TIRANË, 5 janar/ATSH/ Me mbylljen e vitit 2025, Shqipëria thyen rekordin e një viti më parë, duke kapërcyer shifrën e 12 milionë vizitorëve me pasaportë të huaj.

Ministri i Turizmit, Kulturës dhe Sportit, Blendi Gonxhja e cilësoi sot këtë shifër një rezultat që konfirmon konsolidimin e vendit si një destinacion turistik gjithëvjetor.

Gonxhja tha se “Shqipëria ka interes të qëndrueshëm përtej sezonit veror dhe me oferta të larmishme në turizëm kulturor, natyror, kulinar, sportiv dhe jo vetëm, duke forcuar pozicionin e saj në hartën ndërkombëtare të turizmit”.

Shqipëria është shndërruar në një ofertë turistike të turizmit gjithëvjetor, me atraksione të të gjitha llojeve.

Në jug, plazhet me gurë e ujë të pastër tërheqin numrin më të madh të vizitorëve, ndërkohë që në veri shumë vizitorë drejtohen për në Theth e Valbonë. Gjirokastra, Berati, Butrinti, Kruja, Tirana, Shkodra, etj., janë destinacione të kërkuara në çdo stinë për turizëm historik dhe kulturor.

Gjithashtu muzetë dhe parqet kombëtare tërhoqën qindra-mijëra turistë gjatë vitit 2025.

/a.f/r.e/

The post Gonxhja: Shqipëria priti mbi 12 milionë vizitorë të huaj në vitin 2025 appeared first on Agjencia Telegrafike Shqiptare.

TIRANË, 3 janar/ATSH/ Nga menaxhimi i territorit dhe investimet infrastrukturore, te përballimi i fluksit turistik dhe përmirësimi i shërbimeve publike, Durrësi mbetet një hapësirë ku vendimmarrja lokale ka ndikim të drejtpërdrejtë në jetën e përditshme të qytetarëve.

Kryebashkiakja e qytetit bregdetar, Emiriana Sako, ndan në një intervistë për ATSH-në, vizionin e saj për drejtimin e qytetit, prioritetet e institucionit që ajo drejton dhe politikat e ndjekura për një zhvillim të qëndrueshëm.

Në një bisedë që prek dimensionin ekonomik, social dhe urban, Sako flet për projektet strategjike në zbatim, sfidat e administrimit të një qyteti të madh si Durrësi, dhe përgjegjësinë për shërbime cilësore për komunitetin.

Sako u shpreh se prioritetet janë të ndërtuara mbi vizionin për ta shndërruar Durrësin në një qytet modern, dhe plotësisht të harmonizuar me standardet bashkëkohore dhe një qytet turistik evropian. Në thelb të këtij vizioni qëndrojnë disa shtylla kryesore si zhvillimi ekonomik dhe fuqizimi i bizneseve lokale, turizëm gjithëvjetor, fuqizimi dhe integrim i të rinjve në ekonominë e qytetit, mbështetje sociale për familjet në nevojë, një qytet modern, të qëndrueshëm dhe me standarde bashkëkohore.

“Durrësi është një qytet me potencial të jashtëzakonshëm urban, ekonomik dhe social, dhe kjo na motivon çdo ditë të punojmë më fort për ta zhvilluar në mënyrë të qëndrueshme. Sot, situata urbane paraqet një përzierje progresi dhe sfidash. Ne kemi realizuar ndërhyrje të rëndësishme në infrastrukturë dhe kemi rikualifikuar disa zona që kishin nevojë për vëmendje. Po realizojmë projekte të rëndësishme infrastrukturore që synojnë përmirësimin e cilësisë së jetës, forcimin e lidhjeve brenda qytetit dhe rritjen e hapësirave publike”, tha Sako.

“Në aspektin social, jemi të fokusuar te rritja e shërbimeve komunitare, përfshirja e të rinjve dhe mbështetja e shtresave në nevojë. Gjithsej janë 400 familje që përfitojnë nga skema e ndihmës ekonomike. Ne kemi 7 qendra që ofrojnë shërbime ditore, shërbime të specializuara dhe qendra multifunksionale për moshën e tretë, për fëmijë etj. Janë mesatarisht 1700 qytetarë çdo vit që marrin shërbime nga të gjitha këto qendra”, shtoi ajo.

Sipas Sakos, Durrësi është qendra e investimeve strategjike kombëtare, një destinacion për investitorët e huaj, sidomos në aspektin e investimeve infrastrukturore, industriale, turistike dhe kulturore.

Sako u shpreh se aktualisht po zhvillohen projekte të rëndësishme, me rëndësi strategjike për infrastrukturën dhe qarkullimin rrugor si, dy unazat e qytetit: unaza Spital-Currila dhe ajo Spitallë-Currila, përfundimi i shëtitores së plazhit, duke filluar nga Ura e Dajlanit deri tek Konvaleshenca, rikonstruksioni i pallatit të kulturës “Aleksandër Moisiu”, rikonstruksioni i “Mauzoleut të Dëshmorëve” etj.

Durrësi, si qyteti i dytë më i madh pas Tiranës, po merr gjithnjë e më shumë vëmendjen e Qeverisë në aspektin e investimeve dhe projekteve të ndryshme, si Akademia Sportive e Manchester City dhe akademia e Rafael Nadal.

Sipas Sakos, tërheqja e investimeve sportive vjen pasi Durrësi ofron një kombinim faktorësh strategjikë që pak zona të tjera në vend i kanë, si qyteti i dytë më i madh në Shqipëri dhe porta kryesore detare e vendit.

Sako e cilësoi Durrësin kryeqytet të turizmit dhe shpjegoi vizionin për rritjen e cilësisë së shërbimeve turistike si edhe promovimin e destinacioneve apo atraksioneve turistike. Sipas saj, edhe sezoni i fundit veror i tejkaloi pritshmëritë.

“Vitin e kaluar ishin mbi 1 milion turistë që e kanë vizituar qytetin tonë, ndërsa këtë vit duke parë fluksin e lartë mendojmë se ky numër mund të arrijë deri në 1 milion e 500 mijë vizitorë”, tha Sako.

Në Portin e Durrësit vetëm për 9-mujorin e vitit 2025 numërohen 403.554 hyrje në total, rreth 7% më shumë në krahasim me të njëjtën periudhë të vitit të kaluar.

“Mbështetja vit pas viti e qeverisë së kryeministrit Rama me projekte madhore që e kanë transformuar dhe do të vijojnë ta transformojnë qytetin krijon një klimë të favorshme për zhvillimin e mëtejshëm të turizmit, që është motori ekonomik i Durrësit. Kemi filluar një investim të rëndësishëm siç është projekti i hyrjes së Durrësit e cila do të jetë një hyrje e denjë për një qytet turistik”, pohoi Sako.

Investime të tjera janë faza e dytë e shëtitores së plazhit, zgjerimi i brezit të rërës si dhe ndërtimi i dy unazave në qytet.

“Të tjera investime në infrastrukturë do të kryhen gjatë vitit 2026 me synim sektorin turistik. Durrësin e pret një zhvillim i mëtejshëm falë projekteve madhore si projekti i Marinës Turistike, projekti i Portit Tregtar në Porto Romano, projekti i Amfiteatrit dhe rivitalizimi i gjithë qendrës historike, rijetësimi i monumenteve të kulturës, akademia e Manchester City dhe ajo e tenisit Rafael Nadal”, vijoi ajo.

Ndërkaq, vetëm gjatë 10 muajve të vitit 2025, numri i vizitorëve vetëm në Amfiteatër dhe tek Torra Veneciane ishte 50.129 vizitorë, nga ku shënohet një rritje prej 39% në krahasim me të njëjtën periudhë të vitit 2024.

Sako informoi se bashkia ka ndërmarrë hartimin e Planit Vendor të Menaxhimit të Mbetjeve Urbane, në kuadër të angazhimit si anëtarë të Konventës së Bashkive të Ballkanit Perëndimor.

“Një risi e rëndësishme është procesi pilot i evadimit në burim, ku mbetjet zbrazen direkt nga koshat familjarë në disa lagje, me synimin për të rritur efikasitetin dhe për të eliminuar pikat problematike. Paralelisht, kryejmë kontroll të rregullt të pajisjeve dhe zëvendësim të kontejnerëve të dëmtuar, si dhe vendosje të koshave shtesë në zonat që e kërkojnë. Nëpërmjet këtyre masave dhe zbatimit të planit vendor, Durrësi po ndërton një sistem më efikas, më të pastër dhe më të orientuar drejt standardeve moderne të menaxhimit të mbetjeve, duke garantuar shërbim më cilësor për çdo lagje dhe çdo banor të qytetit”, tha Sako.

Kryetarja e bashkisë Durrës, në fund u shpreh se “vizioni ynë është të ndërtojmë një qytet modern, të qëndrueshëm dhe të drejtë për të gjithë”.

“Ne po investojmë në infrastrukturë më moderne, në hapësira publike më cilësore, në një urbanistikë që respekton historinë dhe mbron të ardhmen, shërbime më të mira, investime që sjellin zhvillim afatgjatë, si dhe në projekte që rrisin mirëqenien e qytetarëve”, përfundoi Sako.

Foto nga aktivitete ku e pranishme është edhe kryebashkiakja e Durrësit, Emiriana Sako

1 nga 10

/e.i/j.p/r.e/

The post Sako për ATSH: Investimet që po e transformojnë Durrësin në qytet turistik evropian appeared first on Agjencia Telegrafike Shqiptare.

TIRANË, 1 janar/ATSH/ Në ditën e parë të vitit 2026, Korça është mbushur nga gjallëria e turistëve, qytetarëve vendas dhe atyre të huaj që kanë zgjedhur këtë qytet për të kaluar natën e ndërrimit të viteve.

Korça vazhdon të mbetet destinacioni i preferuar i qindra qytetarëve që zgjedhin këtë qytet për të kaluar festat e fundvitit.

Kryeministri Edi Rama ndau në rrjetet sociale pamje nga Korça, plot me turistë të huaj e qytetarë të shumtë.

Dekori shumëngjyrësh i shtrirë në lagjet kryesore të qytetit, shtëpizat e drurit, pista e patinazhit për fëmijët dhe të rinjtë, janë vetëm disa prej atraksioneve që ofron Korça për festa.

Qytetarët kanë zgjedhur Pazarin e Vjetër, Pedonalen e qytetit si dhe zonën përreth Katedrales, për të shijuar bukuritë magjepsëse të Korçës për festat e fundvitit.

/e.i/j.p/

The post Dita e parë e 2026-ës në Korçë appeared first on Agjencia Telegrafike Shqiptare.

TIRANË, 28 dhjetor /ATSH/ Festat e fundvitit e gjejnë Korçën plot jetë, me aktivitete kulturore që sjellin gëzim, muzikë dhe atmosferë festive në çdo cep të qytetit.

Kryeministri Edi Rama ka ndarë mbrëmjen e të dielës foto nga atmosfera e festave shoqëruar me diçiturën: “Korça e turistëve në çdo stinë”.

Bashkia e Korçës ka përgatitur një program të pasur argëtues për të gjitha moshat për ditët e fundit të vitit dhe ditët e para të vitit të ri 2026.

The post Korça e turistëve në çdo stinë appeared first on Agjencia Telegrafike Shqiptare.

TIRANË, 28 dhjetor/ATSH/ Festat e fundvitit e kanë kthyer Shkodrën në një nga destinacionet më të preferuara në vend për këtë dhjetor.

Mes koncerteve, muzikës, dekorit shumëngjyrësh, atmosfera festive ndihet në çdo shesh dhe rrugë të qytetit duke përfshirë të gjitha grup-moshat.

Kryeministri Edi Rama ndau në rrjetet sociale, foto nga Shkodra sot, ku qytetarë të shumtë, por edhe turistë të huaj kanë mbushur rrugët e qytetit.

Fëmijët shijojnë eksperiencën në pistën e patinazhit të akullit të ndërtuar në sheshin qendror të Shkodrës, ndërsa shtëpizat e drurit, ofrojnë produkte artizanale dhe krijime të tjera, të cilat menaxhohet nga të rinjtë e “Act4Shkodra”. Këto hapësira nuk janë vetëm festive, por edhe solidarizuese, pasi të ardhurat e mbledhura shkojnë për bamirësi për shtresat në nevojë.

/e.i/r.e/

The post Shkodra sot, të dielën e fundit të vitit appeared first on Agjencia Telegrafike Shqiptare.

TIRANË, 27 dhjetor /ATSH–Ermira Isufaj/

Dritat e fundvitit kanë ndezur Shkodrën dhe bashkë me to edhe ritmin e qytetit. Në sheshin para bashkisë, ku muzika dëgjohet deri në rrugicat përreth, turistë dhe qytetarë ndalen, fotografojnë dhe bëhen pjesë e festës që këtë fundvit e ka kthyer Shkodrën në një nga destinacionet më të kërkuara në vend.

Sheshi është epiqendra e festimeve, ku çdo mbrëmje ngjiten artistë të njohur, duke e shndërruar qytetin në një skenë të hapur. Kalendari festiv do të kulmojë në natën e ndërrimit të viteve me performanca nga Arilena Ara, Noizy, Elvana Gjata, Sidrit Bejleri dhe spektaklin e fishekzjarreve.

Drejtoresha e Kulturës në Bashkinë Shkodër, Sara Smaja, thotë për ATSH-në se ky fundvit ka ardhur ndryshe, jo vetëm për shkodranët, por edhe për turistët e shumtë që kanë zgjedhur qytetin për të festuar. Risia e këtij viti është shtrirja e atmosferës festive në disa pika kryesore të qytetit.

Për fëmijët është krijuar një hapësirë e posaçme pranë lulishtes së bashkisë, ndërsa përgjatë pedonales “Kolë Idromeno” rinia ka ngritur shtëpizat e saj festive. Të menaxhuara nga të rinjtë e “Act4Shkodra”, këto hapësira nuk janë vetëm festive, por edhe solidarizuese, pasi të ardhurat e mbledhura shkojnë për bamirësi për shtresat në nevojë.

Smaja thekson se ky është viti i tretë që bashkia e ka çuar festën në një tjetër dimension, duke dyfishuar numrin e turistëve. Strukturat akomoduese janë pothuajse të mbushura dhe gjetja e vendeve të lira për ditët e fundvitit është gjithnjë e më e vështirë.

Atmosfera festive shtrihet edhe në institucionet kulturore të qytetit. Teatri “Migjeni” ka sjellë premiera dhe varietetin e humorit dhe këngës “Kartolinën ta dërgova”, ndërsa Orkestra Simfonike ka mbajtur koncert me të ftuar sopranon e njohur ndërkombëtare Marigona Qerkezi. Muzeu Historik dhe Galeria e Arteve ofrojnë ekspozita dhe veprimtari që pasqyrojnë trashëgiminë dhe krijimtarinë bashkëkohore të Shkodrës.

Krahas festës, bashkia ka ndërmarrë masa për garantimin e rendit dhe sigurisë. Policia Bashkiake dhe ajo e Rendit janë të pranishme në sheshe dhe në akset kryesore për menaxhimin e trafikut dhe mbarëvajtjen e aktiviteteve.

Përtej muzikës dhe dritave, turistët po shfrytëzojnë edhe atraksionet historike dhe natyrore të qarkut Shkodër. Kalaja e Rozafës, liqeni i Shkodrës, Buna, Thethi, Valbona dhe malet përreth mbeten pjesë e itinerarit edhe në dimër.

Në këto ditë festash, Shkodra jo vetëm feston, por edhe mirëpret, duke i dhënë kuptim ftesës së saj tradicionale për vizitorët: “Ardhshi të bardhë”.

Festat në Shkodër; Foto: Florjan Abazaj

1 nga 27

/e.i/r.e/

The post Shkodra, qyteti që di të festojë appeared first on Agjencia Telegrafike Shqiptare.

Me turisttët që sa vijnë e bëhen më koprracë dhe popullsinë vendase që është tkurrur për shkak të emigracionit, bizneset vendase ankohen për konsum të dobët edhe në kulmin e sezonit të verës, çka bëri që shumë mallrat tu mbeteshin stok. Ky perceptim i tyre tashmë konfirmohet dhe nga të dhënat e INSTAT. Sipas INSTAT […]

The post “Bllofi” i turistëve, nuk nxitën konsumin në verë appeared first on BoldNews.al.

TIRANË, 14 dhjetor/ATSH/ Tirana është një prej destinacioneve më të vizituara në rajon, duke tërhequr mijëra turistë të huaj nga e gjithë bota që zgjedhin kryeqytetin për të përjetuar festat e fundvitit.

Isabell Mathersx dhe Lydia Bright janë dy vajza nga Shtetet e Bashkuara të Amerikës, të cilat e kanë të parën vizitë të tyren në vendin tonë.

Ato shprehen se Shqipëria është një vend i bukur, me njerëz mikpritës, ndërsa e etiketojnë Tiranën si një qytet ideal për të kaluar disa ditë pushimesh.

“Kjo është hera e parë që vijmë në Shqipëri. Jemi këtu nisur nga kurioziteti, pasi kemi dëgjuar shumë të flitet për vendin tuaj. Na pëlqen kultura, tradita, ushqimi. Kemi vizituar qytetin e Beratit, kemi parë shpellën e Pëllumbasit në Tiranë, që ishte një eksperiencë e jashtëzakonshme. Ju keni shumë vende të bukura, por sidomos natyra është fantastike”, u shprehën ato.

Një tjetër grup prej tre të rinjsh, thanë për ATSH se kanë ardhur mbrëmjen e djeshme në Tiranë nga Indonezia.

“Do të qëndrojmë këtu një javë dhe mezi presim të eksplorojmë Tiranën dhe disa qytete të tjera të Shqipërisë”.

Gerjan Duri, udhërrëfyes i një kompanie turistike në Tiranë, teksa shoqëron një grup prej 37 turistësh izraelitë, shprehet se ka interes të shtuar dhe grupe të mëdha të huajsh që zgjedhin ta vizitojnë Tiranën, sidomos gjatë festave.

Ai tha se ky grup turistësh do të zhvillojë një tur pesëditor në Tiranë gjatë të cilit do të vizitojnë edhe Shkodrën, Beratin dhe Krujën.

“Sipas Durit, turistët shprehen të kënaqur me Tiranën dhe qytetet e tjera, veçanërisht gjatë periudhës së festave të dhjetorit. Ata vizitojnë pikat kryesore turistike dhe konsumojnë gatimet tradicionale.”

Tirana po konsolidohet si një destinacion i sigurt dhe mikpritës, ndërsa rritja e numrit të turistëve të huaj po e forcon profilin e kryeqytetit si destinacion turistik gjithëvjetor.

/e.i/a.f/r.e/

The post Turistë të huaj në kryeqytet për festat appeared first on Agjencia Telegrafike Shqiptare.

TIRANË, 14 dhjetor/ATSH/ – Me pasurinë e tij unike të artefakteve kishtare dhe ikonografisë bizantine Muzeu Kombëtar Ikonografik “Onufri” në Berat edhe në këtë dhjetor është i mbushur me vizitorë.

Drejtori i Qendrës Muzeore Berat, Miklor Pasku, tha sot për ATSH-në se “edhe pse jemi drejt fundit të vitit, çdo ditë muzeun e vizitojnë grupe turistësh të huaj, por edhe vizitorë vendas”.

“Nga janari deri tani muzeu është vizituar nga rreth 100 mijë vizitorë, 75% prej të cilëve janë të huaj, kryesojnë polakët, francezët, italianët, gjermanët, spanjollët izraelitët, etj.”, tha Pasku.

Muzeu i Ikonografisë “Onufri” është organizuar në ambientet e kishës “Fjetja e Shën Marisë”, në Kalanë e Beratit, prej 27 shkurtit të vitit 1986.

Muzeu mban emrin e Onufrit, kryemjeshtrit të pikturës ikonografike shqiptare në shekullin XVI. Katedralja – sipas mbishkrimeve që mbart – rezulton të jetë rindërtuar në vitin 1797 mbi themelet e një kishe më të vjetër të periudhës bizantine.

Ajo përfaqëson një nga arkitekturat më tipike pasbizantine në qytetin e Beratit. Koleksioni i muzeut përbëhet nga 196 ikona dhe objekte liturgjike.

/k.s/j.p/r.e/

The post Rreth 100 mijë vizitorë në muzeun “Onufri” në Berat appeared first on Agjencia Telegrafike Shqiptare.

Turistëve nga dhjetëra vende, përfshirë Mbretërinë e Bashkuar, do t’u kërkohet të dorëzojnë historikun e rrjeteve sociale të përdorura gjatë pesë viteve të fundit si kusht për hyrje në Shtetet e Bashkuara, sipas një propozimi të ri të bërë publik nga zyrtarët amerikanë. Kushti i ri do të zbatohet për shtetasit e vendeve që kanë […]

The post Trump ashpërson hyrjet për turistët, kërkohet historiku 5-vjeçar i rrjeteve sociale appeared first on BoldNews.al.

Turet kulturore të vjeshtës arritën të kompensonin rënien e ritmit turistik veror, duke e mbajtur këtë vit sërish në krye për numrin e vizitorëve të huaj. Deri në tetor, Shqipëria ka pritur 11.1 milionë turistë, një shifër që tregon rritje, edhe pse të moderuar. Pavarësisht numrave, bizneset e sektorit nuk janë të kënaqura. Të ardhurat rezultojnë më të ulëta nga sa pritej dhe operatorët turistikë e lidhin këtë me një ndryshim të qartë në profilin e turistit: sot mbizotërojnë të rinjtë që vijnë të frymëzuar nga rrjetet sociale, të cilët synojnë të shpenzojnë minimalisht. Operatorët turistikë nuk presin surpriza për vitin 2026. Ai shihet si një vijim i natyrshëm i këtij viti. Ajo që vihet në dyshim është qëndrueshmëria. Për të garantuar këtë duhet të merren masa konkrete në përmirësimin e infrastrukturës në zonat turistike, garantimin e furnizimit me ujë dhe energji, si dhe në përmirësimin e shërbimit.

Nertila Maho

Thuajse në mbyllje të vitit, bizneset në sektorin e turizmit nuk e thonë dot qartësisht nëse 2025-a ishte një vit suksesi apo zbehjeje.

Operatorët turistikë pohojnë se në shifër vizitorësh, ky vit mbetet i mirë, me një rritje të moderuar që ka ardhur si rrjedhojë e tureve kulturore të pranverës dhe vjeshtës.

Në raport me të ardhurat e gjeneruara, bizneset e sektorit janë skeptikë. Tipologjia e turistit, kryesisht e re, në kërkim të eksperiencave por pa shpenzuar shumë, ka sjellë më pak të ardhura për ta. Ky rezultat vjen si efekt i një “marketingu” që s’mund ta kontrollosh.

Është viraliteti i videove në rrjete sociale që ka bindur një pjesë të mirë të turistëve se Shqipëria është një përvojë për t’u provuar dhe mbi të gjitha, shumë e lirë dhe pikërisht ata kanë kërkuar opsionet më të lira të mundshme.

Në akomodim kanë mbizotëruar apartamentet apo hostel, kurse në konsum blerjet në supermarket apo dyqanet e ushqimit të shpejtë. Sigurisht kjo nuk vlen për të gjithë turistët, por tipologjia mbizotëruese ka qenë kjo.

Balancimin e kanë bërë turistët që vijnë në ture kulturore dhe ata të moshës së tretë nga Europa Perëndimore, të cilët eksperiencën e Shqipërisë nuk e shohin si një “check in” por si një periudhë çlodhjeje me më shumë zgjedhje nga oferta turistike.

Turistë ka, por janë kursimtarë, ecuria e vitit 2025

Deri në fund të tetorit, Shqipërinë e vizituan 11.1 milionë të huaj. Të paktën kjo ishte shifra që raportoi Ministria e Turizmit, Kulturës dhe Sportit me një rritje 7% në raport me janar – tetor 2024.

Gjasat janë që ky vit të regjistrojë një rritje disi më të ulët se ajo e një viti më parë, por në total të tejkalojë rezultatin 11.7 milionë vizitorë që u regjistrua deri në fund të 2024-s.

Pavarësisht një numri më të lartë të hyrjeve të të huajve, konsumi ka qenë më i zbehtë duke lënë kështu më pak para në ekonomi.

Si numër vizitorësh jemi te pritshmëritë që kishim, pra që ky vit do të ishte njësoj si viti 2024. Ndoshta mund të cilësohet pak më i zbehtë sezoni veror. Kanë qenë turistë me kosto të ulët, të cilët kanë zgjedhur Tiranën, vendet rurale, agroturizmet.

Karakteristikë e këtij sezoni veror ishte rënia e turistëve cilësorë, pra atyre që paguajnë më shumë dhe kërkojnë më shumë shërbime. Kishte rënie të këtij grupi në raport me vitin 2024”, shprehet Kryetari i Unionit Turistik Shqiptar, Rrahman Kasa.

Ndryshimi i tipologjisë së turistit duket se lidhet drejtpërdrejt me formën që ka ndikuar zgjedhjen e këtyre të huajve për të ardhur në Shqipëri dhe pjesa më e madhe u janë referuar rrjeteve sociale.

Viraliteti që mori vendi ynë në rrjete sociale, që fillimisht lidhej me bukuritë natyrore, ushqimin e mirë dhe koston e lirë duket se u kthye në një bumerang që ka tërhequr gjithmonë e më shumë “kursimtarë” në një lloj “gare” për eksperiencën sa më të lirë.

“Nuk është se nuk patëm turistë këtë verë. Ndoshta patëm njësoj ose më shumë por ajo që bëri diferencën është tipologjia e turistit.

Kjo është një tipologji e re ku dominojnë kryesisht moshat e reja që parapëlqejnë të shpenzojnë pak dhe të krijojnë eksperienca.

Kërkojnë alternativat më të lira. Kjo moshë kështu sillet kudo jo vetëm në Shqipëri”, – pohon Arben Çipa, nga “Sipa Tours”.

Burimi: INSTAT

Vjeshta korrigjon verën, turet kulturore gjithmonë e më shumë interes

Teksa vera shfaqi një situatë të zbehtë për turizmin, pranvera dhe tani edhe vjeshta përmirësuan bilancin turistik të vitit.

Operatorët turistikë shprehen se kjo periudhë ka qenë me një ecuri pozitive dhe të huajt po parapëlqejnë gjithmonë e më shumë që në formë të organizuar në periudha kryesisht njëjavore të vizitojnë qytetet më të rëndësishme në aspektin kulturor.

“Vjeshta është shumë mirë. Ka një rritje të qëndrueshme dhe grupe të shumta që vijnë me ture kulturore në formë të organizuar. Po kështu, ka edhe shumë turistë individualë që shpenzojnë pak dhe zgjedhin të qëndrojnë nëpër AirBNB.

Turet kulturore kanë qenë më të qëndrueshëm. Janë turistë që edhe shpenzojnë pak më shumë dhe zgjedhin të qëndrojnë deri në shtatë net duke lëvizur dhe duke eksploruar vende të ndryshme.

Vizitojnë Veriun, pra Valbonën dhe Thethin, vizitojnë vendet historike siç është Berati dhe Gjirokastra dhe ndalen edhe në Sarandë. Deri më tani mund të themi që numrat janë të kënaqshëm”, – nënvizon z. Kasa.

Të njëjtën tendencë konfirmon edhe z. Çipa, i cili nga muajt e vjeshtës veçon shtatorin i cili bëri diferencën edhe për atë bilancin e turizmit të rërës dhe detit.

Turet kulturore të përqendruara sidomos në tetor dhe nëntor mbeten në nivele të kënaqshme.

“Është vënë re një miks i turistit të pavarur, pra që vjen individualisht dhe operatorëve turistikë që sjellin në mënyrë të organizuar vizitorë për ture kulturore.

Këto të fundit kanë pasur ritëm të kënaqshëm dhe akoma edhe sot që jemi në nëntor, shifrat e tureve kulturore mbeten në nivele të mira”, pohon ai.

Burimi: INSTAT

Nga shërbimi te mungesa e ujit dhe infrastruktura, pikat ku duhet të reflektojmë

Gjatë këtij viti, shërbimi në sektorin e turizmit ka vijuar të shfaqë presionin që sjell mungesa e fuqisë punëtore të thjeshtë, por sidomos asaj të kualifikuar.

Z. Çipa shprehet se shërbimi te ne mbetet ende elementar.

Ai gjykon se ndoshta viti tjetër do ta gjejë më të përgatitur sektorin sepse po rekrutohen vazhdimisht punonjës të huaj.

“Ndoshta mund të evoluojmë pak në shërbim, pasi pjesën më të madhe të stafit po e marrim nga jashtë dhe kjo do të na bëjë të mundur që të përmirësohemi disi, por duhet të vihet theksi te profesionistët e sektorit që janë pika kyçe”, – nënvizon z. Çipa.

Gjatë këtij viti, për rajone të ndryshme në vend, problemet ishin të theksuara dhe në shërbime bazë, të cilat për zonat turistike janë të pakonceptueshme.

Ndër to renditet mungesa e ujit në zonën e Golemit, mungesa e energjisë në disa zona, djegia e mbetjeve në Vlorë. Për z. Kasa këto janë elemente që përkeqësojnë vlerësimin e përgjithshëm turistik të Shqipërisë.

“Problem kryesor ka qenë mungesa e shërbimit. Turistët kanë pasur rezerva për këtë dhe nuk kanë nguruar ta shprehin si ankesë qoftë tek agjencitë e tyre, qoftë në biseda.

Kur ti paguan një dhomë me çmimin 300-400 euro është e pakonceptueshme që të të duhet të presësh 20 minuta për një kafe që është gjëja më e thjeshtë.

Problemeve të tjera ne u kemi dhënë zë vazhdimisht. Kryesisht ankesat janë për kantieret e ndërtimit që mbeten hapur gjatë sezonit.

Pra subjektet ndërtojnë fare pranë strukturave akomoduese dhe kjo e kthen pushimin në një stres për turistët.

Zhurmat që shkakton ndërtimi orar pa orar, inertet por edhe pamja që kanë objektet e papërfunduara nuk është aspak mikpritëse për syrin e një turisti dhe nuk të jep përshtypjen që je në një zonë turistike”, – nënvizon z. Kasa.

Burimi: INSTAT

Viti 2026 pa surpriza, pritet të ketë të njëjtën ecuri si viti aktual

Viti 2025 pritet të mbyllet me një bilanc pozitiv për hyrjen e të huajve në Shqipëri, ku rritja pritet të jetë më e zbehtë se ajo e vitit paraardhës.

Operatorët turistikë shprehen se edhe për vitin tjetër nuk presin ndonjë surprizë, çka do të thotë se ecuria e sektorit pritet të mbetet pozitive, por ritmet e rritjes më të ngadalta.

Edhe tipologjia e turistit pritet që të mbetet e njëjtë me atë të këtij viti duke qenë se kryesimin e marketimit po e mbajnë rrjetet sociale.

Turizmi i organizuar do të dominohet sërish nga polakët teksa ai individual nga Kosova dhe Italia, edhe pse këto dy grupe po tregojnë luhatje herë pas here.

Duhet të shohim me kujdes këto tendenca, sepse shqiptarët e Kosovës dhe italianët janë dy grupet më të mëdha të turizmit të paorganizuar, kurse polakët më të mëdhenjtë në turizmin e organizuar dhe gjasat janë që kështu të mbetet tendenca edhe vitin tjetër.

Franca, nga ana tjetër, edhe pse me tendencë në rritje ka numër të vogël turistësh. Izraeli është një tjetër treg që ka pasur rritje. Janë të paktën 100 mijë turistë që kanë ardhur nga ky vend nga prilli e deri në tetor.

Ideja është që për Shqipërinë vijon të ketë interes, por ne duhet të reflektojmë dhe të bëjmë korrigjimet tona për të mos humbur terren. Gjasat janë që viti 2026 të jetë i njëjtë si 2025-a”, – shprehet z. Kasa.

Edhe për Arben Çipën, pritshmëritë janë të njëjta për vitin e ardhshëm si në të ardhura, edhe në tipologjinë e turistit.

The post Turistë koprracë, vijnë më shumë, por shpenzojnë më pak appeared first on Revista Monitor.

TIRANË, 29 nëntor /ATSH/ Shqipëria është shndërruar në një nga destinacionet më tërheqëse gjatë viteve të fundit.

Përveç bregdetit gjatë verës, pushuesit zgjedhin si destinacion edhe bukuritë natyrore të vendit gjatë dimrit.

Një prej tyre janë edhe Alpet Shqiptare, të cilat të mbuluara nga manteli i bardhë i dëborës ofrojnë peizazhe mahnitëse.

Kryeministri Edi Rama ndau sot pamje nga madhështia e Alpeve tona, të mbuluara nga manteli i bardhë i dëborës dhe të frekuentuara nga turistët e shumtë vendas dhe të huaj në Ditën e Çlirimit të vendit.

Alpet shqiptare me bukuritë e tyre natyrore mbeten një atraksion absolut i turizmit duke tërhequr pushues vendas dhe të huaj në çdo periudhë të vitit.

Të përfaqësuara nga një reliev malor me kontraste të shumta, të përshkuara nga lugina lumenjsh me ujëra të kristalta, gryka dhe qafa malesh që të intrigojnë të vazhdosh më tej për të eksploruar natyrën, me një bimësi të pasur, Alpet përfaqësojnë një perlë me vlera unikale për Shqipërinë.

Majat e maleve në këtë territor duket sikur arrijnë qiellin. Bukuria mahnitëse e tyre pasqyrohet në ujërat e kthjellta të lumenjve si Shala, Valbona, Curraj, Cemi, Moraça, etj., si dhe në liqenet akullnajore të Pejës, Jezercës, Dobërdolit, Sylbicës etj., ofrojnë një qetësi përrallore dhe një nivel adrenaline, e cila ndryshon në çdo moment që shijon bukuritë e shumta të kësaj hapësire.

Male të tilla si Radohima, Maja e Hekurave, maja e Arapit, maja e Shkëlzenit ofrojnë një panoramë të ndryshme, e cila tundon shpirtin aventuror të çdo vizitori për të parë bukuritë natyrore përreth tyre.

/gj.m/r.e/

The post Rama ndan pamje nga Alpet të mbuluara nga dëbora appeared first on Agjencia Telegrafike Shqiptare.

TIRANË, 17 nëntor/ATSH/ Shqipëria ka mirëpritur 11,137,328 vizitorë të huaj nga janari deri në tetor 2025, ose 7% më shumë se në të njëjtën periudhë të vitit 2024.

Shifra u bë e ditur nga ministri i Turizmit, Kulturës dhe Sportit, Blendi Gonxhja në një postim në rrjetet sociale.

Gonxhja tha se “vetëm në tetor 2025 janë regjistruar 908,642 vizitorë, një ritëm që dëshmon transformimin e turizmit gjithëvjetor, duke lënë pas modelin sezonal dhe afirmuar Shqipërinë si një destinacion në zhvillim të qëndrueshëm dhe tërheqës në çdo stinë”.

Për shkak të vijës së gjatë bregdetare Shqipëria ofron disa plazhe, nga veriu deri në jug, si në Velipojë të Shkodrës, në Shëngjin të Lezhës, në Durrës, Vlorë, Himarë, Sarandë, etj., plazhe këto që frekuentohen përveç shqiptarëve, edhe nga shtetas të huaj, që zgjedhin Shqipërinë si një destinacion turistik gjatë muajve të verës.

Gjithashtu, Gjirokastra, Berati, Butrinti, Kruja, Tirana, Shkodra, etj., janë destinacione të kërkuara në çdo stinë për turizëm historik dhe kulturor.

Po ashtu, vendi ynë ka kushte për turizëm gjithëvjetor, për shkak të relievit, që ofron mundësi për turizëm nga jugu, në veri. Fshatrat turistikë të veriut të vendit njohin së fundmi numër të lartë turistësh, ndërsa po zhvillohet edhe infrastruktura për turizmin e aventurës.

Shqipëria po ashtu ka lumenj të shumtë, laguna dhe parqe kombëtare, të cilat tërheqin me bukruinë natyrore të tyre turistë nga e gjithë bota.

/k.s/

The post Gonxhja: Mbi 11 milionë turistë në 10 muaj appeared first on Agjencia Telegrafike Shqiptare.

Qyteti i Gjirokastrës dhe atraksionet e tij turistike po tërheqin një numër gjithnjë e më të madh vizitorësh vendas dhe të huaj. Kalaja e Gjirokastrës ka shënuar një arritje të jashtëzakonshme, duke mirëpritur 300,000 vizitorë deri tani në vitin 2025, njoftoi Ministri i Turizmit, Kulturës dhe Sportit, Blendi Gonxhja. “Kjo shifër rekord tregon qartë rritjen e pandërprerë të interesit që vizitorët…

Source

TIRANË, 15 nëntor/ATSH/ Gjirokastra dhe atraksionet e shumta turistike që qyteti i gurtë ofron po kthehen në zgjedhje absolute për mijëra turistë vendas dhe të huaj.

Kalaja e Gjirokastrës është një pjesë e ofertës turistike që prej kohësh po vizitohet nga një numër rekord turistësh.

Ministri i Turizmit, Kulturës dhe Sportit, Blendi Gonxhja vuri sot në dukje se Kalaja e Gjirokastrës ka shënuar një arritje mbresëlënëse, duke mirëpritur 300,000 vizitorë deri në këtë moment të vitit 2025.

“Kjo shifër rekord tregon qartë rritjen e pandërprerë të interesit që vizitorët vendas dhe të huaj po tregojnë për këtë monument mahnitës të trashëgimisë sonë kulturore. Kjo shifër rekord tregon qartë rritjen e pandërprerë të interesit që vizitorët vendas dhe të huaj po tregojnë për këtë monument mahnitës të trashëgimisë sonë kulturore”, u shpreh Gonxhja në postimin në rrjetet sociale.

Kalaja e Gjirokastrës është e vendosur mbi një kodër pak të shkëputur nga Mali i Gjerë, e ngritur në një pikë vrojtuese rreth 370 metra mbi nivelin e detit. Krahasuar me kalatë mjesjetare të tjera të vendit, kjo kala është më e vogël nga sipërfaqja dhe ruhet në gjendje më të mirë. Gjerësia e saj është 75 metra dhe gjatësia 500 metra. Për t’u shtuar rezistencën mureve të kalasë janë ngritur pesë kulla të fuqishme.

Kalaja e Gjirokastrës vijon të jetë një nga pikat më të rëndësishme të turizmit kulturor në jug të vendit, me një numër vizitorësh që rritet nga viti në vit.

Investimet në ruajtjen dhe promovimin e saj po e kthejnë këtë monument kulture në një destinacion referencë për turistët vendas dhe të huaj.

/e.i/j.p/

The post Gonxhja: 300 mijë vizitorë në kalanë e Gjirokastrës nga janari deri tani appeared first on Agjencia Telegrafike Shqiptare.

TIRANË, 1 nëntor/ATSH/ Qyteti i një mbi një dritareve zgjon kureshtjen e turistëve në çdo stinë të vitit, ku rrugicat e kalldrëmta të kalasë dhe lagjet historike të tij gjallërojnë edhe në këtë ditë të parë nëntori.

Turistët, veçanërisht ata të huaj, nuk largohen pa u ndalur në qytetin historik të Beratit, që është kthyer në një ndër qytetet më të vizituar në vend.

Për këtë sezon turistik vendet më të vizituara kanë qenë: Kalaja, Mangalemi dhe Gorica. Pa lënë pa përmendur këtu dhe thesaret që këto lagje mbajnë: muze, kisha dhe xhami.

Drejtori i Turizmit dhe Aktiviteteve në bashkinë e Beratit, Marius Çepele tha sot për ATSH-në se “nga fillimi i janarit deri në fund të tetorit Berati u vizitua nga 750 mijë turistë vendas e të huaj. Ndërkohë që vetëm në muajt shtator-tetor numri i turistëve që kanë vizituar qytetin e një mbi një dritareve është 280 mijë”.

Sipas tij, në periudhën janar-tetor 2025, 85% e vizitorëve ishin të huaj dhe 15% vendas.

Një interes të veçantë turistët shfaqin edhe për muzeumet e qytetit, ku njihen me historinë dhe trashëgiminë kulturore të Beratit, por jo vetëm.

“Numri i vizitorëve në muzeumet e qytetit ka arritur në 94 204 vizitorë”, tha Çepele.

Por, turistët vendas e të huaj që vizitojnë Beratin, përveç turizmit historik po tregojnë interes edhe për turizmin natyror dhe atë të aventurës.

“Po të dalim jashtë qendrës së qytetit kemi fshatrat turistikë, me agroturizme të zhvilluara, malin e Tomorit, ujëvarën e Bogovës, kanionet e Osumit etj.”, tha Çepele.

Turistët tashmë nuk ndalen vetëm një ditë për të shijuar bukuritë e tij, por qëndrojnë edhe me ditë të tëra. Zgjerimi i paketave turistike përtej qytetit, duke përfshirë fshatra me vlera natyrore dhe agroturizmet, ka shtuar ndjeshëm kohëqëndrimin e tyre.

Kjo gjë vihet re edhe në shtimin e strukturave akomoduese në Berat dhe rrethinat e tij.

“Në vitin 2025, numri i strukturave akomoduese në Berat është rritur ndjeshëm krahasuar me një vit më parë. Kjo lidhet me rritjen e vazhdueshme të fluksit turistik që qyteti ka përjetuar, sidomos pas përmirësimeve në infrastrukturë dhe promovimit si destinacion kulturor. Gjithnjë e më shumë banesa tradicionale janë kthyer në bujtina, shtëpi pritëse dhe apartamente për turistë”, theksoi Çepele.

Gjithashtu, vijoi ai, vërehet se në periferitë e qytetit dhe fshatrat afër tij janë shtuar edhe vila e agroturizme.

Numri i njësive akomoduese është rritur me rreth 40–45% krahasuar me 2024-ën, duke reflektuar kërkesën në rritje për qëndrime në qytetin-muze dhe zonat përreth.

“Në 2024 kishim 1 milion vizitorë, me një rritje 35% duke e krahasuar me vitin 2023. Në vitin 2025 kemi 300 struktura akomoduese, hotele, bujtina, shtëpi pritëse ose 25% më shumë se 2023-shin. Ndërsa në vitin 2025 kemi 10 mijë shtretër në funksion të turizmit”, theksoi Çepele.

Në Berat, shtoi Çepele, vihet re edhe rritja e numrit të bizneseve me 93% krahasuar me 2023, rritja e vlerës së pronave me 45% krahasuar me 2023 si dhe rritja e numrit të kredive për biznese turistike, të cilat zënë 65% të totalit të kredive në bankat e nivelit të dytë.

Bashkia e Beratit vijon organizmin e aktiviteteve të ndryshme që tërheqin mijëra vizitorë gjatë gjithë vitit.

“Në funksion të turizmit organizohet edhe paketa e aktiviteteve, ku kemi një stacion datash vjetore që janë kthyer në aktivitete kombëtare dhe ndërkombëtare me rreth 35 mijë vizitorë të pranishëm si Festivali i Verës, Mangalem Shades, Christmass Market dhe Festat e Dhjetorit, Maratona e Gjelbër, Festat e fshatrave: Festa e Qershisë, Festa e Fikut në Roshnik, Festa e Ullirit në Bilçë, Festa e Sinjës, Festivali i Xixëllonjave, Festivali i Teatrit Kombëtar për Fëmijë, Fundjavat e Verës në Berat etj.”, tha Çepele.

Berati trashëgon 210 objekte muzeale, nga të cilat 150 janë objekte që janë funksionale. Prej tyre 60 janë monumente të Kategorisë së Parë dhe të tjerat të Kategorisë së Dytë të mbrojtjes.

1 nga 7

/k.s/r.e/

The post Zgjerimi i paketave turistike rrit kohëqëndrimin e turistëve në Berat, interes për turizmin natyror e të aventurës appeared first on Agjencia Telegrafike Shqiptare.

TIRANË, 29 tetor/ATSH/ Vlora mirëpriti këtë verë turistë nga e gjithë bota, të cilët zgjodhën të zbulojnë bukuritë e fshehura të bregdetit, por edhe kulinarinë e mikpritjen vendase.

Por edhe pse jemi në ditët e fundit të tetorit, fluksi i turistëve po vijon në bregdetin e Vlorës, favorizuar edhe nga temperaturat e larta në vend.

Kryeministri Edi Rama ndau sot në rrjetet sociale disa foto nga plazhet përgjatë Lungomares, të mbushura me qytetarë që shijojnë diellin, por edhe ujërat e kristalta të Adriatikut.

“Ndërsa po hyn nëntori në Vlorë…”, shkruan Rama, krahas pamjeve.

Edhe pse sezoni i plazhit ka përfunduar zyrtarisht, nga fotot e publikuara nga kreu i qeverisë, vihet re se shumë vizitorë vendas dhe të huaj kanë zgjedhur Vlorën për të shijuar rrezet e diellit, duke u larë edhe në det.

Shëtitorja buzë detit në Vlorë është plot edhe në këto ditë fundtetori, ndërsa qytetarë të tjerë zgjedhin të shijojnë rrezet e diellit në bregdet duke shijuar kaltërsinë e detit në distancë.

Bregdeti i Vlorës po shndërrohet në një destinacion gjithëvjetor falë rezervimeve nga turistët e huaj.

Përveç bregdetit, Vlora ofron edhe turizmin malor, si dhe atë të aventurës. Po ashtu, pjesë e ofertës turistike janë muzetë, kultura, kulinaria, tradita e ruajtur dhe promovuar me mjaft kujdes.

/m.m/r.e/

The post Pushuesit vijojnë të shijojnë plazhin në Vlorë appeared first on Agjencia Telegrafike Shqiptare.

TIRANË, 25 tetor /ATSH/ Plazhi i Ksamilit, mbetet një ofertë turistike jo vetëm gjatë sezonit turistik, por gjatë gjithë vitit.

Falë detit të kristaltë e ishujve me plazhe mahnitëse që arrihen lehtësisht nga bregu, si dhe afërsisë me qytetin antik të Butrintit, Ksamili tërheq çdo vit mijëra turistë vendas e të huaj.

Kryeministri Edi Rama, ndau sot në rrjetet sociale pamje nga ky plazh, teksa shkruan “Ksamili sot”.

Pavarësisht se jemi në javën e fundit të muajit tetor, pushues të shumtë shijojnë motin e ngrohtë dhe plazhin me ujërat e pastra të Jonit.

Ksamili është një qytet i vogël në brezin bregdetar jugor, të quajtur zakonisht Riviera Shqiptare, që shtrihet në detin Jon me ujëra ngjyrë bruz dhe përballë ishullit grek të Korfuzit.

/e.i/r.e/

The post Rama ndan pamje nga plazhi i Ksamilit appeared first on Agjencia Telegrafike Shqiptare.

Pronari i një lokali në Shkodër ka denoncuar një rast të pakëndshëm, ku një grup turistësh të huaj, dyshohet spanjollë, janë larguar nga lokali i tij pa paguar faturën. Sipas tij, ngjarja ka ndodhur në momentin kur lokali ishte i mbushur plot me klientë. Ai ka treguar se bëhej fjalë për tetë persona që udhëtonin […]

The post Shkodër – Pasi darkuan, 8 turistët spanjollë ‘zhduken’ nga lokali pa paguar faturën/ VIDEO appeared first on BoldNews.al.

TIRANË, 24 tetor /ATSH/ Shqipëria po vazhdon të tërheqë një numër gjithnjë e më të lartë vizitorësh të huaj, duke konfirmuar pozicionin e saj si një nga destinacionet më të preferuara turistike në rajonin e Ballkanit.

Sipas të dhënave nga Institutit të Statistikave Kombëtare (INSTAT), për muajin shtator 2025, në territorin e Shqipërisë kanë hyrë 1.965.601 shtetas shqiptarë dhe të huaj, një rritje prej 9,5% krahasuar me të njëjtën periudhë të vitit 2024.

Vetëm shtetasit e huaj që kanë hyrë në vend numërohen 1.259.684, çka tregon një rritje me 9,9% nga viti i kaluar. Ky trend pozitiv pasqyron jo vetëm zgjerimin e sezonit turistik përtej muajve verorë, por edhe forcimin e ofertës turistike shqiptare në tregjet ndërkombëtare.

Në të njëjtën periudhë, 2.127.386 shtetas janë larguar nga territori shqiptar, ndërsa numri i daljeve të turistëve të huaj ka arritur në 1.354.731, me një rritje prej 10,2%.

Sipas statistikave, 95% e hyrjeve të shtetasve të huaj vijnë nga rajoni i Evropës, ku Evropa Jugore zë 69% të hyrjeve, e ndjekur nga Evropa Perëndimore (12%) dhe Evropa Qendrore/Lindore (11%).

Sa i takon qëllimit të hyrjes në vendin tonë të shtetasve të huaj, në 98% të rasteve është për qëllime personale. Në shtator 2025, ky tregues ka shënuar një rritje me 9,8%, krahasuar me shtator 2024. Ndërkohë që hyrjet e shtetasve të huaj për qëllime biznesi dhe profesionale janë rritur me 15,3% për këtë periudhë.

Të dhëna tregojnë se Shqipëria po konsolidohet si një destinacion turistik gjithëvjetor, falë rritjes së kapaciteteve akomoduese, përmirësimit të infrastrukturës dhe diversifikimit të ofertës turistike.

/e.xh/a.f/r.e/

The post INSTAT: Mbi 1,2 milionë të huaj vizituan Shqipërinë në shtator  appeared first on Agjencia Telegrafike Shqiptare.