Nga Patris Pustina 

Përshkallëzimi i konfliktit mes Iranit dhe Izraelit, i shkaktuar nga vrasja e udhëheqësit iranian Ali Khamenei në një sulm izraelito-amerikan ndaj Teheranit më 28 shkurt, u shoqërua me një vërshim dezinformimi në media dhe rrjete sociale, përfshi ato shqipfolëse.

Faktoje ka verifikuar dhe përgënjeshtruar disa prej tyre në dy javët e fundit. 

Gjeni më poshtë një përmbledhje.

Panik për mbledhje klikimesh

Një numër postimesh u mbështetën në tituj dhe tone sensacionaliste për të bërë shumë zhurmë për asgjë. Për shembull, në një metodë tipike të peshkimit për klikime, faqe në Facebook pretendonin se “Irani nis sulme drejt Evropës. Shumë afër Maqedonisë dhe Shqipërisë,” duke i ftuar përdoruesit e alarmuar të zbulojnë detajet e fundit në një artikull të lidhur në komente. 

Megjithatë, në brendinë e artikullit, zbulohet se bëhej fjalë për dy raketa që Irani lëshoi drejt Qipros, rreth 1340 km larg Shqipërisë, në vijë ajrore, ku ka dy baza ushtarake Mbretëria e Bashkuar. 

Vendosmëria për të mbledhur klikime me anë të ngjalljes së panikut qëndron edhe pas një postimi të shpërndarë në mënyrë identike nga dhjetëra faqe në Facebook, që lajmëronte tensionim të situatës pasi “Rusia futet në lojë,” shoqëruar me ftesën e zakonshme për klikime për të mësuar më shumë. Ndërkaq, pasi lexuesi/ja e klikon, ai/ajo zbulon se artikulli citon një deklaratë të Ministrisë së Jashtme ruse që dënon sulmin amerikano-izraelit kundër Teheranit, por nuk përmban asnjë kërcënim, zotim apo insinuatë se Rusia ka ndërmend të përfshihet në konflikt, apo të “futet në lojë”  Përkundrazi, në mënyrë gati ironike, duke marrë parasysh luftën 4-vjeçare në Ukrainë, deklarata përfundon me një thirrje për diplomaci dhe zgjidhje paqësore.

Një tjetër ‘lajm’ që u shpërnda gjerësisht në peizazhin mediatik shqipfolës ishte pretendimi se Irani do të sulmonte bazën e Muxhahedinëve, një grupi opozitar iranian që strehohet në Manëz që në 2018.

Siç Faktoje ka sqaruar në një artikull të mëparshëm, ky pretendim bazohet vetëm në artikullin e një medie azere, i cili citonte një deklarate të fshirë nga një kanal jo-zyrtar. 

Lufta e gjeneruar

Pamjet e gjeneruara me anë të programeve të inteligjencës artificiale (AI) kanë lulëzuar në kontekstin e konfliktit. 

Një sërë mediash dhe faqesh në rrjete sociale qarkulluan pa verifikuar një imazh të gjeneruar me AI si të ishte vërtet një pamje e kufomës së Ali Khamenei nën rrënoja. Kjo paçka faktit se që në sy të parë në imazh spikasin disa gabime logjike. Asnjë nga shpëtuesit nuk duket se ka interes për trupin, por përkundrazi po shikon me vëmendje pllakën e betonit mbi të. Ndërkaq, burri në të djathtë ka hipur mbi pllakën masive të betonit që po shtyp viktimën, duke i shtuar peshën e plotë trupit të tij.

Një video e gjeneruar me AI u shpërnda nga mediat si video reale e sulmit iranian në Aeroportin Ndërkombëtar të Dubait mbrëmjen e 28 shkurtit, megjithëse ajo, gjithashtu, përmbante mospërputhje logjike të dukshme: sjellja e pakuptimtë e njerëzve që rreshtohen përpara sporteleve bosh apo vrapojnë drejt shpërthimit, në vend që të ikin prej tij; njerëzit që sfidojnë ligjet e materies duke kaluar tejpërtej ndarjeve të hekurta, duke u bashkuar me njëri tjetrin, apo zhduken ndërsa ecin; dhe një shkrim i pakuptimtë, megjithëse në stilin e alfabetit arab, që shfaqet në ekranet e mëdhenj.

Një imazh i gjeneruar që dukej se tregonte tre vizatime avionësh luftarakë, njëri prej të cilëve ishte bombarduar, qarkulloi me pretendimin se Shtetet e Bashkuara dhe Izraeli kanë sulmuar siluetat e avionëve luftarakë F-4 Phantom II në një bazë ajrore në Iran, duke pretenduar se kjo ishte një taktikë iraniane për t’i bërë amerikanët dhe izraelitët të shpërdorojnë armë të shtrenjta.

Një video e gjeneruar me pamje shpërthimesh kinematografike në horizontin e një qyteti, qarkulloi gjithashtu në rrjete sociale si pamje të raketave iraniane balistike që godasin Tel Avivin në mars 2026. 

Shmangia e shpërndarjes së pamjeve të gjeneruara me AI si të vërteta nuk është gjithmonë e vështirë apo e komplikuar. Një kërkim pamor me Google Lens, në skedën “About this image” (“Rreth këtij imazhi”) tregon nëse imazhi është etiketuar si “I bërë me Google AI” duke zbuluar një gjurmë SynthID. Një zëdhënës i Google ka thënë për AFP se kur zbulohet një gjurmë SynthID, kjo do të thotë që “imazhi është gjeneruar ose modifikuar me AI.” SynthID, i lançuar nga laboratori DeepMind AI i Google në 2023, identifikon imazhet e gjeneruara me Google AI.

Përdorimi i pamjeve reale që nuk kanë lidhje me konfliktin

Përveç pamjeve të gjeneruara, edhe ato reale, po përdoren për të dezinformuar online, duke u përshkruar si të lidhura me konfliktin kur nuk janë.

Një video që pretendohet se tregon një godinë të Agjencisë Qendrore amerikane të Inteligjencës (CIA) në Dubai të goditur nga raketat iraniane, në të vërtetë tregon një zjarr që shpërtheu në Sharjah, 30 km larg Dubait, në 2015, mbi 10 vite para sulmit iranian në Dubai.

Një video që pretendohet se tregon ushtarë izraelitë që prishin kamerat e sigurisë nëpër rrugë në mënyrë që mos shihen dëmet nga raketat iraniane, në fakt ishte postuar që në 2025 nga policia e Galilesë Perëndimore si pamje nga një aksion për të hequr kamera të jashtëligjshme të vendosura nga kriminelët.

Ndërsa një video që pretendohej se tregonte qytetarë izraelitë që po arratisen nga mali në Mars 2026 nga frika e luftës, gjithashtu qarkullonte në rrjet që në 2025, dhe tregonte një grup njerëzish një mal në Nepal teksa shkonin për të mbledhur një kërpudhë të rrallë dhe të çmuar.

Vdekje të parakohshme dhe deklarata patriotike të rreme

Në rrjete sociale qarkulluan gjithashtu një numër lajmesh të rreme sa i përket vdekjeve të figurave të rëndësishme ushtarake dhe politike izraelite. Komandanti i Forcave Ajrore izraelite Tomer Bar dhe Ministri Izraelit i Mbrojtjes, Yisrael Katz, u bënë vikima të parakohshme të raketave iraniane, megjithëse imazhe dhe artikuj të botuara në mediat vendase dhe ndërkombëtare i tregojnë të dy të gjallë.

Lajmërimet e vdekjes në 28 shkurt dhe 1 mars

Tomer Bar, i pari majtas, dhe Israel Katz, i dyti majtas, në një takim të mbajtur nga Katz, më 2 Mars për të vlerësuar situatën në një bunker të Forcave Ajrore.

Ndërkaq, futbollisti iranian Mehdi Taremi u çua parakohe në luftë nga mediat sportive, paçka faktit se ai ka folur vazhdimisht publikisht për të denoncuar represionin e regjimit të Ajatollahëve dhe agjenti i tij i ka mohuar publikisht pretendimet se Taremi do të linte ekipin grek Olympiacos për të shkuar në luftë për Iranin.

Përfundim

Megjithëse informimi në kohëra konfliktesh përballet me një numër sfidash si pasojë e vetë natyrës së konflikteve, dezinformimi i hasur nga Faktoje në rrjetet sociale dhe peizazhin mediatik shqipfolës kryesisht duket se buron nga mungesa e verifikimit të burimeve apo mendimi bazë kritik. 

The post Nga titujt alarmues tek pamjet e fabrikuara, lufta e rreme që po zhvillohet online appeared first on Faktoje.al.

Pretendimi: Kjo video tregon raketa iraniane duke goditur qytetin izraelit Tel Aviv

Verdikti: E pavërtetë, Video e gjeneruar

———————————————————

Një video që po qarkullon në rrjete sociale, përfshi ato shqipfolëse, pretendohet se tregon goditjen e qytetit izraelit Tel Aviv nga raketat iraniane.

Megjithëse Teherani kreu sulme ndaj Izraelit, përfshirë Tel Avivin, pasi sulmet ajrore të përbashkëta SHBA-Izrael më 28 shkurt vranë Udhëheqësin Suprem të Iranit, Ajatollah Ali Khamenei, kjo video nuk tregon ndonjë nga këto sulme.

Siç dëshmohet nga mbishkrimi “ARKIVAT E FORCAVE TË ARMATOSURA //PAMJET E RENDERIZUARA”, ajo është një simulim i gjeneruar nga kompjuteri.

“Pamjet e renderizuara” është një term që i referohet procesit të konvertimit të pamjeve video të papërpunuara ose imazheve të gjeneruara nga kompjuteri në një format video përfundimtar.

Pamje të vërteta nga sulmet, të botuara nga mediat vendase dhe ndërkombëtare, nuk përputhen me renderizimin dramatik që shihet në videon që po qarkullon në rrjete sociale.

Një shpërthim i shkaktuar nga një goditje me predhë pasi Irani lëshoi ​​raketa në Izrael në Tel Aviv, Izrael, më 28 shkurt. REUTERS/Gideon Markowicz

The post I gjeneruar ky sulm shkatërrimtar në qendrën ekonomike të Tel Aviv appeared first on Faktoje.al.

Pretendimi: Kjo video tregon qytetarë izraelitë që po arratisen nga mali nga frika e luftës

Verdikti: Mungon konteksti

———————————————————

Një video që ka marrë mbi 700 pëlqime në Facebook pretendohet se tregon qytetarë izraelitë që po arratisen nga mali në mars 2026 nga frika e luftës me Iranin.

Me anë të motorrit të kërkimit Google Lens, Faktoje gjeti se video e mësipërme është publikuar, ndër të tjera, në 17 qershor 2025 në X/Twitter me mbishkrimin “Refugjatë iranianë po arratisen në Afganistan.”

Megjithatë, video qarkullon në rrjet që nga 1 qershori 2025. Ajo është postuar nga llogari Instagrami të bazuara apo që flasin për Nepalin. 

Sipas përshkrimeve të videove, njerëz nga Dolpa dhe rrethet fqinje në Nepal janë duke udhëtuar nëpër livadhet alpine për sezonin e korrjes së Yarsagumba.

Me anë të Google Lens, Faktoje gjeti edhe një artikull mbi Yarsagumba, një kërpudhë shumë e vlerësuar, në Nepal, që përfshinte një foto nga e njëjta vendndodhje.

Si përfundim, video që po qarkullon online nuk tregon izraelitë duke iu arratisur luftës në mars 2026, por një grup njerëzish që po nisen në një mal në Nepal për të mbledhur një kërpudhë të rrallë dhe të çmuar.

The post E rreme kjo video e izraelitëve që po arratisen nga mali nga frika e luftës appeared first on Faktoje.al.

Vetëm dy orë pas vendimit të Kuvendit kundër kërkesës së SPAK, një video nga një takim i paqartë mes kryeministrit Rama dhe ambasadores amerikane në Athinë u shpërnda me shpejtësi në media, duke dominuar portalet dhe emisionet ‘prime time’. Analistët e shohin këtë si një manovër për të zhvendosur vëmendjen nga ngjarja kryesore.

Esmeralda Topi 

Vendimi i Kuvendit për të mos hequr imunitetin e Belinda Balluku ishte pa dyshim ngjarja kryesore politike e ditës së djeshme. Mazhoranca socialiste votoi kundër kërkesës së SPAK për heqjen e imunitetit të zëvendëskryeministres dhe ministres së Infrastrukturës, Belinda Balluku. Vendimi shkaktoi reagime të menjëhershme nga ndërkombëtarët të cilët shprehën shqetësim për qëndrimin e shumicës parlamentare.

Por pa u bërë ende dy orë nga ky zhvillim, një tjetër temë nisi të pushtonte hapësirën mediatike.

Një video e servirur si “ekskluzive” e publikuar nga një televizion kombëtar shoqëruar me tekstin e një “vizite misterioze” në Kryeministri. Sipas materialit të transmetuar, në ambientet e godinës shihej të hynte Kimberly Guilfoyle, ambasadorja e Shteteve të Bashkuara në Athinë, e cila pritej nga kryeministri Edi Rama.

Televizioni raportonte se pamjet ishin xhiruar rastësisht nga një telefon celular në zonën e parkut të Piramidës dhe kishin mbërritur në redaksinë e tij. Videoja tregonte momentin e takimit mes kryeministrit dhe diplomates amerikane.

Në tekstin shoqërues nënvizohej se vizita nuk ishte njoftuar zyrtarisht dhe se Kryeministria nuk kishte pranuar ta komentonte takimin. Po ashtu, as Ambasada Amerikane nuk kishte bërë ndonjë njoftim publik për këtë vizitë.

Pak më vonë, e njëjta video dhe pothuajse i njëjti tekst u shpërnda si “ekskluzivë” edhe në disa televizione të tjera. Brenda pak orësh, pamjet u bënë virale në portale dhe në rrjetet sociale. Në shumë media online fokusi nuk ishte më vetë takimi, por detajet dytësore.

 “Me mini-fund dhe taka të larta në zyrën e Ramës”, shkruanin disa portale, duke komentuar veshjen e ambasadores amerikane në pamjet e publikuara. “Veshja ‘e papërshtatshme’ e kryediplomates së SHBA-së në Athinë, i shkon Ramës në zyrë me minifund provokues”- shkruante një tjetër. 

Videoja mori hapësirë edhe në emisionet prime time televizive, ku megjithëse tema kryesore ishte votimi për Ballukun, një pjesë e mirë e diskutimit u përqendrua te takimi i paqartë dhe deri te komentet jo etike për veshjen e ambasadores. 

Në këtë mënyrë, një video e shkurtër nga një takim i paqartë për nga natyra dhe qëllimi u kthye brenda pak orësh në një nga temat më të diskutuara të ditës. Faktoje pyeti Agjencinë për Media dhe Informim pranë Kryeministrisë për qëllimin e takimit.
“Nuk kemi asnjë koment për këtë temë”, tha shkurt MIA për Faktoje.

Mirëpo disa sqarime i dha kryeministri Edi Rama në një konferencë për shtyp. I pyetur nga gazetarët, Rama tha se takimi me diplomaten amerikane përfshiu çështje me interes të lartë për rajonin.

“Për të diskutuar për disa çështje që janë çështje të interesit të lartë amerikan në këtë rajon, që kanë të bëjnë me energjinë, që kanë të bëjnë me bashkëpunimin rajonal dhe qasjen ndaj forcave të treta, aktorëve të tretë”, u shpreh Rama.

“Kini parasysh që ambasadorja e SHBA në Athinë është një përfaqësuese botërisht e njohur në politikën amerikane, drejtëpërdrejtë e rrethit të ngushtë vendimmarrës të Trump,” përfundoi ai. 

“Shmang vëmendjen”

Analistët ofrojnë interpretime të ndryshme mbi momentin dhe mënyrën se si videoja u bë pjesë e debatit publik. Nga perspektiva e studimeve të komunikimit, pedagogu Erlis Cela thekson se koha e publikimit të një informacioni luan një rol vendimtar në mënyrën se si strukturohet vëmendja e publikut brenda ciklit të lajmit. 

“Në teoritë e komunikimit theksohet se media dhe aktorët politikë ndikojnë jo vetëm për çfarë mendon publiku, por edhe se cilat tema bëhen dominante në një moment të caktuar. Kur një video apo informacion publikohet në një moment kur një zhvillim tjetër politik po dominon diskursin publik, ai shpesh funksionon si një mekanizëm për të zhvendosur fokusin e debatit,” shpjegon ai.

Cela thekson gjithashtu se ky fenomen mund të kuptohet përmes konceptit të media events, ku një ngjarje ndërpret rutinën e zakonshme të lajmeve dhe tërheq vëmendjen e publikut. 

“Edhe videoja e takimit të kryeministrit me ambasadoren amerikane, apo episode të ngjashme që shpërndahen në momente kritike, mund të krijojnë një ‘mini-event’, që tërheq interesin e mediave dhe të publikut. Momente të tilla ndikojnë në ndërtimin e asaj që në studimet e medias quhet ‘qendra e ndërmjetësuar’ e debatit publik, pra momentin kur media përcakton se cila çështje konsiderohet tema kryesore e ditës,” shpjegon ai.

Analistët e tjerë e shohin shpërndarjen e kësaj videoje si një mënyrë për të zhvendosur fokusin nga ngjarja kryesore politike e ditës. 

 “Video është lëshuar për të shmangur vëmendjen. Nuk ka lidhje me politikën; zonja ka ardhur privatisht, jo si ambasadore”,  thotë Neritan Sejamini për Faktoje.al. 

Ndërkohë, pedagogu i komunikimit politik Ermal Hasimja tregohet më i rezervuar për të komentuar vetë takimin, duke theksuar mungesën e informacionit zyrtar mbi rrethanat dhe qëllimin e tij.

“Nuk dihet ende asgjë e sigurt për takimin. Çdo koment do të ishte spekulim i pastër”, u shpreh Hasimja.

Megjithatë, sipas tij, në politikën shqiptare është një praktikë e njohur që aktorët politikë të kërkojnë të shfaqen pranë figurave ndërkombëtare, për shkak të nivelit të besueshmërisë që këto figura kanë në publik.

“Është e qartë që politika shqiptare gjuan foto e video me ndërkombëtarë sa herë i jepet rasti, madje edhe investon fuqimisht për to edhe përmes kompanive lobuese. Në kushtet kur besueshmëria e votuesve te partitë është shumë e ulët dhe ajo e ndërkombëtarëve shumë më e lartë, politikanët rreken ta asociojnë veten me burime të besueshme për të aluduar mbështetje”, shpjegon ai.

Pavarësisht interpretimeve të ndryshme, një fakt mbetet i qartë brenda pak orësh, fokusi i debatit publik u zhvendos nga votimi në Kuvend për kërkesën e SPAK te një video nga një takim diplomatik i veshur me mister. Në epokën e mediave sociale dhe të ciklit të shpejtë të lajmeve, shpesh jo vetëm ngjarja, por edhe momenti kur publikohen pamje apo informacione të reja, mund të ndikojë drejtpërdrejt në atë që do të dominojë diskutimin publik të ditës.

The post Videoja “ekskluzive” që zhvendosi fokusin e medias nga votimi për Ballukun  appeared first on Faktoje.al.

Deklaratë e përbashkët mbi projektvendimin për ndryshime në Rregulloren e Kuvendit të Shqipërisë

The post Shoqëria civile i kërkon Kuvendit të mos cenojë transparencën, shqyrtimin parlamentar dhe konsultimin publik në procedurat e përshpejtuara për legjislacionin e integrimit appeared first on Faktoje.al.

Pretendimi: Kjo video tregon ushtarë izraelitë që prishin kamerat e sigurisë nëpër rrugë në mënyrë që mos shihen dëmet nga raketat iraniane në mars 2026

Verdikti: Mungon konteksti

———————————————————-

Në mars 2026, ndërsa Irani dhe Izraeli shkëmbejnë sulme raketash, në rrjetet sociale shqipfolëse po qarkullon një video që pretendohet se tregon ushtarë izraelitë që prishin kamerat e sigurisë nëpër rrugë në mënyrë që mos shihen dëmet nga raketat iraniane.

Me anë të motorit të kërkimit Google Lens, Faktoje gjeti se video e mësipërme është postuar fillimisht në tetor 2025 në Instagram nga policia e Galilesë Perëndimore, rajoni verior i Izraelit i njohur si Galilmaravi.

Sipas përshkrimit që shoqëron postimin, ky ishte një operacion që shënjestronte instalimin e kamerave nga organizatat kriminale. “Policia nga stacioni i Galilesë Perëndimore vazhdon të çmontojë kamerat e instaluara nga organizatat kriminale”, thuhet në postim.

Operacione të ngjashme janë raportuar nga një media vendase izraelite. Në vitin 2024 dhe në vitin 2025, ajo raportoi operacione kundër trafikimit të drogës ose aktiviteteve të tjera kriminale në të cilat u çmontuan pajisjet e mbikëqyrjes të vendosura nga kriminelët.

Policia e Galilesë Perëndimore ka ndarë edhe video të tjera të këtyre operacioneve, më e fundit në shkurt 2026, të cilat tregojnë se policia hoqi gjashtëmbëdhjetë kamera të vendosura në mënyrë të paligjshme nga kriminelët që “shkelin hapësirën publike dhe ndikojnë në sigurinë dhe privatësinë e banorëve”.

Kështu, video e mësipërme është postuar në rrjet që në 2025, dhe nuk ka se si të tregojë përpjekjet e ushtrisë izraelite për të fshehur dëmet që mund të kenë shkaktuar raketat iraniane të nisura si hakmarrje ndaj sulmeve amerikano-izraelite në mars 2026.

The post Heqja e kamerave në Izrael jo për të fshehur dëmet nga dronët iranianë appeared first on Faktoje.al.

Sebi Alla Pak minuta pasi Parlamenti rrëzoi kërkesën e SPAK për dhënien e autorizimit për arrestimin e ish-zëvendëskryeministres dhe ministres së Infrastrukturës, Belinda Balluku, Komisioni Europian reagoi ekskluzivisht për Faktoje.al, duke ngritur shqetësimin dhe nevojën që: “SPAK të kryejë në mënyrë efektive punën e tij”.

“Bashkimi Evropian është në dijeni të rezultatit të votimit të sotëm në Parlamentin e Shqipërisë. Angazhimi ndaj shtetit të së drejtës dhe lufta kundër korrupsionit janë të një rëndësie thelbësore për procesin e anëtarësimit në BE.

Sigurimi i një mjedisi të përshtatshëm që SPAK të kryejë në mënyrë efektive punën e tij është thelbësor për të mbështetur në mënyrë të besueshme progresin e Shqipërisë drejt anëtarësimit në Bashkimin Evropian”, tha Komisioni Evropian për Faktoje.al.

Rrëzimi i SPAK në Parlament

E sigurt për refuzimin e kërkesës së SPAK, për arrestimin e saj, Belinda Balluku nuk preferoi të ishte në sallën e Parlamentit kur do votohej për të me vetëm dy mundësi: “pro, ose kundër kërkesës së Prokurorisë Speciale”.

Përveç mungesës së Ballukut, nuk ishin të pranishëm as deputetët Elisa Spiropali, Fatmir Xhafaj dhe Blendi Gonxhja.

Me 82 vota kundër, prej të cilave 79 të PS-së dhe 3 të PSD-së, Parlamenti i tha jo kërkesës për dhënie autorizimi për arrestimin e Ballukut. Monitori elektronik fiksoi edhe 47 vota të opozitës pro kërkesës për arrestimin e Ballukut.

Ish-zëvendëskryeministrja dhe Ministrja e Infrastrukturës dhe Energjitikës akuzohet nga SPAK për “shkelje të barazisë së pjesëmarrësve në ankande ose tendera publikë, në nëntë raste”.

Dy raporte

Pas debatesh të shumta mes mazhorancës dhe opozitës, si në Këshillin e Mandateve dhe Imuniteteve ashtu edhe në sallën e Parlamentit, palët dolën me dy raporte.

Nëpërmjet deputetit Oerd Bylykbashi i cili lexoi raportin, opozita ftoi mazhorancën të votonte pro kërkesës së SPAK. Ndërsa citoi Komisionin e Venecias, deputeti i PD-së tha se imuniteti nuk mund të mbrojë personalisht një deputet nga ndjekja penale.

“Paprekshmëria e deputetit ndodh vetëm kur akuzat janë të motivuara politikisht, ose kur akuzat kanë karakter partiako-politik”, tha Bylykbashi.

Kundërt me opozitën, në raportin e PS-së i cili u lexua nga deputeti Ulsi Manja nuk justifikohej kërkesa e SPAK për arrestimin.

Si “argument” Manja tha se Balluku nuk ka më funksione ekzekutive dhe nuk mund të ndikojë në procesin penal të hapur ndaj saj.

“Deputetja në fjalë nuk ushtron më funksione ekzekutive për shkak të ndryshimeve në kabinetin qeveritar. Për rrjedhojë, masa e pezullimit nga detyra nuk prodhon më asnjë efekt, dhe me këtë linjë arsyetimi, raporti ynë e qartëson edhe narrativën mbi të cilën SPAK ka ndërtuar kërkesën për aplikimin e masave më të rënda të sigurimit personal si rreziku i prishjes së provave, i arratisjes apo kryerjes së një vepre penale, që mbeten thelbësisht hipotetike për sa kohë lidhen me funksionet që ajo nuk i ushtron më”, tha ai.

Reagimet nga ambasadat

Fillimisht Ambasada Britanike dhe më pas ajo e Gjermanisë dhe Holandës dolën me deklarata zyrtare ku kërkuan që imuniteti parlamentar të mos bëhet pengesë për sistemin e drejtësisë.

“Ekzekutivi, Gjyqësori dhe Legjislativi mbeten partnerë të barabartë në mbështetjen e këtij progresi si pjesë e qëllimit të Shqipërisë për arritjen e anëtarësimit në BE. Ndërsa imuniteti parlamentar duhet të mbrojë proceset demokratike, ai nuk duhet të jetë pengesë për llogaridhënie të barabartë para ligjit”, shkruan Ambasada Britanike.

Në të njëjtën linjë ishte edhe qëndrimi i Ambasadës gjermane në Tiranë. “Pritshmëria jonë e qartë është që edhe në këto raste ndjekja penale përmes drejtësisë të mund të realizohet shpejt dhe pa pengesa. Prej politikës shqiptare vazhdon të kërkohet ende që ta garantojë këtë proces”, shkruan ndër të tjera ambasada gjermane.

“Holanda mbështet integrimin e Shqipërisë në Bashkimin Europian, në përputhje me dëshirën e popullit shqiptar. Një kërkesë kyçe për përparimin në këtë proces të bazuar në meritë është ndjekja efektive penale e korrupsionit, përfshirë edhe në nivelet më të larta”, shkruan Ambasada e Holandës në Tiranë

Rama dhe Berisha

Kryeministri Edi Rama gjatë leximit të raporteve lëvizi disa herë nga vendi dhe në fund bashkoi votat me deputetët socialist dhe ata të PSD-së për të rrëzuar kërkesën e SPAK. Të vetmin qëndrim e mbajti në rrjetet sociale, duke iu përgjigjur deklaratave të ambasadave.

“Kjo shumicë qeverisëse e ka mendjen të ndarë dhe busullën të palëvizshme: Shqipëria 2030 në Bashkimin Europian. Reforma në Drejtësi nuk kthehet mbrapa, pavarësia e gjyqësorit nuk preket dhe mbështetja për SPAK-un mbetet e palëkundur”, shkruajti Rama në rrjetet sociale.

Qëndrim të ashpër mbajti kreu i PD-së Sali Berisha, ku edhe pse kishte thirrur protestë, nuk pati asnjë incident në ditën finale kur votohej për kërkesën e SPAK për dhënien e autorizimit për arrestimin e Ballukut.

“…sot Edi Rama, kreu i organizatës kriminale, shënoi vetëvrasjen e tij politike. Shënoi fundin e tij politik. Firmosi të drejtën e shqiptarëve për ta nxjerrë me të gjitha mjetet nga pushteti i tij i krimit”, tha Berisha, ndërsa lajmëroi se protesta kombëtare e PD-së do të mbahet më 22 Mars.

The post Balluku ruan imunitetin, Brukseli për Faktoje: SPAK të kryejë në mënyrë efektive punën e tij appeared first on Faktoje.al.

Pretendimi: Teknologjia MedBed eleminon diabetin

Verdikti: E paprovuar

——————————————————————-

Shtretërit mjekësorë çudibërës, të quajtur ‘medbeds’, vijojnë të ngërthejnë imagjinatën në rrjetet sociale. Së fundmi, në rrjetet shqipfolëse, po qarkullon pretendimi se “teknologjia medbed” eleminon diabetin duke “rikalibruar pankreasin.”

“Shtretërit mjekësorë”, në anglisht “medbeds”, janë një koncept që e ka origjinën tek ndjekësit e teorisë konspirative QAnon, sipas së cilëve, medbeds janë zhvilluar nga ushtria (në disa versione duke përdorur teknologji aliene) dhe janë duke u përdorur tashmë nga familjet më të pasura dhe të fuqishme në botë. Sipas besimtarëve, shtretërit mjekësorë janë teknologji që mund të shërojnë ADN-në, të rigjenerojnë organet dhe të kthejnë rininë. Sipas disa ndjekësve, kur Donald Trump do të bëhet president do të zbulonte ekzistencën e këtyre pajisjeve dhe do t’i bënte falas për gjithë amerikanët.

Nuk ka asnjë literaturë nga komuniteti mjekësor global që thotë se një pajisje e tillë ekziston. As shkenca për të krijuar një pajisje të tillë, e cila tingëllon sikur ka dalë nga ndonjë film fantastiko-shkencor, nuk ekziston. Nuk ka asnjë mënyrë të njohur për të kthyer pas plakjen.

Diabeti mellitus (DM) një sëmundje kronike, e cila shfaqet kur pankreasi nuk prodhon aspak ose prodhon një sasi të pamjaftueshme insuline, karakterizohet nga hiperglicemia (rritja e sheqerit në gjak), si rezultat i sasisë së pamjaftueshme ose absolute të insulinës (një ndër hormoneve kryesore që prodhon pankreasi). Vlerat normale të sheqerit në gjak janë nga 70-110 mg/dl. Për një person me diabet, vlerat e sheqerit 2 orë pas buke, duhet të jetë > 140 mg/dl. Diabeti është një sëmundje që prek një numër të madh personash në të gjithë botën.

Studimet e kryera së fundmi tregojnë se nuk ka një kurë për diabetin deri më tani, por vetëm trajtime për ta mbajtur nën kontroll.

Terapitë dhe stili i jetesës mund të ndikojë në reduktimin e efekteve të diabetit te njeriu. Aktualisht nuk ekziston një kurë për diabetin, por sëmundja mund të shkojë në remision. Kur diabeti kalon në remision, kjo do të thotë se trupi nuk shfaq asnjë shenjë diabeti, megjithëse sëmundja teknikisht është ende e pranishme.

Teoria konspirative e medbeds “shërben për dy qëllime profetike”, tha për The Daily Beast Sara Aniano, nga Universiteti Monmouth, që studion retorikën e së djathtës ekstreme dhe ka dokumentuar përhapjen e mitit të medbeds.

Nga njëra anë ajo premton një të ardhme të afërt në të cilën kompanitë e mëdha farmaceutike janë të panevojshme. “Pastaj sigurisht që është tërheqja më e dukshme e të paturit një makineri magjike, versionet e së cilës mund të të diagnostikojnë menjëherë ose të të shërojnë menjëherë”, tha Aniano. “Disa mund të rrisin përsëri pjesë të humbura të trupit. Pra, padyshim, ka shumë shpresë që i shërben një narrative shumë tërheqëse për ata që e besojnë këtë.”

Kjo teori konspirative është shfrytëzuar nga persona të ndryshëm për të mashtruar besimtarët që shpresojnë në aftësitë çudibërëse të këtyre pajisjeve për të shëruar probleme të rënda shëndetësore. 

Tesla BioHealing, është një nga kompanitë e shumta që shet atë që ata e përshkruajnë si “medbed”, ndonjëherë për dhjetëra mijëra dollarë. Kjo kompani ofron medbed për shtëpinë në vlerën e 19,999 dollarëve, megjithëse një orë në një nga dhomat e tyre të motelit me medbed do t’ju kushtojë vetëm 160 dollarë.

Edhe pse kompani të tilla listojnë një sërë sëmundjesh që pretendojnë se mund të ndihmohen nga teknologjitë e tyre dhe ofrojnë dëshmi nga klientët e kënaqur, ato sigurohen gjithashtu të thonë se produktet e tyre nuk kanë për qëllim të zëvendësojnë trajtimet nga një mjek i kualifikuar, një mënyrë për t’u ruajtur nga paditë e mundshme që përdoruesit mund të sjellin kundër tyre kur shtrati çudibërës të rezultojë jo aq i plotfuqishëm sa shitet.

Faktoje ka përgënjeshtruar dhe më parë pretendime lidhur me medbeds dhe një sërë këshillash dhe kurash të rreme që kanë qarkulluar online për të kuruar diabetin.

The post Diabeti nuk mund të shërohet me shtretërit çudibërës MedBed appeared first on Faktoje.al.

Pretendimi: Maldivet ndërpresin të gjitha lidhjet me Izraelin dhe ndalojnë të gjitha produktet izraelite.

Verdikti: Mungon konteksti

——————————————————

Në mars 2026, ndërsa Irani dhe Izraeli shkëmbejnë sulme raketash, në rrjetet sociale shqipfolëse nisi të qarkullonte pretendimi se Maldivet ndërprenë të gjitha lidhjet me Izraelin dhe ndaluan të gjitha produktet izraelite.

Ky lajm teknikisht është i vërtetë, por është mbi 50 vite i vjetër.

Ndërsa marrëdhëniet diplomatike midis dy vendeve janë pezulluar që nga viti 1974, Maldivet ndaluan importin e mallrave izraelite pothuajse 12 vjet më parë, në 2014. 

Në vitin 2024, vendi me shumicë myslimane iu bashkua një çështjeje gjyqësore ndërkombëtare që akuzonte Izraelin për kryerjen e gjenocidit kundër palestinezëve gjatë luftës në Gaza.

Një zëdhënës i Zyrës së Presidentit të Maldiveve tha për Reuters: “Maldivet vendosën marrëdhënie diplomatike me Izraelin në vitin 1965. Këto marrëdhënie u ndërprenë në vitin 1974 dhe marrëdhëniet diplomatike kanë mbetur të pezulluara që atëherë.”

Ndërkohë, arkipelagu në Oqeanin Indian i njohur zyrtarisht si Republika e Maldiveve, vendosi një ndalim për importin dhe shitjen e të gjitha mallrave të prodhuara në Izrael më 26 korrik 2014, sipas një njoftimi për shtyp të Zyrës së Presidentit. Vendi ndaloi hyrjen për mbajtësit e pasaportave izraelite në vitin 2025.

The post Maldivet ndërprenë lidhjet me Izraelin, por disa dekada me parë appeared first on Faktoje.al.

Për vitin 2025, Struktura e Posaçme kundër Korrupsionit dhe Krimit të Organizuar, (SPAK) ka arritur të bllokojë pasuri të konsiderueshme të zyrtarëve të lartë të hetuar për korrupsion, por vetëm një pjesë e vogël ka kaluar përfundimisht në pronësi të shtetit, duke treguar diferencën mes pasurive të bllokuara dhe atyre të provuara ligjërisht përmes vendimit të formës së prerë

Në raportin e saj vjetor të punës depozituar në Kuvend, SPAK njofton se për veprën penale të korrupsionit ndaj zyrtarëve të lartë u sekuestruan pasuri me vlerë rreth 1.1 milion euro, ndërkohë ato të konfiskuara janë rreth 100,000 euro.

SPAK thotë në raportin vjetor se intensifikoi luftën kundër korrupsionit duke njoftuar rritje të hetimeve me (+17.7%), procedime të reja ndaj zyrtarëve të lartë, 18 (nga 30 nën hetim) janë dërguar në gjykatë ndërsa 10 janë dënuar me vendim të formës së prerë

Procedimet

Në vitin 2025, SPAK hetoi 27 procedime (të mbartura dhe të regjistruara rishtazi) me 30 zyrtarë të lartë (nën hetim/të pandehur) për korrupsion.

Hetimet , sipas SPAK, zbuluan korrupsion të strukturuar në prokurime, legalizime pronash, polici dhe dogana, ku zyrtarët favorizonin procedurat për përfitime monetare, manipulonin dokumentet dhe shmangnin kontrollet, duke cenuar konkurrencën dhe transparencën.

Bien kallëzimet nga politika

SPAK vëren se bashkëpunimi institucional për hetime të filluara me referime nga Policia e Shtetit u rrit me rreth 70%, ndersa nga institucionet publike me rreth 15%.  Por vërehet gjithashtu se kallëzimet nga subjektet politike dhe personat juridikë kanë ranë përkatësisht me rreth 50% dhe 75%.

“Arresti me burg”

SPAK ka nje përgjigje edhe për debatin që po mëshon kryeministri Edi Rama lidhur me numrin e lartë të masës së sigurimit “arrest më burg”

SPAk njofton se përdorimi i “arrestit me burg” ra me rreth 53.4%, duke u zhvendosur drejt masave alternative. Lidhur me korrupsionin (për vitin 2025) kjo masë zë vetëm 3.45% të personave nën hetim (nga 5% në 2024), ndërsa për krimin e organizuar 21.4% (nga 31% në 2024).

Sfidat

SPAK njofton se përballet me sfida në hetimin e krimit të organizuar dhe korrupsionit në nivele të larta, ku gjithashtu retorika politike e mediatike, sipas saj, mund të ndikojë në perceptimin publik dhe mund të shërbejë si factor nxitës për rritjen e kërcënimeve nga krimi i organizuar.

Prokuroria e Posaçme vëren gjithashtu ndër radhë se ndërhyrjet ligjore apo institucionale që kufizojnë pavarësinë e tij do të përbënin rrezik serioz për funksionin kushtetues të SPAK dhe shtetin e së drejtës.

The post SPAK për 2025: 1.1 mln euro pasuri të sekuestruara të zyrtarëve të lartë vetëm 100 mijë të konfiskuara appeared first on Faktoje.al.

Pretendimi: Këto imazhe tregojnë tre burra algjerianë që u arrestuan pasi u maskuan si dele për të kaluar kufirin në Spanjë

Verdikti: E pavërtetë, Gjeneruar me AI

——————————————————————–

Në mes të shkurtit 2026, në rrjetet sociale shqipfolëse nisën të qarkullonin imazhe të tre burrave të veshur si dele, që pretendohet se ishin 3 algjerianë, të cilët u arrestuan teksa përpiqeshin të kalonin kufirin në Spanjë të maskuar si dele.

Një kontroll i lajmeve ndërkombëtare dhe njoftimeve zyrtare nga autoritetet algjeriane, policia spanjolle dhe Europol tregon se nuk ekziston asnjë rast i raportuar për persona të maskuar si dele që tentuan të hynin në Spanjë. Një episod i tillë nuk figuron as në bazat e të dhënave të mediave ndërkombëtare dhe nuk ka asnjë deklaratë të institucioneve ligjzbatuese që e mbështet historinë.

Më 27 janar 2026, Spanja miratoi një plan për të legalizuar qëndrimin e rreth 500 mijë migrantëve pa dokumente.

Në vitin 2025, Rruga Perëndimore Mesdhetare u bë pika kryesore e hyrjes së Spanjës, me më shumë se 19,400 mbërritje, sipas Qendrës së Migracionit të Përzier. Nisjet nga Algjeria dominuan rrugën, pavarësisht se ky vend nuk ndan një kufi tokësor me Spanjën. Qindra njerëz vdesin ose zhduken çdo vit në këtë rrugë për shkak të kushteve të vështira dhe anijeve të papërshtatshme për lundrim.

Në gusht 2025, Europol raportoi përpjekjet e autoriteteve spanjolle për të shkatërruar një rrjet kontrabande që sillte migrantë nga Algjeria në Spanjë me anije.

Megjithatë, imazhet që pretendojnë të tregojnë tre algjerianë me kostume delesh janë të gjeneruara nga programe kompjuterike me inteligjencë artificiale (AI).

Në imazhin e gjunjëzuar, maskat e deleve duken jashtëzakonisht të gjalla.

Në imazhin tjetër, vetëm burri i parë ka një bri, i cili është më i gjatë dhe me formë të ndryshme. Dora e burrit të mesëm është gjithashtu e paplotë, duke u bashkuar në mënyrë të panatyrshme me krahun e burrit të tretë.

Vlen të përmendet se dy koka kostumesh që ngjajnë me lodra prej pelushi ndodhen në tokë, megjithatë vetëm një nga treshja e arrestuar është i pamaskuar në imazhin që i tregon ata në këmbë.

Uniformat e policisë gjithashtu ndryshojnë ngjyrë midis imazheve, blu në njërën dhe jeshile të errët në tjetrën. Përveç kësaj, gishtat e oficerëve duken të deformuar në të dyja imazhet, një defekt i zakonshëm në pamjet e gjeneruara nga inteligjenca artificiale.

Fakotje ka përgënjeshtruar dhe më parë një imazh që pretendonte se tregonte tre burra të maskuar si dele që të kalonin kufirin në Spanjë.

The post Një trillim ky maskim si dele i emigrantëve algjerianë në kufirin spanjoll appeared first on Faktoje.al.

The post Durrës, 76 familje pasiguri me fadromat mbi kokë appeared first on Faktoje.al.

Pretendimi: Kjo video tregon pamje të raketave iraniane balistike që godasin Tel Avivin në mars 2026

Verdikti: E pavërtetë, Gjeneruar me AI

———————————————————–

Në rrjete sociale, përfshi ato shqipfolëse, po qarkullon një video që pretendohet se tregon goditjen e qytetit izraelit Tel Aviv nga raketat iraniane. Pamjet shfaqin rënien në formë breshëri të dhjetra raketave në të njëjën zonë të mbushur me kulla të larta të një qyteti.

Ne videon e mësipërme vihen re disa mospërputhje. Elemente të videos, si format e pazakonta të ndërtesave dhe makinave, ngrenë dyshime se videoja është krijuar duke përdorur programe kompjuterike të inteligjencës artificiale (AI). Përveç kësaj, videoja përmban gabime vizuale që janë tipare të zakonshme të videove të inteligjencës artificiale, duke përfshirë përfaqësime të ekzagjeruara dhe joreale të lëvizjes së raketave, dendësisë së tymit dhe natyrës së shpërthimit. Ndër më të dukshmet janë edhe shtrembërimet në panelet diellore të instaluara nëpër tarraca, automjetet me përmasa dhe detaje të paqëndrueshme, si dhe përsëritja pothuajse identike e ballkoneve dhe dritareve në apartamente të ndryshme.

Disa nga makinat në video duken të paplota, ndërsa të tjerat duken të ngjitura së bashku ose të shtrembëruara.

Për më tepër, dy vinça ndërtimi shfaqen mbi njërën nga ndërtesat vetëm kur videoja fokusohet në zonën e goditjes.

Nga ana tjetër, në plan të parë të videos, një flamur izraelit është i dukshëm në një ballkon, i kthyer nga brenda në vend që të jetë jashtë, siç do të ishte tipike. Flamujt shpesh shfaqen në përmbajtjen e gjeneruar nga inteligjenca artificiale kur kërkesa fillestare përmban emrin e një vendi, pasi kjo është një mënyrë e thjeshtë që inteligjenca artificiale ta përfaqësojë atë.

Në fakt, me anë të motorrit të kërkimit pamor Google Lens, Fakotje gjeti se video ishte postuar fillimisht në Instagram nga një llogari e cila e ka etiketuar videon si të krijuar me AI.

The post E gjeneruar kjo pamje e bombardimit apokaliptik të Tel Avivit appeared first on Faktoje.al.

Pretendimi: Kjo është një video e botuar në 2026 nga ushtria izraelite, e cila pretendonte se këta ishin avionë luftarakë iranianë të shkatërruar, por rezultoi të ishte një model letre i një avioni luftarak iranian.

Verdikti: Mungon konteksti

————————————————–

Kohët e fundit, përdoruesit e rrjeteve sociale qarkulluan një video që pretendohet se ishte botuar në 2026 nga ushtria izraelite, e cila pretendonte se këta ishin avionë luftarakë iranianë të shkatërruar, por rezultoi të ishte një model letre i një avioni luftarak iranian.

Me anë të motorit të kërkimit pamor Google Lens, Faktoje gjeti se klipi u publikua më 16 qershor 2025, nga ushtria izraelite, e cila tha se tregonte shënjestrimin e dy avionëve F-14 në Aeroportin e Teheranit gjatë konfrontimit ushtarak midis Izraelit dhe Iranit në atë kohë.

F-14, një lloj avioni i nxjerrë nga qarkullimi prej kohësh në Marinën Amerikane, është në shërbim të kufizuar me Forcat Ajrore të Republikës Islamike të Iranit (IRIAF). IDF njoftoi “një sulm ndaj dy avionëve luftarakë F-14 që ndodheshin në një aeroport në Teheran”, duke shtuar se “këta avionë kishin për qëllim të kapnin avionë izraelitë”. Në atë kohë, Irani e hodhi poshtë pretendimin, duke thënë se avionët e shkatërruar ishin vetëm makete.

Sipas kompanive të armëve nga të cilat furnizohen Shtetet e Bashkuara dhe Izraeli, avionët luftarakë modernë kanë një rrjet të sofistikuar sensorësh radarësh elektronikë, termikë dhe të lidhur me rrjetin për të zbuluar objektivat e tyre, në vend të vëzhgimit të drejtpërdrejtë pamor, gjë që u lejon atyre të identifikojnë dhe të godasin me saktësi objektivat nga distanca shumë të gjata.

Megjithatë, çfarë është e sigurt është se video e mësipërme nuk është nga bombardimet e vitit 2026 ndaj Iranit, por të gjysmë viti më parë, në qershor 2025.

The post Izraelitët nuk u gënjyen nga maketet prej letre të avionëve iranianë në 2026 appeared first on Faktoje.al.

Pretendimi: Ky imazh tregon disa vizatime avionësh, nje prej të cilëve është bombarduar

Verdikti: E pavërtetë, Gjeneruar me AI

——————————————————-

Në rrjete sociale, përfshi ato shqipfolëse, po qarkullon një imazh që pretendohet se tregon dy vizatime avionësh luftarakë, njëri prej të cilëve duket se është bombarduar. 

Megjithëse postimi i mësipërm nuk ofron shumë kontekst, një kërkim me motorin pamor Google Lens zbuloi se imazhi ka qarkulluar në rrjet specifikisht me pretendimin se Shtetet e Bashkuara dhe Izraeli kanë sulmuar siluetat e avionëve luftarakë F-4 Phantom II në një bazë ajrore në Iran, duke pretenduar se kjo ishte një taktikë iraniane për t’i bërë amerikanët dhe izraelitët të shpërdorojnë armë të shtrenjta.

Megjithatë, një kërkim pamor me Google Lens tregon se imazhi është etiketuar si “I bërë me Google AI.” Një zëdhënës i Google ka thënë për AFP se kur zbulohet një gjurmë SynthID, kjo do të thotë që “imazhi është gjeneruar ose modifikuar me AI.” SynthID, i lançuar nga laboratori DeepMind AI i Google në 2023, identifikon imazhet e gjeneruara me Google AI.

Ka video reale të sulmeve ajrore dhe detare të ShBA dhe Izraelit ndaj objekteve ushtarake iraniane. 

Sipas kompanive të armëve nga të cilat furnizohen Shtetet e Bashkuara dhe Izraeli, avionët luftarakë modernë kanë një rrjet të sofistikuar sensorësh radarësh elektronikë, termikë dhe të lidhur me rrjetin për të zbuluar objektivat e tyre, në vend të vëzhgimit të drejtpërdrejtë pamor, gjë që u lejon atyre të identifikojnë dhe të godasin me saktësi objektivat nga distanca shumë të gjata.

Teknikat e kamuflimit të objekteve ushtarake janë të njohura gjatë Luftës së Dytë Botërore. kur aleatët krijonin tanke dhe avionë që fryheshin me ajër për të mashtruar pilotët nazistë nga ajri. Suksesi i këtyre metodave ishte i garantuar në teknologjinë e kohës, kur mungonin pajisjet moderne dhe vëzhgimi bazohej në aftësitë e shikimit të pilotëve. 

The post I gjeneruar ky bombardimi i avionëve iranianë të vizatuar mbi asfalt appeared first on Faktoje.al.

Pronat e sekuestruara përfshijnë banesa luksoze, toka pranë bregdetit në zona preferenciale, njësi shërbimi, automjete luksoze por edhe aksione.

Nga Anila Hoxha

Në katalogun publik të Agjencisë së Administrimit të Pasurive të Sekuestruara, pasaporta e pasurisë së sekuestruar përshkruan karakterin arkitektonik të një vile të veçantë, që ndodhet nën mbikëqyrjen e shtetit.

Në kompleksin rezidencial buzë detit në Hamallaj, qetësia dhe luksi bashkohen me arkitekturën moderne dhe ndriçimin elegant, duke e bërë këtë pronë një shembull dallues të jetesës në vijën e parë të bregdetit.

Pasuria në fjalë është vendosur nën sekuestro më 23 mars 2023, sipas vendimit nr. 137 të Gjykatës së Posaçme.

Ky vendim e identifikon vilën si pronë të shtetases E.H., bashkëjetuese e ish-zëvendëskryeministrit Arben Ahmetaj.

Ndaj këtij të fundit vijon të jetë në fuqi masa e arrestit në mungesë për akuzat e korrupsionit, pastrimit të parave dhe fshehjes së pasurisë.

(Foto e vilës së bashkëjetueses së Arben Ahmetaj)

Në listën e pasurive të sekuestruara të SPAK , kjo pasuri vlerësohet 26,884,000 lekë

Pasuritë e sekuestruara

Aktualisht, numri i pasurive të vendosura nën sekuestro preventive arrin në 64.

Këto prona dyshohet se kanë origjinë nga veprimtari korruptive, abuzime me tendera dhe shpërdorim detyre.

Sipas hetimeve, ato dyshohen se iu përkasin ish-funksionarëve publikë, familjarëve të tyre, si dhe, persona të afërt apo të bashkëlidhur me ta.

Pronat përfshijnë banesa luksoze, toka pranë bregdetit në zona preferenciale, njësi shërbimi, automjete luksoze por edhe aksione.

SPAK iu përgjigj Faktoje-s duke bërë preventivin e pasurive të bllokuara, të cilave u është dhënë statusi i aseteve nën hetim.

Ky veprim u ndërmor mbasi pas këtyre pasurive, në rrethin e investigimit penal, figurojnë emra zyrtarësh të lartë, ish-kryetarë bashkish, ish-ministra, ish-deputetë dhe drejtorë të institucioneve.

“Për periudhën kohore 21.12.2019 – aktualisht, bazuar në kërkesat e prokurorëve të posaçëm për sekuestrimin e pasurive, Gjykata e Posaçme e Shkallës së Parë kundër Korrupsionit dhe Krimit të Organizuar ka vendosur për sekuestrimin e pasurive të përfituara nga korrupsioni duke sekuestruar përkatësisht: 64 pasuri të paluajtshme, 26 pasuri të luajtshme, 11 subjekte tregtare nga të cilat 7 subjekte të sekuestruar plotësisht dhe kuotat përkatëse të personave nën hetim për 4 subjekte të tjerë”

Prokuroria e Posaçme sqaron gjithashtu për Faktoje se, vlera e llogarive bankare të vendosura nën sekuestro arrin rreth një milion euro

Rezulton se shumica e aseteve të vendosura nën sekuestro preventive ose të konfiskuara kanë burim të paligjshëm, të lidhur me krimin e organizuar. Autorët dhe të dyshuarit e përfshirë lidhen kryesisht me rrjete ndërkombëtare të narkotrafikut.

Agjencia

Gjithsej Agjencia e Administrimit të Pasurive të Sekuestruara dhe të Konfiskuara llogarit se në total, nën mbikëqyrje, janë rreth 3982 pasuri dhe prova materiale, të cilat përfshijnë kryesisht apartamente, njësi shërbimi, toka dhe automjete.

Vlera totale e tyre llogaritet 62 milionë euro. Shumë prej tyre sapo publikohen kane tendencë të jepen me qira.

Agjencia e Administrimit të Pasurive të Sekuestruara dhe të Konfiskuara (AAPSK) sqaron për Faktoje se,  “pasuritë që publikohen/ jepen me qira përfshijnë tipologji të ndryshme, si apartamente banimi, njësi shërbimi, garazhe, magazina dhe hotele”.

Por, deri në publikimin e këtij shkrimi, me përjashtim të pasurive të fituara nga krimi, pasuritë e ish zyrtarëve ende nuk janë dhënë me qira referuar një prej administratorëve të caktuar nga gjykata për kontrollin e tyre

Juristi, Bledar Meminaj, shprehet për Faktoje, se pasuritë e sekuestruara që lidhen me zyrtarë apo ish-funksionarë përfaqësojnë vetëm një pjesë të vogël të aseteve të bllokuara, krahasuar me ato që duhej të ishin zbuluar në tërësi.

“Në dijeninë time përdoren prestanome për identitetin e tyre për të investuar jashtë Shqipërisë në biznese të ndryshme, duke lidhur kontrata besimi apo edhe të firmosura jashtë Shqipërisë për qarkullimin e parave tek emri tjetër që nuk gjurmohet dot”

Pyetjes se si mund të zbulohen pasuritë, avokati Meminaj u përgjigj me shprehjen: “ndiq paranë”.

Megjithatë, ai shtoi se për të ndjekur gjurmët e parasë është e domosdoshme të ekzistojë infrastruktura e duhur institucionale dhe teknike

(Foto e vilës së bashkëjetueses së Arben Ahmetaj)

Fotot

Ndërsa hetimet penale vazhdojnë, paralelisht me to zhvillohen edhe kundërshtimet e përfaqësuesve ligjorë, të cilët kanë vënë në lëvizje Gjykatën Kushtetuese lidhur me pasuritë nën sekuestro preventive.

Ndërkohë, publikimi i të dhënave nga ana e Agjencisë për këto pasuri kufizohet.

Konkretisht nuk bëhen të ditur emrat e pronarëve, por referenca jepet vetëm përmes vendimeve gjyqësore dhe hartave që tregojnë vendndodhjen e tyre.

Njëjtë (si me banesën nën sekuestro preventive pronë e  E.H, bashkëjetuese e ish zv/ kryeministrit Ahmetaj) është edhe prezantimi i një tjetër banese që dyshohet së i përket një ish zyrtari të lartë.

Publikimi i banesës me sipërfaqe 90.8 m2, veranda 61.2 m2, vendndodhja  ”Ujë i Ftohtë , Vlorë”, nuk përfshin emrin e pronarit, por referohet vetëm tek dokumentet gjyqësore dhe hartat që tregojnë vendndodhjen e saj.

Me një mobilim modern, shoqëruar me spote e ngjyra të hapura, një kuzhinë të bardhë kombinuar me elementë druri apo ngjashëm me të, banesa ndodhet në një nga zonat më të pëlqyera të qytetit bregdetar Vlorë.

Vlera e pronës nga Agjencia vlerësohet rreth 9 milionë lekë. Por beteja ligjore nuk ka përfunduar ende, ndaj ky apartament mbetet ende në proces për t’u kaluar në portofolin e shtetit.

Apartamenti në fjalë, dyshohet se i përket  ish- ministrit të Shëndetësisë, Ilir Beqja. Por ky i fundit (Beqja) këmbëngul se nuk ka asnjë lidhje me këtë pronë. 

Avokati i ish-ministrit ka deklaruar më herët se këtë apartament Beqja e përdorte me qira, kontratë që ka përfunduar në vitin 2020.

(Apartamenti në Vlorë, që po hetohet si i lidhur me ish ministrin e Shëndetësisë)

Pasuria është identifikuar nga SPAK në zonën e Lungomares dhe, me vendim gjykate të vitit 2024, ajo iu nënshtrua kontrollit.

Sipas hetimeve, dyshohet se investimet e kryera për mobilimin nuk janë deklaruar nga ish-ministri Beqaj.

SPAK rendit disa fakte që mbështesin këtë dyshim, duke nisur nga kontrata e porosisë, mobilimi i realizuar nga ai dhe bashkëshortja e tij.

Llogaritet se vlera totale e investuar mund të ketë arritur deri në pesë milionë lekë.

Prona mbahet nën sekuestro preventive, pasi ekzistojnë dyshime se origjina e saj është e fshehur.

Si po qarkullon paraja e korruptuar

Avokati Vladimir Meçi shpjegon skemat e qarkullimit të  parave në fushën e korrupsionit.

Sipas tij, hetimi i korrupsionit në nivele të larta është ndër hetimet më të vështira në drejtësinë penale:

“Kjo lidhet me faktin se korrupsioni nuk është një krim që kryhet hapur apo në mënyrë të drejtpërdrejtë, por zakonisht realizohet në mënyrë të fshehtë, përmes ndërmjetësve, marrëveshjeve informale dhe skemave financiare të maskuara”.

“Së pari, këto hetime kërkojnë metoda të avancuara të hetimit financiar, ndërkohë që shpesh organet e hetimit operojnë ende me metodika klasike të hetimit penal. Hetimi i korrupsionit kërkon analizë të transaksioneve financiare, të lidhjeve ekonomike dhe të strukturave të pronësisë që përdoren për të fshehur përfitimet e paligjshme”, thotë avokat Meçi

“Së dyti, – vijon ai, – është pothuajse e pamundur që një zyrtar i lartë të kapet në flagrancë duke marrë përfitimin korruptiv”.

Në shumicën e rasteve përfitimet, sipas avokatit, nuk kalojnë drejtpërdrejt në emrin e tij, por regjistrohen në emër të familjarëve, miqve apo personave të besuar, ose maskohen përmes kompanive dhe investimeve të ndryshme.

Korrupsioni është sofistikuar

Të njëjtin këndvështrim ndan edhe avokati Meminaj, sipas të cilit, korrupsioni ka ndryshuar formë.

“Nëse më herët paratë merreshin nëpërmjet sekserëve, sot nuk merren më dorazi, por merren jashtë vendit, nëpërmjet changeve të ndryshme dhe kthimit në kriptovalutë”, shpjegon Meminaj.

Ai thekson se paratë cash nuk mund të futen në sistemin bankar ndaj dhe, po transferohen në vendet offshore ose parajsat fiskale.

Pasuritë

Mes emrave që u janë konfiskuar pasuri është edhe ish- ministri i Mjedisit, Lefter Koka, ish -deputeti Alqi Bllako, zyrtarë të dosjes “5D”, (pas të cilës dyshohet se fshihen Redi Molla e Mariglen Qato), apo banesa e ish- bashkëshortes së ish- Presidentit Ilir Meta, gjithashtu e përfshirë në katalogun e pasurive të sekuestruara

Monika Kryemadhi akuzohet për korrupsion pasiv të funksionarëve të lartë shtetërorë, pastrim parash dhe mosdeklarim pasurie.

(Banesa e ish -deputetes Monika Kryemadhi nën sekuestro preventive)

Në të njëjtën mënyrë, bazuar në vendimin e sekuestros, është emërtuar edhe një tjetër pasuri, e cila për momentin ndodhet nën bllokim preventiv.

Pasuria i përket çiftit Jamarbër dhe Argita Malltezi.

Jamarbër Malltezi akuzohet për korrupsion pasiv dhe pastrim parash.

(Banesa nën sekuestro J. Malltezi)

SPAK

SPAK detajon se nga 21 dhjetori 2019 Gjykata Antikorrupsion ka pranuar kërkesat për vendosjen e sekuestros ndaj pasurive të ish-zyrtarëve dhe personave të lidhur me ta, pasi dyshohet se ata mund të kenë ndihmuar në fshehjen e origjinës së këtyre pasurive.

“Përgjithësisht, pasuritë të cilat sekuestrohen me vendim të ndërmjetëm, përfundojnë duke u konfiskuar me vendim themeli dhe me vendim të formës së prerë nga gjykatat e posaçme”, shprehet SPAK.

Konfiskimi

Përveç çështjeve që ndodhen ende nën sekuestro preventive derisa të zgjidhen përfundimisht, 23 pasuri të dyshuara se janë përfituar përmes korrupsionit dhe shkeljes së barazisë në tendera i kanë kaluar tashmë shtetit.

SPAK i thotë Faktojes se “për periudhën kohore 21.12.2019 – aktualisht, bazuar në kërkesat e prokurorëve të posaçëm për konfiskimin e pasurive, Gjykata e Posaçme e Shkallës së Parë kundër Korrupsionit dhe Krimit të Organizuar ka vendosur konfiskimin e pasurive të përfituara nga korrupsioni për 20 pasuri të paluajtshme, 2 pasuri të luajtshme dhe 1 subjekt tregtar”

Ndaj dhe, në këtë pikë, avokat Vladimir Meçi insiston se, ” hetimi duhet të nisë nga analiza e pasurisë së zyrtarit”.

 “Duhet të krahasohen të ardhurat e ligjshme të tij me pasurinë reale që ai apo personat e lidhur me të zotërojnë. Kur konstatohet një pasuri që nuk justifikohet me burime të ligjshme, atëherë lind dyshimi për përfitim të paligjshëm”, thotë ai.

Një element tjetër shumë i rëndësishëm, sipas tij, është lidhja e kësaj pasurie me vendimmarrjen publike të zyrtarit, sidomos në procedurat e prokurimit publik, tenderëve apo koncesioneve.

“Shpesh, – vëren avokat Meçi,- përfitimet korruptive lidhen pikërisht me favorizimin e subjekteve të caktuara në këto procese”.

Vështirësia në hetim, sipas avokatit, shtohet edhe nga fakti që pasuritë e paligjshme shpesh fshihen përmes skemave të ndërlikuara financiare, kompanive guackë apo transfertave ndërkombëtare, gjë që kërkon ekspertizë të specializuar dhe bashkëpunim institucional.

“Në thelb, hetimi i korrupsionit nuk duhet të fokusohet vetëm te akti i marrjes së ryshfetit, por mbi të gjitha te gjurma financiare që ky përfitim lë pas. Pikërisht analiza e pasurisë është shpesh çelësi për të zbuluar korrupsionin në nivele të larta”, thotë avokat Vladimir Meçi

The post Nga Ahmetaj tek Kryemadhi, brenda shtëpive të sekuestruara (FOTOT) appeared first on Faktoje.al.

Nga Jona Cenameri

Në korrik 2023, Ministria e Kulturës lajmëroi me entuziazëm “shpëtimin” e ish-godinës së Radio Tiranës.

Në buletinin mujor të ministrisë, projekti i restaurimit paraqitej si sukses. “Shpëtohet ish-Radio Tirana”, shkruhej në titull, duke njoftuar miratimin e projektit nga Këshilli Kombëtar i Trashëgimisë Kulturore Materiale (KKTKM). Por sot, më shumë se 2 vit e gjysmë më vonë, monumenti i kulturës së kategorisë së dytë ende pret restaurimin e premtuar.

Çfarë u tha 

6 korrik 2023 – Deklarata e ish-ministres së Kulturës, Elva Margariti: “Një lajm i mirë për trashëgiminë #kulturore! Ish-godina e Radio Tiranës do të restaurohet! Në mbledhjen e të më së fundit, Këshilli Kombëtar i Trashëgimisë Kulturore Materiale miratoi projektin për restaurimin e këtij objekti, monument kulture i kategorisë II. E ndërtuar midis viteve 1928-1930, ndërtesa e dikurshme e Radio Tiranës dhe më pas e Institutit të Kulturës Popullore është një nga vilat e para moderne në qytet. Aktualisht ajo paraqet dëmtime të shumta në çati, fasadë, dysheme, dyer, dritare, në elemente të brendshme e të jashtëm”

Shkurt 2026 – Realiteti: Mbi 2 vite e gjysmë pas deklaratës, punimet nuk kanë filluar. Edhe pse Bashkia e Tiranës autorizoi nisjen e restaurimit më 13 shtator 2023, ky autorizim kishte vlefshmëri njëvjeçare dhe skadoi në shtator 2024. Pronari nuk ka depozituar asnjë kërkesë për shtyrje afati në sistemin e-leje. Institucionet qendrore si IKTK dhe KKTKM (Këshilli Kombëtar) konfirmojnë se nuk kanë kryer asnjë inspektim zbatimi që prej korrikut 2023.

Projekti

Më 6 korrik 2023, Këshilli Kombëtar i Trashëgimisë Kulturore Materiale miratoi me vendim nr. 381 projektin “Ndërhyrje restauruese në objektin: Instituti i Kulturës Popullore, II-102”, në pronësi të shtetasit R.M. Projekti parashikon restaurimin e elementeve origjinale duke respektuar karakteristikat historike të vilës së ndërtuar midis viteve 1928-1930, si dhe modernizimin me instalimin e një ashensori për personat me aftësi të kufizuara. Investimi total i parashikuar është 28,488,936 lekë (me TVSH).

Në shtator 2023, Bashkia e Tiranës pranoi nisjen e punimeve përmes një shkrese, datë 13.09.2023, duke vendosur një afat një-vjeçar sipas VKM nr. 408/2015.

Pezullimi

Kur u pyetën nga Faktoje.al për ecurinë e projektit, institucionet shtetërore thanë se punimet kanë filluar, por janë pezulluar. Sipas Ministrisë së Kulturës, “punimet filluan por u pezulluan si rezultat i përfundimit të afatit kohor, referuar dispozitave të ligjit nr. 27/2018 ‘Për trashëgiminë kulturore dhe Muzete'”.

Instituti Kombëtar i Trashëgimisë Kulturore (IKTK) sqaron se sipas ligjit, afati është një vit, dhe për të rinisur punimet “nevojitet një aplikim i ri në sistem e-leje me qëllim rifreskimin e vendimit të KKTKM apo rishikimin e afatit”. Pa këtë aplikim formal, punimet nuk mund të vazhdojnë ligjërisht, pavarësisht se projekti mbetet i miratuar në parim.

IKTK dhe Ministria e Kulturës konfirmojnë se nuk janë kryer inspektime nga asnjëra prej këtyre institucioneve pas miratimit të projektit.

Asnjë afat i ri

“Akoma nuk ka afate të reja të miratuara”, thekson Ministria e Kulturës. IKTK shton se “nuk rezulton të ketë ardhur në Sportelin Unik një aplikim ‘Për shtyrje afati të punimeve’ për të njëjtin objekt”.

Kjo do të thotë se që nga shtatori 2024, askush nuk ka aplikuar për rinovimin e lejes apo shtyrjen e afatit. Në një paradoks institucional, IKTK deklaron se monumenti është klasifikuar me “nivel rrezikshmërie nr. 1, që nënkupton se gjendja e objektit paraqitet e mirë”, ndërsa Ministria e Kulturës pranon se “objekti ka nevojë për ndërhyrje restauruese”.

Historiku

Radio Tirana u inaugurua më 28 nëntor 1938, si radiostacioni i parë kombëtar shqiptar, me një transmetues fillestar prej 3 kW. Pas vitit 1944 u riorganizua si institucion qendror i transmetimeve shtetërore. Me krijimin e Televizionit Shqiptar në vitet 1960, radioja u integrua në strukturën e RTSH. Godina e parë e saj, vilë e ndërtuar në vitet 1928–1930 në Tiranë, përfaqëson një nga objektet e hershme moderne të kryeqytetit dhe mbetet sot monument kulture.

Përfundimi

Rasti i ish-Radio Tiranës nxjerr në pah disa probleme strukturore në menaxhimin e trashëgimisë kulturore. Pronari privat nuk ka aplikuar për shtyrje afati që nga shtatori 2024, ndërsa institucionet publike nuk kanë marrë asnjë masë mbikëqyrëse për të parandaluar degradimin e mëtejshëm të ndërtesës. Bashkia e Tiranës ka deklaruar se zona është e “kompletuar” dhe nuk ka planifikuar investime në hapësirat publike përreth godinës.

Mbi një vit e gjysmë pas lajmërimit të “shpëtimit”, monumenti mbetet në të njëjtin status të braktisjes. 

The post Ish-Radio Tirana ende në pritje të restaurimit appeared first on Faktoje.al.

Pretendimi: Kjo video tregon goditjen e një rakete iraniane në një ndërtesë të CIA në Dubai

Verdikti: E pavërtetë

————————————————————-

Që nga sulmi i përbashkët i ShBA dhe Izraelit ndaj Iranit, i cili filloi më 28 shkurt 2026, Irani është përgjigjur me kundërsulme ndaj objektivave në rajonin e Gjirit Persik. Raketat kanë rënë edhe në Dubai. Në rrjete sociale, përfshi ato shqipfolëse, po qarkullon një video që pretendohet se tregon një godinë të Agjencisë Qendrore amerikane të Inteligjencës (CIA) në Dubai të goditur nga këto raketa.

Wshtë e vërtetë se Dubai ka pësuar një sërë sulmesh raketore nga Irani që nga 28 shkurti. Autoritetet thanë se shpërthimet tronditën ishullin artificial Palm Jumeirah të Dubait dhe mbetjet e një droni shkaktuan një zjarr në hotelin luksoz Burj Al Arab.

Megjithatë, video e mësipërme nuk tregon pasojat e sulmeve iraniane në 2026.

Me anë të motorrit të kërkimit pamor Google Lens, Faktoje gjeti se video është filmuar mbi 10 vite më parë.

Një video e ngjashme e kësaj ndërtese në flakë u postua më 1 tetor 2015, në YouTube nga media e Emirateve të Bashkuara Arabe, The National. Përshkrimi i videos thotë se një zjarr shpërtheu në Sharjah, në një kullë banimi në Rrugën King Faisal.

Sipas një artikulli të BBC, të botuar më 1 tetor 2025, një ndërtesë shumëkatëshe banimi në Sharjah të Emirateve të Bashkuara Arabe ishte përfshirë nga flakët, duke ngritur në ajër re tymi të zi të dendur. Artikuj të tjerë lajmesh nga Tetori 2025 përmendin zjarrin që ndodhi në Kullën Nasser. Zjarri u vu nën kontroll pa u raportuar për viktima

Sharjah ndodhet rreth 30 km larg Dubait.

Ndërtesa në Sharjah mund të shihet edhe në Google Maps dhe Street Vieë. Fotot datojnë nga Maji 2015, disa muaj para zjarrit. Kulla Nasser, e dallueshme nga vija blu në anën e ngushtë të ndërtesës, dhe ndërtesa më e vogël me ngjyrë krem ​​pranë saj janë identike me ndërtesat në videon e mësipërme.

Krahasim i videos së pretenduar në Dubai (majtas) dhe pamje nga Sharjah (djathtas) tregon se kemi të bëjmë me të njejtin vend

Pra, video është e vjetër dhe nuk ka të bëjë me ngjarjet e vitit 2026 në Lindjen e Mesme. Gjithashtu, ende nuk ka raportime të besueshme për një sulm iranian ndaj një ndërtese të CIA në rajon.

The post Zjarri në kullën në Dubai jo nga sulmet hakmarrëse të Iranit appeared first on Faktoje.al.

Sebi Alla “Kërkesa rrëzohet”! Kjo qe fjala e fundit dhe e prerë e kryeministrit Edi Rama pas fjalimit të gjatë që mbajti për heqjen ose jo të imunitetit të ish-zëvendëses së tij, Belinda Balluku.

Në këtë mënyrë Partia Socialiste në seancën e 12 Marsit pritet t’i thotë një “jo” të fortë Prokurorisë Speciale (SPAK), e cila kërkonte nga Kuvendi lëshimin e autorizimit për arrestimin e Ballukut, kërkesë e mbërritur që më datë 16 dhjetor të vitit të kaluar, por vetëm ditën e sotme mori përgjigjen përfundimtare nga kryeministri dhe Grupi Parlamentar i PS-së.

Balluku akuzohet për “shkelje të barazisë së pjesëmarrësve në ankande ose tendera publike, në nëntë raste”, për procedurat e ndërtimit të Tunelit të Llogarasë dhe disa lote të ndërtimit të Unazës së Madhe në Tiranë.

SPAK kërkoi në muajt nëntor dhe dhjetor dy herë masë sigurie fillimisht “bllokim të pasaportës për të dalë jashtë vendit” dhe më pas “pezullim nga detyra”, ndërsa në fund më 16 dhjetor kërkesë për arrestimin e saj.

Raporti i PS

E përmbledhur në disa pika, raporti i përfaqësuesve të PS-së (që Faktoje e disponon të plotë) në Komisionin Parlamentar të Mandateve dhe Imuniteteve që u lexua nga Ulsi Manja thotë se ndaj Ballukut nuk ka akuzë për korrupsion por “shkelje e barazisë në tendera”, vepër për të cilën PS pretendon se në raste të tjera procesi ndaj të pandehurve është ndjekur në gjendje të lirë.

Gjithashtu grupi i PS këmbëngul se nuk ekziston rreziku i arratisjes apo i prishjes së provave.

Për PS-në, masa e sigurimit personal për pezullimin nga detyra si anëtare e Këshillit të Ministrave nuk prodhon më pasoja juridike reale, pasi Balluku nuk ushtron më funksione ekzekutive.

“Për rrjedhojë, masa e sigurimit personal e pezullimit nga detyra si anëtare e Këshillit të Ministrave nuk prodhon më asnjë pasojë juridike reale. Në të njëjtën linjë arsyetimi, edhe narrativa mbi të cilën Prokuroria e Posaçme ka ndërtuar kërkesën për aplikimin e masave më të rënda të sigurimit personal, si rreziku i prishjes së provave, i arratisjes apo i kryerjes së një vepre tjetër penale, mbetet thelbësisht hipotetike për sa kohë lidhet drejtpërdrejt me ushtrimin e funksioneve ekzekutive që deputetja në fjalë nuk i ushtron më”, thuhet në raport.

Qëndrimi i Ramës

Në rreth 90 minuta fjalim, kreu i qeverisë kundërshtoi kërkesën e SPAK për dhënien e autorizimit për arrestimin e Ballukut, ndërsa bëri edhe një rezyme të gjatë të përballjes qeveri-SPAk deri në këto momente, duke marrë në analizë arrestimin në detyrë të kryebashkiakut të Tiranës Erion Veliaj, apo të ish-ministrit të Shëndetësisë Ilir Beqja.

Ai i cilësoi “16 mijë faqet e prokurorisë”, si fjalë dhe jo prova bindëse. “…kur mendoj që vihet me këtë kollajllëk, në Kuvendin e Shqipërisë, për të kërkuar kokën e një të zgjedhuri, mbasi është bërë gjithçka për ta futur 7 pash jo nën dhe, por në llum. Po një njeri i thjeshtë, i pambrojtur e parafytyroni ju se si mund ta hajë fletë-arrestin surratit. E kur sheh këtë, aty e kupton konkretisht se si e hanë shumë njerëz në Shqipëri, se si për faqen e zezë të autorëve, të kësisoj përplasjesh turinjve të fletëve të arrestit, Shqipëria është bërë delja e zezë e arrestit, me shumë të burgosur në paraburgim”, tha Rama, duke ironizuar drejtësinë se: “jetojnë nën kurrizin e të tjerëve. Hajde ta fusim një herë, se na ka dalë një incizim, na kanë ardhur disa sms”.

Kryeministri e mbylli me kërkim falje ndaj Ballukut për mos pranimin e tre dorëheqjeve të dorëzuara prej saj, ndërsa i ka kujtuar se në betejën me drejtësinë, ish- ministrja, do të ketë në krah vetëm avokatët. “E falënderoj Ballukun për punën e bërë dhe i uroj fatin që meriton në betejën e saj ligjore, ku do të ketë në krahë vetëm avokatët e saj. I kërkoj ndjesë për refuzimin e tre dorëheqjeve”, tha ai.

Reagimi i Berishës

Menjëherë pas qëndrimit të PS-së dhe Ramës të cilët dolën me raport për të rrëzuar kërkesën e SPAK për imunitetin e Ballukut reagoi edhe kreu i PD-së Sali Berisha.

“Ai (Rama) iu tha shqiptarëve sot se Balluku është e paprekshme! Se SKAP-i (SPAK) është zero me bisht, se drejtësia nuk ekziston. Noterja apo regjistruesja e të gjitha vjedhjeve 25 vjeçare të këtij kryehajduti. Edi Rama, sot sfidoi çdo shqiptar, qytetarët shqiptarë! Nuk është kryesisht sulm ndaj SPAK, ndaj drejtësisë kjo që po bën, sepse në këtë drejtim drejtësia po përfaqësohet nga ju. Edi Rama ju thotë juve se qëndron mbi ligjin dhe si narko-diktator i vërtetë, vendos për gjithçka”, tha Berisha.

The post Rama dhe PS nuk lëshojnë Ballukun, i thonë jo SPAK-ut appeared first on Faktoje.al.

Pretendimi: Futbollisti iranian Mehdi Taremi ka deklaruar se do të lërë ekipin grek Olympiacos për të shkuar në luftë për Iranin

Verdikti: E paprovuar

————————————————————–

Ndërsa Irani dhe Izraeli shkëmbejnë sulme raketore pas vrasjes së udhëheqësit iranian Ali Khamenei nga një sulm amerikano-izraelit më 28 shkurt, në rrjete sociale, përfshi ato shqipfolëse, po qarkullon lajmi se futbollisti me origjinë iraniane Mehdi Taremi ka deklaruar se do të largohet nga ekipi i tij Olympiacos për të luftuar për Iranin.

Taremi citohet të ketë deklaruar se “ky është momenti kur vendi im ka më shumë nevojë për mua.” 

Megjithatë, ky lajm është i pavërtetë.

Mehdi Taremi nuk ka deklaruar kurrë publikisht se dëshiron të kthehet në Iran për të luftuar në mbrojtje të tij, as nuk e ka thënë citimin që i atribuohet.

Për më tepër, Taremi njihet për kritikat e tij të forta ndaj regjimit të Ajatollahëve për vite me radhë dhe ka folur vazhdimisht publikisht për të denoncuar represionin e tij.

Zyra e shtypit e ekipit të tanishëm të Taremit, Olympiacos, konfirmoi për kolegët italianë të verifikimit të fakteve Facta se lajmi është plotësisht i pabazë. Presidenti i ekipit, Kostas Karapapas, si dhe agjenti i Taremit, Federico Pastorello, gjithashtu e mohuan këtë lajm në Instagram.

“Në orët e fundit, kanë qarkulluar deklarata që i atribuohen Mehdi Taremit, të cilat nuk pasqyrojnë realitetin e situatës. Lojtari është plotësisht i përqendruar në punën e tij, në Athinë, dhe në rrugën e tij profesionale, me përkushtim dhe vendosmëri. Në një periudhë delikate si kjo, është e rëndësishme të shmangen interpretimet jashtë kontekstit ose rindërtimet e pasakta. Ne kemi besim në ndjenjën e përgjegjësisë dhe respektit të të gjithëve,” lexonte deklarata e plotë nga Pastorello.

Shënim: Data 10 mars 2026 faqja TV21 e ka korigjuar lajmin, pas verfikimit të Faktoje. Lajmit të raportuar i është ndryshuar vlerësimi fillestar në Facebook.

Shënim: Data 10 mars 2026 faqja Katër Anët e ka korigjuar lajmin, pas verfikimit të Faktoje. Lajmit të raportuar i është ndryshuar vlerësimi fillestar në Facebook.

The post Sulmuesi Taremi nuk ka ndërmend të braktisë Olympiacos për të luftuar në Iran appeared first on Faktoje.al.