Debati mbi prishjen e piramidës së pagave u rikthye në vëmendje gjatë tryezës së diskutimit në emisionin “Real Story”, ku ish-prokurori Ervin Karanxha dhe analisti Arben Meçe dhanë këndvështrime kritike mbi reformën në drejtësi dhe pasojat e saj.

Karanxha e cilësoi situatën si produkt të paaftësisë së strukturave të Vettingut, duke theksuar se ligjet janë hartuar dhe miratuar nga të njëjtët aktorë që sot kërkojnë përfitime financiare, ndërsa përgjegjësia institucionale, sipas tij, mbetet e paqartë.

Nga ana tjetër, Meçe vuri theksin te rreziku i cenimit të parimit të proporcionalitetit dhe barazisë para ligjit, duke argumentuar se sistemi i posaçëm me paga të jashtëzakonshme është shkëputur nga piramida e përgjithshme e pagave dhe mungon një mekanizëm real kontrolli mbi të.

Ish-prokurori Ervin Karanxha: Ne duhet të dalim në rrënjët e këtij diskutimi. Personat që janë marrë me reformën në drejtësi kanë qenë indipedentë. Tani këta vetë i kanë bërë këto ligje. Po kërkojnë atë që u takon. Është apo nuk është ligjore, kjo është gjë tjetër. Duhet të bëhet një reformë, që nga të paaftëve në “Vetting”. Mendimi im personal është që u takon rritja e pagave. Vetë e ke thënë, vetë e ke miratuar. Pse, a nuk ka përgjegjësi ministri i Financave?! Kur shikon Kodin Penal të vjen për të qeshur, është si një film me kartona.

Analisti Arben Meçe: Kemi një sistem që është tërësisht i pavarur. E vetmja pikë që pretendohet se ka varësi, është rroga. Mungon mekanizmi i kontrollorit. Nuk është Gjykata Kushtetuese që rrit rrogën, vetëm e shqyrton në bazë të ligjeve dhe piramidës së rrogave. Gjithë sistemi i posaçëm, janë të jashtëzakonshme duke qenë të tilla edhe pagat e tyre janë të jashtëzakonshme dhe nuk bëjnë pjesë në piramidën e pagave. Ajo që na shqetëson ne në këtë moment është se cenohet parimi i proporcionalitetit dhe barazia para ligjit.

Policia Kufitare e Korçës ka konstatuar dhe ndaluar 16 emigrantë të paligjshëm të moshës dhe nacionaliteteve të ndryshme, të cilët ishin strehuar në një ndërtesë të braktisur në fshatin Qatrom.

Sipas informacioneve paraprake, emigrantët ishin fshehur në një ndërtesë në afërsi të teqesë së Qatromit, ndërsa gjatë ndërhyrjes së policisë u konstatua se njëri prej tyre kishte probleme shëndetësore, pasi kishte ndrydhur këmbën.

Menjëherë pas njoftimit nga policia kufitare, në vendngjarje mbërriti ambulanca për t’i dhënë ndihmën e parë mjekësore. Burime bëjnë me dije se kontrollet janë shtuar nga Policia Kufitare e Korçës, me qëllim jo vetëm evidentimin e emigrantëve të paligjshëm, por edhe identifikimin e personave që ndihmojnë këta shtetas për të lëvizur drejt Tiranës apo qyteteve të tjera të vendit.

Kontrollet në zonë vijojnë, ndërsa emigrantët po dërgohen drejt Drejtorisë së Kufirit dhe Migracionit në Korçë për veprime të mëtejshme.

Kryeministri Edi Rama ka reaguar në rrjetet sociale lidhur me kërkesat e gjyqtarëve për rritje pagash, duke theksuar se pagat e tyre janë të krahasueshme me ato në Greqi dhe më të larta se në Maqedoninë e Veriut dhe Malin e Zi.

Ndërkohë, juristja Brizida Gjikondi, e ftuar në emisionin “Real Story” në ABC News, e cilësoi përplasjen mes ekzekutivit dhe gjyqësorit si kryesisht politike dhe jo financiare, duke kritikuar mënyrën e komunikimit dhe përdorimin e zgjedhjeve në këtë debat, si dhe duke theksuar nevojën për më shumë kujdes institucional, veçanërisht në një çështje që është në shqyrtim nga Gjykata Kushtetuese.

“SPAK nuk është përfshirë fare në këtë, megjithëse është përmendur. Marrëdhënia ekzekutiv dhe gjyqësor është bërë si “Lufta dhe Paqja”. U është hapur “syri” gjyqtarëve dhe Unionit të Gjyqtarëve. Mendoj që vetë Rama nuk ka hallin e financës, kam përshtypjen që është një përplasje që është më shumë politike se sa ligjore. Mendoj që duhet të ishte me një standard më të lartë komunikimi. Fakti që kanë përdorur zgjedhjet është një paburrëri.

Gjithë kjo histori është nga autorët e reformës në drejtësi. Nuk u morën vetëm me reformën në drejtësi, por me financat e reformës në drejtësi. Ky është një mos pasje vizioni. Duhet kapur Demi prej brirësh dhe të jemi realistë që Rama të mos merret me pasoja, por të shikojë gjithë këtë kaos, ku përfitojnë dhe sindikata të tjerë. Gjuha e Ramës për më tepër që është në Gjykatën Kushtetuese, duhet të jetë më e kujdesshme. Po e rithem që nuk është përplasje për financat, por është tërësisht politike”, tha Gjikondi./abcnews.al

Abc News Live

Kryeministri i Grenlandës, Jens-Frederik Nielsen, paralajmëroi të hënën se, ndërsa presidenti i SHBA-së, Donald Trump, ka përjashtuar forcën ushtarake, Uashingtoni ende kërkon në thelb të kontrollojë ishullin Arktik.

Trump intensifikoi thirrjet për kontrollin e SHBA-së mbi Grenlandën në fillim të vitit, duke përmendur shqetësime për sigurinë kombëtare që lidhen me Rusinë dhe Kinën.

Disa aleatë evropianë të NATO-s kanë mbrojtur sovranitetin e Danimarkës mbi Grenlandën, dhe kanë thënë se presioni i Trump kërcënon të përçajë aleancën e NATO-s.

Presidenti i SHBA-së që atëherë është tërhequr nga kërcënimet me forcë dhe ka thënë se kishte siguruar qasje të plotë të SHBA-së në Grenlandë në një marrëveshje të NATO-s, megjithëse detajet mbeten të paqarta.

“Pikëpamja mbi Grenlandën dhe popullsinë nuk ka ndryshuar: Grenlanda do të lidhet me SHBA-në dhe do të qeveriset prej andej”, tha Nielsen në një fjalim para parlamentit të ishullit në Nuuk, duke folur nëpërmjet një përkthyesi.

Nielsen tha se SHBA-të vazhdojnë të kërkojnë “shtigje drejt pronësisë dhe kontrollit mbi Grenlandën”.

Qeveria e ishullit tha javën e kaluar se kishte nisur një studim mbi gjendjen e shëndetit mendor të popullsisë në një kohë presioni të jashtëzakonshëm.

“Disa nga bashkatdhetarët tanë kanë probleme të rënda me gjumin, fëmijët ndiejnë shqetësimin dhe ankthin e të rriturve dhe të gjithë jetojmë me pasiguri të vazhdueshme për atë që mund të ndodhë nesër. Duam ta themi shumë qartë: Kjo është plotësisht e papranueshme”, tha Nielsen.

Bisedimet diplomatike midis SHBA-së, Danimarkës dhe Grenlandës filluan javën e kaluar me zyrtarë të lartë që u takuan për të “diskutuar se si mund t’i adresojmë shqetësimet amerikane në lidhje me sigurinë në Arktik, duke respektuar linjat e kuqe të Mbretërisë”, tha ministria e Jashtme e Danimarkës.

Nielsen gjithashtu vlerësoi Danimarkën si një partner të ngushtë gjatë gjithë krizës.

Ai ka deklaruar më parë se nëse banorët e Grenlandës do të detyroheshin të zgjidhnin midis SHBA-së dhe Danimarkës, ata do të zgjidhnin Danimarkën. Fjalimi nuk përmendi pavarësinë e Grenlandës.

Për popullsinë vendase Inuit të Grenlandës, debati mbi pronësinë bie ndesh me vlerat kulturore. Sipas ligjit të Grenlandës, njerëzit mund të zotërojnë shtëpi, por jo tokën poshtë tyre, duke reflektuar konceptin Inuit të administrimit kolektiv të tokës.

Në lidhje me ngjarjen në Rrilë, ku mbeti i plagosur berberi Sokol Daci, policia ka ndaluar punonjësin Besart Kovaçi, patrullë e përgjithshme në policinë vendore të Lezhës, për veprën penale moskallëzim krimi. Kovaçi ndodhej brenda berberhanes gjatë atentatit dhe ka qëlluar me armën e shërbimit në drejtim të autorëve.

Burime pranë policisë së Lezhës bëjnë të ditur se Kovaçi ishte shoqëruar nga Merando Nikulaj, nip i Ardian Nikulajt, i cili dyshohet të ketë qenë shënjestra kryesore e sulmit.

Në ambientet e berberhanes u gjetën 16 gëzhoja pistolete, nga të cilat disa dyshohet se i përkasin armës së përdorur nga Kovaçi. Një gëzhojë tjetër që nuk i përket të njëjtës armë të efektivit ka ngritur dyshime për përdorimin e një armë të dytë në këtë shkëmbim zjarri.

Pamjet e kamerave të sigurisë tregojnë dy automjete që mbërrijnë para berberhanes, një Audi dhe një Passat. Prej tyre zbresin 7 persona, dy me kallashnikov, por edhe 3 të tjerë duket që kanë armë zjarri. Në drejtim të berberhanes u qëlluan mbi 30 plumba, tre prej të cilëve plagosën Sokol Dacin.

Policia dyshon se Merando Nikulaj mund të jetë plagosur, pasi shihet në pamjet filmike duke u larguar me vështirësi. Ai ende nuk është shoqëruar, ndërsa po kryhen kontrolle në banesa dhe biznese për gjetjen e tij.

Një mundësi për të ulur tensionet dhe për të shmangur një luftë rajonale. Media amerikane Axios raporton se një takim i nivelit të lartë mes Shteteve të Bashkuara dhe Iranit pritet të zhvillohet të premten në qytetin turk të Stambollit, me palët që do të kenë temë kryesore arritjen e një marrëveshjeje mbi programin bërthamor të Teheranit.

Axios, e cila citon dy burime nga Shtëpia e Bardhë, shkruan se Shtetet e Bashkuara do të përfaqësohen në këtë takim nga i dërguari i Trump për Lindjen e Mesme, Steve Witkoff, ndërsa Irani do të përfaqësohet nga ministri i tyre i Jashtëm, Abas Aragçi. Burimet që folën për Axios deklaruan se takimi i së premtes konsiderohet si mundësia më e mirë për arritjen e një marrëveshjeje mbi programin bërthamor të Iranit, që do të sillte një tërheqje të Presidentit amerikan Donald Trump nga një sulm ushtarak ndaj këtij shteti.

Nëse gjërat shkojnë sipas planit dhe takimi do të mbahet ditën e premte, ky do të ishte takimi i parë i drejtpërdrejtë mes zyrtarëve amerikanë dhe iranianë që pas dështimit të negociatave të qershorit të vitit të shkuar, që sollën luftën 12-ditore Izrael–Iran. Presidenti amerikan Donald Trump ka deklaruar se vetëm një marrëveshje e shpejtë mund të shmangë një përplasje të fortë ushtarake.

Axios shkruan se takimi i mundshëm mes zyrtarëve iranianë dhe atyre amerikanë vjen si rezultat i përpjekjeve intensive diplomatike të Turqisë, Egjiptit dhe Katarit përgjatë ditëve të fundit. Pavarësisht lajmit për një takim mes palëve, në prapaskenë mbetet edhe hendeku në këto bisedime. Qëndrimi i administratës Trump se çdo marrëveshje duhet të përfshijë jo vetëm programin bërthamor të Iranit, por edhe arsenalin e tij raketor dhe aleatët rajonalë, bie ndesh me qëndrimin e Teheranit se në tryezë duhet të jetë vetëm çështja bërthamore. Ende nuk është e qartë se si Witkoff dhe Aragçi do të përpiqen të kapërcejnë këtë diferencë.

I dërguari i administratës Trump për Lindjen e Mesme, Steve Witkoff, do të udhëtojë drejt Izraelit këtë të martë, ku do të takohet me kryeministrin izraelit Benjamin Netanyahu. Në axhendën e tij përfshihet edhe një takim me shefin e Shtabit të Përgjithshëm të ushtrisë izraelite (IDF), Ejall Zamir, i cili sapo është kthyer nga një vizitë pune në Uashington, ku informoi shefin e Shtabit të Përgjithshëm të SHBA-së, Dan Kein, për planet mbrojtëse dhe sulmuese të Izraelit në rast të një lufte me Iranin.

Më pas, Witkoff do të udhëtojë në Abu Dabi për bisedime trepalëshe paqeje mes Rusisë dhe Ukrainës të mërkurën dhe të enjten, përpara se të udhëtojë drejt Stambollit, nëse do të konfirmohet takimi i tij me ministrin e Jashtëm iranian Abas Aragçi.

Autoritetet doganore gjermane kanë arrestuar pesë persona këtë të hënë, 2 shkurt, të dyshuar se kanë shkelur embargon e Bashkimit Europian ndaj Rusisë, duke eksportuar mallra industriale drejt prodhuesve rusë të armëve.

Sipas hetimeve të deritanishme, të dyshuarit kanë organizuar rreth 16 mijë dërgesa drejt Rusisë, ndërsa vlera e transaksioneve të paligjshme arrin të paktën 30 milionë euro. Kështu bën të ditur Prokuroria e Përgjithshme Federale e Gjermanisë.

Arrestimet vijnë në një kohë kur autoritetet në Kiev u bëjnë thirrje liderëve europianë të forcojnë kontrollet ndaj eksporteve të mallrave industriale dhe pjesëve që Rusia mund t’i përdorë për prodhimin e armëve të përdorura në luftën kundër Ukrainës.

Mes pesë personave të akuzuar janë dy shtetas me nënshtetësi të dyfishtë gjermano-ruse dhe një shtetas me nënshtetësi të dyfishtë gjermano-ukrainase. Në qendër të hetimit ndodhet një kompani tregtare në qytetin verior gjerman Lübeck, në pronësi të njërit prej të dyshuarve, i identifikuar nga gjykata si Nikita S.

Për të fshehur aktivitetin e tyre, të dyshuarit dyshohet se kanë përdorur të paktën një kompani “guackë”(fiktive, pa zyra reale dhe aktivitet normal ekonomik) tjetër në Lübeck, blerës fiktivë brenda dhe jashtë BE-së, si edhe një kompani ruse si përfituese.

Sipas prokurorisë, “përdoruesit përfundimtarë” të mallrave të eksportuara përfshinin të paktën 24 kompani ruse të mbrojtjes. Gjithashtu, institucionet shtetërore ruse dyshohet se kanë mbështetur këto procese furnizimi.

Mallrat e eksportuara përfshinin, mes të tjerash, komponentë mekanikë dhe teknikë për prodhimin e armëve ruse dhe pajisje gjysmëpërçuese.

Në mbledhjen me dyer të mbyllura të Partisë Demokratike, ka pasur debate të ashpra nëse PD do të duhet të bojkotojë Komisionin për reformën territoriale dhe atë për reformën zgjedhore.

Megjithatë duket se PD ka braktisur bojkotin për “territorialen”.

Analisti Frrok Çupi i ftuar në “Tirana Live” në ABC News e cilësoi këtë zhvillim si një lëvizje kundër Sali Berishës, duke paralajmëruar përçarje brenda PD-së dhe lëkundje të pozicioneve të tij, ndërsa theksoi se veprimet e opozitës po bëhen kryesisht për sy të ndërkombëtarëve dhe jo si shenjë e një ndryshimi pozitiv real brenda partisë.

“Në PD nuk ka nevojë për entuziazëm se po ndodh diçka pozitive. Po ndodh diçka që është kundër Berishës dhe që ky nuk e komandon dot më. Pas këtij vendimi do të vijë përçarja në PD. Duke qenë se Berisha kërkon që ta shkatërroje me dorë të hekurt do të dalë shumë komik. Këto përbetimet që Berisha se do rrëzojë Ramën nuk shkojnë më, sepse PD hyri në ‘vathën’ e mazhorancës. Të gjitha këto PD me Berishën në krye i bëjnë për sy të ndërkombëtarëve. Atje dëgjojnë jehonën e tyre, në Strasburg dhe Bruksel. Shqipëria është goditur gjithmonë nga të vetët, por nga jashtë.

Pritet që në PD të tunden pozitat e Berishës. Godasin drejtësinë nga jashtë. Berisha e bën këtë, se paradite sulmoi një pjesë të drejtësisë dhe pasdite u jep sinjale pjesës tjetër, janë ata që Berisha ka në dorë, ose edhe ata janë neutralë që nuk i bëjnë gjë. Drejtësia jonë ka kohë që ka hyrë në ekstazë, kërkojnë rroga sa e gjithë bota, kërkojnë që të shkrijnë qeverinë. Berisha quan armike të përbetuar Irena Gjokën dhe Altin Dumani, sepse ata vepruan sipas ligjit”, tha Çupi.

Berisha ha fjalët e veta. Presioni nga 10 deputetë të PD për të marrë pjesë në komisionet e reformave, e detyroi të zhbëjë vendimin e bojkotit.

Bashkëkryetari i Komisionit të Reformës së Territoriale, Luçiano Boçi zbuloi se PD ka një vendim të ri, për tu rikthyer në komisionet e posaçme parlamentare.

“Qëndrimi i shprehur i PD, pas diskutimeve në grupin parlamentar dhe më pas në kryesinë e vogël, është që PD do të vijojë të jetë pjesë. Në një mbledhje sa më të afërt, të dakordësuar mes bashkëkryetarëve, dhe do vijojë me axhendën e komisionit”, tha Boçi.

Si vendimi i ri, ka dhe një kusht të ri. Boçi paralajmëroi se komisioni duhet të përfundojë me një produkt, jo me dy.

“Ne nuk heqim dorë nga qëndrimi ynë, duhet të ketë një finalizim, një dalje të vetme, dhe kjo dalje të jetë konsensual, përndryshe nuk ka përfundim. Të heqin dorë nga këto do zvogëlohet etj, duhen konsulta me qytetarë”, shtoi ai më tej.

Por si erdhi ky ndryshim 180 gradë i PD?

Në fillim, kreu i grupit parlamentar socialist, Taulant Balla gjatë paradites dha shenjat e para të tërheqjes së ultimatumit të fundit.

Më pas, doktori thirri grupin parlamentar. Aty ku vendimi i tij u vu në diskutim, nga plot 10 deputetë, shumica anëtarë të dy komisioneve. Çuditërisht edhe nga më besnikët e doktorit, Oerd Bylykbashi apo Tritan Shehu.

Megjithatë, PD ka edhe 24 orë kohë, kësaj radhe për të mos ndryshuar më mendje. Pasi projektvendimi i PS për të ndryshuar formulën e komisionit, duke i hequr opozitës bashkëkryetarin, paritetin dhe veton, ka shkuar në seancën parlamentare të së martës gati për tu votuar. Kjo do të varet nga humori i doktorit, që me dëshirën e tij do e bënte reformën në rrugë.

Vendimi i Komisionit Qendror të Zgjedhjeve për të mos miratuar listën e kandidatëve për deputetë të Listës Serbe është “në kundërshtim me të drejtën e qytetarëve për të zgjedhur në mënyrë demokratike përfaqësuesit e tyre”.

“Çdo përpjekje për të shkelur këtë parim bazë minon partneritetin mes Shteteve të Bashkuara dhe Kosovës”, tha për Radion Evropa e Lirë një zëdhënës i Ambasadës amerikane në Prishtinë.

Më 31 janar, KQZ-ja shpalli rezultatet përfundimtare të zgjedhjeve të parakohshme parlamentare të 28 dhjetorit. Por, gjatë mbledhjes, anëtarët e Komisionit miratuan listat e kandidatëve të të gjithë partive, përveç Listës Serbe – partisë kryesore të serbëve në Kosovë që ka mbështetjen e Beogradit.

Tre anëtarë të KQZ-së votuan për, dy kundër nga Lëvizja Vetëvendosje, dhe anëtarët tjerë abstenuan.

Lista Serbe më 2 shkurt është ankuar në Panelin Zgjedhor për Aneksa dhe Parashtresa për këtë vendim të KQZ-së.

Beogradi e ka prej kohësh në vëmendje fuqizimin e ushtrisë së saj, por kësaj here presidentit serb Aleksandër Vuçiç i ka “lindur” një ide e re.

Ushtria serbe do te fuqizohet shpejt me rekrutë rinj, e ata nuk do të jenë njerëz por robotë.

Sipas Vuçiç, vendi do të prezantojë mijëra robotë të armatosur në paradën e ardhshme ushtarake, pasi prodhimi i tyre do të fillojë që këtë vit, ndërsa për bërjen realitet të kësaj ideje do të kontribuoj Kina.

Vuçiç tha se do të kërkojë mbështetjen nga presidenti Xi Jingping.

Sipas presidentit serb, robotët janë të përshtatshëm sepse mund të mbajnë deri në 30 kilogramë peshë, mund ti paisësh me kamera, të bëjnë patrullime në pikat kufitare dhe gjithashtu mund ti armatosësh.

Vuçiç theksoi se Serbia mund të bëhet vendi i parë në Europë që prodhon robotë humanoid në ushtri.

Lëvizjet për forcimin e ushtrisë dhe rekrutimin e ushtarëve të rinjë, përsfhirë shërbimin e detyrueshëm ushtarak, janë të fokus të presidencës Vuçiç, ndërsa ai intensifikon edhe marrëdhëniet me Kinën.

“Në jetë duhet pasur vullnet e durim, të mirat vijnë pastaj. Ju faleminderit për demokracinë maksimale, për besimin e ri e të pastër; dhe për një fillim të ri, shumë më të ndryshëm. Ecim bashkë tani!”

Ky është reagimi i kryetarit të votëbesuar të Lidhjes Demokratike të Kosovës Lumir Abdixhiku pas mbledhjes së anëtareve të partisë të shtunën e 31 janarit.

Diskutimet brenda partisë u mbajtën me dyer të mbyllura, ku kishte edhe një kandidaturë për kryetar, ajo e Avdullah Hotit, ndërsa dyert u hapën për mediat vetëm për fjalën e kryetarit dhe votimin.

Lidhja Demokratike e Kosovës në zgjedhjet e 28 dhjetorit shënoi rezultatin e dytë më të ulët në historinë e saj me vetëm 15 deputetë.

Sipas kritikëve ky proces ishte bosh dhe nuk solli asnjë ndryshim real në parti.

Zëvendëskryeministrja dhe ministrja e Energjisë dhe Infrastrukturës, Belinda Balluku, ka uruar Persida Shkrepa për marrjen e detyrës së re në krye të Institutit të Ndërtimit, duke vlerësuar karrierën dhe përvojën e saj profesionale.

Sipas Ballukut, profesionalizmi dhe përkushtimi i Shkrepës përbëjnë një garanci të fortë për drejtimin dhe zhvillimin e mëtejshëm të këtij institucioni të rëndësishëm, si dhe për forcimin e rolit të tij në shërbim të industrisë së ndërtimit në vend.

“Suksese Persida Shkrepa në këtë detyrë dhe sfidë të re, në drejtimin e Institutit të Ndërtimit. Me një karrierë të spikatur si arkitekte, profesionalizmi, përkushtimi dhe përvoja e saj janë një garanci e fortë për drejtimin dhe zhvillimin e këtij institucioni kaq të rëndësishëm, si edhe për forcimin e rolit të tij në shërbim të industrisë së ndërtimit në vend”, shkruan zëvendëskryeministrja Balluku në “Facebook”.

Sekretari i Shtetit polak për Çështjet Evropiane, Ignacy Niemczycki, “shpreson vërtet” që SHBA-të mund ta “bindin Rusinë të jetë më krijuese” në bisedimet trepalëshe të paqes që do të rifillojnë në Abu Dhabi këtë të mërkurë.

Por, sipas tij, ndërsa “Ukraina bëri një përpjekje të konsiderueshme për t’i dhënë fund luftës”, Rusia po “përpiqet ta zgjasë diskutimet”.

Gjatë një interviste me Europe Today, Niemczycki tha se sulmet ruse në infrastrukturën energjetike civile në Kiev janë provë se Moska dëshiron të vazhdojë luftën.

Ukraina aktualisht po përjeton një mot jashtëzakonisht të ashpër, me temperatura që bien në minus 20 gradë Celsius.

“Ne e kemi parë Rusinë të synojë gjeneruesit e nxehtësisë, gjeneruesit e energjisë elektrike. Kjo është shumë shqetësuese”, tha Niemczycki.

Por Niemczycki mbetet optimist.

“Presidenti (Donald) Trump ka njoftuar se negociatat janë premtuese”, tha ai për Euronews, duke thënë se pret një “një lloj marrëveshjeje që është e dobishme për Evropën dhe që është e dobishme për SHBA-në” – por edhe “për paqen botërore, sepse kjo është ajo që është në lojë këtu”.

Se a përmban ndonjë marrëveshje e tillë ndonjë lëshim territorial ndaj Rusisë, tha ai, duhet të jetë një çështje për popullin ukrainas.

“Nuk mendoj se varet nga ne të themi se Ukraina duhet të bëjë këtë apo atë”, tha politikani, i cili këmbënguli që bisedimet duhet të “ushtrojnë presion mbi Rusinë, jo mbi Ukrainën”. Ndërsa i pyetur për afatin e fundit të vitit 2027 për Ukrainën për t’u bashkuar me Bashkimin Evropian, Niemczycki tha se “do të ishte shumë e vështirë” dhe se ndërsa ai beson se Ukraina mund t’i bashkohet bllokut së shpejti, ai “nuk do të përqendrohej aq shumë në një datë”, por në “faktin e bashkimit të Ukrainës me BE-në”

Tre persona humbën jetën pasi një aeroplan trajnimi u rrëzua në rajonin Orenburg të Rusisë të hënën, tha Ministria e Situatave të Emergjencave.

Aeroplani Diamond DA, i operuar nga Universiteti Shtetëror i Aviacionit Civil të Shën Petersburgut, po kryente një fluturim trajnimi pranë qytetit të Orskut kur u rrëzua me një instruktor dhe dy kadetë në bord, të cilët të gjithë vdiqën, tha ministria në një deklaratë.

“Një aeroplan trajnimi u rrëzua në rajonin e Orenburgut. Rrëzimi u raportua në fshatin Dzhanatalap, Orsk. Ai ishte në një fluturim trajnimi. Kur ekipet e shpëtimit nga Ministria Ruse e Situatave të Emergjencave mbërritën në vendngjarje, nuk kishte zjarr. Fatkeqësisht, tre persona u vranë”, tha deklarata.

Autoritetet rajonale do t’u ofrojnë ndihmë familjeve të viktimave, sipas shërbimit për shtyp të guvernatorit të Orenburgut dhe qeverisë rajonale.

Operacionet e shpëtimit po vazhdonin në vendin e rrëzimit dhe zyrtarët thanë se nuk kishte zjarr. Ministria nuk dha informacion paraprak mbi shkakun e mundshëm të rrëzimit.

Policia ka arrestuar një 24-vjeçar të shpallur në kërkim, pasi në datën 24 janar bleu karburant, në një subjekt në rrugën “Egnatia”, me 2 kartëmonedha (në prerjen 100 dollarë) false.

Nga verifikimet, 24-vjeçari rezultoi në kërkim nga Policia e Vlorës, për 2 raste të tjera të së njëjtës veprimtari kriminale, të kryera gjatë muajit janar, 2026. Vijon hetimi për të zbardhur raste të tjera në këtë fushë, në të cilat mund të jetë përfshirë shtetasi E. K.

Emri i presidentit rus Vladimir Putin përmendet 1 mijë e 56 herë në më shumë se tre milionë dokumente që lidhen me Jeffrey Epstein, financierin e dënuar për abuzime seksuale, i cili u gjet i vdekur në burg në vitin 2019. Moska citohet gjithsej 9.629 herë. Edhe pse nuk ka prova konkrete për një lidhje direkte mes Epstein dhe Kremlinit, hetuesit amerikanë e konsiderojnë të pazakontë një numër kaq të lartë referencash.

Sipas shërbimeve sekrete amerikane, Epstein mund të jetë përfshirë në rrjete spiunazhi për shkak të lidhjeve të tij me Robert Maxwell, ish-agjent i Moskës në vitet ’70 dhe babai i Ghislaine Maxwell, bashkëpunëtores së tij, e dënuar me 20 vjet burg.

Gazeta britanike Daily Mail raporton se Epstein dyshohet se ka drejtuar një operacion të gjerë shantazhi seksual (“kompromat”) për llogari të shërbimeve sekrete ruse, duke rekrutuar gra, përfshirë edhe nga Rusia, për rrjetin e tij të personave me ndikim. Në dokumente përmenden email-e dhe letra ku flitet për takime të mundshme me Putinin, përfshirë komunikime të viteve 2011–2014.

Në një email të vitit 2014, sipërmarrësi japonez Joey Ito përmend mundësinë që Reid Hoffman, bashkëthemelues i LinkedIn, t’i bashkohej një takimi me presidentin rus. Megjithatë, pas rrëzimit të avionit Malaysia Airlines MH17 mbi Ukrainë, ideja u braktis. Në email-e të tjera, Epstein i referohet “dokumenteve Putin”, pa sqaruar përmbajtjen e tyre.

Epstein kishte ndërtuar një rrjet të gjerë ndërkombëtar kontaktesh politike dhe financiare. Ai kishte kryer pagesa ndaj figurave politike britanike dhe kishte komunikuar me ish-kryeministrin norvegjez Thorbjørn Jagland lidhur me takime me liderë botërorë, përfshirë Putinin.

Sipas dokumenteve, Epstein kishte pretenduar se mund t’i siguronte Kremlinit informacione komprometuese për Donald Trump, në prag të samitit të Helsinkit në vitin 2018. Në email-e të tjera, ai përshkruan aktivitetet e Robert Maxwell dhe lidhjet e tij me shërbime të huaja inteligjence.

Në korrik 2019, pas arrestimit në New York, avokatët e Epstein i njoftuan FBI-në se ai ishte i gatshëm të bashkëpunonte. Tre javë më vonë, ai u gjet i vdekur në qelinë e tij. Autoritetet amerikane e cilësuan vdekjen si vetëvrasje, një përfundim që vijon të ngjallë dyshime dhe debate.

Në ditën kur në Tiranë, raporteri për Shqipërinë në PE kërkoi një hap para, për dialog në parlament, Berisha hodhi hapin pas, shpalli protestën e radhës në rrugë pas asaj me molotov.

“Të bashkohemi ne datën 10 shkurt në ora 5 në Tiranë për t’i dhënë leksionin e merituar kësaj organizate kriminale me në krye Edi Ramën. Revolta dhe vetëm revolta është përgjigja e merituar e sovranit ndaj këtij grupi që nuk ka ligj, kushtetutë e as moral”, tha Berisha.

Berisha e shfaqi hapur respektin, por edhe pakënaqësinë ndaj raporterit për Shqipërinë në Parlamentin Europian, Andreas Shider. Por shpresën e fundit e ka tek Partitë Popullore Europian

“Mendoj se, shqiptarët prisnin prej tij dhe presin jo vetëm prej tij, por presin nga Brukseli, kërkesën për të mbrojtur standardin Europian, i cili standard edhe 12-13 vite më parë në këtë vend, detyronte ministrat për koincidentë dhe zv/kryeministrin që kërkohej nga prokuroria imuniteti, të dorëzonin imunitetin, para se të votonte parlamentin”, shtoi ai

Po për Berishën, më shumë faji është në Tiranë, në zyrat e BE.

“Zoti Schider, për fat të keq as edhe përfaqësuesi i BE-së, ambasadori Gonzato, madje Gonzato pak më thellë se zoti Schider, nuk e kërkuan këtë. Ndonëse theksoj se grupi popullor ka edhe ai reporterin në hije për Shqipërinë dhe pritet që dhe ai të vijë në Shqipëri”,- u shpreh Berisha.

Protestë do të ketë. Por reforma jo. Te enjten taulant Balla la afatin e së hënës për territorialen, dhe Bardhi e pranoi me kokën ulur thyerjen e bojkotit.

Sot Berisha refuzoi afatin, dhe Bardhi sërish duhet ta pranojë bojkotin e doktorit, po me kokën ulur. 

“Bllokimit që i bëjnë drejtësisë, bëjnë të pamundur çdo formë bashkëpunimi me mandatet e krimit të kësaj mazhorance,” – u shpreh Berisha.

Tabloja tashmë është qartë, jo vetëm për sytë e shqiptarëve, por dhe për sytë e BE.

Mazhoranca në një rrugë të re, qëndron brenda institucioneve, dhe punon për të anëtarësuar Shqipërinë në BE.

“Nëse nuk vijnë deri të hënën, anëtarët e PS në Komision kanë firmosur dhe kërkesa Kuvendit i është çuar. Pra, puna nuk ndërpritet sepse jemi bllokuar pa nisur punën. Dhe jemi nën presion të madh për të kapur afatin e për ta miratuar”- tha Mazniku në Real Story./abcnews.al

Ushtria izraelite ka pranuar për herë të parë se gjatë luftës dyvjeçare në Rripin e Gazës kanë humbur jetën mbi 71 mijë qytetarë palestinezë, shifër kjo e raportuar më herët nga Ministria Palestineze e Shëndetësisë, e cila kontrollohet nga Hamasi.

Gazeta izraelite Haaretz shkruan se kjo shënon herën e parë që Izraeli pranon publikisht shifrat e dhëna nga autoritetet brenda enklavës palestineze, të cilat më parë ishin hedhur poshtë nga Tel Avivi zyrtar, duke u cilësuar si të pabesueshme dhe propagandë e Hamasit.

Sipas Ministrisë së Shëndetësisë në Gaza, e cila kontrollohet nga grupi militant palestinez, që nga nisja e ofensivës izraelite më 7 tetor 2023 janë regjistruar 71.667 viktima. Ushtria izraelite thekson se këto shifra nuk përfshijnë personat e zhdukur, të cilët dyshohet se mund të ndodhen ende nën rrënojat e ndërtesave të shkatërruara.

Konflikti në Lindjen e Mesme shpërtheu pas sulmit të Hamasit ndaj jugut të Izraelit më 7 tetor 2023, ku rreth 1.200 persona u vranë dhe 251 të tjerë u morën peng.

Ministria Palestineze e Shëndetësisë njofton se të paktën 492 palestinezë kanë humbur jetën që nga shpallja e armëpushimit më 10 tetor 2025. Ndërkohë, autoritetet izraelite kanë raportuar se katër ushtarë izraelitë kanë humbur jetën si pasojë e sulmeve të grupeve militante palestineze.

Pas publikimit të lajmit nga Haaretz, një zyrtar i lartë i ushtrisë izraelite refuzoi të komentojë më tej, duke deklaruar se të dhënat zyrtare do të publikohen vetëm nga Forcat e Mbrojtjes së Izraelit përmes kanaleve të tyre zyrtare të komunikimit.