Interi ka shënuar fitore minimale në udhëtim te Udinese në kuadër të xhiros së 21-të në Serie A.

“Neurazzurët” arkëtuan pikët e plota falë një fitore 0-1.

Lautaro Martinez rrezikoi pas vetëm katër minutave lojë megjithatë dështoi nga afërsia përballë portierit vendas.

Megjithatë, argjentinasi pastaj përmirësoi gabimin për të shënuar një gol fantastik për të zhbllokuar epërsinë (20’).

Interi në fakt shënoi edhe një gol tjetër përmes Federico DiMarcos sidoqoftë goli iu anulua për pozitë jashtë loje (61’).

Udinese gjithashtu rrezikoi në fund me disa aksione të shpejta, por mbrojtja zikaltër ishte e pathyeshme.

Interi vazhdon si lider i vetëm në Itali me 49 pikë ndërsa Udinese zë pozitën e 10-të me 26 sosh./Telegrafi/

Mbi 3000 shtëpi të ndërtuara pa leje në komunën e Tetovës, të cilëve përshka të mungesës të dokumentacionit ju është refuzuar lënda për legalizim, kanë mundësi që deri më 3 Mars ti dërzojn edhe një herë dokumentet e nevojshme për legalizim thoën nga komuna e Tetovës.
Ata thonë se bëhët fjalë për ndërtimet gjatë periudhës 2011-2018. Siaps tyre shumica e shtëpive të ndërtuara pa leje dhe pa dokumente janë në qytet, por ka edhe në fshatrat e Tetovës.
“Deri më 3 Mars është thirrja që kemi bërë që të gjithë qytetarët që kanë probleme pronaore juridike, mungesë të dokumentacionit ti sjellin në mënyrë që këta lënd të përfundohen.Nga gjithsej 14451 lënd që janë numri për momentin është rreth 3000 lënd.Pra janë 3000 lëndë që kanë probleme dokumentacioni ose probleme të ndryshme,dhe thirrja është deri më 3 Mars të sjellin dokumentat se pas këtij afati nuk do mund të legalizohen të njejtat.Bëhët fjalë për objekte që kanë mungesë dokumentacioni. Thirrja vlene vetëm për ato ndërtime që janë ndërtuar gjatë periudhës 2011-2018-të,shumica e objekteve janë në qytet por ka edhe në fshatrat e Tetovës,por dokumentet që janë pa dokumentacion të nevojshëm janë në qytet” deklaroi Alili, zëdhënës i komunës së Tetovës.
Por, mbetet në pikëpyetje shtëpit që janë ndërtuar në vakëf të BFI-së, të cilët nuk arrin të gjejn një zgjedhje ligjore. Nga komuna e Tetovës thonë se ky probleme është i kahëmotshëm.
“Ai është si problem i më hershëm. Shumica e shtëpive aty janë ndërtuar la leje dhe pa kriter ndërtimit, dhe është pornlem i veçant dhe sigurisht që do merren masa”, u shpreh zëdhënësi i komunës se Tetovës Albion Alili.
Ndërkohë, nga Myfteni e Tetovës, janë përgjigjur shkurt duke theksuar se kjo temë një herë duhet diskutuar në organet më të larta të BFI-së. Myftiu Selver Xhemaili, tha se ka gadishmëri për të diskutuar me institucione relevante.
Nga ana tjetër edhe shumë vikend shtëpiza presin legalizim në Kodër të Diellit, ndërsa gjatë vizitës së fundit në qendrën turistike Kodra e Diellit, kryeministri i vendit Hristijan Mickovski, është deklaraur i prer që as ka ligj për ta e as do ketë.

Ylli i Kosovës Vedat Muriqi ka hyrë në historinë e Mallorcas, për t’u bërë golashënuesi i dytë më i mirë.

Sulmuesi nga Prizreni shënoi gol sërish në kampionatin spanjoll kundër Athletic Bilbaos, që ishte i 46-ti në fanellën e Mallorcas.

Kësisoj, Muriqi ka tejkaluar legjendën Juan Arango me 45 sosh, ndërsa për objektiv tani ka vetëm Samuel Eto’o, i cili numëron plot 54 sosh.

Edhe vetë faqja zyrtare e La Liga-s ka uruar “Piratin” për këtë arritje të jashtëzakonshme.

“Historike. Vedat Muriqi tejkalon Juan Arangon dhe bëhet golashënuesi i dytë më i mirë në historinë e Mallorcas”, thuhet ndër të tjera në komunikatë.

Muriqi edhe vetë e ka pranuar se po synon t’ia thyejë edhe rekordin e Eto’o, kësisoj as nuk po e konsideron një largim nga Mallorca, aty ku është i padiskutueshëm në formacionin bazë./Telegrafi/

Trajneri Pep Guardiola ka pranuar hapur se Manchester United ishte skuadra më e mirë në fitoren 2-0 ndaj Manchester Cityt në derbin e qytetit.

Pas ndeshjes, trajneri i Cityt deklaroi për Sky Sports:

“Skuadra më e mirë fitoi. Ata ishin më të mirë. Kur një ekip është më i mirë, duhet ta pranosh. Ata kishin energjinë që ne nuk e kishim, kështu që urime për ta”.

“Ata krijuan raste në fund dhe natyrisht golat që pësuam ishin shumë dobët. Nuk e kontrolluam lojën, por në përgjithësi mund të flasim për këtë apo atë aksion. Ne kemi detyrimin ta analizojmë ndeshjen në tërësi dhe ata ishin më të mirë”.

“Ata e nisën shumë fort, ne humbëm një ose dy topa. Reagimi i tifozëve është normal sepse është derbi. Për shumë vite ata kanë qenë pas skuadrës së tyre dhe me trajnerin e ri është normale që ndodhin gjëra të tilla në lojë”.

“Ne nuk arritëm as të rrezikonim, as të dërgonim krosime apo të bënim lëvizje për ta fituar ndeshjen. Kjo lidhet edhe me energjinë – fitorja apo humbja varet nga ajo që bëjmë me topin, jo vetëm pa të”.

Guardiola gjithashtu refuzoi të ankohej për faktin që Diogo Dalot i shpëtoi kartonit të kuq.

“Mund ta thuash edhe këtë, mund të thuash që po të jepej kartoni i kuq do të ishte tjetër ndeshje. Shumë situata ndodhin”.

“Është e lehtë për mua të vij këtu dhe të them se duhej të ishte karton i kuq. Por nuk është kjo arsyeja për të fituar apo humbur një ndeshje. Për të fituar duhet të bësh më mirë dhe ne sot nuk e bëmë”.

Pas kësaj humbjeje, Manchester City mbetet gjashtë pikë prapa Arsenalit në garën për titull në Liga Premier, ndërsa londinezët kanë edhe një ndeshje më pak të zhvilluar./Telegrafi

Pas 45 vitesh u publikua online fjalori i madh i gjuhës shqipe. Gjuhëtarja Anila Kananaj, njëherësh edhe koordinatorja e projektit, thotë se ai do t’i vijë në ndihmë drejtshkrimit të saktë të gjuhës.

“Presim ndryshim në nivelin e drejtshkrimit në të gjitha nivelet. Në shkollë, në dokumentacion zyrtar, në legjislacion, në media. Ky fjalor do të jetë shumë ndihmues, duke filluar që nga fjalët android, fjala online…”

Fjalori, i cili ka rreth 125 mijë njësi leksikore, mund të përdoret nga të gjithë online.

“Ke të gjitha konceptet e reja që brezi i ri i njeh dhe i përdor. Ke lëvizje masive të popullsisë, bashkë me lëvizjen e popullsisë hyjnë fjalë të reja, koncepte të reja. Ke fjalë të vjela nga dialektet. Fjala hajgara (shaka), përdoret shumë në Kosovë. Ne përdorim variant tjetër, ama kjo nuk do të thotë që nuk duhet ta fusim si fjalë”.

Por publikimi i këtij fjalori nga Akademia e Shkencave në Shqipëri ka nxitur reagime në Kosovë. Akademikët atje thonë se u lanë jashtë projektit për shkak të parimeve të diskutimit.

“Në Këshillin Ndërakademik ishte paraparë të diskutoheshin çështjet e leksikut. Së pari, pra, do të përcaktoheshin parimet e punës dhe do të zgjidheshin dilemat. Ne, në Akademinë e Kosovës, nuk e kemi parë të arsyeshme të punojmë pa ato parime dhe nuk kemi pranuar të përfshihemi në atë mënyrë”, tha Bardh Rugova.

Për këto rezerva, grupi i punës në Shqipëri thotë se ka bashkëpunuar me Institutin e Albanologjisë në Prishtinë.

“Kemi grup pune atje në Kosovë, të Institutit të Albanologjisë, që ka qenë pjesëmarrës që nga fillimi. Mendimi i tyre nuk ka munguar kurrë në fjalor. Ata na kanë sjellë vazhdimisht pasuri leksikore nga Kosova”, u shpreh Kananaj.

Për 9 muaj fjalori do të jetë i hapur për të marrë sugjerime nga publiku, të cilat do të reflektohen nga grupi i punës./Tv Klan

Mijëra njerëz dolën në rrugët e kryeqytetit të Danimarkës, Kopenhagen, për të protestuar kundër përpjekjes së presidentit të SHBA-së, Donald Trump, për të aneksuar Grenlandën.

Protesta pasoi paralajmërimin e Trumpit të premten se ai "mund të vendosë një tarifë" për vendet që kundërshtojnë planet e tij për të marrë përsipër Grenlandën.

Ato përkuan gjithashtu me një vizitë në Kopenhagen nga një delegacion dypartiak nga Kongresi i SHBA-së, i cili e ka bërë të qartë kundërshtimin e shumë amerikanëve ndaj kërcënimeve të administratës Trump.

Mijëra njerëz kishin thënë se do të merrnin pjesë në marshime dhe tubime të organizuara nga shoqatat e Grenlandës në Kopenhagen, si dhe në Aarhus, Aalborg, Odense dhe kryeqytetin e Grenlandës, Nuuk.

“Qëllimi është të dërgohet një mesazh i qartë dhe i unifikuar respekti për demokracinë dhe të drejtat themelore të njeriut në Grenlandë”, tha në faqen e saj të internetit Uagut, një shoqatë e banorëve të Grenlandës në Danimarkë.

Një protestë është planifikuar të mbahet në Nuuk, kryeqytetin e Grenlandës, për të protestuar kundër "planeve të SHBA-së për të marrë kontrollin e Grenlandës".

Protestuesit do të marshojnë drejt konsullatës amerikane duke mbajtur flamuj të Grenlandës. /Telegrafi/

Mallorca po luan ndaj Athletic Bilbaos në një ndeshje që i përket javës së 20-të në La Liga.

Vendasit kaluan në epërsi qysh në minutën e pestë, ku autor i këtij goli ishte sulmuesi kosovar Vedat Muriqi, i cili realizoi në minutën e pestë për rezultatin 1-0 pas asistimit nga Sergi Darder.

Për Muriqin ky ishte goli i tij i 12-të deri më tani këtë sezon në La Liga, duke konfirmuar kështu formën spektakolare nëpër të cilën po kalon.

Megjithatë, i shpejtë ishte reagimi i mysafirëve, të cilët vetëm tre minuta më vonë ia dolën të barazojnë shifrat në 1-1 me anë të Unai Gomez.

Mallorca po kalon në një formë jo aq të mirë pasi nuk ka asnjë fitore në tri takimet e fundit në kampionat.

Një fitore eventuale sot do të ishte një hap i madh për t’u larguar edhe më shumë nga zona e cila çon në kategorinë e dytë të futbollit spanjoll./Telegrafi/

Në Kumanovë ka vazhduar aksioni për largimin e objekteve dhe paisjeve të përkohshme hotelerike, të vendosura ilegalisht në sipërfaqet publike në qytet.
Bëhet fjalë për aktivitet të filluar para festave të fundvitit në zonën qendrore të Kumanovës, e që nën mbykqyrjen e organeve kompetente komunale ka vazhduar këtë muaj.
“Aktualisht, pronarët po largojnë teracën verore të objektit të hotelerisë “La Vita”. Por vendime për largimin e paisjeve të këtilla kanë marrë pronarët e objekteve në sheshin e qytetit dhe në ish-kazermën në Bedinjë. Të gjitha objektet e hotelerisë që zënë zonat e trafikut publik dhe nuk kanë leje për instalimin e pajisjeve urbane në përputhje me ligjin do të largohen”, thonë nga Komuna e Kumanovës.
Autoritetet komunale thonë se në Kumanovë ka rreth njëzet objekte hotelierike me pajisje urbane të vendosura ilegalisht, dhe largimi i tyre do të kryhet në bazë të prioritetit. Nëse pronarët nuk e bëjnë këtë, do të angazhohet një kompani nga ana e komunës. Për këtë qëllim, në buxhetin e vitit 2026, komuna ka parashikuar katër milionë denarë, ose rreth 65 mijë euro.
Qytetarët janë kryesisht të kënaqur me këtë vendim, pasiqë me vendosjen e objekteve apo paisjeve të këtilla, vështirësohej kalimi i tyre nëpër trotuare.

Aktori amerikan Ashton Kutcher ka zbuluar se humbi një fushatë për Gucci në fillim të karrierës së tij sepse, sipas stilistit Tom Ford, ishte shumë i shëndoshë, edhe pse në atë kohë peshonte 78 kilogramë.

Përpara se të bëhej një nga fytyrat e njohura të Hollivudit, Kutcher punoi si model dhe eci në pasarelë.

Ai foli për atë periudhë të jetës së tij në një intervistë të kohëve të fundit me ET, në të cilën bashkë-aktorët e tij në "The Beauty", Jeremy Pope dhe Anthony Ramos, diskutuan presionin e standardeve jorealiste të përsosmërisë në industri.

Kutcher, i cili sot është 47 vjeç, theksoi se pasiguritë prekin të gjithë, pavarësisht pamjes apo statusit.

"Fillova të merresha me modelim kur isha rreth 19 vjeç dhe dilja me njerëz që i konsideroj ndër më të bukurit në botë. Ajo që kuptova shumë shpejt ishte se të gjithë kishin pasiguri", zbuloi ai.

Ai gjithashtu kujtoi përvojën e tij me fushatën e Gucci-t kur Tom Ford ishte drejtor krijues i shtëpisë së modës.

"Më kujtohet, mora një fushatë ekskluzive për Gucci-n kur ajo drejtohej nga Tom Ford. U paraqita, shkova në Itali për shfaqjen dhe ai më veshi ato rroba banje rozë Speedo. Në atë kohë peshoja saktësisht 78 kilogramë. Ford tha, 'Ai është shumë i shëndoshë' dhe pastaj më pushuan nga puna", kujtoi Kutcher.

Kutcher shtoi se Ford kishte një vizion shumë specifik për atë që donte të shihte dhe se kjo përvojë e mësoi të mos mbingarkohej nga mendimet e të tjerëve.

"Po qesh me të tani, dhe ai thotë: 'Ishe shumë i shëndoshë.' Unë i thashë: 'Vëlla, unë isha 80 kilogramë! Për çfarë po flet?'" tregoi Kutcher duke qeshur.

Ai theksoi se nuk e përjetoi refuzimin si një dështim personal. Duke folur më gjerësisht për presionet që lidhen me pamjen, Kutcher tha se pasiguritë ndikojnë tek të gjithë.

"Nëse shikohesh në pasqyrë mjaftueshëm gjatë, do të gjesh diçka që nuk të pëlqen ose që mendon se mund të jetë më mirë ose që mendon se mund të jetë ndryshe", tha ai.

Përvojat e Kutcher në botën e modës lidhen tematikisht me projektin e tij të fundit, serialin thriller të FX "The Beauty", i cili eksploron obsesionin e shoqërisë me pamjen dhe përsosmërinë.

Nëse nuk reagoni menjëherë, por vëzhgoni dhe dëgjoni, psikologët thonë se mendja juaj funksionon ndryshe nga e shumicës

Të gjithë kemi qenë të paktën një herë në situatë kur dikush na ka gënjyer. Disa njerëz menjëherë dyshojnë se diçka nuk shkon, të tjerë zemërohen, ndërsa një grup i tretë duket çuditërisht i qetë dhe i përmbajtur – thuajse sikur e dinin që në fillim se e vërteta nuk u tha.

Sipas ekspertëve, mënyra se si reagojmë ndaj gënjeshtrës mund të tregojë shumë për nivelin e inteligjencës sonë, por jo në kuptimin klasik të IQ-së, por në kuptimin e aftësisë për të kuptuar njerëzit, motivet e tyre dhe për të menaxhuar emocionet tona.

Inteligjenca nuk është vetëm logjikë

Kur flasim për mënyrën se si njerëzit reagojnë ndaj gënjeshtrës, është e rëndësishme të kuptojmë se inteligjenca e vërtetë nuk është vetëm aftësia për të zgjidhur probleme matematikore apo logjike. Psikologët theksojnë se njerëzit inteligjentë shpesh kanë të zhvilluar inteligjencën emocionale dhe sociale – pra, aftësinë për të dalluar emocionet e të tjerëve, por edhe për të kontrolluar reagimet e veta në marrëdhënie me njerëzit.

Kjo do të thotë se ata nuk reagojnë impulsivisht, as vetëm mbi bazën e instinktit, por analizojnë situatën përpara se të nxjerrin përfundime.

Nuk panikosen dhe nuk reagojnë menjëherë

Një nga shenjat më tipike të njerëzve inteligjentë kur përballen me një gënjeshtër është se nuk akuzojnë menjëherë dhe nuk e mbyllin bisedën pa prova. Përkundrazi, ata:

• ruajnë qetësinë dhe nuk e ndërpresin menjëherë personin,
• dëgjojnë me kujdes gjithçka që thuhet,
• i kushtojnë vëmendje kontekstit, jo vetëm miteve të zakonshme, si ideja se “njerëzit që shmangin kontaktin me sy gënjejnë”.

Ekspertët theksojnë se ky është një nga mitet më të përhapura në psikologji: njerëzit që shmangin kontaktin me sy nuk gënjejnë domosdoshmërisht, ata mund të jenë nervozë, të turpshëm ose nën stres.

Kjo qasje e qetë dhe e menduar tregon aftësinë për të ndarë emocionet nga faktet, transmeton Telegrafi.

Kërkojnë shenja të holla, jo reagime sipërfaqësore

Njerëzit me inteligjencë më të zhvilluar nuk mjaftohen vetëm me gjuhën e trupit apo me gjeste të ngadalta. Ata i kushtojnë vëmendje asaj çfarë thuhet dhe si ndërtohet rrëfimi.

Psikologët theksojnë se çelësi shpesh qëndron te dinamika e të folurit: duhet vëzhguar hezitimi, vonesa midis pyetjes dhe përgjigjes, si dhe mungesa e detajeve konkrete.

Me fjalë të tjera, një përgjigje e sinqertë zakonisht vjen shpejt dhe natyrshëm, ndërsa një gënjeshtër kërkon më shumë përpjekje mendore për të tingëlluar bindëse.

Inteligjentët i dallojnë motivet, jo vetëm fjalët

Sigurisht, aftësia për të zbuluar gënjeshtrën nuk është universale, madje as te njerëzit shumë të aftë në marrëdhënie shoqërore. Në disa raste, empatia e lartë mund ta vështirësojë zbulimin e gënjeshtrës, sepse njerëzit empatikë priren t’u besojnë të tjerëve.

Megjithatë, ajo që e dallon reagimin inteligjent është kombinimi i mendimit kritik dhe kontrollit emocional. Në vend që të gjykojnë menjëherë, këta njerëz bëjnë pyetje, vlerësojnë motivet dhe mbledhin informacion përpara se të nxjerrin përfundimin se janë mashtruar.

Ata nuk gjykojnë shpejt – por veprojnë me mend

Në praktikë, kjo do të thotë se kur një person inteligjent përballet me një gënjeshtër, ai nuk do:

• të kthehet menjëherë me akuza,
• të tërhiqet në mënyrë dramatike,
• ose të lejojë që zemërimi ta marrë situatën në dorë.

Përkundrazi, ai zakonisht do:

• të qëndrojë i qetë dhe të vëzhgojë sjelljen e personit që gënjen,
• të përpiqet të kuptojë pse është shfaqur gënjeshtra,
• ta orientojë bisedën drejt fakteve dhe logjikës dhe vetëm atëherë të formojë reagimin e tij.

Ky qëndrim i menduar jo vetëm që ndihmon në zbulimin më të saktë të gënjeshtrës sesa reagimet impulsive, por tregon edhe pjekuri emocionale dhe kuptim të thellë të njerëzve – dy nga shtyllat kryesore të inteligjencës së vërtetë. /Telegrafi/

Real Madridi ka shënuar fitore me rezultat 2-0 në shtëpi ndaj Levantes në kuadër të javës së 20-të në elitën e futbollit spanjoll.

Kjo ndeshje u përcoll me një atmosferë tejet armiqësore për lojtarët e ‘Los Blancos’, pas fishkëllimave të shumta nga tifozët në stadium.

Disfata në finale e Superkupës së Spanjës ndaj Barcelonës dhe eliminimi nga Kupa e Mbretit bëri që tifozët të shpërthejnë në protesta.

Të gjithë lojtarët e Real Madridit u fishkëllyen nga tifozët në përjashtim të Mbappes ku cak i tyre kryesor u duk se ishte Jude Bellingham dhe Vinicius Junior.

Megjithatë, kjo nuk mjaftoi pasi një pjesë e konsiderueshme e stadiumit nisi të kërkojë edhe dorëheqjen e Florentino Perez.

Brohoritja zgjati pak, por ishte qartësisht e dëgjueshme dhe aspak e izoluar, pasi shumë tifozë iu bashkuan.

Pas përfundimit të pjesës së parë, teksa skuadrat po drejtoheshin drejt tunelit, thirrjet kundër presidentit të Real Madridit u rikthyen, kësaj here me dukshëm më shumë zëra sesa në minutën e pestë./Telegrafi/

Real Madridi ka shënuar fitore me rezultat 2-0 në shtëpi ndaj Levantes në kuadër të javës së 20-të në elitën e futbollit spanjoll.

Pjesa e parë u karakterizua nga lojë e kujdesshme dhe ndërhyrje të forta, me të dyja skuadrat që patën vështirësi të krijonin raste të pastra. Levante rrezikoi në minutën e 42-të, kur Pablo Martinez ekzekutoi një goditje të rrezikshme nga distanca, por topi kaloi shumë pranë shtyllës së djathtë.

Në pjesën e dytë, Real Madridi rriti presionin dhe në minutën e 56-të fitoi një penallti, pas një ndërhyrjeje të palejuar nga Dela.

Vendimi u konfirmua edhe pas rishikimit nga VAR-i, ndërsa Kylian Mbappé u tregua i saktë nga pika e bardhë në minutën e 58-të, duke mposhtur portierin Matheë Ryan për rezultatin 1-0.

Pas golit, madrilenët vazhduan të dominojnë dhe në minutën e 65-të dyfishuan epërsinë. Pas një goditjeje këndi të ekzekutuar në mënyrë perfekte nga Arda Guler, Raul Asencio u ngrit më lart se të gjithë në zonë dhe me kokë e dërgoi topin në rrjetë për 2-0.

Real Madridi ishte pranë golit të tretë në disa raste. Në minutën e 76-të, Franco Mastantuono goditi fuqishëm nga distanca, por topi u ndal nga traversa.

Vetëm dy minuta më pas, Jude Bellingham ishte shumë pranë golit, por portieri Matheë Ryan bëri një pritje spektakolare ndaj goditjes me kokë të anglezit.

Edhe Levante pati momentet e saj, me Ivan Romero që në minutën e 71-të lëshoi një goditje të rrezikshme nga skaji i zonës, por topi kaloi pak mbi traversë.

Në fund, Real Madridi menaxhoi qetësisht avantazhin dhe siguroi fitoren 2-0, duke treguar efikasitet në momentet vendimtare dhe kontroll të plotë në pjesën e dytë./Telegrafi/

Franca po shqetësohet gjithnjë e më shumë për shkak të rritjes së shpejtë të kapaciteteve ushtarake të Gjermanisë, nga frika se kjo mund të ndryshojë jo vetëm ekuilibrin strategjik dhe politik brenda Evropës, por edhe të dobësojë ndikimin tradicional të Parisit në kontinent evropian.

Sipas një raporti të Bloomberg, zyrtarët francezë po ndjekin nga afër atë që është përshkruar si një nismë “historike” e riarmatimit të Gjermanisë, me një përzierje admirimi dhe shqetësimi.

Gjatë dy viteve të fundit, Berlini ka ndërmarrë një forcim të paparë të mbrojtjes, shkaku i luftës në Ukrainë, Zeitenwende, ose “pikës së kthesës”. Gjermania planifikon të shpenzojë mbi 500 miliardë euro për mbrojtje deri në vitin 2029.

Vetëm për vitin 2026, buxheti i saj ushtarak pritet të arrijë rreth 127 miliardë dollarë, duke e bërë një nga shpenzuesit më të mëdhenj të mbrojtjes në nivel global.

Në të njëjtën kohë, Gjermania ka lehtësuar kufijtë kushtetues të huamarrjes, duke i mundësuar të financojë riarmatim me një ritëm që shumë vende evropiane, të kufizuara nga borxhi dhe rregullat fiskale, nuk mund ta arrijnë.

Ndërsa aleatët e NATO-s kanë mirëpritur gjerësisht rikthimin e fokusit të Gjermanisë te mbrojtja, atmosfera në Paris është më e ndërlikuar, transmeton Telegrafi.

Franca prej kohësh i ka kërkuar Gjermanisë të marrë më shumë përgjegjësi për sigurinë e Evropës.

Megjithatë, zyrtarët francezë tani shqetësohen se shkalla dhe shpejtësia e veprimeve të Berlinit mund ta lënë Francën strategjikisht pas. Katër zyrtarë të lartë francezë i thanë Bloomberg se ekziston një “shqetësim i përgjithshëm” lidhur me fuqinë në rritje ushtarake të Gjermanisë dhe ndikimin politik që vjen me të.

Ky shqetësim u shpreh edhe nga ligjvënësi francez François-Xavier Bellamy, i cili paralajmëroi se Franca rrezikon të mbetet pas. “Franca është në një situatë të brishtë, dhe fakti që Gjermania po angazhohet me një vendosmëri të tillë sigurisht krijon një dinamikë që mund të na lërë anash”, tha ai.

Për më tepër, janë shfaqur tensione në disa projekte kyçe të mbrojtjes evropiane. Franca ka shprehur zhgënjim ndaj Iniciativës së Gjermanisë për Mburojat e Qiellit Evropian, një plan mbrojtjeje nga raketat që mbështetet shumë në sistemet amerikane dhe izraelite, dhe i cili u prezantua pa një përfshirje të fortë franceze. Parisi e sheh këtë iniciativë si një minimizim të përpjekjeve për të ndërtuar një arkitekturë më autonome të mbrojtjes evropiane.

Përveç kësaj, vendimi i Gjermanisë për të blerë aeroplanë luftarakë F-35 të prodhuar në SHBA, në vend të alternativave evropiane, ka tensionuar më tej marrëdhëniet.

Franca ka ngritur gjithashtu shqetësime për të ardhmen e Sistemit të Ajrit të Luftimit të Ardhshëm Franko-Gjermano-Spanjoll (FCAS), një projekt i gjeneratës së gjashtë.

Mosmarrëveshjet e zgjatura midis kompanive franceze dhe gjermane mbi ndarjen e punës dhe lidershipin vazhdojnë të rrezikojnë vonesa dhe tejkalime të kostove.

Politika e brendshme në Gjermani shton një shtresë tjetër shqetësimi. Partia e ekstremit të djathtë dhe euroskeptike Alternativa për Gjermaninë (AfD) ka një mbështetje prej rreth 26 për qind në sondazhet e INSA-s në dhjetor. Edhe pse partia mbetet jashtë pushtetit, rritja e saj ka shqetësuar aleatët gjermanë dhe fqinjët, duke pasur parasysh qëndrimin e saj kritik ndaj BE-së dhe NATO-s.

Ndërkohë, Rusia ka reaguar ashpër ndaj riarmatimit të Gjermanisë. Zëdhënësi i Kremlinit, Dmitry Peskov, akuzoi Berlinin se po lëviz “në rrugën e konfrontimit” dhe paralajmëroi se Gjermania “po bëhet përsëri e rrezikshme”.

Moska gjithashtu i ka hedhur poshtë pretendimet perëndimore se Rusia synon të sulmojë NATO-n si “marrëzi”, duke argumentuar se narrativë e tillë përdoret për të justifikuar shpenzimet ushtarake masive në të gjithë Evropën.

Pavarësisht këtyre tensioneve, analistët vërejnë se përforcimi i Gjermanisë pasqyron ndryshime më të gjera në mjedisin e sigurisë së Evropës pas luftës së Rusisë në Ukrainë.

Megjithatë, sfida për Evropën do të jetë menaxhimi i këtij transformimi pa thelluar rivalitetet e brendshme. Ndërsa Gjermania ripohon veten ushtarakisht, Franca përballet me detyrën e ripërcaktimit të rolit të saj në një peizazh mbrojtës evropian që ndryshon me shpejtësi. /Telegrafi/

Talenti 18-vjeçar i Barcelonës, Dro Fernandez pritet të nënshkruaj me Paris Saint-Germain pasi ka vendosur të shfrytëzoj klauzolën e lirimit.

Gazetari Loic Tanzi mbështet më tej raportet për transferimin e afërt të mesfushorit të Barcelonës, Dro Fernandez, te Paris Saint-Germain.

Sipas tij, mesfushori 18-vjeçar do të nënshkruajë një kontratë me gjigantët francezë deri në vitin 2030.

Pavarësisht interesit nga gjigantët evropianë si Manchester City, Borussia Dortmund dhe Chelsea, PSG është favorit për të siguruar nënshkrimin e spanjollit, pasi thuhet se ka arritur një marrëveshje në parim me të.

Paris Saint-Germain do të duhet të shfrytëzojë klauzolën e lirimit prej 6 milionë eurosh. /Telegrafi/

Deklaratat e Arben Taravarit dhe bashkëpartiakut të tij, Isen Shabanit, për dështimin e censusit në Gostivar dhe Vrapçisht janë hipokrizi e pastër dhe tentativë për të fshehur fajtorin e vërtetë, Bashkimin Demokratik për Integrim dhe kryetarin e saj, Ali Ahmetin.
Të flasësh sot për “lista të papastruara” dhe për “5–6 mijë të vdekur në lista zgjedhore”, ndërkohë që BDI për 20 vite ka fituar zgjedhje pikërisht me këto lista, është mashtrim i qëllimshëm i opinionit. Nëse listat janë problem, atëherë fajin ta kërkojnë te partneri i tyre politik, BDI-ja, e cila kurrë nuk kishte interes t’i pastronte.Por problemi është edhe më i thellë dhe më i rrezikshëm.
Pas regjistrimit të fundit të popullsisë, BDI e ndau popullatën në rezidentë dhe jorezidentë, duke zhvlerësuar numrat realë të shqiptarëve dhe duke nxjerrë jashtë loje qindra mijë bashkatdhetarë nga diaspora. Ishte pikërisht BDI ajo që propozoi dhe votoi metodologjinë skandaloze të regjistrimit, e cila goditi drejtpërdrejt përfaqësimin e shqiptarëve në institucione.
Sot, Taravari dhe Isen Shabani po shkojnë edhe një hap më tej: pas përjashtimit të diasporës nga regjistrimi real, tani duan ta heqin edhe nga lista e votuesve. Kjo është vazhdimësi e së njëjtës politikë antishqiptare, e paketuar me retorikë të rreme për “pastrim listash”.
VLEN e bëri të qartë në takimin e fundit të liderëve:Diaspora nuk është problem, diaspora është zgjidhje.Përjashtimi i saj nga votimi është grusht ndaj demokracisë dhe vullnetit të shqiptarëve, kudo që jetojnë.
Censusi nuk u arrit sepse BDI për dy dekada i detyroi qytetarët të largohen nga vendi, me korrupsion, kapje institucionesh dhe politikë të mbyllur klanore. Sot, të njëjtët njerëz kanë paturpësinë ta përdorin mërgimin si alibi për dështimet e tyre.
Problemi nuk ra nga qielli, por BDI e krijoi atë, Taravari e mbron këtë problem, ndërsa neve si VLEN na mbet që ti rregullojmë gabimet e tyre.

Chelsea raportohet se është gati ta mbështesë trajnerin e ri, Liam Rosenior, duke realizuar deri në tre përforcime gjatë afatit kalimtar të janarit.

“Blutë” synojnë të forcohen në disa reparte, si një shenjë e qartë mbështetjeje për trajnerin e tyre, i cili këtë muaj zëvendësoi Enzo Marescan në stolin e Stamford Bridge.

Sipas një raporti nga The Telegraph, Chelsea dëshiron t’i japë Roseniorit mjetet e nevojshme për ta riformuar skuadrën sipas vizionit të tij.

Thuhet se klubi nga perëndimi i Londrës po i jep përparësi transferimit të një mbrojtësi qendror, diçka që ishte planifikuar edhe nën drejtimin e Marescas, por Chelsea humbi garën ndaj Real Madridit për nënshkrimin e Dean Huijsen verën e kaluar.

Chelsea besohet gjithashtu se po monitoron objektiva në mesfushë dhe në sulm në prag të afatit kalimtar veror, megjithatë bashkëpronarët Todd Boehly dhe Clearlake Capital janë të gatshëm të veprojnë edhe në tregun e dimrit, nëse paraqiten mundësitë e duhura.

Një nga lojtarët që Chelsea po e ndjek me vëmendje të veçantë është mbrojtësi shumë i vlerësuar i Rennes, Jeremy Jacquet.

Gazetari italian Fabrizio Romano raporton se dy klubet kanë zhvilluar bisedime gjatë 24 orëve të fundit.

Ndërsa Jacquet mbetet objektivi kryesor i Chelseat për përforcimin e mbrojtjes, Daily Mail shkruan se klubi ka përgatitur edhe një listë alternative në rast se nuk arrihet marrëveshje me Rennes këtë muaj.

Sipas raportit, Chelsea është gjithashtu admirues i Jacobo Ramon, 21 vjeç, i cili aktualisht luan për Como të drejtuar nga Cesc Fabregas në Serie A, si dhe i mbrojtësit të Bournemouth, Marcos Senesi, 28 vjeç, i cili mund të jetë i disponueshëm për një çmim të ulët për shkak se kontrata e tij skadon në verë./Telegrafi/

Limuzina Honda 0 Series nuk do të dalë në treg këtë vit dhe është shtyrë për vitin 2027, është konfirmuar nga kompania japoneze.

Honda fillimisht kishte njoftuar se do të prezantonte këtë vit tre modele mbi platformën e re Series 0: Acura RSX, Honda 0 Series SUV dhe Honda 0 Series Saloon.

Dy prej tyre janë në rrugë, por pas një viti ndryshimesh rregullatore, doganash dhe heqjes së kredive tatimore, Honda ka shtyrë pak kalendarin.

- YouTube www.youtube.com

RSX do të dalë i pari, në “gjysmën e dytë të vitit 2026”, tha për gazetarët Jessica Fini, ndihmëse e zv/presidentit për komunikim në American Honda.

Më pas, më vonë gjatë vitit do të vijë Honda 0 Series SUV, ndërsa limuzina është “shtyrë për vitin 2027”.

Ajo shtoi se Honda kishte ndarë lajmin për këtë vonesë me gazetarët gjatë panairit të mobilitetit në Japoni, por lajmi nuk u shpërnda gjerësisht.

Faqja fillestare e Honda-s për 0 Series ende tregon se “modelet e prodhimit” SUV dhe limuzina do të dalin në 2026, kështu që kompania nuk ka publikuar zyrtarisht informacionin për këtë vonesë. /Telegrafi/

Manchester Unitedi ka fituar me rezultat 2-0 ndeshjen derbi ndaj Manchester Cityt në kuadër të javës së 22-të të Ligës Premier.

Micheal Carrick ka vazhduar me rezultate pozitive që nga marrja e përkohshme e drejtimit të skuadrës pas shkarkimit të Ruben Amorim.

Pjesa e parë e ndeshjes u karakterizua me lojë më të mirë të vendasve, të cilët arritën të krijojnë edhe shumë raste për gol dhe ta gjejnë rrjetën në dy raste.

Megjithatë, goli i Amad Diallo (34’) dhe ai i Bruno Fernandes (41’) u anuluan të dytë shkaku i pozitave jashtë loje duke shkuar në pushim me rezultat të barabartë 0-0.

Në pjesën e dytë, Unitedi vazhdoi me lojë më të mirë, por kësaj radhe edhe më konkrete pasi përveç rasteve, arritën të shënojnë edhe tre gola të rregullt.

Goli i parë i ndeshjes erdhi në minutën e 65-të me anë të Bryan Mbeumos, i cili shënoi për 1-0, ndërsa Patrick Dorgu (76’) shënoi për epërsinë 2-0.

Unitedi shënoi edhe me Mason Mount (90+2), por edhe ky gol ishte i parregullt shkaku i pozitës jashtë loje dhe ndeshja u mbyll me fitoren 2-0 të Djajve të Kuq.

Pas kësaj fitore, United ngjitet në pozitën e katërt me 35 pikë, ndërsa City mbetet i dyti me 43 pikë.

Në ndeshjen e ardhshme, Qytetarët e presin Wolverhamptonin, teksa Djajtë e Kuq udhëtojnë te Arsenali. /Telegrafi/

Prej fillimit të protestave në Iran, regjimi ka nisur një shtypje brutale ndaj demonstruesve, duke përdorur snajperë, armë zjarri, plumba metalikë, gaz lotsjellës dhe ndërhyje të dhunshme, për të shpërndarë turmat paqësore dhe për të frikësuar qytetarët që kërkojnë ndryshim demokratik. Arrestimet masive dhe dhuna sistematike ndaj protestuesve kanë shënuar një nga periudhat më të ashpra të represionit në dekada në Iran.

Së fundi janë shfaqur shumë video të të vdekurve në qeze të zeza të najlonit. Një skenë e tillë është edhe e një nëne iraniane, e cila shihet teksa rënkon mbi trupin e të birit të saj të vrarë.

Ai u ekzekutua nga regjimi islamik ndërsa dilte në rrugë, duke kërkuar liri dhe drejtësi për një Iran të lirë, vetëm për të përballuar urrejtjen dhe dhunën e autoriteteve.

Organizata të të drejtave të njeriut dhe agjenci për mbikëqyrje të krimeve tregojnë se numri i të vrarëve është shumë i lartë dhe vazhdon të rritet. Sipas disa vlerësimeve të pavarura dhe të grupimeve aktiviste, mijëra njerëz janë vrarë në dhunën shtetërore që ka shpërthyer përtej kryeqytetit dhe në qytete të tjera.

Agjencia e të drejtave të njeriut HRANA raporton se më shumë se 3000 persona janë vrarë deri më tani, përfshirë mijëra protestues që dolën në rrugë kundër regjimit.

Vlerësime të tjera, përfshirë disa burime brenda Iranit, flasin për shifra shumë më të larta, deri në dhjetëra mijëra viktima, megjithëse këto shifra janë të vështira për t’u verifikuar për shkak të bllokimit të komunikimit nga autoritetet.

Gjatë këtij shtypje brutale, autoritetet vendosën edhe bllokimin e internetit dhe komunikimit, duke e bërë të vështirë dokumentimin e ngjarjeve dhe raportimin e vërtetë të viktimave dhe arrestimeve dhe duke penguar komunitetin ndërkombëtar të marrë informacion të drejtpërdrejtë.

Ndërkohë media ndërkombëtare dhe organizatat për të drejtat e njeriut po ndjekin me shqetësim zhvillimet, duke bërë thirrje për respektim të të drejtave themelore dhe për një hetim të pavarur ndërkombëtar mbi përdorimin e dhunës ndaj protestuesve. /Telegrafi/

Magjistre e stomatologjisë, modele dhe nënë e tre djemve, ajo është dashuria e parë e Lionel Messit dhe shtylla emocionale e familjes që qëndron pas një prej historive më të bukura të futbollit botëror

Antonela Roccuzzo, bashkëshortja e Lionel Messit, shpesh përshkruhet si një nga gratë më të arsimuara dhe më të bukura në botën e sportit. Ajo është rritur në Rosario, qytetin e tretë më të madh të Argjentinës, pikërisht në të njëjtën lagje ku Lionel Messi kaloi fëmijërinë e tij. Historia e tyre është shumë më tepër sesa një përrallë dashurie, është një tregim për miqësinë, dashurinë që zgjat me dekada dhe mbështetjen e ndërsjellë.

Antonela dhe Messi njihen që nga fëmijëria, ndërsa rrugët e tyre u kryqëzuan përmes mikut të Messit, Lucas Scaglia, i cili ishte edhe kushëriri i Antonelës dhe luante me Messin në ekipet e reja të Newell’s Old Boys. Thuhet se që në fillim ata ishin miq shumë të afërt, ndërsa dashuria u zhvillua natyrshëm, hap pas hapi, teksa rriteshin së bashku në qytetin e tyre të lindjes. Miqtë e familjes shpesh tregojnë se lidhja e tyre ka qenë gjithmonë e qetë, larg skandaleve dhe vëmendjes së panevojshme publike, transmeton Telegrafi.

Dashuri që zgjat me dekada

Çifti e bëri publike lidhjen e tyre për herë të parë në vitin 2009, pas ndeshjes Barcelona – Espanyol, kur u shfaqën së bashku në një festival në Sitges. Vite më vonë, në intervista të ndryshme, ata kanë treguar se ndjenjat e tyre u ndërtuan ngadalë, mbi themelet e miqësisë dhe respektit të ndërsjellë.

Në vitin 2017, Lionel Messi dhe Antonela Roccuzzo u martuan në një ceremoni madhështore në Rosario, e cila nga mediat u quajt “dasma argjentinase e shekullit”. Mes të ftuarve ishin shumë yje të njohur botërorë, përfshirë Shakirën dhe Gerard Piqué, ish-bashkëlojtarin e Messit. Sot, çifti ka tre djem: Thiago (lindur më 2012), Mateo (2015) dhe Ciro (2018). Të tre djemtë duket se e kanë trashëguar pasionin për futbollin nga i ati, ndërsa më i madhi, Thiago, tashmë stërvitet me ekipet e reja të Inter Miami. Ata që i njohin nga afër tregojnë se Thiago është më i qetë dhe i matur, Mateo më energjiku dhe shakaxhiu i familjes, ndërsa Ciro është “i vogli i përkëdhelur”, që sjell gjithmonë gjallëri në shtëpi.

gettyimages

Antonela është e njohur për përkushtimin e saj të jashtëzakonshëm ndaj rolit të nënës dhe shpesh ka theksuar se prioriteti i saj absolut janë fëmijët. Ajo dhe Messi përpiqen t’u ofrojnë atyre një fëmijëri sa më normale, larg presionit të famës dhe kamerave, duke ruajtur një stil jetese të thjeshtë dhe familjar, pavarësisht pasurisë dhe statusit që kanë.

Antonela Roccuzzo – e arsimuar, e suksesshme dhe e përkushtuar

Antonela nuk është vetëm partnerja e një legjende të futbollit, ajo është edhe një grua shumë e arsimuar. Pas përfundimit të studimeve bazë në fushën e shkencave humane dhe shoqërore, ajo vendosi të vazhdojë studimet pasuniversitare në stomatologji dhe u diplomua si magjistre e stomatologjisë.

Edhe pse në një moment vendosi t’i vërë ambiciet akademike në plan të dytë për të qenë pranë Messit, Antonela arriti të ndërthurë jetën profesionale me atë familjare. Ajo u shpërngul nga Argjentina në Barcelonë, ku ishte pranë Lionel Messit gjatë viteve të tij më të suksesshme, por njëkohësisht ndërtoi edhe profilin e saj profesional dhe publik. Për shumë vite ajo ka refuzuar ta përdorë famën e bashkëshortit për publicitet personal, duke pranuar vetëm më vonë bashkëpunime të zgjedhura me marka të mëdha ndërkombëtare.

Modele, influencuese dhe entuziaste e fitness-it

Antonela është gjithashtu një modele e njohur, që ka bashkëpunuar me shumë marka të mëdha ndërkombëtare. Në Instagram ajo numëron mbi 40 milionë ndjekës, ndërsa popullariteti i saj nuk lidhet vetëm me pamjen, por edhe me stilin e shëndetshëm të jetesës dhe përkushtimin ndaj aktivitetit fizik. Ajo shpesh publikon fotografi nga palestra, shumë herë edhe së bashku me Messin, duke promovuar disiplinën, këmbënguljen dhe kujdesin për trupin.

Miqtë e përshkruajnë si një person shumë të thjeshtë, jo snob, dhe si njeriun që arrin ta mbajë familjen të bashkuar dhe jetën e Messit të balancuar, larg kaosit të famës dhe presionit të vazhdueshëm mediatik.

Krenari dhe mbështetje në sukseset e Messit

Kur Lionel Messi e udhëhoqi Argjentinën drejt titullit të kampionit të botës në vitin 2022 në Katar, Antonela ishte pranë tij, duke e mbështetur nga tribunat. Pas finales dramatike kundër Francës, që përfundoi 3-3 dhe më pas me fitoren e Argjentinës 4-2 me penallti, Antonela i dërgoi një mesazh emocional bashkëshortit të saj, duke theksuar këmbënguljen, përpjekjen dhe luftën e tij frymëzuese deri në fund.

Për Antonelën, suksesi i Messit nuk është vetëm një fitore sportive, është dëshmi e mbështetjes së ndërsjellë, e dashurisë dhe e forcës për t’i kapërcyer së bashku të gjitha sfidat e jetës. Miqtë e çiftit shpesh thonë se Messi e konsideron Antonelën personin e vetëm që e qetëson vërtet para ndeshjeve të mëdha dhe vendimeve të rëndësishme.

Kombinimi perfekt i bukurisë, inteligjencës dhe dashurisë

Sot, Antonela është shumë më tepër sesa “gruaja e një legjende të futbollit”, ajo është simbol i gruas moderne që arrin të balancojë familjen, karrierën dhe jetën publike. Historia e saj tregon se është e mundur të bashkohen arsimi, disiplina personale, familja dhe dashuria, dhe se mbështetja e vërtetë mund t’i bëjë edhe ëndrrat më të mëdha të realizueshme. /Telegrafi/