Real Madridi ka shënuar fitore të vështirë te Villarreali, në kuadër të xhiros së 21-të në La Liga.

“Los Blancos” triumfuan me rezultat 0-2, sfidë që ishte tepër e baraspeshuar nga fillimi.

Villarreal e nisi më mirë për të rrezikuar përmes Buchanan, por që Courtois me një pritje të bukur ia mohoi golin.

Reali pastaj rrezikoi me Arda Guler që dribloi për mrekulli në zonë por goditja e turkut ishte qendrore. Rast shënimi kishte edhe Vini Jr, megjithatë edhe braziliani nuk e finalizoi.

Heroi i Realit ishte Kylian Mbappe që përfitoi nga asistimi i Viniciusit për ta zhbllokuar rezultatin (47’).

Villarreal tentoi deri në fund që të barazonte duke rrezikuar me Gerard Morenon, mirëpo goditja e këtij të fundit përfundoi mbi portë.

Krejt në fund, Mbappe edhe e fitoi një penallti pasi u faullua brenda zonës, ku pastaj edhe e finalizoi për epilogun përfundimtar 0-2 (90+2').

Kësisoj, Reali merr primatin në La Liga me 51 pikë, dy mbi Barcelonën që ka një ndeshje më pak të zhvilluar derisa Villarreal bie në pozitën e katërt me 41 sosh./Telegrafi/

Sot (e martë) rikthehet Liga e Kampionëve me nëntë ndeshje të cilat janë në program për t’u luajtur në kuadër të xhiros së shtatë të fazës së ligës.

Pas më shumë se një muaji pauzë, Liga e Kampionëve rikthen emocionet e veta me shumë ndeshje interesante, të cilat mund të vendosin fatin e skuadrave për të ecur tutje, për të mbetur në ‘play-off’ ose për t’u eliminuar.

Ndeshja kryesore e mbrëmjes padyshim se është ajo në mes të Interit dhe Arsenalit, e cila pritet të zhvillohet në “Giuseppe Meazza” me fillim nga ora 21:00.

Nerazzurrët duan vetëm fitore për të mbetur në tetë pozitat e para dhe për të bërë një hap drejt sigurimit të kualifikimit, ndërsa Topçinjtë edhe me një barazim do ta siguronin kualifikimin pasi kanë gjashtë fitore nga gjashtë ndeshjet e para.

Në ndeshjet tjera, Real Madridi synon fitore ndaj Monacos për të mbetur në tetëshe, ashtu sikurse Manchester City që udhëton te Bodo/Glimt dhe Paris Saint-Germain te Sporting Lisbona.

Tottenham-Dortmund është një sfidë të cilën dy ekipet tentojnë ta fitojnë duke shpresuar ngjithjen në tetë pozitat e para, ndërsa Napoli synon të mos gaboj në udhëtim te Copenhagen pasi rrezikon të mbetet jashtë fazës play-off.

Në tri ndeshjet tjera të mbrëmjes, Bayer Leverkusen luan në udhëtim te Olympiacosi, Kairat Almaty e pret Club Brugge dhe Villarreal është nikoqir i Ajaxit. /Telegrafi/

Arijon Ibrahimovic iu bashkua Heidenheimit në formë huazimi nga Bayern Munich verën e kaluar dhe shpejt u bë titullar.

Sipas Transfermarkt, disa klube si në Gjermani ashtu edhe jashtë vendit kanë shprehur interes për 20-vjeçarin, i cili debutoi për ekipin kombëtar gjerman U21 në fund të vitit të kaluar.

Këto përfshijnë katër klube të Bundesligës, si dhe klube nga Italia dhe Spanja.

Lojtari me këmbë të djathtë luajti në çdo ndeshje për Heidenheim në gjysmën e parë të sezonit dhe aktualisht është një pjesë e domosdoshme e formacionit titullar të trajnerit Frank Schmidt.

Vlera e tregut e yllit kosovar është rritur në 5 milionë euro në përditësimin e fundit të Transfermarkt.

Duke pasur parasysh zhvillimin e tij mbresëlënës, nuk është çudi që Heidenheim do të donte ta mbante lojtarin sulmues përtej marrëveshjes së tij të huazimit me Bayern Munich, megjithatë, performancat e Ibrahimovic kanë tërhequr interes nga klube të tjera.

Sipas Transfermarkt, klubet e Serie A , Fiorentina dhe Cagliari, kanë sinjalizuar gatishmërinë e tyre për ta transferuar atë.

I riu është tashmë shumë i njohur me ligën e parë italiane nga periudhat e tij të mëparshme të huazimit te Frosinone dhe Lazio, ku ka 17 paraqitje dhe dy asiste.

Ekziston gjithashtu një interesim nga Villarreali teksa edhe disa klube tjera të Bundesligës i kanë vënë syrin atij.

Se vetë lojtari dëshiron një klub të përhershëm në lëvizjen e tij të ardhshme iu bë e qartë së fundmi gazetës me seli në Mynih, Abendzeitung.

"Nuk dua të huazohem përsëri", i tha ai gazetës në fund të vitit të kaluar, duke lënë të kuptohet se mund të parashikojë një të ardhme më afatgjatë në Mynih./Telegrafi/

Me fitoren ndaj Real Madridit në Superkupën e Spanjës, Barcelona tani ka fituar 10 fitore radhazi, duke barazuar një seri rekord që ishte nën drejtimin e Luis Enriques në vitin 2016.

Fitorja në Superkupën e Spanjës kundër Real Madridit me rezultat 3-2 i lejoi Barçës të fitonte trofeun e parë të sezonit dhe të barazonte rekordin e vjetër prej një dekade.

Skuadra e Hansi Flick ka regjistruar serinë më të gjatë të fitoreve në muajt e fundit që nga koha kur Luis Enrique ishte trajner i Blaugranave.

Fitore pas fitoreje

Blaugranët janë në formën e tyre më të mirë të sezonit. Pas disa muajve në fillim të sezonit me ulje-ngritje, Barça është rikthyer në formë pas humbjes kundër Chelseat në Ligën e Kampionëve.

Që nga ajo ditë në Stamford Bridge, skuadra ka arritur një seri prej 10 fitoresh radhazi, duke përfshirë fitoret në shtëpi ndaj Atletico Madrid (3-1) dhe jashtë fushe ndaj Real Betis (5-3) dhe Villarreal (2-0).

Një fitore në derbin katalanas 2-0 jashtë fushe ndaj Espanyol dhe një fitore 3-2 në finalen e Superkupës së El Clasico në Arabinë Saudite janë momente të tjera kulmore të kësaj serie të shkëlqyer në të cilën ndodhet skuadra e Hansi Flick aktualisht.

Katalunasit gjithashtu fituan edhe ndaj Athletic Bilbao, Guadalajara, Osasuna, Eintracht Frankfurt dhe Alaves.

Statistikat e Luis Enriques

Skuadra e Barcelonës që arriti shifra dyshifrore për sa i përket fitoreve të njëpasnjëshme ishte skuadra e trajnuar nga Luis Enrique midis prillit 2016 dhe gushtit të të njëjtit vit.

Nëse Barça mund ta mposhtë Racing Santander në Copa del Rey në ndeshjen e tyre të radhës, atëherë ata do të barazojnë një tjetër seri nën drejtimin e trajnerit të PSG-së, kur ai e udhëhoqi Barcën drejt 11 fitoreve radhazi në janar dhe shkurt të vitit 2015. /Telegrafi/

Villarreal po planifikon me kujdes të ardhmen e repartit të mesfushës dhe ka nisur të shqyrtojë lëvizje strategjike për muajt e ardhshëm.

Klubi është i vetëdijshëm se po hyn në një fazë, ku disa lojtarë kyç janë drejt fundit të ciklit të tyre, ndaj drejtoria sportive synon të veprojë me kohë për të garantuar vazhdimësi dhe stabilitet në projektin afatmesëm dhe afatgjatë.

Në këtë kontekst, në zyrat e “La Ceramica” ka nisur të marrë vëmendje emri i Jobe Bellingham, një nga talentet e rinj më premtues të futbollit evropian dhe vëllai më i vogël i Jude Bellingham.

Mesfushori i Borussia Dortmund shihet si një profil ideal për të rinovuar mesfushën, sidomos në një moment kur roli i Dani Parejo pritet të zbehet gradualisht dhe largimi i mundshëm i Pape Gueye duket gjithnjë e më afër.

Në moshën 20-vjeçare, Jobe Bellingham shquhet për kombinimin e forcës fizike, energjisë dhe aftësisë për të interpretuar lojën në të dy fazat.

Ai nuk është vetëm një mesfushor mbrojtës, por një lojtar modern që depërton mes linjave, ushtron presion të lartë dhe kontribuon në fazën sulmuese.

Në Villarreal vlerësohet fakti që ai ka ende shumë hapësirë për zhvillim dhe mund të rritet brenda një ambienti që u jep besim dhe përgjegjësi lojtarëve të rinj.

Megjithatë, negociatat me Borussia Dortmund pritet të jenë të ndërlikuara.

Villarreal po mendon një ofertë fillestare rreth 20 milionë euro, por klubi gjerman e vlerëson lojtarin më lart dhe nuk është i gatshëm ta shesë për më pak se 30 milionë euro.

Për këtë arsye, drejtuesit spanjollë po analizojnë alternativa si bonuse për objektiva ose pagesa të strukturuara, në mënyrë që operacioni të mos rrezikojë ekuilibrat financiarë të klubit.

Jobe Bellingham e sheh me interes një aventurë në La Liga, ku mund të ketë më shumë minuta dhe rol protagonist.

Për Villarrealin, ai përfaqëson një investim ambicioz, me vlerë të menjëhershme dhe potencial të madh për të ardhmen.

Nëse palët arrijnë të afrojnë qëndrimet, klubi verdhë mund të realizojë një nga transferimet më interesante të afateve kalimtare të ardhshme. /Telegrafi/

Disa klube nga Arabia Saudite po shfaqin interes konkret për portierin belg Thibaut Courtois, ndërsa Villarreal ka nisur lëvizjet për të afruar Andriy Lunin.

Edhe pse vëmendja mediatike te Real Madridi zakonisht përqendrohet te emra si Kylian Mbappe, Vinicius Junior, Jude Bellingham, Arda Guler apo Rodrygo Goes, realiteti është se Courtois (33 vjeç) mbetet një nga shtyllat e padiskutueshme të ekipit.

Ndeshje pas ndeshjeje, portieri belg dëshmon se prania e tij është vendimtare për klubin madrilen.

Për këtë arsye, interesimi në rritje nga Arabia Saudite përbën një burim shqetësimi për “Los Blancos”.

Sipas një raportimi të Defensa Central, disa klube të Lindjes së Mesme janë të gatshme t’i ofrojnë Courtois një kontratë trevjeçare me vlerë 30 milionë euro në sezon.

Megjithatë, në parim, Courtois nuk pritet t’i marrë seriozisht këto oferta.

Përveçse nuk ka shqetësime financiare, ai gëzon një pagë të lartë dhe synon të vazhdojë të luajë në nivelin më të lartë.

Aktualisht, kontrata e tij me Real Madridin skadon në qershor 2027, dhe gjithçka tregon se do të vijojë të mbrojë portën e “Santiago Bernabeu” deri atëherë.

Ndryshe paraqitet situata e Andriy Lunin (26 vjeç).

Portieri ukrainas duket gjithnjë e më i lodhur nga roli i dytë pas Courtois dhe nuk përjashton një largim në fund të sezonit.

Mes ofertave që kanë nisur të mbërrijnë, spikat ajo e Villarrealit.

Sipas OK Diario, klubi spanjoll e sheh Lunin si profilin ideal për t’i dhënë stabilitet portës, një repart ku as Luiz Junior dhe as Arnau Tenas nuk kanë arritur të konsolidohen. /Telegrafi/

Barcelona i ka arkëtuar pikët e plota në udhëtim te Villarreal, në kuadër të xhiros së 17-të në La Liga.

Katalunasit fituan me rezultat 0-2, sfidë ku Villarreal ishte me një lojtar më pak që nga minuta e 39-të.

Vendasit e nisën më mirë për të rrezikuar me Nicolas Pepe dhe Ayoze Perez, por të dy dështuan ta mposhtin Joan Garcain.

Pas kësaj, Barcelona shënoi nga pika e bardhë për të kaluar Barcelonën në epërsi pas 12 minutave lojë.

I njëjti lehtë mund të dyfishonte epërsinë, por traversa e shpëtoi Villarrealin.

Megjithatë e tërë loja ndryshoi kur Renato Veiga u ndëshkua me karton të kuq, pas një ndërhyrje të rëndë (39’).

Fitoren e Barcelonës pastaj e vulosi Lamine Yamal me një gol të bukur pas një aksioni të shpejtë (63’).

Barcelona kësisoj vazhdon si lider i vetëm me 46 pikë ndërsa Villarreal qëndron në pozitën e katërt me 35 sosh./Telegrafi

Përveç Nico Schlotterbeck të Borussia Dortmund, Barcelona ka identifikuar edhe qendërmbrojtësin e Aston Villa, Pau Torres, si një objektiv të mundshëm transferimi.

Mbrojtësi spanjoll, i cili luan për Aston Villa nën drejtimin e Unai Emery që prej vitit 2023, raportohet se është i hapur për një rikthim në La Liga nëse klubi katalanas konkretizon interesimin.

Barcelona kishte tentuar ta afronte Torres edhe gjatë kohës kur ai ishte pjesë e Villarrealit.

Megjithatë, Schlotterbeck mbetet objektivi kryesor i trajnerit Hansi Flick, pasi mbrojtësi gjerman po kërkon një sfidë të re dhe nuk është i prirur të pranojë rinovimin e kontratës me Borussia Dortmund.

Pavarësisht interesit për përforcime, Barcelona duhet së pari të përmirësojë gjendjen financiare për të mundësuar afrime gjatë verës.

Largimi i emrave të mëdhenj, si Robert Lewandowski sezonin e ardhshëm, do t’i lejonte klubit të lironte hapësirë në buxhetin e pagave dhe të përshtatej me rregullat e Fair Play Financiar të La Ligës.

Nevoja për përforcime në mbrojtje është bërë edhe më urgjente pas vendimit të Ronald Araujo për të marrë një pushim të pacaktuar, me qëllim përqendrimin në shëndetin e tij mendor. /Telegrafi/

Në mbrëmjen e sotme (e mërkurë), Liga e Kampionëve rikthehet me duele që premtоjnë ritëm të lartë, emocione të forta dhe lëvizje të rëndësishme në renditje. Ekipet marrin fushën me objektiva të qarta: disa për të siguruar kualifikimin, të tjerat për të mbajtur gjallë shpresat.

Ndeshja kryesore e mbrëmjes së sotme padyshim se pritet të zhvillohet në ‘Santiago Bernabeu’, ku Real Madridi është nikoqir i Manchester Cityt, në një ndeshje ku pikët janë jetike për të dy klubet.

Lideri i vetëm i ligës, Arsenali do të luajë në udhëtim te Club Brugge dhe me një fitore eventuale do ta siguronte vendin në top tetëshen e parë, duke u kualifikuar direkt në fazën e 1/8-tës.

Edhe Paris Saint-Germain do ta bënte një hap të madh drejt kualifikimit në rast fitoreje në udhëtim te Athletic Bilbao, klub i cili gjithashtu synon rezultat pozitiv për t’u ngjitur në pozitat që e dërgojnë në ‘play-off’.

Juventusi i Edon Zhegrovës është nikoqir i Pafos gjatë mbrëmjes së sotme, ndërsa ndeshje interesante pritet të luhet edhe në Gjermani, ku Bayer Leverkusen e pret Neëcastle Unitedin dhe ajo në mes të Benfica dhe Napoli.

Nga ndeshjet tjera, Borussia Dortmund e pret Bodo/Glimt, Ajaxi luan në udhëtim te Qarabagu, Villarreali është nikoqir i Copenhagen. /Telegrafi/

Kupa e Kombeve të Afrikës po i afrohet La Ligas dhe disa ekipe mund të mbeten pa lojtarë kyç në javët në vijim. Turneu zyrtarisht fillon më 21 dhjetor dhe finalja është planifikuar për 18 janar 2026, vetëm pak ditë pas ndeshjes së fundit të ligës para pushimeve të Krishtlindjeve, të cilat janë planifikuar për 19-22 dhjetor.

Sipas rregulloreve të FIFA-s, klubet duhet t'i lirojnë lojtarët e tyre dy javë para ndeshjes së tyre të parë, megjithëse ky afat mund të ndryshohet me marrëveshje midis federatave dhe ekipeve. Në praktikë, kjo do të thotë që disa lojtarë nuk do të jenë në gjendje të marrin pjesë në ndeshjet e javës së 16-të, midis 12 dhe 15 dhjetorit.

Ky është rasti i Marokut, vendit organizator të turneut, i cili do të luajë ndeshjen hapëse kundër Komoreve më 21 dhjetor. Kjo situatë prek lojtarë si Abde Ezzalzouli dhe Sofyan Amrabat (Real Betis), lojtarë të rregullt të ekipit kombëtar maroken dhe me një shans të fortë për t'u përfshirë në skuadër.

Gjithashtu prek Azzedine Ounahi (Girona), i cili do të vuajë një pezullim pas marrjes së kartonit të tij të pestë të verdhë kundër Real Madridit dhe nuk do të kthehet në klubin katalunas deri në mesin e janarit. Skuadra përfundimtare e Marokut për këtë garë nuk është njoftuar ende zyrtarisht.

Levante humbet lojtarin e saj më të mirë

Lista e skuadrës së Kamerunit është konfirmuar dhe ndikon drejtpërdrejt te një lojtar kyç i Levantes: Etta Eyong, golashënuesi më e mirë e ekipit (6 gola) dhe (3 asistime) këtë sezon. Levante është në një pozicion të pasigurt: e parafundit me 9 pikë, tre pikë larg zonës së sigurisë. Ata do të përballen me Osasunën të hënën më 8 dhjetor, Villarrealin më 14 dhjetor dhe Real Sociedadin më 20 dhjetor.

Sulmuesi mund të jetë i disponueshëm për ndeshjen vendimtare në ‘El Sadar’ kundër një rivali të drejtpërdrejtë në betejën për rënie nga kategoria, por mungesa e tij është pothuajse e sigurt kundër Villarrealit, pasi Kameruni do të debutojë në turne më 24 dhjetor, dhjetë ditë pas asaj ndeshjeje kundër ekipit me bazë në Castellon.

Osasuna do të humbasë gjithashtu një lojtar kyç në mbrojtje, Enzo Boyomo, i cili është thirrur gjithashtu nga ekipi kombëtar i Kamerunit.

Dy mungesa kyçe për Marcelinon

Villarreali po bën një nisje të shkëlqyer të sezonit: ata janë të tretit me 32 pikë, vetëm dy pikë pas liderëve të ligës, dhe gjithçka tregon se Marcelino është pa dy lojtarë të rregullt të formacionit të tij, Pape Gueye (Senegal) dhe Nicolas Pepe (Bregu i Fildishtë).

Sevilla do të jetë gjithashtu pa Chidera Ejuke dhe Akor Adams (Nigeri); Betis, pa Cedric Bakambu (Kongo) dhe Rayo Vallecano, pa Pathe Ciss (Senegal) dhe Randy Nteka (Angola), përfshirja e të cilëve është në pritje të konfirmimit për shkak të lëndimit. Përveç kësaj, Ilias Akhomach (Villarreal) mund të përfshihet në skuadrën e Marokut.

Nga ana tjetër, Getafe do të humbiste Abdel Abqarin (Marok). Omar El Hilali gjithashtu mund të thirret nga kombëtarja marokene, gjë që do ta linte Espanyolin pa mbrojtësin e djathtë titullar, ndërsa Charles Pickel do t'i bashkohet skuadrës kongoleze. Përveç kësaj, Umar Sadiq (Real Sociedad) mund të thirret nga Nigeria. /Telegrafi/

Faza e grupeve të Ligës së re të Kampionëve hyn në fazën e saj vendimtare pas një xhiro ndeshjesh që ka tronditur ndjeshëm renditjen.

Me vetëm tre ndeshje të mbetura, ekipet po përsosin strategjitë e tyre, po përshtatin objektivat e tyre dhe po i mbajnë sytë hapur parashikimeve nga superkompjuteri i Opta-s, i cili ka përditësuar renditjen e probabilitetit për të përcaktuar se kush do të zërë tetë vendet e kualifikimit direkt për fazën e 1/8-tës.

Gjetjet e modelit statistikor janë mbresëlënëse. Real Madridi është ngritur, Barcelona ka rënë dhe disa gjigantë evropianë janë gjetur në një pozicion të papritur e të pasigurt.

Parashikimi e vendos Arsenalin në vendin e parë në fund të tetë ndeshjeve të kësaj faze të ligës. Ekipi i Mikel Artetas, i fortë, i drejtpërdrejtë dhe me një skuadër gjithnjë e më të pjekur, është bërë, sipas Opta-s, ekipi më i besueshëm në kontinent.

Pas tyre, Bayern Munich, pavarësisht humbjes së fundit ndaj Arsenalit, ruan një nivel efektiviteti në Evropë që pak ekipe mund ta arrijnë. Podiumin e plotëson Paris Saint-Germain, i cili duket se ka gjetur një ekuilibër konkurrues nën drejtimin e Luis Enriques dhe parashikimet statistikore të së cilës e forcojnë pozicionin e tyre të tretë.

Real Madridi ngjitet në vendin e katërt

Lajmi i madh për futbollin spanjoll është ngritja e Real Madridit në vendin e katërt në parashikime. Fitorja e tyre në ndeshjen e fundit kundër Olympiacos ka forcuar besimin e superkompjuterit te skuadra e Xabi Alonsos, e cila shfrytëzoi pengesat e rivalëve të drejtpërdrejtë për t'u ngjitur në një hap vendimtar në luftën për tetë vendet e para.

Modeli i superkompjuterit e vendos Interin në vendin e pestë, pavarësisht humbjes së tyre kundër Atletico Madridit, dhe Manchester Cityn në të gjashtin.

Dy vendet e fundit kualifikuese automatike, sipas Opta-s, janë të rezervuara për Chelsean dhe Borussia Dortmundin. Klubi londinez ka bërë një hap të rëndësishëm falë fitores së tyre prestigjioze kundër Barcelonës, ndërsa Dortmundi, i cili mundi Villarrealin, është ngjitur në renditje.

Në vendet e fazës ‘play-off’ gjenden edhe klube si Atletico Madridi në vendin e 10-të, Liverpooli i 11-ti, Barcelona e 12-ta, Napoli i 19-ti, Juventusi i 20-t, Marseille në vendin e 23-të dhe Monaco që zë vendin e fundit për një shans kualifikimi në fazën e 1/8-tës nga faza e eliminimit.

Superkompjuteri parashikon eliminimin e klubeve të njohura si Athletic Bilbao, Benfica, Villarreal dhe Ajax pasi gjenden më poshtë se pozita e 24-të. /Telegrafi/

Sot (e martë) janë në program për t’u zhvilluar nëntë ndeshje në kuadër të xhiros së pestë të fazës së ligës në Ligën e Kampionëve.

Pas një pauze prej tri javësh, Liga e Kampionëve rikthen emocionet mes tifozëve me disa ndeshje shumë interesante që pritet të zhvillohen mbrëmjen e sotme.

Ndeshja kryesore e mbrëmjes padyshim se do të zhvillohet në Londër, ku Chelsea e pret Barcelonën në “Stamford Bridge” me fillim nga ora 21:00.

Takime tjera interesante pritet të jenë edhe ato në mes të Manchester City-Bayer Leverkusen, Marseille-Newcastle dhe Borussia Dortmund-Villarreal.

Nga ora 21:00 do të luhen edhe ndeshjes mes të Bodo/Glimt-Juventus, Napoli-Qarabag dhe Slavia Praga-Athletic Bilbao.

Dy ndeshjet e vetme janë ato në mes të Galatasaray-Royale Union SG dhe Ajax-Benfica. /Telegrafi/

Pas katër xhirove të para të fazës së ligës në Ligën e Kampionëve, është bërë e qartë se klubet nga La Liga nuk po arrijnë të tregojnë fuqinë që i ka karakterizuar në dekadën e fundit. Performanca e tyre ka qenë e zbehtë — dhe në disa raste, shqetësuese.

Nëse zakonisht ishim mësuar t’i shohim ekipet spanjolle duke dominuar Evropën, këtë herë situata duket ndryshe.

Përballjet kundër skuadrave nga Liga Premier kanë nxjerrë në pah një hendek të dukshëm në cilësi dhe efikasitet. Me përjashtim të fitores së Barcelonës ndaj Newcastle United në xhiron e parë, pothuajse të gjitha duelet kanë përfunduar me humbje për spanjollët.

Xhiro 1

Në ndeshjet hapëse, Arsenali mposhti Athletic Bilbaon 2-0 në “San Mamés”, Liverpooli fitoi 3-2 ndaj Atletico Madridit, ndërsa Tottenhami mposhti Villarrealin 1-0, duke bërë që klubet angleze të shënonin tri fitore në tri ndeshje kundër spanjollëve.

Vetëm Barcelona arriti të reagojë, duke fituar 2-1 ndaj Newcastle në transfertë, ndërsa Real Madridi mposhti Marseille 2-1 në “Bernabéu”.

Xhiro 2

Këtë herë shkëlqyen vetëm klubet madrilene. Real Madridi fitoi me rezultat bindës 5-0 ndaj debutuesve të Kairatit, ndërsa Atletico Madridi triumfoi 5-1 ndaj Frankfurtit.

Ndërkohë, Villarreali barazoi 2-2 me Juventusin, Barcelona humbi në shtëpi 2-1 nga PSG, dhe Athletic Bilbao pësoi disfatë të rëndë 4-1 në Gjermani kundër Borussia Dortmundit.

Xhiro 3

Barcelona reagoi fuqishëm me një fitore 6-1 ndaj Olympiacos, por Atletico Madridi pësoi humbje të rëndë 4-0 në Londër nga Arsenali.

Villarreali humbi 2-0 në shtëpi nga Manchester City, ndërsa Real Madridi fitoi 1-0 ndaj Juventusit, e Athletic Bilbao mposhti Qarabagun 3-1 në “San Mamés”.

Xhiro 4

Performanca e klubeve spanjolle u përkeqësua sërish. Real Madridi u mposht nga Liverpooli 1-0, Barcelona nuk arriti të fitonte ndaj Club Brugge (3-3), Athletic Bilbaon u mund 2-0 në shtëpi nga Newcastle, ndërsa Villarreali pësoi një humbje të befasishme 1-0 ndaj debutuesve të Pafosit nga Qipro.

I vetmi ekip spanjoll që fitoi ishte Atletico Madridi, që mundi Union Saint-Gilloise 3-1 në Madrid.

Pas katër xhirove, Real Madridi është i vetmi përfaqësues spanjoll në top 8 të renditjes së Ligës së Kampionëve, ndërsa Villarreali renditet i 32-ti, në fundin e tabelës.

Nëse klubet nga La Liga nuk ndryshojnë ritëm, Spanja rrezikon ta përfundojë këtë sezon evropian më keq se çdo herë tjetër në dekadën e fundit — diçka që dikur dukej e pamundur. /Telegrafi/

Në një ndeshje interesant, Pafos arriti të triumfojë me rezultat minimal 1-0 ndaj Villarreal, në një përballje ku rastet nuk munguan dhe pritjet e portierëve vendosën ritmin e takimit.

Ky ishte një sukses historik për Pafos, fitorja e parë në Ligën e Kampionëve për klubin qipriot, duke e çuar në 5 pikë në mes të renditjes, ndërsa Villarreal mbetet me vetëm një pikë pas katër xhirove të grupit.

Ndeshja nisi me dy skuadra të kujdesshme, por me disa raste të cilat nuk u konkretizuan. Domingos Quina për Pafos dhe Georges Mikautadze për Villarreal patën mundësi të mira brenda zonës, por portierët dhe pritjet e tyre ishin vendimtare.

Nicolas Pepe provoi nga këndi i jashtëm i 16-metërshit, por goli mbeti i pamundur.

Në minutën e 47’, Pafos shënoi golin e vetëm të ndeshjes. Derrick Luckassen shfrytëzoi një krosim nga goditja e këndit, kaloi mbrojtjen e Villarreal dhe me një kokë të saktë e dërgoi topin në fundin e rrjetës, duke i dhënë avantazhin skuadrës së tij.

Villarreal kërkoi barazimin, duke krijuar disa raste të rrezikshme. Manor Solomon, Nicolas Pepe dhe Tanitoluëa Oluëaseyi provuan të gjejnë rrjetën, por portieri i Pafos, Neofytos Michail, bëri pritje vendimtare, duke mbajtur portën e paprekur.

Me këtë fitore historike, Pafos shënon fitoren e parë në Ligën e Kampionëve dhe ngjitet në mes të renditjes me 5 pikë, ndërsa Villarreal mbetet me vetëm 1 pikë dhe duhet të përmirësojë efikasitetin para portës për sfidat e ardhshme. /Telegrafi/

Sot (e mërkurë) janë në orar për t’u zhvilluar nëntë ndeshje në kuadër të xhiros së katërt të fazës së ligës në Ligën e Kampionëve.

Pas etheve dhe ndeshjeve interesante të së martës mbrëma, tani radhën e ka nata e sotme me disa takime tjera që pritet të sjellin emocione të mëdha.

Megjithatë, për dallim nga mbrëmja e së martës ku pati dy derbi shumë të fortë evropian, mbrëmja e sotme nuk ka ndonjë derbi shumë të madh.

Ndeshja më interesante e mbrëmjes pritet të jetë ajo në mes të Manchester Cityt dhe Borussia Dortmundin, e planifikuar të luhet në ‘Etihad’ nga ora 21:00.

Përballje interesante pritet të jenë edhe ato në mes të Neëcastle-Athletic Bilbao, Ajax-Galatasaray, Benfica-Bayer Leverkusen dhe Marseille-Atalanta.

Nga ora 21:00 luajnë edhe dy klubet tjera të mëdha evropiane, Interi dhe Barcelona, me Nerazzurët që presin Kairat Almanyt dhe katalunasit që udhëtojnë te Club Brugge.

Dy ndeshjet e vetme që luhen nga ora 18:45 janë ato në mes të Qarabag-Chelsea dhe Pafos-Villarreal. /Telegrafi/

Real Madridi ka shënuar fitore të thellë në shtëpi ndaj Valencias, në kuadër të xhiros së 11-të në La Liga.

“Los Blancos” i arkëtuan pikët e plota falë një paraqitje fantastike, ku triumfuan me rezultat të thellë 4-0.

Real Madridi e nisi fuqishëm me Jude Bellingham që tentoi nga distanca, por portieri mysafir bëri super pritje për t’ia mohuar golin.

Sidoqoftë, shkaku i një prekje të topit me dorë, gjyqtari akordoi penallti – të cilën e konkretizoi Kylian Mbappe për të kaluar Realin në epërsi (19’).

Francezi pastaj dyfishoi epërsinë me një vollej të bukur pas asistimit të Arda Guler (31’).

Reali kishte rastin e artë për golin e tretë, sidoqoftë Vinicius Jr dështoi nga pika e bardhë.

Megjithatë, një minutë pas huqjes së brazilianit, Jude Bellingham realizoi nga distanca për ta dërguar rezultatin në 3-0 (44’).

Real Madridi ishte më kërkues edhe në pjesën e dytë, ku Mbappe për pak sa nuk e kompletoi het-trikun me një tjetër vollej por portieri mysafir prapë ishte në vendin e duhur.

Fitoren e thellë e vulosi mbrojtësi Alvaro Carreras me një supergol (82’).

Real Madridi vazhdon si lider në La Liga, duke shkuar në kuotën e 30 pikëve, plot shtatë mbi Villarrealin derisa Valencia qëndron në pozitën e 18-të me nëntë sosh./Telegrafi/

Raul Asencio është bërë një pjesë e rëndësishme e mbrojtjes së Real Madridit, megjithatë e ardhmja e tij në ekip nuk është e sigurt.

22-vjeçari luajti në 41 ndeshje gjatë sezonit 2024/25, duke treguar potencial dhe duke u bërë një alternativë e besueshme në rotacionin mbrojtës.

Real Madridi po planifikon një rinovim të mbrojtjes, me emra si Dayot Upamecano ose Ibrahima Konate që mund të arrijnë gjatë verës.

Në këtë kontekst, Asencio mund të huazohet ose shitet për të hapur vend për lojtarë me përvojë më të madhe, duke ruajtur vlerën e tij tregtare, që sipas Transfermarkt është rreth 30 milion euro.

Villarreal shihet si një destinacion i mundshëm për mbrojtësin, duke kërkuar përforcime të reja dhe lojtarë të rinj që janë tashmë të adaptuar në futbollin spanjoll.

Një huazim tek skuadra verdhë do të ishte një mundësi për Asencion për të luajtur rregullisht dhe për të treguar se mund të ketë një rol të rëndësishëm në një ekip të madh.

Për Real Madridin, një largim i përkohshëm ose i kushtëzuar do të ofronte hapësirë në skuadër dhe lehtësim financiar, ndërsa rreziku është që Asencio të përparojë jashtë dhe të kthehet më i fortë.

E ardhmja e tij do të vendoset këtë verë, ndërsa vendimet e klubit dhe performanca e tij në muajt e ardhshëm do të përcaktojnë nëse do të qëndrojë në Madrid apo do të vazhdojë karrierën në LaLigë me një skuadër si Villarreal. /Telegrafi/

Mbrojtësi i Barcelonës, Pau Cubarsi, ka pranuar se ai dhe shokët e skuadrës nuk ishin dakord me idenë për të zhvilluar një ndeshje të La Ligës në Miami këtë dhjetor.

Gjigantët katalanas do të udhëtonin për të përballuar Villarrealin në ndeshjen e fundit të vitit në kampionat, por ajo tani do të zhvillohet në “La Ceramica”, pasi organizatorët Relevent vendosën të anulojnë planin të martën në mbrëmje.

Ky vendim ka ngjallur reagime të shumta, Villarreal është shprehur i pakënaqur me mënyrën si e menaxhoi situatën La Liga, kjo e fundit është e zhgënjyer nga anulimi, ndërsa Real Madridi është i kënaqur që plani nuk do të realizohet.

Zëvendëskapiteni i Barcelonës, Frenkie De Jong, deklaroi javën e kaluar se ishte kundër zhvillimit të ndeshjes jashtë Spanjës, dhe Cubarsi i tha Diario AS se kjo ishte ndjesia e përgjithshme brenda ekipit.

“Ishim të gjithë pak kundër idesë për të luajtur jashtë vendit, sepse kampionati duhet të luhet këtu. Si futbollist, nuk më takon të përfshihem shumë në këtë çështje”, u shpreh ai.

Pau Cubarsi

Cubarsí foli gjatë një eventi promovues të Barcelonës pas marrëveshjes me kompaninë Uber.

Vëmendja kryesore gjatë eventit ishte te El Clasico, që luhet këtë fundjavë në “Santiago Bernabeu”. Cubarsi u pyet për çelësin e një fitoreje ndaj Real Madridit.

“Duhet të vazhdojmë me filozofinë tonë. Vitin e kaluar funksionoi mirë. Tani ekipet janë zhvilluar. Duhet të rregullojmë disa gjëra që do na ndihmojnë të përmirësohemi".

“Ne jemi të përqendruar vetëm te loja e mirë dhe te marrja e tre pikëve”, përfundoi spanjolli./Telegrafi/

Barcelona ka deklaruar se e pranon dhe e respekton vendimin e La Ligas për të anuluar ndeshjen e propozuar kundër Villarrealit në Miami.

Ndeshja ishte planifikuar të ishte e para në historinë e La Ligas që do të luhej jashtë Spanjës, por reagimet në rritje nga lojtarët, klubet dhe zyrtarët detyruan organizatorët të heqin dorë nga plani vetëm disa javë para se biletat të dilnin në shitje.

Barcelona konfirmoi se pranon vendimin e marrë nga La Liga dhe kompania Relevent Sports për anulimin e ndeshjes së javës së 17-të, e planifikuar për më 20 dhjetor në Miami.

Klubi katalanas shprehu zhgënjimin e tij, por gjithashtu bëri të qartë se e respekton vendimin pas javësh pasigurie dhe polemikash.

“Barcelona respekton dhe pranon vendimin për të anuluar ndeshjen kundër Villarreal në Miami, ashtu siç ka pranuar dhe respektuar edhe vendimin e mëparshëm për të luajtur në SHBA”.

“Klubi shpreh keqardhjen për mundësinë e humbur për të zgjeruar imazhin e kompeticionit në një treg strategjik me potencial të madh për rritje dhe gjenerim të të ardhurave për të gjithë”.

“Klubi është mirënjohës për mbështetjen dhe dashurinë e pakushtëzuar të tifozëve tanë në SHBA dhe shpreh keqardhjen e thellë që ata po humbasin mundësinë për të parë një ndeshje zyrtare në vendin e tyre”, përfundon deklarata e Barcelonës.

La Liga gjithashtu publikoi një deklaratë të detajuar, duke konfirmuar anulimin dhe duke theksuar zhgënjimin për mundësinë e humbur për të zgjeruar futbollin spanjoll në nivel ndërkombëtar./Telegrafi/

Javier Tebas ka kritikuar ashpër vendimin për të anuluar planet për të organizuar ndeshjen mes Villarreal dhe Barcelonës në Miami, duke e quajtur atë “të ngushtë në mendësi” dhe duke akuzuar organet qeverisëse dhe Real Madridin për sabotimin e ambicieve globale të La Ligës.

Presidenti i ligës insiston se futbolli spanjoll ka humbur një mundësi historike, ndërsa reagimet ndaj ndeshjes së propozuar vazhdojnë të shkaktojnë përçarje opinionesh.

Presidenti i La Ligës, Tebas, reagoi fuqishëm në X, duke e quajtur vendimin “një disfatë për të ardhmen e futbollit spanjoll” dhe duke akuzuar institucione dhe klube të paemëruara, të interpretuara gjerësisht si UEFA dhe Real Madridi, për pengimin e përparimit.

“Sot, futbolli spanjoll ka humbur një mundësi për të avancuar, për t’u projektuar globalisht dhe për të forcuar të ardhmen e tij”.

“Mbrojtja e ‘traditës’ përdoret nga një perspektivë e ngushtë dhe provinciale, ndërsa traditat e vërteta të futbollit evropian janë të kërcënuara nga vendimet e institucioneve qeverisëse, të cilat vit pas viti shkatërrojnë ligat kombëtare, forcën e vërtetë lëvizëse të industrisë së futbollit evropian, në mes të naivitetit dhe pasivitetit të liderëve evropianë që nuk arrijnë të dallojnë të parëndësishmen nga e domosdoshmja”.

“‘Integriteti i kompeticionit’ përdoret si justifikim nga ata që prej vitesh e kanë vënë në dyshim të njëjtin integritet, duke ushtruar presion ndaj gjyqtarëve dhe drejtuesve, duke krijuar narrativë të shtrembëruara, apo duke përdorur presion politik dhe mediatik si mjet sportiv”.

Jaiver Tebas

“Dua të falënderoj Villarrealin dhe Barcelonën për angazhimin dhe bujarinë e tyre në pjesëmarrjen në një projekt që kërkonte vetëm rritjen e kompeticionit tonë. Ata nuk mendonin për veten, por për të gjithë”.

“La Liga do të vazhdojë të punojë me rigorozitet dhe bindje për ta mbajtur futbollin spanjoll konkurrues, duke u përballur me ata që kërkojnë ta shkatërrojnë, por gjithmonë duke respektuar rrënjët e tij dhe duke siguruar qëndrueshmërinë e tij”.

“Futbolli spanjoll meriton të shikojë drejt së ardhmes me ambicie, jo me frikë. Ne do të vazhdojmë përpjekjet. Këtë herë, u afruam shumë”, ka thënë Tebas./Telegrafi/