TIRANË, 4 shkurt/ATSH/ Kryetari i grupit parlamentar të Partisë Socialiste, Taulant Balla deklaroi sot se ligjëratat kundër UÇK-së në shkollat e Kosovës janë sulm i drejtpërdrejtë ndaj historisë sonë kombëtare dhe sakrificës për liri të popullit shqiptar.

Sipas Ballës, të tentosh ta njollosësh UÇK-në në institucione arsimore është keqinformim i qëllimshëm dhe cenim i rëndë i dinjitetit të dëshmorëve dhe familjeve të tyre. Gjykata Speciale, sipas tij, nuk ka mandat të rishkruajë historinë e Kosovës.

“Duhet të përkujtojmë me nderim edhe dëshmorët e Ushtrisë Çlirimtare të Kosovës. Përpjekjet e ditëve të fundit të disa përfaqësuesve të Gjykatës Speciale, të cilët shfaqen në shkollat e Kosovës, për të interpretuar sipas tyre historinë dhe rolin e Ushtrisë Çlirimtare të Kosovës, janë përpjekje që nuk gjenden askund në asnjë vend të botës dhe ju kujtojmë se Ushtria Çlirimtare e Kosovës është nderi i kombit shqiptar, në atë anë të kufirit dhe në këtë anë të kufirit”, deklaroi Balla.

Deklarata e Ballës i bashkohet zemërimit masiv që ka nxitur një leksion i mbajtur në shkollën e mesme “Xhevdet Doda” në Prishtinë, ku zyrtarë të Gjykatës Speciale, sipas një audioincizimi të publikuar nga media lokale, u kanë shpjeguar nxënësve përmbajtjen e aktakuzave ndaj ish-krerëve të UÇK-së, përfshirë akuza për krime lufte dhe krime kundër njerëzimit.

Kjo orë mësimi ka nxitur reagime politike për shkak të baltosjes së UÇK-së, mungesës së një perspektive të balancuar dhe mosrespektimit të parimit të prezumimit të pafajësisë.

/m.m/j.p/

The post Balla: Ligjëratat kundër UÇK-së në shkollat e Kosovës, sulm ndaj historisë kombëtare appeared first on Agjencia Telegrafike Shqiptare.

TIRANË, 4 shkurt /ATSH/ Kryeministri Edi Rama reagoi sot ndaj deklaratës së Shoqatës Kombëtare të Gjyqtarëve, lidhur me shqetësimin e ngritur prej tij mbi kërkesën për rritjen e pagave të gjyqtarëve.

Në një komunikim përmes rrjeteve sociale, Rama u shpreh se nuk është e pranueshme që gjyqtarët të kenë në mënyrë të pakufizuar epërsi mbi pjesën tjetër të shoqërisë shqiptare dhe mbi piramidën e pagave të shtetit, duke theksuar se një praktikë e tillë nuk aplikohet në asnjë vend të botës.

Kryeministri theksoi se kjo epërsi i është njohur Gjykatës Speciale dhe Prokurorisë Speciale për shkak të funksionit që ushtrojnë, duke nënvizuar se këto struktura kanë karakter të përkohshëm dhe një mision të përcaktuar si strategjik për transformimin e shtetit shqiptar.

“Ata persona ndodhen shpesh në situata sakrifice, presioni dhe rreziku për jetën, për shkak të përballjes me grupe kriminale”, u shpreh Rama. Sipas tij, Këshilli i Ministrave dhe Kuvendi kanë ushtruar diskrecionin e tyre kushtetues në përcaktimin e formulës së pagave, kompetencë e cila, sipas Ramës, është njohur edhe nga Gjykata Kushtetuese.

Rama shtoi se Gjykata Kushtetuese nuk duhet të marrë në konsideratë kërkesa për rritje pagash, pasi pagat nuk rriten përmes vendimeve gjyqësore.

“Ajo që kërkohet të imponohet është ndërhyrja në politikën e pagave të Republikës së Shqipërisë”, u shpreh Kryeministri, duke shtuar se ndërhyrje të tilla, përfshirë politikat fiskale, janë kompetencë ekskluzive e pushtetit ekzekutiv dhe Kuvendit.

/gj.m/r.e/a.f/

The post Rama: Politika e pagave i takon ekzekutivit, epërsia për SPAK dhe GJKKO për shkak të funksionit appeared first on Agjencia Telegrafike Shqiptare.

TIRANË, 3 shkurt /ATSH/ Shoqata Kombëtare e Gjyqtarëve të Republikës së Shqipërisë ka reaguar sot ndaj asaj që e cilëson si një fushatë publike spekulative dhe populiste, të ndërmarrë nga Kryeministri dhe të amplifikuar nga media, në një moment kur Gjykata Kushtetuese ndodhet në fazën përfundimtare të shqyrtimit të çështjes së statusit financiar të magjistratëve.

Në një deklaratë të gjatë publike, shoqata vlerëson se kjo klimë synon linçimin e gjyqtarëve dhe ushtrimin e presionit të drejtpërdrejtë mbi Gjykatën Kushtetuese, duke cenuar parimet e shtetit të së drejtës dhe pavarësinë e pushtetit gjyqësor.

Shoqata thekson se nuk është në kompetencën e saj të argumentojë më tej kërkesat kushtetuese, pasi ato ndodhen tashmë në shqyrtim nga Gjykata Kushtetuese, por e konsideron të domosdoshme ndaljen e keqinformimit të opinionit publik dhe të presionit politik ndaj gjyqtarëve.

Sipas shoqatës, që prej vitit 2016, pushteti ekzekutiv dhe legjislativ kanë ndërhyrë në mënyrë të përsëritur në statusin financiar të magjistratëve, duke devijuar nga standardet e parashikuara fillimisht në reformën në drejtësi dhe nga neni 138 i Kushtetutës, i cili parashikon se paga dhe përfitimet e gjyqtarëve nuk mund të ulen.

Në deklaratë renditen disa raste konkrete, ku qeveria dhe Kuvendi, sipas shoqatës, kanë vepruar në kundërshtim me frymën e reformës dhe jurisprudencën e Gjykatës Kushtetuese, përmes ndryshimeve ligjore, dispozitave tranzitore dhe referencave të pagave, disa prej të cilave janë shfuqizuar nga vetë Gjykata Kushtetuese.

Shoqata thekson se iniciativat e saj nuk kanë si qëllim rritjen e pagave, por mbrojtjen e statusit kushtetues, pavarësisë dhe dinjitetit të magjistratëve, duke e cilësuar si të pavërtetë dhe spekulative narrativën se bëhet fjalë për privilegje financiare.

Në përfundim, Shoqata Kombëtare e Gjyqtarëve paralajmëron se sulmet publike ndaj gjyqësorit dhe paralajmërimet për ndërhyrje të reja edhe pas vendimmarrjes së Gjykatës Kushtetuese përbëjnë një rrezik serioz për pavarësinë e pushtetit gjyqësor dhe për funksionimin e demokracisë, duke nënvizuar se veprimet e saj synojnë forcimin e shtetit të së drejtës dhe mbrojtjen e parimeve kushtetuese nga çdo ndërhyrje politike.

/gj.m/j.p/

The post Shoqata e Gjyqtarëve: Presioni publik ndaj Kushtetueses cenon pavarësinë e drejtësisë appeared first on Agjencia Telegrafike Shqiptare.

TIRANË, 31 janar /ATSH/ Ministri i Turizmit, Kulturës dhe Sportit Blendi Gonxhja ka reaguar për ndarjen sot nga jeta të aktorit Fitim Makashi.

“Një tjetër yll i teatrit dhe kinematografisë shqiptare u nda sot nga jeta”, shkruan Gonxhja në rrjetet sociale.

Gonxhja vlerëson figurën e Fitim Makashit si aktor, pedagog dhe emër i paharruar i skenës dhe ekranit, që i dha artit shqiptar më shumë se tri dekada përkushtim, pasion dhe shpirt.

Ai la gjurmë në skenë me role si Pedagogu në “Pas provimit të dytë”, Beni në “Vdekja e një komisioneri”, Bedriu në “Dritat e skenës” dhe Filipoviç në “Inspektori”.

Në kinematografi u bë pjesë e filmave që sot janë klasikë: “Nga mesi i errësirës”, “Duel i heshtur”, “Prita”, “Njesiti gueril”, “Ndërgjegjia”, “Larg barbarëve”, “Shpella e piratëve”, “Vdekja e kalit”, “Tre njerëz me guna”, “Gjurmë në kaltërsi”, “Intendenti”, “Ilegalët”, “Rrugicat që kërkonin diell”.

“U prehtë në paqe!”, shkruan Gonxhja.

/r.e/

The post Gonxhja: Fitim Makashi i dha artit shqiptar më shumë se tri dekada përkushtim dhe pasion appeared first on Agjencia Telegrafike Shqiptare.

TIRANË, 28 janar/ATSH/ Kryetari i grupit parlamentar të Partisë Demokratike, Gazment Bardhi reagoi sot ndaj vendimit të Kuvendit për të shtyrë mbledhjen e Këshillit të Mandateve për shqyrtimin e imunitetit të zv/kryeministres Belinda Balluku, njëherësh ministre e Infrastrukturës dhe Energjisë.

“Zvarritja e çështjes Balluku, si në Parlament ashtu edhe në Gjykatën Kushtetuese, nuk është rastësi, por një operacion i koordinuar politik për të bllokuar SPAK-un dhe për të mbrojtur korrupsionin në majë të pushtetit”, u shpreh Bardhi.

Sipas tij, të njëjtën strategji ka ndjekur edhe Gjykata Kushtetuese, e cila dje shtyu pa afat vendimmarrjen për Belinda Ballukun.

“Sot, Kuvendi i Shqipërisë ka vijuar të njëjtën linjë: është shtyrë, pa asnjë arsye të ligjshme, mbledhja e Këshillit të Mandateve, me justifikimin se duhet pritur vendimi i Gjykatës Kushtetuese, edhe pse masa e re e sigurisë që kërkon SPAK ndaj Ballukut nuk ka asnjë lidhje me çështjen e pezullimit nga detyra”, shtoi Bardhi.

Si shtyrja nga Gjykata Kushtetuese, ashtu edhe shtyrja nga Kuvendi, për Bardhin, “janë hallka të të njëjtit zinxhir mbrojtës, të komanduar politikisht nga Edi Rama”.

“Për shkak se ka marrë një vendim pezullimi të vendimit të GJKKO-së, Gjykata Kushtetuese ka detyrimin ligjor të shqyrtojë këtë çështje me përparësi dhe të konkludojë me një vendimmarrje që zhbllokon veprimtarinë hetimore të SPAK”, shtoi Bardhi.

Çdo vonesë, sipas tij, “është shërbim i drejtpërdrejtë për Edi Ramën, për të blerë kohë kundër drejtësisë, dhe për Ballukun, për prishje provash, intimidim dëshmitarësh dhe vijim të aferave korruptive me vlerë miliona euro”.

/m.m/j.p/

The post Bardhi: Zvarritja për imunitetin e Ballukut, strategji për të bllokuar SPAK-un appeared first on Agjencia Telegrafike Shqiptare.

TIRANË, 28 janar/ATSH/- Agjencia Shtetërore e Kadastrës ka reaguar sot lidhur me situatën e krijuar në Kadastrën e Vlorës.

Në njoftimin zyrtar, ASHK thekson se prej kohësh, proceset kadastrale për disa drejtori vendore janë të lokalizuara në Tiranë, si pjesë e një modeli organizimi që synon optimizimin e burimeve njerëzore dhe proceseve administrative.

Sipas ASHK-së, procesi i transferimit të drejtorive vendore në Tiranë ka nisur që në vitin 2021 me transferimin e Durrësit e Krujës, për të vijuar më tej edhe me drejtori të tjera si Shkodër, Kavajë, Kamëz -Vorë dhe Vlorë.

“Në kuadër të rritjes së efikasitetit dhe të mirëadministrimit të proceseve të parashikuara nga legjislacioni në fuqi, edhe pjesa e mbetur e punonjësve në qytetin e Vlorës, po zhvendoset në Tiranë. Ky riorganizim synon përshpejtimin e trajtimit dhe unifikimin e praktikave të punës”, sqarohet në njoftimin për shtyp.

Gjithashtu, në njoftim nënvizohet se “falë digjitalizimit dhe përdorimit të sistemeve të avancuara, një jurist mund të përpunojë të gjithë dokumentacionin ligjor dhe një hartograf mund të kryejë reflektimet hartografike në sistemet përkatëse, pa qenë prezent fizikisht në territorin në të cilin ndodhet prona apo aplikuesi”.

Agjencia Shtetërore e Kadastrës siguron banorët e Vlorës se “jemi të përkushtuar për të përmirësuar cilësinë e shërbimeve kadastrale, për të rritur ritmin e legalizimit të ndërtimeve informale si dhe për të përfunduar procesin e Regjistrimit Fillestar në zonat e mbetura në të gjithë qarkun e Vlorës”.

Në njoftimin për shtyp, Kadastra sjell në vëmendje se  “të gjitha aplikimet kryhen online përmes portalit e-Albania dhe shërbimet përkatëse ofrohen gjithashtu në mënyrë elektronike, drejtpërdrejt në profilin e qytetarit aplikues. Gjithashtu, dokumentacioni i nevojshëm për trajtimin e aplikimit, përveç ngarkimit në sistemin elektronik, dërgohet përmes Postës Shqiptare pranë drejtorisë vendore, pavarësisht vendndodhjes së saj, për t’u administruar dhe bashkëlidhur me aplikimin e kryer në mënyrë të rregullt dhe të standardizuar”

Agjencia Shtetërore e Kadastrës përfundon reagimin zyrtar se mbetet e angazhuar që, përmes digjitalizimi të proceseve, të ofrojë shërbime gjithnjë e më të shpejta, transparente dhe të besueshme për çdo qytetar, në çdo drejtori vendore.

The post Zhvendosja e Kadastrës Vlorë, ASHK: Qytetarët nuk penalizohen, model i nisur në 2021 edhe me drejtori të tjera appeared first on Agjencia Telegrafike Shqiptare.

TIRANË, 27 janar/ATSH/ Kryetari i grupit parlamentar të Partisë Socialiste Taulant Balla deklaroi sot në Kuvend se në protestën e fundit të opozitës kishte edhe “një grup zjarri” me fytyra të mbuluara, të cilët kishin ardhur me një axhendë të qartë.

Duke replikuar në Kuvend me deputetin e Partisë Demokratike, Agron Gjekmarkajn, Balla u ndal sërish te protesta e dhunshme e opozitës.

Balla theksoi se aktet e dhunës nuk erdhën nga protestuesit, anëtarë apo militantë të Partisë Demokratike që kishin dalë në protestë, por nga një “grup zjarri”.

“Ata kishin ardhur me një agjendë të qartë dhe ishin pozicionuar në mënyrë të koordinuar”, tha Balla.

Sipas tij, mediet kishin evidentuar pozicionimin e këtij grupi që përpara nisjes së protestës.

Balla tha se ata fillimisht mbanin tabela, por më pas hapën palltot dhe nxorën një arsenal mjetesh që ai i cilësoi si armë.

Sipas tij, “këto mjete duhet të konsiderohen armë dhe se përdorimi i tyre duhet të sanksionohet dhe rregullohet me ligj, duke e bërë të papranueshëm përdorimin e tyre në mjedise publike ku ndodhen shumë qytetarë”.

/m.m/j.p/

The post Balla: “Grup zjarri” mes protestuesve të PD-së, përdorimi i molotovëve të rregullohet me ligj appeared first on Agjencia Telegrafike Shqiptare.

TIRANË, 27 janar/ATSh/ Në Ditën Ndërkombëtare të Përkujtimit të Holokaustit, ambasada e Shteteve të Bashkuara të Amerikës vuri në dukje se ShBA-të mbeten të përkushtuara për t’u përballur me antisemitizimin dhe shtrembërimin e Holokaustit.

Në këtë ditë të përkujtimit të viktimave të Holokaustit, ambasada e ShBA-ve nderon gjashtë milionë viktimat hebreje të Holokaustit dhe rithekson përgjegjësinë e përbashkët për të kujtuar të kaluarën dhe për të punuar drejt një të ardhmeje pa dhunë dhe urrejtje.

Në njoftim, ambasada nënvizon një thënie të Sekretari Rubio, i cili është shprehur se “antisemitizmi nuk ka vend në këtë botë”.

“Shtetet e Bashkuara mbeten të përkushtuara për t’u përballur me antisemitizmin dhe shtrembërimin e Holokaustit. Ne e njohim historinë e veçantë të Shqipërisë si një nga të paktat vende të pushtuara nga nazistët ku hebrenjtë gjetën strehim, falë guximit të shqiptarëve të zakonshëm”, citohet sekretari Rubio.

Ambasada e ShBA-ve, thekson se mirëpret partneritetin e vazhdueshëm të Shqipërisë në luftën kundër antisemitizmit, siç është miratimi nga ana e vendit tonë vitin e kaluar i Praktikave më të Mira për Parimet e Konferencës së Uashingtonit mbi Artin e Konfiskuar nga Nazistët, të cilat çojnë përpara drejtësinë dhe kompensimin për pronën kulturore të periudhës së Holokaustit.

Asambleja e Përgjithshme e Kombeve të Bashkuara në vitin 2005 caktoi 27 janarin si Ditën Ndërkombëtare të Përkujtimit të Viktimave të Holokaustit.

Kjo ditë ndërkombëtare është një kujtesë globale për rreziqet e urrejtjes, fanatizmit dhe antisemitizmit. Dita është një thirrje për të kujtuar, reflektuar dhe ndërmarrë veprime për të siguruar që mizori të tilla të mos ndodhin më kurrë. Kjo ditë kremtohet me ngjarje dhe aktivitete përkujtimore në Selinë e Kombeve të Bashkuara në Nju-Jork dhe zyrat e Kombeve të Bashkuara në të gjithë botën.

/e.i/j.p/

The post Ambasada e ShBA-ve citon Rubio-n: Shqipëria, ndër të paktat vende ku hebrenjtë gjetën strehim appeared first on Agjencia Telegrafike Shqiptare.

PARIS, 25 janar /ATSH-AFP/ – Australia iu bashkua zemërimit të shkaktuar nga komentet e Donald Trump, kur tha se aleatët e NATO-s kishin mbetur “shumë larg vijave të frontit” në Afganistan, duke bërë që presidenti amerikan të tërhiqej pjesërisht nga komentet e tij.

Përballë kësaj krize të re, e cila shpërtheu pikërisht kur tensionet mbi Groenlandën dukeshin se po lehtësoheshin, Trump dukej se miratoi një ton pajtues duke lavdëruar rolin e ushtarëve britanikë, pasi foli me kryeministrin Keir Starmer, i cili i kishte denoncuar komentet si “fyese”.

“Ushtarët e mëdhenj dhe SHUMË të guximshëm të Mbretërisë së Bashkuar do të qëndrojnë gjithmonë me Shtetet e Bashkuara të Amerikës! Në Afganistan, 457 vdiqën, shumë u plagosën rëndë dhe ata ishin ndër luftëtarët më të mëdhenj. Është një lidhje shumë e fortë për t’u thyer ndonjëherë”, deklaroi Donald Trump në platformën e tij Truth Social.

Në një intervistë të enjten me ”Fox News”, presidenti amerikan sulmoi vendet e tjera anëtare të NATO-s gjatë konfliktit 20-vjeçar në Afganistan, duke pretenduar se aleatët kishin “qëndruar shumë larg vijave të frontit” dhe se Shtetet e Bashkuara “nuk kishin pasur kurrë nevojë për to”.

Mbretëria e Bashkuar pësoi numrin e dytë më të lartë të viktimave në Afganistan pas Shteteve të Bashkuara (2 400 vdekje).

Ndërsa kërkoi falje për rolin e ushtarëve britanikë, Donald Trump nuk tha asgjë për përfshirjen e ushtarëve nga vendet e tjera.

Pas vendeve evropiane, Australia, e cila nuk është anëtare e NATO-s, por mori pjesë në koalicionin ndërkombëtar të udhëhequr nga SHBA-të për të dëbuar Al-Kaedën nga fortesat e saj afgane pas sulmeve të 11 shtatorit 2001, gjithashtu i denoncoi këto vërejtje si “krejtësisht të papranueshme”.

Kryeministri Anthony Albanese vlerësoi “guximin” e gati 40 000 trupave australiane të vendosura gjatë dy dekadave (2001-2021).

“Ata ishin sigurisht në vijën e parë për të mbrojtur, së bashku me aleatët tanë të tjerë, demokracinë dhe lirinë, si dhe për të mbrojtur interesat tona kombëtare”, theksoi ai.

Franca, Danimarka, Italia dhe Polonia gjithashtu shprehën zemërimin e tyre.

“Këto deklarata të papranueshme nuk kërkojnë koment. Kreu i Shtetit dëshiron t’u ofrojë ngushëllim familjeve të ushtarëve të rënë dhe të përsërisë mirënjohjen dhe kujtimin me respekt të kombit”, tha një burim pranë presidentit francez Emmanuel Macron.

Franca pati 89 vdekje në Afganistan midis viteve 2001 dhe 2014.

Kryeministrja italiane Giorgia Meloni shprehu “habinë” e saj dhe kërkoi “respekt” pas deklaratave të zotit Trump, me të cilin ajo konsiderohet aleate.

Kryeministri polak Donald Tusk kujtoi pjesëmarrjen në një ceremoni lamtumire në vitin 2011 për pesë ushtarë polakë të vrarë në aksion në Afganistan.

“Oficerët amerikanë që më shoqëruan më thanë se Amerika nuk do t’i harronte kurrë heronjtë polakë. Ndoshta do t’ia kujtojnë këtë presidentit Trump”, shkroi ai në X.

Në Danimarkë, kryeministrja Mette Frederiksen e konsideroi “të padurueshme që presidenti amerikan po vë në pikëpyetje angazhimin e ushtarëve aleatë në Afganistan”.

Shoqata Daneze e Veteranëve tha se ishte “pa fjalë” në përgjigje të vërejtjeve të Donald Trump.

Ajo po bën thirrje për një marshim të heshtur të shtunën, më 31 janar, në Kopenhagë për të protestuar kundër këtyre sulmeve.

Grindja e parë midis dy vendeve erdhi nga komentet e bëra nga zëvendëspresidenti i SHBA-së JD Vance, i cili, gjatë një vizite në bazën amerikane në Pituffik në Grenlandë në mars 2025, e quajti Danimarkën një “aleat të keq”.

“Kemi kaluar nga vërejtjet ofenduese në ato të pahijshme. Dhe tani ndiejmë se është një tradhti. Kjo nuk është vetëm e pavërtetë, por është padyshim diçka ndaj së cilës duhet të reagojmë shumë, shumë me vendosmëri”, tha zëvendëspresidenti i shoqatës, Soren Knudsen.

Knudsen shërbeu në Afganistanin jugor në vitin 2006 dhe ishte zëvendëskomandant i një misioni të NATO-s në vitin 2012, i përbërë kryesisht nga trupa amerikane.

Sipas forcave të armatosura daneze, 44 ushtarë danezë kanë vdekur në Afganistan, 37 u vranë në aksion dhe shtatë të tjerë vdiqën nga sëmundje, aksidente ose lëndime të tjera./  a.jor.

The post SINTEZË – Zemërim nga Franca në Australi, pas komenteve të Trump mbi Afganistanin appeared first on Agjencia Telegrafike Shqiptare.

TIRANË, 25 janar /ATSH/ Kryeministri Edi Rama reagoi sot ndaj protestës së mbrëmshme të opozitës, duke e krahasuar atë me forma të dhunës së organizuar që, sipas tij, nuk kanë precedent në Europën demokratike nga koha e partive famëkeqe të shekullit të kaluar.

Në reagimin e tij në rrjetin social X, Rama thekson se në vende të ndryshme europiane ka protesta nga grupe të llojeve të ndryshme, nga ekologjistë e studentë, deri te ekstremistë, por nënvizon se vetëm një parti parlamentare, sipas tij, e ka dhunën si pjesë të pandarë të aktivitetit politik që nga lindja e saj.

“Ka në Europë protestues, anarkistë, ekologjistë, ekstremistë të djathtë a të majtë, studentë, anti-globalistë, tifozë huliganë, grupime lloj-lloj që dalin në rrugë për arsyet e tyre, maskohen, armatosen me molotovë dhe thyejnë e djegin, duke plagosur punonjës policie e shkatërruar prona…”, shkruan Rama

Kryeministri akuzoi organizatorët e protestës për shkatërrim prone, sulme ndaj institucioneve dhe përdorim të personave të maskuar e të rekrutuar për akte dhune, duke i cilësuar protestat si shfaqje dëshpërimi dhe degjenerimi politik.

“Po qysh nga koha e partive famëkëqia të 100 vjetëve më parë në Gjermani e Itali, ka vetëm një parti parlamentare në Europë, që të ketë në programin e aktivitetit të saj si pjesë të pandarë të ekzistencës së vet qysh nga lindja, ushtrimin e dhunës, shkatërrimin e pronës, sulmin ndaj godinave të institucioneve, deri edhe ndaj godinës së vet, mobilizimin e paramilitarëve, të cilët deri dje ishin çeta e liderit shpirtëror, kurse tanimë janë thjesht mercenarë të rekrutuar me lekë nga rrugaçët e lagjeve, që veshin maska apo fshehin fytyrën pas tabelave për të mbaruar punë me hedhjen e molotovëve pa u identifikuar nga kamerat”, thekson Rama.

“Tanimë këto farë protestash me pisllëkun që krijojnë në bulevard, ngjajnë si jashtëderdhja në rrugë e plakut të lajthitur që i organizon… Degjenerim i pandalshëm dhe dëshpërim i pangushëllueshëm”, nënvizon Rama.

Ai shpreh gjithashtu solidaritet me punonjësit e Policisë së Shtetit që mbetën të plagosur gjatë protestës, duke u uruar shërim të shpejtë dhe duke dënuar ashpër dhunën ndaj forcave të rendit.

“Të shkuara punonjësve të policisë që u plagosën e lënduan nga kjo lukuni e verbër”, përfundon reagimin kryeministri Rama.

1 nga 4

/gj.m/a.f/

The post Rama: Protesta e opozitës, degjenerim i pandalshëm dhe dëshpërim i pangushëllueshëm appeared first on Agjencia Telegrafike Shqiptare.

TIRANË, 25 janar /ATSH/ Kreu i Grupit Parlamentar të Partisë Demokratike, Gazment Bardhi, në një reagim për mediet u shpreh se në asnjë vend të Europës kryeministri nuk mbron korrupsionin.

Duke iu referuar reagimit të kryeministrit Edi Rama, të publikuar mëngjesin e së dielës mbi protestën e opozitës, ku ai theksoi se në asnjë vend të Europës dhuna nuk është pjesë e programit të një partie politike, Bardhi nënvizon se “askund në Europë, kryeministri nuk shndërrohet në avokat të korrupsionit”.

“Edi Rama është një kryeministër i skaduar dhe mbrëmë reagoi kundër protestuesve si çdo regjim i korruptuar që ka humbur kontrollin: me dhunë shtetërore, gaz lotsjellës të skaduar dhe ujë me piper”, shkruan Bardhi në reagimin e tij.

“Kudo në Europë, kur një kryeministër kapet në skandale dhe u përgjigjet qytetarëve me dhunë, ai nuk qeveris më. Ai largohet. Nuk fshihet pas propagandës. Nuk kriminalizon opozitën. Nuk dhunon qytetarët”, vijon reagimi.

Sipas Bardhit, “askund në Europë kryeministri nuk shndërrohet në avokat të korrupsionit, siç po bën Edi Rama me Belinda Ballukun. Kur zëvendëskryeministrja implikohet në korrupsion, hetohet dhe merret e pandehur”.

“Askund në Europë një kryeministër nuk paracakton tenderat. Askund në Europë një kryeministër nuk cakton një koordinator mes qeverisë dhe krimit të organizuar, siç ka bërë Edi Rama me Ergys Agasin. Askund në Europë Drejtori i Përgjithshëm i Policisë nuk emërohet nga koordinatori i krimit të qeverisë. Askund në Europë kryeministri nuk sulmon drejtësinë për të mbrojtur korrupsionin e vet, të familjes së vet dhe të bashkëpunëtorëve të tij më të ngushtë”.

“Po, kudo në botë, regjimet e korruptuara dhe diktaturat reagojnë me dhunë ndaj protestuesve. Ky është Edi Rama, sepse vetëm regjimet e kalbura reagojnë me dhunë ndaj protestave. As gazi i skaduar, as uji me piper nuk do ta mbrojnë më.

Koha e kryeministrit të korrupsionit dhe e karteleve të drogës ka skaduar”, përfundon Bardhi.

The post Bardhi: Askund në Europë Kryeministri nuk mbron korrupsionin appeared first on Agjencia Telegrafike Shqiptare.

UASHINGTON, 25 janar /ATSH-DPA/ – Tensionet u rritën më tej në Mineapolis, në shtetin amerikan të Minesotës, pasi një burrë vdiq pasi u qëllua nga një oficer federal në incidentin e dytë të tillë në qytet këtë muaj.

Sekretarja e Departamentit të Sigurisë Kombëtare të SHBA-së (DHS), Kristi Noem tha në një konferencë për shtyp se oficerët e DHS të shtunën në mëngjes “po kryenin një operacion të synuar në Mineapolis kundër një të huaji të paligjshëm” të kërkuar për krime, përfshirë sulm të dhunshëm, kur atyre iu afrua një person “me një pistoletë gjysmautomatike 9,0 milimetra”.

Noem tha se njëri nga oficerët qëlloi me armë pasi individi “reagoi me dhunë”.

“Duke pasur frikë për jetën e tij dhe për jetën e kolegëve të tyre oficerë përreth tij, një agjent qëlloi në mënyrë mbrojtëse. Mjekët ishin menjëherë në vendngjarje dhe u përpoqën t’i jepnin ndihmë mjekësore subjektit, por ai u shpall i vdekur në vendngjarje”, tha Noem, ndërsa një foto e armës u shfaq në një ekran pranë saj.

Sekretarja e DHS-së theksoi se burri mbante gjithashtu municion shtesë dhe nuk kishte me vete një dokument identifikimi.

“Kjo duket si një situatë ku një individ mbërriti në vendngjarje për t’u shkaktuar dëme maksimale individëve dhe për të vrarë forcat e rendit”, tha ajo.

Shefi i Policisë së Mineapolis e kundërshtoi këtë rrëfim dhe tha se personi vdiq pak më vonë në një spital.

Shefi i policisë shtoi se individi ishte një 37-vjeçar, shtetas i bardhë mashkull i Mineapolis, i cili me sa duket ishte shtetas amerikan.

”New York Times” raportoi, duke cituar dëshmitarë okularë, se të paktën 300 demonstrues u mblodhën në vendin e incidentit në Mineapolis brenda një periudhe të shkurtër kohore.

Oficerët thuhet se përdorën gjithashtu gaz lotsjellës dhe sprej me piper.

Pas të shtënave fatale gjatë operacionit federal në Minneapolis, presidenti i SHBA-së Donald Trump sulmoi kryetarin e bashkisë së qytetit dhe guvernatorin e shtetit të Minesotës.

“Kryetari i bashkisë dhe guvernatori po nxisin kryengritje me retorikën e tyre pompoze, të rrezikshme dhe arrogante!” shkroi Trump në platformën e tij Truth Social.

Guvernatori i Minesotës Tim Walz, një demokrat, i kërkoi Trumpit në një konferencë për shtyp të tërhiqte forcat federale nga shteti.

“Largojeni këtë forcë nga Minesota, ata po mbjellin kaos dhe dhunë”, tha ai.

Kryetari i bashkisë së Mineapolis, Jacob Frey, gjithashtu demokrat, postoi në X.

“Sa njerëz të tjerë duhet të vdesin ose të qëllohen para se kjo të mbarojë? Presidenti Trump, po ju bëj thirrje që ta vini popullin amerikan dhe këtë qytet amerikan në radhë të parë dhe ta largoni ICE-n”, shkroi ai.

Më herët në janar, një oficer nga Zbatimi i Imigracionit dhe Doganave (ICE) qëlloi një grua 37-vjeçare në makinën e saj në Minneapolis.

Rasti shkaktoi zemërim dhe protesta të mëdha.

Administrata republikane amerikane e përshkroi veprimin si vetëmbrojtje, ndërsa demokratët e opozitës dhe demonstruesit folën për forcë të tepërt dhe mungesë transparence në hetim./  a.jor.

The post SHBA – Tensione në rritje në Mineapolis, pasi një qytetar vritet nga një oficer federal appeared first on Agjencia Telegrafike Shqiptare.

TIRANË, 24 janar/ATSH/-Partia Demokratike ka reaguar pas njoftimi të Policisë së Shtetit se gjatë protestës janë plagosur 11 efektivë.

Duke i konsideruar mashtrime dhe të pabaza reagimin e policisë, PD thekson se “sipas informacioneve tona të grumbulluara në mënyrë operative në të gjitha spitalet e kryeqytetit, asnjë efektiv policie nuk është paraqitur për ndihmë të parë”.

“Përpjekja për të ngjyrosur me dhunë një protestë masive kundër narkoregjimit, nuk është gjë tjetër veçse frika e Ramës dhe shërbëtorëve të tij se zhvillimet politike në Shqipëri kanë arritur në ‘kilometrin e fundit’.
Partia Demokratike thekson se, jo vetëm nuk ka policë të plagosur, por ka dhjetëra protestues të lënduar dhe dhjetra të tjerë të arrestuar, shpesh në mënyrë të paligjshme nga patronazhistë të qeverisë, njerëz pa uniformë dhe pa simbolet e policisë”, thuhet në deklaratën për mediet të PD.

PD shton se “çdo tejkalim i ligjit do të merret shënim dhe çdo abuzues do të mbajë përgjegjësi të plota”.

“Partia Demokratike falenderon edhe njëherë të gjithë mbështetësit dhe protestuesit, dhe siguron të ndaluarit dhe familjarët e tyre, se ata do të marrin çdo ndihmë ligjore dhe mbështetje. Ky është fillimi i fundit për narkoregjimin dhe narkopolicinë. Tërbimi i demonstruar sonte me përdorim gazrash helmuese dhe dhune të shpërpjestuar është dëshmi e kësaj”, përfundon PD njoftimin për shtyp.

The post PD: Nuk ka efektivë të plagosur gjatë protestës appeared first on Agjencia Telegrafike Shqiptare.

Sindikata e Bashkuar e Arsimit, Shkencës dhe Kulturës (SBASHK) ka reaguar lidhur me ligjëratën e mbajtur në Gjimnazin “Xhevdet Doda” në Prishtinë nga përfaqësues të Gjykatës Speciale dhe YIHR.

Siç thuhet në reagim SBASHK ka shprehur shqetësimin e thellë dhe kundërshtimin e fuqishëm ndaj mbajtjes së ligjëratës në Gjimnazin “Xhevdet Doda” në Prishtinë, e realizuar nga përfaqësues të Gjykatës Speciale në bashkëpunim me organizatën Nisma e të Rinjve për të Drejtat e Njeriut në Kosovë (YIHR).

Tutje thuhet se SBASHK e konsideron të papranueshme që institucionet arsimore të shfrytëzohen për promovimin e një narrative të njëanshme, me synimin që nxënësit të binden se Gjykata Speciale përfaqëson drejtësi.

"Nuk ka padrejtësi më të madhe sesa fakti që për më shumë se pesë vite mbahen në paraburgim luftëtarët e lirisë, bashkëpunëtorë të NATO-s, të cilët luftuan për të drejtat elementare të popullit të Kosovës – për lirinë, dinjitetin dhe të drejtën për arsimim. Është e pamohueshme se gjatë viteve të represionit serb, Serbia kishte mbyllur të gjitha shkollat shqipe në Kosovë, përfshirë edhe Gjimnazin 'Xhevdet Doda'. Pikërisht në atë periudhë të errët, mësimdhënësit dhe punëtorët e arsimit, të organizuar edhe përmes SBASHK-ut, mbajtën gjallë arsimin shqip me sakrifica të jashtëzakonshme. Prandaj, është paradoksale, e padrejtë dhe moralisht e papranueshme që sot, në po ato ambiente shkollore, të promovohet një gjykatë që po gjykon njëanshëm luftën çlirimtare të popullit të Kosovës, duke e barazuar viktimën me agresorin", thuhet në reagim.

SBASHK reagon gjithashtu edhe ndaj përfshirjes së organizatës Nisma e të Rinjve për të Drejtat e Njeriut në Kosovë (YIHR), e cila përmes këtij aktiviteti ka kontribuar në futjen e një agjende politike dhe ideologjike në institucionet arsimore, pa respektuar ndjeshmërinë historike, kombëtare dhe arsimore të shoqërisë sonë. U bëjmë thirrje organeve përgjegjëse – Ministrisë së Arsimit, Drejtorisë Komunale të Arsimit në Prishtinë dhe menaxhmentit të Gjimnazit “Xhevdet Doda” – që të marrin masa konkrete lidhur me këtë rast dhe të mos lejojnë që shkollat të shndërrohen në hapësira për promovimin e mekanizmave që cenojnë të vërtetën historike dhe dinjitetin e luftës sonë çlirimtare.

"Njëkohësisht, SBASHK apelon te të gjithë anëtarët tanë, punëtorët e arsimit në Kosovë, që të tregojnë vigjilencë dhe përgjegjësi profesionale e kombëtare, duke mos lejuar organizimin e aktiviteteve të tilla në institucionet tona arsimore. Sindikata e Bashkuar e Arsimit, Shkencës dhe Kulturës riafirmon qëndrimin e saj të palëkundur në mbrojtje të vlerave të Ushtrisë Çlirimtare të Kosovës dhe në përkrahje të drejtuesve institucionalë të asaj lufte – Hashim Thaçi, Jakup Krasniqi, Kadri Veseli dhe Rexhep Selimi – të cilët po mbahen padrejtësisht në Hagë, vetëm pse ishin në anën e drejtë të historisë. Liria e Kosovës nuk është krim. Lufta për arsim, liri dhe dinjitet nuk gjykohet", thuhet ndër të tjera në reagim.

Ndryshe, Dhomat e Specializuara të Kosovës (KSC) konfirmuan për Telegrafin se zhvillojnë aktivitete informuese në Kosovë që nga viti 2018, si pjesë e Programit të Shtrirjes së Informacionit, duke përfshirë nxënës, komunitetin lokal, gazetarë dhe avokatë.

Zëdhënësja Angela Griep tha se këto takime diskutojnë mbi mandatin dhe procedurat e gjykatës, duke ofruar informacion publik të ngjashëm me atë që gjendet në faqen zyrtare të KSC-së. /Telegrafi/

TIRANË, 19 janar /ATSH/ Kryeministri Edi Rama reagoi sot ndaj deklaratës së rrjetit “Safe Journalists”, duke e cilësuar atë si një keqkuptim të shtrembëruar të qëndrimit të tij mbi Transmetuesin Publik Shqiptar (RTSH).

Rrjeti “Safe Journalists” ngriti shqetësimin në lidhje me deklaratat publike të Kryeministrit Rama sa i takon transmetuesit televiziv publik RTSH duke reaguar se “lidhja e financimit ose ekzistencës së RTSH me miratimin politik minon pavarësinë e tij dhe paraqet rreziqe për lirinë e medias”.

Përmes një postimi në rrjetin social X, Rama u shpreh se po krijohet “një model për të ardhur keq i kësaj epoke të re të përtacisë së shfrenuar ndaj dëgjimit të asaj që të tjerët realisht thonë”, duke iu referuar reagimeve që, sipas tij, nuk pasqyrojnë thelbin e deklaratave të bëra prej tij.

“Po bëhet një model për të ardhur keq i kësaj epoke të re të përtacisë së shfrenuar ndaj dëgjimit të asaj që të tjerët realisht thonë, që të përballemi me deklarata si ajo e bashkëngjitura, të cilat pasqyrojnë një keqkuptim thellësisht të shtrembëruar të qëndrimit tim lidhur me Transmetuesin Publik Shqiptar”, shkroi Rama.

Kryeministri ftoi autorët e deklaratës së “Safe Journalists” që ta lexojnë ose dëgjojnë me kujdes fjalimin e tij dhe të bëjnë një përpjekje të sinqertë për të kuptuar mesazhin real.

“I ftoj autorët e kësaj deklarate keqorientuese ta lexojnë ose ta dëgjojnë me kujdes fjalimin tim dhe të bëjnë një përpjekje të sinqertë për të kuptuar thelbin. Vërejtjet e mia nuk kanë të bëjnë absolutisht aspak me “lidhjen e financimit apo të ekzistencës së RTSH-së me miratimin politik”. Çdo interpretim i tillë është thjesht i pasaktë dhe keqorientues. Mbrojtja e informacionit nis me mos përhapjen e dezinformimit”, shkroi Rama.

/gj.m/j.p/

The post Rama reagon ndaj “Safe Journalists”: Keqkuptim thellësisht i shtrembëruar i qëndrimit tim për RTSH-në appeared first on Agjencia Telegrafike Shqiptare.

TIRANË, 19 janar/ATSH/ Nënkryetarja e Kuvendit, Klodiana Spahiu, në fjalën e mbajtur sot në Konferencën e Kryetarëve, u ndal te çështjet që lidhen me dezinformimin dhe lajmet e rreme.

“Në fundjavë ishim dëshmitarë të një lajmi plotësisht të pavërtetë dhe pa asnjë fakt të cilat vendosën në shënjestër familjarë të kryetarit të grupit parlamentar të PS-së (Taulant Balla – shën. i red.). Mediet të cilat i servirën këto lajme edhe pse u vunë në dijeni të së vërtetës, vazhduan të përhapin shpifjet e hedhura nga Berisha dhe përfaqësues të tjerë të opozitës”, u shpreh Spahiu.

Sipas Spahiut, është e papranueshme ajo që ndodhi.

Spahiu tha se “duhen gjetur mekanizmat që në raste të tilla si ky, të marrin përgjegjësitë, qoftë edhe penale, personat që orkestrojnë lajme të rreme të tilla”.

/m.m/a.f/r.e/

The post Spahiu: Përgjegjësi penale për ata që orkestrojnë lajme të rreme appeared first on Agjencia Telegrafike Shqiptare.

TIRANË, 18 janar/ATSH/ Deputetja e Partisë Demokratike Jorida Tabaku reagoi sot lidhur me deklaratën e kryeministrit Edi Rama në lidhje me Korporatën Shqiptare të Investimeve (AIC).

Duke e krahasuar me modelin italian, Tabaku tha se nuk është e qartë se cilit institucion i referohet kryeministri.

“Cilindo model italian të marrë si referencë Kryeministri, rezultati është i njëjtë: në Itali funksionet janë të ndara qartë me ligj. Banka financon, agjencia administron pronën; ndërsa në Shqipëri ato janë përqendruar në një ent të vetëm, pa garë dhe pa llogaridhënie.
Dallimet janë thelbësore”, tha ajo.

Tabaku theksoi se në Itali, institucionet funksionojnë si banka publike që menaxhojnë para dhe rrezik financiar, ndërsa Korporata Shqiptare e Investimeve nuk menaxhon fonde, por merr prona publike me vendime qeverie dhe i fut ato në marrëveshje ndërtimi me privatë.

“Ndërsa institucionet publike europiane veprojnë përmes prokurimit publik dhe konkurrencës së hapur, AIC shmang garën dhe krijon privilegje të drejtpërdrejta për partnerë të përzgjedhur”, u shpreh Tabaku.

Ndërkohë, Tabaku theksoi se në Europë, ndërhyrja publike bëhet aty ku tregu dështon, për banesa sociale, zona të varfra apo infrastrukturë strategjike.

“AIC bën të kundërtën, duke ndërhyrë aty ku tregu funksionon më së miri dhe duke krijuar konkurrencë të pandershme të sponsorizuar nga shteti. Ndërkohë, qeveria shqiptare është njëkohësisht edhe lojtari që ndërton, edhe arbitri që firmos për veten, ndërsa rreziku financiar i kësaj skeme nuk shfaqet sot në buxhet, por u lihet shqiptarëve si faturë për nesër”, vijoi ajo.

Tabaku iu referua vendimit të Këshillit të Ministrave, ku qeveria ia kaloi godinën e ish-shkollës jetimore “Zyber Hallulli” Korporatës Shqiptare të Investimeve.

“Një pronë publike me funksion social iu hoq fëmijëve jetimë përmes një firme qeveritare, pa debat publik dhe pa transparencë. Korporata e Investimeve veproi jo si institucion shtetëror, por si një pronar i keq: hoqi fëmijët nga godina, i zhvendosi në periferi dhe e nxori pronën nga funksioni i saj social”, u shpreh ajo.

/m.m/r.e/

The post Tabaku për Korporatën e Investimeve: Dallime thelbësore me Italinë, ku funksionet ndahen me ligj appeared first on Agjencia Telegrafike Shqiptare.

TIRANË, 18 janar/ATSH/ Kryeministri Edi Rama reagoi sot lidhur me lajmet që janë shpërndarë në disa medie mbi ftesën që i është bërë Shqipërisë për të qenë pjesëmarrëse si vend anëtar themelues i Bordit të Paqes në Rripin e Gazës.

Kryeministri Edi Rama hodhi poshtë, duke i cilësuar gënjeshtra, pretendimet e disa medieve, sipas të cilave “në Bordin e Paqes janë ftuar të gjitha shtetet e OKB-së, apo se Shqipëria do të paguajë 1 miliard euro dhe këtu do të vijnë palestinezët”.

“Tenxheret politike e medietike të mexhelisit tonë janë teneqera të zhurshmshme të Shqipërisë së vjetër, ndërsa kjo që po vazhdojmë të ndërtojmë me shumë mund e këmbëngulje të madhe është një Shqipëri Tjetër, e dinjitetshme ndërkombëtarisht dhe e respektuar botërisht”, u shpreh Rama.

Më poshtë reagimi i plotë i kryeministrit Rama:

Tenxheret politike mediatike po bubullojnë e gërrgërrojnë aq fort sa thua se në Bordin e Paqes së Presidentit Trump nuk është ftuar Shqipëria, po një vend armik i Shqipërisë!

Në Bordin e Paqes janë ftuar të gjitha shtetet e OKB
GËNJESHTËR

Shqipëria do të paguajë 1 miliardë EURO
GËNJESHTËR

Palestinezët do të vijnë në Shqipëri
GËNJESHTËR

E vërteta është shumë e thjeshtë se sa ç’pjell, sidomos në çdo rast kur nderohet Shqipëria, mllefi i injorancës dhe inati i ligësisë:

Tenxheret politike e mediatike të mexhelisit tonë janë teneqera të zhurmshme të Shqipërisë së vjetër, ndërsa kjo që po vazhdojmë të ndërtojmë me shumë mund e këmbëngulje të madhe është një Shqipëri Tjetër, e dinjitetshme ndërkombëtarisht dhe e respektuar botërisht.

Sa për mua personalisht, rëndësi ka vetëm besimi i shumicës së shqiptarëve, që më kanë ngjitur e mbajtur katër herë në majën e shtetit shqiptar dhe respekti i atyre që janë në majat e botës a të Europës, i cili më duhet mbi të gjitha për të nderuar e lartësuar Shqipërinë.

Ky është një moment i jashtëzakonshëm i Shqipërisë, ku tërbimi i tenxhereve thjesht na siguron se sa më shumë lehin qentë, aq më përpara është duke shkuar karvani”.

/m.m/r.e/

The post Rama: Shqipëria nuk do të paguajë 1 miliard euro për Bordin e Paqes appeared first on Agjencia Telegrafike Shqiptare.

TIRANË, 16 janar/ATSH/ Kryeministri Edi Rama reagoi sot pas jehonës që krijoi në disa medie në Athinë, bashkëbisedimi i tij me gazetarin John Defterios, në panelin e organizuar gjatë Samitit të Zhvillimit të Qëndrueshëm në Abu Dhabi.

Rama u shpreh se “është e pabesueshme që një fjali e thënë me humor, të shkëputet totalisht nga konteksti e të kthehet në polemikë publike me pathos nacionalist”, gjë që sipas tij, “fatkeqësisht në Athinën mediatike ndodh shpesh”.

Kryeministri siguroi se nuk ka as më të voglin dyshim që Platoni dhe Aristoteli janë filozofë grekë dhe që Greqia e Lashtë është shtrati i qytetërimit europian.

“Greqia është një vend për të cilin unë ushqej ndjenjat më pozitive; populli grek është për mua një fqinj i pazëvendësueshëm e vëlla i patjetërsueshëm i popullit shqiptar dhe për kryeministrin e Greqisë ushqej një respekt të veçantë”, u shpreh Rama.

Më poshtë reagimi i plotë i kryeministrit Rama:

Jam i mahnitur nga reagimi i disa mediave në Athinë e i ndonjë politikani të lodhur grek lidhur me tonet e mia aspak tendencioze, po me humor miqësor gjatë bashkëbisedimit me gazetarin e nderuar John Defterios në panelin e organizuar gjatë Samitit të Zhvillimit të Qëndrueshëm në Abu Dhabi.

Është e pabesueshme që një fjali e thënë me humor, të shkëputet totalisht nga konteksti e të kthehet në polemikë publike me pathos nacionalist, gjë që fatkeqësisht në Athinën mediatike ndodh shpesh.

Por i siguroj të gjithë të shqetësuarit e të lënduarit, se nuk kam as më të voglin dyshim që Platoni dhe Aristoteli janë filozofë grekë dhe që Greqia e Lashtë është shtrati i qytetërimit europian; që kultura greke meriton vetëm admirim, jo vetëm për filozofët e lashtësisë po edhe për poetët, shkrimtarët, kineastët e muzikën që i ka dhënë njerëzimit; që Greqia është një vend për të cilin unë ushqej ndjenjat më pozitive, që populli grek është për mua një fqinj i pazëvendësueshëm e vëlla i patjetërsueshëm i popullit shqiptar dhe që për kryeministrin e Greqisë ushqej një respekt të veçantë!

U kuptuam? Shpresoj po.

Por ama mos më kërkojë askush ndër të shqetësuarit dhe të lënduarit me humorin tim, që kush shkruan e flet greqisht me pathosin nacionalist të të larpërmendurve, të më duket si pasardhës i Platonit dhe Aristotelit! Kaq”.

/m.m/j.p/

The post Rama pas reagimeve në disa medie në Greqi: E pabesueshme si humori kthehet në polemikë me pathos nacionalist appeared first on Agjencia Telegrafike Shqiptare.

TIRANË, 14 janar/ATSH/ Kryeministri Edi Rama reagoi sërish sot ndaj deklaratave të gazetarit Blendi Fevziu, lidhur me udhëtimet private të ministrave të kabinetit qeveritar gjatë fundjavave.

Rama tha se “Fevziu reagoi prapë duke e pohuar përsëri faktin që ka fabrikuar një shpifje”.

“Ai refuzon t’i japë llogari publikut të vet, një herë të vetme, për një gënjeshtër me shtatë bishta dhe kapet si i mbyturi pas fijes së barit tek video-inspektimet e anëtarëve të qeverisë, për të cilat thotë se janë praktikë unike në botë, jashtë çdo standardi demokratik”, u shpreh Rama.

Më herët, gazetari Blendi Fevziu ka deklaruar se ka fakte që të paktën 7 ministra janë në udhëtime private jashtë shtetit të shtunave e të dielave, dhe lënë kasetat me inspektime nëpër televizione sikur janë në punë.

Kjo deklaratë ka sjellë reagimin e kryeministrit Rama, i cili i ka hedhur poshtë këto pretendime, ndërsa ka deklaruar se ministrat e kabinetit qeveritar edhe kur dalin për arsye personale jashtë vendit e bëjnë këtë me një kërkesë për leje dhe vetëm me miratim.

Më poshtë reagimi i plotë i kryeministrit Rama:

Fevziu reagoi prapë duke e pohuar përsëri faktin që ka fabrikuar një akuzë, më shqip një shpifje, për të cilën as ka çfarë thotë e vjen vërdallë me muhabete kafeneje, duke përmendur si në jerm dy a tre raste sporadike, për të cilat përsëri s’ka asnjë provë se janë të lidhura me udhëtime private të ministrave në fundjavë, e duke i ikur përsëri me një turravrap konfuz të vetmes gjë që duhet të bënte në këtë rast: Ndjesës ndaj shikuesve të tij.

Ndryshe nga më parë, Fevziu deklaron se nuk do përgjigjet më për këtë çështje. Normal, e kupton edhe vetë që s’ka si ia bën ndryshe, përderisa nuk mendon se shikuesit e tij meritojnë aq respekt sa ai t’u kërkojë ndjesë.

Pra Fevziu kërkon llogari edhe për gjëra që nuk i di ose që nganjëherë edhe i shpik, ndërkohë që fton rregullisht në sallonin e tij njerëz të armatosur me gjysmë të vërteta, të cilat janë edhe gënjeshtrat më të mëdha. Por ama ai refuzon t’i japë llogari publikut të vet, një herë të vetme, për një gënjeshtër me shtatë bishta dhe kapet si i mbyturi pas fijes së barit tek video-inspektimet e anëtarëve të qeverisë, për të cilat thotë se janë praktikë unike në botë, jashtë çdo standardi demokratik.

Dakord, atëherë po kaloj tek standardet dhe po i them Blendit, i cili padyshim e ka parë botën shumë më tepër se unë, që të na tregojë një rast të vetëm në botë ku debatet politike janë kacafytje për të marrë fjalën, në një sfond britmash të pandërprera, ku nuk e merr vesh i pari të dytin, e ku mikpritësi me një shkop në dorë nxit palët të zihen, pa vënë ose pa dashur të vendosë as qetësi, as rregulla në debat, as kufi etikë në komunikim, e pa kultivuar as sensin më të vakët të drejtësisë në trajtimin e të ftuarve, të cilëve u ndërpritet fjala rregullisht pa bërë dot 3 fjali bashkë!

Pra le të themi se po, e vërtetë, nuk është normale që anëtarët e qeverisë t’i shmangin daljet në sallonet mediatike (në fakt, në rastin tonë ne nuk shmangim daljet me gazetarë, po vetëm daljet me udhëheqësit barisalifallistë), por nëse Fevziu nuk e nis nga vetja, bashkë me sivëllezërit e simotrat e 700 tenxhereve, e të vendosi standardet demokratike në sallonin e tij të madh, atëherë s’ka si t’i kërkojë llogari ministrave pse nuk hidhen me kokë në tenxheren e Opinionit a në cilëndo tenxhere, ku bubullon e gërrgëron molla e përhershme e sherrit dhe ku shikuesit në vend se të informohen, abuzohen dhe helmohen me politikën!

/m.m/j.p/

The post Rama: Fevziu pohoi faktin që ka fabrikuar një shpifje appeared first on Agjencia Telegrafike Shqiptare.