Nata e fundit e fazës së ligës në Ligën e Kampionëve solli një nga momentet më dramatike të viteve të fundit, ndërsa Benfica siguroi kualifikimin në sekondat e fundit falë një goli të pabesueshëm nga portieri i saj.

Benfica po fitonte 3:2 ndaj Real Madridit deri në minutën e 98-të, por kjo nuk mjaftonte për të kaluar në fazën eliminatore. Për të siguruar vendin e fundit në play-off për raundin e 16-tave, portugezëve u duhej edhe një gol për të përmirësuar diferencën e golave.

Në momentin kur dukej se gjithçka kishte marrë fund, u shfaq portieri Anatoliy Trubin, i cili në sekondën e fundit shënoi golin vendimtar për rezultatin 4:2, duke e çuar Benfikën në fazën tjetër të garës.

Ky gol nuk u prit mirë nga të gjithë, pasi la jashtë garës Olympique de Marseille, që deri në atë çast po shpresonte të kualifikohej.

Gjigantët francezë ishin mposhtur 3-0 nga Club Brugge, por ende prisnin përfundimin e ndeshjes Benfica–Real Madrid, me shpresën se rezultati do t’i favorizonte.

Madje festa shkoi aq larg sa Club Brugge e përgëzoi Marsejën për kualifikimin në ekranin e madh të stadiumit, duke shkruar:

"Urime për kualifikimin, Olympique de Marseille", shkruhej në ekranin gjigant nga Club Brugge.

Megjithatë, belgët nuk e dinin se Benfica kishte ende kohë për të shënuar, dhe ky gjest xhentëlmenësh përfundoi duke u kthyer në një moment edhe më të dhimbshëm për tifozët dhe lojtarët francezë. /Telegrafi/

Me fazën e ligës së Ligës së Kampionëve 2025/26 që tashmë është përfunduar, Arsenali kryeson renditjen e fitimeve deri më tani me 59.74 milionë euro, i ndjekur nga Bayern Munich (57.33 milionë euro) dhe Liverpool (54.92 milionë euro).

Skuadra e Mikel Artetas ka pasur një fazë të parë perfekte të turneut, duke fituar të tetë ndeshjet e tyre, gjë që i ka fituar pothuajse 60 milionë euro deri më sot, duke pasur parasysh se UEFA dha 2.1 milionë euro për fitore dhe 0.7 milionë euro për një barazim.

Kësaj shume duhet t'i shtohen 18.62 milionë euro të marra nga secili prej 36 pjesëmarrësve në këtë fazë, si dhe 11 milionë euro të siguruara tashmë nga Topçinjtë për arritjen në fazën e 1/8-tës, së bashku me një bonus shtesë prej 2 milionë eurosh për tetë ekipet e para që kualifikohen direkt.

Fituesit e ndeshjeve ‘play-off’ midis 16 ekipeve të renditura nga vendi i 9-të deri në të 24-tin, të cilat do të garojnë ekipi si Real Madridi, Interi dhe Juventusi, do të marrin një bonus prej 1 milion eurosh.

Më shumë para për të avancuar në raundet kualifikuese

Përveç kësaj, çdo klub ka marrë një shumë të ndryshme bazuar në pozicionin e tyre në renditjen e ligës. Arsenali fitoi 11.32 milionë euro, një shifër që ra në 310,000 euro për Kairat Almatyn e vendit të fundit, i cili u eliminua nga Liga e Kampionëve me një total prej 19.63 milionë eurosh.

Që tani e tutje, shuma e çmimit për avancimin në raundet eliminatore do të rritet. Është thënë se kalimi në fazën e 1/8-tës paguhet me 11 milionë (sezonin e kaluar ishte 9.6), kalimi në çerekfinale është 12.5 milionë (krahasuar me 10.6 në 24/25), arritja në gjysmëfinale do të thotë 15 milionë më shumë (12.5 një vit më parë), luajtja e finales në Budapest më 30 maj rrit të ardhurat me 18.5 milionë për nën-kampionin (15.5 më parë) dhe 25 milionë euro për fituesin e ri të Ligës së Kampionëve (20 milionë ishte sezonin e kaluar).

Sa i përket klubeve të mëdha spanjolle, Barcelona ka fituar 52.89 milionë euro deri më sot dhe është e vetmja që është kualifikuar direkt për raundin e 1/8-tës. Pas humbjes së tyre në ndeshjen e fundit dhe rënies nga tetë vendet e para, Real Madrid ka grumbulluar 37.93 milionë euro.

Bazuar në grafikun e fitimeve nga play-off-et, disa prej klubeve kryesore evropiane kanë arkëtuar shuma të konsiderueshme, edhe pse me diferenca të dukshme mes tyre.

Interi renditet shumë lart, me rreth 37.6 milionë euro, duke u konfirmuar si një nga klubet më fitimprurëse në këtë fazë falë paraqitjeve konstante dhe progresit sportiv.

Juventusi ndjek pas, me afërsisht 35.3 milionë euro. Edhe pse larg kulmit financiar të viteve të arta, bardhezinjtë vazhdojnë të mbeten një forcë e rëndësishme ekonomike në Evropë.

Borussia Dortmundi ka siguruar rreth 32.6 milionë euro, duke përfituar nga pjesëmarrjet e rregullta dhe modeli i njohur i zhvillimit të lojtarëve.

Në këtë grup futen edhe klube si Atletico Madridi (34.9 milionë euro), Atalanta (34.6 milionë euro) dhe Bayer Leverkusen (33.6 milionë euro), që tregojnë se suksesi sportiv reflektohet drejtpërdrejt në të ardhura.

PSG fitoi 144 milionë euro në edicionin e fundit

Sezonin e kaluar, PSG u kurorëzua fituese e Ligës së Kampionëve dhe gëzimi i Kupës së tyre të parë Evropiane u shoqërua me një fitim të papritur financiar prej 144.4 milionë eurosh për ekipin e drejtuar nga Luis Enrique.

Interi, finalist në Mynih, fitoi 136.6 milionë euro. Gjysmëfinalistët gjithashtu panë shuma të konsiderueshme të shtuara në llogaritë e tyre: 116.9 milionë euro për Arsenalin dhe 105.8 milionë euro për Barcelonën. /Telegrafi/

Faza e ligës në Ligën e Kampionëve 2025/26 mbyllet sonte (e mërkurë) me 18 ndeshje që luhen njëkohësisht nga ora 21:00, ku nuk mungojnë ndeshjet e forta dhe interesante.

Një nga duelet më të forta zhvillohet në Lisbonë, ku Benfica pret Real Madridin. “Los Blancos” kërkojnë rezultat pozitiv për të siguruar pozicion më të favorshëm, ndërsa Benfica luan shansin e fundit për të mbetur në garë. Një ndeshje ku çdo detaj mund të jetë vendimtar.

Spektakël pritet edhe në Gjermani, aty ku Borussia Dortmund përballet me Interin. Dy ekipe me ambicie të mëdha dhe eksperiencë evropiane. Një duel i hapur, fizik dhe me peshë të madhe për renditjen finale.

Në Itali, Napoli dhe Chelsea përplasen në një nga sfidat më interesante të mbrëmjes. Të dyja skuadrat kanë objektiva të qarta dhe presioni është i barabartë. Një humbje këtu mund të kushtojë shtrenjtë.

Barcelona pret Copenhagenin me synimin për të mbyllur fazën me fitore dhe në tetëshe, ndërsa Paris Saint-Germain përballet me Newcastle United në një duel që premton intensitet dhe ritëm të lartë. Edhe këtu, llogaritë janë ende të hapura.

Manchester City kërkon konfirmim përballë Galatasarayt, Liverpooli është favorit ndaj Qarabagut, ndërsa Bayern Munich përballet me PSV Eindhoven në një udhëtim të vështirë. Ndeshje ku favoritët nuk guxojnë të gabojnë.

Gjatë mbrëmjes luajnë edhe takime tjera si Arsenal–Kairat Almaty, Ajax–Olympiacos, Monaco–Juventus dhe Atletico Madrid–Bodo/Glimt, sfida që mund të sjellin befasi pavarësisht diferencave në letër.

Në ndeshjet e mbetura, Frankfurt pret Tottenhamin në një duel ku çdo pikë ka peshë, Bayer Leverkusen përballet me Villarrealin në një sfidë teknike dhe të hapur, Union Saint-Gilloise pret Atalantën me synimin për të befasuar dhe Pafos luan ndaj Slavia Pragës për prestigj.

Xhiroja e fundit nuk është thjesht mbyllje faze. Është provë nervash. Është test karakteri dhe në fund të mbrëmjes, Evropa do të dijë se kush vazhdon dhe kush mbetet jashtë Ligës së Kampionëve. /Telegrafi/

Presidenti i Olympique Marseille, Pablo Longoria, ka zbuluar se përpara se të nënshkruante me Mason Greenwood, ai kërkoi këshillën e nënës së tij në lidhje me situatën e lojtarit.

Greenwood ishte përballur më parë me akuza për tentativë përdhunimi, sjellje shtrënguese dhe sulm, të cilat u rrëzuan të gjitha në shkurt 2023, gjatë kohës që ishte ende pjesë e Manchester United.

“Me të gjitha informacionet, e thirra nënën time. I thashë: ‘Çfarë mendon, duke e ditur të gjithë situatën?’ Ajo punonte në sistemin e burgjeve në Spanjë dhe ishte e vlerësuar me medalje shtetërore. Më tha: ‘Bëje!’ Për mua ishte e rëndësishme që dikush që nuk merret me sport të jepte një opinion objektiv", tha Longoria.

Ai shtoi se për klubin, vendimi për të sjellë Greenwood-in ishte një mundësi e madhe sportive dhe se analiza e situatës ishte bërë me shumë kujdes.

“Krijimi i tabuve në jetë nuk është kurrë pozitiv. Për ne, ishte një mundësi e madhe tregu nga një perspektivë sportive, ku analizuam me shumë kujdes se çfarë ndodhi në të vërtetë”, tha Longoria.

Marseille e solli Greenwood-in në verën e vitit 2024 nga Manchester United, në një transferim me vlerë 26 milionë euro.

Që nga ajo kohë, sulmuesi ka qenë i jashtëzakonshëm për klubin francez, duke shënuar 20 gola dhe dhuruar 6 asistime në 28 paraqitje këtë sezon. /Telegrafi/

Liverpooli ka marrë fitore të madhe në udhëtim te Olympique Marseille, duke triumfuar 0-2 në Veledrome.

Në minutën e 23-të, The Reds shëuan golin e parë me Hugo Ekitiken, por që u anulua nga VAR.

E në minutën e 45-të ndeshja u zhbllokua, kur Dominik Szoboszlai realizoi një gol spektakolar nga gjuajtja e lirë për epërsinë e Liverpoolit 0-1.

Liverpooli vazhdoi dominimin edhe në pjesën e dytë, teksa në minutën e 73-të, pas një asistimi nga Frimpong, portieri vendas Rulli shënoi autogol për ta dyfishuar epërsinë e Liverpoolit.

E krejt në fund të ndeshjes, Cody Gakpo realizoi golin e tretë për Liverpoolin dhe për rezultatin përfundimtar 0-3.

Me këtë fitore Liverpooli ngjitet në pozitën e katërt në tabelë me 15 pikë, derisa ndeshjen e ardhshme e luan në Anfield ndaj Qarabag.

Në anën tjetër Marseille është e 19-ta në tabelë me nëntë pikë, ndërsa në duelin e fundit përballet në udhëtim me Club Brugge. /Telegrafi/

Liga e Kampionëve vazhdon sonte (e mërkurë) me ndeshjet e xhiros së shtatë të fazës së ligës, ku në program janë përballje të forta dhe direkte që ndikojnë drejtpërdrejt në garën për kualifikim. Mbrëmja sjell sfida mes emrave të mëdhenj dhe ekipeve që luftojnë për mbijetesë evropiane.

Vëmendja kryesore është te dueli Marseille-Liverpool, një ndeshje me peshë të madhe në grup. Francezët kërkojnë fitore në shtëpi, ndërsa Liverpool synon rezultat pozitiv për të siguruar hap të madh drejt fazës tjetër.

Interes i lartë pritet edhe në ndeshjen Juventus-Benfica, ku dy skuadra me histori të pasur në Evropë përballen në Torino. Një duel i hapur, ku çdo pikë mund të jetë vendimtare për renditjen përfundimtare të ligës.

Në Gjermani, Bayern Munich pret Union Saint-Gilloise, me bavarezët që kërkojnë fitore për të konfirmuar statusin e favoritit. Në letër diferenca është e madhe, por skuadra belge hyn pa presion dhe me synim befasinë.

Barcelona luan në udhëtim ndaj Slavia Pragës, në një ndeshje ku katalunasit nuk kanë luksin e gabimit. Çekët janë të fortë në shtëpi, ndërsa Barça kërkon reagim dhe tre pikë jetike.

Chelsea luan në Stamford Bridge ndaj Pafos. Anglezët kërkojnë pikë për të forcuar pozicionin e tyre në mesin e tabelës, ndërsa Pafos shpreson në një rezultat befasues në fushë kundërshtare.

Në Angli, Newcastle United-PSV Eindhoven pritet të jetë një duel me ritëm të lartë, ndërsa Atalanta-Athletic Bilbao në Bergamo premton futboll sulmues dhe luftë direkte për pozicionet në tabelë.

Galatasaray pret Atletico Madridin në një duel që pritet të jetë taktik dhe i fortë fizikisht, ndërsa në të njëjtin orar nga ora 18:45 luan edhe përballja mes Qarabag dhe Eintracht Frankfurt, ku dy skuadrat me fitore tentojnë të mbajnë gjallë shpresat për një vend në ‘play-off’.

Ndryshe, Liga e Kampionëve hyn në fazën ku llogaritjet marrin fund. Sonte vendosen fatet. Kush fiton, afrohet me kualifikimin, kush gabon, rrezikon eliminimin. /Telegrafi/

Manchester United do t’i marrë në konsideratë Thomas Tuchel dhe Roberto De Zerbi si kandidatë për rolin e tyre afatgjatë të trajnerit këtë verë.

Me Michael Carrick të emëruar si trajner i përkohshëm deri në fund të sezonit pas shkarkimit të Ruben Amorim, drejtuesit e INEOS tashmë po hartojnë kërkimin e përhershëm.

Stafi i Carrick i cili përfshin edhe emra si Jonny Evans, Travis Binnion, Steve Holland dhe Jonathan Woodgate do të largohen në verë, kështu që një trajner i ri me emër do të vijë në Old Trafford.

Sipas Fabrizio Romano, Tuchel dhe De Zerbi janë dy emrat më të përfolur për të marr drejtimin e Djajve të Kuq nga edicioni 2026/27.

“Dy emra që garantohen se do të merren në konsideratë nga INEOS janë Thomas Tuchel dhe Roberto De Zerbi. Tuchel është plotësisht i përqendruar te Anglia dhe Kupa e Botës, ndërsa De Zerbi po bën një punë të shkëlqyer te Olympique Marseille, por të dy mbeten të vlerësuar brenda ekipit”, ka thënë Romano.

Aftësitë e Tuchel në menaxhimin e lojtarëve dhe ngritjen e skuadrës e bëjnë atë një opsion të rëndësishëm, megjithëse preferenca e tij për kontroll mund të bie ndesh me strukturën bashkëpunuese të United.

Inteligjenca taktike e De Zerbi dhe puna e provuar në zhvillim e tij te Brighton dhe Marseille mund të ofrojnë një përshtatje më të mirë.

Procesi mbetet i gjatë dhe priten emra të tjerë, ndërsa United ndjek kualifikimin në Ligën e Kampionëve nën drejtimin e Carrick para një rivendosjeje të madhe. /Telegrafi/

Pavarësisht interesimit serioz të Olympique de Marseille gjatë afatit kalimtar të verës, Dani Ceballos vendosi të qëndrojë te Real Madridi, duke shpresuar se do të fitonte një rol më të rëndësishëm nën drejtimin e Xabi Alonsos.

Mesfushori spanjoll, i cili ka kontratë me “Los Blancos” deri në vitin 2027, besoi se mungesat në fillim të sezonit do t’i hapnin më shumë hapësira në formacion.

Ceballos është pjesë e Real Madridit që nga viti 2017 dhe, përveç huazimit te Arsenali mes viteve 2019 dhe 2021, ka qenë vazhdimisht në klub, duke fituar 16 trofe.

Megjithatë, pavarësisht përvojës dhe momenteve pozitive në disa sezone, ai ka pasur shpesh rol dytësor dhe është përballur me konkurrencë të fortë në repartin e mesfushës.

Në fillim të këtij sezoni, ai u aktivizua në 7 nga 10 ndeshjet e para, katër prej tyre si titullar, duke përfituar nga mungesat e Jude Bellingham dhe Eduardo Camavinga.

Me rikthimin e lojtarëve kryesorë, situata ndryshoi shpejt dhe minutat e tij në fushë u reduktuan ndjeshëm, deri në pikën që nuk ka luajtur në katër ndeshjet e fundit të kampionatit.

Xabi Alonso ka sqaruar se mungesa e Ceballos lidhet me zgjedhje taktike, duke theksuar se ai mbetet pjesë e planeve të skuadrës.

Megjithatë, konkurrenca nga emra si Aurelien Tchouameni, Federico Valverde, Bellingham, Camavinga dhe Arda Guler e ka lënë mesfushorin në hije.

Deri në këtë fazë të sezonit, Ceballos ka grumbulluar vetëm 560 minuta në 13 ndeshje, një bilanc që vështirë se premton ndryshim të madh në të ardhmen e afërt.

Në këto kushte, e ardhmja e tij te Real Madridi mbetet e paqartë dhe një largim i mundshëm në një afat kalimtar të ardhshëm nuk përjashtohet. /Telegrafi/

Sezoni 2025/2026 ka nisur me ritëm të lartë në kampionatet kryesore evropiane dhe sulmuesit më të mirë po tregojnë menjëherë formën e tyre përpara portës.

Disa nga emrat më të njohur të futbollit botëror po kryesojnë listën e golashënuesve.

Harry Kane po shkëlqen me fanellën e Bayern Munich.

Sulmuesi anglez ka shënuar 18 gola në 14 ndeshje, duke qenë aktualisht më i miri në Evropë për nga numri i golave.

Pas tij renditet Erling Haaland, i cili vazhdon të jetë vendimtar për Manchester City, me 17 gola në 16 ndeshje.

Ndërkohë, Kylian Mbappe ka nisur shumë mirë aventurën e tij me Real Madridin, duke u bërë një nga pikat kryesore të sulmit.

Në listën e golashënuesve më të spikatur janë edhe Ayase Ueda, Vangelis Pavlidis, Luis Suarez dhe Ferran Torres, të cilët po japin kontribut të rëndësishëm për skuadrat e tyre.

Sezoni sapo ka filluar, por gara për golashënuesin më të mirë të Evropës pritet të jetë shumë interesante.

Golashënuesit më të mirë në Evropë

1. Harry Kane (32 vjeç / Bayern Munich / Angli) - 18 gola në 14 ndeshje (1,087 minuta)

2. Ayase Ueda (27 vjeç / Feyenoord / Japoni) - 18 gola në 16 ndeshje (1,315 minuta)

3. Erling Haaland (25 vjeç / Manchester City / Norvegji) - 17 gola në 16 ndeshje (1,377 minuta)

4. Kylian Mbappe (26 vjeç / Real Madrid / Francë) - 17 gola në 17 ndeshje (1,488 minuta)

5. Vangelis Pavlidis (27 vjeç / Benfica / Greqi) - 13 gola në 14 ndeshje (1,164 minuta)

6. Ayoub El Kaabi (32 vjeç / Olympiakos / Marok) - 12 gola në 14 ndeshje (1,148 minuta)

7. Luis Suarez (28 vjeç / Sporting Lisbon / Kolumbi) - 11 gola në 14 ndeshje (1,156 minuta)

8. Mason Greenwood (24 vjeç / Olympique de Marseille / Angli) - 11 gola në 15 ndeshje (1,224 minuta)

9. Paul Onuachu (31 vjeç / Trabzonspor / Nigeri) - 11 gola në 15 ndeshje (1,304 minuta)

10. Ferran Torres (25 vjeç / FC Barcelona / Spanjë) - 11 gola në 16 ndeshje (1,023 minuta) /Telegrafi/

Sot (e martë), tifozët e futbollit evropian do të përballen me një nga mbrëmjet më dramatike. Në programin e xhiros së gjashtë të fazës së grupeve të Ligës së Kampionëve, shumë skuadra kryesore luajnë për kualifikim dhe për disa prej tyre edhe për mbijetesë në garë.

Ndeshja kryesore e mbrëmjes së sotme padyshim se do të zhvillohet në “Giuseppe Meazza”, me Interin që është nikoqir i Liverpoolit.

Për skuadra si Barcelona dhe Atletico Madrid, kjo natë është thuajse “jetë a vdekje”: një fitore apo mundësi për të shpëtuar sezonin evropian.

Barça pret Eintracht Frankfurt në “Camp Nou”, me presion maksimal për pikë, ndërsa Atletico luan në udhëtim te PSV Eindhoven.

Ndeshje interesante pritet të jenë edhe ato në mes të Bayern Munich-Sporting Lisbona dhe Atalanta-Chelsea.

Për adhuruesit e skuadrave më të vogla nga Kairat Almaty deri te Union Saint-Gilloise, ky mund të jetë shansi i fundit për të befasuar Evropën dhe siguruar pozita që kurrë më parë nuk dukeshin të mundshme. Të parët presin Olympiacosin, teksa të dytët e presin Marseille.

Në ndeshjet tjera të mbrëmjes, Monaco është nikoqir i Galatasarayt, ndërsa Tottenhami e pret Slavia Pragën. /Telegrafi/

Manchester United pritet të përfitojë rreth 50 milionë euro nga një ofertë marramendëse prej 100 milionë eurosh e paraqitur nga klubi i ri i Saudi Pro League, Neom Sports Club, për ish-sulmuesin e “Djajve të Kuq”, Mason Greenwood, sipas raportimeve nga media spanjolle Fichajes.

Oferta, e bërë në prag të afatit kalimtar së janarit, vjen pas formës së shkëlqyer që 24-vjeçari ka shfaqur tek Olympique Marseille, ku vetëm 18 muaj pas largimit nga Old Trafford është shndërruar në lojtar kyç.

Transferimi i tij te Marseille për rreth 26 milionë euro përfshinte një klauzolë inteligjente prej 50% mbi shitjen e ardhshme një marrëveshje e negociuar nga ish-drejtori sportiv Dan Ashworth, çka e vë United në pozitë të favorshme për të përfituar ndjeshëm nga një transferim i mundshëm.

Nën drejtimin e Roberto De Zerbi, Greenwood po zhvillon një sezon mbresëlënës në Ligue 1, me 10 gola dhe 4 asistime në 14 ndeshje, duke e mbajtur Marseille në garë për titull.

Ai ka shkëlqyer edhe në arenën evropiane, ku ka regjistruar gol dhe asistim në Ligën e Kampionëve.

Forma e tij ka tërhequr vëmendjen e gjigantëve si Barcelona dhe Juventus, por Neom SC duket se e konsideron sulmuesin anglez si figurën qendrore të projektit të tyre ambicioz, duke vlerësuar “qëndrueshmërinë e tij në situata presioni” dhe duke i ofruar rol absolut protagonist.

Ky zhvillim e vendos Greenwoodin mes emrave më të kërkuar të afatit kalimtar së janarit, ndërsa Man Utd qëndron gati të përfitojë ndjeshëm ekonomikisht nga një lëvizje e mundshme drejt Arabisë Saudite. /Telegrafi/

Faza e grupeve të Ligës së re të Kampionëve hyn në fazën e saj vendimtare pas një xhiro ndeshjesh që ka tronditur ndjeshëm renditjen.

Me vetëm tre ndeshje të mbetura, ekipet po përsosin strategjitë e tyre, po përshtatin objektivat e tyre dhe po i mbajnë sytë hapur parashikimeve nga superkompjuteri i Opta-s, i cili ka përditësuar renditjen e probabilitetit për të përcaktuar se kush do të zërë tetë vendet e kualifikimit direkt për fazën e 1/8-tës.

Gjetjet e modelit statistikor janë mbresëlënëse. Real Madridi është ngritur, Barcelona ka rënë dhe disa gjigantë evropianë janë gjetur në një pozicion të papritur e të pasigurt.

Parashikimi e vendos Arsenalin në vendin e parë në fund të tetë ndeshjeve të kësaj faze të ligës. Ekipi i Mikel Artetas, i fortë, i drejtpërdrejtë dhe me një skuadër gjithnjë e më të pjekur, është bërë, sipas Opta-s, ekipi më i besueshëm në kontinent.

Pas tyre, Bayern Munich, pavarësisht humbjes së fundit ndaj Arsenalit, ruan një nivel efektiviteti në Evropë që pak ekipe mund ta arrijnë. Podiumin e plotëson Paris Saint-Germain, i cili duket se ka gjetur një ekuilibër konkurrues nën drejtimin e Luis Enriques dhe parashikimet statistikore të së cilës e forcojnë pozicionin e tyre të tretë.

Real Madridi ngjitet në vendin e katërt

Lajmi i madh për futbollin spanjoll është ngritja e Real Madridit në vendin e katërt në parashikime. Fitorja e tyre në ndeshjen e fundit kundër Olympiacos ka forcuar besimin e superkompjuterit te skuadra e Xabi Alonsos, e cila shfrytëzoi pengesat e rivalëve të drejtpërdrejtë për t'u ngjitur në një hap vendimtar në luftën për tetë vendet e para.

Modeli i superkompjuterit e vendos Interin në vendin e pestë, pavarësisht humbjes së tyre kundër Atletico Madridit, dhe Manchester Cityn në të gjashtin.

Dy vendet e fundit kualifikuese automatike, sipas Opta-s, janë të rezervuara për Chelsean dhe Borussia Dortmundin. Klubi londinez ka bërë një hap të rëndësishëm falë fitores së tyre prestigjioze kundër Barcelonës, ndërsa Dortmundi, i cili mundi Villarrealin, është ngjitur në renditje.

Në vendet e fazës ‘play-off’ gjenden edhe klube si Atletico Madridi në vendin e 10-të, Liverpooli i 11-ti, Barcelona e 12-ta, Napoli i 19-ti, Juventusi i 20-t, Marseille në vendin e 23-të dhe Monaco që zë vendin e fundit për një shans kualifikimi në fazën e 1/8-tës nga faza e eliminimit.

Superkompjuteri parashikon eliminimin e klubeve të njohura si Athletic Bilbao, Benfica, Villarreal dhe Ajax pasi gjenden më poshtë se pozita e 24-të. /Telegrafi/

Sot (e martë) janë në program për t’u zhvilluar nëntë ndeshje në kuadër të xhiros së pestë të fazës së ligës në Ligën e Kampionëve.

Pas një pauze prej tri javësh, Liga e Kampionëve rikthen emocionet mes tifozëve me disa ndeshje shumë interesante që pritet të zhvillohen mbrëmjen e sotme.

Ndeshja kryesore e mbrëmjes padyshim se do të zhvillohet në Londër, ku Chelsea e pret Barcelonën në “Stamford Bridge” me fillim nga ora 21:00.

Takime tjera interesante pritet të jenë edhe ato në mes të Manchester City-Bayer Leverkusen, Marseille-Newcastle dhe Borussia Dortmund-Villarreal.

Nga ora 21:00 do të luhen edhe ndeshjes mes të Bodo/Glimt-Juventus, Napoli-Qarabag dhe Slavia Praga-Athletic Bilbao.

Dy ndeshjet e vetme janë ato në mes të Galatasaray-Royale Union SG dhe Ajax-Benfica. /Telegrafi/

Manuel Locatelli mbetet një nga lojtarët më të rëndësishëm të Juventusit dhe një gur i vërtetë themeli në strukturën e skuadrës bardhezi, pavarësisht kritikave të herëpashershme.

Megjithatë, e ardhmja e kapitenit duket më e pasigurt se kurrë, me mundësinë reale që ai t’i thotë lamtumirë klubit qendra e tij mes muajit janar dhe qershor.

Sipas raportimeve të Alfredo Pedullà, trajneri i Italisë, Luciano Spalletti, do të zhvillojë vlerësime të rëndësishme gjatë javëve të ardhshme.

Për të plotësuar idetë e tij teknike, mesfushori mund të përfundojë si një “sakrificë” në merkato, veçanërisht nëse kjo do t’i hapte Juventusit rrugën për të nënshkruar me Pierre Hojbjerg, një nga lojtarët e preferuar të trajnerit toskan.

Një tjetër skenar i mundshëm është ai i një shkëmbimi me Marseille.

Trajneri francezëve, Roberto De Zerbi, është një admirues i madh i Locatellit, dhe kjo mund të shërbejë si katalizator për arritjen e një marrëveshjeje mes dy klubeve. Situata mbetet e hapur dhe pritet të marrë formë të qartë me afrimin e afatit të janarit. /Telegrafi/

Gjyqtari spanjoll, Jose Maria Sanchez Martinez, përgjegjës për ndeshjen Olympique de Marseille-Atalanta, e bëri këtë lojë të ndërlikuar në minutat e fundit të ndeshjes, pasi një vendim i tij po diskutohet shumë nëse ishte i saktë apo jo.

Atalanta mori një fitore të madhe me rezultat 1-0 në udhëtim te Marseille në ndeshjen e xhiros së katërt të fazës së ligës në Ligën e Kampionëve.

Megjithatë, goli i fitores i shënuar në minutën e 89-të nga Lazar Samardzic po diskutohet shumë nëse ishte i rregullt.

Gjyqtari spanjoll, Sanchez Martinez, përgjegjës për ndeshjen e së mërkurës mbrëma, e bëri këtë lojë të ndërlikuar në minutat e fundit të ndeshjes.

Një lojë e mundshme me dorë ndodhi në zonën e penalltisë të Atalantës, dhe kundërsulmi pasues përfundoi me një gol për ekipin italian.

Pavarësisht protestave nga ekipi francez, Sanchez Martinez vendosi ta pranonte golin dhe vendosi që loja me dorë ishte e paqëllimshme.

Vendimi i gjyqtarit spanjoll ka bërë bujë të madhe në rrjetet sociale, ku shumë tifozët të futbollit po e cilësojnë si të parregullt, pasi mendojnë se më parë ekzistonte penalltia për Marseille. /Telegrafi/

Sot (e mërkurë) janë në orar për t’u zhvilluar nëntë ndeshje në kuadër të xhiros së katërt të fazës së ligës në Ligën e Kampionëve.

Pas etheve dhe ndeshjeve interesante të së martës mbrëma, tani radhën e ka nata e sotme me disa takime tjera që pritet të sjellin emocione të mëdha.

Megjithatë, për dallim nga mbrëmja e së martës ku pati dy derbi shumë të fortë evropian, mbrëmja e sotme nuk ka ndonjë derbi shumë të madh.

Ndeshja më interesante e mbrëmjes pritet të jetë ajo në mes të Manchester Cityt dhe Borussia Dortmundin, e planifikuar të luhet në ‘Etihad’ nga ora 21:00.

Përballje interesante pritet të jenë edhe ato në mes të Neëcastle-Athletic Bilbao, Ajax-Galatasaray, Benfica-Bayer Leverkusen dhe Marseille-Atalanta.

Nga ora 21:00 luajnë edhe dy klubet tjera të mëdha evropiane, Interi dhe Barcelona, me Nerazzurët që presin Kairat Almanyt dhe katalunasit që udhëtojnë te Club Brugge.

Dy ndeshjet e vetme që luhen nga ora 18:45 janë ato në mes të Qarabag-Chelsea dhe Pafos-Villarreal. /Telegrafi/

Mason Greenwood është lidhur me një rikthim në kampionatin anglez, Ligën Premier, pasi dy klube besohet se kanë hyrë në garë për nënshkrimin e tij nga Olympique Marseille.

Tottenham Hotspur po rrit interesin e tyre për Greenwood, ndërsa ringjallja e sulmuesit 24-vjeçar në Ligue 1 vazhdon të tërheqë vëmendjen në të gjithë Evropën.

Greenwood u bashkua me Marseille nga Manchester United në vitin 2024 për rreth 30 milionë euro, pasi polemikat jashtë fushës çuan në largimin e tij nga Old Trafford, por United mban një klauzolë shitjeje prej 50%.

Përveç Spurs, West Ham United e sheh Greenwoodin si një lojtar që mund të ndihmojë në shpëtimin e asaj që ka qenë një sezon i dëshpëruar deri më tani.

Greenwood ka lulëzuar në Francë, duke shënuar 21 gola në ligë sezonin e kaluar dhe tashmë tetë në të gjitha garat këtë sezon, përfshirë katër në një ndeshje të vetme të tetorit kundër Le Havre.

Barcelona dhe Interi Hami janë ndër klubet tjera që konkurrojnë për anglezin dhe thuhet se Greenwood favorizon një transferim në një skuadër të Ligës së Kampionëve. /Telegrafi/

Barcelona po e mban nën vëzhgim sulmuesin anglez Mason Greenwood, i cili pas disa sezoneve të trazuara po rikthehet fuqishëm në qendër të vëmendjes evropiane.

Që nga debutimi i tij te Manchester United, Greenwood tregoi shenja të një lojtari të nivelit të lartë, me instinkt të jashtëzakonshëm për gol, por mungesa e qëndrueshmërisë dhe problemet jashtë fushës e penguan të arrinte potencialin e plotë.

Midis brezit të artë të futbollistëve të rinj anglezë si Bukayo Saka, Marcus Rashford dhe Phil Foden, Greenwood spikati për aftësinë e tij të jashtëzakonshme për të përballur çdo portier dhe për të shënuar nga pothuajse çdo pozicion. Aftësia e tij për të qenë vdekjeprurës para portës e bëri të konsiderohej si “ylli i ardhshëm” i Manchester United, por karriera e tij mori një kthesë të fortë pas akuzave për dhunë ndaj ish-partneres, çështje që e detyroi klubin anglez të distancohej nga ai.

Pas asaj periudhe të errët, Greenwood vendosi të rilindte karrierën e tij në Francë, duke u transferuar te Olympique de Marseille, një lëvizje që fillimisht shkaktoi polemika në Angli.

Mason Greenwood telegrafi.com

Megjithatë, qëndrimi i tij në Ligue 1 është kthyer në një histori suksesi. Në mesin e vitit 2025, sulmuesi 24-vjeçar po kalon formën më të mirë të karrierës së tij që nga largimi nga Premier League, dhe sipas mediave spanjolle, Barcelona po e monitoron me kujdes zhvillimin e tij, duke parë mundësinë për një transferim gjatë verës së ardhshme.

Statistikat e tij janë bindëse: sezonin e kaluar, Greenwood regjistroi 36 paraqitje në të gjitha garat për Marseille, duke luajtur mbi 2,900 minuta, shënuar 22 gola dhe dhënë pesë asiste. Kjo paraqitje e ka rikthyer në orbitën e klubeve të mëdha evropiane, dhe Barça shihet si një prej destinacioneve më të mundshme për fazën e re të karrierës së tij. /Telegrafi/

Sot (e mërkurë) janë në program për t’u zhvilluar gjithsej nëntë ndeshje në kuadër të xhiros së tretë të fazës së ligës në Ligën e Kampionëve.

Pas emocioneve dhe ndeshjeve të zjarrta gjatë të martës mbrëma, tani radhën e ka dita e sotme me pritshmëri të njëjta.

Vëmendja më e madhe padyshim se është te kryendeshja e kësaj xhiros mes Real Madridit dhe Juventusit, e cila pritet të zhvillohet në “Santiago Bernabeu” nga ora 21:00.

Në të njëjtin orar, Liverpooli luan në udhëtim te Eintracht Frankfurt, Bayern Munichu e pret Club Brugge, ndërsa Chelsea është nikoqir i Ajaxit.

Nga ora 21:00 luajnë edhe ndeshjet mes Atalanta-Slavia Praga, Monaco-Tottenham dhe Sporting Lisbona-Marseille.

Dy ndeshjet e vetme të parapara nga ora 18:45 janë ato mes Athletic Bilbao-Qarabag dhe Galatasaray-Bodo/Glimt. /Telegrafi/

Mason Greenwood po kalon një periudhë rilindje te Marseille. Në ndeshjen ndaj Le Havre, ai shkëlqeu me katër gola në fitoren 6-2, duke u bërë lojtari i parë i klubit që realizon një “poker” në Ligue 1 që nga Jean-Pierre Papin në 1991.

Por për Greenwood, nuk ishin vetëm golat: ishte qetësia, buzëqeshja, dhe një sinjal i qartë se ky nuk është më thjesht një talent premtues, është një lider në formim.

Pas një sezoni të mirë në Spanjë me Getafe, Greenwood iu bashkua Marseilles si një lojtar i heshtur dhe i rezervuar. Por në pak muaj, ai është transformuar falë një ambienti të shëndetshëm dhe punës me trajnerin italian Roberto De Zerbi, i cili ka besuar tek ai që në ditën e parë.

“Mund të bëhet një nga më të mirët në botë”, ka deklaruar De Zerbi, duke e mbrojtur publikisht dhe duke e vendosur në zemër të projektit të tij.

Mason Greenwood

Në fushë, Greenwood ka nisur sezonin 2025/2026 në mënyrë brilante: 6 gola dhe 3 asistime në 8 ndeshje, pas një sezoni të kaluar ku mbylli me 21 gola e shtatë asistime, duke e çuar Marseillen në vendin e dytë.

Në total - 27 gola dhe 10 asiste në 42 ndeshje me fanellën bardheblu, shifra që tregojnë rritjen dhe ndikimin e tij.

Por ajo që bie më shumë në sy është ndryshimi jashtë fushës. Greenwood tashmë flet frëngjisht, është më i hapur me shokët e skuadrës, ndjek kurse, ndërvepron me tifozët dhe është pjesë aktive e jetës së klubit.

Në qendrën stërvitore të Marseille, ku lojtarët kalojnë të gjithë ditën në një ambient që funksionon si “familje”, Greenwood ka gjetur stabilitetin dhe sigurinë që i mungonte.

Mason Greenwood

Marseille është bërë shtëpia e tij e re, dhe ai po shpërblen klubin me përkushtim dhe performanca të larta

Në dhomën e zhveshjes pas pokerit, bashkëlojtarët e pritën për të festuar, një moment që tregon se Greenwood nuk është më vetëm një individ në rikthim, por një pjesë kyçe e grupit.

Nga izolimi në protagonizëm, nga presioni në pjekuri

Greenwood po ecën drejt elitës me hapa të sigurt. Dhe nëse e ardhmja i përket nivelit më të lartë të futbollit, kjo është sepse në Marseille ai ka gjetur vendin e duhur për ta rilindur veten./Telegrafi/