SEUL, 4 janar /ATSH DPA/ – Koreja e Veriut lëshoi sot disa raketa balistike drejt Detit Lindor, i njohur gjithashtu si Deti i Japonisë, raportoi agjencia jugkoreane e lajmeve Yonhap, duke cituar burime ushtarake në Seul.

Lëshimi i raketave rrit sërish tensionet në rajon, në fillim të vitit 2026.

Sipas Shtabit të Përgjithshëm të Ushtrisë së Koresë së Jugut (JCS), sistemet e vëzhgimit zbuluan disa lëshime raketash nga territori i Koresë së Veriut. Ushtria jugkoreane bëri të ditur se po monitoron nga afër situatën dhe po analizon të dhënat teknike të raketave.

“Ushtria jonë ruan një gjendje të fortë gatishmërie, ndërsa ndan ngushtë informacionin mbi raketat balistike të Koresë së Veriut me Shtetet e Bashkuara dhe Japoninë, në kuadër të një mbikëqyrjeje të shtuar për lëshime të tjera të mundshme”,  tha JCS-ja në një deklaratë zyrtare.

Sipas ushtrisë së Koresë së Jugut, raketat fluturuan rreth 900 kilometra përpara se të binin në det. Nuk u raportua për dëme apo kërcënime të drejtpërdrejta ndaj territorit të vendeve fqinje.

Edhe Japonia konfirmoi aktivitetin raketor. Agjencia japoneze Kyodo, duke cituar Rojat Bregdetare të Japonisë, raportoi se dy raketa të dyshuara balistike ishin lëshuar nga Koreja e Veriut dhe kishin rënë në Detin e Japonisë.

Yonhap kujtoi se Pheniani herën e fundit kishte lëshuar një raketë balistike drejt Detit Lindor në muajin nëntor.

Sipas rezolutave të Kombeve të Bashkuara, Koreja e Veriut e ka të ndaluar të lëshojë apo edhe të testojë raketa balistike të çdo rrezeje veprimi, pasi këto sisteme mund të pajisen edhe me koka bërthamore. /Ad.Ab./

The post SEUL: Koreja e Veriut lëshon raketa balistike drejt Detit Lindor appeared first on Agjencia Telegrafike Shqiptare.

UASHINGTON, 4 janar /ATSH/ – Për muaj të tërë, spiunët amerikanë kishin monitoruar çdo lëvizje të presidentit të Venezuelës, Nicolas Maduro, sipas BBC.

Një ekip i vogël, që përfshinte edhe një burim brenda qeverisë venezuelase, kishte vëzhguar se ku flinte 63-vjeçari, çfarë hante, çfarë vishte dhe madje, sipas zyrtarëve të lartë ushtarakë, edhe “kafshët e tij shtëpiake”.

Më pas, në fillim të dhjetorit, u finalizua një mision i planifikuar me emrin “Absolute Resolve Operation”. Ai ishte rezultat i muajve të tërë planifikimi dhe provash të imtësishme, që përfshinin edhe ndërtimin nga trupat elitare amerikane të një kopjeje të saktë, në madhësi reale, të shtëpisë së sigurt të Maduros në Karakas, për të praktikuar rrugët e hyrjes.

Plani, që përbënte një ndërhyrje të jashtëzakonshme ushtarake amerikane në Amerikën Latine, të paprecedent që nga Lufta e Ftohtë, u mbajt rreptësisht sekret.

Kongresi nuk u informua dhe nuk u konsultua paraprakisht. Me detajet e sakta të përcaktuara, zyrtarëve të lartë ushtarakë u mbeti vetëm të prisnin kushtet optimale për nisjen e operacionit.

Ata donin të maksimizonin elementin e befasisë, thanë zyrtarët.

Kishte pasur një nisje të rreme katër ditë më parë, kur presidenti Trump kishte dhënë miratimin, por u vendos të pritej për mot më të mirë dhe më pak mbulim me re.
“Gjatë javëve të Krishtlindjeve dhe Vitit të Ri, burrat dhe gratë e ushtrisë së Shteteve të Bashkuara qëndruan gati, duke pritur me durim që të plotësoheshin kushtet e duhura dhe presidenti të na urdhëronte të vepronim”, tha shefi më i lartë ushtarak i vendit, gjenerali Dan Caine, në një konferencë shtypi.

“Fat të mbarë dhe Zoti ju ndihmoftë”

Urdhri nga presidenti për të nisur misionin erdhi më në fund në orën 22:46 EDT të së premtes.
“Do ta bënim këtë katër ditë më parë, tre ditë më parë, dy ditë më parë, dhe pastaj papritur u hap mundësia. Dhe thamë: Shkoni”, tha vetë Trump për Fox & Friends dje pak orë pas operacionit të natës.

“Ai na tha, dhe ne e vlerësojmë këtë… fat të mbarë dhe Zoti ju ndihmoftë”, tha gjenerali Caine.

Urdhri i Trump erdhi pak para mesnatës në Karakas, duke i dhënë ushtrisë pjesën më të madhe të natës për të operuar në errësirë.

Ajo që pasoi ishte një mision dy orë e njëzet minuta nga ajri, toka dhe deti, që befasoi shumëkënd në Uashington dhe në mbarë botën.

Për nga shkalla dhe saktësia, ai ishte praktikisht i paprecedentë. Dhe shkaktoi menjëherë dënime nga disa fuqi rajonale, me presidentin e Brazilit, Luiz Inacio Lula da Silva, që tha se kapja e dhunshme e udhëheqësit të Venezuelës vendoste “edhe një precedent jashtëzakonisht të rrezikshëm për të gjithë komunitetin ndërkombëtar”.

Trump nuk e ndoqi misionin nga salla e situatave në Shtëpinë e Bardhë. Në vend të kësaj, ai ishte i rrethuar nga këshilltarët e tij në klubin Mar-a-Lago në Palm Beach, Florida, ku ndoqi një transmetim të drejtpërdrejtë të operacionit, i shoqëruar nga drejtori i CIA-s, John Ratcliffe dhe sekretari i Shtetit, Marco Rubio.

“Ishte diçka e pabesueshme për t’u parë”, tha dje Trump. “Nëse do ta kishit parë çfarë ndodhi… e pashë fjalë për fjalë sikur po shikoja një shfaqje televizive. Dhe nëse do të kishit parë shpejtësinë, dhunën… ishte thjesht diçka e jashtëzakonshme, një punë e mrekullueshme që bënë këta njerëz”.

Në muajt e fundit, mijëra trupa amerikane janë dislokuar në rajon, duke iu bashkuar një aeroplanmbajtëseje dhe dhjetëra anijeve luftarake në grumbullimin më të madh ushtarak në dekada, ndërsa presidenti Trump ka akuzuar Maduron për trafik droge dhe narko-terrorizëm, si dhe ka shkatërruar dhjetëra varka të vogla të akuzuara për transport droge në rajon.

Por shenjat e para të operacionit  u shfaqën në qiell. Sipas zyrtarëve amerikanë, më shumë se 150 avionë përfshirë bombardues, avionë luftarakë dhe mjete zbulimi  u angazhuan gjatë natës.

“Ishte shumë komplekse, jashtëzakonisht komplekse, e gjithë manovra, uljet, numri i avionëve”, tha Trump për Fox News. “Kishim një avion luftarak për çdo situatë të mundshme”.

Shpërthime të forta u dëgjuan në Karakas rreth orës 02:00 me orën lokale, dhe re tymi u panë duke u ngritur mbi qytet.

“Dëgjova një zhurmë të madhe, një shpërthim të fortë”, tha një gazetare, Ana Vanessa Herrero. “I lëvizi të gjitha dritaret. Menjëherë pas kësaj pashë një re të madhe tymi që pothuajse bllokoi të gjithë pamjen”.

“Avionë dhe helikopterë po fluturonin kudo mbi qytet”, tha ajo.

Së shpejti, në rrjetet sociale nisën të qarkullonin gjerësisht video që tregonin avionë të shumtë në qiell dhe të tjera që tregonin pasojat e dukshme të shpërthimeve.

Njëra tregonte një kolonë helikopterësh që fluturonin në lartësi të ulët mbi Karakas, ndërsa tymi ngrihej nga shpërthime të dukshme.

“U zgjuam rreth orës 01:55 nga gjëmimi i shpërthimeve dhe zhurma e avionëve që fluturonin mbi Karakas”, tha një dëshmitare, Daniela. “Gjithçka u zhyt në errësirë të plotë, e ndriçuar vetëm nga shkëndijat e shpërthimeve aty pranë”.

“Fqinjët po shkruanin në grupin e bisedave të pallatit, të gjithë të hutuar dhe të pavetëdijshëm se çfarë po ndodhte, [dhe] të frikësuar nga shpërthimet”, shtoi ajo.

Një numër videosh tregojnë shpërthime, zjarr dhe tym në zona të ndryshme të Karakasit.

Deri tani janē konfirmuar pesë lokacione, të goditura gjatë sulmeve, përfshirë Bazën Ajrore “Generalissimo Francisco de Miranda”, një fushë ajrore të njohur si “La Carlota:, dhe portin La Guaira, korridori kryesor i Karakasit drejt Detit Karaibe.

Disa nga goditjet amerikane kishin në shënjestër sisteme të mbrojtjes ajrore dhe objektiva të tjera ushtarake, thanë zyrtarët.

Presidenti Trump sugjeroi gjithashtu se SHBA-ja i ndërpreu energjinë elektrike Karakasit përpara nisjes së misionit, megjithëse nuk specifikoi se si.

“Dritat e Karakasit u fikën kryesisht falë një ekspertize të caktuar që ne kemi”, tha ai. “Ishte errësirë dhe ishte vdekjeprurëse.”

“Ata e dinin se po vinim”

Ndërsa goditjet tronditnin Karakasin, forcat amerikane u futën në qytet. Ato përfshinin anëtarë të njësisë elitare “Delta Force,” njësia më e lartë e misioneve speciale të ushtrisë amerikane. Ata ishin të armatosur rëndë dhe mbanin edhe një pishtar prerës, në rast se do t’u duhej të prisnin dyert metalike të shtëpisë së sigurt të Maduros.

Sipas gjeneralit Caine, trupat mbërritën në vendndodhjen e Maduros pak pasi nisën goditjet, në orën 02:01 me orën lokale.

Trump e përshkroi shtëpinë e sigurt si një “fortesë” ushtarake në zemër të Karakasit.
“Ata ishin në pozicion gati duke na pritur. E dinin që po vinim”, tha ai.

Trupat u qëlluan sapo mbërritën, dhe një nga helikopterët amerikanë u godit, por arriti të vazhdonte fluturimin.
“Forcat amerikane zbritë në kompleksin e Maduros dhe vepruan me shpejtësi, saktësi dhe disiplinë”, tha gjenerali Caine.

“Ata thjesht hynë me forcë, dhe hynë në vende që realisht nuk ishin menduar të hapeshin, dyer çeliku të vendosura pikërisht për këtë arsye”, tha Trump.

Vetëm ndërsa operacioni po zhvillohej dhe që përfshiu edhe kapjen e bashkëshortes së Maduros, Cilia Flores sekretari i Shtetit Rubio filloi të njoftonte ligjvënësit për veprimin, një vendim që ka shkaktuar zemërim te disa anëtarë të Kongresit.

“Le të jem i qartë; Nicolas Maduro është një diktator i paligjshëm. Por nisja e një veprimi ushtarak pa autorizimin e Kongresit dhe pa një plan të besueshëm për atë që vjen më pas është e pamatur”, tha demokrati kryesor Chuck Schumer, udhëheqësi i partisë në Senat.

Njoftimi paraprak i Kongresit do ta kishte rrezikuar misionin, u tha gazetarëve Rubio gjatë konferencës për shtyp të së shtunës.
“Kongresi ka një prirje për të rrjedhur informacione”, shtoi Trump. “Kjo nuk do të ishte gjë e mirë”.

Në kompleksin e Maduros, ndërsa trupat elitare amerikane po hynin me shpejtësi, Trump tha se presidenti venezuelia, i cili thuhet se në muajt e fundit ka rritur mbështetjen te truprojat kubane, u përpoq të arratisej drejt një dhome të sigurt.
“Ai po përpiqej të shkonte në një vend të sigurt, i cili nuk ishte i sigurt, sepse do ta kishim hedhur në erë derën për rreth 47 sekonda”, tha ai.

“Ai arriti te dera. Nuk arriti ta mbyllte”, tha Trump. “U sulmua aq shpejt sa nuk arriti të futej në atë dhomë”.

Kur u pyet nëse SHBA-ja mund ta kishte vrarë Maduron, një udhëheqës autoritar që mori presidencën në vitin 2013, nëse ai do t’i kishte rezistuar arrestimit, Trump tha se kjo “mund të kishte ndodhur”.

Nga pala amerikane, “disa djem u plagosën”, tha ai, por asnjë ushtar amerikan nuk u vra.

Autoritetet venezueliane nuk kanë konfirmuar viktima.

SHBA-ja kishte ofruar më parë një shpërblim prej 50 milionë dollarësh për informacion që do të çonte në arrestimin e Maduros. Por deri në orën 04:20 me orën  lokale të së shtunës, helikopterët po largoheshin nga territori venezuelian me Maduron dhe bashkëshorten e tij në bord, nën kujdesin e Departamentit të Drejtësisë dhe në rrugë drejt Nju Jorkut, ku pritet të përballen me akuza penale.

Pothuajse saktësisht një orë më vonë, Trump njoftoi botën për kapjen e tij.

“Maduro dhe gruaja e tij së shpejti do të përballen me gjithë fuqinë e drejtësisë amerikane”, përfundoi ai. /Ad.Ab./

The post ANALIZË – Spiunë, dronë dhe pishtarë prerës: si e kapi SHBA presidentin Maduro appeared first on Agjencia Telegrafike Shqiptare.

AMSTERDAM, 4 janar /ATSH -DPA/ – Dëbora dhe akulli po shkaktojnë ndërprerje të rënda të trafikut ajror në aeroportin Schiphol të Amsterdamit gjatë fundjavës.
Ashtu si të premten, të shtunën edhe sot  ka vonesa dhe anulime të shumta fluturimesh për shkak të kushteve dimërore dhe nevojës për shkrirjen e akullit të avionëve, njoftoi aeroporti.

Vetëm linja ajrore holandeze KLM anuloi dje mbi 200 fluturime, ndërsa sot pritet të anulohen pothuajse 300 fluturime, raportoi agjencia holandeze e lajmeve ANP duke cituar KLM-në.

Ndërkohë, pati gjithashtu ndërprerje dhe anulime në qarkullimin rrugor dhe hekurudhor në Holandë.

Autoritetet u bënë thirrje qytetarëve të tregojnë kujdes. /Ad.Ab./

The post HOLANDÊ – Moti i keq paralizon aeroportin Schipol, qindra fluturime të anulluara appeared first on Agjencia Telegrafike Shqiptare.

NEVADA, 4 janar /ATSH/ –
Astronomët kanë njoftuar se mund të kenë gjetur dëshmi për ekzistencën e një planeti të nëntë në sistemin tonë diellor, shumë përtej orbitës së Neptunit, sipas “Sciencealert”.

Zbulimi bazohet në analiza të të dhënave infra të kuqe të mbledhura dekada më parë, të cilat tregojnë praninë e një objekti të madh dhe shumë të ftohtë që lëviz ngadalë në hapësirë.

Objekti i dyshuar është identifikuar duke krahasuar të dhëna nga sateliti amerikan IRAS i vitit 1983 dhe misioni japonez AKARI i vitit 2006.

Në këto të dhëna u vu re një sinjal i dobët termik që kishte ndryshuar pozicion me kalimin e 28 viteve, një tregues i mundshëm i një orbite rreth Diellit.

Sipas vlerësimeve, ky trup qiellor mund të ndodhet në një distancë prej 500 deri në 700 njësish astronomike nga Dielli, duke e bërë atë jashtëzakonisht të largët.

Nëse konfirmohet si planet, ai mund të ketë një masë 7 deri në 17 herë më të madhe se ajo e Tokës dhe një temperaturë ekstreme shumë nën zero, çka shpjegon pse është kaq i vështirë për t’u zbuluar.

Ky zbulim lidhet ngushtë me misteret e Kuiper Belt, një rajon përtej Neptunit i mbushur me trupa akullnajorë.

Prej vitesh, astronomët kanë vërejtur se disa prej këtyre objekteve kanë orbita të çuditshme dhe të grupuara, gjë që sugjeron ndikimin gravitacional të një planeti të madh të padukshëm.

Karakteristikat e planetit të mundshëm e afrojnë atë me Uranin dhe Neptunin, të ashtuquajturit gjigantë akullnajorë, të cilët kanë atmosfera të pasura me hidrogjen, helium dhe metan.

Për shkak të distancës dhe temperaturës së ulët, teleskopët infra të kuqe mbeten mjeti kryesor për zbulimin e tij.

Megjithatë, shkencëtarët theksojnë se provat aktuale nuk janë ende përfundimtare.

Nevojiten vëzhgime të reja dhe të vazhdueshme për të konfirmuar lëvizjen orbitale të objektit dhe për të përjashtuar mundësinë që ai të jetë një burim i largët në sfond.

Nëse konfirmohet, ky zbulim do të ndryshonte ndjeshëm kuptimin tonë për strukturën e sistemit diellor dhe do të rikthente zyrtarisht idenë se Dielli ynë ka nëntë planetë, duke hapur një kapitull të ri në astronomi. /Ad.Ab./

The post HAPËSIRË – Dëshmi të reja për planetin e nëntë në sistemin diellor appeared first on Agjencia Telegrafike Shqiptare.

MJEKËSI – Një proteinë LONDËR, 4 janar /ATSH/ – Proteinat që qarkullojnë në gjak po shndërrohen në një mjet kyç për të kuptuar më mirë sëmundjet kronike. Ndryshe nga gjenet, të cilat tregojnë rreziqe të trashëguara, proteinat ofrojnë informacion në kohë reale për proceset që ndodhin në organizëm, përfshirë mënyrën si trupi rregullon energjinë dhe zhvillon sëmundje si diabeti apo problemet kardiovaskulare, sipas “The Independent”.

Një studim i ri, i botuar në revistën “Circulation: Genomic and Precision Medicine” ka analizuar lidhjen mes proteinave të gjakut dhe shëndetit të zemrës. Studiuesit shqyrtuan mbi 45 mijë mostra gjaku nga databaza britanike UK Biobank, duke matur nivelet e disa proteinave që ndikojnë drejtpërdrejt në presionin e gjakut dhe funksionin e zemrës.

Rezultatet treguan se nivelet e këtyre proteinave ndryshojnë ndjeshëm nga një individ te tjetri, në varësi të moshës, gjinisë, stilit të jetesës, përdorimit të barnave dhe prejardhjes.

Kjo përforcon idenë se trajtimet standarde nuk funksionojnë njësoj për të gjithë dhe se mjekësia duhet të bëhet më e personalizuar.

Vëmendje të veçantë mori proteina ACE2, e njohur gjerësisht gjatë pandemisë COVID-19. Përveç rolit të saj në infeksionet virale, ACE2 ndihmon në relaksimin e enëve të gjakut duke neutralizuar substanca që shkaktojnë ngushtimin e tyre, çka kontribuon në uljen e presionit arterial.

Tek personat me presion të lartë të gjakut ose diabet të tipit 2, nivelet e ACE2 rezultuan më të larta, veçanërisht te gratë.

Sipas studiuesve, ky mund të jetë një mekanizëm mbrojtës i organizmit, një përpjekje natyrore për të kundërshtuar efektet e këtyre sëmundjeve.

Ky zbulim mund të ndikojë në mënyrën se si përdoren barnat për hipertensionin.

Aktualisht, shumë terapi fokusohen në bllokimin e proteinës ACE1, ndërsa ACE2 vepron në drejtim të kundërt. Balanca mes këtyre dy proteinave mund të përcaktojë se cili trajtim është më efektiv për secilin pacient.

Studiuesit sugjerojnë se në të ardhmen, rritja e kontrolluar e niveleve të ACE2, përmes barnave ekzistuese si metformina apo terapive të reja, mund të hapë rrugë për trajtime më të sigurta dhe më efikase të presionit të gjakut dhe diabetit. /Ad.Ab./

The post MJEKËSI – Një proteinë në gjak mund të hapë rrugë të reja për trajtimin e presionit të gjakut dhe diabetit appeared first on Agjencia Telegrafike Shqiptare.

STAMBOLL, 31 dhjetor /ATSH-AA/ – Presidenti turk, Recep Tayyip Erdogan, deklaroi se Turqia nuk do ta tolerojë dhunën, piraterinë apo kërcënimet ndaj interesave të saj dhe të popullit turk qipriot në Mesdheun Lindor.

Në një mesazh të Vitit të Ri, ai theksoi se Ankaraja monitoron nga afër çdo provokim dhe do të veprojë për të mbrojtur atdheun blu të saj.

Erdogan u shpreh optimist për zhvillimet ekonomike, duke vënë në dukje përparimin në procesin e dezinflacionit, forcimin e rezervave të Bankës Qendrore dhe rritjen e prodhimit, investimeve, punësimit dhe eksportit.

Ai gjithashtu përmendi projektin e madh të banesave sociale, që synon të ndihmojë qytetarët me të ardhura të ulëta dhe të ulë çmimet e banesave.

Presidenti kujtoi gjithashtu dëmet nga tërmetet e 6 shkurtit 2023 dhe përparimin e bërë në rindërtimin e qyteteve të goditura, duke falënderuar punëtorët dhe bamirësit që kontribuan në këtë proces.

Në aspektin rajonal, Erdogan nënvizoi mbështetjen e Turqisë për Sirinë dhe Gazën, duke theksuar kthimet vullnetare të sirianëve dhe përpjekjet për ndihmë humanitare në Gaza, si dhe rolin e Ankarasë në ruajtjen e armëpushimit dhe fillimin e rindërtimit.

Ai gjithashtu foli për përparimin e procesit të “Turqisë pa terror” dhe për bashkëpunimin e Aleancës Popullore, duke theksuar se qeveria do të bëjë gjithçka për të siguruar suksesin e këtij procesi.

Erdogan përfundoi mesazhin me një falënderim për qytetarët dhe mbështetësit e vizionit të Shekullit të Turqisë, duke uruar një Vit të Ri të begatë për vendin, rajonin dhe gjithë njerëzimin./  /Ad.Ab./ a.jor.

The post TURQI – Erdogan: Nuk do të tolerojmë provokime dhe kërcënime në Mesdheun Lindor appeared first on Agjencia Telegrafike Shqiptare.

VILNIUS, 31 dhjetor /ATSH-DPA/ –  Lituania planifikon të blejë sisteme portative të mbrojtjes ajrore “RBS 70 NG” me vlerë mbi 320 milionë euro (375 milionë dollarë), për të forcuar kapacitetet e saj mbrojtëse, njoftoi sot Ministria e Mbrojtjes.

Sipas deklaratave të ministrisë dhe kompanisë suedeze “Saab”, me të cilën është nënshkruar kontrata, marrëveshja, së bashku me kontrata të mëparshme, garanton furnizim të vazhdueshëm të Forcave të Armatosura të Lituanisë me këtë armatim për periudhën 2026–2032.

“Forcimi i mbrojtjes ajrore është një nga prioritetet tona kryesore”, deklaroi ministri i Mbrojtjes, Robertas Kaunas.

Lituania tashmë disponon sisteme “RBS 70”, një sistem i mbrojtjes ajrore me rreze të shkurtër veprimi, i cili lejon goditje efektive të objektivave ajrore si ditën ashtu edhe natën.

Sipas ministrisë, ky sistem u zgjodh për shkak të mirëmbajtjes së lehtë, lëvizshmërisë së lartë dhe avantazheve të tjera teknike.

Qeveria kishte njoftuar para Krishtlindjeve se planifikonte të blinte gjithashtu municione antitank dhe granatahedhës njëpërdorimësh, po ashtu nga kompania “Saab”.

Lituania, e cila kufizohet me enklavën ruse të Kaliningradit dhe me Bjellorusinë, aleate të Rusisë, e sheh luftën e Kremlinit në Ukrainë si një kërcënim të drejtpërdrejtë.

Që nga nisja e pushtimit të plotë rus të Ukrainës në vitin 2022, Vilniusi dhe kryeqytetet e tjera baltike kanë rritur ndjeshëm kapacitetet e tyre mbrojtëse.

Lituania pritet të shpenzojë vitin e ardhshëm 5,38% të prodhimit të brendshëm bruto për mbrojtjen./  /Ad.Ab./ a.jor.

The post VILNIUS – Lituania blen raketa suedeze për mbrojtje ajrore appeared first on Agjencia Telegrafike Shqiptare.

KIEV, 31 dhjetor /ATSH-DPA/ – Dronë ukrainas kanë goditur dhe i kanë vënë flakën një depoje të madhe karburanti në rajonin Yaroslavl në verilindje të Moskës, thanë sot zyrtarët e shërbimit sekret në Kiev.

”Terminali ‘Temp’ në qytetin e Rybinskut është pjesë e rezervave strategjike të Rusisë dhe sulmi kishte në shënjestër asetet thelbësore për pushtimin e Ukrainës nga Moska”, tha shërbimi sekret SBU.

“SBU vazhdon të prishë zinxhirët e furnizimit të produkteve ruse të naftës si jashtë vendit ashtu edhe për trupat që sulmojnë Ukrainën me saktësi kirurgjikale”, citoi agjencia e lajmeve Ukrinform një zyrtar të paidentifikuar.

Agjencia publikoi një video që tregonte një zjarr të madh pas shtëpive të mbuluara me borë, megjithëse vendndodhja e saktë nuk mund të identifikohej.

Nuk pati asnjë koment nga pala ruse mbi raportin ukrainas. Yaroslavl ndodhet rreth 280 kilometra në verilindje të Moskës dhe më shumë se 800 kilometra nga Ukraina.

Dronët ukrainas sulmuan gjithashtu sot objektiva të tjerë brenda Rusisë.

”Në rajonin jugor të Krasnodarit, një zjarr shpërtheu në rafinerinë e naftës në portin Tuapse të Detit të Zi, sipas stafit operativ lokal. Zjarri u shua”, thanë zyrtarët./ /Ad.Ab./ a.jor.

The post KIEV – Ukraina sulmon me dronë terminalin e naftës në veri të Moskës appeared first on Agjencia Telegrafike Shqiptare.

ATHINË, 31 dhjetor /ATSH-ANA/ – Një takim mbarëkombëtar i fermerëve të sektorit parësor do të mbahet të dielën, më 4 janar, në orën 12:00, në Malgara, për të vendosur hapat e radhës të mobilizimeve të tyre.

Lajmin e bëri të ditur Kostas Rouzios, përfaqësues i një shoqate fermerësh në Selanik.

Takimi do të zhvillohet në ambientet e Qendrës Kulturore të Malgaras.

Ndërkohë, fermerët vazhdojnë të qëndrojnë në bllokadat në Thesalinë perëndimore, ndërsa në rrjetin rrugor kombëtar janë vendosur devijime të qarkullimit për të lehtësuar lëvizjen e udhëtarëve gjatë festave.

Policia greke publikoi një njoftim lidhur me bllokadat e fermerëve, duke informuar për devijimet e trafikut dhe duke sugjeruar rrugë alternative për qytetarët që udhëtojnë në aksin Athinë–Selanik. Gjithashtu, Policia ka publikuar edhe një video nga autostrada Athinë–Lamia, ku shfaqet bllokada e fermerëve në zonën e Kastro-Beotisë. /Ad.Ab./ a.jor.

The post GREQI – Fermerët protestues në takim mbarëkombëtar appeared first on Agjencia Telegrafike Shqiptare.

BANGKOK, 31 dhjetor /ATSH-AFP/ – Një mace me kokë të sheshtë, një specie shumë e rrallë felini e konsideruar si “ndoshta e zhdukur” në Tajlandë, është filmuar nga kamera-kurth në një sanktuar të jetës së egër në jug të vendit, gati tri dekada pas shikimit të fundit.

Lajmi u bë i ditur të  nga autoritetet e zonave të mbrojtura dhe nga organizata joqeveritare për ruajtjen e felinëve, “Panthera”.

Macet me kokë të sheshtë, që kanë madhësinë e një maceje shtëpiake, renditen ndër felinët e egër më të rrallë dhe më të rrezikuar në botë.

Kjo specie, e përhapur në Azinë Juglindore, kërcënohet seriozisht nga humbja e habitatit natyror.

Sipas Departamentit tajlandez të Parqeve Kombëtare, Jetës së Egër dhe Bimësisë, si dhe organizatës “Panthera”, një studim ekologjik i nisur në vitin 2024 ka regjistruar 29 vëzhgime përmes kamerave-kurth.

“Ky rizbulim është njëkohësisht emocionues dhe shqetësues”, tha Kaset Sutasha, veteriner dhe studiues në Universitetin Kasetsart, duke theksuar se fragmentimi i habitatit e ka bërë këtë specie gjithnjë e më të “izoluar”.

Ende nuk është e mundur të përcaktohet numri i saktë i individëve, pasi kjo specie nuk ka shenja dalluese të qarta, gjë që e vështirëson numërimin.

”Megjithatë, vëzhgimet sugjerojnë një përqendrim relativisht të lartë të maceve me kokë të sheshtë”, deklaroi Rattapan Pattanarangsan, përgjegjës i programit të ruajtjes në Panthera.

Pamjet tregojnë një femër me kotelen e saj – një shenjë e rrallë dhe inkurajuese për këtë specie, e cila zakonisht lind vetëm një kotele në çdo herë.

Sipas Unionit Ndërkombëtar për Ruajtjen e Natyrës (IUCN), në mbarë botën kanë mbetur rreth 2 500 mace me kokë të sheshtë.

Në Tajlandë, kjo specie ishte klasifikuar si e zhdukur./  /Ad.Ab./  a.jor.

The post Rizbulim i rrallë në Tajlandë i një maceje kokësheshtë, e konsideruar e zhdukur appeared first on Agjencia Telegrafike Shqiptare.

BAGDAD, 31 dhjetor /ATSH-DPA/ – Iraku njoftoi sot se do të marrë në dorëzim javën e ardhshme një strukturë të rëndësishme ushtarake nga aleanca globale e udhëhequr nga Shtetet e Bashkuara, e angazhuar në luftën kundër terroristëve të Shtetit Islamik (IS), një çështje që prej kohësh ka qenë burim polemikash në vend.

Zëvendëskomandanti i Komandës së Përbashkët të Operacioneve të Irakut, gjenerallejtënant Qais al-Muhammadawi, deklaroi se koalicioni anti-IS do t’ia dorëzojë forcave irakiane të sigurisë bazën ushtarake “Ain al-Asad” në Irakun perëndimor.

“Do të ketë marrëveshje dypalëshe mes Bagdadit dhe disa vendeve anëtare të aleancës, përfshirë SHBA-në, Francën dhe Britaninë e Madhe”, shtoi ai.

”Baza ‘Ain al-Asad’ do të shohë javën e ardhshme një tërheqje të plotë dhe do t’u dorëzohet forcave tona irakiane”, tha al-Muhammadawi në një konferencë për shtyp në Bagdad.

“Kjo është një arritje që lidhet me kapacitetet irakiane, sovranitetin e Irakut, si dhe me mirëkuptimin me SHBA-në dhe vendet e tjera të aleancës për ta shndërruar misionin në memorandume dypalëshe për shkëmbim ekspertize dhe informacioni, si edhe për trajnim”, theksoi ai, pa dhënë detaje të mëtejshme.

Iraku po shqyrton nënshkrimin e marrëveshjeve të sigurisë me SHBA-në pas tërheqjes së forcave të saj drejt rajonit autonom të Kurdistanit irakian, raportoi sot televizioni saudit al-Hadath, duke cituar burime të paidentifikuara.

Muajt e fundit, milicitë irakiane të afërta me Iranin kanë bërë thirrje të përsëritura për largimin e trupave amerikane nga vendi.

E vendosur në provincën perëndimore al-Anbar, baza “Ain al-Asad” ka qenë disa herë objekt sulmesh nga grupe irakiane të lidhura me Iranin.

Forcat amerikane vazhdojnë të jenë të dislokuara pranë aeroportit të Bagdadit dhe në bazën ajrore të Erbilit, në Kurdistanin irakian. /Ad.Ab./ a.jor.

The post BAGDAD – Iraku merr bazën “Ain al-Asad” pas tërheqjes së koalicionit nën drejtimin amerikan appeared first on Agjencia Telegrafike Shqiptare.

SIDNEJ, 31 dhjetor /ATSH-DPA/ – Qytete të mëdha aziatike e pritën Vitin e Ri 2026 me kambana, fishekzjarrë dhe ceremoni tradicionale, ndërsa festimet nisën nga Paqësori Jugor dhe u shtrinë gradualisht në mbarë botën.

Singapori, Pekini, Tokio dhe Seuli ishin ndër qytetet që hynë në vitin e ri, secili me mënyrën e vet të festimit.

Në Pekin u organizua një shfaqje spektakolare dritash, ndërsa daullet shoqëruan pritjen e Vitit të Kalit të Zjarrit.

Në Hong Kong, ndërrimi i viteve u shënua më qetë, pasi fishekzjarrët tradicionalë mbi portin ”Victoria” u anuluan pas një zjarri vdekjeprurës në muajin nëntor.

Ndërkohë, në Singapor qielli mbi ”Marina Bay” u ndriçua nga fishekzjarrët, me horizontin e qytetit që krijoi një pamje mbresëlënëse.

Japoni dhe Koreja e Jugut u përqendruan te ritualet tradicionale të rënies së kambanave, ndërsa në Seul valltarë dhe ceremoni kulturore shënuan ardhjen e vitit 2026.

Në Tajlandë, lumi Chao Phraya në Bangkok ishte në qendër të festimeve në mesnatë.

Në Australi, Sidnej e priti Vitin e Ri me një shfaqje madhështore fishekzjarrësh mbi Urën e Portit dhe Shtëpinë e Operës, por edhe me një moment reflektimi.

Qyteti përkujtoi viktimat e sulmit të fundit në plazhin Bondi, me një minutë heshtjeje dhe mesazhe paqeje e uniteti të ndriçuara mbi urë.

Festimet në vetë plazhin Bondi u anuluan në shenjë respekti.

Ishujt e Paqësorit Jugor ishin të parët që hynë në vitin 2026. Banorët e Kiritimatit e pritën Vitin e Ri në mesnatë sipas orës lokale, të ndjekur pak minuta më vonë nga Ishujt Chatham të Zelandës së Re.

Më pas, Zelanda e Re, Samoa dhe Tonga shënuan ndërrimin e viteve me fishekzjarrë dhe shfaqje dritash.

Në Zelandën e Re, vëmendja u përqendrua te Auckland, ku Kulla Sky Tower u ndriçua nga shfaqje të veçanta, si dhe në kryeqytetin Wellington.

Ndërkohë, Samoa Amerikane, në anën tjetër të Vijës Ndërkombëtare të Datës, pritet të jetë vendi i fundit i banuar në botë që do të hyjë në vitin 2026./   /Ad.Ab./ a.jor.

The post FOKUS – Singapori, Pekini, Tokio dhe Seuli presin 2026-n me kambana, fishekzjarrë dhe ceremoni tradicionale appeared first on Agjencia Telegrafike Shqiptare.

PARIS, 31 dhjetor /ATSH-AA/ -Franca do të shqyrtojë në janar një projektligj që synon të ndalojë mediet sociale për fëmijët nën 15-vjeç dhe telefonat celularë, raportoi sot “FranceInfo”. 

Këshilli i Shtetit do të shqyrtojë projektligjin më 8 janar me qëllim ndalimin e aksesit në mediat sociale për të rinjtë nën moshën 15-vjeç dhe ndalimin e përdorimit të telefonave celularë në shkollat ​​e mesme duke filluar nga viti i ri shkollor, që do të thotë shtatori 2026.

Sipas burimeve qeveritare, projektligji është hartuar në një mënyrë që siguron se është në përputhje me ligjin evropian, ndryshe nga një përpjekje e mëparshme që dështoi.

Në nëntor, presidenti francez Emmanuel Macron tha se dëshiron ta zgjerojë ndalimin e përdorimit të telefonave celularë në shkollat ​​e mesme që nga fillimi i vitit shkollor 2026-2027 dhe të vendos një ndalim të medieve sociale për të rinjtë nën 15 ose 16-vjeç.

Ndalimi i telefonave celularë ka qenë tashmë në fuqi nga kopshti deri në shkollën e mesme sipas një ligji të vitit 2018, megjithëse ndonjëherë ka rezultuar i vështirë për t’u zbatuar.

Shumë studime akademike kanë dokumentuar rreziqet për shëndetin mendor të përdorimit të mediave sociale nga të rinjtë si dhe rreziqet e shpërqendrimit nga telefonat celularë tek adoleshentët./  /Ad.Ab./  a.jor.

The post PARIS – Edhe Franca do të ndalojë mediet sociale për nën 15-vjeçarët appeared first on Agjencia Telegrafike Shqiptare.

HELSINKI, 31 dhjetor /ATSH/ – Autoritetet finlandeze kanë ndaluar një anije të dyshuar për dëmtimin e një kablli nëndetar të telekomunikacionit që lidh Helsinkin me Talinin, njoftoi policia, sipas “The Guardian”.

Kompania e telekomunikacionit “Elisa” raportoi sot në mëngjes një defekt në kabllin që ndodhet në Gjirin e Finlandës.

Pas sinjalizimit, rojat bregdetare lokalizuan një anije në zonën ekonomike ekskluzive të Finlandës, e cila dyshohet se e ka shkaktuar dëmtimin më herët në ujërat e Estonisë.

Sipas autoriteteve, zinxhiri i spirancës së anijes ishte i lëshuar në ujë.

Anija u shoqërua drejt një vendankorimi të sigurt në ujërat territoriale finlandeze dhe u vu nën kontroll.

Policia po heton çështjen për dëmtim të rënduar të pronës, tentativë për dëmtim të rënduar dhe ndërhyrje në telekomunikacion.

Autoritetet finlandeze janë në kontakt të ngushtë me palën estoneze.

Presidenti i Finlandës, Alexander Stubb, deklaroi se vendi është i përgatitur për sfida të ndryshme sigurie dhe se situata po monitorohet nga afër.

Incidenti ndodh në një kontekst tensioni të shtuar në detin Baltik, ku që prej fillimit të luftës në Ukrainë janë regjistruar disa raste dëmtimi të kabllove dhe infrastrukturës kritike, të cilat ekspertët i lidhin me veprime të ashtuquajtura të luftës hibride./  /Ad.Ab./ a.jor.

The post HELSINKI – Finlanda ndalon një anije të dyshuar, pas dëmtimit të një kablli nëndetar appeared first on Agjencia Telegrafike Shqiptare.

BERLIN, 30 dhjetor /ATSH-DPA/ – Ministri gjerman i Mbrojtjes, Boris Pistorius dënoi ashpër sot një sërë shkeljesh të rënda disiplinore të zbuluara në një nga regjimentet elitare të parashutistëve të vendit.

”Rastet e raportuara të ekstremizmit të djathtë, sjelljeve seksuale të papërshtatshme dhe përdorimit të drogës në Zweibrucken janë tronditëse”, tha Pistorius.

Sipas tij, këto veprime bien në kundërshtim të hapur me vlerat themelore të Bundeswehr-it, Forcave të Armatosura të Gjermanisë.

Ushtria njoftoi se ka shkarkuar disa ushtarë pas hetimeve për Regjimentin e Parashutistëve 26, i vendosur në qytetin Zweibrucken, në landin perëndimor Rheinland-Pfalz, dhe ka paralajmëruar masa të tjera.

Ndërkohë, prokuroria po heton 19 ushtarë.

Megjithatë, Pistorius shprehu pakënaqësi me mënyrën se si udhëheqja lokale ushtarake reagoi fillimisht ndaj rasteve të raportuara.

Edhe pse hetimi u nis menjëherë dhe çështja u sqarua plotësisht me pasoja të rënda, sipas tij pati mangësi.

”Ajo që është e papranueshme është fakti se sjelljet e gabuara duket se nuk u njohën menjëherë si të tilla në terren dhe për këtë arsye nuk u ndoqën me konsistencën e nevojshme. Kjo duhet të përjashtohet”, tha Pistorius.

Ministri falënderoi Inspektorin e Ushtrisë, gjenerallejtnant Christian Freuding, për ndërmarrjen e menjëhershme të masave për të parandaluar vazhdimin e shkeljeve.

“Freuding do t’i përmbledhë këto masa në një plan veprimi për forcat ajrore-desantuese dhe do të sigurojë zbatimin e tyre”, shtoi Pistorius.

‘Prioriteti im tani është, së pari, të sigurohem që incidentet individuale të vazhdojnë të hetohen plotësisht; së dyti, nëse akuzat e tjera konfirmohen, që rastet të ndëshkohen me të gjithë forcën e ligjit dhe së treti, të rikthehet besimi te udhëheqja ushtarake në terren”, përfundoi ministri./ /Ad.Ab./

The post BERLIN – Pistorius: Shkeljet në repartin elitar ushtarak gjerman janë tronditëse appeared first on Agjencia Telegrafike Shqiptare.

KOPENHAGË, 30 dhjetor /ATSH/ – Një tunel masiv po ndërtohet nën detin Baltik duke premtuar të transformojë rrjetin e transportit në Evropë, sipas the “Independent”.

Projekti, që ka zgjatur për disa vjet dhe është më i madh se sa pritej, po kalon një moment kritik.

Tuneli ”Fehmarnbelt”, që pritet të hapet në 2029 do të shtrihet për 18 kilometrra midis Rodbyhavn në Danimarkë dhe Puttgarden në Gjermani.

”Kur të përfundojë, ai do të jetë tuneli më i gjatë nënujor në botë dhe kombinimi më i madh për rrugë dhe hekurudhë”, sipas kompanisë shtetërore daneze “Femern A/S”, që menaxhon projektin.

Ndryshe nga, tuneli i La Manshit, ”Fehmarnbelt” nuk po gërryhet përmes shkëmbit, por po ndërtohet me teknikën e zhytjes. Kjo përfshin prodhimin e elementeve të mëdha betoni, secili 217 metra i gjatë dhe rreth 73 000 tonë.

Pasi të jenë përfunduar, ato lundrojnë, zhyten në një gropë të përgatitur në fundin e detit dhe lidhen me saktësi të lartë.

Tuneli do të ketë dy linja hekurudhore të elektrizuara dhe një rrugë me dy korsi si dhe një korridor shërbimi për mirëmbajtje dhe emergjenca.

Ai pritet të shkurtojë ndjeshëm kohën e udhëtimit midis Kopenhagës dhe Hamburgut, duke ulur udhëtimet hekurudhore nga 4,5 në 2,5 orë dhe udhëtimet me makinë për rreth një orë.

Ky projekt është pjesë e Rrjetit të Transportit Trans-Evropian (TEN-T) dhe mbështet qëllimet e Marrëveshjes së Gjelbër Evropiane, duke zëvendësuar tragetin aktual prej 45 minutash me një lidhje hekurudhore 7-minutëshe dhe një rrugë 10-minutëshe.

Ky projekt madhor punëson aktualisht deri në 2 500 persona dhe financohet përmes kredive të garantuara nga qeveria daneze, të cilat do të shlyhen me tarifat e përdoruesve./ /Ad.Ab./

The post FOKUS – Tuneli ”Fehmarnbelt”, megaprojekti 18 kilometra nën Baltik appeared first on Agjencia Telegrafike Shqiptare.

ROMË, 30 dhjetor /ATSH-DPA/ – Parlamenti Italian miratoi sot buxhetin e vitit 2026, pas javësh negociatash dhe ndryshimesh.

Paketa financiare e koalicionit të djathtë me tre parti, e udhëhequr nga kryeministrja Giorgia Meloni, që arrin rreth 22 miliardë euro (25.9 miliardë dollarë), tani është miratuar edhe nga Dhoma e Deputetëve, e cila është dhoma e ulët e Parlamentit italian me dy dhoma.

Senati kishte dhënë miratimin e tij pak para Krishtlindjes.

Qeveria kryesuar nga Giorgia  Meloni kaloi mbrëmë një votim besimi për të përfunduar buxhetin pa ndryshime, në mënyrë që ai të hyjë në fuqi më 1 janar 2026.

Meloni planifikon të përdorë buxhetin për të ulur huamarrjen e re për vitin 2026 nën 3% të Prodhimit të Brendshëm Bruto (PBB), siç kërkojnë kriteret e stabilitetit evropian.

Italia është një nga vendet më me borxhe në Evropë.

BE-ja ka kërkuar disa herë nga Roma që të fillojë uljen e deficitit, gjë që ka bërë që qeveria Meloni të angazhohet për zbatimin e këtij objektivi në 2026.

Ndryshimet përfshijnë stimuj investimi për bizneset dhe lehtësira tatimore për punonjësit.

Norma tatimore për të ardhurat midis rreth 24 000 dhe 40 000 euro do të ulet nga 35% në 33%.

Mosha e pensionit do të rritet gradualisht në disa raste.

Masat që lidhen me taksimin e bankave dhe kompanive të sigurimeve do të kontribuojnë në financimin e buxhetit.

Buxheti parashikon gjithashtu më shumë shpenzime për mbrojtjen.

Përveç kësaj, rezervat e arit të “Banca d’Italia” do të konsiderohen pronë e popullit italian.

Sipas Bankës Qendrore Evropiane, e cila po monitoron masën nga afër, ky është një akt simbolik.

Pas votimit, Meloni e përshkroi buxhetin si një “paketë serioze dhe të përgjegjshme masash” që fokusohet në “burimet e pakta të disponueshme tek disa prioritetet themelore.”

Megjithatë, liderja e opozitës, Elly Schlein nga Partia Demokrate (PD), tha se buxheti nuk arrin të adresojë shqetësimet më të rëndësishme të italianëve dhe është i gabuar.

“Është një buxhet kursimesh që parashikon rritje zero”, tha Schlein./  /Ad.Ab./

The post ITALI – Parlamenti miraton buxhetin e diskutueshëm të vitit 2026 appeared first on Agjencia Telegrafike Shqiptare.

TEHERAN, 30 dhjetor / ATSH-DPA/ – Irani lëshoi sot një paralajmërim të ashpër si reagim ndaj kërcënimeve të presidentit amerikan Donald Trump, i cili tha se do të mbështeste sulme të mëtejshme izraelite ndaj Iranit nëse vendi refuzonte një marrëveshje të re bërthamore.

“Republika Islamike e Iranit do të përgjigjet në mënyrë të qëndrueshme ndaj çdo agresioni dhe do t’i bëjë agresorët të pendohen për veprimet e tyre”, shkroi presidenti iranian Masoud Pezeshkian në platformën sociale X.

Më parë, një këshilltar i udhëheqësit suprem Ayatollah Ali Khamenei paralajmëroi gjithashtu SHBA-në dhe Izraelin se çdo sulm do të provokonte një përgjigje të fortë iraniane.

Ali Shamkhani tha në një postim në X se Irani nuk ka nevojë për leje nga shtetet e tjera për kapacitetet e tij të raketave apo për mbrojtjen e vetvetes.

Gjatë një takimi dje me kryeministrin izraelit Benjamin Netanyahu në rezidencën e tij Mar-a-Lago në Florida, presidenti Trump tha se do të mbështeste sulme të mëtejshme izraelite ndaj Iranit nëse Teherani refuzon një marrëveshje të re bërthamore dhe vazhdon avancimin e programeve të tij raketore dhe bërthamore.

Izraeli zhvilloi luftë ndaj Iranit për 12 ditë në qershor, duke bombarduar objektiva kyç bërthamore në vend së bashku me SHBA-në.

Megjithëse u vendos një armëpushim, një zgjidhje diplomatike për konfliktin midis armiqve të përbetuar nuk duket në horizont, dhe raporte në të dy vendet kanë përhapur mundësinë e rifillimit të luftës.

Sipas informacioneve izraelite, Irani po punon intensivisht për rindërtimin e arsenaleve të tij raketore, të cilat, së bashku me programin bërthamor, konsiderohen nga Izraeli si një kërcënim i madh./  /Ad.Ab./

The post FOKUS – Irani reagon ndaj kërcënimit amerikan për sulme të tjera izraelite appeared first on Agjencia Telegrafike Shqiptare.

KIEV, 30 dhjetor /ATSH-AFP/ – Presidenti ukrainas, Volodymyr Zelensky njoftoi sot se javën e ardhshme në Francë do të zhvillohet një takim me liderët e vendeve aleate të Kievit, në kuadër të përpjekjeve diplomatike për t’i dhënë fund pushtimit rus të Ukrainës.

”Takimi, i planifikuar për më 6 janar, pritet të paraprihet nga një tjetër takim në Ukrainë, në nivelin e këshilltarëve të sigurisë të vendeve aleate të Kievit”, shtoi Zelensky në platformën X.

“E parashikojmë për më 3 janar”, tha ai.

Ndërkohë në takimin e zhvilluar të dielën në Florida mes presidentit amerikan Donald Trump dhe presidentit Zelensky për paqen në Ukrainë u hodh ideja e një takimi trepalësh mes Zelensky, Putin dhe Trump në “kohën e duhur”.

Kjo ide u hodh nga presidenti Trump.

Ndërsa Trump është përpjekur t’i japë fund konfliktit përmes samiteve të nivelit të lartë, përfshirë pritjen e Putinit në Alaska në gusht, fokusi i përpjekjeve intensive diplomatike në javët e fundit ka qenë në zgjidhjen e një numri të pikave kyçe të ngërçit./  /Ad.Ab./ a.jor.

The post KIEV – Zelensky: Takim i aleatëve të Ukrainës më 6 janar në Francë appeared first on Agjencia Telegrafike Shqiptare.

PEKIN/TAJPEI, 30 dhjetor /ATSH-DPA/ – Manovrat ushtarake në shkallë të gjerë të Kinës rreth Tajvanit vazhduan sot në ditën e dytë rresht.

Ministria e Mbrojtjes e Tajvanit njoftoi se brenda 24 orëve u regjistruan 130 fluturime të avionëve ushtarakë kinezë rreth ishullit, shifra e dytë më e lartë e shënuar ndonjëherë për këtë periudhë.

Ushtria Çlirimtare Popullore e Kinës kishte paralajmëruar se do të zhvillonte manovra me municion të vërtetë në shtatë zona të caktuara pranë Tajvanit.

Sipas autoriteteve tajvaneze, ushtria kineze lëshoi sot 27 raketa nga provinca Fujian në  mëngjes dhe pasdite.

”Disa nga raketat ranë brenda zonës së vazhdueshme detare prej 24 miljesh të Tajvanit, por mbetën jashtë ujërave territoriale prej 12 miljesh”, thanë zyrtarët në Tajpei.

Ndërkohë, dhjetëra avionë kinezë kaluan vijën e mesit të Ngushticës së Tajvanit dhe hynë në hapësirën ajrore të ishullit.

Ministria e Mbrojtjes shtoi se edhe anije të shumta kineze iu afruan ose hynë në ujërat e kufizuara.

Forcat e armatosura të Tajvanit monitoruan situatën dhe reaguan përmes forcave të përbashkëta dhe sistemeve mbrojtëse.

Pekini e konsideron Tajvanin pjesë të territorit të tij dhe ka deklaruar vazhdimisht se synon ta vendosë nën kontroll, nëse është e nevojshme edhe me forcë ushtarake. Ishulli qeveriset në mënyrë demokratike prej dekadash./  /Ad.Ab./ a.jor.

The post TAJVAN – Tajpei: Kina ka lëshuar 27 raketa kundër ishullit appeared first on Agjencia Telegrafike Shqiptare.