Trajneri i Juventusit, Luciano Spalletti ka deklaruar se nuk ka kërkuar përforcime në afatin kalimtar të janarit, pavarësisht raportimeve se klubi po kërkon një qendërmesfushor.

Me hapjen zyrtare të afatit kalimtar dimëror, disa burime pranë klubit kanë raportuar se “Bianconerët” po shqyrtojnë mundësinë për të afruar një lojtar të ri në mesfushë, por tekniku italian ka mohuar se kjo është kërkesë e tij.

“Erdha te Juventusi me marrëveshje të qarta që në momentin kur e pranova këtë detyrë. Nuk pres asgjë, jam shumë i kënaqur me lojtarët që kam në dispozicion”, ka deklaruar Spalletti për “Ilbianconero.com”.

Juventusi ka fituar shtatë nga tetë ndeshjet e fundit në të gjitha garat, ndërsa sipas raportimeve të La Gazzetta dello Sport, drejtuesit e klubit tashmë po mendojnë për një zgjatje të kontratës së trajnerit.

Megjithatë, Spalletti ka bërë të qartë se as kjo nuk është prioritet për të në këtë moment.

“Nëse do të kisha pasur nevojë për diçka tjetër për t’u ndier më i sigurt me një kontratë më afatgjatë, do ta kisha diskutuar që në fillim, kur fola me Comollin. Nuk e bëra dhe jam mirë në çdo aspekt”.

“Më duhet vetëm të ndihem mirë me punën time dhe me njerëzit që bashkëpunojnë me mua në dhe jashtë fushës. Kam gjetur njerëz jashtëzakonisht profesionistë, që respektojnë rolet dhe punën që duhet bërë. Ne ndajmë të njëjtat objektiva”.

Spalletti konfirmoi se objektivi kryesor mbetet kualifikimi në Ligën e Kampionëve.

“Qëllimi është Liga e Kampionëve dhe po punojmë në atë drejtim. Në qershor do të bëjmë vlerësimet më të mira, në të mirë të Juventusit dhe tifozëve. Nëse gjithçka është e kënaqshme për të gjithë, atëherë mund të flasim për diçka tjetër. Për momentin, nuk kam nevojë për asgjë tjetër”, përfundoi ai./Telegrafi

Trajneri Pep Guardiola ka mohuar spekulimet për largimin e tij nga Manchester City, duke theksuar se nuk ka asnjë paqartësi rreth të ardhmes së tij në “Etihad”.

Trajneri spanjoll ka rikujtuar edhe një herë se ka kontratë me kampionët e Anglisë dhe se ndihet i vlerësuar nga drejtuesit e klubit.

“Do të jem trajner i City sezonin e ardhshëm? Oh Zoti im… kam kontratë. E kam thënë 1 milion herë”.

“E di që shumë njerëz janë lodhur nga unë pas 10 vitesh këtu. Një ditë do të largohem, e premtoj. Por tani jam i lumtur, dua të luftoj me ekipin tim dhe klubi më respekton – kjo u dëshmua sezonin e kaluar”.

Guardiola veçoi mbështetjen e drejtuesve edhe në momentet më të vështira të sezonit.

“Ne nuk fituam asnjë ndeshje për tre muaj dhe ata më qëndruan pranë. Çfarë më shumë mund të kërkoj?”, u shpreh tekniku katalanas.

Në fund, ai konfirmoi se ka edhe një vit kontratë dhe dëshiron të vazhdojë në krye të Cityt.

“Kam edhe një vit kontratë. Do të doja të isha këtu, pastaj do të shohim”.

Këto deklarata vijnë pas raportimeve të shumta se ky është viti i fundit i Guardiolas me Cityn dhe që klubi anglez ka shprehur interesim për trajnerin e sapo shkarkuar nga Chelsea, Enzo Maresca./Telegrafi

Kanë kaluar 21 vjet që kur Aurelio De Laurentiis bleu Napolin, 21 vjet të shënuara nga suksese, dështime, gëzime dhe zhgënjime. Më 6 shtator 2004, De Laurentiis bleu Napolin për rreth 31 milionë euro, duke e shpëtuar klubin nga falimentimi.

Ai mori praktikisht nga hiri një skuadër, një klub, një stadium, një tifozëri dhe një qytet të tërë, duke i rikthyer në majën e futbollit italian përmes pasionit, largpamësisë, vendosmërisë, fitimeve kapitale dhe të ardhurave milionëshe pa financime të jashtme, këmbënguljes dhe investimeve të mëdha.

Duke nisur nga Serie C1, ai arriti të fitojë shtatë trofe në krye të klubit. Në fund të vitit të parë nga dy sezonet e Luciano Spallettit, marrëdhënia e tij me tifozët dukej se kishte arritur një pikë pa kthim, për shkak të raporteve të tensionuara me qytetin dhe vendimeve të papëlqyera në merkato.

Por që nga Scudettoja e tretë e tutje, ai hyri drejtpërdrejt në “Olimp” dhe u fut përfundimisht në zemrat e popullit azzur dhe në historinë e klubit si një figurë qendrore.

Pas sukseseve të para që i dhanë qytetit shijen e fitores, si Kupa e Italisë me Walter Mazzarrin dhe Superkupa e Italisë me Rafa Benitezin, erdhën triumfet më të mëdha. Dy Scudetto në tri vitet e fundit. Fillimisht me Spallettin, më pas me Antonio Conten, ky i fundit i vulosur nga fitorja në finalen e Superkupës së Italisë ndaj Bolognas.

Nga Serie C në Serie A

Në javët pas falimentimit, Aurelio De Laurentiis mori drejtimin e klubit dhe e regjistroi Napolin në kampionatin 2004-2005 të Serie C1. Në sezonin 2006-2007, me Edoardo Rejan në stol, Azzurrët u rikthyen në Serie A pas gjashtë vitesh mungesë, falë ndeshjes vendimtare ndaj Genoas në stadiumin “Ferraris”.

Më 10 qershor 2007, Napoli dhe Genoa u rikthyen së bashku në elitë. Ndeshja mes dy skuadrave përfundoi 0-0, rezultat që i dha të dyja ekipeve ngjitjen matematikore.

Ishte fillimi i një rruge të re, një rilindje e vërtetë, që pa lojtarë si Marek Hamsik dhe Ezequiel Lavezzi të shndërroheshin në heronjtë e rinj të popullit napolitan.

Konsolidimi në Serie A

Me ardhjen e Walter Mazzarrit në stol, Napoli u rikthye në nivelet më të larta. Në sezonin 2010-2011, skuadra u rikthye në Ligën e Kampionëve pas 21 vitesh mungesë, ndërsa në sezonin 2011-2012 fitoi Kupën e katërt të Italisë në historinë e klubit. Në arenën evropiane, Azzurrët dhuruan disa ndeshje spektakolare, përfshirë fitoret ndaj Manchester Cityt të Yaya Toures dhe Chelseat të Didier Drogbas në fazën me eliminim direkt.

Në sezonin 2012-2013, Napoli përfundoi i dyti në kampionat, i udhëhequr nga një Edinson Cavani i jashtëzakonshëm, golashënuesi më i mirë i Serie A atë sezon. Hamsik, Lavezzi dhe Cavani formuan treshen legjendare të quajtur “Tenorët Azzur”.

Benitez dhe Sarrismo

Sezoni pasues shënoi vazhdimin e rritjes së klubit dhe nisjen e procesit të ndërkombëtarizimit, me emërimin e Rafa Benitezit, ish-trajnerit të Liverpoolit. Fitues i Ligës së Kampionëve me “The Reds”, Benitezi i dhuroi Napolit Kupën e pestë të Italisë në sezonin 2013-2014 dhe Superkupën e dytë të Italisë.

Ai solli në Napoli lojtarë të nivelit evropian si Gonzalo Higuain, Raul Albiol dhe Jose Callejon nga Real Madridi.

Në vitin 2013, Napoli zhvilloi një fazë të shkëlqyer të grupeve në Ligën e Kampionëve, me katër fitore në gjashtë ndeshje ndaj Borussia Dortmundit dhe Arsenalit, por për shkak të renditjes së veçantë dhe barazimit me pikë me anglezët dhe gjermanët, nuk arriti të kualifikohej më tej. Një arritje që u ndje si tallje.

Së bashku me tre lojtarët nga Real Madridi, në portë erdhi Pepe Reina, ndërsa nga PSV u transferua Dries Mertens, i cili shpejt u bë idhull i tifozëve.

Kështu nisi epoka e Maurizio Sarrit, i cili shfrytëzoi maksimalisht grupin e ndërtuar nga Benitezi dhe iu afrua shumë fitimit të Scudettos në vitin 2018, duke e mbyllur kampionatin me 91 pikë, katër më pak se Juventusi i Massimiliano Allegrit.

Napoli i Sarrit, i njohur si “Sarrismo”, një term që u përfshi edhe në fjalorin Treccani, ofroi futboll spektakolar, të admiruar në mbarë botën, me lojtarë si Allan, Jorginho, Hamsik dhe Raul Albiol.

Pavarësisht nivelit të lartë të lojës, trajneri toskan e mbylli periudhën 2015-2018 pa asnjë trofe. Ai krijoi një lidhje të fortë me Gonzalo Higuainin, i cili shënoi 36 gola në Serie A në sezonin 2015-2016, rekord absolut për një sezon të vetëm.

“Qëndro edhe një vit këtu dhe do të të bëj sulmuesin më të mirë në botë”.

Premtimi u mbajt, me një fund hollywoodian dhe golin e 36-të të shënuar me roveshatë ndaj Frosinones, nën shi të rrëmbyeshëm në stadiumin e atëhershëm “San Paolo”. Në merkaton pasuese, De Laurentiis e shiti Higuainin te Juventusi i Agnellit.

Ancelotti, Gattuso dhe vitet e vështira

Pas Sarrit erdhi Carlo Ancelotti, por ai nuk arriti të përsëriste sukseset e paraardhësit. Në sezonin e parë Napoli u rendit i dyti, por sezoni i dytë ishte një dështim total, që kulmoi me shkarkimin e tij në vitin 2020. Më pas erdhi Gennaro Gattuso, nën drejtimin e të cilit Napoli fitoi Kupën e gjashtë të Italisë.

Ishte një periudhë e vështirë për klubin, ku presidenti kishte investuar shumë besim te Ancelotti, por pa rezultatet e pritura.

Spalletti dhe Conte: Rikthimi i Scudettos

Sezoni 2021-2022 shënoi ardhjen e Luciano Spallettit, një trajner me përvojë të madhe, por pa tituj në Itali. Në sezonin e parë, Napoli përfundoi i treti, duke luftuar deri në fund për Scudetto.

Në sezonin 2022-2023, pas një revolucioni të madh në merkato me largimin e Insignes, Koulibalyt, Fabian Ruizit dhe Mertensit, erdhi triumfi historik i Scudettos së tretë, 33 vjet pas suksesit me Maradonën.

Me 90 pikë, çerekfinale në Ligën e Kampionëve dhe futboll spektakolar, Napoli u rikthye në majë të Italisë me dyshen Kvaratskhelia–Osimhen.

Scudettoja e dytë nuk vonoi 33 vjet, por erdhi shpejt, në sezonin 2024-2025 me Antonio Conten në stol. Trajneri nga Lecce, fitues serial i titujve në Itali, e nxori Napolin nga rrënojat e një sezoni katastrofik dhe e çoi drejt Scudettos së katërt në histori.

Lojtarë si Romelu Lukaku, Scott McTominay dhe David Neres ishin ndër protagonistët kryesorë. Goli me roveshatë i skocezit dhe aksioni spektakolar i belgut në ndeshjen e fundit ndaj Cagliarit i dhanë Napolit titullin me 82 pikë, një më shumë se Interi.

Antonio Contes iu desh vetëm një vit për ta rikthyer Scudetton nën hijen e Vezuvit, duke fituar më pas edhe Superkupën e Italisë, të tretën në histori për Napolin, me David Neres dhe Rasmus Hojlund si protagonistë absolutë.

Pronari i klubit realizoi investime masive për të përmbushur kërkesat e trajnerit, duke shpenzuar rreth 350 milionë euro në dy merkato verore. Dhe pas Higuainit, De Laurentiis arriti të sillte një tjetër yll botëror në Napoli: Kevin De Bruyne.

Qëllimi i Contes është të vazhdojë fitoret në një vit të veçantë për klubin, njëqindvjetorin e themelimit në vitin 1926. Një shekull histori, në të cilin Aurelio De Laurentiis ka qenë, është dhe do të mbetet një protagonist i madh. Ndoshta më i rëndësishmi./Telegrafi

Kosova ka bërë një progres të madh nën drejtimin e Franco Fodas dhe kanë fuqinë për të bërë diçka të madhe, kështu ka deklaruar ylli i Rubin Kazanit Dardan Shabanhaxhaj në një intervistë ekskluzive për Telegrafin.

Shabanhaxhaj është bërë i padiskutueshëm në formacionin e Rubin Kazanit këtë edicion, ku ka zhvilluar 23 paraqitje, për të kontribuar me dy gola e dy asistime.

24-vjeçari në një intervistë për Telegrafi thotë se puna e madhe ka ndikuar që të arrijë në këtë pikë.

“Falë shëndetit të mirë, punës së pandalur dhe përkushtimit maksimal, kam arritur të jem aty ku jam sot. Çdo hap ka qenë rezultat i sakrificës dhe besimit në veten time”.

Edhe pse lojtari nga Kosova po kalon formë të mirë, Rubin Kazani ndodhet në mesin e tabelës. Ai e pranoi se objektivi gjithnjë është titulli, por kësaj radhe kanë për qëllim vetëm ta mbarojnë edicionin në top pesë.

“Synimet e skuadrës janë të qarta: Premier Liga e Rusisë. Megjithatë, si Rubin Kazan, objektivi ynë real dhe afatshkurtër është të renditemi në pesëshen e parë dhe të ndërtojmë një ekip konkurrues për të ardhmen”.

Dardan ShabanHaxhaj

Te Rubin Kazani përpos Shabanhaxhaj luajnë edhe mesfushori i Kosovës Veldin Hoxha, si dhe sulmuesi i Shqipërisë Mirlind Daku.

I pyetur se si po kalon me ta, Shabanhaxhaj deklaroi se po provojnë ta ndihmojnë Veldinin që ta mësojë sa më mirë gjuhën shqipe.

“Padyshim është një ndjenjë shumë e mirë të kesh shqiptarë pranë vetes, dhe fatmirësisht jemi tre. Sa i përket komunikimit, me Veldinin përpiqemi vazhdimisht dhe ai tregon dëshirë të madhe për të mësuar gjuhën shqipe”.

Dardan ShabanHaxhaj dhe Mirlind Daku kur ishin pjesë e Mura

“Kalojmë shumë kohë së bashku, sidomos në hotele dhe gjatë udhëtimeve, gjë që e bën edhe më të lehtë këtë proces dhe forcon lidhjen mes nesh”.

Shabanhaxhaj në fundin e muajit nëntor rinovoi me Rubin Kazanin pavarësisht ofertave të ndryshme, por konfirmoi se ka dëshirë që të ndryshojë kampionat në të ardhmen e afërt.

“Po, ka pasur disa oferta, përfshirë edhe një nga Qiproja. Megjithatë, ato nuk përmbushnin kushtet dhe vizionin që Rubin Kazan ofron, veçanërisht në aspektin profesional dhe material”.

“Dëshira për një hap të ri ka qenë gjithmonë prezente, por mbetem me shpresë dhe besim se shumë shpejt do të vijë momenti i duhur për një angazhim të ri, aty ku mund të jap maksimumin tim”.

Dardan ShabanHaxhaj

Shabanhaxhaj në nivelin ndërkombëtar ka përfaqësuar Austrinë, por ka të drejtë të luajë për Kosovën ose Shqipërinë, meqenëse ka luajtur vetëm në grupmoshat U21.

Ai dha lëvdata të mëdha për përforcimin e Kosovës nën drejtimin e Fodas, ndërsa beson se “Dardanët” mund të kualifikohen në Botërorin 2026.

“Si çdo sportist dhe qytetar, i kam ndjekur me vëmendje si Kombëtaren e Shqipërisë ashtu edhe atë të Kosovës. Megjithatë, zemra ime ndalet te Kosova”.

“Franco Foda ka krijuar një klimë shumë pozitive brenda ekipit dhe talenti që posedon Kosova është i padiskutueshëm. Kjo u dëshmua edhe në ndeshjet e kualifikuesve për Botëror, ku shihet qartë progresi dhe rruga që kemi bërë”.

Dardan ShabanHaxhaj

“Play-offi? Edhe pse dy ndeshjet e fundit janë shumë të vështira, besoj fuqishëm se ekipi ka potencialin të bëjë diçka të madhe”.

Shabanhaxhaj pranoi se është i hapur për ta përfaqësuar ndonjërën kombëtare, por fillimisht i duhet të bëjë paraqitje të mira me Rubin Kazanin.

“Sinqerisht, jam shumë i fokusuar te fillimi i sezonit pranveror dhe te paraqitje ime me Rubin Kazan. Besoj se paraqitjet e mia do të flasin vetë dhe më pas është në dorën e ndonjërës Federatë që të më ftoj, kuptohet dëshira tek unë është e madhe”, përfundoi ai për Telegrafin.

Dardan ShabanHaxhaj kur ishte pjesë e Kosovës U16

Përndryshe, Shabanhaxhaj e di si është të veshësh fanellën e Kosovës, pasi ishte pjesë e grupmoshës U16./Telegrafi

Viti 2025 ka qenë i jashtëzakonshëm për kombëtaren e Kosovës në futboll, ku përpos kualifikimit në play-offin e Kupës së Botës 2026 edhe u promovuan në Ligën B të Ligës së Kombeve.

“Dardanët” nën drejtimin e Franco Fodas ishin të shkëlqyer këtë vit, ku regjistruan shtatë fitore, dy barazime dhe vetëm një humbje.

Kualifikimi në Ligën B të Ligës së Kombeve

Kosova aventurën pozitive e nisi në Ligën B të Ligës së Kombeve pasi kishte përfunduar e dyta në ligën C të Ligës së Kombeve pak muaj më parë.

Aty u përballen me një skuadër të fortë fizike, Islandën, por regjistruan fitore komode në dy ndeshjet me rezultat 2-1 dhe 1-3 për të avancuar një rang më lartë, pra rezultati i përgjithshëm 2-5.

Fillimisht, “Dardanët” fituan me rezultat 2-1 në “Fadil Vokrri”, ndërsa si mysafir ishin edhe më të mirë për të fituar me rezultat 1-3, duke e siguruar biletën që të dërgon në ligën B.

Forma pozitive e Kosovës vazhdoi edhe në dy ndeshjet e muajit qershor, të cilat kuptohet ishin miqësore. Të dy takimet u zhvilluan në Prishtinë, ku Kosova fillimisht e ‘rrahu’ Armeninë me rezultat 5-2 e pastaj Ishujt Komore me rezultat 4-2.

Kështu, me një entuziazëm të madh Kosova shkoi në kualifikimin e Kupës së Botës, ku ishim në një grup me Zvicrë, Suedinë deh Slloveninë.

Këndellja e madhe për ta siguruar play-offin e Botërorit

Edhe pse entuziazmi i madh, Kosova e nisi në një mënyrë të keqe, pra u mposhtën thellë në Bazel, nga Zvicra, që fituan me rezultat 4-0.

Pas kësaj, shpresat te tifozët filluan të shuhen meqenëse në përballjen e dytë, ishte Suedia – për shumëkë pretendenti kryesor për t’u kualifikuar si vend i parë në Botëror.

Por, Franco Foda ndryshoi sistemin e lojës 3-5-2 dhe që atëherë ndryshoi e tërë loja. “Dardanët” zhvilluan një paraqitje mahnitëse në “Fadil Vokrri”, ku mposhtën Suedinë me rezultat 2-0, që ishte fitorja e parë e madhe ndaj një shteti që renditet në top 30 të botës.

Me tre pikët e para, Kosova s’iu ndal rezultateve pozitive. Në muajin tetor morën një pikë në shtëpi ndaj Sllovenisë, sfidë ku zhvilluan një paraqitje solide, por epilogu përfundimtar rezultoi të jetë 0-0.

Kosova pastaj e dëshmoi se është një kundërshtar në ngritje, pasi mposhti në udhëtim Suedinë me rezultat 0-1.

Kualifikimin historik e kompletoi në muajin nëntor, atë në udhëtim te Sllovenia me rezultat komod 0-2, sfidë në të cilën edhe përzgjedhësi i tyre Matjaz Kek deklaroi se “na mposhtën dhe na rrahën në aspektin sportiv”.

Kosova ishte në garë edhe për kualifikimin direkt, por që i duhej një fitore e madhe prej gjashtë golave dallim, gjë që kuptohet nuk është e lehtë për t’u arritur kundër Zvicrës.

Foda vendosi t’i pushojë disa nga lojtarët kryesorë të cilët rrezikonin suspendimin dhe me një barazim 1-1 në Prishtinë, e përmbyllën vitin si pozitë e dytë me 11 pikë, që është rekord pikësh.

Mbi 20 vende ngritje në renditjen botërore të FIFA-s

Përpos suksesit në aspektin sportiv, Kosova kishte edhe një ngritje të madhe edhe në renditjen e shtëpisë së futbollit, FIFA.

Në shkurtin e vitit 2025, Kosova renditej në vendin e 102-të, ndërsa tani aktualisht zë vendin e 80-të.

Afrimet e reja e rritën nivelin e Kosovës

Pas përforcimit me Elvis Rexhbecajn e Fisnik Asllanin në vitin e kaluar, Kosova këtë vit i mori edhe disa yje të tjerë për ta ngritur edhe më shumë nivelin.

Në muajin shtator, Kosova e bindi Leon Avdullahun që ta refuzojë ftesën e Zvicrës si dhe Veldin Hoxhën, i cili ishte kapiten i grupmoshave U21 të Kroacisë.

Të dy mesfushorët menjëherë zunë vend në sistemin e Franco Fodas, ku Avdullahu është bërë i padiskutueshëm derisa Hoxha shihet si alternativa e parë në rast që mungon ylli i Hoffenheimit ose Rexhbecaj.

E më e bukura ishte një muaj më vonë, kur edhe Albian Hajdari vendosi të largohet nga Zvicra, edhe pse ishte ftuar disa herë në ekipin A për ta përfaqësuar Kosovën në nivelin ndërkombëtar.

Kosova veç mund të bëhet edhe më e fortë vitin tjetër pasi janë në negociata edhe me emra si Arijon Ibrahimovic, Diant Ramaj, Dardan ShabanHaxhaj dhe talentin Yll Gashi.

Objektivi i qartë për vitin 2026 – Kupa e Botës

Edhe pse ky vit ka qenë jashtëzakonisht i suksesshëm, Kosova nuk do të ndalet më kaq. Pra, objektivi është i qartë – kualifikimi historik në Kupën e Botës 2026.

“Dardanët” duhet t’i fitojnë dy ndeshje mjaftë të vështira në play-off për ta prerë biletën për Botëror. Fillimisht më 26 mars, jemi mysafir i Sllovakisë dhe në rast që triumfojmë atëherë do ta presim në Prishtinë, fituesin e gjysmëfinales tjetër Turqi – Rumani.

Finalja do të zhvillohej në “Fadil Vokrri” më 31 mars./Telegrafi

Gjiganti i La Ligës, Barcelona ka identifikuar një emër nga reparti ofensiv i Manchester Cityt të Pep Guardiolës si objektiv të mundshëm për sezonin e ardhshëm.

Sipas raportimeve, në radarët e drejtuesve të klubit nga “Camp Nou” ka përfunduar braziliani Savinho.

Barcelona, gjatë verës, e ka përforcuar repartin ofensiv me huazimin e Marcus Rashford nga Manchester United. Megjithatë, Deco dhe drejtuesit e tjerë të klubit nuk janë ende të bindur për ta bërë të përhershëm transferimin e sulmuesit anglez.

Për shkak të kufizimeve të vazhdueshme financiare në kryeqytetin katalunas, klubi ka përgatitur një listë alternative për sezonin e ardhshëm.

Sipas “Fichajes”, emri që bie më shumë në sy në këtë listë është pikërisht Savinho.

“Emri që i pëlqen më shumë FC Barcelonës është Savinho. Anësori 21-vjeçar është në pronësi të Manchester Cityt dhe përputhet plotësisht me profilin që klubi kërkon për nga mosha, karakteristikat dhe potenciali”.

Në fazën fillestare, Barcelona shpreson të përfitojë nga mungesa e minutave të brazilianit në Manchester, për të realizuar një marrëveshje huazimi për shërbimet e tij.

Savinho shihet si një opsion afatgjatë për krahët e sulmit, ndërsa vendimi përfundimtar do të varet nga situata financiare dhe zhvillimet rreth Rashfordit në muajt në vijim./Telegrafi

AS Roma u ngjit në vendin e katërt në Serie A pas një fitoreje të qetë 3-1 ndaj Genoas në “Stadio Olimpico”, duke e ngushtuar diferencën me kryesuesit e kampionatit, Interin, në vetëm tre pikë.

Pas tri humbjeve në katër ndeshjet e fundit të ligës, kishte presion të madh mbi skuadrën e Gian Piero Gasperinit për ta mbajtur gjallë synimin për titull, por 20 minutat e para nuk mund të kishin shkuar më mirë për Giallorossët.

Vendasit kaluan në epërsi pak para çerek ore me goditjen e tyre të parë në ndeshje, kur Matias Soule e dërgoi me qetësi topin pas portierit Daniele Sommariva, duke shënuar golin e tij të pestë sezonal në Serie A.

Evan Ferguson ishte pranë dyfishimit të avantazhit pothuajse menjëherë, por situata për Genoan u përkeqësua edhe më shumë. Në minutën e 19-të, topi përfundoi në këmbët e Manu Kone dhe gjuajtja e tij e devijuar u ndal në cepin e poshtëm të portës për golin e dytë të mbrëmjes për vendasit.

Në një pjesë të parë totalisht njëanshme, Roma e pati ndeshjen thuajse të mbyllur shumë shpejt. Mbrojtja e çorganizuar e mysafirëve i dhuroi Soules një rast të artë, i cili u ndal nga Sommariva, por për fat të keq të Genoas, reagimi më i shpejtë ishte ai i Fergusonit, i cili e shtyu topin në rrjetë për të thelluar epërsinë.

Për një çast, tifozët vendas festuan një gol të katërt para pushimit, pas një tjetër gabimi të rëndë në mbrojtjen e Genoas, por gjuajtja nga afër e Kones u anulua për faull ndaj portierit.

Kjo fitore është veçanërisht e kënaqshme për Gasperinin, pasi dobësia më e madhe e Romës këtë sezon ka qenë mungesa e instinktit vrasës në fazën sulmuese, me vetëm 17 gola të shënuar në 16 ndeshjet e mëparshme të kampionatit.

Ndërkohë, humbja e tretë radhazi e mban Genoan vetëm një hap mbi zonën e rënies, në vendin e 17-të, përpara një përballjeje jetike për mbijetesë ndaj Pisas në ndeshjen e tyre të parë të vitit 2026./Telegrafi

Qendërmbrojtësi i Barcelonës, Ronald Araujo është rikthyer në stërvitje të hënën pas disa javësh mungesë, çka përforcon ndjeshëm opsionet mbrojtëse të liderit të La Ligës përpara derbit katalanas të këtij fundjave.

Reprezentuesi i Uruguait u shfaq në fushë së bashku me bashkëlojtarët dhe trajnerin Hansi Flick gjatë një seance stërvitore me dyer të hapura në stadiumin “Johan Cruyff”.

Mungesa e Araujos kishte ngjallur shumë spekulime në mediat lokale, të cilat raportuan se ai kishte marrë një pushim për arsye të shëndetit mendor.

Flick kishte sqaruar më herët se mbrojtësi nuk ishte në dispozicion për shkak të “një situate private”, vetëm disa ditë pasi Araujo ishte kritikuar ashpër për kartonin e kuq që kontribuoi në kolapsin e Barcelonës dhe humbjen 3-0 ndaj Chelseat në Ligën e Kampionëve.

“Araujo nuk është i gatshëm për momentin për shkak të një situate private”, kishte deklaruar Flick në atë periudhë.

Rikthimi i tij vjen në një moment kyç për katalanasit, pasi qendërmbrojtësi tjetër, Andreas Christensen, pritet të mungojë për disa muaj për shkak të një lëndimi në gju, duke e bërë praninë e uruguaianit edhe më të rëndësishme për stabilitetin e prapavijës.

Derbi i së shtunës ndaj Espanyolit pritet të zhvillohet në stadiumin “RCDE” dhe konsiderohet si një nga përballjet më interesante të viteve të fundit mes dy skuadrave të Barcelonës.

Espanyoli, që aktualisht renditet i pesti, po kalon një nga sezonet më të mira në historinë e tij moderne, vetëm një vit pasi mezi shmangu rënien nga elita në sezonin 2024/25.

Për Barcelonën, kthimi i Araujos në stërvitje përpara këtij dueli përbën një lajm shumë pozitiv, në një ndeshje ku rivaliteti lokal dhe forma e mirë e kundërshtarit pritet të testojnë seriozisht ambiciet e liderit të kampionatit./Telegrafi

Ministria e Kulturës, Rinisë dhe Sportit (MKRS) ka lëshuar komunikatë zyrtare për ndarjen nga jeta të Davide Tizzano, Presidenti i Komitetit Ndërkombëtar të Lojërave Mesdhetare.

Tizzano ishte një personalitet i shquar i sportit ndërkombëtar, një udhëheqës me integritet dhe vizion, si dhe një mik i dëshmuar i Kosovës.

Telegrami i plotë i MKRS-së:

“Me pikëllim mora lajmin për ndarjen nga jeta të Davide Tizzano, President i Komitetit Ndërkombëtar të Lojërave Mesdhetare.

Davide Tizzano ishte një personalitet i shquar i sportit ndërkombëtar, një udhëheqës me integritet dhe vizion, si dhe një mik i dëshmuar i Kosovës. Angazhimi dhe mbështetja e tij e vazhdueshme për sportin, për vlerat olimpike dhe mesdhetare, si dhe për aspiratat e Kosovës në arenën ndërkombëtare, do të mbeten në kujtesën tonë.

Kontributi i tij në forcimin e bashkëpunimit sportiv dhe në avancimin e Lojërave Mesdhetare përbën një trashëgimi të çmuar, që do të vazhdojë të frymëzojë brezat e sportistëve dhe drejtuesve sportivë.

Në emrin tim personal dhe në emër të Ministrisë së Kulturës, Rinisë dhe Sportit të Republikës së Kosovës, shpreh ngushëllimet më të sinqerta familjes Tizzano, bashkëpunëtorëve të tij dhe gjithë komunitetit të Lojërave Mesdhetare”./Telegrafi

Bournemouth pret që transferimi i sulmuesit Antoine Semenyo te Manchester City të zyrtarizohet brenda 48 orëve të ardhshme.

Kjo vjen pas bisedimeve pozitive të zhvilluara të hënën lidhur me strukturën e pagesave që lidhen me klauzolën e lirimit të lojtarit.

Semenyo tashmë ka arritur marrëveshje verbale për kushtet personale me Manchester Cityn, duke i hapur rrugë përfundimit të transferimit.

Megjithatë, në këto momente Bournemouth ende shpreson që sulmuesi të mund të bëjë një paraqitje lamtumire ndaj Chelseat të martën, në kuadër të ndeshjes së radhës në Liga Premier.

Semenyo u kërkua me ngulm nga shumica e gjigantëve anglezë, si Man Unitedi dhe Liverpooli, por që lojtari preferonte Cityn.

Këtë edicion, Semenyo ka zhvilluar 16 paraqitje në Ligën Premier, ku ka kontribuar me tetë gola e tre asistime në proces./Telegrafi

Këto dy ditët e fundit ka pasur shumë raportime se CFR Cluj është e interesuar për mesfushorin Etnik Brruti, si pasues i Lindon Emërllahut, por menaxheri Eros Grezda për Telegrafin ka konfirmuar se këto spekulime janë plotësisht të pavërteta.

Cluji e shiti Emërllahun te Polissya për 1.5 milionë euro, ndërsa thashethemet thoshin se Brruti do të jetë zëvendësuesi, derisa Malisheva kërkon rreth 800 mijë euro për ta lënë yllin e skuadrës që të largohet.

Telegrafi ka kontaktuar Grezdën për këto spekulime, mirëpo ky i fundit ishte i qartë se janë thjesht lajme të pavërteta.

“Jo, nuk ka asgjë të vërtetë në ato raportime. I kam parë lajmet edhe kinse kërkesat e Malishevës, por nuk janë aspak të vërteta. Është e pamundur edhe shkaku i kontratës së Etnikut (ka vetëm edhe gjashtë muaj kontratë)”.

Etnik Brruti

Grezda ndër të tjera konfirmoi se për Brrutin shumë klube kanë shprehur interesim, por gjasat më reale janë që të mbetet deri në verë si lojtar i Malishevës.

“Po, ka interesim të madh për Brrutin nga disa klube, por të shohim. Gjasat më reale janë që deri në verë të mbetet te Malisheva”, shtoi ky i fundit.

21-vjeçari këtë edicion ka zhvilluar 16 paraqitje në elitën e futbollit kosovar, për të kontribuar me katër gola e dy asistime në proces.

Kujtojmë, falë paraqitjeve të shkëlqyeshme Brruti zuri vend në formacionin më të mirë të vitit si të FFK-së ashtu edhe të Telegrafi Sport./Telegrafi

Presidenti i FC Barcelona po përballet me telashe të reja ligjore. Një gjykatë në Barcelonë e ka thirrur atë të paraqitet si i pandehur në një rast të dyshuar mashtrimi.

Gjykata Hetimore numër 22 në Barcelonë ka thirrur Joan Laportën në gjykatë më 16 janar. Çështja lidhet me një mashtrim të dyshuar të rënduar, me vlerë afër 100 mijë euro.

Së bashku me Laportën, si të pandehur janë thirrur edhe nënkryetari Rafael Yuste, ekonomisti Xavier Sala i Martin dhe ish-drejtori i TV3, Joan Oliver.

Sipas një urdhri gjykate të siguruar nga El Periodico de Catalunya (përmes SPORT), mashtrimi i dyshuar ka të bëjë me dy kompani të lidhura me personat e akuzuar.

Investimet, sipas raportimeve, ishin ofruar me premtimin për një kthim prej gjashtë për qind. Çështja është rihapur pasi Gjykata Provinciale e Barcelonës urdhëroi që padia të hetohej në detaje.

Viktima në këtë rast ka arritur të rikuperojë vetëm 12,500 euro nga shuma fillestare e investuar. Kjo është tashmë çështja e tretë e hapur në të cilën Laporta po hetohet për mashtrim të dyshuar.

Të gjitha rastet janë të lidhura me kompanitë Core Store dhe CSSB Limited. Disa investitorë raportohet se u kanë dhënë para këtyre kompanive në këmbim të kthimeve të larta vjetore, por nuk kanë marrë as fitimet e premtuara dhe as shumën fillestare të investimit.

Procedurat e fundit burojnë nga një padi e ngritur pasi u transmetua një dokumentar mbi rastin e Reusit. Viktima kontaktoi avokatin Pepe Oriola pasi identifikoi ngjashmëri me përvojën e saj personale.

Dokumentet e gjykatës theksojnë se investimet ishin promovuar duke përdorur reputacionin publik të personave të përfshirë, çka luajti një rol kyç në bindjen e viktimës për të investuar.

Gruaja investoi 50 mijë euro në Core Store dhe më pas 54 mijë dollarë në CSSB Limited. Ajo pretendon se kërkesat e saj të vazhdueshme për informacion dhe përditësime janë përballur me përgjigje shmangëse.

Deri më tani, nuk është kryer asnjë pagesë tjetër dhe hetimet për këtë çështje mbeten ende në vazhdim./Telegrafi

Boksieri britanik me prejardhje nga Nigeria, Anthony Joshua i shpëtoi vdekjes në një aksident të rëndë, ku mbeten të vdekur dy njerëz.

Joshua pësoi vetëm me disa lëndime të lehta, ndërsa është në spital – ku ka nisur shërimin.

Në rrjetet sociale tashmë janë publikuar disa video, ku shihet Joshua duke u larguar nga makina që ishte përfshirë në aksident.

Aksidenti ndodhi në zonën e Makun, gjatë autostradës së ngarkuar Lagos – Ibadan Expressway, në shtetin Ogun. Automjeti i tij u përplas me makinën tjetër, kurse rrethanat e tjera vazhdojnë të hetohen.

Aksidenti vjen vetëm disa ditë pasi Joshua e rrahu keq Jake Paul, për ta mposhtur me nokaut dhe iu bërë me dije të gjithëve se ende po e ëndërron titullin e kampionit të botës në peshat e rënda./Telegrafi

Pep Guardiola i ka dërguar një paralajmërim të qartë Arsenalit, liderit aktual të Ligës Premier, duke insistuar se Manchester City ka kaluar problemet që e penguan sezonin e kaluar, ndërsa çdo shpjegim tjetër që fajëson taktikat e tij e ka cilësuar si “budallallëk”.

Pas një sezoni historik 2023/24, kur City u bë skuadra e parë në historinë e futbollit anglez që fitoi katër tituj radhazi në elitë, ambicia për një titull të pestë radhazi u shua sezonin pasues.

Një seri prej vetëm një fitoreje në Ligën Premier gjatë nëntë ndeshjeve, nga 2 nëntori deri më 26 dhjetor, përfshirë gjashtë humbje, e rrëzoi përfundimisht Cityn nga gara për titull. Në fund, skuadra e Guardiolës përfundoi 13 pikë pas kampionëve Liverpool dhe ëndrra për një rekord absolut u mbyll.

Këtë sezon, ndërsa Arsenali synon më në fund ta thyejë mallkimin pas tri vendeve të dyta radhazi dhe të fitojë titullin e parë pas 22 vitesh, Manchester City është rikthyer fuqishëm. Skuadra e Guardiolës ndodhet vetëm dy pikë prapa “Topçinjve”, pasi ka fituar gjashtë ndeshjet e fundit në Ligën Premier dhe tetë radhazi në të gjitha garat, duke grumbulluar 33 pikë nga 39 të mundshme.

Guardiola ka qenë i prerë se arsyeja kryesore e rënies dhe ringritjes së Cityt nuk ka lidhje me skemat apo zgjedhjet taktike, por me një element shumë më bazik, pra energjinë.

“Energji, energji, energji. Unë i pari”, ka shtuar ai, duke e përfshirë veten në përgjegjësinë për mungesën e saj.

“Ne e humbëm sezonin e kaluar. Pastaj filluam të stërviteshim më mirë, të konkurronim më mirë. Pas kësaj mund të flasim për tre mbrojtës, katër mbrojtës, anësorë apo mbrojtës krahu – të gjitha këto janë budallallëqe. Na duhej të rikthenim energjinë dhe pastaj krijohet një ambient i mirë”.

Sipas Guardiolës, nëse energjia mungon, çdo plan taktik bëhet i parëndësishëm.

“Diçka ishte në mjegull në Manchester, rreth qendrës sonë stërvitore”.

“Na mungonte diçka. Nuk është se energjinë e ndez apo e fik si një çelës. Trajnerët nuk janë magjistarë që mjafton të këpusin gishtat dhe gjithçka bëhet e qartë. Ndonjëherë të duhet kohë. Fitoret ndihmojnë për ta përshpejtuar këtë proces”.

Guardiola nuk ka dashur ta marrë meritën personale për formën e rikthyer të Cityt këtë sezon. Ai ka theksuar se një rol të madh kanë pasur komunikimi i vazhdueshëm dhe bashkëpunimi brenda klubit.

“U kthyem dhe thamë se diçka kishte ndryshuar. Diçka që e ndjen”.

“Nuk do të thotë se patjetër do të fitosh, por që je në gjendje ta njohësh skuadrën tënde. Tani janë tetë fitore radhazi në të gjitha garat. Nuk është e lehtë, por ne po garojmë në mënyrën tonë. Duhet të përmirësohemi, patjetër, por ky mentalitet është shumë më i mirë”./Telegrafi

Paris Saint-Germain raportohet se ka paraqitur një ofertë prej 45 milionë eurosh për qendërmbrojtësin e Sporting CP, Ousmane Diomande.

Sipas raportimeve nga Portugalia, të publikuara nga “A Bola”, 22-vjeçari është objektivi kryesor i PSG-së për repartin defensiv gjatë kësaj merkatoje dimërore. Klubi parisien e sheh Diomande si profilin ideal për kërkesat taktike të Luis Enrique.

Mbrojtësi nga Bregu i Fildishtë vlerësohet për aftësinë e tij për të ndërtuar lojën nga prapavija, përdorimin e të dyja këmbëve dhe dominimin fizik, elemente që e bëjnë atë shumë të përshtatshëm për stilin e lojës që kërkon trajneri spanjoll.

Brenda klubit, Diomande shihet si një zgjidhje afatgjatë, veçanërisht duke pasur parasysh se Marquinhos tashmë është 31 vjeç dhe PSG po mendon për rinovimin gradual të mbrojtjes.

Sporting ka kontratë me Diomande deri në vitin 2027, por drejtuesit e klubit nga Lisbona kanë plane për ta zgjatur marrëveshjen deri në vitin 2030. Klauzola e lirimit të tij është 80 milionë euro dhe klubi portugez është i vendosur të mbrojë një nga asetet më të vlefshme të skuadrës.

PSG po monitoron gjithashtu edhe mbrojtësin e Benficës, Tomas Araujo, por Ousmane Diomande mbetet emri kryesor në listën e dëshirave të kampionëve të Francës./Telegrafi

E ardhmja e Mohamed Salah te Liverpooli është shndërruar në një nga temat më të diskutuara të javëve të fundit, ndërsa qartësia për situatën e tij mund të vijë shumë shpejt.

Salah shprehu hapur pakënaqësinë e tij pas ndeshjes ndaj Leeds United në Ligën Premier, pasi Arne Slot e kishte lënë në stol për herë të tretë radhazi. Pas këtij episodi, sulmuesi egjiptian u kërkoi falje bashkëlojtarëve të tij. Më pas, u rikthye në listën e skuadrës për ndeshjen kundër Brightonit, pasi kishte munguar në përballjen ndaj Interit.

Që prej asaj kohe, Salah është larguar për t’iu bashkuar kombëtares së Egjiptit në Kupën e Afrikës së Kombeve. Ndërkohë, bisedimet mes tij dhe Arne Slot kanë qetësuar disi situatën, por problemet thelbësore mbeten. Lojtari i ka bërë të ditur Liverpoolit se nuk ka asnjë synim të pranojë një rol dytësor në “Anfield”.

Sipas gazetarit Lewis Steele të Daily Mail, ka ardhur momenti për bisedime vendimtare që mund të përcaktojnë të ardhmen e tij. Drejtori sportiv i Liverpoolit, Richard Hughes, pritet të zhvillojë një takim ballë për ballë me agjentin e Salah, Ramy Abbas Issa, i cili njihet për faktin se nuk kryen negociata të rëndësishme në distancë.

Këto bisedime do të zhvillohen ndërsa Salah ndodhet me Egjiptin në AFCON, që do të thotë se ai nuk do të jetë i përfshirë drejtpërdrejt në kohë reale në negociata.

Nëse rezultati i këtyre takimeve tregon drejt një largimi, Arabia Saudite shihet si destinacioni më i mundshëm. Megjithatë, Steele sugjeron se një largim në afatin e janarit është pak i mundshëm.

Pritshmëritë janë që Salah të qëndrojë te Liverpooli deri në fund të sezonit dhe të largohet gjatë verës. Klubet saudite mbeten në gatishmëri dhe janë të përgatitura të veprojnë sapo të shfaqet mundësia e duhur, e cila mund të vijë pikërisht në verë.

Një shitje e Salah gjatë verës do t’i mundësonte Liverpoolit të arkëtonte një shumë të konsiderueshme financiare, si dhe të lirohej nga paga e tij prej rreth 400 mijë paundësh në javë.

Në të njëjtën kohë, Liverpooli do ta mbajë Salah për pjesën e mbetur të sezonit, veçanërisht për shkak të lëndimit të Alexander Isak. Tashmë, Arne Slot do të ketë nevojë për golat dhe eksperiencën e egjiptianit, teksa klubi synon të shpëtojë sezonin./Telegrafi

Roma ka dërguar një ofertë zyrtare për sulmuesin e Manchester United, Joshua Zirkzee, kështu ka deklaruar së paku gazetari i besueshëm italian Fabrizio Romano.

Oferta, e paraqitur përmes një ndërmjetësi, është për një huazim me mundësi që të shndërrohet në detyrim blerjeje. Zirkzee tashmë ka arritur marrëveshje personale me Romën dhe është i etur t’i bashkohet klubit nga Serie A, ndërsa tani vendimi i takon Manchester Unitedit.

Më herët ishte raportuar se Roma ishte e gatshme të paguante 5 milionë euro për huazimin gjashtëmujor, si dhe 35 milionë euro të tjera për ta bërë transferimin përfundimtar në fund të sezonit.

Situata mbetet e hapur, por fakti që lojtari ka dhënë dritën jeshile për transferimin shihet si një avantazh i madh për Romën në përpjekjet për të përforcuar repartin ofensiv.

Zirkzee nuk po ka vend në formacionin e Ruben Amorim dhe e sheh Serie A si shpëtim karrierë dhe shpresë për ta rikthyer vendin te kombëtarja e Holandës para Kupës së Botës 2026./Telegrafi/

Interi e ka fituar sfidën e vështirë në udhëtim te Atalanta, në kuadër të xhiros së 17-të në Serie A.

“Neurazzurët” zhvilluan një tjetër paraqitje solide për të fituar me rezultat 0-1.

Interi e nisi mjaftë mirë për të kaluar në epërsi përmes Marcus Thuram, por goli i këtij të fundit u anulua nga VAR-i për pozitë jashtë loje.

Gjatë tërë kohës mysafirët ishin më kërkues, ku si Martinez ashtu edhe Barella kishin dy mundësi të arta por nuk i finalizuan.

Atalanta u “ngjallë” përmes Gianluca Scamacca, por goli i këtij të fundit u anulua gjithashtu për pozitë jashtë loje.

Heroi i Interit si zakonisht ishte Martinez, i cili mori një asistim perfekt dhe lehtësisht e dërgoi brenda rrjetës (65’).

Interi me këtë fitore rikthehet në krye të Serie A me 36 pikë ndërsa Atalanta zë pozitën e 10-të me 22 sosh./Telegrafi

Dinamo është fituesja e Superkupës së Shqipërisë, pasi ka mposhtur Egnatian me rezultat 3-1.

Sfida nisi më mirë për rrogozhinasit, të cilët kaluan në epërsi që në minutën e 9-të me golin e Ruçit. Sulmuesi përfitoi nga një gabim i prapavijës së Dinamos dhe u tregua i saktë përballë portierit Teqja, duke dërguar topin në rrjetë.

Në pjesën e dytë, Dinamo reagoi fuqishëm dhe përmbysi gjithçka brenda pak minutash. Në intervalin 54’–59’, fillimisht Bregu dhe më pas Nani realizuan dy gola të shpejtë, duke e kthyer rezultatin në favor të skuadrës blu.

Fitorja u vulos nga Qefalija, i cili shënoi golin e tretë dhe të qetësisë, duke i dhënë fund çdo shprese për rikthim Egnatias.

Të besuarit e Ilir Dajës arrijnë kështu të fitojnë trofeun e parë të sezonit, duke e mbyllur vitin 2025 në mënyrën më të mirë të mundshme dhe duke nisur me ambicie të larta pjesën tjetër të garave./Telegrafi

AC Milani ka vendosur të mos e transferojë qendërmbrojtësin të Chelseas, Axel Disasi.

Klubit të Serie A i është ofruar mundësia për të nënshkruar me francezin, por drejtuesit kuqezi kanë zgjedhur të mos ecin përpara me këtë opsion. Arsyeja kryesore lidhet me kushtet e transferimit dhe situatën kontraktuale të lojtarit.

Disasi nuk ka luajtur asnjë minutë futboll në nivel senior që nga rikthimi i tij nga huazimi te Aston Villa në fund të sezonit të kaluar, çka ka ngritur pikëpyetje edhe për formën dhe ritmin e tij garues.

Për më tepër, mbrojtësi nuk mund të largohet nga Chelsea në formë huazimi drejt një klubi të huaj, pasi “Blutë” i kanë të zëna të gjashta vendet e lejuara për huazime ndërkombëtare. Kjo do të thoshte se Milani do të duhej ta blinte përfundimisht kartonin e Disasit.

Megjithatë, sipas raportimit të Romanos, Milani nuk ishte i gatshëm të investonte në një blerje të tillë, duke vendosur kështu të tërhiqet nga pista e francezit dhe të kërkojë alternativa të tjera për repartin defensiv.

Milan Skriniar mbetet një opsion mjaftë konkret, pasi edhe Juventusi po refuzon ta shesë Guttin./Telegrafi