Futbollisti Nemanja Matic iu bashkua këtë verë ekipit të Sassuolos, ku menjëherë fitoi vend në formacionin titullar, ndërsa mbron ngjyrat e klubit italian me Aro Muricin.

Gjatë një interviste për portalin “Four Four Two”, Matić u pyet për festimet e Xherdan Shaqirit dhe Granit Xhakës kundër Serbisë në Kupën e Botës, në vitet 2018 dhe 2022, ku të dy përdorën shqiponjën dykrenare – simbolin e flamurit shqiptar.

Matic e kritikoi këtë veprim, duke e konsideruar si një fitore politike, jo sportive.

“Unë i respektoj ata si futbollistë, kam luajtur kundër tyre disa herë në Ligën Premier. Por me këto gjëra të vogla ata fitojnë pikë të lira politike. Ata janë rritur në Zvicër. Me një veprim të tillë, nuk tregon respekt për vendin për të cilin luan. Nëse e do kaq shumë Shqipërinë, atëherë pse nuk luan për Shqipërinë? Kjo është pyetja ime”, deklaroi Matic.

Ai shtoi se dashuria për vendet të ndryshme nuk është problem, por sinqeriteti është thelbësor.

“Mund të duash disa vende, kjo nuk është problem. Unë e dua Serbinë, është vendi im. Gjithashtu e dua Anglinë, kam kaluar shumë kohë atje. Por kurrë nuk do të them se e dua Anglinë më shumë se Serbinë. Duhet të jesh i sinqertë”.

“Kam luajtur kundër Xhakës shumë herë dhe kurrë nuk kam pasur problem. Gjithmonë shtrëngonim duart, ai është një lojtar i mirë – ashtu si edhe Shaqiri. Por unë kurrë nuk do ta bëja për të provokuar dikë. I respektoj të gjithë”, ka thënë mesfushori. /Telegrafi/

Përzgjedhësi Murat Yakin dhe kapiteni Granit Xhaka janë ndarë të lumtur me shortin e Kupës së Botës 2026.

Zvicra faktikisht ka rënë në një grup mjaftë të favorshëm pasi përballen me Kanadanë, Katarin dhe një kombëtare nga play-offi i Evropianit (Itali, Irlandë Veriore, Uells dhe Bosnja/Hercegovinë).

Nuk ka vonuar shumë dhe Xhaka shkurtimisht për “bluewin.ch” e ka komentuar shkurtimisht shortin.

“Një grup shumë i mirë me kundërshtarë interesant. Sigurisht, të luajmë ndaj nikoqirit Kanadasë do të jetë diçka e veçantë. Atmosfera do të jetë fantastike”.

Ndërkohë, përzgjedhësi Murat Yakin thotë se të gjithë kundërshtarët do të jenë jashtëzakonisht të motivuar.

“Sigurisht një grup i mirë dhe atraktiv, në të cilën padyshim duam të kualifikohemi për fazën e play-offit”.

“Presim që kombëtaret të jenë tepër të motivuara dhe do të kenë mbështetje të madhe në secilën lojë. Me Katarin është vështirë të parashikohet se çfarë stili të lojës do të luajnë. Pastaj do të përballemi me një kombëtare evropiane që i njohim”, shtoi ai.

Në “letër” Zvicra shihet si favoriti i grupit, por në rast që Italia avancon nga muaji mars atëherë “matematikat” do të ndryshojnë./Telegrafi/

Presidenti i Federatës Zvicerane Peter Knabel thotë se provuan gjithçka për ta bindur mesfushorin Leon Avdullahu të mos i bashkohet Kosovës, por nuk ia dolën.

Kosova u përforcua dukshëm këta muajt e fundit, duke bindur top talentët e Hoffenheimit si Leon Avdullahu e Albian Hajdari, ndërsa falë paraqitjeve të shkëlqyeshme edhe e siguruan për herë të parë play-offin e Botërorit 2026.

Së fundmi lidhur me largimin e lojtarëve nga Zvicra reagoi edhe Knabel, i cili përmendi çështjen e Avdullahut si shembull që “Helvetikët” nuk mund të bëjnë gjithçka për t’i bindur lojtarët.

Leon Avdullahu dhe Albian Hajdari

“Provuam gjithçka, edhe e vizitova Leon Avdullahun në Hoffenheim së bashku me Murat Yakin, por vendimi i tij ishte kryer”.

Knabel gjithashtu konfirmoi se problemi kyç është të talentët e rinj sepse edhe konkurrenca mes Federatave është rritur në përgjithësi.

“Kemi një problem me kalimin e lojtarëve të rinj në ligën më të lartë sepse konkurrenca midis Federatave për talente është bërë shumë më e madhe”, deklaroi ai për “SRF”.

Ndërkohë, Kosova është duke provuar të marrë edhe disa talentë tjerë të Zvicrës, si Demir Xhemalija e Adrien Llukes./Telegrafi/

Sulmuesi Baton Zabërgja thotë se të gjithë yjet e Kosovës duhet të japin mbi 100 për qind për ta realizuar ëndrrën e tërë kombit shqiptar dhe të dërgojnë “Dardanët” në Kupën e Botës 2026.

Zabërgja mungoi muajin e kaluar shkaku i lëndimit, mirëpo bëri paraqitje fantastike kur u inkuadrua në barazimin 1-1 ndaj Zvicrës, ku edhe kishte një rast shënimi për t’i mposhtur përfundimisht “Helvetikët”, sidoqoftë Kobel me pritje fantastike ia mohoi golin.

Anësori i Metalist 1925 në një intervistë për Telegrafin ka lavdëruar bashkëlojtarët për paraqitjet e bëra në tërë këto kualifikuese.

“Unë besoj se paraqitje të mirë kanë pasur të gjithë bashkëlojtarët, andaj jemi këtu ku jemi së bashku si grup. Sa i përket rastit që kisha me Zvicrën, pa dashur të justifikohem, futbolli i ka këto – nganjëherë ndikohesh edhe nga dëshira e madhe për të shënuar pastaj gjërat nuk ecin siç dëshiron”.

Në gjysmëfinalen e play-offit të Kupës së Botës, Kosova ka përballë Sllovakinë. Ish ylli i Gjilanit është i sigurt se “Dardanët” mund ta mundin Sllovakinë.

“Besoj shumë te bashkëlojtarët e mi, grupin që ka formuar trajneri Foda dhe do të jemi arrë e fortë për këdo. Në Sllovaki shkojmë padyshim për fitore, dashtë Zoti të ruhet forma e të gjithë bashkëlojtarëve dhe mos të kemi ndonjë mungesë”.

I pyetur se kë preferon në finalen e mundshme në Prishtinë, Zabërgja shtoi se nuk ka rëndësi – pasi muaj mars është i historisë në Kosovë dhe me punë do t’ia dalim për të shkuar në Botëror.

“Sa i përket finales së madhe që do të kemi fatin ta luajmë në “Fadil Vokrri” para tifozëve, po e them me tërë qënien se çdo bashkëlojtarë duhet ta llogarisë këtë finale “Jetë a vdekje” dhe pak rëndësi nëse luajmë me Rumaninë apo Turqinë”.

“Muaji mars për Kosovën është muaji i kthesave historike, prandaj besoj se datën 31 mars 2026 do të vendosim në vazhdën e datave historike të popullit tonë, do të jemi në Botëror”.

Për fund, ai premtoi se të gjithë lojtarët “do ta japin edhe atomin e fundit” për ta bërë krenar tërë popullin shqiptar.

“Është një moment historik dhe nuk duhet ta lëshojmë nga dora. Jemi gjeneratë që duhet ta shijojmë Botërorin dhe për këtë duhet ta shkrijmë atomin e fundit, që jo vetëm Dardanët dhe populli brenda Kosovës, por i tërë kombi shqiptar të ndjehet krenar”, përfundoi Zabërgja për Telegrafin.

Ndërkohë, Kosova përballjen në udhëtim te Sllovakia do ta zhvillojë më 26 mars, kurse finalja e mundshme më 31 mars 2026./Telegrafi/

Legjenda turke, Hakan Sukur ka lavdëruar fuqishëm Kombëtaren e Kosovës në podcastin e tij, duke thënë se arritja në ‘play-off’ është e jashtëzakonshme duke parë grupin tepër të vështirë. Sukur theksoi se Kosova nuk duhet nënvlerësuar nga askush dhe paralajmëroi Sllovakinë për “kurthin” e Dardanëve. Ai vlerësoi lart disa lojtarë të Kosovës dhe disiplinën e ekipit, duke shtuar se edhe Turqia do ta ketë shumë vështirë ndaj fituesit të kësaj përballjeje.

Hakan Sukur, një nga emrat më të mëdhenj në historinë e futbollit turk, ka folur me superlativa për Kosovën në podcastin e tij.

Ai theksoi prejardhjen e tij nga Prishtina dhe u ndal te rrugëtimi i Dardanëve, duke theksuar se arritja në një grup me Zvicrën, Slloveninë dhe Suedinë nuk duhet nënvlerësuar.

Sipas tij, Kosova kishte potencial të përfundonte edhe e para në grup, falë disiplinës dhe planit të qartë të lojës që tregoi përgjatë gjithë kualifikimeve.

“Kosova është atdheu i babait tim. Babai im ka lindur në Prishtinë. Kosova kur ta shikoni grupin ku ishte Zvicra, Sllovenia e Suedia, nuk duhet të nënvlerësohet arritja e tyre. Kosova ka dal prej ish-Jugosllavisë, vende që janë minierë për sportistë. Kosova përfaqëson pjesën e fortë. E vërtetë që Kosova ka humbur nga Rumania 3-0 (kundërshtari i Turqisë), por shikoni Kosova ka arritur të sigurojë një vend në ‘play-off’ në këtë grup të vështirë. Kur t’i shikoni rezultatet e Kosovës, ka mundur që të përfundojë edhe e para në këtë grup”, ka thënë fillimisht Sukur.

Sukur paralajmëroi se edhe pse shpesh konsiderohet “hallka më e dobët”, Kosova është shumë e fortë dhe e rrezikshme, sidomos për Sllovakinë. Ai u ndal te cilësitë individuale të lojtarëve si Milot Rashica dhe Vedat Muriqi, duke theksuar se Dardanët luajnë futboll sulmues dhe fizik.

“Edhe nëse shihet si hallka më e dobët në këtë fazë, Sllovakia nuk do ta ketë lehtë. Nuk dihet nëse Sllovakia do të luajë si kundër Gjermanisë dhe nëse luan një lojë ofensive, atëherë mund të bie në kurthin e Kosovës”.

- YouTube youtu.be

“Kosova si e dyta, është shumë më e mirë se Rumania. Shikoni grupin e Kosovës, të gjitha ekipet kanë pasur gjasa ta mundin njëra-tjetrën, por duket se Kosova me një plan dhe disiplinë, ka arritur këtë sukses”.

“Kosova ka lojtar të mirë, si Milot Rashica dhe Vedat Muriqi. Kosova është një ekip i mirë, një ekip sulmues. Muriqi është një sulmues që luan në Spanjë. Ai nuk është i shpejt, por në ajër është shumë i mirë dhe di ta shfrytëzojë shumë fizikun që e ka”.

Sipas Sukur, përballja Kosovë–Sllovaki do të jetë jashtëzakonisht e vështirë, dhe pavarësisht kush kalon, edhe Turqia do të përballet me sfidë serioze në ndeshjet e ‘play-off’-it.

“Ndeshja mes Kosovës dhe Sllovakisë do të jetë shumë e vështirë. Cila do që kalon tutje, unë e di se Turqia do ta ketë shumë vështirë sepse këto ndeshja janë për kualifikimet në botëror. Janë dy ndeshje dhe çdo gjë varet edhe prej kushteve të tjera”, përfundoi legjenda turke. /Telegrafi/

Federata e Futbollit të Kosovës (FFK) ka nisur punën për ta bindur edhe talentin e Zvicrës Adrien Llukes, që është kushëri i Bastien Tomës, kështu së paku raporton mediumi zviceran “20min.ch”.

Llukes është lojtari më në formë te Zvicra U17, i cili luan në disa pozita, pra si sulmues, qendërmesfushor, numër 10, 8 ose edhe në krahë.

Gazeta e njohur zvicerane raporton se Kosova e ka kontaktuar Llukes për ta bindur t’i bashkohet “Dardanëve”, sidoqoftë aktualisht përgjigja është negative.

“Llukes ka pasaportë të dyfishtë zvicerane-kosovare dhe ka luajtur për FC Sion që nga fëmijëria, si kushëriri i tij Bastien Toma”.

“Talenti i ri zviceran zhvilloi paraqitjen e dytë për Sionin në ligë kundër Grasshoppers në tetor. Ai ishte momenti kur u vërejt nga Federata e Futbollit të Kosovës”.

“Pas një periudhë të shkurtër, zyrtarët e Federatës Kosovare e kontaktuan dhe provuan ta bindin për ta ndryshuar përfaqësuesen, siç bënë me Leon Avdullahun dhe Albian Hajdarin. Sidoqoftë, ky nuk është opsion për heroin e U17-shave, pjesërisht sepse Federata Zvicerane ka punuar në prapaskena për ta ndaluar këtë skenar”.

Llukes aktualisht është i fokusuar te çerekfinalja e Kampionatit Evropian, ku përballen me Portugalinë.

“Jemi një grup i mirë, jemi rritur bashkë dhe të shohim se çfarë do të ndodhë. Qëllimi është ta mposhtim edhe Portugalinë”, tha ai.

Mbetet të shihet nëse 17-vjeçari do të ndjek rrugën e Hajdarit dhe Avdullahut për t’u larguar nga “Helvetikët” dhe kaluar te Kosova./Telegrafi/

Granit Xhaka, kapiteni i Zvicrës, u përball me disa fishkëllima nga një pjesë e tifozëve kosovarë gjatë ndeshjes Kosovë – Zvicër në Prishtinë.

Momenti krijoi një atmosferë të papritur tensioni dhe u komentua gjerësisht pas ndeshjes.

Lojtari me rrënjë të forta nga Kosova u shpreh i emocionuar dhe i prekur nga situata, duke e konsideruar të dhimbshme që një reagim i tillë t’i ndodhte pikërisht në vendin e tij të origjinës, pavarësisht se mbron ngjyrat e Zvicrës në arenën ndërkombëtare dhe ka përfaqësuar me qindra herë Kosovën në mënyrën më të mirë të mundshme kudo që ka luajtur.

Për Xhakën, që gjithmonë ka treguar lidhje të veçanta me Kosovën, episodi ishte i vështirë për t’u përjetuar.

Pas ngjarjes, Xhaka ka reaguar sërish në rrjetet sociale. Ai publikoi një fotografi të shoqëruar me këngën e Çun Mulës “Malësori”, duke e shoqëruar me mbishkrimin: “FALEMINDERIT”.

Në sfond dëgjohen vargjet e njohura: “Si zog shqipe n’mal mi male, e kish falë zoti këtë djal…”.

Ky reagim i fundit i futbollistit është interpretuar si një mesazh mirënjohjeje dhe një deklarim i lidhjes së tij të fortë emocionale me vendlindjen e prindërve.

Ngjarja ka hapur diskutime të gjera në opinionin sportiv, me shumë tifozë dhe figura publike që kanë bërë thirrje për më shumë respekt dhe vlerësim ndaj lojtarëve me origjinë shqiptare që përfaqësojnë shtete të tjera. /Telegrafi/

Mesfushori Veldin Hoxha ka komentuar dy përballjet ndaj Sllovenisë dhe Zvicrës, si dhe është i sigurt se do të kualifikohemi në Kupën e Botës 2026.

Hoxha ishte zëvendësues në fitoren 0-2 kundër sllovenëve, ndërsa luajti nga minuta e parë në barazimin 1-1 kundër Zvicrës, të martën mbrëma në “Fadil Vokrri”.

Ai në një intervistë për Telegrafin tha se është i lumtur me paraqitjet në këto dy përballje.

“Do të thosha se ishte një fitore e madhe ndaj Sllovenisë dhe një lojë e mirë kundër Zvicrës”, deklaroi fillimisht 23-vjeçari.

Veldin Hoxha

Hoxha ndër të tjera komentoi edhe atmosferën e jashtëzakonshme te “Dardanët”, ku theksoi se të gjithë lojtarët po e ndihmojnë me përkthim, pasi ende nuk e di gjuhën shqipe.

“Kemi një atmosferë të mirë në skuadër, të gjithë njerëzit janë shumë të mirë përfshirë lojtarët. Ende nuk di si të flasë në gjuhën shqipe, por të gjithë po më ndihmojnë me përkthimin dhe gjëja e mirë që trajnerët flasin anglisht, prandaj është më e lehtë”.

“Po adaptohem shumë shpejtë sepse po më flasin shumë, më shpjegojnë gjithçka në detaje dhe kuptohet me skuadrën që kemi, është e lehtë të adaptohesh dhe të luash”.

Ai ndër të tjera ishte afër të shënonte edhe golin e parë me Kosovën ndaj Sllovenisë, mirëpo Jan Oblak me një super pritje ia mohoi golin.

“Jam shumë i lumtur që jam këtu dhe do të bëj gjithçka për ta ndihmuar skuadrën. Kisha një mundësi të mirë shënimi, por nuk arrita ta realizoja (ndaj Jan Oblakut), mirëpo shpresoj që së shpejti ta gjej golin. Sllovenia dhe Zvicra ishin skuadra të mira, por dëshmuam se mund të luajmë ndaj gjithkujt”.

Veldin Hoxha

I pyetur se kë e preferon në play-off, ku shorti do të tërhiqet nesër, Hoxha ishte i qartë: Nuk ka rëndësi me kë luan Kosova pasi secili do të jap gjithçka.

“Nuk ka rëndësi më kë luajmë, duhet të japim gjithçka dhe ta tregojmë kualitetin. E dimë sa të rëndësishme janë këto ndeshje”.

Në fund, mesfushori mbrojtës nënvizoi se Kosova do të shkojë në Kupën e Botës 2026.

“Besoj se mund të shkojmë në Kupën e Botës”, përfundoi ai për Telegrafin.

Me paraqitjet fantastike, Hoxha ka filluar t’ua fitojë zemrat edhe tifozëve dardanë, derisa shihet si zgjedhja kryesore e Franco Fodas në rast që mungojnë dyshja e Bundesligës, Leon Avdullahu e Elvis Rexhbecaj.

Kujtojmë, Kosova të enjten e mëson kundërshtarët për gjysmëfinalen dhe finalen e play-offit të Kupës së Botës 2026, ndërsa ndeshjet i zhvillon në muajin mars të vitit të ardhshëm./Telegrafi

Mbrojtësi i Kombëtares së Kosovës, Albian Hajdari i ka dhënë përkrahje Granit Xhakës, pas pritjes jo edhe aq të mirë në ndeshjen e mbrëmshme.

Kosova mbylli kualifikueset me një barazim 1-1 në Prishtinë ndaj Zvicrës në ndeshjen e luajtur nën shiun e rreptë të martën mbrëma.

Këto kualifikuese ishin historike për Kosovën, pasi arritën ta mbyllin në vendin e dytë duke siguruar një vend në ‘play-off’.

Megjithatë, ylli shqiptar i cili mban fanellën e Zvicrës, Xhaka, nuk u prit edhe aq ngrohtë nga një grup i tifozëve në stadium, të cilët vendosen ta vërshëllejnë pas çdo prekje të topit.

E gjithë kjo vjen pas disa deklaratave të mesfushorit të Sunderland kundrejt Albian Hajdarit dhe Leon Avdullahut, të cilët lanë fanellën e Zvicrës për të përfaqësuar Kosovën.

Por, ishte pikërisht Hajdari, i cili i doli në mbrojtje pas ndeshjes, duke postuar një fotografi së bashku me Xhakën dhe Avdullahun, me një mbishkrim: “Ne jemi një”.

Kjo fotografi u shpërnda edhe nga Avdullahu, duke treguar që edhe mesfushori e përkrah dhe nuk iu ka mbetur aspak hatëri nga deklaratat e bëra.

Fotografia u rishpërnda edhe nga vetë Xhaka. /Telegrafi/

Austria, Belgjika, Skocia dhe Spanja janë katër ekipet e fundit kombëtare që kanë siguruar kualifikim të drejtpërdrejtë për Kupën e Botës 2026. Ato i bashkohen Gjermanisë, Zvicrës, Francës, Portugalisë, Holandës, Norvegjisë, Anglisë dhe Kroacisë në listën e ekipeve evropiane që e kanë bërë këtë më parë.

Belgjika pati punën më të lehtë sonte, pasi priti në shtëpi një Lihtenshtajn të dobët, i cili nuk kishte asnjë shans për të shënuar golin e parë dhe për të marrë pikët e para në kualifikuese. Belgët festuan 7:0 falë golave të Hans Vanaken, Jeremy Doku (×2), Brandon Mechele, Alexis Saelemaekers dhe Charles De Ketelaere (×2).

Spanja barazon, Skocia fiton Kupën e Botës në kohën shtesë

Kampionët evropianë, Spanja, barazuan 2-2 me Turqinë në një ndeshje ku atyre iu lejua të humbnin vetëm me shtatë ose më shumë gola për t'u kualifikuar në Kupën e Botës. Dani Olmo e kaloi Spanjën në epërsi me një gol në minutën e katërt, ndërsa turqit e përmbysën rezultatin me golat e Deniz Gul dhe Salih Ozcan. Mikel Oyarzabal shënoi golin e fundit në minutën e 62-të.

Drama më e madhe në betejën për kualifikim në Kupën e Botës u luajt në Skoci, ku ekipit vendas i duhej një fitore kundër Danimarkës për t'u kualifikuar në Kupën e Botës të parë pas vitit 1998. Ajo ia doli mbanë me një fitore 4:2.

Skocezët kaluan në epërsi me anë të Scott McTominay në minutën e tretë, dhe Danimarka barazoi me anë të një penalltie nga shoku i skuadrës te Napoli, Rasmus Hojlund, në minutën e 57-të. Vetëm katër minuta më vonë, danezët mbetën me një lojtar më pak pasi Rasmus Kristensen u përjashtua.

Skocia rifitoi epërsinë me golin e Lawrence Shankland në minutën e 78-të, por vetëm tre minuta më vonë Patrick Dorgu barazoi në 2:2. Ekipi vendas u kualifikua për në Kupën e Botës në kohën shtesë, në të cilën Kieran Tierney dhe Kenny McLean shënuan në minutat e 93-të dhe 98-të të ndeshjes deliri në Skoci.

Të gjitha rezultatet e ndeshjeve të ditës së martë:

Kosova - Zvicra 1:1

Suedia - Sllovenia 1:1

Bjellorusia - Greqia 0:0

Skocia - Danimarka 4:2

Bullgaria - Gjeorgjia 2:1

Spanja - Turqia 2:2

Austria - Bosnja dhe Hercegovina 1:1

Rumania - San Marino 7:1

Belgjika - Lihtenshtajni 7:0

Uellsi - Maqedonia e Veriut 7:1

Ekipet evropiane që janë kualifikuar direkt për Kupën e Botës:

Austri

Belgjikë

Angli

Francë

Kroaci

Holandë

Norvegji

Gjermani

Portugali

Skoci

Spanjë

Zvicër /Telegrafi/

Granit Xhaka, kapiteni i padiskutueshëm i Zvicrës, zbriti sot në “Fadil Vokrri” për ndeshjen e radhës ndaj Kosovës, ku në pjesën e parë, një numër jo aq i madh për të thënë dhjetëra, nga tribuna lindore, i vërshëllyen yllit të futbollit shqiptar.

Shkaku ishte një deklaratë për dy lojtarë të rinj shqiptarë, Albian Hajdarin dhe Leon Avdullahun, të cilët Xhaka i vlerësoi si jo të gatshëm për të marrë minutazh të rëndësishëm në përfaqësuesen helvete, duke marrë si shembull Ardon Jasharin, një tjetër shqiptar që luan për Zvicrën.

Por kjo situatë nuk duhet të hidhërojë askënd. Granit Xhaka asnjëherë nuk e ka fshehur prejardhjen e tij, dhimbjen e familjes dhe historinë e kaluar, dhe gjithmonë ka folur me krenari dhe me zë të lartë për rrënjët e tij shqiptare.

Ai vazhdon të mbetet një nga mesfushorët më të mirë në botë, aktualisht duke luajtur në Ligën Premier me Sunderland, dhe më parë ka bërë karrierë të suksesshme te Arsenal dhe Bayer Leverkusen.

Në kombëtaren e Zvicrës, Xhaka ka qenë lider i jashtëzakonshëm, me gola dhe paraqitje memorabile, përfshirë ndeshjet kundër Serbisë, ku ka treguar karakter dhe pasion, duke festuar me fanellën e Jasharit – një moment krenarie që nuk harrohet lehtë.

Ai mbetet shqiptari i vetëm i nominuar për Topin e Artë, një arritje individuale e jashtëzakonshme.

Numri që e vërshëlloi ishte i vogël në stadium, por Granit, edhe pse sot je i hidhëruar, mos harro: mijëra, për të mos thënë miliona, shqiptarë të duan me zemër, për atë që je, atë që përfaqëson dhe që ke bërë për vendin tënd, Kosovën.

Në fund, Granit Xhaka mbetet simbol i profesionalizmit dhe lider i natyrshëm. Ata që e duan dhe e njohin e dinë se vlerat e tij nuk mund të fshihen nga pak kritika të izoluar. /Telegrafi/

Kombëtarja e Kosovës ka luajtur baras me rezultat 1-1 në shtëpi ndaj Zvicrës në ndeshjen e fundit të ciklit kualifikues për Kupën e Botës 2026.

Gjatë këtij takimi, cak i vërshëllimave nga tifozat ishte ylli shqiptar Granit Xhaka, i cili u vërshëllua në çdo prekje të topit.

Pas përfundimit të ndeshjes, Xhaka tha se ishte i befasuar nga kjo situatë dhe se nuk e kishte pritur aspak.

“Jam i befasuar që jam fishkëllyer. Dhemb, por më duhet ta pranoj atë. Mundohem të koncentrohem vetëm në futboll. Për fat të keq është pjesë e lojës”.

“Gjithnjë kam pasur përkrahjen e tifozëve të Zvicrës, pavarësisht nëse kemi luajtur në shtëpi apo në udhëtim”.

“Të gjithë që ishin këtu mund të jenë krenarë. Nuk është diçka që mund ta marrësh të sigurt. Jemi kualifikuar për ngjarje të mëdha për herë të tetë radhazi. Ishte e rëndësishme për ne që kosovarët nuk e morën me vete euforinë”.

“Mentalisht është ende e rrezikshme duke e ditur që nuk lejohet të pranosh gjashtë gola. Ishim dominantë në pjesën e parë dhe deri te goli. Dhe natyrisht, Kosova u kthye. Në përgjithësi kishim një kampanjë të mirë”, ka deklaruar Xhaka./Telegrafi/

Ndeshja e fundit e fazës së grupeve ndërmjet Kosovës dhe Zvicrës përfundoi 1-1, duke konfirmuar vendin e play-off-it për Dardanët dhe kualifikimin direkt të Zvicrës në Kupën e Botës.

Zvicra kaloi e para në avantazh në minutën e 47-të me Ruben Vargas, i cili shfrytëzoi një pasim të Djibril Sow dhe finalizoi qetësisht brenda zonës. Kosova barazoi në minutën e 72-të me një gol spektakolar të Florent Muslijes, i cili gjuajti fuqishëm nga afër zonës për të mposhtur portierin Gregor Kobel, duke vendosur rezultatin përfundimtar.

Lojtari më i vlerësuar i Kosovës ishte Lumbardh Dellova me notën 7.9, i ndjekur nga Florent Muslija me 7.5,.

Fidan Aliti me 7.2 dhe Elvis Rexhbecaj e Mërgim Vojvoda me 7.1, të gjithë me paraqitje solide.

Te Zvicra, më i miri ishte Djibril Sow me notën 7.6, ndërsa Granit Xhaka mori një notë mesatare prej 6.7.

Notat e lojtarëve të Kosovës dhe Zvicrës

/Telegrafi/

Kosova dhe Zvicra kanë barazuar 1-1 në një ndeshje me ritëm dhe emocione në stadiumin “Fadil Vokrri”, ku Dardanët treguan karakter të madh sidomos në pjesën e dytë.

Dueli nisi me intensitet të lartë, me Zvicrën që rrezikoi e para në minutën e 6-të kur Aebischer depërtoi brenda zonës dhe goditi fuqishëm, por Arijanet Muriq reagoi me një pritje të shkëlqyer.

Deri në fund të pjesës së parë, të dy ekipet tentuan të krijonin raste, mirëpo 45 minutat e para u mbyllën me rezultat të bardhë 0-0.

Fillimi i pjesës së dytë ishte tronditës për Kosovën. Vetëm dy minuta pas rifillimit, Djibril Sow e gjeti Ruben Vargasin brenda zonës dhe ky i fundit, me qetësi, e dërgoi topin në rrjetë për epërsinë 1-0 të Zvicrës.

Pas golit, Kosova reagoi fuqishëm. Foda ndërhyri me zëvendësime duke futur Edon Zhegrovën dhe Baton Zabërgjën.

Reagimi i Dardanëve u shpërblye në minutën e 74-t, kur pas një aksioni të gjatë, topi u devijua drejt Florent Muslijes afër zonës.

Mesfushori i Kosovës goditi menjëherë me të djathtën, duke e dërguar topin në shtyllën e djathtë, përtej duarve të Gregor Kobelit, në një gol spektakolar që elektrizoi stadiumin. Rezultati u barazua 1-1 dhe atmosfera në “Fadil Vokrri” u ndez.

Në minutat e fundit, Kosova kërkoi me ngulm golin e fitores, duke ushtruar presion dhe freski në sulm, por pa mundur të krijojë rastin e pastër të dytë.

Takimi u mbyll 1-1, një rezultat i drejtë duke parë zhvillimin e ndeshjes. Ky barazim i jep Dardanëve vetëbesim dhe sinjale pozitive para ndeshjeve të play-offit. /Telegrafi/

Kosova ka arritur të barazojë rezultatin në 1-1 në minutën e 72-të, falë një super goli të Florent Muslijës, i cili ndezi “Fadil Vokrrin” dhe riktheu shpresën për dardanët.

Pas disa aksioneve të njëpasnjëshme dhe presionit të vazhdueshëm në gjysmëfushën zvicerane, erdhi edhe momenti i artë i barazimit.

Topi qarkulloi me qetësi në mesfushë, derisa përfundoi te Muslija, i cili u fut pranë zonës me vendosmëri. Ai krijoi hapësirën e duhur dhe lëshoi një goditje fantastike, të pakapshme për portierin Kobel, duke dërguar topin në rrjetë dhe duke e çuar stadiumin në delir.

Një perlë e vërtetë teknike, që e vendosi ndeshjen në ekuilibër dhe shpërbleu lojën e guximshme të Kosovës në pjesën e dytë.

Më herët, në fillim të fraksionit të dytë, Zvicra kishte kaluar në epërsi përmes Ruben Vargas, i cili shfrytëzoi një moment të pakujdesisë në mbrojtjen dardane. Por reagimi i Kosovës ishte i menjëhershëm dhe i fuqishëm.

Tani, me rezultatin 1-1 dhe me mbështetjen e zjarrtë të tifozëve, Kosova do të kërkojë fitoren deri në sekondën e fundit. Atmosfera është elektrizuese dhe dardanët duken më të motivuar se kurrë. /Telegrafi/

Pjesa e parë në stadiumin “Fadil Vokrri” është mbyllur pa gola, ndonëse të dyja skuadrat patën raste të mira për të zhbllokuar rezultatin.

Zvicra e nisi më mirë takimin, duke mbajtur më shumë topin dhe duke shtyrë Kosovën drejt zonës së vet, ndërsa dardanët me kalimin e minutave e gjetën ritmin dhe krijuan raste shënimi.

Që në minutën e 6-të, Zvicra rrezikoi seriozisht me Michel Aebischer, i cili u gjend brenda zonës, por Aro Muric reagoi mrekullisht me një pritje vendimtare.

telegrafi.com

Zvicra pati një shans të artë në minutën e 19-të me Johan Manzambin, i cili nga pika e penalltisë goditi me kokë, por topi përfundoi mbi traversë.

Në minutën e 37-të, edhe Veldin Hoxha testoi portën zvicerane me një gjuajtje nga distanca, por Gregor Kobel e kapi pa vështirësi.

Në anën tjetër, Kosova ka mundur të shënojë në fund, por harkimi i Florent Muslijës, nuk u devijua nga Vedat Muriq.

Pjesa e parë u mbyll me vetëm një minutë shtesë, ndërsa lojtarët shkuan në zhveshtore me rezultatin 0-0. /Telegrafi/

Në ndeshjen e fundit të Grupit B ndërmjet Kosovës dhe Zvicrës në stadiumin “Fadil Vokrri”, kapiteni i përfaqësueses zvicerane, Granit Xhaka, është përballur me reagime të menjëhershme nga tifozët vendas sa herë ka prekur topin.

Shkak për këtë duket se janë deklaratat e tij të mëparshme lidhur me dy yjet e Kosovës, Albian Hajdari dhe Leon Avdullahu, të cilët nuk u grumbulluan për këtë takim.

Xhaka kishte përmendur se dy lojtarët nuk janë të gatshëm për t’u aktivizuar ndaj Zvicrës dhe kishte përdorur shembullin e Ardon Jashaarit, duke thënë se ai ka një përvojë më të madhe dhe ka luajtur më shumë ndeshje.

Megjithatë, tifozët kosovarë duket se nuk e kanë pritur mirë këtë koment, dhe sot çdo prekje e Xhakës është shoqëruar me vëshkallime dhe brohoritje kundër kapitenit zviceran.

Situata ka tërhequr vëmendjen e mediave, duke e kthyer deklaratën e tij në një moment tensioni brenda stadiumit.

Kosova, megjithëse kërkon të përballet me Zvicrën me seriozitet dhe të japë maksimumin në fushë, ka treguar se edhe deklaratat jashtë saj mund të ndikojnë në atmosferën e ndeshjes, duke bërë që tifozët të reagojnë fuqishëm ndaj lojtarëve kundërshtarë. /Telegrafi/

Shiu i rrëmbyeshëm në Prishtinë e ka dëmtuar fushën në stadiumin “Fadil Vokrri”, pasi që nga mbrëmë reshjet nuk janë ndalur.

Vijat janë zbehur plotësisht për shkak të reshjeve të dendura të shiut.

Dy mirëmbajtës të fushës po luftojnë aktualisht me shiun dhe stuhinë, duke i lyer vijat me bojë të bardh. Se a do t’i rezistojnë vijat shiut – mbetet të shihet.

Lojtarët e Kosovës sapo kanë arritur në stadium dhe janë nisur drejt zhveshoreve.

Ndeshja mes Kosovës dhe Zvicrës zhvillohet sot nga ora 20:45. /Telegrafi/

Kombëtarja e Kosovës e futbollit ka publikuar formacionin zyrtar për ndeshjen vendimtare ndaj Zvicrës, që zhvillohet sonte nga ora 20:45 në stadiumin “Fadil Vokrri”.

Përballja e fundit e Grupit B ka rëndësi të madhe, megjithatë Kosova ka nevojë për një fitore me gjashtë gola dallim për të kaluar Zvicrën dhe për t’u kualifikuar direkt në Kupën e Botës 2026, një detyrë që duket thuajse e pamundur.

Përzgjedhësi Franco Foda ka vendosur të lërë dy lojtarët e njohur në tribunë për t’i ruajtur nga kartonët e verdhë dhe për t’i pasur të gatshëm në ndeshjet e ‘play-off’-it: Albian Hajdari dhe Leon Avdullahu.

Ky vendim sjell tri ndryshime kryesore në formacion krahasuar me ndeshjen e fundit ndaj Sllovenisë, Fidan Aliti merr vendin e Hajdarit në mbrojtje, Veldin Hoxha starton në mesfushë në vend të Avdullahut duke luajtur partner me Elvis Rexhbecajn, ndërsa në portë rikthehet Arijanet Muric, duke zëvendësuar Amir Saipin.

Formacioni i Kosovës mbetet me skemën 3-5-2, që di të kthehet edhe 3-4-3. Porta i takon porta Arijanet Muric, ndërsa mbrojtje rreshtohet me Fidan Aliti, Amir Rrahmani (kapiten), Lumbardh Dellova. Krahët janë Mërgim Vojvoda dhe Dion Gallapeni.

Mesfusha vjen me Veldin Hoxhë, Elvis Rexhbeçajn dhe Florent Muslija, dhe sulmi Vedat Muriqi dhe Fisnik Asllani.

Në anën tjetër, Zvicra i ka besuar Granit Xhakës mesfushën, ndërsa në sulm është treshja Manzambi, Vargas dhe Embolo.

Kosova: Muric, Aliti, Dellova, Rexhbeçaj, Muslija, Asllani, Rrahmani, Vojvoda, Muriqi, Gallapeni, Hoxha.

Zvicra: Kobel, Widmer, Elvedi, Akanji, Embolo, Manzambi, Xhaka, Rodriguez, Sow, Vargas, Aebischer

/Telegrafi/

Kosova ka një sfidë të jashtëzakonshme sonte në orën 20:45 ndaj Zvicrës. Për të kaluar në vendin e parë të grupit dhe për t’u kualifikuar direkt në Kupën e Botës 2026, Kosova ka nevojë për një fitore me gjashtë gola dallim – një rezultat që duket thuajse i pamundur.

Edhe brenda ekipit është e qartë se një skenar i tillë është i vështirë. Mos-grumbullimi i Albian Hajdarit dhe Leon Avdullahut për këtë ndeshje tregon se trajneri ka menduar më shumë për sigurimin e lojtarëve për ndeshjen e play-offit, duke shmangur rrezikun e kartonëve të verdhë.

Por pse pikërisht rezultati 6:0 do ta ndryshonte situatën në tabelë?

• Zvicra ka 13 pikë, ka shënuar 13 gola dhe ka pranuar vetëm një, me një goldallim prej +12.
• Kosova ka 10 pikë, ka shënuar 5 gola dhe ka pranuar 4, të gjitha në ndeshjen e parë ndaj Zvicrës, me goldallim +1.

Një fitore hipotetike 6-0 për Kosovën do ta barazonte numrin e pikëve me Zvicrën (të dy 13 pikë), por goldallimi do të favorizonte Kosovën (+7 ndaj +6 të Zvicrës), duke e bërë vendin e parë të grupit një realitet të mundshëm.

Megjithatë, trajnerët dhe futbollistët e dinë se kjo mbetet vetëm një kombinim matematikor.

Qëllimi kryesor i Kosovës është të hyjë në play-off me ritëm të mirë, energji pozitive dhe përvojë për ndeshjet vendimtare, pa e vënë si objektiv të pamundur sigurimin e kualifikimit direkt. /Telegrafi/