Kandidatja për deputete nga radhët e PDK-së, Luljeta Veselaj-Gutaj ka reaguar pas zhvillimeve të fundit në procesin zgjedhor, duke thënë se i është cenuar integriteti personal dhe politik, si dhe integriteti i shtetit demokratik.

Në një postim publik, ajo ka theksuar se këtë vit shënon 20 vjet angazhim politik dhe se për herë të parë, sipas saj integriteti i saj është cenuar nga keqmenaxhimi i procesit zgjedhor.

“20 vjet të jetës sime kam punuar me profesionalizëm, parime të drejta, kompetencë dhe integritet, i cili për herë të parë në jetën time po më cenohet nga individë që procesin zgjedhor e kanë menaxhuar me papërgjegjësi dhe agjenda të panjohura për mua dhe pa dijeninë time”, ka shkruar Veselaj-Gutaj.

Ajo ka vlerësuar se tjetërsimi i votës përbën një nga goditjet më të rënda ndaj demokracisë dhe ka paralajmëruar se do të kërkojë përgjegjësi nga institucionet e drejtësisë.

“Tjetërsimin e votës e konsideroj krimin më të madh që mund t’i ndodhë demokracisë dhe rrugës sonë për një shoqëri të drejtë. Kjo nuk mund assesi të falet”, ka theksuar ajo.

Sipas Veselaj-Gutajt, ajo që ka ndodhur nuk mund të quhet thjesht vjedhje, por sabotim i shtetit dhe i procesit demokratik.

“Kjo nuk është demokraci, madje nuk mund ta quajmë as vjedhje, është sabotim i shtetit, dhe i gjithë asaj për çka sakrifikuam në këtë çerek shekull”, ka shkruar ajo.

Veselaj-Gutaj ka kërkuar që të gjithë përgjegjësit të vihen para drejtësisë dhe që të bëhet rinumërim i votave në të gjitha komunat.

“Kjo dukuri që i preku të gjithë kandidatët pa asnjë përjashtim… duhet të ndalohet qysh tash dhe të papërgjegjshmit të sillen para përgjegjësisë. Madje rinumërimi duhet të bëhet në të gjitha komunat”, ka theksuar ajo.

Pavarësisht zhgënjimit, ajo ka bërë të ditur se do të vazhdojë angazhimin e saj politik.

“Ndonëse e mllefosur dhe e zhgënjyer me këtë dukuri të shëmtuar, unë do të vazhdoj rrugën time në karrierën politike me plot përgjegjësi, kompetencë dhe integritet”, ka përfunduar Veselaj-Gutaj.

Kujtojmë se ish-deputetes së PDK-së deri tash i janë larguar mbi dy mijë vota pas rinumërimit. /Telegrafi/

Infeksionet e ndryshme respiratore të sipërme dhe të poshtme kanë shtuar ndjeshëm numrin e të prekurve tek të vegjlit.

Në 24 orë në urgjencën pediatrike të QSUT, paraqiten mbi 250 raste, ku vetëm 15-20% prej tyre kanë nevojë për trajtim spitalor.

Sa i takon simptomave, mbeten ata klasikët e gripit: kollë, dhimbje koke dhe temperaturë disa ditore.

“Pacientë që kanë nevojë të domosdoshme për trajtim të mëtejshëm në urgjencë, është 15-20% për trajtim në pavion. Pjesa tjetër, në 30%, kanë nevojë për trajtim të shkurtër në observim, një perfuzion… fëmijët paraqiten me kollë, temperaturë, ose me të vjella e diarre.”, tha doktori Albert Lama.

Në qarkullim janë infeksione të ndryshme, por ajo që po mbizotëron tek të vegjlit është varianti “A” i gripit.

Mendoj se është influenca A, ajo që mbizotëron, duke qenë se është më agresive. Gripi po dominon stinën.”, shtoi ai.

Shefi i Urgjencës së Pediatrisë në QSUT, Albert Lama, këshillon prindërit që të jenë vigjilentë ndaj çdo ndryshimi në sjellje të fëmijës, çka do të thotë nga mungesa e oreksit, apo gjendja e parehatisë me gjumin, si dhe jeta joaktive.

“Ta shikojnë gjendjen çdo ditë. Nëse e shohin të plogësht, me temperaturë apo me kollë, jo si përditshmëria që janë mësuar, ta çojnë te mjeku i familjes. Më pas të ndiqet sipas protokollit, sepse mjeku i familjes e njeh edhe historikun e tyre.”, tha ai.

Në rastet kur të vegjlit paraqesin simptoma gripi, mjekët këshillojnë prindërit të mos i dërgojnë fëmijët në kopshte, çerdhe apo shkolla, masë kjo për të ndërprerë zinxhirin e transmetimit të infeksioneve në qarkullim.

Ende nuk kemi arritur në pikun e gripit; pritet të arrijë në fund të muajit janar, fillim shkurti./abcnews.al/

Chelsea ndodhet në negociata për transferimin e qendërmbrojtësit të Rennes, Jeremy Jacquet.

Talenti 20-vjeçar i përfaqësueses franceze U21 ka tërhequr interes të madh me paraqitjet e tij këtë sezon.

“Blutë” raportohet se janë të gatshëm të paguajnë rreth 50 milionë funte, megjithatë Rennes po kërkon 55 milionë funte, çka ka krijuar një ngërç në bisedime mes dy klubeve.

Jacquet ka qenë titullar i rregullt gjatë këtij edicioni, duke lënë mbresa me forcën në fazën mbrojtëse dhe aftësinë për të avancuar topin nga prapavija. Ai ka kontratë me klubin francez deri në vitin 2029.

Chelsea e sheh Jacquet si një investim dhe opsion afatgjatë për repartin defensivë, ndërsa Rennes mbetet i vendosur të sigurojë vlerën maksimale për një nga talentet më premtues në zhvillim. /Telegrafi/

Në Tetovë kanë filluar punimet për prishjen e Tregut të Grave, aty planifikohet në ndërtohet parking.
Ky aksion vjen pak javë pasi tregtarët protestuan para Myftinisë së Tetovës, pasi kjo e fundit u kishte dërguar njoftim që t’i lirojnë këto hapsira që janë në pronësi të saj.
Tregtarët u shprehën të revoltuar pasi siç thanë mbi 30 vite shesin në këto hapsira dhe me të ardhurat mbajnë familje.
Sipas tyre, edhe afati i dhënë ishte shumë i shkurtër, siç theksuan nuk mund t’i shesin mallrat për kaq shpejtë.
Myftiu i Tetovës Selver Xhemaili, pas takimit me shitësit, theksoi se ata do të kenë kohë që deri në gusht të vitit të ardhshëm ta shfrytëzojnë vendin.
Ndryshe, në Tetovë në hapsirën e njohur si ‘Tregu i Grave’ çdo të enjte kur është ditë tregu vijnë tregtarë nga i gjithë vendi dhe shesin produktet e tyre.

Një 'apokalips bore' ka goditur Kamchatkan e Rusisë, siç e përshkruajnë vendasit, pasi reshje rekord të borës kanë goditur vendin.

Pas një stuhie masive dëbore, autoritetet në fillim të kësaj jave shpallën një gjendje emergjence në rajon.

Dy burra rreth të 60-ave vdiqën nën borën që ra nga çatitë, raportoi ministria lokale e emergjencave.

- YouTube youtube.com

Ndërkohë, zyrtarët thanë se dy persona kanë vdekur në Lindjen e Largët të Rusisë nga bora që binte nga çatitë e ndërtesave.

Disa video dhe imazhe u bënë virale në rrjete sociale që tregonin borën që arrinte në katet e dyta të apartamenteve shumëkatëshe.

Ndërkohë, veturat mbetën “të varrosura” në rrugë, të mbuluara me një shtresë të trashë bore.

Ndërsa reshjet e dendura të borës nuk janë të rralla në rajonin e Kamchatkas, një gadishull në Lindjen e Largët të Rusisë, intensiteti i pazakontë i stuhisë ka paralizuar vendin.

Autoritetet kanë mbyllur shkollat dhe bizneset, ndërsa qyteti është i detyruar të kalojë në punë nga distanca për shkak të një sasie të madhe bore në rrugë. /Telegrafi/

Sipas Fabrizio Romano, Kobbie Mainoo do të qëndrojë te Manchester United edhe gjatë këtij muaji, pavarësisht se më herët kishte shprehur dëshirën për t’u larguar në formë huazimi.

Mesfushori 20-vjeçar ishte lënë jashtë planeve nga Ruben Amorim, por gjithçka ndryshoi me ardhjen e Michael Carrick në krye të skuadrës.

Mainoo u aktivizua si titullar në ndeshjen e tij të parë në Premier League nën drejtimin e Carrick dhe shkëlqeu në fitoren 2-0.

Manchester United nuk ka qenë kurrë plotësisht i bindur për idenë e largimit të talentit të ri, megjithatë do ta kishte konsideruar me hezitim një huazim vetëm në rast se ai do të mbetej vazhdimisht në stol.

Tani, klubi nga Liga Premier nuk ka asnjë arsye për të lejuar largimin e Mainoo, i cili gëzon besimin e plotë të Carrick.

Ky zhvillim vjen si një goditje për Napolin dhe klubet e tjera të interesuara, të cilat kishin pyetur për një huazim të mundshëm. /Telegrafi/

Pse kontrolli dhe pritshmëritë janë armiku më i madh i dashurisë

Të dashurohesh është gjithmonë paksa e çmendur. Vendos zemrën në pëllëmbë dhe shpreson që dikush të mos ta lëshojë. Në fillim gjithçka është intensive, kimia, projeksionet, ëndrrat për “ne”. Pastaj, shpesh, shfaqet frika: se mos humbasim, se mos lëndohemi, se mos japim më shumë sesa marrim.

Por, siç mëson budizmi, vuajtja lind nga kapja pas gjërave që janë të përkohshme. Dashuria nuk është diçka që duhet mbijetuar, por diçka që duhet përjetuar me vetëdije të plotë. Të dashurohesh si një budist nuk do të thotë të duash më pak, por të duash më thellë, me më shumë vetëdije (sati) dhe më pak frikë. Është dashuri që nuk kërkon të jesh qendra e botës së dikujt, por që ju lejon të ndani, qetësisht, të njëjtin moment brenda saj.

Dashuria është hapësirë, jo posedim

Në mësimet budiste, dashuria e shëndetshme lidhet me metta, dashurinë e mirëdashur, të pakushtëzuar. Metta nuk thotë “ti më përket”, por “të uroj mirëqenie”. Siç thuhet në Metta Sutta, dashuria e vërtetë është ajo që nuk kërkon asgjë në këmbim.

Të dashurosh si një budist do të thotë ta shohësh partnerin jo si pronë, por si një qenie të lirë që zgjedh të ecë pranë teje. Partneri nuk është burimi yt i lumturisë; ai është bashkudhëtar. Ju nuk i jepni kuptim njëri-tjetrit, ju rriteni së bashku, secili nga qendra e vet.

Veçanti, por jo distancë

Në budizëm, koncepti i mos-kapjes shpesh keqkuptohet si ftohtësi emocionale. Në të vërtetë, ai nënkupton liri nga pritshmëritë dhe nga iluzionet. Jo largim nga dashuria, por largim nga frika.

Budizmi mëson se gjithçka është e përkohshme. Kur e pranon këtë, nuk kërkon garanci të përjetshme, nuk mat vëmendjen, nuk përpiqesh ta kontrollosh rrjedhën e marrëdhënies. Pikërisht sepse e di që asgjë nuk zgjat përgjithmonë, fillon ta vlerësosh më thellë atë që është tani.

Kontrolli është një iluzion

Një nga mësimet themelore të Budës është se kontrolli absolut është iluzion. Gjithçka ndryshon. Kur përpiqemi ta formësojmë partnerin sipas frikërave dhe nevojave tona, krijojmë vuajtje si për veten, ashtu edhe për tjetrin.

Siç thekson mësimi për dukkha (vuajtjen), kapja pas asaj që nuk mund të qëndrojë e pandryshuar është burim dhimbjeje. Kur e pranoni ndryshimin si pjesë të dashurisë, nuk e shihni më si kërcënim, por si shenjë se marrëdhënia është e gjallë, transmeton Telegrafi.

Dashuria nuk është burim i kufizuar

Në budizëm ekziston koncepti i mudita, gëzimi për lumturinë e tjetrit. Dashuria nuk është një burim i kufizuar që duhet ruajtur me xhelozi. Ajo zgjerohet sa më shumë që jepet.

Të dashurosh si një budist do të thotë të jesh i përkushtuar në marrëdhënie, por pa e mbyllur zemrën ndaj jetës, miqve, familjes, botës. Nuk e shteron veten duke dhënë dashuri; përkundrazi, e ushqen atë.

Gjithçka është kalimtare – prandaj është e çmuar

Një nga të vërtetat më të thella budiste është vetëdija për përkohshmërinë. Në vend që kjo të sjellë frikë, ajo sjell mirënjohje. Siç mësohet në shumë sutra, bukuria e jetës qëndron pikërisht në faktin se nuk është e përjetshme.

Kur e di që asgjë nuk është përgjithmonë, ndalon së kërkuari dashurinë perfekte dhe fillon të jetosh dashurinë e vërtetë. Jo “përgjithmonë”, por tani.

Dashuria fillon nga ti

Budizmi thekson se nuk mund ta kuptosh tjetrin pa e njohur veten. Praktika e introspeksionit dhe vetëvëzhgimit është themeli i çdo marrëdhënieje të shëndetshme. Vetëm kur i sheh qartë frikërat, pritshmëritë dhe projekcionet e tua, mund ta shohësh tjetrin ashtu siç është, jo ashtu siç dëshiron të jetë.

Siç thuhet shpesh në mësimet zen: “Kur e njeh veten, fillon të shohësh botën më qartë.”

Në thelb

Të dashurosh si një budist nuk është teknikë, por gjendje vetëdijeje. Është dashuri pa kapje, pa frikë, pa iluzione, por me prani, butësi dhe respekt të thellë për përkohshmërinë e çdo gjëje. /Telegrafi/

Banorët e fshatit Koliq kanë protestuar pranë trafos së fshatit për shkak të ndërprerjeve të shpeshta të energjisë elektrike, me të cilat, sipas tyre, po përballen prej vitesh.

Ata kanë theksuar se këto ndërprerje po u shkaktojnë dëme të konsiderueshme në amvisëri, biznese dhe në shkollën e fshatit.

Kryetari i fshatit Koliq, Bedri Hajzeri, tha se banorët kanë adresuar vazhdimisht kërkesa tek institucionet përgjegjëse dhe kompania KEDS, por pa marrë ndonjë përgjigje apo zgjidhje konkrete.

“Kemi bërë disa herë kërkesa dhe i kemi përsëritur ato tek KEDS, por deri më tani nuk është ndërmarrë asnjë veprim për furnizim të rregullt me energji elektrike. Ky problem nuk është vetëm i Koliqit, por i gjithë rajonit të Gollakut. Sa herë që organizohemi dhe kërkojmë zgjidhje, nuk marrim asnjë përgjigje", tha Hajzeri.

Ai shtoi se rrjeti aktual elektrik nuk e përballon zhvillimin e fshatit, pasi janë ndërtuar shumë shtëpi dhe vila të reja, ndërsa infrastruktura ekzistuese është e vjetruar.

"Rrjeti elektrik, duke përfshirë shtyllat, kabllot dhe trafon, nuk ka kapacitet të mjaftueshëm. Kemi pasur raste kur rryma ka qenë aq e dobët sa ndriçonte vetëm një llambë e vogël, duke rrezikuar djegien e pajisjeve dhe madje edhe të shtëpive. Kemi pasur dëme të mëdha në pajisje shtëpiake si televizorë dhe frigoriferë", theksoi ai.

Hajzeri bëri të ditur se ndërprerjet e energjisë po ndikojnë edhe në procesin mësimor, pasi shkolla e fshatit ngrohet me pelet dhe funksionon me energji elektrike, çka detyron ndërprerjen e mësimit sa herë që ndalet rryma.

Ai kërkoi nga institucionet përgjegjëse që të ndërhyjnë urgjentisht në rrjetin elektrik, duke zëvendësuar shtyllat e vjetra, kabllot dhe, aty ku është e nevojshme, edhe trafon me kapacitet më të madh./Telegrafi/

Temperaturat jo konstante kanë rritur numrin e pacientëve që kërkojn ndihmë në Spitalin e Tetovës. Më të prekur janë fëmijët dhe personat që janë me sëmundje krronike të cilët ankohen për dhimbje fyti, plogështi, temperatura, kollitje dhe probleme me gëlltitjen tha mjeku am Bekim Ismaili.
“Sigurisht që për dallim nga viti i kaluar sivjet numrat janë më të lart se vititn e kalum.Këtë vit i ka kaplaur të gjitha grup moshat gripi sezonal,diku mund të themë lirshëm që kemi rritje diku rreth 20-30% për dallim nga viti i kaluar i pacientëve janë të tanguar nga këto viroza. Ankesat më të shumta janë vinë me plogështi, me kokë dhimbje,me kollitje,teshitje, skuqe të fytit gërvishtje të fytit gjatë gëlltitjes dhe një plogëshit totale dhe një jo disponim total”, deklaroi mjeku familjar Bekim Ismaili.
Mjeku Ismaili, apelon që pacientet që shohën shenja viroze mos të dalin nga shtëpia, pasi duke ruajtur veten ruajm edhe të tjerat.
“Apeli për të gjithë është të ruajm veten që ti ruajm të tjerët. Të githë ata që kanë filluar të kenë simptoma të gripit sezonal të shmangen dhe mos futen aty ku ka edhe tjerë persona mos të përhapet gripi ashtu edhe i kemi numrat e rritur që të kujdesem mos të hapet në mas të madhe dhe të shkaktojn probleme më të mëdha tek pacient që ja më të ndijeshëm” është shprehur Ismaili.
Ismaili thotë se numri i pacienteve me grip mund të rritet me fillimin e vitit akademik. Ndërkohë theksoi se personat që kanë marr vaksinat kundër gripit më lehet e kalojn gripin se sa ato persona që nuk janë vaksinuar.

Një sërë ngjarjesh dramatike kanë ndodhur mes banorëve të BBVA-së.

Ishte Ina ajo që akuzoi Brikenën se e kishte blerë me para titullin e Miss Grand, një pretendim që u hodh poshtë kategorikisht nga producentja e këtij kompeticioni, Arjetë Osmani.

Përmes një lidhjeje telefonike, Osmani deklaroi se titulli që mori Brikena ishte plotësisht i merituar.

“Unë marrë një kohë të gjatë për përzgjedhjen dhe vendosjen përfundimtare të vajzës të cilës unë i delegoj titullin e Missit, Brikena titullin e ka më se të merituar, si në pamje që është një yll, në sjellje dhe në edukatë dhe performimin që ajo mbart dhe këto vlera ajo besoj po i dëshmon tanimë edhe në BBVA”, ka deklaruar producentja e Miss Grand për Shqipëri, Kosovë dhe Mal të Zi.

“Brikenën kur e kam njohur, realisht më ka pëlqyer për vlerat dhe për qasjen e saj ndaj femrës dhe e ka dëshmuar edhe në BBVA dhe atje ka pasur një shpërthim, suksesi i saj, vëmendja që mori në Tajlandë dhe ktheu, produksioni dhe publiku që ndiqte këtë event kaq të madh botëror, ktheu sytë nga Kosova për herë të parë”, deklaroi ajo tutje.

Brikena u zgjodh si përfaqësuese e Kosovës në Miss Grand, derisa me paraqitjen e saj në këtë garë ajo mori vëmendje të madhe mediatike, me videot të cilat bënin xhiron gjithandej nga adhurues të huaj.

Ekipi i shpëtimit me bazë në SHBA, Grey Bull, ka publikuar një video të shkurtër që tregon se si e ndihmuan udhëheqësen e opozitës venezueliane, Maria Corina Machado, të arratisej nga vendi muajin e kaluar.

Machado u largua nga Venezuela në fillim të dhjetorit pas pothuajse një viti të fshehur, në mënyrë që të merrte Çmimin Nobel për Paqen në Norvegji.

Ajo hipi në një varkë nga bregu i Venezuelës dhe lundroi drejt një pike takimi në Detin e Karaibeve.

Atje, ajo u mor nga themeluesi i Grey Bull dhe veterani i forcave speciale, Bryan Stern, dhe ekipi i tij, të cilët po e prisnin në një varkë tjetër.

Videoja e redaktuar dy-minutëshe tregon momentin kur Machado arriti dhe hipi në anijen e dytë në mes të natës.

“Janë ata, janë ata, janë ata”, dëgjohet të thotë Stern ndërsa dritat nga varka e Machados shfaqen në distancë dhe i afrohen mjetit të tij.

Pasi konfirmon identitetin e Machados, dëgjohet Stern duke e ndihmuar të hipë në varkën e tij, megjithëse momenti i saktë i transferimit mezi shihet për shkak të errësirës.

“Përshëndetje, Maria. Emri im është Bryan. Gëzohem që të njoh”, thotë ai ndërsa ajo vazhdon të flasë.

Videoja vazhdon me Machadon e veshur me një xhaketë të errët dhe kapelë, duke folur drejtpërdrejt me kamerën: “Unë jam Maria Corina Machado. Jam gjallë. Jam shëndoshë e mirë dhe shumë mirënjohëse ndaj Grey Bull.”

Videoja përfundon me imazhe të ndryshme statike të Machados me Sternin dhe ekipin e tij.

- YouTube www.youtube.com

Stern tha më parë se ata arritën në breg herët në mëngjes pas një udhëtimi të gjatë, të ftohtë dhe të tensionuar.

Nga atje, Machado hipi në një aeroplan me destinacion Norvegjinë, ku do të merrte Çmimin Nobel dhe do të shihte familjen e saj.

Grey Bull tha muajin e kaluar se misioni zgjati gati 16 orë dhe u krye kryesisht në mes të natës nëpër ujëra të trazuara.

Machado më herët refuzoi të komentonte mbi operacionin, duke përmendur shqetësime për sigurinë e atyre që ishin të përfshirë.

“Një ditë do të jem në gjendje t'jua them, sepse sigurisht që nuk dua t'i vë në rrezik tani”, tha ajo. /Telegrafi/

Parma dhe Genoa ka qenë ndeshja e parë e ditës së diel në Serie A, teksa pas 90 minutave sfida u mbyll pa gola 0-0.

Ka qenë një ndeshje shumë e luftuar nga të dyja skuadrat, por që në fund nuk solli fitues.

Megjithatë këtë ndeshje do ta mbajë gjatë në mend talenti shqiptar Joi Nuredini. Sulmuesi i talentuar shqiptar ka bërë debutimin e tij në Serie A me fanellën e Genoas.

18-vjeçari është një nga futbollistët më të mirë të ri të Genoas, derisa legjenda italiane, Daniele De Rossi që është në stolin e Genoas i ka besuar atij duke i dhënë debutimin në Serie A.

Nuredini u fut në ndeshje në minutën e 88-të, derisa luajti deri në minutën e 94-të.

Sulmuesi i talentuar është pjesë e Kombëtares U19 të Shqipërisë, derisa është produkt i Akademisë së Genoas. /Telegrafi/

Ekspertët shpjegojnë pse përgatitja para nxjerrjes së gjakut është po aq e rëndësishme sa vetë analiza

Nxjerrja e gjakut është një nga procedurat diagnostikuese më të shpeshta dhe shpesh përfaqëson hapin e parë në zbulimin e sëmundjeve dhe çrregullimeve të ndryshme, por edhe në kontrollet rutinë parandaluese. Analizat e gjakut ndihmojnë në monitorimin e sëmundjeve kronike, zbulimin e çrregullimeve metabolike, mungesave ushqyese dhe vlerësimin e statusit hormonal. Siç thekson Organizata Botërore e Shëndetësisë (OBSH), kontrollet periodike laboratorike janë thelbësore për zbulimin e hershëm të sëmundjeve dhe për monitorimin e shëndetit të përgjithshëm.

Gjaku zakonisht merret në orët e mëngjesit, në gjendje esëll. Procedura është e shkurtër dhe pas saj mund të vazhdohet normalisht me aktivitetet e përditshme. Megjithatë, siç rekomandojnë laboratorët klinikë dhe Shoqata Amerikane e Kimisë Klinike (AACC), përgatitja para nxjerrjes së gjakut është vendimtare që rezultatet të pasqyrojnë gjendjen reale shëndetësore.

Ekspertët paralajmërojnë se ushqimi dhe pijet e konsumuara një ditë ose mbrëmjen para analizës mund të ndikojnë ndjeshëm në vlerat laboratorike. ACC dhe Mayo Clinic bëjnë të ditur se, një vakt i pasur me yndyrë mund të rrisë përkohësisht trigliceridet, ndërsa ushqimi i konsumuar pak para analizës ndikon në rritjen e glukozës në gjak. Alkooli, siç raportohet në udhëzimet laboratorike të National Institutes of Health (NIH), ndikon në enzimat e mëlçisë, sheqerin në gjak dhe nivelin e hidratimit, ndërsa mungesa e lëngjeve mund ta bëjë më të vështirë vetë procedurën e marrjes së gjakut, transmeton Telegrafi.

shutterstock

Një ditë para analizës rekomandohet ushqim i zakonshëm dhe i balancuar, pa dieta ekstreme apo programe “detoks”. Sipas udhëzimeve të Mayo Clinic, qëllimi i përgatitjes nuk është “rregullimi” artificial i analizave, por sigurimi i një pamjeje reale të shëndetit. Vaktet duhet të jenë të shpërndara normalisht gjatë ditës, me ushqime të lehta dhe yndyrë të moderuar, duke shmangur mbingrënien në mbrëmje. Darka duhet të jetë e lehtë dhe e konsumuar të paktën dy deri në tre orë para gjumit. Një pjatë e ekuilibruar përfshin perime, proteina dhe karbohidrate komplekse, si peshk me perime dhe quinoa, me pak vaj ulliri.

Alkooli duhet shmangur plotësisht të paktën 24 orë para nxjerrjes së gjakut, sepse ai mund të çrregullojë rezultatet e analizave biokimike, veçanërisht ato të mëlçisë dhe lipideve në gjak. Po ashtu, rekomandohet shmangia e ushqimeve shumë të yndyrshme, shumë pikante dhe porcioneve të mëdha në mbrëmje. Uji, siç theksojnë mjekët laboratorikë, duhet pirë rregullisht gjatë gjithë ditës për të parandaluar dehidratimin.

Në shumicën e rasteve, Shoqata Amerikane e Diabetit (ADA) dhe laboratorët standardë, kërkojnë një pauzë nga ushqimi prej tetë deri në dymbëdhjetë orësh para analizës, veçanërisht kur maten glukoza, yndyrnat në gjak dhe disa parametra metabolikë e hormonalë.

Një pyetje e shpeshtë është nëse lejohet kafeja para nxjerrjes së gjakut. Sipas Mayo Clinic dhe Harvard Health Publishing, edhe pse kafeja nuk përmban kalori, ajo ndikon në nivelin e kortizolit, tensionin arterial dhe sheqerin në gjak. Për këtë arsye, mjekët theksojnë se kafeja në stomak bosh nuk rekomandohet para analizës. Këshilla më e sigurt është që fillimisht të kryhet nxjerrja e gjakut, më pas të hahet mëngjesi dhe vetëm atëherë të pihet kafeja. /Telegrafi/

Deputetja e zgjedhur e LDK-së, Hykmete Bajrami, ka kërkuar rinumërimin e votave në të gjithë Kosovën, duke apeluar për reagim të shpejtë dhe efikas nga institucionet e drejtësisë lidhur me dyshimet për manipulim të procesit zgjedhor.

Në një reagim publik, Bajrami thekson se çdo person që ka ndërhyrë apo prekur votën e qytetarëve duhet të mbajë përgjegjësi ligjore dhe morale.

“Kushdo që ka prekur votën duhet të japë përgjegjësi para ligjit dhe para qytetarëve,” ka deklaruar Bajrami.

Ajo ka theksuar se mbrojtja e votës është thelbësore për funksionimin e demokracisë dhe për ruajtjen e besimit të qytetarëve në proceset zgjedhore. /Telegrafi/

Prokuroria e Posaçme Kundër Korrupsionit dhe Krimit të Organizuar ka dalë me një deklaratë zyrtare mbi operacionin e fundjavës, ku u godit një grup kriminal në fushën e mashtrimit të qytetarëve italian dhe europian, përmes call center-ave, duke u paraqitur si kompani për investime në kriptomonedha të ndryshme.

Sipas SPAK hetimi nisi pas paraqitjes së provave nga gazetarët italianë të emisionit investigativ “Le Iene”, të cilët infiltruan një punonjës në call center dhe dorëzuan materialet dhe provat përkatëse te agjentët e BKH.

Sipas SPAK, Qendra e Thirrjeve monitorohej jo vetëm përmes sistemeve të sigurisë, por edhe nga persona civilë të angazhuar për vëzhgim, të cilët kanë dyshuar se diçka nuk po shkonte normalisht.

“Ekzistojnë indicie të qarta se mbrëmjen e datës 15 janar 2026, pas përfundimit të orarit të punës, pjesëtarë të këtij personeli vëzhgues kanë njoftuar pronarët e qendrës për një ndërhyrje të mundshme nga autoritetet. Si pasojë, në orët e para të mëngjesit të 16 janarit 2026, është ndërmarrë largimi i pajisjeve dhe boshatisja e ambienteve, përpara se SPAK të ndërmerrte aksionin”, thuhet në njoftim.

SPAK thotë se gjatë operacionit, janë arrestuar në flagrancë 6 persona me inicialet R.Gj., D.Q., E.Gj., E.M., R.P. dhe O.K., ndërsa për K.K., H.XH. dhe tre shtetas të tjerë, janë lëshuar urdhra ndalimi, pasi dyshohen për pjesëmarrje në grup të strukturuar kriminal.

“Në kuadër të veprimeve hetimore janë ushtruar kontrolle në 28 ambiente; banesa, automjete, zyra, garazhde, etj, ku janë sekuestruar qindra pajisje kompjuterike, dokumente, sisteme monitorimi të kamerave, sisteme të rrjetit kompjuterik, pajisje memorizuese, server, një automjet luksoz i markës Ferrari që dyshohet të përkiste organizatorëve të aktivitetit si edhe automjete dhe motomjete të përdorur nga autorët e dyshuar”, njofton SPAK.

Njoftimi i plotë i SPAK

“Prokuroria e Posaçme kundër Korrupsionit dhe Krimit të Organizuar rregjistroi procedimin penal nr.03/2026, për kryerjen e veprës penale të “Mashtrimit Kompjuterik”, në bashkëpunim, në formën e grupit të strukturuar kriminal,“Pjesëmarrjes në grup të strukturuar kriminal”, parashikuar nga nenet 143/b, 28/4, 333/a dhe 334 të Kodit Penal.

Procedimi u regjistrua në datën 9.1.2026 në Byronë Kombëtare të Hetimit pas paraqitjes së gazetarëve italianë të emisionit investigativ “Le Iene”, që trasnmetohet në Mediaset. Ata kanë dorëzuar materiale të punës së tyre.

Gjatë këtij hulumtumi është identifikuar një Qendër Thirrjesh (Call Center) që ndodhet në Tiranë, në ndërtesën “Atti Tower”, në rrugën “Ibrahim Rugova”, përballë Katedrales Ortodokse, nga ku, autorët e mirëorganizuar dyshohet se kanë mashtruar shtetas italianë dhe europianë për investime në kriptomonedhave të ndryshme.

Investigimi mori shkas nga ankesat e disa shtetasve italianë të mashtruar nga Qendra e Thirrjeve. Gazetarët italianë mundën të infiltrojnë një shtetas italianë, i cili nisi të punojë aty dhe realizoi regjistrimin e të dhënave në ambientet e Qendrës së Thirrjeve. Nga të dhënat rezulton se në këtë veprimtari dyshohet të jenë përfshirë shtetas italianë, rezidentë në Itali dhe të tjerë që jetojnë në Shqipëri, ndërsa transaksionet kryheshin në kriptovaluta, në portofolet e monedhave virtuale tw menaxhuara nga drejtuesit e këtij aktiviteti të kundraligjshëm, duke përdorur platforma mashtruese.

Duke iu referuar materialeve video bëhet fjalë për një Qendër Thirrjesh, që ndodhej në katin e 9-të dhe të 13-të të “Atti Tower”. Nga pamja e përgjithshme, dinamika e komunikimit dhe veprimet e personit që kryen regjistrimin apo edhe personave të tjerë, shihet se është një qendër e mirëorganizuar e thirrjeve telefonike, me poste pune të ndara, role të përcaktuara dhe staf që operonte në gjuhën italiane, franceze, spanjolle dhe gjermane.

Pas regjistrimit të këtij procedimi penal, hetuesit e Byrosë Kombëtare të Hetimit kanë nisur menjëherë puna për identifikimin e organizatorëve dhe dokumentimin e aktiviteti kriminal të mashtrimit.

Nga veprimet e para hetimore të BKH-së, rezultoi se organizatorët e kësaj veprimtarie kriminale kishin ngritur një strukturë të sofistikuar sigurie, me disa perimetra mbrojtës, duke përdorur jo vetëm kamerat filmike statike, por edhe personel civil vëzhgimi, jashtë kësaj Qendre.

Ekzistojnë indicie të qarta se mbrëmjen e datës 15 Janar 2026, pas përfundimit të punës, pjesëtarë të këtij personeli vëzhgues, kanë njoftuar pronarët e Qendrës për një ndërhyrje të mundshme. Pas kësaj, në orët e para të mëngjesit të datës 16 Janar 2026, janë larguar pajisjet dhe është boshatisur edhe ambienti i Qendrës së Thirrjeve.

Pas ekzekutimit të vendimit të Gjykatës së Posaçme, nr.85, datë 15.1.2026, hetuesit e BKH-së konstatuan në datën 16 Janar 2026, boshatisjen e ambientit dhe largimin e pajisjeve dhe personelit. Falë veprimeve të shpejta dhe të pandërprera hetimore u bë i mundur identifikimi i personave dhe automjeteve të përdorura për largimin e pajisjeve kompjuterike dhe sistemeve nga Call Center-i. Pas gjurmimit të tyre, në një kohë të shkurtër, u realizua kapja në flagrancë e disa shtetasve, të cilët kishin transportuar gjatë natës materiale drejt një ambient tjetër të marrë me qira në “Downtown One”, në Bulevardin Bajram Curri.

Pas kapjes në flagrancë të këtyre shtetasve, hetuesit kanë bërë kontrollin me iniciativë të ambientit në katin e 5-të të godinës, ku është konstatuar një Qendër tjetër Thirrjesh, në ndërtim e sipër. Aty u gjetën pajisje kompjuterike, telefona, hard disqe, laptopë, karta të ndryshme SIM, dokumente, blloqe me shënime. Personat e kapur në flagrancës, po transportonin një kosh mbeturinash, i cili përmbante sende të dyshuara të marra nga Qendra e Thirrjeve në rrugën “Ibrahim Rugova”, të cilat ishin duke i asgjësuar.

Në kushtet e kapjes në flagrancë është kërkuar mbështetja e punonjëve të Policisë të Drejtorisë Vendore Tiranë.

Shtetasin e arrestuar në flagrancë janë 6 persona me inicialet: R.Gj., D.Q., E.Gj., E.M.,R.P.,O.K..

Gjithashtu, paralelisht me identifikimin e Qendrës së dytë të thirrjeve, në sajë të veprimeve verifikuese, janë nxjerrë dhe ekzekutuar urdhrat e ndalimit për shtetasit me inicialet; K.K. dhe H.XH., si të dyshuar për kryerjen e veprës penale të “Mashtrimit kompjuterik”, në bashkëpunimin, në formën e grupit të strukturuar kriminal, parashikuar nga nenet 143/b, 28/4, 333/a dhe 334 të Kodit Penal.

Në ecuri të veprimeve hetimore, në datë 17.1.2026, janë lëshuar dhe urdhrat e ndalimit për tre shtetas të tjerë, të dyshuar për kryerjen e veprës penale të “Mashtrimit kompjuterik”, në bashkëpunimin, në formën e grupit të strukturuar kriminal, parashikuar nga netet 143/b, 28/4, 333/a dhe 334 të Kodit Penal, të cilët nuk janë gjetur deri në këto momente.

Gjatë kontrolleve të ushtruara në 28 ambiente; banesa, automjete, zyra, garazhde, etj, janë gjetur dhe sekuestruar në cilësinë e provës materiale, qindra pajisje kompjuterike të cilat janë në proces verifikimi, sisteme monitorimi të kamerave, sisteme të rrjetit kompjuterik, pajisje memorizuese, server, dokumente të Qendrës së Thirrjeve, subjektit “Infinite” shpk dhe subjekteve të tjerë në proces verifikimi. Gjithashtu janë sekuestruar edhe automjete të përdorur nga autorët e dyshuar, motomjete si dhe një automjet luksoz i markës Ferrari, që dyshohet se i përket organizatorëve të këtij aktiviteti.

Prokuroria e Posaçme vijon kryerjen e veprimeve hetimore për inventarizimin e të gjitha pajisjeve kompjuterike, sekuestrimin, analizimin e tyre si dhe identifikimin e të gjithë viktimave të veprës penale, në bashkëpunim me autoritetet e huaja.

Falenderojmë Policinë e Shtetit për mbështetjen e dhënë në fazën e ekzekutimit të vendimit të Gjykatës së Posaçme si edhe gjatë veprimeve të mëtejshme për identifikimin dhe arrestimin e personave të dyshuar.

Prokuroria e Posaçme falenderon në mënyrë të veçantë edhe stafin e emisionit investigativ italian “Le Iene” të “Mediaset”, falë punës të së cilëve, u bë e mundur inicimi dhe hetimi i këtij rasti të mashtrimit masiv në Qendrën e Thirrjeve në Shqipëri.

Gjithashtu, SPAK u tërheq vëmendjen qytetarëve dhe medias për fenomenin e mashtrimit online përmes Qendrave të Thirrjeve (Call Center) dhe kjo është një veprimtari që do vazhdojë të ndiqet me prioritet edhe në bashkëpunim me partnerët tanë ndërkombëtarë.

Nga ana tjetër, një apel u shkon edhe shtetasve që punojnë në këto qendra, për t’u ndërgjegjësuar dhe për t’u mos bërë pjesë e veprimtarive të paligjshme”, njofton SPAK.

Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë./euronews/

I ftuari i radhës në podcastin “Arena e Yjeve” ishte futbollisti i talentuar Milot Avdyli. Ky episod realizohet me mbështetjen e sponsorëve zyrtarë Golden Eagle , Air Munich dhe Exfis.

Avdyli ka folur për punën e tij me trajnerin spanjoll Albert Riera dhe ndikimin e madh që ky i fundit ka pasur në zhvillimin e tij profesional.

Futbollisti ka theksuar se Riera si trajner i kushton rëndësi të jashtëzakonshme detajeve dhe analizës së lojës.

“Albert Riera ka emër në Slloveni, domethënë sepse ka luajtur për ekipe shumë të mëdha, Liverpool, Manchester City, Espanyol”.

“Po ai është duke e bërë punën më të madhe si trajner besoj sesa që ka qenë si lojtar. Edhe besoj që ka me arritë më shumë si trajner sesa ka arritë si lojtar”.

“Sepse e kam parë si e do punën, si punon, videot, stërvitjet, i jep shumë rëndësi si me u vendos në fushë, videot, bile ndonjëherë rrijmë duke shikuar video nga dy orë, gjë që nuk e kam parë as në Zvicër as në Ukrainë”.

“Edhe e kam parë që e do punën edhe është edhe për mua shumë më lehtë edhe është shumë detajist”.

“I sheh vetëm detajet shumë të vogla por që e vendosin lojën. Është shumë, shumë i përkushtuar pas punës”.

“Njihet që është një tip shumë nervoz, sidomos gjatë ndeshjeve, bile ndonjëherë nuk mundet as ta kontrollojë veten, por jashtë fushës komunikon shumë me lojtarët”, ka rrëfyer Avdyli.

Episodin e plotë me futbollistin Milot Avdyli mund ta ndiqni edhe në kanalin zyrtar të Telegrafit në Youtube./Telegrafi/

- YouTube www.youtube.com

Eugen Cakolli nga KDI, ka reaguar ashpër lidhur me dyshimet për manipulim të votave të kandidatëve gjatë procesit të numërimit, duke kërkuar nga Prokuroria që të nisë menjëherë hetimet dhe ndjekjet penale.

Në një reagim publik, Cakolli thekson se manipulimet e evidentuara në disa vendvotime dhe komuna kanë marrë përmasa industriale dhe nuk mund të konsiderohen si gabime njerëzore apo rastësi.

“Ku është dhe çka po pret Prokuroria që nuk po nisë hetimet dhe ndjekjet penale për manipulimin e votave të kandidatëve – që në disa vendvotime e komuna kanë marrë përmasa industriale”, ka shkruar Cakolli.

Sipas tij, emrat e komisionerëve për secilën tavolinë të numërimit në Qendrat Komunale të Numërimit dihen, por manipulimet nuk janë kryer vetëm nga ta.

“Dhjetëra e qindra vota të shtrembëruara në një vendvotim të vetëm, e mijëra në nivel komune – kryesisht për kandidatë të caktuar dhe në komunat e tyre – nuk janë as rastësi, as gabim njerëzor,” ka shkruar Cakolli.

Ai vlerëson se përfshirja e kandidatëve të caktuar në këto skema është e mundshme dhe se hetimet duhet të përfshijnë edhe ta, për të zbardhur plotësisht rastin.

Cakolli apelon që organet e drejtësisë të veprojnë pa vonesë, në mënyrë që të mbrohet integriteti i procesit zgjedhor dhe besimi i qytetarëve.

“Kështu që, hetimi, pashmangshëm duhet t’i përfshijë edhe ata”, ka shkruar Cakolli./ Telegrafi/

“Do të ishte fundi i rendit botëror siç e njohim ne nëse SHBA do të pushtonte Grenlandën me forcë”, tha ish-kreu i NATO-s.

Anders Fogh Rasmussen, i cili është gjithashtu ish-kryeministër danez, tha se Trump po përdor gjuhë për Grenlandën të ngjashme me atë të "gangsterëve" në Rusi dhe Kinë që ai duhet të përpiqet t'i kontrollojë, shkruan skynews.

"Për mua, ka qenë një proces i dhimbshëm. Që nga fëmijëria, i kam konsideruar Shtetet e Bashkuara si udhëheqësin natyror të botës së lirë. Madje kam folur për SHBA-në si policin e botës", tha Rasmussen, i cili dërgoi trupa daneze për të luftuar përkrah SHBA-së në Afganistan.

"Tani shohim Shtetet e Bashkuara të përdorin një gjuhë që është shumë e ngjashme me atë të gangsterëve që duhet të kontrollojnë në Moskë e Pekin", shtoi ai.

“Ndarjet në perëndim janë në favor të Rusisë. Jam i sigurt që Moska shpreson që Grenlanda të bëhet ajsbergu që fundos NATO-n”, vazhdoi ish-kreu i NATO-s.

"Pra, kjo shkon përtej Danimarkës dhe Grenlandës... Pushtimi i Groenlandës do të ishte fundi i rendit botëror siç e njohim ne", përfundoi ai. /Telegrafi/

“Shprehim shqetësimin tonë të thellë lidhur me njoftimet dhe informacionet se Qeveria e Republikës së Maqedonisë së Veriut, përmes Ministrisë së Punëve të Brendshme, po përgatit ndryshime ligjore dhe sistematizim të ri të vendeve të punës, të cilat drejtpërdrejt e dëmtojnë rëndë statusin institucional të Dibrës", thuhet në njoftim.

Ata shtojnë se deri më sot, organi për punë të brendshme në Dibër ka funksionuar me statusin e Njësisë për Punë të Brendshme, ndërsa sipas ndryshimeve të paralajmëruara, Njësia për Punë të Brendshme- Dibër degradohet dhe kalon në njësi të kategorisë së dytë, duke humbur kompetencat thelbësore dhe strukturën e saj komanduese.

Sipas tyre, me këtë vendim, të gjitha kompetencat dhe organi komandues kalojnë nën juridiksionin e Sektorit për Punë të Brendshme në Ohër, ndërsa në Dibër nuk parashihet më:
kryeshef i policisë,kryeshef i njësisë antikrim,zëvendëskomandant,as komandant i pikës kufitare.Ky veprim përbën një zhvlerësim serioz institucional për një rajon kufitar dhe strategjik, duke cenuar drejtpërdrejt sigurinë, efikasitetin institucional dhe barazinë në trajtim. Ekziston rreziku real që ky degradim të jetë vetëm një hap paraprak drejt shndërrimit të Njësisë për Punë të Brendshme në Dibër në një stacion të thjeshtë policor.

"I bëjmë thirrje të gjithë faktorëve relevantë politikë dhe institucionalë, si nga pushteti ashtu edhe nga opozita, që të mos lejojnë këtë ndëshkim të padrejtë dhe të papranueshëm ndaj Dibrës, i cili ka prapavijë të qartë politike dhe etnike.
Dibra meriton trajtim të barabartë, siguri funksionale dhe respekt institucional. Çdo përpjekje për ta degraduar atë do të hasë në kundërshtim të fuqishëm dhe të vendosur.", theksohet në reagimin e Aleancës për Shqiptarët./Telegrafi/

Shumë gra e teprojnë me bojën dhe dëmtojnë flokun dhe skalpin më shumë sesa mendojnë

Për shumë njerëz, ngjyra e flokëve nuk është thjesht trend mode, por një pjesë e pandashme e stilit personal. Por a e dini se lyerja e flokëve nuk ndikon vetëm në shëndetin e skalpit dhe të lëkurës së fytyrës, por mbart edhe rrezik për alergji?

Sa herë në vit mund t’i lyeni flokët? Cilat ngjyra janë potencialisht më të dëmshme? Si mund të balancohet dhe të rigjenerohet floku përmes ushqimit? Dhe çfarë është më e dëmshme: lyerja e flokëve apo permanenti?

Këtyre pyetjeve u përgjigjet Shao Shaoming, drejtor i Departamentit të Dermatologjisë, për t’ju ndihmuar të kuptoni më mirë të gjitha rreziqet.

Lyerja e flokëve e kufizuar në katër herë në vit

Sa shpesh është më e shëndetshme të lyeni flokët?

- Flokët është më mirë të lyhen një herë në tre muaj, pra maksimumi katër herë në vit. Duke qenë se bojërat përmbajnë shumë përbërës kimikë, toksiciteti i metaleve dhe përthithja përmes lëkurës mund të shkaktojnë reaksione si skuqje, kruarje dhe forma të ndryshme të dermatitit alergjik të kontaktit. Për më tepër, shumë studime tregojnë se lyerja e shpeshtë e flokëve mund të rrisë rrezikun për kancer të traktit urinar, ndaj është e nevojshme kujdes dhe kontroll i shpeshtësisë së lyerjes, shpjegon ai.

Shmangni kontaktin e bojës me lëkurën

Shumë vajza nuk heqin dorë nga nuancat e çelëta dhe nga lyerja e shpeshtë, dhe sa më shpesh që i lyejnë flokët, aq më shumë bëhen të varura nga ky proces. Shao paralajmëron se zbardhja dhe lyerja kërkojnë aplikim të shumëfishtë të bojës që ngjyra të fiksohet mirë, ndaj sa më e çelët të jetë nuanca, aq më e dëmshme është për flokun dhe skalpin.

Ai këshillon që para lyerjes të aplikohet gjithmonë një losion mbrojtës për skalpin, të mos përdoren produkte me origjinë të panjohur dhe të bëhet kujdes që boja të mos prekë lëkurën pas veshëve, në qafë apo në fytyrë, sepse në të kundërt rreziku i alergjive rritet ndjeshëm.

Gjithashtu, ai kujton se era e fortë e disa bojërave mund të irritojë rrugët e frymëmarrjes dhe të shkaktojë alergji ose astmë, ndaj kërkohet kujdes i veçantë gjatë përdorimit, transmeton Telegrafi.

Pini ujë dhe merrni vitaminë C për detoksifikimin e organizmit

Lyerja e flokëve mund të ndikojë në organizëm në një masë të caktuar, ndaj është e rëndësishme të kujdeseni për trupin pas këtij procesi. Dermatologu Dr. Qiu Qiuming thekson se pas lyerjes është e rëndësishme të pini mjaftueshëm ujë dhe të merrni suplemente me vitaminë C.

Uji ndihmon në përshpejtimin e metabolizmit dhe në eliminimin më të shpejtë të mbetjeve të bojës nga trupi, ndërsa vitamina C ka veti të fuqishme antioksiduese, neutralizon radikalet e lira dhe ul ngarkesën mbi organizëm.

Ai rekomandon që në dietën e përditshme të përfshihen më shumë guava, domate, kivi, limon ose portokall, për ta ndihmuar trupin të përballojë dëmet e mundshme nga bojërat e flokëve.

Shmangni thyerjen e flokëve dhe irritimin e lëkurës duke mos i bërë lyerjen dhe permanentin njëkohësisht

Shpesh dëgjohet se lyerja e flokëve dhe permanenti nuk duhen bërë në të njëjtën kohë, por për ata që kanë mungesë kohe, kjo duket si zgjidhja më praktike. Megjithatë, pse parukierët dhe mjekët këshillojnë që këto dy trajtime të mos kryhen në të njëjtën ditë?

- Lyerja e flokëve dhe permanenti përdorin kimikate të ndryshme, dhe aplikimi i tyre njëkohësisht është shumë i dëmshëm për flokun dhe lëkurën. Floku bëhet më i prirur ndaj thyerjes dhe skalpi mund të bëhet i ndjeshëm, ndaj është më mirë që këto trajtime të bëhen veçmas, shpjegon Shaoming.

Permanenti është edhe më i dëmshëm për flokët se lyerja

Shumica e njerëzve e dinë që boja dëmton flokët, por pak e kuptojnë se permanenti është edhe më i rrezikshëm. Shao Shaoming shpjegon se, pavarësisht nëse bëhet fjalë për permanent të ngrohtë apo të ftohtë, ky proces dëmton seriozisht strukturën e flokut.

Qoftë kur flokët e drejtë kthehen në kaçurrela apo anasjelltas, folikulat duhet të stimulohet fuqishëm për të ndryshuar formën e fijes së flokut, gjë që çon në dobësim dhe thyerje. Për këtë arsye, nëse synimi është ruajtja e shëndetit të flokëve dhe parandalimi i dëmtimit, është më mirë të zgjidhet lyerja e flokëve sesa permanenti. /Telegrafi/