Trajneri i Barcelonës, Hansi Flick, ka shprehur kënaqësinë e tij pas fitores 3-2 të skuadrës së tij ndaj Real Madridit në finalen e Superkupës së Spanjës.

“Është e shkëlqyer, ishte një finale e rëndësishme dhe kundër Madridit është gjithmonë e veçantë. Jam krenar, luajtëm ashtu siç donim”, deklaroi Flick pas ndeshjes.

Duke folur për festimet, trajneri gjerman zbuloi se nuk ishte ende në dhomën e zhveshjes, por kishte parë lojtarët duke festuar.

“Tani po festojnë dhe kam parë vetëm se po kërcenin. Jam shumë krenar, luajtëm shumë mirë, duke mbajtur posedimin e topit dhe duke kontrolluar ndeshjen. Në fund, e gjithë skuadra luajti ashtu siç na pëlqeu. Nuk ishte e lehtë dhe luftuam si skuadër, ishte mbresëlënëse”, shtoi ai.

Flick foli edhe për ndikimin që kjo fitore ka në ekip. “Situata është e ndryshme nga sezoni i kaluar. Ne filluam nga disavantazhi, por tani po kemi sukses dhe po funksionojmë si ekip. Kjo më jep ndjenja shumë të mira. Ishte një ndeshje shumë e rëndësishme dhe ndryshimet që kemi bërë na kanë dhënë shumë frymëzim".

Trajneri i Barcelonës vlerësoi gjithashtu mbështetjen e tifozëve. “Gjysmëfinalja ishte shumë e mirë dhe sot pashë të njëjtën gjë, ishte mbresëlënëse. Ne luajtëm shumë mirë kundër Madridit, ata gjithashtu luftuan deri në fund. Jam shumë i lumtur për gjithçka".

Pas ndeshjes, Flick veçoi edhe performancat e disa lojtarëve kyç. Ai lavdëroi veçanërisht Raphinhan i cili ishte fantastik duke shënuar dy gola.

“Mentaliteti i Raphinhas është mbresëlënës dhe kemi edhe të tjerë si ai, kjo ndikon në të gjithë ekipin. Ai humbi shansin e parë, por shfrytëzoi të dytin dhe na dha besim. Ishim nën shumë presion, siç mund ta shihni".

Flick foli edhe për progresin e Eric Garcias, një futbollist që po luan në pozita të ndryshme te Barcelona dhe gjithmonë po tregon paraqitje solide.

“Eric pati disa raste dhe është zhvilluar shumë. E vlerësoj këtë, sepse ai mund të luajë në shumë pozicione. Ka një mentalitet mbresëlënës dhe mund të jetë një nga kapitenët në të ardhmen".

Trajneri zbuloi edhe një këshillë që i dha ekipit para finales. “Të paktën të shënojnë një gol. Ekipi në përgjithësi, jo unë si trajner, për mënyrën se si luan dhe çfarë u ofron tifozëve, mund të mbështetemi në këtë. Nuk mendoj për ndeshjet e mëparshme, sepse finalja ishte shumë e rëndësishme dhe të luash kundër Madridit është gjithmonë e veçantë".

Në fund, Flick komentoi edhe rikthimin e Ronald Araujos. “Mendoj se në këtë situatë, që ai të luajë dhe të fitojë titullin është shumë e rëndësishme. Jam i lumtur që e shoh përsëri, është shumë i rëndësishëm për dhomën e zhveshjes", përfundoi trajneri gjerman. /Telegrafi/

Mbrëmë, lojtarët e Barcelonës mposhtën Real Madridin me rezultatin 3:2 në Arabinë Saudite, duke fituar kështu Superkupën e Spanjës.

Megjithatë, fitimet financiare nga kjo garë nuk janë aq të mëdha sa mund të kenë pritur tifozët.

Shumë tifozë mendonin se klubet spanjolle do të përfitonin shifra astronomike për pjesëmarrjen dhe zhvillimin e kësaj gare në Arabinë Saudite, por realiteti është ndryshe.

Me fitoren e Superkupës, Barcelona përfitoi gjithsej tetë milionë euro, ndërsa Real Madridi arkëtoi 7.5 milionë euro.

telegrafi.com

Diferenca mes fituesit dhe humbësit në finale është vetëm gjysmë milioni euro, një shifër relativisht e vogël për standardet e futbollit modern.

Buxheti total i çmimeve të ndarë nga Shoqata Spanjolle e Futbollit për këtë kompeticion arrin në 21.3 milionë euro. Si Barcelona ashtu edhe Real Madridi përfituan nga 6 milionë euro secili vetëm për pjesëmarrjen e tyre në turne.

Përveç shumës fillestare prej 6 milionë eurosh, Barcelona mori një bonus prej 2 milionë eurosh për fitimin e trofeut, ndërsa Real Madridi përfitoi një bonus shtesë prej 1.5 milionë eurosh për vendin e dytë.

Pavarësisht se nuk është kompeticioni më i madh dhe më prestigjioz në Spanjë, Superkupa mbetet shumë e rëndësishme për shkak të rivalitetit.

Përtej aspektit financiar, është një duel për prestigj, ku ekipet luftojnë fort për trofeun dhe për të ia “vjedhur” atë rivalit më të madh. /Telegrafi/

Drejtori sportiv i Milanit, Igli Tare, ka folur për formën e skuadrës, të ardhmen e portierit Mike Maignan, si dhe pritshmëritë për mesfushorin e ri Ardon Jashari, ndërsa ka komentuar gjithashtu mbi situatën e sulmuesit Christopher Nkunku.

“Tabela tregon se po kalojmë një periudhë pozitive. Gjysma jonë e parë e sezonit pati disa rezultate të rëndësishme. Ka ende shumë për të përmirësuar, por ne jemi optimistë dhe e kuptojmë se duhet të bëjmë sa më pak gabime të jetë e mundur deri në fund të sezonit”, tha Tare për DAZN Italia.

Në lidhje me Maignan, negociatat për një kontratë të re morën një kthesë të papritur, pas një periudhe ku largimi i tij dukej i sigurt.

Tare konfirmoi se portieri francez dëshiron të qëndrojë dhe është në prag të nënshkrimit të një zgjatjeje.

“E dimë që raporti me Mike është i jashtëzakonshëm. Atij i pëlqen projekti i Milanos dhe dëshiron të qëndrojë. Duhet të presim derisa të jepet drita jeshile, por jam i bindur se arsyeja e shëndoshë do të triumfojë dhe ai do të jetë një figurë kyçe për të ardhmen e këtij projekti.”

2024/05/Mike-Maignan.jpg telegrafi.com

Sa i përket Ardon Jasharit, Tare shprehu pritshmëri të mëdha për mesfushorin pas rikthimit nga lëndimet që e mbajtën jashtë për katër muaj.

“Kemi pritshmëri të mëdha për të, pasi tregoi disa performanca të mrekullueshme sezonin e kaluar. Ai ka luajtur shumë më mirë në dy muajt e fundit, duke marrë minuta në Serie A, Kupën e Italisë dhe Superkupën, duke dëshmuar se i përket një klubi si Milani", tha Tare. /Telegrafi/

Bruno Fernandes ka treguar gjithmonë një përkushtim të padiskutueshëm ndaj Manchester United, duke u shndërruar edhe në një nga liderët dhe kapitenët e skuadrës.

Megjithatë, largimi i papritur i bashkëkombësit të tij Ruben Amorim mund ta ketë shtyrë mesfushorin portugez të reflektojë seriozisht mbi të ardhmen e tij në “Old Trafford”, sipas raportimeve nga Anglia.

E ardhmja e Bruno Fernandes ka qenë një nga temat më të diskutuara muajt e fundit, veçanërisht pasi u bë e ditur se Manchester United kishte qenë i gatshëm ta shiste atë gjatë afatit të fundit kalimtar. Vetë lojtari refuzoi çdo mundësi largimi, i bindur për të qëndruar besnik ndaj objektivave që i kishte vendosur vetes kur iu bashkua klubit.

Bruno kishte premtuar se do t’i udhëhiqte “Djajtë e Kuq” drejt rikthimit të lavdisë dhe drejt një pranie të rregullt në Ligën e Kampionëve. Deri tani, ky objektiv nuk është realizuar, ndërsa ndryshimet në stolin e trajnerëve kanë vazhduar. Viktima e radhës ka qenë pikërisht Ruben Amorim, me të cilin Bruno kishte një marrëdhënie shumë të afërt, thuajse më shumë personale sesa profesionale. Portugezi nuk e ka fshehur pakënaqësinë për shkarkimin e tij.

Madje, në orët pas largimit të Amorim, Bruno Fernandes u pa duke dalë nga një hotel në shoqërinë e asistentit të tij, çka ndezi menjëherë spekulimet për një transferim të mundshëm.

Arabia Saudite ka tentuar prej vitesh ta bindë mesfushorin portugez, por ai ka refuzuar çdo ofertë për shkak të dashurisë për Manchester United. Megjithatë, mënyra se si u trajtua Amorim mund ta ketë lëkundur këtë qëndrim.

Nga ana e klubit, situata mbetet e pandryshuar. Nëse drejtuesit ishin të gatshëm ta shisnin Brunon verën e kaluar, nuk ka arsye të besohet se strategjia ka ndryshuar.

Një ofertë e madhe financiare për një lojtar mbi të 30-at, i cili ndoshta ka kaluar kulmin e formës së tij, shihet si një mundësi që klubi mund të mos e shpërfillë. /Telegrafi/

Trajneri i Chelseat, Liam Rosenior, ka rezervuar lëvdata të veçanta për Jorrel Hato, pas performancës mbresëlënëse të adoleshentit në fitoren 5-1 të “Bluve” ndaj Charlton Athletic në Kupën FA.

Rosenior theksoi se 19-vjeçari tregoi pjekuri përtej moshës së tij.

Hato ka pasur një fillim të vështirë te Chelsea, por trajneri beson se paraqitja e tij në “The Valley” përfaqëson një hap të madh përpara.

“Ai është vetëm 19 vjeç. E pashë të luante edhe ndaj Fulham dhe atëherë u impresionova shumë. Ndaj Charlton ai e çoi atë formë në një nivel tjetër", tha Rosenior.

“Jo vetëm për golat e tij. Atributet e tij mbrojtëse ishin të shkëlqyera. Mënyra se si qetësoi ndeshjen gjatë posedimit të topit, si u mbrojt një kundër një, dhe prapë kishte energjinë dhe shpejtësinë për të na ndihmuar në sulm, ka qenë e jashtëzakonshme".

"Njoh shumë nga këta lojtarë, janë të rinj të shkëlqyer. Ka qenë një fillim shumë i mirë për të, por edhe për të gjithë ekipin me mua,” përfundoi Rosenior.

Holandezi shkëlqeu ndaj Charlton duke shënuar golin e parë në fitoren e madh të Chelseat 1-5. /Telegrafi/

Vedat Muriqi ka vazhduar me gola në La Liga, duke shënuar edhe në xhiron e 19-të.

Sulmuesi kosovar e ka nisur ndeshjen ndaj Rayo Vallecanos si gjithmonë si titullar me fanellën e Mallorcas.

E kur kaluan 30 minuta lojë, Muriqi gjeti golin duke shënuar me kokë pas asistimit nga Lato për 1-1.

Pas përfundimit të pjesës së parë, vendasit e Vallecanos janë në epërsi 2-1.

Për Muriqin goli i sotëm në kryeqytetin spanjoll ishte i 11-ti sezonal me fanellën e Mallorcas. /Telegrafi/

Emri i Marc Guehi është një nga më të kërkuarit në merkaton e dimrit. Qendërmbrojtësi i Crystal Palace, kontrata e të cilit me “Eagles” skadon më 30 qershor, nuk ka ndërmend të rinovojë marrëveshjen me klubin londinez.

Për këtë arsye, Palace mund të marrë në konsideratë shitjen e tij që në afatin kalimtar të janarit, për të shmangur humbjen e lojtarit si transferim i lirë në fund të sezonit.

Interesi për Guehin është i madh dhe pretendentët nuk mungojnë. Mbrojtësi anglez ka qenë një nga figurat kyçe të skuadrës këtë sezon, duke regjistruar 33 paraqitje në të gjitha garat, me tre gola dhe katër asistime, statistika të konsiderueshme për një qendërmbrojtës.

Dy klubet që ndodhen aktualisht në “pole position” për shërbimet e tij janë Liverpooli dhe Manchester City. Pala e lojtarit është plotësisht e vetëdijshme për interesimin e këtyre dy gjigantëve dhe, sipas raportimit të The Athletic, Guehi tashmë ka një preferencë të qartë për hapin e radhës në karrierë.

Sipas të njëjtit burim, qendërmbrojtësi anglez do të preferonte të vishte fanellën e Liverpoolit, sesa të transferohej te Manchester City i drejtuar nga Pep Guardiola.

Në fund të afatit kalimtar të verës së kaluar, një transferim i Guehi-t te Liverpooli për rreth 35 milionë euro dukej shumë pranë finalizimit.

Megjithatë, marrëveshja dështoi në minutat e fundit, pasi Crystal Palace u tërhoq nga negociatat për shkak se nuk arriti të gjente një zëvendësues të përshtatshëm për mbrojtësin e tij kryesor. /Telegrafi/

Manchester City po monitoron nga afër situatën e mbrojtësit të Bolognës, Jhon Lucumi, teksa pasiguria rreth së ardhmes së kolumbianit në Serie A po rritet.

Sipas Il Resto del Carlino, qendërmbrojtësi 27-vjeçar ka tërhequr interes serioz nga gjigantët e Ligës Premier, në një moment kur kontrata e tij me Bolognën po hyn në një fazë kritike.

Lucumi ka qenë një figurë kyçe në repartin defensiv të skuadrës së drejtuar nga Vincenzo Italiano, duke ofruar qëndrueshmëri, lidership dhe siguri në ndërtimin e lojës nga prapavija.

Megjithatë, kontrata e tij aktuale skadon verën e ardhshme dhe përpjekjet e klubit italian për të arritur një zgjatje afatgjatë thuhet se kanë ngecur.

Në këtë situatë, kampi i mbrojtësit po shqyrton me kujdes interesimin e Manchester Cityt përpara se të marrë një vendim për kushtet e reja, çka i shton edhe më shumë presion Bolonjës në negociatat që vazhdojnë. /Telegrafi/

Sulmuesi italian Mario Balotelli, i cili tashmë konsiderohet në fund të karrierës së tij në nivelin më të lartë, ka gjetur një klub pas gjashtë muajsh pa kontratë.

Balotelli, i cili u largua nga Genoa verën e kaluar, është fotografuar së fundmi në një aeroport në Emiratet e Bashkuara Arabe, ku mbërriti për të nënshkruar një marrëveshje me Al-Ittifaq.

Tifozët e pritën në aeroport 35-vjeçarin dhe e filmuan duke pozuar për foto, ndërsa më pas u shfaq edhe një fotografi e Balotellit me fanellën e klubit të ri.

Ky është momenti i parë në karrierën e Balotellit që largohet nga Kontinenti i Vjetër, ku ka luajtur për klube të shumta si Inter, Milan, Liverpool, Nice, Marseille, Brescia, Manchester City, Monza, Adana dhe Sion.

Ai ka 36 ndeshje dhe 14 gola me ekipin kombëtar italian. /Telegrafi/

Juventusi dhe Milani po konsiderojnë një shkëmbim të mundshëm lojtarësh gjatë afatit kalimtar të janarit, sipas raportimeve të Tuttosport.

Bëhet fjalë për një marrëveshje huazimi që përfshin Federico Gatti dhe Ruben Loftus-Cheek.

Mundësia u diskutua gjatë një takimi të zhvilluar të premten, ku morën pjesë trajneri i Juventusit, Luciano Spalletti, drejtori ekzekutiv Damien Comolli dhe drejtori i ri sportiv, Marco Ottolini. Bëhet e ditur se në ditët në vijim mund të ketë bisedime konkrete midis të dy klubeve.

Prioritetet e Juventusit në këtë merkato mbeten një mesfushor qendror i gjithanshëm dhe një zëvendësues për Kenan Yildiz. Spalletti ka theksuar se do të nënshkruajë vetëm lojtarë që mund t’i shtojnë cilësi ekipit dhe të mos prishin ekuilibrin e arritur në javët e fundit.

Sipas Tuttosport, trajneri i Juventusit është admirues i Loftus-Cheek, i cili kohët e fundit ka refuzuar një transferim te Lazio, pavarësisht interesit të ish-trajnerit të tij te Chelsea, Maurizio Sarri. Loftus-Cheek kërkon më shumë minuta lojë, me shpresën për të qenë pjesë e skuadrës së Anglisë në Kupën e Botës 2026, dhe Juventusi mund t’i ofrojë mundësi më të shumta për të treguar vlerën e tij.

Fizikaliteti dhe shkathtësia e Loftus-Cheek do t’i përshtateshin taktikave të Spallettit, ndërsa Gatti do t’i lejonte trajnerit të Milanit, Massimiliano Allegri, të forconte qendrën e mbrojtjes në pjesën e dytë të sezonit./Telegrafi/

Kapiteni i Kombëtares së Shqipërisë, Berat Gjimshiti, u lëndua gjatë fitores së Atalantas me 2-0 ndaj Torinos në javën e 20-të të Serie A.

Gjimshiti u detyrua të largohej nga fusha në minutën e 44-t, pas një përplasjeje të ashpër me sulmuesin e Torinos, Duvan Zapata.

Zëvendësimi i tij u bë me suedezin Isak Hien, ndërsa mediat italiane raportojnë se mbrojtësi shqiptar është dërguar në spital për analiza më të hollësishme.

Lëndimi nuk dukej i lehtë dhe Gjimshiti pritet të qëndrojë për disa javë jashtë fushave.

Golat për Atalantan u shënuan nga Charles De Ketelaere në minutën e 13-të dhe Mario Pasalic në minutën e 95-të.

Te Torino, ndeshjen e përfundoi mbrojtësi Ardian Ismajli, ndërsa Kristjan Asllani qëndroi në stol.

Pas këtij rezultati, Atalanta renditet e shtata me 31 pikë, ndërsa Torino ndodhet në mesin e tabelës me 23 pikë. /Telegrafi/

Futbollistët e Barcelonës dhe Real Madridit do të ndeshen sonte në stadiumin King Abdullah në Xheda, këtë herë në finalen e Superkupës së Spanjës.

Rivalët më të mëdhenj të futbollit spanjoll do të luftojnë për trofeun e tretë më të rëndësishëm në vend, pas titullit të La Ligës dhe Kupës së Mbretit, ndërsa tifozët presin një tjetër spektakël nën drejtimin e tyre.

Të dy ekipet vijnë në këtë sfidë në formë të mirë. Barcelona ka fituar nëntë ndeshje radhazi në të gjitha garat, ndërsa Real Madrid ka regjistruar pesë fitore radhazi.

Katalanasit arritën finalen pas një triumfi të madh 5-0 ndaj Atleticos së Bilbaos në gjysmëfinale, ndërsa Reali mposhti rivalin e qytetit, Atletico Madrid, me rezultatin 2-1.

Ky do të jetë El Clasico i dytë i sezonit, pasi të dyja ekipet janë takuar një herë më parë në La Liga, ku Reali triumfoi 2-1 në “Santiago Bernabeu”.

Në historinë e El Clasicos, janë luajtur gjithsej 262 ndeshje zyrtare: Real Madridi ka regjistruar 106 fitore, Barcelona 104, dhe 52 përballje kanë përfunduar barazim.

Sfida e sontme do të fillojë në ora 20:00 me orën lokale. /Telegrafi/

Portieri i Manchester Cityt, Gianluigi Donnarumma, ka deklaruar se po kalon periudhën më të mirë të karrierës së tij që prej transferimit në Ligën Premier në vitin 2025, pas një aventure shumë të suksesshme me Paris Saint-Germainin.

Italiani 26-vjeçar kishte fituar Ligën e Kampionëve të UEFA-s dhe disa tituj të Ligue 1 me PSG-në, përpara se të transferohej në Angli në ditën e fundit të afatit kalimtar veror.

Duke folur për përvojën e tij në futbollin anglez, Donnarumma e cilësoi Ligën Premier si kampionatin më të fortë në botë.

“Është liga më e mirë në botë. Kur e sheh nga jashtë, ndeshjet janë fantastike. Është kënaqësi t’i shikosh dhe edhe më e bukur të luash në to”, u shpreh portieri italian.

“Që kur jam këtu, te Manchester City dhe në Ligën Premier, ndihem në kulmin e karrierës sime në këtë moment”, shtoi ai.

Donnarumma theksoi gjithashtu se zgjedhja për t’iu bashkuar Cityt ishte e menduar mirë, për shkak të reputacionit të klubit dhe ambientit që ofron.

“Doja të vija këtu sepse të gjithë flisnin shumë mirë për Manchester Cityn. E vërteta është se kam gjetur një familje të mrekullueshme dhe jam shumë, shumë i lumtur që jam këtu”.

“Ka një mjedis të vërtetë familjar. Ndjeva një interes shumë të fortë nga klubi dhe kjo më lajkatoi. Të të dëshirojë kaq shumë Manchester City dhe një trajner i nivelit të Pep Guardiolës është një burim i madh krenarie. Jam vërtet i lumtur dhe krenar që jam pjesë e grupit të Cityt dhe kësaj familjeje të madhe”, përfundoi Donnarumma. /Telegrafi/

Pas negociatave të gjata, Arsenali është shumë pranë finalizimit të një zgjatjeje të rëndësishme kontrate. Talenti londinez Bukayo Saka ka rënë dakord për një angazhim afatgjatë me “Topçinjtë”, marrëveshje që pritet t’i sjellë edhe një rritje të ndjeshme të pagës.

Saka është një nga produktet më të spikatura të akademisë së Arsenalit dhe prej vitesh është titullar i padiskutueshëm nën drejtimin e trajnerit Mikel Arteta. Edhe pse statistikat e tij sulmuese këtë sezon, nëntë gola në 19 ndeshje në Ligën Premier janë pak më modeste krahasuar me sezonet e kaluara, anësori anglez mbetet thelbësor për lojën sulmuese të klubit londinez.

Kontrata aktuale e Sakës është e vlefshme deri në vitin 2027, ndërsa bisedimet për rinovim kanë qenë në zhvillim prej disa muajsh. Tani është shënuar një hap vendimtar: sipas The Athletic, mesfushori sulmues ka pranuar ofertën e fundit dhe pritet të nënshkruajë një kontratë të re pesëvjeçare.

Detajet përfundimtare janë ende duke u diskutuar, por paga e re pritet të rritet ndjeshëm. Disa media angleze raportojnë se kjo marrëveshje mund ta bëjë Sakan lojtarin më të paguar në historinë e Arsenalit.

“Kontrata e re pasqyron statusin e tij si një nga lojtarët kryesorë në Ligën Premier dhe në futbollin evropian, ndërsa ai pritet të ketë rol kyç edhe me Kombëtaren e Anglisë në Kupën e Botës 2026”, thuhet në raportimet e mediave të specializuara.

Sipas informacioneve të mëparshme, Saka pritej të hynte në kategorinë e pagave të Kai Havertz, me rreth 15 milionë euro në vit.

Megjithatë, sipas TeamTalk, ai do ta tejkalojë ndjeshëm ndërkombëtarin gjerman dhe do të bëhet lojtari i parë i Arsenalit me pagë mbi 18 milionë euro në sezon. Kjo do të thotë se deri në fund të sezonit 2030/31, Saka mund të arkëtojë afro 100 milionë euro.

Bukayo Saka është pjesë e Arsenalit që nga viti 2008 dhe sot konsiderohet një nga figurat ikonike dhe më të dashura për tifozët. 24-vjeçari ka regjistruar 290 paraqitje me fanellën e “Topçinjve”, duke kontribuar me 77 gola dhe asistime. /Telegrafi/

Boston Celtics u mposhtën në shtëpi nga San Antonio Spurs me rezultatin 100:95. Spurs vazhduan paraqitjet fantastike në sezonin aktual, duke regjistruar fitoren e tyre të 27-të, kryesisht falë ndikimit të Victor Wembanyamas.

Francezi e nisi ndeshjen nga stoli dhe kishte minuta të kufizuara, por sërish ishte vendimtar, duke regjistruar 21 pikë, gjashtë ribaunde dhe tre bllokime. Stephon Castle ishte po ashtu në nivel të lartë, me 21 pikë, nëntë ribaunde dhe gjashtë asistime.

Te Bostoni, lojtari më i dalluar ishte Derrick White, i cili realizoi 29 pikë dhe shpërndau nëntë asistime, por performanca e tij nuk mjaftoi për të shmangur humbjen.

Spektakël i vërtetë u pa në përballjen mes Utah Jazz dhe Charlotte Hornets, ku kjo e fundit triumfoi bindshëm me shifrat 150:95. Në një statistikë të rrallë, plot nëntë basketbollistë të Charlotte patën shënim dyshifror.

Brandon Miller ishte më efikasi me 18 pikë, ndërsa LaMelo Ball shtoi 17. Miles Bridges dhe Collin Sexton kontribuuan me nga 15 pikë secili.

Te Utah, Brice Sensabaugh ishte më i dalluari me 26 pikë, ndërsa Jusuf Nurkić nuk ishte pjesë e ekipit për shkak të një lëndimi në këmbën e majtë. /Telegrafi/

Rezultatet:

Indiana – Miami 123:99

- YouTube www.youtube.com

Detroit – LA Clippers 92:98

- YouTube www.youtube.com

Boston – San Antonio 95:100

- YouTube www.youtube.com

Chicago – Dallas 125:107

- YouTube www.youtube.com

Utah – Charlotte 95:150

- YouTube www.youtube.com

Trajneri i Chelseat, Liam Rosenior, ka lavdëruar mentalitetin dhe intensitetin e lojtarëve të tij pas fitores bindëse 5-1 të “Bluve” ndaj Charlton Athletic në Kupën FA.

Ai ka theksuar se, përpara përballjes së radhës ndaj Arsenalit në gjysmëfinalen e Kupës Carabao, fokusi i tij kryesor nuk do të jetë te taktikat, por te qëndrimi dhe mentaliteti i ekipit.

Duke folur pas ndeshjes, Rosenior zbuloi se mesazhi i tij kryesor për skuadrën ishte i përqendruar te reagimi në momente të vështira, e jo te ndryshimet teknike apo taktike.

“Kam edhe dy ditë të tjera. Por mendoj se gjëja më e madhe për të cilën i sfidova lojtarët ishte mënyra se si reagojmë ndaj pengesave dhe intensiteti ynë. Asgjë taktike, asgjë teknike”, u shpreh Rosenior.

Trajneri i ri i Chelseat pati gjithashtu fjalë të mira për paraardhësin e tij, Enzo Maresca, duke theksuar se skuadra është e përgatitur mirë.

“Këta lojtarë janë të jashtëzakonshëm. Ata janë stërvitur shumë mirë para ardhjes sime”, tha Rosenior, duke vlerësuar punën e bërë më herët në “Stamford Bridge”.

“Isha shumë i kënaqur me unitetin dhe frymën e grupit kundër Charlton. Po ashtu, më pëlqeu shumë intensiteti me të cilin ata vrapuan, fituan duele, goditje me kokë dhe bënë të gjitha gjërat bazë. Pikërisht këtu e gjen kënaqësinë”, përfundoi Rosenior./Telegrafi/

Dikur një nga portierët më të mirë në botë, gjermani Marc-André ter Stegen mund të largohet nga Barcelona që gjatë këtij muaji.

Pas dëmtimit të rëndë në gju që pësoi vitin e kaluar, situata e tij në “Camp Nou” ka ndryshuar ndjeshëm. Nën drejtimin e trajnerit Hansi Flick, ter Stegen ka rënë në plan të dytë, duke humbur rolin e titullarit.

Kjo u bë edhe më e dukshme pas ardhjes së Joan Garcias, i cili po kalon formën më të mirë të karrierës dhe është shndërruar në zgjedhjen kryesore në portën e Barcelonës.

Sipas mediave spanjolle, ter Stegen po shqyrton seriozisht mundësinë e largimit, me synimin për të ringjallur karrierën dhe për të siguruar një vend në Kombëtaren e Gjermanisë për Kupën e Botës që po vjen.

telegrafi.com

Girona përmendet si një nga destinacionet më të mundshme për portierin 32-vjeçar.

Ter Stegen iu bashkua Barcelonës në vitin 2014 dhe ka zhvilluar gjithsej 291 paraqitje në La Liga, duke qenë për vite me radhë një nga shtyllat e ekipit katalanas.

Sipas raportimit të Goal, portieri gjerman beson se gjashtë muaj me paraqitje të rregullta në “Estadi Montilivi” do t’i mjaftonin për të rikthyer vëmendjen e trajnerëve të Kombëtares dhe për të fituar një ftesë në radhët e “Die Mannschaft”. /Telegrafi/

Bayern Munich nuk pritet të realizojë asnjë nënshkrim të jashtëm gjatë afatit aktual të transferimeve. Megjithatë, klubi bavarez përgatitet për tre njoftime të rëndësishme gjatë muajit janar, që lidhen me zgjatjen e kontratave të lojtarëve kyç.

Sipas deklarimeve publike të drejtorit sportiv Max Eberl, nuk do të ketë ndryshime të mëdha në përbërjen e skuadrës këtë dimër. I vetmi lojtar që po shqyrtohet seriozisht për largim është mbrojtësi i djathtë Sacha Boey (25). Edhe në rast të shitjes së tij, Bayern nuk pritet të sjellë menjëherë një zëvendësues, me një përforcim të mundshëm vetëm pas gjashtë muajsh.

Prioriteti absolut për drejtuesit e klubit është sigurimi i vazhdimësisë së boshtit të skuadrës. Lajmi i mirë për bavarezët është se ata janë shumë pranë finalizimit të marrëveshjeve të reja me tre lojtarë kryesorë, ku nënshkrimi shihet tashmë si formalitet.

Bëhet fjalë për liderin e mbrojtjes Dayot Upamecano (27), mbrojtësin e djathtë Konrad Laimer (28) dhe sulmuesin Serge Gnabry (30). Një ose dy njoftime zyrtare priten që gjatë muajit janar në Säbener Straße.

Gnabry pritet të rinovojë kontratën me një pagë më të ulët, ndërsa Upamecano mund të përfitojë një rritje të ndjeshme të pagës për shkak të rolit të tij kyç në mbrojtje.

Edhe Laimer është në linjë për një kontratë më fitimprurëse, pas paraqitjeve të shkëlqyera këtë sezon, FT e ka vlerësuar atë si mbrojtësin e dytë më të mirë të Bundesligës në gjysmën e parë të kampionatit.

Vitin e kaluar, Bayern siguroi disa marrëveshje strategjike, duke rinovuar kontratat e Jamal Musiala (deri në 2030), Joshua Kimmich (deri në 2029) dhe Alphonso Davies (deri në 2030).

Një rol të rëndësishëm në këtë stabilitet ka pasur edhe trajneri Vincent Kompany, i cili ka ndikuar që Bayern të luajë jo vetëm futboll tërheqës, por edhe të suksesshëm. /Telegrafi/

Ish-trajneri i Barcelona-s, Quique Setien, ka zbuluar se i janë dashur pothuajse katër vite që gjigantët katalanas t’i shlyenin plotësisht detyrimet financiare, pas shkarkimit të tij në vitin 2020.

Në një intervistë për mediat spanjolle, trajneri 67-vjeçar foli hapur për vonesën e pazakontë, duke dhënë gjithashtu detaje tronditëse edhe për një tjetër betejë ligjore me Villarrealin, nga i cili ka kërkuar pagesë për gati tre vite, shkruan Goal.com.

Duke folur në emisionin radiofonik El Larguero, Setien konfirmoi se saga me Barcelonën ka përfunduar më në fund, edhe pse me një vonesë që, sipas tij, pasqyron qartë problemet serioze financiare dhe të likuiditetit që klubi ka përjetuar vitet e fundit.

Pas largimit nga Camp Nou, Setién ishte detyruar të ndërmerrte veprime ligjore për të mbledhur pagesat e papaguara. Megjithatë, ai theksoi se tani nuk ka më asnjë pretendim financiar ndaj klubit.

“Barcelones i janë dashur tre ose katër vjet për të më paguar. Gjithçka është zgjidhur. Ata i kanë shlyer të gjitha pagesat që më detyroheshin dhe nuk më kanë më asnjë borxh”, tha Setien.

Qëndrimi i Setien në stolin e Barcelonës ishte i shkurtër dhe i trazuar. Ai u emërua në janar 2020 për të zëvendësuar Ernesto Valverde, me misionin për të rikthyer “ADN-në” karakteristike të klubit dhe stilin e tij të lojës.

Megjithatë, ai e gjeti veten në një ambient të brishtë, me probleme të thella strukturore dhe një dhomë zhveshjeje në krizë.

Mandati i tij zgjati vetëm shtatë muaj. Në 25 ndeshje, ai regjistroi 16 fitore, katër barazime dhe pesë humbje, duke e mbyllur sezonin në vendin e dytë në La Liga, pas Real Madridit. Megjithatë, periudha e tij në Barcelonë do të mbahet mend kryesisht për humbjen e rëndë 8-2 ndaj Bayern Munich në çerekfinalet e Ligës së Kampionëve. /Telegrafi/

Trajneri portugez Nuno Espírito Santo ka regjistruar një rast vërtet të rrallë këtë sezon në Ligën Premier angleze, duke humbur të njëjtën ndeshje dy herë brenda një sezoni – por si trajner i dy skuadrave të ndryshme.

Situata është sa e ndërlikuar, aq edhe pothuajse e pabesueshme. Në fillim të sezonit, Nuno Espírito Santo ishte në krye të Nottingham Forest.

Në atë periudhë, skuadra e tij u mposht bindshëm 3-0 nga West Ham, ndeshje që rezultoi edhe e fundit për portugezin në stolin e Forest, pasi u shkarkua menjëherë pas saj.

Gjashtë muaj më vonë, fati i solli sërish përballë të njëjtat skuadra, por me role të përmbysura. Këtë herë, Nuno Espírito Santo ishte trajner i West Ham, ndërsa Nottingham Forest arriti fitore 2-1, duke i shkaktuar portugezit një tjetër humbje ndaj ish-skuadrës së tij.

Për ta bërë historinë edhe më interesante, mediat angleze raportojnë se Nuno rrezikon shkarkimin edhe nga West Ham, çka do të thotë se për herë të dytë brenda të njëjtit sezon, një përballje mes West Ham dhe Nottingham Forest mund të rezultojë fatale për vendin e tij të punës.

Ky rast unik është parë vetëm një herë më parë në futbollin elitar anglez. I ndodhi Harry Redknapp në sezonin 2004/2005, në derbin e famshëm të Bregut Jugor mes Portsmouth dhe Southampton.

Redknapp fillimisht drejtoi Portsmouthin, duke u mposhtur 2-1 nga Southampton, ndërsa më pas, gjatë të njëjtit sezon, kaloi te Southampton, ku pësoi një humbje të rëndë 4-1 nga Portsmouth. Në atë rast, rikthimi i tij në Portsmouth u shoqërua me një pritje tejet armiqësore nga tifozët vendas. /Telegrafi/