TIRANË, 18 janar/ATSH/ Kryeministri Edi Rama vlerësoi sot se projekti për ndërtimin e parkut të energjisë së rinovueshme me erë në Tropojë do të thellojë diversifikimin e portofolit energjetik të vendit.

Në nisje të podkastit “Flasim”, kryeministri Rama u ndal te zhvillimet kryesore të javës, ku veçoi projektin madhor të parkut me energji të rinovueshme me erë në Tropojë.

“Kjo javë ka qenë e rëndësishme edhe në aspektin e zhvillimit ekonomik, pasi kemi hedhur edhe një hap tjetër të rëndësishëm në drejtim të sovranitetit energjetik, duke fuqizuar kështu themelet e ekonomisë dhe duke iu afruar atij momenti kur Shqipëria nuk do të ketë më nevojë të paguajë nga taksat e shqiptarëve për të importuar energji nga jashtë”, u shpreh kryeministri Rama.

Rama vlerësoi hapin e hedhur për fazën e dytë të projektit madhor të parkut me energji të rinovueshme me erë në Tropojë, me një kapacitet prodhimi prej 600 megavat.

Sipas Kryeministrit ky është një hap dhe një fazë e re që shënon finalizimin e një përpjekjeje të përbashkët rreth dyvjeçare me kompaninë amerikane, lidere në energjinë e rinovueshme në Europë, CWP.

“Në këtë mënyrë, falë një procesi parapërgatitor që është faktikisht më i shkurtër se vetë procesi i ndërtimit, kam bindjen se në një kohë 12 muaj punë, pa llogaritur periudhat kur dimri është realisht në fazën që e bën të pamundur punën normale në terren, ne do të kemi parkun me energji të erës, që do të hyjë në rrjetin e prodhimit tonë kombëtar dhe do të bëjë që, në këtë mënyrë, Shqipëria të thellojë diversifikimin e portofolit të vet energjetik”, u shpreh Rama.

/m.m/r.e/

The post Rama: Parku eolik në Tropojë, hap i rëndësishëm për sovranitetin energjetik appeared first on Agjencia Telegrafike Shqiptare.

TIRANË, 18 janar/ATSH/ Kryeministri Edi Rama sqaroi sot se Shtetet e Bashkuara të Amerikës nuk i kanë ndaluar vizat për Shqipërinë, por për 75 vende është bërë një pezullim i përkohshëm për sa i përket lejeve të punës në Shtetet e Bashkuara.

Gjatë podkastit “Flasim”, Kryeministri reagoi ndaj dezinformimit të opinionit publik lidhur me këtë lajm, të cilin e cilësoi të pavërtetë.

“Dua të them dy fjalë për ata që u hodhën përpjetë, ose më saktë, për ata që jetojnë të hedhur përpjetë dhe që, në përpjetësinë e tyre, i shtuan hedhjeve edhe një hedhje të radhës dhe të së njëjtës natyrë: dezinformim, çoroditje e opinionit publik, helmim i të gjithë atyre që kanë akoma fuqinë t’i dëgjojnë, duke thënë që Amerika i ndaloi vizat për Shqipërinë”, tha Rama.

Kjo, sipas Kryeministrit, është e pavërtetë dhe Shtetet e Bashkuara të Amerikës nuk i kanë ndaluar vizat për Shqipërinë.

“Shtetet e Bashkuara të Amerikës, administrata aktuale, nën orientimin e qartë prej kohësh të presidentit Trump për politikën e re lidhur me emigracionin, ka vendosur që për 75 vende të botës, ndër të cilat edhe disa vende të Ballkanit, ku përfshihet edhe Kosova, të bëhet një pezullim i përkohshëm për sa i përket lejeve të punës në Shtetet e Bashkuara. Jo vizave për në Amerikë, por lejeve të qëndrimit në Amerikë për punë, pasi për këtë kategori vendesh kanë vënë re fenomenin e marrjes së vizës për turizëm, marrjes së vizës për biznes dhe më pas të mosrespektimit të afateve, por të qëndrimit atje për të filluar një punë”, sqaroi Rama.

Kjo, sipas tij, “është diçka që shkon në linjën krejt normale të politikës së re të presidentit Trump dhe që nuk ka pikën e lidhjes me të gjitha ato që u thanë nga ata që hidhen përpjetë dhe që, përsëri, kur të bien në tokë, do të shohin se terreni mbi të cilin qëndrojnë është gjithmonë më i rrëshqitshëm”.

“Pra, do të humbin thellë e më thellë dhe do të hidhen përpjetë lart e më lart”, shtoi Kryeministri.

/m.m/r.e/

The post Rama: SHBA nuk i kanë ndaluar vizat për Shqipërinë appeared first on Agjencia Telegrafike Shqiptare.

TIRANË, 18 janar/ATSH/ Kryeministri Edi Rama publikoi sot tekstin e letrës që mori dje nga presidenti i Shteteve të Bashkuara, Donald J. Trump, i cili e ka ftuar personalisht për të përfaqësuar Shqipërinë në Bordin e Paqes për Rripin e Gazës.

Ndërsa falënderon shqiptarët për privilegjin e besimit që i kanë dhënë, Kryeministri siguron se “do të bëj deri në fund gjithçka duhet për ta lartësuar emrin e Shqipërisë e dinjitetin e shqiptarëve”.

Bordi i Paqes është një organizatë e re ndërkombëtare e ideuar prej presidentit Trump, ku Shqipëria ftohet si anëtare themeluese.

“Arritja jonë sjell së bashku një grup kombesh të dalluara që janë gati të marrin mbi supe përgjegjësinë fisnike të ndërtimit të paqes së përhershme, një nder i rezervuar për ata që janë të përgatitur të udhëheqin me shembullin e tyre, dhe të përkushtohen me mjeshtëri për një të ardhme të sigurt e të begatë për brezat që do të vijnë. Në një të ardhme të afërt, ne do t’i mbledhim partnerët tanë të mrekullueshëm e të përkushtuar, shumica e të cilëve janë Udhëheqës Botërorë shumë të respektuar”, thuhet ndër të tjera në letrën e presidentit Trump.

Presidenti i SHBA-së, Donald Trump njoftoi të enjten formimin e “Bordit të Paqes” për Rripin e Gazës.

Pjesë e Bordit do të jenë edhe ish-kryeministri britanik, Tony Blair, sekretari i Shtetit të SHBA-së, Marco Rubio, i dërguari special për Lindjen e Mesme, Steve Witkoff dhe dhëndri i Trump, Jared Kushner, ish-i dërguari special i OKB-së, Nickolay Mladenov, miliarderi Marc Rowan, presidenti i Bankës Botërore, Ajay Banga, dhe zëvendëskëshilltari i sigurisë kombëtare të SHBA-së, Robert Gabriel.

Më poshtë përkthimi i letrës së presidentit Trump:

“16 Janar, 2026

Shkëlqesia e Tij

Edi Rama

Kryeministër i Shqipërisë

Tiranë

I nderuar Kryeministër,

Është një nder i madh për mua t’ju ftoj ju, si Kryeministër i Republikës së Shqipërisë, të më bashkoheni në një përpjekje Historike dhe Madhështore për forcimin e Paqes në Lindjen e Mesme dhe, njëkohësisht, të ndërmarrim një qasje të re plot guxim për zgjidhjen e Konfliktit Global!

Më 29 shtator 2025, shpalla Planin Gjithëpërfshirës për fundin e konfliktit në Gaza, një plan veprimi me 20 pika, i mbështetur menjëherë nga të gjithë Udhëheqësit Botërorë, përfshirë edhe Krerët kryesorë në Botën Arabe, Izrael, dhe Europë. Në vijim të këtij Plani, më 17 Nëntor, Këshilli i Sigurimit i Kombeve të Bashkuara miratoi me shumicë mbizotëruese Rezolutën 2803, duke mirëpritur dhe mbështetur këtë plan.

Tani është koha që t’i kthejmë gjithë ëndrrat në realitet. Bordi i Paqes është në zemër të këtij Plani dhe ky është Bordi më mbresëlënës dhe më me ndikim i krijuar ndonjëherë, i cili do të themelohet si një Organizatë e Re Ndërkombëtare dhe Administratë Qeverisëse Tranzitore.

Arritja jonë sjell së bashku një grup kombesh të dalluara që janë gati të marrin mbi supe përgjegjësinë fisnike të ndërtimit të PAQES së PËRHERSHME, një Nder i rezervuar për ata që janë të përgatitur të udhëheqin me shembullin e tyre, dhe të përkushtohen me mjeshtëri për një të ardhme të sigurt e të begatë për brezat që do të vijnë. Në një te ardhme të afërt, ne do t’i mbledhim partnerët tanë të mrekullueshëm e të përkushtuar, shumica e të cilëve janë Udhëheqës Botërorë shumë të respektuar.

Si Kryetar i Bordit, ftoj zyrtarisht Republikën e Shqipërisë të përfaqësuar prej jush, të na bashkohet si Shtet Anëtar Themelues, dhe të bëhet palë në Statutin e Bordit të Paqes. Ky bord do të jetë aq i veçantë sa kurrë më parë nuk ka ekzistuar diçka e ngjashme me të!

Çdo Shtet Anëtar mund të caktojë një përfaqësues të autorizuar në emër të tij për të marrë pjesë dhe kontribuar në takime. Bashkëngjitur gjeni Planin Gjithëpërfshirës, dhe Statutin e Bordit, i cili tani është i disponueshëm për nënshkrimin tuaj dhe ratifikimin.

Me kënaqësi pres të punojmë së bashku, edhe për shumë gjatë në të ardhmen, drejt qëllimit të vendosjes së përhershme të PAQES BOTËRORE, MIRËQËNIES, DHE MADHËSHTISË PËR TË GJITHË!Me urimet më të mira, Unë jam,

Sinqerisht,

DONALD J. TRUMP

PRESIDENT I REPUBLIKËS SË SHTETEVE TË BASHKUARA TË AMERIKËS”.

/m.m/r.e/

The post Rama publikon ftesën e Trump për Bordin e Paqes: Do të bëj gjithçka për të lartësuar emrin e vendit tonë appeared first on Agjencia Telegrafike Shqiptare.

TIRANË, 18 janar/ATSH/ Për herë të parë parashikohet që Shqipëria të ketë një regjistër elektronik kombëtar për donacionet dhe sponsorizimet. Ky regjistër do të jetë i aksesueshëm nga publiku në çdo kohë në faqen zyrtare në internet të Drejtorisë së Përgjithshme të Tatimeve për të dhënat që lidhen me donacionet dhe sponsorizimet e organeve publike.

Kjo është risia kryesore e projektligjit “Për donacionet dhe sponsorizimet”, hedhur për konsultim nga qeveria si pjesë e paketës së ligjeve në fushën e antikorrupsionit.

Ky projektligj përcakton rregullat dhe procedurat për mbështetjen me donacione dhe sponsorizime në realizimin e veprimtarive me interes publik.

Në lidhje me lehtësitë tatimore, projektligji parashikon se subjekteve, persona fizikë a juridikë, që paguajnë tatim mbi fitimin sipas ligjit “Për tatimin mbi të ardhurat”, shuma e sponsorizuar u njihet si shpenzim i zbritshëm jo më pak se 3 për qind të tatimfitimit.

Gjithashtu, projektligji synon rregullimin e lehtësisë tatimore të dedikuar për sponsorizuesit që kontribuojnë në fushën e artit, sportit ose kulturës, përmes zbritjes direkte deri në masën 30 % nga tatimi mbi fitimin.

Projektligji vendos kufizime për të pranuar sponsorizime për disa organe publike për shkak të natyrës së tyre të veprimtarisë. Organet e sistemit të drejtësisë, Policia e Shtetit, organet që kanë kompetenca kontrolli dhe mbikëqyrëse në fushën e prokurimit publik, pastrimit të parave ose luftës ndaj korrupsionit nuk mund të pranojnë sponsorizime, nëse nuk i lejohet shprehimisht me ligj të posaçëm.

Në lidhje me donacionet e organeve publike, projektligji parashikon rregulla të posaçme për pranimin dhe administrimin e tyre kur vlera financiare është mbi 500 mijë lekë.

Për organizatat jofitimprurëse, organizatat sportive, shoqëritë sportive, subjektet tregtare dhe individët fshehja e të dhënave në regjistër ose deklarimi i pasaktë i sponsorizuesve përbën kundërvajtje administrative për organizatën dhe dënohet me gjobë nga organet tatimore nga përbën kundërvajtje administrative dhe dënohet me gjobë nga organet tatimore nga 100 mijë lekë deri 200 mijë lekë.

Pranimi i sponsorizimeve të paligjshme nga organizatat jofitimprurëse ndëshkohet me gjobë nga organet tatimore nga 200 mijë lekë deri në 300 mijë lekë.

Në rastin e pranimit të sponsorizimeve të paligjshme nga organizatat jofitimprurëse, organizatat sportive, shoqëritë sportive, subjektet tregtare dhe individët, është parashikuar se përbën kundërvajtje administrative dhe ndëshkohet me gjobë nga organet tatimore nga 200 mijë lekë deri në 300 mijë lekë.

Projektligji është hartuar në kuadër të detyrimeve që sjell procesi i integrimit evropian, ku Shqipëria ka marrë përsipër angazhimin për ndryshimin e kuadrit ligjor për donacionet dhe sponsorizimet brenda vitit 2027.

Shqipëria miratoi ligjin e parë për sponsorizimet në vitin 1994, por ligji ka nocione bazë të kufizuara për sa i përket llojeve të sponsorizimeve si dhe nuk ka parashikime për donacionet, transparencën, integritetin dhe masat antikorrupsion.

Në këto kushte, u konsiderua i vlefshëm hartimi i një projektligji të ri dhe jo amendimi i pjesshëm i ligjit të 1994-ës, në mënyrë që të adresohen këto boshllëqe.

Sindikatat dhe partitë politike nuk janë subjekt i këtij projektligji.

Nga ana tjetër, projektligji nuk krijon mbivendosje me kuadrin ligjor në fuqi për pastrimin e parave, luftën kundër terrorizimit apo parandalimin e konfliktit të interesave, por përforcon masat e integritetit dhe përmban një sërë rregullash që synojnë të rrisin transparencën dhe besimin e qytetarëve tek organet publike.

Në vazhdën e këtyre ndryshimeve ligjore, konsiderohen të domosdoshme ndryshimet për sponsorizimet e kryera në fushën e artit, kulturës dhe sportit.

/m.m/j.p/r.e/

The post Regjistër kombëtar për donacionet dhe sponsorizimet, rregulla të posaçme për vlera mbi 500 mijë lekë appeared first on Agjencia Telegrafike Shqiptare.

TIRANË, 16 janar/ATSH-Maela Marini/ Kryetari i Komisionit për Çështjet e Brendshme dhe të Mbrojtjes, Bledar Çuçi bëri të ditur sot se janë rritur grantet që i dedikohen bashkive për emergjencat civile, si dhe është siguruar një shpërndarje më e drejtë e këtyre fondeve mbi bazë risku.

Në mbledhjen e grupit parlamentar të Partisë Socialiste, Çuçi bëri një analizë të punës së këtij komisioni gjatë tre muajve të shkuar, ku veçoi miratimin e amendamentit për rritjen e fondit të emergjencave civile.

Sipas Çuçit, gjatë shqyrtimit të buxhetit 2026 në këtë komision u propozua një amendament që parashikonte rritjen me gati 50% të granteve që i dedikohen bashkive për emergjencat civile, krahasuar kjo me propozimin e ardhur nga qeveria.

“Kjo u bë në rakordim të plotë me Ministrinë e Mbrojtjes dhe Ministrinë e Financave. Amendamenti i dytë i propozuar nga ky komision dhe i miratuar në Kuvend, ka të bëjë me ndryshimin e formulës së shpërndarjes së këtij fondi, duke i dhënë peshë bashkive bazuar mbi riskun që kanë ndaj emergjencave civile “, tha Çuçi.

Sipas tij, “ky është viti i parë që do të bëhet ky ushtrim dhe do të jetë kontribut shumë i vlefshëm për të shpërndarë para publike aty ku është nevoja, sidomos për parandalimin e   emergjencave civile”.

Çuçi vlerësoi po ashtu edhe zhvillimin e seancës dëgjimore me ministren për Punët e Brendshme, Albana Koçiu, që sipas tij, “ndikoi sadopak në pastrimin e baltës që opozita hedh vazhdimisht në çështjet e sigurisë”.

Ndërkohë, Çuçi informoi se në axhendën e afërt të punës së komisionit janë edhe ndryshimet në Kodin Penal si dhe projektligji për Agjencinë e Mbikëqyrjes së Sistemit të Ekzekutimit të Vendimeve Penale, që do të kthehet në një agjenci inteligjente. /j.p/

The post Çuçi: Garantuam shpërndarje më të drejtë të fondeve të emergjencave për bashkitë  appeared first on Agjencia Telegrafike Shqiptare.

TIRANË, 16 janar/ATSH/ Kryeministri Edi Rama reagoi sot pas jehonës që krijoi në disa medie në Athinë, bashkëbisedimi i tij me gazetarin John Defterios, në panelin e organizuar gjatë Samitit të Zhvillimit të Qëndrueshëm në Abu Dhabi.

Rama u shpreh se “është e pabesueshme që një fjali e thënë me humor, të shkëputet totalisht nga konteksti e të kthehet në polemikë publike me pathos nacionalist”, gjë që sipas tij, “fatkeqësisht në Athinën mediatike ndodh shpesh”.

Kryeministri siguroi se nuk ka as më të voglin dyshim që Platoni dhe Aristoteli janë filozofë grekë dhe që Greqia e Lashtë është shtrati i qytetërimit europian.

“Greqia është një vend për të cilin unë ushqej ndjenjat më pozitive; populli grek është për mua një fqinj i pazëvendësueshëm e vëlla i patjetërsueshëm i popullit shqiptar dhe për kryeministrin e Greqisë ushqej një respekt të veçantë”, u shpreh Rama.

Më poshtë reagimi i plotë i kryeministrit Rama:

Jam i mahnitur nga reagimi i disa mediave në Athinë e i ndonjë politikani të lodhur grek lidhur me tonet e mia aspak tendencioze, po me humor miqësor gjatë bashkëbisedimit me gazetarin e nderuar John Defterios në panelin e organizuar gjatë Samitit të Zhvillimit të Qëndrueshëm në Abu Dhabi.

Është e pabesueshme që një fjali e thënë me humor, të shkëputet totalisht nga konteksti e të kthehet në polemikë publike me pathos nacionalist, gjë që fatkeqësisht në Athinën mediatike ndodh shpesh.

Por i siguroj të gjithë të shqetësuarit e të lënduarit, se nuk kam as më të voglin dyshim që Platoni dhe Aristoteli janë filozofë grekë dhe që Greqia e Lashtë është shtrati i qytetërimit europian; që kultura greke meriton vetëm admirim, jo vetëm për filozofët e lashtësisë po edhe për poetët, shkrimtarët, kineastët e muzikën që i ka dhënë njerëzimit; që Greqia është një vend për të cilin unë ushqej ndjenjat më pozitive, që populli grek është për mua një fqinj i pazëvendësueshëm e vëlla i patjetërsueshëm i popullit shqiptar dhe që për kryeministrin e Greqisë ushqej një respekt të veçantë!

U kuptuam? Shpresoj po.

Por ama mos më kërkojë askush ndër të shqetësuarit dhe të lënduarit me humorin tim, që kush shkruan e flet greqisht me pathosin nacionalist të të larpërmendurve, të më duket si pasardhës i Platonit dhe Aristotelit! Kaq”.

/m.m/j.p/

The post Rama pas reagimeve në disa medie në Greqi: E pabesueshme si humori kthehet në polemikë me pathos nacionalist appeared first on Agjencia Telegrafike Shqiptare.

TIRANË, 16 janar/ATSH-Maela Marini/ Kryeministri Edi Rama e konsideroi sot garantimin e  sigurisë ushqimore si një ndër sfidat kryesore në procesin e integrimit europian.

Kryeministri Rama, njëherësh kryetar i Partisë Soccialiste zhvilloi sot një mbledhje me grupin parlamentar të PS-së ku bëri një përmbledhje të punës dhe të sfidave që janë ndeshur në sesionin e mëparshëm parlamentar, por edhe u vendosën disa objektiva për në vijim.

Rama theksoi se tashmë Shqipëria ka hyrë në fazën më intensive të negociatave me Bashkimin Europian. “Në një hark kohor relativisht shumë të shkurtër, prej vetëm 2 vitesh, Shqipëria duhet të përmbushë të gjitha kushtet për të mbyllur negociatat e anëtarësimit”, shtoi ai.

Rama solli në vëmendje barrën e detyrimeve dhe kushteve që duhet të përmbushë vendi për të dalë me sukses nga procesi i negociatave dhe për të përballuar përfshirjen në një realitet tërësisht të ri, siç është realiteti i një tregu prej 450 milionë njerëzish.

“Shqipëria e integruar do të jetë një pikë uji në oqean dhe sfida për të gjithë sektorin prodhues dhe po ashtu për institucionet do të jetë e shumëfishtë. Ne përmes skuadrës së negociatave jemi duke negociuar periudhat e ndërmjetme pas momentit të anëtarësimit që t’i japim mundësi vendit që të jetë i gatshëm të përmbushë të gjitha kriteret”, shtoi Rama.

Kryeministri theksoi se beteja kryesore është për sektorin e prodhimit ushqimor, për të gjithë prodhuesit në fshat dhe për të gjithë sipërmarrjet që përpunojnë prodhimet ushqimore.

Në kushtet e sotme, Rama tha se jemi të paintegrueshëm në BE për shkak të nivelit të pamjaftueshëm të sigurisë ushqimore sipas kritereve të BE-së.

“Për këtë arsye, po përpiqemi të fitojmë një fazë të ndërmjetme prej 5 vitesh pas anëtarësimit, por përgatitjet duhet të fillojnë tani”, tha Rama.

Kryeministri solli në vëmendje situatën në të cilën ndodhej vendi për sa i përket sigurisë ushqimore në vitin 2013 dhe arritjet që janë bërë në këtë fushë.

“Kur kemi marrë detyrën rrugët e Shqipërisë ishin njëkohësisht tregje ushqimore dhe thertore. Të gjitha autostradat e vendit ishin të kufizuara nga tezgat dhe tregjet informale ushqimore. Shumë përparim është bërë por ama në raport me kriteret e sigurisë ushqimore të BE-së jemi ende larg”, shtoi Rama.

Rama paralajmëroi se në rast se nuk garantohet siguria ushqimore, në momentin e anëtarësimit dhe kur përfundon periudha e ndërmjetme asnjë ushqim i prodhuar në Shqipëri nuk mund të shitet jashtë vendit.

Madje sipas tij edhe në Shqipëri do të funksionojnë kriteret e njëjta dhe ushqimet mund të bllokohen nëse nuk përmbushin kriteret e sigurisë.

“Pastaj në skenarin më pesimist do të thotë se gjithçka që hahet të importohet. Për këtë arsye duhet një super punë por edhe super vendosmëri nga ana jonë si vendimmarrës për të mos falur asgjë dhe askënd në emër të nevojës që ‘vazhdoj të punoj’. Gjithësekush duhet të vendoset në pozita shumë të forta përgjegjshmërie dhe pune sepse në rastin më të mirë janë vetëm 10 vite përpara dhe është një punë shumë e madhe për t’u bërë”, u shpreh Rama.

1 nga 11

The post Rama: Siguria ushqimore, sfida kryesore në mbylljen e negociatave të anëtarësimit në BE appeared first on Agjencia Telegrafike Shqiptare.

TIRANË, 16 janar/ATSh/ Kontigjenti VII i Forcës Tokësore u nis sot drejt Bullgarisë në kuadër të misionit të NATO-s në Novo Selo.

Ministri i Mbrojtjes, Pirro Vengu vlerësoi Forcat Tokësore të cilat ndodhen në vijën e parë të sigurisë kolektive.

Sipas tij, “ky është  një tjetër mision për efektivët e Forca Tokësore dhe një tjetër mundësi për ta mbajtur flamurin shqiptar lart, krah për krah me flamujt aleatë”.

Vengu vlerësoi po ashtu kontigjenti VI, që përmbylli me sukses misionin, duke përfaqësuar Shqipërinë me profesionalizëm, disiplinë dhe përgjegjësi të lartë.

“Kontigjenti VII merr stafetën, gati për të treguar se përkushtimi, gatishmëria dhe standardet e NATO-s janë vlera që Forca Tokësore i mban në çdo mision”, u shpreh Vengu.

Duke filluar nga 29 nëntori 2022, Forcat e Armatosura janë angazhuar në Aktivitetin e Vigjilencës së Përforcuar (eVA) në Novo Selo, Bullgari.

Kontingjenti i FARSH i përbërë nga 30 ushtarakë, dislokohet në përbërje të grup-batalionit të NATO-s në kufijtë lindorë të Aleancës. Vend drejtues i këtij misioni është Italia dhe rotacioni i kontingjenteve është çdo 6 muaj.

/m.m/j.p/

The post Vengu: Forca Tokësore, në vijën e parë të sigurisë kolektive në Bullgari appeared first on Agjencia Telegrafike Shqiptare.

TIRANË, 15 janar/ATSh/ Gjykata Kushtetuese vlerësoi sot se vendimet e gjykatave të posaçme për vijimin e masës së sigurimit “Arrest në shtëpi” për kryetarin e Partisë Demokratike Sali Berisha vijnë në kundërshtim me Kushtetutën.

Në 17 dhjetor, Gjykata Kushtetuese mori në shqyrtim në seancë plenare çështjen me kërkues Sali Berishën, i cili kërkonte shfuqizimin e vendimeve të Gjykatës së Posaçme të Shkallës së Parë për Korrupsionin dhe Krimin e Organizuar; të Gjykatës së Posaçme të Apelit për Korrupsionin dhe Krimin e Organizuar; dhe të Kolegjit Penal të Gjykatës së Lartë, si të papajtueshme me Kushtetutën.

Pasi mori në shqyrtim pretendimet e palëve, Gjykata Kushtetuese nënvizoi se në vitin 2023 ndaj kërkuesit rezulton se, për kërkesën e prokurorit, nga gjykatat e zakonshme janë vendosur masat e sigurimit personal “Detyrimi për t’u paraqitur në Policinë Gjyqësore” dhe “Ndalimi i daljes jashtë shtetit”.

“Vendimet gjyqësore që kanë disponuar për këto masa sigurimi janë bërë objekt i shqyrtimit nga Gjykata, e cila, me vendimin e datë 21 nëntor 2024 ka vendosur pranimin pjesërisht të kërkesës dhe shfuqizimin e vendimeve gjyqësore që kishin vendosur ato masa, si të papajtueshme me Kushtetutën, vetëm për pjesën që kanë caktuar masën e sigurimit personal “Ndalimi i daljes jashtë shtetit”. “Kjo me arsyetimin se në caktimin ndaj kërkuesit të këtyre dy masave vendimeve të gjykatave u mungon arsyetimi, për rrjedhojë nuk rezulton që të kenë vlerësuar nevojën për caktimin tyre për të njëjtin procedim ndaj tij”, thuhet në njoftimin e Gjykatës Kushtetuese.

Për shkak se Berisha nuk respektoi një prej masave të sigurimit të caktuar nga gjykata, “Detyrimi për t’u paraqitur në Policinë Gjyqësore”, për kërkesën e prokurorit gjykatat e zakonshme, në datën 30 dhjetor 2023, ka zëvendësuar masat e sigurimit të vendosura ndaj kërkuesit me masën “Arresti në shtëpi”.

“Edhe procesi gjyqësor që disponoi për zëvendësimin e masave të sigurimit ndaj kërkuesit, duke caktuar masën “Arresti në shtëpi”, është bërë objekt i kontrollit kushtetues nga Gjykata, e cila, me vendimin e datës 17 janar 2025, ka vendosur rrëzimin e kërkesës”, bëri të ditur Gjykata Kushtetuese.

Ndërkohë rasti që u shqyrtua sot lidhet me një vendim të Gjykatës së Posaçme të Shkallës së Parë për Korrupsionin dhe Krimin e Organizuar të datës 30 korrik 2024, përmes të cilit është disponuar për vijimin e zbatimit të masës së sigurimit “Arresti në shtëpi”.

Gjykata, bazuar në jurisprudencën e GjEDNj-së vlerësoi t’i analizojë vendimet gjyqësore në drejtim të kufizimit të lirisë personale për periudhën që ato kanë prodhuar pasoja juridike.

Në vlerësimin e kësaj çështjeje, Gjykata konstatoi se gjykatat në shqyrtimin e kushteve dhe të kritereve për vijimin e masës së sigurimit “Arresti në shtëpi” kanë arsyetuar se nevojat e sigurimit paraqiten të pandryshuara me ato për të cilat në gjenezë është konkluduar se kërkuesi duhej të vendosej nën një masë sigurimi.

Në këtë kuptim, Gjykata Kushtetuese evidentoi se gjykatat që kanë lejuar vijimin e masës së sigurimit personal “Arresti në shtëpi”, u janë referuar të njëjtave nevoja sigurimi si në momentin fillestar, kur janë caktuar masat e sigurimit ndaj kërkuesit “Detyrimi për t’u paraqitur në Policinë Gjyqësore” dhe “Ndalimi i daljes jashtë shtetit”.

Gjykata konstaton se për këtë të fundit, në vendimin e saj ka konsideruar që për sa kohë u konstatua mungesë në vlerësimin e elementit të nevojës për kufizimin e të drejtave dhe të lirive të kërkuesit, në raport me mbarëvajtjen e procedimit penal, kjo përbën shkak të mjaftueshëm për të konstatuar cenimin e parimit të proporcionalitetit në caktimin e masës “Ndalimi i daljes jashtë shtetit”.

Po kështu, Gjykata, mbi bazën e të njëjtave argumente, konstatoi se edhe vetëm masa e sigurimit personal “Detyrimi për t’u paraqitur në Policinë Gjyqësore” duket se i plotësonte nevojat e sigurimit.

“Ndërkohë, në vendimet e gjykatave të zakonshme objekt kontrolli, ndonëse kishin kaluar 7 muaj nga caktimi i masës së sigurimit ‘Arrest në shtëpi”’ në lidhje me rrezikun e ikjes, nuk ka ndonjë arsyetim, ndërsa për rrezikun e marrjes dhe të vërtetësisë së provave organi i prokurorisë, në vijim, por edhe gjykatat e zakonshme, në momentin fillestar të caktimit të masave të sigurimit, kanë vlerësuar se ajo përmbushej nga masa e sigurimit ‘Detyrimi për t’u paraqitur në Policinë Gjyqësore’”, vlerëson Gjykata Kushtetuese.

Megjithatë, Gjykata Kushtetuese konstaton se për të njëjtën nevojë sigurimi dhe pa evidentuar ndonjë rrethanë të re për ndonjë sjellje konkrete të kërkuesit në aspekt të kësaj nevoje sigurimi, në rastin në shqyrtim gjykatat e zakonshme kanë konsideruar se ajo përmbushej nga një masë sigurimi më e rëndë, ajo e “Arrestit në shtëpi”.

Nisur nga kjo, Gjykata konstatoi se arsyetimi i vendimeve gjyqësore nuk është i mjaftueshëm në aspektin kushtetues në vlerësimin e kësaj nevoje sigurimi, duke mbajtur parasysh edhe faktin se justifikimi për caktimin fillimisht të masës së sigurimit “Arresti në shtëpi” konsistonte në mosrespektimin, moszbatimin nga kërkuesi të masës “Detyrimi për t’u paraqitur në Policinë Gjyqësore”.

Në vlerësimin e Gjykatës, vetëm një rrethanë e tillë nuk mund të justifikojë vijimin e zbatimit ndaj kërkuesit të masës “Arresti në shtëpi”, pra nuk mund të përbëjë arsye të mjaftueshme për zgjatjen në kohë të gjatë të kufizimit të lirisë, pa arsyetuar për ndonjë arsye të re që justifikon vijimin e masës konkrete.

Për këtë arsye, Gjykata vlerësoi se vendimet objekt i këtij gjykimi kushtetues, që kanë disponuar për vijimin e masës së sigurimit “Arresti në shtëpi”, vijnë në kundërshtim me Kushtetutën.

Për shkak se masa e sigurimit “Arresti në shtëpi” nuk është më në fuqi, pasi Gjykata e Posaçme e Apelit për Korrupsionin dhe Krimin e Organizuar në datën 3 janar 2025 ka vendosur zëvendësimin e saj me masën e sigurimit “Detyrimi për t’u paraqitur në Policinë Gjyqësore”, Gjykata vendosi të mos i shfuqizojë vendimet objekt të këtij shqyrtimi kushtetues.

Në përfundim të këtij gjykimi, Gjykata vendosi pranimin e pjesshëm të kërkesës dhe deklarimin si antikushtetuese të vendimeve të Gjykatës së Posaçme të Shkallës së Parë për Korrupsionin dhe Krimin e Organizuar; të Gjykatës së Posaçme të Apelit për Korrupsionin dhe Krimin e Organizuar; dhe të Kolegjit Penal të Gjykatës së Lartë. “Shpenzimet e përfaqësimit të kërkuesit në vlerën 75.000 lekë i ngarkohen Ministrisë së Financave”, thuhet në vendim.

/m.m/a.f/r.e/

The post Gjykata Kushtetuese: Vijimi i “Arrestit në shtëpi” për Berishën, në kundërshtim me Kushtetutën appeared first on Agjencia Telegrafike Shqiptare.

TIRANË, 15 janar/ATSh/ Ministri i Drejtësisë, Besfort Lamallari zhvilloi sot një takim me Grupin Ndërinstitucional të Punës për Integrimin Evropian, ku u diskutua për ecurinë e negociatave në nivel teknik përgjatë vitit 2025.

Ministri vlerësoi se “falë bashkëpunimit serioz ndërinstitucional kemi arritur rezultate domethënëse duke adresuar 51 nga 64 boshllëqet kritike të grupkapitullit të Themelorëve, ndërsa pjesa tjetër është në proces të avancuar”.

Ndërkohë, Lamallari theksoi se Reforma në Drejtësi ka nevojë të konsolidohet më tej, ndërsa janë bërë hapa të rëndësishëm në forcimin e pavarësisë së gjyqësorit, në mbrojtjen e të drejtave themelore, në lirinë e medias dhe në përafrimin e legjislacionit penal me standardet e Bashkimit Evropian.

“2026 mbetet një tjetër vit sfidues për ecurinë e negociatave dhe për rrugën tonë pa kthim drejt përmbushjes së aspiratës për Shqipërinë në BE”, u shpreh Ministri i Drejtësisë.

/m.m/a.f/r.e/

The post Negociatat me BE-në, Lamallari: Adresuam 51 nga 64 boshllëqet kritike të “Themelorëve” appeared first on Agjencia Telegrafike Shqiptare.

TIRANË, 15 janar/ATSh/ Këshilli i Ministrave emëroi sot Marjeta Përlalën në postin e drejtores së përgjithshme të Agjencisë Kombëtare të Mjedisit.

Agjencia Kombëtare e Mjedisit është një institucion qendror publik në varësi të ministrit të Mjedisit, që ushtron juridiksionin e vet në të gjithë territorin e Republikës së Shqipërisë, përmes zyrës qendrore dhe katër Agjencive Rajonale të Mjedisit.

AKM-ja ka për mision mbrojtjen, ruajtjen dhe përmirësimin e mjedisit si një pasuri jetike për brezat e sotëm dhe të ardhshëm, parandalimin dhe pakësimin e rreziqeve ndaj jetës e shëndetit të njeriut.

Po ashtu, ajo sigurohet për përdorimin e matur dhe racional të natyrës e të burimeve të saj në kuadër të zhvillimit të qëndrueshëm të vendit.

/m.m/r.e/a.f/

The post Marjeta Përlala emërohet në krye të Agjencisë Kombëtare të Mjedisit appeared first on Agjencia Telegrafike Shqiptare.

TIRANË, 15 janar/ATSh/ Këshilli i Ministrave përcaktoi sot kriteret e veçanta dhe procedurat për përzgjedhjen, emërimin, vlerësimin e rezultateve në punë, disiplinën, lirimin dhe shkarkimin nga detyra të Inspektorit të Përgjithshëm.

Vendimi parashikon kriteret që duhet të plotësojë kandidati për Inspektor të Përgjithshëm, si dhe procedurat e përzgjedhjes dhe emërimit të tij.

Vendimi parashikon krijimin e një komisioni ad hoc të përbërë nga: një përfaqësues nga institucioni që ka në varësi Inspektoratin e Përgjithshëm; një përfaqësues nga Departamenti i Administratës Publike; një përfaqësues nga Ministria e Drejtësisë.

Ky komision shqyrton dokumentacionin dhe zhvillon intervistat me kandidatët, brenda një afati jo më shumë se 15 ditë kalendarike nga data e përfundimit të afatit për dorëzimin e aplikimeve.

“Vlerësimi i kandidatëve bëhet në një total prej 100 pikësh, ku me 60 pikë vlerësohet përvoja profesionale dhe me 40 pikë intervista e strukturuar me gojë.

Komisioni harton listën përfundimtare të kandidatëve të kualifikuar, të shoqëruar me renditjen sipas pikëve të grumbulluara, dhe ia paraqet sekretarit të Përgjithshëm të institucionit përgjegjës brenda 3 ditëve kalendarike nga përfundimi i procesit të vlerësimit.

Po ashtu, Komisioni garanton barazi, objektivitet dhe transparencë gjatë gjithë procesit të vlerësimit.

Ndërkohë vendimi parashikon se në rastet kur ka indicie të arsyeshme për shkelje disiplinore, sekretari i Përgjithshëm i institucionit përgjegjës, me iniciativë të tij ose pas informacionit zyrtar të ardhur nga institucione shtetërore, vendos fillimin e procedurës disiplinore dhe njofton me shkrim Inspektorin e Përgjithshëm për shkeljen e dyshuar dhe për fillimin e hetimit administrativ.

Për këtë urdhërohet ngritja e një grupi të posaçëm për hetimin administrativ të Inspektorit të Përgjithshëm, duke mbledhur prova, dëshmi, raportime dhe deklarata, sipas natyrës së shkeljes së pretenduar.

Sekretari i Përgjithshëm i institucionit përgjegjës, në rast të konstatimit të shkeljes dhe në varësi të rrethanave të konstatuara, i propozon titullarit të institucionit përgjegjës edhe masat përkatëse disiplinore.

Inspektori i Përgjithshëm lirohet dhe shkarkohet nga detyra me vendim të Këshillit të Ministrave, me propozim të titullarit të institucionit përgjegjës, që ka në varësi Inspektoratin e Përgjithshëm.

/m.m/a.f/r.e/

The post Komision ad hoc për përzgjedhjen e Inspektorit të Përgjithshëm appeared first on Agjencia Telegrafike Shqiptare.

TIRANË, 15 janar/ATSh/ Këshilli i Ministrave vendosi sot shpronësimin për interes publik, të pronarëve të pasurive të paluajtshme që preken nga realizimi i projektit të parkut “Dua të luaj” në Fier.

Sipas këtij vendimi, pronarët do të kompensohen me një vlerë të përgjithshme prej 193 385 534 lekësh, që përballohet nga buxheti i shtetit.

Shpronësimi fillon menjëherë pas botimit të këtij vendimi në “Fletoren zyrtare” dhe afati i përfundimit të tij është brenda 3 muajve nga data e hyrjes në fuqi.

Pronarët e pasurive të paluajtshme do të kompensohen pasi të kenë paraqitur dokumentacionin justifikues për likuidim pranë Agjencisë Shtetërore për Shpronësimin.

Ndërkohë, Agjencia Shtetërore për Shpronësimin kryen procedurat për likuidimin e pronarëve të shpronësuar, sipas përcaktimeve të bëra në këtë vendim.

Agjencia Shtetërore e Kadastrës, Drejtoria Vendore Fier, brenda 30 ditëve nga data e miratimit të këtij vendimi, nis procedurat për hedhjen e gjurmës së projektit mbi hartën kadastrale, sipas planimetrisë së shpronësimit të miratuar, dhe regjistron aktin e kalimit të pronësisë në favor të Bashkisë Fier për pasuritë e shpronësuara.

Kjo agjenci pezullon të gjitha transaksionet me pasuritë e shpronësuara deri në momentin e realizimit të procesit të hedhjes së gjurmës së projektit mbi hartën kadastrale dhe të regjistrimit të aktit të kalimit të pronësisë në favor të Bashkisë Fier për pasuritë e shpronësuara.

/m.m/a.f/r.e/

The post Parku “Dua të luaj” në Fier, 193,4 milionë lekë për shpronësimet appeared first on Agjencia Telegrafike Shqiptare.

TIRANË, 15 janar/ATSh-Maela Marini/ Presidenti Volodymyr Zelensky i dorëzoi sot Urdhrin e princeshës Olga, Klasi I, një nga dekoratat më të larta të shtetit ukrainas, ministres për Evropën dhe Punët e Jashtme, Elisa Spiropali.

Urdhri i lartë iu akordua Spiropalit në cilësinë e Kryetares së Kuvendit të Shqipërisë, detyrë që ajo e ka mbajtur në periudhën 2024-2025.

Dekreti i Presidentit të Ukrainës jepet me motivacionin: “Për kontributin e çmuar personal në forcimin e bashkëpunimit ndërshtetëror në mbështetjen e sovranitetit dhe integritetit territorial të Ukrainës si dhe për veprimtarinë e saj bamirëse në shërbim të shtetit ukrainas”.

Nga ana e saj, Spiropali u shpreh se ky nderim nuk i përket vetëm një personi, por qëndrimit të Shqipërisë dhe të çdo europiani që zgjedh të qëndrojë në anën e lirisë.

“Ukraina sot nuk po mbron vetëm tokën e saj. Ajo po mbron ndërgjegjen e Europës.
Në qytetet e saj të bombarduara, në rezistencën e popullit të saj, po shkruhet nëse kontinenti ynë do të jetojë në paqe dhe të drejtë, apo nën frikë dhe forcë”, u shpreh ajo.

Spiropali vlerësoi se ky urdhër mban emrin e princeshës Olga, një grua që udhëhoqi me dinjitet në kohë të errëta.

“Ta marr sot këtë dekoratë në mes të një lufte për mbijetesë dhe liri, është një përgjegjësi morale, po aq sa një nder. Shqipëria qëndron me Ukrainën jo nga protokolli, por nga bindja. Sepse historia na ka mësuar se liria nuk ruhet duke heshtur, por duke qëndruar drejt, edhe kur kjo ka kosto. Ukraina sot po e mban këtë vijë për të gjithë ne”, tha ajo.

Duke iu drejtuar presidentit Zelensky, Spiropali u shpreh se ky urdhër është një nga nderimet më të mëdha të jetës së saj publike.

“Nuk e konsideroj këtë vetëm si një shenjë nderimi dhe një vlerësimi të madh për mua personalisht, por edhe si një shenjë të marrëdhënieve të shkëlqyera mes kombeve, qeverive dhe popujve tanë, veçanërisht në kohë sfiduese. Ne lutemi për paqe, për Shqipërinë dhe Ukrainën”, tha Spiropali.

/a.f/r.e/

The post Zelensky i dorëzon Spiropalit Urdhrin e princeshës Olga, Klasi I appeared first on Agjencia Telegrafike Shqiptare.

TIRANË, 15 janar/ATSh/ Ministrja për Europën dhe Punët e Jashtme, Elisa Spiropali deklaroi sot nga Kievi se “drejtësia për viktimat, mbajtja e përgjegjësisë për agresorin dhe rivendosja e plotë e sovranitetit, unitetit dhe integritetit territorial të Ukrainës nuk janë të negociueshme”.

Në konferencën e përbashkët për shtyp në Kiev me homologun ukrainas, Sybiha, kryediplomatja shqiptare u shpreh se këto janë parakushte për paqen.

“Prej gati katër vitesh, Ukraina po përballet me një luftë të pajustifikuar dhe të paprovokuar agresioni, shkaktuar nga Federata Ruse, e cila vazhdon të sjellë shkatërrim, vuajtje dhe humbje. Gjithsesi, nuk ia ka dalë të mposhtë vullnetin dhe shpirtin e popullit ukrainas”, u shpreh ajo.

Spiropali theksoi se “ndërsa dimri ashpërsohet, Ukraina po përballet sërish së fundmi me sulme brutale dhe të qëllimshme të Rusisë ndaj sistemeve energjetike, instalimeve të ngrohjes dhe infrastrukturës tjetër kritike”.

Kjo, sipas saj, ka detyruar miliona ukrainas të luftojnë për përditshmërinë e tyre ekzistenciale, për të pasur shtëpi të ngrohta, spitale funksionale dhe shërbime thelbësore operative.

“Këto sulme janë të paprovokuara, të pajustifikuara dhe të kryera në shpërfillje të hapur të së drejtës ndërkombëtare dhe dinjitetit njerëzor, duke rrezikuar qëllimisht jetën e civilëve dhe duke goditur infrastrukturën kritike. Goditjet masive, përfshirë përdorimin e raportuar të një rakete balistike me rreze të ndërmjetme, përfaqësojnë një përshkallëzim shumë më të rrezikshëm dhe të papërgjegjshëm”, u shpreh Spiropali.

Ato, sipas saj, “synojnë jo vetëm të terrorizojnë dhe të thyejnë shpirtin e popullit ukrainas, por edhe të dërgojnë një mesazh kërcënues përtej kufijve të Ukrainës”.

Spiropali theksoi se veprime të tilla rrezikojnë sigurinë e të gjithë rajonit dhe vazhdojnë të minojnë stabilitetin global.

“Shqipëria i dënon këto krime pa asnjë rezervë. Nuk mund të ketë asnjë justifikim, asnjë paqartësi përballë një agresioni kaq brutal. Ata që janë përgjegjës për këto mizori, duhet mbajnë përgjegjësi të plotë. Mosndëshkimi nuk është opsion”, shtoi ajo.

Kryediplomatja shqiptare nënvizoi se Shqipëria ka qenë një mbështetëse e qëndrueshme dhe e palëkundur e Ukrainës që nga fillimi i agresionit të paprovokuar të Rusisë.

“Ne jemi rreshtuar plotësisht me sanksionet dhe masat kufizuese të BE-së, si edhe me ato të organizatave të tjera ndërkombëtare, kemi mbështetur integrimin evropian të Ukrainës dhe kemi përkrahur të gjitha nismat për pezullimin e Rusisë nga organizatat ndërkombëtare. Në mbështetjen tonë, nuk jemi kushtëzuar nga përmasat e dimensionit tonë gjeografik, por nga qartësia e qëllimeve, vlerave, kontributeve dhe veprimeve tona”, u shpreh Spiropali.

Si çdo komb tjetër demokratik dhe i qytetëruar që e çmon paqen, Spiropali theksoi se “ne dëshirojmë që vuajtjet të marrin fund dhe të nisë rindërtimi, në mënyrë që fëmijët të mund të flenë pa frikë”.

“Por, për ta arritur këtë, është thelbësore një paqe e drejtë dhe e qëndrueshme. Shqipëria mirëpret përpjekjet ndërmjetësuese të Shteteve të Bashkuara dhe presidentit Trump, të Bashkimit Evropian dhe të gjithë partnerëve që sinqerisht kërkojnë një zgjidhje që nderon sakrificat e jashtëzakonshme të Ukrainës. Çdo nismë që na afron realisht drejt përfundimit të kësaj lufte meriton angazhimin tonë”, theksoi ajo.

Gjithsesi, Spiropali theksoi se “një paqe e drejtë do të thotë garanci reale sigurie”.

“Një paqe e drejtë do të thotë kthimi në shtëpi i fëmijëve të rrëmbyer, kthimi i të burgosurve, hetimi dhe ndjekja penale e krimeve të luftës dhe mbajtja e përgjegjësisë nga ana e agresorit. Me sytë nga e ardhmja, besoj se është po aq e rëndësishme të shohim përtej fushëbetejës. Të fillojmë që tani të projektojmë të ardhmen e Ukrainës. Kjo e ardhme përcaktohet nga perspektiva jonë e përbashkët si anëtarë të ardhshëm të familjes evropiane”, theksoi ajo.

Nga ana tjetër, Spiropali siguroi se Shqipëria do ta mbështesë këtë vizion. “Ne do ta mbështesim pa asnjë hezitim rrugën evropiane të Ukrainës në çdo forum shumëpalësh dhe jemi të gatshëm të ndajmë përvojën tonë, përfshirë punën teknike të negociatave dhe reformave”, u shpreh ajo.

“Sot zhvilluam diskutime të sinqerta dhe konstruktive edhe sa i takon mënyrave për të avancuar marrëdhëniet tona dypalëshe dhe për të harmonizuar më tej lidhjet tona të forta politike me një bashkëpunim më të fuqishëm në shumë fusha. Bashkërisht ramë dakord që, pavarësisht vështirësive, të përqendrohemi në mundësitë për tregti dhe investime, edhe në rrethana të jashtëzakonshme; Kontakte më të thella ndërmjet komuniteteve të biznesit; Bashkëpunim në sektorë ku Shqipëria dhe Ukraina mund të krijojnë vlerë të shtuar, si energjia, infrastruktura, turizmi, bujqësia dhe teknologjia”, theksoi Spiropali.

Po ashtu, ajo theksoi se do të inkurajohen kontakte më të ngushta mes njerëzve dhe do të thellohet bashkëpunimi në kulturë, arsim, shkencë dhe ruajtjen e trashëgimisë kulturore.

Në këtë drejtim, Spiropali vlerësoi shumë rolin e konsoliduar prej vitesh të komunitetit të diasporës shqiptare në Ukrainë, e cila shërben si një urë e rëndësishme për forcimin e lidhjeve mes dy vendeve tona.

“Diskutuam edhe për gatishmërinë e Shqipërisë për të kontribuar në projektet e pasluftës dhe në rindërtim, në koordinim me partnerët dhe organizatat ndërkombëtare. Ukraina po shkruan një nga historitë e mëdha të kohës sonë, një histori rezistence, dinjiteti dhe refuzimi për t’u dorëzuar përballë tiranisë. Shqipëria është krenare të jetë pjesë e kësaj historie, si një mike që zgjodhi të qëndrojë në krahun tuaj në momentet vendimtare. Dhe do të vazhdojmë të jemi, për sa kohë të kërkohet, sepse nuk mund të jesh neutral mes zjarrit dhe zjarrfikëses. Nuk ka terren të mesëm moral mes një kombi që lufton për mbijetesën e tij dhe një lufte perandorake që synon ta fshijë atë nga ekzistenca”, u shpreh Spiropali.

/m.m/a.f/r.e/

The post Spiropali: Drejtësia për viktimat dhe rivendosja e sovranitetit të Ukrainës parakushte për paqen appeared first on Agjencia Telegrafike Shqiptare.

TIRANË, 15 janar/ATSh-Maela Marini/ Ministri i Jashtëm i Ukrainës, Andrii Sybiha u shpreh sot se Shqipëria mbetet partner kyç në rajon dhe shumë aktiv në formatin Ukrainë-Europa Juglindore.

Në një konferencë të përbashkët për shtyp në Kiev me homologen shqiptare, Elisa Spiropali, ministri Sybiha vlerësoi mbështetjen e palëkundur të Shqipërisë ndaj Ukrainës.

Ai kujtoi se një vit më parë Shqipëria hapi ambasadën e saj në Ukrainë dhe kjo është ambasada e parë dhe e vetme që është hapur pas fillimit të invazionit masiv rus.

Ky sipas tij, është një tregues i mbështetjes, solidaritetit dhe besimit të cilin Ukraina e vlerëson shumë.

“Sot diskutuam një gamë të gjerë çështjesh mbi bashkëpunimin dypalësh, mbi rrugën tonë të përbashkët drejt anëtarësimit në BE. Shqipëria mbetet partneri ynë kyç në këtë rajon dhe një partner shumë aktiv në formatin Ukrainë-Europa Juglindore”, u shpreh ai.

Sybiha informoi për situatën në fushë betejë si dhe për pasojat që po përjeton Ukraina pas goditjeve në sektorin energjetik. “Ndajmë të njëjtën bindje se Moska duhet të detyrohet drejt paqes përmes rritjes së presionit”, u shpreh ai.

Ai vlerësoi gjithashtu Shqipërinë për mbështetjen e saj të palëkundur në kundërshtimin e agresionit rus, si dhe kryeministrin Edi Rama për qëndrimin e tij të fortë gjatë mbledhjes së Këshillit të Sigurimit.

“Ju falënderojmë gjithashtu për pjesëmarrjen tuaj në Koalicionin e Vullnetmirëve, për përpjekjet për kthimin e fëmijëve ukrainas dhe për angazhimin për rikthimin e një paqeje të drejtë në vendin tonë”, u shpreh ai.

Ministri Sybiha u shpreh se Ukraina mbështet vendosjen e sanksioneve ndaj Rusisë dhe regjimin e vizave për qytetarët e e saj.

“Do t’i kushtojmë vëmendje mbajtjes së përgjegjësisë që ka Rusia, ngritjes së një tribunali special për krimin e agresionit, si dhe të mekanizmave të tjerë të drejtësisë në bashkëpunim me Shqipërinë. Ukraina dhe Shqipëria janë të bashkuara nga vlerat tona të përbashkëta europiane dhe jemi partnerë në këtë rrugë drejt anëtarësimit në BE”, u shpreh ai.

Ndaj, ministri Sybiha siguroi se do të vazhdohet me këmbimin e përvojave dhe forcimin e bashkëpunimit dypalësh.

“Kemi një potencial të madh për t’iu kundërvënë kërcënimeve hibride të Rusisë, veçanërisht në rajonin e Ballkanit Perëndimor. Jam dakord të vazhdojmë dialogun tonë politik dhe bashkëpunimin në fushat e sigurisë, fushën humanitare dhe atë ekonomike, përfshirë edhe formatin Ukrainë-Europa Juglindore. Ne vlerësojmë komunitetin shqiptar në Ukrainë që jeton më së shumti në Odesa dhe ju falënderojmë për mikpritjen e bashkatdhetarëve tanë që u larguan drejt vendit tuaj pas agresionit rus, si dhe për lehtësimin e përpjekjeve për riatdhesimin e fëmijëve tanë ukrainas. Do të vazhdojmë të forcojmë lidhjet mes Ukrainës dhe Shqipërisë”, u shpreh ai.

/a.f/r.e/

The post Sybiha: Shqipëria partner kyç, vlerësojmë mbështetjen e palëkundur ndaj Ukrainës appeared first on Agjencia Telegrafike Shqiptare.

TIRANË, 14 janar/ATSh-Maela Marini/ Kryeministri Edi Rama shprehu sot bindjen se deri në fund të vitit 2028 Shqipëria do të jetë plotësisht vend sovran në prodhimin e energjisë elektrike duke mos importuar më energji.

Kryeministri Edi Rama ishte sot i ftuar në panelin e samitit të Javës së Zhvillimit të Qëndrueshëm që po zhvillon punimet në Abu-Dabi (Abu Dhabi), nën kujdesin e veçantë të presidentit sheikh Mohammed bin Zayed Al Nahyan.

Duke folur mbi investimet në fushën e energjisë, Rama u shpreh se ne “jemi me fat, sepse kemi burime hidrike dhe jemi një vend 100% me energji të ripërtëritshme”.

“Këtu jemi te niveli më i lartë në renditje. Por energjia nga burimet ujore do të thotë se ne varemi nga natyra, ndaj na duhet t’i drejtohemi importit”, tha Rama.

Ndaj sipas tij, dekadën e fundit është investuar shumë në energjinë diellore dhe të erës.

“Ne duam të krijojmë një portofol burimesh të ekuilibruara në mënyrë të tillë që ne të mos kemi më nevojë t’i drejtohemi importit dhe të jemi plotësisht sovran duke pasur 100% energji të gjelbër. Plani po ecën mirë dhe besojmë se në fund të 2028 do të jemi plotësisht sovran nuk do të blejmë më energji nga jashtë”, tha Rama.

Kryeministri vlerësoi bashkëpunimin strategjik me Emiratet e Bashkuara Arabe në fushën e energjisë. Ai solli në vëmendje marrëveshjen tripalëshe me Emiratet e Bashkuara Arabe dhe Italinë. “Ne synojmë që përmes kabllit ndërlidhës me Italinë t’i shërbejmë Europës me energji të gjelbër dhe bashkë me miqtë tanë arabë të bëjmë para për t’ia shitur Europës. Është më shumë se 1 miliard”, shtoi Rama.

1 nga 8

/j.p/r.e/

The post Rama në Abu Dhabi: Synojmë t’i shërbejmë Europës me energji të gjelbër appeared first on Agjencia Telegrafike Shqiptare.

TIRANË, 14 janar/ATSH/ Kryetari i grupit parlamentar të Partisë Socialiste, Taulant Balla, njëherësh drejtues politik i PS për Diasporën priti sot në një takim në ambientet e Kuvendit, Enkelejda Dajçin (Beqon), përfaqësuese e diasporës shqiptare në Landin e Bavarisë, Gjermani.

Balla vlerësoi lehtësimin e procedurave për lejet e qëndrimit dhe punësimit në Gjermani, duke i konsideruar ato si faktorë kyç për integrimin dhe suksesin e shqiptarëve që jetojnë e punojnë atje.

“Në Bavari jetojnë e punojnë rreth 18 mijë shtetas shqiptarë, ndaj vlerësojmë lehtësimin e procedurave për lejet e qëndrimit, punësimit. Gjithashtu në universitetet e Bavarisë studiojnë afro 800 studentë shqiptarë”, u shpreh Balla.

Takimi u konsiderua një dëshmi e rëndësisë që institucionet shqiptare i kushtojnë diasporës dhe forcimit të lidhjeve me komunitetet shqiptare jashtë vendit.

/m.m/j.p/

The post Balla pret në Kuvend përfaqësuesen e diasporës shqiptare në Bavari appeared first on Agjencia Telegrafike Shqiptare.

TIRANË, 14 janar/ATSH/ Kryeministri Edi Rama reagoi sërish sot ndaj deklaratave të gazetarit Blendi Fevziu, lidhur me udhëtimet private të ministrave të kabinetit qeveritar gjatë fundjavave.

Rama tha se “Fevziu reagoi prapë duke e pohuar përsëri faktin që ka fabrikuar një shpifje”.

“Ai refuzon t’i japë llogari publikut të vet, një herë të vetme, për një gënjeshtër me shtatë bishta dhe kapet si i mbyturi pas fijes së barit tek video-inspektimet e anëtarëve të qeverisë, për të cilat thotë se janë praktikë unike në botë, jashtë çdo standardi demokratik”, u shpreh Rama.

Më herët, gazetari Blendi Fevziu ka deklaruar se ka fakte që të paktën 7 ministra janë në udhëtime private jashtë shtetit të shtunave e të dielave, dhe lënë kasetat me inspektime nëpër televizione sikur janë në punë.

Kjo deklaratë ka sjellë reagimin e kryeministrit Rama, i cili i ka hedhur poshtë këto pretendime, ndërsa ka deklaruar se ministrat e kabinetit qeveritar edhe kur dalin për arsye personale jashtë vendit e bëjnë këtë me një kërkesë për leje dhe vetëm me miratim.

Më poshtë reagimi i plotë i kryeministrit Rama:

Fevziu reagoi prapë duke e pohuar përsëri faktin që ka fabrikuar një akuzë, më shqip një shpifje, për të cilën as ka çfarë thotë e vjen vërdallë me muhabete kafeneje, duke përmendur si në jerm dy a tre raste sporadike, për të cilat përsëri s’ka asnjë provë se janë të lidhura me udhëtime private të ministrave në fundjavë, e duke i ikur përsëri me një turravrap konfuz të vetmes gjë që duhet të bënte në këtë rast: Ndjesës ndaj shikuesve të tij.

Ndryshe nga më parë, Fevziu deklaron se nuk do përgjigjet më për këtë çështje. Normal, e kupton edhe vetë që s’ka si ia bën ndryshe, përderisa nuk mendon se shikuesit e tij meritojnë aq respekt sa ai t’u kërkojë ndjesë.

Pra Fevziu kërkon llogari edhe për gjëra që nuk i di ose që nganjëherë edhe i shpik, ndërkohë që fton rregullisht në sallonin e tij njerëz të armatosur me gjysmë të vërteta, të cilat janë edhe gënjeshtrat më të mëdha. Por ama ai refuzon t’i japë llogari publikut të vet, një herë të vetme, për një gënjeshtër me shtatë bishta dhe kapet si i mbyturi pas fijes së barit tek video-inspektimet e anëtarëve të qeverisë, për të cilat thotë se janë praktikë unike në botë, jashtë çdo standardi demokratik.

Dakord, atëherë po kaloj tek standardet dhe po i them Blendit, i cili padyshim e ka parë botën shumë më tepër se unë, që të na tregojë një rast të vetëm në botë ku debatet politike janë kacafytje për të marrë fjalën, në një sfond britmash të pandërprera, ku nuk e merr vesh i pari të dytin, e ku mikpritësi me një shkop në dorë nxit palët të zihen, pa vënë ose pa dashur të vendosë as qetësi, as rregulla në debat, as kufi etikë në komunikim, e pa kultivuar as sensin më të vakët të drejtësisë në trajtimin e të ftuarve, të cilëve u ndërpritet fjala rregullisht pa bërë dot 3 fjali bashkë!

Pra le të themi se po, e vërtetë, nuk është normale që anëtarët e qeverisë t’i shmangin daljet në sallonet mediatike (në fakt, në rastin tonë ne nuk shmangim daljet me gazetarë, po vetëm daljet me udhëheqësit barisalifallistë), por nëse Fevziu nuk e nis nga vetja, bashkë me sivëllezërit e simotrat e 700 tenxhereve, e të vendosi standardet demokratike në sallonin e tij të madh, atëherë s’ka si t’i kërkojë llogari ministrave pse nuk hidhen me kokë në tenxheren e Opinionit a në cilëndo tenxhere, ku bubullon e gërrgëron molla e përhershme e sherrit dhe ku shikuesit në vend se të informohen, abuzohen dhe helmohen me politikën!

/m.m/j.p/

The post Rama: Fevziu pohoi faktin që ka fabrikuar një shpifje appeared first on Agjencia Telegrafike Shqiptare.

TIRANË, 13 janar/ATSh/ Kryeministrit Edi Rama iu akordua sot medalja “Zayed” nga presidenti i Emirateve të Bashkuara, Sheikh Mohammed bin Zayed al Nayan.

Kryeministri theksoi se ky është respekti dhe vlerësimi më i madh për një kryeministër shqiptar.

“Thellësisht i prekur prej surprizës së paimagjinueshme dhe nderimit të jashtëzakonshëm nga presidenti i Emirateve të Bashkuara, Sheikh Mohammed bin Zayed al Nayan
akordimi i medaljes më të lartë të vendit mik, e cila mban emrin e themeluesit të Emirateve të Bashkuara, Sheikut Zayed, është respekti dhe vlerësimi më i madh për një kryeministër shqiptar, që e mora përulësisht plot me krenari për Shqipërinë, e me mirënjohje të thellë për mikun e madh të shqiptarëve, lartësinë e tij Sheikh Mohammed bin Zayed, si edhe për çdo shqiptar që ma ka besuar udhëheqjen dhe përfaqësimin e atdheut tonë të përbashkët”, tha Rama.

Në kuadër të Javës së Zhvillimit të Qëndrueshëm në Abu-Dabi (Abu Dhabi) u zhvillua sot ceremonia e ndarjes së çmimeve “Zayed” të cilat nderojnë iniciativat humanitare të atyre që kontribuojnë në vendet në zhvillim.

Çmimet u akorduan për projekte dhe organizata që kanë punuar lidhur me përmirësimin e arsimit dhe shkollimit, sigurimin e ujit të pijshëm, mbështetjen e ushqimit për komunitetet në nevojë si dhe për nisma që adresojnë ndryshimet klimatike dhe mbrojtjen e mjedisit.

/m.m/j.p/r.e/

The post Rama merr medaljen “Zayed”: Respekti dhe vlerësimi më i madh për një kryeministër shqiptar appeared first on Agjencia Telegrafike Shqiptare.