Real Madrid ka vendosur të hedhë sytë drejt Bundesligës për të adresuar një dobësi specifike që stafi teknik ka identifikuar në mesfushë.

Kërkimi për një lojtar që të sjellë koherencë dhe rrjedhshmëri në mesfushë ka çuar bordin e 'Los Balncos' drejt Gjermanisë.

Emri i Aleksandar Pavlovic del si zgjidhja ideale për të lidhur linjat e një skuadre që mbushet me forcë fizike, por ka nevojë për më shumë kontroll dhe qetësi në lojë.

Florentino Perez, gjithmonë i vëmendshëm ndaj talenteve të reja që dominojnë skenën kontinental, sheh te ky i ri gjerman komplementin e përsosur për yjet aktualë të klubit.

Presidenti i klubit të bardhë e kupton se balanca midis forcës dhe teknikës është thelbësore për të ruajtur hegjemoninë në Europë.

Mesfushori i Bayern Munich është konsoliduar si një nga futbollistë më të mirë bavarez nën drejtimin e Vincent Kompany.

Në moshën 21-vjeçare, ylli gjerman ka treguar një pjekuri më shumë se sa mosha e tij, duke marrë role udhëheqëse si në klub ashtu edhe me kombëtaren.

Në Real Madrid, besojnë se ardhja e tij do të përmirësonte ndjeshëm performancën e lojtarëve me stil më fizik, si Fede Valverde apo Camavinga.

Aftësia e tij për të lexuar ritmin e lojës do t’i lejonte Jude Bellingham të avanconte më lirshëm në pozicione për të shënuar.

Kontrata e tij me gjigantin bavarez skadon në vitin 2029, duke vendosur vlerën e tij në treg afërsisht 80 milionë euro.

Pavarësisht kostos, entiteti madrilen e sheh këtë transferim si një investim afatgjatë për të siguruar një tranzicion në mesfushë./Telegrafi/

Sipas asaj që ka konfirmuar Fabrizio Romano, Leon Goretzka ka vendosur të refuzojë ofertën e Atletico Madrid dhe të mos largohet nga Bayern Munich gjatë afatit kalimta të janarit.

Mesfushori gjerman, i cili ishte shndërruar në objektivin kryesor të klubit madrilen për të përforcuar repartin e mesfushës, ka zgjedhur të qëndrojë në Mynih deri në fund të sezonit aktual.

Goretzka, kontrata e të cilit skadon në muajin qershor, ka vendosur ta përmbushë marrëveshjen me klubin bavarez dhe të largohet në verë si lojtar i lirë.

Kjo zgjedhje ka prishur planet e Atletico Madrid, që kishte intensifikuar kontaktet ditët e fundit me synimin për ta afruar menjëherë lojtarin dhe për t’i dhënë atij një rol qendror në skuadër.

Vendimi i mesfushorit për të qëndruar te Bayern lidhet kryesisht me stabilitetin dhe me përfitimin e mundësisë për të zgjedhur vetë destinacionin e radhës pa kosto transferimi.

Për Atletico Madrid, ky refuzim nënkupton ndryshim të menjëhershëm të strategjisë.

Me pak ditë para mbylljes së afatit kalimtar, drejtuesit sportivë janë të detyruar të kërkojnë alternativa të tjera për mesfushën, pasi Diego Simeone e konsideronte Goretzkën profil ideal për forcë fizike, personalitet dhe depërtim nga vija e dytë.

Klubi madrilen tashmë punon kundër kohës për të gjetur një zgjidhje që mund të japë ndikim të menjëhershëm. /Telegrafi/

Nicolas Jackson po konsiderohet gjithnjë e më shumë si një nga dështimet më të mëdha të sezonit 2025/26 te Bayern Munich.

Sulmuesi senegalez u afrua në formë huazimi nga Chelsea gjatë verës, me synimin për të ofruar alternativa dhe për të lehtësuar ngarkesën e Harry Kane.

Megjithatë, pritshmëritë nuk janë përmbushur dhe bilanci i tij sportiv ka qenë zhgënjyes.

Që nga mbërritja në Mynih, Jackson nuk ka arritur të përshtatet me stilin e lojës së Bayernit dhe kërkesat e larta të klubit.

Trajneri Vincent Kompany nuk i ka besuar një rol të rëndësishëm në skuadër, ndërsa paraqitjet e tij kanë qenë të dobëta edhe në momentet kur i është dhënë mundësia për të luajtur.

Mungesa e bashkëpunimit me ekipin dhe efektiviteti i ulët para portës e kanë penalizuar ndjeshëm.

Performancat pa ndikim, gabimet elementare dhe mungesa e vetëbesimit kanë bërë që Jackson të shihet si një hallkë e dobët e skuadrës.

Në mediat gjermane flitet hapur për një huazim të dështuar, që nuk i ka sjellë asnjë përfitim sportiv Bayern Munichut në momente kyçe të sezonit.

Bayern pagoi rreth 13 milionë euro për huazimin e Jackson, një shumë e konsiderueshme për një operacion pa asnjë kthim.

Në klub pranohet se vendimi ka qenë i gabuar dhe se lojtari nuk do të qëndrojë përtej këtij sezoni, duke u kthyer te Chelsea në fund të kampionatit.

Një klub i mësuar me lëvizje të sakta në treg, këtë herë ka gabuar, dhe rasti i Nicolas Jackson pritet të mbetet si shembull i një investimi të pasuksesshëm. /Telegrafi/

Me fazën e ligës së Ligës së Kampionëve 2025/26 që tashmë është përfunduar, Arsenali kryeson renditjen e fitimeve deri më tani me 59.74 milionë euro, i ndjekur nga Bayern Munich (57.33 milionë euro) dhe Liverpool (54.92 milionë euro).

Skuadra e Mikel Artetas ka pasur një fazë të parë perfekte të turneut, duke fituar të tetë ndeshjet e tyre, gjë që i ka fituar pothuajse 60 milionë euro deri më sot, duke pasur parasysh se UEFA dha 2.1 milionë euro për fitore dhe 0.7 milionë euro për një barazim.

Kësaj shume duhet t'i shtohen 18.62 milionë euro të marra nga secili prej 36 pjesëmarrësve në këtë fazë, si dhe 11 milionë euro të siguruara tashmë nga Topçinjtë për arritjen në fazën e 1/8-tës, së bashku me një bonus shtesë prej 2 milionë eurosh për tetë ekipet e para që kualifikohen direkt.

Fituesit e ndeshjeve ‘play-off’ midis 16 ekipeve të renditura nga vendi i 9-të deri në të 24-tin, të cilat do të garojnë ekipi si Real Madridi, Interi dhe Juventusi, do të marrin një bonus prej 1 milion eurosh.

Më shumë para për të avancuar në raundet kualifikuese

Përveç kësaj, çdo klub ka marrë një shumë të ndryshme bazuar në pozicionin e tyre në renditjen e ligës. Arsenali fitoi 11.32 milionë euro, një shifër që ra në 310,000 euro për Kairat Almatyn e vendit të fundit, i cili u eliminua nga Liga e Kampionëve me një total prej 19.63 milionë eurosh.

Që tani e tutje, shuma e çmimit për avancimin në raundet eliminatore do të rritet. Është thënë se kalimi në fazën e 1/8-tës paguhet me 11 milionë (sezonin e kaluar ishte 9.6), kalimi në çerekfinale është 12.5 milionë (krahasuar me 10.6 në 24/25), arritja në gjysmëfinale do të thotë 15 milionë më shumë (12.5 një vit më parë), luajtja e finales në Budapest më 30 maj rrit të ardhurat me 18.5 milionë për nën-kampionin (15.5 më parë) dhe 25 milionë euro për fituesin e ri të Ligës së Kampionëve (20 milionë ishte sezonin e kaluar).

Sa i përket klubeve të mëdha spanjolle, Barcelona ka fituar 52.89 milionë euro deri më sot dhe është e vetmja që është kualifikuar direkt për raundin e 1/8-tës. Pas humbjes së tyre në ndeshjen e fundit dhe rënies nga tetë vendet e para, Real Madrid ka grumbulluar 37.93 milionë euro.

Bazuar në grafikun e fitimeve nga play-off-et, disa prej klubeve kryesore evropiane kanë arkëtuar shuma të konsiderueshme, edhe pse me diferenca të dukshme mes tyre.

Interi renditet shumë lart, me rreth 37.6 milionë euro, duke u konfirmuar si një nga klubet më fitimprurëse në këtë fazë falë paraqitjeve konstante dhe progresit sportiv.

Juventusi ndjek pas, me afërsisht 35.3 milionë euro. Edhe pse larg kulmit financiar të viteve të arta, bardhezinjtë vazhdojnë të mbeten një forcë e rëndësishme ekonomike në Evropë.

Borussia Dortmundi ka siguruar rreth 32.6 milionë euro, duke përfituar nga pjesëmarrjet e rregullta dhe modeli i njohur i zhvillimit të lojtarëve.

Në këtë grup futen edhe klube si Atletico Madridi (34.9 milionë euro), Atalanta (34.6 milionë euro) dhe Bayer Leverkusen (33.6 milionë euro), që tregojnë se suksesi sportiv reflektohet drejtpërdrejt në të ardhura.

PSG fitoi 144 milionë euro në edicionin e fundit

Sezonin e kaluar, PSG u kurorëzua fituese e Ligës së Kampionëve dhe gëzimi i Kupës së tyre të parë Evropiane u shoqërua me një fitim të papritur financiar prej 144.4 milionë eurosh për ekipin e drejtuar nga Luis Enrique.

Interi, finalist në Mynih, fitoi 136.6 milionë euro. Gjysmëfinalistët gjithashtu panë shuma të konsiderueshme të shtuara në llogaritë e tyre: 116.9 milionë euro për Arsenalin dhe 105.8 milionë euro për Barcelonën. /Telegrafi/

Liga e Kampionëve 2025/26 po dhuron një show të vërtetë. Pas përfundimit të ndeshjeve në fazën e ligës pati befasi, ku disa skuadra të mëdha mbetën jashtë tetë pozitave të para teksa disa të tjera ia dolën të sigurojnë ‘play-off’-in në frymën e fundit.

Ekipet që kanë siguruar kualifikimin direkt nga tetë pozitat e para janë: Arsenal (24 pikë), Bayern Munich (21 pikë), Liverpool (18 pikë), Tottenham (17 pikë), Barcelona (16 pikë), Chelsea (16 pikë), Sporting Lisbona (16 pikë) dhe Man City po ashtu me 16 sosh.

‘Topçinjtë’ ishin skuadra e vetme me ecuri perfekte duke fituar që të gjitha ndeshjet dhe duke grumbulluar kështu 24 pikë.

Pas tyre vijnë bavarezët të cilët po ashtu patën një kampanjë fantastike, duke u mposhtur vetëm nga Arsenali me rezultat 3-1.

Liverpooli në anën tjetër pavarësisht formës jo të mirë në kampionat, ata e dëshmuan të kundërtën në Ligën e Kampionëve duke arritur të kualifikohen nga pozita e tretë e tabelës.

Befasi e madhe ishte fakti që Tottenhami ia doli të kualifikohet nga pozitat e para, me të besuarit e Thomas Frank që siguruan pozicionimin lart në tabelë falë triumfit me rezultat 2-0 në udhëtim ndaj Eintracht Frankfurtit.

Barcelona po ashtu që deri para kësaj xhiroje nuk dihej nëse do arrinte të kualifikohej direkt apo do lunate në ‘play-off’, ia doli që të kualifikohet si e pesta pas triumfit me rezultat 4-1 ndaj Kopenhagës.

Chelsea në ndërkohë mori një fitore të madhe me rezultat 3-2 në udhëtim ndaj Napolit, duke arritur kështu të sigurojë kualifikimin direkt nga pozita e gjashtë.

Dy pozitat e fundit që siguruan kualifikimin direkt i takuan Sporting Lisbonës dhe Man Cityt respektivisht, me gjigantin portugez që triumfoi me shifrat 3-2 në udhëtim ndaj Athletic Bilbaos, teksa ‘Qytetarët’ morën një fitore komode 2-0 ndaj Galatasarayt.

Pa dyshim, befasia më e madhe e mbrëmjes mbetet fakti që kampioni në fuqi i Evropës, Paris Saint-Germain dhe 15 herë fituesi i Ligës së Kampionëve, Real Madrid, mbetën në ‘play-off’./Telegrafi/

Futbolli evropian po përflitet për të ardhmen e Nico Schlotterbeck, që mund të jetë një nga transferimet kryesore të verës.

Qendërmbrojtësi gjerman ka kontratë me Borussia Dortmund deri në vitin 2027, por nuk ka ndërmend ta rinovojë, duke lënë të hapur rrugën për një largim nga Bundesliga.

Real Madrid shihet si një nga klubet kryesore që e ndjek sulmuesin, me negociata që duket se po avancojnë pozitivisht.

Schlotterbeck, 26 vjeç, ka shkëlqyer si një nga qendërmbrojtësit më premtues të Evropës, duke kombinuar shpejtësinë, aftësinë për të udhëhequr mbrojtjen dhe lojën me topin nga pas.

Performancat e tij me Dortmund dhe përfaqësuesen gjermane e bëjnë atë një zgjedhje tërheqëse për Real Madridin, që kërkon të rinovojë mbrojtjen dhe të ndërtojë një qendër të fortë për të ardhmen.

Megjithatë, marrja e Schlotterbeck nuk do të jetë e lehtë.

Barcelona dhe Bayern Munich janë gjithashtu të interesuar për mbrojtësin gjerman, të cilët kërkojnë të forcojnë linjën e tyre defensivë.

Përparësia duket të jetë në favor të Real Madrid, pasi bisedimet me lojtarin dhe agjentët e tij po ecin me ritëm pozitiv dhe ai shihet i prirur të bashkohet me projektin e klubit spanjoll.

Borussia Dortmund ka vendosur një çmim prej 65 milionë eurosh për Schlotterbeck, një shifër që konsiderohet e drejtë për cilësinë dhe potencialin e lojtarit.

Real Madridi duket i gatshëm ta investojë këtë shumë, duke e parë si një blerje strategjike për të ardhmen.

Klubi i ka mundësitë ekonomike dhe planifikon ta bëjë mbrojtësin gjerman një nga gurët themelorë të mbrojtjes për shumë vite.

Nëse gjithçka ecën sipas planit, Schlotterbeck mund të bëhet një nga shtyllat e mbrojtjes së Real Madridit, duke formuar një partneritet të fortë me Eder Militao ose ndonjë qendërmbrojtës tjetër që mund të vijë në të ardhmen.

Klubi spanjoll ka përparësi në këtë garë dhe synon të sigurojë një nga transferimet më të rëndësishme të sezonit të ardhshëm, duke e bërë mbrojtjen më të rinovuar dhe konkurruese në Evropë. /Telegrafi/

Faza e ligës në Ligën e Kampionëve 2025/26 mbyllet sonte (e mërkurë) me 18 ndeshje që luhen njëkohësisht nga ora 21:00, ku nuk mungojnë ndeshjet e forta dhe interesante.

Një nga duelet më të forta zhvillohet në Lisbonë, ku Benfica pret Real Madridin. “Los Blancos” kërkojnë rezultat pozitiv për të siguruar pozicion më të favorshëm, ndërsa Benfica luan shansin e fundit për të mbetur në garë. Një ndeshje ku çdo detaj mund të jetë vendimtar.

Spektakël pritet edhe në Gjermani, aty ku Borussia Dortmund përballet me Interin. Dy ekipe me ambicie të mëdha dhe eksperiencë evropiane. Një duel i hapur, fizik dhe me peshë të madhe për renditjen finale.

Në Itali, Napoli dhe Chelsea përplasen në një nga sfidat më interesante të mbrëmjes. Të dyja skuadrat kanë objektiva të qarta dhe presioni është i barabartë. Një humbje këtu mund të kushtojë shtrenjtë.

Barcelona pret Copenhagenin me synimin për të mbyllur fazën me fitore dhe në tetëshe, ndërsa Paris Saint-Germain përballet me Newcastle United në një duel që premton intensitet dhe ritëm të lartë. Edhe këtu, llogaritë janë ende të hapura.

Manchester City kërkon konfirmim përballë Galatasarayt, Liverpooli është favorit ndaj Qarabagut, ndërsa Bayern Munich përballet me PSV Eindhoven në një udhëtim të vështirë. Ndeshje ku favoritët nuk guxojnë të gabojnë.

Gjatë mbrëmjes luajnë edhe takime tjera si Arsenal–Kairat Almaty, Ajax–Olympiacos, Monaco–Juventus dhe Atletico Madrid–Bodo/Glimt, sfida që mund të sjellin befasi pavarësisht diferencave në letër.

Në ndeshjet e mbetura, Frankfurt pret Tottenhamin në një duel ku çdo pikë ka peshë, Bayer Leverkusen përballet me Villarrealin në një sfidë teknike dhe të hapur, Union Saint-Gilloise pret Atalantën me synimin për të befasuar dhe Pafos luan ndaj Slavia Pragës për prestigj.

Xhiroja e fundit nuk është thjesht mbyllje faze. Është provë nervash. Është test karakteri dhe në fund të mbrëmjes, Evropa do të dijë se kush vazhdon dhe kush mbetet jashtë Ligës së Kampionëve. /Telegrafi/

Afati kalimtar i verës është i përgatitur për një ndryshim të paparë sizmik në Bundesligë pas zbulimit të ambicieve të klubit gjerman. Bayern Munich ka hartuar një strategji financiare prej 200 milionë eurosh për të sjellë Yan Diomande, Trent Alexander-Arnold dhe Nico Schlotterbeck.

Ky investim masiv synon t’i japë Vincent Kompanyt mjetet që i nevojiten për të dominuar si në kampionatin vendas ashtu edhe në Ligën e Kampionëve. Prioriteti i klubit është të rigjallërojë pozicionet kyçe dhe të sigurojë lojtarë me përvojë ndërkombëtare të nivelit të lartë.

Bayern Munich e kupton se afati aktual i transferimeve kërkon vendime të guximshme për të ruajtur dominimin e saj kundër rritjes së rivalëve të rinj evropianë. Prandaj, drejtuesit sportiv kanë identifikuar tre profile specifike që adresojnë boshllëqet aktuale në skuadër.

Në sulm, klubi bavarez i ka vënë syrin talentit elektrizues Yan Diomande, talenti i ri nga Bregu i Fildishtë. Vetëm 19 vjeç, anësori ka shkëlqyer te RB Leipzig falë driblimit dhe shpejtësisë së tij marramendëse.

Klubi i Mynihut është i përgatitur të ofrojë 100 milionë euro për të siguruar nënshkrimin e tij të menjëhershëm. Ata besojnë se Diomande është lojtari perfekt për të konkurruar dhe për rotacion në krahë me figura si Luis Diaz dhe Micheal Olise.

Ky veprim jo vetëm që do ta forconte sulmin, por edhe do ta dobësonte një rival të drejtpërdrejtë, duke siguruar një të ardhme të ndritur për sulmin. Ylli afrikan, me kontratë deri në vitin 2030, është i etur të bëjë transferimin në Allianz Arena këtë verë.

Për pozicionin e mbrojtësit të djathtë, emri që gjeneron më shumë konsensus është Trent Alexander-Arnold, i cili po kalon një kohë të vështirë në Spanjë. Pas largimit të Xabi Alonsos nga stoli i Real Madridit, mbrojtësi anglez ka humbur statusin e tij të paprekshëm.

Paraqitjet e paqëndrueshme dhe dëmtimet e përsëritura kanë dëmtuar besimin e Alexander-Arnold në Santiago Bernabeu. Klubi gjerman po ofron 50 milionë euro për ta rikthyer mbrojtësin e krahut në formën e tij më të mirë. Kompany vlerëson kreativitetin dhe vizionin e tij, cilësi që përshtaten në mënyrë të përkryer me stilin e tij të lojës të bazuar në posedim të topit.

Njëkohësisht, zona mbrojtëse qendrore kërkon vëmendje urgjente duke pasur parasysh dyshimet rreth së ardhmes së Dayot Upamecanos. Këtu hyn në lojë Nico Schlotterbeck, lojtari aktual i Borussia Dortmund, kontrata e të cilit skadon në vitin 2027.

Afrimi i fundit të kontratës së tij e detyron klubin nga Westfalia të negociojë një transferim këtë verë. Bayern Munich planifikon të shpenzojë edhe 50 milionë euro për të siguruar ardhjen e Nico Schlotterbeck në zemër të mbrojtjes së tyre.

Profili i tij si qendërmbrojtës gjerman, i fortë dhe me shpërndarje të topit, është absolutisht sipas pëlqimit të menaxhmentit teknik. /Telegrafi/

Bayern Munich i ka paraqitur Dayot Upamecanos atë që e konsideron si ofertën përfundimtare për rinovimin e kontratës, sipas raportimeve të Sky Germany.

Kampionët e Bundesligës nuk kanë vendosur një afat zyrtar, por po ushtrojnë presion që mbrojtësi francez të marrë një vendim sa më shpejt, idealisht përpara ditës së fundit të afatit kalimtar.

Drejtori sportiv i klubit, Max Eberl, e konfirmoi qëndrimin e Bayernit të hënën, duke deklaruar:

“Jemi në pritje të një përgjigjeje nga Upamecano”.

Sipas klubit bavarez, oferta aktuale nuk do të përmirësohet më tej, megjithatë mbetet optimizëm se një marrëveshje mund të arrihet së shpejti.

Deri më tani nuk ka pasur një përparim përfundimtar në negociata, pavarësisht bisedimeve të vazhdueshme prapa skenave.

Ndërkohë, situata po ndiqet nga afër nga Real Madridi dhe Paris Saint-Germain, të cilët janë të interesuar për shërbimet e mbrojtësit 27-vjeçar, me synimin për ta transferuar atë si lojtar të lirë kur kontrata e tij me Bayern Munich të skadojë në qershor të vitit 2026. /Telegrafi/

Bayern Munichu ka nisur negociatat për rinovimin e kontratës së qendërsulmuesit Harry Kane.

Anglezi ka qenë lojtari më i mirë që kur iu bashkua “Bavarezzëve”, megjithatë gjithnjë është kërkuar në Ligën Premier, ku thuhet se Manchester Unitedi po e ëndërron afrimin e këtij të fundit.

Sidoqoftë, Bayerni ka vendosur ta “blindojë” Kane për të mos i lënë hapësirë që të largohet.

Drejtori i gjigantit gjerman Max Eberl ka konfirmuar se negociatat kanë nisur dhe dëshira e klubit është ta vazhdojë sa më parë bashkëpunimin edhe për disa vite.

“Jemi në bisedime me Harry”, deklaroi shkurtimisht ai.

Ndërkohë, Man Utd thuhet se ishte gati të ofronte mbi 80 milionë euro për të siguruar shërbimet e lojtarit. Mbetet të shihet nëse Kane do të bindet nga oferta e gjigantit gjerman apo do ta kërkojë rikthimin në kampionatin anglez./Telegrafi/

Menaxhmenti i Bayern Munich nuk kishte planifikuar në fakt të sillte ndonjë përforcim të jashtëm gjatë afatit kalimtar të dimrit. Megjithatë, sipas një raporti, një transferim i mundshëm po diskutohet pa praninë e publikut.

Bayern Munich, me sa duket, ende ka një interes të madh për Josh Acheampong (19). Sipas The Guardian, interesi i klubit të Mynihut për mbrojtësin e gjithanshëm nga Chelsea mbetet i pandryshuar.

Verën e kaluar, kampionët gjermanë ishin tashmë të interesuar për lojtarin e gjatë me këmbë të djathtë (1.90 metra), por Chelsea nuk donte ta linte të largohej. Sipas raportit, kjo mbetet ende e njëjtë edhe sot.

Megjithatë, liderët e Bundesligës po shqyrtojnë mundësinë e një transferimi konkret për Acheampong, qoftë në verë, qoftë ndoshta edhe këtë dimër.

Një nënshkrim i tillë do t’i lejonte Bayernit, i cili kohët e fundit është përballur me disa lëndime, të “vriste dy zogj me një gur”, pasi Acheampong mund të luajë në çdo pozicion mbrojtës.

Jo vetëm Bayern Munich, por edhe Crystal Palace janë të interesuar për anglezin, i cili ka kontratë deri në vitin 2029, pasi kërkojnë një pasardhës për Marc Guehi, i cili u transferua te Manchester City.

Mundësia për më shumë kohë të rregullt loje mund ta tundojë Acheampong të bëjë një ndryshim situate. Pyetja mbetet nëse Bayern Munich mund t’ia ofrojë këtë. /Telegrafi/

Augsburgu ka shkaktuar një surprizë të madhe në Bundesliga, duke triumfuar me rezultat 2-1 ndaj Bayern Munichut në Allianz Arena, fitore që i shkaktoi bavarezëve humbjen e parë në kampionat këtë sezon.

Që në minutat e para u vendos qartë skenari i ndeshjes, me Bayernin dominues në sulm dhe Augsburgun të përqendruar në mbrojtje. Luis Díaz, Lennart Karl dhe Michael Olise ushtruan presion të vazhdueshëm mbi prapavijën mike, por skema 5-4-1 e Augsburgut funksionoi në mënyrë perfekte, duke i mbajtur vendasit larg portës, pavarësisht posedimit 74 për qind në pjesën e parë.

Goli i epërsisë për Bayernin erdhi në minutën e 23-të, kur Olise ekzekutoi një goditje këndi dhe Hiroki Ito u ngrit më lart se të gjithë për të shënuar me kokë. Megjithatë, para pushimit, edhe Augsburg pati momentet e veta, por Han-Noah Massengo nuk ishte i saktë, ndërsa Robin Fellhauer goditi traversën me goditjen e fundit të pjesës së parë.

Në fillimin e pjesës së dytë, një gabim i Jonas Urbig pothuajse i kushtoi Bayern-it, por Anton Kade nuk reagoi në kohë.

Dy raste të tjera për mysafirët e nervozuan trajnerin Vincent Kompany, ndërsa me afrimin e minutës së 60-të, liderët e kampionatit po shfaqnin mungesë të theksuar idesh në sulm ndaj një skuadre që deri tani kishte vetëm katër fitore dhe 20 gola të shënuar në sezon.

Elvis Rexhbeçaj humbi një rast të artë pasi Karl rrëshqiti me topin në zonën e vet, duke bërë që Augsburg të dukej gjithnjë e më i rrezikshëm.

Presioni i mysafirëve u rrit, me Rexhbeçajn dhe Alexis Claude-Maurice që testuan Urbigun, ndërsa ky i fundit u detyrua të intervenonte edhe nga një goditje dënimi. Nga këndi që pasoi, Urbig doli keq dhe topi përfundoi në rrjetë pasi u devijua nga koka e Arthur Chaves.

Kulmi i befasimit erdhi në minutën e 80-të, kur, pavarësisht pranisë së gjashtë mbrojtësve në zonë, askush nga Bayern nuk e ndoqi vrapimin e vonshëm të Massengos, i cili realizoi qetësisht për të heshtur tribunat.

Edhe pse Augsburg vazhdoi të sulmonte, ndërsa Bayern hodhi të gjithë lojtarët përpara në minutat e fundit, gjithçka ishte e kotë për skuadrën e Kompanyt.

Humbja nuk ndryshon shumë situatën e Bayernit në renditje, pasi ata mbeten 12 pikë përpara ndjekësve, ndërsa Augsburgu, falë kësaj fitoreje të madhe, është larguar gjashtë pikë nga zona e rënies.

Mbrojtësi francez Dayot Upamecano ende nuk ka dhënë dritën jeshile për ofertën e rinovimit të kontratës me Bayern Munich.

Situata ka filluar të shkaktojë pakënaqësi në radhët e drejtuesve të klubit bavarez.

Në fillim të muajit janar, disa media raportuan se Upamecano ishte shumë pranë rinovimit të kontratës së tij me Bayernin.

Megjithatë, më shumë se dy javë më vonë, njoftimi zyrtar ende mungon.

Sipas asaj që raporton sot Abendzeitung, ndryshe nga sa ishte menduar fillimisht, palët nuk kanë arritur ende një marrëveshje të plotë.

Dy pikat kryesore të mosmarrëveshjes janë: së pari, kohëzgjatja e kontratës së re (deri në vitin 2030 ose 2031) dhe së dyti, data nga e cila do të hynte në fuqi klauzola e lirimit prej 60 milionë eurosh.

Upamecano dhe përfaqësuesit e tij dëshirojnë të kenë mundësinë për t’u larguar nga klubi duke filluar nga viti 2027, ndërsa Bayern Munich nuk është i gatshëm të humbasë kontrollin mbi lojtarin përpara verës së vitit 2028.

Në çdo rast, gazeta gjermane thekson se një prishje e negociatave për shkak të këtyre dy çështjeve do të ishte një “surprizë e madhe”.

Aktualisht, drejtuesit e Bayernit po ruajnë qetësinë, por fakti që bisedimet nuk po konkretizohen ka nisur të krijojë frustrim në nivelet drejtuese të klubit.

Drejtori sportiv Max Eberl ka deklaruar së fundmi:

“Është spekuluar se Upa ka pranuar ofertën, por këtë nuk e kemi thënë kurrë. Ne kemi thënë se po presim përgjigjen e Upamecanos, ajo është e vetmja që ka rëndësi. Dhe kjo është ajo që po presim, ende nuk ka risi”. /Telegrafi/

Joshua Kimmich ka zgjedhur të qëndrojë jashtë debatit të rindezur së fundmi mbi një bojkot të mundshëm të Kupës së Botës 2026.

Pas fitores 2-0 të Bayern Munich ndaj Union Saint-Gilloise në Ligën e Kampionëve, kapiteni i përfaqësueses gjermane mbajti një qëndrim të qartë, duke iu referuar drejtpërdrejt përvojës së tij gjatë Kupës së Botës 2022 në Katar.

I pyetur për idetë politike që janë shfaqur sërish në lidhje me Botërorin që do të zhvillohet në SHBA, Meksikë dhe Kanada, Kimmich reagoi me një buzëqeshje dhe një deklaratë të prerë:

“Nuk marr më pjesë në diskutime politike”.

Për futbollistin 30-vjeçar, ky qëndrim është rezultat i një procesi reflektimi.

Përvoja në Katar, sipas tij, tregoi se deklaratat politike të lojtarëve nuk japin gjithmonë efektin e dëshiruar.

“Ne e kuptuam se nuk është produktive që ne, si lojtarë, të shprehemi tepër politikisht”, shpjegoi hapur ylli i Bayern Munich.

“Sigurisht që kemi edhe një përgjegjësi për të folur në një masë të caktuar”, shtoi ai, por theksoi se pikërisht aty vendos tani një vijë të qartë.

“Mendoj se në Gjermani dhe në DFB ka persona të tjerë që janë më të përgatitur për këto çështje dhe që duhet të shprehen për to”, përfundoi Kimmich. /Telegrafi/

Superkompjuteri i Opta nuk parashikon vetëm favoritët për të fituar Ligën e Kampionëve, por gjithashtu llogarit raund pas raundi rrugën e mundshme të secilës skuadër.

Renditja aktuale tregon nuanca të rëndësishme në lidhje me performancën e ekipeve deri tani.

Arsenali mbetet skuadra më e besueshme në këtë garë, me 100 për qind shanse për të arritur në raundin e 16-tave dhe 84.6% për të shkuar në çerekfinale. Këto statistika shpjegojnë pse Opta u jep atyre 49% shanse për finale dhe mbi 30% për të fituar titullin.

Bayern Munich i ndjek nga afër, gjithashtu me 100% probabilitet për raundin e 16-tave dhe 77.7% për çerekfinalet, megjithëse shanset për titull janë më të ulëta.

Në një nivel tjetër, Liverpooli ka 94.5% shanse për të kaluar raundin e 16-tave dhe 65.6% për çerekfinale, ndërsa Real Madridi ka 83.9% dhe 56.7% përkatësisht, shifra të larta por jo dominuese. Barcelona qëndron në zonën e mesme me rreth 80% shanse për raundin e 16-tave dhe 63.3% për çerekfinale, ndërsa Manchester City ka 60% për raundin e 16-tave dhe 62% për çerekfinale, duke reflektuar besimin e Opta në aftësinë e tyre për t’u përmirësuar në fazat eliminatore.

Paris Saint-Germain dhe Tottenham Hotspur konsiderohen kategori e dytë e favoritëve: PSG ka 53.7% për raundin e 16-tave dhe 54.9% për çerekfinalet, ndërsa Tottenham ka 51.3% dhe 35.3% përkatësisht, duke i vendosur të dyja në kufirin midis avancimit dhe eliminimit.

Nga Spanja, Atlético de Madrid ka 48.8% shanse për raundin e 16-tave dhe 41.6% për çerekfinale, duke treguar një probabilitet të barabartë për avancim ose eliminim.

Pas tyre, shanset bien ndjeshëm. Interi dhe Juventusi kanë më pak se 6% shanse për raundin e 16-tave, megjithëse Interi ruan 30.6% për çerekfinalet, falë përballjeve potencialisht të favorshme. Atalanta ka 13.4% për raundin e 16-tave dhe 18.4% për çerekfinalet.

Ekipet si Benfica, Ajax dhe Galatasaray mezi kalojnë 10–32% shanset për raundin e 16-tave, ndërsa për çerekfinalet bien nën 6%. Të tjerat renditen me probabilitete minimale ose aspak.

Beteja vendimtare për avancimin pritet të luhet deri në ditën e fundit të fazës së grupeve, duke bërë çdo ndeshje të rëndësishme për skuadrat e mesme dhe të ulëta të renditjes. /Telegrafi/

Pas përfundimit të xhiros së shtatë në fazën e ligës së Ligës së Kampionëve 2025/2026, gara për pozicionet direkte në Top 8 dhe për zonën e “playoff”-it mbetet tepër e fortë, me diferenca minimale mes shumë skuadrave.

Arsenali vazhdon të jetë lider absolut i renditjes, me 21 pikë nga shtatë ndeshje dhe bilanc perfekt prej shtatë fitoresh. Pas londinezëve renditet Bayern Munich me 18 pikë, ndërsa Real Madridi dhe Liverpooli ndajnë nga 15 pikë, duke mbajtur gjallë garën për vendet e para. Liverpooli dhe Bayern Munich janë të vetmet që e kanë siguruar pozitën në top 8.

Zona e Top 8 është jashtëzakonisht e ngjeshur. Tottenham është i pesti me 14 pikë, ndërsa PSG, Newcastle dhe Chelsea kanë nga 13 pikë, njësoj si Barcelona, e cila aktualisht mban vendin e nëntë.

telegrafi.com

Sporting, Manchester City, Atletico Madrid dhe Atalanta janë gjithashtu në kuotën e 13 pikëve, duke e bërë luftën për pozitat elitare edhe më të hapur.

Në zonën e “playoff”-it pozicionohet edhe Juventusi, që me 12 pikë mban vendin e 15-të, përpara Borussia Dortmundit dhe Galatasarayt.

telegrafi.com

Kush janë ekipet e eliminuara?

Skuadra e Kazakistanit, Kairat Almaty, ka grumbulluar vetëm 1 pikë në debutimin e saj në Ligën e Kampionëve, ndërsa Villarreal kanë arritur gjithashtu vetëm 1 pikë gjatë këtij sezoni të vështirë.

Po ashtu, Eintracht Frankfurt dhe Slavia Prague kanë pësuar të njëjtin fat, duke e bërë që katër ekipe të jenë tashmë të eliminuara matematikisht, me një ndeshje të mbetur.

Ekipet që renditen nga vendi 32 deri te vendi 25 janë jashtë, por ende mund të kualifikohen matematikisht në playoff. Aktualisht, skuadra greke Olympiacos zë vendin e fundit për playoff. /Telegrafi/

Bayern Munich ka bërë detyrën, teksa në Allianz Arena ka mposhtur skuadrën belge Royale Union SG me rezultat të pastër 2-0.

Përkundër dominimin të madh të vendasve, pjesa e parë nuk solli gola dhe përfundoi ashtu siç filloi me rezultatin e barabartë 0-0.

Bavarezët e nisën furishëm pjesën e dytë, teksa realizuan dy gola brenda tre minutave.

Harry Kane shënoi në minutën e 52-të pas asistimit nga Olise për 1-0.

Vetëm tre minuta më vonë, sulmuesi anglez shënoi golin e dytë në këtë ndeshje nga penalltia për rezultatin përfundimtar 2-0.

Në minutën e 63-të, bavarezët mbetën me një futbollist më pak në fushë, pasi Kim Min-Jae u ndëshkua me kartonin e dytë të verdhë dhe u përjashtua nga loja.

Me këtë fitore Bayerni ngjitet në pozitën e dytë në tabelë me 18 pikë dhe bëhet skuadra e dytë që siguron fazën e 1/8 së finales në Ligën e Kampionëve. /Telegrafi/

Trent Alexander-Arnold po kalon një nga momentet më të ndërlikuara të karrierës së tij.

Alexander-Arnold i ardhur te Real Madridi me pritshmëri shumë të larta dhe si një transferim strategjik, nuk ka arritur të gjejë rolin dhe rëndësinë e premtuar në projektin sportiv të klubit.

Situata aktuale ka krijuar pakënaqësi të dukshme te lojtari, i cili ndjen se pritshmëritë e tij nuk janë përmbushur.

Pavarësisht cilësive dhe reputacionit të ndërtuar ndër vite, Alexander-Arnold nuk ka arritur të konsolidohet si titullar i padiskutueshëm.

Problemet fizike dhe konkurrenca e brendshme kanë ndikuar në minutazhin e tij, ndërsa ndikimi në lojë ka qenë më i kufizuar nga sa pritej.

Në rrethin e lojtarit flitet për zhgënjim dhe mungesë harmonie me projektin aktual të Real Madridit.

Në këtë kontekst, afati kalimtar i verës po merr formë dhe Bundesliga po shfaqet si një opsion serioz.

Bayern Munich po ndjek nga afër situatën dhe e vlerëson shumë profilin e anglezit, duke e parë atë si një përforcim ideal për krahun e djathtë të mbrojtjes.

Klubi bavarez beson se stili i lojës në Gjermani mund të nxjerrë në pah aftësitë e tij teknike dhe ndikimin ofensiv.

Edhe Real Madridi është i vetëdijshëm për situatën dhe nuk përjashton mundësinë e një largimi, nëse pakënaqësia vazhdon dhe mbërrin një ofertë bindëse.

Mbajtja e një lojtari të pakënaqur nuk shihet si zgjidhje afatgjatë, ndërsa një transferim mund të ndihmojë në rregullimin e balancave në skuadër dhe shmangien e tensioneve të panevojshme.

Alexander-Arnold merr një ofertë të paimagjinueshme për t’u larguar nga Real Madridi

Muajt e ardhshëm do të jenë vendimtarë për të ardhmen e Alexander-Arnold.

Lojtari po shqyrton me kujdes hapin e radhës, duke kërkuar një ambient ku të ndihet i vlerësuar dhe protagonist.

Nëse transferimi te Bayern Munich realizohet, do të ishte një nga lëvizjet më befasuese të afatit kalimtar veror dhe një pikë kthese në karrierën e tij. /Telegrafi/

Drejtuesit e Bayern Munich kanë nisur negociatat për të zgjatur dhe siguruar kontratën e sulmuesit francez Michael Olise, duke qenë të vetëdijshëm për interesin që ai ngjall tek klube të tilla si Real Madrid dhe Liverpool.

Futbollisti 24-vjeçar është bërë tashmë një nga transferimet më të spikatura të klubit bavarez në vitet e fundit, duke regjistruar shifra mbresëlënëse këtë sezon: 13 gola dhe 20 asistime në 28 ndeshje zyrtare.

Progresi i tij nuk ka kaluar pa u vënë re nga klubet e mëdha evropiane, gjë që ka shtyrë Bayernin të veprojë shpejt për të siguruar qëndrueshmërinë e tij afatgjatë.

Sipas Sport Bild, drejtuesit e klubit synojnë të mbyllin marrëveshjen e rinovimit para Botërorit, turne që mund të rrisë edhe më shumë popullaritetin e lojtarit.

Olise erdhi te Bayern verën e vitit 2024 nga Crystal Palace për 53 milionë euro, një shans që në atë kohë konsiderohej i rrezikshëm.

Më pak se dy vite më vonë, insistimi i drejtorit sportiv Max Eberl, mbështetësi i tij kryesor, ka dhënë rezultate, duke e konsoliduar sulmuesin e ri si një pjesë kyçe të ekipit. /Telegrafi/

Liga e Kampionëve vazhdon sonte (e mërkurë) me ndeshjet e xhiros së shtatë të fazës së ligës, ku në program janë përballje të forta dhe direkte që ndikojnë drejtpërdrejt në garën për kualifikim. Mbrëmja sjell sfida mes emrave të mëdhenj dhe ekipeve që luftojnë për mbijetesë evropiane.

Vëmendja kryesore është te dueli Marseille-Liverpool, një ndeshje me peshë të madhe në grup. Francezët kërkojnë fitore në shtëpi, ndërsa Liverpool synon rezultat pozitiv për të siguruar hap të madh drejt fazës tjetër.

Interes i lartë pritet edhe në ndeshjen Juventus-Benfica, ku dy skuadra me histori të pasur në Evropë përballen në Torino. Një duel i hapur, ku çdo pikë mund të jetë vendimtare për renditjen përfundimtare të ligës.

Në Gjermani, Bayern Munich pret Union Saint-Gilloise, me bavarezët që kërkojnë fitore për të konfirmuar statusin e favoritit. Në letër diferenca është e madhe, por skuadra belge hyn pa presion dhe me synim befasinë.

Barcelona luan në udhëtim ndaj Slavia Pragës, në një ndeshje ku katalunasit nuk kanë luksin e gabimit. Çekët janë të fortë në shtëpi, ndërsa Barça kërkon reagim dhe tre pikë jetike.

Chelsea luan në Stamford Bridge ndaj Pafos. Anglezët kërkojnë pikë për të forcuar pozicionin e tyre në mesin e tabelës, ndërsa Pafos shpreson në një rezultat befasues në fushë kundërshtare.

Në Angli, Newcastle United-PSV Eindhoven pritet të jetë një duel me ritëm të lartë, ndërsa Atalanta-Athletic Bilbao në Bergamo premton futboll sulmues dhe luftë direkte për pozicionet në tabelë.

Galatasaray pret Atletico Madridin në një duel që pritet të jetë taktik dhe i fortë fizikisht, ndërsa në të njëjtin orar nga ora 18:45 luan edhe përballja mes Qarabag dhe Eintracht Frankfurt, ku dy skuadrat me fitore tentojnë të mbajnë gjallë shpresat për një vend në ‘play-off’.

Ndryshe, Liga e Kampionëve hyn në fazën ku llogaritjet marrin fund. Sonte vendosen fatet. Kush fiton, afrohet me kualifikimin, kush gabon, rrezikon eliminimin. /Telegrafi/