Pesë ditë pasi u largua nga Chelsea, eksperti italian i futbollit Enzo Maresca, postoi një mesazh lamtumire në rrjetet sociale.

Maresca foli pasi menaxhmenti i Blues njoftoi se "sjellja e tij në ditët e fundit të mandatit të tij ishte joprofesionale dhe plot mungesë respekti".

Ata gjithashtu pohuan se Marescas i mungonte "forca mendore dhe pjekuria emocionale".

“Largohem me qetësinë e brendshme se po e lë një klub prestigjioz si Chelsea aty ku e meriton të jetë”.

"Dua të falënderoj të gjithë tifozët për mbështetjen e tyre gjatë 18 muajve të fundit. Mbështetje që ishte vendimtare në kualifikimin për Ligën e Kampionëve, fitimin e Ligës së Konferencës dhe fitimin e Kupës së Botës për Klube”.

“Fitore që do t'i mbaj gjithmonë në zemër. Një falënderim i veçantë për të gjithë lojtarët që më kanë shoqëruar në këtë udhëtim të mrekullueshëm", shtoi ai.

Në vend të kësaj, skuadra do të drejtohet nga anglezi Liam Rosenior (41), i cili e ka drejtuar Strasburgun që nga vera e vitit 2024.

Ai është trajneri i katërt në krye të Chelseat që kur biznesmeni amerikan Todd Boehly u bë pronari kryesor i klubit në vitin 2022. /Telegrafi/

Kristjan Asllani është pranë një kapitulli të ri në karrierën e tij. Ditët e mesfushorit të kombëtares shqiptare te Torino duken të numëruara dhe tashmë mbetet vetëm të qartësohet destinacioni i radhës.

Vendimi i Torinos për ta kthyer përpara kohe Asllanin, pa e ushtruar opsionin e blerjes prej 11.5 milionë eurosh në fund të sezonit, ka alarmuar seriozisht Interin.

Zikaltrit shqetësohen se kjo situatë mund të ndikojë negativisht në vlerën e kartonit të lojtarit, duke e bërë më të vështirë përfitimin financiar nga një shitje e mundshme.

Për këtë arsye, drejtuesit e Interit kanë nisur menjëherë punën për t’i gjetur Asllanit një sistemim të ri. Mesfushori është propozuar në disa klube të Serie A, me synimin që të rigjejë vazhdimësinë dhe formën, në mënyrë që të realizohet ajo që në ambientet zikaltër quhet “ringjallja” e tij dhe rritja e vlerës në treg.

Megjithatë, sipas burimeve të Calciomercato.com, preferenca reale e Interit nuk është që Asllani të mbetet në Itali.

“Ka zëra që vijnë nga Fiorentina dhe Parma, por nuk duhet përjashtuar mundësia që këtë herë Asllani të marrë seriozisht në konsideratë largimin nga Italia dhe kalimin në një kampionat tjetër”, shkruan mediumi italian.

Në të njëjtin artikull theksohet se në Inter janë të bindur se La Liga spanjolle do të ishte kampionati më i përshtatshëm për karakteristikat teknike të Asllanit, duke marrë parasysh stilin e lojës, qarkullimin e topit dhe rolin e mesfushorit organizator.

Kristjan Asllani ka kontratë me Interin deri në vitin 2028, ndërsa klubi nuk ka ndërmend ta lërë të largohet nga Torino pa i siguruar më parë një destinacion të ri. Vendimi final pritet në javët në vazhdim. /Telegrafi/

Juventus ka arritur një fitore të qetë dhe të rëndësishme ndaj Sassuolos, duke ruajtur vendin e katërt në tabelën e Serie A. Ndeshja u zhvillua me dominim të qartë të Zonës së Bardhë, dhe rezultati përfundimtar ishte 3-0.

Takimi nisi me një fatkeqësi për Sassuolon, kur Tarik Muharemovic shënoi një autogol në minutën e 16-të pas një përpjekjeje për të larguar topin nga zona e gjashtë metrave. Ky gol i dha Juventusit avantazhin dhe kontrollin e lojës.

Në minutën e 62-të, Jonathan David asistoi për Fabio Miretti, i cili me një gjuajtje të bukur e çoi topin në të majtën e portës, duke dyfishuar rezultatin.

Tre minuta më vonë, Jonathan David realizoi golin e tij personal, duke vulosur fitoren 3:0 dhe duke siguruar një fitore bindëse për skuadrën bardhezi.

Arijanet Muric u përpoq të shpëtonte skuadrën e tij me disa pritje të shkëlqyera, duke ndalur gjuajtje të rrezikshme nga Kenan Yildiz dhe Fabio Miretti, megjithatë, nuk ishte mjaftueshëm për të ndaluar dominimin e Juventusit.

Me këtë fitore 3-0, Juventus mbetet në vendin e katërt në Serie A me 36 pikë, duke ruajtur distancën me rivalët për zonën e Ligës së kampionëve. /Telegrafi/

Bregu i Fildishtë ka arritur një fitore të madhe ndaj Burkina Faso, duke siguruar kualifikimin në çerekfinalet e turneut. Ndeshja u zhvillua me intensitet të lartë dhe përfundoi me rezultatin 3-0 në favor të Elefantëve.

Amad Diallo hapi serinë e golave në minutën e 20-të pas një solo-aksioni fantastik, duke e kaluar portierin dhe duke vendosur topin në rrjetën e boshatisur. Ky gol shënoi një start të fortë për skuadrën nga Bregu i Fildishtë.

Në minutën e 32-të, Yan Diomande shënoi golin e dytë pas një asistimi të shkëlqyer nga Diallo, duke dërguar topin në pjesën e poshtme të majtë të portës. Ky gol i dha siguri dhe kontroll të plotë ekipit të drejtuar nga Emerse Fae.

Bazoumana Toure vulosi fitoren në minutën e 87-të me një përpjekje solo brenda zonës, duke shënuar golin e tretë dhe duke vendosur rezultatin përfundimtar 3-0. Bregu i Fildishtë dominonte lojën dhe krijoi shumë raste gjatë gjithë takimit.

Me këtë fitore, Bregu i Fildishtë siguron vendin në çerekfinale ku takohet me Egjiptin, një nga pretendentët kryesorë për titull në këtë edicion. /Telegrafi/

Sigal Prishtina ka pësuar humbje në ligën ndërkombëtare ENBL. Të martën mbrëma, në Pallatin e Sportit dhe në një ambient me pak spektatorë, ekipi prizrenas u mposht nga Tindastolli me rezultat 104:98, pas një vazhdimi prej pesë minutash.

Për Prishtinën, Deondre Burns ishte më i dalluari, duke shënuar 31 pikë, shtatë kërcime dhe pesë asistime.

Adrio Bailey kontribuoi me 27 pikë, 12 kërcime dhe dy asistime, ndërsa Don Polloshka dhe Dion Haxhosaj realizuan nga 11 pikë secili.

Te mysafirët nga Islanda, Dedrick Basile udhëhoqi skuadrën me 27 pikë, duke shtuar edhe pesë kërcime dhe pesë asistime.

Pas kësaj humbjeje, Sigal Prishtina ka bilanc prej katër fitoreve dhe tre humbjeve në këtë sezon të ENBL-së. /Telegrafi/

Një deklaratë e futbollistit të ri të Bayern Munich, Lennart Karl (17), ka shkaktuar një stuhi në median sportive gjermane. Pas një ndeshjeje miqësore kundër RB Salzburg, ku Karl shënoi dy gola në një fitore 5-0, ylli i ri u shpreh se Real Madrid është “klubi i ëndrrave” i tij.

Deklarata e 17-vjeçarit u bë gjatë një vizite në klubin e tifozëve të Bayernit, “Burgsinn 1980, që pastaj shkaktoi bujë të madhe.

"FC Bayern është një klub shumë i madh. Është një ëndërr të luaj atje. Por një ditë dua patjetër të shkoj te Real Madridi. Ky është klubi im i ëndrrave", deklaroi ai.

Drejtori sportiv i Bayernit, Christoph Freund (48), tha për Servus TV se Karl e kuptoi menjëherë gabimin e tij dhe kërkoi falje të nesërmen.

"Ai tha se nuk e kishte fare qëllimisht në atë mënyrë. Ndihet jashtëzakonisht rehat te Bayern Munich dhe po shijon çdo moment", deklaroi Freund.

Freund theksoi gjithashtu se Karl kishte stërvitur si fëmijë në Real Madrid dhe pyetja mbi “klubin e ëndrrave” vinte si pjesë e një bisedë miqësore.

"Ai është vetëm 17 vjeç dhe shumë i lumtur te Bayern. Ne jemi të lumtur që ai është me ne", deklaroi Freund.

Lennart Karl mbetet një nga talentet më premtuese të Bayern Munich, dhe klubi e trajtoi situatën me qetësi, duke i dhënë mbështetje dhe këshilla për të ardhmen e tij. /Telegrafi/

Pas një periudhe të vështirë dhe të shkurtër te Bayer Leverkusen, ish-trajneri i Manchester United, Erik ten Hag, ka gjetur një detyrë të re në futboll.

55-vjeçari do t’i bashkohet klubit holandez, FC Twente, në një rol administrativ, duke filluar nga sezoni 2026/27 si drejtor teknik.

Ai do të zëvendësojë Jan Streuer, i cili ka njoftuar se do të largohet pas përfundimit të këtij sezoni. Nuk është e qartë nëse kjo lëvizje do të shënojë fundin e karrierës së tij si trajner.

“Është një ndjesi e mrekullueshme dhe e veçantë të rikthehem te FC Twente, ku kam qenë tifoz në Het Diekman që kur isha fëmijë”.

“Karriera ime si futbollist dhe trajner ka nisur këtu. Me përvojën time në zhvillimin e të rinjve, ndërtimin e skuadrave dhe kulturën e sportit elitar, dua të forcoj bazën teknike të FC Twente së bashku me Bordet Mbikëqyrës, menaxhmentin dhe stafin, në mënyrë që klubi të realizojë potencialin e tij në mënyrë të qëndrueshme si një flamurtar rajonal”, tha Ten Hag në një deklaratë zyrtare.

Pas karrierës së tij si lojtar, Ten Hag e filloi karrierën e tij si trajner te Twente, fillimisht si trajner i ekipeve U-17 dhe më pas i ekipeve U-19. Më vonë ai u bë ndihmëstrajner, një rol që e mbajti kur ish-trajneri i Anglisë Steve McClaren mori drejtimin e klubit në vitin 2008. /Telegrafi/

Një ditë historike për FC Drita dhe futbollin gjilanas, u shënua me inaugurimin e kampit të ri stërvitor të klubit, një hap i madh drejt zhvillimit të të rinjve dhe forcimit të të ardhmes sportive të qytetit.

Ceremonia zyrtare u zhvillua me pjesëmarrjen e figurave kryesore të klubit, përfshirë presidentin Valon Murseli, drejtorin Feti Murseli, drejtorin dportiv Valon Zymberi, si dhe kryetarin e FFK-së Agim Ademi dhe kryetarin e Komunës së Gjilanit, Alban Hyseni.

Ngjarja mbështetej edhe nga drejtues të klubit, media, tifozë dhe dashamirë të shumtë të FC Dritës.

Kampi nuk përfaqëson vetëm një investim infrastrukturor, por një platformë zhvillimi për talentet e reja dhe një bazë të fortë për arritje sportive.

Ai dëshmon angazhimin e klubit për të ndërtuar të ardhmen me profesionalizëm, vizion dhe hapa të sigurt.

Me këtë projekt, FC Drita synon të rrisë kapacitetet e lojtarëve të rinj, të forcojë suksesin në nivel klubesh dhe të kontribuojë në zhvillimin e futbollit në Gjilan dhe më gjerë. /Telegrafi/

Ndeshja e raundit të 1/8-ave të Kupës së Kombeve të Afrikës midis Algjerisë dhe Republikës Demokratike të Kongos përfundoi me fitoren minimale të skuadrës algjeriane, e cila kualifikohet në çerekfinale. Pas një përballjeje të fortë dhe dinamike që zgjati deri në kohën shtesë, Adil Boulbina shënoi golin vendimtar në minutën e 119-të.

Gjatë pjesës së parë, të dyja ekipet krijuan raste të rrezikshme, por portierët dhe mbrojtja e qëndrueshme mbajtën rezultatin të barabartë. Republika Demokratike e Kongos pati disa mundësi të mira për të kaluar në avantazh, por Luca Zidane dhe kolegët e tij në mbrojtje reaguan në kohë për të shmangur golat.

Në pjesën e dytë, Algjeria mori më shumë kontrollin e lojës, duke krijuar presion konstant mbi portën kundërshtare.

Riyad Mahrez shënoi një gjuajtje nga distanca që kaloi shumë pranë traversës, duke treguar se sulmuesit algjerianë ishin në formë të mirë, por për fat të ekipit, rezultati mbeti i barabartë deri në fund të kohës normale.

Në kohën shtesë, Algjeria shfrytëzoi një mundësi të shkëlqyer për të vendosur fitoren. Adil Boulbina shënoi golin e vetëm të ndeshjes me një gjuajtje të fuqishme nga distanca, duke i dhënë Algjerisë avantazhin vendimtar në minutën e 119-të.

Me këtë fitore, Algjeria kalon në çerekfinalet e Kupës së Kombeve të Afrikës, duke treguar forcën e tyre në fazat e eliminimit, ndërsa atje do të përballet me Nigerinë. /Telegrafi/

Federata Ndërkombëtare e Historisë dhe Statistikave të Futbollit (IFFHS) ka publikuar të martën listën e mbrojtësve me më shumë gola për vitin 2025.

Në krye të kësaj liste qëndron braziliani Reinaldo, mbrojtës i majtë i klubit brazilian Mirassol, me 14 gola të shënuar.

Pas tij, me nga 11 gola, janë Achraf Hakimi i Paris Saint-Germain dhe Besnik Krasniqi i Dritës. Tetë nga 11 golat e Krasniqit janë realizuar nga penalltia, duke treguar precizitetin dhe rolin vendimtar që ai ka te skuadra.

Krasniqi, 35-vjeçari i cili është shtyllë e ekipit të Dritës dhe kapiten i saj, ka kontribuar jo vetëm në kampionat, ku Drita u shpall kampion, por edhe në garat evropiane.

Ai luajti me Dritën në Ligën e Konferencës, ku ekipi arriti deri në play-off, duke dhënë një kontribut të jashtëzakonshëm në mbrojtje dhe në realizimin e golave vendimtarë.

Në këtë klasifikim janë marrë parasysh vetëm lojtarët nga 100 ligat më të mira të botës, ku Krasniqi ka lënë pas edhe mbrojtës të njohur si Nicolás Otamendi i Benficas dhe Argjentinës.

Ole Gunnar Solskjaer është përfolur së fundmi për një rikthim te Manchester United, pas largimit të Ruben Amorim nga posti i trajnerit.

Legjenda norvegjeze, 52 vjeç, ka luajtur 366 ndeshje për Man United gjatë karrierës së tij, duke shënuar 126 gola. Si lojtar, ai ka fituar gjashtë tituj në Ligën Premier dhe një Ligë të Kampionëve, ndër shumë trofe të tjerë.

Solskjaer u emërua trajner i përkohshëm i Man United në dhjetor 2018 pas largimit të Jose Mourinho. Pas një serie rezultatesh pozitive, ai mori detyrën në mënyrë permanente dhe drejtoi 168 ndeshje, me 91 fitore, 37 barazime dhe 40 humbje, që përkthehet në një përqindje fitoreje prej 54.17%. Ai u shkarkua në nëntor 2021 pas një periudhe forme të dobët.

Së fundmi, mediat britanike raportojnë se Solskjaer është i gatshëm të rikthehet si trajner i përkohshëm i Manchester United, me Darren Fletcher duke marrë detyrën përkohësisht këtë javë.

Specialistët e transferimeve, përfshirë Fabrizio Romano, kanë njoftuar se mund të ketë marrëveshje.

"Ole Gunnar Solskjær dhe Manchester United kanë bërë përparim në bisedimet për rolin e trajnerit përkohës. Siç u bë e ditur dje, Ole dëshiron të marrë këtë detyrë dhe konsiderohet një kandidat serioz, ndërsa bisedimet po ecin shumë mirë. Nuk ka asnjë problem lidhur me kohëzgjatjen e kontratës – Ole është i gatshëm ta pranojë", shkruan ai.

Solskjaer mbetet një emër i respektuar në Old Trafford dhe rikthimi i tij, edhe në mënyrë të përkohshme, do të ishte një lajm i madh për tifozët e klubit. /Telegrafi/

Adenis Shala, sulmuesi kosovar, ka zgjedhur këtë sezon të vazhdojë karrierën jashtë Evropës, duke u bashkuar me klubin Nasaf Qarshi në Uzbekistan, tash e gjashtë muaj. Mes vështirësive në adaptim, deri te ndeshjet me yjet e futbollit botëror që luajti ndaj tyre në Ligën e Kampionëve të Azisë, Shala i flet të gjitha në një intervistë me Telegrafin.

Përpara këtij hapit, Shala ka luajtur në ekipe të njohura si Hajduk Split dhe Fenerbahce, sa ishte fëmijë, ndërsa në Kosovë ka mbajtur fanellën e Ferizajt, Feronikelit, Gjilanit dhe Trepçës ’89. Kulmin e arriti te Shkëndija e Tetovës, aty ku vazhdon të jetë i dashur nga tifozët.

Kalimi në Uzbekistan për Shalën ka qenë një sfidë e re, jo vetëm në aspektin sportiv, por edhe në atë personal për futbollistin prishtinas.

Ai ka përballuar një ndryshim të madh jetësor, duke iu dashur të adaptohej në një vend dhe një kulturë të re, pjesë e kontinentit aziatik, ku futbolli është fizikisht më intensiv se në Maqedoni dhe Kosovë.

“Vendosa ta vazhdoj karrierën time në Uzbekistan sepse kampionati aty është i fortë. Arsyeja pse zgjodha Nasaf Qarshi është sepse është një nga klubet më të mira në vend dhe ka një strukturë shumë profesionale”.

“Ka qenë një ndryshim i madh. Uzbekistan është pjesë e Azisë dhe për t’u përshtatur me jetesën këtu është shumë më e vështirë sesa në Evropë. Por po mundohem të adaptohem çdo ditë më mirë”, deklaroi Shala për Telegrafin.

Futbolli në Uzbekistan krahasuar me Maqedoni dhe Kosovë, pasi ylli i sulmit para kalimit atje, ishte pjesë e Shkëndijës së Tetovës, ku u shpall edhe kampion.

“Sipas mendimit tim, futbolli në Uzbekistan është më i fortë nga aspekti fizik. Ka shumë intensitet dhe lojtarë të fuqishëm, më shumë sesa në Maqedoni dhe Kosovë”, shtoi ai.

Përveç kampionatit vendas, Shala ka marrë pjesë me Nasaf Qarshi edhe në Ligën e Kampionëve të Azisë, ku ka përballuar ekipe të njohura si Al Hilal, Al Ahli dhe Al Ittihad, duke fituar eksperienca të jashtëzakonshme nga ndeshjet me lojtarë kampionë dhe ekipe me emër ndërkombëtar.

"Me klubin tonë kemi marrë pjesë në Ligën e Kampionëve të Azisë. Në grup kemi pasur shumë skuadra të forta si Al Hilal, Al Ahli dhe Al Ittihad – ekipe me shumë histori dhe lojtarë kampionë. Për mua ka qenë një eksperiencë e jashtëzakonshme të luaj përballë tyre”, ka thënë Shala.

Ai në këto takime u përballë me yjet botërorë, si Karim Benzema, Ngolo Kante, ndërsa tregoi edhe për bashkëbisedimin që kishte me Mario Mitajn.

“Karim Benzema është lojtar i jashtëzakonshëm dhe fitues i Topit të Artë. Takimi dhe mundësia për të luajtur përball tij ka qenë realizimi i një ëndrre. Mario Mitaj është një lojtar dhe person i shkëlqyer; pata rastin të bisedojmë pas ndeshjes, ku kryesisht folëm për kombëtaren shqiptare dhe ia urova suksesin në play-off. Po ashtu, i urova fat për ndeshjet në mars dhe shpresoj që Shqipëria dhe Kosova të arrijnë Botërorin".

"N’Golo Kanté më la një përshtypje të veçantë – asnjë lojtar që kam pasur përball nuk më ka lënë si ai. Thjeshtësia dhe modestia e tij janë të jashtëzakonshme, duke marrë parasysh se ka fituar Botërorin, Premier Ligën dhe Champions League. Për mua, kjo ishte një surprizë shumë pozitive”, përfundoi ai.

Megjithatë, e ardhmja e tij tek Nasaf Qarshi mbetet e pasigurt, pasi ekziston mundësia që Shala të kthehet në Evropë në sezonin e ardhshëm. /Telegrafi/

Sulmuesi kosovar Emir Sahiti pritet të largohet nga Hamburgu gjatë afatit kalimtar dimëror, pas një sezoni të vështirë dhe me shumë pak hapësira në skuadër.

Sipas raportimit të OneFootball, menaxheri i 27-vjeçarit është duke punuar intensivisht për gjetjen e një klubi të ri. Emri i Sahitit u është ofruar disa skuadrave, përfshirë St. Pauli, por futbollisti ka kërkuar qartë që prioritet të jetë një transferim drejt Arabisë Saudite.

Sahiti ka pasur vështirësi të mëdha për të siguruar minuta këtë edicion në Bundesligën gjermane. Ai ka zhvilluar vetëm 122 minuta lojë në kampionat, duke u paraqitur në dy ndeshjet e para të sezonit.

Pas kësaj, nuk ka fituar më asnjë minutë: në nëntë ndeshje nuk u ftua fare, ndërsa në tri të tjera mbeti në bankën e rezervistëve.

Minutat e vetme pas kësaj periudhe i mori më 3 dhjetor, në ndeshjen e Kupës së Gjermanisë ndaj Holstein Kielit.

Emir Sahiti iu bashkua Hamburgut në verën e vitit 2024, duke u transferuar nga Hajduk Split për shumën prej 1.2 milionë eurosh. Kontrata e tij me klubin gjerman skadon në vitin 2027, çka e bën këtë afat dimëror vendimtar për të ardhmen e tij. /Telegrafi/

Liverpool nuk ka asnjë qëllim ta lejojë Federico Chiesan të largohet gjatë afatit kalimtar të janarit, pavarësisht interesimit në rritje nga Napoli dhe Juventus.

Raportimet e fundit nga Italia e kishin lidhur anësorin italian me një rikthim të mundshëm në Serie A në formë huazimi, por këto skenarë pritet të mbeten vetëm në letër.

Sipas Sky Sports UK dhe TuttoMercato, klubi anglez ka vendosur të mbyllë çdo mundësi largimi në mes të sezonit.

Liverpool e sheh Chiesan si pjesë të planeve për pjesën e mbetur të kampionatit dhe nuk është i gatshëm të aprovojë as huazim e as transferim të përhershëm në janar.

Situata mund të rishikohet vetëm pas mbylljes së sezonit, ku klubi do të ishte i hapur për bisedime, por vetëm për një shitje përfundimtare, jo për një marrëveshje të përkohshme.

Federico Chiesa iu bashkua Liverpoolit nga Juventus në verën e vitit 2024 dhe ka kontratë të vlefshme deri në vitin 2028, me edhe dy vjet e gjysmë të mbetura. Në këtë sezon, përfaqësuesi italian ka zhvilluar 15 paraqitje në Ligën Premier, duke realizuar dy gola.

Megjithëse Napoli dhe Juventus vazhdojnë të monitorojnë situatën e tij, çdo rikthim i Chiesas në Serie A do të duhet të presë të paktën deri në verë – dhe vetëm nëse plotësohen kushtet e vendosura nga Liverpool. /Telegrafi/

Një surprizë e madhe u regjistrua në seancën e fundit stërvitore të Barcelonës përpara gjysmëfinales së Superkupës së Spanjës ndaj Athletic Bilbaos, që do të zhvillohet nesër.

Ylli i ri i katalanasve, Lamine Yamal, nuk u pa në fushë me pjesën tjetër të skuadrës, duke shkaktuar shqetësim mes tifozëve dhe mediave, raportoi Mundo Deportivo.

Klubi reagoi shpejt duke qetësuar opinionin publik, duke bërë të ditur se Yamal ndodhej brenda kompleksit sportiv në Xheda, ku skuadra e Hansi Flick po përgatitet për këtë duel të rëndësishëm.

Sipas Barcelonës, 17-vjeçari po ndiqte një program të veçantë fizik të adaptuar dhe mungesa e tij nuk lidhej me ndonjë dëmtim serioz.

Megjithatë, Mundo Deportivo zbulon se arsyeja reale e mungesës së Yamal është një virus i stomakut, i cili e ka shqetësuar prej disa ditësh dhe e ka dobësuar fizikisht. Për këtë arsye, stafi teknik vendosi ta kursejë nga ngarkesa e plotë stërvitore.

Kujtohet se Yamal mungoi edhe në seancën e parë të vitit të ri, më 1 janar, për shkak të gjendjes së përgjithshme jo të mirë shëndetësore.

Trajneri Hansi Flick nuk komentoi mbi situatën e Yamalit në konferencën për shtyp para ndeshjes, pasi ajo u mbajt para stërvitjes nga e cila sulmuesi i ri mungoi, duke mos i dhënë mundësi gazetarëve të ngrinin pyetje mbi këtë çështje.

Nga ana tjetër, të gjithë lojtarët e tjerë të Barcelonës që udhëtuan drejt Arabisë Saudite u stërvitën normalisht, përfshirë edhe Ronald Araújo.

Flick bëri të ditur se pas stërvitjes do të zhvillojë një bisedë me mbrojtësin uruguaian për të marrë një vendim përfundimtar mbi aktivizimin e tij, ndonëse fillimisht nuk kishte planifikuar ta përdorte në ndeshjen ndaj Athletic Bilbaos. /Telegrafi/

Manchester City nuk arriti të gjente rrugën e fitores ndaj Sunderlandit, në një ndeshje të luftuar dhe me raste, që u mbyll pa gola (0-0).

Skuadra e Pep Guardiolës dominoi posedimin dhe krijoi më shumë raste, por u ndal nga mungesa e konkretizimit.

Man City e nisi ndeshjen fuqishëm dhe arriti edhe të shënojë në minutën e 7-të me Bernardo Silvën, por goli u anulua për pozitë jashtë loje.

Gjatë pjesës së parë, kampionët në fuqi ushtruan presion të vazhdueshëm, me raste nga Haaland, Foden dhe Cherki, por portieri Robin Roefs ishte vendimtar për Sunderlandin, duke mbajtur portën e paprekur.

Nga ana tjetër, Sunderland nuk u mbyll plotësisht dhe pati momentet e veta. Brian Brobbey dhe Trai Hume testuan seriozisht Gianluigi Donnarummën, i cili reagoi në mënyrë spektakolare në disa raste, duke qenë një nga lojtarët më të mirë të Man Cityt në këtë ndeshje.

Në pjesën e dytë, Guardiola reagoi me ndryshime, por sërish mungoi finalizimi.

Sunderland rezistoi me disiplinë deri në fund, pavarësisht lodhjes, duke siguruar një barazim të madh përballë një kundërshtari të fortë. Ndeshja u mbyll pas katër minutash shtesë, pa ndryshim rezultati.

Në përfundim, një ndalesë zhgënjyese për Manchester City, që mbetet e dyta me 41 pikë, ndërsa Sunderland është i shtati me 33 pikë. /Telegrafi/

Liverpool dhe Leeds United nuk arritën të gjenin rrugën e golit në një përballje që përfundoi 0-0, në një ndeshje ku skuadra e Arne Slot dukej e zbehtë dhe pa ide.

Ky rezultat shënon fundin e një serie pozitive për Liverpool, i cili vinte pas tri fitoreve radhazi në kampionat, por nuk arriti të krijonte raste të pastra gjatë 90 minutave.

Ndeshja nisi me ritëm të moderuar, me pak aksione në portat respektive. Leeds tregoi organizim dhe përkushtim në mbrojtje, ndërsa Liverpool duket se nuk kishte ide të qarta taktike për të kaluar mbrojtjen kundërshtare.

Nga ana tjetër, Leeds provonte të shfrytëzonte çdo hapësirë, por e vetmja mundësi e shënimit që u anulua ishte goli i Dominic Calvert-Lewin, i cili u konsiderua pozitë jashtë loje.

Ky barazim i lë Liverpoolin në pozitën e katërtë me 33 pikë, plot 12 pikë pas Arsenalit lider, ndërsa Leeds ka 21 pikë në vendin e 17-të. /Telegrafi/

Max Verstappen mund ta ketë humbur titullin e Kampionit të Botës për pilotë këtë sezon për një diferencë minimale, por për të katërtin vit radhazi ai kryeson listën e pilotëve më të paguar në Formula 1.

Gjashtë nga dhjetë skuadrat pjesëmarrëse janë të përfaqësuara në TOP 10-shen e fitimeve për vitin 2025, bazuar në paga dhe bonuse.

Të dhënat janë raportuar nga Forbes, ndërsa të ardhurat nga sponsorët nuk janë përfshirë.

Ja renditja e plotë, duke nisur nga i vetmi “rookie” në listë.

10. Kimi Antonelli

Pagë: 4.6 milionë € | Bonuse: 6.9 milionë € | Totali: 11.5 milionë €

I vetmi debutues në listë, Kimi Antonelli mori një detyrë të vështirë nga Toto Wolff, duke zëvendësuar Lewis Hamilton te Mercedes.

Italiani pati një sezon solid, me podiumin e parë (P3 në Kanada), shumë rezultate në TOP 10 dhe një vend të dytë në Brazil. Në moshën 19-vjeçare, ai u bë debutuesi me më së shumti pikë në histori dhe e mbylli kampionatin në vendin e 7-të.

9. Carlos Sainz Jr

Pagë: 9.2 milionë € | Bonuse: 2.8 milionë € | Totali: 12 milionë €

Pas largimit nga Ferrari, Sainz iu bashkua Williamsit me dëshirën për të dëshmuar veten.

Fillimi ishte i vështirë, me aksident në Australi dhe shumë probleme teknike, por spanjolli shkëlqeu në gjysmën e dytë të sezonit, duke siguruar dy podiume (Azerbajxhan dhe Katar) dhe vendin e 9-të në renditje.

8. Lance Stroll

Pagë: 11 milionë € | Bonuse: 1.4 milionë € | Totali: 12.4 milionë €

Një sezon zhgënjyes për kanadezin, i cili përfundoi vetëm i 16-ti në kampionat.

Vetëm gjashtë herë në TOP 10, me rezultatin më të mirë vendin e 6-të në Australi. Pavarësisht formës, ai do të vazhdojë me Aston Martin pas rinovimit të kontratës.

7. George Russell

Pagë: 13.8 milionë € | Bonuse: 10.1 milionë € | Totali: 23.9 milionë €

Në sezonin e tij të parë si piloti kryesor te Mercedes, Russell ishte konstant dhe efikas.

Ai fitoi në Kanada dhe Singapor, siguroi 9 podiume dhe e mbylli kampionatin në vendin e 4-t, pavarësisht mungesës së ritmit krahasuar me Red Bull dhe McLaren.

6. Fernando Alonso

Pagë: 22.1 milionë € | Bonuse: 2.3 milionë € | Totali: 24.4 milionë €

Alonso kërkon ta mbyllë karrierën me dinjitet, por makina nuk e ndihmoi.

Fillimi i sezonit ishte i dobët, por spanjolli u përmirësua në gjysmën e dytë dhe e mbylli kampionatin në vendin e 12-të. E ardhmja e tij pas 2026 mbetet e pasigurt.

5. Charles Leclerc

Pagë: 27.6 milionë € | Bonuse: 0 € | Totali: 27.6 milionë €

I konsideruar si kampion bote në pritje, Leclerc vuajti nga mungesa e konkurrueshmërisë së Ferrarit.

Megjithatë, ai arriti 7 podiume dhe përfundoi i pesti në renditjen përfundimtare.

4. Oscar Piastri

Pagë: 9.2 milionë € | Bonuse: 25.3 milionë € | Totali: 34.5 milionë €

Piastri luftoi deri në fund për titull me shokun e skuadrës Lando Norris.

Edhe pse humbi avantazhin prej 34 pikësh, australiani fitoi 7 gara dhe tregoi se është gati për titullin në të ardhmen.

3. Lando Norris

Pagë: 16.6 milionë € | Bonuse: 36.3 milionë € | Totali: 52.9 milionë €

Kampioni i Botës për vitin 2025.

Norris shpërtheu në pjesën e dytë të sezonit, me fitore në Hungari, Meksikë dhe Brazil, duke u bërë kampioni i parë i McLarenit që nga Hamilton në 2008.

2. Lewis Hamilton

Pagë: 64.4 milionë € | Bonuse: 0.5 milionë € | Totali: 64.9 milionë €

Sezoni i parë te Ferrari ishte zhgënjyes për Hamiltonin.

Pa podiume dhe vetëm një fitore Sprinti, britaniku shpreson që rregullat e reja të vitit 2026 ta rikthejnë në krye.

1. Max Verstappen

Pagë: 59.8 milionë € | Bonuse: 10.1 milionë € | Totali: 69.9 milionë €

Edhe pse nuk fitoi titullin, Verstappen mbetet piloti më i paguar në Formula 1.

Me tetë fitore dhe një rikthim spektakolar në fund të sezonit, holandezi e mbylli kampionatin vetëm dy pikë larg titullit, duke treguar pse është katër herë kampion bote radhazi.

/Telegrafi/

Legjenda e Real Madridit, Raul, ka befasuar opinionin futbolldashës duke lënë mënjanë përkatësinë klubore dhe duke e shpallur Lionel Messin më të madh se ikonat e “Los Blancos”, si Cristiano Ronaldo dhe Zinedine Zidane.

Ndryshe nga shumica e figurave të lidhura fort me “Santiago Bernabeu”, të cilët zakonisht zgjedhin CR7 në debatin e përhershëm për lojtarin më të mirë të të gjitha kohërave, Raul e pranon hapur se magjia e argjentinasit ka epërsi ndaj fuqisë së portugezit, shkruan Goal.com.

Debati i përjetshëm vazhdon

Messi ka qenë për vite me radhë “makthi” i Real Madridit, ndërsa përplasjet e tij epike me Cristiano Ronaldon shënuan një epokë të tërë të futbollit botëror.

Gjatë dy dekadave, dy superyjet fituan së bashku 13 Topa të Artë, duke e çuar nivelin e shkëlqimit individual në kufij të paparë më parë.

Edhe në fillim të vitit 2026, të dy vazhdojnë të jenë aktivë. Messi ka kontratë me fituesit e MLS Cup, Inter Miami, deri në vitin 2028, ndërsa Ronaldo është i lidhur me Al-Nassr me një kontratë dyvjeçare që do ta mbajë në fushë edhe pas ditëlindjes së tij të 42-të.

Pse Messi është mbi të gjithë

Raul, i cili shënoi 323 gola në 714 paraqitje për Real Madridin, ka luajtur me disa nga futbollistët më të mëdhenj në histori, por sërish Messin e vendos në majë.

“Kam pasur fatin të luaj me lojtarë si Zidane, Cristiano, Ronaldo, Figo… por mendoj se Messi është më i miri. Ai është shumë ndryshe. I bën gjërat të duken të lehta; ato që për të tjerët duken të pamundura, ai i bën sikur po luan në rrugë me miqtë”, u shpreh Raul.

Ylli i ri që po vjen

Edhe pse Messin e konsideron më të madhin e të gjitha kohërave, Raul pranon se një tjetër produkt i akademisë legjendare La Masia mund të dominojë futbollin në të ardhmen e afërt. Ai veçon Lamine Yamal, talentin adoleshent që po thyen rekorde që nga debutimi në moshën 15-vjeçare.

Tashmë 18-vjeçar, Yamal ka fituar titullin e La Ligës dhe Kampionatin Evropian, ndërsa vitin 2025 e mbylli si i dyti në renditjen për Topin e Artë. Megjithatë, Raul paralajmëron se mbi të nuk duhet ushtruar presion i tepruar.

“Të gjithë e dimë se do të jetë një lojtar i rëndësishëm, por Lamine nuk duhet të jetë shtylla e Kombëtares së Spanjës. Ka lojtarë më me përvojë që duhet ta ndihmojnë, në mënyrë që ai të jetë protagonist pa u ndjerë i detyruar të na shpëtojë çdo ndeshje”, theksoi Raul.

A do ta arrijë Yamal madhështinë?

Për shkak të stilit të lojës dhe faktit se është majtak që kalon lehtë kundërshtarët, Yamal krahasohet vazhdimisht me Messin. Edhe pse ai përpiqet të ndërtojë rrugën e tij, është e vështirë të shmangë hijen e futbollistit më të trofeshëm në histori.

Shumë parashikojnë se Yamal mund të ndjekë hapat e Messit dhe të bëhet fitues i shumëfishtë i Topit të Artë, por për momentin, Lionel Messi mbetet i pakonkurrencë në krye, si më i madhi i të gjitha kohërave. /Telegrafi/

Enzo Maresca nuk është më trajner i Chelseat. Bordi i klubit londinez është ndarë nga trajneri italian, më pak se dy vjet pasi ai kishte nënshkruar një kontratë pesëvjeçare.

Vendimi ka ardhur pas një serie prej tri ndeshjesh pa fitore, si dhe për shkak të një marrëdhënieje të tensionuar mes Marescës dhe menaxhmentit të klubit, raportojnë mediat britanike.

Sipas burimeve angleze dhe ndërkombëtare, favoriti kryesor për ta pasuar Marescën është Liam Rosenior, trajneri 41-vjeçar anglez që aktualisht drejton Strasburgun. Dy klubet kanë të njëjtët pronarë, çka e bën një lëvizje të mundshme më të lehtë për t’u realizuar.

I pari në Ligën e Konferencës

Rosenior mori drejtimin e Strasburgut në fillim të sezonit të kaluar dhe e udhëhoqi ekipin drejt vendit të shtatë në Ligue 1 – pozitë që klubi e mban edhe pas 16 xhirove të sezonit aktual.

Në Ligën e Konferencës, Strasburgu shkëlqeu duke e përfunduar fazën e ligës në vendin e parë, me 16 pikë nga maksimumi i mundshëm prej 18.

Karrierën si trajner, Rosenior e nisi në vitin 2022 si trajner i përkohshëm i Derby County, ku drejtoi ekipin për 12 ndeshje. Më pas, nga nëntori 2022 deri në maj 2024, ai ishte në krye të Hull City.

Si futbollist, Rosenior ka mbi 15 vjet përvojë në Ligën Premier dhe Championship, duke luajtur për Fulham, Reading, Ipswich, Hull City dhe Brighton. /Telegrafi/