Viti 2025 në futboll ishte një udhëtim plot emocione, i mbushur me rikthime të jashtëzakonshme, fitore historike dhe disa tragjedi që tronditën tifozët në mbarë botën.

Nga skuadra që i dhanë fund pritjeve të gjata për trofe, te lojtarë që arritën kulmin në aspektin personal - ky vit i pati të gjitha.

Më poshtë janë momentet më të spikatura të futbollit në vitin 2025.

Finalja e Ligës së Kampionëve : Paris Saint-Germain 5-0 Inter

Pas vitesh përpjekjesh, Paris Saint-Germain më në fund ngriti trofeun e Ligës së Kampionëve të UEFA-s nën drejtimin e trajnerit Luis Enrique.

Fitorja bindëse 5-0 ndaj Interit e shfaqi PSG-në si forcën dominuese të futbollit evropian për klube.

Lojtarë si Vitinha dhe Ousmane Dembele shkëlqyen në një mbrëmje futbolli fluid dhe sulmues, duke forcuar më tej statusin e Enriques si ‘Trajneri i Vitit’ nga France Football.

Interi rrëmben fitoren Barcelonës

Gjysmëfinalja e dytë e Ligës së Kampionëve në “San Siro” ofroi dramë futbolli që kujtoi rikthimin historik të Barcelonës kundër PSG-së në vitin 2017.

Interi shënoi golin e barazimit në minutat e fundit për ta çuar rezultatin e përgjithshëm në 6-5 dhe më pas fitoi në kohën shtesë, me David Frattesi që realizoi golin vendimtar në minutën e 99-të.

Kjo fitore historike i siguroi Interit një vend në finale, duke i shuar edhe një herë shpresat e Barcelonës.

Cristiano Ronaldo dhe Portugalia fitojnë titullin e dytë të Ligës së Kombeve

Cristiano Ronaldo shtoi edhe një trofe ndërkombëtar në karrierën e tij të jashtëzakonshme, teksa Portugalia mposhti kampionët e Evropës, Spanjën, 5-3 me penallti.

Ronaldo shënoi gjithashtu gjatë ndeshjes, duke treguar thellësinë e skuadrës portugeze dhe duke konfirmuar statusin e saj si një nga pretendentet kryesore për Kupën e Botës 2026.

Chelsea fiton edicionin e parë të Kupës së re Botërore për Klube të FIFA-s

E zhvilluar në Shtetet e Bashkuara përpara Kupës së Botës 2026, edicioni i parë i Kupës së riformatuar të Botës për Klube të FIFA-s pa 32 skuadra të garonin për titullin.

Chelsea befasoi kampionët e Evropës, PSG-në, me një fitore 3-0 në finale, falë një paraqitjeje taktike brilante nga Enzo Maresca.

Liverpool thyen rekordin britanik të Ligës Premier për Isak

Liverpool shijoi një sezon fantastik nën drejtimin e trajnerit Arne Slot dhe e përforcoi më tej skuadrën gjatë afatit kalimtar veror.

“Të Kuqtë” thyen rekordin britanik të transferimeve në Ligën Premier duke transferuar sulmuesin suedez Alexander Isak nga Newcastle United për 130 milionë paund, përfshirë bonuset, një nënshkrim që konfirmoi ambiciet e mëdha të klubit.

Një rikthim i papërsëritshëm – Dembele fiton Topin e Artë 2025

Sulmuesi francez Ousmane Dembele realizoi një nga rikthimet më të mëdha në historinë e futbollit duke fituar Topin e Artë.

Pas përballjes me dëmtime që dikur rrezikonin karrierën e tij, Dembele udhëhoqi PSG-në drejt titujve në Ligue 1, Superkupën e Francës dhe Ligën e Kampionëve.

Ceremonia emocionale e ndarjes së çmimit ishte një moment krenarie për yllin francez.

Humbja tragjike e Diogo Jotës

Futbolli u trondit nga një tragjedi e madhe, pasi sulmuesi i Portugalisë dhe Liverpoolit, Diogo Jota, humbi jetën në një aksident automobilistik në Spanjë, së bashku me vëllain e tij, Andre Silva.

Jota kishte pasur një sezon të shkëlqyer, duke fituar Ligën Premier me Liverpoolin dhe Ligën e Kombeve të UEFA-s me Portugalinë, duke lënë në zi tifozët dhe gjithë komunitetin e futbollit.

Neymar shpëton Santosin nga rënia

Neymar u rikthye te klubi i tij i fëmijërisë, Santos, dhe zhvilloi një seri paraqitjesh brilante që ndihmuan skuadrën të shmangte rënien nga kategoria.

Pavarësisht se luajti i dëmtuar, kreativiteti, ndërtimi i lojës dhe golat e superyllit brazilian siguruan fitore vendimtare për Santosin, ndërsa ai tashmë po përgatitet për Kupën e Botës FIFA 2026 pas një operacioni në gju.

Rikthimi i Manchester United në Ligën e Evropës në 'Old Trafford'

Manchester United tregoi qëndrueshmërinë e tij karakteristike me një rikthim dramatik në Ligën e Evropës kundër Lyonit.

Duke qenë në disavantazh prej 4-2 gjatë kohës shtesë, United shënoi dy gola në minutat shtesë falë Kobie Mainoo dhe Harry Maguire, duke e çuar ‘Old Traffordin’ në ekstazë.

Megjithatë, gëzimi zgjati pak, pasi Tottenham Hotspur i mposhti 1-0 në finale.

Trofeu i parë madhor për Tottenhamin

Sezoni i “herëve të para” vazhdoi, teksa Tottenham Hotspur më në fund fitoi trofeun e parë madhor në histori duke triumfuar në Ligën e Evropës pas triumfit në finale ndaj Manchester United.

Goli i Brennan Johnson në pjesën e parë rezultoi vendimtar, ndërsa Micky van de Ven realizoi një shpëtim heroik mbi vijën e portës për të ruajtur avantazhin.

Heung-Min Son ngriti trofeun e tij të parë me Spurs, duke e konsoliduar statusin e tij si një legjendë e klubit./Telegrafi/

Manchester United ka një interes afatgjatë për sulmuesin e Crystal Palace, Jean-Philippe Mateta.

Megjithëse klubi nuk është duke kërkuar aktivisht një sulmues të ri në këtë afat kalimtar, sulmuesi francez mund të jetë dikush që ata do ta shqyrtojnë më seriozisht nëse bëhet i disponueshëm.

Mateta, pjesë kyçe e ekipit të Oliver Glasner te Palace, do të hyjë në vitin e fundit të kontratës së tij në korrik dhe kishte tërhequr interes nga klube të ndryshme gjatë verës së kaluar.

Sky Sports News raportoi më herët se Crystal Palace kishte refuzuar oferta deri në 50 milionë euro për Matetan nga klube të Ligës së Kampionëve në afatin e kaluar kalimtar.

Gjithashtu, kishte një interes të vonshëm ,por pa ofertë konkrete nga Tottenham Hotspur, para se ata të nënshkruanin me Randal Kolo Muani me formë huazimi nga Paris Saint-Germain në ditën e fundit të afatit.

Po ashtu, emri i sulmuesit 28-vjeçar u lidh edhe me Atalantan, Milanin, Juventusin dhe disa klube të tjera angleze.

Sky Sports News ka raportuar se fokusin kryesor të United e mban ende afati i verës së ardhshme, kur prioritet do të jetë një mesfushor defensiv i ri.

Deri më tani këtë sezon, Mateta ka realizuar tetë gola në 19 ndeshje të luajtura në elitën e futbollit anglez./Telegrafi/

Një nga përshtypjet më të forta që la futbolli në vitin 2025 ishte numri i jashtëzakonshëm i konflikteve.

Dhe jo konflikte mes rivalësh, ato janë pjesë e zakonshme e çdo sezoni, por përplasje të hapura brenda vetë skuadrave, mes futbollistëve dhe shokëve të ekipit, trajnerëve apo drejtuesve të klubeve.

Shpresa është që këto histori të mbeten në 2025 dhe që viti 2026 të sjellë tema më të këndshme për debat.

Por, përpara se t’i lëmë pas, ja një përmbledhje e konflikteve më të bujshme të vitit.

Mohamed Salah vs Liverpool

Pa dyshim, skandali i brendshëm më i zhurmshëm i vitit. Pas një barazimi me Leeds, Mohamed Salah shpërtheu publikisht, duke shprehur pakënaqësinë e tij ndaj klubit dhe trajnerit Arne Slot. Egjiptiani u ankua për mungesë besimi, premtime të pambajtura dhe përjashtim nga formacioni.

Reagimi i Slotit ishte i ftohtë, por i prerë, Salah u la jashtë për ndeshjen e Ligës së Kampionëve kundër Interit. Megjithatë, rikthimi i tij në fushë u shoqërua me një asistim kundër Brightonit.

Duartrokitjet e Salahut për tifozët në “Anfield” pas ndeshjes lanë shumë pikëpyetje. Lamtumirë apo thjesht një pauzë para Kupës së Afrikës? Vijimi i historisë pritet në janar.

Alexander Isak vs Newcastle

Një tjetër sagë ku Liverpooli ishte protagonist indirekt. Alexander Isak e bëri të qartë dëshirën për t’u transferuar në “Anfield”, duke refuzuar të luante për Newcastle dhe duke akuzuar klubin për thyerje marrëveshjesh.

Pas një vere të gjatë dhe tensionuese, marrëveshja u mbyll: Liverpooli pagoi 145 milionë euro, ndërsa Newcastle investoi paratë për dy sulmues të rinj. Të gjitha palët fituan, të paktën në letër.

Marc-Andre ter Stegen vs Barcelona

Kush do ta mendonte që kapiteni i Barcelonës do të përplasej me drejtuesit? Pas një operacioni në shpinë, ter Stegen deklaroi se do të mungonte tre muaj, një periudhë që nuk i lejonte klubit të lironte hapësirë për regjistrime të reja.

Situata përshkallëzoi: kapiteni u ndëshkua brenda klubit, refuzoi vizita mjekësore dhe u përfol për largim. Edhe pse u rikthye gradualisht, Flick e bëri të qartë se Joan Garcia ishte portieri numër një. E ardhmja e gjermanit në “Camp Nou” mbetet e pasigurt.

Robert Lewandowski vs përzgjedhësi i Polonisë

Një konflikt që tronditi futbollin polak. Robert Lewandowski pezulloi karrierën në kombëtare pasi iu hoq shiriti i kapitenit nga trajneri Michal Probierz.

Vendimi u mirëprit nga një pjesë e dhomës së zhveshjes, por Polonia pa pasoja të menjëhershme: humbje ndaj Finlandës dhe dorëheqje e tij. Lewandowski u rikthye më vonë dhe tregoi edhe një herë rëndësinë e tij.

Alejandro Garnacho vs Ruben Amorim (Manchester United)

Pas finales së humbur të Ligës së Evropës, Garnacho reagoi hapur ndaj vendimit të trajnerit për ta lënë në stol. Postime provokuese dhe deklarata publike vulosën fatin e tij. Amorim ishte i prerë: argjentinasi nuk ishte më pjesë e planeve.

Pas një vere të vështirë, Garnacho u transferua te Chelsea. Ai atje po luan rregullisht.

Viktor Gyokeres vs Sporting Lisbona

Një tjetër rast presioni për transferim. Sulmuesi suedez pretendoi një “marrëveshje xhentëlmenësh” për largim, por Sporting kërkonte më shumë se sa Arsenali ishte gati të paguante.

Pas tensioneve dhe bojkotit, marrëveshja u arrit. Gyokeres u transferua në Londër, edhe pse forma e tij mbetet larg asaj që tregoi në Portugali.

Yoane Wissa vs Brentford

Një tjetër bojkot veror. Wissa refuzoi të luante për Brentford për të detyruar transferimin te Newcastle.

Pas ofertave të refuzuara dhe presionit publik, marrëveshja u mbyll për 55 milionë euro vetëm pak para mbylljes së afatit kalimtar.

Adrien Rabiot vs Jonathan Rowe (Marseille)

Pas humbjes ndaj Rennes, një debat në dhomën e zhveshjes u shndërrua në përplasje fizike. Rabiot dhe Rowe u përfshinë në një sherr serioz, aq sa stafi i sigurisë ndërhyri.

Të dy lojtarët u larguan nga klubi deri në fund të afatit kalimtar, duke mbyllur një episod të turpshëm për Marseille. Rabiot shkoi te Milani, Eowe te Bologna.

Dominik Livakovic vs Girona

Një nga transferimet më të çuditshme të vitit. Portieri kroat u huazua te Girona, por refuzoi të luante në Kupë e Mbretit, sepse dëshironte të largohej në janar për të siguruar minuta para Kampionatit Botërorit 2026.

Trajneri Michel e konfirmoi publikisht refuzimin e lojtarit për të aktivizuar veten.

Dani Rodriguez vs Mallorca

Një legjendë e klubit u përjashtua pas një postimi kritik ndaj trajnerit Jagoba Arrasate. Rodriguez u ndëshkua, iu hoq shiriti i kapitenit dhe nuk u përfshi më në skuadër.

Mallorca dhe lojtari u ndanë në janar, në një mënyrë të hidhur për një figurë historike të klubit.

Davide Calabria vs Sergio Conceiçao (AC Milan)

Një përplasje e hapur pas ndeshjes me Parmën. Conceiçao i bërtiti Calabrias në fushë, pas pakënaqësive për disiplinën e lojtarëve.

Calabria u largua nga Milani, fitoi Kupën e Italisë me Bolognan dhe më pas u transferua te Panathinaikos.

Idrissa Gueye vs Michael Keane (Everton)

Një moment shokues: Gueye goditi shokun e skuadrës gjatë ndeshjes dhe u përjashtua me karton të kuq, një rast i rrallë në Ligën Premier.

Mesfushori kërkoi falje publike dhe konflikti u mbyll shpejt. Pas dy ditësh publikuan foto së bashku.

Hakan Çalhanoglu vs Lautaro Martinez (Inter)

Deklaratat e Lautaros pas eliminimit nga Botërori i Klubeve ndezën tensione. Çalhanoglu reagoi publikisht, duke kritikuar stilin e udhëheqjes.

Një mbledhje emergjente e skuadrës i shoi tensionet dhe të dy mbetën pjesë kyçe e Interit.

Luis Perez vs Juanmi Latasa (Valladolid)

Gjatë një sezoni katastrofik, një incident në stol tronditi publikun: Perez tentoi të godiste Latasan pas një zënke.

Klubi i ndëshkoi të dy dhe më pas rrugët e tyre u ndanë.

Lorenzo Lucca vs shokët e ekipit (Udinese)

Një episod sa komik aq edhe simbolik. Lucca refuzoi t’ua dorëzonte penalltinë shokëve, shënoi, por u zëvendësua menjëherë.

Asnjë nga protagonistët nuk është më te Udinese.

Përmbledhja

Në përmbledhje, viti 2025 u shënua nga një numër i jashtëzakonshëm konfliktesh të brendshme në futboll, duke nxjerrë në pah brishtësinë e ekuilibrave brenda klubeve moderne.

Përplasjet mes lojtarëve, trajnerëve dhe drejtuesve shpesh morën përmasa publike dhe dolën mbi interesin sportiv të skuadrave.

Mungesa e komunikimit, menaxhimi i dobët i situatave delikate dhe presioni i vazhdueshëm i rezultateve përshkallëzuan tensionet.

Në shumë raste, këto kriza u mbyllën me transferime të detyruara ose ndarje të hidhura, duke lënë pasoja të dukshme.

Efektet u reflektuan drejtpërdrejt në stabilitetin, imazhin dhe performancën sportive të klubeve.

Këto episode shërbejnë si një paralajmërim i qartë se harmonia, udhëheqja dhe dialogu janë elementë thelbësorë për suksesin afatgjatë në futbollin modern. /Telegrafi/

Ish-mbrojtësi legjendar i Manchester United, Gary Neville, nuk kurseu kritikat ndaj trajnerit Ruben Amorim pas barazimit 1-1 të Djajve të Kuq ndaj Wolves në Old Trafford.

Neville iu referua veçanërisht ndryshimeve taktike që Amorim bëri gjatë ndeshjes dhe zëvendësimeve të pazakonta që sipas tij, përkeqësuan situatën.

Amorim riktheu formacionin e tij tipik 3-4-3, megjithëse në takimin e fundit kundër Newcastle kishte përdorur një 4-2-3-1 që i kishte siguruar Manchester United një fitore 1-0 dhe kishte dhënë përshtypjen e një përparimi. Neville e konsideroi rikthimin te 3-4-3 si një hap pas, duke theksuar se rezultatet me këtë sistem ishin “të tmerrshme”.

“Ai nuk ka pse të thotë ‘Nuk ndryshova për shkak të medias’, sepse në thelb po na thotë se media është në kokën e tij. Arsyeja pse ndryshoi ishte se niveli i ndeshjeve me 3-4-3 ishte shumë i keq. Kur pashë që pas pesë minutash jemi përsëri me tre lojtarë në mbrojtje, mendova: jo, Ruben, pse e bëre këtë? Trajneri duhet të pranojë kur gabon,” tha Neville në podcastin e tij në Sky Sports.

Ai kritkoi edhe zëvendësimet e Amorimit, duke veçuar rastin e Zirkzee. “Çdo zëvendësim ishte i çuditshëm. Nëse Zirkzee nuk do të ishte i lënduar dhe kjo ishte një zëvendësim taktik, do të ishte vërtet e gabuar. Ai shënoi golin dhe nuk mund ta zëvendësoje. Shpresoj të jetë i lënduar për shkak të vendimeve të Ruben Amorim,” shtoi Neville.

Neville gjithashtu theksoi se United nuk ishte vendosur si duhet në fazat e hershme të ndeshjes.

“Kjo nuk është e drejtë. Kam parë mjaftueshëm ndeshje të United në pesë ose gjashtë javët e fundit për të ditur çfarë funksionon dhe çfarë jo. Rikthimi në formacionin 3-4-3 sonte nuk ishte i nevojshëm dhe ndikoi në lojën e ekipit,” përfundoi Neville.

Në këtë analizë, Neville shprehu zhgënjimin e tij të qartë për vendimet taktike të trajnerit portugez, duke nënvizuar nevojën për një qasje më të menduar dhe vendime më të forta gjatë ndeshjeve të ardhshme. /Telegrafi/

Atletico Madrid ka marrë një qëndrim të prerë kundër ofertave të huazimit për Conor Gallagher, duke reaguar ndaj interesit të Manchester United.

Klubi spanjoll ka bërë të qartë se do të marrë në konsideratë vetëm një transferim të përhershëm për mesfushorin anglez, me një çmim prej 30 milionë eurosh, raporton ED.

Manchester United shpresonte të siguronte një huazim deri në fund të sezonit, me një opsion blerjeje për Gallagher, i cili ka hasur vështirësi për të gjetur hapësirë në titullarët e Diego Simeone për shkak të konkurrencës me Pablo Barrios, Koke dhe Johnny Cardoso.

Atletico, që kishte shpenzuar 40 milionë euro për lojtarin 18 muaj më parë, synon të sigurojë fonde për të forcuar thellësinë e skuadrës me një zëvendësues të duhur.

Nga ana e tij, Gallagher kërkon minuta të rregullta për të përgatitur rrugën drejt Kupës së Botës 2026, ku një rikthim te Manchester United mund t’i japë një shtysë të fortë mundësive të tij.

Derisa këtë sezon te Atletico, mesfushori ka regjistruar 3 gola dhe 1 asistim në 972 minuta të luajtura për 25 paraqitje, duke treguar potencialin e tij edhe pse me hapësirë të kufizuar në fushë. /Telegrafi/

Mbrojtësi i djathtë i Real Madridit, Trent Alexander-Arnold mund të rikthehet në Ligën Premier më shpejt sesa që ishte menduar, por jo te Liverpooli.

Sipas mediumit të afërt me klubin mbretëror, DefensaCentral, Alexander-Arnold, mund të largohet nga Los Blancos në afatin kalimtar të verës 2026.

Anglezi 27-vjeçar nuk është ambientuar ende plotësisht në klubin e tij të ri, kështu që e ardhmja e tij mbetet e pasigurt.

Manchester City, Manchester United dhe Newcastle United thuhet se mund të ofrojnë deri në 40 milionë euro për të blerë Trentin në verën e vitit 2026.

Nga ana e tij, Alexander-Arnold nuk dëshiron të largohet nga Real Madridi dhe klubi nuk është ende gati të shqyrtojë ofertat në tavolinë.

Të gjithë në ekip besojnë te Alexander-Arnold dhe mendojnë se ai duhet të luajë më shumë ndeshje për t'u përshtatur me klubin e tij të ri.

Mbrojtësi iu bashkua Real Madridit në verën e vitit 2025 si lojtar i lirë. Këtë sezon, ai ka dhënë një asistim në 11 ndeshje në nivel klubesh. /Telegrafi/

Manchester United dhe Wolves u ndanë baras 1-1 në një përballje të fortë, ku vendimtar u bë edhe ndërhyrja e VAR-it në minutat shtesë.

Djajtë e Kuq kaluan në epërsi në minutën e 27-të, kur Joshua Zirkzee shënoi nga jashtë zonës, me goditjen e tij që u devijua dhe përfundoi në rrjetë, duke mposhtur portierin Jose Sa.

“Djajtë e Kuq” patën edhe raste të tjera, përfshirë një goditje me kokë të Benjamin Sesko që u ndal nga shtylla.

Wolves reagoi dhe u shpërblye në fund të pjesës së parë. Pas një goditjeje nga këndi, Ladislav Krejci u gjend i lirë në zonë dhe me kokë shënoi për 1-1 në minutën e 45-të.

Pjesa e dytë u karakterizua nga luftë e fortë në mesfushë dhe raste të shpërndara.

Wolves rrezikoi disa herë, ndërsa Manchester United kërkoi golin e fitores me zëvendësime ofensive.

Momenti më dramatik erdhi në minutën 90+1, kur Patrick Dorgu shënoi për Man United, por pas rishikimit në VAR goli u anulua për pozicion jashtë loje.

Ndeshja u mbyll me rezultatin 1-1, një barazim që lë shije të hidhur për Manchester United pas golit të anuluar në fund, ndërsa Wolves merr një pikë të vlefshme nga “Old Trafford”. /Telegrafi/

Rasmus Hojlund ka folur për kohën e tij te Manchester United dhe thotë se ndihej se ishte paraqitur mirë, veçanërisht gjatë sezonit të tij të parë në ‘Old Trafford’.

Sulmuesi danez më pas u largua me një huazim njëvjeçar te skuadra e Serie A, Napoli, dhe aktualisht po shkëlqen nën drejtimin e Antonio Contes, duke e bërë të mundur që qëndrimi i tij te klubi italian të bëhet i përhershëm.

Hojlund ka shënuar gjashtë gola në 12 ndeshje në kampionatin italian, duke ndihmuar Napolin të ngjitet në vendin e tretë në tabelë, vetëm dy pikë pas udhëheqësve, Interit.

Transferimi përfshinte gjithashtu një opsion blerjeje, i cili pritet të aktivizohet nëse Napoli kualifikohet në Ligën e Kampionëve.

Sulmuesi foli gjithashtu për largimin e tij nga United dhe arsyet pse duhej të niste një aventurë të re.

“United më bëri të qartë që nuk bëja pjesë të planeve për këtë sezon. Duke ardhur në sezon, dhe pa futboll evropian, mendoj se Napoli pa një mundësi për të më marrë”.

“Sapo dëgjova për interesin e tyre, i bëra të qartë ekipit tim dhe njerëzve rreth meje që doja vetëm të shkoja atje. Kam pasur disa biseda të mira me trajnerin dhe me drejtorin sportive”.

Sulmuesi foli më pas për bisedën e tij me Conten rreth transferimit.

“Nuk zgjati shumë. Mendoj se të dy ishim të qartë që ishte një hap i mirë për mua dhe një përputhje e mirë. Ishte një bisedë e shkurtër, por shumë e mirë”.

“Ai është një trajner i jashtëzakonshëm, unë pothuajse gjithmonë kam parë që ai bën gjëra të mira kudo ku ka qenë. Sigurisht, kjo ishte një pjesë e madhe e vendimit. Kur të thërret ai, thjesht duhet të thuash po”, ka deklaruar Hojlund./Telegrafi/

Me afatin kalimtar të janarit që po afron me shpejtësi, Manchester United përballet me mundësinë e largimit të disa lojtarëve të ekipit të parë, kontratat e të cilëve skadojnë këtë verë, përfshirë Harry Maguire.

Si pjesë e vendimit Bosman të vitit 1995, klubet nga vende të tjera mund të diskutojnë marrëveshje paraprake me lojtarë në Angli deri në gjashtë muaj përpara skadimit të kontratave të tyre aktuale.

Megjithatë, ky rregull gjashtëmujor vlen vetëm për klubet e huaja. Në Angli, një klub nuk mund të hyjë në bisedime me një lojtar nga një klub tjetër derisa ai të ketë hyrë në muajin e fundit të kontratës së tij.

Në total, katër lojtarë nga skuadra aktuale e ekipit të parë të Manchester United mund teknikisht të bien dakord për t’u bashkuar me klube të tjera që javën e ardhshme, teksa hyjnë në muajt e fundit të kontratave të tyre, përfshirë mesfushorin brazilian Casemiro.

33-vjeçari, i cili është një nga lojtarët më të paguar të United me rreth 375,000 paund në javë, është lidhur fort me një transferim në Arabinë Saudite muajt e fundit.

Ndërkohë, United kanë një opsion për ta zgjatur kontratën e Casemiros edhe për një vit tjetër. Siç theksohet në një raport të The Mirror, ata ushtruan një opsion të ngjashëm me Harry Maguire, kontrata e të cilit pritej të skadonte në qershor 2025 përpara se opsioni të aktivizohej.

Për pjesë të mëdha të sezonit 2025-2026, Casemiro ka qenë një lojtar i rregullt nën drejtimin e Ruben Amorim.

Sa i përket Maguire, kontrata aktuale e reprezentuesit anglez gjithashtu zgjat deri në verën e vitit 2026 dhe, ashtu si Casemiro, mbrojtësi është lidhur me një largim nga ‘Old Trafford’ gjatë 12 muajve të fundit.

Përveç dyshes së përmendur më sipër, portieri me përvojë Tom Heaton po hyn në gjashtëmujorin e fundit të kontratës së tij, megjithëse 39-vjeçari pritet të tërhiqet nga futbolli në vitin 2026, sipas raportimeve.

Tyrell Malacia ndodhet gjithashtu në të njëjtën situatë dhe, ndonëse United kanë një opsion për ta zgjatur kontratën e tij edhe për një vit tjetër, mbrojtësi holandez vazhdon të ketë vështirësi për të siguruar minuta në ekipin e parë./Telegrafi/

Bournemouth pret që transferimi i sulmuesit Antoine Semenyo te Manchester City të zyrtarizohet brenda 48 orëve të ardhshme.

Kjo vjen pas bisedimeve pozitive të zhvilluara të hënën lidhur me strukturën e pagesave që lidhen me klauzolën e lirimit të lojtarit.

Semenyo tashmë ka arritur marrëveshje verbale për kushtet personale me Manchester Cityn, duke i hapur rrugë përfundimit të transferimit.

Megjithatë, në këto momente Bournemouth ende shpreson që sulmuesi të mund të bëjë një paraqitje lamtumire ndaj Chelseat të martën, në kuadër të ndeshjes së radhës në Liga Premier.

Semenyo u kërkua me ngulm nga shumica e gjigantëve anglezë, si Man Unitedi dhe Liverpooli, por që lojtari preferonte Cityn.

Këtë edicion, Semenyo ka zhvilluar 16 paraqitje në Ligën Premier, ku ka kontribuar me tetë gola e tre asistime në proces./Telegrafi

Manchester City ka arritur marrëveshje personale me sulmuesin e Bournemouth, Antoine Semenyo, ndërsa përfaqësuesit e lojtarit pritet të jenë në Mançester për të finalizuar detajet e transferimit, i cili pritet të kushtojë rreth 65 milionë euro në janar.

Klubi ka hapur negociatat me Bournemouth për klauzolën e lirimit të aktivizuar vetëm deri më 10 janar, duke e bërë Cityn deri më tani kandidatin e vetëm zyrtar për nënshkrim.

Interesi i Liverpoolit duket se është ftohur, pasi nuk ka pasur kontakte me Bournemouth ose me lojtarin, pavarësisht lidhjeve të mëparshme së bashku me Arsenalin, Manchester United dhe Tottenham.

Semenyo vetë ka shprehur dëshirën për të luajtur në nivele të larta dhe për të fituar trofe, duke favorizuar projektin e Man Cityt.

Në këtë sezon, Semenyo ka shënuar tashmë nëntë gola dhe ka dhuruar tre asistime në Ligën Premier për Bournemouth. /Telegrafi/

Është tashmë e qartë se Antoine Semenyo do të largohet nga AFC Bournemouth këtë dimër. Manchester City shihet si favorit, por konkurrenca nuk është dorëzuar.

Prej javësh është kuptuar se Bournemouth nuk do të jetë në gjendje ta mbajë Semenyon. 25-vjeçari ka shënuar tetë gola dhe ka dhënë tre asiste në 16 paraqitje, një bilanc që ka tërhequr menjëherë interesimin e klubeve të mëdha të Ligës Premier.

Anësori ka një klauzolë lirimi prej rreth 75 milionë eurosh, e vlefshme për javët e para të janarit.

Manchester City, Liverpool dhe Manchester United janë të gatshme të paguajnë këtë shumë. Ditët e fundit, City është paraqitur si favorit i qartë, me Semenyon që raportohet se është gati të kalojë te ekipi i Pep Guardiolës.

Megjithatë, sipas Sky Sports, Liverpooli nuk është dorëzuar dhe po përpiqet ta bindë lojtarin të rishqyrtojë vendimin.

Gjithnjë sipas Sky Sports, edhe Manchester United mbetet në garë dhe po pret shansin e vet.

Për të shmangur një “rrëmbim” të mundshëm, City po shpejton negociatat. Sky Sports raporton se një takim ndoshta vendimtar mes përfaqësuesve të lojtarit dhe Citizens pritet të zhvillohet sot.

Ganezi dëshiron të përcaktojë klubin e ardhshëm para fundit të vitit, duke vendosur 1 janarin si afatin përfundimtar. Nëse City nuk arrin marrëveshje deri atëherë, dera do të rihapet për klubet e tjera. /Telegrafi/

Futbollisti legjendar uruguaian, Edinson Cavani, i ka dhënë fund karrierës së tij të shkëlqyer në moshën 38-vjeçare.

Cavani njoftoi tërheqjen nga futbolli gjatë pushimit të kampionatit argjentinas, i cili zgjat nga 7 dhjetori deri në fund të janarit.

Golashënuesi uruguaian u përcoll me një mesazh prekës drejtuar futbollit.

“Më ke formuar, më ke sfiduar, më ke mësuar të ngrihem gjithmonë kur rrëzohem dhe të vlerësoj çdo hap gjatë rrugës. Më ke lejuar të arrij ëndrra që më dukeshin të pamundura si fëmijë dhe të takoj njerëz të jashtëzakonshëm, si në fushë ashtu edhe jashtë saj".

"Asgjë nga kjo nuk do të kishte qenë e mundur pa familjen, miqtë, shokët e ekipit, trajnerët dhe, mbi të gjitha, njerëzit e mi. Dashurinë e tifozëve në çdo vend dhe në çdo klub do ta mbaj me vete përgjithmonë".

“Po largohem në paqe, i qetë duke e ditur se dhashë gjithçka në çdo seancë stërvitore dhe në çdo ndeshje. Me gabime dhe suksese, por gjithmonë me respekt për këtë profesion që më ka dhënë kaq shumë", shkroi Cavani në letrën e tij të lamtumirës.

“El Matador”, siç njihet Cavani, ka veshur fanellën e Boca Juniors në dy vitet e gjysmë të fundit, ndërsa më parë fitoi famë me PSG, Napoli, Palermo dhe Manchester United.

Ai luajti 301 ndeshje për PSG-në dhe shënoi 200 gola, ndërsa me Napolin realizoi 104 gola në 138 paraqitje.

Me kombëtaren e Uruguait, Cavani regjistroi 136 paraqitje dhe shënoi 58 gola. /Telegrafi/

Roma ka dërguar një ofertë zyrtare për sulmuesin e Manchester United, Joshua Zirkzee, kështu ka deklaruar së paku gazetari i besueshëm italian Fabrizio Romano.

Oferta, e paraqitur përmes një ndërmjetësi, është për një huazim me mundësi që të shndërrohet në detyrim blerjeje. Zirkzee tashmë ka arritur marrëveshje personale me Romën dhe është i etur t’i bashkohet klubit nga Serie A, ndërsa tani vendimi i takon Manchester Unitedit.

Më herët ishte raportuar se Roma ishte e gatshme të paguante 5 milionë euro për huazimin gjashtëmujor, si dhe 35 milionë euro të tjera për ta bërë transferimin përfundimtar në fund të sezonit.

Situata mbetet e hapur, por fakti që lojtari ka dhënë dritën jeshile për transferimin shihet si një avantazh i madh për Romën në përpjekjet për të përforcuar repartin ofensiv.

Zirkzee nuk po ka vend në formacionin e Ruben Amorim dhe e sheh Serie A si shpëtim karrierë dhe shpresë për ta rikthyer vendin te kombëtarja e Holandës para Kupës së Botës 2026./Telegrafi/

Sipas një raporti të “The i Paper”, njerëzit e afërt të Antoine Semenyo besojnë se anësori mund të jetë duke bërë një gabim nëse vendos t’i bashkohet Manchester Cityt gjatë afatit kalimtar dimëror.

Ylli i Bournemouthit raportohet se e ka bërë Cityn destinacionin e tij të preferuar, duke e lënë pas Manchester Unitedin në këtë garë. Megjithatë, ekzistojnë dyshime serioze nëse kjo do të ishte zgjedhja më e mirë për zhvillimin e tij.

Semenyo nuk pritet të ketë statusin e titullarit të garantuar në “Etihad”, diçka që, sipas burimeve, do të ishte shumë më e realizueshme në “Old Trafford”. Kjo është parë si një pikë kyçe në vendimmarrjen e tij, pasi minuta të rregullta loje konsiderohen thelbësore në këtë fazë të karrierës.

Anësori 25-vjeçar përshkruhet si një profil perfekt për sistemin e Ruben Amorim te Manchester United. Ai mund të përshtatet si mbrojtës i majtë krahu në skemën 3-4-3, ose si anësor klasik, nëse United vazhdon të luajë me katër mbrojtës, ashtu si në fitoren ndaj Newcastle.

Pavarësisht kësaj, Manchester City mbetet i bindur se e ka fituar garën për shërbimet e Semenyo. Megjithatë, raportimet e fundit sugjerojnë se Liverpooli mund të hyjë në lojë në momentet e fundit, duke tentuar ta përmbysë situatën dhe të rrëmbejë transferimin./Telegrafi/

Manchester United është gati të nënshkruajë me mesfushorin e Romës, Manu Kone, verën e ardhshme, sipas raportimeve të besueshme nga Italia.

Trajneri Ruben Amorim po përgatitet për një riorganizim të mesfushës së skuadrës së tij, ndërsa Manchester United ka lidhur objektiva të tjerë të rëndësishëm, përfshirë mesfushorin e Nottingham Forest, Elliot Anderson, dhe Carlos Baleba të Brighton.

Kone tani është bërë një emër kyç në këtë garë, dhe gazetarja Francesca Teodori ka raportuar se ekziston një shans i madh që francezi, i cili ka luajtur 12 ndeshje me kombëtaren, të transferohet në Old Trafford.

2024/12/Manu-Kone.jpg telegrafi.com

24-vjeçari ka lënë mbresa që kur iu bashkua Romës nga Borussia Monchengladbach në vitin 2023. Ky sezon, Kone renditet ndër lojtarët kryesorë të Serie A për pasimet e plota (i 10-ti), pasimet progresive (i 4-ti) dhe faullet e tërhequra (i 8-ti).

Roma duhet të shes deri më 30 qershor për t'i rregulluar bilancet financiare dhe për ta lënë të lirë Konen, synon të fitojë rreth 70 milionë euro.

Duke folur në kanalin Twitch të ASRomaLive, Teodori shtoi se ky transferim është shumë i besushëm.

"Nuk është lajm, por është një thashethem mjaft i besueshëm. Burime të shumta më kanë thënë se ai do të largohet nga Roma në qershor dhe do të bashkohet me Manchester United", deklaroi gazetarja italiane. /Telegrafi/

Manchester United vazhdon të mbajë interes të fortë për mundësinë e transferimit të Carlos Balebas nga Brighton, me synim vitin 2026, raporton gazetari i njohur Fabrizio Romano.

Sipas burimit, Bayern Munich ka ndalur punën për një marrëveshje të mundshme për mesfushorin kamerunas, pasi në kampin bavarez ekziston bindja se Baleba është i prirur t’i bashkohet “Djajve të Kuq”.

Pavarësisht një sezoni jo bindës 2025/26 me Brighton në Liga Premier, Manchester United mbetet i vendosur për ta afruar lojtarin, qoftë në afatin kalimtar të janarit 2026, qoftë gjatë verës, me kusht që “Seagulls” të jenë të hapur për shitjen e tij.

Trajneri Ruben Amorim e sheh Baleban si një zgjidhje ideale për problemet aktuale në mesfushën e United, ndërsa ai figuron në listën e ngushtë të objektivave së bashku me emra të tjerë si Adam Wharton dhe Elliott Anderson.

Baleba ka regjistruar 19 paraqitje për Brighton në sezonin 2025/26, por deri më tani nuk ka kontribuar as me gol e as me asist për skuadrën e tij. /Telegrafi/

Manchester United po shqyrton një lëvizje surprizë në afatin kalimtar të janarit për një nga yjet e Kupës së Afrikës së Kombeve, i cili ka shënuar gol edhe kundër Nice, klub në pronësi të INEOS, më herët gjatë këtij sezoni.

Sulmuesi 26-vjeçar i Auxerre dhe përfaqësueses së Malit, Lassine Sinayoko, ka tërhequr vëmendjen e departamentit të rekrutimit të “Djajve të Kuq”, të cilët tashmë po e konsiderojnë seriozisht paraqitjen e një oferte gjatë afatit kalimtar të janarit.

Sipas Africa Sport, Manchester United është i interesuar për transferimin e sulmuesit, kontrata aktuale e të cilit me Auxerre skadon verën e ardhshme.

Raporti shton se klubi anglez ka zhvilluar “negociata serioze” me lojtarin dhe përfaqësuesin e tij, me synimin për ta siguruar si lojtar të lirë verën e ardhshme.

United synon të finalizojë bisedimet me Sinayokon gjatë këtij muaji, në mënyrë që ai të transferohet në “Old Trafford” në fund të sezonit 2025/26.

Aktualisht, klubi po negocion kushtet personale dhe shpreson të arrijë një marrëveshje përfundimtare së shpejti.

Sinayoko ndodhet momentalisht në aktivitet me kombëtaren e Malit në Kupën e Afrikës së Kombeve.

Sulmuesi 26-vjeçar është i aftë të luajë në disa pozicione të repartit ofensiv, ndërsa trajneri Ruben Amorim synon të forcojë edhe më tej sulmin, pavarësisht afrimeve të mëparshme si Matheus Cunha, Bryan Mbeumo dhe Benjamin Sesko gjatë afatit kalimtar veror./Telegrafi/

Paul Scholes ka emëruar shokun e tij më të keq të ekipit gjatë karrierës së gjatë te Manchester United, duke e kritikuar ashpër për mungesën e profesionalizmit.

Scholes kaloi 20 sezone me ‘Djajtë e Kuq’, duke fituar 12 tituj në Ligën Premier dhe dy Liga të Kampionëve.

Ai ka ndarë zhveshtoren me emra si Eric Cantona, Cristiano Ronaldo dhe Wayne Rooney, por jo çdo lojtar e ka impresionuar.

“Veron ishte një lojtar i madh, me talent. Nuk e di pse nuk funksionoi për të, por çfarë futbollisti ishte. Po kthehem te portierët; kur duhej të zëvendësoje Peter Schmeichel, gjë që gjithmonë është e vështirë, ne patëm disa të tillë. Po mendoja për Massimo Taibi dhe Mark Bosnich”.

“Mendoja se Mark ishte një portier i mirë te Aston Villa. Kur erdhi tek ne, ishte kaq jo profesional. Sinqerisht, ishte qesharake”.

Mark Bosnich

“Në stërvitjen për goditjet, zakonisht ke 15-20 goditje. Pas tre goditjeve, ai lodhej dhe thoshte: ‘Jo, merr dikë tjetër’", ka deklaruar Scholes.

Mark Bosnich ishte një nga portierët më të mirë në Ligën Premier në kohën kur nënshkroi me Manchester United nga Aston Villa në 1999, si pasardhës i legjendës së klubit, Peter Schmeichel.

Por vetëm një javë pasi u bashkua me klubin, u duk qartë se ai nuk kishte mentalitetin e duhur për të luajtur për “makinerinë e fitoreve” të Sir Alex Ferguson.

Ai u shfaq një orë vonë në dasmën e tij, pasi kishte kaluar natën e kaluar në një qeli policie pas një përleshjeje me një fotograf gjatë festës së beqarisë me miqtë e tij, përfshirë sulmuesin e United, Dwight Yorke./Telegrafi/

Ruben Amorim u pa duke “shpërthyer” ndaj njërit prej lojtarëve të tij gjatë fitores së vështirë të Manchester United ndaj Newcastle United.

Manchester United u rikthye te fitoret me triumfin minimal 1-0 kundër Newcastle në ‘Boxing Day’.

Patrick Dorgu shënoi golin e vetëm të ndeshjes në minutën e 24-të, kur goditi bukur me volej në këndin e poshtëm të portës.

Kjo ishte fitorja e parë e Unitedit që nga suksesi 4-1 ndaj Wolves në fillim të muajit, ndërsa Newcastle tani ka tri ndeshje radhazi në kampionat pa fitore, me klubin që tashmë ka marrë një vendim për të ardhmen e Eddie Howe.

Nga ana tjetër, Amorim ndryshoi skemën e lojës për të siguruar jo vetëm fitoren, por edhe portën e paprekur. Pasi e nisi takimin me katër mbrojtës, trajneri portugez kaloi në një mbrojtje me gjashtë lojtarë në minutat e fundit për të neutralizuar presionin ofensiv të Newcastle.

Trajneri i “Djajve të Kuq” bëri edhe ndryshime në repartin ofensiv, përfshirë aktivizimin e Joshua Zirkzee, i cili zëvendësoi Benjamin Sesko në pjesën e dytë.

Megjithatë, Zirkzee e nervozoi Amorimin në një moment shqetësues.

Sipas gazetarit Samuel Luckhurst, Zirkzee e zemëroi Amorimin për faktin se “nuk po bënte presion” dhe “nuk po jepte maksimumin”.

“Amorim shpesh po shpërthente ndaj Zirkzee për mungesë presioni dhe angazhimi maksimal”, shkroi Luckhurst në platformën X.

Një video e publikuar më pas tregoi trajnerin portugez duke reaguar ashpër pranë vijës anësore, reagim që duket se ishte i drejtuar pikërisht ndaj Zirkzee./Telegrafi/