Ish-presidentit të Kosovës që po mbahet në qendrën e paraburgimit në Hagë gjatë gjithë kohës i përgjohen bisedat me vizitorë.
Në gjyqin e dytë ndaj Hashim Thaçit, Prokuroria e Specializuar, i ka dorëzuar 35 orë audio-incizime si prova, njofton Klan Kosova.
Rëndimi që po i bëhet mbrojtjes me mbi 5 mijë faqe transkripte nuk është ankesa e vetme e avokatëve të Thaçit dhe të tjerëve, të cilët kanë gjetur se Prokuroria po i ndryshon edhe versionet e përkthimeve të pjesëve ku pretendohet se ish-presidenti u mundua të jap udhëzime për dëshmitarë.
Kujtojmë se deklaratat përmbyllëse në çështjen kundër ish-udhëheqësve të Ushtrisë Çlirimtare të Kosovës do të mbahen nga 9 deri më 18 shkurt.
Ish-eprorët e UÇK-së Hashim Thaçi, Kadri Veseli, Rexhep Selimi dhe Jakup Krasniqi akuzohen për krime lufte dhe krime kundër njerëzimit. Të katërtit janë deklaruar të pafajshëm për akuzat që rëndojnë ndaj tyre.
Sipas njoftimit, parashihet që fillimisht Zyra e Prokurorit të Specializuar të mbajë deklaratën përmbyllëse më 9 shkurt. Një ditë më pas, radha do të jetë e mbrojtësit të viktimave.
Thaçi, Veseli, Krasniqi dhe Selimi janë në paraburgim që nga nëntori i vitit 2020. Gjykimi ndaj tyre nisi në prill të vitit 2023. Fillimisht, Zyra e Prokurorit të Specializuar thirri në gjykatore 125 dëshmitarë, ndërkaq 117 të tjerë dorëzuan dëshmitë e tyre me shkrim.
Ndërkaq, Thaçi po përballet edhe një rast tjetër për pengim të drejtësisë dhe gjykimi për këtë çështje është caktuar të nisë më 24 shkurt të këtij viti. /Telegrafi/
Një rast i veprës penale “Mashtrim” është raportuar në komunën e Leposaviqit,.
Policia e Kosovës ka njoftuar se më 4 shkurt 2026, rreth orës 17:15, rasti është raportuar në Stacionin Policor në Leposaviq, ndërsa ngjarja dyshohet se ka ndodhur një ditë më herët.
“Ankuesi dyshohet se është mashtruar nga i dyshuari, i cili është shoku i tij. I dyshuari, me pretekst të rremë se babai i tij do t’ia kryente një obligim kreditor që ankuesi kishte ndaj bankës, ka arritur të sigurojë kartelën bankare të ankuesit”, thuhet në njoftimin e Policisë.
Policia bën të ditur se më pas, pa dijeninë dhe pëlqimin e ankuesit, i dyshuari ka tërhequr nga llogaria bankare shumën prej 600 euro.
Në lidhje me rastin, në stacionin policor është intervistuar i dyshuari D.S. (2003). Me urdhër të Prokurorit të Shtetit, pas intervistimit, i dyshuari është liruar në procedurë të rregullt dhe rasti do të hetohet për veprën penale “Mashtrim”.
Policia e Kosovës ka apeluar te qytetarët që të tregojnë kujdes dhe të mos bien pre e mashtrimeve, duke u bërë thirrje që të jenë të kujdesshëm në dhënien e të dhënave personale dhe bankare.
Për çdo rast të dyshimtë, qytetarët mund të kontaktojnë Policinë e Kosovës përmes numrit emergjent 192, linjave pa pagesë ose përmes aplikacionit “Lajmëro Policinë”. /Telegrafi/
Dogana e Kosovës ka vazhduar me intensitet kontrollet kundër kontrabandës me mallra, me fokus të veçantë në sektorin e barnave.
Së fundmi, njësitë e antikontrabandës kanë zhvilluar një aksion në Ferizaj, ku gjatë kontrolleve në një poliklinikë private dhe në një barnatore janë sekuestruar barna të dyshuara si të kontrabanduara, me vlerë mbi 30 mijë euro.
“Gjatë një operacioni kundër kontrabandës, njësitë e antikontrabandës kanë konfiskuar një sasi barnash të dyshuara si të kontrabanduara dhe kanë zbuluar një hapësirë të fshehtë (bunker) të përshtatur për fshehjen e tyre”, ka njoftuar Dogana e Kosovës.
Gjatë kontrollit në hapësirat e poliklinikës, si dhe në një hapësirë të kamufluar në bodrum, e cila shfrytëzohej për kryerjen e rrezatimeve rentgen, është gjetur dhe sekuestruar një sasi e konsiderueshme barnash pa banderola RKS.
Pas evidentimit dhe verifikimit nga agjencitë kompetente, është konstatuar se janë konfiskuar 1,099 pako barnash pa banderola, të regjistruara sipas specifikacionit zyrtar me vlerë të përgjithshme të vlerësuar mbi 30,000 euro.
Ndër barnat e konfiskuara përfshihen produkte farmaceutike si Nexium, Jardiance, Xarelto, Janumet, Primolut, Microgynon, Cyclo-Progynova, Sintrom, Euthyrox/Eutirox, No-Spa, Ponstan, Diane, si dhe barna të tjera, sipas listës zyrtare të konfiskimit.
Rasti është në procedurë të mëtejme ligjore, ndërsa Dogana e Kosovës ka theksuar se mbetet e përkushtuar në parandalimin dhe luftimin e qarkullimit ilegal të barnave, si dhe në mbrojtjen e shëndetit publik, në koordinim me institucionet relevante. /Telegrafi/
Një aksident trafiku ka ndodhur mbrëmë rreth orës 20:05 në fshatin Lebushë të Deçanit.
Si pasojë e këtij aksidenti tre persona janë lënduar.
Lajmin për Telegrafin e ka konfirmuar zëdhënësi i policisë për rajonin e Pejës, Driton Rugova.
“Me datën 04.02.2026, rreth orës 20:05, Policia është njoftuar për një aksident i cili ka ndodhur në fshatin Lebushë-Deçan, në këtë aksident ishin të involvuara 2 vetura dhe si pasojë 3 persona kanë pësuar lëndime trupore”, ka thënë Rugova.
Ai ka shtuar se me rastin është marrë njësiti i trafikut rrugor. /Telegrafi/
Gjykata Kushtetuese e Kosovës ka publikuar aktgjykimin e plotë ku është vendosur se zgjedhja e nënkryetarit të Kuvendit nga radhët e komunitetit serb më 10 tetor 2025, e dokumentuar në procesverbalin e seancës, nuk është në përputhje me Kushtetutën dhe Rregulloren e Kuvendit.
Kërkesa ishte dorëzuar nga 10 deputetë të Kuvendit, përfshirë Igor Simiq, të cilët kontestuan kushtetutshmërinë e procesverbalit të seancës konstituive të Kuvendit të Kosovës me pretendimin se ai është në kundërshtim me dispozitat relevante kushtetuese dhe rregulloren e punës së Kuvendit.
Në vendimin e saj, Gjykata thekson se ky proces ka shkelur parimet e barazisë dhe procedurës së rregullt në Kuvend.
“Vendimi i Kuvendit të Republikës së Kosovës për zgjedhjen e nënkryetarit nga radhët e komunitetit serb më 10 tetor 2025, nuk është në përputhje me Kushtetutën dhe Rregulloren e Kuvendit”, thuhet në aktgjykim.
Gjykata gjithashtu bëri të qartë se ky konstatim nuk ka efekt prapaveprues.
“Veprimet e kryera gjatë këtij procesi mbeten në fuqi deri në marrjen e një vendimi të ri nga organet përkatëse”.
Në aktgjykim, Kushtetuesja ka vlerësuar se propozimi për nënkryetarin nga komuniteti serb duhet të bëhet nga shumica e deputetëve të komunitetit serb apo të komuniteteve tjera që nuk janë shumicë.
“Çdo shmangie nga ky standard cenon legjitimitetin kushtetues të procesit të konstituimit të Kuvendit të Republikës së Kosovës”, thuhet mes tjerash në aktgjykim.
Gjykata ka theksuar rëndësinë e bashkëpunimit të deputetëve për të siguruar funksionalitetin e Kuvendit.
“E drejta e shumicës për propozimin e kandidatit për nënkryetar nga komunitetet që nuk janë shumicë, e përcaktuar dhe e garantuar me Kushtetutë, duhet të respektohet nga të gjithë deputetët dhe të realizohet përmes bashkëpunimit në mirëbesim, ku deputetët veprojnë në interesin më të mirë të shtetit”
Gjykata gjithashtu ka konstatuar se procedura e shortit, e përdorur nga Kryetari i Kuvendit Dimal Basha për të zgjidhur ngërçin, nuk ishte zbatuar në përputhje me frymën dhe qëllimin e saj,
“Zbatimi i këtij mekanizmi në mënyrë që shumica e deputetëve të Kuvendit të përcaktojë përfaqësuesin e një komuniteti që nuk është shumicë, pa propozimin e këtyre të fundit, do të përbënte anashkalim të garancive kushtetuese dhe atyre të përcaktuara në Rregulloren e Kuvendit”, thekson Kushtetuesja në aktgjykimin e saj.
Gjykata ka theksuar se shumica e deputetëve serbë kishin propozuar nëntë kandidatë të tjerë dhe kishin marrë pjesë në votim, duke përfshirë edhe votimin kundër Rashiqit, prandaj nuk ishin plotësuar kushtet për aktivizimin e mekanizmit debllokues të procedurës së shortit.
Ky vendim shërben si precedent ligjor për të garantuar respektimin e procedurave kushtetuese në konstituimin e institucioneve, veçanërisht në periudha tranzicioni pas zgjedhjeve parlamentare.
Ministrja në detyrë e Ekonomisë, Artane Rizvanolli ka reaguar lidhur me kërkesën e KESCO-s, e cila ka bërë kërkesë tek Zyra e Rregullatorit për Energji (ZRRE) për rritjen e tarifave për 21 për qind.
Rizvanolli është deklaruar se ende nuk ka vendim për rritjen e tarifave të energjisë elektrike, duke theksuar se lajmet e publikuara lidhen vetëm me kërkesën e furnizuesit dhe operatorëve, e jo me një vendim të marrë, raporton KosovaPress.
Ajo tha se vendimi eventual do të merret vetëm pasi ZRRE të publikojë raportin konsultativ, ndërsa do të analizojë atë dhe do të japë komentet e saj, ashtu si çdo vit.
“Së pari duhet theksuar se lajmi që është publikuar ka të bëjë me kërkesën e furnizuesit dhe operatoreve të tjerë, por nuk ka një vendim ende. Ndërsa duhet pasur parasysh disa zhvillime që janë objektive në sektor të energjisë që do të mund të kenë pasoja në këtë aspekt. Në Korporatën Energjetike të Kosovës vitin e kaluar kanë filluar investime në modernizim dhe rehabilitim që nuk janë bërë për 40 vite. Kjo do të thotë që për këto vite, vjet, sivjet dhe vitin e ardhshëm ne do të kalojmë një periudhë sfiduese, sepse blloqet duhet të ndalen, është e domosdoshme të ndalen për një kohë për disa muaj, në mënyrë që investimet të realizohen”, tha Rizvanolli.
Ajo shtoi se kjo është një sakrificë që duhet të bëjmë ne, për ne dhe gjeneratat e ardhshme.
“Është investimi i parë serioz që po bëhet në KEK pas 40 viteve...Kjo është një arsyeje pse vjet është dashur të importojmë më shumë, pra, ka arsyeje objektive pse importi është rritur, pse importi pritet të jetë i lartë edhe gjatë këtij viti, mirëpo edhe gjatë vitit të ardhshëm”, ka theksuar Rizvanolli.
Rizvanolli foli edhe për rritjen e importit të energjisë, duke e cilësuar atë si pasojë të zhvillimeve objektive në sektorin energjetik, veçanërisht investimeve në Korporatën Energjetike të Kosovës.
Sipas saj, në KEK kanë filluar investime serioze në modernizim dhe rehabilitim, të parat pas 40 vitesh, çka ka bërë që blloqet të ndalen për disa muaj.
“Sa i përket kërkesës dhe vendimit eventual, ose sa i përket çmimit të tarifave të energjisë elektrike, do të shohim raportin konsultativ kur ZRRE do të publikojë atë, në këtë fazë nuk mund të themi asgjë,. ZRRE i vlerëson këto shpenzime që ata konsiderojnë që janë të arsyeshme”, ka thënë Rizvanolli.
Këto komente Rizvanolli i bëri gjatë ceremonisë së përurimit të investimeve në efiçiencë të energjisë në Shkollën e Mesme Ekonomike ‘Isa Boletini’ në Podujevë.
Ndërsa, një grup aktivistësh/esh, Kolektivi Feminist dhe Përpjekja, kanë bërë thirrje për protestë kundër paralajmërimeve për rritje të çmimit të energjisë elektrike, raporton KosovaPress.
Sipas njoftimit, protesta do të mbahet këtë të premte, duke nisur nga ora 13:00 pranë ndërtesës së KEDS-it, për të vazhduar më pas drejt Qeverisë së Kosovës.
KESCO ka bërë kërkesë tek Zyra e Rregullatorit për Energji për rritjen e tarifave për 21 për qind. ZRRE, është në proces të shqyrtimit të këtij aplikacioni. /Telegrafi/
Mbi 400 mijë shërbime janë kryer në Klinikën e Onkologjisë gjatë vitit të kaluar, ka thënë drejtori i kësaj klinike, Ilir Kurtishi. Në Ditën Botërore kundër Kancerit, ai tha se në tetë vitet e fundit në Kosovë janë diagnostikuar rreth 14 mijë raste me këtë sëmundje. Kjo klinikë u vizitua gjatë ditës nga ministri në detyrë i Shëndetësisë, Arben Vitia, raporton KosovaPress.
Kurtishi gjatë prezantimit të punës ka folur për shërbimet e kimioterapisë dhe ato të radioterapisë.
“Kemi pasur që Klinika e Onkologjisë në vitin 2025 ka kryer mbi 408,000 shërbime, të ndara në dy shërbimet tona, shërbimin e kimioterapisë dhe shërbimin e radioterapisë. Dhe nga këto ajo që bie në pa është se ne kemi aplikuar në numër shumë të lartë të trajtimeve medikamentoze ose me citostatik dhe kemi kryer mbi, jo vetëm citostatik por edhe forma të tjera të mjekimit tabletar ose dhënies së terapive biologjike, terapive imunologjike e kështu me radhë, ato të cilat ne i kemi disponuar në klinikë, dhe kjo kap një shifër prej 100,000 shërbimeve ose qytetarëve që i bie, i njëjti qytetar, i njëjti pacient ka marrë disa herë ose më shumë se 10-15 herë brenda klinikës trajtime korrekte onkologjike. Anën tjetër kemi pasur, kemi aplikimin e barnave jo citostatikë, edhe kjo është një shifër prej 51,600 shërbimeve të cilët janë realizuar nga Klinika e Onkologjisë, pra nga stafi mjekësor dhe nga sidomos nga stafi infermieror”, tha Kurtishi.
Tutje, Kurtishi tha se në tetë vitet e fundit kanë qenë rreth 14 mijë raste me kancer.
“Kemi grumbulluar disa të dhëna për tetë vitet e fundit në Kosovë, nga viti 2018 deri 2025 dhe kemi parë se gjatë këtij viti, pra jemi fokusuar pra në të gjitha vitet dhe numri i rasteve me kancer për tetë vite në Kosovë është rreth 14,042 raste. Ne po flasim sipas të dhënave dhe evidencave të cilat i kemi në Klinikën e Onkologjisë të të rriturit ose tumoreve adult, pa i përfshirë tumoret e fëmijëve dhe tumoret hematologjike. Dhe nga viti në vit shohim se në vitin 2022 kanë qenë 1,736 raste të reja ose të cilët për herë të parë janë lajmëruar në Klinikën e Onkologjisë. Në vitin 2023 ky numër ka shkuar në 2,126, në vitin 2024 është 2,119 dhe vitin 2025 ne kemi pak ulje, por kjo e dhënë është rreth, duhet të jetë rreth 2,100 raste”, shtoi ai.
Ministri në detyrë i Shëndetësisë, Arben Vitia ka vizituar Klinikën e Onkologjisë në Ditën Botërore Kundër Kancerit.
Ai e pranoi që duhet të punohet që të eliminohen pritjet e gjata në këtë klinikë për marrjen e shërbimeve nga ana e pacientëve.
“Janë disa nga shërbimet, po them, jo nivelit shumë të avancuar terciar, të cilat ndoshta kishin mundur me u decentralizuar, pasi që sot e pamë, kjo çka e pamë sot, besoj që është një përditshmëri për juve, numrin e pacientëve që presin poshtë në Klinikën e Onkologjisë vetëm për këtë qëllim. Nuk mjafton vetëm dyfishimi i shtretërve, të cilin veç me të është ju e keni realizuar. Nuk mjafton vetëm dyfishimi i shtretërve të cilët ju tashmë veç e keni realizuar, nuk mjafton vetëm shtimi i aparaturave si ajo e Radioterapisë. Ju keni një fluks të tillë, të cilin ne ishte dashur që me jua ndihmuar, e kjo ndihmë, natyrisht, prapë po them, çdo herë në bashkëpunim me juve, sepse ju jeni ekspertët, dhe prapë po them, ju merrni një mu si fasilitator edhe ndihmës në këto procese që ju duhet t'i shtyni përpara, të mundohemi që të ulim fluksin në Klinikën e Onkologjisë në Prishtinë, në mënyrë që edhe të jetë më lehtë për pacientët, por edhe ju mos keni ngarkesa të tilla të përditshme siç i keni sot”, ka thënë Vitia.
Ai u zotua se Ministria e Shëndetësisë do të vazhdojë të ketë në fokus sëmundjet malinje, modernizimin e shërbimeve dhe sigurimin e terapisë.
Sa i përket kostos së investimeve dhe jetëgjatësisë së pacientëve, ish-drejtori i Onkologjisë, Ekrem Hyseni tha se Kosova është vendi me shpenzimet më të ulëta në regjion.
“Nëse e shohim si shpenzim, normalisht jemi vendi që shpenzojmë më së paku për Onkologjinë në regjion, edhe Mali i Zi shpenzon më shumë. Është shumë me të vërtetë kosto-efikitiviteti që duhet me pa, por në fund të fundit nuk mundesh me i ik se familjari nuk është numër, është person, ka familje, ka fëmijë”, u shpreh ai.
Veç tjerash, ministri në detyrë i Shëndetësisë, Arben Vitia bëri ditur se janë duke zhvilluar komunikime me Komunën e Fushë Kosovës për ndarjen e tokës për ndërtimin e institucionit i cili i dedikohet kujdesit të pacientëve në fazën terminale.
“Plani i veprimit për Hospicën është bërë, domethënë të gjitha janë, po vitin e kaluar kemi pasur telashe në komunikim me disa komuna për tokën, sepse aty ku ndërtohet Hospica janë disa kushte elementare, qasja, vendi e të gjitha që janë shumë të rëndësishme që të marrin pacientët në fazat terminale të jetës një trajtim dinjitoz dhe tash veç jemi në fazat e avancuara të bisedave me komunën e Fushë Kosovës për ndarjen e tokës në këtë komunë dhe menjëherë të fillojmë pastaj procedurat për projektin ideor dhe procedura të tjera deri në ndërtimin e Hospicës”, tha ai. /KP/
Një grup i organizatave të shoqërisë civile ka shprehur shqetësim të thellë lidhur me vendimin e Ministrisë së Financave për themelimin e një grupi punues për hartimin e Projektligjit të ri të Prokurimit Publik, duke e cilësuar procesin si të diskutueshëm dhe të nxituar.
Në reagimin e tyre, organizatat theksojnë se hartimi i ligjeve të rëndësishme, si ai i prokurimit publik, kërkon stabilitet institucional dhe proces gjithëpërfshirës, ndërsa tani po bëhet në një situatë të paqartë qeveritare.
“Nisja me nguti e proceseve për hartimin e ligjeve me rëndësi të lartë, si Ligji për Prokurimin Publik, është politikisht e papërshtatshme dhe institucionalisht e paarsyeshme në rrethana të mungesës së mandatit të plotë qeveritar. Hartimi i një ligji të tillë nuk është proces teknik, por proces normativ me pasoja afatgjata për sistemin e prokurimit publik dhe menaxhimin e fondeve publike”, thuhet në reagim.
Organizatat kritikojnë gjithashtu përbërjen e grupit punues, që sipas tyre nuk përfshin shoqërinë civile dhe ekspertët e pavarur, duke shkelur Rregulloren e Punës së Qeverisë.
“Mosrespektimi i dispozitave që rregullojnë këtë çështje që në fazën fillestare të procesit cenon parimin e gjithëpërfshirjes, transparencës dhe konsultimit real, duke e reduktuar procesin ligjvënës në një ushtrim të mbyllur administrativ”, theksohet më tej.
Shoqëria civile nënvizon se prokurimi publik është një sektor veçanërisht i ndjeshëm ndaj korrupsionit dhe keqmenaxhimit të fondeve publike, prandaj përjashtimi i palëve relevante nga procesi rrezikon kontrollin publik dhe besueshmërinë e ligjit.
“Çdo proces për hartimin ose ndryshimin e Ligjit për Prokurimin Publik duhet të zhvillohet përmes një qasjeje të hapur, transparente dhe gjithëpërfshirëse, me pjesëmarrjen aktive të shoqërisë civile dhe palëve relevante, dhe në rrethana të stabilitetit institucional që garantojnë legjitimitet dhe besim publik”, përfundon reagimi.
Nënshkruesit e këtij reagimi janë Demokraci Plus, Fondacioni Kosovar për Shoqëri Civile, Grupi për Studime Juridike dhe Politike, Iniciativa për Progres, Instituti Demokratik i Kosovës, Instituti i Kosovës për Drejtësi dhe Lëvizja Fol./Telegrafi/
Pas kritikave të gazetarit gjerman të Frankfurter Allgemeine Zeitung (FAZ), Michael Martens, ndaj presidentes së Kosovës Vjosa Osmani, ka reaguar këshilltari i saj, Rinor Nuhiu duke i cilësuar deklaratat e gazetarit si shpifëse dhe të pavërteta.
Në një reagim publik, Nuhiu ka theksuar se pretendimet e Martens përbëjnë shpifje, fyerje dhe përhapje të dezinformatave, të cilat sipas tij, janë të dënueshme sipas legjislacionit gjerman.
“Shpifja dhe fyerja, akuzat e pabazuara dhe pretendimet e rreme nga Michael Martens (i njohur si Andric1961), i nënshtrohen përgjegjësisë civile dhe penale sipas ligjit gjerman,” ka shkruar Nuhiu në “X”.
Ai shtoi se presidentja Osmani i hedh poshtë kategorikisht pretendimet e gazetarit, duke i cilësuar ato si dëmtuese për institucionin e Presidencës dhe për shtetin e Kosovës.
“Presidentja Osmani i refuzon kategorikisht pretendimet shpifëse dhe përhapjen e rrezikshme të dezinformatave,” theksoi këshilltari i saj.
Sipas Nuhiut, presidentja tashmë ka nisur konsultimet me avokatë në Gjermani, me qëllim të ndjekjes së të gjitha rrugëve ligjore të mundshme.
“Presidentja po konsultohet me avokatë në Gjermani për të përdorur të gjitha mjetet ligjore, me qëllim të mbrojtjes së integritetit të institucionit dhe të vendit që ajo udhëheq,” përfundoi Nuhiu.
Reagimi vjen pasi gazetari i FAZ-it kishte shkruar se Osmani po përpiqet të sigurojë një mandat të dytë duke u prezantuar si “kandidatja e Donald Trumpit”, një vlerësim që ka nxitur debat të gjerë në opinionin publik. /Telegrafi/
Defamation and slander, the unfounded allegations and demonstrably false claims by Michael Martens (aka Andric1961) are subject to civil and criminal liability under German law. President Osmani categorically rejects his defamatory claims and his dangerous dissemination of… — Rinor Nuhiu (@RinorNuhiu) February 4, 2026
Kryeministri në detyrë i Kosovës, Albin Kurti, ka deklaruar se janë duke u përgatitur që sa më shpejt të konstituohet Kuvendi i Kosovës dhe të formohet Qeveria e re, meqë sipas tij ekziston urgjencë për miratimin e buxhetit dhe marrëveshjeve ndërkombëtare.
Ai theksoi se buxheti i Republikës së Kosovës për vitin 2026 duhet të përmbyllet brenda muajit shkurt, pasi funksionimi me sistemin e një të dymbëdhjetës nuk mund të vazhdojë edhe në muajin mars.
“Ne po përgatitemi që sa më shpejt ta konstituojmë Kuvendin dhe sa më shpejt ta formojmë Qeverinë, sepse, siç e dini, i kemi tri marrëveshje ndërkombëtare me Bankën Botërore. Njëkohësisht e kemi edhe Planin e Rritjes me Bashkimin Evropian, në vlerë prej 882.6 milionë eurosh, që duhet sa më parë të miratohet në Kuvendin e Republikës, pa harruar edhe buxhetin për vitin 2026”, shtoi ai.
Kurti rikujtoi se Qeveria mund të funksionojë me buxhetin e përkohshëm vetëm deri në fund të muajit shkurt.
“Me një të dymbëdhjetën Qeveria mund të vazhdojë vetëm edhe në muajin shkurt, ndërsa në mars kjo nuk është e mundur. Prandaj, në shkurt duhet ta kemi të përmbyllur buxhetin e vitit 2026,” tha ai.
Duke folur për përbërjen e kabinetit të ri qeveritar, Kurti paralajmëroi se do të ketë vazhdimësi, por edhe ndryshime.
“Do të ketë shumë prej emrave që i kam prezantuar unë dhe Glauk Konjufca në vjeshtën e vitit të kaluar, por kabineti nuk do të jetë identik. Do të ketë edhe emra të rinj", u shpreh Kurti.
I pyetur për postin e presidentit të shtetit, Kurti tha se prioritet mbeten fillimisht konstituimi i Kuvendit, formimi i Qeverisë dhe miratimi i buxhetit, ndërsa më pas do të ecet edhe drejt hapit të katërt.
“Së pari duhet t’i përmbyllim këta tre hapa, e pastaj do të ecim edhe me hapin e katërt mbarë e mirë", përfundoi Kurti. /Telegrafi/
Dogana e Kosovës ka ndaluar 102 kilogramë katalizatorë të bluar të padeklaruar në Pikëkalimin Kufitar Vërmicë, gjatë kontrolleve të rregullta doganore.
Sipas njoftimit zyrtar, automjeti është ndaluar për kontroll të detajuar, ku është zbuluar mall i padeklaruar.
“Në automjet janë gjetur dhe sekuestruar katalizatorë të bluar me peshë totale prej 102.10 kilogramësh, me vlerë të përafërt rreth 8 mijë euro”, thuhet në njoftimin e Doganës së Kosovës.
Autoritetet bëjnë të ditur se rasti është trajtuar si kundërvajtje doganore për mosdeklarim të mallit, në përputhje me legjislacionin në fuqi.
“Dogana e Kosovës vazhdon me përkushtim zbatimin e masave të kontrollit, me qëllim të parandalimit të veprimtarive të kundërligjshme në pikat kufitare”, theksohet më tej në njoftim.
Dogana ka ritheksuar angazhimin e saj për forcimin e kontrolleve dhe mbrojtjen e tregut nga mallrat e padeklaruara. /Telegrafi/
Partia Demokratike e Kosovës shpreh mbështetjen e saj për marshin qytetar “Drejtësi, jo politikë!”, i cili organizohet nga platforma Liria ka Emër më 17 shkurt, në Ditën e Pavarësisë së Republikës së Kosovës, në Prishtinë.
Sipas njoftimit, PDK-së, ka nisur mobilizimin e saj në të gjitha strukturat partiake, anembanë Kosovës, me qëllim të angazhimit sa më të gjerë të qytetarëve për pjesëmarrje masive në këtë marsh qytetar.
“PDK vlerëson se ky marsh është thirrje e ligjshme dhe paqësore për drejtësi të paanshme, në mbrojtje të luftës çlirimtare të Kosovës dhe të luftëtarëve të lirisë, Hashim Thaçit, Kadri Veselit, Jakup Krasniqit, Rexhep Selimit dhe bashkëluftëtarëve të tyre, të cilët po përballen me procese gjyqësore në Hagë. Në këtë periudhë kur procesi ka hyrë në fazën përmbyllëse, PDK kërkon drejtësi të plotë, të barabartë dhe larg çdo ndikimi politik”, njofton PDK.
Në njoftim thuhet se Partia Demokratike e Kosovës rithekson se lufta e Ushtrisë Çlirimtare të Kosovës ishte luftë e drejtë dhe çlirimtare, e lindur nga nevoja për liri dhe dinjitet. Çdo përpjekje për ta relativizuar këtë të vërtetë historike përbën padrejtësi ndaj sakrificës së popullit të Kosovës.
Partia Demokratike e Kosovës fton qytetarët që në frymën e unitetit dhe respektit institucional, të bashkohen më 17 shkurt në Prishtinë për të kërkuar drejtësi dhe për të nderuar sakrificën çlirimtare mbi të cilën është ndërtuar Republika e Kosovës.
Marshi synon të përcjellë mesazhin se drejtësia duhet të jetë e paanshme dhe larg ndikimeve politike, duke respektuar sakrificën e atyre që kontribuuan për lirinë dhe pavarësinë e Kosovës.
Vitin e kaluar janë organizuar pesë protesta me thirrjet "Drejtësi per Çlirimtarët".
Protesta e parë është mbajtur në Prishtinë, më pas në Hagë, Tiranë, Strasburg e në Shkup. /Telegrafi/
Prokuroria Themelore në Pejë, Departamenti i Përgjithshëm, ka ngritur aktakuzë ndaj personit fizik Sh.K., si dhe ndaj personit juridik kompanisë “Luani Transport”, për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, sipas Kodit Penal të Republikës së Kosovës.
Sipas aktakuzës, i pandehuri Sh.K., më 7 korrik 2025, në fshatin Gorazhdevc, Komuna e Pejës, në cilësinë e pronarit të kompanisë, nuk ka ndërmarrë masat e nevojshme për siguri dhe shëndet në punë, duke mos krijuar kushte të sigurta për punëtorët.
“I pandehuri nuk ka ofruar trajnim për siguri në punë, nuk ka dhënë informacione për rreziqet në vendin e punës dhe as për përdorimin e duhur të makinerisë”, thuhet në aktakuzë.
Prokuroria thekson se, megjithëse viktima S.R., tani i ndjerë, kishte detyrë vetëm pastrimin, ai ka humbur jetën në vendin e punës si pasojë e kontaktit me gjeneratorin.
Po ashtu, aktakuzë është ngritur edhe ndaj personit juridik, kompanisë “Luani Transport”, e cila sipas Prokurorisë, nga pakujdesia dhe mosrespektimi i Ligjit për Sigurinë dhe Shëndetin në Punë, nuk ka vepruar në përputhje me dispozitat dhe rregullat teknike për masat e sigurisë në vendin e punës.
“Si pasojë e mosplotësimit të kushteve të punës sipas ligjit dhe në kundërshtim me nenin 6, paragrafi 1 i Ligjit për Sigurinë dhe Shëndetin në Punë, ka humbur jetën punëtori S.R”, thuhet në njoftimin e Prokurorisë.
Prokurori i shtetit i ka propozuar gjykatës që, përveç dënimit për veprën penale, të shqiptohet edhe dënimi plotësues “Ndalimi i ushtrimit të profesionit, veprimtarisë ose detyrës”, konkretisht ndalimi i ushtrimit të veprimtarisë së separacionit.
“Kjo për faktin se i pandehuri ka ushtruar veprimtarinë pa licencë dhe pa asnjë kriter të sigurisë në vendin e punës”, thuhet më tej në aktakuzë.
Rasti tashmë pritet të trajtohet nga gjykata kompetente. /Telegrafi/
Një debat mediatik i ashpër është ndezur pas deklaratave të gazetarit të njohur gjerman Michael Martens, i cili në disa komente publike ofendoi rëndë presidenten e Kosovës, Vjosa Osmani, që kanë shkaktuar reagime të fuqishme në Prishtinë.
Martens, gazetar i gazetës prestigjioze gjermane Frankfurter Allgemeine Zeitung (FAZ), i është referuar një sërë ngjarjesh diplomatike të fundit që lidhen me Osmani, duke përfshirë edhe pjesëmarrjen e saj në forume ndërkombëtare dhe lidhjet me presidentin amerikan Donald Trump.
Së fundmi gazetari ka shkruar një artikull të gjatë që ka publikuar në numrin e të mërkurës në gazetën gjermane FAZ.
Martens ka ndarë në rrjetin “X” disa nga pjesët që përmban artikulli i tij në FAZ.
Ai rikujton një intervistë të Osmanit nga viti 2019, ku ajo shprehej se synimi i saj ishte që “asnjë vajzë dhe asnjë grua në Kosovë të mos besojë më se është inferiore” dhe se gratë do ta dinin “se nuk ka asgjë që nuk mund ta bëjnë”.
Shtatë vjet më vonë, shkruan Martens, mesazhi që Osmani po lë pas është se ajo “nuk është aspak inferiore ndaj kolegëve meshkuj kur bëhet fjalë për vënien e ambicies personale mbi dinjitetin dhe interesin e një shteti të tërë”.
Seven years on, one of the messages President Osmani indeed leaves behind at the end of her presidential mandate is that in the game of putting personal ambition over self-respect and the interest of an entire country, she is in no way inferior to male politicians. — Michael Martens (@Andric1961) February 4, 2026
Sipas autorit, presidentja ka vepruar pa u koordinuar me kryeministrin Albin Kurti për të siguruar pranimin e Kosovës si anëtare themeluese në të ashtuquajturin “Bordi për Paqe” të Donald Trump dhe se kryeministri i Shqipërisë, Edi Rama është ai që ia siguroi Osmanit hyrjen tek Trumpi.
Tutje Martines citon një intervistë të Osmanit për BBC-në, ku sipas tij ajo e justifikoi afrimin me Trump duke theksuar rolin historik të SHBA-së.
“Në një intervistë për BBC-në, zonja Osmani e shpjegoi sfondin e këtij veprimi të pavarur në Davos duke i kujtuar publikut kohën kur Kosova ishte ende nën okupimin serb. Shqiptarët në atë kohë, tha ajo, nuk merrnin asgjë nga Kombet e Bashkuara përveç fjalëve: Ajo që dëgjonim në atë kohë ishin rezoluta të Asamblesë së OKB-së – ishin letra, ishin fjalë, por zero veprim. Derisa SHBA-të erdhën dhe mobilizuan botën për të na ardhur në ndihmë”, shkruan Martines, transmeton Telegrafi.
Martens kritikon edhe rolin e bashkëshortit të presidentes, Prindon Sadriu, i cili sugjeroi publikisht që ish-“Grand Hotel” në Prishtinë të shndërrohej në një “Trump Hotel”, si dhe vendimin e Osmanit për të organizuar një pritje presidenciale për premierën e filmit biografik “Melania” kushtuar bashkëshortes së Trumpit.
But this praise does not apply to other steps taken by the president and her entourage. One example is the case of Osmani’s husband, Prindon Sadriu, a not so diplomatic diplomat whose intellectual capacity does not always keep pace with his remarkable ambition. — Michael Martens (@Andric1961) February 4, 2026
Më 4 mars është afati i fundit kur Kuvendi i Kosovës duhet ta zgjedhë presidentin.
Gazetari i FAZ ka thënë se këto veprime lidhen drejtpërdrejt me faktin se mandati presidencial i Osmanit përfundon në mars dhe ajo aktualisht nuk ka mbështetjen e nevojshme në Kuvend për një mandat të dytë.
Strategjia e saj, shkruan Martens, është të paraqitet si “kandidatja e Trumpit”, duke ushtruar presion indirekt ndaj deputetëve.
Ajo (Osmani), shkruan autori i artikullit në FAZ i përdor lidhjet e saj të supozuara me rrethin e Donald Trumpit si mjet presioni ndaj deputetëve që e zgjedhin presidentin, duke dërguar mesazhin e nënkuptuar: “Nëse nuk më rizgjidhni presidente, do të keni probleme me Shtetet e Bashkuara.”
The threat is: “If you don’t re-elect me as president, you’ll have trouble with the U.S.” A few years ago, such a calculation might have worked. After all, Kosovo, for understandable reasons, is the most pro-American country in the world. — Michael Martens (@Andric1961) February 4, 2026
Martines shkruan se Osmani prej vitesh ka dështuar të krijojë miq, duke përmendur se shumë bashkëpunëtorë të afërt, si ish-shefi i kabinetit të saj Blerim Vela, nuk qëndruan gjatë pranë saj.
Gazetari gjerman shkruan se ideja që afërsia me Uashingtonin mund të garantojë automatikisht sukses politik në Kosovë mund të ketë funksionuar më parë, por realiteti ka ndryshuar.
Megjithëse Kosova mbetet jashtëzakonisht pro-amerikane, mbështetja për SHBA-të nuk është më e pakushtëzuar.
“Kosovarët e dallojnë qartë ndryshimin mes Amerikës së Clintonit dhe Bushit dhe asaj të Donald Trumpit. Në këtë kontekst, përpjekja e Vjosa Osmanit për ta siguruar rizgjedhjen duke u identifikuar si “kandidatja e Trumpit” paraqet një strategji të pasigurt, ndërsa opsione të tjera politike mund të rezultojnë më të qëndrueshme”, ka shkruar ai. /Telegrafi/
Hetimet për dyshimet për manipulim të votave janë zgjeruar edhe në Pejë, ndërsa autoritetet po ndërmarrin veprime konkrete hetimore.
Telegrafi merr vesh se vetëm gjatë ditës së sotme rreth 30 persona do të procedohen për intervistim në kuadër të këtyre hetimeve.
Sipas burimeve, personat që do të intervistohen janë kryesisht komisionerë të vendvotimeve nga komunat e Junikut dhe Deçanit.
Intervistimet po zhvillohen në koordinim me institucionet përkatëse të rendit dhe drejtësisë, ndërsa rasti lidhet me dyshime për parregullsi gjatë procesit zgjedhor.
Autorizimi i parë për ndërmarrjen e veprimeve hetimore është lëshuar më 19 janar nga Kryeprokurorja e Prokurorisë Themelore në Pejë, Lumturije Vuçetaj, ndërsa veprimet e mëtejshme hetimore po ndërmerren me autorizimet e prokurorëve të caktuar nga Kryeprokurorja, në koordinim të ngushtë me Hetimet Rajonale të Policisë së Kosovës në Pejë.
Zyrtarisht, autoritetet nuk kanë dhënë ende detaje shtesë lidhur me natyrën e dyshimeve apo numrin e përgjithshëm të personave që mund të përfshihen në këtë proces, ndërsa hetimet pritet të vazhdojnë edhe në ditët në vijim. /Telegrafi/
Prokuroria Speciale e Republikës së Kosovës ka arrestuar tre persona të dyshuar për përfshirje në krim të organizuar.
Sipas njoftimit të Prokurorisë, të dyshuarit me inicialet F.M., V.M. dhe A.D. janë duke u hetuar për veprën penale “Pjesëmarrja ose organizimi i grupit kriminal të organizuar”, në lidhje me veprat penale “Mashtrimi” dhe “Hyrja në sistemet kompjuterike”, sipas nenit 327, paragrafi 2 të Kodit Penal të Republikës së Kosovës.
Hetimet, të cilat po zhvillohen në koordinim me Policinë e Kosovës, kanë edhe elemente ndërkombëtare.
"Sipas dyshimeve, të pandehurit që nga viti 2021 e tutje, në bashkëkryerje me persona të tjerë, janë paraqitur rrejshëm si punëtorë bankash", thuhet në njoftim.
Prokuroria bën të ditur se dyshimet përfshijnë vepra penale të mashtrimit, prezantimit të rremë, vjedhjes së identitetit dhe kredencialeve, si dhe shpëlarjes së parave, me qëllim të përfitimit të drejtpërdrejtë financiar.
Gjatë zbatimit të urdhër-kontrolleve janë gjetur dhe sekuestruar prova materiale, përfshirë telefona mobilë, laptopë dhe para të gatshme në vlerë prej 11 mijë e 756 euro.
Prokuroria Speciale ka bërë të ditur se hetimet lidhur me këtë rast janë duke vazhduar. /Telegrafi/
Një incident zjarri ka ndodhur mbrëmë në rrugën “Rrustem Statovci” në Prishtinë.
Si pasojë e zjarrit një veturë është djegur. Lajmin për Telegrafin e ka konfirmuar zëdhënësi i policisë për kryeqytetin, Enis Pllana.
“Mbrëmë rreth orës 23:30 kemi pranuar informatën për një incident zjarri në rrugën “Rrustem Statovci” në Prishtinë, ku nga zjarri është përfshirë një veturë.
Nuk raportohet për persona të lënduar, ndërkohë që policia po kryen procedurat e nevojshme lidhur me incidentin”, ka thënë Pllana.
Ndërkaq sipas raportimeve thuhet se zjarri ka shpërthyer në një garazh të një objekti banesor. /Telegrafi/
Guvernatori i Bankës Qendrore të Republikës së Kosovës (BQK), Ahmet Ismaili, së bashku me zëvendësguvernatorët dhe stafin e BQK-së, ka pritur Misionin e Fondit Monetar Ndërkombëtar (FMN) në Kosovë për zhvillimin e konsultimeve të rregullta sipas Nenit IV të Marrëveshjes së FMN-së.
Sipas njoftimit për media bëhet e ditur se misioni i FMN-së udhëhiqet nga David Amaglobeli, Shef i Misionit për Kosovën, dhe përfshin Sebastian Sosa, Përfaqësues Rajonal i FMN-së për Ballkanin Perëndimor me seli në Vjenë, si dhe stafin e FMN-së nga Washington DC.
“Në takimin hapës, Guvernatori Ismaili vlerësoi bashkëpunimin e vazhdueshëm ndërmjet BQK-së dhe FMN-së, duke theksuar rëndësinë e asistencës profesionale dhe teknike të ofruar ndër vite. Ai prezantoi zhvillimet e fundit makroekonomike në Kosovë dhe theksoi stabilitetin e përgjithshëm të sektorit financiar”, thuhet në njoftim.
Guvernatori Ismaili informoi gjithashtu misionin e FMN-së për reformat në vazhdim në sektorin financiar, përfshirë avancimin e kornizës rregullative dhe mbikëqyrëse në fushat e stabilitetit financiar, modelimit makroekonomik, mbikëqyrjes financiare, praktikave të tregut, sigurisë kibernetike dhe inteligjencës artificiale.
“Këto reforma po mbështeten nga asistenca teknike e FMN-së dhe institucione të tjera financiare ndërkombëtare.
Ai theksoi po ashtu zhvillimet në sektorin bankar, duke nënvizuar nivelet e larta të kapitalizimit dhe likuiditetit, si dhe performancën pozitive të sektorëve të tjerë financiarë, të cilat konfirmojnë stabilitetin e sistemit financiar në vend”, thuhet tutje në njoftim.
Nga ana e tij, Shefi i Misionit të FMN-së, David Amaglobeli, vlerësoi bashkëpunimin konstruktiv me BQK-në dhe përgëzoi institucionin për progresin e arritur në forcimin e kornizave institucionale dhe rregullative, si dhe për bashkëpunimin e vazhdueshëm përmes asistencave teknike.
Gjatë takimit u diskutua zbatimi i rekomandimeve nga konsultimet e mëparshme të Nenit IV, si dhe mundësitë për aranzhime të reja me FMN-në, me fokus në forcimin dhe reformimin e mëtejmë të sistemit financiar.
Misioni i FMN-së do të qëndrojë në Kosovë nga 3 deri më 13 shkurt, gjatë së cilës do të zhvillojë diskutime tematike me stafin e BQK-së dhe me institucione të tjera të Republikës së Kosovës, në përputhje me Nenin IV të Marrëveshjes së FMN-së me vendet anëtare. /Telegrafi/
Prokuroria e Durrësit ka lëshuar dhjetëra masa sigurie pas përfundimit të hetimit lidhur me mbetjet e rrezikshme të nisura nga porti i Durrësit.
Burime bëjnë me dije se bëhet fjalë për 33 masa sigurie për mbetjet e kompanisë “Kurum” të nisura rreth 1 vit më parë nga porti më i madh në vend, mes të cilëve janë zyrtarë të doganave dhe mjedisit si dhe biznesmenë drejtues të kompanisë.
Nga këto, 26 masa janë “arrest me burg”, ndërsa 7 masa janë “arrest shtëpie”.
Masat e sigurisë
Erdal Demir Administratori i “Kurum International” në arrest me burg
Yusuf Sezai Kurum Administrator me prokurë i “Kurum” në arrest me burg
Gjovana Sokolaj Pronare e kompanisë “Sokolaj” në arrest me burg
Doni Sokolaj Administrator i kompanisë D.o.o Minerals në arrest me burg
Olizana Pemati Ish- administratore e kompanisë “Sokolaj” në arrest me burg
Mujo Ilazaj Drejtori i Transportit në kompaninë “Kurum” në arrest me burg
Rami Bunga Specialist pranë zyrës së mjedisit në “Kurum” në arrest me burg
Harun Sarica Drejtori i prodhimit të çelikut në “Kurum” në arrest me burg
Arif Shkalla Drejtues në kompaninë “Kurum” në arrest me burg
Shaban Hyseni Drejtor i departamentit te shitjeve në “Kurum” në arrest me burg
Mirjeta Zotaj Kontabiliste e kompanisë “Sokolaj” në arrest shtëpiak
Mikail Hila Aksioner i agjencisë doganore “Joti Spedition” në arrest me burg
Mbarime Koroci Aksionere e kompanisë “Alliance Resource” në arrest me burg
Nazif Bajrami Pronar i kompanisë “Bajrami N” në arrest me burg
Andon Prifti Administrator i kompanisë “Bajrami N” në arrest me burg
Petrit Qosja Person fizik në tregtinë e mbetjeve në arrest me burg
Julian Kapedani Dega e Doganës Durrës në arrest me burg
Indrit Likaj Dega e Doganës Durrës në arrest me burg
Helidon Lila Dega e Doganës Durrës në arrest me burg
Edmond Voda Dega e Doganës Durrës në arrest me burg
Shkëlqim Jakupi Dega e Doganës Durrës në arrest me burg
Florian Çimo Administrator i kompanisë koncesionare EMS APO në arrest me burg
Gazmend Sina Punonjës i kompanisë koncesionare EMS APO në arrest me burg
Ingo Hesse, administrator i kompanisë EMS APO në arrest me burg
Arta Dollani Ish- drejtoresha e Përgjithshme e AKM në arrest shtëpiak
Marjeta Përlala Drejtoresha aktuale e AKM në arrest shtëpiak
Dritan Seferaj Drejtoria e Inspektim- Kontrollit, AKM në arrest me burg
Kledina Skendo Sektori i monitorimit të lejeve mjedisore, AKM në arrest shtëpiak
B.T Sektori i lejeve mjedisore, AKM në arrest shtëpiak
Evis Mellonashi Sektori i lejeve mjedisore, AKM në arrest shtëpiak
Kejdi Ahmetaj Drejtoria e Inspektimit, AKM në arrest me burg
Iva Musa Inspektore e Autoritetit Portual Durrës, arrest shtëpiak
Xhulio Golgota Inspektor i Autoritetit Portual Durrës, arrest me burg
Rreth 2,100 tonë total metrikë mbetjesh të dyshuara të rrezikshme të paketuara në 102 kontejnerë u kthyen në vendin e tyre të origjinës, Shqipëri, më 27 tetor 2024, nëpërmjet portit italian të Gioia Tauro pasi të kenë lundruar të gjithë.
Grupi mbikëqyrës ndërkombëtar, Basel Action Network (BAN), pas një informacioni nga një sinjalizues, paralajmëroi Shqipërinë, disa vende tranziti dhe vendin e synuar të Tajlandës për dërgesën masive.
Pas paralajmërimit, qeveria e Tajlandës refuzoi importin dhe BAN më pas mori garanci nga linjat e transportit të përfshirë – Maersk dhe Kompania Mesdhetare e Transportit (MSC) se do të siguronin kthimin e sigurt të kontejnerëve në portin e tyre origjinal të shkarkimit – Porti i Durresit ne Shqiperi.
Në një letër të dytë drejtuar qeverisë, BAN i bëri thirrje edhe një herë Shqipërisë që në mënyrë transparente të mostrojë dhe testojë mbetjet e rrezikshme të dyshuara dhe të ndajë një kampion të ndarë me BAN. BAN është gati të mbërrijë në Durrës për të marrë pjesë në vëzhgimin dhe marrjen e një kampioni të ndarë pas mbërritjes së anijes në Shqipëri. /euronews/
Presidentja e Kosovës, Vjosa Osmani po qëndron në Emiratet e Bashkuara Arabe, ku gjatë qëndrimit atje është takuar me Presidentin e Sierra Leones, Julius Maada Bio.
Në këtë takim, Osmani dhe Presidenti Bio diskutuan për mundësitë e thellimit të bashkëpunimit ndërmjet dy shteteve, me fokus në përfitimet për qytetarët dhe adresimin e sfidave të përbashkëta.
Osmani theksoi se Kosova mbetet e përkushtuar për ndërtimin e partneriteteve të forta dhe të qëndrueshme me vende në mbarë botën, duke forcuar bashkëpunimin ndërkombëtar në fusha me interes të përbashkët. /Telegrafi/
Login
