Sot përfundoi takimi midis kryeministrit Kyriakos Mitsotakis dhe Presidentit turk Rexhep Tayip Erdogan dhe filloi puna e Këshillit të Lartë të Sigurisë.

Sipas mediave greke Athina dhe Ankaraja po nënshkruajnë gjashtë marrëveshje dhe një deklaratë të përbashkët.

Pak pas orës 14:15, avioni që mbante kryeministrin grek mbërriti në aeroportin e Ankarasë. Ai u prit nga Ministri turk i Turizmit, zëvendëskryetari i Bashkisë dhe Prefekti i Ankarasë.

Më parë, duke folur në parlamentin turk, Rexhep Tajip Erdogan iu referua vizitës, duke thënë se “qëllimi është të kontribuohet në paqen në rajon”.

Sot, Kuvendi i Kosovës do të mblidhet në seancën konstituive, e cila do të nisë nga ora 17:00.

Para seancës, Mimoza Kusari, nga Lëvizja Vetëvendosje, njoftoi se Albulena Haxhiu do propozohet për t’u zgjedhur kryeparlamentare.

Kusari gjithashtu tha se vetë ajo do të jetë pjesë e kabinetit qeveritar, siç ishte propozuar edhe më parë. /Klankosova.tv

Presidenti i Shteteve të Bashkuara të Amerikës, Donald Trump, në bisedime private po shqyrton mundësinë e tërheqjes nga Marrëveshja e Tregtisë së Lirë të Amerikës së Veriut (USMCA), e cila sjell pasiguri shtesë në negociatat me Kanadanë dhe Meksikën, thanë për Bloomberg burime të njohura me situatën.

Sipas burimeve, Trump u ka pyetur bashkëpunëtorëve pse nuk duhet të largohet nga marrëveshja që nënshkroi gjatë mandatit të tij të parë, por nuk është e qartë nëse ai do të marrë realisht një vendim për t’u larguar.

Një tërheqje e mundshme e SHBA-së nga USMCA mund të shkaktojë një tronditje të menjëhershme ekonomike, të rrisë tarifat për eksportet meksikane dhe kanadeze dhe të prishë integrimin e furnizimit që ka zgjatur për më shumë se tre dekada./abcnews.al

Shtabi Suprem i Fuqive Aleate në Evropë (SHAPE) njoftoi se Komanda Aleate e Operacioneve të NATO-s (ACO) nisi të mërkurën stërvitjen “Arctic Sentry”, me qëllim rritjen e pranisë së aleancës në Arktik dhe Veriun e Largët.

Aktiviteti shumë-dimensional do të forcojë qëndrimin e NATO-s në rajon, duke përforcuar angazhimin e saj për të mbrojtur shtetet anëtare dhe për të ruajtur stabilitetin në një nga zonat “më të rëndësishme strategjike dhe më sfiduese për mjedisin” në botë, tha në një deklaratë Gjenerali i Forcave Ajrore Amerikane Alexus G. Grynkewich, Komandanti Suprem i Forcave Aleate në Evropë.

“Do të shfrytëzojë forcën e NATO-s për të mbrojtur territorin tonë dhe për të siguruar që Arktiku dhe Veriu i Largët të mbeten të sigurta”, shtoi ai.

Stërvitja vjen pas një takimi të kohëve të fundit në Davos, Zvicër, midis Presidentit të SHBA-së, Donald Trump dhe Sekretarit të Përgjithshëm të NATO-s, Mark Rutte, ku të dy udhëheqësit ranë dakord që NATO duhet të marrë një rol më aktiv në mbrojtjen e rajonit mes “aktivitetit ushtarak të Rusisë dhe interesit në rritje të Kinës”.

“Arctic Sentry” do t’u ofrojë planifikuesve të NATO-s dukshmëri të plotë të aktiviteteve të kombeve aleate në Arktik dhe do t’i integrojë ato në një qasje të koordinuar operative.

Operacioni do të drejtohet nga Komanda më e re e Forcave të Përbashkëta të NATO-s, JFC Norfolk, zona e përgjegjësisë së së cilës tani mbulon të gjithë rajonin e Arktikut.

ACO dhe JFC Norfolk do të koordinohen me Komandën Aleate për Transformimin, Komandën e Mbrojtjes Hapësinore të Amerikës së Veriut (NORAD) të SHBA-së dhe Kanadasë, si dhe Komandat Veriore dhe Evropiane të SHBA-së.

Në muajt e fundit, Trump përsëriti interesin e tij për kontrollin amerikan mbi Groenlandën, duke përmendur shqetësimet e sigurisë kombëtare për shkak të Rusisë dhe Kinës. Ai gjithashtu kërcënoi me sanksione kundër vendeve evropiane që kundërshtuan këtë veprim.

Kërcënimet u tërhoqën më vonë pasi Trump u takua me Rutte në Forumin Ekonomik Botëror, ku të dy udhëheqësit ranë dakord për një kornizë për një marrëveshje të mundshme që mbulon Groenlandën dhe rajonin e gjerë të Arktikut.

Pas takimit, filluan bisedimet midis Shteteve të Bashkuara të Amerikës, Danimarkës dhe Groenlandës për të zgjidhur situatën.

Presidenti Bajram Begaj ka pritur në një takim Drejtorin e INL për Evropën dhe Azinë,  Mark Tervakoski, dhe të Ngarkuarën me Punë të SHBA-së në Shqipëri, Nancy VanHorn.

Në një reagim në platformën X, Begaj thotë se në këtë takim u riafirmua edhe njëherë partneriteti dhe bashkëpunimi strategjik si aleatë të NATO-s.

Reagimi:

Në një takim me Drejtorin e INL për Evropën dhe Azinë, z. Mark Tervakoski, dhe të Ngarkuarën me Punë të SHBA-së në Shqipëri, znj. Nancy VanHorn, ne riafirmuam partneritetin dhe bashkëpunimin tonë strategjik si aleatë të NATO-s: – forcimin e sundimit të ligjit; – luftimin e krimit të organizuar dhe korrupsionit; – promovimin e zhvillimit të qëndrueshëm ekonomik; – ndërtimin e institucioneve më të forta në dobi të të gjithë shoqërisë shqiptare.

In a meeting with INL Director for Europe & Asia, Mr. Mark Tervakoski, and U.S. Chargé d’Affaires in Albania, Ms. Nancy VanHorn.

We reaffirmed our strategic partnership and cooperation as NATO allies:
-strengthening the rule of law;
-fighting organized crime and corruption;… pic.twitter.com/6d1SeiszqB

— Bajram Begaj (@BajramBegajAL) February 11, 2026

Astrit Balliu alias Avdyli alias Sulejmani është dënuar me 12 vite burg

Dënimi është dhënë për dosjen 339 njohur ndryshe dhe si operacioni Volvo 4, lidhur me laboratorin e drogës që u zbulua në atë kohe në Has.

Avdylaj u arrestua më 29 qershor 2024, me urdhër të SPAK, pas zbërthimit të komunikimeve në aplikacionin “Sky ECC”.

Ndërkohë, për Astrit Avdylin vijojnë hetimet për dosje te tjera penale nga SPAK.

/abcnews.al/

Drejtori i zyrës për Europën dhe Azinë i Byrosë së Çështjeve Ndërkombëtare të Narkotikëve dhe Zbatimit të Ligjit të Departamentit të Shtetit, Mark Tervakoski, është takuar me ministren e Brendshme, Albana Koçiu si edhe me përfaqësues të zbatimit të ligjit, drejtësisë, shoqërisë civile dhe misioneve ndërkombëtare në Shqipëri.

Ambasada amerikane në Tiranë ka ndarë në Facebook, një postim, ndërsa nënvizon se Shtetet e Bashkuara janë të përqendruara në ofrimin e aftësive, mjeteve dhe bashkëpunimit në Shqipëri dhe në rang global për partnerët që ndajnë angazhimin për të luftuar kriminelët që dëmtojnë qytetarët apo edhe kërcënojnë kufijtë tanë e cenojnë sigurinë tonë kombëtare.

REAGIMI:

Duke shfaqur forcën e partneritetit në fushën e zbatimit të ligjit mes Shteteve të Bashkuara dhe Shqipërisë dhe luftën e palodhur të Administratës Trump kundër krimit të organizuar ndërkombëtar dhe trafikimit të narkotikëve, Drejtori i Zyrës për Europën dhe Azinë i Byrosë së Çështjeve Ndërkombëtare të Narkotikëve dhe Zbatimit të Ligjit të Departamentit të Shtetit, Mark Tervakoski, u takua me përfaqësues të zbatimit të ligjit, drejtësisë, shoqërisë civile dhe misioneve ndërkombëtare në Shqipëri.

Shtetet e Bashkuara janë të përqendruara në ofrimin e aftësive, mjeteve dhe bashkëpunimit në Shqipëri dhe në rang global për partnerët që ndajnë angazhimin tonë për të luftuar kriminelët që dëmtojnë qytetarët e vendeve tona, kërcënojnë kufijtë tanë dhe cenojnë sigurinë tonë kombëtare.

Presidenti iranian Masoud Pezeshkian tha të mërkurën se vendi i tij është i përgatitur për “çdo verifikim” të programit të tij bërthamor, duke këmbëngulur se Teherani nuk po kërkon armë atomike.

“Ne nuk po kërkojmë të pajisemi me armë bërthamore. E kemi deklaruar këtë vazhdimisht dhe jemi gati për çdo verifikim”, tha Pezeshkian gjatë një fjalimi në sheshin Azadi në Teheran, duke shënuar 47-vjetorin e Revolucionit Islamik të Iranit, transmeton Telegrafi.

“Vendi ynë, Irani, nuk do t’i nënshtrohet kërkesave të tyre të tepërta”, shtoi ai, pasi Teherani rifilloi bisedimet indirekte me Uashingtonin mbi programin e tij bërthamor.

Përvjetori vjen ndërsa teokratët në pushtet të vendit mbeten nën presion nga presidenti i SHBA-së, Donald Trump, i cili sugjeroi dërgimin e një grupi tjetër transportuesish aeroplanësh në Lindjen e Mesme.

Trump e bëri këtë sugjerim në një intervistë të botuar të martën në mbrëmje, ndërsa kryeministri izraelit Benjamin Netanyahu përgatitet të vijë në Uashington për të shtyrë SHBA-në drejt kushteve më të rrepta të mundshme në çdo marrëveshje të arritur me Teheranin në bisedimet e reja bërthamore.

SHBA-të bombarduan vendet bërthamore iraniane qershorin e kaluar gjatë një konflikti 12-ditor Iran-Izrael. Ndërkohë, Agjencia Ndërkombëtare e Energjisë Atomike (IAEA) nuk ka qenë në gjendje të verifikojë statusin e rezervave të uraniumit të Iranit, të cilat janë pothuajse të përshtatshme për armë, që nga konflikti 12-ditor, kur Teherani pezulloi bashkëpunimin e tij me mbikëqyrësin bërthamor të OKB-së.

Shefi i IAEA-së, Rafael Grossi, arriti një marrëveshje me Ministrin e Jashtëm iranian Abbas Araghchi në shtator 2025 për të rifilluar inspektimet, por OKB-ja rivendosi sanksionet ndaj Iranit po atë muaj, duke bërë që vendi të ndalonte zbatimin e marrëveshjes.

Përfaqësues të Klubit të Popullit Boshnjak në Dhomën e Popujve të Parlamentit të Bosnjës dhe Hercegovinës kanë ngritur padi penale kundër liderit të SNSD-së, Milorad Dodik, të cilin e akuzojnë për nxitje të urrejtjes kombëtare, racore dhe fetare, si dhe për përçarje dhe mungesë tolerance.

Kallëzimi vjen pas deklaratave të fundit të Dodikut, të cilat, sipas tyre, përbëjnë fyerje dhe nënçmim ndaj popullit boshnjak. Dodik kishte deklaruar se “myslimanët dhe Sarajeva janë armiqtë tanë”, si dhe kishte paralajmëruar rikthimin e ushtrisë së Republikës Sërspka.

Në reagimin zyrtar, Klubi i Popullit Boshnjak thekson se këto deklarata janë pjesë e një retorike të vazhdueshme ndër vite, që sipas tyre synon të diskreditojë dhe të poshtërojë boshnjakët.

Ata konsiderojnë se bëhet fjalë për vepër penale dhe se vetëm veprimi i organeve të drejtësisë mund të ndalojë një qasje të tillë.

“E kaluara e Bosnjës dhe Hercegovinës dëshmon se fjalët që nuk ndëshkohen me kohë shpesh paraprijnë ngjarje më të rënda”, thuhet në deklaratë.

Përfaqësuesit boshnjakë kanë paralajmëruar po ashtu se do të kërkojnë nga institucionet kompetente zbatimin e plotë të aktgjykimit të Gjykatës së Bosnjës dhe Hercegovinës, e cila e ka dënuar Dodikun me një vit burg dhe me ndalimin për një periudhë 6 vjecare të ushtrimit të funksioneve publike.

Ministrja e Brendshme e Portugalisë, Maria Lucia Amaral ka dhënë dorëheqje pas kritikave për menaxhimin e situatës së krijuar pas përmbytjeve.

Në deklaratën e lëshuar nga Presidenca thuhet se Amaral “nuk kishte kushte personale dhe politike të nevojshme për të kryer detyrat e saj”.

Postin e saj do ta mbajë përkohësisht kryeministri, Luís Montenegro. Qeveria e Montenegros është kritikuar ashpër për reagimin e saj ndaj stuhive dhe erërave të forta dyjavore nga të cilat vdiqën të paktën shtatë persona dhe shkaktuan dëme prej rreth 4 miliardë eurosh.

Portugalia është në gjendje të jashtëzakonshme deri në mesin e shkurtit për shkak të nivelit të lartë të reshjeve dhe përmbytjeve.

Një aksident rrugor është regjistruar në kilometrin e dytë të superstradës Lezhë–Milot, ku janë përfshirë tre mjete, një autoveturë, një fuoristrade dhe një mjet tip furgon, duke sjellë vështirësi të përkohshme në qarkullim.

Sipas informacioneve paraprake, dy nga drejtuesit e mjeteve janë transportuar në spital për ndihmë mjekësore dhe ndodhen jashtë rrezikut për jetën. Njëri prej drejtuesve është testuar në vendngjarje dhe rezulton se nuk ka qenë nën efektin e alkoolit.

Paraprakisht dyshohet se shkak i aksidentit ka qenë një parakalim i gabuar nga një prej mjeteve të përfshira. Policia rrugore ndodhet në vendngjarje dhe ka nisur hetimet për zbardhjen e plotë të rrethanave, ndërsa po punohet edhe për normalizimin e qarkullimit të mjeteve.

Policia e Vlorës ka arrestuar në flagrancë shtetasin A. L., 47 vjeç, banues në Vlorë, për veprën penale “Plagosja e rëndë me dashje”, pasi mbrëmjen e djeshme, në lagjen “Isa Boletini”, dyshohet se gjatë një konflikti për motive të dobëta, ka goditur me mjet të mprehtë (kaçavidë), shtetasin D. Z., 25 vjeç, banues në Vlorë. I dëmtuari po merr mjekim në spitalin e Vlorës dhe është jashtë rrezikut për jetën.

Sistemi bankar në vend vijon të shfaqë qëndrueshmëri dhe nivel të lartë menaxhimi të riskut, ndërsa bizneset dhe konsumatorët po tregojnë një qasje më të kujdesshme ndaj financave. Kështu u shpreh ekspertja e ekonomisë, Romina Radonshiqi, në “Money Report” në ABC News, duke theksuar se financat e biznesit dhe ato të familjeve shqiptare paraqiten të stabilizuara, në një klimë zhvillimi ekonomik.

Sipas saj, bankat kanë arritur të menaxhojnë në nivele shumë të larta riskun, ndërsa bizneset kanë nisur të administrojnë më mirë të ardhurat dhe investimet e tyre, të cilat janë përqendruar kryesisht në sektorin bankar. Radonshiqi nënvizoi se edhe konsumatori shqiptar ka përmirësuar ndjeshëm menaxhimin e të ardhurave, i ndikuar nga përvojat e së kaluarës që kanë treguar koston e lartë të keqmenaxhimit financiar.

Ekspertja theksoi se bizneset janë të parat që reflektojnë zhvillimet e tregut, ndërsa problematikat gjeopolitike mbeten një faktor që sjell pasiguri në ekonomi. Megjithatë, ajo vuri në dukje se turizmi ka marrë një hov të ndjeshëm, duke ndikuar drejtpërdrejt në rritjen e kredive për pasuri të paluajtshme.

Sipas Radonshiqit, rritja e kërkesës në treg është reflektuar edhe në shtimin e kredive hipotekore, të cilat nuk merren më vetëm për qëllime strehimi, por në shumë raste shërbejnë edhe si mbështetje për zhvillimin e bizneseve.

“Sistemi bankar ka menaxhuar në nivele shumë të larta riskun, nga ana tjetër janë edhe bizneset të cilat kanë filluar të mirëmenaxhojnë të ardhurat e tyre. Shikojmë që rëndësia që u kushtohet sot investimeve, janë përqendruar tek biznesi bankar. Nga ana tjetër konsumatori shqiptar e menaxhon shumë mirë riskun, pasi e shkuara ka bërë që nëse nuk menaxhojnë mirë të ardhurat e tyre, do u kushtojë shumë në pronësinë dhe të ardhurat. Kemi një qëndrueshmëri të financave të biznesit dhe të financave shqiptare.

Kemi një zhvillim ekonomik. Bizneset janë të parat që shikojnë zhvillimet e tregut. Nga ana tjetër shikojmë që problemet gjeopolitike sjellin pasiguri. Shikojmë gjithashtu që turizmi ka marrë një hov të madh, prandaj dhe janë rritur kreditë për pasuri të patundshme. Efektet janë reflektuar. Kemi rritje të kërkesës së tregut. Marrja e kredisë hipotikore nuk është e bazuar vetëm tek marrja e shtëpisë për strehim, por shumë kredi të tyre janë të mbështetura edhe te të bëri biznes”, tha ekspertja.

Gjykata e Lartë ka lënë në fuqi vendimin e Apelit të Posacem, duke rrëzuar rekursin e ish-gjyqtarit Guxim Zenelaj për konfiskimin e pasurive të tij.

Bëhet fjalë për pasuri sipërfaqe toke prej 1000 m2 në Porto Palermo, Himarë-Vlorë si dhe 6 pasuri të paluajtshme në Ishull Shëngjin-Lezhë.

Dy bodrume njësi me sipërfaqe 218 m2 dhe tre apartamente me sipërfaqe rreth 60 m2, 67 m2 dhe 51 m2.

Policia e Tiranës ka arrestuar një 28-vjeçar, pasi kishte fshehur pistoletën, në papafingon e banesës së tij, arrestohet 28-vjeçari. Sekuestrohen arma e zjarrit dhe celulari i të arrestuarit.

“Gjatë operacionit u arrestua në flagrancë shtetasi A. M., 28  vjeç, banues në fshatin Pezë e Vogël.

Nga kontrolli në banesën e tij, u gjet e fshehur në papafingo, 1 armë zjarri pistoletë që mbahej pa leje, nga i arrestuari”, njofton policia.

Fermerët apo bizneset agro-përpunuese kanë shfaqur interes për të përfituar financim nga garancia Sovrane me vlerë 250 mln euro. Nisur nga kjo por edhe për të analizuar ecurinë e garancisë Sovrane Banka e Shqipërisë ka realizuar një takim me aktorët kryesorë.

Sipas ministrit të bujqësisë tashmë ka pasur një  rritje të  interesit dhe  aplikimeve që tregon  nevojën e sektorit për financim nga ky sektor .

Po ashtu në takim  u bë thirrje bankave që të intensifikojnë përpjekjet për orientimin e fermerëve drejt mundësive të pashfrytëzuara të financimit dhe investimit në sektorin bujqësor.

Ndër të tjera, takimi synoi gjithashtu edhe përcaktimin e masave konkrete për përmirësimin e aksesit në financim për fermerët, ndërmarrjet bujqësore dhe bizneset mikro, në përputhje me parimet e menaxhimit të kujdesshëm të rrezikut dhe stabilitetit financiar.

Ndërkohë, Qeveria do vazhdojë të mbështesë sektorin edhe nëpërmjet kanaleve të tjera, si skema kombëtare e bujqësisë, paketa fiskale si dhe rifillimi i IPARD III.

Vendimet për legalizimin e ndërtimeve informale do t’u dërgohen qytetarëve drejtpërdrejt në profilin e tyre në platformën e-Albania. Agjencia Shtetërore e Kadastrës informon se dokumenti do të mbërrijë menjëherë në telefon apo kompjuter, duke eliminuar nevojën për paraqitje fizike në sportele apo pritjen në radhë.

Në këtë mënyrë qytetarët mund të marrin vendimin për legalizimin në kohë reale, me gjurmueshmëri elektronike dhe siguri më të lartë.

Po ashtu në mënyrë elektronike tashmë do të ofrohet edhe një tjetër shërbim siç është aplikimi online për kalimin në pronësi të truallit shtetëror në përdorim.

Aplikimi kryhet elektronikisht, pa nevojë paraqitjeje fizike, duke ngarkuar dokumentacionin përkatës në sistem. Ky shërbim pritet të përshpejtojë proceset e kalimit në pronësi, të rrisë formalizimin dhe të ulë hapësirat për vonesa apo keqkuptime procedurale.

Bashkimi Europian ka vënë në dispozicion të Shqipërisë një fond prej 100 milionë eurosh për nxitjen e punësimit për kategoritë në nevojë, ndërsa përshtatja e politikës sociale me atë të unionit do të ndikojë drejtpërdrejtë në rritjen e mirëqenës së qytetarëve.

“Po investojmë më shumë se 100 milionë euro përmes projekteve të BE-së për gjithëpërfshirjen dhe punësimin social. Këto plotësohen edhe nga Plani i Rritjes i BE-së, nga i cili Shqipëria ka marrë 100 milionë euro për të mbështetur zhvillimin e kapitalit njerëzor. Kemi mbështetur 41 bashki për të krijuar planet e tyre vendore sociale, me qëllim që të hartojnë reagimet e duhura për nevojat që kanë analizuar”, tha Gonzato.

Aktualisht janë 65 mijë qytetarë që marrin mbështetje të vazhdueshme ndërsa me fondin e ri social shtohen 12 shërbime të dedikuara për fëmijët dhe nënat në nevojë, personat me aftësi ndryshe, gratë viktima të dhunës apo fëmijët pa kujdes prindëror.

“Shqipëria të kujdeset në mënyrë të posaçme për 65 mijë individë është diçka shumë domethënëse dhe nuk janë 65 mijë individë të cilët i prek një sistem financimi, por janë 65 mijë individë, të cilët i prek një sistem i organizuar institucionesh, pikash shërbimi, kujdestarësh dhe kështu me radhë. Është 17 % më i lartë këtë vit sesa vitin e shkuar, por buxheti nuk është e gjitha dhe nuk i thotë dhe as i zgjidh dot të gjitha. Kështu që për këtë arsye na duhet që këtë proces decentralizimi ta thellojmë, ta bëjmë më të konsoliduar dhe në ndërkohë të rrisim patjetër edhe cilësinë e jetës nën strehët e kujdesit shoqëror”, u shpreh kryeministri Rama.

Jo pak rol do të kenë dhe bashkitë, ndaj një mesazh Gonzato, e kishte për politikën ka nisur punën për hartën e re territoriale.

“Në nivel qendror duhet të fuqizohen bashkitë. Kjo kërkon bashkëpunim të ngushtë mes qeverisjes vendore dhe asaj lokale, për këtë mendojmë se mund të ndihmojë Reforma Territoriale. Transparenca dhe llogaridhënia duhet të jenë në qendër të politikave, kjo pasi ndërsa Shqipëria ecën më pranë BE duhet të ketë sisteme të drejta dhe transparentë”, shtoi më tej Gonzato.

Për Ramën negociatat nuk janë vetëm një fazë burokratike, por një proces I tërë transformimi, ndërsa nuk i kurseu as batutat.

“Nëse BE i ka të dyja, ka edhe lekët, ka edhe mendjen, UNICEF nuk ka lekë, por ka mendjen, ka edhe zemrën, kështu që kinezët thonë “një mendje, hiç mendje; dy mendje, një mendje; tre mendje, dy mendje’’ kështu që bashkimi i mendjeve tuaja bën një mendje për ne. Edhe mendja jonë, edhe pastaj zemrën e kemi vetë ne, se ti je dhe turk, ndërkohë që këta kanë edhe lekët që i kanë ato, s’kemi ça bëjmë”, përfundoi Rama.

Kërkesa për 45 vite burg ndaj ish-krerëve të UÇK-së ka nxitur reagime të forta, ndërsa analisti Ledion Krisafi e cilëson atë si një masë tepër të lartë dhe me sfond politik.

Sipas Krisafit, dënimi i kërkuar është “shumë i lartë nga sa pritej” dhe, duke marrë parasysh moshën e të akuzuarve, përkthehet praktikisht në burgim të përjetshëm. Ai thekson se situata në Kosovë nuk mund të barazohet me atë të Serbisë, duke argumentuar se Serbia ishte agresori në luftë, ndërsa shqiptarët ishin viktima.

Krisafi nuk përjashton mundësinë që të akuzuarit të shpallen të pafajshëm ose të marrin një dënim më të ulët se 45 vite, por shprehet kritik ndaj qasjes së gjykatës, të cilën e konsideron politike dhe tendencioze. Sipas tij, ka pasur një përpjekje për të shpërndarë përgjegjësinë mes palëve, në mënyrë që faji të mos mbetet vetëm mbi Serbinë, e cila, sipas tij, ka kryer pjesën më të madhe të krimeve gjatë luftës.

Ai shton se paralelizmi mes UÇK-së dhe ushtrisë serbe është bërë më shumë për të prodhuar dënime sesa për të zbardhur të vërtetën, duke nënvizuar se UÇK-ja nuk ishte një ushtri e rregullt në kuptimin klasik të fjalës, por një organizim paramilitar në rrethana lufte.

“Në fakt është shumë e lartë nga sa pritej. Duke marrë parasysh edhe moshën e ish-krerëve të UÇK i bie që të jetë gati burgim të përjetshëm. Nuk jemi në këtë situatë në Kosovë, për më tepër që Serbia ishte agresori dhe shqiptarët ishin viktimat. Nuk përjashtohet mundësia që të akuzuarit të dalin të pafajshëm.

Ka një përpjekje që të dënoheshin të gjithë, për të mos ua lënë gjithë fajin serbëve. Lufta u fillua nga serbët dhe ata bënë pjesën më të madhe të krimeve. Një pjesë e elitave ndërkombëtare mund të jenë penduar për atë që ka ndodhur në Kosovë, dhe mendojnë që fajin ta mbajnë të gjithë. Kërkesa është e rëndë, nuk mund të dënohen shqiptarët që ishin viktima.

E gjithë kjo gjykatë është e gjitha politike, nuk ka qenë qëllimi për të hyrë në detaje. Qëllimi ka qenë që të dënojmë të gjithë, të gjithë ata që kanë bërë krime në ish-Jugosllavi. UÇK nuk ishte një ushtri në kuptimin e plotë të fjalës, ishte më shumë një organizimin paramilitar.

Nuk ishte e ngjashme me ushtrinë serbe. Paralelizmi me UÇK-në dhe me ushtrinë e Serbisë, ka qenë më shumë për të dënuar, se sa për të zbuluar të vërtetën. Në disa kancelari ndërkombëtare, është thënë që Shqipëria nuk mund t’i marrë të gjitha, pavarësinë. Qëllimi ka qenë që të dënohen të gjithë. Ka qenë shumë tendencioze. Nuk mendoj se mund të ketë një dënim maksimal 45 vjet, mendoj që mund të ketë një dënim më të vogël, por edhe pse jo pafajësi”, tha Krisafi.

Në një nga e-mail-et e publikuara nga Departamenti Amerikan i Drejtësisë, përmendet një bisedë ku Jeffrey Epstein diskuton për karrierën e motrave Bella dhe Gigi Hadid në industrinë e modelingut.

Biseda mban datën 3 dhjetor 2015 dhe zhvillohet mes Epstein dhe një personi të paidentifikuar, që dyshohet të ketë pasur lidhje me botën e modelingut. Në fillim të dialogut, bashkëbiseduesi e pyet Epsteinin: “Si u bënë modele motrat Hadid dhe fituan kaq shumë para? Nuk e kuptoj.”

“Ti e di”, përgjigjet Epstein, duke kundërshtuar më pas pretendimin se “babai i tyre pagoi agjencinë e modelingut”.

Biseda vijon me tone edhe më të forta. Në një tjetër mesazh, personi i paidentifikuar shkruan: “Ka shumë vajza që bëjnë kompromis”, ndërsa Epstein përgjigjet: “Jam dakord”.

“Pra, çfarë bënë ato?” këmbëngul bashkëbiseduesi. Në përgjigje, Epstein përdor një shprehje vulgare me nënkuptime të qarta. Kur ai pyetet për motrat Hadid me frazën “nëse mund ta bëjnë ato, pse jo unë?”, Epstein përfundon: “Sepse ato ndjekin udhëzimet, është kaq e thjeshtë”.