TIRANË, 23 janar /ATSH/ Shtatëmbëdhjetë punonjës të Shërbimit Zjarrfikës u certifikuan sot pas përfundimit me sukses të kursit të trajnimit në Akademinë e Sigurisë.

E pranishme në aktivitet ishte edhe ministrja për Punët e Brendshme, Albana Koçiu, e cila vlerësoi rolin dhe përkushtimin e zjarrfikësve, duke theksuar rëndësinë e rritjes profesionale dhe forcimit të standardeve të shërbimit.

“Zjarrfikësit janë shembull i guximit dhe sakrificës, duke zgjedhur çdo ditë t’i shërbejnë vendit përmes një profesioni që kërkon jo vetëm aftësi teknike, por edhe forcë morale e ndjenjë të lartë përgjegjësie”, theksoi Koçiu.

Ministrja shtoi se certifikimi i punonjësve përfaqëson një hap të rëndësishëm drejt përmirësimit të kapaciteteve profesionale dhe rritjes së cilësisë së shërbimit ndaj qytetarëve.

“Sot në ceremoninë e certifikimit të 17 punonjësve të Shërbimit Zjarrfikës, të cilët përfunduan me sukses kursin e trajnimit në Akademinë e Sigurisë, një hap drejt rritjes profesionale dhe standardeve të shërbimit”, shkruan ministrja Albana Koçiu në rrjetet sociale.

Certifikimi i punonjësve nga drejtoritë vendore të MZSH-së, të cilët sot marrin gradën “Inspektor Zjarrfikës”, përfaqëson një hap tjetër të rëndësishëm drejt rritjes profesionale, forcimit të kapaciteteve njerëzore dhe përmirësimit të standardeve të shërbimit zjarrfikës, në funksion të garantimit të sigurisë së qytetarëve dhe përballimit më efikas të emergjencave.

/m.q/r.e/a.f/

The post Certifikohen 17 punonjës të Shërbimit Zjarrfikës pas trajnimit në Akademinë e Sigurisë appeared first on Agjencia Telegrafike Shqiptare.

TIRANË, 23 janar /ATSH/ Prokuroria e Përgjithshme Kundër Korrupsionit dhe Krimit të Organizuar ka publikuar regjistrin e kërkesave dhe përgjigjeve për informacion në lidhje me hetimet e kryera nga Prokuroria e Posaçme.

Një ndër pyetjet e adresuara ishte nëse Byroja Kombëtare e Hetimit ka sekuestruar celularin e drejtorit të përgjithshëm të Policisë së Shtetit, Ilir Proda, me urdhër të SPAK.

Në përgjigjet e kthyera nga Prokuroria e Posaçme theksohet se “Byroja Kombëtare e Hetimit (BKH) nuk e ka sekuestruar telefonin e Drejtorit të Policisë së Shtetit”.

Një tjetër pyetje e adresuar kishte të bënte me numrin e çështjeve ndaj të cilave SPAK nuk ka nisur hetimet që nga vitit 2019.

Sipas SPAK në lidhje me kallëzimet penale për të cilat është vendosur mosfillim procedimi penal, rezulton se për periudhën 2019 deri në 24 dhjetor 2025, janë 671 kallëzime penale.

“Konkretisht për periudhën 2019-2020 është vendosur mosfillim procedimi penal për 73 kallëzime penale. Për vitin 2021 është vendosur mosfillim procedimi penal për 121 kallëzime penale. Për vitin 2022 është vendosur mosfillim procedimi penal për 60 kallëzime penale. Për vitin 2023 është vendosur mosfillim procedimi penal për 113 kallëzime penale. Për vitin 2024 është vendosur mosfillim procedimi penal për 127 kallëzime penale. Për vitin janar 2025 deri datë 24 dhjetor është vendosur mosfillim procedimi penal për 177 kallëzime penale”, thuhet në përgjigjen e SPAK.

Në lidhje me kërkesat për pushimin e procedimit të dërguara në Gjykatë, sipas SPAK, rezulton se nga vitit 2019 deri në 24 dhjetor 2025 janë pushuar 227 çështje.

Konkretisht “për periudhën 2019-2020 janë dërguar në gjykatë 28 procedime penale, me kërkesë për pushimin e çështjes. Për vitin 2021 janë dërguar në gjykatë 37 procedime penale, me kërkesë për pushimin e çështjes. Për vitin 2022 janë dërguar në gjykatë 38 procedime penale, me kërkesë për pushimin e çështjes. Për vitin 2023 janë dërguar në gjykatë 29 procedime penale, me kërkesë për pushimin e çështjes. Për vitin 2024 janë dërguar në gjykatë 41 procedime penale, me kërkesë për pushimin e çështjes. Për periudhën janar 2025 deri datë 24 dhjetor janë dërguar në gjykatë 54 procedime penale, me kërkesë për pushimin e çështjes”.

/m.q/a.f/r.e/

The post SPAK: Nuk ka filluar procedim penal për 671 kallëzime, telefoni i Prodës nuk është sekuestruar appeared first on Agjencia Telegrafike Shqiptare.

TIRANË, 23 janar /ATSh/ Në të gjithë territorin e vendit vijon puna për lirimin e hapësirave publike nga ndërtimet e paligjshme, një nismë që i paraprin zbatimit të programit “Rilindja Urbane 2.0”.

Nisma për lirimin e hapësirave publike nga ndërtimet pa leje synon të kthejë ligjshmërinë në territor duke sjellë zhvillim për komunitetet.

Kryeministri Edi Rama publikoi sot në rrjetet sociale, pamje nga një tjetër ndërhyrje e forcave të Inspektoratit Kombëtar të Mbrojtjes së Territorit.

“Vijojmë kudo punën për të liruar hapësirat publike”, shkruan Rama, ndërsa ndau pamje nga prishja e një ndërtese të ndërtuar pa leje.

E nisur në muajin korrik të vitit të kaluar, nisma për lirimin e hapësirave publike është konceptuar si ndërhyrje e përhershme dhe mbetet prioritet i pushtetit vendor dhe qendror.

Shumë raste shkeljesh raportohen nga vetë qytetarët në portalin e dedikuar për këtë qëllim “Hapësira ime publike”, ku deri tani rezultojnë 18 065 raste të denoncuara, nga të cilat janë zgjidhur 13 947 raste, ndërsa 4 118 të tjera janë në proces shqyrtimi.

Qeveria shqiptare ka ashpërsuar masat për forcimin e kontrollit mbi territorin, mbrojtjen e hapësirave publike, zbatimin cilësor të lejeve të ndërtimit dhe ndëshkimin e ndërtuesve që i shkelin ato.

/m.q/r.e/a.f/

The post Rama: Vijojmë kudo punën për të liruar hapësirat publike appeared first on Agjencia Telegrafike Shqiptare.

TIRANË, 23 janar /ATSh/ Në komisionin për Evropën dhe Punët e Jashtme u diskutua sot lidhur me disa ndryshime në Kodin Penal.

Në fjalën e tij kryetari i Grupit Parlamentar të Partisë Socialiste, Taulant Balla deklaroi ndryshimet e propozuara nga mazhoranca synojnë dekriminalizimin shpifjes për gazetarët profesionistë, por jo për profesionistët e shpifjes.

“Sa i përket 120-ës, që është shpifja. Këtu pastaj duhet të ndajmë ça janë gazetarë: Kush janë gazetarët? Po vure një bexh dhe vetëshpallesh gazetar, në asnjë vend të Evropës nuk je gazetar. Dhe është shtuar paragrafi, dhe ju lutem ndiqeni fjalë për fjalë, në atë që ka bërë në një zgjidhje tepër të mirë qeveria. Kjo që po lexoj unë është konfirmuar 100 për qind nga Komisioni Europian. Një gazetar i punësuar ose i vetëpunësuar, i regjistruar dhe i njohur si i tillë në përputhje me legjislacionin në fuqi, pavarësisht se si apo vendi ku e ushtron aktivitetin, nuk mban përgjegjësi penale për veprën e shpifjes.

“Sipas këtij neni, për përhapjen me mirëbesim të të dhënave, thënieve, të çdo informacioni tjetër përmes shtypit, mediave audiovizive, medias elektronike ose platformave të tjera të komunikimit publik, kur: 1, qëllimi kryesor është informimi i publikut mbi çështje me interes të përgjithshëm; 2, në momentin e publikimit ai nuk ka dhe, në rrethana konkrete, në mënyrë të arsyeshme nuk kishte dijeni se të dhënat apo informacionet faktike janë të rreme dhe ka bërë përpjekje të arsyeshme për të verifikuar saktësinë e tyre; dhe, pasi të jetë informuar nga personi i tretë, pra personi i prekur, ose autoritetet kompetente, se të dhënat apo informacionet faktike janë haptazi të rreme ose qartazi të pasakta, ai vepron pa vonesë për të bërë një përgënjeshtrim ose sqarim, ose për t’i hequr ato, për ta çaktivizuar aksesin në to.

“Për qëllimet e këtij neni, përhapja me mirëbesim do të thotë përhapje që plotëson kushtet e përcaktuara në paragrafin e tretë dhe bëhet në përputhje me rregullat etike profesionale të gazetarisë dhe mbi baza faktike të arsyeshme. Vlerësimet, opinionet, komentet kritike dhe interpretimet, edhe kur janë therëse, të ekzagjeruara ose fyese, nuk konsiderohen shpifje në kuptim të këtij neni, përveç nëse përmbajnë shprehimisht ose të nënkuptuara pretendime, fakte, të dhëna apo informacione objektivisht të rreme”, tha Balla.

Balla tha më tej se “për efekt të referencës së diskutimeve në këtë komision të nderuar, e theksoj, t’ju kujtoj se ndër vendet e Bashkimit Europian që vazhdojnë ta mbajnë shpifjen si vepër penale janë: Austria, Belgjika, Bullgaria, Kroacia, Çekia, Danimarka, Estonia, Finlanda, Franca, Gjermania, Greqia, Hungaria, Italia, Letonia, Lituania, Polonia, Portugalia, Sllovakia, Sllovenia.

“Ato që e kanë hequr janë vetëm Qipro, Estonia, Irlanda. Rumania është gjysmë për gjysmë”, tha ai.

Qëllimi i këtyre ndryshimeve, theksoi në vijim Balla, është mbrojtja e publikut dhe garantimi i standardeve evropiane në fushën e informimit.

/m.q/a.f/

The post Ndryshimet në Kodin Penal, Balla: Dekriminalizojmë shpifjen për gazetarët profesionistë appeared first on Agjencia Telegrafike Shqiptare.

TIRANË, 23 janar /ATSh/ Shërbimi i Kontrollit të Brendshëm në Sistemin e Burgjeve (SHKBB), pas një hetimi të thelluar disa-mujor të zhvilluar nën drejtimin e Prokurorisë së Elbasanit, ka finalizuar me sukses një operacion kundër veprimtarisë kriminale në burgun e Elbasanit.

SHKBB njoftoi se u ekzekutua masa “Arrest me burg” ndaj tre personave nën hetim: Ndriçim Kroi, punonjës policie në IEVP Elbasan, Esmeralda Komici, familjare e një të paraburgosuri dhe Gerald Stamolla, i paraburgosur në IEVP Elbasan

Sipas SHKBB “hetimi, i zhvilluar me metoda speciale, zbuloi një skemë bashkëpunimi për futjen e lëndëve narkotike në institucion me qëllim përfitimin financiar”.

Materialet procedurale i janë referuar Prokurorisë për veprime të mëtejshme.

/m.q/a.f/

The post Fusnin lëndë narkotike në burgun e Elbasanit, tre të arrestuar appeared first on Agjencia Telegrafike Shqiptare.

TIRANË/ 23 janar /ATSh/ Deputetja e Partisë Demokratike, Jorida Tabaku, prezantoi sot në Komisionin për Evropën dhe Punët e Jashtme ndryshimet në Kodin Penal për mbrojtjen e gazetarëve dhe lirinë e medias.

Gjatë fjalës së saj, Tabaku tha se grupi i ekspertëve, në konsultim me organizatat e shoqërisë civile dhe në përputhje me rekomandimet e Komisionit Evropian, ka propozuar dekriminalizimin e plotë të fyerjes dhe shpifjes, përmes shfuqizimit të neneve 119 dhe 120 të Kodit Penal.

Tabaku nënvizoi se qeveria shqiptare është ndalur vetëm në ndryshime të pjesshme dhe ka lënë të paprekur nenin 119, që lidhet me fyerjen.

“Unë kam propozuara ashtu siç grupi i ekspertëve i ka sjellë komisionit, ashtu siç është konsultuar me organizata të shoqërisë civile, ashtu siç edhe Komisioni Evropian thotë, dekriminalizmin e plotë, pra shfuqizimin e nenit 119 dhe nëntit 120, për sa i përket fyerjes dhe shpifjes dhe këtu ndahemi me propozimin që ka sjellë qeveria shqiptare. Qeveria shqiptare mendon se mund t’i fyeje gazetarët dhe ka lënë nenin 119 ashtu të paprekur”, tha Tabaku.

Duke iu referuar ndryshimeve të propozuara për nenin 120, Tabaku theksoi se ato janë praktikisht të pazbatueshme.

“Qeveria ka shkruar për nenin 120 disa ndryshime të pjesshme, ku referohet, kur një gazetar për shkak të detyrës çohet në gjykatë dhe ka padi ndaj tij për shpifje, qeveria shqiptare ka sjellë një propozim dhe këtu ndahemi, i cili thotë për të gjitha ato organizata që janë të regjistruara dhe sot ka 0 të regjistruara. Propozimi që ka sjellë qeveria shqiptare nuk zbatohet. Kur ke 0 të regjistruar, ligji nuk zbatohet. Ju jeni në dijeni edhe për vendimet dhe rekomandimet që ka marrë Këshilli i Evropës. Është vendosur dekriminalizimi i shpifjes, jo vetëm për gazetarët, por ndaj çdo qytetari, si pjesë e lirisë së shprehjes”, tha Tabaku.

Tabaku theksoi se Shqipëria mbetet pas vendeve të rajonit në këtë drejtim dhe se procesi i integrimit evropian kërkon reforma reale dhe jo thjesht ligje formale.

Deputetja theksoi se ndryshimet ligjore duhet të shoqërohen me masa konkrete për mbrojtjen dhe sigurinë e gazetarëve.

“Mendoj se këto sugjerime që ka sjellë Komisioni Evropian të grupit të punës që ne kemi punuar bashkërisht, i cili thotë, përjashtimi plotë i dënimit për të gjithë qytetarët, si një e drejtë bazë dhe element bazë dhe si një detyrim, jo vetëm në procesin e integrimit, por edhe detyrime që ne kemi si anëtarë të Këshillit të Evropës. Jemi pas të gjithë vendeve të rajonit. Nuk mund të bëjmë ndryshime gjysmake. Procesi i integrimit nuk është për të bërë ligje në letër, por është për të sjellë ndryshime reale për të gjithë qytetarë. Duhet miratuar kuadri ligjor dhe rregullator shoqërues.

Këto janë propozime fillestare, duhet të punojmë dhe për paditë kundër gazetarëve. Duhet të punojmë dhe për sigurinë e gazetarëve. Është pjesë e një kuadri të gjerë”, tha Tabaku.

Në fund të shqyrtimit, Komosioni për Evropën dhe Punët e Jashtme rrëzoi projektligjin e propozuar nga deputetja e Partisë Demokratike, Jorida Tabaku “Për disa shtesa në ligjin nr. 7895, datë 27.1.1995 “Kodi Penal i Republikës së Shqipërisë”, të ndryshuar.

/m.q/a.f/

The post Tabaku: Dekriminalizimi i shpifjes duhet të jetë i plotë appeared first on Agjencia Telegrafike Shqiptare.

TIRANË, 23 janar /ATSh/ Prokuroria pranë Gjykatës së Shkallës së Parë në Fier përfundoi hetimet dhe dërgoi për gjykim, shtetasen K.K. për veprën penale “Mashtrimi” e kryer më shumë se një herë dhe “Fshehja e të ardhurave”.

Prokuroria njoftoi sot se “në përfundim të hetimeve mbi procedimin penal të nisur vitin e kaluar, regjistruar mbi bazën e kallëzimit të disa shtetësave dhe transmetimit në mediat investigative ku paraqiteshin shqetësimet se e pandehura K.K., duke u prezantuar si avokate, kishte arritur të merrte vlera monetare nëpërmjet mashtrimit, u evidentua se e pandehura, e cila për një periudhë të gjatë kohore është prezantuar si avokate, ka përfituar shuma monetare nga disa qytetarë, duke u premtuar zgjidhjen e çështjeve të ndryshme ligjore, administrative dhe gjyqësore, përfshirë legalizime pronash, procedura pensioni, çështje pronësie, përfaqësim në procese gjyqësore civile etj”.

Nga verifikimet e kryera, vijoi më tej prokuroria “rezulton se këto shërbime, nuk janë realizuar, megjithëse vlerat monetare janë marrë nga e pandehura. Pagesat janë kryer në forma të ndryshme, përfshirë dorëzime në dorë, transferta financiare dhe pagesa të deklaruara si kapar apo shpenzime procedurale”.

“Në disa episode, viktimat janë siguruar nga e pandehura se procedurat ishin në vijim dhe se çështjet do të përfundonin brenda afateve të caktuara, ndërkohë që më pas komunikimi me të është ndërprerë dhe nuk është dhënë asnjë rezultat konkret. Në raste të tjera, rezulton se janë dhënë informacione të pavërteta mbi ekzistencën e proceseve gjyqësore apo aplikimeve administrative, të cilat, pas verifikimit pranë institucioneve përkatëse, nuk kanë rezultuar të jenë bërë prej saj. Të mashtruar nga e pandehura në këtë procedim janë evidentuar 8 shtetas kryesisht qytetarë të Lushnjës dhe Fierit”, njoftoi prokuroria.

Sipas prokurorisë hetimi ka zbuluar gjithashtu se e pandehura ka kryer veprime në dukje të një përfaqësimi ligjor në një kohë kur nuk kishte status aktiv për ushtrimin e profesionit të avokatit, si dhe ka përfituar të ardhura nga ky aktivitet pa i deklaruar ato pranë organeve tatimore.

“Nga të dhënat e administruara, rezulton se për disa vite ajo ka ushtruar aktivitet ekonomik faktik, ndërkohë që figuronte me status pasiv në regjistrat tatimorë, duke mos deklaruar të ardhurat e përfituara dhe duke shmangur detyrimet përkatëse tatimore”, njoftoi prokuroria.

/m.q/a.f/

The post Dërgohet për gjykim një shtetase në Fier, mashtronte duke u hequr si avokate appeared first on Agjencia Telegrafike Shqiptare.

TIRANË, 23 janar /ATSh/ Ivanka Trump, vajza e presidentit të Shteteve të Bashkuara të Amerikës, Donald Trump, ndau në rrjetet sociale disa pamje nga bregdeti i Vlorës.

Në fotot dhe videot e publikuara shfaqen peizazhet e bukura natyrore, deti dhe gjelbërimi i zonës, ndërsa në sfond dëgjohet kënga shqiptare “Luleborë”.

Disa prej pamjeve janë nga Plazhi i Porto Novos, nga ishulli i Sazanit si dhe nga vizita e saj në Manastirin e Zvërnecit.

Ivanka Trump qëndroi për dy ditë në Vlorë. Mbrëmjen e së enjtes ajo u prit në Kryeministri nga kreu i qeverisë, Edi Rama.

Ajo mbërriti të mërkurën në qytetin bregdetar të Vlorës, e shoqëruar nën masa të rrepta sigurie nga Policia e Shtetit, dhe u akomodua në një nga hotelet në zonën e “Ujit të Ftohtë”.

Ivanka Trump vizitoi zonën e Novoselës dhe më pas edhe Zvërnecin. Gjithashtu, në itinerarin e saj ka qenë edhe zona bregdetare e njohur si Porto Novo.

Fokus i vizitës së Ivanka Trump mësohet se ka qenë vijimi i projektit të madh të investimit që ajo dhe bashkëshorti Jared Kushner kanë planifikuar të bëjnë në  zonën e ishullit të Sazanit dhe në Zvërnec, një investim prej 1 miliard dollarësh për një resort turistik.

1 nga 5

/m.q/a.f/r.e/

The post Ivanka Trump ndan pamje nga bregdeti i Vlorës, i shoqëron me këngën “Luleborë” appeared first on Agjencia Telegrafike Shqiptare.

TIRANË, 22 janar /ATSh/ Gjykata Kushtetuese po shqyrton sot çështjen e pezullimit të zëvendëskryeministres dhe ministres së Infrastrukturës dhe Energjisë, Belinda Balluku të vendosur nga Gjykata e Posaçme (GJKKO).

Prokurori i Prokurorisë së Posaçme kundër Korrupsionit dhe Krimit të Organizuar, Dritan Prençi, paraqiti argumentet gjatë seancës plenare, duke theksuar se nuk ka asnjë shkelje të kompetencave të pushtetit ekzekutiv. Sipas tij, nuk konstatohet ekzistenca e një konflikti kompetencash.

Gjatë fjalës së tij, Prençi kërkoi që mos të pranohet ankimimi i Kryeministrit dhe Këshillit të Ministrave, pasi masa e marrë është individuale.

“Në këtë çështje pala kërkuese nuk legjitimohet si subjekt procedural për të aktivizuar kontrollin e Gjykatës Kushtetuese, pasi vlerësohet se kërkuesi nuk është subjekt i drejtpërdrejtë i procedimit penal, nuk ka provuar një interes personal aktual dhe kushtetues me pasoja të pariparueshme apo shfaqjen e rrezikut të kryerjes së funksionit të tij e për rrjedhojë shkaqet e ngritura nuk krijojnë bazë kushtetuese të pranueshme për shtrimin nga kjo gjykatë.

“Në vlerësimin tonë pretendimet e kërkuesit bazohet në interpretime të kushtetues dhe ligjit, pa u provuar ekzistenca e një marrëdhënie juridike konkrete të cenuar, që do të ketë sjellë pasoja juridike. Po ashtu nuk konstatohet ekzistenca e një konflikti kompetencash dhe për rrjedhojë mungon një çështje kushtetuese reale, pasi qëndrimet e ndryshme interpretuese në mungesë të një marrëdhënie juridike konkrete nuk janë të mjaftueshme për të ngritur një çështje me objekt kushtetues”, tha Prençi.

Sipas Prençit, Gjykata Kushtetuese “vendosur qartë në jurisprudencën e saj, se për ekzistencën e një konflikti kompetencash duhet që ai të burojë nga një marrëdhënie konkrete midis pushteteve që pretendohet se ushtrojnë një të drejtë, që i takon vetëm njërit”.

“Në rastin konkret nuk ka një ndërveprim të tillë midis gjykatës penale dhe Kryeministrit. Pra gjykata ushtron kompetencat e saj ligjore për caktimin e masave të sigurimit në bazë të ligjit procedural penal, ndërsa marrëdhënia e pretenduar nga kryeministri buron nga Kushtetuta, që do të thotë se kemi dy marrëdhënie të ndryshme, për dy pushtete të ndryshme dhe nuk mund të pretendohet për konflikt kompetencash”, tha ai.

Prençi vijoi më tej duke theksuar “A ka konflikt konkret të kompetencave kushtetuese midis GJKKO dhe Kryeministrit? Në jurisprudencën e saj Gjykata Kushtetuese e ka trajtuar gjerësisht këtë çështje, duke argumentuar se çdo pushtet ka kompetencat e veta dhe secili organ ka pushtet të mjaftueshëm për të vepruar në mënyrë të pavarur.

“Po ashtu kjo gjykatë ka sqaruar se për të pasur konflikt kompetencash midis pushteteve duhet të plotësohen tre kritere ligjore; mosmarrëveshja lind midis organeve të pushteteve të ndryshme, mosmarrëveshja lidhet me organet që vendosin përfundimisht vullnetin e pushtetit të tyre, mosmarrëveshja  ka të bëjë me përcaktimin e sferës së kompetencave. Në rastin konkret këto kritere nuk përmbushen, pasi mosmarrëveshja e pretenduar nuk lind nëpërmjet pushtetesh që ushtrojnë të njëjtën sferë kompetencash”.

Sipas tij Prokuroria e Posaçme “vlerëson se kërkesa e Kryeministrit për shfuqizimin e vendimit të gjykatës së posaçme për masën e sigurimit personal apo për interpretimin e nenit 103 pika 3 të Kushtetutës (imuniteti i deputetit) po ashtu nuk lidhen me kontroll kushtetues mbi ligje, nuk paraqet konflikt kompetencash mes pushteteve, pasi masat janë e sigurimit janë vendime individuale penale me juridiksion penal dhe nuk krijojnë konflikt kompetencash”.

Prokurori nënvizoi se “kërkuesi nuk mund të përdorë këtë pretendim për të bllokuar hetimin penal ndaj ministrit, pasi ndjekja penale janë kompetenca ekskluzive të pushtetit ligjor dhe nuk mund të cenohet nga ndërhyrja e pushtetit ekzekutiv”.

Prençi tha se ka një procedurë të plotë në pushtetin ligjor, që është ankimimin në gjykata.

Më tej ai shtoi se edhe “shqyrtimi i kushtetutshmërisë në këtë fazë do të shkelte parimin e shterimit të mjeteve gjyqësore”, ndërsa shtoi se “cenon funksionim e sistemit gjyqësor”.

Prençi tha gjithashtu se masa prek individin dhe nuk ndalon funksionin e institucionit. Kërkesa e Kryeministrit sipas Prençit, synon të kundërshtojë vendimet e gjykatës.

“Po ashtu prokuroria vlerëson se kërkuesi nuk ka një interes personal dhe aktual për të parashtruar këtë çështje. Në vlerësimin tonë pretendimi se pezullimi i zëvendëskryeministrit ka penguar funksionim normal të Këshillit të Ministrave ose kompetenca e Kryeministrit, nuk qëndron. Masa ka natyrë të përkohshme dhe është e nevojshëm për të vijuar hetimin penal dhe nuk shkakton pasoja të pariparueshme për institucionet. Kërkesa kërkuesit nuk tregon shkelje të drejtpërdrejt të kushtetuese, por synon të kundërshtoje vendimet e gjykatës”, tha ai.

Prençi tha se SPAK vlerëson se kërkesa a nuk duhet të pranohet dhe duhet t’i hapë rrugë funksionit normal të pushtetit gjyqësor.

Sa i përket imunitetit, Prençi tha se “ky pretendim është i pabazë, pasi duket se kërkuesi tenton të barazoj pushtetin legjislativ dhe ekzekutiv gjë që kushtetuat nuk e parashikon. Mandati i deputeti lidhet me përfaqësimin e elektoratit ndërsa funksioni i ministrit është pjesë e ekzekutivit.

“Mandati i deputetit buron nga vota e popullit, ndërsa funksioni i ministrit është e natyrës ekzekutive dhe administrative dhe nuk barazohet me funksionin e deputetit. Imuniteti parashikohet për detyra përfaqësuese të deputetit dhe nuk i jep funksionit të ministrit imunitet ndaj masave të pezullimit të natyrës penale. Kemi mendimin se nëse kushtetutbërësi do të kishte dashur që funksionit ekzekutiv të anëtareve të Këshillit të Ministrave tu jepte imunitet ndaj masave procedurale penale, sikurse është rasti, kjo do të ishte parashikuar qartë në dispozita kushtetues”, tha ai.

Pezullimi si masë procedurale, sipas Prençit “nuk kufizon lirinë personale”.

“Ajo nuk pengon as ushtrimin e funksionit të deputetit si përfaqësues i parlamentit”, tha ai.

Përfaqësuesi i SPAK nënvizoi se “pretendimi i shkeljes së parimit të ndarjes së pushteteve, në vlerësimin tonë ky pretendim është i pabazuar pasi masa e pezullimit ka karakter ligjor parandalues dhe është vendosur  brenda procedimit penal pa përfshirë Kryeministrin apo Këshillin e Ministrave. Nuk ka ndërhyrje në kompetencat e pushtetit ekzekutiv”.

Prençi shtoi gjithashtu se pezullimi i vendimit të GJKKO-së nga Kushtetuta cenon parimin e ndarjes së pushteteve.

Në mbyllje, Prençi tha se “ndërhyrja e këtij lloji rrezikon të krijojë një precedent të rrezikshëm ku ekzekutivi mund të ndikojë mbi vendimet gjyqësor duke cenuar balancën dhe ekuilibrin e pushtëve të përcaktuar nga Kushtetuta”, tha ai.

/m.q/a.f/

The post Pezullimi i Ballukut, SPAK: Masë individuale, asnjë cenim i kompetencave të ekzekutivit appeared first on Agjencia Telegrafike Shqiptare.

TIRANË, 22 janar /ATSh/ Përfaqësuesja e Kuvendit, Mimoza Arbi parashtroi argumentet e këtij institucioni gjatë seancës në Gjykatën Kushtetuese, ku po shqyrtohet pezullimi nga detyra i zëvendëskryeministres dhe ministres së Infrastrukturës dhe Energjisë, Belinda Balluku të vendosur nga Gjykata e Posaçme (GjKKO).

Në fjalën e saj ajo u shpreh se një deputet apo ministër nuk mund të pengohet të ushtrojë detyrën apo të arrestohet pa pëlqimin e Kuvendit. Sipas saj, pezullimi nuk prek vetëm individin, por edhe Këshillin e Ministrave.

“Deputeti gëzon imunitet, nuk mund te pengohet të ushtrojë detyrën, nuk mund të ndalohet apo arrestohet pa pëlqimin e Kuvendit. Ndjekja penale bëhet me miratim të Kuvendit”, tha ajo.

Arbi deklaroi se vendimi i Gjykatës së Posaçme për pezullimin nga detyra të një ministri përbën një ndërhyrje të drejtpërdrejtë në kompetencat kushtetuese të Kuvendit dhe cenon parimin e ndarjes dhe balancimit të pushteteve. Ajo theksoi se, ndonëse ministrat nuk zgjidhen drejtpërdrejt nga populli, legjitimiteti i tyre buron nga Kuvendi, i cili është organ i zgjedhur drejtpërdrejt.

“Logjika juridike është e qartë, deputeti përfaqëson vullnetin e popullit dhe ushtron një mandat që i është dhënë nga zgjedhësit pezullimi i tij nga detyra do të përbente një ndërhyrje në këtë mandat do të cenonte pavarësinë pushtetit legjislativ. E njëjta logjikë zbatohet edhe për anëtarin e Këshillit të Ministrave.

“Dekreti i emërimit të ministrave shqyrtohet nga Kuvendi dhe ky shqyrtim nga Kuvendi krijon lidhjen kushtetuese ndërmjet vullnetin popullor dhe përbërjes të Këshillit të ministrave. Ndonëse ministri nuk zgjidhet drejtpërdrejt nga populli ai merr legjitimim nga Kuvendi i cili është organ i zgjedhur drejtpërdrejt”, tha ajo.

Arbi nënvizoi se Kushtetuta ka synuar të sigurojë një mbrojtje të barabartë institucionale midis pushtetit legjislativ dhe atij ekzekutiv, gjë që është njohur edhe nga jurisprudenca e Gjykatës Kushtetuese.

“Ministrat ndonëse nuk zgjidhen drejtpërdrejt përfitojnë legjitimitetin e tyre nga Kuvendi dhe në kuptim kanë një natyre të ngjashme me personat e zgjedhur. Kur kushtetutëbërësi ka vendosur që ministrat të gëzojnë imunitetin e deputetit, ai ka synuar që të sigurojë një mbrojtje të barabartë institucionale midis dy organeve të pushtetit legjislativ dhe ekzekutiv. Edhe jurisprudenca e Gjykatës Kushtetuese e ka njohur këtë mbrojte të barabartë institucionale midis dy organeve”, tha Arbi.

Arbi e cilësoi vendimin e GjKKO-së si të pambështetur në Kushtetutë dhe paralajmëroi se ai krijon konfuzion juridik dhe institucional.

“Nëse deputeti mbrohet nga pezullimi nga detyra për të garantuar ushtrimin e mandatit të tij, atëherë e njëjta logjikë zbatohet edhe për ministrin. Pezullimi i ministrit nga detyra do të cenonte veprimtarinë e ekzekutivit. Në vlerësimin e Kuvendit, ky vendim cenon parimin e ndarjes dhe balancimit të Kuvendit. Ndërhyrja gjyqësore në përbërjen e Këshillit të Ministrave që Kuvendi ka miratuar përbën një cenim të drejtpërdrejtë të kompetencave të tij kushtetuese.

“Ky proces kushtetues që përfshin tre organe të larta të shtetit nuk mund të pezullohet më një vendim gjyqësor që mbështet në asnjë depozitë kushtetues. Vendimi i GjKKO krijon një situatë kritike që bien në kundërshtim me kompetencat që Kushtetuta i ka njohur Kuvendit në procesin e formimit dhe funksionit të Këshillit të Ministrave”, tha ajo.

Në përfundim, Arbi theksoi se vendimi i GjKKO është ngritur pa një bazë kushtetuese.

“Vendimi i GjKKO krijon një situatë faktike që është në kundërshtim me vendimin e Kuvendit që ka dhënë votëbesimin për miratimin e programit dhe përbërjes së Këshillit të ministrave. Vendimi krijon edh enjë konfuzion juridik në lidhje me statusin e akte që presidenti ka nxjerrë në emërimin e ministrit. Vendimi i GjKKO është ngritur pa një bazë kushtetuese”, tha Arbi.

/m.q/r.e/a.f/

The post Pezullimi i Ballukut, Kuvendi: Vendimi i GjKKO pa bazë kushtetuese appeared first on Agjencia Telegrafike Shqiptare.

TIRANË, 22 janar /ATSH/ Gjykata Kushtetuese po shqyrton sot çështjen e pezullimit të zëvendëskryeministres dhe ministres së Infrastrukturës dhe Energjisë, Belinda Balluku të vendosur nga Gjykata e Posaçme (GjKKO).

Seanca publike, nisi në orën 10:00 dhe në të ishin të pranishëm përfaqësues të Prokurorisë së Posaçme, të qeverisë si dhe presidentit.

Ndërkohë GjKKO njoftoi se nuk do të marrë pjesë, pasi nuk mund të legjitimohet si palë në gjykimin kushtetues me kërkues Kryeministrin e Republikës së Shqipërisë.

“Në një shtet demokratik të së drejtës, të bazuar në parimin e sundimit të ligjit dhe të ndarjes së pushteteve, një gjykatë nuk mund të thirret dhe as të legjitimohet si palë në një gjykim kushtetues për të bërë parashtrime apo për të mbrojtur një vendim të dhënë prej saj. Pjesëmarrja e GjKKO-së si palë e interesuar në Gjykatën Kushtetuese do të cenonte parimin e ndarjes së pushteteve dhe pavarësinë e brendshme të pushtetit gjyqësor”, njoftoi GjKKO.

Balluku aktualisht është rikthyer në detyrë pas një vendimi të Gjykatës Kushtetuese, deri në shqyrtimin e plotë të ankimit të Kryeministrit. Ndërkohë, masa e GjKKO për ndalimin e daljes së Belinda Ballukut jashtë shtetit mbetet në fuqi.

Konkretisht qeveria kërkon shfuqizimin e vendimit të GjKKO-së për pezullimin e ministres Balluku nga detyra. Qeveria gjithashtu kërkon zgjidhjen e mosmarrëveshjes së kompetencës së krijuar ndërmjet Kryeministrit dhe Këshillit të Ministrave, nga njëra anë, dhe Gjykatës së Posaçme për Korrupsionin dhe Krimit e Organizuar (GjKKO), nga ana tjetër, lidhur me pezullimin e ushtrimit të detyrës së anëtarit të Këshillit të Ministrave.

Nga ana tjetër më 28 janar do të mblidhet Këshilli për Rregulloren, Mandatet dhe Imunitetin për të vijuar shqyrtimin e kërkesës së Prokurorisë së Posaçme, që ka për objekt dhënien e autorizimit nga Kuvendi për arrestimin/heqjen e lirisë së deputetit/ministrit/zëvendëskryeministrit, nëpërmjet zëvendësimit të masës së sigurimit, për Belinda Ballukun.

Seanca për Ballukun në Gjykatën Kushtetuese - Foto: Andrin Hoxha

1 nga 5

/m.q/a.f/r.e/

The post Pezullimi i Ballukut, nis seanca në Gjykatën Kushtetuese appeared first on Agjencia Telegrafike Shqiptare.

TIRANË, 21 janar /ASTh/ Sot bëhen 15 vite nga protesta e “21 Janarit” ku u vranë katër protestues në bulevard para Kryeministrisë. Kryetari i Partisë Demokratike, Sali Berisha, asokohe kryeministër, tha se ajo ishte “protesta më e dhunshme në historinë e vendit, e dokumentuar dhe e faktuar”.

Gjatë një konference për median, Berisha tha se protesta ishte “me agjendë politike”, siç thonë dokumentet ndërkombëtare.

“Ishte protesta e thirrur mbi bazën e falsifikimit të tmerrshëm, të një regjistrimi të bërë nga Dritan Prifti, ku flitej për një letër në mos gaboj të një pronari, fitues tenderi për një HEC që e kishte marrë me gjykatë, jo nga ne. Gjykata ia kishte marrë një kompanie italiane dhe dhënë këtij, por vendimi i gjykatës duhej zbatuar, shkruhej në shkresë: “I nderuar ministër, për këtë vonesë që po më bëhet, 3 muaj pa u zbatuar vendimi i gjykatës, sipërmarrja ime ka humbur 700 e ca mijë euro”.

“Dhe fjalën 700 e ca mijë euro, që Ilir Meta i thotë Dritan Priftit, që jepja, zbato vendimin e gjykatës, e transformuan sikur ky i kishte marrë apo po i kërkonte 700 mijë euro kompanisë”, tha Berisha.

Kreu i PD tha se protesta kishte dhe një mesazh politik: “Prano zgjidhjen politike, – më thotë mua, – ose do kalohet mbi kufoma”.

Berisha shton se ka kërkuar hetim të plotë ndërkombëtar për ngjarjet e “21 Janarit”.

“Janë disa deklarata të qeverisë amerikane, por dhe të institucioneve ndërkombëtare ku kërkohet hetimi i plotë i këtij zhvillimi nga polici i thjeshtë dhe deri tek organizatorët kryesorë”, u shpreh Berisha.

Kreu i PD-së nënvizoi se Garda ka qëlluar në zbatim të ligjit.

“Ina Rama e hetoi çështjen, por nuk guxoi kurrë të thërrasë Edi Ramën. Nuk gjeti asnjë shkak, se aty kishte qëllime, ku Garda qëlloi në kushtet e ligjit. Garda ka zbatuar ligjin”, tha Berisha.

I pyetur nëse ka ndonjë përgjegjësi morale për “21 Janarin”, Berisha u përgjigj: “Nuk është përgjegjësia ime. Unë trajtova me standardet më demokratike 752 protesta të opozitës në të katra anët e vendit, pa asnjë cenim, por në përputhje me rregullat e një vendi demokratik”.

Berisha tha se ka patur plumba e gurë në dritaret e Kryeministrisë të hedhura nga protestuesit.

“Përgjegjësia ime, se hidhnin gurë dhe plumba? E mohoi sot (kryeministri Rama – shën. i red.), por ato janë në dritare, të dokumentuara, plumbat dhe revolet e tyre janë të dokumentuara, drejt kryeministrit që ishte në detyrë. Nuk blindoja dyer unë. Nuk lëshoja zyrën unë, nuk bëja këtë frikacak që ia mbath”, tha Berisha.

Ish-kryeministri tha se ka realizuar zgjedhjet sipas kërkesave të OSBE-ODIHR, zgjedhjet që plotësuan standardet kryesore ndërkombëtare të zgjedhjeve të lira.

Berisha shtoi se ishte duke punuar dhe kishte refuzuar dhe kërkesën për t’u evakuuar. “Edi Rama qëndronte në kullën karshi dhe priste çastin që të vinte në zyrën time dhe t’ju mbante fjalim pushtuesve poshtë. Por ai nuk mund të merrte kurrë”.

Berisha shtoi më tej se 21 Janari “është ngjarje fatkeqe shumë dhe kam kërkuar që atë natë hetim ndërkombëtar dhe kam insistuar për hetim ndërkombëtar, se nuk kisha pikën e besimit te kjo, që i kam thënë ato fjalë dhe nuk i heq asnjë, as sot dhe gjersa të jetë gjallë, sepse i meriton ajo, sepse hyri në një lojë shumë të turpshme, të paimagjinueshme. Keqardhje po, ngushëllime po, që atë ditë. Ishte planifikuar si protestë e dhunshme”.

/m.q/r.e/

The post Berisha: Kam kërkuar hetim ndërkombëtar për 21 Janarin, Garda zbatoi ligjin appeared first on Agjencia Telegrafike Shqiptare.

TIRANË, 21 janar /ATSh/ Komisioni për Çështjet Ligjore dhe Administratën Publike miratoi sot në parim dhe nen për nen projektligjin për disa ndryshime në ligjin “Për statusin e gjyqtarëve dhe prokurorëve në Republikën e Shqipërisë”, dhe projektligjin për “Për organet e qeverisjes së sistemit të drejtësisë”.

Nisma ligjore për disa ndryshime në ligjin për “Për statusin e gjyqtarëve dhe prokurorëve” ka në fokus garantimin e pavarësisë, paanësisë dhe llogaridhënies së magjistratëve, me qëllim ndërtimin e një sistemi drejtësie të pavarur, profesional, të besueshëm dhe të orientuar drejt shërbimit ndaj qytetarit.

Projektligji është hartuar në përputhje me rekomandimet e Komisionit Evropian për Shqipërinë për periudhën 2021-2025 dhe udhërrëfyesin për shtetin e së drejtës, duke synuar përmbushjen e piketave të ndërmjetme të Kapitullit 23, “Gjyqësori dhe të drejtat themelore”.

Ndryshimet e propozuara adresojnë problematika të konstatuara gjatë zbatimit të ligjit aktual, veçanërisht mungesën e drejtuesve të përhershëm në gjykata dhe prokurori, nevojën për rritjen e transparencës së vendimmarrjes së Këshillave, si dhe forcimin e mekanizmave të kontrollit të integritetit të kandidatëve për magjistratë.

Gjithashtu ndryshimet e propozuara parashikojnë dispozitë tranzitore për drejtuesit aktualë të gjykatave dhe prokurorive, që parashikon qëndrimin e tyre në detyrë deri më 31 dhjetor 2028, me kusht kalimin e vetingut dhe vlerësim pozitiv të performancës.

Po ashtu në ndryshime parashikohet rritje të transparencës në lëvizjet paralele dhe ngritjet në detyrë, përmes detyrimit për publikimin e vendimeve të KLGj-së dhe KLP-së, duke respektuar legjislacionin për mbrojtjen e të dhënave personale.

Përfshirje të opinionit të Prokurorit të Përgjithshëm në procesin e përzgjedhjes dhe rizgjedhjes së kryetarëve të prokurorive, si dhe përjashtimin nga kandidimi të magjistratëve me masa disiplinore në fuqi.

Gjithashtu ndryshime parashikohen edhe në rregullat e komandimit të magjistratëve pranë Inspektoriatit të Lartë të Drejtësisë, duke zgjatur afatin maksimal të komandimit deri në 15 vjet dhe duke krijuar stimuj për rritjen e aplikimeve, përfshirë njohjen e përvojës si vlerë e shtuar në karrierë.

Nga ana tjetër projektligji për disa ndryshime në ligjin “Për organet e qeverisjes së sistemit të drejtësisë”, synon korrigjimin e paqartësive ligjore dhe plotësimin e boshllëqeve normative të evidentuara gjatë zbatimit të reformës në drejtësi, duke rritur efektivitetin, transparencën dhe integritetin në qeverisjen e sistemit të drejtësisë.

Projektligji, i cili përbëhet nga 38 nene, parashikon që edhe anëtarët jomagjistratë, qoftë në Këshillin e Lartë Gjyqësor, po ashtu edhe në Këshillin e Lartë të Prokurorisë, të kalojnë nëpër filtra të thelluar verifikimi, të ngjashëm me procesin e vetingut të magjistratëve.

Ky mekanizëm synon krijimin e një barazie mes anëtarëve magjistratë dhe atyre jomagjistratë dhe garantimin e integritetit institucional.

Sipas projektligjit procedura për përzgjedhjen e kandidatëve nga fusha e avokatisë, fillon nga Avokati i Popullit, vijon me një verifikim të detajuar nga Komisioni i Pavarur Ad hoc, i cili ka kompetenca të zgjeruara për akses në të gjitha institucionet shtetërore dhe subjekte private, për të kontrolluar kriteret e pasurisë dhe figurës. Bazë e këtij verifikimi janë raportet e ILDKPKI-së dhe AKSIK-së.

Pas përfundimit të këtij procesi, kandidatët e kalifikuar ose të skualifikuar shqyrtohen në një filtër të dytë nga Sekretari i Përgjithshëm i Kuvendit, i cili kontrollon përputhshmërinë e raportit me dokumentacionin e dosjes.

E njëjta procedurë zbatohet për kandidatët që vijnë nga fusha e pedagogëve, ku kompetenca të zgjeruara marrin Dekani dhe Këshilli i Shkollës së Magjistraturës, si dhe Komisioni Ad hoc, i cili kryen verifikime të detajuara dhe administron raportet përfundimtare të ILDKPKI-së dhe AKSIK-së.

Në rastin e kandidatëve nga shoqëria civile, dokumentacioni grumbullohet nga Avokati i Popullit, ndërsa Komisioni i Shoqërisë Civile ka kompetenca për verifikim dhe ka akses në institucione shtetërore dhe subjekte private, duke përfunduar me një raport përfundimtar.

Ndryshimet ligjore synojnë të rrisin besueshmërinë, transparencën dhe standardet e integritetit për të gjithë anëtarët jomagjistratë të organeve të qeverisjes së sistemit të drejtësisë.

/m.q/r.e/a.f/

The post Ndryshimet ligjore – Kryegjyqtarët në detyrë deri në 2028-ën, veting anëtarëve jomagjistratë në KLP e KLGJ appeared first on Agjencia Telegrafike Shqiptare.

TIRANË, 21 janar /ATSh/ Ministri i Drejtësisë, Besfort Lamallari prezantoi sot në Komisionin e Ligjeve në Kuvend një paketë të gjerë ndryshimesh në Kodin Penal, të cilën e cilësoi si një reformë strategjike për forcimin e shtetit të së drejtës, rritjen e sigurisë publike dhe përmbushjen e detyrimeve të Shqipërisë në procesin e integrimit evropian.

Gjatë fjalës së tij, ministri theksoi se projektligji nuk është një ndërhyrje thjesht teknike, por rezultat i një analize të thelluar të problematikave reale në terren dhe i harmonizimit të plotë me standardet e Bashkimit Evropian, në kuadër të Kapitullit 24 të negociatave “Drejtësia, Liria dhe Siguria”.

Sipas ministrit, ndryshimet përafrojnë legjislacionin penal shqiptar me shtatë instrumente kyçe të BE-së, duke forcuar luftën kundër pastrimit të parave, trafikimit të drogës dhe qenieve njerëzore, terrorizmit, shfrytëzimit seksual të fëmijëve, si dhe mbrojtjen e interesave financiare të Bashkimit Evropian. Paketa zgjeron juridiksionin penal të Shqipërisë edhe për vepra të kryera jashtë territorit të vendit dhe rrit efektivitetin e ndjekjes penale për krime të rënda dhe ndërkufitare.

Një vëmendje e veçantë i është kushtuar mbrojtjes së fëmijëve dhe grupeve vulnerabël, përmes ashpërsimit të veprave penale me natyrë seksuale, rritjes së dënimeve, zgjatjes së afateve të parashkrimit dhe ndalimit të ushtrimit të profesioneve që përfshijnë kontakt me fëmijë. Po ashtu, garantohet trajtimi i viktimave të mitura sipas standardeve më të larta të mbrojtjes.

Në luftën kundër trafikimit të qenieve njerëzore, projektligji parashikon zero tolerancë ndaj shfrytëzimit, duke përjashtuar pëlqimin e viktimës si element justifikues dhe duke kriminalizuar përdorimin e shërbimeve të ofruara nga viktimat e trafikimit.

Ndryshimet prekin edhe mbrojtjen e territorit dhe interesit publik, duke ashpërsuar ndëshkimet për zënien e paligjshme të tokës, ndërtimet pa leje dhe shfrytëzimin e paligjshëm, veçanërisht në zona të mbrojtura, pasuri kulturore dhe infrastrukturë kritike, sidomos kur këto vepra kryhen nga funksionarë publikë. Forcohet gjithashtu kuadri penal për zjarrvënien në pyje dhe mjedise natyrore.

Një risi tjetër lidhet me sigurinë publike, ku parkimi në rresht të dytë trajtohet si vepër penale në rastet kur pengon seriozisht qarkullimin dhe mjetet e emergjencës. Paralelisht, projektligji forcon mbrojtjen e gazetarëve dhe lirinë e medias, duke përjashtuar përgjegjësinë penale për gazetarët që veprojnë me mirëbesim dhe në interes publik, ndërsa ashpërson ndëshkimet për dhunën dhe kërcënimet ndaj tyre.

Në përfundim, ministri e cilësoi paketën si një reformë të guximshme dhe të domosdoshme, që synon jo vetëm ndëshkimin e krimit, por edhe parandalimin dhe garantimin e sigurisë për qytetarët, duke ndërtuar një sistem penal modern dhe plotësisht të përputhshëm me standardet evropiane.

/m.q/r.e/a.f/

The post Lamallari prezanton Kodin e ri Penal: Nga dekriminalizimi i shpifjes për gazetarët, te parkimi në rresht të dytë appeared first on Agjencia Telegrafike Shqiptare.

TIRANË, 21 janar /ATSh/ Kryetari i Partisë Demokratike, Sali Berisha tha sot se gjyqtarja e Gjykatës së Posaçme Kundër Korrupsionit dhe Krimit të Organizuar, Irena Gjoka, nuk ka raportuar dënimin në Greqi, pranë Këshillit të Lartë Gjyqësor (KLGj).

Duke iu referuar verifikimit të Prokurorisë së Përgjithshme, Berisha shtoi se dje u konfirmua ajo që ai ka shprehur që në mars të vitit 2024, se “Irena Gjoka ka vendim penal në Greqi si falsifikatore, si dhe dy dëbime nga shteti fqinj dhe zona Shengen”.

“Ajo është një falsifikatore e certifikuar me vendim gjyqësor, vepër për të cilën është dënuar me burg si falsifikatore, më pas të konvertuar në gjobë. Ky vendim penal ka marrë formë të prerë. Po kështu, ajo është dëbuar dy herë nga shteti grek. Përkatësisht më datë 24.12.2002 dhe dy muaj më pas, më 13.02.2003. Ajo nuk ka raportuar dënimet e veta pranë KLGj-së, siç kërkohet në ligjin 96/2016 për statusin e gjyqtarëve dhe prokurorëve të Republikës së Shqipërisë, nenit 28 D dhe 66/3”, tha Berisha.

Sipas Berishës, sipas Ligjit të Dekriminalizimit “fshehja, refuzimi për të deklaruar gjykime, dënime, qoftë dhe jo të formës së prerë, nga autoritetet e huaja për çfarëdo lloj vepre penale apo masë dëbimi, shkakton ndërprerjen e menjëhershme të funksionit të gjyqtarit, si dhe përbën vepër penale që përfshin dënimin me burg”.

Berisha tha se refuzimi për të deklaruar përbën shkak për shkarkimin e saj të menjëhershëm.

“Irena Gjoka me 5 mbiemra nuk duhet të ishte gjyqtare në bazë të Kushtetutës së Shqipërisë, pasi neni 6/1, parashikon që një person, integriteti publik i të cilit është cenuar, nuk mund të vijojë funksionet në organet kushtetuese”, u shpreh Berisha. Berisha shtoi se faktet për Irena Gjokën ishin plotësisht të njohura për autoritetet e drejtësisë.

Berisha theksoi se Irena Gjoka, në shkelje të Kushtetutës dhe ligjeve u përdor nga qeveria si “mashë për proceset politike ndaj opozitës”. Berisha shtoi gjithashtu se Prokuroria e Përgjithshme e zvarriti për 21 muaj apo 20 muaj, kinse se po e hetonte çështjen.

Sipas kreut të PD-së, Irena Gjoka duhej të ishte prej kohësh në burg te 313-a.

“Ka zero moral ligjor, ka zero integritet profesional, e cila duhet të ishte prej kohësh në burg tek “313”-a ose në ndonjë burg tjetër për të marrë ndëshkimin e merituar. Por ajo mbrohet nga Altin Dumani, mbrohet edhe nga këta që konstatuan, se nuk di nëse Prokurori i Përgjithshëm është shprehur për dëbimet apo i ka injoruar dëbimet”, tha Berisha.

Berisha tha se KLGj-ja ka qenë e detyruar për tri javë të kthejë përgjigje, por asnjë përgjigje nuk ka kthyer.

Irena Gjoka është gjyqtarja e dosjes “Partizani”, në të cilën ish-kryeministri është marrë i pandehur.

/m.q/r.e/a.f/

The post Berisha: Irena Gjoka duhet të ishte në burg, nuk raportoi dënimet në KLGj appeared first on Agjencia Telegrafike Shqiptare.

TIRANË, 21 janar/ATSh/ Në kuadër të operacionit “Anëtarët”, policia e Tiranës njoftoi sot se pas tre muajve hetime, goditi një grup kriminal i cili shiste armë zjarri.

Në kuadër të këtij operacioni u vunë në pranga shtetasit: I. Z., 55 vjeç, banues në Tiranë, i dënuar më parë për vrasje; A. B., 63 vjeç, banues në Tiranë, i dënuar më parë për prodhim dhe shitje të narkotikëve dhe për mashtrim; A. R., 46 vjeç, banues në Tiranë, i dënuar më parë për plagosje të rëndë me dashje. Gjithashtu, u shpall në kërkim shtetasi E. S., 28 vjeç.

Gjatë operacionit, sipas policisë u kapën në flagrancë, në Tufinë, shtetasit A. B dhe I. Z., në tentativë për të shitur dy armë zjarri kallashnikov.

Policia bëri të ditur se nga hetimet dyshohet se këta shtetas ishin pjesëtarë të një grupi që shiste armë zjarri në zona të ndryshme të Tiranës, kryesisht në Tufinë dhe në Fresk. Në kuadër të operacionit u sekuestruan pesë armë zjarri dhe municion luftarak, që dyshohet se do të shiteshin në zonat e Tufinës dhe të “Freskut”.

Vijojnë hetimet, në drejtimin e Prokurorisë, për dokumentimin e plotë të veprimtarisë kriminale të këtyre shtetasve, identifikimin dhe kapjen e shtetasve të tjerë të përfshirë në grup.

Materialet procedurale iu referuan Prokurorisë, për veprime të mëtejshme.

/m.q/r.e/a.f/

The post Tiranë, goditet grupi kriminal që shiste armë zjarri appeared first on Agjencia Telegrafike Shqiptare.

TIRANË, 21 janar/ATSh/ Gjykata e Posaçme për Korrupsionin dhe Krimin e Organizuar shpalli sot fajtor deputetin Agron Shehaj, kryetar i Partisë Mundësia, për veprën penale “Fyerja” ndaj Adriatik Lapajt, kryetar i Partisë Shqipëria Bëhet.

Vendimi u mor nga gjyqtari Erjon Çela dhe në bazë të ligjit Shehaj dënohet me 300 000 (treqind mijë) lekë gjobë.

Afati i pagimit të gjobës do të jetë gjashtë muaj nga dita e marrjes së formës së prerë të vendimit. Shpenzimet gjyqësore i lihen në ngarkim të akuzuarit Agron Shehaj.

Ndërkohë gjykata shpalli ta pafajshëm Shehajn për veprën penale “Shpifja”, pasi fakti i pretenduar nuk përbën vepër penale.

Kundër këtij vendimi mund të bëhet ankim në Gjykatën e Posaçme të Apelit për Korrupsionin dhe Krimin e Organizuar brenda 15 ditëve, afat i cili fillon nga dita e nesërme e njoftimit të vendimit.

/m.q/r.e/a.f/

The post GJKKO dënon Agron Shehajn për fyerje ndaj Adriatik Lapajt appeared first on Agjencia Telegrafike Shqiptare.

TIRANË, 21 janar /ATSh/ Gjykata e Shkallës së Parë në Vlorë, më kërkesë të prokurorisë, sekuestroi pasuritë e A.Rr dhe familjarëve të tij, nën hetim për veprën penale “Pastrimi i produkteve të veprës penale ose veprimtarisë kriminale”

Në kuadër të hetimeve të nisura në vitin 2020, rezultoi se shtetasi A.Rr., i dënuar më parë për “Trafik të lëndëve narkotike” dhe “Organizatë kriminale”, nuk justifikonte pasuritë e krijuara.

Konkretisht prokuroria kërkoi sekuestrimin e 3 apartamenteve, 3 makinave si dhe një dyqan.

Gjykata e Shkallës së Parë të Juridiksionit të Përgjithshëm Vlorë pranoi kërkesën e organit të akuzës, duke caktuar masën e sigurimit pasuror sekuestro preventive për pasuritë e mësipërme të paluajtshme në vlerë totale 400.000 euro.

/m.q/a.f/

The post Sekuestrohen pasuri me vlerë 400 mijë euro në Vlorë appeared first on Agjencia Telegrafike Shqiptare.

TIRANË, 21 janar /ATSH/ Kryeministri Edi Rama përkujtoi sot ngjarjen e “21 Janarit” ku në Bulevardin “Dëshmorët e Kombit” përballë Kryeministrisë mbetën të vrarë katër protestues.

Gjatë fjalimit të tij, ku ishin të pranishëm edhe familjarët e katër viktimave: Aleks Nikës, Ziver Veizit, Faik Myrtajt dhe Hekuran Dedajt, Kryeministri Edi Rama bëri thirrje për drejtësi. Sipas Ramës prej 15 vitesh ende drejtësia për 21 Janarin nuk është vendosur në vend, pavarësisht reformës së bërë në drejtësi.

Kryeministri u shpreh se prokurorët e SPAK ende nuk e kanë çuar në Gjykatës Speciale çështjen e “21 Janarit”, megjithëse ka një vendim më shumë se dy vite më parë nga Gjykata e të Drejtave të Njeriut në Strasburg.

“Nuk ka mjaftuar as vendimi rrënqethës i Gjykatës së të Drejtave të Njeriut në Strasburg më shumë sesa 2 vjet më parë që prokurorët specialë të kësaj Republike t’i kishin kërkuar deri tani Gjykatës Speciale drejtësinë për 4 vrasjet shtetërore të “21 Janarit”, ndërkohë që në emër të drejtësisë dhe vetëm të drejtësisë së barabartë për të gjithë dhe të barazisë së secilit përpara ligjit prej plot 6 vjetësh ne u bëjmë atyre veç duvara dhe hosanara dhe u paguajmë rroga ku e ku më të larta sesa vetes dhe vetë Presidentit të Republikës, pa llogaritur justifikimin me durim dhe me heshtje nga ana jonë të gabimeve të tyre nganjëherë tejet shqetësuese, si gabime të rritjes të një institucioni të ri dhe jetik për shtetin e së drejtës”, tha Rama.

“Halli është se sa herë vjen kjo ditë tragjike për ju, familjarët e katër dëshmorëve të 21 Janarit dhe për ne miqtë dhe dashamirët tuaj, vijnë mbi kurrizin tonë dhe gurët e mllefit dhe të mërzisë së shumë kujt në këtë vend, që me plot të drejtë ndjehet i tradhtuar në pritjen e vet të pafundme për drejtësi, ndjehet i përdorur në besimin e vet tek drejtësia e re dhe ndjehet i përbuzur që drejtësia për 21 Janarin të vihet në vend. Unë i mirëkuptoj plotësisht dhe nuk e pretendoj mirëkuptimin reciprok prej atyre se ç’nuk komentojnë dhe akuzojnë me gishtin e ngritur në drejtim tonë dhe drejtimin tim posaçërisht, kur vjen fjala për pandëshkueshmërinë që mban peng 21 Janarin. Por u them se ndihem po njësoj i zbrazët në shpirt dhe i dobët në pozitë, kur shoh sesi kaloi dhe një vit tjetër dhe 21 Janari rierdhi përsëri me hijen përqeshëse të padrejtësisë së madhe mbi shpinën e vet”, tha Rama.

Kreu i qeverisë shtoi se “sot burgjet e Shqipërisë mbajnë me taksat e shqiptarëve më shumë të paraburgosur, pra njerëz të dënuar me vendim gjykate, pa gjyq, sesa njerëz të dënuar me vendim gjykate të formës së prerë dhe një pjesë e madhe e të paraburgosurve janë viktima të karshillëkut të hatashëm të lirive dhe të drejtave të njeriut nga ana e prokurorëve të çdo niveli dhe gjykatësve që shpesh i venë nga mbrapa prokurorit si delja dashit”.

Sipas tij, kjo është “një panoramë e trashtë e një drejtësie të dhunuar, ku 21 Janari është ana tjetër e medaljes, ajo e drejtësisë së vonuar me përgjegjësit kryesorë të tragjedisë që mezi u thirrën për t’u pyetur për herë të parë gjatë muajve të fundit, pas thuajse 15 vitesh”.

Rama theksoi se “e kam thënë që në krye të herës se 21 Janari, si një krim shtetëror, hyn tek ajo kategori krimesh për të cilët historia na mëson, që drejtësia vonon shumë, por nuk harron kurrë. Është interesante historia e krimeve shtetërore, sepse nuk rezulton asnjë krim shtetëror i pandëshkuar”.

Kreu i qeverisë theksoi se edhe SPAK, si një institucion i krijuar krejtësisht i pavarur, fatkeqësisht nuk ka ngritur ende akuza për 21 Janarin.

“Nga ana tjetër është shumë evidente nga kanalet e asaj historie se sa shumë vonon ndëshkimi për një krim shtetëror. Por, ama, edhe me orvatjen për të gjetur ngushëllim tek historia e botës demokratike ndaj krimeve shtetërore, nuk e kam menduar, të them të vërtetën, se Reforma në Drejtësi për të cilën 21 Janari si nevojë prioritare e jona për drejtësi, ka qenë një prej burimeve të energjisë dhe vendosmërisë sonë për ta çuar para atë reformë dhe pastaj strukturat e reja speciale, krejtësisht të pavarura, që u krijuan në kuadrin e reformës në drejtësi, nuk do të ngrinin, e paimagjinueshme për mua, asnjë akuzë të vërtetë për 21 Janarin as pas 15 vitesh nga vrasjet mizore në bulevardin kryesor të Shqipërisë. Fatkeqësisht, për vite me radhë edhe vetë SPAK-u bëri sikur kjo çështje nuk ekziston, pavarësisht se bëhet fjalë për kryeçështjen mes çështjeve të lidhura me abuzimin e pushtetit politik në Shqipëri, për të cilat SPAK merret drejtpërdrejt, ndërkohë që kur i është dashur ka hetuar dhe ka ngritur akuza pa humbur asnjë vit, për çështje të hapura dhe me një letër anonime, apo ka konsumuar kohë dhe energji me vite duke mbajtur peng punë me interes shtetëror dhe punonjës shteti me çështje të cilat janë aq të sforcuara, sa mund të shkruhen romane satirike, jo vendime gjyqësore të formës së prerë fajësie”, tha Rama.

Rama theksoi se se ishte Mark Nika, xhaxhai i Aleks Nikës, “që e çoi kryeçështjen e 21 Janarit në Strasburg dhe e riktheu gurin mbi varrin ku drejtësia e kishte kyçur 21 Janarin, pas një farse të shëmtuar kriminale si gjyqi që medemek u bë lidhur me vrasjet.

Vetëm ashtu dhe falë këmbënguljes së familjeve të viktimave përmes Markut, dosja e krimit më të egër të historisë së demokracisë shqiptare u rivendos me detyrim-përcaktim në tryezën e SPAK, ku Marku dorëzoi dhe një material autentik zërash të regjistruar në vendngjarje nga kanalet e komunikimit të forcave të sigurisë, të cilin prej vitesh e mbante fshehur nga mosbesimi total ndaj institucioneve të drejtësisë, dhe nga droja se ai material “humbte” siç janë humbur plot gjurmë. Ndërkohë që gjurmë të shumta janë humbur, ujku është krejtësisht i dukshëm në sytë e të gjithëve”.

Rama shtoi se “Gjykata e Strasburgut i konsideroi si shkelje të Konventës Evropiane qoftë përdorimin e pajustifikuar të forcës vdekjeprurëse, qoftë mungesën e bazës legjitime për të mbrojtur zyrën e Kryeministrit me forcë vdekjeprurëse, duke kërkuar nga autoritetet të zbardhin ngjarjen. Në rrjedhën e vendimit të Strasburgut, Gjykata e Lartë ka formuluar një nga dokumentet më të plotë dhe më të pakontestueshëm profesionalisht dhe moralisht dhe ka vënë faktikisht në lëvizje hetimet, që kanë rinisur. Ndërkohë që shpresa vdes e fundit, ndërsa nevoja për drejtësi nuk vdes kurrë dhe kur vdes shpresa”.

Rama shtoi se “nuk e di sa vite do të kërkojë fundi i padrejtësisë mbi këdo që do drejtësia për katër të vrarët për 21 Janarin”, por theksoi se “ulërima e kësaj padrejtësia nuk do të shuhet asnjëherë dhe nevoja për drejtësinë e munguar për këtë tragjedi të madhe do të triumfojë me patjetër”.

/a.f/r.e/

The post Rama: E paimagjinueshme që SPAK ende nuk ka ngritur akuza për 21 Janarin appeared first on Agjencia Telegrafike Shqiptare.

TIRANË, 20 janar /ATSh/ Mesditën e sotme, Kuestori i Romës, drejtori i policisë së kryeqytetit italian, Roberto Massucci, së bashku me delegacionin që e shoqëronte, zhvilloi një vizitë kortezie në Drejtorinë e Përgjithshme të Policisë së Shtetit, ku u prit nga drejtori i përgjithshëm i Policisë së Shtetit, Ilir Proda, dhe drejtues të lartë të institucionit.

Gjatë takimit, kuestori Massucci vlerësoi bashkëpunimin shumë të mirë që ekziston mes dy policive.

Nga ana e tij, Proda e siguroi Kuestorin e Romës se Policia e Shtetit është e vendosur të bashkëpunojë ngushtësisht me partnerët italianë dhe ata ndërkombëtarë.

Ai theksoi se bashkëpunimi me Policinë italiane përbën një shembull shumë të mirë, përmes shkëmbimit të informacionit, krijimit të skuadrave të përbashkëta hetimore dhe operacionale, si dhe realizimit të trajnimeve dhe shkëmbimit të eksperiencave.

Gjatë takimit u shkëmbyen gjithashtu eksperienca mbi menaxhimin e situatave të ndryshme, u vlerësua roli dhe mbështetja e ambasadës italiane në Tiranë, si dhe u dakordësua forcimi i mëtejshëm i marrëdhënieve, përfshirë zgjerimin e bashkëpunimit edhe me Kuesturën e Romës.

1 nga 3

/m.q/r.e/a.f/

The post Proda pret kreun e Policisë së Romës: Bashkë për të luftuar krimin e organizuar appeared first on Agjencia Telegrafike Shqiptare.