Ministri i Jashtëm iranian Abbas Araghchi do të vizitojë Turqinë të premten për bisedime me homologun e tij Hakan Fidan mbi zhvillimet e fundit në Iran dhe tensionet me Shtetet e Bashkuara, ka thënë të enjten një burim i Ministrisë së Jashtme turke.

Vizita e tij vjen pasi presidenti i SHBA-së, Donald Trump, i kërkoi Iranit të mërkurën të ulet në tryezën e bisedimeve dhe të arrijë një marrëveshje për armët bërthamore ose sulmi i ardhshëm i SHBA-së do të jetë shumë më i keq.

Trump tha se ka dërguar një "armadë" në Lindjen e Mesme dhe e paralajmëroi Teheranin kundër vrasjes së protestuesve antiqeveritarë ose rinisjes së programit të tij bërthamor.

Teherani, i cili shtypi brutalisht protestat e mëdha këtë muaj dhe vrau ose arrestoi mijëra njerëz, u përgjigj me një kërcënim për t'u kundërpërgjigjur Shteteve të Bashkuara, Izraelit dhe atyre që i mbështesin ato.

Zyrtarët iranianë fajësojnë për trazirat, më të mëdhatë që nga revolucioni i vitit 1979, armiqtë e Iranit, Izraelin dhe Shtetet e Bashkuara.

Dhe Turqia, një anëtare e NATO-s që ndan një kufi me Iranin, ka thënë se kundërshton çdo ndërhyrje të huaj ndaj fqinjit të saj dhe i kërkoi Uashingtonit të zgjidhë çështjet e saj me Iranin "një nga një".

Ajo ka kontaktuar të dyja palët, duke paralajmëruar se destabilizimi në Iran do të tejkalonte kapacitetin e rajonit për ta menaxhuar në këtë kohë.

Burimi ka thënë se Fidan do t'i thoshte Araghchi-t se Turqia i ndiqte nga afër zhvillimet në Iran dhe se siguria, paqja dhe stabiliteti i Iranit ishin me "rëndësi të madhe" për Ankaranë.

Fidan gjithashtu do të përsërisë kundërshtimin e Turqisë ndaj çdo sulmi ushtarak ndaj Iranit dhe do të paralajmërojë se një veprim i tillë do të "krijojë rreziqe në shkallë globale", thotë burimi, duke shtuar se ai do të ofrojë mbështetjen e Turqisë për të ndihmuar në zgjidhjen e tensioneve me Uashingtonin.

Fidan do të "theksoi se Turqia mbështet gjetjen e një zgjidhjeje për programin bërthamor të Iranit sa më shpejt të jetë e mundur dhe se është e gatshme të ndihmojë në këtë çështje nëse është e nevojshme", tha burimi. /Telegrafi/

Ministri i Jashtëm i Turqisë, Hakan Fidan, ka dërguar një mesazh të qartë ndaj Shteteve të Bashkuara, duke paralajmëruar se çdo sulm ndaj Iranit do të ishte i gabuar dhe se rifillimi i një konflikti do të ishte i rrezikshëm.

Ai theksoi se Irani është i gatshëm të ulet përsëri në tryezën e bisedimeve për çështjen bërthamore, duke ofruar mundësi për një zgjidhje diplomatike.

Trump: Një flotë e madhe amerikane po lëviz drejt Iranit, por do ta doja që të mos ndodhte asgjë

Kryediplomati turk deklaroi se negociatat duhet të zhvillohen çështje për çështje, dhe jo si një paketë e vetme.

“Këshilla ime për miqtë amerikanë është që të mbyllin çështjet me iranianët një nga një. Filloni me dosjen bërthamore, mbylleni atë, dhe mos e trajtoni si një paketë”, tha ai.

— (@)

Sipas ministrit turk, trajtimi i të gjitha çështjeve njëkohësisht mund të jetë i vështirë për palën iraniane dhe mund të duket poshtëruese për udhëheqësinë e tyre.

“Nëse mund t’i bëjmë gjërat më të pranueshme dhe më të lehta për t’u toleruar, kjo do të ndihmonte shumë në procesin e negociatave”, shtoi Fidan.

Ky qëndrim i Turqisë vjen në një moment kur tensionet ndërkombëtare mbi programin bërthamor të Iranit janë rritur dhe bisedimet e rrethit bërthamor janë në ngërç.

Analistët vënë në dukje se qasja e Turqisë, si një vend fqinj me ndikim në rajon, mund të luajë një rol kyç në lehtësimin e tensioneve dhe promovimin e një zgjidhjeje diplomatike pa konflikte. /Telegrafi/

Ministri i Jashtëm turk, Hakan Fidan, paralajmëroi të premten se ekzistojnë shenja që Izraeli po kërkon një mundësi për të sulmuar Iranin, dhe tha se gjatë vizitës së tij të fundit në Teheran i ka shprehur udhëheqësve iranianë shqetësimin e Ankarasë për një sulm të mundshëm dhe destabilizim të përgjithshëm të rajonit.

Fidan, në një intervistë për televizionin turk NTV, theksoi se ka tregues që Izraeli “veçanërisht po kërkon një mundësi për të goditur Iranin”.

Në pyetjen shtesë nëse kjo vlerësim i referohet edhe Shteteve të Bashkuara të Amerikës, ai nënvizoi se veçanërisht Izraeli shihet si aktor që kërkon një mundësi të tillë.

- YouTube www.youtube.com

Shefi i diplomacisë turke tha se shqetësimi për një sulm të mundshëm iu është shprehur drejtpërdrejt zyrtarëve iranianë gjatë vizitës së tij të fundit në Teheran.

“Kur shkova këto ditë në Teheran, si mik i tyre u thashë gjithçka për këtë proces. Dhe e dini, miku thotë të vërtetat e hidhura”, tha kryediplomati turk.

Trump: Një flotë e madhe amerikane po lëviz drejt Iranit, por do ta doja që të mos ndodhte asgjë

Paralajmërimet e Fidanit erdhën pas bisedës telefonike të presidentit turk, Recep Tayyip Erdogan, me homologun iranian, Masoud Pezeshkian, gjatë së cilës Erdogan theksoi se Turqia është kundër çdo ndërhyrjeje të huaj në Iran dhe se vlerëson paqen dhe stabilitetin e fqinjit të saj.

Nga ana tjetër, të premten një zyrtar i lartë iranian i tha agjencisë Reuters se Teherani çdo sulm nga armiqtë e tij do ta konsiderojë “si luftë totale kundër nesh”. Kjo ka ashpërsuar më tej retorikën në një luftë fjalësh gjithnjë e më të tensionuar mes Uashingtonit dhe udhëheqësve iranianë. /Telegrafi/

TIRANË, 23 janar /ATSH/ Ministrja për Evropën dhe Punët e Jashtme, Elisa Spiropali, po merr pjesë në Takimin e Ministrave të Jashtëm të Platformës për Paqe Ballkanike, me ftesë të homologut të saj, Ministrit të Jashtëm të Republikës së Turqisë, Hakan Fidan.

Platforma do të fokusohet në avancimin e bashkëpunimit rajonal për ndërlidhjen, zhvillimin ekonomik, sigurinë energjetike, integrimin europian, paqen rajonale.

Ministrja Spiropali njoftoi se “në cilësinë edhe të Anëtarit të Bordit Ekzekutiv të Paqes, kolegu Fidan prezantoi rëndësinë e këtij mekanizmi të ri të krijuar nga Presidenti Trump për ndërtimin e paqes së qëndrueshme në një kohë sfidash”.

Spiropali shtoi se “Shqipëria është gjithashtu gati për të marrë përgjegjësitë e saj si Anëtar Themelues i Bordit të Paqes”.

Bashkëpunimi me aleatët tanë strategjikë, Shtetet e Bashkuara të Amerikës dhe partnerë të tjerë, sipas Spiropalit, do të çelë një kapitull të ri në historinë e zgjidhjes së konflikteve ndërkombëtare.

Më herët Spiropali zhvilloi një takim me ministrin Fidan, për partneritetin strategjik në rritje mes Shqipërisë dhe Turqisë, që do të marrë një tjetër peshë me takimin e tretë të Këshillit të Nivelit të Lartë për bashkëpunimin ndërsektorial mes dy vendeve tona, përgjatë këtij viti.

/gj.m/a.f/r.e/

The post Spiropali nga Stambolli: Shqipëria gati për të marrë përgjegjësitë si Anëtare Themeluese e Bordit të Paqes appeared first on Agjencia Telegrafike Shqiptare.

PRISHTINË, 23 janar /ATSh/ Ministrja e Punëve të Jashtme dhe Diasporës e Kosovës, Donika Gërvalla, është takuar sot në Stamboll me ministrin e Punëve të Jashtme të Turqisë, Hakan Fidan.

Gërvalla ka bërë të ditur se takimi bilateral është zhvilluar me ftesë të ministrit Fidan, në kuadër të takimit të dytë të Platformës së Paqes për Ballkanin.

Ajo, përmes një statusi në Facebook, ka theksuar se Turqia, si shtet mik dhe aleat i ngushtë i Kosovës, mbetet partner i rëndësishëm në promovimin e paqes, stabilitetit dhe bashkëpunimit rajonal.

Sipas saj, Kosova përmes angazhimit në këtë platformë riafirmon orientimin strategjik drejt integrimit euroatlantik, përfshirë anëtarësimin në Bashkimin Evropian dhe NATO, si dhe përkushtimin për paqe të qëndrueshme, fqinjësi të mirë dhe stabilitet rajonal.

Ministrja Gërvalla po ashtu ka vënë në dukje rëndësinë e thellimit të bashkëpunimit në fushën e sigurisë dhe përpjekjeve të përbashkëta për një rajon më të sigurt.

Në fund, ajo ka falënderuar ministrin Fidan për ftesën dhe mikpritjen, duke ritheksuar marrëdhëniet e shkëlqyera dhe partneritetin e qëndrueshëm ndërmjet Kosovës dhe Turqisë, si dhe rolin e Turqisë në avancimin e dialogut, paqes dhe stabilitetit në rajon dhe më gjerë.

/KosovaPress/

The post Gërvalla takon homologun turk në Stamboll, flasin për paqen dhe sigurinë në rajon appeared first on Agjencia Telegrafike Shqiptare.

Në kuadër të Takimit të Dytë Ministror të Platformës Ballkanike për Paqe, që po mbahet sot në Stamboll, Ministri i Punëve të Jashtme dhe Tregtisë së Jashtme, Timço Mucunski, zhvilloi një takim dypalësh me homologun e tij turk, Ministrin e Punëve të Jashtme të Republikës së Turqisë, Hakan Fidan, njoftojnë nga MPJ.

"Fokusi i bisedimeve ishte në marrëdhëniet dypalëshe, bashkëpunimin ekonomik, mundësitë e investimeve dhe thellimin e bashkëpunimit në fusha me interes të ndërsjellë. Në këtë kontekst, u konfirmuan marrëdhëniet e shkëlqyera politike midis dy vendeve dhe bashkëpunimi jashtëzakonisht i suksesshëm në disa fusha.

Theks i veçantë u vu në forcimin e bashkëpunimit ekonomik dhe shfrytëzimin më efikas të mundësive të investimeve, si dhe në thellimin e bashkëpunimit në fusha të tjera me interes të ndërsjellë.

Të dy ministrat konfirmuan gjithashtu aleancën e fortë brenda NATO-s, si dhe mbështetjen e ndërsjellë në nismat rajonale dhe organizatat shumëpalëshe", thonë nga MPJ.

Nga atje shtojnë se bashkëbiseduesit trajtuan edhe çështjet aktuale rajonale dhe gjeopolitike, duke theksuar rëndësinë e një rajoni të qëndrueshëm dhe të begatë./Telegrafi/

Turqia, si shtet mik dhe aleat i ngushtë i Republikës së Kosovës, mbetet një partner i rëndësishëm në promovimin e paqes, stabilitetit dhe bashkëpunimit rajonal, kështu ka thënë ministrja në detyrë e Punëve të Jashtme, Donika Gërvalla përmes një postimi në rrjetin social në Facebook.

Gërvalla bëri të ditur se me ftesë të Ministrit të Punëve të Jashtme të Republikës së Turqisë, Hakan Fidan, në Stamboll kanë zhvillua një takim bilateral në kuadër të takimit të dytë të Platformës së Paqes për Ballkanin.

"Gjatë takimit me Ministrin Fidan theksova se Republika e Kosovës, përmes angazhimit të saj në këtë platformë, riafirmon orientimin strategjik drejt integrimit euroatlantik, përfshirë anëtarësimin në Bashkimin Evropian dhe NATO, si dhe përkushtimin ndaj paqes së qëndrueshme, fqinjësisë së mirë dhe stabilitetit rajonal. Po ashtu, vura në dukje rëndësinë e thellimit të bashkëpunimit në fushën e sigurisë dhe të përpjekjeve të përbashkëta për një rajon më të sigurt", ka shkruar ajo.

Tutje ministrja në detyrë u shpreh se: "Falënderova Ministrin Fidan për ftesën dhe mikpritjen, duke ritheksuar marrëdhëniet e shkëlqyera dhe partneritetin e qëndrueshëm ndërmjet Republikës së Kosovës dhe Republikës së Turqisë, si dhe rolin e saj në avancimin e dialogut, paqes dhe stabilitetit në rajon dhe më gjerë". /Telegrafi/

Janë bërë publike emrat e personave që do të jenë pjesë e Komitetit Kombëtar për menaxhimin e Gazës, i formuar me propozim të presidentit të SHBA-së, Donald Trump.

Ekipi do të udhëhiqet nga Ali Shaath, ndërsa anëtarë të tij janë: Abdul Karim Ashour, Jaber Al-Daour, Bashir Al-Rais, Ali Barhoum, Aed Yaghi, Osama Al-Saadawi, Sami Nasman, Mohammad Bseiso, Arabi Abu Shaaban, Hana Tarzi, Rami Halas, Omar Shamali, Ayed Abu Ramadan dhe Husni Al-Mughni.

Secili prej tyre do të jetë përgjegjës për një sektor të veçantë, që përfshin fusha nga financat deri te arsimi, raporton reuters.

Përveç këtij ekipi, Trump ka emëruar edhe trupa këshillimore që do të veprojnë në bashkëpunim me Komitetin Kombëtar për menaxhimin e Gazës, ku do të përfshihen emra të njohur të politikës ndërkombëtare.

Ndër ta janë ministri i Jashtëm i Turqisë, Hakan Fidan, Sekretari amerikan i Shtetit, Marco Rubio, ish-kryeministri i Britanisë së Madhe, Tony Blair, si dhe të dërguarit e Trump-it, Steve Witkoff dhe Jared Kushner.

Bordi do të përfshijë gjithashtu drejtuesin e fondeve private dhe miliarderin Marc Rowan, presidentin e Bankës Botërore Ajay Banga, si dhe Robert Gabriel, këshilltar i Trump-it, bëri të ditur Shtëpia e Bardhë, duke shtuar se Nickolay Mladenov, ish-i dërguar i OKB-së për Lindjen e Mesme, do të jetë përfaqësuesi i lartë për Gazën.

Gjeneralmajori i ushtrisë Jasper Jeffers, komandant i operacioneve speciale të SHBA-së, është emëruar komandant i Forcës Ndërkombëtare të Stabilizimit, njoftoi Shtëpia e Bardhë. Një rezolutë e Këshillit të Sigurimit të OKB-së, e miratuar në mes të nëntorit, autorizoi bordin dhe vendet që bashkëpunojnë me të të krijojnë këtë forcë në Gaza.

Me emërimin e këtyre strukturave ka nisur zyrtarisht zbatimi i fazës së dytë të armëpushimit në Gaza, gjatë së cilës synohet vendosja e një administrate në këtë territor palestinez pa përfshirjen e Hamasit.

Faza e parë e armëpushimit zgjati tre muaj, gjatë së cilës Izraeli e shkeli marrëveshjen disa herë dhe si pasojë u vranë qindra civilë palestinezë.

Ndryshe, sulmet izraelite në Gaza që nga tetori i vitit 2023 ka shkaktuar vdekjen e dhjetëra mijëra njerëzve, ka krijuar një krizë urie dhe ka zhvendosur brenda territorit të gjithë popullsinë e Gazës. Shumë ekspertë të të drejtave të njeriut, studiues dhe një hetim i OKB-së vlerësojnë se kjo përbën gjenocid.

Izraeli ka deklaruar se ka vepruar në vetëmbrojtje, pasi militantë të udhëhequr nga Hamasi vranë 1200 persona dhe morën më shumë se 250 pengje gjatë një sulmi në fund të vitit 2023. /Telegrafi/

Ministri i Jashtëm turk Hakan Fidan ka thënë të enjten se Ankaraja është kundër veprimeve ushtarake në Iran dhe përparësia e saj është të shmangë destabilizimin.

"Ne jemi kundër një ndërhyrje ushtarake kundër Iranit", tha Fidan në një konferencë për shtyp në Stamboll, shkruajnë mediat e huaja, përcjell Telegrafi.

Ai ka shtuar se Turqia do të vazhdojë iniciativat e saj diplomatike në lidhje me Iranin.

"Ata janë nën sanksione për shkak të disa politikave rajonale dhe ndërkombëtare që kanë ndjekur. Ne i themi Iranit, duhet të zgjidhësh problemet e tua në rajon", shtoi ai.

Ministri i Jashtëm turk argumentoi gjithashtu se disa njerëz po i keqinterpretojnë protestat që vijnë nga problemet dhe ankesat e justifikuara ekonomike si një kryengritje kundër regjimit.

"Kjo po krijon një zonë gri", citohet të ketë thënë ai.

I pyetur në lidhje me njoftimin e fundit të administratës Trump se vendet që bëjnë biznes me Iranin do të përballen me një tarifë të re prej 25%, e cila ka të ngjarë të zbatohet për Turqinë, Fidan tha se ishte vetëm një deklaratë dhe jo një "dekret konkret presidencial".

Si rezultat, ai theksoi se Turqia ende nuk e ka vënë në axhendën e saj shqyrtimin e tarifave të reja. /Telegrafi/

Ministri i Punëve të Jashtme të Turqisë, Hakan Fidan, deklaroi se ngjarjet e fundit në Iran nuk do të jenë dështimi i fundit me të cilin përballet Izraeli, duke sugjeruar se përpjekjet e Tel Avivit për të shfrytëzuar tensionet e brendshme në Iran janë të destinuara të dështojnë.

Në një intervistë për transmetuesin kombëtar TRT, Fidan analizoi situatën aktuale gjeopolitike, me fokus të veçantë në marrëdhëniet mes Izraelit dhe Iranit, situatën në Venezuelë, si dhe të ardhmen e marrëdhënieve turko-amerikane.

Ai theksoi se demonstratat në Iran, megjithëse burojnë nga ankesa reale të qytetarëve dhe probleme strukturore brenda vendit, janë objekt manipulimi nga rivalët e Iranit. Sipas tij, Izraeli po përpiqet të përfitojë nga kjo situatë.

“Ajo që ndodhi në Iran nuk do të jetë e fundit që Izraeli e pret. Izraeli po përpiqet ta shfrytëzojë këtë”, tha kryediplomati turk, pa hyrë në detaje mbi incidente specifike.

Kreu i diplomacisë turke theksoi se shërbimi izraelit i inteligjencës po i nxit hapur iranianët drejt rebelimit. Megjithatë, ai paralajmëroi se shoqëria iraniane, pavarësisht dallimeve të brendshme, tradicionalisht bashkohet kur përballet me kërcënime të jashtme.

Fidan theksoi qëndrimin e Turqisë se populli iranian nuk duhet të dëmtohet dhe se problemet mes Iranit, Shteteve të Bashkuara dhe Perëndimit duhet të zgjidhen ekskluzivisht përmes negociatave.

Shtoi se “Izraeli duhet të ndalet” dhe se Turqia është e gatshme të ndihmojë.

Duke komentuar dinamikën më të gjerë rajonale, Fidan hodhi poshtë retorikën gjithnjë e më agresive të zyrtarëve izraelitë. Ai e përshkroi atë si “përpjekje të dëshpëruara për të tërhequr vëmendje” nga ministra më të vegjël të koalicionit, të cilët në këtë mënyrë përpiqen të rrisin profilin e tyre politik.

Duke folur për marrëdhëniet mes Turqisë dhe SHBA-së, Fidan shprehu optimizëm për vitin e ardhshëm.

Ai theksoi se parashikon rezultate konkrete në vitin 2025 në fushat ku të dy vendet po punojnë aktivisht.

Pikat kyçe të përparimit përfshijnë: sanksionet CAATSA, ligji amerikan që synon Iranin, Rusinë dhe Korenë e Veriut, i cili ka ndikuar edhe Turqinë; si dhe çështjen Halkbank, pra akuzat se banka turke ka ndihmuar Iranin të shmangë sanksionet amerikane. /Telegrafi/

Ministri i Jashtëm turk Hakan Fidan ka thënë se Turqia është e përgatitur të marrë përgjegjësi në Gaza, duke përfshirë mundësinë e vendosjes së trupave, nëse është e nevojshme.

Turqia është gati të mbajë barrën në Gaza dhe "do të përmbushë përgjegjësitë e saj me një ndjenjë të madhe detyre, duke përfshirë dërgimin e trupave. Ky është mesazhi ynë më i qartë për bashkësinë ndërkombëtare për këtë çështje", ka thënë Fidan për mediat turke.

Duke vënë në dukje takimin e shtatorit të presidentit turk Rexhep Tajip Erdogan me homologun e tij amerikan Donald Trump, ai tha se të dy udhëheqësit diskutuan tema të rëndësishme në lidhje me marrëdhëniet dhe dinamikën rajonale.

Fidan theksoi se "performanca e fundit e politikës së jashtme" të Turqisë dhe besueshmëria e saj si partnere e kanë bërë atë "një aktor të kërkuar për bashkëpunim në shumë çështje".

Bisedimet në SHBA, shtoi ai, nxorën përsëri në pah çështje me rëndësi kritike për të dy vendet, rajonin më të gjerë dhe paqen dhe stabilitetin global.

Fidan tregoi se një projektrezolutë e Këshillit të Sigurimit të OKB-së është ende në debat dhe vazhdon të evoluojë.

Ai vuri në dukje se forca e stabilizimit e propozuar është një nga dy strukturat e përshkruara në Planin e Paqes të Trump në faza, dhe diskutimet janë përqendruar në formësimin e një kuadri ligjor që do të përcaktonte mandatin e saj dhe mënyrën se si do të funksiononte pasi të zbatohej.

Fidan shtoi se Turqia mbetet e vendosur të përparojë mekanizmat e nevojshëm për të koordinuar progresin në marrëveshjen e armëpushimit, duke theksuar se dialogu i ngushtë vazhdon midis autoriteteve ushtarake përkatëse.

Sipas Fidan, Turqia luajti një rol aktiv në bisedimet e Sharm el-Sheikh që mundësuan armëpushimin në Gaza, duke vënë në dukje se Egjipti, Katari dhe Turqia ndihmuan në vënien në fuqi të marrëveshjes.

Ai shtoi se deklarata e nënshkruar nga vendet nuk është një model tradicional garantues, por pasqyron mbështetjen e tyre të vazhdueshme politike për armëpushimin. /Telegrafi/

Ministri turk i Jashtëm, Hakan Fidan, ka deklaruar të hënën, 3 nëntor, se vendet pjesëmarrëse në forcën e propozuar ndërkombëtare për stabilizimin e Gazës do të vendosin për dërgimin e trupave vetëm pasi të përcaktohet qartë mandati i saj në një rezolutë të pritshme të Këshillit të Sigurimit të OKB-së.

Fidan shpjegoi në takimin e Stambollit se diskutimet janë të ndërlikuara dhe procesi është i ndjeshëm, duke shtuar se çdo vend do të vendosë bazuar te autoritetet dhe përgjegjësitë e forcës.

Ai nënvizoi se Turqia është e gatshme të kontribuojë për paqen dhe të bëjë sakrifica, por dokumentet dhe rregullat e vendosura duhet të jenë të pranueshme për të gjitha palët.

Ministri turk theksoi se prioritet është përfundimi i krimeve kundër njerëzimit në Gaza, ruajtja e armëpushimit dhe rindërtimi i territorit, duke siguruar që nuk të krijohet një sistem mbikëqyrës që mund të sigurojë të ardhmen e palestinezëve.

Ai gjithashtu nënvizoi se zbatimi i një qeverisjeje palestineze, sipas një komiteti të udhëhequr nga palestinezët, është thelbësor për ruajtjen e të drejtave dhe stabilitetit.

Fidan shtoi se përpjekjet ndërkombëtare, duke përfshirë takimet me SHBA-të dhe samitet në Sharm El-Sheikh, janë pasur me zhvillime pozitive si shkëmbime pengjesh, ndihma humanitare dhe tërheqje të pjesshme të forcave izraelite. Megjithatë, ai paralajmëroi se armëpushimi mbetet i brishtë dhe Izraeli ka shkelur disa herë marrëveshjen, duke penguar furnizimet e ndihmave.

Fidan përfundoi fjalën e tij duke theksuar rëndësinë e durimit, koordinimit ndërkombëtar dhe respektimit të procesit të dy shteteve për zgjidhjen e çështjes palestineze.

Ministri i Jashtëm turk Hakan Fidan pritet të zhvillojë një takim në Stamboll të hënën për të marrë masa sa më shpejt të jetë e mundur për të ofruar sigurinë dhe administrimin e Gazës nga palestinezët, tha të dielën një burim i ministrisë së jashtme.

Ministrat e jashtëm të Katarit, Arabisë Saudite, Emirateve të Bashkuara Arabe, Jordanisë, Pakistanit dhe Indonezisë do të bashkohen në takim mbi zhvillimet e armëpushimit dhe situatën humanitare në Gaza, ka thënë burimi i ministrisë së jashtme turke.

Burimi theksoi se Fidan pritet të "theksojë rëndësinë e veprimeve të koordinuara nga vendet myslimane që armëpushimi të evoluojë në një paqe të qëndrueshme".

Vendet që marrin pjesë në bisedimet e Stambollit morën pjesë të gjitha në një takim me presidentin e SHBA-së, Donald Trump në Nju Jork në shtator, në margjinat e Asamblesë së Përgjithshme të OKB-së, shkruajnë mediat e huaja, përcjell Telegrafi.

Armëpushimi i ndërmjetësuar nga SHBA-të në Gaza, i cili la të pazgjidhura çështje të vështira si çarmatimi i grupit militant palestinez Hamas dhe një afat kohor për tërheqjen izraelite nga Gaza, është testuar nga dhuna periodike që nga hyrja në fuqi.

Burimi tha se Fidan do të thotë gjatë takimit se Izraeli po "gjen justifikime" për t'i dhënë fund armëpushimit dhe do të theksojë nevojën që bashkësia ndërkombëtare të "marrë një qëndrim të vendosur kundër veprimeve provokuese të Izraelit".

Ai gjithashtu do të thoshte se ndihma humanitare që hyn në Gaza është e pamjaftueshme dhe Izraeli nuk i ka përmbushur detyrimet e tij në këtë drejtim.

Marrëdhëniet midis Turqisë dhe Izraelit kanë arritur nivele të reja gjatë luftës në Gaza, me presidentin Rexhep Tajip Erdogan që kritikoi ashpër sulmet e Izraelit në enklavë.

Turqia ndihmoi në bindjen e Hamasit që të pranonte planin e paqes të Trump dhe ka shprehur gatishmërinë për të marrë pjesë në një grup pune ndërkombëtar për të monitoruar zbatimin e armëpushimit.

STAMBOLL, 1 nëntor /ATSH-DPA/- Ministri i Jashtëm turk, Hakan Fidan u takua sot me anëtarët e Byrosë Politike të grupit islamist palestinez, Hamas në Stamboll.

Takimi vjen përpara bisedimeve të planifikuara të hënën midis ministrave të Jashtëm të disa vendeve myslimane për të diskutuar armëpushimin në Gaza dhe hapat e mundshëm të mëtejshëm.

Fidan tha se takimi do të mbledhë ministra nga tetë vende – që u takuan me presidentin e SHBA-së, Donald Trump në Nju Jork në shtator – Turqia, Katari, Arabia Saudite, Egjipti, Emiratet e Bashkuara Arabe, Jordania, Pakistani dhe Indonezia.

“Bisedimet do të përqendrohen në vazhdimin e fazës së dytë të armëpushimit”, dje tha Fidan.

Ministri i Jashtëm turk tha se çështja kryesore ishte formimi i një force stabilizuese. //a.i/

The post STAMBOLL – Fidan takon zyrtarët e Hamasit përpara bisedimeve për paqen në Gazë appeared first on Agjencia Telegrafike Shqiptare.

Ministri i Jashtëm turk, Hakan Fidan, ka thënë se një përparim në përpjekjet për të zgjidhur luftën e Rusisë kundër Ukrainës mund të ndodhë brenda disa muajve të ardhshëm, shkruan TRT haber.

Ai beson se pavarësisht përshkallëzimit aktual në front, skicat e një marrëveshjeje të mundshme janë bërë më të qarta pas takimit midis sundimtarit të Kremlinit, Vladimir Putin, dhe presidentit të SHBA-së, Donald Trump.

Siç raporton Ukrainska Pravda, Fidan tha se takimi midis udhëheqësve rusë dhe amerikanë në Alaska i dha një shtysë të konsiderueshme procesit të negociatave, transmeton Telegrafi.

"Në këtë takim u ngritën çështje jashtëzakonisht të rëndësishme. Pala ruse ia paraqiti qartë dhe në mënyrë eksplicite kushtet e saj për një armëpushim Trumpit. Trump më vonë i diskutoi ato me presidentin e Ukrainës dhe udhëheqësit evropianë. Ata folën se cilat çështje mund të ecin përpara", tha Fidan.

Ministri shtoi se Turqia po vazhdon bisedimet paralelisht me të gjitha palët - Rusinë, Ukrainën, SHBA-në dhe BE-në.

Fidan tha se përshkallëzimi aktual në luftime nuk duhet të shihet si një dështim i diplomacisë, por më tepër si një strategji tipike ushtarake nga të dyja palët përpara negociatave të mundshme.

"Të dyja palët po e rrisin nivelin e tensionit. Luftimet janë intensifikuar. Ky është një sinjal për palën tjetër. Do të thotë, nëse më duhet të luftoj, kam vendosmërinë, vullnetin dhe aftësinë për ta bërë këtë. Ky është mesazhi që të dyja palët po dërgojnë", tha ai.

Kryediplomati turk shtoi se si Ukraina ashtu edhe Evropa, si dhe Rusia, po i forcojnë përpjekjet e tyre ushtarake për të shmangur shfaqjen e dobësisë dhe për të përmirësuar pozicionet e tyre për negociatat e ardhshme.

Ministri vuri në dukje se pengesa kryesore për paqen mbetet fati i asaj pjese të Donetskut që Rusia ende nuk e ka pushtuar.

"Tani është e qartë se cili është problemi. Rusët duan ta pushtojnë atë. E ukrainasit thonë: Kjo zonë është jetike për integritetin tonë territorial. Nuk mund ta heqim dorë pa luftë. Nëse e humbim, kjo do të hapë rrugën për të humbur më shumë. Në anën tjetër rusët thonë ne do të vazhdojmë të luftojmë sido që të ndodhë. Pasi ta pushtojmë këtë territor, do të lëvizim më tej. Pra, për të shmangur humbjen e më shumë tokës, thjesht na e jepni”, shtoi ministri turk.

Fidan tha se bazuar në bisedat e tij me partnerët amerikanë dhe evropianë, "një përparim mund të ndodhë brenda pak muajsh" për këtë çështje.

Ai shtoi se ka "shqyrtuar disa opsione alternative që mund t'i afrojnë të dyja palët", por nuk pranoi të jepte hollësi.

Ministri gjithashtu e krahasoi situatën në Ukrainë me atë në Rripin e Gazës, duke e quajtur këtë të fundit një "problem më urgjent" për shkak të "shfarosjes sistematike dhe deportimit të popullsisë". /Telegrafi/

ROME,14 shtator /ATSH-AA/ – Ministri i Jashtëm turk, Hakan Fidan, i kërkoi bashkësisë ndërkombëtare të pranojë realitetet në Rripin e Gazës dhe ta mbajë Izraelin përgjegjës për krimet kundër njerëzimit si “hapi i parë drejt një bote më të drejtë”.

Fidan i bëri këto komente në një konferencë të organizuar nga Instituti i Çështjeve Ndërkombëtare (IAI) me seli në Romë, një nga grupet kryesore të ekspertëve në Itali, ku ai vlerësoi zhvillimet aktuale ndërkombëtare dhe iu përgjigj pyetjeve.

Fidan nënvizoi se Turqia dhe Italia nuk janë vetëm fqinjë në Mesdhe, por edhe aleatë të NATO-s dhe partnerë të G20-ës, duke theksuar se të dy vendet kontribuojnë në stabilitetin në Mesdhe dhe Afrikë.

“Partneriteti i Turqisë me Italinë përhapet si krahët e një shqiponje në gjithë Mesdheun dhe Afrikën e Veriut… Nuk është një aleancë e leverdisë. Është një entitet strategjik i lindur nga historia e përbashkët, gjeografia e përbashkët dhe e ardhmja e përbashkët”, tha ai.

Fidan theksoi se në një kohë ndryshimesh globale, bashkëpunimi Turqi-Itali është më jetësor se kurrë, duke vënë në dukje se të dy vendet kanë aftësinë për të formësuar zhvillimet në rajon dhe më gjerë.

Ai e nënvizoi Italinë si një nga partnerët kryesorë ekonomikë të Turqisë me potencialin për të zgjeruar bashkëpunimin në mbrojtje, industri, energji, shkencë dhe ndërlidhje.

Duke iu referuar situatës në Gaza Fidan tha se ajo do të jetë gjithashtu në rendin e ditës gjatë javës së nivelit të lartë të Asamblesë së Përgjithshme të OKB-së në fund të këtij muaji.

“Gaza është prova e vërtetë për bashkësinë ndërkombëtare për të dalluar të drejtën nga e gabuara. Njohja e realitetit në Gaza dhe ekspozimi i krimeve të Izraelit kundër njerëzimit janë hapat e parë drejt një bote më të drejtë”, tha ai. “Nuk ka nevojë të ngurrojmë. Izraeli po kryen gjenocid në Gaza. Ne po i bashkojmë të gjitha vendet me ndërgjegje në anën e njerëzimit. Në këtë drejtim, mbështetja e hapur e Italisë do të jetë më e rëndësishme se kurrë”, shtoi Fidan.   /os/

The post ROME – Fidan: ​​Njohja e realitetit në Gaza, hapi i parë drejt një bote më të drejtë appeared first on Agjencia Telegrafike Shqiptare.

Ministri i Punëve të Jashtme i Turqisë, Hakan Fidan, do të udhëtojë këtë javë për një vizitë pune dyditore në Itali, thanë burime diplomatike turke. Fidan do të takohet me homologun e tij italian Antonio Tajani dhe do të mbajë një fjalim në think-tankun “Istituto Affari Internazionali” gjatë udhëtimit të tij më 11-12 shtator.

Bisedimet pritet të përqendrohen në forcimin e lidhjeve midis Turqisë dhe Italisë, aleatë të NATO-s dhe partnerë strategjikë.

Sipas burimeve, Fidan pritet të theksojë vlerën e kontakteve të nivelit të lartë, të bëjë thirrje për ruajtjen dhe diversifikimin e bashkëpunimit për të arritur një objektiv tregtar prej 40 miliardë dollarësh dhe të nënvizojë rëndësinë e përditësimit të bashkimit doganor të Turqisë me Bashkimin Evropian (BE).

Agjenda do të përfshijë gjithashtu sigurinë dhe lidhshmërinë energjetike në Mesdhe, emigracionin e parregullt, bashkëpunimin në industrinë e mbrojtjes dhe punën e përbashkët në shkencë dhe teknologji, shtuan burimet.

Çështjet rajonale dhe globale si Libia, Siria, Ukraina, Irani, Afrika dhe lufta në Gaza pritet gjithashtu të trajtohen, sipas burimeve. Të dy ministrat së fundmi u takuan në maj në margjinat e takimit të ministrave të jashtëm të NATO-s në Antalya të Turqisë.

Marrëdhëniet bilaterale

Në prill, Presidenti turk Recep Tayyip Erdoğan dhe kryeministrja italiane Giorgia Meloni bashkëkryesuan Samitin e 4-t Ndërqeveritar Turqi-Itali në Romë, i ndjekur nga një samit trepalësh Turqi-Itali-Libi në Stamboll në gusht.

Tregtia dypalëshe midis Turqisë dhe Italisë arriti në 32,2 miliardë dollarë në vitin 2024, duke e bërë Italinë tregun e pestë më të madh të eksportit të Turqisë në nivel global dhe të dytin brenda BE-së.

Në samitin e Romës, të dy vendet vendosën një objektiv të ri prej 40 miliardë dollarësh.

Bashkëpunimi në fushën e mbrojtjes është zgjeruar gjithashtu, me prodhuesin turk të dronëve Baykar që nënshkroi një marrëveshje me Leonardo të Italisë për sisteme ajrore pa pilot në mars dhe përfundoi blerjen e firmës hapësinore Piaggio në qershor.

Turqia është gjithashtu në bisedime me Italinë për avionët luftarakë Eurofighter Typhoon. Italia është ndër partnerët kryesorë të energjisë të Turqisë nëpërmjet Korridorit Jugor të Gazit, i cili ka furnizuar gaz në Itali nëpërmjet Gazsjellësit Trans Adriatik që nga viti 2020.

Rreth 50.000 qytetarë turq jetojnë në Itali, ndërsa më shumë se 719.000 italianë vizituan Turqinë në vitin 2024.

Ministri i Jashtëm turk, Hakan Fidan, paralajmëroi sot Izraelin se çdo kërcënim ndaj Turqisë do të marrë një përgjigje të menjëhershme. Deklarata u bë gjatë një seance të jashtëzakonshme të parlamentit turk mbi situatën në Gaza. “Nuk kemi ndërmend të sulmojmë askënd, përveç nëse kërcënohemi. Në atë rast nuk do të tërhiqemi dhe përgjigja jonë […]

The post Turqia paralajmëron Izraelin: Nëse kërcënohemi, do të përgjigjemi menjëherë appeared first on BoldNews.al.

ANKARA, 29 gusht /ATSH-AA/ – Ministri i Punëve të Jashtme i Turqisë, Hakan Fidan, paralajmëroi se sulmet e vazhdueshme të Izraelit në Gaza dhe në të gjithë Palestinën kërcënojnë ta përfshijnë të gjithë rajonin në konflikt, nëse nuk ndalen.

Duke folur në një seancë të jashtëzakonshme të Kuvendit të Madh Popullor të Turqisë (TBMM) në Ankara mbi Gazën, Fidan tha se Izraeli ka “kryer gjenocid në Gaza për dy vitet e fundit, duke injoruar vlerat themelore humanitare para syve të botës”.

Ai tha se Turqia ka ndërprerë të gjithë tregtinë me Izraelin, ka mbyllur hapësirën ajrore për avionët izraelitë dhe nuk lejon anijet turke të shkojnë në portet izraelite.

Fidan shtoi se Ankaraja kundërshton çdo propozim që parashikon zhvendosjen e palestinezëve nga Gaza, duke i quajtur plane të tilla “të pavlefshme”. Ai tha se mizoritë e kryera në Gaza “janë regjistruar si një nga kapitujt më të errët në historinë e njerëzimit”.

Kryediplomati turk e përshkroi rezistencën palestineze si një luftë që “do të ndryshojë rrjedhën e historisë, do të bëhet simbol për të shtypurit dhe do të lëvizë gurët e një rendi të kalbur”.

Fidan dënoi më tej sulmet më të gjera rajonale të Izraelit, duke thënë: “Ky qëndrimi i pamatur (sulmet e Izraelit në Gaza, Liban, Jemen, Siri, Iran); është manifestimi më i qartë i një mentaliteti i shtetit terrorist që sfidon rendin ndërkombëtar”.

Lidhur me Sirinë, ai theksoi se Turqia “nuk do të lejojë që komunitetet e lashta dhe të çmuara të Sirisë të shfrytëzohen” për qëllime të shtrembëruara kundër integritetit territorial të Sirisë.

Gjatë seancës, kryetari i TBMM-së, Numan Kurtulmuş, bëri thirrje gjithashtu për “hapa konkretë” kundër Izraelit, duke përfshirë pezullimin e anëtarësimit të tij në organizata ndërkombëtare si OKB-ja, derisa të braktisë “politikat gjenocidale”.

Pas 22 muajsh konflikti të pamëshirshëm, monitoruesi global i urisë, Klasifikimi i Fazës së Sigurisë Ushqimore të Integruar (IPC) tha se mbi gjysmë milioni njerëz në Rripin e Gazës po përballen me urinë, varfërinë dhe vdekjen, ndërsa 1,07 milion njerëz të tjerë, mbi gjysma e popullsisë, po përballen me nivele emergjente të pasigurisë akute ushqimore.

Izraeli ka vrarë rreth 63 mijë palestinezë në Rripin e Gazës që nga tetori i vitit 2023. Fushata ushtarake e ka shkatërruar enklavën, e cila po përballet me zi buke.

Nëntorin e kaluar, Gjykata Ndërkombëtare Penale lëshoi ​​urdhërarreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.

– ⁠Turqia ka ndërprerë tregtinë me Izraelin që nga 2 maji 2024

Turqia e uli tregtinë e saj me Izraelin me afërsisht 30 për qind në periudhën shtatëmujore nga 7 tetori 2023 deri më 2 maj 2024.

Në fazën e parë, qeveria turke ndaloi eksportet në Izrael më 9 prill 2024 për 1.019 produkte të ndara në 54 kategori.

Më 2 maj 2024, u bë e ditur se eksporti, por edhe importi dhe tregtia tranzite me Izraelin u ndërprenë plotësisht, duke e çuar tregtinë me këtë vend në zero.

The post TURQI – Fidan: Sulmet e pamatura të Izraelit do t’i vënë flakën të gjithë rajonit appeared first on Agjencia Telegrafike Shqiptare.

Vendet myslimane duhet patjetër të veprojnë të bashkuara dhe ta kundërshtojnë planin e Izraelit për ta marrë nën kontroll Qytetin e Gazës, tha të shtunën ministri i Jashtëm i Turqisë, Hakan Fidan, pas bisedimeve në Egjipt.

Fuqitë rajonale, Egjipti dhe Turqia, e dënuan planin e Izraelit të premten.

Ankaraja tha se kjo shënon një fazë e re në atë që e quajti politikë “gjenocidale dhe ekspansioniste” të Izraelit, duke bërë thirrje për masa globale për të ndaluar zbatimin e tij.

Izraeli e mohon këtë përshkrim të veprimeve të tij në Gazë.

Duke folur në një konferencë të përbashkët për shtyp në El Alamein me homologun e tij egjiptian, Badr Abdelatty, pas një takimi edhe me presidentin e Egjiptit, Abdel Fattah al-Sisi, Fidan tha se Organizata për Bashkëpunim Islamik (OIC) ishte thirrur në një mbledhje urgjente.

Fidan tha se politika e Izraelit synon t’i detyrojë palestinezët të largohen nga tokat e tyre përmes urisë dhe ta pushtojë përgjithmonë Gazën, duke shtuar vendet nuk e kanë më asnjë arsye për ta vazhduar mbështetjen e Izraelit.

Izraeli e mohon se synon shkaktimin e krizës së urisë në Gazë dhe thotë se grupi militant palestinez Hamas – i shpallur organizatë terroriste nga SHBA dhe BE – mund t’i japë fund luftës duke u dorëzuar.

“Ajo që po ndodh sot është një zhvillim shumë i rrezikshëm… jo vetëm për popullin palestinez apo vendet fqinje”, tha Abdelatty, duke shtuar se planet e Izraelit janë “të papranueshme”.

Abdelatty tha se ka pajtueshmëri të plotë me Turqinë për çështjen e Gazës dhe iu referua një deklarate të publikuar të shtunën nga Komiteti Ministror i OIC, i cili dënoi planin e Izraelit.

Komiteti i OIC-it tha se plani i Izraelit përbën “një përshkallëzim të rrezikshëm dhe të papranueshëm, një shkelje flagrante të së drejtës ndërkombëtare dhe një përpjekje për të forcuar pushtimin e paligjshëm”, duke paralajmëruar se ai do të “shkatërrojë çdo mundësi për paqe”.

Ekipet ndërmjetësuese nga Egjipti, Katari dhe Shtetet e Bashkuara kanë punuar prej muajsh për të arritur një armëpushim mes Izraelit dhe Hamasit.

OIC u bëri thirrje fuqive botërore dhe Këshillit të Sigurimit të OKB-së që “të marrin përgjegjësitë e tyre ligjore dhe humanitare dhe të ndërmarrin veprime urgjente për të ndaluar” planin e Izraelit për Qytetin e Gazës, duke siguruar njëkohësisht përgjegjësinë e menjëhershme për atë që e quajti shkelje të ligjit ndërkombëtar nga Izraeli./REL