TIRANË, 20 janar/ATSH/ Shefi i shërbimit të Reanimacionit në Qendrën Spitalore Universitare “Nënë Tereza”, Krenar Lilaj deklaroi sot se ndërprerja e energjisë elektrike mbrëmjen e kaluar në Godinën A2 të QSUNT nuk ka cenuar aspak trajtimin e pacientëve.

Në një deklaratë për mediet, Lilaj theksoi se “pacientët që kanë qenë të shtruar në reanimacionin kirurgjikal, vazhduan ta merrnin trajtimin aty pa vështirësi dhe nuk ka komplikacion të situatës për sa i përket këtyre pacientëve”.

“Momenti më delikat është trajtimi i të sëmurëve që kanë nevojë për asistencën respiratore. Këto pacientë, në kushte të ndërprerjes së energjisë elektrike janë me pajisje back up që siguron funksionimin e tyre të potë më energji të akumuluar që janë të inkorporuar në këto aparate. Trajtim i i këtyre të sëmurëve vazhdoi normalisht, pasi këta të sëmurë e marrin mjekimin nëpërmjet aparateve që janë me back up”.

“Ndërprerja e energjisë elektrike zgjati disa minuta. Nga informacionet që morëm bëhej fjalë për një defekt të rëndë dhe rikthimi i energjisë ishte i pakonfirmuar. Në këto kushte, për të shmangur mosfunksionimin e njëkohshëm të aparateve respiratore, vendosëm kalimin e të sëmurëve në godinën tjetër të spitalit apo në njësinë e terapisë intensive të godinës ngjitur. Zhvendosja u bë vetëm 20 metra më larg, duke siguruar vazhdimin e trajtimit edhe në kushtet e reja të reanimacionit tjetër. Vendosëm që të transportojmë vetëm 10 të sëmurë, 9 prej të cilëve ishin në respiracion të drejtuar, domethënë që frymëmarrja e tyre sigurohej nëpërmjet aparateve respiratore”, theksoi Lilaj.

Lilaj vuri në dukje se “ne kemi mjetet që transporti i tyre të realizohet më respiratorë portativë, pa u cenuar shërbimi. Transporti ishte i shkurtër. Trajtim i të sëmurëve, i cili u krye të mënyrë të kontrolluar, vazhdoi në reanimacionin e kardiologjisë për rreth 30 minuta. Në 20:18 ikën dritat dhe në 20:43 filluam transportin e të sëmurëve, teksa rreth orës 21:10 përfundoi transporti i të sëmurëve. Pas disa minutash u rikthye energjia elektrike dhe pasi morëm siguri, pacientët u rikthyen përsëri në njësinë e terapisë intensive”.

“Pasi morëm njoftimin për rikthimin e energjisë pacientët rikthehen në orën 22:00 në mënyrë të kontrolluar, pa komplikacione. E them me përgjegjësi të plotë, nga pikëpamja funksionale, ndërprerja e energjisë, nuk ka cenuar aspak trajtimin e pacientëve. Ata që kanë qenë në reanimacionin kirurgjikal vazhduan ta merrnin trajtimin aty pa vështirësi dhe nuk ka komplikacion të situatës për sa i përket këtyre pacientëve”, nënvizoi Lilaj.

I pyetur nga gazetarët nëse është normale ndërprerja e energjisë elektrike, Lilaj tha se “si të them që është normale ndërprerja e energjisë elektrike në njësinë e terapisë intensive?!  Detyra ime është të mbroj jetën e të sëmurëve. Në çfarëdolloj situate ne jemi të gatshëm për të mbrojtur jetën. Kjo pyetje nuk më përket mua”.

Pyetjes për humbjen e jetës të një të sëmuri të dënuar, Lilaj iu përgjigj se “i sëmuri po trajtohej në njësinë e terapisë intensive kirurgjikale. Gjendja e tij ishte e rëndë që në ardhje ditën që është shtruar, të dielën pasdite. Ka pasur ceroza hepatike dhe ka pasur hemorragji masive për të cilën është trajtuar kirurgjikalisht. Saktësisht, i sëmuri është ndarë nga jeta në orën 04:18 minuta të mëngjesit”.

Më tej Lilaj tha se “vendimi që morëm ne për transferimin e pacientëve në reanimacionin kardiologjik, ishte për të shmangur rënien e njëkohshme të këtyre pajisjeve, gjë që do të shkaktonte probleme në transportin e pacientëve. Them me siguri që aparatet e reja sigurojnë energji për 5-6 orë. Incidente të tilla kemi pasur rëndom shumë vite më parë. Një ngjarje e ngjashme ndodhi dhe përpara 1-2 vitesh, e cila u kalua me sukses nga ana jonë, ashtu si dhe mbrëmjen e kaluar”.

/k.s/r.e/a.f/

The post Lilaj: Jeta e pacientëve nuk u cenua nga ndërprerja e energjisë në QSUT appeared first on Agjencia Telegrafike Shqiptare.

TIRANË, 20 janar/ATSh/ Kapiteni i Kombëtares së Shqipërisë, Berat Gjimshiti është rikuperuar nga dëmtimi që e mbante jashtë fushe.

Lojtari kuqezi, i cili luan me Atalantën në Itali, është stërvituar këto ditë me klubin bergamask dhe këtë fundjavë, në sfidën përballë Parmës, pritet të jetë i gatshëm për të nisur nga minuta e parë.

Gjimshiti u dëmtua në sfidën ndaj Torinos, e vlefshme për Serinë A, e luajtur më 10 janar.

Ky është një lajm i mirë edhe për kombëtaren në prag të angazhimeve të ardhshme në play-off-in e Botërorit, ku kuqezinjtë më 26 mars do të luajnë kundër Polonisë në Varshavë.

/a.f/r.e/

The post Gjimshiti rikuperohet nga dëmtimi, gati për sfidën ndaj Parmës appeared first on Agjencia Telegrafike Shqiptare.

DAVOS, 20 janar /ATSH-AFP/ – Kryetarja e Komisionit Evropian, Ursula von der Leyen premtoi sot një rritje të madhe të investimeve evropiane në Groenlandë dhe u angazhua të punojë me Shtetet e Bashkuara  të Amerikës për përmirësimin e sigurisë në Arktik.

“Po punojmë për një rritje të madhe të investimeve evropiane në Groenlandë”, deklaroi ajo gjatë Forumit Ekonomik Botëror në Davos, pa specifikuar ndonjë shumë konkrete.

“Ne do të bashkëpunojmë ngushtë me Groenlandin dhe Danimarkën për të përcaktuar se si mund të mbështesim më tej ekonominë dhe infrastrukturën lokale”, shtoi ajo.

“Unë mendoj veçanërisht se duhet të ndajmë një pjesë të rritjes së shpenzimeve tona të mbrojtjes për të krijuar një kapacitet evropian të thyerjes së akullit dhe pajisje të tjera thelbësore për sigurinë në Arktik”, theksoi Von der Leyen.

Kryetarja e Komisionit theksoi gjithashtu gatishmërinë e saj për të punuar me Shtetet e Bashkuara “dhe të gjithë partnerët tanë” për “përmirësimin e sigurisë në Arktik”.

“Kjo është qartë në interesin tonë të përbashkët dhe do të intensifikojmë investimet tona”, tha ajo.

Gjatë këtij fjalimi, Ursula von der Leyen premtoi gjithashtu një përgjigje “të fortë” ndaj kërcënimeve të përsëritura të Donald Trump për Groenlandën dhe tarifat doganore, të cilat i quajti “gabim”.

“Ne e konsiderojmë popullin amerikan jo vetëm si aleatin tonë, por edhe si mikun tonë. Të futemi në një spirale rënëse do të favorizonte vetëm kundërshtarët që të dy jemi të vendosur t’i mbajmë larg”, theksoi ajo.

Liderët evropianë do të mblidhen të enjten në mbrëmje në Bruksel për një samit të jashtëzakonshëm për të shqyrtuar këtë çështje./  /Ad.Ab./ a.jor.

The post DAVOS – Von der Leyen premton rritje të madhe të investimeve evropiane në Groenlandë appeared first on Agjencia Telegrafike Shqiptare.

/r.e/a.f/

The post Dollari humb terren ndaj lekut, euroja forcohet lehtë appeared first on Agjencia Telegrafike Shqiptare.

TIRANË, 20 janar/ATSh/ Ditët e ftohta të dimrit nuk ia kanë ulur gjallërinë e zakonshme kopshteve të kryeqytetit.

Daljet e herëpashershme nëpër muze apo institucione të tjera, tashmë janë zëvendësuar nga teatri me kukulla në mjediset e brendshme të kopshtit.

“Për të evituar daljet në motin e ftohtë, kemi ftuar aktorë të cilët japin shfaqje me kukulla, në mënyrë që të thyejmë rutinën dhe qëndrimi në kopsht të jetë më i këndshëm për fëmijët”, tha për ATSH-në, Artjavola Mile, drejtoreshë e Kopshtit 101 Dalmatët.

Sot, më shumë se 110 fëmijë të këtij kopshti ndoqën me kërshëri shfaqjen “Frozen”. Reagimet e tyre ishin të ndryshme. Pjesa më e madhe u argëtuan me kullat: Elsën, Anën dhe Olafin, të cilët i shihnin të flisnin e këndonin. Ndërkohë edukatoret ishin pranë atyre fëmijëve që u frikësuan nga perdja e errët e skenës.

Teatri brenda mjediseve të kopshtit është kthyer tashmë në një traditë. Këto shfaqje janë jo vetëm argëtim, por edhe një mënyrë edukimi i fëmijëve përmes artit. Drejtoresha Mile, u shpreh se kjo praktikë nisi gjatë periudhës kur Teatri i Kukullave ndërpreu aktivitetin për shkak se ishte në rikonstruksion. Ajo tha se, përveç shfaqjeve brenda institucionit, kur moti e lejon, fëmijët e grupit të madh, kanë kryer vizita edhe nëpër muzetë e kryeqytetit, si te Muzeu i Forcave të Armatosura, Kopshti Botanik, piknik nga Liqeni i Tiranës etj.

Teatri në kopshtin 101 Dalmatet. Fotot nga Andrin Hoxha.

1 nga 7

/a.f/r.e/

The post Shfaqjet me kukulla në kopshtet e kryeqytetit, mënyrë edukimi përmes artit appeared first on Agjencia Telegrafike Shqiptare.

TIRANË, 20 janar /ATSh/ Mesditën e sotme, Kuestori i Romës, drejtori i policisë së kryeqytetit italian, Roberto Massucci, së bashku me delegacionin që e shoqëronte, zhvilloi një vizitë kortezie në Drejtorinë e Përgjithshme të Policisë së Shtetit, ku u prit nga drejtori i përgjithshëm i Policisë së Shtetit, Ilir Proda, dhe drejtues të lartë të institucionit.

Gjatë takimit, kuestori Massucci vlerësoi bashkëpunimin shumë të mirë që ekziston mes dy policive.

Nga ana e tij, Proda e siguroi Kuestorin e Romës se Policia e Shtetit është e vendosur të bashkëpunojë ngushtësisht me partnerët italianë dhe ata ndërkombëtarë.

Ai theksoi se bashkëpunimi me Policinë italiane përbën një shembull shumë të mirë, përmes shkëmbimit të informacionit, krijimit të skuadrave të përbashkëta hetimore dhe operacionale, si dhe realizimit të trajnimeve dhe shkëmbimit të eksperiencave.

Gjatë takimit u shkëmbyen gjithashtu eksperienca mbi menaxhimin e situatave të ndryshme, u vlerësua roli dhe mbështetja e ambasadës italiane në Tiranë, si dhe u dakordësua forcimi i mëtejshëm i marrëdhënieve, përfshirë zgjerimin e bashkëpunimit edhe me Kuesturën e Romës.

1 nga 3

/m.q/r.e/a.f/

The post Proda pret kreun e Policisë së Romës: Bashkë për të luftuar krimin e organizuar appeared first on Agjencia Telegrafike Shqiptare.

TIRANË, 20 janar /ATSH/ Banka e Shqipërisë çeli sot ekspozitën “Paraja rrëfen: 100 vjet jetë dhe ngjarje, Banka e Shqipërisë”, me pjesëmarrjen e ambasadorit të Italisë në Tiranë, Marco Alberti, përfaqësuesve të lartë të institucioneve shtetërore, të institucioneve financiare, trupit diplomatik, studiuesve dhe akademikëve.

Ekspozita vjen në një moment me simbolikë të veçantë historike, në intervalin mes 100-vjetorit të themelimit të Bankës së Shqipërisë (1925-2025) dhe 100-vjetorit të hedhjes në qarkullim të monedhës së parë kombëtare shqiptare (1926). Ajo është realizuar në bashkëpunim me Institutin Italian të Kulturës dhe është vendosur në Selinë Qendrore nr. 2 të Bankës së Shqipërisë, një godinë kjo me vlera të spikatura arkitektonike dhe historike për qytetin e Tiranës.

Në fjalën e hapjes, Guvernatori i Bankës së Shqipërisë, Gent Sejko theksoi se ekspozita synon të shkojë përtej historisë institucionale të bankës qendrore, duke pasqyruar edhe historinë e përditshme të shoqërisë shqiptare: mënyrën se si qytetarët kanë paguar, kursyer, përballuar kriza ekonomike dhe ndërtuar aspirata për stabilitet e mirëqenie. Përmes dokumenteve arkivore, objekteve, imazheve dhe rrëfimeve, ekspozita ofron një pasqyrë të plotë të zhvillimeve monetare dhe ekonomike të vendit.

Historia e Bankës së Shqipërisë dhe e monedhës kombëtare shpaloset si një udhëtim në tri faza të mëdha historike, të ndikuara nga ndryshimet politike, gjeopolitike dhe ekonomike. Në këtë rrugëtim, Banka ka vepruar nën regjime të ndryshme monetare, duke synuar vazhdimisht ruajtjen e stabilitetit dhe besimit publik, edhe në rrethana të vështira apo të jashtëzakonshme.

Guvernatori Sejko vuri në dukje se ekspozita nuk i trajton këto periudha si kapituj të mbyllur, por si burim mësimi për të tashmen dhe të ardhmen, duke nënvizuar rëndësinë e stabilitetit monetar, menaxhimit të krizave dhe edukimit financiar të publikut. Në këtë kontekst, ekspozita përfaqëson edhe një përpjekje për ta afruar bankën qendrore me qytetarët, përmes komunikimit të hapur, transparent dhe gjithëpërfshirës.

Ambasadori i Italisë në Tiranë, Marco Alberti përshëndeti projektin, duke u shprehur i emocionuar që ndodhej në një godinë të projektuar dhe të restauruar nga arkitektë italianë. “Banka e Shqipërisë është një institucion në rritje, në një vend në rritje. Projektet e menaxhuara nga Banka po rriten, ashtu si edhe aftësia e saj për të mbështetur ekonominë kombëtare; gjithashtu po rritet edhe integrimi i saj, me hyrjen e fundit në sistemin SEPA, një tjetër objektiv thelbësor i arritur falë angazhimit të Bankës Qendrore”, theksoi ambasadori Alberti.

Gjatë ceremonisë u prezantua gjithashtu edhe një vepër studimore e përgatitur nga profesori i ndjerë Aristotel Pano, kushtuar 100 viteve të sistemit monetar dhe Bankës Qendrore në Shqipëri, si një kontribut i rëndësishëm akademik në dokumentimin e historisë monetare të vendit.

Një element i veçantë i kësaj nisme është shtrirja e saj përtej Tiranës, me aktivitete shoqëruese dhe një koncept udhëtues, që synon të sjellë historinë monetare dhe edukimin financiar më pranë komuniteteve të ndryshme. Ekspozita është fryt i bashkëpunimit mes Bankës së Shqipërisë, botës akademike, institucioneve të kulturës dhe partnerëve vendas e ndërkombëtarë, duke përfshirë historianë, ekonomistë, arkitektë dhe ekspertë të komunikimit. Në këtë kuadër, u vlerësua veçanërisht bashkëpunimi me Bankën Qendrore të Republikës së Kosovës, e cila do të mirëpresë ekspozitën në Prishtinë.

Në mbyllje të fjalës së tij, Guvernatori ftoi publikun ta vizitojë ekspozitën që do të qëndrojë e hapur për 6 muaj, deri në 20 korrik, dhe të angazhohet në mënyrë proaktive në dialogun mbi historinë monetare të Shqipërisë, si pjesë e ndërtimit të një të ardhmeje më të qëndrueshme dhe të informuar.

/e.xh/r.e/a.f/

The post “Paraja rrëfen”, udhëtim në 100 vite histori monetare dhe bankare në Shqipëri appeared first on Agjencia Telegrafike Shqiptare.

PARIS, 20 janar /ATSH-AFP/ – Kërcënimet e presidentit amerikan, Donald Trump për të vendosur tarifa 200% mbi verën dhe shampanjën franceze janë të papranueshme dhe joeficente deklaroi sot një burim pranë presidentit francez, Emmanuel Macron.

”Kërcënimet tarifore për të ndikuar në politikën tonë të jashtme janë të papranueshme dhe nuk do të kenë efekt”, tha burimi, pas deklaratës së Trump lidhur me qëndrimin e Parisit për të refuzuar ftesën e tij për të marrë pjesë në Bordin e Paqes.

Presidenti Trump kërcënoi dje se do të vendosë tarifa prej 200% për verërat dhe shampanjat franceze, në përgjigje të refuzimit të homologut të tij Emmanuel Macron për t’iu bashkuar me Bordit të Paqes për Gazën.

”Do të vendos tarifa prej 200% për verërat dhe shampanjat e tij. Dhe ai do ta pranojë këtë. Por, nuk është i detyruar ta pranojë”, u tha ai gazetarëve në Florida./  /Ad.Ab./ a.jor.

The post FOKUS – Franca i konsideron të papranueshme kërcënimet e Trump mbi tarifat për verën appeared first on Agjencia Telegrafike Shqiptare.

TIRANË, 20 janar/ATSH/ Ministrja e Shtetit dhe Kryenegociatorja, Majlinda Dhuka prezantoi sot paketën prej 12 nismash ligjore, të cilat i ka në shqyrtim Kuvendi i Shqipërisë.

“Këto nisma lidhen me forcimin e shtetit të së drejtës, sundimin e ligjit, luftën kundër krimit dhe krimit të organizuar, zbatimin më të mirë të reformës në drejtësi dhe në fund dhe jo për nga rëndësia, mbrojtjen nga diskriminimi, mbështetjen për familjen, gratë, për të miturit etj., ndryshe, të drejtat e njeriut dhe drejtësia shoqërore. Duke provuar që vendi e ka vullnetin social politik dhe aftësinë institucionale për t’i mbrojtur shtetasit e vet, për t’i ofruar shërbime më të mira të standardit europian gjithnjë e më të krahasueshme me ato të qytetarëve të një vendi anëtar të BE-së”, theksoi Dhuka, në një konferencë të përbashkët për shtyp me Adea Pirdenin, ministre Shteti për Administratën Publike dhe Antikorrupsionin dhe Toni Gogun, ministër Shteti për Marrëdhëniet me Parlamentin.

Sipas saj, kjo paketë prej 12 nismash ligjore të rëndësishme ka në përmbajtjen e saj 6 projektligje, të cilat i janë propozuar Kuvendit nga Këshilli i Ministrave dhe 6 projektligje të cilat janë iniciuar nga Kuvendi i Shqipërisë.

Kryenegociatorja Dhuka vuri në dukje se “e veçanta e kësaj pakete është se ajo garanton progres në lidhje me standardin europian dhe praktikën më të mirë të vendeve anëtare në 3 grupe çështjesh të rëndësishme. Së pari, në luftën krimit dhe krimit të organizuar; së dyti, në lidhje me barazinë dhe drejtësinë sociale, mbrojtjen e familjes, të nënës dhe të të miturve; së treti, në masat për parandalimin e korrupsionit”.

Më tej Dhuka u shpreh se “së bashku me dy kolegët e mi ne do t’i prezantojmë më me hollësi këto nisma të rëndësishme të transformimit europian. Kjo paketë në zemrën e saj ka një numër përafrimesh me ligjin europian të ligjit shqiptar, duke filluar nga shtatë direktiva në ndryshimet e Kodit Penal, në dy direktiva në projektligjin “Për mbrojtjen nga dhuna”, apo në rregulloren e përafruar plotësisht në projektligjin “Për importin dhe eksportin e armëve”, që garanton parandalimin e trafikut të armëve në Shqipëri”.

“Kjo paketë sjell një numër risish. Për herë të parë përmes kësaj pakete Shqipëria do të dekriminalizojë plotësisht veprën penale të shpifjes ndaj gazetarëve, duke rritur mbrojtjen ndaj gazetarëve në misionin e tyre të rëndësishëm për fjalën e lirë dhe për lirinë e shprehjes në Shqipëri, duke u garantuar në të njëjtën kohë një mbrojtje të re nga kanosja për shkak të detyrës”, tha Dhuka.

“Një numër vendesh të BE e kanë ende të kriminalizuar shpifjen, përfshirë edhe gazetarët për shkak se ekzistojnë edhe sfida të mëdha në lidhje me dezinformimin për shkak të epokës digjitale në të cilën jetojmë. Por Shqipëria mendon se realizimi i këtij ndryshimi është një investim i rëndësishëm në demokraci dhe lirinë e shprehjes dhe në forcimin e rolit të madh që kanë gazetarët në këtë drejtim”, theksoi Dhuka.

Kryenegociatorja Dhuka u shpreh se “një risi tjetër e rëndësishme është që pas shumë vitesh Shqipëria më në fund do të ketë një ligj që rregullon aktivitetin e lobimit, për të rregulluar me kujdes ndërhyrjet në vendimmarrjen publike”.

Sipas saj, pas 31 vitesh, Shqipëria do të ketë një ligj të ri për donacionet dhe sponsorizimin.

“Ligji ekzistues për sponsorizimin është i vitit 1994. Me ligjin e ri afrojmë praktikën pranë praktikës dhe standardit europian. Njëherësh do të krijohet një regjistër për lobimin, ku gazetarët, qytetarët, të interesuarit kanë informacion dhe njëkohësisht një regjistër për sponsorizimin dhe donacionet si përpjekje e jona për të rritur dimensionet e nismës “Shqipëria transparente” – që ministrja për antikorrupsionin e ka prezantuar edhe më herët – dhe për të treguar se nisma është e gjallë dhe përmirësime të vazhduara i bëhen përpjekjes sonë për transparencë”, tha Dhuka.

Dhuka shprehu falënderime për gazetarët pasi sipas saj një sondazh ka treguar se 70% e qytetarëve shqiptarë janë të informuar për çështjet e negociatave me BE, në sajë të detyrës së gazetarëve.

/k.s/r.e/a.f/

The post Dhuka: 12 nisma ligjore për përafrimin e legjislacionit shqiptar me atë të BE-së appeared first on Agjencia Telegrafike Shqiptare.

TIRANË, 20 janar /ATSh/ Kryeministri Edi Rama njoftoi se i është përgjigjur ftesës së presidentit amerikan Donald Trump, për të marrë pjesë në Bordin e Paqes për rindërtimin e Gazës.

Kreu i qeverisë shprehu gatishmërinë e plotë për të kontribuar në lidhje me këtë përpjekje të rëndësishme dhe për t’u bërë tërësisht pjesë e një angazhimi të përbashkët që synon ta përkthejë vizionin në veprim.

Rama theksoi se Shqipëria qëndron me vendosmëri përkrah Shteteve të Bashkuara të Amerikës, në të gjitha përpjekjet për promovimin e paqes, sigurisë dhe angazhimit konstruktiv global. Rama nënvizoi se pret me interes që të kontribuojë në suksesin e misionit të Bordit të Paqes.

Kreu i qeverisë nënvizoi se “së shpejti angazhimi ynë do t’i përcillet Kuvendit të Shqipërisë për miratim”.

Përgjigjja e plotë e kryeministrit Edi Rama ndaj ftesës së presidentit të SHBA-së, Donald Trump

Republika e Shqipërisë

Kryeministri

Tiranë, 19 janar 2026

Shkëlqesisë së Tij Z. Donald J. Trump

President i Shteteve të Bashkuara të Amerikës

Washington, DC

I nderuar Zoti President,

Po ju shkruaj për të shprehur vlerësimin tim më të thellë për angazhimin tuaj të fortë dhe udhëheqjen vizionare në themelimin e Bordit të Paqes, si edhe për t’ju falënderuar sinqerisht për ftesën që më keni drejtuar personalisht për të qenë pjesë e tij, si edhe për ftesën drejtuar vendit tim, Republikës së Shqipërisë, për të shërbyer si anëtare themeluese.

Në një kohë kur konfliktet dhe përçarja dominojnë shumë shpesh panoramën ndërkombëtare, paqja duhet të formësohet aktivisht e jo të pritet pasivisht a diskutohet pafundësisht nëpër forume politike, teksa përreth globit jetë të pafajshme humbasin kotësisht çdo minutë. Bordi i Paqes shfaqet si mishërimi i kësaj domosdoshmërie urgjente.

Duke trajtuar njëkohësisht pasojat e menjëhershme të konflikteve dhe shkaqet më të thella strukturore që e prodhojnë paqëndrueshmërinë, kjo nismë ka potencialin të shndërrohet në një model vërtetë transformues të ndërtimit të paqes në nivel global.

Duket qartë se për të qenë një organizatë e re ndërkombëtare, Bordi i Paqes nuk është konceptuar si një forum tjetër deklaratash, procedurash dhe përgjegjësish të shtyra në kohë, por si një instrument i përqëndruar dhe qëllimplotë i udhëheqjes dhe përgjegjësisë globale.

Kur filtrohet pafundësisht përmes shtresave të procedurave, paqja shumë shpesh mbërrin tepër vonë; kjo nismë mishëron me plot të drejtë kuptimin se koha, qartësia e mandatit dhe përgjegjësia personale në nivelin më të lartë janë vetë instrumente të paqes.

Prandaj, është njëkohësisht privilegj dhe nder të shpreh gatishmërinë time të plotë për të kontribuar në këtë përpjekje të rëndësishme dhe për t’u bërë tërësisht pjesë e një angazhimi të përbashkët që synon ta përkthejë vizionin në veprim.

Republika e Shqipërisë ka qenë prej kohësh një aleate e palëkundur e Shteteve të Bashkuara të Amerikës, e lidhur nga vlera të përbashkëta, respekt i ndërsjellë dhe një përkushtim i përbashkët ndaj lirisë, demokracisë dhe sigurisë ndërkombëtare.

Populli shqiptar do ta kujtojë gjithmonë dhe do ta çmojë vazhdimisht rolin parimor dhe vendimtar të Shteteve të Bashkuara të Amerikës, drejt vendosjes së paqes dhe stabilitetit në rajonin tonë në momente kritike të historisë sonë të përbashkët. Në këtë frymë të qëndrueshme partneriteti, dëshiroj të ritheksoj se Republika e Shqipërisë qëndron me vendosmëri përkrah Shteteve të Bashkuara të Amerikës, në të gjitha përpjekjet për promovimin e paqes, sigurisë dhe angazhimit konstruktiv global.

Duke pritur me interes të kontribuoj në suksesin e misionit të Bordit të Paqes, ju lutem pranoni, Zoti President dhe Kryetar i Bordit, shprehjen e konsideratës sime më të lartë.

Me respekt,

Edi Rama

1 nga 2

/a.f/r.e/

The post Rama i përgjigjet ftesës së Trump për Bordin e Paqes: Së shpejti i përcillet Kuvendit për miratim appeared first on Agjencia Telegrafike Shqiptare.

TIRANË, 20 janar/ATSH/ Ministrja e Shtetit dhe Kryenegociatorja, Majlinda Dhuka deklaroi sot se në vitin 2027 Shqipëria duhet t’i ketë plotësuar të gjitha kushtet për mbylljen e negociatave me Bashkimin Europian.

Në një konferencë të përbashkët për shtyp me Adea Pirdenin, ministre Shteti për Administratën Publike dhe Antikorrupsionin dhe Toni Gogun, ministër Shteti për Marrëdhëniet me Parlamentin, lidhur me fazën e re të negociatave me Bashkimin Europian dhe angazhimin politik e qytetar për t’ia dalë mbanë, Dhuka tha se “në këtë bashkëbisedim do t’i informojmë qytetarët shqiptarë mbi çfarë pret Shqipëria në 2026 sa i përket aspiratës europiane, negociatave dhe përgatitjes për anëtarësim në BE”.

“Në 2025-ën Shqipëria i çeli negociatat për 33 kapituj. Në 17 nëntor çelëm negociatat për 5-së kapitujt e fundit. Viti 2026 është veçanërisht i rëndësishëm dhe një gur kilometrik në rrugën e vendit drejt anëtarësimit në BE. Në 2026 Shqipëria do të kalojë, dhe po punon intensivisht për këtë, për t’u futur në fazën e mbylljes së negociatave për anëtarësim me një numër të mirë fushash nga këto 33 kapituj dhe me aspiratën e madhe që në vitin 2027 t’i kemi arritur të gjitha përgatitjet ose siç njihet në gjuhën e negociatave, kushtet për mbylljen e negociatave”, nënvizoi Dhuka.

Kryenegociatorja Dhuka theksoi se “kjo është një punë jashtëzakonisht komplekse, por edhe shumë pozitive sa i përket transformimit europian të vendit që nga shteti, ekonomia, shërbimet për qytetarët, heqja e barrierave midis Shqipërisë dhe BE-së siç bëmë gjatë 2025 ku Shqipëria u fut në zonën e pagesave euro, e njohur si SEPA, që na mundësoi të bëjmë veprime bankare nga Shqipëria drejt vendeve të BE-së me tarifa shumë të reduktuara dhe në një kohë të shkurtër”.

Midis çeljes së negociatave dhe mbylljes, vijoi Dhuka, Shqipëria duhet të japë një test aftësie si në pikëpamje të vullnetit politik për reforma europiane, ashtu edhe të aftësisë së institucioneve të veta, aftësisë teknike dhe zbatuese të standardit europian praktikisht në shërbime dhe jetën e qytetarëve.

“Për këtë Shqipëria duhet të përgatitet me një numër reformash dhe përmirësimesh që ka në zemër standardin europian që buron si nga ligji europian i njohur si acquis i BE-së, ashtu edhe nga praktikat më të mira të vendeve anëtare apo udhëzimet e gjykatave europiane. Ky test aftësie në gjuhën e negociatave njihet si përmbushja e kushteve të ndërmjetme, atij progresi që qëndron midis çeljes së negociatave dhe mbylljes së tyre”, tha Dhuka.

Dhuka u shpreh se “fusha në të cilën Shqipëria duhet të japë këtë test aftësie në zemër të të cilit është edhe aftësia e institucioneve, por edhe vullneti politik i të gjitha forcave politike në Shqipëri është shteti i së drejtës dhe sundimi i ligjit”.

/k.s/r.e/

The post Dhuka: Kushtet për mbylljen e negociatave duhet të plotësohen deri në fund të 2027-ës appeared first on Agjencia Telegrafike Shqiptare.

TIRANË, 20 janar/ATSh- Arbi Fortuzi/ Ministri i Shtetit për Marrëdhëniet me Parlamentin, Toni Gogu, njoftoi sot se një prej nismave ligjore që do të diskutohet në Kuvend, në kuadër të procesit reformues për integrimin në Bashkimin Europian, është ligji për median.

Sipas ministrit Gogu, ndryshimet përfshijnë dekriminalizimin e shpifjes për gazetarët, duke forcuar dhe mbrojtur rolin e tyre në shoqëri, si dhe garantimin e transparencës mbi pronësinë së platformave televizive.

Deklaratën Gogu e bëri gjatë një konference për median, të zhvilluar në Kryeministri, me fokus “fazën e re të negociatave me Bashkimin Europian dhe angazhimin politik për t’ia dalë mbanë”.

Në konferencë ishin të pranishme edhe Majlinda Dhuka, ministre Shteti dhe Kryenegociatore, si dhe Adea Pirdeni, ministre Shteti për Administratën Publike dhe Antikorrupsionin.

Gogu bëri me dije se “një pjesë e rëndësishme e nismave ligjore lidhet me median dhe rolin e saj në shoqëri. Ligji për përmirësimin e medias audiovizive ka në fokus transparencën e platformave televizive, ku publiku ka të drejtë të dijë pronësinë dhe aktorët që qëndrojnë pas medieve. Vitin e kaluar kemi bërë një punë të jashtëzakonshme për luftën ndaj dezinformimit”.

Ai shtoi se “një tjetër element i rëndësishëm lidhet me mbrojtjen e gazetarëve në rolin e tyre jetik për demokracinë. Dekriminalizimi i shpifjes do të garantojë që gazetarët të jenë të çliruar nga barra e shpifjes, kur veprojnë në mirëbesim dhe përpiqen të pasqyrojnë zhvillimet e fundit. Kjo është një nga gurët themelorë të paketës ligjore, që më pas përkthehet në standardet europiane të BE-së në jetën e përditshme”.

Një tjetër paketë ligjore është ajo që lidhet me mbrojtjen e familjes.

“Familjet shqiptare janë duke u përplasur me përbindëshin e dhunës, prandaj janë propozuar ndryshime ligjore për forcimin e mbrojtjes së familjes nga dhuna, zonjave, por dhe më të dobtëve, pasi nga dhuna preken edhe të miturit, prandaj fuqizojmë mekanizmin koordinues dhe mekanizmin reagues të ndërhyrjes”, tha Gogu.

“Ndryshimet e tjera kanë të bëjnë me luftën ndaj korrupsionit, me luftën ndaj krimit, që kanë të bëjmë me ato propozime që bëhen në Kodin Penal, edhe janë disa projektligje që forcojnë luftën ndaj narkotikëve, që janë pjesë e paketës. Më pas do të ketë dhe ndryshime në ligjin për rolin e komisioneve hetimore etj.”, tha Gogu.

/r.e/

The post Gogu: Dekriminalizohet shpifja për gazetarët, transparencë pronësisë së televizioneve appeared first on Agjencia Telegrafike Shqiptare.

TIRANË, 20 janar /ATSh/ Deputetja e Partisë Demokratike, Jorida Tabaku, tha sot se anëtarësimi në Bashkimin Evropian nuk matet me numrin e ligjeve të miratuara formalisht në Kuvend, por me standardet reale që ndikojnë drejtpërdrejt në cilësinë e jetës së qytetarëve.

Sipas Tabakut, integrimi evropian nënkupton më shumë arsim cilësor, shëndetësi më të mirë, siguri ushqimore, ekonomi funksionale dhe infrastrukturë sipas standardeve të BE-së, fusha në të cilat Shqipëria, sipas saj, mbetet ende shumë larg.

Tabaku shtoi se vetë qeveria shqiptare ka pranuar këtë realitet, duke kërkuar zyrtarisht periudha të ndërmjetme në negociatat me Bashkimi Evropian.

“Vetëm për sigurinë ushqimore janë kërkuar të paktën 5 vite shtesë për përmbushjen e standardeve. Për infrastrukturën nevojiten rreth 15 vite investime, ndërsa për ekonominë një dekadë e plotë”, u shpreh Tabaku.

Sipas saj, këto kërkesa tregojnë qartë se Shqipëria nuk është gati për anëtarësim real dhe se problemet nuk janë të reja.

“Këto nuk janë detyrime që Shqipëria po i mëson sot. Janë çështje të njohura prej vitesh, por të injoruara sistematikisht nga qeveria gjatë 12 viteve të fundit”, deklaroi ajo.

Tabaku nënvizoi se në total janë rreth 15 periudha të ndërmjetme që qeveria shqiptare ka kërkuar nga Bruksel, një tregues i qartë, sipas saj, i dështimit për të ndërtuar standardet evropiane brenda vendit.

“Në fund të ditës, Evropa nuk është në letra dhe në raporte propagandistike. Evropa është në cilësi dhe standarde. Fatkeqësisht, këto standarde ende nuk i kemi arritur, dhe me këtë ritëm, rrezikojmë të mos i arrijmë as në vitet që vijnë” tha Tabaku.

/m.q/r.e/a.f/

The post Tabaku: Qeveria ka dështuar të ndërtojë standarde evropiane brenda vendit appeared first on Agjencia Telegrafike Shqiptare.

DAVOS, 20 janar /ATSH-AFP/ – Presidenti amerikan, Donald Trump njoftoi sot një takim të palëve të ndryshme në lidhje me Groenlandën, një territor autonom që i përket Danimarkës, të cilin ai dëshiron ta aneksojë, por kjo ka rritur presionin mbi udhëheqësit evropianë të mbledhur në Forumin Ekonomik të Davosit.

Mbledhja vjetore e multilateralizmit, të cilën presidenti amerikan e ka dëmtuar gjithmonë, vjen mes një ngërçi për Groenlandën midis Shteteve të Bashkuara dhe aleatëve të saj evropianë brenda NATO-s.

“Nuk mendoj se do të bëjnë shumë luftë. Duhet ta pranojmë”, i tha presidenti amerikan një gazetari në Florida i cili e pyeti për Groenlandën, përpara se të njoftonte “një takim të palëve të ndryshme në Davos”.

“Groenlanda është thelbësore për sigurinë kombëtare dhe globale. Nuk mund të ketë kthim prapa për këtë, të gjithë janë dakord!”, deklaroi ai në rrjetin e tij Truth Social, duke treguar se kishte pasur “një bisedë shumë të mirë telefonike” me Mark Rutte-n, sekretarin e përgjithshëm të NATO-s.

“Shtetet e Bashkuara të Amerikës janë padyshim vendi më i fuqishëm në botë… Ne jemi e vetmja fuqi e aftë të sigurojë paqen në botë, dhe kjo bëhet, thjesht, me forcë!”, tha ai.

Presidenti amerikan postoi gjithashtu një imazh të gjeneruar nga IA që e tregon atë, të shoqëruar nga zëvendëspresidenti JD Vance dhe sekretari i Shtetit Marco Rubio, duke vendosur një flamur amerikan në një peizazh arktik. Një tabelë shkruan “Grenlanda, territor i SHBA-së që nga viti 2026”.

Trump citon shqetësimet e sigurisë në lidhje me Rusinë dhe Kinën si justifikim për sekuestrimin e Groenlandës dhe ai ka kërcënuar me tarifa për vendet që e kundërshtojnë atë, përfshirë Francën, Gjermaninë dhe Mbretërinë e Bashkuar.

Ndërsa BE-ja shqyrton masa tregtare hakmarrëse, deklaratat e bëra nga udhëheqësit evropianë në samitin e Davosit të martën do të monitorohen nga afër.

Presidentja e Komisionit Evropian Ursula von der Leyen është planifikuar të mbajë një nga fjalimet hapëse, e ndjekur nga zëvendëskryeministri kinez He Lifeng.

Të hënën, ajo përsëriti “nevojën për të respektuar pa mëdyshje” sovranitetin e Groenlandës dhe Danimarkës gjatë një takimi në Davos me një delegacion dypartiak nga Kongresi i SHBA-së.

Presidenti francez Emmanuel Macron, i cili kohët e fundit denoncoi “kolonializmin e ri dhe imperializmin e ri” në marrëdhëniet ndërkombëtare, është ndër ata që mbështesin një përgjigje të fortë të BE-së.

Ai është planifikuar të flasë në Davos herët këtë pasdite.

– Rreth vicioz –

Donald Trump, paraqitja e të cilit e fundit personalisht në forumin e Davosit ishte në vitin 2020, pritet t’i drejtohet asamblesë të mërkurën.

Prania amerikane është shumë e dukshme këtë vit në Davos.

Sipas organizatorëve, delegacioni amerikan është një nga më të mëdhenjtë e regjistruar ndonjëherë në Davos këtë vit.

Sekretari i Thesarit i SHBA-së, Scott Bessent, hodhi poshtë të martën në Davos idenë se evropianët mund të imponojnë hakmarrje financiare dhe të shesin obligacionet e tyre të Thesarit të SHBA-së.

Gjatë një konference për shtyp, ai denoncoi “një narrativë krejtësisht mashtruese”, duke vënë në dukje se tregu i borxhit amerikan “po performon më mirë në botë”.

“Është tregu më likuid dhe është baza e të gjitha transaksioneve financiare”, tha ai.

“Të gjithë duhet të marrin frymë thellë. Mos i dëgjoni mediet histerike”, shtoi ai.

Macron kishte planifikuar të largohej nga Davosi të martën në mbrëmje, pa u takuar me Donald Trump.

Kancelari gjerman Friedrich Merz, nga ana tjetër, kishte deklaruar se donte të takohej me presidentin amerikan atje, duke thënë se donte të “shmangte një përshkallëzim të luftës tregtare”.

“Kërcënimet tarifore midis aleatëve janë të papranueshme; ato dobësojnë marrëdhënien tonë transatlantike dhe, në skenarin më të keq, mund të çojnë në një rreth vicioz”, paralajmëroi gjithashtu presidenti finlandez, Alexander Stubb.

Kur u pyet për mundësinë e përdorimit të forcës nga amerikanët, ai megjithatë pohoi se “nuk besoj se amerikanët do të marrin ushtarakisht kontrollin e Groenlandës”.

Ndër udhëheqësit e tjerë që priten në Davos të martën është kryeministri kanadez Mark Carney, i cili po kërkon të zvogëlojë varësinë e vendit të tij nga Shtetet e Bashkuara dhe së fundmi përfundoi një partneritet të ri me Pekinin.

Samiti, këtë vit me temën “Një Frymë Dialogu”, do të mbahet deri të premten në një resort luksoz skish./  a.jor.

The post KOMENT – Evropianët dalin në skenë në Davos, pasi Trump vendos Groenlandën në agjendë appeared first on Agjencia Telegrafike Shqiptare.

TIRANË, 20 janar /ATSh/ Deputeti Olsi Komici në Komisionin për Nismat Qytetare, Bashkëpunimin dhe Mbikëqyrjen Institucionale iu përgjigj sot shqetësimit të ngritur nga Shoqata e Gjyqtarëve në lidhje me emërimin e kryetarëve të gjykatave.

Teksa shqyrtohej projektligji “Për disa ndryshime në ligjin nr. 96/2016 ‘Për statusin e gjyqtarëve dhe prokurorëve në Republikën e Shqipërisë’”, Komici tha se është lënë një afat që kryetarët e gjykatave të rrinë në detyrë deri në fund të vitit 2028, por kjo pikë është e diskutueshme.

Komici theksoi se viti 2028 është vendosur për të caktuar një afat për KLGJ-në, në mënyrë që mos të krijohet një vakuum institucional.

“Në rast se bëhet fjalë për ‘deadline’ në lidhje me kryetarët e gjykatave, që është dhe shqetësimi kryesor i Shoqatës së Gjyqtarëve, është lënë një afat që kryetarët e gjykatave apo zëvendëskryetarët të rrinë në detyrë deri në fund të vitit 2028. Që kur bëra prezantimin e nismave ligjore, e lashë si pikë për ta diskutuar, hapa kartat e diskutimit në këtë komision. Logjika dhe ideja ime ka të bëjë me faktin se vërtetë nga ana e KLGJ është miratuar në rregulloren përkatëse për zgjedhjen e kryetarëve të gjykatave, por unë mbaj parasysh që procesi i vlerësimit të pasurisë, integriteti dhe aftësive profesionale të të gjithë kandidatëve për kryetarë gjykatash, është një proces që do të dojë një kohë të konsiderueshme.

“Pra ne mund të dimë datën se kur do të fillojë ky proces, por nuk mund të dimë datën se kur përfundon ky proces, i cili mund të vazhdojë për muaj, por mund të vazhdojë dhe për një 1 vit apo 2 vite. Është një proces realisht mjaft kompleks, ku përveç marrjes së analizës së informacionit që bëjnë Këshillat përkatëse, ka të bëjë me faktin me ndërthurjen e këtij informacioni dhe pika më e vështirë është në vlerësimin përfundimtar që u bëhet kandidaturave.

“Pikërisht, për të shmangur këtë vakuum që mund të krijohet, në kohë dhe institucional, kam propozuar që të vendoset një afat, pra që është viti 2028, në mënyrë që mos të lëmë bosh institucionin e kryetarit të gjykatës, pra të këtë një vazhdimësi ky institucion, ky rol, qoftë ligjor dhe kushtetues, por nga ana tjetër përcaktojmë dhe një afat për KLGJ-në. Pra në bazë të Rregullores, ke të drejtën ta fillosh procesin, por jo ta zgjasësh pafund. Kam vendosur vitin 2028, por që është i diskutueshëm, është relativ”, tha Komici.

Komici shtoi se “ligji përcakton afatin 3-vjeçar të atyre që janë në detyrë, por deadline (afati i fundit) është që mos të zvarrisin pafund procedurat”.

“Një propozim mund të jetë që KLGJ të nisë procedurën për zgjedhjen e kryetarit dhe mos të kalojë afati 3-vjeçar i atyre që janë në detyrë”, tha ai.

Deputetët e Partisë Demokratike nuk morën pjesë në mbledhjen e komisionit.

/m.q/r.e/a.f/

The post Komici: Emërimi i kryetarëve të gjykatave deri në vitin 2028, që KLGJ të mos zvarrisë procedurat appeared first on Agjencia Telegrafike Shqiptare.

TIRANË, 20 janar/ATSh/ Kryetari i grupit parlamentar të Partisë Socialiste dhe Drejtuesi Politik për Diasporën, Taulant Balla vlerësoi marrëveshjen mes Shqipërisë dhe Italisë si një hap të rëndësishëm strategjik, me fokus të veçantë mbështetjen për diasporën shqiptare në Itali dhe forcimin e lidhjeve kulturore mes dy vendeve.

Në fjalën e tij në Komisionin për Evropën dhe Punët e Jashtme, Balla theksoi rolin vendimtar të komunitetit shqiptar në Itali në proceset demokratike të vendit, duke nënvizuar se diaspora shqiptare në Itali ishte komuniteti me pjesëmarrjen më të lartë në zgjedhjet e 11 majit, çka sipas tij i dha qeverisë mandatin për të vijuar reformat integruese.

“Dhe gjej rastin të falënderoj diasporën shqiptare që jeton në Itali edhe për një fakt tjetër, që ishin edhe numri më i madh i shqiptarëve që morën pjesë në zgjedhjet e 11 majit. Duke votuar për herë të parë. Dhe duke i dhënë mbështetjen qeverisë sonë për të vijuar reformat integruese në rrugën drejt anëtarësimit në Bashkimin Evropian”, u shpreh Balla.

Një vend të veçantë në fjalën e tij zuri edhe komuniteti italian në Shqipëri, si dhe komuniteti arbëresh, të cilin Balla e cilësoi si një frymëzim për shqiptarët.

“Komuniteti arbëresh është një inspirim i madh për çdo shqiptar pas 500 vitesh, një model i shkëlqyer i ruajtjes dhe promovimit të kulturës dhe gjuhës shqipe”, tha ai, duke përshëndetur njëkohësisht vendimin e Qeverisë Meloni për të mundësuar transmetime në gjuhën shqipe arbëreshe në kanalet e RAI-t.

Balla theksoi se një element thelbësor i kësaj marrëveshjeje historike është sanksionimi i transmetimeve të ndërsjella të kanaleve publike, çka do të rrisë mirëkuptimin kulturor mes dy vendeve dhe do të ndihmojë në ruajtjen e identitetit gjuhësor të diasporës.

“Është sanksionuar përfshirja e transmetimit të kanaleve publike në territorin e palës tjetër, një hap shumë i rëndësishëm për ndërveprimin kulturor dhe qytetar mes komuniteteve”, u shpreh ai.

Në vijim, Balla u ndal edhe te marrëveshja për njohjen e ndërsjellë të kontributeve të sigurimeve shoqërore, e cila tashmë ka hyrë në fuqi.

“Sot, rreth 500 mijë motra dhe vëllezër shqiptarë që jetojnë në Itali janë përfitues të kësaj marrëveshjeje, e cila u miratua në mënyrë të përshpejtuar nga të dyja dhomat e Parlamentit italian”, deklaroi ai.

Në përfundim, Balla theksoi rolin e Kuvendit në monitorimin e zbatimit të marrëveshjes dhe nxitjen e qeverisë për të zgjeruar modele të ngjashme bashkëpunimi edhe me vende të tjera partnere ku jetojnë komunitete të mëdha shqiptare.

“Besoj që shpreh vlerësimin e të gjithëve, është një marrëveshje e cila gëzon mbështetjen dhe pa dyshim që roli i Kuvendit është të monitorojë. Dhe të monitorojë zbatimin e kësaj marrëveshjeje, dhe të nxisë qeverinë, që marrëveshje të tilla të negociohen dhe të firmosen edhe me vende të tjera partnere. E nënvizova Greqinë, por edhe me vendet e tjera ku jetojnë dhe punojnë shqiptarët”, përfundoi Balla fjalën e tij në Komision.

/a.f/r.e/

The post Balla: Marrëveshja me Italinë për transmetimet e ndërsjella, hap i rëndësishëm për diasporën appeared first on Agjencia Telegrafike Shqiptare.

TIRANË, 20 janar /ATSh/ Byroja e Kuvendit do të mblidhet sot në orën 11:00 për të shqyrtuar ankimimin e deputetëve të përjashtuar të Partisë Demokratike.

Grupi parlamentar i Partisë Demokratike kërkon që mbledhja të jetë e hapur.

“Në cilësinë e anëtarit të Byrosë së Kuvendit, në kuadër të transparencës dhe interesit të opinionit publik, si dhe ndjeshmërisë së çështjeve për diskutim, kërkoj që mbledhja e sotme e Byrosë së Kuvendit, në orën 11:00, të zhvillohet me praninë e medieve dhe gazetarëve”, thuhet në kërkesën e depozituar nga deputeti Belind Këlliçi, në emër të grupit parlamentar të PD-së.

Sekretariati për Procedurat, Votimet dhe Etikën ka përjashtuar gjashtë deputetë të Partisë Demokratike, Belind Këlliçin, Albana Vokshin, Klevis Balliun, Elda Hotin, Flamur Nokën dhe Fidel Krekën, pas kaosit të krijuar në Kuvend seancën e 18 dhjetorit.

/m.q/r.e/a.f/

The post PD kërkon mbledhje me dyer të hapura të Byros së Kuvendit appeared first on Agjencia Telegrafike Shqiptare.

TIRANË, 20 janar/ATSh/ Ministri i Turizmit, Kulturës dhe Sportit, Blendi Gonxhja ka zhvilluar një vizitë në Pazarin e Krujës, ku është takuar me artizanë dhe sipërmarrës.

Ministri Gonxhja bëri të ditur se, mbështetja e artizanatit, e ekonomisë lokale dhe e turizmit kulturor mbetet një prioritet i rëndësishëm, për të garantuar zhvillim të qëndrueshëm, punësim dhe promovim dinjitoz të Shqipërisë si destinacion me rrënjë të forta kulturore dhe potencial të madh turistik.

Artizanët dhe sipërmarrësit e këtij pazari, përmes punës së tyre ruajnë identitetin kombëtar dhe promovojnë produktet “Made in Albania” si vlera autentike për vizitorët vendas dhe të huaj.

Pazari i Krujës është një ansambël që ruan vlera historiko-arkitektonike, me rrugë me kalldrëm që të çojnë drejt kalasë së qytetit.

Ky pazar është zemra e qytetit të Krujës, një vend me gjallëri, i frekuentuar gjatë gjithë vitit nga vizitorë vendas e të huaj të cilët tërhiqen edhe nga suveniret e shumta. Çdokush i dhënë pas blerjeve artizanale patjetër që kalon nga Pazari i Krujës, në dyqanet e të cilit edhe mund të shihet endja e pëlhurave.

1 nga 8

/r.e/

The post Gonxhja: Prioritet mbështetja e artizanatit dhe e turizmit kulturor appeared first on Agjencia Telegrafike Shqiptare.

TIRANË, 20 janar/ATSH/ Kombëtarja shqiptare nuk ka ndryshuar pozicion në klasifikimin e Federatës Ndërkombëtare të Futbollit për muajin janar.

Qeveria e futbollit botëror publikoi renditjen e parë për vitin 2026 me kuqezinjtë që e nisin vitin në të njëjtin pozicion siç e mbyllën edhe vitin 2025, në vendin e 63-të me 1401,07 pikë të grumbulluara.

Ajo që ka fituar sërish pozicion është pikërisht përfaqësuesja e Kosovës. Dardanët e nisin vitin 2026 në vendin e 79-të, një shkallë më lart në krahasim me klasifikimin e publikuar në fund të vitit 2025 me skuadrën e drejtuar nga Franco Foda që shkon në 1308,84 pikë.

Sigurisht që Kupa e Afrikës e mbyllur këtë të dielë ka ndikuar jo pak në klasifikimin e parë të FIFA për këtë vit, me dy skuadrat finaliste që kanë bërë shumë shumë progres duke ngjitur shkallë në këtë renditje. Kështu Maroku edhe pse humbi në finale e sheh veten mes 10 ekipeve më të mira të botës duke u pozicionuar në vendin e 8-të, një ngjitje me 3 vende në krahasim me muajin e kaluar. Ndërsa skuadra kampione e Afrikës, Senegali fitoi 5 vende dhe ngjitet në vendin e 12-të, një pozicionim që zbret Italinë në vendin e 13-të, shkruan TCh.

Për sa i përket kreut, Spanja vazhdon të jetë në vendin e parë, e ndjekur nga kampionia e botës në fuqi Argjentina dhe Franca në të tretin.

/a.f/r.e/

The post Shqipëria ruan pozicionin në renditjen e FIFA-s, Kosova ngjitet në vendin e 79-të appeared first on Agjencia Telegrafike Shqiptare.

DAVOS, 20 janar /ATSH/ – Sekretari amerikan i Thesarit, Scott Bessent deklaroi sot se marrëdhëniet mes Shteteve të Bashkuara të Amerikës dhe Evropës mbeten të forta, duke u bërë thirrje partnerëve tregtarë që të marrin frymë thellë dhe të lejojnë që tensionet e nxitura nga kërcënimet e reja tarifore të administratës Trump lidhur me Groenlandën të marrin rrjedhën e tyre, sipas AP.

“Unë mendoj se marrëdhëniet tona kurrë nuk kanë qenë më të afërta”, tha Bessent, duke folur në kuadër të takimit vjetor të Forumit Ekonomik Botëror në Davos.

Presidenti Donald Trump njoftoi të shtunën vendosjen e një takse importi prej 10%, duke nisur nga shkurti, për mallrat që vijnë nga tetë vende evropiane që janë rreshtuar në mbështetje të Danimarkës, pas thirrjeve të intensifikuara të tij që SHBA-ja të marrë kontrollin e territorit gjysmautonom të Groenlandës.

Trump ka këmbëngulur se Shtetet e Bashkuara të Amerikës kanë nevojë për Groenlandën për arsye sigurie, duke përmendur kërcënime të mundshme nga Kina dhe Rusia.

Kërcënimet e presidentit amerikan kanë shkaktuar indinjatë dhe një valë aktiviteti diplomatik në mbarë Evropën, ndërsa liderët po shqyrtojnë kundërmasa të mundshme, përfshirë tarifa hakmarrëse dhe përdorimin për herë të parë të instrumentit kundër shtrëngimit të Bashkimit Evropian./  /Ad.Ab./ a.jor.

The post DAVOS – Bessent: Marrëdhëniet SHBA-Evropë më të forta se kurrë, pavarësisht krizës së Groenlandës appeared first on Agjencia Telegrafike Shqiptare.