurat burokratike të institucionit financiar dhe periudhës së festave të fundvitit.

“Siç dihet, ky projekt financohet pjesërisht me grant dhe pjesërisht me kredi nga kjo bankë, ndërsa vonesa ka ardhur si pasojë e procedurave burokratike të institucionit financiar dhe periudhës së festave të fundvitit. Nga ana jonë institucionale, të gjitha procedurat janë përfunduar dhe aktualisht presim vetëm miratimin final nga banka. Besojmë se shumë shpejt do të krijohen kushtet për fillimin e punimeve”, deklaroi Zekolli.

Ndryshe për këtë autostradë janë kryer vetëm 2 kilometrat e para, por as ato nuk munden të lëshohen në përdorim, derisa nuk ndërtohet edhe pjesa tjetër prej 10 kilometrave. Për realizimin e autostradës janë paraparë rreth 240 milionë euro, apo afërsisht 24 milionë euro për çdo kilometër. /tv21

Fondacioni i SC GjilaniT po vazhdon të dëshmojë se sporti është shumë më tepër se garë dhe emocione në fushë.

Me një frymë solidariteti dhe përgjegjësie shoqërore, Fondacioni ka mbështetur financiarisht Qendrën e Kujdesit Ditor “Pema”, Shoqatën “Handikos” dhe Shoqatën e të Verbërve në Gjilan, me nga 2 mijë euro secilën.

Kjo iniciativë humane u realizua falë përkrahjes së vazhdueshme dhe të pakursyer të partnerëve të çmuar të klubit – si El Bau, Demiri Gartenbau GmbH dhe Autovillage AG – të cilët qëndrojnë pranë SC Gjilanit jo vetëm në rrugëtimin sportiv, por edhe në misione me vlerë të lartë shoqërore.

Përfaqësuesit e klubit, së bashku me disa nga futbollistët dhe anëtarë të stafit teknik, vizituan nga afër këto tri institucione, ku u dorëzuan mjete simbolike financiare dhe dhurata modeste, si shenjë respekti, përkrahjeje dhe përkushtimi ndaj atyre që kanë më së shumti nevojë.

Fondacioni SC Gjilani mbetet i përkushtuar që edhe në të ardhmen të zgjerojë veprimtarinë e tij humanitare, duke mbështetur iniciativa dhe organizata që kontribuojnë drejtpërdrejt në mirëqenien dhe forcimin e komunitetit tonë./Telegrafi/

Paneli Zgjedhor për Ankesa dhe Parashtresa (PZAP) ka gjobitur subjektin politik Lista Serbe, me seli në Mitrovicë të Veriut, me 45,000 euro për shkelje të Kodit të Mirësjelljes gjatë fushatës zgjedhore për zgjedhjet e parakohshme parlamentare të 28 dhjetorit 2025.

Vendimi është marrë pas ankesës së parashtruar nga subjekti politik Kosovski Savez, me seli në Leposaviq, e cila u vlerësua si e bazuar nga PZAP.

Sipas vendimit, Lista Serbe është shpallur përgjegjëse për shkelje të Kodit të Mirësjelljes për Subjektet Politike, mbështetësit e tyre dhe kandidatët gjatë fushatës zgjedhore.

Në arsyetimin e vendimit thuhet se për këto shkelje Listës Serbe i është shqiptuar dënim me gjobë në vlerë prej 45 mijë euro.

PZAP ka njoftuar gjithashtu se Lista Serbe është e obliguar që gjobën e shqiptuar ta paguajë brenda afatit prej 15 ditësh, nga dita e plotfuqishmërisë së vendimit.

Zgjedhjet e parakohshme parlamentare në Kosovë janë mbajtur më 28 dhjetor 2025, ndërsa PZAP ka trajtuar disa ankesa që lidhen me mbarëvajtjen e fushatës zgjedhore./Telegrafi.

Dronët detarë që Ukraina ka përdorur për të goditur Flotën e Detit të Zi të Rusisë, tani po synojnë Rusinë në rrugë të reja ujore.

Brigada e 40-të e Marinës së Ukrainës tha javën e kaluar se një dron pa pilot "Barrauda" ishte në gjendje të depërtonte në pozicionet ruse, të linte mina dhe të godiste objektiva ruse, duke dëmtuar një bazë logjistike ruse dhe një anije të pajisur me mitraloz.

Sulmi vjen ndërsa Ukraina ka në dispozicion më shumë dronë detarë të projektuar për të gjuajtur objektiva ruse në sipërfaqe më të vogla ujore, transmeton Telegrafi.

Brigada ndau pamje luftimi që duket se janë filmuar nga një kamera në dron. Anija pa pilot mund të shihet duke lundruar në një sipërfaqe të gjerë ujore përpara se të lëvizë në një kanal shumë më të ngushtë me ujë kafe.

Videoja e publikuar së fundmi tregon një anije të kamufluar në një bazë, dhe më pas pamjet ajrore tregojnë një shpërthim të madh të ndjekur nga imazhe të një ndërtese të shkatërruar përgjatë ujit.

Pamjet tregojnë se sulmi nuk ndodhi në oqean të hapur, siç kanë ndodhur shumë nga sulmet me dronë detarë të Ukrainës, por në një rrugë ujore të brendshme të mbyllur, media ukrainase Militarnyi raportoi se sulmi ndodhi në lumin Dnipro.

Ukraina ka përdorur dronë në tokë, ajër dhe det për të mbledhur informacione mbi armikun dhe për të goditur objektivat ruse, dhe dronët e saj detarë kanë ndihmuar në dobësimin e Flotës së Detit të Zi të Rusisë.

Kievi nuk ka një marinë të mirëfilltë me anije të fuqishme, por dronët shumë më të lirë kanë ndihmuar në dëmtimin e anijeve luftarake të shtrenjta të Rusisë, madje duke e detyruar Rusinë të zhvendosë shumë anije më larg.

Megjithatë, përdorimi i dronëve në mjedise lumore ose në sipërfaqe më të vogla ujore është një zhvillim relativisht i ri për Ukrainën, duke hapur një gamë të re objektivash për teknologjinë e zhvilluar rishtazi.

Dronët e dedikuar për ato zona, siç është Barracuda ose të tjerë si Ursula ose Black Widow 2, janë teknologji më e re krahasuar me sisteme si dronët Sea Baby ose Magura për oqeanin e hapur. Ukraina po i përmirëson vazhdimisht dronët e saj detarë dhe po krijon të rinj. /Telegrafi/

Ish-deputeti i Lidhjes Demokratike të Kosovës (LDK), Agim Veliu, ka reaguar pas rezultatit zgjedhor të partisë, duke kërkuar përgjegjësi politike dhe reflektim të thellë brenda saj.

Në një reagim publik, Veliu ka theksuar se humbjet e njëpasnjëshme të LDK-së nuk janë rastësi, por “verdikt i qartë politik”, duke shtuar se mungesa e reflektimit pas tyre nuk përbën më thjesht gabim, por refuzim të përgjegjësisë.

Sipas tij, një parti që synon besimin e qytetarëve nuk mund të sillet sikur humbjet nuk kanë autor, ndërsa mbyllja ndaj kritikës, mungesa e analizës dhe kapja e vendimmarrjes kanë dëmtuar rëndë LDK-në dhe e kanë larguar nga misioni i saj.

Veliu ka kërkuar publikisht dhe pa ekuivoke: llogaridhënie politike për humbjet zgjedhore, transparencë të plotë mbi proceset e vendimmarrjes brenda partisë, dhe hapjen e menjëhershme të një procesi demokratik të brendshëm, me garë reale në të gjitha nivelet.

“Askush nuk është mbi partinë. Askush nuk ka mandat të përhershëm nga humbja”, ka shkruar ai, duke paralajmëruar se pa reflektim dhe ndryshim, drejtimi aktual i LDK-së nuk mund të mbrohet dhe nuk i shërben të ardhmes së partisë./Telegrafi/

Futbollisti Nemanja Matic iu bashkua këtë verë ekipit të Sassuolos, ku menjëherë fitoi vend në formacionin titullar, ndërsa mbron ngjyrat e klubit italian me Aro Muricin.

Gjatë një interviste për portalin “Four Four Two”, Matić u pyet për festimet e Xherdan Shaqirit dhe Granit Xhakës kundër Serbisë në Kupën e Botës, në vitet 2018 dhe 2022, ku të dy përdorën shqiponjën dykrenare – simbolin e flamurit shqiptar.

Matic e kritikoi këtë veprim, duke e konsideruar si një fitore politike, jo sportive.

“Unë i respektoj ata si futbollistë, kam luajtur kundër tyre disa herë në Ligën Premier. Por me këto gjëra të vogla ata fitojnë pikë të lira politike. Ata janë rritur në Zvicër. Me një veprim të tillë, nuk tregon respekt për vendin për të cilin luan. Nëse e do kaq shumë Shqipërinë, atëherë pse nuk luan për Shqipërinë? Kjo është pyetja ime”, deklaroi Matic.

Ai shtoi se dashuria për vendet të ndryshme nuk është problem, por sinqeriteti është thelbësor.

“Mund të duash disa vende, kjo nuk është problem. Unë e dua Serbinë, është vendi im. Gjithashtu e dua Anglinë, kam kaluar shumë kohë atje. Por kurrë nuk do të them se e dua Anglinë më shumë se Serbinë. Duhet të jesh i sinqertë”.

“Kam luajtur kundër Xhakës shumë herë dhe kurrë nuk kam pasur problem. Gjithmonë shtrëngonim duart, ai është një lojtar i mirë – ashtu si edhe Shaqiri. Por unë kurrë nuk do ta bëja për të provokuar dikë. I respektoj të gjithë”, ka thënë mesfushori. /Telegrafi/

Studimet e reja tregojnë se ajo që quajmë “talent i hershëm” shpesh nuk është çelësi i suksesit afatgjatë, përkundrazi, mund të jetë pengesë

Sipas ekspertëve, qasjet më të përdorura në arsimimin dhe zhvillimin e fëmijëve të talentuar shpesh bazohen në supozime të pasakta.

Hulumtimet e mëhershme mbi talentin dhe ekspertizën tek fëmijët janë mbështetur në korniza tradicionale, duke supozuar se arritjet varen nga shenjat e hershme të suksesit në shkollë, garat sportive apo aktivitetet muzikore, të kombinuara me aftësi si inteligjenca, koordinimi fizik apo muzikaliteti.

Megjithatë, studime më të reja, të udhëhequra Arne Güllich, profesor i shkencave sportive në RPTU Kaiserslautern-Landau, sugjerojnë se kjo nuk është rruga më e mirë për të zhvilluar fëmijë që do të jenë të suksesshëm në planin afatgjatë, raporton SciTechDaily, përcjell Telegrafi.

“Studimet tradicionale mbi suksesin dhe ekspertizën nuk e kanë trajtuar mjaftueshëm pyetjen se si janë zhvilluar individët e suksesshëm gjatë fëmijërisë së hershme. Grupi që kemi analizuar përfshinte fitues të Çmimit Nobel në shkencë, medalistë olimpikë, shahistë elitarë botërorë dhe interpretues kryesorë të muzikës klasike”, thekson Güllich.

Një gjetje veçanërisht domethënëse është se fëmijët që arrijnë rezultatet më të mira në moshë të re shpesh nuk janë ata që më vonë arrijnë suksesin më të madh në jetë. Për më tepër, individët që më pas u bënë shumë të suksesshëm nuk u fokusuan herët vetëm në një disiplinë të vetme.

Përkundrazi, ata eksploruan një gamë të gjerë aktivitetesh, nga lëndët akademike, te stile të ndryshme muzikore dhe sporte të ndryshme.

Bazuar në këto të dhëna, studiuesit nxjerrin disa rekomandime kyçe. E para dhe më e rëndësishmja është provimi i sa më shumë disiplinave. Kjo rrit gjasat që fëmija, me kalimin e kohës, të gjejë fushën që i përshtatet më së miri.

“Ata që arrijnë të gjejnë disiplinën optimale për veten zhvillojnë potencial më të madh për të mësuar gjatë gjithë jetës, kanë rrezik më të ulët nga faktorët që mund të ndërpresin karrierën dhe shanse më të mira për të arritur rezultate të nivelit të lartë”, shpjegon Güllich.

Prandaj, studiuesit këshillojnë prindërit dhe edukatorët që t’i inkurajojnë të rinjtë të provojnë aktivitete të ndryshme, duke u dhënë hapësirë për eksplorim, jo presion për specializim të hershëm. /Telegrafi/

Kryetari aktual i OBRM-Popullore, Ljubço Georgievski, shprehet se nuk e kupton pse autoritetet aktuale maqedonase janë kundër “propozimit francez”, kur ai e ka shfuqizuar politikën rigide bullgare.

“Para nesh është një propozim i Bashkimit Evropian, që ne e quajmë ‘propozimi francez’, i cili është shumë i qartë, shumë i saktë dhe nuk e kuptoj pse shkohet kundër atij propozimi”, thotë Georgievski në një intervistë për portalin “Racin”.

“Nuk guxojmë të harrojmë se ai ‘propozim francez’, praktikisht dhe de facto, ishte shfuqizim i një pozicioni rigid të politikës bullgare me atë qëndrimin e pakëndshëm se deri në vitin 1945 keni qenë bullgarë, ndërsa nga viti 1945 jeni maqedonas, që ishte miratuar nga parlamenti bullgar. Në Maqedoni i jepet shumë pak rëndësi faktit se ‘propozimi francez’ praktikisht e shfuqizoi këtë ide. Ai e anuloi atë qëndrim, sepse për ‘propozimin francez’ u votua gjithashtu edhe në parlamentin bullgar dhe, në vend që kjo të interpretohej si fitore, ne e interpretojmë si humbje. Nuk e di për çfarë arsyesh, ndoshta fillimisht për arsye të politikës ditore, por më pas kjo u bë pjesë e bllokadës sonë. Bullgaria evoluoi nga ajo pozitë dhe shohim se pas propozimit francez, qëndrimet provokuese nga politikanët bullgarë janë reduktuar në minimum. Tani edhe futja e bullgarëve në Kushtetutë na paraqitet si problem. Edhe protokolli na është problem, e deri te pozicioni më i ri që po e dëgjojmë muajt e fundit, ku ne u imponojmë kushte Bashkimit Evropian dhe Bullgarisë. Tani ne jemi ata që vendosim kushte ndaj BE-së, nëse duam të ecim përpara. E gjithë kjo tregon se ata që janë kryesorët dhe përgjegjësit për rrugën tonë drejt BE-së në këtë moment, nuk kanë një politikë serioze për ta kaluar këtë pikë të fundit dhe për të filluar integrimin tonë final evropian, përveç nëse po ndodh diçka pas skenave që ne nuk e dimë”, thotë Georgievski.

Pas një periudhe të gjatë heshtjeje pas tragjedisë personale, reperi nga Peja, Gjesti, ka rikthyer aktivitetin e tij në rrjetet sociale dhe ka tërhequr menjëherë vëmendjen e fansave.

Në postimet e fundit, Gjesti shihet me tatuazhe të reja, përfshirë një ku ka shkruar fjalën “Reaggeton”, duke lënë të kuptohet rikthimi i tij në muzikë dhe lidhja me stilin e tij artistik.

Kjo ka nxitur komente dhe reagime pozitive nga ndjekësit, të cilët e mirëpritën rikthimin e tij aktiv online.

Një detaj tjetër i dukshëm është se reperi ka fshirë disa fotografi personale, përfshirë ato ku shfaqej me familjen e tij, përfshirë edhe vëllanë e ndjerë, Eldionin.

Ky veprim shihet si një mënyrë për të menaxhuar emocionet dhe për të përgatitur një kapitull të ri në jetën dhe karrierën e tij.

Fansat kanë komentuar se rikthimi i Gjestit në rrjetet sociale mund të shënojë fillimin e një faze të re kreative dhe muzikore, ndërsa reperi duket i përqendruar në projekte të reja dhe në rikthimin e lidhjes me publikun e tij.

Ky rikthim vjen pas një periudhe të vështirë për Gjestin, duke pasur parasysh humbjen e rëndë të vëllait të tij dhe sfidat personale që e shoqëruan pas famës së fituar nga Big Brother VIP. /Telegrafi/

Mediat botërore kanë raportuar të hënën gjerë e gjatë për rezultatin zgjedhor të dalë pas zgjedhjeve, të cilat u mbajtën më 28 dhjetor.

“The Guardian” ka shkruar se kryetari i Lëvizjes Vetëvendosje, Albin Kurti, ka shënuar një fitore bindëse në zgjedhjet e parakohshme, duke i dhënë fund bllokadës politike në Kosovë.

Në artikull thuhet se fitorja në zgjedhjet e së dielës forcon mandatin e Kurtit për të çuar përpara reformat e brendshme, përfshirë zgjerimin e skemave të mirëqenies sociale dhe rritjen e pagave për punëtorët e sektorit publik.

“Megjithatë, ai përballet me sfida të mëdha, përfshirë tensionet me Serbinë, si dhe me sistemet shëndetësore dhe arsimore që mbesin prapa krahasuar me vendet fqinje të Ballkanit. Me pothuajse të gjitha votat e numëruara, Lëvizja Vetëvendosje e udhëhequr nga Kurti ka marrë mbi 49 për qind të votave, sipas rezultateve zyrtare, që nënkupton se atij i nevojiten vetëm disa partnerë të vegjël koalicioni për të formuar shumicën parlamentare”, ka shkruar “The Guardian”.

Jehona në mediat gjermane e zgjedhjeve në Kosovë

Deutsche Welle ka shkruar se partia në pushtet Vetëvendosje, e udhëhequr nga kryeministri Kurti, ka fituar gati 50 për qind të votave, pas bllokadës disamujore prej zgjedhjeve të shkurtit.

Al Jazeera ka raportuar se Kurti ka fituar gjysmën e votave të zgjedhjeve të së dielës, duke hapur rrugën për të formuar qeverinë e re pas bllokadës disamujore.

E “Politico” ka shkruar se Kurti ka deklaruar se synon të formojë shpejt një qeveri të re, pasi rezultatet paraprake treguan se partia e tij është në rrugë të mbarë për të fituar bindshëm zgjedhjet e parakohshme parlamentare të mbajtura të dielën.

“Lëvizja Vetëvendosje, parti e majtë në pushtet, ka fituar rreth 49 për qind të votave në një proces zgjedhor që u konsiderua jetik për t’i dhënë fund krizës politike njëvjeçare dhe për të ringjallur shpresat e bllokuara të vendit për anëtarësim në Bashkimin Evropian”, thuhet në artikull.

BBC në një artikull që i kushtohet rezultatit zgjedhor ka shkruar se partia nacionaliste shqiptare Vetëvendosje ka shënuar fitore bindëse në zgjedhjet parlamentare në Kosovë, sipas rezultateve paraprake.

“Me 90 për qind të votave të numëruara, kjo parti – emri i së cilës do të thotë “vetëvendosje” – ka marrë 50.8 për qind të votave, duke ia siguruar një mandat të tretë në pushtet liderit të saj Albin Kurti”, thuhet në artikull. “Dy partitë kryesore opozitare, Partia Demokratike e Kosovës (PDK), e qendrës së djathtë, dhe Lidhja Demokratike e Kosovës (LDK) kanë marrë përkatësisht 20.98 për qind dhe 13.89 për qind të votave. Vetëvendosje kishte fituar edhe zgjedhjet e mbajtura në shkurt, por pa arritur të sigurojë shumicën parlamentare. Që nga ajo kohë Kosova ka qenë pa një qeveri funksionale”.

E në artikullin e Euronews thuhet se partia e majtë Vetëvendosje ka shënuar një fitore bindëse në zgjedhjet parlamentare, pas një bllokade politike 10-mujore që kishte pamundësuar formimin e qeverisë pas zgjedhjeve të mbajtura në shkurt.

“Partia e kryeministrit të Kosovës, Albin Kurti, ka dalë fituese bindëse në zgjedhjet e parakohshme parlamentare të mbajtura të dielën, tregojnë rezultatet paraprake, duke e pozicionuar atë për një mandat tjetër qeverisës. Sipas Komisionit Qendror të Zgjedhjeve, pas numërimit të pothuajse të gjitha fletëvotimeve, Lëvizja Vetëvendosje (LVV) ka fituar rreth 50 për qind të votave, dukshëm përpara dy partive të qendrës së djathtë, Partisë Demokratike të Kosovës (PDK) me 21 për qind dhe Lidhjes Demokratike të Kosovës (LDK) me afro 14 për qind të votave”, thuhet në artikull.

“Provojmë për tu loguar dhe akoma nuk ka ardhur një kod. Kemi rreth 10-15 minuta që tentojmë dhe e pamundur”, është shprehur Etleva Treska.

Nga regjistrim i shoqërive të reja në QKB, funksionimi i pjesshëm ose mosfunksionimi fare i sistemit selfcare si dhe një sër sistemesh ndërlidhëse përmes Agjencisë Kombëtare të Shoqërisë së Informacionit janë këto problemet më të hasura për bizneset të cilat prej ditësh në këto ditë fundviti kanë mbetur me punët pezull. Edhe qytetarët hasin vështirësi në dokumentacione teksa çdo gjë duhet të kryhet online.

“Duhet ta shikojmë në dy këndvështrime ajo përdoret kryesisht dhe nga individët. Dhe aplikimi i emigrantëve për rinovim dokumentesh është i pamundur. Me bizneset ka shumë probleme. Sapo e kisha një klient nuk u loguam dot. Siç e shikojmë faqja s’po reagon fare. Dhe nisur nga kjo më duhet të bëj mbylljen e vitit deri në 31. Bizneset në momentin që hyn janari duhet të paguajë taks bashkie, të bëj deklarimet në tatime për vitin dhe e ngarkon bizneset pa të drejtë. Jemi gjithë ditën duke punuar dhe s’kemi asnjë rezultat për punën tonë”, tha Treska.

Jo vetëm kontabilistët, ky problem prek edhe profesione të tjera, si ekonomistët, noterët, juristët, avokatet etj.

“Edhe ne si avokat ngremë shqetësimin në lidhje me e-Albania. Konkretisht unë kam pasur kontakte me biznese të huaja dhe një rast të fundit kam pamundur ta regjistroj. 4-5 ditët e fundit e pamundur të logohemi apo kryejmë procedura”, është shprehur avokati Franc Nuri.

Përballë një situate të tillë kolapsi bizneset kërkojnë të merren masa. Por zgjidhja e vetme që arrijnë të marrin është kjo në e-Albania.

“Drejtoria e Përgjithshme e Gjendjes Civile do të realizojë operacione mirëmbajtjeje dhe përmirësimi të sistemit elektronik të saj.

Ju informojmë se gjatë këtyre proceseve mund të ketë ndërprerje të përkohshme apo ngadalësime në marrjen e të dhënave përmes ndërveprimit me Regjistrin Kombëtar të Gjendjes Civile. Kërkojmë mirëkuptimin tuaj për çdo vështirësi të mundshme që mund të haset në përdorimin e shërbimeve publike online” thuhet në deklaratën e e-Albania.

Profesionistët e lirë paralajmërojë protesta nëse portali qeveritar e-Albania nuk bëhet funksional para vitit 2026.

“Nuk kam gjetur zgjidhje dhe që kam shkuar në zyrat fizike të QKB. Ajo që duhet bërë duhet të ketë alternativë”, tregon Treska.

Intervistoi: Eraldo Xhelili

Rrugëtimi i Stelës dhe skandalet e tregut imobiliar në Shqipëri. Për herë të parë prononcohet realtor Stela Tata, që e ndërtoi karrierën e saj mes Tiranës, Irakut dhe New York-ut.

Eraldo: Stela, më thuaj: pse tani? Pse ishte pikërisht ky momenti që ti pranove të japësh një intervistë publike?

Stela: Së pari, faleminderit për ftesën për intervistë, është kënaqësi për mua të intervistohem nga ju. Së dyti, arsyeja që unë kam zgjedhur të flas në këtë moment është sepse mendoj se kam arritur një farë pjekurie dhe kam ndërtuar një karakter më të fortë. Kjo si pasojë e eksperiencave të mia sociale dhe profesionale midis kulturave të ndryshme, si shqiptare, europiane, lindje e mesme dhe perëndimore, ku jam stacionuar sot si agjente imobiliare. Është një kompleksitet faktorësh që më kanë bërë të ndihem gati tani dhe mendoj që është një temë shumë e gjatë për ta përmbledhur në një përgjigje. Megjithatë, dua të them që vjen një moment ku ti e ndien së brendshmi që je gati, dhe për mua ky ishte momenti.

Eraldo: Stela, njerëzit që do të na lexojnë duan të dinë të vërtetën: Pse u largove nga Tirana, nga Shqipëria? Çfarë ndodhi?

Stela: Është temë delikate kjo, pasi prek jo vetëm një brez, por më shumë. Por meqë po më kërkohet e vërteta dhe unë e ndiej detyrimin moral për ta thënë… Pasi u ktheva nga Gjermania pas studimit të gjuhës gjermane, u riktheva në Shqipëri. Aty studiova për degën Marrëdhënie Ndërkombëtare dhe Diplomaci. Është një degë shumë e bukur dhe të rrit goxha pritshmëritë mbi të ardhmen profesionale, por realiteti shqiptar nuk përputhet me këto pritshmëri. Pasi përfundova studimet Bachelor, fillova të aplikoja në disa vende. Madje, në shumë vende kam shkuar me referim, por nuk mora asnjë përgjigje. Kjo situatë zgjati gati një vit. Ky lloj realiteti më rëndoi emocionalisht. Ky ka qenë momenti kur më lindi ideja të aplikoja për punësim jashtë vendit tim. Meqë e vërteta duhet thënë, le ta themi: unë, pasi aplikova në një kompani turke për air conditioning & fans, u kualifikova direkt. Edhe pse e dhimbshme për t’u thënë, u prita shumë herë më mirë nga të panjohur sesa nga të njohur. Një pjesë të karrierës sime, rreth dy vite, e kam kaluar në Kurdistan — Irak (2012–2014). Ka qenë një vend në zhvillim, po bëheshin shumë ndërtime. Jeta sociale dhe profesionale ka qenë e këndshme për mua, jam ndjerë e mirëpritur në detaj. Vetëm temperaturat shkonin deri në 60 gradë, dhe kjo e vështirësonte qëndrimin. Jo shumë e bukur për t’u thënë, por e vërtetë: vende të tjera, edhe jo shumë të përparuara, e kanë tregun e punës më të konsoliduar. Mund të punësohesh vetëm nga një aplikim online, nëse plotëson kriteret. Tregu i punës në Shqipëri për mua ishte i padrejtë, por kjo është eksperiencë subjektive — nuk dua ta përgjithësoj. Unë prapë shpresoj për vendin tim dhe uroj të ndryshojë.

Eraldo: E dëgjojmë shpesh këtë fenomen në Shqipëri: nepotizmi, miku… Si ka qenë përvoja jote në New York?

Stela: Eh, duhet thënë: New York-u është shumë ndryshe. Ka vështirësi, por vështirësia është që duhet të përgatitesh shumë. Punësimi lidhet drejtpërdrejt me aftësitë e individit dhe jo me cilën parti je apo fëmija i kujt je. Procesi fillon dixhitalisht, çka të jep një lloj sigurie. Por New York-u është New York; nuk dua të jem e padrejtë me tregun e punës në Shqipëri.

Eraldo: Nëse do t’i rendisje eksperiencat e tua, cila ka qenë më e bukura dhe cila më e vështira?

Stela: Ndër eksperiencat më të bukura është New York-u. Tregu i punës më ka sfiduar me retail, sales, office admin, etj. Ke shumë opsione — je ti që zgjedh. Pas kësaj rendis Irakun. Kanë qenë eksperienca të vlefshme dhe më kanë rritur shumë. Nuk dua ta quaj eksperiencë të keqe, por duhet të them të vërtetën: eksperienca jo më e mira ka qenë vendi im. Ndoshta ka qenë koha e gabuar.

Eraldo: Le të bëhemi pak më specifik: Ku ndryshon Tirana nga New York-u në tregun imobiliar?

Stela: Kjo temë është delikate. Tregu imobiliar në Shqipëri ndryshon radikalisht nga ai në New York. Në Shqipëri, ligji që rregullon këtë profesion lë për të dëshiruar. Ky vakum ligjor prek si klientin, ashtu edhe agjentin.

Eraldo: Mund të na japësh një shembull konkret?

Stela: Në New York nuk mund të hapë çdokush një agjenci imobiliare — kërkon buxhet, përgjegjësi dhe standarde. Kontratat janë të detajuara dhe sigurojnë palët. Nëse ndodh ndonjë dëm, kompania e zgjidh shpejt dhe klienti është i sigurt. Në Tiranë, shpesh klientët mbeten “në mes të rrugës”, ndërsa agjentët humbasin kredibilitet. Të mendosh që një agjenci merr 40–60% vetëm për databazë dhe zyra — kjo është aspak profesionale. E vetmja e përbashkët Tiranë–NY është rritja e çmimeve. Për ta përmbledhur: Shqipërisë i mungon rregullatori ligjor dhe integriteti i agjencive.

Eraldo: Çfarë sugjeron për agjencitë dhe agjentët në Shqipëri?

Stela: Për agjencitë: nëse duan biznes solid, të marrin shembuj solidë. Nëse ligji ka vakum — ta mbushin me integritet.

Për agjentët:

• Të informohen mbi ligjin e kontratave.
• Të trajnohen në komunikim dhe proces.
• Të njohin terrenin dhe projektet.
• Të mos dorëzohen.
• Të bashkëpunojnë me agjenci integriteti.

Eraldo: Stela, një pyetje që publiku e ka pasur kuriozitet: Çfarë të lidh ty me Parashqevi Simakun?

Stela: Lidhja ime me Parashqevi Simakun ka nisur një vit më parë, kur mamaja ime e takoi rastësisht në Manhattan. Që atëherë kemi krijuar një lidhje shumë të ngushtë. Takohemi shpesh dhe jemi pranë saj. Ajo ka një shpirt të bukur — dhe është kënaqësi ta mbështesim.

Media prestigjioze kroate Telesport ka publikuar 11-shen më të mirë të gjysmës së sezonit në HNL, ku një vend të veçantë zë edhe Arbër Hoxha, i përzgjedhur si anësori i majtë ideal i kampionatit.

Fillimi i sezonit për reprezentuesin shqiptar nuk ishte aspak i lehtë. Në hierarkinë e Dinamos, Hoxha ishte fillimisht opsioni i tretë apo i katërt, pas emrave si Gabriel Vidović, Cardoso Varela dhe Luka Stojković. Megjithatë, me punë, këmbëngulje dhe paraqitje vendimtare, ai arriti ta ndryshojë plotësisht statusin e tij dhe të shndërrohet në një nga figurat kryesore të skuadrës.

Sipas analizës së Telesport, forca fizike, vendosmëria dhe gjuajtja e fuqishme janë armët kryesore që e dallojnë Arbër Hoxhën nga të gjithë anësorët e tjerë në ligë. Ai jo vetëm që u bë titullar i rregullt te Dinamo, por në një pjesë të sezonit ishte faktori kryesor që e “tërhoqi” skuadrën, duke kombinuar paraqitje të forta në kampionat me ndikim të dukshëm edhe në arenën evropiane.

Momentet kulmore erdhën pikërisht në derbit kundër Hajdukut. Në ndeshjen e parë, Hoxha ishte titullar në fitoren për tri pikë, ndërsa në përballjen e dytë shënoi në minutat shtesë për të ruajtur epërsinë dhe pozicionin e Dinamos në krye. Në një kampionat ku diferencat mes ekipeve janë minimale, këto gola dhe paraqitje kishin peshë të jashtëzakonshme.

Edhe pse ka ende hapësirë për përmirësim, Telesport thekson se ndikimi i Arbër Hoxhës në lojën sulmuese të Dinamos është i pakontestueshëm. Pikërisht për këtë arsye, ai është zgjedhur pa dilemë si anësori i majtë i formacionit të vitit, përpara emrave si Iurii Tavares, Ante Rebić apo Salim Fag Lawal.

Një vlerësim i madh për futbollistin shqiptar dhe një tjetër dëshmi se Arbër Hoxha po e fiton vendin e tij mes emrave më të spikatur të futbollit kroat. /Telegrafi/

Këngëtarja e njohur, Vesa Luma, ka ndarë me fansat një mesazh të ndjerë në rrjetet sociale, duke reflektuar mbi vitin 2025 dhe duke ndarë planet për vitin e ardhshëm.

Në postimin e saj, Vesa shpreh mirënjohjen për mësimet që mori gjatë këtij viti.

“Faleminderit 2025 që më mësove balancën, që më dhe mundësinë t’ia dëshmoj vetes sërish, që familja dhe shëndeti mbeten mbi të gjitha. Faleminderit Zotit që më kujton ditë për ditë”.

Ajo thekson rëndësinë e fansave dhe mbështetjes së tyre: “Kur ju më ndaloni e përkëdhelni me përqafimet tuaja të ngrohta, më kujtoni se kam ardhur në këtë botë për të dhuruar, jo vetëm muzikë, emocion e dashuri, po edhe të jap zë gjërave pozitive”.

Luma paralajmëron fansat për ndryshime të mëdha në vitin 2026, të cilat i quan “radikale, por pozitive”.

Ajo shton se dëshira e saj për vitin e ardhshëm është shëndeti, por edhe më shumë stabilitet emocional, duke përdorur një shprehje të zakonshme nga Kosova: “pak më shumë ‘rrafsh’”.Këngëtarja përfundon postimin duke shprehur dashurinë për ndjekësit e saj: “Ju dua shumë të gjithë ju, që në një mënyrë apo tjetër keni qenë pjesë e ditëve të mira të këtij viti që po e lemë pas”.

Mesazhi i saj është një reflektim i sinqertë mbi vitin që po mbyllet dhe një paralajmërim për projekte dhe momente pozitive që fansat mund të presin në vitin jubilar që po vjen. /Telegrafi/

Kuvendi miratoi kërkesën e Qeverisë për shpalljen e konkursit publik për përzgjedhjen e kryeprokurorit të shtetit i cili duhet të vijë në vend të Lupço Kocevskit të dorëhequr pak para se të shkarkohej. Ditëve në vijim Kuvendi duhet të shpallë konkursin publik ndërsa dorëzimi i kandidaturave do të duhet të bëhet në afat prej 15 ditëve.

Kandidatët duhet të kenë së paku 300 kredi, të kenë provimin e jurisprudencës, përvojë të pandërprerë pune prej së paku 10 viteve si prokuror apo gjykatës. Në këtë pozitë për momentin si ushtruese detyre është Anita Topollova Isajllovska derisa të zgjidhet kryeprokurori i ri. Këshilli i Prokurorëve do të përgatisë mendim për secilin nga kandidatët e paraqitur dhe do ta dorëzojë në Qeveri. Prokurori i ri duhet të zgjidhet me shumicë të thjeshtë prej 61 votave.

Më 22 dhjetor, prokurorja Anita Topalova-Isajllovska u zgjodh njëzëri si kandidatja e vetme e propozuar në seancën e Këshillit të Prokurorëve Publikë si ushtruese detyre, duke zëvendësuar prokurorin publik republikan Ljupço Kocevski, i cili dha dorëheqjen javën e kaluar, pak para se të shkarkohej nga Parlamenti.

Kujtojmë se, më 16 dhjetor, ish-prokurori publik shtetëror Ljupço Kocevski njoftoi se kishte paraqitur dorëheqje të parevokueshme nga detyra. Ai informoi seancën parlamentare në të cilën do të shqyrtohej propozimi i Qeverisë për shkarkimin e tij nga detyra.

Në Parlament nuk pati asnjë debat sepse, siç informoi kryetari i Parlamentit, Afrim Gashi, shqyrtimi i kësaj pike bëhet i pakuptimtë, duke marrë parasysh dorëheqjen e paraqitur të Kocevskit.

Shumica e shoqatave gjermane të biznesit presin shkurtime vendesh pune në vitin 2026, ndërsa kriza ekonomike e vendit vazhdon, me industrinë e goditur më rëndë nga proteksionizmi global dhe eksportet e dobëta, tregoi një anketë nga Instituti Ekonomik Gjerman IW të hënën.

Nga 46 shoqata biznesi të anketuara, 22 parashikojnë shkurtime të fuqisë punëtore vitin e ardhshëm. Vetëm nëntë presin të rrisin punësimin dhe 15 parashikojnë nivele të qëndrueshme punësimi, transmeton Telegrafi.

Industritë e automobilave, letrës dhe tekstilit janë ndër ato që presin rënie të prodhimit. Ato janë dëmtuar nga rritja e proteksionizmit, eksportet e dobëta dhe kostot e larta të brendshme që kanë gërryer konkurrueshmërinë e çmimeve të Gjermanisë, zbuloi anketa.

"Ata që shpresonin për një fund të shpejtë dhe gjithëpërfshirës të krizës ekonomike do të zhgënjehen gjithashtu në vitin 2026", tha drejtori i IW, Michael Huether.

Ekonomia po "stabilizohet në një nivel më të ulët", shtoi ai.

Planet e investimeve mbeten të ndrydhura. Vetëm 11 shoqata presin rritje, ndërsa 14 parashikojnë shkurtime dhe 21 shohin investime të ndenjura në nivele të ulëta, tregoi anketa.

Disa pika pozitive dolën në pah në sektorët që përfitojnë nga rritja e shpenzimeve për mbrojtjen, duke përfshirë hapësirën ajrore dhe ndërtimin e anijeve. Shërbimet gjithashtu raportuan kushte të përmirësuara krahasuar me vitin e kaluar.

Ndjenja e biznesit tregoi një përmirësim modest, me 19 shoqata që presin prodhim më të lartë se në vitin 2025, kundrejt nëntë që parashikojnë rënie. Kjo shënon bilancin e parë pozitiv të perspektivës në vite. /Telegrafi/

Që fëmijë, Edon Zhegrova kënaqej duke dribluar shokët e lagjes. Ishte thuajse një obsesion, aq sa më vonë u quajt “Messi i Kosovës”, për të theksuar cilësinë teknike dhe prirjen e tij të pandalshme për driblim, shkruan Gazetta dello Sport.

Sot, Zhegrova ka një nofkë tjetër: “Mister Zeppetta”, siç e ka quajtur Luciano Spalletti – një epitet që lojtari duket se e ka pranuar me kënaqësi, duke falënderuar trajnerin e tij.

Spalletti e gjeti Zhegrovën si një “objekt të harruar” në dhomat e zhveshjes së Juventusit dhe, për një kohë të shkurtër, e shndërroi në një armë të rrezikshme në fushë. Megjithatë, menaxhimi fizik i tij mbetet thelbësor.

Menaxhimi te Juventusi

Zhegrova vuan nga pubalgjia, një problem që e kishte mbajtur larg fushës për një periudhë të gjatë para se të transferohej në Torino. Kjo gjendje vazhdon të kërkojë kujdes të veçantë, pasi çdo rritje e tepruar e intensitetit mund të sjellë rrezik dëmtimi.

Spalletti u befasua pozitivisht nga paraqitja e tij e fundit, në një moment kur Juventusi kishte nevojë urgjente për ndryshim ritmi ndaj Pisas. Zhegrova hyri në lojë dhe për 35 minuta luajti në nivel të lartë, duke i dhënë skuadrës një dozë të madhe paparashikueshmërie dhe energjie. Ai ndryshoi rrjedhën e ndeshjes dhe u shpall lojtari më i mirë në fushë.

Programi i posaçëm i Zhegrovës

I afruar në fund të afatit kalimtar të verës, Zhegrova pati një periudhë adaptimi jo të lehtë te Juventusi. Pushimi i gjatë dhe nevoja për të kalibruar ngarkesat fizike bënë që Igor Tudor të mos mund të llogariste shumë tek ai në fillim: vetëm 36 minuta në tri paraqitje.

Situata ndryshoi nën drejtimin e Spallettit. Në 12 ndeshje, Zhegrova luajti 173 minuta në 8 paraqitje, duke fituar gjithnjë e më shumë besim. Kjo nuk ishte vetëm çështje besimi, por rezultat i një programi të veçantë pune, i ndërtuar nga disa departamente që punojnë në mbështetje të stafit teknik.

Përparimi fizik, 75% dhe ende në rritje

Në muajt e parë në Torino, Edoni i kushtoi rreth 70% të kohës punës fizioterapisë dhe 30% zonës së performancës. Sipas planit, ky raport është përmbysur në javët e fundit. Ai vazhdon punën e forcës, me fokus të veçantë në muskujt e poshtëm të barkut dhe gluteusët (muskujt e vitheve), për të mbrojtur zonat më të rrezikuara për një lojtar eksploziv dhe shpërthyes si ai.

Aktualisht, gjendja fizike e Zhegrovës vlerësohet në 75%, çka do të thotë se më e mira ende nuk ka ardhur.

Aspekti mendor, një armë shtesë

Vlerësime shumë pozitive kanë ardhur edhe nga mbështetja psikologjike. Zhegrova ka treguar dëshirë të madhe për t’u rikthyer në nivelin e tij më të lartë dhe është paraqitur në Torino me optimizmin e duhur për të përballuar një periudhë të gjatë rikuperimi.

Ai i ka përballuar ngarkesat e punës me mentalitetin e duhur, pa u ankuar për sakrificat. Njihet si natyrë optimiste, por është vazhdimësia në punë ajo që ka bërë diferencën më të madhe.

Tani, objektivi i Juventusit dhe i stafit teknik është i qartë: ta përgatisin Zhegrovën që të jetë në gjendje të luajë deri në tri ndeshje në javë. /Telegrafi/

Kryeministri në detyrë dhe kryetari i Lëvizjes Vetëvendosje, Albin Kurti ka thënë se e ardhmja e Kosovës është e orientuar fuqishëm drejt Bashkimit Evropian.

Një ditë pas zgjedhjeve përmes platformës X, ka falënderuar të gjithë ata që ushtruan të drejtën e tyre për të votuar, si dhe të gjithë ata që kontribuuan që procesi zgjedhor të ishte i lirë, i drejtë dhe të zhvillohej pa incidente.

“Jemi mirënjohës për mbështetjen ndërkombëtare gjatë gjithë këtij procesi, nga Bashkimi Evropian, vendet individuale dhe organizatat ndërkombëtare, të cilat vazhdojnë të mbështesin përparimin demokratik të Kosovës”, tha ai.

“Dje, qytetarët e Kosovës na dhanë edhe një herë një mandat të fuqishëm. Është gjithmonë nder të fitosh besimin e popullit, veçanërisht kur ai vjen pas përfundimit të mandatit të parë të plotë në historinë e vendit. Dëshirojmë të falënderojmë të gjithë ata që ushtruan të drejtën e tyre për të votuar, si dhe të gjithë ata që kontribuuan që procesi zgjedhor të ishte i lirë, i drejtë dhe të zhvillohej pa incidente. Jemi mirënjohës për mbështetjen ndërkombëtare gjatë gjithë këtij procesi, nga Bashkimi Evropian, vendet individuale dhe organizatat ndërkombëtare, të cilat vazhdojnë të mbështesin përparimin demokratik të Kosovës. Një falënderim i veçantë për partitë tona motra dhe për lëvizjen më të gjerë progresive, teksa angazhohemi për ndërtimin e shoqërive ku dinjiteti dhe mirëqenia e njerëzve janë në qendër. E ardhmja e Kosovës është e begatë dhe e orientuar fuqishëm drejt Bashkimit Evropian”, ka shkruar ai në X.

Ja si ta përdorni buzëkuqin në mënyrë që buzët të duken më të plota, më të buta dhe më rinore

Buzëkuqi, në këtë fazë të jetës, nuk është më thjesht ngjyrë – ai bëhet një mënyrë për të theksuar vitalitetin, shprehjen dhe dritën e brendshme që vitet vetëm sa e thellojnë.

Pas të pesëdhjetave, buzët ndryshojnë, bëhen më të ndjeshme, më të buta, ndonjëherë më të holla, por edhe më mirënjohëse kur u ofrohet kujdesi i duhur dhe i respektueshëm.

Në këtë moshë, buzëkuqi nuk shërben vetëm për ngjyrosje; ai ka fuqinë të freskojë pamjen, të zbusë tiparet dhe të theksojë elegancën natyrale të fytyrës.

Hapi 1: Eksfolimi dhe kujdesi për buzët

Çdo aplikim i bukur nis me përgatitjen. Një eksfolim i lehtë dhe i butë largon pjesët e thata dhe rikthen butësinë e buzëve. Këtë mund ta bëni me një furçë të butë dhëmbësh ose me një skrab të lehtë me sheqer.

Pas eksfolimit, hidratimi është thelbësor. Një balsam ushqyes ndihmon që buzëkuqi të mos grumbullohet në vijat e holla dhe e bën teksturën të duket natyrale dhe e freskët.

Hapi 2: Zgjedhja e mençur e buzëkuqit

Kur buzët janë të përgatitura mirë, ngjyra shfaqet shumë më elegante. Formulat mat, që dikur funksiononin për mrekulli, pas të pesëdhjetave mund të duken të forta dhe të theksojnë linjat.

Prandaj, buzëkuqet kremozë ose sateni janë zgjedhja ideale - ato reflektojnë dritën, japin iluzionin e volumit dhe rrëshqasin lehtë mbi buzë, duke lënë një përfundim të butë dhe të rafinuar.

Në këtë pikë, përzgjedhja e nuancës është vendimtare: një ngjyrë e duhur buzëkuqi mund ta freskojë tenin pothuajse po aq sa një krem cilësor, transmeton Telegrafi.

Hapi 3: Lapsi para buzëkuqit

Lapsi i buzëve, në një nuancë të afërt me ngjyrën natyrale të buzëve, bëhet aleati juaj më i mirë. Ai përcakton lehtë konturet, pa ekzagjerim. Një vizatim i butë pak mbi vijën natyrale thekson formën, ndërsa blendimi i lehtë me furçë zbut kalimet e forta.

Kështu arrihet një kontur i rregullt, pa efekt rigid. Buzëkuqin mund ta aplikoni me furçë ose direkt, por gjithmonë në shtresa të holla dhe me durim, buzët e pjekura duken më bukur kur ngjyra është delikate dhe e shpërndarë në mënyrë të njëtrajtshme.

Hapi 4: Truku për efekt vizual më të plotë

Nëse dëshironi një efekt të lehtë mbushjeje, mjafton një pikë e vogël buzëkuqi më shkëlqyes ose transparent në qendër të buzëve. Një tjetër truk diskret është të lini një hapësirë pothuajse të padukshme në cepat e buzëve.

Kështu shmanget efekti i buzëqeshjes së rënë dhe e gjithë fytyra duket më e hapur, më e freskët dhe më e ndriçuar. /Telegrafi/