Përmes një qëndrimi të përbashkët, pronarë të bizneseve të vogla, kanë reaguar në lidhje me draft-ligjin për mbrojtjen nga duhani, duke shprehur shqetësime për pasojat që do të shkaktojë zgjidhja ligjore për këtë veprimtari tregtare.

Paralajmërojnë se mbi 4.000 biznese të vogla, si tobako, kioska dhe mini-markete, rrezikojnë të mbyllen.

Pronarët po ashtu druajnë se kufizimet e reja për shitjen dhe ekspozimin e produkteve me duhan do të shkatërrojnë investimet e bëra me kredi dhe do të detyrojnë disa të mbyllin dyqanet.

Ligji ndalon ekspozimin dhe reklamimin e produkteve me duhan dhe kërkon ruajtjen e tyre në dollapë të mbyllur dhe të errët, pa ndonjë shenjë që të tërheqë klientin.

Pronarët kërkojnë një periudhë tranzitore për t’u përshtatur dhe zgjidhje të qarta për produktet e aromatizuara që nuk do të lejohen më. Pa këto masa, thonë ata, shumë biznese do të përballen me kolaps financiar dhe shkurtim të stafit.

Lidhja e Sindikatave ka njoftuar itinerarin e plotë për protestën më 28 janar.

Qëllimi kryesor i protestës është rritja e pagave të punëtorëve në 600 euro.

Protesta fillon më 28 janar 2026 në orën 17:00 para Qendrës së Punëtorëve (ndërtesa e LSM në Mirce Acev 6) në Shkup, pas së cilës vazhdon para Parlamentit, Dhomës së Tregtisë dhe Qeverisë së Maqedonisë (Duke lëvizur përgjatë Mirce Acev, Filipit të dytë, 11 Tetori, Dame Gruev, Bulevardi OBRM dhe duke përfunduar në Bulevardin Ilinden para Qeverisë së Republikës së Maqedonisë) – njoftoi në Facebook Ivan Peshevski nga LSM.

Nga LSM thanë e nuk do të heqin dorë nga protesta për rritjen e pagës mininmale, pasi standardi jetësor është rritur dhe punëtorët po punojnë për mbijetesë.

"Izolimi diplomatik i Mickoskit ishte i dukshëm në Davos. Kryeministri nuk pati asnjë takim me një udhëheqës botëror apo evropian. Ai po filmonte veten në korridore dhe po bënte turizmin në kurriz të qytetarëve", reagon LSDM.

Nga LSDM thonë se i vetmi takim që shënoi vizitën e tij në Davos ishte me pronarin e kompanisë hungareze 4iG, të lidhur me regjimin e Viktor Orbanit.

"Kjo tregon se sa shumë i shërben Mickoski Orbanit në zgjerimin e ndikimit të tij politik dhe të biznesit. Në këtë drejtim është edhe vendimi i fundit i Qeverisë Mickoski për të futur kompaninë 4iG në sektorin e telekomunikacionit. Ky nuk është një sukses investimi, por një projekt politik për të marrë kontrollin e sektorëve strategjikë si telekomunikacioni dhe media, duke krijuar një rrjet ndikimesh autoritare që izolojnë rajonin nga BE-ja. Pronarët e portaleve pro-qeveritare që janë pjesë e oktapodit mediatik Alfa-Alta janë kryesisht nga Hungaria dhe të lidhur drejtpërdrejt me Orbanin. LSDM ka paralajmëruar për dy muaj për planin e OBRM-PDUKM--së për të marrë kontrollin e sektorëve strategjikë, veçanërisht medias, dhe ky plan po bëhet gjithnjë e më i dukshëm", thuhet në reagim.

LSDM bën thirrje për mbrojtjen e interesave kombëtare nga ndikimet e huaja që kërcënojnë pavarësinë dhe të ardhmen evropiane të Maqedonisë së Veriut.

Një person e humbi jetën sot në Shkup, pasi drejtone një automjet udhëtarësh në ora 4 të mëngjesit duke dalë nga rruga kryesore, njoftuan nga MPB.

"Në Shkup në kryqëzimin e bul. “Aleksandri i Maqedonisë””, rr. “Brigada e 16-të Maqedonase” dhe rr. “Brigadat Ndërkombëtare”, sot në mëngjes rreth orës 04:10, një automjet udhëtarësh “Ford” me targa të Shkupit, drejtuar nga B.S. (45) nga Shkupi, ka dalë nga rruga. Në aksident shoferi ka pësuar lëndime të rënda trupore dhe me automjet të Ndihmës Urgjente Mjekësore është dërguar në Spitalin e Përgjithshëm “Sh. Naum Ohridski” të Shkupit, ku mjeku ka konstatuar vdekjen. Sipas urdhrit të prokurorit publik, trupi i të ndjerit u dorëzua për obduksion në Mjekësinë Ligjore, ndërsa këqyrjen e vendit të ngjarjes e kreu një ekip hetues i SPB Shkup”, thuhet një njoftimin e Sektorit për Punë të Brendshme në Shkup.

Shefi i SPB Shkup, Sasho Topallovski deklaroi se vozitja në kryeqytet dukshëm është qetësuar pas periudhës testuese të sistemit “Qyteti i sigurt”.

Ai theksoi se qytetarët menjëherë e kanë ulur numrin e kundërvjatjeve me vendosjen e vërejtjeve, ndërsa sistemi i ri do të regjistrojë katër kundërvajtje kyçe të cilat më së shumti e rrezikojnë sigurinë në komunikacion: vozitja e shpejtë, kalimi në semafor të kuq, automjete të paregjistruara dhe parkimi jo i rregullt.

“Përmes vërejtjeve populli shumë shpejtë reagoi gjatë periudhës testuese. U njoftua, e dinte se çka paraprin dhe menjëherë e qetësoi vozitjen, e qetësoi mënyrën e vozitjes. Me atë dëshmuam se mund të jemi njejtë si gjermanët, austriakët, si të gjitha vendet e tjera që e kanë të inkorporuar atë në sistemin e vet, edhe ne ta respektojmë”, deklaroi Topallovski.

Ai theksoi se reagimi ishte aq i shpejtë sa që numri i kundërvajtjeve u ulë për më shumë se tre herë.

“Në fillim kishim mbi 110 mijë kundërvajtje. Nuk ka sistem dhe institucion që mund ta përpunojë atë. Por populli, për dy ditë, e zbriti numrin në 30 mijë. Aq është i menqur populli ynë. Mu në vërjtje, mu në vetë testin, e uli nivelin e vozitjes së shpejtë”, shtoi ai.

Topallovski sqaroi se reforma është e kahëzuar drejt katër kundërvajtjeve të cilat më së shumti ndikojnë në rendin dhe sigurinë e trafikut: vozitja e shpejtë, kalimi në dritë të kuqe, automjete të paregjistruara dhe parkim jo i rregullt. Këto janë mu kundërvajtjet që do t’i detektojë “Qyteti i sigurt”.

Ministri i Punëve të Brendshme, Pançe Toshkovski informoi sot se me sistemin Safe City rritet siguria dhe zvogëlohet numri i aksidenteve rrugore.

Toshkovski informoi se ndodhet në terren, në lokacion ku po kryhet verifikimi përfundimtar i kamerave për zbulimin automatik të kundërvajtjeve të trafikut si pjesë e projektit “Qyteti i sigurt”.

Ai theksoi se në këtë fazë po bëhet kontrolli i saktësisë së matjes së shpejtësisë, me ç’rast lëshimet e konstatuara janë minimale dhe dukshëm nën tolerancën e lejuar ligjore, që garanton siguri dhe besueshmëri të sistemit.

Kujtojmë se sot nga MPB informuan se faza testuese e kamerave nga "Safe City" do të bëhet në qytetin e Tetovës dhe Kumanovës, teksa gjobat për shkelësit e rregullave në komunikacion do të aktivizohen nga 1 shkurti.

Nga Agjencia për Ushqim dhe Veterinari kanë njoftuar se vitin e kaluar janë kryer mbi 125 mijë kontrolle në të gjithë territorin e Maqedonisë së Veriut, Mes tjerash nga AUV bëjnë të ditur se janë shqiptuar edhe gjoba në vlerë prej 618 mijë euro.

Theksi i kontrolleve u vendos në zbatimin dhe mirëmbajtjen e procedurave të Praktikës së Mirë Higjienike dhe Praktikës së Mirë Prodhuese, si dhe të sistemit HACCP për sigurinë ushqimore, në etiketimin e duhur të ushqimit, monitorimin e ushqimit nga prodhimi vendas dhe nga importi, si dhe në mbrojtjen shëndetësore dhe mirëqenien e kafshëve.

Njoftimi i plotë nga AUV:

Mbi 125 mijë kontrolle inspektuese nga fusha e sigurisë së ushqimit dhe ushqimit për kafshë, mbrojtjes shëndetësore dhe mirëqenies së kafshëve, u realizuan vitin e kaluar nga veterinerët zyrtarë dhe inspektorët e ushqimit të Agjencisë së Ushqimit dhe Veterinarisë. Krahas tregtisë së brendshme, objekt i kontrolleve ishin edhe prodhimi, shpërndarja, gastronomia, si dhe importi dhe eksporti. Theksi i kontrolleve u vendos në zbatimin dhe mirëmbajtjen e procedurave të Praktikës së Mirë Higjienike dhe Praktikës së Mirë Prodhuese, si dhe të sistemit HACCP për sigurinë ushqimore, në etiketimin e duhur të ushqimit, monitorimin e ushqimit nga prodhimi vendas dhe nga importi, si dhe në mbrojtjen shëndetësore dhe mirëqenien e kafshëve.
Frekuenca e kontrolleve zyrtare u realizua në përputhje me kategorizimin e objekteve (operatorëve ushqimorë) sipas rrezikut, ku objektet e kategorizuara me rrezik të lartë u kontrolluan më shpesh sesa ato të kategorizuara si operatorë me rrezik të ulët.
Në vitin 2025, nga numri i përgjithshëm, u realizuan gjithsej 47.200 kontrolle në tregtinë e brendshme, në kuadër të mbikëqyrjeve të rregullta dhe të jashtëzakonshme inspektuese, me ç’rast u lëshuan 5.406 vendime, u paraqitën 10 kallëzime për kundërvajtje, u shqiptuan 1.073 urdhër-pagesa për kundërvajtje me vlerë totale prej 618.010 eurosh në kundërvlerë në denarë. U paraqitën gjithashtu 8 kallëzime penale, të gjitha nga fusha e mbrojtjes shëndetësore dhe mirëqenies së kafshëve.
Në kuadër të këtyre kontrolleve, u konfiskua dhe u asgjësua në mënyrë të sigurt ushqim i pasigurt (mish dhe produkte mishi, qumësht dhe produkte qumështi, fruta të thata, vezë, peshk, produkte ëmbëlsirash, si dhe pije alkoolike dhe joalkoolike) në një sasi totale prej 355.377 kilogramësh. Shuma totale e gjobave të shqiptuara në vitin 2025 arrin 618 mijë euro në kundërvlerë në denarë.
Për më tepër, shërbimet inspektuese të Agjencisë realizuan 78.016 kontrolle të dërgesave të importit dhe të atyre që transitonin nëpër vend, me ushqim me origjinë shtazore dhe joshtazore, produkte dhe materiale që vijnë në kontakt me ushqimin, ushqim për kafshë dhe kafshë të gjalla. Si të pasigurta, u asgjësuan 8 dërgesa me ushqim me origjinë joshtazore në sasi prej 69.785 kilogramësh, ndërsa një dërgesë u kthye në vendin eksportues.
Si të pasigurta, në kuadër të këtyre kontrolleve, u asgjësuan edhe tri dërgesa me ushqim me origjinë shtazore në një sasi totale prej 22.061 kilogramësh. Në të njëjtën periudhë kohore, si të pasigurta u kthyen 16 dërgesa me ushqim me origjinë shtazore.

Sistemi “Safe City” është çështje e sigurisë publike, e mbrojtjes së jetës së qytetarëve dhe e vendosjes së rendit në komunikacion. Kur flasim për “Safe City”, nuk flasim për kamera apo gjoba, por për jetë njerëzish. Flasim për rrugë më të sigurta, për familje që nuk duhet të humbasin më baballarë, fëmijë apo motra për shkak të papërgjegjshmërisë së dikujt tjetër, kështu deklarojnë nga koalicioni VLEN.

Ata shprehën se qëndrimi i BDI-së, dëshmon edhe një herë se kjo strukturë nuk ka asnjë lidhje me interesin e përgjithshëm publik.

"Për ta, çdo vendim është pazar, çdo proces është llogari e brendshme, dhe asgjë nuk udhëhiqet nga parimet apo nevoja reale e qytetarëve. Rasti i “Safe City” e zbulon hapur krizën e thellë të brendshme në BDI. Një ditë deklarojnë se “në parim janë pro”, ndërsa ditën tjetër e rrëzojnë të njëjtin qëndrim. Kjo dëshmon rrëmujë politike dhe mungesë totale kontrolli. Është e qartë se Ali Ahmeti nuk e kontrollon më as grupin e tij parlamentar. Anija e tyre politike po fundoset. Sapo u aktivizua klika e vjetër, me Sadulla Durakun në krye, çdo pretendim për reformë u shua. E ashtuquajtura “risi” e BDI-së u zhduk në momentin kur foli e kaluara e tyre. Kjo është arsyeja pse kjo parti nuk mund dhe nuk përfaqëson interesin e shqiptarëve sot. BDI mbetet peng i njerëzve dhe mendësisë të së kaluarës, një mendësi që ka prodhuar krizë pas krize. Kur bëhet fjalë për interesin e qytetarëve, zgjedhin bllokadën. Kur kërkohet përgjegjësi dhe vendimmarrje, zgjedhin kaosin e brendshëm. Kur kërkohet llogaridhënie, kthehen te logjika e pazareve. Refuzimi i tyre për të mbështetur “Safe City” nuk ka të bëjë me përmbajtjen e projektit, por me frikën nga rendi, ligji dhe transparenca. Sepse aty ku ka rregull, nuk ka hapësirë për ndërhyrje, ndikim dhe lojëra prapa perdeve siç janë mësuar çdoherë", thuhet në komunikatën e VLEN-it.

Ata shtojnë se qytetarët duhet ta dinë qartë se problemi nuk është “Safe City”, por sipas tyre problemi është BDI.

Trafiku në rrugët shtetërore po zhvillohet pa probleme, në rrugë kryesisht të lagura, informon LAMM.

Ekipet e NP "Rruga e Maqedonisë" janë të pajisura plotësisht, makineria dhe fuqia punëtore e nevojshme janë në dispozicion dhe pastrimi i borës po kryhet vazhdimisht në terren.

Në bashkëpunim me NP Rrugët Shtetërore dhe Ministrinë e Transportit, po kryhen aktivitete të koordinuara me qëllim sigurimin e rrjedhës së qetë dhe të sigurt të trafikut.

Përveç menaxhimit të kujdesshëm dhe të ndërgjegjshëm të automjeteve, rekomandohet përdorimi i detyrueshëm i pajisjeve dimërore, respektimi i sinjalistikës së vendosur të trafikut dhe shpejtësia e rregulluar sipas kushteve të rrugës. Rekomandohet gjithashtu informacion në kohë nga të gjitha qendrat e informacionit për kushtet dhe trafikun në rrugët shtetërore.

Aktivitetet e koordinuara të institucioneve kompetente vazhdojnë gjatë periudhës së ardhshme, me qëllim sigurimin e rrjedhës së qetë dhe të sigurt të trafikut.

Intensiteti i trafikut në rrugët jashtë zonave urbane është mesatar. Në pikat kufitare në anën e Maqedonisë së Veriut nuk ka vonesa më të gjata për hyrje dhe dalje nga vendi.

Në Kongresin e 31-të të Lidhjes Socialdemokrate të Maqedonisë në Shkup, deputetja dhe ish-ministrja e Mbrojtjes Sllavjanka Petrovska shprehu nevojën për reforma serioze në parti.

Sipas saj, nëse LSDM nuk fillon të ndryshojë, ekziston rreziku që gradualisht të margjinalizohet dhe në fund të fundit - të zhduket nga skena politike.

Petrovska vlerësoi se socialdemokracia si ide është e gjallë, por për të ruajtur rolin e partisë, duhet të bëhen ndryshime konkrete në mënyrën e funksionimit të saj. Ajo theksoi se rezultatet e zgjedhjeve të fundit - si lokale ashtu edhe parlamentare - tregojnë se partia nuk ka arritur të kryejë analiza dhe diskutime të mjaftueshme për arsyet e humbjeve.

Në fjalimin e saj në Kongres, Petrovska propozoi një ndryshim në Statutin e partisë, sipas të cilit kryetarët e degëve komunale do të zgjidheshin drejtpërdrejt nga anëtarësia, në vend që të emëroheshin nga kryetari i LSDM-së.

Ajo gjithashtu propozon futjen e verifikimit politik për të gjithë mbajtësit aktualë dhe të mëparshëm të funksioneve dhe anëtarët e kryesisë, me qëllim që të zvogëlohet kundërshtimi brenda partisë dhe deklaratat e papërshtatshme midis zyrtarëve.

Petrovska theksoi se mendimi kritik duhet të vazhdojë të jetë një vlerë thelbësore e demokracisë sociale, por se është një strategji e rëndësishme dhe e qartë për veprim. Ajo theksoi se vetëm me kritikë të hapur dhe konstruktive LSDM mund t'i kapërcejë sfidat dhe të rivendosë besimin midis anëtarësisë dhe elektoratit të saj.

Mëngjesin e sotëm, temperatura më e ulët në vend është matur në Kodrën e Diellit, ku në termometër shënon minus një gradë Celsius.

Temperaturat më të ulëta janë regjistruar edhe në Manastir me zero gradë, ndërsa një gradë është matur në Prilep, Tetovë dhe Mavrovë.

Në Kriva Pallankë, Berovë, Veles, Kavadar, Krushevë dhe Llazaropole, temperatura e mëngjesit ka qenë dy gradë.

Në Shkup, në pikat matëse Zajçev Rid dhe Petrovec, si dhe në Strumicë, Ohër dhe Pretor, janë matur tre gradë, ndërsa temperatura më të larta të mëngjesit janë regjistruar në Shtip, Vinicë dhe Demir Kapi me pesë gradë.

Mëngjesi më i ngrohtë ishte në Gjevgjeli, ku janë matur tetë gradë.

Në 24 orët e fundit, reshjet më të ulëta të ujit janë regjistruar në Pozharane, Lazaropole dhe Pozhar, me një litër për metër katror.

Mbulesë bore është regjistruar në zonat më të larta malore, me 29 centimetra borë të matura në Kodrën e Diellit deri në orën 7 të mëngjesit të sotëm, dhe nëntë centimetra në Mavrovë.

Moti sot do të jetë me vranësira të ndryshueshme. Gjatë natës, kryesisht në pjesët juglindore, do të ketë reshje lokale të shiut, ndërsa në malet më të larta - borë. Do të fryjë erë mesatare, herë pas here e fortë nga juglindja. Temperatura maksimale ditore do të lëvizë nga 7 deri në 13 gradë.

Në Shkup pritet mot me vranësira të ndryshueshme me erë të moderuar, herë pas here të fortë nga juglindja.

Gjatë natës do të ketë kushte për reshje të shiut të kohëpaskohshme, ndërsa temperatura maksimale do të arrijë 10 gradë.

Sot do të mbajë mot kryesisht me vranësira gjatë gjithë ditës. Në pjesët veriperëndimore dhe juglindore me reshje lokale të rastësishme, dhe në malet më të larta me borë të lehtë.

Do të fryjë erë mesatare. Temperatura minimale do të jetë në intervalin nga 3 deri në 7 gradë, ndërsa maksimale do të arrijë nga 8 deri në 12 gradë.

Në Shkup, me vranësira të ndryshueshme në mëngjes me shfaqje të mjegullës, pasdite me kushte për reshje lokale të rastësishme.

Temperatura minimale do të bjerë në 3, ndërsa maksimale do të arrijë deri në 12 gradë.

Reshje më të bollshme dhe kushte për bubullima të rralla do të ketë të hënën, reshjet do të vazhdojnë të martën deri në mbrëmje.

Të mërkurën në mëngjes do të jetë kryesisht me diell, ndërsa pasdite vranësirat do të rriten.

Gjatë natës dhe të enjten, do të ketë përsëri reshje shiu, ndërsa në malet më të larta me borë.

Emigrimi jashtë shtetit nuk ka të ndalur!

Këtë më së miri po e dëshmojnë klasat gjithnjë e më të zbrazëta nëpër shkollat e Tetovës.

Vetëm për 5 muaj, 100 nxënës më pak.

Shumë nxënës kanë marrë fletëshpërngulje nga shkollat, për t’u larguar me familjet jashtë shtetit.

Në qytet më e prekur nga fenomeni i ikjeve është shkolla fillore “Kirili dhe Metodi”.

Drejtoresha Sihana Kaba-Kasami na tregon se tani shkolla ka thuajse një klasë më pak.

“Ky është një fenomen që kohëve të fundit ka marr përmasa shumë të mëdha. Po të shohim në nivel të komunës me 12 shkolla fillore është një fakt shqetësues sepse kemi një shpërngulje me të madhe, zakonisht nxënësit na shpërngulen në Evropë por më së shumti i kemi në Itali dhe Gjermani dhe shumë pak kemi në shtet tjera. Sa i takon shkollës tonë ne fillim të vitit në fillim të vitit shkollor kishin 1048 nxënës në shtator , dhe nga shtatori deri në janar kur jemi tash na kanë shkuar 22 nxënës , dhe kjo është brengosëse se thuaj se një klasë na shpërngulet komplet për shkaqe familjare”, deklaroi Sihana Kaba Kasami – drejtoreshë e Shkollës “Kirili dhe Metodi”.

Në malësinë e Tetovës, më shumë fletëshpërngulje kanë marrë nxënësit e shkollës së Shipkovicës, “Rexhep Voka”.

“Duke filluar nga muaj shtator e deri në këto momente, ne kemi marr të dhëna nga të gjitha shkollat fillore dhe të mesme të nxënësve që kanë marrë fletëshpërngulje për jashtë shtetit dhe nga të dhënat që kemi gjithsej nga shkollat fillore dhe të mesme të Tetovë fletëshpërngulje kanë marrë diku 100 nxënës, ku po potencojmë se pjesa më e madhe e nxënësve që kanë marrë fletëshpërngulje janë nga shkolla fillore “Rexhep Voka” në Shipkovicë, shkolla fillore “Kirili dhe Metodi” në qytetin e Tetovës, ndërsa nga shkollat e mesme që kanë marr fletëshpërngulje më shumë jashtë shtetit është shkolla e mesme “8 shtatori”, u shpreh Nazmi Dauti nga Sektori për Arsim – Komuna e Tetovës.

Trendi i shpërnguljes është i përvitshëm. Të dhënat tregojnë se në shkollat e Tetovës çdo vit shkollor ka thuajse 100 nxënës më pak. Kjo në shkollat e qytetit nuk vërehet edhe aq shumë, sepse shpërnguljet ndodhin edhe nga fshati në qytet, por kjo bën që shkollat e vendeve rurale të mbeten pa nxënës, ose të bashkohen, ose edhe më e keqja, të mbyllen, fat të cilin e kishte shkolla e Veshallës. /tv21

Ekipet e NP “Pyjet Kombëtare”, informojnë se së bashku me Policinë Pyjore, kapën një grup prerësish ilegalë të druve që prej kohësh po shkatërronin pyjet e Pllaçkovicës pranë Radovishit.

Gjatë aksionit u sekuestruan dy automjete, një motor, dhe mjete të tjera që përdornin druprerësit ilegalë.

Për këtë njoftoi zëvendësdrejtori i ndërmarrjres, Kire Mihajllov, i cili shpërndau edhe video nga momenti i kapjes së autorëve.

Mihajllov paralajmëroi se të gjithë druprerësit ilegalë do të ndiqen penalisht dhe “nuk do të ketë të paprekshëm” në luftën kundër krimit në pyje.

Kuvendi i Maqedonisë së Veriut dje i ka dërguar zyrtarisht Ministrisë së Drejtësisë nominimet, përkatësisht emrat e deputetëve që do të jenë anëtarë dhe do të marrin pjesë në grupin e punës pranë Ministrisë së Drejtësisë, i cili do të angazhohet në përgatitjen e Kodit të ri Zgjedhor.

Këtë e ka konfirmuar për TVM2, kabineti i kryeparlamentarit Afrim Gashi. Deri në këto momente ende nuk janë bërë të ditur emrat e deputetëve që do të marrin pjesë në këtë grup punues.

“Në bazë të kërkesës, dje Ministrisë i janë dorëzuar propozimet nga koordinatorët e grupeve parlamentare, si dhe nga deputetët që nuk janë të organizuar në grupe deputetësh”, thuhet në njoftimin e Kabinetit të Kryeparlamentarit Afrim Gashi.

Ditë më herë numri i “një” i drejtësisë Igor Fillkov u ankua se Ministria e Drejtësisë ka dërguar dy shkresa radhazi në Kuvend, me kërkesë që të nominohen nga dy përfaqësues të partive parlamentare dhe të deputetëve të pavarur, por deri më ditën e djeshme teksa është mbajtur pres konferenca e tij, nuk kishin marrë përgjigje.

"Ndryshimet e Kodit Zgjedhor kanë qenë një dëshirë e kahmotshme e partive politike. Që nga miratimi i tij e deri më sot, Kodi aktual Zgjedhor ka pësuar rreth 40 ndryshime, të cilat, për shkak të qasjes parciale, kanë krijuar mospërputhje dhe mungesë koherence në të gjithë ligjin", tha Fillkov.

Përfaqësuesit e partive politike gjatë kësaj periudhe kanë pasur qëndrime të ndryshme lidhur me atë nëse Maqedonia duhet të ketë një, tre, gjashtë apo tetë njësi zgjedhore. Sipas Fillkovit, për miratimin e një zgjidhjeje të re ligjore është i domosdoshëm konsensusi politik i të gjitha partive.

Koordinatori i grupit parlamentar të LSDM-së Oliver Spasovski u shpreh i habitur me faktin që para kongresit të sotëm të partisë nuk është mbajtur mbledhje e këshillit qendror të partisë për të diskutuar raporti i punës së kongresit edhe pse kjo paraprakisht ishte paralajmëruar për më 16 janar.

“Nëse vazhdohet praktika që ishte deri tani, nuk premtohen rezultate dhe suksese. Për këtë janë kongreset këtu që të bëhen rikthime, të ofrohet platformë dhe të bashkohen njerëzit. Duhet të shtrijmë dorën njëri tjetrit. Në parti duhet të mbizotërojë dialogu e jo përjashtimi. Unë gjithnjë jam për bashkim e jo për ndarje. Bashkimi forcon partinë e përjashtimet vetëm e dobësojnë partinë”, tha Spasovski.

Spasovski komentoi dhe pranoi gabimin që bënë në vitin 2023 kur udhëhiqnin me Qeverinë, e kur mundësuan ndryshime të kodit penal veçanërisht të nenit 353 me të cilat u amnistuan shumë funksionarë dhe kohë pas kohe iu vjetërsonin lëndët gjyqësore.

“Fakt se ishte gabim i bërë në kohën e LSDM-së e të cilin ende edhe sot nuk mund ta kuptoj. Edhe atëherë pyesja njerëzit që sillnin vendimet, nuk kishte asnjë arsyetim që mund të më bindë pse u bënë ato ndryshime. Ky është një nga shkaqet pse LSDM i humbi zgjedhjet dhe qytetarët dënuan seriozisht partinë. Tani pushteti aktual propozoi ndryshime dhe ne dorëzuam nëntë amandamente por asnjë nuk u pranua”, tha Spasovski.

Deri më 1 shkurt, Shkupi dhe Tirana kanë kohë që në UNESCO të dorëzojë raport që duhet të tregojë se çfarë kanë bërë në 8 muajt e fundit, për të siguruar që rajoni rreth Liqenit të Ohrit të mos jetë në listën e zonave të rrezikuara nën mbrojtjen e UNESCO-s. Ministri i Kulturës, Zoran Lutkov, në vend që të japë sqarime për zbatimin e rekomandimeve dhe vërejtjeve të UNESCO-s për vite me radhë, justifikim kërkon nga pala shqiptare.

“Një nga problemet më të mëdha në të gjithë këtë proces është se që nga viti 2016 pala shqiptare ka hyrë në të gjithë këtë proces dhe kjo e bën komunikimin pak më të vështirë. Ata kishin zgjedhje më parë, ndryshim të qeverisë, dhe ne kishim zgjedhje gjithashtu, dhe kështu që për një periudhë të gjatë asgjë nuk ndodhi në 6-7 vitet e fundit. Komunikimi është shumë i rëndësishëm në të gjithë procesin. Ne mund të plotësojmë një pjesë të madhe të rekomandimeve tona që kemi si Ministri e Kulturës, por nëse në anën tjetër nuk plotësohet, ka kritika nga komisioni i UNESCO-s”, tha Zoran Lutkov – Ministër i Kulturës.

Lutkov tha se raporti është duke u përgatitur dhe muajin e kaluar u ngrit një shtab krize për të punuar mbi rekomandimet. Ai pretendon se shumë gjëra janë bërë deri më tani, pa specifikuar se cilat janë ato.

“Shumë gjëra janë bërë, nuk mund të them se nuk janë bërë, shpresoj se në bazë të asaj që kemi bërë deri tani dhe asaj që do të bëjmë këto ditë, do të kemi një vlerësim pozitiv dhe nuk do të futemi në listën e rrezikut”, shtoi Zoran Lutkov – Ministër i Kulturës.
Konstantin Georgievski, aktivist civil thotë se nuk ka aktivitete serioze, sistematike dhe të koordinuara që mund të përmirësojnë realisht situatën në mbrojtjen e rajonit të Ohrit.

“Do të kemi pasoja në të ardhmen dhe gjeneratat e ardhshme do të na urrejnë për të njëjtën arsye pse nuk kemi ndërmarrë asgjë më shumë. UNESCO nuk është një armik i zhvillimit ekonomik, UNESCO nuk është një eliminator i zhvillimit ekonomik, UNESCO është një organizatë në të cilën ne u bashkuam vullnetarisht në vitet 1980, dhe është e jona të ndjekim rregullat siç bëjnë shumë vende të tjera”, u shpreh Konstantin Zdraveski – Shoqata Ekologjike EKOMENLOG.

Një nga vërejtjet më të mëdha është urbanizimi i tepërt dhe problemi i ndërtimeve të paligjshme. /Alsat.mk

Aleanca për Shqiptarët shpreh shqetësimin e saj për faktin se Maqedonia e Veriut nuk është përfshirë në nismën ndërkombëtare “Bordi i Paqes”, të inicuar nga presidenti amerikan Donald Trump, ku tashmë janë përcaktuar vendet pjesëmarrëse në rajonin e Ballkanit.

Nga ASH thonë se ky përjashtium nuk mund të jetë rastësi duke reflektuar mungesën e peshës politike të Qeverisë aktuale.

"Fakti që Kosova, Shqipëria, Bullgaria dhe Turqia janë ftuar të jenë pjesë e kësaj platforme, ndërsa Maqedonia e Veriut renditet në listën e vendeve që as nuk janë ftuar, përbën një sinjal serioz alarmi për pozitën ndërkombëtare dhe kredibilitetin diplomatik të shtetit tonë. Ky përjashtim nuk mund të shihet si rastësi. Ai reflekton qartë mungesën e peshës politike dhe të ndikimit diplomatik të qeverisë aktuale në skenën ndërkombëtare, si dhe dështimin për ta pozicionuar Maqedoninë e Veriut si faktor stabiliteti dhe partner të besueshëm në nismat rajonale dhe globale të sigurisë", thuhet në njoftimin e ASH-së.

Aleanca për Shqiptarët kërkon sqarim urgjent nga Qeveria dhe Ministria e Punëve të Jashtme se pse Maqedonia e Veriut nuk është ftuar në këtë nismë?

"A ka pasur komunikim zyrtar dhe përpjekje diplomatike për përfshirje, dhe cilat mund të jenë pasojat politike dhe strategjike të këtij përjashtimi për vendin? Në një kohë kur “Board of Peace” synon ndërtimin e një platforme bashkëpunimi politik dhe sigurie, përjashtimi i Maqedonisë së Veriut – së bashku me disa vende të tjera të Ballkanit Perëndimor – po lexohet gjerësisht si një mesazh i qartë gjeopolitik për rolin periferik ku po shtyhet vendi ynë. Aleanca për Shqiptarët vlerëson se Maqedonia e Veriut ka kapacitete, përvojë dhe përgjegjësi për të qenë pjesë e çdo mekanizmi serioz për paqe dhe siguri në rajon. Por kjo kërkon diplomaci aktive, politikë të jashtme të qartë dhe qeverisje kredibile – jo improvizime, heshtje dhe izolim. Ne do të vazhdojmë të kërkojmë transparencë, përgjegjësi institucionale dhe një orientim të qartë euro-atlantik që garanton se Maqedonia e Veriut nuk do të mbetet jashtë proceseve të rëndësishme ndërkombëtare", thonë nga ASH.

Partia në pushtet OBRM-PDUKM e cilëson si dështim kongresin e LSDM-së.

Ata e pyesin Filipçen pse në kongres nuk dha llogari për atë se pse partia është bërë partia e tretë në Maqedoni dhe e pesta në Shkup.

"Pyesim Filipçen pse nuk u distancua nga krimet e klanit DUBAI ku pjesë përbërëse është edhe vet ai. Pyesim Filipçen pse LSDM i shërbente Bullgarisë dhe Greqisë dhe e imponoi marrëveshjen franceze. Pyesim dhe pse u bënë çirak të BDI-së në krim dhe nuk u distancuan nga Artan Grubi dhe krimet e tij në Lotari. Pyesim pse nuk u distancuan as nga Vasko Kovaçevski i cili ndodhet në arrati pasi dëmtoi buxhetin për 6,5 milion euro në rastin “Aditivi”, thuhet në komunikatën e OBRM-PDUKM-së.

Nga OBRM-PDUKM thonë se për ta nuk ka zgjidhje më të mirë se Filipçe në krye të LSDM-së .

Iniciativa qytetare “Support Koçani” ka mbledhur 22.742.997 denarë nga donacionet, për të cilat shteti ka arkëtuar tatim personal në vlerë totale prej 2.274.285 denarë.

Nga iniciativa njoftuan se kanë realizuar shpërndarjen e tretë dhe të fundit të donacioneve për të prekurit nga zjarri në të ashtuquajturin kabare “Puls” në Koçan.

Shpërndarja e tretë përfshin donacione nga Eparkia e Kishës Ortodokse Maqedonase për Evropë, e cila ka dhuruar 3.153.204 denarë.

“Me qëllim që të kontribuohet kudo, por të ndihmohet aty ku është më së shumti e nevojshme, ata vendosën që 123 persona të marrin nga 15.968 denarë, ndërsa 19 persona të marrin nga 45.992 denarë. Me këtë rast duhet të falënderojmë Bankën NLB, e cila pati mirësinë të na lirojë nga provizioni, ndërsa duhet të theksojmë se tatimi për këtë donacion arrin në 315.292 denarë. Tatimi i përgjithshëm i marrë nga shteti për të tri shpërndarjet nga llogaria e përbashkët arrin në 2.274.285 denarë. Ju falënderojmë të gjithëve për humanizmin dhe për të gjitha donacionet”, njoftuan nga iniciativa.

Zjarri në Koçan shpërtheu natën e 15-16 marsit, duke rezultuar me 63 viktima dhe duke plagosur pothuajse 200 të tjerë. Prokuroria ka ngritur akuza kundër 34 personave të cilët, nëpërmjet veprimeve ose mosveprimeve të tyre brenda sistemit, shkaktuan katastrofën. Aktakuza përfshin gjithashtu tre kompanitë e pronarit të diskotekës, i cili është i pandehuri kryesor.