ATHINË, 9 janar /ATSH-ANA/ – Fermerët e Greqisë qendrore po lëvizin drejt një heqjeje graduale të bllokimeve, pas vendimeve të marra në asambletë e tyre të përgjithshme, ndërsa përgatiten për takimin me kryeministrin Kyriakos Mitsotakis, që do të mbahet të martën e ardhshme në rezidencën ”Maximos”.

Në të njëjtën kohë, grupet që marrin pjesë në Komitetin Panhelen të Koordinimit po planifikojnë një takim të ri në Nikaia, me qëllim përcaktimin e përbërjes së delegacionit dhe kuadrit të diskutimeve me qeverinë.

Megjithatë, përfaqësuesit e fermerëve theksuan se ”nuk bëhet fjalë për përfundimin e protestave”.

Përkundrazi, ata nënvizuan se traktorët do të qëndrojnë në autostrada dhe se situata do të rivlerësohet pas takimit me kryeministrin, në mënyrë që vendimet përfundimtare të merren pas vlerësimit të rezultateve të këtij takimi./  /Ad.Ab./ a.jor.

The post GREQI – Fermerët drejt heqjes së bllokimeve, përpara takimit me kryeministrin Mitsotakis appeared first on Agjencia Telegrafike Shqiptare.

UASHINGTON, 9 janar /ATSH-DPA/ – Presidenti amerikan Donald Trump, deklaroi sot se një valë e dytë sulmesh ndaj Venezuelës është anuluar për momentin, duke përmendur lirimin e të burgosurve politikë në vendin e Amerikës së Jugut.

Presidenti Trump vlerësoi gjithashtu bashkëpunimin pozitiv mes dy vendeve, veçanërisht në sektorin e infrastrukturës së naftës dhe gazit, pas kapjes javën e kaluar të udhëheqësit venezuelian Nicolas Maduro dhe bashkëshortes së tij, Cilia Flores, nga forcat amerikane, pas muajsh presioni të shtuar ndaj regjimit të tij autoritar.

“Për shkak të këtij bashkëpunimi, kam anuluar valën e dytë të sulmeve që pritej më herët, e cila duket se nuk do të jetë e nevojshme. Megjithatë, të gjitha anijet do të qëndrojnë në pozicion për arsye sigurie dhe mbrojtjeje”, shkroi Trump në rrjetin e tij social Truth Social, duke iu referuar anijeve luftarake amerikane të dislokuara në brigjet e Venezuelës.

Sipas  president Trump, Venezuela po liron një numër të madh të burgosurish politikë si shenjë e kërkimit të paqes.

Qeveria në Karakas kishte njoftuar më herët lirimin e shumë të ndaluarve venezuelianë dhe të huaj, mes të cilëve raportohet se përfshihen figura të njohura të opozitës, si aktivistja për të drejtat e njeriut, Rocío San Miguel./  /Ad.Ab./ a.jor.

The post SHBA – Trump: Anulova valën e dytë të sulmeve ndaj Venezuelës appeared first on Agjencia Telegrafike Shqiptare.

ROMË, 9 janar /ATSH-ANSA/- Kryeministrja italiane, Giorgia Meloni, ka deklaruar se nuk beson te një veprim ushtarak i mundshëm i Shteteve të Bashkuara të Amerikës  në Groenlandë.

Meloni theksoi se nuk do ta mbështeste një veprim të tillë.

”Nuk do ta mbështes një veprim të tillë”, deklaroi Meloni.

Ajo shtoi se mesazhi i ish-presidentit amerikan, Donald Trump, duket të jetë se ai nuk do të pranojë ndërhyrje nga shtetet e tjera në këtë rajon strategjik.

Meloni nënvizoi gjithashtu rëndësinë e dialogut dhe bashkëpunimit ndërkombëtar për çështjet që lidhen me sigurinë dhe stabilitetin në rajon.

Ajo shtoi se ”zgjidhjet ushtarake nuk duhet të jenë opsioni i parë”.

Deklarata e saj vjen në një kohë kur interesat gjeopolitike në Arktik po rriten dhe vendet e ndryshme po vëzhgojnë me kujdes lëvizjet e fuqive të mëdha në këtë zonë./  /Ad.Ab./ a.jor.

The post ITALI – Meloni: Nuk besoj te një veprim ushtarak i SHBA-së në Groenlandë appeared first on Agjencia Telegrafike Shqiptare.

MOSKË, 9 janar /ATSH-DPA/ – Rusia ka përdorur raketën e saj me rreze të mesme veprimi dhe me kapacitet bërthamor ”Oreshnik” në një sulm ndaj Ukrainës perëndimore, raportoi sot agjencia e lajmeve TASS, duke cituar Ministrinë ruse të Mbrojtjes.

Ky është sulmi i dytë ndaj Ukrainës ku përfshihet kjo armë.

Sipas ministrisë, sulmi u krye si përgjigje ndaj një akti terrorist të kryer nga Kievi ndaj rezidencës së presidentit rus Vladimir Putin më 29 dhjetor 2025.

Ministria shtoi se objektivat e goditjes u arritën dhe se u shënjestruan objekte që prodhonin mjete ajrore pa pilot (dronë), të cilat dyshohet se janë përdorur në sulmin e pretenduar, si edhe infrastruktura energjetike.

Ukraina ka mohuar se ka kryer ndonjë sulm ndaj rezidencës së Putinit dhe akuzon Moskën se po përdor këtë pretendim të rremë për të justifikuar goditjet ndaj ndërtesave qeveritare në Kiev.

Rusia e përdori për herë të parë raketën ”Oreshnik” kundër Ukrainës në qytetin industrial të Dnipros në nëntor të viitit 2024.

Presidenti Putin ka deklaruar se sistemet perëndimore të mbrojtjes ajrore nuk janë në gjendje ta kapin raketën ”Oreshnik”, emri i së cilës në rusisht do të thotë ”lajthi” dhe se ajo mund të godasë objektiva deri në Evropën Perëndimore.

Analistë ushtarakë perëndimorë thonë se ”Oreshnik” është e aftë të mbajë një koka bërthamore./  /Ad.Ab./ a.jor.

The post MOSKË – Rusia përdori raketën ”Oreshnik” me kapacitet bërthamor në sulmin ndaj Ukrainës appeared first on Agjencia Telegrafike Shqiptare.

LONDËR, 9 janar /ATSH-AFP/ – Erëra të fuqishme goditën sot Francën dhe BM, ndërsa stuhitë ”Elli” dhe ”Goretti” përparuan me shpejtësi në Evropën veriore, duke lënë qindra mijëra familje pa energji elektrike, në kushtet e temperaturave të ulëta dimërore.

Parashikuesit e motit nga Britania e Madhe deri në Gjermani u bënë thirrje qytetarëve të qëndrojnë brenda, duke lëshuar paralajmërime të shumta për motin e keq, përfshirë edhe alarmin e rrallë maksimal, nivelin e kuq për erëra, për Ishujt Scilly dhe Cornwall në jugperëndim të Anglisë.

Rreth 380 mijë familje mbetën pa energji elektrike në Francë, shumica dërrmuese në rajonin verior të Normandisë, njoftoi kompania e shpërndarjes së energjisë “Enedis”.

Ndërkohë raportohet se rreth 65 mijë familje humbën energjinë elektrike në BM.

“Gjatë natës, në rajonin veriperëndimor francez të Manches u regjistruan stuhi ere  me fuqi deri në 216 kilometra në orë”, thanë autoritetet.

Sipas autoriteteve , shtrëngatat rrëzuan pemë në disa rajone, ku të paktën njëra prej tyre ra mbi ndërtesa banimi në rajonin Seine-Maritime të Francës, pa shkaktuar të lënduar.

Në BM priten erëra deri në 160 kilometra në orë (100 milje), ndërsa “valë shumë të mëdha do të krijojnë kushte të rrezikshme në zonat bregdetare”, njoftoi Shërbimi Meteorologjik Britanik (Met Office).

Po ashtu, Met Office lëshoi një paralajmërim portokalli për borë në Uells, Anglinë qendrore dhe pjesë të Anglisë veriore, duke parashikuar deri në 30 centimetra borë (11 inç) në disa zona.

Hekurudhat Kombëtare të Britanisë së Madhe njoftuan se shërbimet hekurudhore do të preken gjatë dy ditëve të ardhshme dhe u bënë thirrje qytetarëve të shmangin udhëtimet, përveç rasteve të domosdoshme.

Shkolla të mbyllura, probleme në udhëtime

Shkollat mbetën të mbyllura në Francën veriore, ku paralajmërime për mot ekstrem janë lëshuar në 30 rajone të tjera.

“Strehoni veten dhe mos përdorni automjetet”, paralajmëroi prefektura e Manches në platformën X të, duke u kërkuar banorëve të përgatisin ndriçim emergjence dhe furnizim me ujë të pijshëm.

Kushtet ekstreme të motit në Evropë kanë shkaktuar të paktën tetë viktima.

Policia në qytetin shqiptar të Durrësit nxori trupin e një burri nga ujërat e përmbytura, pas ditësh me reshje të dendura bore dhe shira të rrëmbyeshëm në të gjithë Ballkanin.

Në Gjermani, reshjet e dendura të borës dhe erërat e forta në veri pritej të ndikonin në shkolla, spitale dhe lidhjet e transportit.

Sipas Shërbimit Meteorologjik Gjerman (DWD), në veri mund të bien deri në 15 centimetra dëborë, ndërsa në jug ekziston rreziku i formimit të akullit në rrugë.

”Temperaturat gjatë fundjavës mund të zbresin deri në minus 20 gradë Celsius në disa zona”, tha pmeteorologu i DWD-së, Andreas Walter.

Disa rajone kanë njoftuar sot mbylljen e shkollave, përfshirë qytetet veriore Hamburg dhe Bremen.

Në Hamburg, moti i keq kishte shkaktuar tashmë vonesa dhe anulime në rrjetin e transportit publik që të enjten.

Kompania kombëtare hekurudhore “Deutsche Bahn” paralajmëroi për vonesa të konsiderueshme në ditët në vijim dhe ka angazhuar më shumë se 14 mijë punonjës për të pastruar borën nga shinat dhe platformat.

Pasojë e ndryshimeve klimatike

DWD-ja bëri të ditur se stuhia pritet të zgjasë deri nesër , ndërsa reshjet e borës të ndalojnë të hënën.

Walter tha se kjo stuhi përbën një përjashtim krahasuar me vitet e fundit me dimra më të butë, të cilët janë “pasojë e ndryshimeve klimatike”.

“Edhe pse temperaturat po rriten për shkak të ndryshimeve klimatike, është ende e mundur të kemi një muaj të ftohtë me borë, por ngjarje të tilla do të bëhen më të rralla në të ardhmen,” tha ai./  /Ad.Ab./ a.jor.

The post FOKUS – Stuhitë ”Elli” dhe ”Goretti” lënë qindra mijëra evropianë pa energji elektrike appeared first on Agjencia Telegrafike Shqiptare.

PARIS, 8 janar /ATSH-DPA-AFP/ – Presidenti francez, Emmanuel Macron ka akuzuar Shtetet e Bashkuara se po u kthejnë shpinën partnerëve të tyre, duke përmendur politikat tregtare dhe të sigurisë.

”SHBA-ja është një fuqi e konsoliduar, por gradualisht po largohet nga disa prej aleatëve të saj dhe po shkëputet nga rregullat ndërkombëtare që deri vonë i promovonte vetë”, u tha  Macron sot ambasadorëve në Paris.

Ai tha se mes fuqive të mëdha ekziston një tundim për ”ta ndarë botën”.

”Institucionet shumëpalëshe po funksionojnë gjithnjë e më pak. Ne po jetojmë në një botë të fuqive të mëdha, me një tundim real për ta ndarë botën”, shtoi ai.

Fjalimi i Macron vjen në një kohë kur fuqitë evropiane po përpiqen të gjejnë një përgjigje të koordinuar ndaj politikës gjithnjë e më assertive të Uashingtonit në Hemisferën Perëndimore, përfshirë kapjen e liderit të Venezuelës, Nicolas Maduro, si dhe ambiciet e presidentit Donald Trump lidhur me Groenlandën.

The post FRANCË – Macron: SHBA po braktis aleatët dhe rregullat ndërkombëtare appeared first on Agjencia Telegrafike Shqiptare.

TIRANË, 8 janar /ATSH/ – Sot përkujtohet ditëlindja e David Bowie, një prej figurave më ndikuesе dhe më novatore të muzikës dhe kulturës pop.

I lindur në Londër në vitin 1947, Bowie do të shndërrohej në një artist që ndryshoi përgjithmonë mënyrën se si ndërthuren muzika, identiteti dhe arti skenik.

Karriera e tij nisi në fund të viteve ’60, por shpërthimi i vërtetë erdhi në fillim të viteve ’70, kur Bowie u pozicionua si një zë i ri dhe i guximshëm në skenën rock.

Ai dallohej për qasjen eksperimentale dhe për refuzimin e kufijve tradicionalë artistikë.

Krijimi i alter egos Ziggy Stardust shënoi një moment kyç në historinë e muzikës moderne.

Personazhi androgjen dhe futurist e ktheu Bowie në simbol të lirisë artistike dhe sfidës ndaj normave shoqërore të kohës.

Albumi “The Rise and Fall of Ziggy Stardust and the Spiders from Mars” u bë një nga veprat më të rëndësishme të rock-ut, duke e konsoliduar Bowie si një artist vizionar.

Kritika dhe publiku e panë atë si një figurë që po hapte rrugë të reja në art.

Në vitet që pasuan, Bowie vijoi të transformohej. Ai kaloi nga glam rock-u te soul-i, elektronika dhe muzika eksperimentale, duke treguar një aftësi të rrallë për t’u përshtatur dhe për të udhëhequr tendencat muzikore.

Albumet “Heroes” dhe “Low”, të regjistruara pjesërisht në Berlin, reflektuan një fazë më introspektive dhe eksperimentale të karrierës së tij. Këto projekte u konsideruan si gurë themeli të muzikës moderne evropiane.

Përtej muzikës, David Bowie u shqua edhe si aktor në film dhe teatër. Rolit e tij në kinematografi i dhanë një dimension tjetër figurës së tij publike dhe dëshmuan shtrirjen e gjerë të talentit të tij artistik.

Tekstet e këngëve të Bowie shpesh trajtonin tema si identiteti, izolimi, fama dhe pasiguria njerëzore. Kjo thellësi tematike e bëri muzikën e tij aktuale për breza të ndryshëm.

Në vitet e fundit të jetës, Bowie u tërhoq pjesërisht nga jeta publike, por jo nga krijimtaria.

Albumi “Blackstar”, i publikuar pak para vdekjes së tij në vitin 2016, u interpretua gjerësisht si një lamtumirë artistike e menduar me kujdes.

Sot, David Bowie mbetet një referencë e pashmangshme në muzikë dhe kulturë. Artistë të rinj vazhdojnë të frymëzohen nga guximi dhe vizioni i tij.

Ditëlindja e David Bowie shërben si një moment reflektimi për trashëgiminë e tij. Ai nuk ishte thjesht një muzikant, por një figurë që tregoi se arti mund të jetë transformim, sfidë dhe liri njëkohësisht./   /Ad.Ab./

The post MUZIKË – David Bowie ikona e përjetshme e transformimit artistik appeared first on Agjencia Telegrafike Shqiptare.

MOSKË, 8 janar /ATSH-AFP/ – Rusia paralajmëroi sot se do ta konsiderojë çdo prani perëndimore në Ukrainë një objektiv legjitim për forcat e saj të armatosura, pas njoftimit nga evropianët për qëllimin e tyre për të vendosur mijëra trupa në vend pas luftës.

“Të gjitha këto njësi dhe instalime do të konsiderohen objektiva legjitime ushtarake për forcat e armatosura ruse. Këto paralajmërime janë përsëritur disa herë në nivelin më të lartë dhe mbeten të vlefshme”, tha në një deklaratë zëdhënësja e Ministrisë së Jashtme ruse, Maria Zakharova.

Rusia dënoi edhe deklaratat, “militariste” sipas saj, pas marrëveshjes midis Kievit dhe aleatëve të tij evropianë për të vendosur trupa në Ukrainë pas përfundimit të konfliktit.

“Deklaratat e reja militariste nga i ashtuquajturi Koalicion i të Gatishëmve dhe regjimi i Kievit i bëjnë ata një bosht të vërtetë lufte”, tha Zakharova në një deklaratë./ /Ad.Ab./ a.jor.

The post MOSKË – Rusia do ta konsiderojë çdo prani ushtarake perëndimore në Ukrainë një objektiv legjitim appeared first on Agjencia Telegrafike Shqiptare.

MADRID, 8 janar /ATSH-AFP/ – Kryeministri socialist spanjoll, Pedro Sánchez tha sot se ishte gati të dërgonte trupa paqeruajtëse në Palestinë, kur të lindte mundësia, siç kishte bërë edhe me Ukrainën.

“Do t’i propozoj parlamentit, kur të lindë mundësia, që të dërgojmë trupa paqeruajtëse në Palestinë, kur më në fund të shohim se si të ecim përpara me këtë përpjekje paqësimi dhe… në afat të mesëm ose shpresojmë më shpejt, të njohim dy shtetet, Izraelin dhe Palestinën”, tha Sánchez gjatë një ceremonie përshëndetëse të Vitit të Ri për ambasadorët spanjollë të mbledhur në Madrid.

“Padyshim që nuk po harrojmë as Palestinën dhe Rripin e Gazës”, tha udhëheqësi socialist, pasi përsëriti mbështetjen e tij për dërgimin e forcave paqeruajtëse në Ukrainë.

“Spanja duhet të marrë pjesë aktive në rindërtimin e shpresës në Palestinë. … Situata atje mbetet e patolerueshme”, shtoi ai.

“Pa dyshim, një shtet palestinez i pavarur, i qëndrueshëm dhe i sigurt do të jetë zgjidhja për stabilizimin, zhvillimin dhe përparimin e një rajoni me rëndësi të madhe, gjithashtu nga një pikëpamje gjeopolitike dhe gjeostrategjike, për kontinentin tonë dhe për vendin tonë”, argumentoi më tej ai.

Qeveria spanjolle, e cila njohu Shtetin e Palestinës në vitin 2024, ka qenë një nga zërat më të fuqishëm në Evropë që nga nisja e ofensivës ushtarake izraelite në Rripin e Gazës, e shkaktuar nga sulmi i Hamasit më 7 tetor 2023, në Izraelin jugor./ /Ad.Ab./ a.jor.

The post SPANJË – Sanches: Të gatshëm të dërgojmë trupa për ruajtjen e paqes në Palestinë appeared first on Agjencia Telegrafike Shqiptare.

UASHINGTON, 8 janar /ATSH/ – Sekretari amerikan i Shëndetësisë, Robert F. Kennedy Jr. ka prezantuar udhëzimet e reja dietike të SHBA-së, të cilat u bëjnë thirrje amerikanëve të konsumojnë më shumë proteina dhe të kufizojnë ushqimet shumë të përpunuara si dhe sheqerin e shtuar, sipas BBC.

Udhëzimet, që publikohen çdo pesë vjet nga Departamenti i Bujqësisë dhe Departamenti i Shëndetësisë dhe Shërbimeve Njerëzore, sugjerojnë gjithashtu tre racione në ditë të produkteve të qumështit me yndyrë të plotë dhe lehtësojnë kufizimet për pijet alkoolike.

Këto udhëzime përbëjnë bazën e programeve federale të ushqyerjes, përfshirë programet e vakteve shkollore, dhe të rejat kanë marrë reagime të përziera nga ekspertët.

”Mesazhi im është i qartë: hani ushqim të vërtetë”, tha Kennedy në një konferencë për shtyp në Shtëpinë e Bardhë.

Në përgjithësi, rekomandimet nxisin konsumimin e proteinave, produkteve të qumështit me yndyrë të plotë, drithërave integrale të pasura me fibra, si dhe frutave dhe perimeve, ndërsa këshillojnë shmangien e sheqernave dhe ushqimeve shumë të përpunuara, përfshirë snack-et e parapaketuara si patatinat, biskotat dhe karamelet.

Theksi mbi produktet e qumështit me yndyrë të plotë përbën një ndryshim nga udhëzimet e mëparshme, të cilat sugjeronin qumësht me pak yndyrë ose pa yndyrë për të kufizuar konsumin e yndyrave të ngopura.

Udhëzimet rekomandojnë gatimin me vajra si vaji i ullirit, por sugjerojnë edhe dhjamin e viçit si një alternativë — një preferencë e Kennedyt — edhe pse ai është i pasur me yndyra të ngopura.

Ndryshimet e përgjithshme u mirëpritën nga disa ekspertë mjekësorë, përfshirë Shoqatën Mjekësore Amerikane, e cila ka kritikuar disa nga veprimet e Kennedyt që nga marrja e detyrës./  /Ad.Ab./  a.jor.

The post FOKUS – SHBA prezanton udhëzime të reja dietike, më shumë proteina dhe më pak ushqime të përpunuara appeared first on Agjencia Telegrafike Shqiptare.

PRAGË, 7 janar /ATSH-DPA/ – Kryeministri i ri i Republikes Çeke, populisti i djathtë, Andrej Babis tha sot se nuk do të ndërpresë një iniciativë për armë e municione për Ukrainën, pavarësisht premtimeve të tij gjatë fushatës elektorale për ta  ndërprerë këtë.

“Projekti do të vazhdojë  dhe Republika Çeke do të jetë në rolin e koordinatorit”, njoftoi Babis, 71 vjeç.

Por, ai tha se paratë e taksapaguesve çekë nuk do të investoheshin më në këtë projekt.

“Kjo është pak a shumë një çështje simbolike, pasi donatorët kryesorë kanë përfshirë vende si Gjermania, Danimarka dhe Holanda, ndërsa Praga ka dhënë vetëm një pjesë të vogël të fondeve”, tha Babis.

Miliarderi dhe lideri i partisë populiste të djathtë ANO kishte kritikuar ashpër projektin gjatë fushatës së tij dhe kërkoi ndërprerjen e tij, po ashtu si dy partnerët e tij të koalicionit të ekstremit të djathtë.

Këshilli Kombëtar i Sigurisë u mblodh në Pragë për të diskutuar hapat e ardhshëm.

Përveç shefave të ushtrisë dhe të zbulimit, pritej të merrte pjesë edhe presidenti Petr Pavel.

Ukraina ka një nevojë të vazhdueshme për armë e municion artilerie për t’u mbrojtur nga Rusia, e cila filloi një pushtim të gjerë pothuajse katër vjet më parë./ /Ad.Ab./ a.jor.

The post PRAGË – Babis: Do të vazhdojmë t’i dërgojmë armë Ukrainës appeared first on Agjencia Telegrafike Shqiptare.

NUREMBERG, 7 janar /ATSH-DPA/ – Papunësia në Gjermani u rrit në 2,9 milionë persona në dhjetor, me 23 mijë më shumë krahasuar me muajin paraardhës dhe me rritjen më të lartë të 15 viteve të fundit, treguan sot të dhënat zyrtare.

Sipas Agjencisë Federale të Punësimit (BA), ky është niveli më i lartë i regjistruar që nga dhjetori i vitit 2010, kur 3,012 milionë persona ishin të regjistruar si të papunë.

Në krahasim me dhjetorin e vitit 2024, numri i të papunëve u rrit me 101 mijë, ndërsa norma e papunësisë u rrit me 0,1 pikë përqindje në baza mujore duke arritur në 6,2%.

Sipas agjencisë, shifrat bazohen në të dhënat e disponueshme deri më 11 dhjetor.

”Tregu i punës vazhdon të mos ketë vrull ekonomik”, deklaroi drejtuesja e BA-së, Andrea Nahles.

Rritja e papunësisë në dhjetor është e zakonshme, pasi më pak kompani punësojnë staf të ri dhe numri i vendeve të punës bie në sektorë si ndërtimi apo bujqësia për shkak të kushteve të ftohta të dimrit.

Megjithatë, Nahles theksoi se tregu i punës është përkeqësuar gradualisht gjatë vitit si pasojë e ngadalësimit ekonomik.

”Në përmbledhje, situata është më e dobët se një vit më parë. Megjithatë, ka shenja se kemi arritur pikën më të ulët”, shtoi ajo.

Kërkesa për fuqi të re punëtore vazhdoi të bjerë edhe në dhjetor, me agjencinë që regjistroi 619 mijë vende të lira pune, 35 mijë më pak krahasuar me një vit më parë.

Sipas institutit kërkimor të BA-së, IAB, nuk dallohen prirje të qarta për muajt në vijim./ /Ad.Ab./ a.jor.

The post GJERMANI – Papunësia shënon rritjen më të lartë të 15 viteve të fundit appeared first on Agjencia Telegrafike Shqiptare.

TEHERAN, 7 janar /ATSH-AFP/ – Presidenti iranian, Massoud Pezeshkian u bëri thirrje sot forcave të rendit të mos ndërmarrin asnjë masë kundër protestuesve, duke bërë një dallim të qartë mes tyre dhe personave të dhunshëm, sipas deklaratave të raportuara nga agjencia e lajmeve Mehr.

”Sot, presidenti Pezeshkian ka urdhëruar që të mos merren masa sigurie ndaj protestuesve dhe personave që marrin pjesë në tubime”, deklaroi në një video të publikuar nga Mehr pas mbledhjes së qeverisë, zëvendëspresidenti ekzekutiv, Mohammad Jafar Ghaempanah.

”Ata që mbajnë armë zjarri, thika apo mjete të tjera dhe që sulmojnë komisariate policie dhe objekte ushtarake janë persona që duan të shkaktojnë trazira, dhe duhet bërë dallim mes tyre dhe protestuesve”, shtoi Ghaempanah./ /Ad.Ab./ a.jor.

The post IRAN – Pezeshkian: Forcat e rendit të mos ndërhyjnë ndaj protestuesve appeared first on Agjencia Telegrafike Shqiptare.

LONDËR, 7 janar /ATSH-AFP/ – Çmimet e naftës vijuan sot rënien, mes frikës për rritje të ofertës, pasi presidenti amerikan, Donald Trump, deklaroi se Venezuela do t’i dërgojë Shteteve të Bashkuara deri në 50 milionë fuçi naftë.

Në një postim dje në platformën e tij Truth Social, Trump tha se qeveria e përkohshme e Venezuelës do t’i dorëzojë SHBA-së nga 30 deri në 50 milionë fuçi naftë të sanksionuar duke e paraqitur këtë veprim si përfitim për të dyja vendet.

Një fuçi përmban 159 litra.

Kjo sasi është e barabartë me prodhimin një deri në dy mujor të naftës të Venezuelës.

Nafta do të shitej me çmime tregu dhe të ardhurat do të kontrolloheshin prej tij si president, për të garantuar se do të përdoreshin në dobi të popullit të Venezuelës dhe të Shteteve të Bashkuara, sipas Trump.

Një fuçi e naftës Brent të Detit të Veriut për dorëzim në mars u ul sot në mëngjes me 56 cent ose gati 1%, në 60,14 dollarë, pasi çmimi kishte rënë me afro 2% të martën.

Ndërkohë, çmimi i një fuçie të naftës amerikane WTI për dorëzim në shkurt u ul me 73 cent ose 1,3%, në 56,40 dollarë.

Fillimisht ishte e paqartë se për çfarë periudhe kohore do të vihej në dispozicion vëllimi i naftës së papërpunuar i përmendur nga Trump.

Nafta është burimi më i rëndësishëm i të ardhurave dhe valutës së huaj për Venezuelën.

Udhëheqja e re në Karakas nuk reagoi menjëherë ndaj njoftimit të Trump. /Ad.Ab./ a.jor.

The post FOKUS – Çmimet e naftës bien sërish, pas deklaratave të Trump për Venezuelën appeared first on Agjencia Telegrafike Shqiptare.

OSLO, 7 janar /ATSH-AFP/ – Viti 2025 ka qenë viti më i nxehtë i regjistruar ndonjëherë në Norvegji, me një verë të shënuar nga një valë e fortë të nxehti dhe një fillimdimri të vonuar e jashtëzakonisht të butë, njoftoi sot Instituti Meteorologjik Norvegjez.

Si një tjetër tregues i çrregullimeve klimatike të shkaktuara nga aktivitetet njerëzore, termometri arriti në 4,0 gradë Celcius më 22 dhjetor në Longyearbyen, kryeqendra e arkipelagut të Svalbardit në zemër të Arktikut, më shumë se në Sevilje (3,0 gradë Celcius)  apo Ankara (1,0 gradë Celsius) në të njëjtën ditë.

“Është një vit rekord”, deklaroi klimatologu Hans Olav Hygen nga Instituti Meteorologjik Norvegjez.

“Shumë zona të Norvegjisë përjetuan një verë jashtëzakonisht të nxehtë, me një valë të fortë të nxehti në korrik. Kjo, sigurisht, ndikon në bilancin e gjithë vitit. Për më tepër, para Krishtlindjeve pamë një fund vjeshte dhe një fillim dimri relativisht të butë”, shtoi ai.

Në shkallë kombëtare, temperaturat mesatare vitin e kaluar rezultuan 1,6 gradë Celcius mbi normalen (mesatarja e periudhës 1991–2020) dhe 2,8 gradë Celcius mbi nivelet e periudhës paraIndustriale (1871–1900), sipas Institutit./ /Ad.Ab./ a.jor.

The post METEO – 2025-a viti më i nxehtë i regjistruar ndonjëherë në Norvegji appeared first on Agjencia Telegrafike Shqiptare.

UASHINGTON, 7 janar /ATSH-DPA/ – Presidenti i SHBA-së, Donald Trump deklaroi se qeveria e përkohshme e Venezuelës do t’i dorëzojë Shteteve të Bashkuara nga 30 deri në 50 milionë fuçi naftë të sanksionuar, një hap që ai e paraqiti si përfitim për të dy vendet.

Në një postim në platformën e tij Truth Social, Trump tha se nafta do të shitej me çmime tregu dhe se të ardhurat do të kontrolloheshin prej tij si president, për t’u siguruar që do të përdoreshin “në dobi të popullit të Venezuelës dhe të Shteteve të Bashkuara”.

“Kam kërkuar nga sekretari i Energjisë, Chris Wright, ta zbatojë këtë plan menjëherë. Nafta do të merret nga anije magazinimi dhe do të transportohet drejtpërdrejt në portet e shkarkimit në Shtetet e Bashkuara” , shtoi ai.

SHBA-ja  sulmoi objektiva në Venezuelë, duke kapur udhëheqësin autoritar Nicolás Maduro nën akuzat për vepra penale të lidhura me drogën dhe duke e larguar atë nga vendi. Pas operacionit, Trump deklaroi se SHBA-ja do ta administronte përkohësisht Venezuelën.

Presidenti amerikan kishte theksuar më herët potencialin ekonomik të industrisë së naftës së vendit, duke thënë se kompani të mëdha amerikane të naftës do të investonin miliarda dollarë për të riparuar infrastrukturën dhe për të zhvilluar prodhimin.

Disa demokratë e kanë akuzuar Trumpin se po e shënjestron Venezuelën vetëm për rezervat e saj të naftës, duke e quajtur arrestimin e Maduro thjesht një pretekst./  /Ad.Ab./ a.jor.

The post UASHINGTON – Trump: SHBA do të marrin 50 milionë fuçi nafte të sanksionuar venezueliane appeared first on Agjencia Telegrafike Shqiptare.

PARIS, 6 janar /ATSH/ – Aleatët e Ukrainës takohen sot në Paris për bisedime kyçe që mund të ndihmojnë në përcaktimin e sigurisë së vendit, pas një armëpushimi të mundshëm me Rusinë.

Por, perspektivat për përparim janë të pasigurta, ndërsa administrata e Trumpit po e zhvendos fokusin tek Venezuela, ndërkohë që sugjerimet për një pushtim të Groenlandës po shkaktojnë tension me Evropën, sipas AP.

Para kapjes nga SHBA e liderit venezuelian Nicolas Maduro, presidenti francez Emmanuel Macron kishte shprehur optimizëm për takimin e fundit të ashtuquajtur “koalicion i të gatshëmve”.

Për muaj me radhë, ata kanë eksploruar mënyrat për të penguar çdo agresion të mëtejshëm rus nëse do të pranojë të ndalojë luftën kundër Ukrainës.

Në një fjalim më 31 dhjetor, Macron tha se aleatët do të “marrin angazhime konkrete” në samit “për të mbrojtur Ukrainën dhe për të siguruar një paqe të drejtë dhe të qëndrueshme”.

Zyra e presidentit  Macron tha se takimi i sotëm do të mblidhte një numër të paprecedent të zyrtarëve të pranishëm personalisht, me 35 pjesëmarrës duke përfshirë 27 kryetarë shtetesh dhe qeverish.

SHBA-ja do të përfaqësohet nga të dërguarit  e presidentit Donald Trump, Steve Witkoff dhe Jared Kushner.

Zyra e Macron tha se delegacioni i SHBA-së fillimisht ishte planifikuar të udhëhiqej nga sekretari i Shtetit Marco Rubio, i cili ndryshoi planet për arsye të lidhura me ndërhyrjen ushtarake në Venezuelë.

 Rritet tensioni mbi komentet për Groenlandën

Witkoff dhe Kushner udhëtuan drejt kryeqytetit francez pas ripërsëritjes të dielën nga presidenti Trump të thirrjes për të marrë kontrollin e Groenlandës, një ishull strategjik dhe i pasur me minerale në Arktik.

Kryeministrja daneze Mette Frederiksen dhe homologu i saj i Groenlandës Jens Frederik Nielsen, kritikuan  presidentin Trump për komentet e tij dhe paralajmëruan për pasoja katastrofike nga çdo përpjekje e SHBA-së për të marrë kontrollin e ishullit, duke thënë se kjo do të përbënte fundin e aleancës ushtarake NATO.

Shumë liderë evropianë i dhanë mbështetje atyre, por kontinenti gjithashtu ka nevojë për fuqinë ushtarake të SHBA-së për të mbështetur çdo garanci sigurie për Ukrainën dhe për të penguar ambiciet territoriale të Rusisë. Kjo mund të kërkojë një balancim të hollë diplomatik në Paris.

Pjesëmarrësit synojnë rezultate konkrete mbi pesë prioritete kryesore pas përfundimit të luftimeve: mënyrat për të monitoruar një armëpushim; mbështetjen për forcat e armatosura të Ukrainës; vendosjen e një force shumëkombëshe në tokë, në det dhe në ajër; angazhimet në rast të një agresioni tjetër rus; dhe bashkëpunim afatgjatë në mbrojtjen me Ukrainën.

Ukraina kërkon garanci të forta nga Uashingtoni për mbështetje ushtarake dhe të tjera, të cilat shihet si të domosdoshme për sigurimin e angazhimeve të ngjashme nga aleatët e tjerë.

Kievi ka qenë i kujdesshëm ndaj çdo armëpushimi që mund të japë kohë Rusisë për t’u rigjeneruar dhe për të sulmuar përsëri.

Progresi i fundit në bisedime

Para operacionit ushtarak të SHBA-së që synonte Maduron, Witkoff kishte treguar përparim në bisedimet mbi mbrojtjen dhe sigurimin e Ukrainës.

Në një postim më 31 dhjetor, Witkoff shkroi në Twitter se diskutimet “produktive” me të, Rubion dhe Kushner nga ana e SHBA-së dhe, nga ana tjetër, këshilltarët e sigurisë kombëtare të Britanisë, Francës, Gjermanisë dhe Ukrainës, kishin fokusuar mbi “forcimin e garancive të sigurisë dhe zhvillimin e mekanizmave efektivë të dekonfliktimit për të ndihmuar në përfundimin e luftës dhe për të siguruar që ajo të mos rifillojë.”

Franca, e cila së bashku me Britaninë e Madhe ka koordinuar përpjekjen shumëkombëshe muaj pas muaji për të mbështetur armëpushimin, ka dhënë vetëm detaje të përgjithshme mbi shkallën e planit. Ajo thotë se linja e parë e mbrojtjes së Ukrainës kundër rifillimit të luftës nga Rusia do të jetë ushtria ukrainase dhe se koalicioni ka për qëllim ta forcojë atë me trajnime, armë dhe mbështetje të tjera.

Macron ka folur gjithashtu për mundësinë e vendosjes së forcave evropiane larg vijave të frontit të Ukrainës për të ndihmuar në pengimin e agresionit të ardhshëm rus.

Detajet e rëndësishme ende të pafinalizuara

Presidenti i Ukrainës, Volodymyr Zelensky, tha gjatë fundjavës se vendosja e mundshme të trupave evropiane ende përballen me pengesa, detaje të rëndësishme mbeten të pafinalizuara dhe “jo të gjithë janë gati” të angazhojnë forcat.

Ai vuri në dukje se shumë vende do të kishin nevojë për miratimin e parlamentit edhe nëse liderët ranë dakord për mbështetje ushtarake për Ukrainën. Por ai e njohu se mbështetja mund të vijë edhe në forma të tjera përveç trupave, si “përmes armëve, teknologjive dhe inteligjencës”.

Zelensky tha se vendosja pas armëpushimit në Ukrainë nga BM dhe Franca, dy vendet e vetme evropiane me armë bërthamore, do të jenë “thelbësore” sepse disa anëtarë të tjerë të koalicionit “nuk mund të sigurojnë ndihmë ushtarake në formën e trupave, por ofrojnë mbështetje përmes sanksioneve, ndihmës financiare, ndihmës humanitare dhe të tjera”./  /Ad.Ab./ a.jor.

The post KOMENT – Tensionet SHBA-Europë rrezikojnë bisedimet për Ukrainën në Paris appeared first on Agjencia Telegrafike Shqiptare.

BERLIN, 6 janar /ATSH-DPA/ – Punimet për rikthimin e energjisë elektrike dhe ngrohjes në disa zona të jugperëndimit të Berlinit po vazhdojnë dhe sot, ndërsa dhjetëra mijëra banorë mbetën pa furnizim për të katërtën ditë radhazi, në një kryeqytet të mbuluar nga bora.

Rreth 45 000 familje dhe mbi 2 200 biznese në lagjet ”Nikolassee”, ”Zehlendorf”, ”Wannsee” dhe ”Lichterfelde” mbetën pa energji elektrik të shtunën, pasi kabllo të tensionit të lartë që çojnë drejt një centrali elektrik u  përfshinë nga zjarri.

Autoritetet e Berlinit besojnë se pas sulmit qëndron një grup militantësh të majtë.

Deri tani, energjia elektrike u është rikthyer rreth 19 500 familjeve dhe rreth 1 000 bizneseve, por operatori “Stromnetz Berlin” njoftoi se mund të duhen deri të enjten që të gjithë përdoruesit të rilidhen me rrjetin, pasi riparimet janë komplekse.

Policia, zjarrfikësit dhe ushtria janë angazhuar në zonat e prekura për të ndihmuar personat që nuk kanë mundur të strehohen te familjarë apo miq në pjesë të tjera të Berlinit, ku temperaturat kanë qenë nën zero.

Spitalet arritën të vazhdojnë funksionimin falë gjeneratorëve të emergjencës dhe tashmë u është rikthyer furnizimi me energji. Ndërkohë, 72 nga 74 shtëpitë e kujdesit të prekura po furnizohen sërish me energji, sipas ”Stromnetz Berlin”./  /Ad.Ab./ a.jor.

The post BERLIN – 25 500 familje ende pa energji elektrike, katër ditë pas sulmit në rrjet   appeared first on Agjencia Telegrafike Shqiptare.

UASHINGTON, 6 janar /ATSH-DPA/ – Një zyrtar i lartë i Shtëpisë së Bardhë deklaroi se pretendimet e Shteteve të Bashkuara të Amerikës për të marrë kontrollin e Groenlandës përbëjnë qëndrimin zyrtar të qeverisë amerikane, duke hedhur poshtë mundësinë e një konflikti ushtarak për ishullin arktik.

I pyetur nga CNN nëse Uashingtoni do të përjashtonte përdorimin e forcës për të marrë Grenlandën, Stephen Miller, zëvendësshefi i stafit të presidentit amerikan Donald Trump, tha se ”askush nuk do të luftojë ushtarakisht Shtetet e Bashkuara për të ardhmen e Groenlandës”.

Ai shtoi se ishulli duhet të jetë pjesë e SHBA-së dhe se Trump e ka bërë të qartë këtë qëndrim që nga fillimi i mandatit të tij, gati një vit më parë.

Sipas Miller, si fuqia kryesore ushtarake e NATO-s, SHBA-ja ka nevojë për kontroll mbi Groenlandën për të garantuar sigurinë e rajonit Arktik.

Miller vuri gjithashtu në dyshim sovranitetin e Danimarkës mbi territorin, duke pyetur mbi çfarë baze ligjore Groenlanda i përket Danimarkës dhe pse ishulli duhet të mbetet një ”koloni e Danimarkës”.

Groenlanda është pjesë e Mbretërisë së Danimarkës, por gëzon autonomi të gjerë dhe nuk është anëtare e Bashkimit Evropian.

Ajo ka rëndësi strategjike për shkak të pasurive të saj me lëndë të para dhe rolit si bazë për kontrollin ushtarak të Arktikut.

Trump ka deklaruar vazhdimisht se SHBA-ja duhet të kontrollojë Groenlandën për arsye të sigurisë kombëtare, një qëndrim që e përsëriti edhe gjatë fundjavës.

Të shtunën, një postim në rrjetet sociale nga ish-këshilltarja qeveritare Katie Miller, bashkëshortja e Stephen Miller, shfaqi një hartë të Groenlandës me ngjyrat e flamurit amerikan dhe fjalën ”Së shpejti”.

Danimarka, vendet nordike, Britania e Madhe , Gjermania dhe Bashkimi Evropian i hodhën poshtë dje pretendimet amerikane.

Kryeministrja daneze Mette Frederiksen tha se kërcënimet e Trump duhet të merren seriozisht dhe paralajmëroi se, nëse SHBA-ja zgjedh të sulmojë një vend të NATO-s, ”gjithçka ndalet”./  /Ad.Ab./ a.jor.

The post SHBA – Shtëpia e Bardhë: Groenlanda nuk do të sjellë konflikt ushtarak appeared first on Agjencia Telegrafike Shqiptare.

UASHINGTON, 6 janar /ATSH-DPA/ – Presidenti i SHBA-së, Donald Trump, ka deklaruar se nuk pret që në Venezuelë të mbahen zgjedhje të reja brenda 30 ditëve të ardhshme.

“Duhet ta rregullojmë fillimisht vendin. Nuk mund të zhvillohen zgjedhje”, i tha ai transmetuesit amerikan NBC News.

”Kjo do të marrë një periudhë kohe dhe ne duhet të rikthejmë qetësinë në vend”, shtoi ai.

Qeveria e Venezuelës vazhdon ta konsiderojë Nicolas Maduro, i cili u ndalua nga forcat amerikane të shtunën, si presidentin legjitim të vendit.

Sipas Kushtetutës së Venezuelës, në rast të mungesës së përhershme të presidentit, detyrën e merr zëvendëspresidenti dhe duhet të organizohen zgjedhje të reja brenda 30 ditëve.

Megjithatë, mbetet e paqartë nëse udhëheqja e re e konsideron situatën aktuale si mungesë të përhershme.

Delcy Rodríguez, e cila kishte shërbyer si zëvendëspresidente e Maduros që nga viti 2018, bëri dje betimin si  presidente në detyrë.

Gjykata e Lartë e kishte ngarkuar atë gjatë fundjavës me marrjen përkohësisht të detyrave të kreut të shtetit.

Forcat amerikane sulmuan objektiva në Venezuelë gjatë fundjavës dhe arrestuan Maduron./  /Ad.Ab./ a.jor.

The post SHBA – Trump: Nuk priten zgjedhje në Venezuelë në 30 ditët e ardhshme appeared first on Agjencia Telegrafike Shqiptare.