TIRANË, 21 janar/ATSH/ Partia Socialiste, përmes një shkrese zyrtare drejtuar kryetarit të Kuvendit, Niko Peleshi ka kërkuar mbledhjen e Kuvendit ditën e enjte për ratifikimin me procedurë të përshpejtuar të marrëveshjes për pranimin e Shqipërisë në Bordin e Paqes.

Në shkresën drejtuar Kuvendit, grupi parlamentar i Partisë Socialiste kërkon thirrjen e Kuvendit në 22 janar në orën 10:00 duke marrë në konsideratë rëndësinë strategjike të Bordit të Paqes.

Po ashtu PS thekson se kërkesa bazohet në Kushtetutë dhe në Rregulloren e Kuvendit dhe vjen pas vlerësimit të rëndësisë së projektligjit “Për ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes” dhe në funksion të angazhimit të vazhdueshëm të Shqipërisë për promovimin e paqes, stabilitetit dhe bashkëpunimit ndërkombëtar.

Nga ana tjetër Partia Demokratike e pyetur nga mediet për pjesëmarrjen ose jo në një seancë plenare të supozuar për t’u zhvilluar nesër, shprehet se “deri në orën 16.40, grupi parlamentar i Partisë Demokratike nuk ka marrë asnjë njoftim nga Kryetari i Kuvendit për mbledhje të seancës plenare gjatë kësaj jave.

“Me vendim të njëanshëm të mazhorancës në seancën plenare të datës 19 janar 2026, në Kalendarin e Punimeve të Kuvendit, është përcaktuar që këtë javë nuk ka seancë plenare. Seanca plenare e radhës është planifikuar për t’u zhvilluar në datën 27 janar. Sipas Rregullores së Kuvendit, mbledhja e seancës plenare dhe rendi i ditës, i njoftohen deputetëve dhe publikut, si rregull 7 ditë përpara, por jo më vonë se 2 ditë përpara datës së caktuar për seancë plenare”, thuhet në njoftimin e PD-së.

Sipas PD-së, “transparenca dhe llogaridhënia ndaj qytetarëve i dikton Kuvendit  që për secilën çështje dhe vendimmarrje, të respektojë rregullat e parashikuara nga Kushtetuta dhe Rregullorja e Kuvendit, në respekt edhe të përgjegjshmërisë që duhet të tregojë secili deputet gjatë ushtrimit të funksionit të tij kushtetues”.

/m.m/j.p/

The post Shqipëria në Bordin e Paqes, PS kërkon mbledhjen e Kuvendit nesër për ratifikimin e marrëveshjes appeared first on Agjencia Telegrafike Shqiptare.

TIRANË, 21 janar/ATSH/ Këshilli i Ministrave miratoi sot vendimin për përcaktimin e organizimit të brendshëm, të organeve drejtuese e të mënyrës së funksionimit të Agjencisë Kombëtare të Ekonomisë së Mbetjeve (AKEM).

Sipas vendimit të qeverisë, AKEM është shoqëri aksionare me kapital 100% shtetëror, e themeluar me qëllim përmbushjen e objektivave të përcaktuar në ligjin  “Për menaxhimin e integruar të mbetjeve”.

Autoriteti publik, që përfaqëson shtetin si pronar të 100% të aksioneve të shoqërisë aksionare, është ministria përgjegjëse për mjedisin.

AKEM ofron kundrejt pagesës, shërbimin e trajtimit fundor të mbetjeve dhe çdo shërbim tjetër, në përputhje me qëllimin e krijimit dhe statutin e saj.

Kapitali fillestar për krijimin e AKEM është 20 milionë lekë.

Ministria e Mjedisit, brenda 30 ditëve nga hyrja në fuqi e këtij vendimi, ndjek procedurat e nevojshme ligjore për themelimin dhe miratimin e statutit të shoqërisë aksionare, regjistrimin e AKEM në Qendrën Kombëtare të Biznesit.

Organet drejtuese të AKEM janë: Asambleja e Përgjithshme e Aksionarit; Këshilli Mbikëqyrës dhe Administratori.

Efektet financiare për zbatimin e këtij vendimi për krijimin e kapitalit fillestar të shoqërisë, në vlerën 20 milionë lekë përballohen nga buxheti i Agjencisë Kombëtare të Ekonomisë së Mbetjeve.

Për zbatimin e këtij vendimi ngarkohen Ministria e Mjedisit, Ministria e Financave, ministri i Shtetit për Pushtetin Vendor dhe Agjencia Kombëtare e Ekonomisë së Mbetjeve.

Ky vendim hyn në fuqi pas botimit në “Fletoren zyrtare”.

/k.s/j.p/

The post Miratohet krijimi i Agjencisë Kombëtare të Ekonomisë së Mbetjeve appeared first on Agjencia Telegrafike Shqiptare.

PARIS, 21 janar /ATSH-AA/ – Franca ka bërë thirrje për një stërvitje ushtarake të NATO-s në Grenlandë dhe tha se është “e gatshme të kontribuojë”, njoftoi Pallati Elysee, ndërsa tensionet rriten mes deklaratave të përsëritura të presidentit të SHBA-së, Donald Trump për marrjen e kontrollit të ishullit Arktik.

Grenlanda, një territor vetëqeverisës i Mbretërisë së Danimarkës, ka tërhequr interesin e Trumpit për shkak të vendndodhjes strategjike dhe burimeve të mëdha minerale, si dhe shqetësimeve të supozuara në lidhje me rritjen e aktivitetit rus dhe kinez.

Ndërsa Trump refuzoi të përjashtonte përdorimin e forcës për të marrë ishullin dhe postoi imazhe si meme për të mbështetur pretendimin e tij, Danimarka dhe Grenlanda kanë hedhur poshtë propozimet për ta shitur atë, duke riafirmuar sovranitetin danez mbi territorin.

Franca, Danimarka, Suedia dhe Gjermania po rrisin praninë e tyre ushtarake në Grenlandë përmes ushtrimeve dhe misioneve të zbulimit, ndërsa Trump ka këmbëngulur që territori duhet të jetë “në duart e SHBA-së” për t’iu kundërvënë Rusisë dhe Kinës.

Të shtunën, Trump tha se Washingtoni do të vendoste tarifa prej 10 për qind për mallrat nga Danimarka, Norvegjia, Suedia, Franca, Gjermania, Mbretëria e Bashkuar, Holanda dhe Finlanda duke filluar nga 1 shkurti dhe duke u rritur në 25 për qind në qershor derisa të arrihet një marrëveshje për “blerjen e plotë dhe totale të Grenlandës”.

Në përgjigje, udhëheqësit evropianë hodhën poshtë kërcënimet e Trumpit për tarifa kundër tetë vendeve evropiane dhe përsëritën solidaritetin me Danimarkën.   /os/

The post PARIS – Franca bën thirrje për stërvitje të NATO-s në Groenlandë, ndërsa Trump dyfishon përpjekjet për ishullin appeared first on Agjencia Telegrafike Shqiptare.

BERLIN, 21 janar /ATSH-DPA/- Qeveria gjermane akuzoi sot Rusinë për krime lufte në Ukrainë, pasi sulmet e përsëritura ndaj infrastrukturës energjetike të vendit lanë shumë qytetarë pa ngrohje dhe energji elektrike mes të ftohtit të dimrit.

“Qindra mijëra fëmijë, të moshuar dhe familje duhet të durojnë temperaturat e ngrirjes pa energji elektrike, ngrohje ose ujë të nxehtë”, tha zëvendëszëdhënësi i qeverisë Steffen Meyer në Berlin.

“Presidenti rus Vladimir Putin po e përdor të ftohtin si armë”, tha zëdhënësi, duke i përshkruar sulmet si thellësisht çnjerëzore dhe përçmuese për jetën njerëzore.

“Sipas mendimit tonë, Rusia e Putinit po kryen krime lufte”, shtoi ai.

Sipas presidentit ukrainas, Volodymyr Zelensky, më shumë se 1 milion banorë janë aktualisht pa energji elektrike vetëm në Kiev, pas sulmeve të fundit ruse.

“Gjermania dënon këto sulme ruse masive të vazhdueshme në termat më të forta të mundshme”, tha zëdhënësi.

“Pavarësisht shumë mosmarrëveshjeve të tjera në skenën ndërkombëtare, ngjarjet në Ukrainë meritojnë një fokus të qartë”, tha ai.

“Përfundimi i kësaj lufte duhet të vazhdojë të jetë shqetësimi qendror i përbashkët i Evropës, Ukrainës, SHBA-së dhe gjithashtu i unionit ndërkombëtar”, shtoi ai. //a.i/

The post BERLIN – Gjermania akuzon Rusinë për krime lufte në Ukrainë appeared first on Agjencia Telegrafike Shqiptare.

TIRANË, 21 janar/ATSH/ Në kuadër të programit “Paketa e Maleve”, Këshilli i Ministrave shpalli sot disa zona me përparësi zhvillimi të ekonomisë malore në bashkitë Dibër, Memaliaj dhe Tepelenë.

Llojet e aktiviteteve që do të zhvillohen në këto zona kanë të bëjnë me zhvillimin ekonomik; zhvillimin industrial dhe zhvillimin turistik.

Në bashkinë Dibër zonë me përparësi zhvillimi të ekonomisë malore janë shpallur në Bjeshkët e Korabit, të Hinoskës, të Gramës dhe të Zimurit.

Po ashtu, zona zhvillimore janë përcaktuar në fshatin Brezhdan, fshatin Kallë, fshatin Lashkizë, fshatin Lugjej, në Lurë, në fshatin Qa (Prat), fshatin Sllatinë, në Lan – Lurë etj.

Zona zhvillimore në territorin e kësaj bashkie janë përcaktuar edhe në livadhet e Kallës – Vleshë, në luginën e lumit Drin, si dhe në fshatrat Selishtë, Luzni dhe Rabdisht.

Ndërsa në territorin e bashkisë Memaliaj janë shpallur zona zhvillimore në fshatrat Arrëz e Madhe, Maricaj dhe Vagalat, në njësinë administrative Buz, dhe në fshatin Rabie.

Në bashkinë Tepelenë janë shpallur zona me përparësi zhvillimi të ekonomisë malore sipërfaqe toke në njësinë administrative Kurvelesh, në njësinë administrative Lopës dhe në njësinë administrative Qendër-Tepelenë.

/m.m/j.p/

The post “Paketa e Maleve”, shpallen zonat me përparësi zhvillimi në Dibër, Memaliaj dhe Tepelenë appeared first on Agjencia Telegrafike Shqiptare.

PRISHTINË, 21 janar/ATSH/ Kryeministri në detyrë, Albin Kurti përkujtoi sot 20-vjetorin e vdekjes së presidentit Ibrahim Rugova.

Duke vlerësuar në një shkrim në rrjetet sociale rolin e Rugovës në shtetndërtimin, demokratizimin dhe ndërkombëtarizimin e çështjes së Kosovës, Kurti u shpreh se ish-Presidenti ka merita të veçanta për orientimin e qartë politik të Kosovës drejt Perëndimit dhe për ndërkombëtarizimin e drejtë të çështjes së Kosovës, veçanërisht gjatë viteve të para të dekadës së fundit të shekullit të kaluar.

Në reagimin e tij përkujtimor, Kurti shkruan se periudha e pluralizmit politik dhe e rezistencës paqësore është e lidhur pazgjidhshmërisht me emrin e Rugovës, i cili udhëhoqi Lidhjen Demokratike të Kosovës që nga themelimi i saj në vitin 1989 deri në vdekjen e tij më 21 janar 2006. Sipas Kurtit, kontributi i Rugovës ishte i ndërtuar bashkë me një rreth të gjerë bashkëpunëtorësh dhe veprimtarësh që në vitet ’90 mbajtën gjallë institucionet dhe shpresën për liri.

“Në një kohë tejet të vështirë kur Serbia kishte vendosur një regjim apartheidi në Kosovë, Ibrahim Rugova u vendos në krye të një shteti juridikisht dhe politikisht unik, duke u votuar e zgjedhur President i Kosovës më 24 maj 1992, asaj Republike të Kosovës që e kishin shpallur delegatët e saj më 7 shtator 1990 në Kaçanik, një vit e gjysmë pasi Serbia ia kishte suprimuar autonominë Kosovës, më 23 mars 1989. Pikërisht atëherë kur më së shumti Serbia këmbëngulte që nuk ka një Republikë të Kosovës dhe kur askush përveq Republikës së Shqipërisë nuk e njihte ekzistencën e saj, Ibrahim Rugova si President i Republikës së Kosovës, arriti të imponohej si i tillë duke u takuar edhe me liderë botërorë deri te Presidenti i ShBA-së, Bill Klinton”, shkruan Kurti.

Kurti nuk mori pjesë sot në homazhe dhe akademi përkujtimore për Ibrahim Rugovë, pasi që ai aktualisht gjendet në Forumin Botëror Ekonomik, në Davos. /Kosovapress/

The post Kurti: Rugova ka merita të veçanta për orientimin e qartë politik të Kosovës appeared first on Agjencia Telegrafike Shqiptare.

TIRANË, 21 janar/ATSH/ Këshilli i Ministrave miratoi sot kriteret dhe procedurat për shpërndarjen e granteve shtetërore për organizatat sportive, përfshirë Komitetin Olimpik dhe Paralimpik, Organizatën Kombëtare Antidoping, federatat sportive olimpike, fondacionet sportive dhe Këshillin e Arbitrazhit Sportiv.

Sipas vendimit të qeverisë organizatat sportive përfitojnë nga granti i buxhetit të shtetit kur plotësojnë kriteret e përgjithshme, shoqëruar me dokumentacionin përkatës për regjistrimin si person juridik, sipas legjislacionit në fuqi.

Komiteti Olimpik Kombëtar Shqiptar, Komiteti Paralimpik Kombëtar Shqiptar, Organizata Kombëtare Antidoping, fondacionet sportive, me themelues institucionet publike përgjegjëse në fushën e sportit, dhe Këshilli i Arbitrazhit Sportiv financohen në bazë të programeve vjetore e të planeve të zhvillimit përkatës dhe nuk i nënshtrohen sistemit të pikëzimit.

Organizatat sportive për të përfituar prej grantit nga buxheti i shtetit, dorëzojnë në ministrinë përgjegjëse për sportin dokumentacionin dhe pas marrjes së kërkesës, struktura përgjegjëse pranë ministrisë, brenda 7 ditëve nga data e regjistrimit të kërkesës, nëse konstatohen të meta, i cakton kërkuesit një afat prej 7 ditësh për plotësimin e të metave.

Për vlerësimin e aplikimeve të paraqitura në ministrinë përgjegjëse për sportin, ngrihet një komision ad hoc vlerësimi, i përbërë nga 5 anëtarë, i cili mblidhet brenda 10  ditëve nga data e fundit për paraqitjen e kërkesës.

Fondet alokohen në llogaritë bankare të nivelit të dytë të përfituesve nga ministria përgjegjëse për sportin. Fondet buxhetore, që do t’i akordohen fondacioneve nga ministria përgjegjëse për sportin, duhet t’i nënshtrohen rregullave të menaxhimit financiar dhe kontrollit, në përputhje me legjislacionin në fuqi për menaxhimin financiar dhe kontrollin.

Përjashtimisht për vitin 2026, kërkesa për mbështetje financiare do të paraqitet brenda 10 ditëve nga hyrja në fuqi e vendimit.

Ngarkohen Ministria e Turizmit, Kulturës dhe Sportit, Komiteti Olimpik Kombëtar Shqiptar, Komiteti Paralimpik Kombëtar Shqiptar, Organizata Kombëtare Antidoping, federatat sportive olimpike, fondacionet sportive, me themelues institucionet publike përgjegjëse në fushën e sportit, dhe Këshilli i Arbitrazhit Sportiv për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

/k.s/j.p/

The post Miratohen kriteret dhe procedurat e shpërndarjes së grantit nga buxheti i shtetit për organizatat sportive appeared first on Agjencia Telegrafike Shqiptare.

TIRANË, 21 janar/ATSH/ Në mbledhjen e sotme Këshilli i Ministrave miratoi financimin e shërbimeve shëndetësore spitalore nga skema e detyrueshme e sigurimeve të kujdesit shëndetësor për vitin 2026.

Vendimi parashikon financimin nga skema e detyrueshme e sigurimeve shëndetësore të paketës së shërbimeve të ofruara në spitalet publike.

Sipas këtij vendimi, Fondi i Sigurimit të Detyrueshëm të Kujdesit Shëndetësor lidh kontratat me spitalet për financimin e paketave të shërbimeve shëndetësore të ofruara prej tyre, në përputhje me indikatorët e performancës spitalore.

Rishpërndarja e buxhetit ndërmjet spitaleve bëhet brenda një kufiri prej 3 (tre) % të buxhetit të spitaleve, me vendim të Këshillit Administrativ të Fondit të Sigurimit të Detyrueshëm të Kujdesit Shëndetësor.

Një fond jo më i madh se 30 % e buxhetit vjetor, i planifikuar për shërbimet spitalore, mbahet nga Fondi i Sigurimit të Detyrueshëm të Kujdesit Shëndetësor për ta shpërndarë gjatë vitit, me vendim të Këshillit Administrativ të Fondit të Sigurimit të Detyrueshëm të Kujdesit Shëndetësor.

Shpenzimet kapitale për investimet në spitale mbulohen nga Ministria e Shëndetësisë dhe Mirëqenies Sociale. Spitalet paraqesin kërkesën për investime në Ministrinë e Shëndetësisë dhe Mirëqenies Sociale.

Sipas vendimit, burime të tjera financimi për spitalet janë fondet e krijuara nga të ardhurat e realizuara gjatë veprimtarisë së tyre dhe nga dhurimet, të cilat përdoren tërësisht nga vetë spitali.

Përdorimi i të ardhurave dytësore miratohet nga bordi drejtues i spitaleve për spitalet që kanë përfituar autonominë menaxheriale. Për spitalet e tjera, përdorimi i të ardhurave bëhet bazuar në procedurat e miratuara nga Ministria e Shëndetësisë dhe Mirëqenies Sociale. Këto të ardhura vlerësohen si të ardhura jashtë limitit, të cilat mbarten në vitin buxhetor pasardhës.

Spitali zbaton sistemin e referimit dhe tarifat për shërbimet me pagesë, të miratuara nga ministri i Shëndetësisë dhe Mirëqenies Sociale, me përjashtim të spitaleve që kanë përfituar autonominë financiare.

Numri i përgjithshëm i punonjësve të spitaleve, që financohen nga Fondi i Sigurimit të Detyrueshëm të Kujdesit Shëndetësor, është 13 200 persona.

Për raste të veçanta të mungesës së mjekut specialist në shërbime të ndryshme të spitaleve rajonale, bashkiake, ministri i Shëndetësisë dhe Mirëqenies Sociale, brenda numrit të përgjithshëm të personelit spitalor, urdhëron kontraktimin, për një periudhë të caktuar, të mjekëve specialistë.

Mjekët e përcaktuar në këtë pikë, përveç pagës, trajtohen financiarisht me një bonus deri në 250 000 lekë në muaj. Vlera e bonusit përcaktohet, rast pas rasti, nga ministri i Shëndetësisë dhe Mirëqenies Sociale, bazuar në vlerësimin e komisionit përkatës.

Për spitalet rajonale, bashkiake, që nuk plotësojnë nevojat me personel mjek të strukturës në shërbimin e urgjencës, ministri i Shëndetësisë dhe Mirëqenies Sociale urdhëron kontraktimin e mjekëve të përgjithshëm dhe kryerjen e shërbimit nga mjekë të qendrave shëndetësore të shërbimit parësor.

Numri i pedagogëve me kontratë shërbimi për spitalet universitare miratohet çdo vit nga ministri i Shëndetësisë dhe Mirëqenies Sociale.

Masa e shpërblimit mujor të mjekëve pedagogë të Universitetit të Mjekësisë, Tiranë, bazohet në aktivitetin mjekësor e në kohën e angazhimit në strukturat shëndetësore universitare dhe nuk mund të jetë më e lartë se masa e shpërblimit mujor të drejtuesit të shërbimit me gradën “Doktor i shkencave”. Pagesa e tyre bëhet nga buxheti për shërbimet e spitalit.

Ky vendim hyn në fuqi menjëherë, botohet në “Fletoren zyrtare“ dhe i fillon efektet nga data 1 janar 2026.

/k.s/j.p/

The post Miratohet financimi i shërbimeve shëndetësore spitalore nga skema e detyrueshme e sigurimeve për 2026 appeared first on Agjencia Telegrafike Shqiptare.

UASHINGTON, 21 janar /ATSH/- Pentagoni ka planifikuar të ulë pjesëmarrjen e tij në një numër grupesh këshillimore të NATO-s, një përpjekje e administratës Trump për të zvogëluar praninë ushtarake amerikane në Evropë, sipas “Washington Post”.

Ky veprim pritet të prekë rreth 200 ushtarakë dhe do të ulë kryesisht përfshirjen e SHBA-së në 30 Qendrat e Ekselencës të aleancës, të cilat janë krijuar për të trajnuar forcat e NATO-s në elementë të ndryshëm të luftës.

Në vend që të tërhiqet menjëherë, Pentagoni synon të nisë zëvendësimin e personelit kur të përfundojë misionet, një proces që mund të zgjasë me vite, sipas dy zyrtarëve amerikanë. Pjesëmarrja e SHBA-së në qendra nuk po hiqet plotësisht.

“Midis grupeve këshillimore që do të preken nga shkurtimet janë grupet të dedikuara për sigurinë energjetike dhe luftën detare”, sipas dy zyrtarëve evropianë.

Pentagoni do të zvogëlojë gjithashtu përfshirjen e tij në organizatat formale të NATO-s të dedikuara për operacione speciale dhe inteligjencë, sipas dy zyrtarëve, megjithëse njëri prej tyre vuri në dukje se disa nga këto funksione amerikane do të zhvendoseshin diku tjetër brenda aleancës.

Masa ka qenë në shqyrtim për muaj të tërë, sipas dy zyrtarëve amerikanë, njëri prej të cilëve tha se nuk kishte lidhje me kërcënimet në rritje të Presidentit Donald Trump për të marrë territorin danez të Groenlandës. Provokimet e Trump kanë shkaktuar dënim të gjerë nga udhëheqësit evropianë dhe shumë ligjvënës në Kongres, të cilët kanë frikë se presidenti rrezikon të shkaktojë dëme të pariparueshme dhe të panevojshme në aleancën e NATO-s.

Në një deklaratë, një zëdhënës i NATO-s tha se rregullimet në vendosjen e forcave dhe stafit amerikan nuk ishin të pazakonta dhe se aleanca ishte në “kontakt të ngushtë” me Uashingtonin mbi vendosjen e përgjithshme të forcave.

Që kur Trump mori detyrën, ushtria amerikane është tërhequr nga Evropa ndërsa administrata ka nxitur aleatët të marrin më shumë kontroll mbi mbrojtjen kolektive të kontinentit.

Vitin e kaluar, për shembull, Pentagoni njoftoi papritur se do të tërhiqte një brigadë trupash nga Rumania dhe do të shkurtonte programet e ndihmës për sigurinë për tre shtetet baltike që kufizohen me Rusinë, pushtimi shumëvjeçar i Ukrainës nga e cila ka nxitur frikën e konfliktit të drejtpërdrejtë midis NATO-s dhe Kremlinit.

Nën presionin e administratës Trump, aleanca ra dakord verën e kaluar të rrisë shpenzimet e mbrojtjes në 5%të PBB-së gjatë 10 viteve të ardhshme, duke përfshirë 1,5% të dedikuar për infrastrukturën dhe projekte të tjera civile.

Ligjvënësit, përfshirë disa republikanë kryesorë, kanë kundërshtuar lëvizjet e administratës në Evropë dhe po punojnë për të financuar programet e ndihmës për sigurinë pavarësisht direktivave të Pentagonit.

Anëtarët e Kongresit kanë miratuar gjithashtu legjislacionin që kërkon që Pentagoni të konsultohet me ta përpara se të bëjë ndonjë reduktim të madh në vendosjet ushtarake amerikane në Evropë.

Ligji specifikon se kërkesa do të zbatohet vetëm nëse vendosja e përgjithshme e forcave amerikane në Evropë bie nën 76 000. Aktualisht është rreth 80 000.

Ndërsa personeli, që përfundimisht do të tërhiqet, përfaqëson një pjesë të vogël të trupave që Shtetet e Bashkuara të Amerikës kanë stacionuar në Evropë, disa zyrtarë aktualë dhe të mëparshëm thanë se tërheqja e SHBA-së mund të kishte një ndikim të madh në aleancë duke zvogëluar ekspertizën e vlefshme ushtarake amerikane. //a.i/

The post SHBA – Pentagoni planifikon të ulë pjesëmarrjen e SHBA-së në NATO appeared first on Agjencia Telegrafike Shqiptare.

TIRANË, 21 janar/ATSH/ Këshilli i Ministrave miratoi sot 1067 vende vakante për vitin 2026 në institucionet e administratës shtetërore, pjesë e Shërbimit Civil.

Nga këto 11 vende do të jenë për Trupën e Nëpunësve Civilë të Nivelit të Lartë Drejtues, 99 për kategorinë e mesme drejtuese, 205 për kategorinë e ulët drejtuese dhe 752 për kategorinë ekzekutive 752.

Fondet buxhetore për vendet vakante të planifikuara për rekrutim për vitin 2026 janë pjesë të fondeve buxhetore të miratuara me ligjin e buxhetit për vitin 2026 për secilin institucion të administratës shtetërore.

Plotësimi i vendeve vakante në kategorinë ekzekutive, kategorinë e ulët drejtuese, apo në kategorinë e mesme drejtuese bëhet së pari, nëpërmjet procedurës së lëvizjes paralele, ku mund të konkurrojnë nëpunësit civilë të së njëjtës kategori në të njëjtin institucion apo në një institucion tjetër të shërbimit civil, që plotësojnë kushtet për lëvizjen paralele dhe kërkesat e posaçme për vendet e lira.

Vendet, që mbeten të lira në përfundim të procedurës së lëvizjes paralele për kategorinë ekzekutive, plotësohen nëpërmjet procedurës së pranimit në shërbimin civil, ku mund të konkurrojnë të gjithë ata kandidatë jashtë shërbimit civil.

Ndërsa për kategorinë e ulët dhe atë të mesme drejtuese, plotësohen nëpërmjet procedurës së ngritjes në detyrë, ku mund të konkurrojnë nëpunësit civilë të një kategorie paraardhëse, të punësuar në të njëjtin institucion apo në një institucion tjetër të shërbimit civil.

Po ashtu, Këshilli i Ministrave miratoi vendimin për hapjen e procedurës së pranimit të drejtpërdrejtë në TND edhe për kandidatë të tjerë jashtë shërbimit civil dhe për përdorimin e procedurës së pranimit të drejtpërdrejt në TND, për vitin 2026.

Pranimi në TND bëhet në mënyrë të drejtpërdrejtë, nëpërmjet një konkursi kombëtar.

Numri i pozicioneve, për të cilat do të përdoret procedura e pranimit të drejtpërdrejtë në TND, është 11.

/m.m/j.p/

The post 1067 vende vakante në Shërbimin Civil, përcaktohen kriteret e rekrutimit appeared first on Agjencia Telegrafike Shqiptare.

DAVOS, 21 janar /ATSH-AA/ – Presidenti i SHBA-së, Donald Trump tha se Washingtoni duhet të hapë negociata për ta blerë Grenlandën, duke thënë se vetëm SHBA-ja ka kapacitetin për ta mbrojtur dhe zhvilluar këtë territor arktik me rëndësi strategjike.

“Kam respekt të jashtëzakonshëm si për popullin e Grenlandës, ashtu edhe për popullin e Danimarkës, respekt të madh. Por, çdo aleat i NATO-s ka detyrimin të jetë në gjendje të mbrojë territorin e vet, dhe fakti është se asnjë shtet apo grup shtetesh nuk është në pozitë ta sigurojë Grenlandën, përveç SHBA-së”, tha Trump në Forumin Ekonomik Botëror (WEF) në Davos të Zvicrës.

Trump përsëriti se SHBA-ja ka nevojë për Grenlandën për sigurinë strategjike kombëtare.

“Janë vetëm Shtetet e Bashkuara që mund ta mbrojnë këtë masë gjigante toke, këtë copë gjigante akulli, ta zhvillojnë dhe ta përmirësojnë, duke e bërë atë të dobishme për Evropën, të sigurt për Evropën dhe të mirë edhe për ne”, tha ai.

Presidenti amerikan theksoi se këto konsiderata po e shtyjnë atë të kërkojë bisedime për një blerje të mundshme.

“Dhe kjo është arsyeja pse po kërkoj negociata të menjëhershme për të diskutuar edhe një herë blerjen e Grenlandës nga SHBA-ja”, shtoi Trump.

– “Nuk do të përdor forcë”

Trump tha se nuk do të përdorë forcë për të siguruar kontrollin e territorit autonom të Danimarkës. “Njerëzit menduan se do të përdorja forcë, por nuk kam nevojë të përdor forcë”, tha ai. “Nuk dua të përdor forcë. Nuk do të përdor forcë”, theksoi Trump.

Trump tha se SHBA-ja po kërkon titull dhe pronësi sepse “duhet ta kesh pronësinë për ta mbrojtur atë”.

“Nuk mund ta mbrosh me qira, së pari ligjërisht, nuk është e mbrojtshme në atë mënyrë, fare”, tha ai duke shtuar se SHBA-ja nuk dëshiron ta marrë territorin me qira.

Trump tha se territori arktik do të jetë qendror në çdo konflikt të ardhshëm dhe thelbësor për planifikimin e mbrojtjes nga raketat.

“Nëse ka luftë, shumë nga veprimet do të zhvillohen mbi atë copë akulli. Mendoni për këtë: Ato raketa do të fluturonin pikërisht mbi qendrën e asaj cope akulli”, deklaroi presidenti amerikan.

“Gjithçka që duam nga Danimarka për sigurinë kombëtare dhe ndërkombëtare dhe për t’i mbajtur larg armiqtë tanë shumë energjikë dhe të rrezikshëm është kjo tokë, mbi të cilën do të ndërtojmë ‘Kupolën e Artë’ më të madhe që është ndërtuar ndonjëherë”, shtoi ai.

Grenlanda ka tërhequr vëmendjen e Trumpit për shkak të pozitës së saj strategjike në Arktik, burimeve të gjera minerare dhe shqetësimeve të pretenduara për një prani në rritje ruse dhe kineze.

Danimarka dhe Grenlanda kanë refuzuar propozimet për shitjen e territorit, duke riafirmuar sovranitetin danez mbi ishullin.

The post DAVOS – Negociata të menjëhershme, Trump përsërit thirrjen për blerjen e Grenlandës appeared first on Agjencia Telegrafike Shqiptare.

LONDËR, 21 janar /ATSH/- Tregjet amerikane u rimëkëmbën pasi presidenti  i SHBA-së, Donald Trump tha sot në Forumin Ekonomik Botëror, Davos të Zvicrës, se nuk do të përdorte forcë ushtarake për të blerë Groenlandën, sipas BBC.

Menjëherë pas njoftimit, indekset e tregut të aksioneve, “S&P 500” dhe “Dow Jones Industrial Average” u rritën të dy rreth 0,3%, dhe “Nasdaq” gjithashtu shënoi fitime modeste.

Rendimentet e thesarit ranë ndërsa çmimet u rritën, ndërsa dollari pakësoi humbjet.

Investitorët u gëzuan nga deklarata e presidentit Trump.

“Njerëzit menduan se do të përdorja forcë ushtarake. Nuk kam nevojë të përdor forcë. Nuk dua të përdor forcë. Nuk do të përdor forcë”, tha sot presidenti i SHBA-së Donald Trump në një fjalim në Davos.

Aksionet kishin rënë ndjeshëm dje mes tensioneve të lidhura me Groenlandën dhe kërcënimeve tarifore. //a.i/

The post FOKUS – Tregjet amerikane rimëkëmben pasi Trump përjashton mundësinë e forcës ushtarake ndaj Groenlandës appeared first on Agjencia Telegrafike Shqiptare.

HAGË, 21 janar /ATSH-DPA/ – Agjencia evropiane e policisë Europol thotë se hetuesit kanë shkatërruar një nga organizatat më të mëdha të prodhimit të drogës.

Europol tha se ishte operacioni më i madh deri më sot kundër trafikimit të drogës sintetike.
‘’Njëzet e katër laboratorë të përdorur për prodhimin e drogës u mbyllën dhe 85 të dyshuar u arrestuan’’, njoftoi Europol.

Ata përfshinin dy udhëheqës të dyshuar në Poloni. Operacioni përfshinte disa bastisje kundër bandave dhe zgjati më shumë se një vit.

Europol mbështet shtetet anëtare të BE-së në hetimet në fusha të tilla si krimi i organizuar dhe terrorizmi.

Sipas autoriteteve doganore gjermane, gjashtë laboratorë të paligjshëm të drogës janë zbuluar në të gjithë vendin.

“Në të gjithë vendin, u sekuestruan mbi 800 kilogramë drogë sintetike dhe afërsisht 160 000 litra mbetje kimike shumë toksike”, tha Tino Igelmann, kreu i Byrosë së Hetimit Kriminal të Doganave, në një konferencë për shtyp.

“Si në Gjermani ashtu edhe në Evropë, këto sasi janë të paprecedentë”, shtoi ai.
Europol thotë se u sekuestruan gjithsej afërsisht 1 000 ton kimikate, të cilat mund të jenë përdorur për të prodhuar mbi qindra ton droga të forta si MDMA, amfetamina dhe metamfetamina.

Drogat sintetike të prodhuara nga kimikatet paraqesin një rrezik veçanërisht serioz për shëndetin, tha Igelmann. Ato gjithashtu paraqesin një problem të rëndësishëm mjedisor. /os/

The post FRANCË – Europool shkatërron një nga organizatat më të mëdha të prodhimit të drogës appeared first on Agjencia Telegrafike Shqiptare.

TIRANË, 21 janar /ATSH/ Ministri i Bujqësisë dhe Zhvillimit Rural, Andis Salla, njoftoi se ka nisur një tur dëgjesash me fermerët në të gjithë vendin, me qëllim përshtatjen sa më të mirë të skemës kombëtare të mbështetjes së fermerëve e nevojat që ata kanë.

Gjatë vizitës në Kavajë dhe Rogozhinë, ministri Salla theksoi rëndësinë e dëgjimit të fermerëve dhe përfshirjes së tyre në përshtatjen e skemës, duke u mundësuar të japin sugjerimet dhe të evidentojnë çdo problematikë lidhur me skemën apo përfitimet e tyre.

“Kemi vendosur një buxhet rreth 52 milionë euro për këtë skemë, që fermerët të aplikojnë dhe përfitojnë,” tha ministri, duke shtuar se turi do të vazhdojë në të gjithë bashkitë e Shqipërisë.

Në lidhje me dëmet e shkaktuara nga përmbytjet në disa zona, ministri Salla njoftoi se qeveria ka vendosur një paketë financiare për të gjithë fermerët e dëmtuar. Ai bëri të ditur se po punohet për evidentimin e plotë të dëmeve në bashkëpunim me Ministrinë e Bujqësisë, emergjencën civile dhe bashkitë, për të dalë me vendime konkrete dhe shpërblime të shpejta për fermerët e prekur.

“Siç e keni parë para disa ditësh, ne kemi vendosur një paketë financiare nga qeveria shqiptare në mënyrë që të gjithë të dëmtuarit do të jenë të përfshirë në paketën financiare. Ne jemi duke bërë evidentimin e dëmeve të shkaktuara bashkë me Ministrinë e Bujqësisë, emergjencën civile dhe bashkitë në mënyrë që ne të kemi një evidentim të plotë dhe të dalim me një vendim, i cili do të jetë publik shumë shpejt”, deklaroi ai.

/e.xh/a.f/

The post Salla: 52 milionë euro në mbështetje të fermerëve, skema përshtatet sipas nevojave të tyre appeared first on Agjencia Telegrafike Shqiptare.

TIRANË, 21 janar /ATSH/ Komisioni për Evropën dhe Punët e Jashtme miratoi sot ndryshimet ligjore të propzouara nga qeveria në ligjin “Për barnat narkotike dhe lëndët psikotrope”, si dhe ndryshimet ligjore në ligjin për “Për kontrollin e lëndëve që përdoren për fabrikimin e paligjshëm të lëndëve narkotike dhe psikotrope”.

Deputetja e Partisë Socialiste, nënkryetarja e Kuvendit, Klodiana Spahiu, në fjalën e saj tha se përparësia e këtij projektligji është krijimi i një mekanizmi më të fortë dhe të efektshëm ligjor për të kontrolluar lëndët narkotike dhe psikotrope, në përputhje me standardet ndërkombëtare e në funksion të rritjes së sigurisë publike.

Zëvendësministrja e Shëndetësisë Eugena Tomini, në fjalën e saj, duke prezantuar ndryshimet ligjore në ligjin “Për kontrollin e lëndëve që përdoren për fabrikimin e paligjshëm të lëndëve narkotike dhe psikotrope”,  tha se ky përmirësim, vjen si nevojë për përputhje me legjislacionin ndërkombëtar dhe atë të Bashkimit Evropian, si dhe për forcimin e mekanizmave të parandalimit e të kontrollit, në kuadër të luftës kundër trafikut të paligjshëm të drogës. Objektivi specifik, që synohet të arrihet me këtë projektligj, është përditësimi i listës së lëndëve që përdoren në mënyrë të paligjshme për prodhimin e lëndëve narkotike dhe psikotrope.

Kryetari i grupit parlamentar të Partisë Socialiste, Taulant Balla në fjalën e tij në Komisionin për Europën dhe Punët e Jashtme, gjatë diskutimit për projektligjin që lidhet me barnat narkotike dhe lëndët psikotrope, me fokus të veçantë luftën kundër opioideve sintetike, përfshirë fentanilin deklaroi se Shqipëria është përkrah presidentit të SHBA, Donald Trump në luftën kundër drogave.

Ai theksoi se përveç fentanilit, në listën që po miratohet janë përfshirë edhe katër opioidë të tjerë sintetikë edhe më të fortë se fentanili, duke i cilësuar si jashtëzakonisht të rrezikshëm për jetën e njeriut.

Në fjalën e tij, Balla solli shifra tronditëse nga Shtetet e Bashkuara të Amerikës, duke e quajtur fentanilin një kërcënim global.

“Nga 1 janari 2021 deri më 31 dhjetor 2024, në SHBA kanë humbur jetën 262 mijë persona për shkaqe të lidhura me përdorimin e fentanilit. Më shumë amerikanë kanë vdekur nga fentanili sesa nga Lufta e Dytë Botërore, në vetëm katër vite.”

Sipas tij, edhe për vitin 2025 priten shifra shumë të larta, rreth 76 mijë viktima, çka justifikon qëndrimin e fortë të presidentit Trump ndaj kësaj çështjeje.

Balla rikujtoi se më 14 mars 2024 Shqipëria u anëtarësua në Koalicionin Global Kundër Drogave Sintetike, një iniciativë e udhëhequr nga Shtetet e Bashkuara.

“Drogat sintetike, dhe në mënyrë të veçantë fentanili, janë armë të shkatërrimit në masë që vrasin dhjetëra-mijëra njerëz çdo vit”, theksoi ai, duke paralajmëruar se Europa ende nuk është plotësisht e vetëdijshme për rrezikun që ky fenomen përbën.

Sipas Ballës, një sasi më e vogël se një kokërr kripe e fentanilit mund të marrë jetën e një njeriu, duke nënvizuar se kjo është pasojë e rrjeteve kriminale të organizuara, kufijve të dobët dhe zbatimit të pamjaftueshëm të ligjit.

“Kufijtë e fortë shpëtojnë jetë”, deklaroi ai, duke shtuar se Shqipëria duhet të rrisë kontrollet kufitare dhe të forcojë politikat e sigurisë në shkolla për të parandaluar që fëmijët dhe të rinjtë të bien pre e shpërndarësve të drogës.

Në përmbyllje, Taulant Balla vlerësoi qasjen proaktive të qeverisë shqiptare për përditësimin e listës së lëndëve narkotike dhe kërkoi më shumë vëmendje për qendrat e rehabilitimit dhe trajtimit të personave me varësi.

“Detyra e shtetit është jo vetëm të parandalojë përdorimin e drogës, por edhe të kujdeset që viktimat e saj të shpëtojnë nga varësia”, tha Balla, duke bërë thirrje që edhe opozita të mbështesë projektligjin dhe ai të miratohet sa më shpejt në seancë plenare.

Në fund të punimeve, komsioni miratoi në parim, Nen për Nen dhe në tërësi ndryshimet ligjore, ndërsa deputetët e Partisë Demokratike nuk morën pjesë në votim.

/gj.m/r.e/a.f/

The post Ndryshimet në ligjin për narkotikët, Balla: Shqipëria në krah të SHBA-së në luftën globale kundër fentanilit appeared first on Agjencia Telegrafike Shqiptare.

STRASBURG, 21 janar /ATSH-DPA/ – Parlamenti Evropian ka vendosur që marrëveshja e kontestuar e BE-së për tregti të lirë me katër vende nga blloku amerikano-latin “Mercosur” të shqyrtohet nga Gjykata Evropiane e Drejtësisë.

Në një votim sot, 334 ligjvënës të Bashkimit Evropian votuan pro vlerësimit ligjor, 324 kundër dhe 11 abstenuan.

Pritja për opinionin e gjykatës mund të vonojë ndjeshëm procesin e ratifikimit për marrëveshjen me katër vendet e Mercosur-it, Brazili, Argjentina, Paraguaji dhe Uruguaji.

Nuk dihet sa kohë do t’u duhet gjyqtarëve në Luksemburg për të dhënë vlerësimin, por proceset e mëparshme kanë zgjatur midis 16 dhe 26 muajsh.

Marrëveshja, e cila u nënshkrua javën e kaluar në Paraguaj, pas më shumë se 25 vitesh negociata, synon të heqë barrierat tregtare dhe tarifat doganore dhe të rrisë shkëmbimin e mallrave dhe shërbimeve.

Rezoluta e sotme kritikoi faktin që marrëveshja u vendos në një mënyrë që kërkon vetëm miratimin e Parlamentit Evropian dhe jo ratifikimin nga parlamentet kombëtare./  /Ad.Ab./ a.jor.

The post STRASBURG – Parlamenti Evropian dërgon në gjykatë marrëveshjen BE-Mercosur appeared first on Agjencia Telegrafike Shqiptare.

TIRANË, 21 janar/ATSh/ Më 21 janar 1925 Shqipëria u shpall për herë të parë Republikë Parlamentare.

Forma e re e qeverisjes së vendit u përligj përmes miratimit të Statutit të Republikës Shqiptare nga Asambleja Kushtetuese, në mars të vitit 1925. Data hyri në analet e historisë si tregues për vendosjen e republikës së parë shqiptare. Për detyrën e kreut të shtetit u zgjodh Ahmet Zogu, post të cilin e mori më 31 janar. Mandati i presidentit të Republikës ishte 7-vjeçar, por kjo formë republikane e qeverisjes zgjati deri në shtator të vitit 1928, kur Ahmet Zogu u vetëshpall “mbret i shqiptarëve”.

Statuti sanksionoi konsolidimin e pavarësisë dhe jetësimin e parimeve demokratike kushtetuese. Po ashtu, në Statut ligjëroheshin parimet dhe liritë demokratike, sikurse janë ndarja e pushteteve dhe liritë e të drejtat e njeriut. Një arritje e madhe e kohës ishte miratimi i Kodit Penal.

/r.e/a.f/

The post 21 janar 1925, shpallja e republikës së parë shqiptare appeared first on Agjencia Telegrafike Shqiptare.

TIRANË, 21 janar /ATSH/Zv.ministrja e Shëndetësisë dhe Mirëqenies Sociale Eugena Tomini, deklaroi se projektligji “Për aderimin e Republikës së Shqipërisë në Protokollin për ndalimin e tregtisë së paligjshme të produkteve të duhanit” është pjesë e angazhimeve të Shqipërisë në kuadër të procesit të integrimit europian.

E pranishme në Komisionin për Bujqësinë, Ushqimin dhe Zhvillimin Rural, gjatë diskutimit të pr/ligjit, Tomini tha se, “protokolli synon të sigurojë kontroll të plotë të zinxhirit të furnizimit me produkte duhani, duke krijuar një regjistër global të gjurmimit dhe ndjekjes, që përfshin sisteme kombëtare dhe rajonale, si dhe një pikë globale shkëmbimi informacioni pranë sekretariatit të Konventës Kornizë të Organizatës Botërore të Shëndetësisë për Kontrollin e Duhanit (WHO FCTC)”.

Sipas saj, projektligji parashikon gjithashtu masa për licencimin, mbajtjen e të dhënave, kontrolle parandaluese dhe të sigurisë, si dhe rregulla për shitjet online, zonat e lira dhe transitin ndërkombëtar.

“Ai përfshin dispozita penale për shkelësit, ndjekje ligjore, sanksione, sekuestrime, asgjësimin e produkteve të paligjshme dhe bashkëpunim ndërkombëtar në shkëmbimin e informacionit, ndihmë juridike dhe ekstradim”, u shpreh ajo.

Zv/ministrja Tomini theksoi se ky protokoll plotëson Konventën Kornizë të OBSH-së për Kontrollin e Duhanit dhe ofron një mjet gjithëpërfshirës për luftën kundër tregtisë së paligjshme, duke forcuar bashkëpunimin me Bashkimin Evropian dhe sigurinë ligjore të tregut të produkteve të duhanit.

e.xh/

The post Tomini: Kontroll i plotë i zinxhirit të furnizimit me duhan përmes protokollit ndërkombëtar appeared first on Agjencia Telegrafike Shqiptare.

TIRANË, 21 janar /ATSH/ Zëvendësministri i Ekonomisë dhe Inovacionit, Enkelejd Musabelliu, deklaroi se projektligji për ratifikimin e vendimit të Komitetit të Përbashkët të CEFTA-s “Për aspektet tregtare të të drejtave të pronësisë intelektuale” synon të forcojë bashkëpunimin rajonal dhe harmonizimin e legjislacionit vendas me standardet e Bashkimit Evropian në këtë fushë.

Gjatë diskutimit të projektligjit në Komisionin për Bujqësinë, Ushqimin dhe Zhvillimin Rural, Musabelliu theksoi se vendimi krijon një kuadër të përbashkët rajonal për mbrojtjen dhe zbatimin e të drejtave të pronësisë intelektuale, duke u mbështetur në parimet e mosdiskriminimit dhe të palës më të favorizuar ndërmjet palëve të CEFTA-s.

Sipas tij, vendimi forcon zbatimin e këtyre të drejtave në përputhje me marrëveshjen TRIPS të Organizatës Botërore të Tregtisë dhe standardet e Bashkimit Evropian, veçanërisht në mbrojtjen e sekreteve tregtare. Ai parashikon procedura më efikase dhe në afate të arsyeshme për mbrojtjen dhe zbatimin e të drejtave të pronësisë intelektuale, përfshirë përdorimin e aplikimeve elektronike.

Musabelliu nënvizoi se projektligji nxit gjithashtu bashkëpunimin dhe ngritjen e kapaciteteve ndërmjet vendeve të CEFTA-s përmes shkëmbimit të informacionit, trajnimeve dhe asistencës teknike, duke kontribuar në krijimin e një mjedisi më të sigurt ligjor dhe ekonomik për investitorët dhe bizneset.

Sipas zëvendësministrit, miratimi i këtij projektligji e afron Shqipërinë me praktikat më të mira evropiane në fushën e pronësisë intelektuale dhe forcon një sistem më transparent dhe të mbrojtur për zhvillimin e tregut dhe inovacionit.

“Vendimi i Komitetit të Përbashkët të CEFTA-s synon vendosjen e rregullave të përbashkëta për mbrojtjen dhe zbatimin e të drejtave të pronësisë intelektuale ndërmjet vendeve anëtare, duke garantuar standarde minimale të unifikuara, parimet e mosdiskriminimit dhe të palës më të favorizuar”, deklaroi ai.

/e.xh/r.e/a.f/

The post Shqipëria ratifikon rregullat e pronësisë intelektuale në kuadër të CEFTA-s appeared first on Agjencia Telegrafike Shqiptare.

TIRANË, 21 janar /ATSh/ Drejtoria e Përgjithshme e Taksave dhe Tarifave Vendore Tiranë ka ndërmarrë një nismë informuese për të rikujtuar bizneset, por edhe qytetarët që kanë pronë e cila përdoret për qëllim tregtar, mbi rëndësinë e vetëdeklarimit të saktë të të dhënave, si një hap thelbësor për përllogaritjen e drejtë të detyrimeve vendore për vitin 2026.

Në kuadër të kësaj nisme, formulari i vetëdeklarimit u është dërguar tashmë taksapaguesve në profilin e tyre në portalin “e-Albania”, te rubrika “Dokumentet e mia”. Plotësimi i këtij formulari mundëson përditësimin e të dhënave reale dhe shmang pasaktësitë në llogaritjen e detyrimeve vendore.

Procesi i plotësimit është i thjeshtë dhe kryhet përmes disa hapave: hyrja në portalin “e-Albania” me kredencialet përkatëse si qytetar ose biznes, aksesimi i rubrikës “Dokumentet e mia”, plotësimi i formularit dhe dorëzimi i tij.

Formulari i plotësuar mund të dorëzohet pranë sporteleve të Drejtorisë së Përgjithshme të Taksave dhe Tarifave Vendore, me anë të shërbimit postar, ose online në adresën zyrtare të e-mail: taksat@tirana.al.

Drejtoria e Përgjithshme e Taksave dhe Tarifave Vendore, thekson se vetëdeklarimi i saktë, para fillimit të procesit të përllogaritjes, garanton një vlerësim korrekt të detyrimeve vendore dhe rrit transparencën në marrëdhënien me taksapaguesit.

Në rastet kur formulari nuk shfaqet në profilin e taksapaguesit në portalin “e-Albania”, qytetarët dhe bizneset ftohen të përditësojnë të dhënat e tyre pranë Drejtorisë së Përgjithshme të Taksave dhe Tarifave Vendore Tiranë.

/e.i/r.e/a.f/

The post Taksat vendore 2026, Bashkia Tiranë thirrje bizneseve që të vetëdeklarojnë të dhënat appeared first on Agjencia Telegrafike Shqiptare.