BERLIN, 6 shkurt /ATSH-DPA/ – Moska ka dhënë një vlerësim pozitiv për bisedimet e paqes mes Ukrainës dhe Rusisë, të ndërmjetësuara nga Shtetet e Bashkuara dhe të zhvilluara në Emiratet e Bashkuara Arabe.

“Janë kryer dy ditë pune konstruktive dhe njëkohësisht shumë komplekse”, tha sot  zëdhënësi i Kremlinit, Dmitry Peskov, sipas agjencive ruse të lajmeve, duke shtuar se puna do të vazhdojë.

Delegacione nga Rusia, Ukraina dhe Shtetet e Bashkuara u takuan të mërkurën dhe të enjten në kryeqytetin e Emirateve të Bashkuara Arabe, Abu Dabi, në një raund të ri bisedimesh që synojnë t’i japin fund luftës gati katërvjeçare të Rusisë në Ukrainë.

Edhe pse nuk u prezantuan rezultate konkrete, paralelisht me negociatat u realizua një shkëmbim i më shumë se 300 robërve lufte.

Ndërkohë, kancelari gjerman Friedrich Merz shprehu sot skepticizëm lidhur me mundësinë e bisedimeve të drejtpërdrejta mes udhëheqësve evropianë dhe presidentit rus Vladimir Putin për përfundimin e luftës.

Gjatë vizitës së tij në Abu Dabi, Merz kujtoi një vizitë të kryeministrit hungarez Viktor Orban në Moskë, e cila, sipas tij, u pasua vetëm disa ditë më vonë nga “bombardime të rënda, përfshirë një spital fëmijësh në Kiev”.

Presidenti francez Emmanuel Macron ka shprehur së fundmi mbështetje për bisedime të drejtpërdrejta mes evropianëve dhe Putinit.

Këshilltari i tij për politikën e jashtme, Emmanuel Bonne, udhëtoi këtë javë drejt Moskës../ /Ad.Ab./ a.jor.

The post FOKUS – Kremlini: Bisedimet e fundit për paqen ruso-ukrainase ishin konstruktive appeared first on Agjencia Telegrafike Shqiptare.

VATIKAN, 6 shkurt /ATSH-ANSA/ – Papa Leone XIV bëri thirrje për një armëpushim olimpik gjatë Lojërave Dimërore në Milano dhe Cortina duke e përshkruar atë si simbol shprese dhe pajtimi ndërkombëtar.

”Nxis fuqishëm të gjitha kombet, në rastin e Lojërave Olimpike dhe Paralimpike Dimërore, të rikthejnë dhe respektojnë këtë mjet shprese që është Armëpushimi Olimpik, simbol dhe profeci e një bote të pajtuar”, shkruan papa Leone XIV në një letër të publikuar sot me rastin e Lojërave Olimpike Dimërore, që zhvillohen në Milano dhe Cortin nga sot deri më 22 shkurt, dhe Lojërave Paralimpike, që do të zhvillohen gjithashtu nga 6 deri më 15 mars.

”Gjatë Lojërave Olimpike të kaluara, paraardhësit e mi theksuan se sporti mund të luajë një rol të rëndësishëm për të mirën e njerëzimit, veçanërisht për promovimin e paqes”, kujton ai.

”Në këtë kuadër qëndron Armëpushimi Olimpik, i cili në Greqinë e Lashtë ishte një marrëveshje për të pezulluar armiqësitë para, gjatë dhe pas Lojërave Olimpike, në mënyrë që sportistët dhe spektatorët të mund të lëviznin lirshëm dhe garat të zhvilloheshin pa ndërprerje”, shton papa.

Në letrën e tij, papa Leone XIV thekson se ”praktika sportive mund të ketë një natyrë profesionale, me specializim shumë të lartë: në këtë formë ajo korrespondon me një thirrje të pakicës, duke ngjallur admirim dhe entuziazëm në zemrat e shumë të tjerëve, që ndihen të emocionuar nga fitoret ose humbjet e atletëve. Por, ushtrimi i sportit është një aktivitet i përbashkët, i hapur për të gjithë dhe i dobishëm për trupin dhe shpirtin, saqë përbën një shprehje universale të të qenit njeri”.

Duke nisur nga ”interesi i kishës për sportin dhe mënyra se si një i krishterë i qaset atij”, papa vë në dukje se ”njeriu duhet të mbetet gjithmonë në qendër të sportit”./  /Ad.Ab./

The post MILANO 2026 – Papa Leone XIV thirrje për armëpushim olimpik appeared first on Agjencia Telegrafike Shqiptare.

NUUK (Groenlandë), 6 shkurt /ATSH/ – Kanadaja dhe Franca planifikojnë të hapin sot konsullata diplomatike në kryeqytetin Nuuk, duke treguar mbështetje për aleatin e NATO-s, Danimarkën, dhe ishullin arktik, pas përpjekjeve të Shteteve të Bashkuara për të siguruar kontroll mbi territorin gjysëm të pavarur danez, sipas AP.

Ministrja e Jashtme kanadeze, Anita Anand, po udhëton drejt Nuuk për të inauguruar konsullatën, e cila sipas zyrtarëve mund të ndihmojë gjithashtu në bashkëpunimin mbi çështje si ndryshimet klimatike dhe të drejtat e inuitëve.

Ajo do të shoqërohet nga guvernatorja kanadeze indigjene, Mary Simon.

Franca, për herë të parë, do të vendosë një konsullatë të përgjithshme në Groenlandë, me Jean-Noël Poirier në krye.

Ai do të ketë detyrën të thellojë projektet ekzistuese të bashkëpunimit në fushat kulturore, shkencore dhe ekonomike, duke forcuar gjithashtu lidhjet politike me autoritetet lokale.

Kanadaja kishte premtuar hapjen e një konsullate në 2024, para diskutimeve të Trump për një marrëveshje të mundshme të marrjes së Groenlandës.

Inaugurimi u shty nga moti i keq.

Vendimi francez u mor pas vizitës së presidentit Emmanuel Macron në Groenlandë në qershor.

Shtetet e Bashkuara të Amerikës kishin kërcënuar me tarifa ndaj Danimarkës dhe shteteve të tjera evropiane që kundërshtonin përpjekjet e tyre, por më pas e tërhoqën këtë kërcënim pas një marrëveshjeje të paqartë për qasje në mineralet e pasura të ishullit.

Negociatat teknike midis SHBA-së, Danimarkës dhe Greenlandit po vazhdojnë për një marrëveshje sigurie në Arktik, ndërsa grupet e punës po krijohen për këtë qëllim./  /Ad.Ab./ a.jor.

The post FOKUS – Kanadaja dhe Franca hapin konsullata në Groenlandë appeared first on Agjencia Telegrafike Shqiptare.

UASHINGTON, 6 shkurt /ATSH/ – Gazeta e njohur amerikane ”Washington Post” njoftoi  punonjësit se po ecën përpara me një valë të gjerë shkarkimesh, pjesë e asaj që drejtuesit e përshkruajnë si një rivendosje strategjike të gjerë të gazetës, sipas ”The Independent”.

Masat përfshijnë mbylljen e redaksisë së sportit, shkurtime të thella në mbulimin ndërkombëtar, çmontimin e seksionit të recensioneve të librave dhe ristrukturimin e ekipit të lajmeve lokale.

Edhe pse fillimisht nuk u bë e ditur shifra e saktë e të prekurve, më herët ishte raportuar se rreth 100 gazetarë nga redaksia dhe deri në 300 punonjës në total nga kompania mund të humbnin vendet e punës.

Megjithatë, pas emaileve të dërguara pritet që rreth një e treta e stafit, afërsisht 300 nga rreth 800 gazetarë të redaksisë,  të shkarkohen.

Disa punonjës e përshkruan situatën si një gjakderdhje.

”I përket ndër ditëve më të errëta në historinë e një prej organizatave më të mëdha të lajmeve në botë”, deklaroi ish-redaktori ekzekutiv i ”Washington Post”, Marty Baron.

”Ambiciet e ‘Washington Post’ do të zvogëlohen ndjeshëm, stafi i tij i talentuar dhe i guximshëm do të tkurret edhe më tej, dhe publikut do t’i mohohet raportimi në terren, i bazuar në fakte, në komunitetet tona dhe në mbarë botën, raportim që është më i nevojshëm se kurrë”, shtoi ai.

Njoftimi, i bërë nga redaktori ekzekutiv Matt Murray, erdhi pas një apeli kolektiv të redaksisë, i cili i kërkoi publikisht pronarit miliarder të gazetës, Jeff Bezos, të tërhiqej nga planet për zvogëlim.

Fushata ”SaveThe Post” duket se nuk pati efekt.

Gjatë një telefonate me stafin, Murray theksoi se po eliminohet redaksia e sportit, për vite me radhë pjesë thelbësore e gazettes, megjithëse disa anëtarë do të mbeten në një seksion të ri që do të mbulojë kulturën e sportit.

Ai njoftoi gjithashtu tkurrjen e zyrave të huaja, ndryshime rrënjësore në mbulimin lokal dhe pezullimin e podkastit kryesor ”Post Reports”.

Edhe seksioni i recensave të librave është shpërbërë pothuajse tërësisht.

”Nuk mund të jemi gjithçka për të gjithë”, shkroi Murray në mesazhin e tij.

”Por duhet të jemi të pazëvendësueshëm aty ku konkurrojmë. Kjo do të thotë të pyesim vazhdimisht pse një histori ka rëndësi, kë i shërben dhe si u jep njerëzve një kuptim më të qartë të botës dhe një avantazh për ta naviguar atë”, theksoi ai./  /Ad.Ab./ a.jor.

The post MEDIA – Jeff Bezos shkarkon një të tretën e stafit të ”Washington Post” appeared first on Agjencia Telegrafike Shqiptare.

PEKIN, 6 shkurt /ATSH-AFP/ – Kina ka deklaruar se mbështet Iranin në mbrojtjen e interesave të tij dhe përballë çdo forme kërcënimi, sipas një komunikate të publikuar sot nga diplomacia kineze, pak përpara bisedimeve të rëndësishme mes Teheranit dhe Uashingtonit.

”Pekini mbështet Iranin në mbrojtjen e sovranitetit, sigurisë dhe dinjitetit kombëtar si edhe të të drejtave dhe interesave të tij legjitime”, deklaroi zëvendësministri kinez i Punëve të Jashtme, Miao Deyu, gjatë një takimi në kryeqytetin kinez me homologun e tij iranian, Kazem Gharibabadi.

”Kina kundërshton çdo kërcënim të njëanshëm ose përdorim të forcës në marrëdhëniet ndërkombëtare”, theksoi Miao gjatë bisedës me përfaqësuesin iranian, i cili e informoi atë mbi situatën e brendshme në Iran dhe mbi zhvillimet që lidhen me programin bërthamor të Teheranit, thuhet në komunikatën kineze të bërë publike sot./  /Ad.Ab./  a.jor.

The post PEKIN – Kina mbështet Iranin dhe kundërshton çdo kërcënim ndaj tij appeared first on Agjencia Telegrafike Shqiptare.

ATHINË, 6 shkurt /ATSH-ANA/ – Një burrë rezulton i zhdukur pasi tentoi të kalonte me makinë një rrugë të përmbytur pranë Komotinit, në Greqinë veriore, ndërsa reshjet e dendura në disa rajone të vendit shkaktuan probleme serioze në qarkullim dhe çuan në mbylljen e shkollave.

Sipas një dëshmitari, shoferi i zhdukur u përpoq të kalonte një kalim ujor në zonën Ifestos, afër Komotinit, ku që nga orët e para të së enjtes ka pasur reshje të forta.

Dyshohet se automjeti i tij u rrëmbye nga ujërat e rrëmbyeshme të lumit Vozvozis.

Operacionet e kërkim-shpëtimit u vështirësuan për shkak të nivelit të lartë të ujit, ndërsa në terren u angazhuan shërbimet emergjente, policia greke dhe zyrtarë të Mbrojtjes Civile për të lokalizuar makinën dhe drejtuesin e saj.

Ndërkohë, kryebashkiaku i Pyrgos, Stathis Kannis, në Peloponezin veriperëndimor, urdhëroi mbylljen e shkollave fillore dhe të mesme për sot, për shkak të kushteve të rrezikshme të motit dhe problemeve në infrastrukturën e qytetit dhe rrjetin rrugor. Një rrëshqitje dhe shembja e një ure mbi lumin Kladeos, në zonën Koskina të Olimpisë së Lashtë, dëmtuan tubacionin kryesor të ujësjellësit, duke lënë pa ujë Pyrgosin dhe Olimpin antik.

Kannis bëri të ditur gjithashtu se tre shkolla u evakuuan në një zonë të Pyrgosit me histori përmbytjesh, ndërsa shprehu shqetësim për rrezikun e daljes nga shtrati të lumit Alfios.

Në ishullin e Samothrakës, reshjet e vazhdueshme i kthyen përrenjtë në rrjedha të furishme, duke rrëmbyer degë, gurë dhe dhe.

Kryebashkiaku Thanassis Vitsas tha se ishulli është mësuar me pamje të tilla, pasi relievi i tij bën që të nevojiten reshje të gjata për të ndikuar seriozisht në qarkullim.

Duke bërë një bilanc të reshjeve, Observatori Kombëtar i Athinës njoftoi se sasitë më të dendura të shiut u regjistruan në disa zona të Peloponezit.

Sipas rrjetit të stacioneve automatike, reshjet më të mëdha u shënuan në Andritsena të prefekturës Ilia (114 milimetra), pasuar nga Stemnitsa në Arkadi (98,6 milimetra) dhe Mystras në Lakoni (88,6 milimetra).

Observatori theksoi se reshje pati pothuajse në të gjitha rajonet e Greqisë./  /Ad.Ab./ a.jor.

The post GREQI – Një i zhdukur dhe reshje të dendura shkaktojnë probleme në disa rajone appeared first on Agjencia Telegrafike Shqiptare.

MILANO, 6 shkurt /ATSH/ – Olimpiada dimërore Milano–Cortina 2026, që fillon sot, zhvillohet në një moment historik të ngarkuar me tensione, kur rendi ndërkombëtar duket gjithnjë e më i brishtë dhe konfliktet po rikthehen si mjet i zakonshëm i politikës globale.

Në këtë klimë pasigurie, Lojërat Olimpike shfaqen jo vetëm si një ngjarje sportive, por si një simbol i rrallë i bashkimit dhe i vlerave të përbashkëta njerëzore, sipas Euronews.

Italia, vend pritës i olimpiadës, përpiqet ta shndërrojë këtë edicion në një festë që shkon përtej sportit, duke ndërthurur traditën olimpike me kulturën, historinë dhe mikpritjen që e karakterizon.

Milano dhe Cortina d’Ampezzo nuk ofrojnë vetëm pista gare dhe arena sportive, por një hapësirë ku kombet mblidhen në kushte barazie, larg logjikës së përplasjes dhe armiqësisë.

Që nga zanafilla e tyre në Greqinë e lashtë, Lojërat Olimpike janë menduar si një institucion paqeje.

Ato shoqëroheshin nga Armëpushimi Olimpik, një marrëveshje e shenjtë që detyronte qytet-shtetet të ndalonin luftërat dhe të garantonin sigurinë e atletëve dhe të udhëtarëve gjatë zhvillimit të Lojërave.

Për më shumë se 1 000 vjet, ky armëpushim u respektua dhe u zbatua edhe ndaj fuqive më të mëdha të kohës, duke treguar se edhe në një botë të dominuar nga rivalitetet, vlerat e përbashkëta mund të vendosen mbi interesat e ngushta politike dhe ushtarake.

Në dallim nga arenat romake, ku dhuna dhe dominimi ishin pjesë e spektaklit, Olimpiada përfaqësonte një vizion alternativ të qytetërimit.

Ajo lartësonte konkurrencën paqësore, dinjitetin njerëzor dhe ekselencën, duke e parë forcën jo si mjet shtypjeje, por si shprehje të disiplinës dhe vetëpërmbajtjes.

Sot, ky vizion përballet me sfida serioze.

Lufta në Ukrainë, krizat humanitare në Gaza, konfliktet e vazhdueshme në Lindjen e Mesme, Afrikë dhe rajone të tjera tregojnë se ideja se forca bën të drejtën po rikthehet rrezikshëm në skenën ndërkombëtare.

Ringjallja e Olimpiadës moderne në vitin 1896 u frymëzua pikërisht nga dëshira për t’i kundërvënë kësaj logjike një model tjetër marrëdhëniesh mes kombeve.

Sporti u pa si një mjet edukimi, dialogu dhe ndërtimi besimi, jo si një iluzion idealist, por si një nevojë reale për bashkëjetesë në një botë të ndërlidhur.

Historia moderne ofron shembuj konkretë të këtij roli.

Në disa raste, gjatë olimpiadave janë hapur korridore humanitare, janë shmangur përplasje ushtarake dhe janë krijuar kushte për komunikim diplomatik mes palëve në konflikt, duke dëshmuar se sporti mund të krijojë hapësira të përkohshme paqeje.

Në një epokë të sfidave globale, ku ndryshimet klimatike, pabarazitë sociale, migracioni masiv dhe zhvillimi i shpejtë teknologjik po ndryshojnë jetën e njerëzve, zgjidhjet nuk mund të vijnë nga konfrontimi dhe politika me rezultat zero.

Ato kërkojnë bashkëpunim, besim dhe institucione të forta shumëpalëshe.

Evropa e njeh këtë realitet më mirë se kushdo tjetër. E ndërtuar mbi përvojën shkatërruese të dy luftërave botërore, ajo u konceptua si një projekt paqeje i bazuar në ligj, dialog dhe respekt të ndërsjellë, parime që sot po vihen në provë nga krizat e reja.

Në këtë kontekst, olimpiada e Milano–Cortinas fiton një domethënie që shkon përtej medaljeve, rekordeve dhe ceremonive.

Ajo ofron një moment reflektimi për rolin e Evropës dhe të komunitetit ndërkombëtar në mbrojtjen e paqes dhe të rendit të bazuar në rregulla.

Thirrja për respektimin e Armëpushimit Olimpik, e mbështetur nga Kombet e Bashkuara dhe nga 165 shtete, e forcon këtë mesazh, duke e kthyer olimpiadën në një apel simbolik për vetëpërmbajtje, dialog dhe tolerancë në një botë të përçarë.

Milano–Cortina 2026 mund të mbetet në kujtesë jo vetëm për sukseset sportive, por edhe si një kujtesë se njerëzimi ka ende zgjedhje.

Në një kohë kur frika dhe forca po fitojnë terren, kjo olimpiadë ofron një skenë ku dinjiteti, bashkëpunimi dhe përgjegjësia e përbashkët mund të riafirmohen si themele të qytetërimit modern./  /Ad.Ab./  a.jor.

The post KOMENT – Milano 2026 një olimpiadë që bën thirrje për paqe në një botë në përplasje appeared first on Agjencia Telegrafike Shqiptare.

LONDËR, 5 shkurt /ATSH-DPA/ – Kryeministri britanik Keir Starmer u ka kërkuar falje viktimave të Jeffrey Epstein për emërimin e Peter Mandelson si ambasador të Britanisë së Madhe në Uashington, ndërsa përpiqet të përballojë një krizë politike.

Starmer këmbënguli sot se “askush prej nesh nuk e dinte thellësinë e errësirës” së marrëdhënies së Mandelson me të dënuarin për krime seksuale, në kohën kur ai u përzgjodh për këtë detyrë.

Mes pasigurive në rritje për të ardhmen e tij politike, kryeministri tha se ndante “zemërimin dhe frustrimin” e kolegëve për këtë çështje, por u zotua se do të vazhdojë detyrën si kryeministër.

“U zgjodha në vitin 2024 me një mandat për ta ndryshuar vendin për mirë dhe këtë kam ndërmend ta bëj”, tha Starmer duke u përballur me  zemërimin e deputetëve laburistë për vendimin e tij.

Ai e trajtoi skandalin në fillim të një fjalimi mbi programin qeveritar të rigjallërimit të komuniteteve në qytetin jugor të Hastings.

“Ka qenë e njohur publikisht prej kohësh që Mandelson e njihte Epstein, por askush prej nesh nuk e dinte thellësinë e errësirës së asaj marrëdhënieje”, tha Starmer.

“Viktimat e Epstein kanë jetuar me trauma që shumica prej nesh vështirë se mund t’i kuptojë, dhe janë detyruar t’i përjetojnë ato sërish e sërish”, tha ai.

“Dua të them këtë, më vjen keq,  më vjen shumë keq për atë që ju është bërë, më vjen keq që kaq shumë njerëz me pushtet ju dështuan, më vjen keq që besova gënjeshtrat e Mandelson dhe e emërova, dhe më vjen keq që edhe sot jeni të detyruar ta shihni këtë histori të shpaloset sërish publikisht”, shtoi  Starmer duke u kërkuar falje viktimave të Epstein.

“Por, dua të them edhe këtë: në këtë vend, ne nuk do të kthejmë kokën mënjanë, nuk do të ngremë supet dhe nuk do t’i lejojmë të pushtetshmit ta trajtojnë drejtësinë si opsionale. Do të ndjekim të vërtetën, do të mbrojmë integritetin e jetës publike dhe do të bëjmë gjithçka që është në fuqinë tonë, në interes të drejtësisë, për të siguruar llogaridhënie. Kjo është ajo që publiku pret, ajo që viktimat meritojnë dhe ajo që do të bëj”, shtoi ai./ /Ad.Ab./  a.jor.

The post LONDËR – Starmer u kërkon falje viktimave të Epstein për skandalin Mandelson appeared first on Agjencia Telegrafike Shqiptare.

LISBONË, 5 shkurt /ATSH-DPA/ – Stuhi të rënda kanë shkaktuar shkatërrime të shumta në Gadishullin Iberik, duke lënë të paktën 11 të vdekur në Portugali që nga java e kaluar dhe duke detyruar mijëra njerëz të evakuohen në Spanjë, ndërsa autoritetet paralajmërojnë për mot të ekstrem në ditët në vijim.

”Në Portugali, një burrë 70-vjeçar u gjet i vdekur në makinën e tij, e cila ishte përfshirë nga uji i një lumi në komunën e Serpas”, raportoi sot agjencia shtetërore e lajmeve LUSA.

Vdekja e tij rrit numrin e të vdekurve nga stuhitë në Portugali që nga java e kaluar në 11 persona.

Ministri portugez i Ekonomisë, Manuel Castro Almeida, vlerësoi se dëmi i shkaktuar nga stuhitë arrin mbi 4,0 miliardë euro (rreth 4,7 miliardë dollarë), raportoi  sot transmetuesi shtetëror RTP.

Pesë persona humbën jetën kur sistemi i stuhive atlantike kaloi në disa zona me shpejtësi erë mbi 200 kilometra në orë.

Pesë të tjerë vdiqën në ditët pasuese gjatë operacioneve të pastrimit dhe rikuperimit./ /Ad.Ab./

The post PORTUGALI – 11 viktima dhe miliarda euro dëme pas stuhive katastrofike appeared first on Agjencia Telegrafike Shqiptare.

UASHINGTON, 5 shkurt /ATSH/ – Presidenti amerikan, Donald Trump, paralajmëroi liderin suprem iranian, Ajatollah Ali Khamenei, duke thënë se duhet të jetë “shumë i shqetësuar”, ndërkohë që rifillojnë bisedimet e paraformale bërthamore pas sulmeve amerikane ndaj objekteve bërthamore iraniane vitin e kaluar, sipas Reuters.

Tensionet mes dy vendeve janë rritur pas shtypjes brutale të protestave antiqeveritare në Iran.

Trump ka rritur prezencën ushtarake në rajon, duke dërguar një flotë të madhe dhe duke kërcënuar përsëri me sulme të reja, ndërsa Irani ka paralajmëruar për hakmarrje të shpejtë ndaj forcave dhe objektivave amerikane në Lindjen e Mesme. Një dron iranian u rrëzua nga forcat amerikane këtë javë.

Bisedimet janë caktuar të zhvillohen nesër në Muskat, kryeqytetin e Omanit, me pjesëmarrjen e ministrit të Jashtëm iranian, Abbas Araghchi, dhe përfaqësuesit special të Trump, Steve Witkoff.

Kërkesa amerikane përfshin diskutime mbi programin bërthamor, raketat dhe mbështetjen për grupe militante, ndërsa Irani kërkon të fokusohet vetëm në programin bërthamor dhe heqjen e sanksioneve.

Kjo diferencë në agjendë ka rritur dyshimet për dështimin e negociatave, pasi SHBA-ja kërkonte një dialog më të gjerë, ndërsa Irani insiston të mos diskutojë për raketat, të cilat i konsideron për vetëmbrojtje kundër Izraelit.

Rifillimi i bisedimeve vjen pas dështimit të negociatave indirekte në mes të vitit 2025, pas sulmeve izraelite dhe më pas goditjeve amerikane ndaj objekteve bërthamore iraniane. Trump ka thënë se këto sulme parandaluan një konflikt më të gjerë rajonal dhe se Irani po tentonte të rindizte programin e tij bërthamor në vende alternative.

Irani hyn në bisedime duke përballur presion të brendshëm nga protestat e shtypura dhe dobësim të ndikimit rajonal pas goditjeve izraelite ndaj Hezbollahut në Liban dhe rënies së Bashar al-Assad në Siri. Me tensionet dhe flotat e vendosura në rajon, bisedimet në Oman kanë rëndësi të madhe për shpërshkallëziin e situatës, edhe pse rreziku i përleshjeve mbetet i lartë.  /Ad.Ab./ a.jor.

The post FOKUS – Trump paralajmëron Iranin përpara negociatave në Oman appeared first on Agjencia Telegrafike Shqiptare.

PEKIN, 5 shkurt /ATSH/ – Presidenti kinez, Xi Jinping i tha homologut të tij amerikan, Donald Trump se Shtetet e Bashkuara duhet të tregohen të kujdesshme në furnizimin e Tajvanit me armë, gjatë një bisede telefonike të zhvilluar mbrëmë, sipas  BBC.

Sipas medias shtetërore kineze, Xi e quajti Tajvanin çështjen më të rëndësishme në marrëdhëniet Kinë-SHBA.

Sipas agjencisë shtetërore Hsinhua, Xi tha se i kushton rëndësi të madhe marrëdhënieve me Uashingtonin dhe shprehu shpresën se të dyja palët do të gjejnë mënyra për të zgjidhur mosmarrëveshjet.

Trump e përshkroi bisedën si të shkëlqyer.

Telefonata vjen pas një vale vizitash të liderëve perëndimorë në Kinë muajt e fundit, përfshirë kryeministrin britanik Keir Starmer, në përpjekje për të rivendosur marrëdhëniet me ekonominë e dytë më të madhe në botë.

Vetë Trump pritet të vizitojë Kinën në prill, një udhëtim për të cilin tha se e pret me padurim.

Trump shtoi se Pekini po shqyrton blerjen e 20 milionë tonëve sojë amerikane, nga rreth 12 milionë tonë aktualisht.

”Marrëdhënia me Kinën dhe marrëdhënia ime personale me presidentin Xi, është jashtëzakonisht e mirë, dhe të dy e kuptojmë sa e rëndësishme është ta mbajmë kështu”, shkroi ai në një postim në Truth Social.

Në dhjetor, administrata Trump njoftoi një shitje të madhe armësh për Tajvanin me vlerë rreth 11 miliardë dollarë.

Pekini reagoi duke thënë se kjo përpjekje për të mbështetur pavarësinë e Tajvanit do të përshpejtojë shtytjen drejt një situate të rrezikshme dhe të dhunshme në Ngushticën e Tajvanit./   /Ad.Ab./ a.jor.

The post PEKIN – Xi: SHBA të jetë e kujdesshme në furnizimin e Tajvanit me armë appeared first on Agjencia Telegrafike Shqiptare.

MYNIH, 5 shkurt /ATSH-DPA/ – Reza Pahlavi, djali i shahut të fundit të Iranit dhe një nga figurat më të njohura të opozitës iraniane në mërgim, pritet të marrë pjesë javën e ardhshme në Konferencën e Sigurisë në Mynih, thanë burimet.

Organizatorët i thanë se Pahlavi, 65 vjeç, ka konfirmuar pjesëmarrjen në konferencën që do të mbahet nga 13 deri më 15 shkurt dhe që mbledh liderë të lartë politikë dhe ekspertë të sigurisë në hotelin ”Bayerischer Hof” në Mynih.

Qeveria e Iranit fillimisht ishte ftuar në këtë konferencë, por më pas ftesa u tërhoq pas shtypjes së dhunshme të protestave, ku mbetën të vrarë mijëra persona.

Ministria e Jashtme e Gjermanisë kishte këshilluar kundër ftesës për Teheranin.

Pahlavi ka shprehur mbështetje për protestat masive kundër udhëheqjes iraniane dhe shihet gjerësisht si figura më e njohur dhe me ndikim e opozitës iraniane jashtë vendit.

Imazhet e tij janë shfaqur në tubime solidariteti për lëvizjen protestuese iraniane, përfshirë edhe në Gjermani.

Një demonstratë është planifikuar në Mynih më 14 shkurt nën sloganin ”Të drejtat e njeriut dhe liria në Iran. Solidaritet ndërkombëtar me popullin iranian”.

Pahlavi ka bërë thirrje për pjesëmarrje në këtë tubim përmes rrjeteve sociale, ndërsa organizatorët synojnë të mobilizojnë deri në 100 000 persona.

Më shumë se 60 liderë botërorë dhe rreth 100 ministra të Jashtëm dhe të Mbrojtjes pritet të marrin pjesë në konferencë.

Pahlavi mori pjesë për herë të fundit në këtë event në vitin 2023.

Detajet mbi paraqitjet e tij të planifikuara këtë vit ende nuk janë bërë të ditura.

Babai i tij, Mohammad Reza Shah Pahlavi, sundoi Iranin nga viti 1941 deri në rrëzimin e tij gjatë Revolucionit Islamik të vitit 1979.

Reza Pahlavi, i cili ishte shpallur princ i kurorës nga i ati, jeton prej dekadash në mërgim në Shtetet e Bashkuara të Amerikës./  /Ad. Ab./  a.jor.

The post MYNIH – Reza Pahlavi në Konferencën e Sigurisë mes tensioneve për Iranin appeared first on Agjencia Telegrafike Shqiptare.

BERLIN, 5 shkurt /ATSH-DPA/ – Avionët nuk kanë mundur të nisen nga aeroporti ”Berlin Brandenburg” (BER) sot në mëngjes për shkak të kushteve të akullta, bëri të ditur një zëdhënëse e aeroportit.

”Aktualisht nuk po kryhen nisje nga BER për shkak të kushteve të motit”, tha ajo duke shtuar se avionët nuk mund të nisen për shkak të shiut që ngrin shpejt.

Sipas saj, ndërprerja prek vetëm nisjet, ndërsa fluturimet që mbërrijnë vijojnë të ulen normalisht.

Mbetet e paqartë se sa do të zgjasë pezullimi i ngritjeve.

Pasagjerët duhet të presin anulime fluturimesh dhe vonesa të konsiderueshme dhe këshillohen të kontrollojnë statusin e fluturimeve të tyre pranë kompanive ajrore.

Ndërkohë, Shërbimi Meteorologjik Gjerman (DWD) paralajmëroi për një rrezik të lartë të kushteve të rrezikshme të akullit në Berlin, për shkak të shiut që ngrin shpejt./  /Ad.Ab./ a.jor.

The post GJERMANI – Shiu i akullt ndalon fluturimet në aeroportin e Berlinit appeared first on Agjencia Telegrafike Shqiptare.

BERLIN/NJU JORK, 4 shkurt /ATSH-DPA/ – Kushtet e jetesës për migrantët dhe pasardhësit e tyre në Gjermani janë përkeqësuar, deklaroi sot  organizata ndërkombëtare për të drejtat e njeriut Human Rights Watch (HRW).

“Ngritja e politikave regresive për migracionin dhe azilin, shtimi i krimeve dhe gjuhës së urrejtjes, si dhe kufizimet ndaj lirisë së shprehjes dhe tubimit kanë ngritur shqetësime serioze,” thuhet në raportin e HRW për Gjermaninë.

Sipas Almaz Teffera, studiuese e HRW për çështjet e racizmit, retorika politike e partisë së ekstremit të djathtë Alternativa për Gjermaninë (AfD) është përvetësuar gjithnjë e më shumë edhe nga partitë demokratike. Ajo e bëri këtë deklaratë në Berlin, gjatë prezantimit të raportit vjetor më të fundit të organizatës. AfD ka në qendër të programit të saj kërkesën për ligje më të ashpra mbi emigracionin.

Teffera theksoi se është e dëmshme që fillimisht njerëzit me prejardhje migrante të etiketohen si problem dhe më pas të sqarohet se ”migrantët e mirë që punojnë fort këtu nuk janë, gjoja, objekt i kritikave”.

Sa i përket politikës së jashtme, drejtori i HRW për Gjermaninë, Philipp Frisch, tha se si qeveria e mëparshme e qendrës së majtë, ashtu edhe ajo aktuale e qendrës së djathtë, kanë shpërdoruar kredinë morale të Gjermanisë në arenën ndërkombëtare, duke humbur kështu ndikim.

Sipas Frisch, mbështetja pothuajse e pakushtëzuar e qeverisë gjermane për qeverinë izraelite, përballë sulmeve sistematike ndaj popullsisë civile palestineze në Rripin e Gazës, është arsyeja kryesore për këtë humbje besueshmërie dhe influence ndërkombëtare./ /Ad.Ab./ a.jor.

The post FOKUS – HRW: Situata për migrantët në Gjermani është përkeqësuar appeared first on Agjencia Telegrafike Shqiptare.

NJU JORK, 4 shkurt /ATSH/ – Skadimi i traktatit New START, marrëveshja e fundit që rregullonte dhe kufizonte arsenalet bërthamore të Shteteve të Bashkuara dhe Rusisë, shënon një kthesë të rrezikshme në arkitekturën globale të sigurisë, sipas AP.

Pakti i fundit i mbetur për armët bërthamore midis Rusisë dhe Shteteve të Bashkuara skadon nesër duke hequr çdo kufizim në dy arsenalet më të mëdha atomike për herë të parë në më shumë se gjysmë shekulli.

Dy fuqitë që zotërojnë mbi 90 për qind të armëve bërthamore në botë mbeten pa asnjë kufizim ligjor mbi numrin e kokave bërthamore strategjike dhe mjeteve që i transportojnë ato.

Ky zhvillim nuk është thjesht një ngjarje teknike apo procedurale, por një ndryshim thelbësor që rrit ndjeshëm rrezikun e përshkallëzimit, keqinterpretimit dhe destabilizimit global.

New START kishte shërbyer si shtylla e fundit e një sistemi kontrolli armësh që nisi gjatë Luftës së Ftohtë, kur Uashingtoni dhe Moska, pavarësisht armiqësisë ideologjike, arritën të kuptonin se kufizimi i armëve bërthamore ishte një interes i përbashkët ekzistencial.

Marrëveshja vendoste kufij të qartë: jo më shumë se 1 550 koka bërthamore të vendosura dhe jo më shumë se 700 raketa ndërkontinentale, raketa të lëshuara nga nëndetëset dhe bombardues strategjikë për secilën palë.

Po aq e rëndësishme sa vetë shifrat ishte edhe mekanizmi i verifikimit, përmes inspektimeve në terren, që krijonte transparencë dhe ulte dyshimet reciproke.

Pa këto kufizime, rreziku i një gare të re armatimi bëhet real dhe i menjëhershëm.

Ekspertët paralajmërojnë se të dyja palët kanë kapacitete teknike dhe industriale për të rritur relativisht shpejt numrin e armëve të vendosura.

Në një mjedis të tillë, vendimmarrja nuk udhëhiqet më nga logjika e stabilitetit afatgjatë, por nga impulsi për të mos mbetur prapa rivalit.

Kjo logjikë e sigurisë përmes epërsisë ka prodhuar historikisht cikle të rrezikshme përshkallëzimi.

Dimensioni politik e ndërlikon edhe më tej situatën.

Oferta e presidentit rus Vladimir Putin për të respektuar kufijtë e New START edhe për një vit tjetër, nëse SHBA-ja bën të njëjtën gjë, u pa nga disa si një përpjekje për të blerë kohë për negociata, por nga të tjerë si një manovër taktike për të zhvendosur përgjegjësinë tek Uashingtoni.

Nga ana e tij, presidenti amerikan Donald Trump ka shprehur interes për ruajtjen e kufizimeve bërthamore, por ka insistuar në përfshirjen e Kinës në një marrëveshje të re.

Ky kushtëzim ka bllokuar çdo përparim konkret, pasi Pekini refuzon të pranojë kufizime mbi një arsenal që është shumë më i vogël se ai i SHBA-së dhe Rusisë, edhe pse në rritje të shpejtë.

Kjo situatë hap rrugën për një garë trepalëshe armatimi. Në mungesë të kufijve, SHBA-ja dhe Rusia mund të rrisin arsenalet e tyre për të ruajtur epërsinë reciproke, ndërsa Kina, duke u ndjerë e rrethuar dhe e pambrojtur, mund të përshpejtojë ndjeshëm zgjerimin e kapaciteteve të saj bërthamore.

Një konkurrencë e tillë nuk do të kufizohej vetëm në numra, por edhe në teknologji të reja, duke përfshirë armë hipersonike, sisteme autonome dhe platforma të reja bartëse.

Konteksti i luftës në Ukrainë e bën këtë skenar edhe më alarmues.

Që nga fillimi i pushtimit në shkurt 2022, Kremlini ka përdorur vazhdimisht kërcënimin bërthamor si instrument presioni strategjik. Rishikimi i doktrinës bërthamore ruse në vitin 2024, i cili ul pragun për përdorimin e armëve bërthamore, sinjalizon një gatishmëri më të madhe për t’i përfshirë ato në llogaritjet ushtarake. Kjo përfaqëson një ndryshim të rrezikshëm nga parimi tradicional i përdorimit vetëm si mjet parandalimi ekstrem.

Në të njëjtën kohë, zhvillimi i armëve të reja ruse, si raketat me energji bërthamore dhe dronët nënujorë të armatosur bërthamor, synon të kapërcejë sistemet perëndimore të mbrojtjes raketore. Këto armë, për nga natyra e tyre e re dhe shpesh e paprovuar plotësisht, shtojnë pasigurinë dhe e bëjnë edhe më të vështirë vlerësimin e qëllimeve dhe kapaciteteve reale të palës tjetër.

Nga ana amerikane, planet për sistemin e mbrojtjes raketore “Golden Dome” dhe sinjalet për një rikthim të mundshëm të testeve bërthamore për herë të parë që nga viti 1992 kanë shkaktuar shqetësim të thellë në Moskë dhe Pekin. Historikisht, çdo përpjekje për të ndërtuar mburoja të fuqishme mbrojtëse ka nxitur palën tjetër të rrisë arsenalin sulmues, për të garantuar se mund të depërtojë çdo sistem mbrojtjeje. Kjo dinamikë e lidh ngushtë zhvillimin e armëve mbrojtëse me rritjen e armëve ofensive, duke ushqyer një spirale të rrezikshme konkurrimi.

Çmontimi i traktateve të mëparshme, nga Traktati ABM te ai INF, ka dobësuar gradualisht sistemin e kontrollit të armëve. New START ishte pengesa e fundit ndaj një gare të pakufizuar. Me skadimin e tij, bota përballet me një boshllëk normativ dhe ligjor, ku çdo veprim justifikohet nga nevoja për siguri kombëtare, por në praktikë rrit pasigurinë kolektive.

Në thelb, ajo që po ndodh nuk është vetëm një krizë marrëveshjesh, por një krizë besimi dhe komunikimi strategjik. Pa mekanizma verifikimi, pa kanale të qëndrueshme dialogu dhe pa kufij të pranuar reciprokisht, rreziku i keqllogaritjeve rritet ndjeshëm.

Në një botë të karakterizuar nga konflikte rajonale, polarizim politik dhe përparime të shpejta teknologjike, mungesa e kontrollit bërthamor përbën një kërcënim ekzistencial.

Siç paralajmërojnë ekspertët e sigurisë, skadimi i New START mund të shënojë fillimin e një periudhe të re të konkurrencës bërthamore globale, më të paqëndrueshme dhe më të paparashikueshme se ajo e Luftës së Ftohtë.

Ndryshe nga ajo epokë, sot mungon një arkitekturë e fortë marrëveshjesh dhe një kulturë e konsoliduar e menaxhimit të krizave.

Kjo e bën botën jo më të sigurt, por dukshëm më të ekspozuar ndaj rreziqeve që dikur konsideroheshin të kontrolluara./  /Ad.Ab./  a.jor.

The post ANALIZË – Fundi i traktatit New START rikthen botën në epokën e pasigurisë bërthamore appeared first on Agjencia Telegrafike Shqiptare.

RAFAH, 4 shkurt /ATSH-AFP/ – Sulmet izraelite mbi Rripin e Gazës kanë shkaktuar vdekjen e 17 personave, përfshirë tre fëmijë, sot në mëngjes, njoftoi Mbrojtja Civile e territorit palestinez, në një bilanc të ri.

Më herët, ushtria izraelite kishte bërë të ditur se kishte kryer sulme, pas të shtënave ndaj ushtarëve të saj, të cilat kanë plagosur rëndë një oficer./ (vijon) /Ad.Ab./ a.jor.

The post GAZA – 17 të vrarë pas sulmeve izraelite appeared first on Agjencia Telegrafike Shqiptare.

BERLIN, 4 shkurt /ATSH-DPA/ – Kancelari gjerman Friedrich Merz niset sot  për vizitën e tij të parë në rajonin e pasur dhe strategjikisht të rëndësishëm të Gjirit.

Ndalesa e parë do të jetë Arabia Saudite, e ndjekur nga Katari dhe Emiratet e Bashkuara Arabe.

Kancelari Merz synon të intensifikojë partneritetet me vendet prodhuese të naftës dhe gazit, me pritshmëri që bashkëpunimi të forcohet veçanërisht në sektorin e energjisë.

Në bisedime do të përfshihen edhe marrëveshjet për armë.

Eksportet e armëve drejt këtyre tre vendeve, të qeverisura në mënyrë autokratike, janë trajtuar me shumë kujdes nga qeveritë e mëparshme gjermane për shkak të shqetësimeve mbi të drejtat e njeriut dhe përfshirjes së tyre në konflikte rajonale.

Qeveria e Merz tani synon të zbusë këtë qasje kufizuese.

Një temë e rëndësishme do të jetë përshkallëzimi i situatës në dhe rreth Iranit.

Së fundmi janë rritur sërish shqetësimet për një luftë të re, pasi presidenti amerikan Donald Trump ka kërcënuar vazhdimisht udhëheqjen në Teheran me sulme ushtarake, pjesërisht për shkak të veprimeve brutale të forcave shtetërore kundër demonstruesve gjatë protestave masive të fundit.

Mendohet se mijëra, në mos dhjetëra mijëra njerëz, janë vrarë. Ushtria amerikane ka rritur ndjeshëm praninë e saj në rajon që nga fillimi i janarit, por raportimet më të fundit thonë se negociata mes përfaqësuesve amerikanë dhe iranianë pritet të zhvillohen të premten. /Ad.Ab./

The post BERLIN – Energjia dhe armët në qendër të vizitës së Merz në vendet e Gjirit appeared first on Agjencia Telegrafike Shqiptare.

UASHINGTON, 4 shkurt /ATSH-DPA/ – Ish-presidenti i SHBA-së, Bill Clinton, dhe bashkëshortja e tij, ish-sekretarja e Shtetit Hillary Clinton, pritet të dëshmojnë para Kongresit amerikan në fund të këtij muaji, në kuadër të një hetimi të udhëhequr nga republikanët lidhur me Jeffrey Epstein, i dënuar për krime seksuale.

James Comer, kryetari republikan i Komisionit të Mbikëqyrjes në Dhomën e Përfaqësuesve, tha se të dy kanë rënë dakord të paraqiten për pyetje, të cilat do të transkriptohen dhe filmohen.

Hillary Clinton është planifikuar të dëshmojë më 26 shkurt, ndërsa bashkëshorti i saj më 27 shkurt, të dy nën betim.

Sipas medieve amerikane, pranimi i Clintonëve për të dëshmuar i shtyu republikanët në Dhomën e Përfaqësuesve të anulojnë një votim të planifikuar për një masë “përçmimi ndaj Kongresit” ndaj tyre.

Kjo masë ishte shtyrë përpara pasi Clintonët kishin refuzuar për muaj të tërë të bashkëpunonin me hetimin parlamentar mbi aktivitetet e Epstein, duke argumentuar se hetimi ishte i motivuar politikisht.

Comer tha se anëtarët e komisionit nga të dyja partitë kanë theksuar se askush nuk është mbi ligjin, përfshirë edhe  çiftin Clinton.

Ai kritikoi ata për, sipas tij, sfidimin e përsëritur të thirrjeve zyrtare për dëshmi dhe për pranimin për të dëshmuar vetëm përballë mundësisë së procedurave për përçmim ndaj Kongresit.

Emri dhe imazhe të Bill Clinton shfaqen në dokumentet e hetimit për Epstein, megjithëse ish-presidenti ka mohuar vazhdimisht çdo sjellje të pahijshme të lidhur me njohjen e tij me Epstein.

Jeffrey Epstein, një multimilioner, drejtoi për vite me radhë një rrjet trafikimi seksual, duke shfrytëzuar dhjetëra gra të reja dhe të mitura.

Ai vdiq në burg në vitin 2019, në moshën 66-vjeçare, ndërsa priste gjyqin për akuza federale për trafikim seksual./  /Ad.Ab./ a.jor.

The post SHBA – Bill dhe Hillary Clinton do të dëshmojë në Kongres për çështjen Epstein në fund të shkurtit appeared first on Agjencia Telegrafike Shqiptare.

NJU JORK, 3 shkurt /ATSH/ – Arkeologët kanë zbuluar dy vegla prej druri që datojnë rreth 430 000 vjet më parë në zonën arkeologjike Marathousa, në jug të Peloponezit, Greqi, sipas AP.

Ky zbulim i bën këto vegla prej druri më të vjetrat që janë gjetur ndonjëherë në botë.

Veglat ofrojnë një pasqyrë të rrallë mbi jetën e njerëzve të lashtë, duke treguar përdorimin e drurit si mjet për punë të ndryshme përpara sen të ekzistonte Homo sapiens.

Marathousa ndodhet pranë një liqeni dhe ka qenë një zonë e pasur me kafshë dhe bimësi, gjë që e bëri vendin një mjedis ideal për njerëzit e lashtë.

Shkencëtarët besojnë se vendi mund të ketë qenë përdorur për gjueti dhe përgatitjen e ushqimit dhe veglat prej druri mund të jenë përdorur për gërmime ose punime të tjera praktike.

Një nga veglat e gjetura është një shkop i gjatë dhe i hollë prej rreth 80 centimetra, i cili mund të jetë përdorur për gërmime në baltë ose për nxjerrjen e ushqimeve të ndryshme nga toka ose uji.

Vegla e dytë është më e vogël, rreth 5,7 centimetra, dhe mendohet të jetë përdorur për formësimin e veglave prej guri ose për punë të tjera dore.

Ky nivel detajimi tregon aftësi të avancuara teknologjike për kohën.

Ruajtja e veglave prej druri është jashtëzakonisht e rrallë, sepse druri zakonisht prishet me kalimin e mijëra viteve.

Kjo bën që gjetja e tyre në Marathousa të jetë një rast unik, duke u ofruar shkencëtarëve prova të drejtpërdrejta të përdorimit të drurit nga njerëzit e lashtë.

Përveç drurit, gjetjet e tjera përfshijnë vegla prej guri dhe mbetje kafshësh, duke ndihmuar në krijimin e një pamjeje më të plotë të jetës në atë kohë.

Studiuesit nuk kanë gjetur eshtra njerëzish në vendin e gjetjes, prandaj nuk është e qartë cili grup njerëzor i përdori këto vegla.

Megjithatë, bazuar në kohën dhe vendin, shkencëtarët mendojnë se mund të kenë qenë neandertalët ose një specie tjetër homini i hershëm që jetonte në atë rajon.

Në përfundim, gjetja e veglave prej druri në Marathousa jo vetëm që thyen rekorde të vjetërsisë, por ofron edhe një dritare të rrallë për të kuptuar inovacionin dhe aftësitë teknike të njerëzve të lashtë, duke shtuar njohuritë tona mbi historinë e hershme njerëzore./  /Ad.Ab./ a.jor.

The post GREQI – Arkeologët gjejnë veglat më të vjetra në botë prej druri appeared first on Agjencia Telegrafike Shqiptare.

DUBAI, 3 shkurt /ATSH/ – Spanja do të ndalojë përdorimin e rrjeteve sociale për fëmijët nën 16 vjeç dhe do të kërkojë nga platformat të përdorin mjete të rrepta verifikimi të moshës, duke iu bashkuar Australisë, Francës dhe Danimarkës në përpjekjet për të kufizuar ndikimin e platformave digjitale tek fëmijët, sipas CNN.

“Fëmijët tanë janë të ekspozuar në një hapësirë që nuk ishte menduar kurrë për ta për t’u naviguar vetëm. Një hapësirë e mbushur me varësi, abuzim, pornografi, manipulim dhe dhunë”, tha sot kryeministri spanjoll Pedro Sanchez.

“Ne nuk do ta pranojmë më këtë, do t’i mbrojmë ata nga ‘perëndimi i egër digjital’”, theksoi ai.

Duke folur në Samitin Botëror të Qeverive në Dubai, Sanchez tha se qeveria e tij do të propozojë gjithashtu ligje të reja që parashikojnë përgjegjësi penale për drejtuesit e rrjeteve sociale në rast se ata dështojnë të heqin përmbajtje të paligjshme ose që nxitin urrejtje.

Procesi i miratimit të ligjit do të fillojë javën e ardhshme.

Australia u bë vendi i parë në botë që zbatoi një ndalim të rrjeteve sociale për nën 16-vjeçarët, duke ndaluar aksesin në 10 platforma, përfshirë Facebook, TikTok, Instagram, Snapchat dhe X.

Britania e Madhe po konsideron një masë të ngjashme, ndërsa Franca dhe Danimarka kanë njoftuar së fundmi planet për të ndaluar fëmijët nën 15 vjeç të përdorin rrjetet sociale.

Të tjera vende në Evropë gjithashtu po ndjekin një qasje më të ashpër ndaj kompanive të rrjeteve sociale.

“Spanja u është bashkuar pesë vendeve  të tjera evropiane të përkushtuara për zbatimin më të rreptë, më të shpejtë dhe më efektiv të rregullave të rrjeteve sociale”, tha Sanchez.

Ai nuk përmendi vendet, por shpjegoi se grupi do të mbajë takimin e parë në ditët e ardhshme me qëllim koordinimin e zbatimit përtej kufijve./  /Ad.Ab./ a.jor.

The post DUBAI – Sanchez: Qeveria do të ndalojë rrjetet sociale për fëmijët nën 16 vjeç appeared first on Agjencia Telegrafike Shqiptare.