Trajneri i Real Madridit, Xabi Alonso, rikthehet sërish në qendër të vëmendjes këtë javë, teksa skuadra e tij presin Real Betisin në Bernabeu.

Më pas, Los Blancos do të udhëtojnë në Arabinë Saudite për Superkupën e Spanjës, ku do të përballen me Atletico Madrid në një derbi gjysmëfinale, dhe potencialisht me Barcelonën ose Athletic Bilbaon në finalen e mundshme.

Alonso ia ka dalë të mbijetojë spekulimet e shumta mbi pozicionin e tij gjatë javës së fundit të ndeshjeve para pushimit të dimrit, duke siguruar fitore ndaj Alaves, Talavera de la Reina dhe Sevilla.

Një nga arsyet që e ndihmon Alonso është mungesa e alternativave të qarta. Zinedine Zidane është përjashtuar nga një rikthim i tretë, ndërsa Jurgen Klopp duket se është i kënaqur me rolin e tij të ri te Red Bull. Këta janë dy emrat e vetëm të mëdhenj që janë lidhur me ‘Los Blancos’.

Alternativat më të mundshme për të marrë drejtimin deri në fund të sezonit, nëse do të nevojitej, janë trajneri i Real Madrid Castilla, Alvaro Arbeloa, ose drejtori sportiv Santiago Solari.

Arbeloa vlerësohet lart në Valdebebas, dhe këtë verë u promovua nga trajner i ekipit U-19 në trajner të Castillas. Që nga ardhja e tij në akademi në 2022, ai ka regjistruar 150 fitore në 198 ndeshje, sipas Diario AS.

Sa i përket stilit, ai krahasohet me askënd tjetër veç Klopp. Arbeloa kreditohet për zhvillimin e Nico Paz, Jacobo Ramon dhe Gonzalo Garcia, dy të parët duke shkëlqyer më pas në Serie A.

Raportohet se Arbeloa e bëri ekipin e të rinjve më profesional që në ardhje dhe ka zgjedhur një stil presioni të lartë, që nuk dallon shumë nga ai i Klopp në kohën e tij më të mirë./Telegrafi/

KF Llapi ka njoftuar zyrtarisht për përfundimin e bashkëpunimit me futbollistin Muhamed Useini, pas një viti e gjysmë bashkëpunimi mes palëve.

Sipas komunikatës së klubit, marrëveshja për ndarjen e rrugëve është arritur me mirëkuptim të plotë dhe respekt të ndërsjellë, duke mbyllur kështu një kapitull pozitiv për të dyja palët.

Llapi e ka falënderuar publikisht Muhamed Useinin për gjithçka që ka dhënë për fanellën e klubit dhe i ka uruar shumë suksese në vazhdim të karrierës së tij sportive.

Njoftimi i plotë i Llapit:

KF Llapi njofton se, pas një viti e gjysmë bashkëpunimi të shkëlqyeshëm, ka arritur marrëveshje të dyanshme me futbollistin Muhamed Useini për përfundimin e bashkëpunimit.

Gjatë kësaj periudhe, Useini u dëshmua si një sportist i jashtëzakonshëm, duke dhënë kontribut të çmuar për klubin, si brenda ashtu edhe jashtë fushës. Ai u veçua për sjelljen korrekte, përkushtimin maksimal dhe profesionalizmin e lartë, duke qenë gjithmonë në shërbim të ekipit dhe objektivave të klubit.

Me respekt dhe mirëkuptim të ndërsjellë, palët kanë vendosur të ndajnë rrugët, duke mbyllur një kapitull pozitiv të bashkëpunimit të tyre.

KF Llapi e falënderon Muhamed Useinin për gjithçka që ka dhënë për klubin dhe i uron shumë suksese në vazhdim të karrierës së tij sportive./Telegrafi/

CFR Cluj është gati të fitojë para këtë dimër dhe pasi shiti Louis Munteanu te DC United, ata po përgatiten të shesin një tjetër yll në MLS.

Nelutu Varga, pronari i klubit me seli në Gruia, është në bisedime të avancuara me zyrtarët e DC United për transferimin e mesfushorit kosovar Meriton Korenica.

Sipas informacioneve të marra nga Fanatik, asgjë nuk është finalizuar ende, por ka shumë mundësi që marrëveshja të përfundojë.

Korenica vlerësohet shumë nga trajneri i DC United, Rene Weiler, i cili e pa atë në një ndeshje të Cluj.

Madje duket se trajneri zviceran i ekipit të Amerikës së Veriut e pëlqen Korenicën edhe më shumë sesa Louis Munteanu.

Fanatik ka mësuar se bisedimet në lidhje me transferimin e Meriton Korenicës te DC United janë rreth shumës 4 milionë euro.

Kjo do të ishte një tjetër lëvizje e shkëlqyer për Clujin, një klub që po përballet me disa vështirësi financiare.

I transferuar një vit e gjysmë më parë nga Manisa, Korenica ka performuar vazhdimisht mirë për Clujin.

Këtë sezon, ai ka shënuar 6 gola dhe ka dhënë 7 asistime në 29 ndeshje të luajtura në të gjitha garat./Telegrafi/

Liverpool thuhet se ka arritur një marrëveshje për nënshkrimin e parë të janarit, ndërsa Arne Slot kërkon të forcojë skuadrën pas një fillimi të zhgënjyeshëm të sezonit 2025/26.

Pavarësisht se gjatë afatit kalimtar të verës kanë transferuar lojtarë të klasit të lartë si Alexander Isak dhe Florian Wirtz, asnjëri nuk ka pasur ndikimin që shumë prisnin, ndërsa të tjerët që erdhën në verë, Milos Kerkez dhe Jeremie Frimpong, ende nuk kanë performuar në nivelin e tyre më të mirë që nga mbërritja në ‘Anfield’.

Hugo Ekitike, i cili erdhi nga Eintracht Frankfurt, është ndoshta nënshkrimi më i suksesshëm i verës, me 11 gola në 24 paraqitje.

Por pavarësisht se ‘Të Kuqtë’ shpenzuan një shumë të raportuar prej 446 milionë euro gjatë verës, ata janë tashmë aktivë në afatin kalimtar të janarit, që u hap më 1 janar.

Të premten, më 2 janar, një raport nga The Athletic pretendoi se Liverpool ishte “në bisedime” me mbrojtësin austriak 17-vjeçar Ifeanyi Ndukwe, i cili aktualisht luan për Austria Wien.

Të shtunën, më 3 janar, gazetari italian Fabrizio Romano zbuloi në kanalin e tij në YouTube atë që di për marrëveshjen e mundshme dhe deklaroi se “gjithçka është e kryer” dhe “e rënë dakord”.

“Ky mbrojtës i talentuar, që vjen nga Austria-Wien, 17 vjeç, do të mbushë 18 shumë shpejt, dhe në verën e vitit 2026, Ndukëe do të bëhet mbrojtësi i ri i Liverpoolit. Është e kryer”.

Lojtari ka rënë dakord për kushtet. Mund të them se gjatë verës, klube italiane dhe gjermane donin ta nënshkruanin, por Ndukwe vendosi të presë, dhe tani Liverpool ka vendosur ta transferojë”, ka shkruar Romano./Telegrafi/

Real Madrid ka finalizuar tashmë huazimin e Endrick Felipe te Lyon, dhe ai mund të mos jetë lojtari i vetëm që largohet gjatë afatit kalimtar të dimrit.

Ka interes për disa nga lojtarët e Xabi Alonsos, dhe njëri prej tyre mund të jetë në rrugë drejt Arsenalit.

Arsenal aktualisht kryeson tabelën e Ligës Premier, teksa kërkon titullin e parë kampion pas më shumë se 20 vitesh.

Mikel Arteta, natyrisht, është i interesuar të përmirësojë skuadrën për gjysmën e dytë të sezonit, dhe shpreson të shtojë një lojtar të Real Madridit në përbërje gjatë javëve të ardhshme.

Sipas CaughtOffside, Arda Guler pëlqehet nga Arsenal dhe Arteta, me shpresën që të arrihet një marrëveshje e strukturuar gjatë afatit të dimrit, e ngjashme me atë që solli Martin Odegaard në Londrën e Veriut.

Arsenal është e interesuar të huazojë Guler për gjysmën e dytë të sezonit, me synimin që të vendosë një marrëveshje të përhershme në verë.

Interesi i tyre për mesfushorin turk është i gjatë, megjithatë mund të përballen me konkurrencë nga rivalët, Liverpool dhe Manchester United.

Arsenal mund të jetë shumë i interesuar për Guler, por raporti thekson qartë se Real Madrid nuk ka plane për ta shitur.

Një largim do të kishte qenë më i mundur para këtij sezoni, por me 20-vjeçarin tashmë një lojtar kyç për Alonson, ka pak ose aspak mundësi që ai të largohet nga Bernabeu./Telegrafi/

Liam Rosenior ka hapur derën për t’u bërë trajneri i ri i Chelseat, duke pranuar se nuk ka asnjë garanci që do të qëndrojë te Strasbourg deri në fund të sezonit.

41-vjeçari është kandidati kryesor për të zëvendësuar Enzo Marescan, i cili u largua në Ditën e Vitit të Ri, dhe pritet që së shpejti të ketë zhvillime konkrete.

Pengesa kryesore që duhet kapërcyer lidhet me faktin se BlueCo, fondi investues që zotëron si Chelsean ashtu edhe Strasbourgun, dëshiron të tregojë ndjeshmëri ndaj nevojave të të dy klubeve.

Para se anglezi të largohet nga klubi i Ligue 1, duhet të sigurohet një zëvendësues cilësor për Rosenior te Strasbourg.

Rosenior do të jetë në pankinën e Strasbourgut kur ata të përballen me Nicen të shtunën në mbrëmje dhe nuk ka asnjë garanci që ai do të jetë në krye të Chelseat për ndeshjen kundër Fulhamit të mërkurën.

Megjithatë, ish-mbrojtësi i Brightonit pranoi se situata mund të zhvillohet shpejt, kur u pyet të premten nëse e shihte veten duke qëndruar te Strasbourg.

“Nuk ka garanci në jetë. Ajo që di është se unë jap gjithçka për këtë punë. Kam krijuar lidhje të jashtëzakonshme me njerëzit e këtij klubi. Kemi krijuar disa kujtime vërtet të bukura”.

“Nuk mund të garantosh asgjë në jetë. Sa i përket interesimit nga klube të tjera, kam pasur shumë interes”.

“Shumë kontakte, për të cilat gjithmonë kam qenë i hapur me klubin. Disa janë bërë publike dhe disa jo”.

“Fokusi im është gjithmonë te puna që bëj. Por të thuash se patjetër do të jem diku apo patjetër do të bëj diçka, nuk mendoj se është e drejtë”, ka deklaruar Rosenior./Telegrafi/

Trent Alexander-Arnold mund t’i ofrohet një rrugëdalje nga Real Madridi, pasi raportohet se dy klube të Ligës Premier po rivalizojnë për shërbimet e tij.

Mbrojtësi 27-vjeçar u largua verën e kaluar nga klubi i fëmijërisë së tij, Liverpool, ku kishte kaluar gjithë karrierën deri në atë moment, një vendim që ndau opinionin e tifozëve të “Të Kuqve”.

Sezoni i parë i Alexander-Arnold te Real Madridi ka qenë me ulje-ngritje. Ai ka zhvilluar vetëm 11 paraqitje në të gjitha kompeticionet dhe në fillim të dhjetorit pësoi një dëmtim në muskujt e kofshës, i cili e ka lënë jashtë fushave për disa muaj.

Me hapjen e merkatos së janarit, kanë nisur spekulimet mbi të ardhmen e tij. Sipas mediumit spanjoll Fichajes, Reali po shqyrton mundësinë e shitjes së ish-mbrojtësit të Liverpoolit, ndërsa disa klube angleze janë të interesuara për ta rikthyer Alexander-Arnold në Angli gjatë verës.

Një nga klubet e përmendura në artikull është Newcastle United, që aktualisht renditet në vendin e dhjetë në Ligën Premier.

Opsioni tjetër, më kontrovers, është Manchester United, rival i përbetuar i Liverpoolit, i cili ndodhet në vendin e gjashtë në renditje, dy pikë pas skuadrës së Arne Slot, me të cilën Alexander-Arnold fitoi titullin e Ligës Premier sezonin e kaluar.

Raportohet se si Newcastle ashtu edhe Manchester United po shqyrtojnë oferta rreth 40 milionë euro për Alexander-Arnold, por këto shifra konsiderohen “të pamjaftueshme” për ta bindur Real Madridin të heqë dorë nga lojtari, me klubin spanjoll që thuhet se “nuk ka asnjë qëllim ta lërë të largohet”.

Kontrata e Trent Alexander-Arnold me Real Madridin është e vlefshme deri në verën e vitit 2031./Telegrafi/

Sulmuesi i Espanyolit, Pere Milla, ka ndezur edhe më shumë atmosferën e derbit katalanas, duke deklaruar se do të zgjidhte të shkelte mbi Lamine Yamal dhe jo mbi ish-shokun e skuadrës, Joan Garcia.

Përballja mes Espanyolit dhe Barcelonës pritet të ketë një nga ambientet më armiqësore të sezonit, pasi Garcia rikthehet për herë të parë në ish-shtëpinë e tij, këtë herë si lojtar i Barcelonës.

Përpara ndeshjes, drejtuesit e Espanyolit kanë qenë të kujdesshëm t’u bëjnë thirrje tifozëve për mbështetje të zjarrtë, por njëkohësisht kanë theksuar se “duhet të mbizotërojnë kokat e ftohta”, mesazhe që janë përcjellë përmes disa thirrjeve publike.

Po ashtu, klubi ka vendosur të instalojë rrjeta pas portave, nga frika se tifozët mund të hedhin objekte në drejtim të Garcias.

Në prag të ndeshjes, Milla ishte i ftuar në emisionin e Beteve, “Perico que vola”, i cili i kushtohet plotësisht Espanyolit.

Gjatë marrjes së pyetjeve nga publiku, ai u pyet nëse do të preferonte të shkelte mbi Lamine Yamal apo mbi Garcia.

“Mendoj Lamine”, u përgjigj Milla. Duhet theksuar se toni ishte humoristik, dhe më pas Milla së bashku me prezantuesit bënë shaka me titujt që mund të pasonin, si “Milla dëshiron të shkelë mbi Lamine Yamal” apo “Milla do të shkelë mbi Lamine Yamal”.

Megjithatë, pavarësisht natyrës komike të deklaratës, ashtu siç e ka mësuar edhe vetë Lamine Yamal përpara një klasikeje, toni shpesh humbet dhe rrezikon të ndezë edhe më shumë lojtarët e Barcelonës./Telegrafi/

Pepe Mel ka tërhequr së fundmi vëmendje pas një deklarate të fortë që lidhet me yllin e Barcelonës, Pedri.

Reprezentuesi spanjoll, i cili konsiderohet një nga mesfushorët më të mirë në botë, ka punuar me Mel gjatë periudhës së tyre së bashku te Las Palmas.

Në fakt, Mel ka luajtur një rol kyç në ngritjen fillestare të Pedrit, me spanjollin që ka zhvilluar plot 37 ndeshje zyrtare nën drejtimin e tij.

Edhe pse Pedri u transferua më pas te Barcelona, Mel ka zbuluar në një intervistë të fundit për Radioestadio Noche se ish-lojtari i Las Palmas ishte ndjekur edhe nga Real Madridi.

Mel shtoi se kishte pasur madje një bisedë me kryetarin e Real Madridit dhe legjendën e klubit, Emilio Butragueno.

Pedri dhe Pepe Mel

“Fola me Butraguenon dhe ai më tha se klubi e kishte vëzhguar tashmë Pedrin dhe kishte vendosur se ai nuk ishte një lojtar i përshtatshëm për Real Madridin.”

Në thelb, “Los Blancos” hoqën dorë nga mundësia për ta transferuar Pedrin, pasi nuk u konsiderua si lojtar i nivelit të Real Madridit.

Duhet theksuar se kjo ndodhi përpara se spanjolli të shndërrohej në një yll të madh, veçanërisht pas transferimit të tij te Barcelona.

Në moshën vetëm 23-vjeçare, Pedri ka regjistruar tashmë 221 ndeshje zyrtare me Barcelonën, duke thyer së fundmi edhe rekordin e Lionel Messit, pasi u bë lojtari më i ri në histori që ka luajtur 150 ndeshje në La Liga për klubin katalanas./Telegrafi/

Klubi turk Fenerbahce raportohet se ka kontaktuar Milanin për të pyetur jo vetëm për Christopher Nkunku, por edhe për Youssouf Fofana.

Afati kalimtar i janarit ka nisur dhe kuqezinjtë kanë bërë tashmë një përforcim, duke siguruar Niclas Fullkrug nga West Hami në formë huazimi, me opsion blerjeje në fund të sezonit.

Në këtë kontekst, ka pasur sugjerime se Nkunku mund të largohet vetëm gjashtë muaj pas transferimit të tij nga Chelsea.

Fenerbahce thuhet se është e interesuar për sulmuesin, i cili aktualisht është jashtë fushave për shkak të një dëmtimi në kyçin e këmbës.

Megjithatë, Calciomercato.com pretendon se ai nuk është lojtari i vetëm i Milanit që ka tërhequr interesin e klubit turk.

Ata kanë pyetur gjithashtu për mesfushorin Fofana, por ai është një titullar i rregullt nën drejtimin e trajnerit Max Allegri dhe është shumë pak e mundshme që të shitet, përveç rastit kur të vijë një ofertë shumë e lartë.

Reprezentuesi francez mbush 27 vjeç këtë muaj dhe u ble nga AS Monaco në vitin 2024 për 26 milionë euro./Telegrafi/

Kapiteni i Sunderlandit, Granit Xhaka, ka vlerësuar energjinë pozitive të skuadrës pas barazimit 0-0 me Man Cityn në Ligën Premier.

Sunderland u përball me shumë presion nga ekipi i Pep Guardiolas, por arriti të siguronte një pikë të rëndësishme në ‘Stadium of Light’.

Xhaka, i cili ka qenë një nga arsyet kryesore pse Sunderland po performon kaq mirë këtë sezon, ishte përsëri i shkëlqyer.

Duke folur për Sky Sports pas ndeshjes, ish-mesfushori i Arsenalit lavdëroi “energjinë e mirë” të skuadrës së tij.

“Në fund, sigurisht që dëshiron të fitosh ndeshjet, por duhet të shohim realitetin gjithashtu. Sapo u ngjitëm në Ligën Premier pas kaq shumë vitesh dhe kemi pasur disa ndryshime në ekip”.

“Afro 15-16 lojtarë të rinj dhe nuk është gjithmonë e lehtë të përshtatesh kaq shpejt me njëri-tjetrin”.

“Është thjesht energjia, dhoma jonë e zhveshjes është kaq pozitive. Kemi një energji të madhe me stafin dhe me lojtarët”.

“Në fund, rezultatet flasin vetë sepse po japim shumë përpjekje ditë pas dite, javë pas jave”.

“Mendoj se për momentin mund të jemi shumë të kënaqur pas kësaj pjese të parë të sezonit”, ka deklaruar Xhaka./Telegrafi/

Është zbuluar një arsye tronditëse pse miku i Anthony Joshuas po udhëtonte me të në Nigeri, sipas xhaxhait të tij.

Të hënën, kampioni dy herë botëror i peshave të rënda ishte përfshirë në një aksident automobilistik që mori jetën e dy prej miqve të tij.

Aksidenti ndodhi në Makun, shteti Ogun, në autostradën Lagos-Ibadan, kur makina u përplas me një kamion të ndalur pranë rrugës.

Fotografi treguan Joshuan në ulë sen e pasme të automjetit, të rrethuar nga xhama, dhe më pas ai u dërgua në spital për të marrë trajtim nga lëndime të lehta, me sugjerime se “mundësia për dëmtime në brinjë dhe gjunjë” ishte përmendur nga një burim që thuhet se është afër “rrethit të brendshëm” të Joshuas.

Një raport pretendonte se ai kishte thënë: “Ndjej dhimbje kudo në trupin tim” në fjalët e tij të para pas aksidentit.

Autoritetet konfirmuan se dy burra të rritur humbën jetën në këtë aksident tragjik dhe më vonë u identifikuan si Kevin Latif Ayodele dhe Sina Ghami, të dy 36 vjeç, bashkëpunëtorë të ngushtë të Joshuas dhe anëtarë kyç të ekipit të tij.

Të dy kanë qenë pjesë integrale në përgatitjen e Joshuas për shumë beteja të mëdha, përfshirë fitoren e tij më të fundit me nokaut ndaj Jake Paul në Miami.

Sina, bashkëthemelues i Evolve Gym në Londër, ka punuar me Joshuan në kampin e tij si trajner i sportit dhe rehabilitimit fizik për më shumë se një dekadë.

Ai ka krijuar një miqësi me Joshuan, me Shahryar Rumi që zbuloi se marrëdhënia e tyre ishte aq e ngushtë sa boksieri e kishte marrë atë në Nigeri për këtë udhëtim që të mos ishte vetëm.

“Ata ishin miq, Anthony Joshua dhe Sina. Punuan së bashku, por filluan si miq. Edhe në këtë udhëtim, ai nuk donte që ai të ishte i vetëm, prandaj shkoi me të”, ka deklaruar Rumi për The Times./Telegrafi/

Barcelona po përqendrohet te një mbrojtës qendre për verën e ardhshme, por nuk përjashtohet edhe përforcimi në pozicione të tjera, përfshirë edhe krahun e djathtë

Aktualisht, blaugranasit kanë vetëm Jules Kounde si një mbrojtës “natyral” të djathtë, edhe pse vetë francezi është një qendërmbrojtës i konvertuar.

Eric Garcia ka performuar mirë në këtë pozicion gjatë vitit 2025, por nuk ka alternativa të tjera të qarta për Kounde në skuadër, ndërsa Garcia shpesh përdoret në pozicione të tjera.

Sipas Mundo Deportivo, Barcelona është e interesuar të rekrutojë një alternativë më sulmuese për Kounde, pasi kjo mund t’i ofrojë Hansi Flick një mjet shtesë dhe mundësinë për të shfrytëzuar hapësirën që krijon Lamine Yamal më përpara, çka shpjegon edhe lidhjet me Joao Cancelo.

Një nga emrat që është lidhur me Barcelona këtë sezon është Julian Ryerson i Borussia Dortmund.

Gazeta katalanase thekson se blaugranasit kanë rritur përpjekjet e skautimit për Ryerson dhe, gjatë muajve të ardhshëm, do të ndjekin me kujdes progresin e tij, duke e vlerësuar si një blerje të mundshme afatmesme.

Ryerson është mbrojtës i djathtë, por së fundmi ka luajtur si mesfushor krahu dhe gjithashtu ka performuar mirë si qendërmbrojtës i tretë si dhe në krahun e majtë – një shkathtësi shumë e vlefshme për një skuadër që ka vetëm shtatë mbrojtës.

Mendohet se Ryerson mund të plotësojë mirë Lamine Yamal në sulm dhe fakti që ka mundur Yan Couto për vendin e tij shihet si një avantazh i madh në CV-në e tij./Telegrafi/

Milani ka zyrtarizuar nënshkrimin e sulmuesit gjerman Niclas Fullkrug në formë huazimi, me opsion blerjeje.

Në një njoftim në faqen zyrtare të klubit, Rossonerët konfirmuan “kënaqësinë” për ardhjen e gjermanit dhe bënë të ditur se ai do të mbajë fanellën me numrin 9.

Ish-sulmuesi i Werder Bremen dhe Borussia Dortmund iu bashkua West Hamit në vitin 2024, por nuk arriti të lërë gjurmë gjatë 18 muajve të tij në Londrën Lindore.

Në 29 paraqitje me klubin anglez, gjermani shënoi vetëm tre gola dhe tani shpreson ta lërë pas këtë periudhë të vështirë në Angli.

Një fillim i ri te Milani mund të jetë pikërisht ajo që i nevojitet, veçanërisht duke pasur parasysh se edhe ‘Rossonerët’ kanë vuajtur këtë sezon nga mungesa e një “numri 9” të sigurt dhe efektiv.

Fullkrug do të jetë në dispozicion të Massimiliano Allegrit që sonte (e premte), i cili mund ta aktivizojë sulmuesin në ndeshjen kundër Cagliarit.

Edhe pse është e pamundur që ai ta nisë ndeshjen si titullar, Fullkrug mund të futet në lojë në pjesën e dytë./Telegrafi/

Ndërsa shumë nga ligat kryesore evropiane kanë bërë pushim për dimër, është koha të bëjmë një bilanc dhe të reflektojmë mbi katër muajt e parë të mbushur me emocion dhe veprim në fushë.

Ky është gjithashtu momenti i duhur për të vlerësuar lojtarët që përfunduan transferimet gjatë verës nëpër kontinent, tani që kanë një numër të konsiderueshëm ndeshjesh pas tyre.

10. Malick Thiaw (Newcastle – 35 milionë euro)

Gjermani ka hyrë në Ligën Premier me një lehtësi të jashtëzakonshme, duke u bërë shpejt një titullar i në mbrojtjen e fortë të Newcastle, bashkë me Fabian Schar, Sven Botman dhe Dan Burn, dhe madje është lavdëruar si një nga qendërmbrojtësit më të mirë në kampionat.

Thiaw ka dominuar në ajër, ka treguar aftësitë e tij me topin dhe madje ka shënuar një dygolësh kundër Everton në fund të nëntorit.

9. Marcus Rashford (Barcelona – huazim)

Huazimi i Marcus Rashford te Barcelona ishte një lëvizje surprizuese verën e kaluar. 27-vjeçari, i cili duket se po afrohej në fundin e karrierës së tij në nivele të larta, ka shfrytëzuar mundësinë me të dyja duart.

Rashford ka shfrytëzuar një dëmtim të hershëm të Leëandoëskit për t’u bërë një figurë kyçe në një repart sulmues që përfshin gjithashtu Raphinha dhe Lamine Yamal.

8. Joan Garcia (Barcelona – 25 milionë euro)

Barcelona është shpërblyer për vendimin e diskutueshëm për të degraduar Marc-Andre ter Stegen dhe për të besuar te Joan Garcia.

24-vjeçari ka shkëlqyer, duke bërë pritje të jashtëzakonshme që kanë ndihmuar blaugranët të ngjiten në krye të La Ligës, përfshirë një paraqitje vendimtare kundër Rayo Vallecano dhe një tjetër të jashtëzakonshme ndaj Villarreal.

Ai ka një përqindje pritjesh prej 79 përqind dhe 6 ndeshje pa pësuar gola në 12 takime në kampionat.

7. Martin Zubimendi (Arsenal – 60 milionë euro)

Sezona e tij e parë në Arsenal nuk do të mbahet mend për statistika individuale, por 26-vjeçari ka transformuar mesfushën e ‘Topçinjve’, duke ndihmuar veçanërisht Declan Rice të lulëzojë në një rol më të lirë, duke kombinuar aftësi me topin dhe forcë në duelin fizik.

6. Jonathan Tah (Bayern Munich – falas)

Tah u bashkua me Bayern Munchen në qershor pas skadimit të kontratës me Bayer Leverkusen dhe ka sjellë stabilitet të ri në mbrojtjen bavareze, duke formuar një partneritet të fortë me Dayot Upamecano.

Reprezentuesi gjerman ka dominuar në ajër dhe ka kontribuar edhe me disa gola.

5. Granit Xhaka (Sunderland – 17 milionë euro)

Mesfushori shqiptar ka qenë një lider i vërtetë për Sunderland, duke mbajtur shiritin e kapitenit dhe duke udhëhequr skuadrën në asiste, mundësi të krijuara, pasime të suksesshme dhe fitore dueli.

Një ndikim kyç për suksesin e hershëm të klubit nën drejtimin e Regis Le Bris.

4. Luka Modric (AC Milan – falas)

Modric, 40 vjeç, ka treguar përsëri klas dhe energji të jashtëzakonshme për të udhëhequr mesfushën e Milanit, duke luajtur çdo ndeshje të Serie A dhe duke ndihmuar klubin të luftojë për Scudetto pas një sezoni të dobët të mëparshëm.

3. Florian Thauvin (Lens – 8 milionë euro)

Në moshën 32-vjeçare, Thauvin është bërë një nga transferimet më të spikatura në Ligue 1, duke ndihmuar Lens të qëndrojë në krye të kampionatit para Krishtlindjeve.

Ai ka kontribuar në 7 gola në 16 ndeshje dhe është rikthyer në Kombëtaren e Francës pas gjashtë vjetësh.

2. Yan Diomande (RB Leipzig – 20 milionë euro)

19-vjeçari i Bregut të Fildishtë ka qenë sensacion për Leipzig këtë sezon. Pas zhvendosjes nga krahu i majtë në të djathtin në tetor, ai ka arritur të kontribuojë në 10 gola në 9 ndeshjet e fundit përpara Kupës së Afrikës.

1. Luis Diaz (Bayern Munich – 75 milionë euro)

Luis Diaz ka filluar me ritëm të jashtëzakonshëm në Bayern Munich, duke dhuruar 14 kontribuime në gola në po aq ndeshje ligash, duke përfshirë 5 gola në 3 ndeshje për të nisur karrierën e tij në Gjermani.

Ai ka shfrytëzuar hapësirat e mbrojtjeve kundërshtare në Bundesliga për të shkëlqyer si sulmues i shpejtë dhe direkt./Telegrafi/

Lee Casciaro ka shkruar historinë në Ligën e Konferencës. Në moshën 44 vjeç, ai ka bërë debutimin e tij evropian dhe është bërë lojtari më i vjetër në garat e UEFA-s.

Një rekord i certifikuar nga arkivat e UEFA-s , i arritur në ditën e fundit të fazës së grupeve të Ligës së Konferencës 2025/26 , i destinuar të mbetet si një referencë historike për garat kontinentale.

Në minutën e 81-të të ndeshjes Legia Varshava kundër Lincoln Red Imps, ka ndodhur diçka që asnjë rezultat nuk mund ta fshinte.

Ndeshja përfundoi 4-1 për ekipin vendas, por historia e Ligës së Konferencës do të kishte një histori tjetër: Lee Casciaro hyri në fushë në moshën 44 vjeç dhe vendosi një rekord të paprecedentë të UEFA-s.

Lincoln Red Imps ishin tashmë jashtë garës për në fazat eliminatore, por ai zëvendësim e shndërroi një ndeshje të zakonshme në një ngjarje historike.

Lee Casciaro

I lindur më 29 shtator 1981 , Casciaro u bë zyrtarisht lojtari më i vjetër që ka luajtur ndonjëherë në një garë evropiane , duke tejkaluar të gjitha kufijtë e mëparshëm të moshës.

Rëndësia e këtij rekordi është edhe më e dukshme kur krahasohet me të dhënat zyrtare të UEFA-s.

Në garat e ekipeve kombëtare, Casciaro është tashmë lojtari me më shumë kohë në karrierë në historinë e Ligës së Kombeve , duke luajtur me 43 vjet e 14 ditë në ndeshjen kundër Lihtenshtajnit në tetor 2024.

Një renditje që përfshin emra të shquar si Cristiano Ronaldo , Luka Modric, Pepe, Hugo Lloris dhe Jordi Alba : kampionë të mësuar të rishkruajnë rekorde, por të tejkaluar, për sa i përket jetëgjatësisë, nga sulmuesi i Gjibraltarit .

Lee Casciaro

Midis fushës dhe uniformës: Jeta e dyfishtë e Lee Casciaros

Casciaro nuk jeton nga futbolli. Për më shumë se njëzet vjet, ai ka punuar për Ministrinë e Mbrojtjes të Gjibraltarit , në role që lidhen me sigurinë ushtarake dhe të portit.

Një jetë e dyfishtë, siç e shpjegoi vetë sulmuesi në një intervistë: "Kam qenë oficer policie për 22 vjet. Në fakt, është më shumë një forcë sigurie: ne merremi me anije dhe objekte ushtarake."

Seanca stërvitore në mbrëmje , punë e përditshme , udhëtime evropiane të ngjeshura midis ndërrimeve: një rutinë që përshkruan se çfarë do të thotë të luash futboll në një nga kontekstet më të vogla në kontinent, ku pajtueshmëria e punës dhe sportit është ende një domosdoshmëri e përditshme./Telegrafi/

Në muajt para largimit të tij, raportohet se Enzo Maresca ka treguar mungesë respekti ndaj Chelseat, duke zhvilluar biseda me përfaqësues nga dy klube të tjera.

Chelsea ka ndërprerë bashkëpunimin me Marescan, i cili u largua nga detyra më 1 janar pas një periudhe të dobët forme, si dhe pas një raporti të përkeqësuar të marrëdhënies së tij me hierarkinë e klubit.

Pak pas lajmit zyrtar, u zbuluan më shumë detaje rreth largimit të Maresca-s, duke përfshirë edhe bisedat për mundësinë e pasimit të Pep Guardiolas te klubi i tij i mëparshëm, Manchester City, që ishte një nga zbulimet kryesore.

Maresca, i cili kishte punuar me ekipin U21 të City gjatë sezonit 2020/21 përpara se të shijonte një periudhë si ndihmës i Guardiolas, ka zhvilluar disa biseda me përfaqësues të City për pozicionin e trajnerit.

Në fakt, Maresca i kishte bërë të ditur Chelseas në fund të tetorit dhe përsëri në mes të dhjetorit se po diskutonte me njerëz të lidhur me City “për kandidaturën e tij për pozicionin e trajnerit nëse dhe kur lind hapë sira”, sipas The Athletic.

Ndërkohë, sipas kontratës, Maresca ishte i detyruar të informonte Chelsean për çdo bisedë që zhvillonte me klube të tjera, që në këtë rast ishin Manchester City dhe gjiganti i Serie A, Juventus.

Megjithatë, pavarësisht se e informoi klubin, Maresca thuhet se nuk e ka respektuar Chelsean duke zhvilluar këto biseda, sipas Sky Sports.

Raporti gjithashtu pretendon se Maresca kishte “mungesë të forcës mendore dhe pjekurisë emocionale” dhe se shpesh ka vepruar në kundërshtim me këshillat e stafit mjekësor të Chelseat./Telegrafi/

Viti 2025 në futboll ishte një udhëtim plot emocione, i mbushur me rikthime të jashtëzakonshme, fitore historike dhe disa tragjedi që tronditën tifozët në mbarë botën.

Nga skuadra që i dhanë fund pritjeve të gjata për trofe, te lojtarë që arritën kulmin në aspektin personal - ky vit i pati të gjitha.

Më poshtë janë momentet më të spikatura të futbollit në vitin 2025.

Finalja e Ligës së Kampionëve : Paris Saint-Germain 5-0 Inter

Pas vitesh përpjekjesh, Paris Saint-Germain më në fund ngriti trofeun e Ligës së Kampionëve të UEFA-s nën drejtimin e trajnerit Luis Enrique.

Fitorja bindëse 5-0 ndaj Interit e shfaqi PSG-në si forcën dominuese të futbollit evropian për klube.

Lojtarë si Vitinha dhe Ousmane Dembele shkëlqyen në një mbrëmje futbolli fluid dhe sulmues, duke forcuar më tej statusin e Enriques si ‘Trajneri i Vitit’ nga France Football.

Interi rrëmben fitoren Barcelonës

Gjysmëfinalja e dytë e Ligës së Kampionëve në “San Siro” ofroi dramë futbolli që kujtoi rikthimin historik të Barcelonës kundër PSG-së në vitin 2017.

Interi shënoi golin e barazimit në minutat e fundit për ta çuar rezultatin e përgjithshëm në 6-5 dhe më pas fitoi në kohën shtesë, me David Frattesi që realizoi golin vendimtar në minutën e 99-të.

Kjo fitore historike i siguroi Interit një vend në finale, duke i shuar edhe një herë shpresat e Barcelonës.

Cristiano Ronaldo dhe Portugalia fitojnë titullin e dytë të Ligës së Kombeve

Cristiano Ronaldo shtoi edhe një trofe ndërkombëtar në karrierën e tij të jashtëzakonshme, teksa Portugalia mposhti kampionët e Evropës, Spanjën, 5-3 me penallti.

Ronaldo shënoi gjithashtu gjatë ndeshjes, duke treguar thellësinë e skuadrës portugeze dhe duke konfirmuar statusin e saj si një nga pretendentet kryesore për Kupën e Botës 2026.

Chelsea fiton edicionin e parë të Kupës së re Botërore për Klube të FIFA-s

E zhvilluar në Shtetet e Bashkuara përpara Kupës së Botës 2026, edicioni i parë i Kupës së riformatuar të Botës për Klube të FIFA-s pa 32 skuadra të garonin për titullin.

Chelsea befasoi kampionët e Evropës, PSG-në, me një fitore 3-0 në finale, falë një paraqitjeje taktike brilante nga Enzo Maresca.

Liverpool thyen rekordin britanik të Ligës Premier për Isak

Liverpool shijoi një sezon fantastik nën drejtimin e trajnerit Arne Slot dhe e përforcoi më tej skuadrën gjatë afatit kalimtar veror.

“Të Kuqtë” thyen rekordin britanik të transferimeve në Ligën Premier duke transferuar sulmuesin suedez Alexander Isak nga Newcastle United për 130 milionë paund, përfshirë bonuset, një nënshkrim që konfirmoi ambiciet e mëdha të klubit.

Një rikthim i papërsëritshëm – Dembele fiton Topin e Artë 2025

Sulmuesi francez Ousmane Dembele realizoi një nga rikthimet më të mëdha në historinë e futbollit duke fituar Topin e Artë.

Pas përballjes me dëmtime që dikur rrezikonin karrierën e tij, Dembele udhëhoqi PSG-në drejt titujve në Ligue 1, Superkupën e Francës dhe Ligën e Kampionëve.

Ceremonia emocionale e ndarjes së çmimit ishte një moment krenarie për yllin francez.

Humbja tragjike e Diogo Jotës

Futbolli u trondit nga një tragjedi e madhe, pasi sulmuesi i Portugalisë dhe Liverpoolit, Diogo Jota, humbi jetën në një aksident automobilistik në Spanjë, së bashku me vëllain e tij, Andre Silva.

Jota kishte pasur një sezon të shkëlqyer, duke fituar Ligën Premier me Liverpoolin dhe Ligën e Kombeve të UEFA-s me Portugalinë, duke lënë në zi tifozët dhe gjithë komunitetin e futbollit.

Neymar shpëton Santosin nga rënia

Neymar u rikthye te klubi i tij i fëmijërisë, Santos, dhe zhvilloi një seri paraqitjesh brilante që ndihmuan skuadrën të shmangte rënien nga kategoria.

Pavarësisht se luajti i dëmtuar, kreativiteti, ndërtimi i lojës dhe golat e superyllit brazilian siguruan fitore vendimtare për Santosin, ndërsa ai tashmë po përgatitet për Kupën e Botës FIFA 2026 pas një operacioni në gju.

Rikthimi i Manchester United në Ligën e Evropës në 'Old Trafford'

Manchester United tregoi qëndrueshmërinë e tij karakteristike me një rikthim dramatik në Ligën e Evropës kundër Lyonit.

Duke qenë në disavantazh prej 4-2 gjatë kohës shtesë, United shënoi dy gola në minutat shtesë falë Kobie Mainoo dhe Harry Maguire, duke e çuar ‘Old Traffordin’ në ekstazë.

Megjithatë, gëzimi zgjati pak, pasi Tottenham Hotspur i mposhti 1-0 në finale.

Trofeu i parë madhor për Tottenhamin

Sezoni i “herëve të para” vazhdoi, teksa Tottenham Hotspur më në fund fitoi trofeun e parë madhor në histori duke triumfuar në Ligën e Evropës pas triumfit në finale ndaj Manchester United.

Goli i Brennan Johnson në pjesën e parë rezultoi vendimtar, ndërsa Micky van de Ven realizoi një shpëtim heroik mbi vijën e portës për të ruajtur avantazhin.

Heung-Min Son ngriti trofeun e tij të parë me Spurs, duke e konsoliduar statusin e tij si një legjendë e klubit./Telegrafi/

Sevilla ka qenë prej disa muajsh në bisedime për ndryshimin e pronësisë së klubit, por këtë javë situata ka marrë një kthesë të papritur – drejt Sergio Ramosit.

Mbrojtësi veteran raportohet se është përfshirë drejtpërdrejt në bisedimet për marrjen në dorë të klubit ku u formua si futbollist.

Ramos u rrit te Sevilla përpara se të transferohej te Real Madridi dhe për shumë vite pati një marrëdhënie të tensionuar me tifozët e klubit të fëmijërisë së tij.

Megjithatë, ai duket se i rregulloi këto marrëdhënie gjatë rikthimit të dytë te Sevilla, i cili përfundoi 18 muaj më parë, pas një sezoni të vetëm në ‘Ramon Sanchez Pizjuan’.

Deri së fundmi, dukej se një konsorcium amerikan ishte në pozicionin më të favorshëm për të marrë në pronësi klubin, me Antonio Lappi dhe Fede Quintero në krye të ofertës.

Megjithatë, pas kryerjes së raportit të verifikimit financiar mbi Sevillën, oferta ka rënë nga 3.4 mijë euro për aksion në vetëm 2.7 mijë euro për aksion, siç raportohet nga Muchodeporte dhe është përcjellë nga Diario AS. Si pasojë, besohet se negociatat janë bllokuar.

Pas raportimeve fillestare se Sergio Ramos kishte shprehur interes për t’u bërë investitor minoritar te Sevilla, Cadena Cope zbulon se në fakt Ramos po udhëheq grupin e tij të investimit për të marrë kontrollin e klubit dhe tashmë ka paraqitur një ofertë zyrtare për aksionarët.

Kjo ofertë rezulton të jetë më e larta e bërë deri tani, ndërsa grupi i investitorëve ka vendosur besimin e plotë te Ramos për të qenë fytyra dhe zëri i projektit të ri./Telegrafi/

Arsenal pritet të ketë një afat kalimtar të qetë në janar, por mund të përfitojë para shtesë nga dy klauzola të shitjes së mëparshme negociuar nga Edu.

Megjithëse është e pamundur të ketë lëvizje të mëdha te Arsenal gjatë afatit të janarit, klubi mund të përfitojë nga disa fitime nga transferimet muajin e ardhshëm falë dy klauzolave të shitjes së mëparshme.

Kjo për shkak se ish-lojtarët Nuno Tavares dhe Brooke Norton-Cuffy, të cilët aktualisht luajnë në Serie A, po tërheqin interes para hapjes së afatit kalimtar të dimrit këtë të enjte.

Nuno Tavares, mbrojtësi krahu, i transferuar nga Benfica në korrik 2021, u largua nga Arsenal për te Lazio në korrik 2024 me një huazim fillestar që përfshinte edhe detyrimin për blerje.

Nuno Tavares

Marrëveshja, që u bë permanente verën e kaluar për rreth 7.85 milionë euro, përfshinte edhe një klauzolë të rëndësishme të shitjes që do t’i jepte Arsenal një pjesë të fitimit.

Fillimisht u tha se klauzola do të vlente rreth 25% të çdo shume të ardhshme, por burimet italiane pretendojnë se mund të arrijë deri në 35%.

Megjithatë, lojtari portugez ka qenë objekt diskutimesh me klubin arab, Al-Ittihad, dhe mund të largohet nga skuadra e Serie A këtë dimër.

Brooke Norton-Cuffy

Ndërkohë, fituesi i Kampionatit Evropian për grupmoshat U21, Brooke Norton-Cuffy, u largua nga Arsenal për te Genoa në gusht 2024 për një shumë fillestare prej 1.75 milion eurosh, plus rreth 1.75 milion euro bonuse.

Thelbësore është se Arsenal negociuan edhe një klauzolë shitjeje që i garanton një pjesë të fitimit të ardhshëm, i cili nuk është bërë publik.

Si Juventusi, ashtu edhe Interi thuhet se po monitorojnë anglezin, megjithatë nuk ka asnjë garanci që lojtari të largohet në janar pasi Genoa po lufton për mbijetesë./Telegrafi/