Cilësia e ajrit në New Delhi ra në nivele të rrezikshme, teksa smogu më i dendur i sezonit mbuloi qytetin, duke i shtyrë autoritetet të aktivizojnë masat emergjente më të rrepta deri më tani.

Sipas Bordit Qendror të Kontrollit të Ndotjes, Indeksi i Cilësisë së Ajrit (AQI) në kryeqytetin indian arriti nivelin ekstrem prej 491 nga 500 që të dielën në mëngjes. Ky nivel shënoi një rritje të fortë krahasuar me vlerën e mbrëmjes së së shtunës prej 441.

Në përgjigje, Komisioni për Menaxhimin e Cilësisë së Ajrit aktivizoi fazën IV të planit të ndërhyrjes, niveli më i lartë i ndërhyrjes.

Masat që hynë në fuqi sot herët përfshijnë detyrimin që 50 për qind e stafit të zyrave qeveritare dhe private të punojë nga shtëpia, si dhe ndalimin e furnizimit me karburant për çdo automjet që nuk ka certifikatë të vlefshme ndotjeje.

Plani emergjent gjithashtu kufizoi hyrjen e kamionëve të vjetër me naftë, pezulloi të gjitha projektet e ndërtimit jo thelbësore dhe i kaloi shkollat në një model të kombinuar mësimi.

Autoritetet thanë se lagështia e lartë dhe ndryshimi i modeleve të erës kanë penguar shpërndarjen e ndotësve, duke krijuar një shtresë të qëndrueshme ajri toksik mbi zonën metropolitane.

Ylli i futbollit Lionel Messi, zbarkoi në Delhi në etapën e tij të katërt dhe të fundit në Indi. Pas kaosit që shkaktoi vizita e tij në Kalkuta, ku tifozët tentuan të pushton fushën, këtë herë forcat e rendit dhe organizatorët kishin marrë masa duke shmangur çdo incident të mundshëm.

Vizita e Messi-t në Indi po bën shumë zhurmë, ndërsa lajmet që vijnë janë nga më të çuditshmet.

Së fundmi, sipas mediave lokale, stafi i Leo Messit, ka planifikuar edhe takime private mes Messit dhe personazheve VIP në Indi.

Gjithnjë sipas mediave, një takim kokë më kokë me legjendën argjentinase kushton afro 93 mijë euro.

The post 93 mijë euro për një takim privat, Lionel Messi u vendos “gjobë” VIP-ave në Indi appeared first on Albeu.com.

Pamje tronditëse po bëhen publike nga momentet kur shpërtheu zjarri në një klub nate në Indi. Njëzet e pesë persona, mes tyre edhe turistë, humbën jetën kur klubi u përfshi nga flakët.

Zjarri shpërtheu pas mesnatës së së shtunës drejt të dielës në një klub që ishte pjesë e një hoteli në Arpora, në rajonin North Goa, sipas policisë dhe agjencisë së lajmeve Press Trust of India.

Lajmi u konfirmua nga kreu i qeverisë së shtetit, Pramod Sawant, dhe zyrtarë të tjerë lokalë.

Mes viktimave kishte “tre deri në katër” turistë, tha Sawant për PTI. Ende nuk është sqaruar nëse mes tyre kishte të huaj dhe cilat ishin kombësitë e tyre.
Kryeministri i shtetit deklaroi se ka urdhëruar nisjen e një hetimi për të përcaktuar shkaqet e tragjedisë dhe për të verifikuar nëse ishin respektuar rregullat e sigurisë kundër zjarrit dhe kodet e ndërtimit.
“Përgjegjësit do të përballen me pasojat më të rënda ligjore. Çdo neglizhencë do të trajtohet me ashpërsi”, theksoi ai. Tre persona humbën jetën nga djegiet, ndërsa të tjerët nga asfiksia, sipas Sawant.

Pamjet e PTI tregojnë ekipet e shpëtimit që nxjerrin të plagosur ose të vdekur nëpërmjet barelave, duke zbritur një shkallë të ngushtë prej guri gjatë natës drejt klubit “Birch”, ku ishin mbledhur policë, ekipe ndihme dhe qytetarë.

Në pamje më të gjera duken re tymi që ngrihen mbi vendin e tragjedisë.

Për shefin e qeverisë lokale, “ky aksident tragjik nuk duhej të kishte ndodhur kurrë”, pasi “lokali funksiononte pa licencë” dhe “pikërisht kjo pakujdesi shkaktoi zjarrin”.

Sipas raportimeve të Indian Express dhe mediave të tjera, një nga shkaqet e mundshme ishte shpërthimi i një bombole gazi të përdorur në kuzhinë. Por shefi i zjarrfikësve në Goa, Nitin V. Raitkar, deklaroi për CNN News18 se “shumica e njerëzve vdiqën nga asfiksia në bodrum dhe kuzhinë”, pasi “një shfaqje me fishekzjarre i vuri flakën pjesëve prej druri të lokalit duke e mbushur atë me tym”.

Goa priti mbi dhjetë milionë turistë në vitin 2024, mes tyre rreth 470 mijë të huaj, sipas të dhënave zyrtare. Zjarret në Indi janë të shpeshta, pasi infrastruktura është shpesh në gjendje të keqe dhe rregullat e sigurisë zbatohen me përjashtime

The post Tragjedi në Indi, 26 persona humbin jetën pas një zjarri në një klub nate appeared first on Albeu.com.

Një zjarr i fuqishëm në një klub nate shumë të frekuentuar në rajonin bregdetar të Goa-s, Indi, ka shkaktuar vdekjen e 25 personave, sipas autoriteteve lokale.

Shumica e viktimave dyshohet të jenë punonjës të klubit në zonën Arpora, në Goa-n e Veriut, ndërsa mes të vdekurve ka edhe turistë, raporton BBC.

At least 23 people killed in #nightclub fire in #India’s #Goa https://t.co/hUQnMXnRAJ
Several tourists were among the dead in the fire, which broke out at about midnight at a club in #Arpora in the North Goa district, according to officials cited by the Press Trust of India.… pic.twitter.com/c0FgNp9HFC

— ⚡️🌎 World News 🌐⚡️ (@ferozwala) December 6, 2025

Sipas hetimeve paraprake, zjarri nisi pasi një bombol gazi shpërtheu në kuzhinën e klubit, duke shkaktuar përhapjen e menjëhershme të flakëve rreth mesnatës së së shtunës.

Autoritetet te dielën në mëngjes konfirmuan se numri i viktimave u rrit nga 23 në 25, ndërsa gjashtë persona të tjerë po trajtohen në spital dhe ndodhen në gjendje të qëndrueshme.

Dëshmitarë në vendngjarje përshkruan skena paniku në zonën e njohur për jetën e gjallë të natës.

“Zjarri ishte përqendruar kryesisht në zonën e kuzhinës në katin përdhes”, tha Alok Kumar, Drejtori i Përgjithshëm i Policisë së Goa-s.

“Zjarri shpërtheu rreth mesnatës dhe tashmë është vënë nën kontroll”, shtoi ai.

Sipas tij, shumica e trupave u gjetën pranë kuzhinës, ç`ka përforcon dyshimin se viktimat ishin kryesisht punonjës të lokalit.

“Sot është një ditë shumë e trishtueshme për të gjithë ne në Goa. Një zjarr i madh në Arpora ka marrë jetën e 23 personave”, tha Savand.

Tre persona humbën jetën për shkak të djegieve dhe pjesa tjetër nga asfiksia.

Sipas një raporti në gazetën Indian Express, shkaku i mundshëm i zjarrit ishte shpërthimi i një bombole gazi që përdorej në kuzhinë.

Goa – një ish-koloni portugeze, e lagur nga Deti i Omanit, është një magnet për turistët nga e gjithë bota.

Muajt ​​e dimrit zakonisht kanë një kulm në vizita.

The post Tragjedi në Indi/ Shpërthen bombola e gazit, shkrumbohet nga flakët klubi i natës, humbin jetën 25 persona (VIDEO) appeared first on Albeu.com.

NJU DELHI, 5 /ATSH-AA/ – Presidenti i Rusisë, Vladimir Putin tha se Moska dhe New Delhi po punojnë për të rritur tregtinë dypalëshe në 100 miliardë dollarë, pasi xhiroja tregtare dypalëshe ka arritur rekorde.

Duke folur në një konferencë për media në New Delhi pas një takimi me kryeministrin indian, Narendra Modi, Putin tha se vitin e kaluar, qarkullimi tregtar u rrit me 12 për qind, duke vendosur një rekord të ri.

“Shifrat e ndryshme statistikore ndryshojnë pak, por në përgjithësi, ato arrijnë në rreth 64-65 miliardë dollarë. Parashikohet që vëllimi tregtar për këtë vit do të mbetet afërsisht në të njëjtin nivel. Megjithatë, duket e realizueshme për ne që ta çojmë këtë tregues në shifrën 100 miliardë dollarë”, tha ai.

Për të arritur këtë qëllim, është koordinuar një program bashkëpunimi ekonomik ruso-indian deri në vitin 2030, duke përcaktuar standardet për organet ndërqeveritare për të lehtësuar tregtinë, për të çuar përpara projektet e përbashkëta dhe për të forcuar bashkëpunimin teknologjik dhe të investimeve, shpjegoi ai.

Moska dhe New Delhi po punojnë gjithashtu për një marrëveshje për një zonë të tregtisë së lirë midis Indisë dhe Bashkimit Ekonomik Euroaziatik, tha ai.

Mes tarifës prej 50 për qind të Washingtonit mbi importet indiane, pjesërisht për shkak të blerjes së naftës ruse nga India gjatë konfliktit në Ukrainë, Putin tha se Moska është gati të vazhdojë të sigurojë furnizime të pandërprera me karburant për Indinë.

Ndërkohë, Rusia dhe India po kalojnë vazhdimisht në monedhat kombëtare në pagesat e ndërsjella për të shmangur përdorimin e dollarit si mjet politik, shtoi ai.

Pjesa e rublës dhe rupisë në pagesat dypalëshe është rritur në 96 për qind, vuri në dukje Putin.   /os/

The post FOKUS – Nivel rekord, Rusia dhe India synojnë 100 miliardë dollarë në tregti appeared first on Agjencia Telegrafike Shqiptare.

NJU DELHI, 5 DHJETOR /atsh-aa/ – Presidenti rus Vladimir Putin ka marrë pjesë në ceremoninë presidenciale të mirëseardhjes në kryeqytetin e Indisë, New Delhi, përpara një samiti vjetor dypalësh.

Presidentja e Indisë Droupadi Murmu priti Putinin në shtëpinë presidenciale, së bashku me kryeministrin indian Narendra Modi, për një roje nderi ceremoniale. Putini mbërriti në New Delhi dje për një vizitë shtetërore dy-ditore.

Pas ceremonisë, Putini dhe Modi do të zhvillojnë bisedime dypalëshe dhe do të bashkë-kryesojnë samitin e 23-të vjetor Indi-Rusi. Ata pritet të diskutojnë bashkëpunimin e mbrojtjes, të energjisë dhe atë bërthamore, mekanizmat e pagesave, BRICS dhe Organizatën e Bashkëpunimit të Shangait.

Vizita e Putinit, e para që nga fillimi i luftës Moskë-Kiev në shkurt të vitit 2022, vjen ndërsa New Delhi përballet me presion në rritje nga SHBA-ja për të ndaluar blerjet e naftës ruse. SHBA-ja ka vendosur tarifë prej 50 për qind për importet indiane, pjesërisht për blerjen e naftës ruse gjatë luftës së vazhdueshme.

Putini dhe Modi do të flasin në një forum biznesi ndërsa India dhe Rusia synojnë të rrisin vëllimin aktual të tregtisë dypalëshe prej 68.7 miliardë dollarësh, gati gjashtë herë më i lartë se nivelet para pandemisë, në 100 miliardë dollarë.

Presidenti rus shoqërohet nga një grup i madh biznesmenësh. Putini do të pritet nga homologia e tij indiane Murmu për një darkë presidenciale para largimit të tij nga vendi sot vonë.  /os/

The post NJU DELHI – Putin në vizitë zyrtare në Indi appeared first on Agjencia Telegrafike Shqiptare.

NJU DELHI, 4 dhjetor /ATSH/- Presidenti rus, Vladimir Putin deklaroi sot se negociatat e vazhdueshme me Shtetet e Bashkuara për Ukrainën janë të ndërlikuara dhe për to duhet  angazhim.

Në një intervistë të transmetuar nga një kanal televiziv indian, Putin tha se ”është një detyrë komplekse dhe një mision i vështirë që presidenti Donald Trump i ka vënë vetes”.

“Arritja e një konsensusi mes palëve në konflikt nuk është e lehtë, por unë besoj se presidenti Trump po punon sinqerisht drejt kësaj”, vazhdoi ai, përpara se të shtonte se “mendoj se duhet të angazhohemi në këtë përpjekje në vend që ta pengojmë atë”.

Presidenti rus, Vladimir Putin mbërriti sot në Indi për një vizitë dyditore shtetërore, gjatë së cilës do të zhvillojë bisedime me kryeministrin indian Narendra Modi.

Kjo është vizita e tij e parë në vendin më të populluar në botë që nga pushtimi i plotë i Ukrainës nga Rusia në shkurt 2022.

Sipas raportimeve të medieve që citojnë qeverinë indiane, pas një darke private me Modin menjëherë pas mbërritjes, të dy  liderët do të takohen sërish nesër për samitin e 23-të Indi-Rusi.

Bisedimet pritet të fokusohen në marrëdhëniet dypalëshe, përfshirë tregtinë dhe energjinë.

India është një nga blerëset më të mëdha të naftës ruse./  /Ad.Ab./

The post NJU DELHI – Putin: Bisedimet me SHBA-në për Ukrainën të ndërlikuara appeared first on Agjencia Telegrafike Shqiptare.

NJU DELHI, 4 dhjetor /ATSH-DPA/ – Presidenti rus, Vladimir Putin mbërriti sot në Indi për një vizitë dyditore shtetërore, gjatë së cilës do të zhvillojë bisedime me kryeministrin indian Narendra Modi.

Dy udhëheqësit u panë duke u përqafuar ngrohtësisht në pistën e aeroportit, pasi avioni i Putinit u ul në Nju Delhi, sipas medieve lokale.

Kjo është vizita e tij e parë në vendin më të populluar në botë që nga pushtimi i plotë i Ukrainës nga Rusia në shkurt 2022.

Sipas raportimeve të medieve që citojnë qeverinë indiane, pas një darke private me Modin menjëherë pas mbërritjes, të dy  liderët do të takohen sërish nesër për samitin e 23-të Indi-Rusi.

Bisedimet pritet të fokusohen në marrëdhëniet dypalëshe, përfshirë tregtinë dhe energjinë.

”Të dy palët synojnë të zgjerojnë partneritetin e tyre të veçantë dhe të privilegjuar strategjik”, sipas medieve.

India është një nga blerëset më të mëdha të naftës ruse.

Rusia po përdor një pjesë të të ardhurave nga këto shitje për të financuar luftën në Ukrainë, për të cilën Modi ka kërkuar vazhdimisht t’i jepet fund.

Ndërkohë, Vladimir Putin tha sot se negociatat e vazhdueshme me Shtetet e Bashkuara për Ukrainën janë të ndërlikuara, por duhet të angazhohen në vend që të pengojnë”, në një intervistë të transmetuar nga një kanal televiziv indian.

“Është një detyrë komplekse dhe një mision i vështirë që presidenti Donald Trump i ka vënë vetes”, deklaroi Putin.

“Arritja e një konsensusi mes palëve në konflikt nuk është e lehtë, por unë besoj se presidenti Trump po punon sinqerisht drejt kësaj”, vazhdoi ai, përpara se të shtonte: “Mendoj se duhet të angazhohemi në këtë përpjekje në vend që ta pengojmë atë”. /Ad.Ab./

The post NJU DELHI – Putin mbërrin në Indi, në vizitën e parë që nga pushtimi i Ukrainës appeared first on Agjencia Telegrafike Shqiptare.

Një dasmë madhështore, që tashmë ka bërë xhiron e botës, u zhvillua në qytetin piktoresk të Udaipur në Indi, ku miliarderi Vamsi Ganhirju dhe Netra Madena – vajza e Rama Raju Madena, një figure të njohur në industrinë farmaceutike kurorëzuan dashurinë e tyre në një ceremoni që rivalizon edhe skenat e filmave të Bollywood-it.

Dasma, e mbajtur në një nga pallatet më të famshme të rajonit, i cili njihet edhe si skenografia e filmit të James Bond “Octopussy” (1983), u shndërrua në një spektakël të vërtetë luksi. Sipas “Daily Mail”, kostoja totale kap shifrën e rreth 6.7 milionë dollarëve, një detaj që ka shkaktuar debat të fortë midis banorëve vendas, të cilët kritikojnë shpenzimet marramendëse në një vend ku kontrastet ekonomike janë të theksuara.

Pallati i ndriçuar, dekorimet ekstravagante dhe një tortë gjigante 4.5 metra e lartë e dizajnuar në formën e një pallati ishin vetëm disa prej elementëve që e kthyen festën në një event të paprecedentë. Nëpër rrjetet sociale janë shpërndarë foto dhe video që tregojnë çdo detaj, nga zbukurimet mbresëlënëse te performancat e artistëve botërorë.

E veçanta e kësaj nate ishte prania e yllit ndërkombëtar Jennifer Lopez, e cila performoi hitet e saj të njohura si “Waiting for Tonight” dhe “Get Right”. Këngëtarja, e veshur me krijime të Elie Saab – të njëjtin stilist që kishte veshur edhe nusen “ndezu” skenën mes duartrokitjeve të të ftuarve. Në festë ishte i pranishëm edhe DJ Tiësto, i cili kujdesi për atmosferën e muzikës dhe ndau momente ekskluzive në llogaritë e tij në rrjetet sociale.

Lista e të ftuarve ishte po aq impresionuese: ndër ta, Donald Trump Jr. i shoqëruar nga e dashura e tij Bettina Anderson, së bashku me personalitete të tjera të botës së biznesit dhe politikës.

Megjithëse dasma u vlerësua për shkëlqimin dhe organizimin perfekt, ajo ndezi edhe diskutime për pabarazinë ekonomike dhe shpenzimet e tepruara. Por pa dyshim, mbetet një nga eventet më të komentuara të vitit një përzierje e luksit ekstrem, traditës indiane dhe spektaklit global.

 

View this post on Instagram

 

A post shared by Pinky Reddy (@pinkyreddyofficial)

The post Dasma me 6.7 milionë njerëz në Indi/ Shfaqja e Lopez, torta e famshme 5 metra e lartë dhe të ftuarit e zgjedhur appeared first on iconstyle.al.

UASHINGTON, 20 nëntor /ATSH/- Departamenti Amerikan i Shtetit ka miratuar shitjen e raketave antitank “Javelin” dhe municioneve të artilerisë “Excalibur” me vlerë 93 milionë dollarë për Indinë, sipas “Reuters”.

Sipas Agjencisë Amerikane të Bashkëpunimit për Sigurinë dhe Mbrojtjen (DSCA), India kërkoi deri në 216 predha taktike “Excalibur” dhe 100 njësi raketash antitank “Javelin”.

DSCA tha se shitja do të mbështesë objektivat e politikës së jashtme dhe të sigurisë kombëtare të Shteteve të Bashkuara të Amerikës duke ndihmuar në forcimin e marrëdhënieve strategjike SHBA-Indi.

Gjithashtu, do të rrisë sigurinë e një partneri të madh të mbrojtjes dhe do të promovojë stabilitetin, paqen dhe përparimin ekonomik në rajonet Indo-Paqësore dhe Azinë Jugore.

Kjo shitje shënon blerjen e parë të sistemeve të mbrojtjes nga India – në kuadër të programit të shitjeve ushtarake të Uashingtonit – që nga përshkallëzimi i tensioneve në gusht, kur presidenti Donald Trump dyfishoi tarifat për mallrat indiane në 50% për shkak të blerjeve të naftës ruse nga Nju Delhi.

Këtë muaj, India gjithashtu riporositi motorë avionësh luftarakë nga “General Electric” për avionët e saj luftarakë “Tejas” të prodhuar në vend.

Këto lëvizje tregojnë një normalizim gradual dhe forcim të bashkëpunimit ushtarak SHBA-Indi. //a.i/

The post FOKUS – SHBA miraton shitjen e raketave “Javelin” dhe artilerisë “Excalibur” në Indi appeared first on Agjencia Telegrafike Shqiptare.

Shteti jugor indian i Karnataka-s, i cili është gjithashtu shtëpia e disa prej firmave më të mëdha të IT-së në botë, është bërë i pari në vend që ofron leje menstruale të paguar për të gjitha gratë që punojnë në vende pune formale.

Sipas politikës së re, gratë e moshës 18 deri në 52 vjeç që punojnë në kompani qeveritare dhe private mund të marrin një ditë leje menstruale çdo muaj, e cila nuk mund të mbahet më tej. Nuk kërkohet certifikatë mjekësore për të përfituar nga leja.

Politika mbulon 350,000 deri në 400,000 gra në sektorin formal, megjithëse përjashton një grup shumë më të madh – që vlerësohet të jetë gjashtë milionë – të cilat janë të angazhuara si punëtore shtëpiake, punëtore me pagë ditore dhe punëtore të përkohshme në sektorin e paorganizuar.

Ekspertët thonë se politika duhet të shtrihet në sektorin informal.

Por politika e shtetit për lejen menstruale ende konsiderohet e rëndësishme për shkak se është e para që përfshin sektorin privat, duke u zbatuar për punëtorët pavarësisht nga lloji i punës ose kontrata.

Koncepti i lejes menstruale nuk është i ri. Vende si Spanja, Japonia, Koreja e Jugut dhe Indonezia ofrojnë tashmë leje menstruale. Disa shtete indiane ofrojnë gjithashtu leje menstruale të kufizuar: Bihar dhe Odisha u japin dy ditë në muaj punonjësve të qeverisë, ndërsa Kerala ua ofron atë stafit të universiteteve dhe instituteve të trajnimit industrial.

Por në Indi, masa për t’u dhënë grave një ditë pushim shtesë ngjall debat mbi paragjykimet e mundshme gjinore dhe shqetësimet për barazi.

Të tjerë argumentojnë se është një e drejtë e domosdoshme, që u lejon grave të shmangin humbjen e pagës ose të punojnë për shkak të dhimbjeve të pashmangshme menstruale.

“Ky është një nga vendimet më progresive të politikave për gratë që qeveria po zbaton”, tha për BBC-në Santosh Lad, ministri i punës i Karnataka-s.

The post Shteti i Indisë ofron leje menstruale për të gjitha gratë që punojnë appeared first on iconstyle.al.

NJU DELHI, 10 nëntor /ATSH/- Të paktën 10 persona u vranë sot pas shpërthimit të një automjeti pranë një stacioni metroje në monumentin historik të Fortesës së Kuqe në Nju Delhi, në Indi, sipas CNN.

“Më shumë se 30 persona të tjerë u “plagosën rëndë” gjatë shpërthimit”, tha Dr. Manish Kumar Jha, një mjek në Spitalin lokal Lok Nayak.

“Ndërsa shkaku i shpërthimit nuk dihet ende, aeroportet, stacionet hekurudhore, ndërtesat qeveritare dhe vendet e trashëgimisë në të gjithë vendin janë vënë në gatishmëri të lartë”, sipas Forcës Qendrore të Sigurisë Industriale.

Fortesa e Kuqe, e njohur në Indi si “Lal Qila”, është një fortesë e shekullit XVII e epokës Mughal në qytetin e vjetër dhe të vizituar nga turistët gjatë gjithë vitit.

Para shpërthimit, një automjet “që lëvizte ngadalë” “u ndal” pranë një semafori të kuq rreth orës 18:42 pasdite”, u tha gazetarëve komisioneri i Policisë së Nju Delhit, Satish Golcha.

“Një shpërthim ndodhi në atë automjet. Pasagjerët dhe njerëzit në automjetet përreth u prekën nga zjarri”, tha Golcha. //a.i/

The post NJU DELHI – Të paktën 10 të vdekur pas shpërthimit të një automjeti pranë monumentit historik appeared first on Agjencia Telegrafike Shqiptare.

Një parukiere braziliane, Larissa Nery, e cila ka bërë bujë në Indi këtë javë pasi fotografia e saj u përhap në lajme në një akuzë për mashtrim zgjedhor, i ka thënë BBC-së se fillimisht mendoi se ishte e gjitha një gabim. Ose një shaka. Por më pas rrjetet e saj sociale shpërthyen dhe njerëzit filluan ta etiketonin në Instagram.

“Në fillim ishin disa mesazhe të rastësishme. Mendova se po më ngatërronin me dikë tjetër”, i tha ajo BBC-së. “Pastaj më dërguan videon ku fytyra ime shfaqej në një ekran të madh. Mendova se ishte inteligjencë artificiale ose ndonjë shaka. Por pastaj shumë njerëz filluan të shkëmbenin mesazhe në të njëjtën kohë dhe e kuptova se ishte e vërtetë.”

Nery, e cila jeton në Belo Horizonte, kryeqytetin e shtetit Minas Gerais të Brazilit juglindor, dhe që nuk ka qenë kurrë në Indi, thotë se kërkoi në Google për të kuptuar se çfarë po ndodhte.

Ajo që kishte ndodhur ishte pasoja e një konference për shtyp të udhëheqësit të opozitës indiane, Rahul Gandhi, të mërkurën, ku ai akuzoi partinë BJP të kryeministrit Narendra Modi dhe Komisionin Zgjedhor (KE) për kryerjen e mashtrimit me votat në zgjedhjet e vitit të kaluar në shtetin Haryana. BJP i ka mohuar akuzat.

Disa orë pas konferencës për shtyp, në një postim në X , Kryezyrtari Zgjedhor i Haryanas ndau një letër që ata thanë se ia kishin dërguar Gandhit në gusht, duke i kërkuar atij të nënshkruante një betim me emrat e votuesve të papërshtatshëm “në mënyrë që të mund të fillonin procedurat e nevojshme”. Ata nuk iu përgjigjën akuzave specifike që ai bëri dhe nuk komentuan për rastin e Nery-t. BBC i është drejtuar panelit të zgjedhjeve për përgjigje.

Gandhi ka bërë një sërë akuzash për “vjedhje votash” kundër panelit të votimit që nga fillimi i gushtit.

Në pretendimet e tij të fundit, ai tha se ekipi i tij kishte shqyrtuar të dhënat e listës së votuesve të Komisionit Zgjedhor dhe kishte zbuluar se nga afërsisht 20 milionë votues, 2.5 milionë ishin të regjistruar në mënyrë të parregullt – duke përfshirë dublikatë, votues me shumicë dhe adresa të pavlefshme. Ai fajësoi humbjen e partisë së tij në zgjedhjet e Haryana-s për këtë manipulim të supozuar të listës së votuesve.

Për të vërtetuar pretendimet e tij, ai shfaqi disa diapozitiva në një ekran të madh. Njëra prej tyre tregonte Gandhin në këmbë përpara një imazhi të madh të Nery-t, ndërsa një tjetër tregonte një përmbledhje prej 22 votuesish me emra dhe adresa të ndryshme, por të gjithë me fotot e saj.

“Kush është kjo zonjë? Sa vjeç është? Ajo voton 22 herë në Haryana,” tha Gandi.

Ai shpjegoi se një foto e vetme e një gruaje, e bërë nga fotografi brazilian Matheus Ferrero, ishte përdorur vazhdimisht në regjistrime të shumta votuesish nën emra të ndryshëm. Ai e përshkroi Neryn si një modele që ishte shfaqur në listën e votuesve me shumë emra, duke përfshirë Seema, Sweety dhe Saraswati.

29-vjeçarja i konfirmoi BBC-së se në fotografi ishte vërtet ajo. “Po. Jam unë. Shumë më e re, por jam unë. Unë jam personi në imazhe.”

Ajo sqaroi se ishte parukiere dhe jo modele dhe se fotografia ishte bërë në mars të vitit 2017 kur ishte 21 vjeç, pak jashtë shtëpisë së saj. Fotografi, tha ajo, “mendoi se isha e bukur dhe i kërkoi të më bënte fotografi”.

Tani vite më vonë, e gjithë vëmendja në dy ditët e fundit nga “njerëz nga India, shumë prej tyre gazetarë”, e ka lënë të frikësuar.

“U frikësova. Nuk mund ta kuptoj nëse është e rrezikshme për mua apo nëse të flas për të mund të dëmtojë dikë atje. Nuk e di kush ka të drejtë ose kush jo sepse nuk i njoh palët e përfshira”, tha ajo.

“Nuk shkova në punë në mëngjes sepse nuk munda të shihja as mesazhet nga klientët e mi. Shumë gazetarë më telefononin. Ata gjetën numrin e vendit ku punoj.”

“Më është dashur ta heq emrin e sallonit nga profili im sepse po më shqetësonin në vendin e punës. Shefi im madje më foli. Disa njerëz e trajtojnë si meme, por po më prek profesionalisht.”

Matheus Ferrero, i cili bëri foton e Nery-t, është gjithashtu i tronditur nga vëmendja e papritur. Deri vonë, ai thotë se India nënkuptonte për të vetëm Caminho das Índias – shfaqja braziliane e vitit 2009 në orën kryesore.

Ai ende po përpiqet t’u japë kuptim ngjarjeve të ditëve të fundit në një vend mijëra kilometra larg.

Disa njerëz e kishin kontaktuar nga India një javë më parë, duke e pyetur se kush ishte gruaja në foto, tha ai për BBC-në.

“Nuk u përgjigja. Nuk do ta jap emrin e askujt në atë mënyrë. Dhe nuk e kisha parë këtë mik prej vitesh”, i tha ai BBC-së. “Mendova se ishte një mashtrim. E bllokova dhe e raportova.”

Por që nga konferenca për shtyp e Gandit, “gjërat kanë shpërthyer”.

“Njerëzit më telefononin në Instagram dhe Facebook. Ishte e tmerrshme. E çaktivizova Instagramin tim për të kuptuar se çfarë po ndodhte. Më vonë e kërkova në Google dhe e kuptova se çfarë po ndodhte, por në fillim nuk kisha ide.”

Ferrero thotë se disa faqe interneti i kanë vendosur fotografitë e tij pranë fotografisë së Nery-t pa leje. “Njerëzit po bënin meme, sikur ta kthenin në një shaka për një shfaqje televizive. Është absurde.”

Në vitin 2017, Ferrero sapo kishte filluar karrierën si fotograf kur e ftoi Neryn, të cilën e njihte, të vinte për një set fotografik. Ferrero tha se i ndau fotot në Facebook-un e tij dhe i postoi ato edhe në Unsplash – një faqe interneti fotografish – me pëlqimin e saj.

“Fotoja shpërtheu… arriti rreth 57 milionë shikime”, tha ai.

Ai tani e ka fshirë lidhjen nga llogaria e tij në Unsplash, por na dërgoi pamje të ekranit të bëra më parë që tregonin foto të tjera të Nery-t nga i njëjti xhirim.

“I fshiva nga frika, sepse fotot po keqpërdoreshin. U frikësova duke imagjinuar se kjo do t’u ndodhte edhe njerëzve të tjerë që kisha fotografuar. Ndihesha i pushtuar. Shumë njerëz të rastësishëm vinin drejt meje. Mendon ‘A bëra diçka gabim?’ Por nuk e bëra. Platforma ishte e hapur dhe unë i ngarkova si miliona të tjerë.” Ai gjithashtu tani e ka bërë postimin origjinal në Facebook me fotot e saj privat.

“Kur sheh njerëz që hyjnë në Twitterin, Facebookun, Instagramin tënd personal, të zë paniku. Reagimi i parë është të mbyllësh gjithçka dhe ta kuptosh më vonë. Disa njerëz menduan se ishte qesharake, si një telenovelë, por unë u ndjeva i pushtuar.”

As Ferrero dhe as Nery nuk kanë qenë ndonjëherë në Indi dhe ende po përpiqen të kuptojnë se si diçka që ndodhi në anën tjetër të botës mund t’ua përmbysë jetën përmbys.

Ne e pyetëm Ferreron nëse e gjithë kjo ndihmoi në zbulimin e mashtrimit zgjedhor, a do të ishte kjo pozitive?

“Po, mendoj se kjo do të ishte pozitive. Por unë nuk i di detajet”, tha ai.

Nery, e cila nuk është larguar kurrë nga vendi, thotë: “Kjo është larg realitetit tim. Unë as nuk i ndjek zgjedhjet në Brazil, e lëre më në një vend tjetër.”

The post ‘Mendova se ishte një shaka’/ Si një grua braziliane u bë fytyra e debatit për manipulimin e votave në Indi appeared first on iconstyle.al.

Një tren pasagjerësh u përplas me një tren mallrash në Indinë qendrore të martën, duke vrarë të paktën shtatë persona dhe duke plagosur disa të tjerë. Aksidenti ndodhi pranë Bilaspur, në shtetin Chhattisgarh.

Më shumë se 10 persona mbetën të plagosur dhe janë dërguar në spitalet lokale për trajtim, teksa një prej tyre është në gjendje kritike. Në një deklaratë, operatori i rrjetit Indian Railëays tha se është angazhuar për përpjekjet e shpëtimi dhe ka filluar një hetim për shkakun e aksidentit.

Përplasjet e trenave nuk janë të rralla në Indi, ku rrjeti i gjerë hekurudhor përballet me probleme të infrastrukturës së vjetër dhe gabimet njerëzore. Më shumë se 12 milionë njerëz udhëtojnë me 14,000 trenat e Indisë çdo ditë në 64,000 kilometra shina.

Pavarësisht përpjekjeve të qeverisë për të përmirësuar sigurinë hekurudhore, disa qindra aksidente – disa vdekjeprurëse ndodhin çdo vit.

Një aksident në pjesën lindore të vendit në vitin 2023 vrau më shumë se 280 njerëz në atë që ishte një nga fatkeqësitë më vdekjeprurëse hekurudhore në Indi.

NJU DELHI, 31 tetor /ATSH-DPA/- Ministri indian i Mbrojtjes, Rajnath Singh dhe shefi i Pentagonit, Pete Hegseth nënshkruan sot në Kuala Lumpur një kornizë 10-vjeçare të mbrojtjes së ndërsjellë.

“Kjo avancon partneritetin tonë mbrojtës, një gur themeli për stabilitetin dhe parandalimin rajonal. Ne po përmirësojmë koordinimin, ndarjen e informacionit dhe bashkëpunimin teknologjik”, tha Hegseth në X.

“Lidhjet e mbrojtjes SHBA-Indi nuk kanë qenë kurrë më të forta”, shtoi ai.

“Kjo marrëveshje kornizë do të sjellë një epokë të re në partneritetin tonë tashmë të fortë të mbrojtës dhe është një shenjë e konvergjencës strategjike në rritje të të dy vendeve”, tha Hegseth.

Ai shtoi se kjo ishte kritike për të siguruar një rajon të lirë, të hapur dhe të bazuar në rregulla në Indo-Paqësor.

Pentagoni tha se marrëveshja, e cila do të rinovohet çdo 10 vjet, ofron bazën për marrëdhënie të ndërsjella mbrojtëse.

“Ajo forcon ndërveprimin në të gjitha fushat, duke përfshirë tokën, detin, ajrin, hapësirën dhe hapësirën kibernetike”, tha ai.

Të dy ministrat u takuan në kryeqytetin malajzian gjatë takimit të ministrave të Mbrojtjes të Shoqatës së Kombeve të Azisë Juglindore (ASEAN).

Pas një kohe të gjatë furnizimi me pajisje ushtarake nga Bashkimi Sovjetik dhe më vonë nga Rusia, India është bërë një blerës i madh i armatimeve amerikane, si dhe një partner i rëndësishëm në kundërshtimin e ndikimit kinez në rajon.

SHBA-ja e ngriti Indinë në një “Partner Kryesor të Mbrojtjes” nëntë vjet më parë me qëllim thellimin e bashkëpunimit.

Vendosja e tarifave shtesë nga Uashingtoni në përgjigje të blerjeve indiane të naftës ruse ka dëmtuar kohët e fundit marrëdhëniet.

SHBA-ja vendosi tarifa prej 50% për produktet indiane, duke përfshirë 25% që lidhen me marrëdhëniet tregtare të Indisë me Rusinë. //a.i/

The post FOKUS – SHBA-ja dhe India nënshkruajnë marrëveshje 10-vjeçare për mbrojtjen në Kuala Lumpur appeared first on Agjencia Telegrafike Shqiptare.

NJU DELHI, 16 tetor /ATSH-DPA/- India është e përgatitur të importojë më shumë naftë dhe gaz nga Shtetet e Bashkuara të Amerikës, tha sot zëdhënësi i Ministrisë së Jashtme, Randhir Jaiswal në Nju Delhi.

“Përsa i përket SHBA-së, ne kemi kërkuar për shumë vite të zgjerojmë prokurimin tonë të naftës dhe gazit. Kjo ka përparuar vazhdimisht në dekadën e fundit. Administrata aktuale ka treguar interes për thellimin e bashkëpunimit energjetik me Indinë”, tha Jaiswal, duke shtuar se diskutimet ishin në vazhdim e sipër.

Jaiswal nuk iu drejtua drejtpërdrejt deklaratës së presidentit Donald Trump – i cili tha se kryeministri, Narendra Modi e kishte siguruar se India do të ndalonte blerjen e naftës nga Rusia.

Më herët, Trump kritikoi blerjet e naftës ruse nga India, dhe SHBA-ja vendosi tarifa ndëshkuese në gusht – në një përpjekje për të kufizuar të ardhurat e Moskës dhe aftësinë e saj për të vazhduar luftën në Ukrainë.

Nju Delhi i ka quajtur si të padrejta tarifat e SHBA-së dhe Jaiswal tha se sigurimi i çmimeve të qëndrueshme të gazit dhe furnizimeve të sigurta kishin qenë qëllimet kryesore të politikës së qverisë.

“Kjo përfshin zgjerimin e furnizimit tonë të naftës dhe gazit dhe diversifikimin sipas nevojës për të përmbushur kushtet e tregut”, tha ai.

Sekretari i Tregtisë i Indisë, Rajesh Agrawal, tha se India ishte e lumtur që mund të importonte më shumë naftë dhe gaz nga SHBA-ja, me kusht që çmimi të ishte i drejtë.

“Një delegacion indian ndodhet aktualisht në SHBA për të diskutuar çështjet tregtare”, shtoi ai. //a.i/

The post NJU DELHI – India e gatshme të importojë më shumë naftë dhe gaz nga SHBA-ja appeared first on Agjencia Telegrafike Shqiptare.

Të paktën 20 persona humbën jetën kur një autobus që transportonte më shumë se 50 pasagjerë u përfshi nga flakët në shtetin perëndimor indian të Rajasthanit të martën, thanë mediat dhe autoritetet.

Autobusi po udhëtonte midis qyteteve Jaisalmer dhe Jodhpur dhe u përfshi nga flakët. “Nëntëmbëdhjetë pasagjerë vdiqën brenda autobusit dhe një tjetër vdiq nga djegiet e tij në një rrugë në Jodhpur”, tha për AFP Rajesh Meena, një oficer policie.

Sipas agjencisë së lajmeve Press Trust of India, e cila raportoi të njëjtën histori, autobusi u ndal në anë të rrugës sepse nga pjesa e pasme dilte tym, përpara se të përfshihej nga flakët brenda një kohe shumë të shkurtër.

Kryeministri indian Narendra Modi tha nëpërmjet Twitter-it se ishte “i tronditur nga humbja e jetëve njerëzore” dhe premtoi kompensim deri në 200,000 rupi (rreth 1,940 euro) për familjet e të ndjerëve.

Në Indi, vendin më të populluar në planet, situata e sigurisë rrugore përshkruhet si katastrofike.

Në vitin 2023, sipas të dhënave zyrtare më të fundit në dispozicion, në rrugët indiane u regjistruan më shumë se 480,000 aksidente rrugore, me pothuajse 173,000 vdekje dhe rreth 463,000 të plagosur.

The post Indi/ Autobusi përfshihet nga flakët, të paktën 20 persona ndërrojnë jetë appeared first on Albeu.com.

Të paktën 20 persona kanë humbur jetën pasi një autobus u përfshi nga flakët.

Në autobus udhëtonin më shumë se 50 pasagjerë. Ngjarja e rëndë ndodhi në Rajasthani, ndërsa autobusi po udhëtonte në qytetet Jaisalmer dhe Jodhpur.

Kryeministri indian Narendra Modi nëpërmjet u shpreh i tronditur nga ngjarja e rëndë, ndërsa shprehu ngushëllimet per familjet e prekura nga tragjedia.

Tragedy in Jaisalmer Bus carrying 57 passengers catches fire en route to Jodhpur — 19 killed in horrific accident #BreakingNews #India #Jaisalmer #Rajasthan #BusAccident #Tragedy #Fire #DisasterUpdate #Rescue #LatestNews #NewsAlert #UttarakhandNewsXpress pic.twitter.com/MMWB1qGfiH

— उत्तराखंड न्यूज़ एक्सप्रेस/Uttarakhand News Xpress (@UkExpressnews) October 14, 2025

Qeveria ka shkarkuar nga detyra prefektin e Qarkutë të Vlorë dhe të Fierit. Më konkretisht, në Vlorë është shkarkuar nga detyra prefekti Plator Nesturi, teksa në vend të tij është emëruar Evis Allushi. Kjo e fundit ishte kandidate për deputete në zgjedhjet parlamentare të 11 Majit në Qarkun e Vlorës, ku mori 2 446 vota […]

The post Rama shkarkon nga detyra prefektin e Vlorës dhe të Fierit, ja kush i zëvendëson appeared first on BoldNews.al.

Një tjetër tragjedi shëndetësore ka goditur Indinë, pasi të paktën 11 fëmijë të moshës një deri në gjashtë vjeç kanë humbur jetën në shtetin Madhya Pradesh pas konsumimit të një shurupi të zakonshëm kundër kollës.

Pas disa ditësh hetime, autoritetet zbuluan se produkti përmbante 48.6 për qind diethylene glycol, një tretës industrial shumë toksik, që mund të shkaktojë dështim të veshkave dhe vdekje, raportojnë mediat  e huaja.

Vetëm pak javë më vonë, raste të ngjashme u raportuan edhe në shtetin Rajasthan, ku dy fëmijë të tjerë vdiqën pasi kishin konsumuar shurupin vendas “Dextromethorphan”, substancë e rrezikshme për fëmijët e vegjël.

Këto ngjarje kanë ringjallur kujtimet e dhimbshme të rasteve të ngjashme në të kaluarën. Në vitin 2023, shurupet e prodhuara në Indi, të kontaminuara me të njëjtin përbërës helmues, u lidhën me vdekjen e 70 fëmijëve në Gambit dhe 18 në Uzbekistan. Edhe më herët, raste të ngjashme janë raportuar në Kashmir dhe rajone të tjera indiane.

Ekspertët thonë se këto raste pasqyrojnë problem të thellë në sistemin farmaceutik të Indisë – tregun e fragmentuar, mungesën e kontrollit cilësor dhe mbikëqyrjen e dobët shtetërore. Mijëra shurupe prodhohen nga kompani të vogla, shpesh pa miratimin e nevojshëm dhe shiten lirshëm në farmaci apo nga shitës pa licencë.

Në zonat rurale, deri në 75 për qind e rasteve të kujdesit shëndetësor trajtohen nga persona pa trajnim profesional, të njohur si “RMP” – praktikues të vetëshpallur që shpesh u japin pacientëve shurupe të ndryshme për çdo kollë apo ftohje.

Këto ilaçe përdoren edhe në qytetet e mëdha, ku prindërit e shqetësuar kërkojnë trajtim të menjëhershëm, ndërsa disa mjekë i përshkruajnë pa nevojë, duke injoruar rreziqet që mbartin për fëmijët.

Sipas pediatrit nga Mumbai, Rajaram D. Khare, shumica e kollave te fëmijët janë virale dhe kalojnë vetë brenda një jave, pa nevojë për shurup. Ai paralajmëron se përdorimi i tepërt mund të shkaktojë efekte anësore, varësi dhe madje helmim, sidomos kur përmbajnë substanca si codeine apo ambroxol që nuk rekomandohen për fëmijë të vegjël.

Pas rasteve të fundit, Ministria e Shëndetësisë së Indisë ka urdhëruar hetime, ka sekuestruar mostrat e shurupit dhe ka pezulluar shitjet e tij. Megjithatë, kritikët theksojnë se problemi është sistemik dhe kërkon reforma rrënjësore në mbikëqyrjen e prodhimit dhe tregtimit të barnave, si dhe fushata ndërgjegjësuese për mjekët dhe prindërit.

Ekspertët paralajmërojnë se derisa India të frenojë obsesionin me shurupet e kollës, rreziku për tragjedi të ngjashme do të mbetet i lartë.